1 CORINTO
11 Ine Pablo. Dio oriaobojona eku mayejebuae Jesukirito aina-taba tane mabakitane. Sóstenes, nome abatu jakutai, tai maisiko. 2 Takore rijana Dio aikeresia Corinto tata jakutaisi saba jabatayaine. Yatu Dio saba emo abánae tiakutaisi saba jabatayaine. Dio Kirito Jesú eku yatu emo abanae orisaba. Dio yatu yejebuae orisaba emo abakitane. Eobo kokotukanea Kai-ramo Jesukirito awai waraya. Dio jakutai tai tatuma Airamo. Okorakate Kairamo tane. 3 Dio Karima jakutai, Kairamo Jesu-kirito jakutai tane tatuma aobojona ayakara yatu moakunarai. Inareraja tane yatu abakunarai. 4 Yatu aobojona Mario isia yakeraja jae tane ribiaine rijana. Dio aobojona ayakara yatu moae Kirito Jesú isia. 5 Yatu Kirito isia yaorane bajukánae tiame Dio isia yakeraja jae tane ribiaine. Yaorane bajukanajame Kirito aobojona yatu inamina kokotuka naminaya. Yatu yaorane rewarakitane naminaya. 6 Kirito isia rewara jakutai yatu eku nomeraja ejobonae. 7 Yatu yaorane yawakaya Kairamo Jesukirito yatu oriemimejerei. Yawakayakore Dio yatu kokotuka moae ekirajenaka jamejerei. 8 Ya ayaju saba yatu taeraja tane abate Kairamo Jesukirito asinarija eku obojona asiraja yatu kware abanaka jamejerei. 9 Dio oriaribu eku abaya. Tai yatu yejebuae Aukama amuaraisatamejerei. Auka jakutai tai Jesukirito Kairamo. 10 Mawarao, Kairamo Jesukirito aribia yatu ebiaine. Obojona jisaka eku abakotu. Jisajisayanaka jakotu. Tiarone jisaka tane yakeraja bajekotu. Obonobu jisaka eku, obojona jisaka eku tane bajekotu. 11 Mawarao, Cloetuma yatu isia masaba rewarae. Yatu oriaribu kwarikayama. 12 Ine yatu isia ribate: Yatu tametane jisaka jisaka ribiema. Pablo sabasabamo ine, tiema. Araisa, Apolos sabasabamo ine, tiema. Araisa, Cefas sabasabamo ine, tiema. Araisa Kirito sabasabamo ine, tiema. 13 Amasike yatu kawanaya Kirito jisajisa jara bajama? Pablo yatu kware kuru isia esijariaera? Yatu Pablo aribia joni ekobu-naera? 14 Yatu kawanamo Crispo, Gayo tane ekobuaine. Atae jisakarakate ekobunatanaine. Dio isia yakeraja jae tane ribiaine. 15 Ama Pablo aribia mekobunae yatu tane ribakomoni. 16 Takore Estéfanas awaraoto, tairakate ekobunaine. Ine ribia: Raisama ekobunaka jaja monúkau, tiaine. 17 Kirito ekobamejerei mainatabanatanae. Tiarone rewara yakerajasi rewaramejerei mai-natabae. Ribu urirajasi isia rewarakore inamina Kirito awaba kuru isia jakutai tai eko ejobakuna. Tiame ribu urirajasi isia rewaranajine. 18 Ribu Kirito awaba kuru isia jakutai tai rijayakutaisi saba ribu buretaja ejoboya. Tiarone ribu jakutai oko kaobojona bajukayakutaisi saba Dio ajarata ja. 19 Jabataja taisi isia ribia: Musaberajasi ainamina iekoratine. Akwa jaja jakutai, akwa emonitine, tia. (Isa. 29:14) 20 Musaberaja jakutai katukeme? Inaminatu jakutai katu-keme? Araisama aribu akwarikaubutu jakutai katukeme? Tatuma ama ya saba. Raina arao naminajakutai Dio taisi eburetae. Taneanara? 21 Raina arao oriainamina isia Dio naminanatanae. Dio musaberaja jame tane abanae. Rewara yakeraja jakutai tai raina araoto saba ribu buretaja monuka. Tiarone rewara isia Dio nome abayakutaisi aobojona ibajukaya. Taisike Dio aobojona ekuwitu. 22 Judiotuma sinarija mikitane obonoya. Grecia arao naminakitane najabia. 23 Tiarone oko Kirito isia rewarayaoko. Kirito kuru isia esijaríae tiaja wabae tane rewarayaoko. Kirito isia rewarakore Judiotuma saba omu esoakanoko ejoboya. Eobo saba ribu buretaja ejoboya. 24 Tiarone Dio Judiotuma kawanamo yejebuae. Grecia araoto kawanamo yejebuae. Kirito tatuma saba Dio ajarata, Dio ainamina tane ejoboya. 25 Dio buretaja jakore are waraoto kwarika musaberaja ejoboya. Dio taerena jakore are waraoto kwarika taeraja ejoboya. 26 Mawarao, ateje Dio yatu yejebukore yatu katukayaja jaja? Taisi isia obonobukitane ja. Yatu kawanaya raina ainamina musaberaja erajena. Yatu kawanaya ajara taeraja jakutai erajena. Yatu kawanaya obojona ja jakutai awarao erajena. 27 Tiarone raina araoto saba buretaja jakutai Dio taisi nisanae. Taisi nisanae musaberaja jakutai tomanamejerei. Raina araoto saba taerena jaku-tai Dio taisi nisanae. Taisi nisanae taeraja jakutai tomanamejerei. 28 Raina eku amoara ekirakutai Dio taisi nisanae. Eobo taina-jakutai Dio taisi nisanae. Ekirakutai Dio taisi nisanae, ja jakutai ekiraja bajemejerei. 29 Tiame jisakarakate Dio amujaba ine airamo tane ribakomoni rijana. 30 Tane Dio aobojona yatu Kirito Jesú eku abanae rijana. Dio taisi abanae kasaba. Tai musaberaja tane kasaba abanae. Enometatu tane kasaba abanae. Dio saba emo abatu tane kasaba abanae. Amoara abane ejerotu tane kasaba abanae. 31 Tiame Jabataja ribia: Ine airamo tane ribunaka jakunarai. Kirito Mairamo tane ribakunarai, tia. (Jer. 9:24)
21 Mawarao, ine yatuata naruaine Dio isia rewarayakutai taisi rewarakitane. Narune ribu urirajasi isia inamina taerajasi isia tane rewaranatanaine. 2 Yatuata narune maobojona taeraja abanaine yatu kawanaya Jesukiritowitu isia rewarakitane. Kirito kuru isia esijariae tane rewaraine. Ribu raisama rewaranatanaine. 3 Yatuata narune yatu kawanaya taerena monuka kujuaine. Kwana retaine. Tororoaine. 4 Ine ribiaja, o ine rewarayaja ribu-witu rewaranatanaine. Raina ainamina rewaranatanaine. Ine rewarakore Dio Amejokojira maribu sanetae. Dio ajarata maribu sanetae. 5 Yatu nome abakore waraoto ainamina isia nome abanaka jamejereaine. Tiarone Dio ajarata isia nome abameje-reaine. 6 Nome abayaja iramo jakutai taisi saba ribu musaberajasi rewarayaoko. Inamina jakutai warao ama jakutaisi isimoana. Airamo ama jakutaisi isimoana tane. Tatuma ekorea. 7 Tiame Dio ainamina rewarayaine. Dio ainamina jakutai tai musaberaja. Tai ribu rijisa. Tai erijísae tiaja. Ateje raina ajiroma ebeatukamo Dio ainamina abanae oko yakerajawitu tane ejobamejerei. 8 Airamo ama jakutai jisakarakate tamaja ribu rijisa jakutaisi naminanatanae. Tatuma naminakore Airamo yakerajawitu jaku-tai kuru isia esijarinatakuna. 9 Amasike Jabataja taisi isia ribia: Dio yakerajasi iyakaratae Dio obonoyakutaisi saba. Warao mimoana jakutai Dio taisi iyakaratae. Warao nokomoana jakutai Dio taisi iyakaratae. Warao obonobumoana jakutai Dio taisi iyakaratae, tia. (Isa. 64:4) 10 Dio iyakaratajakutai Dio Amejokojira taisi kainaminae. Mejokojira jakutai kokotuka yaorane mija. Dio aobonobu eku jakutai tairakate mija. 11 Takore waraoto kawanaya sina waraoto aobonobu nami-naya? Waraojase naminanajara? Taisi monukajase sina Dio aobonobu naminaya bajama? Dio Amejokojira naminanajara? 12 Oko raina aobojona jakutaisi oanaja. Dio Amejokojira isimo jakutai taisi oanaeko. Taisi oanaeko Dio aobojona ayakara kaika kamoajakutai taisi naminakitane. 13 Dio kamoajakutaisi isia rewarayaoko. Warao musaberajasi aribu isia rewaranajaoko. Tia-rone ribu Mejokojira Yakerajawitu inaminayakutai taisi eku rewarayaoko. Kainamina ama jakutai Mejokojira ebe inaminaja-kutaisi isiko orimonuka jakitane ja. 14 Warao akobe are jakutai tai Dio Amejokojira isimo oanaja. Kobe are jakutaisi saba buretaja. Oakomoni. Kobe jiro isia oakitane ja. 15 Warao akobe jiro jakutai, tai kokotuka nome toaya. Tiarone jisakarakate kobe jiro arotuma aribu nome toanaja. 16 Tiame Jabataja ribia: Sina Airamo aobonobu naminae? Sina Airamo reirite? tia. (Isa. 40:13) Tiarone Kirito aobonobu keku ja.
31 Mawarao, yatu mate warao obojona are jaja monuka. Obo-jona jiro jakutaisi monuka yatu saba rewarakomoni yatu mate Kirito eku jorosimo monuka jame. 2 Ebe amijo yatu moaine. Najoro moanatanaine, mate najorokomoni jame. Amarakate yatu mate najorokomoniraji! 3 Matewitu yatu aobojona are monuka. Miajitayakore yatu aobojona areanara? Orisabajene yatu orieji-sajisayakore yatu aobojona areanara? Mate warao yawatanuka monuka nonanajara? 4 Jisaka ribia: Ine nomewitu Pablo sabasa-bamo ine, tia. Araisa ribia: Ine Apolos sabasabamo ine, tia. Tane takore mate yatu warao are jakutaisi monukenara? 5 Takoresike Pablo sina tai takore? Apolos sina tai? Oko Dio akajotabutuma. Kaobojona yatu nome abanae. Airamo yaota kamoae. Yaota kamoajakutai taisi eku nonaeko. 6 Ine namuaine. Apolos jo isia namuna yanajoae. Tiarone eirajakutai tai Dio. 7 Tiame anamutu jakutai amoara ekira rijana. Ayanajotu jakutai tairakate amoara ekira. Tiarone Dio eiratu jakutai, taisike amoara uriraja ja. 8 Anamutu jakutai, ayanajotu jakutai tane, orimonuka. Jisaka jisaka ayaota kaika amoara moate. 9 Oko takore Dio isiko yaotamo. Yatu Dio arajikaba rijana. Yatu Dio ajanoko rijana. 10 Ine moijotu monuka janoko noika aba abanaine. Dio aobo-jona ayakara kaika abanaine. Takore raisa janoko araimo nonaya. Nonayakutai asiraja nonaterate! 11 Noika abánae tiakutai tai Jesukiritowitu. Raisama abakomoni. 12 Noika aba araimo nonaya. Nonayakutai burata simo abaya tai. Burata joko abaya tai. Joyo amoara urirajasi abaya tai. Rau abaya tai. Jakawaja abaya tai. Bebe ajokonamu tane abaya tai. 13 Takore Dio jisaka jisaka ayaota ayakara mite. Ya mate naokitane jakutaisi eku ayakara mite, jekunu isia. Jekunu warao kokotuka ayaota ayakara mite. 14 Ayaota nonajakutai tai bajekore, amoara moate. 15 Ayaota rokakore amoara rijate. Tiarone anonatu rokaturuaerone aobo-jona bajukánae tiaja bajete. 16 Yatu Dio ajanokoanara? Dio Amejokojira yatu eku ubaya. Yatu taisi naminanajara? 17 Dio ajanoko iekoreakutai, Dio taisi iekorate. Dio ajanoko Dio saba emo abánae tiaja. Janoko jakutai tai yatu. 18 Yatu oriimasibunaka jakotu. Yatu kawanamo ine raina aobo-jona ama jakutaisi isia musaberajaine tane ribunaka jakunarai. Ine naminanaja tane ribakunarai. Tane jakore musaberaja tane ejobate. 19 Raina araoto ainamina jakutai tai Dio saba buretaja. Jabataja taisi isia ribia: Musaberaja naminayame Dio tatuma bukanae, tia. (Job 5:13) 20 Atae ribia: Airamo musaberajasi aobonobu naminaya. Musaberaja naminayarone aobonobu jakutai eko, tia. (Rok. 94:11) 21 Waraoto ayakara warane sabasabamo jakitane yatu saba ya-kerena jakuna. Obojona kokotukanea jakutai yatu saba. 22 Pablo jakutai, Apolos jakutai, Cefas jakutai, tatuma yatu saba. Raina jakutai, riko jakitane jakutai, waba jakutai tatuma yatu saba. Ama ja jakutai, mate jakitane jakutai, tai kokotuka yatu saba. 23 Tiarone yatu Kirito sabasabamo. Kirito jakutai Dio sabasa-bamo.
41 Tametane kaisia obonobukotu: Tatuma Kirito anebu. Ta-tuma Dio aribu rijisa jakutaisi ayaoromo. Tane obono-bukotu. 2 Amasike, ayaoromo jakutai yaota arotuma aribu eku abakitane ja. 3 Yatu maribu nome toakore masaba amoara ekira. Nome toanoko arao maribu nome toakore tairakate masaba amoara ekira. Inerakate oriaribu nome toanaja. 4 Makware abakitane ekira monúkau, tiaine. Tiarone tamajasi aobojona maisia Tai nomeraja, tanaja. Maribu nome atoatuwitu jakutai, tai Airamo. 5 Mate maribu nome toanaka jakotu. Mate asinarija ekuana. Airamo naokore nome toakitane yakera. Ama imajana eku erijisaja jakutai, taisi sinajarate. Waraoto aobojona sinajarate tane. Yakeraja jakore Dio taisi isia yakeraja tane ribate. 6 Mawarao, tametane rewaraine yatu kasitamejerei. Masitamejerei, Apolos sitamejerei tane rewaraine. Yatu jabatajasi ekuwitu nonanaminamejerei rewaraine. Yatu warao jisaka warao raisama kwarika abanaka jamejerei rewaraine. Tane nonayaja yatu oriaribu kwarikaya. 7 Sina airamo tane jiabanae? Iji ja jakutai jimoanatanaera? Jimoakore iji katukeme manona tia bajama? 8 Yatu jajinaubuae tai. Yatu rijana burata arao tai. Komi yatu airamowitu ejobonae. Nomewitu nome airamo jakunako! Takore oko yatu isiko kajotabukuna! 9 Oko inatabatuma jakutai, Dio kokotuka ayaju tane kabanae, tiaine. Waba saba monuka kabanae. Raina arao kamimejerei kabanae. Dio ainatabatuma kamimejerei warao kamimejerei tane kabanae. 10 Kirito aobojona oko bure-taja, tiarone yatu naminamoraji bajama! Oko joteraja, tiarone yatu taerajaraji bajama! Yatu isia tai raomata, tia. Tiarone katai-naya. 11 Ama saba nojeraoko, jobiajera, waraojoro tane. Kaja-noko ekira. Kaisanamataya. 12 Kwana yaotayaoko, kamojo isia. Kaisia asiraja ribiarone, oko riboto yakeraja ribiaoko. Kaisana-matayarone, oko taerataya. 13 Kaisia asiraja ribiakore aobojona iabamejereaoko. Ama saba oko raina aweboto, kokotuka ataina tane. 14 Ine tamajasi jabatayakutaisi aobojona yatu tomanamejere-najine. Tiarone yatu manobotomo tane ine obonoyame yatu reiriaine. 15 Kirito isia yatu ainaminamo asebe sinarijairatuma mojoreko tai. Tiarone yatu arima jisakawitu. Yatu Kirito Jesú eku rewara yakerajasi isia manobotomo tane ejobonae. 16 Tiame yatu reiriaine masitamejerei. 17 Tiame Timoteo yatuata inatabaine. Tai mauka ine obono-yakutai. Airamo aribu eku abaya. Ine Kirito eku nonayakutai taisi yatu saba rewarate. Ine ikeresia kokotuka eku inaminayakutai tai monukajase Timoteo taisi yatu inaminate. 18 Yatu kawanaya maisia rewaraya: Tai naonaja, tia. Tiame tatuma airamo tane oritoaya. 19 Tiarone yatuata rubujiraja narutine, Airamo tane obonokore. Takore narune, airamo tane oritoayakutai taisi naminatine. Aribu isia naminanatatine, tiarone ajarata isia naminatine. 20 Dio arujuna rujuyakutai ribuwituana. Tai jarata. 21 Yatu katukane obonoya? Rau isiko narutera ine? O yatuata obonoyaja raoberaja tane narute? Kasikaja yatu obonoya?
51 Amasike yatu kawanaya asirajasi anonatu jaeyama. Tai arimasi atirasi isiko ubayema. Taisi anona monuka Judioana kawanaya ekirawitu. 2 Tiarone yatu are airamo tane oritoayaraji bajama! Yatu onakuna. Tane anonatu jakutai yatu kawanamo emo inatabakuna. 3 Takore matejo yatu emorone, maobojona yatu kaika ja. Ine yatu kaika monuka asirajasi anonatu aribu nome toanaine rijana. 4 Yatu Kairamo Jesukirito aribia orikware nakakore maobojona yatu kaika bajia monuka. Kairamo Jesukirito ajarata kaisiko ja. 5 Jesukirito ajarata kaisiko ja asirajasi anonatu jakutai Satanás amojeku abamejerei. Atejo ekorate tiarone aobojona bajukate Airamo asinarija eku. 6 Yatu airamo tane oritoayakore yakerena. Tuata namínae tiakutai yatu taisi nokonajara? Arina akwaruta arina kokotuka ejokojokoya. Tane nokonajara? 7 Akwaruta nobo jakutai ebo-toya. Webotakotu. Webotaitane yatu arina jiro inamóae tiakutai ejobate. Takore kwaeaba arina akwaruta ekiraja jakutaisi monuka ejobate. Kwaeaba aobeja kasaba jakutai tai Kirito. Kaobojona taisi nae. 8 Tiame Oriwaka Kwaeaba oriwakaki obonobu nomerajasi isiko ribu nomerajasi isiko tane. Arina jiro inamóae tiakutai tatuma sitaya. Obojona asirajasi isiko, nona asirajasi isiko tane oriwakanaka jaki. Akwaruta nobo jakutai tatuma sitaya. 9 Yatu saba karata jabataine. Taisi eku yatu saba jabataine tatusebe isiko kujunaka jamejerei, nibosebe isiko kujunaka jame-jerei tane. 10 Raina araoto isia rewaranajine. Tatuma kawanaya tatusebe ja. Nibosebe ja. Are obonomo ja. Imasibumo ja. Diosita ayatomanetemo ja. Tatuma emo bajekitane yatu raina ekumo ejobakitane jakuna. 11 Tiarone nome abatu tiakutai, taisi isia jabataine. Tai nibosebe jakore o tatusebe jakore asira. Are obonotu jakore asira. Diosita ayatomanetetu jakore asira. Raisama isia asiraja aribatu jakore asira. Awabatu jakore asira. Biterijisa jakore asira. Taisi isiko najoronakawitu jakotu. 12 Yakareku jakutai, taisi aribu nome atoatuana ine. Dio tatuma aribu nome toaya. Yatu kawanaya jakutai, yatu taisi aribu nome toanajara? 13 Tane asirajasi anonatu yatu kawanaya jakutai, taisi emo inatabakotu. (Kaj. 17:7)
61 Yatu kawanamo jisaka raisama kware abakitane obonone, obojona nomerajena jakutaisiata naria mojoro? Ribu nome toakitane warao Dio saba emo abánae tiajasiata narunaja mojo-ro? 2 Warao Dio saba emo abánae tiaja raina araoto aribu nome toanatatera? Yatu raina araoto aribu nome toate. Tiaja yawa-tanuka sanuka nome toakomonianara? Toakitane yatu amoara ekira mojoro? 3 Oko Dio ainatabatuma kwaimo jakutai taisi aribu nome toate. Yatu taisi naminanajara? Atae kwarika ribu ama jakutai taisi nome toanatatera? 4 Ama jakutaisi nome toakitane jakore, nome atoatu tane sinama abaya yatu? Ikeresia eku amoara ekirakutaisi abaya mojoro? 5 Yatu atomana jakotu. Yatu kawanaya musaberaja jaja jisaka janajara? Ekirawitu mojoro? Jakore taisi abakuna oriawaraoto aribu nome toamejerei. 6 Tia-rone ribu nome toayaja nome abamomana oririboto ejobane ribu nome toakitane nome abamoana tata naria mojoro! 7 Tiarone rijana yatu orikware abakore yatu amoara nomewitu ekoroya. Yatu isia asiraja nonakore, inareraja bajekuna. Yatu imasibiaja yatu aunukamo erijisakore yatu inareraja bajekuna. 8 Tiarone yatu tanaja. Yaturakate raisama isia asiraja nonaya. Imasibiaja aunukamo erijisaya tatuma nome abamorone. 9 Raisa yatu imasibuterate! Dio arujuna rujakore tamatuma Dio awarao tane ejobonatate. Yatu taisi naminanajara? Tatusebe, nibosebe, diosita ayatomanetemo tane. Atae atira jarone raisama isiko aubamo, anibora jarone raisama isiko aubamo, nibomana, atejo awabimo tane. Tatuma Dio awarao tane ejobonatate. 10 Atae biterijisamo, are obonomo, awabamo tane. Atae rejorotuma, imasibumo tane. Tatuma Dio awarao tane ejobonatate. 11 Ebe yatu kawanamo tametane jaja. Tiarone Dio yatu jojarae. Dio yatu orisaba emo abanae. Yatu aobojona enometae. Tane nonae Kairamo Jesú aribia, Mejokojira isia tane. 12 Kokotukanea nonakitane inerakate masaba ribu ja. Tiarone tamaja nona isia sanetanaja. Kokotukanea nonakitane inerakate masaba ribu ja. Tiarone ine nonakore aneburatu tane bajekuine. Aneburatu tane bajekitane obononajine. 13 Najoro jakutai tai obono saba. Obono jakutai tai najoro saba tane. Tiarone Dio reko iekorate. Tejo jakutai tai tatusebekitane, nibosebekitane tane sabena, tiarone Airamo saba. Airamo jakutai tejo saba. 14 Dio jakutai Airamo enomininae. Tiame ajarata isia kenominate. 15 Yatu atejo Kirito atejo akarianara? Ine Kirito akari nisane nibosebe akari tane nonatera bajama? Nonanajawitu. 16 Nibo-sebe isiko ubane taisi isiko tejo jisaka tane ejoboya. Yatu taisi naminanajara? Jabataja taisi isia ribia: Manamorone tejo jisaka jate, tia. (Awa. 2:24) 17 Tiarone Airamo isia tenejisayakutai Airamo isia obojona jisaka tane ejoboya. 18 Tatusebe janaka jakitane kurujubukotu. Nibora nonatuma asiraja raisama nonakore nona jakutai kokotuka tejo ekuana. Tai yakareku. Tiarone tatusebe jaja oriatejo iasi-rataya. 19 Yatu atejo Dio Amejokojira Yakerajawitu ajanoko. Yatu taisi naminanajara? Tai yatu eku. Tai Dio isimo. Yatu oriabituana rijana. 20 Jesú yatu amoara urirajasi abanae. Tiame Dio Airamo tane abakotu. Tejo isia, obojona isia tane Dio airamo tane abate, tatuma Dio abitutiji.
71 Yatu masaba jabatajakutai taisi isia yatu saba jabatayaine. Nibora tirasi torinaka jakore yakerakuna. 2 Tiarone mare-tanaka jakitane, jisaka jisaka wite atira jakitane yakera. Jisaka jisaka wite anibora jakitane yakera. 3 Nibora jakutai atirasi aobojona eku abakitane ja. Tira jakutai aniborama aobojona eku abakitane ja. 4 Atira jakutai oriatejo arotuana rijana. Anibora jakutai atirasi atejo arotu. Monukajase anibora oriatejo arotuana rijana. Atira jakutai aniborama atejo arotu. 5 Oriwaninaka jakotu. Reko obo-jona jisaka eku abane kware majabakitane yakera, yaorane kwai ribakitane. Tiarone atanejese oriyanabakakotu. Tanaja jakore yatu orietuwarakomoni jame Satanás yatu asiraja nonamejerete. 6 Tamaja ribu yatu kajotabunajine tiarone yatu isia ribiaine. 7 Kokotuka mamonuka jamejereaine. Tiarone Dio jisaka jisaka aobonobu moaya. Jisaka aobonobu raisa, araisa aobonobu raisa tane. 8 Saretuma isia, tatu teweretuma isia tane ribiaine: Mamonuka bajekore yakerakuna, tiaine. 9 Tiarone orietuwarakomoni jakore orinisakitane yakera. Orinisakitane jakutai ama rokiakutaisi kwarika yakera. 10 Tiarone tirabaka jakutai niborabaka jakutai tane taisi kajo-tabiaine. Kajotabu jakutai makajotabuana. Airamo akajotabu. Atira aniborama ebikamo narunaka jakunarai. 11 Tiarone tira narune, raisama iamo narunaka jakunarai. O obojona iabane ani-borameta nabakakunarai. Anibora atirasi iabanaka jakunarai. 12 Eobo isia ribiaine. Airamo aribuana, maribu. Nome abatu jakutai atira nome abatuana jate tai. Jakore tirasi saba taisi isiko bajekitane yakerakore, tirasi iabanaka jakunarai. 13 Tira jakutai anibora nome abatuana jate tai. Jakore niborama saba tirasi isiko bajekitane yakerakore, niborama iabanaka jakunarai. 14 Nome abatuana jakutai atirasi aobojona Dio saba emo abánae tiaja bajia. Tira nome abatuana jakutai niborama aobojona Dio saba emo abánae tiaja bajia. Tanaja jakore yatu anobotomo Dio saba wisi jakuna. Tiarone ama Dio saba emo abánae tiaja bajia. 15 Tiarone nome abatuana jakutai araisama ebikamo narukitane obonone narukunarai. Tametane nonakore nome abatu jakutai araisama isiko bajekitane ekira. Dio kayejebuae inareraja baje-mejerei. 16 Obonobukotu. Tirasi aobojona aniborama aobojona bajukate tai. Niborama aobojona atirasi aobojona bajukate tai. 17 Airamo obonobu jisaka jisaka kamoae. Kamoajakutaisi eku ubakitane ja. Dio jisaka jisaka kayejebuae. Kayejebukore are tane bajekitane ja. Tametane ikeresia kokotuka eku kajotabiaine. 18 Dio yejebukore, ajoro serénae tiakutai, are serénae tiaja bajete. Raisama yejebukore ajoro seremoana jaja are seremoana bajete. 19 Joro serénae tiakutai taisi amoara ekira. Joro seremoana jakutai taisi amoara are ekira. Tiarone Dio akajotabu eku abakitane amoara ja. 20 Dio jiyejebukore are tane jate. 21 Dio jiyejebukore iji raisama akajotabuanara? Are. Tiarone jiairamo jiejerokore, yakera. 22 Iji raisama akajotaburone Airamo jiyejebukore, iji Airamo saba jerónae tiaja bajia. Iji jerónae tiajarone Airamo jiyejebukore iji Kirito akajotabu tane bajia. 23 Airamo yatu amoara abanae rijana. Tiame raisama anebu tanaka jakotu. 24 Dio jiyejebukore are tane Dio isiko jate. 25 Saretuma saba Airamo akajotabu jakutai ekiraine. Tiarone ine ribiaine. Airamo akobe ajera maisia ine Airamo aribu eku abamejerei. Tiame maribu eku abakitane yakera. 26 Asanamata ama jakutaisi aobojona yatu are saretuma tane bajekore yakera, tiaine. 27 Jitira ja mojoro? Jakore iabakitane najabunaka. Jitira ekirara? Ekirakore tirabakakitane najabunaka. 28 Tiarone tiraba-kakore obojona asirena. Iboma niborabakakore obojona asirena. Tiarone orinisayakutai ama sanamatate. Sanamatanaka jamejereaine. 29 Takore, mawarao, tane ribiaine: Ya erayana bajia. Tamatukamo tirabaka jakutai, atira ekiraja monuka ubakunarai. 30 Sanamo jakutai sananaka monuka ubakunarai. Oriwakamo jakutai oriwakanaka monuka ubakunarai. Unukamo anisamo jakutai unukamo ekiraja monuka ubakunarai. 31 Raina isimo mi-jaja ubayakutai, raina isimo mijaja ubayajena monuka bajeku-narai. Raina ama jakutai ekoreame tane jakunarai. 32 Yatu obonobu erajenaka jamejereaine. Sare jakutai Airamo kware baria, aobojona eku abakitane. 33 Tirabaka jakutai raina aobojona kware baria, atirasi aobojona eku abakitane. Aobojona manamo. 34 Tira sare jakutai Airamo kware baria. Tira sare jakutai atejo, aobojona tane Dio saba emo abánae tiaja bajekitane obonoya. Tiarone niborabaka jakutai raina kware baria anibo-rama aobojona eku abakitane. 35 Tane ribiaine yatu yakeraja tane ejobamejerei. Tiarone yatu ebe kai abakitane obononajine. Yatu saba yakeraja jakutai taisi ribiaine, yatu Airamo akajotabuwitu bajemejerei. 36 Niborama aiboma ja tai. Yawakakitane taisi saba asira tai. Orietuwarakomoni tai. Tane jakore tirabakakunarai. Asirena. 37 Tiarone tametane nonatine, tane ribiaja taeratakore bajuka. Yawakakitane taisi saba yakerakore bajuka. Orietuwarakore bajuka. Aobojona taeraja abane tirabakanaja jakore bajuka. 38 Iboma isiko orinisayakutai tai yakeraja nonaya. Nisanaja jakutai kwarika yakeraja nonaya. 39 Niborabaka jakutai anibora mate riko jakore orikoyánae tiaja bajia kajotabu eku. Anibora wabakore, jeronae rijana nibora raisama nisakitane. Tiarone nome abatuma nisakitane. 40 Tia-rone jisamuka bajekore bajuka, tiaine. Inerakate Dio Amejo-kojira ja, tiaine.
81 Najoro diosita moaya. Taisi isia naminayaoko. Jisakarakate naminanaka bajinaja. Naminayakutai raisama kwarika oriabaya. Tiarone obonoyakutai raisama aobojona eiraya. 2 Ine naminanaja. 3 Tiarone Dio obonoyakutai, Dio taisi naminaya. 4 Takore najoro diosita moaya. Tatukamo najorokitane obo-noya. Diosita amoara ekiraja raina eku tane naminayaoko. Dio jisakawitu ja. 5 Diotuma najamutuata jaeyama. Raineta jaeyama tane. Dio eraja jaeyama, airamotuma eraja tane. 6 Tiarone oko nome abamo saba Dio jisakawitu ja. Tai Karima. Taisi isimo kokotuka ejoboya. Taisi saba jaoko. Airamo jisakawitu ja. Tai Jesukirito. Taisi isia kokotuka ja. Okorakate taisi isia jaoko. 7 Kokotuka tamaja ribu naminanaja. Eobo ateje tuata namínae tiaja diosita ayatomanetemo. Ayatomanetemotiji ama najoro diosita saba jakutaisi najorokitane are diosita saba najoroya monuka. Aobojona joteraja jame saba asiraja ejobane aobojona iasiratánae tiaja bajia. 8 Oko najorokore Dio saba yakeraja tane ejobonaja. Najorokore kwarika ejobonaja. Najoronaja jakore yajoto ejobonaja tane. 9 Iji ribu ja najorokitane. Tiame oi! Raisa aobojona joteraja jakutai tai jimite tai. Jimikore taisi saba omu esoakanoko tane ejobate tai. 10 Iji naminatu. Tiame iji diosita ajanoko eku najoroya. Najorokore raisa jimikore aobojona joteraja jakore, katukate? Tai suatana najoro diosita saba jakutai taisi najoro-natatera bajama? Are diosita sabarone najorote. 11 Iji namina-yame nome abatu joteraja jakutai rijate. Kirito taisi kware wabaerone rijate. 12 Yatu tametane nonayaja nome abamo isia asiraja nonaya. Aobojona joteraja jakutai taisi ikwasia. Kirito isia asiraja nonaya. 13 Tiame, najoro nome abatu saba omu esoakanoko jakore are toma najoronajine, tiaine. Nome abatu omu esoakane nakamejerenajine.
91 Ine raisama akajotabura? Ine Jesukirito ainatabenara? Ine Jesú Kairamo jakutaisi minatanaera? Yatu rijana Airamo isia manonenara? 2 Eobo saba ine Jesukirito ainataba tane ejobonajarone yatu saba Jesukirito ainataba ine. Yatu Airamo isia nome abayakutai tai Dio mainatabajakutaisi asinarija. Tiame Jesukirito ainataba ine. 3 Maribu nome toayakutaisi riboto ribiaine: 4 Okorakate najo-rokitane, jobikitane tane ribu janajara? 5 Jesukirito ainatabatuma eobo jakutai atira nome abatu jakutaisi konaria. Airamo araka-tuma, Cefas tane taisi konaria. Okorakate tane nonakitane ribu janajara? 6 Jesukirito ainatabatuma eobo jakutai yaota raisa yaotanaka Dio aribuwitu rewaraya. Ine Bernabé tane okorakate nonakuna. Taneanara? 7 Yaoromo jakutai oriamoara abayara bajama? Uwa arauina anamutu jakutai akwaja najoronajara? Bakatuma ayaorotu amijo jobinajara? 8 Ine waraoto aribiawitu ribiara bajama? Dio akajotaburakate tane ribunajara? 9 Moisés akarata eku ribia: Baka tiriko najutiakutai taisi aroko koyanaka, tia. (Kaj. 25:4) Tane ribiaja bakawitu isia ribia mojoro? 10 Kaisiarakate ribuna-jara? Kasabarakate jabatae. Rajikabayakutai namuna yawakaya. Najutiakutai namuna akari yawakaya tane. 11 Oko yatu aobojona eku namune, yatu aunukamo kawanamo kasaba bajekore, taisi aobojona yatu aobonobu eraja ejoboyara? 12 Eobo yatu kawanaya tametane nonakitane ribu jakore oko nonakomoni mojoro? Oko kwarika nonakuna. Nonakitane ribu jarone oko tametane nonanaja. Kokotuka sana-matayaoko, rewara yakeraja Kirito isia jakutaisi etuwaranaka jamejerei. 13 Kwai ribunoko eku yaotayakutai kwai ribunoko ekumo anajoro nojoya. Romu erokunokoatuka bajene yaotaya-kutai romu atoma akari nojoya. Taneanara? 14 Taisi monukajase Airamo kajotabuae rewara yakerajasi arewaramo rewara yakera-jasi isia ubamejerei. 15 Tiarone tamaja ribu eku nonanatanaine. Yatu maisia tametane nonamejerei jabatanajine. Amoara yatu ebunaka yatu saba rewarayakutai taisi mebikamo nisakore asirakuna. Mebikamo nisakore wabakuine. 16 Ine rewara yakerajasi rewarayaja ine oriisia yakeraja tane ribakomonine. Rewarakitane jaine. Rewara yakerajasi rewara-naja jakore amájae tane ribakuine. 17 Ine maobojona rewarakore mayaota amoara jakuna. Tiarone raisama aobojona rewarayaja tai mayejebuajame rewaraya. 18 Tane rewarayakore mamoara katukayaja tai? Rewara yakerajasi amoara ebukitane ribu jarone amoara ebunaka Kirito arewara yakerajasi rewarayaine. Taisike mamoara. 19 Ine jisakarakate aneburatuanaine. Tiarone warao erajasi kanatakitane warao kokotuka akajotabu tane oriabayaine. 20 Judio saba Judio tane ejobonaine, Judio kanatakitane. Moisés akajotabu eku abamo saba Moisés akajotabu eku abatu monuka tane ejobonaine. Ine kajotabu eku abakitane ekirarone are eku abaya monuka tatuma kanatakitane. 21 Moisés akajotabu ekirakutaisi saba Moisés akajotabu ekirakutaisi monuka ejobonaine, tatuma kanatakitane. Tiarone ine Dio akajotabu ekirayana. Ine Kirito akajotabu eku abaya. 22 Joteraja jakutaisi saba joteraja tane ejobonaine, joteraja jakutaisi kanatakitane. Kokotuka saba, kokotukanea ejobonaine. Obojona kokotukanea isiko bajinaine tatuma kawanamo aobojona bajukate maobojona. 23 Tametane nonaine rewara yakerajasi aobojona. Inerakate rewara yakerajasi ekumo nisakitane nonaine. 24 Orikwarikakitane kurujubiaja kokotuka kurujubia. Tiarone jisaka kwarikane amoara nojoya. Yatu taisi naminanajara? Tane kurujubukotu, amoara nojokitane. 25 Orikwarikamo jakutai nona kokotukanea atejo saba asiraja jakutaisi iabaya yakerajawitu ejobakitane. Tatuma amoara jakutai yaroko wekótae tiaja. Taisi kware orikwarikaya. Tai rijana botate. Oko kamoara are ja. Botonaja. 26 Ine asinarija abánae tiakutaisiata jakayaine. Arewitu ajaka nabayakutaisi monuka orikubanajine. 27 Tiarone wite oriatejo nabaubia monuka ine. Matejo makajotabu tane abayaine, ine raisama saba rewarakore, abita mabanaka jamejerei.
101 Mawarao, tamaja ribu naminakotu. Kanobotuma kokotuka ajakajoko noika kujuae. Kokotuka nojabaira ekia naruema. 2 Tatuma kokotuka ajakajoko eku kobunae monuka. Nojaba eku kobunae monuka, Moisés amuaraisatayaja. 3 Dio najoro tatuma moae obojona saba. Moakore kokotuka taisi najoroae. 4 Dio jo tatuma moae obojona saba. Moakore kokotuka taisi jobiae. Joyo tatuma iamo naruae. Tatuma taisi ekumo jobiae. Joyo jakutai joyowituana. Joyo jakutai tai Kirito. 5 Tiarone tatuma kawanamo eraja Dio aobojona awerea ejobonae. Tiame jarawaja eku muanane are atejo bajinema. 6 Tatuma anona kasaba rewarae oko taisi monuka nonanaka jamejerei. Tatuma obojona asirajasi kwana obonoae. Dio oko tatuma monuka obononaka jamejerea. 7 Tatuma kawanamo dio-sita yatomaneteaeyama. Tatuma monuka diosita yatomanetenaka jakotu. Jabataja taisi isia ribia: Warao norujuae najorokitane jobikitane tane. Enokitane nokaramuae, tia. (Ejo. 32:6) 8 Tatuma kawanamo tatusebetuma ejobonae. Tatuma monuka tatusebenaka jaki. Tatuma tane nonajame ya jisaka eku sina-rijaira mojorekotuma manamo kware rijanamo muanae. 9 Tatuma kawanamo Airamo ayakara miema. Tatuma monuka Airamo ayakara minaka jaki. Tatuma Airamo ayakara mikore Airamo juba inatabema tatuma muanamejerei. 10 Tatuma kawanamo eribubuaema. Tatuma monuka eribunaka jakotu. Tatuma eribukore Iekoratu jakutai tatuma iekoronaema. 11 Dio tane nonae eobo tatuma monuka nonanaka jamejerei. Tatuma kokotuka isia jabatae kainaminakitane. Sinarija ayaju jakutai tai kawere ja rijana. 12 Tiame warao ribane: Ine taeraja, tane ribiakutai nakaterate. 13 Warao kokotuka aobojona eku asiraja nonakitane jakutai naoya. Raisarakate yatu asiraja nonamejerea. Tane takore Dio ribu abanae asiraja nonakitane jakutai yatu kwarikamejerenaka jamejerei. Ejobonoko abate yatu taeratamejerei. 14 Takore Diosita yatomanetenaka jakitane ebikamo kurujubukotu. Mawarao, ine yatu obonoya. 15 Yatu isia ribiaine yatu aobojona jame. Maribu ayakara mikotu. 16 Jobinoko yakerajasi isia yakeraja jae tane ribiaoko. Tane ribiaja Kirito ajotu eku oriamuaraisatanajara? Kirito ajotu kuru isia sororoae. Oko bãu nakarine najoroyaja Kirito atejo eku oriamu-araisatanajara? 17 Bãu jisakatiji oko tejo jisaka tane ejoboya, oko erarone. Oko kokotuka bãu jisaka najoroya. 18 Israeltuma anona mikotu. Romu nae tiakutaisi atoma ana-joromo romu erokunoko eku oriamuaraisatanatanaera? 19 Ta-kore ine katukeme ribia? Diosita jakutai amoara ja mojoro? Na-joro diosita moayakutai amoara ja mojoro? 20 Amoara ekira. Ribu raisama ribiaine. Ina eobo arao romu nane Dio saba nanaja. Jebu saba naija. Yatu jebu amuaraisatamejerenajine. 21 Airamo ajobinoko ekumo, jebu ajobinoko ekumo tane jisaka tane jobiko-moni. Airamo anajoro, jebu anajoro tane jisaka tane najoroko-moni. 22 Oko Airamo miajitamejeretera bajama? Kajarata Airamo ajarata kwarika mojoro? 23 Kokotukanea nonakitane inerakate masaba ribu ja. Tiarone tamaja nona isia sanetanaja. Kokotukanea nonakitane inerakate masaba ribu ja. Tiarone taisi isia obojona eiranaja. 24 Jisakarakate wite saba yakeraja jakutaisi najabunaka jaku-narai. Raisama saba yakeraja jakutaisi najabukunarai. 25 Takore toma awabinoko eku wabiakutai taisi najorokotu. Yatu aobojona renokonaka jakotu. 26 Raina jakutai tai Airamo abitu. Kokotuka raina eku jakutai tairakate Airamo abitu. (Rok. 24:1) Tiame najorokotu. 27 Nome abatuana jakutai ajanokoata najoromejerei jiyejebute tai. Jisaba yakerakore naru. Najoro abajakutai taisi najoro. Jiaobojona renokonaka. 28 Tiarone jisaka jiisia ribate tai: Tamaja toma diosita moae, tate tai. Takore najoronaka jau. Jiisia ribiakutai taisi aobojona najoronaka. Jiaobojona najoronaka. Raina jakutai tai Airamo abitu. Kokotuka raina eku jakutai tairakate Airamo abitu. (Rok. 24:1) 29 Jiaobojonenarone, taisi aobojona najoronaka, tane tiaine. Masaba najorokitane yakera. Masaba yakerarone katukeme raisa makware obojona asiraja abaya bajama? 30 Ine najoro isia yakeraja jae tane ribia. Ine yakeraja jae tane ribane najorokore raisa katukeme maisia asiraja ribia bajama? 31 Takore yatu najoroyaja, yatu jobiaja, yatu yawatanuka nonayaja tane, Dio Airamo tane ejobamejerei kokotuka nona-kotu. 32 Raisama ebika omu esoakanoko abanaka jakotu. Judio-tuma ebika abanaka jakotu. Grecia araoto ebika abanaka jakotu. Dio aikeresia araoto ebika abanaka jakotu. 33 Ine manona koko-tuka isia kokotuka saba yakeraja nonayaine. Masaba yakeraja jakutaisi najabunajine. Tiarone erajasi saba yakeraja jakutaisi najabiaine tatuma aobojona bajukamejerei.
111 Ine Kirito sitayakutai taisi monuka yatu masitakotu. 2 Mawarao, yatu kokotukanea maisia obonobia. Ine ribu yatu moajakutai yatu taisi eku abaya. Tiame yatu yakeraja tane ribiaine. 3 Tiarone Kirito nibora kokotuka akwa jakutai yatu taisi nami-namejereaine. Nibora jakutai, tai tirasi akwa. Dio jakutai tai Kirito akwa. 4 Nibora kwai ribakitane o rewarakitane akwa sija-kanaja. Sijakakore tomaneraja. 5 Tiarone tira kwai ribakitane o rewarakitane akwa sijakaya. Sijakanaja jakore tomanera. Sija-kanaja jakore akwa wijiaja monuka. 6 Takore tira sijakanaja jakore ajio jewetakunarai. Tira ajio jewetakore o akwa wijikore saba tomanera. Tiame sijakakunarai. 7 Nibora akwa sijakanaka jakunarai, tai Dio asitatiji. Nibora jakutai Dio airamo tane abaya. Tira jakutai nibora airamo tane abaya. 8 Nibora tirasi isimoana. Tira jakutai tai niborama isimo. 9 Dio tirasi aobojona niborama nonanatanae. Tiarone Dio tirasi nonae niborama aobojona. 10 Tia-me airamo jame sinarijanoko abakitane ja. Dio ainatabatuma aobojona abakitane ja. 11 Tiarone airamo eku nibora tirasi abita bajinaja. Tirarakate niborama abita bajinaja. 12 Tira jakutai niborama isimo. Ama nibora jakutai tirasi isimo rijawaraya. Tiarone kokotuka Dio isimo. 13 Yatujase ribu nome toakotu: Tira akwa sijakanaka kwai ribakore asirenara? 14 Niborama akwa wijimoana jakore tomanera. Tane inaminaubúae tiajenara? 15 Tiarone tirasi akwajio ebumokorerakate saba yakera. Dio tirasi ajio moae asijakanoko tane. 16 Tiarone raisa kariboto kwana ribiakore, katuata namínae tiakutaisi inaminanaka iabayaoko. Dio aikeresiatumarakate tuata namínae tiakutaisi inaminanaka iabaya. 17 Ama ribakitane jakutaisi isia yatu yakeraja tane ribunajine. Yatu orikware nakaya yakeraja sabena, asiraja saba. 18 Wajia-bara. Ikeresia arao orikware nakane oririboto wiyawiyayema. Takore nome sabuka, tiaine. 19 Yatu oririboto ejoboyame anome jakutaisi naminate. 20 Yatu orikware nakane najoroya. Tiarone najoroyakutai Airamo anajoroana. 21 Najorokitane eobo ebisa-buka najoroya. Takore jisaka nojeraja bajia. Araisa awabaja bajia. 22 Katukeme? Yatu ajanoko ekira mojoro eku najoro-kitane, eku jobikitane tane? Yatu Dio aikeresia tainanajara? Ekirakutai tomaneraja bajemejereara? Ama ine katukane ribate? Yatu isia yakeraja tatera bajama? Yakeraja tanajine. 23 Airamo isimo ine naminajakutai taisi yatu inaminaine: Jesú wabikore tai ima Airamo Jesú bãu nisanema. 24 Yakeraja jae tane, nakariae. Taitane ribane: Nisane, najorokotu. Tamaja matejo yatu kware karinajakutai. Tane nonayaja maisia obonobukotu, tae. 25 Monukajase najoroitane jobinoko nisane ribane: Tamaja jobinoko ajute jiro jakutai. Majotu jakutai ajute jiro asinarija. Tamaja jobinoko ekumo jobikitane aya eku are maisia obonobukotu. 26 Takore yatu tamaja bãu najoroyaja tamaja jobinoko ekumo jobiaja Airamo awaba isia rewaraya. Mate Airamo naonaja jakore awaba isia rewaraya. 27 Tiame jisaka yatomanetenaka tamaja bãu najorone, Airamo atejo isiko asiraja nonaya. Airamo ajobinoko ekumo yatomane-tenaka jobine Airamo ajotu isiko asiraja nonaya. 28 Tiame oriao-bojona nome toaitane bãu najorokunarai, jobinoko ekumo jobi-kunarai tane. 29 Airamo atejo yatomanetenaka najoroyakutai Dio tai sanamatamejerete. Airamo atejo yatomanetenaka jobiakutai Dio tai sanamatamejerete. 30 Tiamesike yatu kawanaya muanayaja era. Joteraja era. Wábae tiaja era tane. 31 Takore oko wite kaobojona nome toakore Dio oko sanamatamejerenatate. 32 Tiarone Airamo kaobojona nome toane kayewerea raina araoto isiko sanamatamejerenaka jamejerei. 33 Tiamesike, mawarao, yatu orikware nakane najorokitane oriyawakakotu. 34 Nojeraja jakutai ajanokoata najorokunarai. Tane najorokitane yatu orikware nakakore Dio yatu sanamata-mejerenatate. Obojona bajiakutai ine narune taisi nome toatine.
121 Mawarao, Dio obonobu moaya obojona jiro saba. Yatu taisi naminamejereaine. 2 Yatu mate Judioana jakore mumoni diosita tata yatu kona-ruae. Yawatanuka yatu konaruae. Diosita jakutai are ribunaja. 3 Ama takore Dio Amejokojira Yakerajawitu isia Jesú Dio amojeku bajekunarai iekoramejerei, tane ribakomoni. Ama ribu riboto, Dio Amejokojira ekirakutai Jesú Mairamo tane ribako-moni. 4 Takore aobonobu erajarone Mejokojira jakutai are jisaka. 5 Yaota erajarone taisi Airamo are Airamo jisaka. 6 Nona erajarone Dio warao kokotuka eku kokotuka nonaya. 7 Dio Amejokojira jisaka jisaka kamoaya kokotuka yakeraja bajemejerei. 8 Mejokojira isia ribu musaberaja ribamejerei jisaka moaya. Ribu musaberajawitu rewaramejerei raisama moaya Mejo-kojira isiajase. 9 Nome abamejerei raisama moaya Mejokojira isiajase. Wabayakutaisi ibajukamejerei raisama moaya Mejoko-jira isiajase. 10 Nona taeraja nonamejerei jarata raisama moaya. Rewaramejerei raisama moaya. Obojona kasikaja yakera, obo-jona kasikaja asira tane naminamejerei raisama moaya. Warao raisama aribu ribamejerei raisama moaya. Ribu raisama waraoto aribu isia rewaramejerei raisama moaya. 11 Obonobu erarone Mejokojira jisaka jakutai taijase kokotuka moaya. Mejokojira jisaka jisaka moaya oriaobojona eku. 12 Tejo jakutai tai tejo jisaka, tiarone akari era. Tejo jisaka akarituma erarone kokotuka erarone tejo jisaka. Kiritorakate monukajase. 13 Mejokojira jisaka isia oko kokotuka tejo jisaka eku kobunaeko. Oko Judiorone, Judioanarone, neburone, nebua-narone, kokotuka Mejokojira jisaka jakutaisi isia jobimejereae. 14 Tejo jakutai akari jisakawituana. Akari era. 15 Takore omu ribiaja: Ine mojoanatiji tejo akarianaine, tane ribiame tejo akariana mojoro? 16 Kojoko ribiaja: Ine muanatiji tejo akarianaine, tane ribiame tejo akariana mojoro? 17 Tejo kokotuka muwitu jakore katukane nokote? Kokotuka kojoko jakore katukane ajate? 18 Amasike Dio tejo akari abanoko eku abanae. Oriaobojona jakutaisi kaika abanae. 19 Kokotuka akari jisakawitu jakore tejo katukane ejobate? 20 Amasike tejo akari erarone, are tejo jisaka. 21 Mu mojo isia ribakomoni: Jiobononajine, takomoni. Kwa omu isia ribakomoni: Jiobononajine, takomoni. 22 Tejo akari joteraja jakutai taisi amoara uriraja. 23 Tejo akari kasaba toma-neraja jakutai taisi yaorane eorisabaya. Takore akari sabana jakutai yakeraja ejoboya. 24 Akari yakeraja jakutai are. Dio tejo nonae akari yajoto jakutaisi yaorane yaoromejerei. 25 Tejo eku orikuba ekiramejerei, akari oriyaoromejerei tane, Dio tane nonae. 26 Amasike akari jisaka roroyakore kokotuka ajera. Akari jisaka yakeraja jakore kokotuka ekeiraja. 27 Yatu rijana Kirito atejo. Yatu orikari rijana. 28 Takore Dio ikeresia eku tane abanae. Awajiabara Jesukirito ainatabatuma. Tatukamo rewaramo. Tatukamo inaminamo. Tane nona taeraja anonamo, ibajukamo, sanetamo, airamotuma, ribu raisama are-waramo tane abanae. 29 Kokotuka Jesukirito ainatabatumara? Kokotuka rewaramora? Kokotuka inaminamora? Kokotuka nona taeraja anonamora? 30 Kokotuka ibajukamora? Kokotuka warao raisama aribu arewaramora? Kokotuka ribu raisa waraoto aribu isia arewaramora? 31 Obonobutuma kwarika jakutaisi kwana obonokotu. Obonobu jakutai yakeraja. Ama jojisi kwarika yake-raja jakutai yatu taisi inaminatine.
131 Ine raina araoto aribu eraja ribate tai. Dio ainatabatuma aribu ribate tai. Tiarone ine raisama obononaja jakore maribu eko. Maribu najamutu jariakutaisi monuka ejoboya. Tamboru jariakutaisi monuka ejoboya tane. 2 Ine rewarakitane naminate tai. Ribu rijisa kokotuka naminate tai. Inamina kokotuka naminate tai. Kokotukanea saba nome abate tai, jota emo inatabakitane. Tiarone ine raisama obononaja jakore mamoara ekira. 3 Maunukamo kokotuka saneraubiajasi moate tai. Matejo erokamejerei moate tai. Tiarone obononaja jakore, ekiraja ejoboya. 4 Obonoyakutai kokotuka yawakaya. Raoberaja. Miajitanaja. Orianona rewaranaja. Oriisia rewaranaja. 5 Raisa tomaneraja bajemejerenaja. Oriaobojona eku bajekitane najabunaja. Ribu jisaka isia orijisinaja. Wite oriamoara abaobononaja. 6 Obono-yakutai nona nomerajena raisa nonakore taisi isia oriwakanaja, tiarone nome isia oriwakaya. 7 Kokotuka sanamataya. Kokotuka isia nome abaya. Kokotuka yawakaya. Kokotuka isia taerataya. 8 Obonokitane jakutai ekoronaja. Dio kware rewarakitane jakutai, taisike ekorate. Ribu ekorate. Naminakitane jakutai ekorate. 9 Oko ama sanuka naminaya. Ama sanuka rewaraya. 10 Tiarone kaikawitu jakutai naokore kaikena jakutai ekorate. 11 Ine sanukiraja jaja sanukirajasi monuka ribunaine. Sanukirajasi monuka obonobuaine. Sanukirajasi monuka ribu nome toaine. Ama niboratiji sanukirajasi aobojona iabanaine rijana. 12 Ama musebuji eku monuka mijaoko. Yaorane minaja. Kaikawitu jakutai naokore mumana orimite. Ama ine sanuka naminaya. Kaikawitu naokore ine yaorane naminate. Manaminayakutaisi monuka naminatine. 13 Ama rijana obojona rijanamo bajia: Nome abakitane, yawakakitane, obonokitane tane. Takore obonokitane jakutai tai kokotuka kwarika.
141 Raisama obonokitane jakutaisi najabukotu. Obonobu Mejokojira isimo jakutaisi obonokotu. Rewarakitane jakutai obonobu eobo kawanamo kokotuka kwarika. Tiame taisi obonokotu. 2 Ribu raisama ribiakutai waraoto saba rewaranaja. Dio saba rewaraya. Jisakarakate aribu nokonaja. Ribu rijisa ribia Mejokojira isia. 3 Tiarone yaorane rewarayakutai waraoto saba rewaraya. Obojona eirakitane, reirikitane, kobe etuwarakitane tane rewaraya. 4 Ribu raisama rewarayakutai oriaobojona eiraya. Yaorane rewarayakutai ikeresia araoto aobojona eiraya. 5 Ine yatu kokotuka ribu raisama ribamejereaine. Tiarone taisi kwarika yatu yaorane rewaramejereaine. Yaorane rewarayakutai ribu raisama ribiakutaisi kwarika. Ribu raisa waraoto aribu isia rewarakore bajuka. Tane rewarayaja ikeresia araoto aobojona eiraya. 6 Mawarao, amasike ine ribu raisama ribiaja yatuata yarone katukane yatu sanetate? Dio ribu memusabajakutai taisi rewarakitane jaine. Musaberaja rewarakitane jaine. Yaorane rewarakitane jaine. Inaminakitane jaine. Tanaja jakore katukane yatu sanetate? 7 Ekuitanoko yakeraja ekuitanaja jakore katukane akuita no-kote? Esemoi jakutai, sekeseke jakutai tane yakeraja kuitakitane ja. 8 Wana yakeraja ekuitanaja jakore sina orikuba saba oriiya-karatate? 9 Yaturakate ajono ribu yakeraja ribunaja jakore, eobo katukane ribu nokote? Yatu ajaka isia ribia. 10 Raina eku ribu erajawitu ja. Kokotuka amusaba ja. 11 Ine ribu musabakitane naminanaja jakore ribu raisama arewaratu saba tamatukamoana ejobakuine. Tai masaba tamatukamoana ejobakuna. 12 Yatura-kate. Obonobu obojona jiro saba jakutai yatu taisi kwana obonoya. Tiarone ikeresia araoto aobojona eirakitane najabukotu kwarika musabakitane. 13 Takore ribu raisama ribiakutai Dio ebukunarai waraoto aribu isia rewarakitane. 14 Ine ribu nokonaja jajasi isia kwai ribakore, mamejokoji kwai ribia. Tiarone ine nokonaja. 15 Katukate! Ine mejokoji isia kwai ribate, obojona isia tane. Mejokoji isia rokotu warate, tiarone obojona isiarakate waratine. 16 Iji mejokoji isiawitu Dio yakeraja jae tane ribakore, jiribu anokotu katukane amén tane ribate bajama? Jiribu nokonaja jame amén tane ribakomoni. 17 Nomewitu iji Dio yakeraja jae tane ribiaja yakeraja ribia. Tiarone araisama aobojona eiranaja. 18 Ine yatu kokotuka kwarika ribu raisama ribiaine. Tiame Dio yakeraja jae tane ribiaine. 19 Ikeresia eku obojona isia ribakitane masaba yakera, eobo inaminakitane. Ribu mojoabasi obojona isia rewarakitane jakutai, ribu sinarijaira mojoreko ribu raisama isia ribakitane jakutaisi kwarika yakeraja. 20 Sanukiraja jakutai asirajasi obononaja. Taisi monuka jakotu. Sanukiraja aobojona ekirakutaisi monuka tanaka jakotu. Tiarone yatu aobojona nibora iramo aobojona monuka jakotu. 21 Kajotabu akarata eku jabátae tiaja ja. Ribia: Airamo ribane: Ribu raisama aribamo maribu tamaja waraoto saba rewarate. Tamatukamoana jakutai tatuma saba rewarate. Takorejone maribu nokonatate, tia, taeyama. (Isa. 28:11-12) 22 Takore ribu raisa jakutai sinarija tane ejoboya. Nome abamo sabena tiarone nome abamoana saba. Dio kware rewarakitane jakutai tai nome abamoana sabena, tiarone nome abamo saba. 23 Takore ikeresia arao orikware nakane, kokotuka ribu raisama ribate tai. Ribiakore naminanaka jaja o nome abanaka jaja yarone tatuma yatu isia buretaja tane ribunatatera? 24 Tiarone kokotuka yaorane rewarate. Rewarakore nome abanaka jaja o naminanaka jaja yarone ribu yakerajasi nokote. Ribu kokotuka jakutai aobojona ayakara mija. Aribu kokotuka nome toaya. 25 Aobonobu rijisa jakutai yakareku mija. Takore tai mukunamane rujane, jinamane Dio yatomanetete. Ribate: Nomewitu Dio yatu kaika, tate. 26 Mawarao, katukane nonaubia? Yatu orikware nakakore, jisaka rokotu ja. Jisaka inamina ja. Jisaka ribu raisa ribakitane obonoya. Jisaka emusabatajasi inaminakitane obonoya. Jisaka ribu raisa waraoto aribu isia rewarakitane obonoya. Kokotuka aobojona eirakitane nonakotu. 27 Ribu raisama ribakitane, manamowitu ribakunarai, o rijanamowitu. Jisaka jisaka ribaku-narai. Takore jisaka waraoto aribu isia rewarakunarai. 28 Wara-oto aribu isia arewaratu ekirakore, ribatu jakutai inareraja bajekunarai ikeresia eku. Wite oriisia o Dio isia ribakunarai. 29 Rewaramo monukajase. Manamowitu rewarate, o rijana-mowitu. Eobo takore ayakara mite. 30 Takore Dio rewaratu awere rujuyakutaisi inaminate tai. Tai rewarakitane obonokore arewaratu awajiabara jakutai inareraja bajekunarai. 31 Jisaka jisaka rewarakore yakera. Tane jakore kokotuka inaminate. Kokotuka akobe etuwarate. 32 Rewaramo jakutai oriaobojona arotu takitane ja. 33 Dio wiyawiya arotuana. Tiarone Dio jakutai inareraja arotu. Takore warao Dio saba emo abánae tiakutaisi aikeresia koko-tuka eku tametane nonakitane ja. 34 Tatu ikeresia eku inareraja bajekunarai. Rewaramejerei ribu ekira. Dio akajotabu eku tatu airamobaka bajekunarai. 35 Naminakitane obonone aniborama renokote janokoata. Tiarone ikeresia eku rewarakore tomanera. 36 Katukete! Dio aribu yatu isimo mojoro? Yatuwituata naba-kanae mojoro? 37 Amasike rewaratu tane oritoayakutai maribu nokokunarai. O Mejokojira aobojona arewaratu tane oritoaya-kutai maribu nokokunarai. Ine Airamo aribia jabatayaine. Aira-mo aribu jakutaisi nokokunarai. 38 Nokokitane obononaja jaku-tai are nokonaka bajekunarai. 39 Amasike, mawarao, rewarakitane najabukotu. Ribu raisama ribiakutaisi isia Ribunaka, tanaka jakotu. 40 Takore kokotuka yakeraja wiyawiyanaka tane nonakunarai.
151 Mawarao, atae yatu saba rewarayaine. Rewara yakeraja ine ebe rewarayakutai are taijase rewarayaine. Rewara yakeraja yatu nisanajakutai, tai. Taisi eku yatu bajia. 2 Yatu taisi eku bajene yatu aobojona bajukaya. Rewara yakeraja ine yatu saba rewarajakutai yatu taisi eku bajinajara? Tanaja jakore yatu nome abajakutai tai amoara ekiraja ejobate. 3 Ine wajiabara yatu inaminayaja ine nisanajakutai taisi yatu inaminaine: Kirito kaobojona asirajasi kware wabae. Jabataja aribu eku wabae. 4 Wabane, joitane, ya rijanamo takore nomininae. Jabataja aribu eku nomininae. 5 Nominitane tai Cefas oriemiae. Taitane anebu mojoreko kware manamo oriemiae. 6 Tatukamo jisaka tane nome abamo siento mojoabasi oriemiae. Tatuma kawanamo eraja mate riko. Eobo muanae rijana. 7 Tatukamo Jacobo oriemiae. Tatukamo inatabatuma kokotuka oriemiae tane. 8 Tane ayajuwitu inerakate orimemiae. Jorosimo asinarija ekuana nakayakutaisi monuka jajaine. 9 Ine Jesukirito ainata-batuma ayajotowitu. Oriisia ribakitane Ine Jesukirito ainataba, takitane, mamoara ekira. Ine Dio aikeresia araoto isanamataine. Tiame mamoara ekira. 10 Tiarone rijana ine Jesukirito ainataba Dio aobojona ayakara aobojona. Dio aobojona ayakara eko ejobonatanae maobojona. Ine kokotuka kwarika yaotaine. Tiarone ineana, Dio aobojona ayakara makaika jakutai tai yaotae. 11 Takore ine rewarakore, o tatuma rewarakore are tane rewarae. Yatu are nome abanae. 12 Kirito isia rewarayaoko. Wabaerone nomininae, tiaoko. Katukeme yatu kawanamo ribia warao nomininaja, tia bajama? 13 Warao nomininaja jakore Kiritorakate nomi-ninatakuna. 14 Kirito nomininatanajakore karewara eko jakuna rijana. Yatu nome abane eko ejobakuna rijana. 15 Takore oko Dio isia rewarakore, karibu eko ejobakuna. Oko ribunae: Dio Kirito enomininae, taeko. Takore warao waba nomininaja jakore Kirito nomininatakuna. 16 Warao waba nomininaja jakore Kiritorakate nomininatakuna. 17 Takore nomininatanajakore, yatu taisi isia nome abajakutai eko ejobakuna. Mate obojona asirajasi eku jakuna. 18 Atae, nome abamo Kirito eku muanajakutai tatuma are rijakuna. 19 Oko amawitu saba Kirito yawakayakore oko saneraja jakuna. Kokotuka kwarika kaisia rewarakuna: Tatuma sanasabukaraji, takuna. 20 Amasike nome Kirito wabaerone nomininae. Nominikitane jakutaisi awajiabara nomininae namuna akwaja awajiabara monuka. 21 Nibora jisaka aobojona raina arao muanaya. Taisi monuka nibora raisama aobojona raina arao nominite. 22 Adán aobojona kokotuka muanaya. Taisi monuka Kirito kokotuka riko tane abate. 23 Kokotuka asinarija eku. Namuna akwaja awajiabara jakutai Kirito. Tatukamo Kirito naokore anebu. 24 Taitane asinarija ayaju eku Kirito kajotabumo kokotuka iekorate. Airamo sabuka kokotuka iekorate. Jarata kokotuka iekorate tane. Iekorane Dio Rima amojeku arujunoko moate. 25 Kirito airamo takitane ja. Kokotuka Kirito isiko asiraja jakutai mate Kirito omu noika bajinaja jakore Kirito are airamo tane bajete. 26 Waba jakutai taisi isiko asira. Ayaju tane waba iekorate. 27 Dio Kirito amojeku kokotuka abanae omu noika bajemejerei. Jabataja taisi isia ribia: Kokotuka amojeku abanae, tia. (Rok. 8:6) Tane ribiaja Diorakate Kirito amojeku bajia, tanaja. Amojeku abatutiji nomewitu Kirito amojeku bajinaja. 28 Tiarone Dio koko-tuka Kirito amojeku abakore Aukarakate Dio amojeku oriabate, Dio Kirito amojeku kokotuka abanaetiji. Takore Dio jisakawitu kokotuka kwarika. 29 Tanaja jakore, waba kware joni ekobamejereakutai tatuma katukate? Waba nomininaja jakore, katukate? Tatuma katukeme waba kware joni ekobamejerea bajama? 30 Okorakate katukeme ya kokotukanea jawanerajasi ekia kujuya? 31 Yatu isia ekeiraja jaine. Kairamo Jesukirito eku nomewitu yatu isia ribiaine: Ya kokotukanea Ine wabate tai, tane obonobiaine. 32 Efeso tata raina aromu jawanera isiko orikubaine. Waba nomininaja jakore ine katukeme tatuma isiko orikubae bajama? Waba nomininaja jakore ama isiawitu obonobuki. Oko jake wabate jame najoroki, jobiki tane. (Isa. 22:13) 33 Raisa yatu imasibuterate. Amuaraisa asiraja jakutai obo-jona yakerajasi iasirataya. 34 Obojona bakane obojona nomeraja nonakotu. Yatu kawanamo Dio naminanaka ja. Yatu tomana-mejerei ribunaine. 35 Yatu kawanaya ribate tai: Waba katukane ejobate? Atejo kasikajasi isiko ejobate? tate tai. 36 Buretaja monuka ribia. Namiakutai wabanaja jakore riko ejobonaja. 37 Namiakutai atejo raisa. Irayakutai atejo raisa. Namuna aumu namia. Tiriko namia tai. Namuna aumu raisa namia tai. 38 Namuna ejobakore Dio oriaobojona eku atejo moaya. Namuna jisaka atejo jisaka. Na-muna raisa atejo raisa tane. 39 Toma kokotuka jakutai orimonu-kena. Waraoto atoma jisaka. Raina arao atoma raisa. Jomakaba atoma raisa. Romu atoma raisa tane. 40 Tejo najamutu ekia ja. Raina eku tejo ja. Tejo najamutu eku jakutai ajoko raisa. Tejo raina eku jakutai ajoko raisa. 41 Ya jakutai ajoko raisa. Waniku jakutai ajoko raisa. Kuratuma ajoko raisa. Kura jakutai ajoko orimonukena. 42 Waba nominikore monukajase. Namiakutai botoya. Nominiakutai botonaja. 43 Saneraja namia. Nominane yakeraja. Joteraja namia. Taeraja nominia. 44 Tejo are jakutai namia. Tejo jiro tane nominia. Tejo are jakutai ja. Tejo jiro jakitane ja tane. 45 Tiame jabátae tia: Dio Adán nonaitane Adán aobojona jamejereae. Tai nibora awajiabara, tia. (Awa. 2:7) Tiarone nibora ayaju jakutai tai obojona jiro arotu. Tai obojona jiro amoatu. 46 Tejo jiro jakutai tai awajiabarayana. Tejo are jakutai tai awajiabara. Tatukamo tejo jiro. 47 Nibora awajiabara jakutaisi atejo joboto isimo. Tai joboto arotu. Nibora ayaju jakutai tai najamutu arotu. Tai Airamo. 48 Joboto arao nibora joboto arotu jakutaisi monuka. Najamutu arao nibora najamutu arotu jakutaisi monuka. 49 Ama katejo joboto arotuma atejo monuka. Tiarone katejo najamutu arotuma atejo monuka ejobate. 50 Mawarao, yatu isia ribu tamajasi ribiaine: Dio arujuna rujuyakutaisiata tejo ama jakutai tata nabakakomoni. Botoya-kutai botonaka jakitane jakutaisi oakomoni. 51 Ribu rijisa yatu saba rewarayaine rijana. Maribu nokokotu. Oko kokotuka muananatate. Tiarone kokotuka kainamonite. 52 Rubujira kaina-monite. Mu tabiakutaisi monuka kainamonite. Wana ayaju jakutai ekuitakore, waba enominite. Atae muananaja. 53 Tejo botoyakutai tejo botonaka jakutaisi isia inamonikitane ja. Tejo wabayakutai tejo wabanaka jakutaisi isia inamonikitane ja. 54 Tejo botoyakutai tejo botonaka jakutaisi isia inamonikore Jabataja aribu eku nakate. Tejo wabayakutai, tejo wabanaka jakutaisi isia inamonikore Jabataja aribu eku nakate. Jabataja aribu ribia: Kanatayakutai waba iekoroya. (Isa. 25:8) 55 Waba, jiaji kasaba rijana? Waba, iji katukane kanatate rijana? tia. (Hos. 13:14) 56 Nomewitu waba aji jakutai tai obojona asiraja. Dio akajotabu jakutaisi aobojona obojona asiraja jakutai taeraja tane ejobonae. 57 Tiarone Dio Kairamo Jesukirito aobojona oko kanatamejerea. Dio Jesukirito sanetatu tane abanae. Tiame Dio yakeraja jae tane ribaki. 58 Tiame mawarao ine obonoyakutai, taeraja bajekotu. Emo narunaka jakotu, Airamo ayaota eku are irayaja. Tametane nonakotu yatu ayaota Airamo eku eko ejobonaja jakutaisi nami-nayame.
161 Yatu burata orikware toaya warao Dio saba emo abánae tiakutaisi saba. Katukane nonate? Ine ina Galacia aikeresiatuma araoto saba rewarajakutai yatu taisi monuka nonakotu. 2 Misa kokotukanea eku ya awajiabara jakutaisi eku yatu jisaka jisaka burata akari emo abane orabakotu. Nojoajakutaisi kaika emo abate, ine naokore burata orikware toanaka jakitane. 3 Yatu inatabakitane obonoyakutaisi awai yatu akarata eku jabatakotu. Takore ine yarone tatuma inatabatine yatu aburata Jerusalén tata konarumejerei. 4 Yakerakore inerakate narute. Narukore tatuma maiamo narute. 5 Tane Macedonia ekia kujune yatuata nabakatine. Macedonia ekia kujukitane jaine. 6 Tatukamo ine yatu kaika bajete tai. Joira jisaka yatu kaika kwaeabate tai. Tatukamo yatu masanetate ine nariakutaisiata narumejerei. 7 Rubujiraja kemo narukitane obo-nonajine. Yatu kaika kware majabakitane obonoyaine, Airamo tane obonokore. 8 Mate Oriwaka Pentecostés aya eku nakanaja jakore Efesoata bajetine. 9 Tamatuka yaorane rewarakitane yakeraja ejobonae. Tiarone mariboto jakutai era. 10 Takore Timoteo yatuata nabakakore, yatu taisi etuwarakotu inareraja bajemejerei. Tairakate mamonuka Airamo ayaota yaotaya. 11 Tiame, tainanaka jakotu. Inareraja kemo inatabakotu, ineata nabakamejerei. Ine taisi wakayaine. Nome abamo tamatuka jakutai Timoteo wakaya. 12 Ama raka Apolos isia rewarakitane. Reiriaine yatuata narumejerei nome abamo isiko. Tiarone ama naruobononatanae. Saba yakerakore narute. 13 Seorobukotu. Nome abane taeraja bajekotu. Nibo monuka nonakotu. Taeraja bajekotu. 14 Kokotuka eobo obonoyaja nonakotu. 15 Mawarao, Estefanastuma jakutai nome abamo awajiabara ina Acaya eku. Tatuma warao Dio saba emo abánae tiakutaisi akajotabu tane oriabanae. Yatu taisi naminaya. 16 Yatu reiriaine tatuma monuka jakutai kokotuka akajotabu tane bajekotu. Sanetamo, yaotamo tane kokotuka akajotabu tane bajekotu. 17 Estéfanas, Fortunato, Acaico tane naokore oriwakaine. Yatu ekirarone tatuma ekeiraja tane mabanae. 18 Tatuma makobe okko tane abanae. Yatu akobe okko tane abaya tane. Tatuma raomata tane abakotu. 19 Ikeresiatuma arao Asiayata jakutai yatu isia yakeraubiara abaya. Aquila, Priscila tane kwana yakeraubiara abaya Airamo eku. Ikeresia tatuma ajanoko eku orikware nakayakutai yakeraubiara abaya. 20 Nome abamo kokotuka yatu isia yakeraubiara abaya. Oriamukaba oroyaja oriisia yakeraubiara abakotu nome abamo-tiji. 21 Ine Pablo mamojo isia jabatayaja yakeraubiara abayaine. 22 Airamo Jesukirito obononaja jakutai Dio amojeku bajekunarai iekoramejerei. Airamo naoya. 23 Airamo Jesukirito aobojona ayakara yatu moakunarai. 24 Oko Kirito Jesú ekutiji ine yatu kokotuka obonoyaine. Amén.