12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 PEDRO

1

1 Ine Simón Pedro, Jesukirito aneburatu, ainataba tane. Yatu kamonuka nome abanae. Nome abakitane jakutai amoara uriraja. Jesukirito tai Kario, kaobojona Aibajukatu tane. Tai nomeraja. Jesukirito nomeraja jame oko nome abaya. 2 Yatu Dio yaorane naminaya. Kairamo Jesú yaorane nami-naya. Yatu tatuma naminayame tatuma aobojona ayakara are suatana yatu moakunarai. Are suatana inareraja tane yatu aba-kunarai. 3 Dio taeraja jame oko obojona jiro jamejerei kamoae. Oko Dio yatomanetemejerei kamoae. Tatuma isia kokotuka kamoae. Dio airamotiji kayejebuae. Anona yakeraja jame kayejebuae. Oko Dio yaorane naminamejerei kayejebuae. 4 Anona kaika aribu kamoae. Aribu jakutai uriraja, amoara uriraja tane. Ribu kamoae Dio aobojona yatu aobojona tane ejobamejerei. Obojona asirajasi aobojona raina asiraja ejobonae. Dio ribu kamoae yatu raina aobojona asirajasi ekumo ejobamejerei. 5 Tiame yaorane nonakitane ja. Nome abaitane yakeraja nonakitane ja. Yakeraja nonaitane musaberaja ejobakitane ja. 6 Musaberaja ejobaitane oriaobojona yaorokitane ja. Oriyaoroitane taeratakitane ja. Taerataitane Dio yatomanetekitane ja. 7 Yatomaneteitane oriwarao oriyaorokitane ja. Oriyaoroitane oriobonokitane ja. 8 Tametane nonakitane ja. Tane irakitane ja. Tametane nona-yame yatu anona amoara ekiraja ejobonaja. Yatu Kairamo Jesukirito yaorane naminane yatu amoara ekiraja ejobonaja. 9 Tiarone tametane nonanaja jakutai tai mujasi monuka. Utiraja minaja. Dio taisi aobojona asirajasi berearone emoniae. 10 Tiame, mawarao, Dio yatu yejebuajakutaisi yaorane nami-nakotu. Dio yatu mibune nisanajakutaisi yaorane naminakotu. Yatu taisi yaorane naminaitane are nakanaja. 11 Kairamo Jesukirito kaobojona Aibajukatu jakutai arujuna rujate are airamo takitane. Arujuna rujakore yatu yaorane naminaitane tata yatu yakeraja yarute. Amoara abanaka yarute. 12 Tiame are yatu aobojona tata nakamejereaine. Yatu nami-nayarone yatu aobojona tata nakamejereaine. Yatu ribu nomeraja ama jakutaisi eku taerajarone yatu aobojona tata nakamejereaine. 13 Ine mate riko jakore yatu reirikitane masaba yakera. 14 Mai-ramo Jesukirito ine rubujira wabakitane jakutaisi menokoae. 15 Ine are yaorane nonatine. Mawaba nokabuka yatu aobojona are ribu eku nakamejerei nonatine. 16 Oko Kairamo Jesukirito isia yatu inaminae. Taisi ajarata isia anao isia tane inaminaeko. Kainamina reana. Kakwa ekumoana. Oko kamu isia Airamo tane ejobakore taisi miae. 17 Dio Karima jakutai Jesú airamo tane abanae. Raomata tane abanae. Abayakore miaeko. Ajakajoko jokeraja jakutaisiatamo Dio ribunae: Tamaja Mauka ine obonoyakutai. Tai maobojona ekuwitu, tae. (Mat. 17:5 Mar. 9:7 Luc. 9:35) 18 Oko Airamo iamo naruaeko jotakwa yakerajasiata. Tiame najamutuatamo ribiakore nokoaeko. 19 Tai ribu taeraja. Tiarone atae ribu taerajawitu ja. Tai ribu Dioatukamo Dio kware arewaramo rewarajakutai. Ribu jakutai abije monuka. Abije imajana eku yi tia. Mate jokomoana jakore are yi tia. Jokoyakore jokona akura ejobate yatu akobe sinajarakitane. Tiame yatu ribu eku abakore yakerakuna. 20 Tiarone wajiabara tamajasi naminakotu. Ribu Dioatukamo Dio kware arewaramo jabatajakutai waraowitu taisi yaorane naminakomoni. 21 Ebe Dio kware arewaramo oriaobojona isiawitu rewaranatanae. Tiarone tatuma Dio saba emo abánae tiaja. Dio Amejokojira Yakerajawitu tatuma inaminakore rewarae.

2

1 Tiarone ateje Judiotuma kawanamo Dio kware arewaramo tane oritoanae. Taisi monuka yatu kawanamo inaminamo tane oritoate. Tatuma rijisane inamina emo jakutaisi inaminaya. Arotu tatuma amoara abane ejeronajakutai tatuma taisi isia rewaraya: Tai Arotuana, tia. Tiame Dio tatuma rubujira iekorate. 2 Warao eraja tatuma anona asirajawitu, nona eobo kwarika jakutaisi eku nonate. Dio ajojisi nomerajarone tatuma aobojona jojisi isia asiraja ribate. 3 Burata obonoyaja aribu tona isia yatu aburata konaria. Tiame amena Dio tatuma abanae sanamata saba. Kware majabanaka tatuma ekorate. 4 Ateje Dio ainatabatuma asiraja nonakore Dio tatuma aobojona berenatanae. Tiarone are totoira eku toanae. Imajana eku iabanae. Tata karena isia koyánae tiaja ja. Dio tatuma aribu mate nome toakitane ja. 5 Dio warao ateje jakutaisi aobojona berenatanae. Tiarone joiraira inatabae warao Dio ayatomanete-moana jakutai muanamejerei. Dio Noewitu waba jekemejereae. Noé awarao mojoabasi kware manamo isiko wabanatanae. Noé jakutai ribu nomeraja arewaratu. 6 Dio janokoina Sodoma jano-koina Gomorra ekoramejereae. Erokunae. Erokakore jekunu ajuju tane bajinae. Tane nonae Dio ayatomanetemoana nokabuka ejoboyakutai tatuma isia nokone tatuma sitanaka jamejerei. 7 Tiarone Dio Lot ejeronae Sodoma ekumo. Lot jakutai nibora nomeraja. Lot tatuma anona asirajawitu eobo kwarika jakutaisi mijaja ekumoniraja bajinae. 8 Tamaja nibora nomeraja tatuma kawanaya ubae. Tatuma anona kajotabu ekuana jakutaisi nokone mine tane ya kokotukanea aobojona ekumonirajawitu bajinaeyama. Taisi aobojona nomeraja. 9 Airamo Dio yatomanetemo jakutaisi ejerokitane naminaya. Ayakara mitane ejerokitane naminaya. Asirajasi anonamo ribu nome toakitane aya saba abakitane naminaya sanamata mimejerei. 10 Tatusebeaja, nibosebeaja tane oriaobojona asirajasi eku abayakutai Dio tatuma wajiabara isanamatate. Airamotuma aribu tainayakutai Dio tatuma wajiabara isanamatate. Tatuma aobojona taeraja. Oriaobojonaya nonaya. Airamotuma isia asiraja ribakitane retanaja. 11 Tiarone Dio ainataba tanaja. Ainataba jakutaisi ajarata waraoto ajarata kwarika. Ainataba jakutaisi ajara taeraja waraoto ajara taerajasi kwarika. Kwarikarone tatuma Airamo amujaba airamotuma isia asiraja ribakitane retaya. 12 Asiraja anonamo romu monuka aobojona ekira. Aobojona are jakutaisi eku ubaya. Romu monuka jarako tane rijawaraya. Namejerei rijawaraya. Naminanaja jakutaisi isia asiraja ribia. Asiraja nonayakutai nona taisi isiajase muanate. 13 Tatuma orianona nomerajena jakutaisi amoara nojote. Are oriwakakitane tatuma aobojona ekuwitu. Yatu isiko oriwaka-yarone tatuma tomaneraja nonaya. Asiraja nonaya. Oriaobojona asirajasi eku oriwakaya. 14 Tirasi mine are obonoya. Asiraja nonakitane wakutanaja. Aobojona taerena jakutaisi imasibune konaria. Raisama aunu-kamo are obonoya. Tatumasike yajoátae tiaja. 15 Jojisi nome-rajasi ekumo mumoni narune rijánae tiaja naria. Tatuma Dio kware arewaratu Balaam Beor auka jakutaisi sitaya. Balaam asiraja nonakitane jakutaisi amoara kanatakitane obonoae. 16 Takore buro ribunaka jajarone tai waraoto aribu isia ribiaja niborama anona Dio aribu riboto jakutaisi sabajiae. Anona bure jakutaisi etu-warae. 17 Tamaja warao asiraja anonamo jakutai jo ejobonoko nawa-jánae tiaja monuka. Tatuma naja ebonaka ajaka ebe jakayaku-taisi monuka. Dio tane abanae tatuma imajanawitu eku are saba bajemejerei. 18 Tatuma aribu taeraja monuka tiarone amoara ekira. Warao kawanamo nomewitu asirajasi nonakitane iabanae. Iabanaerone emo inabajimo jakutai tatuma are asiraja nonamejerea. Obojona are jakutaisi isia, nona eobo kwarika nona asirajawitu jakutaisi isia tane asiraja nonamejerea. 19 Tatuma nona asirajasi aneburone eobo isia ribia: Yatu jerónae tiaja bajete, tia. Amojeku bajiakutai taisi anebu tane bajia. 20 Kairamo Jesukirito Kejerotu jakutai taisi naminayakutai yakeraja bajia. Naminane raina aobojona ekumo ejobonae. Ama atanejese ebe jakutaisi eku bebene asiraja kwarika ejoboya. Ebe jakutai atanejese tatuma kwarikakore asiraja kwarika ejoboya. 21 Tatuma jojisi nomeraja jakutaisi naminanaja jakore asiraja jakuna. Tiarone jojisi naminaerone kajotabu yakeraja tatuma móae tiaja jakutai taisi emo narukore asirajawitu. 22 Tatuma isia reiri nomeraja ja. Ama taisi eku nakae. Reiri tametane ribia: Beoro najorone erokoitane ekiajase najoroya, tia. (Rei. 26:11) Iburejubaka inakoaerone are jobotoboto eku baribaria, tia.

3

1 Mawarao, ine obonoyakutai, tamaja makarata nokamo. Karata manamo yatu saba jabataine. Karata reko eku yatu reiriaine yakeraja obonobumejerei. 2 Dio kware arewaramo yakeraja ebe jakutaisi aribu isia obonobukotu. Kairamo, Kaobojona Aibajukatu tane jakutai taisi ainatabatuma oko jakutai Airamo akajotabu yatu inaminae. Akajotabu isia obonobukotu. 3 Wajiabara tamajasi naminakotu: Ya ayajuata warao naone ribu yakerajasi ekotubute. Oriaobojona asirajasi eku abate. 4 Reno-kote: Ribu jayama Airamo anao isia. Airamo kasaba? Raina ajiro-metukamo kokotuka are monukajase bajia. Kanobotuma awabe-tukamo kokotuka monukajase bajia, tate. 5 Tiarone tamajasi nami-nakitane obononaja. Atejeatukamo najamutu ja. Dio aribia raina jonimo ejobane irae. Raina nojaba autia bajia. 6 Raina ebe jakutai Dio taisi iekoronae joiraira isia. 7 Tiarone najamutu ama jakutai, raina ama jakutai tane Dio oriaribia orabanae jekunu saba. Ribu nome toakitane jakutaisi aya eku erokate. Dio yatomanetenaja jakutaisi iekoraitane erokate. 8 Mawarao, ine yatu obonoya. Tamaja ribu emoninaka jakotu: Airamo saba ya jisaka inawaja sinarijaira jisaka monuka. Ina-waja sinarijaira jisaka ya jisaka monuka. 9 Kawanamo ribia: Airamo oriaribu eku mate abanaja, tia. Taneana. Airamo kaya-wakaya. Jisakarakate rijamejerenaja. Kokotuka aobojona ibare-mejerea. 10 Tiarone eobo Airamo asinarija yawakanaja jakore eku nakate. Biterijisa imaya naoyakutai taisi monuka naote. Takore kwana-witu kuitayaja najamutu ekorate. Ajaka jekunu ebe ekorate. Raina ekoroyaja, eku jakutaisi isiko kokotuka ekorate. 11 Kokotuka tametane ejujute jame yatu yakerajawitu nona-kuna, yakerajawitu Dio yatomanetekuna. 12 Dio asinarija anao yawakakotu. Rubujira naomejerei nonakotu. Tai ya eku naja-mutu jekunu ebe ekorate. Ajaka jekunu ebe jotate. 13 Tiarone Dio ribunae: Najamutu jiro nonatine. Raina jiro nonate, tae. Oko taisi yawakayaoko. Taisi eku kokotuka nomeraja jate. 14 Mawarao ine obonoyakutai, Dio tamajasi nonamejerei yatu yawakaya. Yawakayaja yaorane nonakotu inareraja bajekitane. Dio naokore yatu aobojona anana ibásae tiaja bajinaka jamejerei nonakotu. Yatu aobojona asiraja ekirakitane nonakotu. 15 Kai-ramo yawakaya waraoto aobojona ibajukakitane. Taisi nami-nakotu. Karaje Pablo oko obonoyakutai tai ribu monukajase jabatae. Dio Pablo musaberaja tane abanae. Musaberakutaisi kaika yatu saba jabatae. 16 Akarata kokotuka eku tamaja ribu isia jabatae. Tiarone akarata kawanamo moniraja naminaya. Eobo musaberena jakutai, aobojona taerena jakutai tane akarata aribu ikasia. Jabataja akari eobo jakutaisi ikasia. Taisi monuka Pablo ajabata ikasia. Jabataja ikasiame Dio tatuma iekorate. 17 Mawarao ine obonoyakutai, tamaja mate nonamoana jakore yatu naminaya. Naminayame oriyaorokotu. Tanaja jakore asiraja anonamo aribu nomeana isia yatu emo iwarate. Takore yatu taerajarone nakate. 18 Tiarone Kairamo kaobojona Aibajukatu Jesukirito jakutai taisi suatana naminakotu. Aobojona ayakara eku nariaja suatana taisi eku irakotu. Tai are Airamo ja. Are Airamo tane bajekunarai. Amén.