1 PEDRO
11 Ine Pedro, Jesukirito ainataba. Karata jabatayaine. Israeltuma awaraosebeira mojoreko kware manamo kayanae. Ina Pontoata, ina Galacieta, ina Capadocieta, ina Asieta, ina Bitinieta tane kayanae. Kayanajakutaisi saba jabatayaine. 2 Ateje Dio Karima jakutai aobojona abanae warao mibune nisakitane. Aobojona abanajakutaisi eku yatu mibune nisanae. Amejokojira isia yatu orisaba emo abanae aribu eku abamejerei. Jesukirito ajotu isia yatu berekitane yatu nisanae. Dio oriaobojona ayakara are suatana yatu moakunarai. Are suatana inareraja tane yatu abakunarai. 3 Dio Kairamo Jesukirito Arima jakutai taisi isia yakeraja jae tane ribaki. Taisi akobe kaisia ajerame oko atae rijawara-mejereae. Jesukirito wabaerone nomininajame oko atae rijawara-mejereae. Jesú nomininajame oko taisi yawakayaja bajia. 4 Yatu nojokitane jakutai najamutuata ja. Dio tata orabaya. Yatu nojokitane jakutai ekoronaja. Mujotanaja. Wajanaja. Moau-bukitane jakutaisi yawakamejerei Dio oko rijawaramejereae. 5 Yatu nome abajame Dio oriajarata isia yatu yaoroya. Dio obojona aibajukanoko iyakaratae ya ayaju eku emusabakitane. Yatu obojona aibajukanoko jakutaisi eku bajukamejerei Dio yatu yaoroya. 6 Tiame yatu oriwakaya. Tiarone ama yatu ayakara mijaja yatu isanamataya. Tai ya erayana saba tai. 7 Waraoto anome aba jakutai burata simo kwarika. Burata simo jekunu isia ayakara miki-tane ja. Nome abayakutaisi ayakara mibune taeraja ejoboyakutai taisi amoara burata simo amoara kwarika. Burata simo ekorea. Nome abakitane jakutai ekoronaja. Yatu nome abayakutai taeraja ejobakore Dio yatu isia yakeraja jae tane ribate. Yatu airamo tane abate. Yatu raomata tane abate. Dio Jesukirito emusabakore tane abate. 8 Yatu Jesukirito minatanaerone are taisi obonoya. Mina-jarone isia nome abaya. Nome abayame kwana oriwakaya. Yakeraja oriwakaya. Kwana oriwakayame yatu aoriwaka ribu isia ribakomoni. 9 Yatu nome abayakutaisi aobojona Dio yatu aobojona ibajukanae. 10 Ateje Dio aobojona yakerame aobojona abanae yatu aobojona ibajukakitane. Dio kware arewaramo taisi isia rewarayaja obojona aibajukanoko isia renokoae. Yaorane naminakitane obonoae. 11 Kirito mate sanamatamoana jakore Kirito Amejokojira Dio kware arewaramo inaminae Kirito asanamata isia. Nokabuka Kirito yakeraja ejobakitane jakutaisi isia tatuma inaminae. Tiame Dio kware arewaramo sina tai tane mikitane najabuae. Amejokojira tatuma eku jakutai anao sinarijae. Asinarija katukakore tai tane naminakitane najabuae. 12 Tiarone Dio tatuma inaminae. Ribu jakutai tatuma sabena. Ribu jakutai kasaba. Yatu saba rewara jakutai, tai. Amejokojira Yakerajawitu ajarata najamutuatukamo jakutaisi eku yatu saba rewara yakerajasi rewarae. Tai ateje jakutaijase. Dio ainata-batuma taisi naminakitane kwana obonoya. 13 Tiame yatu anona isia yaorane obonobukotu. Obojona bakane nonakotu. Dio Jesukirito emusabakore Dio aobojona ayakara yatu moaubute. Moaubukitane jakutaisi yaorane yawakakotu. 14 Ateje yatu Dio naminamoana jaja obojona asirajasi eku abanae. Ama taisi eku abanaka jakotu. Nobotomo yakeraja jakutai oriai-ramotuma aribu eku abaya. Taisi monuka Dio aribu eku abakotu. 15 Yatu yejebuajakutai tai yakeraja. Yatu kokotukanea eku yakeraja nonayaja ubakotu, tia. 16 Ebe jabatajasi eku ribia: Ine yakeraja jame yakeraja jakotu, tia. (Lev. 11:44-45, 19:2, 20:7) 17 Dio waraoto anona nome toaya. Dio warao jisaka warao raisama kwarika abanaja. Yatu Dio isia Rima, tia. Tiame yatu mate tamaja raina eku ubayame Dio nojakitane ja. 18 Yatu ano-botuma nona amoara ekiraja nonayaja ubae. Yatu tuata namínae tiame nona amoara ekirajasi nonayaja ubae. Tiarone Dio yatu amoara abane yatu ejeronae. Amoara jakutai burata simo monu-kena. Ekoronaja. Burata joko monukena. Ekoronaja. 19 Amoara jakutai Jesú ajotu. Jesú ajotu amoara uriraja ja. Jesú obeja auka monuka wabae. Taisike yakerajawitu. Anana ekirawitu. 20 Mate raina ajiroma ebe jakore Dio aobojona abanae Kirito wabame-jerei. Tiarone yatu yakeraja ejobamejerei kaje sabuka Kirito inatabae. 21 Yatu Kirito aobojona Dio isia nome abaya. Kirito wabaerone Dio taisi enomininae. Airamo tane abanae. Dio anona aobojona yatu Dio isia nome abaya, Dio yawakaya tane. 22 Ama yatu Dio Amejokojira isia ribu nomeraja eku abaitane yatu aobojona bereae. Obojona bereae nome abamo eobo yao-rane obonokitane. Tiame yatu oriobonokitane ja kobe kokotuka isia, jarata kokotuka isia tane. 23 Yatu atanejese rijawarae. Tia-rone yatu airamotuma isimo rijawaranatanae. Yatu Dio aribu isimo rijawarae. Airamotuma jakutai wabaya. Dio aribu jakutai are riko. Are taerataya. 24 Jabataja Dio aribu isia ribia: Raina arao kokotuka jaka monuka. Warao ayakara kokotuka jaka atokoyo monuka. Jaka jakutai wajaya. Tokoyo jakutai nakaya. 25 Tiarone Airamo aribu are taerataya, tia. (Isa. 40:6-8) Tamaja ribu jakutai rewara yakeraja yatu saba rewara jakutai.
21 Tiame obojona asiraja kokotuka iabakotu. Imasibukitane kokotuka iabate. Obojona manamo jakitane iabate. Raisama kwarikakitane obonokitane iabate. Rejorokitane kokotuka iabate. 2 Jorosimo nakajiro monuka amijo yaorane najabukotu. Amijowitu jo ekiraja jakutaisi najabukotu yatu aobojona saba. Amijo najabukotu taisi isia irakitane. 3 Airamo akobe yatu isia raoberaja tane ejobonajakutaisi naminayame tametane nonakotu. 4 Airamo awere nabakakotu. Airamo jakutai joyo riko mo-nuka. Dio joyo mibune nisanae. Joyo jakutai amoara uriraja. Tiarone warao joyo tainae. 5 Yaturakate joyo riko monuka. Dio yatu isia janoko obojona saba nonakitane obonoya. Dio yatu saserotetuma tane abakitane obonoya orisaba. Saserote tane ejobaitane Jesukirito isia nobeanaka Dio aobojona eku jakutaisi moate. Nobeanaka jakutai obojona saba. Rijana Dio nonakitane jakutaisi eku abakotu. 6 Jabatajarakate taisi isia ribia: Janoko noika joyoira abayaine. Sion eku abayaine. Joyo jakutai mibune nisanaine. Tai amoara uriraja. Taisi isia nome abayakutai tomananaja, tia. (Isa. 28:16) 7 Yatu nome abamo jakutai yatu saba joyo amoara uriraja. Tia-rone nome abanaja jakutai tai Jabataja aribu eku nakaya. Jabataja taisi isia ribia: Janoko anonamo joyo tainae. Joyo tainajakutai tai janoko ajoyoira tane ejobonae, tia. (Rok. 118:22) 8 Atae Jabataja taisi isia ribia: Joyo jakutai omu esoakanoko tane ejobonae. Nakanoko tane ejobonae, tia. (Isa. 8:14) Tatuma ribu eku abanatanajame omu esoakane nakae. Dio ebe tane aobojona abanae. 9 Dio yatu mibune nisanae orisaba. Tai yatu airamo yatu asaserote tane. Yatu taisi anobotomo jame yaturakate saserote-tuma. Yatu warao emo abánae tiaja Dio saba. Dio yatu amoara abane nisanae. Dio tane nonae yatu taisi anona yakeraja isia rewaramejerei. Dio yatu yejebuae imajana ekumo ejobane Dio ajokoma yakerajasi eku yarumejerei. 10 Yatu ebe warao amoara ekiraja jaja monuka. Ama yatu Dio awarao tane ejobonae. Ebe jisakarakate akobe yatu isia ajeraja ejobonatanae. Ama Diojase akobe yatu isia ajera. 11 Mawarao ine obonoyakutai, ine yatu reiriaine. Yatu tamaja ina araoana monuka. Yatu sanuka saba ina raisama eku ubayakutaisi monuka. Tiame tejo aobojona eku abanaka jakotu. Yatu atejo aobojona yatu aobojona isiko orikubaya. 12 Judioana amujaba yakeraja nonakotu. Tatuma ama yatu kware abaya yatu asiraja anonamo monuka. Ama yatu yakeraja nonayakore mitane Dio isia, Yakeraja jae, tane ribate. Dio ribu nome toakore tatuma yakeraja jae tane ribate. 13 Raina eku airamotuma abaubúae tiaja ja. Tatuma aribu kokotuka eku abakitane ja Kairamo aobojona. Ina airamowitu aribu eku abakitane ja. 14 Kobenajoro aribu eku abakitane ja. Airamo-witu kobenajoro tane abanae asirajasi anonamo isanamatame-jerei. Kobenajoro tane abanae yakerajasi anonamo raomata tane abamejerei. 15 Dio aobojona jakutai tai tamaja. Yatu yakeraja nonamejerea obojona ekirakutaisi arewara etuwarakitane. Tatuma naminanajarone rewaraya. 16 Raisama akajotabuana monuka nonakotu. Tiarone ribunaka jakotu: Oko raisama akajotabuanatiji asiraja nonakitane are yakera, tanaka jakotu. Yatu Dio akajotabutuma rijana. Dio akajotabu-tuma monuka nonakotu. 17 Warao kokotuka jakutaisi raomata tane abakotu. Nome abamo obonokotu. Dio nojakotu. Ina airamowitu raomata tane abakotu. 18 Nebu, yatu araoto aribu eku abakotu. Tatuma raomata tane yaorane abakotu. Arotu yakeraja jakutai musaberaja jakutai tane raomata tane abakotu. Arotu asirajarakate raomata tane abakitane ja. 19 Warao jisaka aobojona asiraja ekirarone sanamatate tai. Tane sanamatayaja taeratate Dio aobojona eku abakitane jame. Tane sanamatakore Dio saba yakeraja ejoboya. 20 Tiarone kawanamo asiraja nonate tai. Asiraja nonajakutaisi aobojona isanamatate. Tane taeratayaja taeratakore amoara kasi-kaja? Tiarone yakeraja nonaitane taeratayaja sanamatakore Dio saba yakeraja ejobate. 21 Tiame Dio yatu yejebuae. Kirito yatu kware sanamatae yatu taisi sitamejerei, monukajase nonamejerei tane. 22 Tai jakutai asiraja nonanajawitu. Aroko eku ribu imasibiaja jakutai ekira. (Isa. 53:9) 23 Eobo Kirito isanakore riboto ribu asiraja ribunatanae. Isana-matakore orimoara abatine tanatanae. Ribunaka oriaobojona Dio amojeku abanae. Diosike yaorane ribu nome toaya. 24 Kirito kuru isia oriatejo eku kaobojona asiraja konaruae. Konaruae oko obojona asirajasi saba wabane nomeraja nonayaja ubamejerei. Eobo Kirito eboisiae yatu aobojona bajukamejerei. 25 Ateje yatu obeja monuka mumoni tane jakanae. Tiarone ama Kiritoata bajinae. Kirito jakutai taisike obeja ayaorotu. Tai yatu aobojona yaoroya.
31 Niborabakatuma, yatu sabarakate ribu ja. Yatu orianiborama akajotabu tane bajekotu. Yatu anibo kawanamo ribu nome abamoana ja tai. Nibo jakutai atatu anona mitane nome abate tai tatu ribu isia ribunajarone. 2 Yatu anona tomanerena jakutaisi mite. Yatu tatuma yatomaneteakore mite. 3 Yakeraja orisabaki-tane jiakawitu orisabanaja. Obojonarakate orisabaya. Kwajio eburojokitaneana. Burata simonona oriisia abakitaneana. Jiaka amoara taerajasi orisabakitaneana. 4 Obojonasike orisabate. Obojona raoberaja orisabate. Obojona inareraja orisabate. Obo-jona jakutai ekoronaja. Dio saba amoara jajawitu ejoboya. 5 Ebe ateje tatu Dio saba emo abánae tiakutai tametane orisabanae. Tatu jakutai ayawaka Dio isia jaja. Aniboto akajotabu eku abanae. 6 Sara jakutai tane nonae. Anibora Abraham jakutaisi aribu eku abanae. Isia Mairamo tane ribunae. Yatu yakeraja nonane, retane tororoyajenaka tane, yatu Sara anobotomo monuka ejobate. 7 Ama tirabakatuma yatu sabarakate ribu ja. Yatu atatu isiko musaberaja ubayaja yatomaneteaja jakotu. Tatu jakutai taerena. Dio yakeraja nonayaja obojona jiro niboto moae. Monukajase obojona jiro tatusi moae. Tiame tametane nonakotu yatu akwai ribu jakutai yakeraja Dioata nabakamejerei. 8 Tane yatu kokotuka obojona jisaka eku ubakotu. Yatu akobe oririboto ajeraja ejobakotu. Oriwarao tane oriobonokotu. Orisaba saneraja ejobakotu. Eobo yajoto oriabakotu. 9 Yatu isiko asiraja nonayarone riboto asiraja nonanaka jakotu. Yatu isia kayamoni tane ribakore riboto kayamoni tane ribunaka jakotu. Tiarone yakeraja tane abakotu. Dio yatu yejebuae yatu yakeraja tane abakitane. Tiame eobo yakeraja tane abakotu. 10 Jabataja taisi isia ribia: Ubakitane obonoyakutai, ya ekeiraja mikitane obonoya-kutai tane Tai oriajono yaorokitane ja asiraja ribunaka jamejerei. Oriaroko yaorokitane ja tona ribunaka jamejerei. 11 Nona asirajasi emo bajekitane ja yakerajasi nonakitane. Inareraja bajekitane obonokitane ja, are inareraja bajekitane. 12 Airamo warao nomerajasi yaoroya. Kwai ribakore aribu nokoya. Tiarone asirajasi nonayakutai Airamo tatuma riboto. (Rok. 34:12-16) 13 Yatu are yakeraja nonayakore sina yatu isiko asiraja nonate bajama? 14 Tiarone yatu anona nomerajasi aobojona sanamatane are ekeiraja jate. Raisama nojanaka jakotu. Retanaka jakotu. (Isa. 8:12) 15 Tiarone yatu aobojona isia Kirito Airamo tane abakotu. Ama yatu ayawaka ja. Eobo yatu renokote tai: Katukeme yawakaya bajama? tate tai. Warao kokotuka riboto ribakitane oriiyaka-ratakotu. Tiarone riboto ribiaja raoberaja yatomaneteaja tane ribate. 16 Yakeraja nonakotu yatu aobojona yakeraja ejoba-mejerei. Takore yatu isia asiraja rewarayakutai tatuma yatu anona yakerajasi mite. Yatu Kirito isia nome abayame yakeraja nonaya. Tatuma taisi mine yatu isia tona ribunajame tomanate. 17 Asiraja nonane sanamatakitane asira. Tiarone yakeraja nonane sanamatakitane bajuka Dio tane obonokore. 18 Wajiabara Kiritorakate sanamatae. Jisata wabayaja kaobo-jona asirajasi amoara abanae. Kirito nomeraja jakutai oko nome-rajena jakutaisi kware sanamatae. Kakware sanamatae Dioata kakonarukitane. Nomewitu atejo wabae tiarone Amejokojira taisi enomininae. 19 Taisi ebika Amejokojira isia narune rewa-rae. Obojona mojoju jakutaisi saba rewarae. 20 Obojona mojoju jakutai ebe atejeyatukamo. Noé jakore tatuma Dio aribu eku abanatanae. Noé waera nonayakore Dio eobo yaorane yawakae nome abamejerei. Warao waera eku waba jekenae. Asebe mojo-abasi kware rijanamowitu. Jo isia yakeraja bajinae. 21 Taisi monuka asita tane ejoboya. Joni ekobakitane jakutai tairakate ama kaobojona ibajukaya Jesukirito anominina aobojona. Tiarone tejo anana jakutaisi berekitaneana. Kaobojona yakeraja bajene Dio aobojona eku ejoboya. 22 Jesú najamutuata yaburuae. Dio amojonome tajasaba ja. Tata Dio ainatabatuma jakutaisi Airamo tane ejobonae. Airamotuma Airamo tane ejobonae. Airamo sabukatuma Airamo tane ejobonae.
41 Kirito atejo eku kakware sanamatayaja obonobuae. Kirito obonobuajakutaisi monuka oriyaoroyaja obonobukotu. Kirito asanamata isia obonobiakutai obojona asirajasi eku ubayaja baji-naja. 2 Mate tejo eku ubayaja Dio aobojona eku abayaja ubaya. Tejo aobojona eku abayaja ubanaja. 3 Ateje yatu Judioana jakutaisi anona eku nonae. Tane nonakitane asinarija kaikanae rijana. Yatu tatusebeaja, nibosebeaja tane asirajawitu nonae. Obojona asirajasi eku abanae. Awabaubuae. Nonakitaneana jakutaisi nonae. Arija jobibuae. Jebusita yatu saba asiraja jakutaisi yatomaneteae. 4 Ama warao Dio naminamoana jakutai yatu renokoya: Yatu katukeme kamuaraisatanaja, tia. Asiraja uriraja nonakitane katukeme kamuaraisatanaja, tia. Yatusike asira, tia. 5 Tiarone Dio tatuma aribu nome toate. Dio warao riko jakutaisi aribu nome toakitane iyakarataya. Waba jakutaisi aribu nome toakitane iyakarataya. 6 Waba jakutaisi saba rewara yakerajasi rewarae. Saba rewarae aobojona Dio aobojona monuka are ubamejerei. Saba rewarae tatuma aribu warao eobo aribu monuka nome toakitane. 7 Amasike ya ayaju kawere rijana. Tiame obojona bakakotu. Are kwai ribakotu. 8 Ribu eobo kwarika jakutai tai tamaja: Kwana oriobonokotu. Oriobonoyaja raisama aobojona asiraja erarone kware barinaja. 9 Yatu ajanokoata nabakayakutaisi etu-warakotu. Yatu aobojona asiraja tane eribubunaka tatuma etuwarakotu. 10 Dio obonobu raisa raisa yatu moae. Obonobu Dio yatu moajakutaisi kaika eobo sanetakotu. Dio aobojona ayakara jakutai kokotukanea saba. Yatu Dio aobojona ayakara ayaoromo monuka. Yaoromo yakeraja tane eobo sanetakotu. 11 Ribiakutai Dio aribu eku ribakunarai. Sanetayakutai Dio jarata moayakutaisi eku sanetakunarai. Kokotuka nonakotu Dio airamo tane ejobamejerei. Jesukirito aobojona airamo tane ejobate. Jesukirito jakutai are saba airamo jakunarai. Are saba ajara taeraja jakunarai. Amén. 12 Mawarao ine yatu obonoya. Yatu ayakara kwana mikore retanaka jakotu. Ebe takore tamaja ribu ekira, tanaka jakotu. 13 Tiarone oriwakakotu. Yatu Kirito isia sanamataya. Dio Kirito airamo tane emusabakore kwarika oriwakakitane ja. 14 Kirito aobojona yatu ekotubukore yatu ekeiraja bajia. Dio Amejokojira yakerajawitu jakutai yatu kaika bajiame yatu ekeiraja bajia. Eobo Dio Amejokojira isia asiraja ribia, tiarone yatu tanaja. Yatu Dio Amejokojira airamo tane abaya. 15 Yatu kawanamo isanamatate tai. Tiarone obojona asirajasi aobojona isanamatanaka jakunarai. Akobaka tane isanamatanaka jakunarai. Biterijisa tane isanamatanaka jakunarai. Asirajasi anonatu tane isanamatanaka jakunarai. Eobo anona eku anakasetu tane isanamatanaka jakunarai. 16 Tiarone yatu Kirito sabasabamotiji yatu isanamatakore tomananaka jakotu. Tiarone yatu Kirito awai warayame, Dio yakeraja jae, tane ribakotu. 17 Ama rijana asinarija eku nakae ribu nome toakitane. Wajiabara Dio sabasabamo jakutaisi aribu nome toate. Karibu nome toane eobo Dio arewara yakerajasi eku abamoana jakutaisi aribu nome toakore tatuma katukane ejobate bajama? 18 Nomeraja jakutai aobojona moniraja bajukate. Amasike Dio ayatomanetemoana jakutai, asirajasi anonatu jakutai tane katukane ejobate bajama? (Rei. 11:31) 19 Tiame Dio aobojona sanamatayakutai suatana yakeraja nona-kitane ja. Aobojona Dio amojeku abakitane ja. Diosike kokotuka anonatu. Tai oriaribu eku abaya.
51 Ama iramotuma yatu kawana jakutaisi reiriaine. Ine tatuma monuka iramo rijana. Kirito sanamatayakore miaine. Nokabuka Dio Kirito airamo tane emusabakore oko taisi isiko airamo tate. 2 Dio aobejatuma yaorokotu. Yatu obeja ayaoromo monuka yatu amojeku obeja abanae yaoromejerei. Obojona bakane yaorokotu Dio aobojona eku abayaja. Raisama aribia monuka yaoronaka jakotu. Wite oriaobojonamo yaorokotu. Burata najabiaja yaoronaka jakotu. Obojona bakane yaorokotu. 3 Obeja yatu amojeku jakutaisi airamo tane oritoanaka jakotu. Tiarone yakeraja nonakotu obeja yatu sitamejerei. 4 Takore yaoromo Airamo naone amoara yakeraja yatu moate. Amoara jakutai wajanaja. 5 Ama ribu nebu saba. Yatu nebu jakutai iramotuma aribu eku abakotu. Kokotuka oriakajotabu tane ejobakitane ja eobo yajoto tane oriabayaja. Jabataja taisi isia ribia: Eobo kwarika tane oriabayakutai Dio tatuma riboto ejo-boya. Tiarone eobo yajoto tane oriabayakutai Dio oriaobojona ayakara tatuma moaya. (Rei. 3:34) Tiame raisama yajoto tane oriabakotu. 6 Dio ajara taeraja jakutaisi amujaba eobo yajoto tane oriabakotu. Takore asinarija eku nakakore Dio yatu airamo tane abate. 7 Dio yatu sanetayame yatu aobonobu erajasi Dio amojeku abakotu. 8 Orinaminane seorobukotu. Jebuira jakutai yatu isiko asiraja. Tai karamane tobesimo monuka kuitaya. Kokotukanea kujuya waraoto iekorakitane najabiaja. 9 Jebuira ribotakotu. Nome abayaja taeraja bajekotu. Yatuwitu sanamatanaja. Nome abamo eobo raina kokotukanea monukajase sanamataya. Taisi naminakotu. 10 Yatu sanuka sanamatakore Dio oriaobojona ayakara koko-tuka isia yatu sanetakunarai. Tai yakeraja tane yatu abate. Yatu aobojona taeraja tane abate. Yatu ajara taeraja tane abate. Tai yatu taeraja bajemejerete. Dio are airamo tate. Tai kayejebuae are taisi isiko yakeraja bajemejerei Jesukirito eku. 11 Tai are saba airamo tane bajekunarai. Are saba ajara taeraja jakunarai. Amén. 12 Silvano masanetae karata jabatayaja. Taisike Dio aribu eku abatu masaba. Yatu reirikitane sanuka jabataine. Yatu isia ribi-aine: Dio tametane nonayakutai taisike Dio aobojona ayakara nomeraja. Taisi eku bajekotu. 13 Dio yatu mibune nisanae. Taisi monuka ikeresia arao Babilonieta jakutaisi mibune nisanae. Tatuma yatu isia yake-raubiara abaya. Mauka Marcos yatu isia yakeraubiara abaya. 14 Oriobonoyaja oriamukaba orone oriisia yakerara abakotu oriwaraotiji. Yatu kokotuka Jesukirito aobojona eku jakutai yatu inareraja tane bajekunarai. Amén.