2 CORINTO

¹ Ine Pablo karata jabatayaine. Dio aobojona Jesukirito aina-taba tane mabanae. Ine raka Timoteo isiko karata jaba-tayaine. Dio aikeresia Corinto tata jakutaisi saba jabatayaine. Ina Acaya kokotukanea arao Dio saba emo abánae tiakutai tatuma kokotuka sabarakate jabatayaine. ² Dio Karima jakutai Kairamo Jesukirito jakutai tane oriaobojona ayakara yatu moakunarai. Yatu inareraja tane abakunarai. ³ Dio jakutai tai Kairamo Jesukirito Ario, Arima tane. Taisi isia yakeraja jae tane ribaki. Karimatiji akobe kaisia ajera. Diotiji kakobe etuwaraya. ⁴ Oko kokotukanea sanamatayakore Dio kakobe etuwaraya. Dio ketuwaraya raisa sanamatayakore oko taisi akobe etuwaramejerei. Dio kakobe etuwarayakutai taisi eku okorakate raisama akobe etuwarayaoko. ⁵ Kirito sanamataya-kutai taisi monuka oko kwana sanamataya. Oko kwana sana-matayame Kirito kwana kasanetaya kakobe etuwarayaja. ⁶ Tia-me oko sanamataya yatu akobe tuwaramejerei. Oko sanamataya Dio yatu aobojona ibajukamejerei. Dio kakobe etuwaraya yatu akobe tuwaramejerei, yatu aobojona bajukamejerei tane. Tiame yaturakate kamonuka taeratayaja sanamatakitane ja. ⁷ Yatu taeraja tane bajete tane yatu isia kayawaka taeraja ja. Yatu kamonuka sanamatayame kamonuka Dio yatu akobe etuwarate. ⁸ Oko ina Asia tata sanamatayakutai taisi isia yatu namina-naka bajemejerenajaoko. Kwana sanamatajame kajarata ekoronae. Wabaturuaeko. ⁹ Dio waba saba kabanae tanabaeko. Tane kaba-nae oko wite kajarata eku abanaka jamejerei tiarone Dio ajarata eku abamejerei. Diosike ajarata ja waba enominakitane. ¹⁰ Dio waba urirajasi ekumo kejeronae wabanaka jamejerei. Are kejeroya. Atanejese are kejerote tane ribiaoko. ¹¹ Yatu kasanetayaja ka-kware kwai ribiaja ebia. Warao erajasi anobeanaka okoata nabakanae. Taisi aobojona warao eraja Dio yakeraja jae tane ribate. Kanona isiarakate Dio yakeraja jae tane ribate. ¹² Kaobojona tametane ja. Oko raina eku Dio aribu eku aba-naeko, yakeraja nonaeko tane. Yatu amujaba monukajase nona-yaja kwarika nonaeko. Tiame masaba yakera. Oko waraoto ana-mina isia nonanatanae tiarone Dio oriaobojona ayakara isia kasa-netae. ¹³ Ribu teribukitane yatu saba yakerakutai taisi jabataya-oko. Ribu nokokitane yatu saba yakerakutai taisi jabatayaoko. Atae ribu raisama jabatanajaoko. Yatu ama sanuka nokoya. Tia-rone yaorane yatu nokomejereaine. ¹⁴ Oko yatu kwarika noko-mejerea Kairamo Jesú aya eku oko yatu aobojona eku bajeki-tane. Yatu kaobojona eku bajekitane jakutaisi monuka oko yatu aobojona eku bajekitane. ¹⁵ Maobojona tane abayaja wajiabara yatuata narukitane obonoaine. Ine narukore yatu manata yakeraja bajete. ¹⁶ Ine Macedonieta nariaja yatuata nabakakuine. Tatamo naoyaja atanejese yatuata nabakakuine. Takore yatu masanetakuna ine Judeayata nabakamejerei. ¹⁷ Ine narukitane obonone yaorane obonobunatanaera? Ine narukitane obonobiaja yawatanuka obono-biara? Ine jisaka tane nome narutine, nomeana narunajine tane tatera? ¹⁸ Oko tanaja. Oko yatu isia jisaka tane nome, nomeana tane ribunaja. Dio taisi naminaya. ¹⁹ Ine, Silvano, Timoteo tane Kirito Jesú isia yatu saba rewaraeko. Tai Dio Auka. Taisike jisaka tane nome, nomeana tane ribunatanae. Taisi isia rewarajakutai taisike nome. ²⁰ Dio ribu moajakutai Jesú taisi eku nomeraja nakae. Tiame Jesukirito aobojona oko Amén tane ribiaoko Dio airamo tane ejobamejerei. ²¹ Diowitu Kirito eku taeraja tane kabaya, yatu abaya tane. Toi isia yanajone orisaba emo abayakutaisi monuka orisaba emo kabanae. ²² Asinarija kaisia abanae. Amejokojira kaobojona eku abanae kamoakitane jakutaisi awajiabara. ²³ Dio maobojona naminaya. Ine yatuata narunatanaine yatu sabajinaka jakitane. ²⁴ Oko yatu isia tametane nome abakitane ja tane ribakitane obononaja. Yatu nome abayaja taeraja ja rijana. Tiarone oko yatu isiko yaotaya yatu kwarika ekeiraja ejo-bamejerei.

¹ Ine maobojona tametane abanaine rijana. Yatu ekumoniraja tane abakitane narunajine. ² Ine yatu ekumoniraja tane abakore sina ekeiraja tane mabate? Yatujase mabakuna tiarone yatu ekumoniraja jate. ³ Tiame yatu saba karata jabataine. Yatu ekumoniraja tane mabamejerei ine narukitane obononatanaine. Yatu ekeiraja tane mabakuna. Ine ekeiraja jakore yatu kokotuka ekeiraja jakuna, tiaine. ⁴ Ine karata jabatayaja maobonobu eraja ejobonae. Makobe ajeraja ejobonae. Onaine. Yatu ekumoniraja tane abakitane jabatanatanaine. Tiarone ine yatu kwana obono-yakutai taisi naminamejerei jabataine. ⁵ Jisaka ekumoniraja tane kabanae. Inewitu ekumoniraja tane mabanatanae tiarone yatu kokotuka monuka ekumoniraja tane abanae. Yatu kokotuka monuka tiaine yatu sabajinaka jaki-tane. ⁶ Yatu eraja taisi aribu nome toane emo abanae. Atae ekira rijana. ⁷ Ama taisi kware abanaka yatu oriaobojona iabakotu. Taisi akobe etuwarakotu. Tanaja jakore tai ekumonirajawitu bajene suatana Dio aribu eku narukitane obononatate. ⁸ Atane-jese yatu reiriaine yatu taisi obonoyakutai anome isia taisi inami-nakotu. ⁹ Tiame karata yatu saba jabataine. Yatu ayakara miki-tane jabataine. Maribu kokotuka eku abakitane yatu saba yakera tai tane jabataine. ¹⁰ Yatu raisama kware abanaka yatu aobojona iabakore inerakate taisi kware abanaka maobojona iabaya. Ni-bora jakutai maisiko asiraja nonanatanae. Nonanatanaerone ine yatu isia obonobiaja taisi kware abanaka maobojona iabaya, tiaine. Kirito amujaba tane ribiaine. ¹¹ Ine tane ribiaine Satanás kakwarikanaka jamejerei. Satanás imasibiaja nonayakutai taisi naminayaoko. ¹² Ine janokoina Troas tata nabakanaine rewara yakeraja Kirito isia jakutaisi rewarakitane. Nabakakore yakeraja ejobonae ine Airamo aribia yaotamejerei. ¹³ Tiarone ine raka Tito mina-tanajame maobonobu eraja ejobonae. Tiame nariaine abane ina Macedonia tata naruaine. ¹⁴ Tiarone Dio yakeraja jae tane ribiaine. Ateje orikuba akanatamo amojoju oriiamo abane konaruae. Taisi monuka Dio Kirito Jesú iamo kabanae kakonarumejerei. Dio aribu kaisia inaminamejerea. Ajonaba monuka kokotukanea kayaya. ¹⁵ Ateje warao jonaba Dio saba erokunae. Taisi monuka Kirito jonaba tane kamoaya Dio saba. Jonaba jakutaisi ajonaba kokotukanea kayaya. Obojona bajukayakutaisi kawanaya kayaya. Rijaya-kutaisi kawanaya kayaya tane. ¹⁶ Jonaba jakutai rijayakutaisi saba waba tane ejoboya. Tiarone obojona bajukayakutaisi saba obojona jiro tane ejoboya. Sina jonaba tane bajekitane yakera? ¹⁷ Oko yakera. Eobo Dio aribu kambiatane rewaraya. Oko tatuma monukena. Anome rewarayaoko. Dio kainatabae. Dio amujaba rewarayaoko. Kirito anebu tane rewarayaoko.

¹ Oko tametane ribakore yatu ribate tai: Atanejese oriisia oko yakeraja tane ribia, tate tai. Eobo emo narukitane karata konaria eobo tatuma naminamejerei. Oko karata yatu saba konarukitane jate? O karata yatu ebukitane jatera? ² Ebunaja. Yatusike kakarata. Kaobojona eku jabátae tiaja ja kokotuka taisi naminane teribamejerei. ³ Kirito jakutai yatu karata tane abanae. Oko karata akonarumo. Karata jabatanoko isia jabatanatanae tiarone Dio riko jakutaisi Amejokojira isia jabatae. Joyo arai jabatanatanae. Tiarone obojona eku jabatae. ⁴ Oko Kirito aobojona Dio isia nome abayame tametane ribia-oko. ⁵ Oko jarata ekira tamaja yaota nonakitane. Dio kajara taeraja tane abaya tamajasi nonamejerei. ⁶ Dio ajute jiro nonae. Nonaitane kajara taeraja abanae ajute jiro anebu tane ejobame-jerei. Ajute jiro jakutai kajotabu akarata isimoana. Tai obojona jiro Dio Amejokojira isimo. Kajotabu akarata waba saba abaya. Tiarone Mejokojira jakutai are ubamejerei abaya. ⁷ Kajotabu joyobasa arai jabatajakutai warao waba saba aba-yarone Dio ajokoma isiko naoae. Moisés amujororakate jokeraja ejobonae. Jokoma taeratakitane sabenarone jokeraja jame Israel-tuma Moisés amu mikomoni ejobonae. ⁸ Amasike Mejokojira aribu jokoma kwarika ja. ⁹ Emo ribatine. Kajotabu sanamata saba abayarone ajokoma yakera. Ama ribu jiro ribia: Dio obojona enometaya, tia. Taisike ajokoma yakerajawitu. ¹⁰ Kajotabu ebe jakutai tai yakera. Tiarone amoara ekiraja monuka. Ribu ama jakutai yakerajawitu jame amoara uriraja ja. ¹¹ Ebe jakutai taeramejerei moanatanae. Tiarone yakera. Ama jakutai are taera-mejerei moae. Tiame yakerajawitu. ¹² Ribu are taerate jame oko retanaka rewaraya. ¹³ Oko Moisés monuka nonanaja. Ateje Moisés jiaka isia oriamujoro makanae-yama. Amujoro ajoko taeratakitane sabena. Israeltuma tane minaka jamejerei Moisés oriamujoro makanaeyama. ¹⁴ Tatuma nokonatanae. Ama ya eku ajute nobo akarata teribukore aobo-jona mate makánae tiaja ja. Warao Kirito eku jakore aobojona amaka ejeroya. Kirito ekuana jakore ejeronaja. ¹⁵ Israeltuma ama ya eku Moisés akarata teribukore aobojona makánae tiaja ja. ¹⁶ Tiarone warao Airamo sabasabaya oriaobojona ibarekore aobojona amaka ejeroya. ¹⁷ Airamo tiakutai tai Mejokojira. Airamo Amejokojira jame warao jerónae tiaja bajia. ¹⁸ Oko kokotuka rijana kamu amaka jerónae tiaja bajia. Oko musebuji eku mijaja monuka Airamo ayakara amejokoji mijaja bajia. Oko taisi mijaja uria uria irayaja Airamo monuka ejoboyajaoko.

¹ Dio kaisia akobe ajerame tamaja yaota kamoae. Kamoajame oko yawakanaka bajinaja. ² Oko rijisane nonakitane jaku-taisi tainae. Tomaneraja jakutai taisi tainae. Oko eobo imasibu-naja, Dio aribu kambiatanaja tane. Nome jakutai taisi rewara-yaoko. Oko Dio amujaba ubaya warao kokotuka yaorane kana-minamejerei. ³ Rewara yakeraja oko rewarayakutai tai eobo saba rijísae tiaja ja tai. Rijayakutaisi sabawitu rijísae tiaja ja. ⁴ Ta-maja raina airamo nome abamoana aobojona sijakae jokoma tatuma sinajarayakutai taisi minaka jamejerei. Jokoma jakutai tai rewara yakeraja Kirito yakerajasi isia. Kirito jakutai tai Dio Amejokojiwitu. ⁵ Oko rewarayaja oko airamo, tane rewaranaja. Jesukiritosike Airamo tane rewarayaoko. Oko rijana yatu akajo-tabu Jesú obonoyame, tane rewarayaoko. ⁶ Dio abije imajana eku sinajaramejereae. Ama Dio jakutai abije kaobojona eku sina-jarae. Sinajarae oko Jesukirito amu mijaja Dio ayakara namina-mejerei. ⁷ Tamaja Dio kamoajakutai amoara uriraja ja. Katejo namu jobotonona monukarone taisi eku ja. Tamaja jarata urirajawitu jakutai kajaratena. Tai Dio ajarata. Warao taisi naminamejerei Dio tametane abanae. ⁸ Nona kokotuka kateoaya tiarone kaejobonoko ja. Kaobonobu eraja ejoboya tiarone yawakanaka bajinaja. ⁹ Eobo kaiyajubia tiarone Dio komonaja. Eobo joika kajarajia tiarone kaiekoronaja. ¹⁰ Kokotukanea oko katejo eku Jesú awaba konaria Jesú obojona jiro kamoajakutai eobo taisi mimejerei. ¹¹ Oko mate riko jakore Jesú anebutiji wabakitane jawanerarone waba amojeku oriabayaoko. Tane jaoko obojona jiro Jesú kamoayakutai katejo ekoreakutaisi eku mimejerei. ¹² Ta-kore waba jakutai keku yaotaya. Tiarone obojona jiro jakutai yatu eku yaotaya. ¹³ Jabataja taisi isia ribia: Ine nome abanajame rewaraine, tia. (Rok. 116:10) Okorakate jabatatu monuka nome abayaja bajia. Nome abayame rewarayaoko. ¹⁴ Kairamo Jesú wabaerone Dio taisi enomininae. Jesú isiko okorakate kenominate. Taisi naminayaoko. Dio yatu isiko kakonarute oriamujaba abakitane. Taisi naminayaoko. ¹⁵ Oko sanamata kwaeabayakutai yatu saba kokotuka kwaeabaya. Warao eraja Dio aobojona ayakara nojokore eraja Dio isia yakeraja jae tane ribate, Dio airamo tane bajemejerei. ¹⁶ Tiame oko yawakanaka bajinaja. Ya kokotukanea katejo ekorea tiarone kaobojona are bajukaya. ¹⁷ Oko ama sanamataya-kutai tai sanamata urirajena monuka. Rubujira kwaeabate. Oko sanamatayame nokabuka yakerajawitu bajeteko. Yakerajawitu bajekitane jakutai tai urirajawitu. Tai are saba. ¹⁸ Ama mijakutai taisi eku abanaja oko. Minaja jakutai taisi eku abayaoko. Ama mijakutai tai taeratanaja. Tiarone minaja jakutai tai are taeratate.

¹ Katejo raina eku jakutai janoko taerajena monuka. Katejo ekorakore Dio janoko kasaba iyakaratae. Najamutuata ja. Taisike are ekoronaja. Tai waraoto anonena. Taisi naminayaoko. ² Oko mate katejo eku obubiaja ubaya. Kajanoko najamutuata jakutaisi keorisabamejerei kwana obonoyaoko. ³ Keorisabakore waraojoro bajinatateko. ⁴ Oko mate katejo eku ubayaja sanamatayaja tane obubia. Katejo nobo jiaka monuka jiwara-mejerenajaoko. Tiarone katejo nobo kwarea tejo jiro jiaka monuka keorisabamejereaoko. Tejo jiro jiaka monuka tejo waba-yakutaisi kwarea eorisabakore obojona jiro tane bajia. ⁵ Kaiya-karatajakutai tai Dio. Dio kaiyakaratae kainamonikitane. Amejo-kojira kamoae. Oko mate nojokitane jakutaisi awajiabara tane kamoae. ⁶ Tiame oko retanaka suatana nome abaya. Oko mate katejo eku ubayakore mate kajanokoata nabakamoana. Taisi naminayaoko. Bajuka ribate: Oko mate Airamoata nabakamoana. ⁷ Tiame oko mijakutaisi eku ubanaja tiarone nome abayaja ubaya. ⁸ Amasike retanaka suatana nome abaya. Oko katejo iabakuna eku ubanaka jakitane. Oko Airamoata narukuna isiko ubakitane. ⁹ Tiame oko Airamo aobojona eku abakitane najabiaoko. Mate tejo eku jaja aobojona eku abaya. Tata narunerakate are aobojona eku abate. ¹⁰ Oko kokotuka Kirito amujaba nabakakitane ja karibu nome toamejerei. Mate katejo jaja nonajakutai taisi kaika nojoteko. Kanona yakeraja o asira tai. Tiame kanona kaika nojoteko. ¹¹ Takore oko Airamo nojane warao eobo saba kwana rewa-raya nome abamejerei. Diosike kaobojona yaorane naminaya. Yaturakate kanaminaya tane ribiaoko. ¹² Oko yatu isia atanejese oriisia oko yakera tane ribunaja. Eobo anona aobojona oriisia oko yakera tane ribia, aobojona naminanajarone. Oko tanaja. Yatu kaobojona naminamejerea. Kaobojona naminane eobo riboto ribakitane yatu naminate. Yatu ribate: Tatumasike yakera, tate. ¹³ Oko burera bajama? Bure jakore Dio saba. Oko bureanara bajama? Bureana jakore yatu saba. ¹⁴ Kirito kaobonoyame aobojona eku abakitane jaoko. Jisaka kokotuka kware wabae. Taisi naminayaoko. Tiame kokotuka wabae. ¹⁵ Kirito warao kokotuka kware wabae tatuma mate riko jaja oriaobojona eku ubanaka jamejerei. Tiarone tatuma kware wabane nomininajakutai taisi aobojona eku ubamejerei wabae. ¹⁶ Tiame oko raina arao monuka eobo isia obonobunaja rijana. Ebe raina arao monuka Kirito isia obonobuaeko. Ama tane tanajaoko. ¹⁷ Warao jisaka Kirito eku jakore tai nonajiro. Ebe jakutai kwaeabanae. Kokotuka jiro tane ejobonae. ¹⁸ Tamaja kokotuka Dio anona. Dio Kirito aobojona oko kaobojona iabamejerea Dio isiko obojona jisaka eku abamejerei. Yaota kamoae eobo Dio aobojona eku abamejerei. ¹⁹ Suatana ribatine. Dio Kirito isia raina araoto aobojona asiraja tatuma kware abanaja. Tiarone Dio raina arao oriaobojona iabamejerea Dio isiko obojona jisaka eku abamejerei. Ribu kamoae eobo saba ribamejerei. Ribane: Obojona iabane Dio isiko obojona jisaka eku abakotu, tamejerei. ²⁰ Tiame Kirito aribia yatuata rewaramo tane naoaeko. Dio yatu ebiakutaisi monuka oko yatu ebia. Oko Kirito aribia ribia: Yatu aobojona iabane Dio isiko obojona jisaka eku abakotu, tia. ²¹ Kiritosike asiraja nonanatanaewitu. Tiarone Dio Kirito asiraja anonatu monuka abanae, kakware. Dio tane abanae kaobojona enometakitane Dio aobojona nome-raja jakutaisi monuka.

¹ Oko Dio isiko yaotamotiji yatu reiria: Ribu Dio aobojona ayakara isia jakutai taisi tainanaka jakotu, tiaoko. ² Jabataja taisi isia ribia: Ya yakerajasi eku jiribu nokoaine. Ya ine obojona ibajukakitane yakerakutaisi eku jisanetaine, tia. (Isa. 49:8) Amasike ya yakeraja. Ama yasike obojona bajukakitane yakera. ³ Oko raisama ebisaba omu esoakanoko abanaja kayaota isia asiraja ribunaka jamejerei. ⁴ Yakeraja nonayaja oko Dio anebu tane inaminakitane obonoyaoko. Tametane inaminaya. Sanama-tayakore, o kanajoro ekirakore o ribu taeraja jakore oko are taeratayaoko. ⁵ Kayewereae. Kemojojutae. Kawerea wiyawiyae. Kwana yaotaeko. Ubanaka yaotaeko. Najoronaka yaotaeko. ⁶ Ka-isia tatuma Dio anebu, tane naminamejereaoko. Tatuma tame-tane kamija. Kanona yakerajasi mija. Oko nome naminayakutaisi mija. Oko yawakayakutaisi mija. Oko yakeraja jakutaisi mija. Oko Dio Amejokojira Yakerajawitu kaika ja jakutaisi mija. Oko obonoyaja kaobojona manamo ekirakutaisi mija. ⁷ Oko nome rewarayakutaisi mija. Dio ajarata kakaika ja jakutaisi mija. Rai-sama isiko kaorikubanoko jakutai nona nomeraja rijana. O raisa kaisiko orikubakitane obonokore tai kaorikubanoko rijana. ⁸ Eobo saba yakerakore raomata tane kabaya. Yakerakore raomatena tane kabaya. Yakerakore kaisia asiraja ribia. Yakerakore kaisia yakeraja ribia. Yakerakore oko imasibutu monuka tane kabaya. Yakerakore nome arewaramo monuka tane kabaya. ⁹ Yakerakore amusabena tane kabaya. Yakerakore amusaba tane kabaya. Are kanakitane obonoya tiarone oko wabanaka are ja. Kayewerea tiarone kananaja. ¹⁰ Oko ekumonirajarone are ekeirajaoko. Oko sanerarone eobo burata arao tane monuka abayaoko. Oko ekirarone kokotuka jaoko. ¹¹ Kawarao Corinto tata jakutai, yatu isia yakeraja ribunaeko. Kaobonobu kokotuka yatu saba rewaraeko. ¹² Kaobonobu jisa-karakate sijakanatanaeko. Tiarone yatu oriaobonobusike sijakae. ¹³ Arima anobotomo ebiakutai taisi monuka yatu ebiaine. Taisi monuka obonobu sijakanaka masaba rewarakotu. ¹⁴ Yatu nome abamo jakutai nome abamoana isiko obojona jisaka eku nakanaka jakotu. Yatu orimonukena. Nomeraja jaku-tai katukane nomerena jakutaisi isiko orimajate? Imajana jakutai katukane abije isiko orimajate? ¹⁵ Kirito katukane Satanás isiko orimajate? Nome abatu jakutai katukane nome abatuana isiko obojona jisaka eku nakate? ¹⁶ Kwai ribunoko Dio saba jakutai katukane diosita ajanoko isiko orimajate? Yatusike janoko Dio riko jakutaisi saba. Diojase ribunae. Ribane: Tatuma kaika ubatine. Kawanaya narutine. Ine Dio jakutai tatuma Ario tane jatine. Tatuma mawarao tane ejobate, tae. (Eze. 37:27) ¹⁷ Tiame atanejese ribunae. Ribane: Airamo ribia: Tatuma kawanamo ejobakotu. Emo jakotu. Masaba wisi jakutaisi torinaka jakotu. Takore yatu etuwaratine. (Isa. 52:11) ¹⁸ Yatu Arima tane ejobatine. Yatu manobotomo nibo, manobotomo tatu tane ejobate. Airamo Taerajawitu jakutai tane ribia, tia, taeyama. (2 Sam. 7:14 Isa.43:6)

¹ Yatu mawarao, ine obonoyakutai. Tamaja ribu jakutai ka-saba. Nona kawanamo katejo asiraja abaya. Kaobojona asi-raja abaya. Asiraja kabayakutai kokotuka webotane oribereki. Dio nojayaja Dio saba emo abánae tiajawitu bajeki. ² Yatu aobojona kaisia iabakotu. Jisakarakate isia asiraja nonanatanaeko. Jisakarakate iasiratanatanaeko. Jisakarakate imasibunatanaeko. ³ Ine tametane ribiarone asiraja yatu kware abanajine. Ine ebe ribunajakutai atanejese taijase ribiaine. Oko yatu obonoyame oko oriaobojona eku jaoko wabakitane o riko bajekitane tane. ⁴ Yatu maobojona eku. Yatu masaba yakera. Dio makobe etuwaraya. Oko kokotukanea sanamatayarone ine ekeirajawitu bajiaine. ⁵ Ina Macedonia tata naruaeko tiarone tatarakate tuwara-komoni oko. Kokotukanea sanamatayaoko. Karibu kwarikaya. Kakobe retaya. ⁶ Tiarone kobe joteraja jakutai Dio taisi etuwa-raya. Tito anao isia Dio kakobe etuwarae. ⁷ Anaowituana tiarone aribu isia kakobe tuwarae. Tito yatuatukamo naone akobe tuwá-rae tiaja naoae. Yatu mamikitane kwana obonoyakutai tai masa-ba rewarae. Yatu ekumoniraja jakutai tai masaba rewarae. Yatu maisia kwana obonobiakutai tai masaba rewarae. Tiame ekeira-jawitu bajinaine. ⁸ Ine karata jabataine yatu saba. Makarata aobojona yatu eku-moniraja bajinae. Asirena. Ebe yatu sanuka ekumoniraja baji-najame asira tane ribunaine. ⁹ Tiarone ama asirena tane ribiaine. Yatu ekumoniraja bajinajame yakera tane ribunajine. Tiarone yatu ekumoniraja jame yatu aobojona ibarinae. Tiame yakera tane ribiaine. Yatu ekumoniraja jame Dio yatu aobojona eku yaotae. Tiame yatu kaobojona asiraja bajinatanae. ¹⁰ Ekumoni Dio isimo jakutai obojona ibaria. Obojona ibajukaya. Tai eku-moni asira tane ribakitane ekira. Tiarone ekumoni raina isimo jakutai taisike wabakitane saba. ¹¹ Yatu ekumonirajarone Dio yatu aobojona eku yaotae. Tiame yatu yakeraja ejobonaeraji! Orikware ribakitane obonobuae. Kwana orijisiae. Retae. Iyaka-ratakitane kwana obonoae. Asiraja anonatu jakutai taisi emo abakitane obonoae. Ama yatu yakeraja nonajame yatu kware abakitane ekirawitu rijana. ¹² Tiame karata jabataine. Asiraja anonatu aobojona jabatanatanaine. Isiko asiraja nonajakutaisi aobojona jabatanatanaine. Yatu aobojona jabataine. Dio amujaba oko yatu obonoya. Yatu taisi naminamejerei jabataine. ¹³ Tiame yatu akobe tuwaraya rijana. Taisi aobojona kakobe tuwarae tiarone Tito aobojonarakate kakobe ekeiraja ejobonae. Yatu kokotuka Tito sanetae ekeiraja bajemejerei. Tiame okorakate ekeiraja bajia. ¹⁴ Tito isia ribunaine Corinto arao kasaba yakera, taine. Nomewitu emo ribunatanaine. Oko are yatu isia nome kokotuka ribiaoko. Taisi monuka Tito isia ribunajakutai nomeraja ejobonae. ¹⁵ Tito yatu ebuajakutai yatu kokotuka jakutaisi eku nonae. Yatu retayaja, tororoyaja tane Tito etuwarae. Tito taisi isia obonobiaja kwarika yatu obonoya. ¹⁶ Ine yatu isia obonobiaja retanaja. Tiame yatu masaba yakera.

¹ Mawarao, ina Macedonia aikeresiatuma eku Dio oriaobojona ayakara isia nonae. Taisi yatu saba rewarakitane obonoyaoko. ² Sanamata uriraja Macedonia araoto ayakara miae. Tiarone tatuma ekeirajawitu bajinae. Tatuma sanerajawiturone burata arao monuka uriraja moaubuae. ³ Ine nome ribiaine. Moakitane tatuma saba yakerakutai taisi moae. Atae kwarika moae. Oriaobojona eku moae. ⁴ Nobeanaka kamoayaja kwana kebuae warao Dio saba emo abánae tiaja Judea tata jakutaisi sanetakitane. ⁵ Oko obonobiakutai taisi kwarika moae tatuma. Wite orimoae. Dio aobojona eku abayaja tatuma Airamo orimoae. Tatukamo kaobojona eku abakitane orimoae. ⁶ Yaturakate yatu aobojona ayakara kaika burata moaubute. Ebe Tito burata orikware toakitane jotananae. Tiame Tito ebuaeko yatuata narune yatu yakeraja moayakutai taisi orikware toamejerei. ⁷ Yatu kokotukanea eobo kwarikaya. Nome abayaja eobo kwarikaya. Inaminayaja eobo kwarikaya. Naminayaja eobo kwarikaya. Sanetakitane obonoyaja eobo kwarikaya. Kaobonoyaja eobo kwarikaya. Rijana sanetakitane buratarakate kwarika moakotu. ⁸ Yatu tametane nonakitane ja tane ribunajine. Eobo yakeraja moakitane jakutai taisi yatu saba rewaraine. Yatu eobo obonoya-kutai tai nome tai tane mikitane obonoyaine. ⁹ Kairamo Jesu-kirito aobojona ayakara jakutai yatu taisi naminaya rijana. Jesú burata aroturone saneraja monuka oriabanae yatu aobojona. Tane oriabanae saneraja monuka jakitane yatu burata arao monuka bajemejerei. ¹⁰ Yatu saba yakeraja ejobate jame ine yatu isia ribatine. Kaje inawaja kwaeabanajakutaisi eku yatu yakeraja moakitane jota-nanae. Moakitanewituana tiarone obonoyaja moaubuae. ¹¹ Sua-tana! Nona riwarakitane. Wajiabara moajakutai taisi monuka moakotu ja jakutaisi moayaja. ¹² Raisama moakitane unukamo uriraja ja tai. O unukamo sanukawitu ja tai. Unukamo ekirarone amojeku jaja jakutai raisama moakitane obonokore Dio saba yakeraja bajia. ¹³ Yatu eobo sanetayame ekiraja bajemejerenajine. ¹⁴ Tiarone kokotuka orijika bajemejereaine. Ama eobo ekira tiarone yatu ja tatuma sanetakitane. Tamatukamo yatu ekirakore tatuma ja jakutaisi isia yatu sanetate. Tametane orijika bajia. ¹⁵ Jabataja taisi isia ribia: Eraja ja jakutai bajinatanae. Sanuka ja jakutai kaikanae, tia. (Ejo. 16:18) ¹⁶ Ine yatu isia obonobia. Titorakate mamonuka yatu isia obonobia. Tiame Dio yakeraja jae tane ribiaine. ¹⁷ Ine Tito yatu-ata narumejerei ribunae. Tiarone Tito amena yatu isia obonobiaja wite oriaobojonaya yatu mikitane naria. ¹⁸ Tito isiko nome abatu raisa inatabayaoko. Ikeresia kokotuka arao taisi isia tamaja yakera tane rewaraya rewara yakerajasi rewarayame. ¹⁹ Atae ribu. Ikeresia arao taisi mibune nisanae. Nobeanaka konarukitane kaiamo narumejereae. Oko tane yaotaya Kairamo Airamo uriraja tane ejobamejerei. Oko yaotaya eobo saneta-kitane obonoyakutaisi emikitane. ²⁰ Oko burata uriraja akarimo moaubukitane ja. Tiame yaotaya eobo kaisia asiraja tane ribunaka jamejerei. ²¹ Nomeraja nonakitane obonoyaoko, Airamo amujaba, waraoto amujaba tane. ²² Tatuma isiko atae nome abatu raisama inatabaya. Eraja tane ayaota ayakara miae. Yakeraja yaotaya. Ama yatu isia retanaja jame kwarika yaotakitane obonoya. ²³ Warao jisaka Tito isia renokote tai. Tamaja sina tai? tate tai. Takore isia ribakotu: Tamaja Pablo ajisaka. Pablo isiko yaotaya yatu sanetakitane, takotu. Eobo isia renokokore ribakotu: Tamatuma ikeresia ainatabatuma. Tatuma Kirito Airamo tane bajemejerea, takotu. ²⁴ Yatu rijana tatuma obonokotu. Obonokotu ikeresia arao yatu obonoyakutaisi naminamejerei. Oko yatu isia ribunajakutai tai nome tane naminamejerei tatuma obonokotu.

¹ Warao Dio saba emo abánae tiaja Judea tata jakutaisi sanetakitane oko burata orikware toaya. Tiarone taisi isia yatu saba jabatakitane ekira rijana. ² Yatu sanetakitane obonoyakutaisi naminayaine rijana. Amena ina Macedonia tata yatu isia rewarakitane masaba yakera. Ina Acaya arao amena sanetakitane iyakarátae tiaja ja. Kaje inawajayatukamo raisama sanetakitane kwana obonoyawitu, tiaine. Macedonia arao yatu isia nokone aobojona nakae raisama sanetakitane. ³ Tiarone ma-warao are inatabaya maribu yatu isia ribunajakutai eko ejobo-naka jamejerei. Nomewitu, maribu eku yatu raisama sanetaki-tane iyakarátae tiaja ja rijana. ⁴ Macedonia arao maiamo narute tai. Narukore yatu iyakarátae tiajena jate tai. Tane jakore oko yatu isia yakeraja rewarajame tomaneraja bajekuna. Yaturakate tomaneraja bajekuna. ⁵ Tiame mawarao reirikitane obonoaine mebisaba yatuata narumejerei. Yatu ateje burata moakitane obo-noae. Tiame tatuma inatabayaine yatu burata orikware toame-jerei. Takore ine narukore yatu aburata jate rijana. Tametane yatu obonoyakutai moate. Mamo mamo tane nisakitane ekira. ⁶ Tamaja ribu isia obonobukotu. Sanuka namiakutai sanuka arite. Uriraja namiakutai uriraja arite. ⁷ Jisaka jisaka oriaobojona eku moakitane ja. Moaobononajine tane ribunaka jakotu. Mebi-kamo nisaya tane ribunaka jakotu. Ekeiraja moayakutai Dio taisi obonoya. ⁸ Dio ajara taeraja ja oriaobojona ayakara uriraja yatu moakitane. Takore yatu ekirakutaisi saba are jate. Are bajete yatu kokotukanea yakeraja nonayaja sanetamejerei. ⁹ Jabataja taisi isia ribia: Uriraja saneraubiajasi moaubuae. Anona nomeraja are bajia, tia. (Rok. 112:9) ¹⁰ Namumejerei Dio namuna aumu moaya. Najoromejerei Dio najoro moaya. Yatu namuna ekirakutai Dio taisi yatu moate namumejerei. Dio yatu anamuna erirate. Takore yatu anona nomeraja namuna ayakaramata eku monuka eraja arite. ¹¹ Takore yatu kokotukanea uriraja jate uriraja moakitane. Tatukamo yatu moajakutai oko taisi konarukore eobo Dio yakeraja jae tane ribate yatu aobojona. ¹² Yatu warao Dio saba emo abánae tiakutaisi sanetayaja tatuma ekirakutaisi moaya. Tiarone taiwituana. Yatu anona aobojona warao eraja Dio yakeraja jae tane ribia. ¹³ Yatu tatuma sanetayame tatuma yatu Kirito arewara yakeraja eku abaya tane naminate. Tiame Dio airamo tane abate yatu aobojona. Yatu uriraja tatuma moaya. Yatu uriraja nome abamo kokotuka moaya. Tiame tatuma Dio Airamo tane abate yatu aobojona. ¹⁴ Dio aobojona ayakara uriraja yatu eku yaotayakutaisi naminayame tatuma yatu kwana obonoyaja yatu kware kwai ribate. ¹⁵ Dio nobeanaka kamoae. Tiame Dio yakeraja jae tane ribaki. Nobea-naka jakutai amoara urirajawitu jame, isia ribakitane kaobonobu kere tia.

¹ Kirito raoberaja. Tai raisama aribu kwarikanaka nokoya. Ine Pablo yatu ebiaine. Kirito aobojona maribu nokokotu. Yatu kawanamo ribia: Pablo kakaika jaja kayajoto oriabayaja ribia. Tiarone emo jaja kanojanaka ribia, tia. ² Ama-sike ine yatuata nojanaka ribiaja naomejerenaka jakotu. Kawa-namo ribia: Pablotuma tejo aobojona eku nonaya, tia. Ine tatuma ribotakitane ja tai. ³ Nomewitu oko mate tejo eku. Tiarone oko tejo aobojona orikubanaja. ⁴ Kaorikubanoko raina araoto isimoana. Orikubanoko Dio kamoayakutai tai taeraja, oko yaoronoko taeraja jakutaisi kwarikakitane. ⁵ Oko ribu eko iekorea. Warao kawanamo wite airamo tane oritoane eobo Dio naminamejerenaja. Tatuma aribu iekoreaoko. Waraoto aobonobu kokotuka Kirito aobojona eku nakamejereaoko waraoto aobonobu Kirito aobojona eku ejobamejerei. ⁶ Yatu Kirito aobojona eku yaorane abayakore eku abanaja jakutai kokotuka emo abakitane jaoko. ⁷ Yatu obojona minaka yakareku mija. Jisaka ribate tai: Ine Kirito aneburatu, tate tai. Tane ribiakutai obonobukunarai. Oko taisi monuka Kirito anebu. ⁸ Ribu Airamo kamoajakutai taisi isia are ribiaine. Are ribiarone tomananajine. Airamo ribu kamoae yatu aobojona eiramejerei. Yatu ekoramejerei kamoanatanae. ⁹ Pablo akarata isia keretaya tane ribunaka jamejereaine. ¹⁰ Yatu ribia: Pablo akarata aribu jawanera, taeraja tane. Tiarone kakaika jaja joteraja ja. Aribu amoara ekira monuka, tia. ¹¹ Tametane ribiakutai maribu nokokunarai. Emomo karata yatu saba jabatayakutai taeraja. Taisi monuka oko yatu kaika jaja taeraja jateko. ¹² Eobo oriisia oko yakeraja tane ribia. Oko tatuma monuka ejobakitane obononajaoko. Tatuma monuka oriabakitane obono-najaoko. Tatuma naminanaka monuka nonaya. Wite oriaribu abane eku abaya. Orimonuka yakeraja tane oriabaya. ¹³ Dio yaota ka-moae. Yaota kamoajakutaisi kemo narukomoni oko. Tiarone ka-yaota kaika Dio oko yatuata narumejereae. ¹⁴ Oko yatuata narune kayaota kemo narunatanaeko. Rewara yakeraja Kirito isia jakutaisi yatu saba rewaraeko. ¹⁵ Oko raisama ayaota isia kayaota tane ribunajaoko. Tiarone yatu isia obonobiaoko. Yatu suatana nome abayaja iramejerei obonoyaoko. Irakore yaota oko yatu kawanaya yaotayakutai tairakate irate. Oko Dio aobojona kaika yaotaya. ¹⁶ Tatukamo oko ina yatu kemo jakutaisiata narune rewarakitane obonoyaoko. Yaota jakutai mayaotenarone isia Tamaja mayaota, tane ribakitane obononajine. ¹⁷ Jisaka yakeraja tane ribakitane obonone Airamosike yakeraja, tane ribakunarai. (Jer. 9:24) ¹⁸ Wite oriisia ine yakeraja tane ribiakutai taisike yakeraja ejobonaja. Airamo ribane: Iji masaba yakera, tane ribakore taisike yakeraja ejoboya.

¹ Yatu maribu nokokore yakerakuna. Maribu yatu saba buretaja jakorejone arejase nokokitane taeratakotu. ² Dio yatu temiajiakutai taisi monuka temiajiaine. Yatu tira monuka niborabakamejerei moaine rijana. Yatu tira anibora mate ekiraja monuka moakitane obonoyaine. Yatu anibora jisakawitu. Tai Kirito. ³ Ateje juba jakutai tona ribiaja Eva imasibuae. Ine reta-yaine. Eva imasibuajakutaisi monuka eobo yatu imasibute tai. Yatu yaorane Kirito obonoyakutai taisi iabate tai tane reta-yaine. ⁴ Eobo yatuata narune Jesú raisama isia rewaraya. Oko rewarayakutai taiana. Raisarone yatu tatuma yakeraja etuwaraya. Oko obojona jisaka rewara jisaka tane rewaraeko. Ama rijana raisa narune obojona raisa, rewara raisa tane rewarae. Raisarone yatu taisi etuwaraya. ⁵ Ine oriisia obonobia. Ine Jesukirito ainatabatumawitu yajotoana, tane obonobiaine. ⁶ Ine rewarayaja yakeraja rewaranaja tai tiarone mainaminasike yakera. Are kokotukanea yatu taisi naminamejereaoko. ⁷ Ine rewara yakeraja Dio isimo jakutai yatu saba rewarane yatu burata mamoamejerenatanaine. Asiraja nonae tai. Ine yatu yajoto tane oriabanaine yatu airamo tane ejobamejerei. Asiraja nonae tai. ⁸ Ine yatuata jakore ikeresia arao eobo burata mamoae. Tatuma ebikamo aburata nisanaine yatu sanetakitane. ⁹ Ine yatuata jaja ine obonoyakutai ekirarone jisakarakate ebunatanaine burata mamoamejerei. Macedonia arao naone ine ekirakutaisi mamoae. Ebe yatu burata mamoamejerenatanaine. Are mamoamejere-najine. ¹⁰ Nome Kirito moayakutai taisi eku ribiaine. Ina Acaya kokotukanea Corinto arao burata mamoanatanae tane ribatine. Jisakarakate taneana tane ribakomoni. ¹¹ Ine katukeme tametane ribia? Yatu obononaja jame ribiara bajama? Taneana. Ine yatu obonoyakutai Dio taisi naminaya. ¹² Ine are manona jakutaisi eku nonatine eobo Pablo monuka yaotayaoko, tane ribakomoni jamejerei. ¹³ Tatumasike inataba-tuma eko. Tatuma imasibumo. Kirito ainatabatuma tane orito-aya. ¹⁴ Tai mianareana. Satanasrakate jokoma ainataba tane oritoaya. ¹⁵ Tiame Satanás anebu Satanás monuka nomeraja anonamo tane oritoaya. Tiarone ayajuata tatuma anona kaika nojote. ¹⁶ Atanejese ribatine. Pablo buretae tane ribunaka jakotu. Ine buretajarone maribu nokokotu. Takore sanuka ine yakera tane ribatine. ¹⁷ Ine ama ribakitiakutai Airamo aribiena ribatine. Ine wite oriayakara isia ribakitiakutai taisike buretaja monuka ribatine. ¹⁸ Eobo eraja raina aobojona eku abayaja oko yakera tane ribia. Ine tatuma sitatine. ¹⁹ Yatu musaberaja jame buretaja aribu ekeiraja nokoyaraji! ²⁰ Aneburatuwitu tane abane yatu kajotabiakutai tai yatu aobojona eku. Yatu ajotu jobiakutai tai yatu aobojona eku. Yatu ebikamo nisayakutai tai yatu aobojona eku. Yatu arotu tane ejoboyakutai tai yatu aobojona eku. Yatu amukaba nabayakutai tai yatu aobojona eku. ²¹ Ine tomaneraja ribia. Oko joteraja jame tametane nonanatanaeko. Eobo oriisia oko yakera tane ribia. Oi! Ine buretaja monuka ribatine. Inerakate oriisia ine yakera tane ribatine. ²² Tatuma-witu ebereotumara? Inerakate ebereo. Tatumawitu Israeltumara? Inerakate Israel arotu. Tatumawitu Abraham anobotomora? Inerakate Abraham anoboto. ²³ Tatumawitu Kirito anebura? Ine tatuma kwarika Kirito aneburatu. Ine tane ribiaja buretaja monuka ribia. Tatuma kwarika yaotaine. Tatuma kwarika maye-wereae. Tatuma kwarika memojojutae. Eraja tane waba jawana kwaeabanaine. ²⁴ Mojoabasi tane Judiotuma mayewere-mejereae. Korea isia mayewereaja mojorekotuma manamona-mojase nakakitane jisaka eko tane majinae. ²⁵ Rijanamo tane rau isia mayewereae. Jisata matimiae. Rijanamo tane waeraira ine eku naruajakutai rijanae. Jisata ima jisaka ya jisaka tane nojabaira autu joni bajinaine. ²⁶ Eraja tane kujuaine. Nojaba jawana, erijisa arao jawana, mawarao jawana, Judioana jawana tane kwaeabanaine. Janokoina eku, jarawaja eku, nojabaira eku tane jawana kwaeabanaine. Nome abamo tane oritoayakutaisi ajawana kwaeabanaine tane. ²⁷ Yaotaine. Sanamataine. Eraja tane ubanaka, najoronaka, jobinaka tane yaotaine. Eraja tane manajoro ekiraja, rairaja, majiaka ekiraja tane yaotaine. ²⁸ Suatana kwarika ribatine: Ya kokotukanea ikeresia koko-tuka isia maobonobu kwana jaine. ²⁹ Jisaka joteraja jakore inerakate joteraja monuka. Eobo jisaka omu esoakamejerekore maobojona awerea ejoboya. ³⁰ Oriisia ine yakeraja tane ribakitane jakore ine joterame yakera tane ribatine. ³¹ Kairamo Jesukirito Arima Dio maribu naminaya. Ine nomeraja ribia. Dio isia iji yakeraja jae tane are ribakitane ja. ³² Ebe ine Damascoata jakore Aretas jakutai tai Damasco airamo. Aretas aribia kobena-joro jakutai janokoina arara akojo yaoromejereae memojojuta-kitane. ³³ Tiarone u urirajasi eku mabane janoko akojo ekia janokoina arara kwarea mainanakakore naruaine.

¹ Ine wite oriisia ine yakeraja tane ribakore amoara ekira. Musibu memiajakutai Airamo memusabajakutai tane taisi isia rewaratine. ² Ine warao Kirito isia nome abatu jakutaisi naminayaine. Ateje Dio najamutu rijanamoata taisi konaruae. Ainawaja asebe mojoreko kware manamonamojase ja rijana. Atejo isiko konarukore o atejo omi konarukore naminanajine. Diosike naminaya. ³ Dioata konaruae. Atejo isiko tai o atejo omi tai. Ine naminanaja. Diosike naminaya. ⁴ Taisi rao takore najamutuata ribu rijisawitu nokoae. Ribu rijisa jakutai Dio warao taisi rewaramejerenaja. ⁵ Tata naruajakutaisi isia ribatine: Taisike yakera, tatine. Wite oriisia ine yakera tane ribunajine. Tamajawitu ribatine. Ine joteraja jame yakeraine tane ribatine. ⁶ Maribu nome jame wite oriisia ine yakera tane ribakitane obonokore maribu buretajena jakuna. Kwarikawitu maisia warao obonobumejerenajine. Tiarone manona isia maribu isia tane mayakara naminakitane ja. ⁷ Memusabajakutai yakerajawitu jame ine wite airamo tane oritoate tai. Tiame tane obonobunaka jamejerei tametane maisia nakae. Ji monuka manatia. Satanás ainataba maisanamataya. ⁸ Tiame rijanamo tane Airamo ebuaine mebikamo konaru-mejerei. ⁹ Tiarone Airamo mariboto ribunae. Maobojona ayakara jakutai jisaba kaika ejoboya. Iji joteraja jakore majara taeraja ejoboya, tae. Tiame ine joteraja jame masaba yakera Kirito ajarata meku mimejerei. ¹⁰ Ine Kirito aobojona eku jame ekeiraja bajiaine. Ine joteraja jate tai. Mekotubute tai. Ine ekiraja jate tai. Maisanamatate tai. Maobonobu eraja ejobate tai. Tiarone joteraja jaja taeraja ejoboya. ¹¹ Oriisia ribiaja buretaja monuka ribiaine. Tiarone yatu aobojona tametane ribiaine. Yatu maisia tai yakeraja tane riba-kuna. Mamoara ekira monuka. Tiarone mamoara jakutai Jesu-kirito ainatabatumawitu amoara yajotoana. ¹² Ine yatuata ma-nona jakutai tai tamaja: Nona sinarija, nona mianare, nona taeraja tane. Ine sanamata isiko taeratayaja nonaine. Yatu manona aobojona ine Jesukirito ainataba nomeraja jakutaisi naminaya. ¹³ Yatu ikeresia eobo araoto yajoto tane abanatanaine. Ine yatuata jaja masanetamejerenatanaine. Manona yatu saba nomerajena jakore makware abanaka yatu aobojona iabakotu. ¹⁴ Ine manata yatuata naruaine. Ama atanejese narutine. Yatu masanetamejerenajine. Yatuatukamorakate obononajine. Yatuwitu obonoyaine. Nobotomo jakutai airamo saba burata orabanaja. Tiarone airamotuma anobotomo saba orabaya. ¹⁵ Maburata yatu saba yawanakitane masaba yakera. Ine wite oriyawanakuna yatu aobojona yakeraja ejobamejerei. Suatana kwarika ine yatu obonoyarone yatu yajotowitu maobonoya. ¹⁶ Eobo ribia: Nome, tatuma Pablo sanetanatanae. Tiarone Pablo tatuma imasibune akai eku nakamejereae, tia. ¹⁷ Manebu maribia yatuata naruae. Tatuma maribia yatu imasibuaera? ¹⁸ Tito ebuaine yatuata narumejerei. Nome abatu raisa Tito iamo inatabaine. Tito yatu imasibuaera? Oko reko obojona jisaka eku abayaja orimonuka nonanajara? ¹⁹ Yatu ribate tai: Pablo orikware ribia rijana, tate tai. Taneana. Oko Dio amujaba ribunaeko. Kirito aribia ribunaeko. Mawarao oko obonoyakutai, kokotuka oko nonayakutai yatu aobojona ira-mejerei nonayaoko. ²⁰ Ine retayaine. Ine yatuata narukore yatu aobojona raisa ine obonoajakutaisi ekuana jate tai. Monukajase yatu obonoajakutaisi ekuana maobojona jate tai. Tane retayaine. Obojona asiraja jate tai. Orikubakitane. Oritemiajikitane, kwana orijisikitane. Wite oriisia obonobukitane. Eobo isanakitane. Rejoro jakitane. Eobo kwarika oriabakitane. Wiyawiyakitane. Tane jate tai. ²¹ Ine retayaine. Ine yatuata narukore yatu aobojona Dio ine tomaneraja bajemejerete tai. Yatu kware onate tai. Ateje yatu kawanamo asiraja nonane mate aobojona ibarinaja. Asiraja sabuka nonae. Tatukamo yatu tatusebeae, nibosebeae tane. Suatana nona eobo kwarika nona asirajawitu nonae.

¹ Ine manata yatuata naruaine. Ama atanejese narutine. Amimo manamo o rijanamo nona miajakutai taisi isia rewarakore anome kokotuka naminate. ( Kaj. 19:15) ² Yatu ebe asiraja nonajakutai yatu isia, kokotuka isia tane ribatine. Ebe ine yatuata ribunajakutai ama ine emorone tai monukajase ribatine. Ine atanejese yatuata narune kokotuka sabajikitane ja, tiaine. ³ Ine tane nonakore yatu ribate: Nome-witu Pablo Kirito aribia ribia, tate. Kirito yatu kawanaya jote-rena. Tiarone tai taeraja ejoboya. ⁴ Nomewitu Kirito joteraja monuka esijariae tiarone Dio ajarata isia ubaya. Oko Kirito eku-tiji joteraja monuka tiarone oko Kirito ekutiji Dio ajarata isia ubaya yatu sanetakitane. ⁵ Wite oriayakara mikotu, yatu nomewitu nome abamo ja tai tane naminakitane. Yatujase orinaminakotu! Kirito yatu eku ja tane naminanajara? Yatu ayakara mikore yatu nome ejobona-tanaera? ⁶ Okorakate nome. Yatu taisi naminamejereaine. ⁷ Oko yatu saba nomeana monukarone oko kwai ribiaja Dio ebia yatu asiraja nonanakawitu jamejerei. Oko nomeana ejobonaka jame-jerei ebunajaoko tiarone yatu yakeraja nonamejerei ebiaoko. ⁸ Oko nome riboto nonakomoni tiarone nome eku nonakitane jaoko. ⁹ Oko joterarone yatu taeraja jakore kasaba yakera. Oko suatana kwai ribiaja yatu Dio aobojona kaikawitu ejobamejerei ebute. ¹⁰ Tiame ine emo jaja karata yatu saba jabataya. Ine yatuata narune ribu Airamo mamoajakutaisi eku abane yatu kwana sabajikitane obononajine. Ribu mamoae yatu aobojona eiramejerei. Obojona iekoramejerei mamoanatanae. ¹¹ Ama mawarao, yakeraja bajekotu. Dio aobojona kaika ejo-bakitane najabukotu. Yatu akobe tuwarakunarai. Obojona jisaka eku abane inareraja oriisiko ubakotu. Dio inareraja tane abaya-kutai, yatu obonoyakutai tane yatu kaika bajete. ¹² Oriamukaba oroyaja oriisia yakeraubiara abakotu nome abamotiji. ¹³ Warao Dio saba emo abánae tiakutai tatuma koko-tuka yatu isia yakeraubiara abaya. ¹⁴ Kairamo Jesukirito aobo-jona ayakara yatu moakunarai. Dio are yatu obonokunarai. Dio Amejokojira Yakerajawitu are yatu kokotuka amuaraisataku-narai tane. Amén.