2 JUAN
11 Ine iramo jakutai karata jabataya. Rakoi, jisaba jabatayaine. Dio jimibune jinisanae. Jinobotomo saba jabatayaine. Ine nomewitu yatu obonoya. Inewituana. Eobo kokotuka ribu nome naminayakutai tatumarakate yatu obonoya. 2 Ribu nome jakutai kaobojona eku ja. Are kaobojona eku jate. Ribu nome jakutaisi aobojona yatu obonoyaine. 3 Dio Rima jakutai, Airamo Jesu-kirito jakutai tane, tatuma oriaobojona ayakara yatu moate. Jesu-kirito jakutai tai Rimasi Auka. Tatuma akobe kaisia ajerate. Tatuma inareraja tane kabate. Tatuma nomeraja jame kaobo-noyame tane, tametane nonate. 4 Jinobotomo kawanamo ribu nome eku kujuyame masaba yakerajawitu ejobonae. Oko ribu nome eku kujumejerei Rima tametane kakajotabuae. 5 Rakoi, ama jiebiaine: Oriobonoki. Ori-obonokitane isia ine jabatayakutai tai kajotabu jiroana. Kajotabu awajiabarayatukamo jakutai, tai. 6 Obonokitane jakutai Dio akajotabutuma eku abakitane. Awajiabarayatukamo kajotabu yatu moae obonoyaja eku kujumejerei. 7 Imasibumo eraja raina ekia kujuya. Imasibumo jakutai Jesukirito warao tane naonatanae tane ribia. Tane ribiakutai tai imasibutuwitu, Kirito riboto tane. 8 Yatu tatuma aribu nokote-rate, yatu ayaota amoara rijanaka jamejerei. Yatu ayaota amoara kaikawitu nojokitane ja. 9 Kirito ainamina riboto nonane emo nabajiakutai tai Dio ekira. Tiarone Kirito ainamina eku abayakutai taisike Dio Rima ja, Dio Auka ja tane. 10 Takore jisaka yatuata nabakane tamaja inamina eku abanaja jakore yatu ajanoko eku etuwaranaka jakotu. Isiarakate yakerara abanaka jakotu. 11 Isia yakerara abayakutai anona asirajasi yajorabaya. 12 Mate maribu eraja ja yatu saba rewarakitane. Tiarone taisi isia karata jabatakitane obononajine. Tiame yatuata narukitane yawakayaine yatuwitu isiko rewarakitane. Tane jakore kaekei kaikawitu ejobate. 13 Jirajia anobotomo jiisia yakerara abaubia. Dio jirajiarakate mibune nisanae. Amén.