1 TIMOTEO

¹ Ine Pablo, Jesukirito ainataba. Dio kaobojona Aibajukatu jakutai makajotabuae. Kairamo Jesukirito makajotabuae. Taisi yawakayaoko. ² Timoteo saba jabatayaine. Nomewitu iji nome abanajame mauka tane ejobonae. Dio Karima jakutai, Kirito Jesú Kairamo jakutai tane oriaobojona ayakara jimoakunarai. Akobe jiisia ajerakunarai. Inareraja tane jiabakunarai. ³ Ine Macedonia tata narune jiebuaine Efeso tata bajemejerei. Iji bajinae eobo isia ribakitane inamina raisama inaminanaka jamejerei. ⁴ Iji bajinae renobo eku abanaka jamejerei ribakitane. Iji bajinae oriwaraoto isia rewaraubunaka jamejerei ribakitane. Tamajasi aobojona oriaribu kwarikaya. Inamina Dio isimo jakutai eirakore yakerakuna. Taisi isia nome abaya. Ateje jiisia ribunajakutai taisi monukajase ama jiisia ribiaine. ⁵ Ine ribiaine tatuma oriobonomejerei. Obonoyaja kobe ananerena isia obonote. Obojona yakerajasi isia obonote. Nome abayaja obojona manamo isikoana tane obonote. ⁶ Kawanamo tamaja obojona iabane emo jakanae ribu amoara ekirajasi isia orikwarikakitane. ⁷ Tatuma kajotabu ainaminamowitu takitane obonoya. Tiarone oriaribu nokonaja orianaminajase nokonaja tane. ⁸ Kajotabu jakutai, tai yakera, tiaoko. Tiarone ayakara waraki-tanewituana. Kajotabu eku jakakitane ja. ⁹ Tamajasi naminaya-oko. Kajotabu jakutai tai nomerajasi anonatu sabena. Tai kajotabu atainamo saba. Tai kajotabu eku abaonituma saba. Tai Dio kware barinaja jakutaisi saba. Tai asirajasi anonamo saba. Tai Dio ayatomanetemoana saba. Tai yawatanuka asiraja obono-bumo saba. Tai rimasi akubamo saba. Tai ranima akubamo saba. Tai akobakamo saba. ¹⁰ Kajotabu jakutai tatusebe saba. Tai nibomana saba. Tai waraoto erijisamo saba. Tai tona aribamo saba. Ribu nome toanokoata tona aribamo saba. Inamina yakeraja ekuana jakutai kajotabu taisi saba. ¹¹ Dio yakerajawitu jakutai arewara yakerajasi mamoae rewaramejerei. Akajotabu jakutai tai rewara yakerajasi kaika. ¹² Kirito Jesú Kairamo jakutai majara taeraja tane abanae ayaota saba. Tiame isia yakeraja jae tane ribiaine. Mamibukore saba ribu eku abatu tane ejobonaine. Tiame akajotabu tane ma-banae. ¹³ Ateje Dio isia asiraja ribunaine. Eobo iyajubune isia asiraja ribunaine. Tiarone ine naminanaka nonajame nome aba-naka nonajame tane Dio akobe maisia ajeraja ejobonae. ¹⁴ Kai-ramo aobojona ayakara masaba uriraja ejobonae. Kirito Jesú isia nome abayakore obonoyakore tane ayakara masaba ejoboya. ¹⁵ Kirito Jesú raineta naoae asirajasi anonamo aobojona ibajukakitane. Ine asirajasi anonamo kokotuka kwarika ine. Tamaja ribu nome. Amoara ja nisamejerei. ¹⁶ Kirito Jesú akobe maisia ajeraja ejobonae. Tiamesike Jesukirito eobo mamime-jereae Jesú yaorane taisi yawakae, tane naminamejerei. Tatumarakate nome abakitane jakutai. Nome abane are ubate. ¹⁷ Kairamowitu are ja. Tai wabanaja. Taisi mikomoni. Tai Dio jisakawitu, musaberajawitu tane. Are taisi isia yakeraja tane ribakunarai. Are Airamo jakunarai. Tai are saba jakunarai. Amén. ¹⁸ Mauka Timoteo, jikajotabiaine rijana. Ateje iji nonakitane jakutaisi rewarae. Taisi eku nonakore yakerakuna orikubamo monuka orikubayaja. ¹⁹ Are nome abanu. Jiaobojona yakeraja are bajekunarai. Warao kawanamo obojona yakerajasi tainane nome abanaja. Tiame wajibaka wanariaja monuka asiraja ejoboya. ²⁰ Tatuma kawanamo Himeneo, Alejandro tane. Ine tatuma Satanás amojeku abanaine naminamejerei. Dio isia asiraja ribunaka jakitane naminamejerei tane.

¹ Wajiabara reiriaine warao kokotuka kware kwai ribamejerei. Ebiaja, Dio isia ribiaja, eobo kware ebiaja, yakeraja jae tane ribiaja tane ribate. ² Aina airamowitu kokotuka kware ribiaja, airamo sabukatuma kokotuka kware ribiaja oko wiyawiyanaka, inareraja tane ubamejerei ribate. Dio isia obonobiaja, yatomaneteaja tane ubamejerei ribate. ³ Tamaja Dio kaobojona Aibajukatu saba yakera, aobojona ekuwitu tane. ⁴ Tai warao kokotuka aobojona bajukamejerea, nome yaorane naminamejerea tane. ⁵ Dio jisakawitu ja. Dio warao tane autu anakasetu jisakawitu ja. Tai Jesukirito warao jakutai. ⁶ Jesukirito jakutai orimoae, wabane warao kokotuka amoara abakitane. Asinarija eku taisi isia rewarae. ⁷ Taisi isia rewaratu tane mabanae. Jesukirito ainataba tane mabanae. Judioana jakutaisi ainaminatu tane mabanae nome abakitane isia inaminamejerei, nome isia inaminamejerei tane. Ine Kirito isia nome abatutiji maribu tonena. Maribu nome. ⁸ Kokotukanea warao kwai ribamejereaine. Mojo yakeraja kobukate. Orijisinaka oriaribu kwarikanaka tane kwai ribate. ⁹ Taturakate jiaka bajuka isia orisabate. Jiaka tomanerajenaka jajasi orisabate. Wite aobojona arotu tane orisabate. Ajio orikwaremo nejobonatate. Burata simo orisabanatate. Joyo amoara urirajasi orisabanatate. Ajiaka amoara taerajasi orisabanatate. ¹⁰ Tiarone anona yakerajasi isia orisabate. Nona yakeraja jakutai tatu Dio ayatomanetemo jakutaisi saba yakera. ¹¹ Tira inareraja naminate. Kokotuka isia aniborama akajotabu tane bajete. ¹² Tira inaminamejerenajine. Tira niborama airamo tamejerenajine. Inareraja bajekitane ja. ¹³ Ateje Dio wajiabara Adán nonae. Tatukamo Eva nonae. ¹⁴ Juba jakutai Adán imasibunatanae. Tiarone juba tirasi imasibukore tira Dio aribu riboto nonae. ¹⁵ Tiarone anobotomo aranitayaja bajukate. Are nome abayaja obonoyaja are Dio saba emo abánae tiaja bajiaja, are wite aobojona arotu tayaja bajukate.

¹ Tamaja ribu nome. Nome abamo ayaorotu takitane kwana obonoyakutai tai yaota yakerajasi obonoya. ² Ayaorotu jakutai tametane jakitane ja. Obojona asiraja kware abakomoni jakitane. Atira jisakawitu jakitane. Obojona baka jakitane. Wite aobojona arotu takitane. Ribu tomaneraja ribunaka jakitane. Ajanokoata etuwaratu jakitane. Inaminatu tane jakitane. ³ Arijarokoana jakitane. Orikuba arotuana jakitane. Asirajasi nonane burata nisakitane obonotuana. Raoberaja jakitane. Inareraja jakitane. Oriaunukamo awanituana jakitane. ⁴ Oriajanoko araoto airamo takitane. Anobotomo amujaba airamo bajiaja anobotomo saba raomata jakitane. ⁵ Oriawaraoto airamo takomoni jakutai katukane Dio aikeresia araoto airamo tate bajama? ⁶ Nome abatu jiro airamo takomoni. Tane jaja airamo tane oritoayaja sanamata saba nakate. Jebuira ebe nakajakutaisi monuka nakate. ⁷ Nome abamoana saba arewara yakeraja ejobakitane ja. Tanaka jaja amoara ekiraja ejobate. Jebuira akai eku nakate tane. ⁸ Sanetamorakate tametane jakitane ja. Raomata jakitane. Aobonobu manamoana jakitane. Bino uriraja ajobimoana jaki-tane. Asirajasi nonane burata nisakitane obonomoana jakitane. ⁹ Nome abakitane jakutai tai ribu rijisa. Obojona yakerajasi isia tai ribu eku abakitane ja. ¹⁰ Sanetamo takitane jakutai wajiabara ayakara mikitane ja. Obojona asiraja taisi kware abakomoni jakore sanetamo tane yaotamejerei abakunarai. ¹¹ Ataturakate raomata jakitane ja. Rejorotumena jakitane. Obojona baka jakitane. Kokotukanea oriaribu eku abamo jakitane. ¹² Sanetamo jakutai atira jisakawitu jakitane ja. Anobotomo airamo takitane ja. Oriajanoko araoto airamo takitane ja tane. ¹³ Sanetamo yakeraja yaotayakutai tatuma raomata kwarika ejoboya. Tatuma retanaka Kirito Jesú isia nome abaya. ¹⁴ Kware majabanaka jimikitane narukitine, tiaine. Tanerone jisaba jabatayaine. ¹⁵ Ine kware majabate tai. Tiame jisaba jabatayaine iji Dio ajanoko eku katukane nonakitane ja tai tane naminamejerei. Dio ajanoko jakutai tai Dio riko jakutaisi aikeresia. Tai nome noika abánae tiaja, akari riboto yanamúnae tiaja tane. ¹⁶ Ribu rijisa Dio yatomanetekitane jakutaisi isia tai ribu taeraja. Tai ribu kwarikakomoni. Tai tamaja. Dio tejo tane nakae. Dio Amejokojira taisi kware ribunae. Dio ainataba taisi miae. Judioana saba taisi isia rewarae. Raina arao taisi isia nome abanae. Najamutu ajokoma eku taisi nisanae.

¹ Rijana Dio Amejokojira yaorane ribia. Ya ayaju eku warao kawanamo nome jakutaisi iabate. Jebu imasibumo jakutaisi kware barete. Jebu ainamina kware barete. ² Tatumajase tonairatuma. Tatuma aobonobu manamo. Aobojona jojúae tiaja monuka bajia. ³ Kasamejerenaja. Najoro kawanamo najorome-jerenaja. Najoro jakutai Dio taisi nonae nome abamo jakutai nome jakutaisi anaminamo jakutai tane najoromejerei. Yakeraja jae tane ribiaja najoromejerei nonae. ⁴ Dio nonajakutai kokotuka yakeraja. Tainanaka jakitane ja. Yakera jae tane ribiaja oakitane ja. ⁵ Dio aribu Dio anona yakeraja tane abaya. Kwai ribiaja Dio anona yakeraja tane abaya. ⁶ Iji tamaja ribu nome abamo inaminayakore iji Jesukirito akajotabu tane yakeraja ejobate. Ribu nome abakitane jakutai tai jinajoro tane ejobate. Iji inamina yakerajasi eku nariame tairakate jinajoro tane ejobate. ⁷ Renobo yawatanuka jakutaisi kware barinaka. Tatu iramotuma arenobo kware barinaka jau. Dio yatomanetekitane naminaubu. ⁸ Tejo inaminakitane jakutai amoara ja sabuka. Tiarone Dio yatomanetekitane jakutaisike amoara uriraja. Ama ubakitane amoara ja. Mate are ubakitane amoara ja tane. ⁹ Tamaja ribu nome. Amoara ja warao kokotuka taisi isia nome abamejerei. ¹⁰ Tiamesike oko yaotaya, sanamataya tane. Dio riko jakutaisi aobojona kayawaka ja. Dio jakutai warao kokotuka aobojona Aibajukatu. Tai nome abamo aobojona Aibajukatuwitu rijana. ¹¹ Tamaja ribu kajotabu, inaminau tane. ¹² Iji neburatu jame eobo jiisia taisi amoara ekiraja tanaja jakore yakerakuna. Nome abamo jisitakunarai. Jiribu sitakunarai. Jinona sitakunarai. Iji obonoyakutaisi sitakunarai. Jiaobojona sitakunarai. Iji nome aba-yakutaisi sitakunarai. Jiaobojona ijabanaka jakutaisi sitakunarai. ¹³ Ine ijiata narutine. Mate narunaja jakore Jabataja teribu, eobo reiri, ribu inaminau tane. ¹⁴ Iramotuma amojo jikwa arai abane jiobonobu jakitane jakutaisi isia rewarae. Dio obonobu jakutaisi jimoae. Obonobu jimoajakutaisi iabanaka jau. ¹⁵ Tamajasi oriinaminau. Ribu tamajasi eku yaorane bajenu. Takore warao kokotuka jimijaja tamaja nona namínae tiaja ji-mite. ¹⁶ Oriyaoro. Jiainamina eku abanu. Suatana are eku abanu. Tane nonayaja oriaobojona ibajukate. Jiribu anokomo aobojona-rakate ibajukate.

¹ Iramo jakutaisi kwana sabajinaka. Jirima monuka reiri. Iramo sabuka jiwarao monuka reiri. ² Tatu iramo jakutai jiranituma monuka reiri. Ibomamo jirakoi sanukatuma monuka reiri, ribu kokotuka tomanerena jakutaisi isia. ³ Tatu tewerewitu jakutai tatuma sanetate. ⁴ Tira tewere anobotomo jakutai o anatoromo jakutai wajiabara anotuma o aranima sanetakunarai. Ajanoko eku Dio yatomanetemo tane jakunarai. Arima arani tane amoara abakitane naminakunarai. Tamajasike Dio saba yakera. ⁵ Tira tewerewitu jakutai, jisamu-kawitu jakutai tane tai Dio yawakaya. Tai imaya jokomaya tane kwai ribiaja Dio ebubia. ⁶ Tiarone tira tewere oriaobojona eku abayakutai tai rikorone waba rijana. ⁷ Tamaja ribu kajotabu, obojona asiraja tatuma kware abakomoni jamejerei. ⁸ Warao oriwaraoto sanetanaja jakore, awaraowitu sanetanaja jakore tai nome abatuana monuka. Tai nome abatuana kwarika asira. ⁹ Tira tewere ainawaja siento asibi kware mojoreko kaikena jakore awai tira tewere akarata eku jabatanaja. Atae niborabákae tiaja jakutai awai jabatanaja. ¹⁰ Arewara yakeraja jakitane ja anona yakerajasi isia. Anobotomo aenojotatu jakore, ajanoko eku etuwaratu jakore, Dio saba emo abánae tiakutaisi omu ajojaratu jakore yakerakuna. Atae sanamatamo asanetatu jakore, nona kokotuka yakeraja anonaubutu jakore yakerakuna. ¹¹ Tatu tewere nojotonajiro jakutai taisi awai jabatanaja. Ori-aobojona eku abane Kirito iabaitane atanejese niborabakakitane obonoya. ¹² Tiame aribu wajiabara jakutaisi iabane sanamata saba nakaya. ¹³ Atae ayaota ekiraja ejoboya. Janokoya kujuya. Ayaota ekiraja taiwituana. Atae rejorotuma. Eobo kaika nakasia. Re rewaranaka jakitane jakutai taisi are rewaraya. ¹⁴ Tatu tewere nojotonajiro jakutai niborabakamejereaine. Anobotomo eirakitane. Ajanoko arotu takitane. Takore kariboto jakutai kaisia ribu asiraja rewarakitane ekirate. ¹⁵ Rijana tatu tewere kawanamo Satanás iamo emo naruae. ¹⁶ Nome abatu jakutai awarao tatu tewere jakutaisi saneta-kunarai. Takore ikeresia arao tatuma kware barekitane ekira. Ikeresia arao jakutai tatu tewerewitu kware barete sanetakitane. ¹⁷ Nome abamo airamo yakeraja wajukautayakutai ayaota kaika amoara moakitane ja. Ribu arewaramowitu, ribu ainami-namowitu tane amoara abakitane ja. ¹⁸ Jabataja taisi isia ribia: Baka nibora tiriko najutiakutai taisi aroko koyanaka, tia. (Kaj. 25:4) Atae ribia: Yaotatu amoara ja ayaota amoara moamejerei, tia. (Mat. 10:10 Luc. 10:7) ¹⁹ Warao jisaka airamo kware abakomoni. Kware abakitane manamo o rijanamo kware abate. ²⁰ Suatana asiraja nonau-biakore kokotuka amujaba sabaji, eobo taisi mitane retamejerei. ²¹ Jiisia ribiaine Kairamo Jesukirito amujaba Dio ainataba mibune nisánae tiakutaisi amujaba tane. Iji tamaja ribu eku abanu. Warao jisaka warao raisama kwarika abanaka jau. Kokotuka orimonuka abanu. ²² Jimojo raisama akwa arai rubu-jira abanaka. Iji raisama aobojona asirajasi eku nakanaka. Jiao-bojona ijabanaka bajekunarai. ²³ Jowitu jobinaka rijana. Bino sanuka jobite jiobono saba, iji are wabayame. ²⁴ Warao kawanamo aobojona asiraja ja tane yaorane naminaya. Mate obojona nome toamoanarone naminaya. Eobo nokabuka aobojona asiraja jakutaisi naminate. ²⁵ Nona yakeraja monukajase yaorane naminaya. Yakerena jakore are rijisakomoni.

¹ Raisama anebu tane bajiakutai arotuma yaorane yatomane-tekitane ja. Tane jakore eobo Dio awai isia asiraja ribuna-tate. Dio ainamina isia asiraja ribunatate tane. ² Nebu arao nome abamo jame anebu jakutai nebu araoto tainanaka suatana yato-manetekitane ja. Nebu araoto obonoyaja kwarika yakeraja yaotakitane ja. Yakeraja yaotayame nebu arao jakutai yakeraja bajia. Tamaja ribu inaminau, reiri tane. ³ Ribu raisa inaminayakutai tai airamo tane oritoaya. Ribu raisa jakutai tai Kairamo Jesukirito aribu yakerajasi kaikena. Ribu raisa jakutai tai Dio yatomanetekitane jakutaisi ainamina kaikena. ⁴ Tai airamo tane oritoaya. Tai inaminatu jakutai musaberena. Tai ribu isia orikubakitane kwana obonoya. Ribu isia orikwarikakitane kwana obonoya. Taisi ekumo obojona asiraja ejoboya: Miajitakitane, ribu isia orikubakitane, raisama isia asiraja ribakitane, raisama kware asiraja abakitane. ⁵ Ribu isia orikwarikakitane. Ribu isia orikwarikamo jakutai aobojona emo. Nome naminanaja. Tatuma ribia: Oko Dio yatomanetekore burata kamoate, tia. Tane anonamo emo bajenu. ⁶ Nomisa oriwakayaja Dio yatomanetekore amoara uriraja ja. ⁷ Oko raina eku nakane kaunukamo jisakarakate konanatanaeko. Tamatu-kamo narukitane kaunukamo jisakarakate arejase konarunaja. ⁸ Kanajoro jakore, kajiaka jakore tane oriwakaki. ⁹ Burata uriraja nisakitane obonoyakutai jebuira tai asiraja nonamejerea. Tai kai eku nakate. Obojona yawatanuka asiraja tane eku nakate. Obojona asiraja jakutai waraoto iekoroya. Taisi aobojona warao rijaya rijana. ¹⁰ Burata obonokitane jakutai tai obojona asiraja kokotukanea ajokonamu. Warao kawanamo burata kwana obonone nome abakitane iabaya. Takore sanamata isia akobe neuae jatabu isia monuka. ¹¹ Tiarone iji rijana Dio aneburatu. Obojona tamajasi monuka ebikamo jakanu. Nona nomerajasi iamo naru. Dio yatomanete-kitane, nome abakitane, obonokitane, taeratakitane, raobotaki-tane tane. ¹² Iji nome abanajame orikubamo monuka orikubau. Obojona jiro oanu. Dio obojona jiro saba jiyejebuae. Iji jimimo erajasi amujaba yakeraja rewarae. ¹³ Dio aribia jikajotabiaine. Dio kokotuka rijawaramejerea. Jesukirito aribia jikajotabiaine. Jesukirito Poncio Pilato amujaba yakeraja rewaraeyama. ¹⁴ Kai-ramo Jesukirito mate naonaja jakore are kajotabu eku abanu. Oriijabanaka jau. Asiraja jikware abakomoni jakunarai. ¹⁵ Sina-rija abánae tiakutaisi eku Jesú naote. Kokotuka Airamowitu yakeraja jakutai tai Jesú inatabate. Tai Airamo Taeraja jisaka-witu. Tai airamo sabukatuma Airamo. Tai airamotuma Airamo. ¹⁶ Taiwitu are wabanaja. Tai jokoma urirajasi eku ubaya. Taisi awere nabakakomoni. Warao jisakarakate taisi minatanae. Taisi mikomoni. Tai are Airamo jakunarai. Are saba taisi ajara taeraja jakunarai. Amén. ¹⁷ Burata arao ama raina eku jakutaisi isia ribanu. Tametane jakitane ja. Airamo tane oritoanaka jakitane. Burata yawakanaka jakitane. Burata jate tai, o burata ekirate tai tane naminanaja. Tiarone Dio yawakakitane. Dio riko kokotukanea uriraja kamoaya oko yakeraja bajemejerei. ¹⁸ Burata araoto isia ribanu, anona yakerajasi isia yakeraja bajemejerei. Isia ribanu wite oriaobojona kaika raisama sanetayaja oriaburata moamejerei. ¹⁹ Tane nonayaja arobisi yakeraja janoko noika abaya monuka, mate saba. Tane obojona jiro oate. ²⁰ Timoteo, jiisia ribiaine: Ribu jimoajakutai taisi eku abanu. Ribu yawatanuka amoara ekirakutai taisi eku abanaka. Kawanamo musaberaja tane oritoaya aribu amoara ekirarone. Tatuma aribu eku abanaka jau. ²¹ Warao kawanamo ribu amoara ekirajasi eku abane nome abakitane iabanae. Dio oriaobojona ayakara jimoakunarai. Amén.