MMO/II KA PIJE/ MO

Gwo ma Musa jin ’Kon ma P̱o/ i Su/: Mmo/ii ka Pije/ mo

’Kwani ma Israyiil Sere’ckunu ki Sho’k mo

¹ Gwansan i ta gway gi iya/ ma Israyiil mo uni kun iikin bway Pam Masir mo nyaḵka Yakuub mo, aris uni ka ’deṯe/ ’deṯe/ mo ’peni kuŋ gu’b piti mo be. ² Ra/ubiin mo dhala Shim/uun dhala Lawi mo dhala Yahuuda/ mo be. ³ Yassaakar dhala Sabuluun dhala Benyamiin mo. ⁴ Daan dhala Nap̱taali dhala Jaad dhala Ashiir mo be. ⁵ Aris emen ma Yakuub i ’baar mo uni ’ko iss ’kwanimpa i kwara i’ce’dka ’kume’d mo. Dhala Yuusup̱ diki’di ṯwa/a/ e Pam Masir mo be. ⁶ Dhali yan’ko’d aYuusup̱ wuki’d mo dhala ris ikam piti mo dhala risa nyaḵum yil ki uc̱im buni mo be. ⁷ Hili emen ma Israyiil uni dho’thkin ka ris mo dhali markunu is kagahara mo. Dhali uni eḵkin mo ki nyanye/ dhali ’bi’thkina is ki ’bi’th mo. Gom kan mo tani Pam Masir ’tu’dkunu ki uni mo.

⁸ Dhali yan’ko’d amaliḵ thisa kamu/ bu’thki embul ma kamu/ dhamo/ mo i Pam Masir mo a’di jin diki misha Yuusup̱ mo be. ⁹ Dhali a’di ki o ’kwanim piti gwo mo ki: Ayy, ’kwani ma Israyiil uni tana ris ka ris mo dhali uni si’da/ ’bitha’bi’th mo mmobol ana e mo be. ¹⁰ Waḵki/ mo/as midi biṯa p̱o/i ana mo tani uni mini gam me’d ki ’kwani kun ta ’kup̱ ki ana mo dhali as ana mo dhali ye mo ’peni bampam bana mo be. Dhalki ana ṯikira ap̱o/ uni ki yuḵ yuḵ mo ki uni mini ’koki mar is mo.

¹¹ Gom ’kup̱ gwo yan tani uni dhuki itap̱a ap̱o/ uni mo mmoṯa/ uni is jwa ka ṯu’c kun diṯadiṯ mo. Dhali uni nyaŋkina P̱irawn ’peŋkuman bampa/ ki jasi mondhu tom piti mo kun yuḵu gway ka Piṯuum dhala Ramasiis mo be. ¹² Hili ki ’kwani ma Israyiil ’kokunu mo mmosirica p̱o/ ki sho’k mo ki nyanye/ mo tani uni si’da/ markunu is mo ki nyanye/ mo dhali mmohakara ’cesh ka bor mo. Wakan ’kwani Pam Masir uni ḵo/ ki is mo gom ’kwani ma Israyiil mo be. ¹³ Wakan uni dhuki ’kwani ma Israyiil mo mmomiiya ṯu’c ki c̱iŋkina/ ki mom’bi’th mo be. ¹⁴ Dhali uni si’da/ dhuki ’kwani ma Israyiil is mmo’ta’bula’ta’bul mo ka ṯu’c jin ’batha’ba’th mo mmo’thoḵa jeeŋ gu’b mo dhali eya risa ṯu’c kun ’kona e ki she/ ki she/ mo e bwam buntom buni mo. Eya risa ṯu’c buni gwansani ’baar mo tani c̱inu uni ki dar gi mo si/is mo be.

¹⁵ Dhali yan’ko’da maliḵ gi ’kwani Pam Masir ki o iShip̱ira uni ka Puu/a kun ta up̱ kun dho’th tiya Ibraniyiin gwo mo ki: ¹⁶ Waḵki/ um dho’th up̱ ’kwani Ibraniyiin mo dhali um ki p̱ar uni e eya p̱owa birish jin dhodhuwa dho’th ap̱o/ mo tani, ’koshi a’di jwa mo waḵki/ ta’da ’ciŋgwaṯẖ mo. Hili waḵki/ ta’da ’bomi mo tani dhalka yim di’d ki e mo. ¹⁷ Hili up̱ gwansan kun dhodhi tiya mo tani uni ḵo/kina Arumgimis mo. Dhali uni ’koki mii gwoŋḵan ma maliḵ gi Pam Masir jin ḵankina a’di uni mo. Hili uni dhal uc̱iŋgwaṯẖ mo mmo’ko ki e mo be. ¹⁸ Dhali amaliḵ gi Pam Masir a’di yuḵki up̱ gwansan mo dhali o uni gwo mo ki: Atinta miina um kan mo mmodhal uc̱iŋgwaṯẖ bway mo mmo’ko ki e kan mo?

¹⁹ Up̱ kun dhodhi tiya thoḵkina P̱irawn gwo mo ki: Haali/ up̱ gi ’Kwani Ibraniyiin yisa wa ki up̱ gi ’kwani Pam Masir yisa. Hili uni c̱a’b ki dem dem mo dhali uni la dho’th uc̱im buni nṯwa/a/ mo ki aman ’konaki p̱u’d naskina/ mo be.

²⁰ Wakan Arumgimis miiki’d ki ’bore/ gom up̱ gun dho’thki tiya mo. Dhali ’kwani markunu is ki nyanye/ mo dhali uni c̱a’b ki dem dem e mom’bi’th buni mo be. ²¹ Dhali gom moŋḵo/ jin ḵo/kina up̱ Arumgimis mo tani a’di c̱iki uni uc̱im buni si’da/ mo be. ²² Dhali yan’ko’d mo tani aP̱irawn ḵanki’da ris ’kwanim piti gwo ’baar mo ki: Aris iya/ kun dho’thkunu gom ’kwani Ibraniyiin mo tani minu ṯa’kku/ mo e ḵumma/ yi’de/ mo, hili um mini dhalku/ ushi i’bwa/ i ’kon ki e mo be.

Mondho’th ma Musa

¹ Dhali ki embul yan wathi/ ’peni ’Kwani Lawi masha’da ’bom ’pena waḵ piti mo. ² Dhali a’bom bwaki’d mo dhali dho’th ya/ mo. Dhali ka yim p̱arki a’di e mo ka ’ci ’bora’bor mo tani ayim ki bag a’di mo ka ppee ’kup̱i kwara mo be. ³ Dhali ka yim mol a’di bag ki rash rash mo tani ayim ’kuc̱ki’da gup̱p̱a mo jin uḵkunu mo ’pena ’ci’d mo dhali rus a’di ka ’bi’c mo dhala sip̱ti/ mo, mmonon yi’de/ ki bway mo mmose bwa gup̱p̱a mo. Dhala yim ki kara ’ci nycine/ mo dhali karki a’di e bwam ma ’ci’d jin di’d i shemen ma gap̱ gi ḵumma/ yi’de/ mo be. ⁴ Dhali ’bwah ma ’ci doshki’d ari kaṯan mo mmop̱ar mo e mo ka ta a’di i midi p̱u’d e ara kam mo.

⁵ Dhali ’bwa/ ma P̱irawn p̱u’dki’d ka luŋgu’b mo mmo/up̱ yi’de/ mo e ḵumma/ yi’de/ mo. Dhali aris nyara/ gun mii a’di aṯu’c iikin e yan wor mo tani ayim mishki’da gup̱p̱a mo e bwam ma ’ci’d mo. Dhali ayim ki hash nyarany c̱iŋkinam piti mo mmo’cwam a’di mo be. ⁶ Dhali ka yim ḵa’dki a’di ’kup̱ mo tani ayim p̱arki ara ’ciŋgwaṯẖ e mo. Dhali ara ’ci di’d mmoko mo. Ayim hilki a’di ki e ma ’thime/ gi mo/en mo dhali o gwo mo ki: Yansan a’di i ta ara ’ci ’peni ’Kwani Ibraniyiin mo be.

⁷ Dhali yan’ko’d ’bwah ma ’ci yansan ki o ’bwa/ ma P̱irawn gwo mo ki: Miga/ ya mo dhali yuḵi /eya manthip̱a ’ci ’peni bwaman up̱ ’Kwani Ibraniyiin mo mmothip̱ ki /eya ’ci mo ’taa?

⁸ Dhali ’bwa/ ma P̱irawn ki o ari nyara/ gwo mo ki: Nye, yaku/ mo ma. Gom gwo gi wakan mo tani ari nyara/ yaki’d mo dhali yuḵi kum ma ’ci mo be. ⁹ Dhali ’bwa/ ma P̱irawn o’da yim gwo mo ki: ḵalka ’ci yansan mo dhali thip̱i a’di mo gom aha/ mo dhali aha/ mina c̱iki /e to jin miina /eya ṯu’c gom a’di mo. Gom gwo gi wakan mo tani a’bom bu’thki’da ’ci mo dhali thip̱ a’di mo be. ¹⁰ Dhali a’ci caki’d mo dhala yim ki ḵalki a’di ’bwa/ ma P̱irawn mo dhali a’di warki’d ki ya/ ma yim mo. Dhali ayim ki yer a’di gway ka Musa+ 2:10 Gway yan wana e ki gwo jin onu ki ’cwam ki ’twaŋ ’kwani Ibraniyiin mo. mo goma yim oki gwo mo ki: Haali/ aha/ ’cwamkina a’di ka pije/ mo ’peni yi’de/ mo be.

AMusa Guski Pa Midyaan mo

¹¹ Ka Musa caki’d mo tani a’di yaki’d ka pije/ mo mmobuṯi ’kwanim pitiŋ gana/ mo dhali p̱ara ṯuca diṯga/ gi kwanim piti e mo. Dhali a’di p̱arki wathi/ Masir e mo mmo’koshkina a’di wathi/ Ibraniyiin mo a’di jin ta wathi/ ’peni ’kwanim piti mo be. ¹² AMusa ki ’kar mo ki e mo dhali jan ṯal ’deŋ kamu/ yisa di’da. Dhali a’di ki ’kosh wathi/ Masir jwa mo dhali bag a’di mo e bwam ma si’b mo be. ¹³ Ka cim jiŋ ’ko’d, a’di yaki’d ka pije/ i ’kwanim piti doḵ e mo dhali a’di ki mish ’kwani Ibraniyiin i su/ ḵalkin ki as c̱em buni mo. Dhali a’di ki o wathi/ jin dina mii i ’ba/ gwo mo ki: Atinta i dorkina /eya waḵ pini mo kan?

¹⁴ A’di thoḵki a’di gwo mo ki: Aja i kar /e ki tap̱a mo dhali ka mandwall aman gwo mo? A /e kulumki gwo i bwa mo mmoŋap̱i ’kosh aha/ jwa mo me’d jin ’koshkina /e wathi/ Pam Masir mo ’taa? Dhali yan’ko’d aMusa ḵo/ki is mo dhali kulumki gwo ’kup̱ mo ki to yansan ka jiŋ gana/ mishu mo be. ¹⁵ Yan’ko’da maliḵ ciḵki gwo yansan mo dhali ŋap̱a Musa ki minu ’kosh jwa mo. Hila Musa guski’d mo ’pena P̱irawn mo dhali a’di yaki’d mmoc̱a’b e Pam Midyaan mo be. Dhali ka cima kamu/ a’di c̱a’bki’da ’cesh e shemen jis yi’de/ mo. ¹⁶ Dhala gasiis gi Pam Midyaan taki’d gi i ’bwa/ i pesu/ mo dhali uni p̱u’dkin mo mmomush yi’de/ e mo jin c̱a’b ma Musa i shemen mo. Dhali uni ’tu’dkina ḵur ki yi’de/ mo goma ma’diny ḵa’bal dhali miya ma babam buni mo be. ¹⁷ Imanhil ḵa’bala tiya uni p̱u’dkin mo dhali ur uni mo. Hila Musa cuki mis mo dhali woṯẖki nyara/ dhali doḵi uni ka nyaŋ’ko’d mmowol ki uni to em buni yi’de/ mo be.

¹⁸ Ki nyara/ doḵkin eya babam buni ka Rau/iil mo tani a’di ki o uni gwo mo ki: ’Pemen ta’da ta layina um p̱u’du/ gane/ ki jahanne/ kan mo?

¹⁹ Uni ki thoḵ gwo mo ki: Wathi/ Masir a’di i woṯẖki aman mo ’peni me’d gi imanhil ḵa’bal mo dhali a’di si’dayi ki mush ki aman yi’de/ mo dhali wolki to e mo be.

²⁰ A’di oki i’bwa/ gwo mo ki: Mane a’di mane? Atinta i dhalina um wathi/ mo? Yuḵi a’di mo ma ki a’di midi shwa to nyaḵki ana mo.

²¹ Dhala Musa gamki gwo me’d mo mmoc̱a’b mo nyaḵki wathi/ yan mo. Dhali a’di c̱iki’da Musa ’bwa/ jin yuḵu gway ka Sap̱uura mmota ash mo be. ²² Ayim dho’thki a’di ya/ mo dhala Musa ki yer a’di gway piti ka Jirshuum+ 2:22 Gway yan wana e ki gwo jin onu ki: Wathi/ ’peni bampaŋ kamu/ mo ki ’twaŋ ’kwani Ibraniyiin mo. mo haali/ a’di oki gwo mo ki: Aha/ dina ka c̱is e pampaŋ kamu/ mo.

²³ I’ko’di yil ka ris pekin mo tani amaliḵ gi ’kwani Pam Masir a’di wuki’d mo be. Dhali ’kwani ma Israyiil uni ’kon mmo/ohon mo e bwaŋ’kwariny miiny c̱iŋkinam buni mo dhali uni ḵumki cuuwa mo gom mowoṯẖ mo. Dhali kom buni e bwaŋ’kwariny miiny c̱iŋkina/ mo tani ciḵkin ma Arumgimis mo be. ²⁴ Dhali Arumgimis ciḵki mo/ohon buni mo dhali a’di kakina gwo e mo jin gamkina a’di me’d ki mondeḵ nyaḵka Ibrahiim mo dhali nyaḵka Is/hak mo dhali nyaḵka Yakuub mo be. ²⁵ Dhali Arumgimis mishki ’kwani ma Israyiil mo dhali a’di ta gi bwaŋ kulum ap̱o/ uni mo gom moŋ’kom buni jin shi/ashi/ kan mo be.

Arumgimis Yuḵki’da Musa mo

¹ Dhala Musa ta’da amanhila ma’diny ḵa’bal ma mar piti ka Rau/iil mo jin ta’da gasiis gi Pa Midyaan mo. Dhala Musa urki’da ma’diny ḵa’bal piti dhali ’ciṯẖ bway mombwaasho mo dhali p̱u’di Wosh Sinaa/ jin ta wosh jin ḵogu mo be. ² Dhali aman’doyu/ gwo gi TAP̱A piki a’di i is ka le’dan o’d e ari bwaman cwa mo. Dhala Musa p̱arki mo e dhali merki’d mo ki cwa shwakina o’d mo dhali a’di ’konu ki kup̱ ki sule/ mo be. ³ Dhali aMusa ki kulum gwo i bwa mo ki: Atinta dina o’d ki kup̱ ari bwaman cwa yan mo kan sa/? Aha/ mina shorki is mo dhali p̱ar dhan miimer yan e mo.

⁴ Ki TAP̱A p̱arki mo e ka Musa ya’d mmo’dish mo is mmop̱ar mo e mo tani Arumgimis yuḵki a’di ’peni ari bwaman cwa mo ki: Musa, Musa. Dhali a’di thoḵki gwo mo ki: Aha/ dina i se mo be.

⁵ Dhali yan’ko’d Arumgimis ki o a’di gwo mo ki: Dhalku/ ki shor mmo’dish mo yan is mo. ’Cuḵa p̱p̱am pini ’peni sho’k mo ma haali/ mo yan jin dina /e i cine/ mo tani ta’da ’cesh jin ḵogu mo be. ⁶ Dhali a’di ki o a’di gwo mo ki: Aha/ tana Arumgimis gi ibabam pini jin ta’da Arumgimis ma Ibrahiim mo dhali Arumgimis ma Is/hak dhali Arumgimis ma Yakuub mo be. Dhali yan’ko’da Musa tiḵki jis em piti mo haali/ a’di ḵo/ki is mo mmohila Arumgimis mo be.

⁷ Dhali yan’ko’d TAP̱A ki o a’di gwo mo ki: Aha/ misha isa nyor jin wo’cki ’kwanim pem mo uni kun ’kokin mo e Pam Masir mo. Dhali aha/ ciḵkina kom buni mo gom mii gi imanjiya ṯu’c buni kun ta ’Kwani Masir mo. Dhali aha/ misha moŋ’kosh is ka nyor buni mo be. ⁸ Dhali aha/ thulkina ka ’cesh mo mmo’cuḵ uni ’peni me’d gi ’Kwani Masir mo. Dhali aha/ mina sus uni mo ’peni pa c̱aan mo bway mo jin ’kosh jwa mo jin isha ris embul mo dhali jin ’bor ma ’cesh ki ’bor mo. A’di ta mo jin ’kona ’kwani Paŋ Kanaan mo dhali Pa Hiṯẖṯẖa mo dhali Pa Amuur mo dhali Pam P̱aaris mo dhali Pa Hayp̱a mo dhali Pa Yabuus mo be. ⁹ Dhali shwane/ aha/ ciḵkina ko gi ’kwani ma Israyiil mo dhali aha/ mishkina mo jin siriju asiri’c ki sho’k jin ’kokina ’Kwani Pam Masir mmosiri’c uni ap̱o/ ki sho’k mo be. ¹⁰ Dhali shwane/ yaku/ mo ma, aha/ mina hash /e aP̱irawn mo ki /e mini mish susu ’kwanim pem ka pije/ mo, uni kun ta ’kwani ma Israyiil mo ’peni Pam Masir mo be.

¹¹ Hila Musa thoḵki’da Arumgimis gwo mo ki: Aha/ jana/ sa/ mina ’taki ya aP̱irawn dhali susi ’kwani ma Israyiil ka pije/ ’peni Pam Masir mo?

¹² Arumgimis ki thoḵ a’di gwo mo ki: Aha/ mina nyaḵ di ki /e mo. Dhali ki /e mini dili ’kwani sho’k ka pije/ ’peni Pam Masir mo tani um mini mii mii mmotaḵ aha/ e ’kuwosh yan mo. Dhali mii yansan midi ta jamas mii mo gom /e mo ki aha/ tana a’di jin hashkina /e mo be.

¹³ Dhali yan’ko’d aMusa ki owa Arumgimis gwo mo ki: Waḵki/ aha/ mina p̱u’dku/ e ’kwani ma Israyiil mo dhali o uni gwo mo ki: Arumgimis gi ibabam bum a’di i hashki aha/ i um mo tani uni mini doṯ aha/ gwo mo ki: Gway piti yuḵu kaja mo? Atinta i miga/ thoḵ uni mo? ¹⁴ Arumgimis ki thoḵa Musa gwo mo ki: Aha/ Be I Tana Aha/ be. Dhali a’di ki o gwo mo ki: Oyi gwo yansan e ’kwani ma Israyiil ki: Aha/ jin Tana Aha/ mo tani i hashki aha/ i um mo.

¹⁵ Arumgimis si’da/ ki owa Musa gwo mo ki: Oyi gwo yansan mo ma e ’kwani ma Israyiil mo ki: Aha/ jin tana TAP̱A jin ta’da Arumgimis gi ibabam bum mo a’di jin ta’da Arumgimis ma Ibrahiim mo dhali Arumgimis ma Is/hak mo dhali Arumgimis ma Yakuub mo aha/ i hashkina /e i uni mo. Gway pem a’dansan ki sule/ sule/ ya ye ’ba/ mo. Gway yan a’di ta ’pemen jin min ma risa nyaḵum yili heri ’baar mo ka londhoṯẖ mo be.

¹⁶ Yaku/ mo dhali tuli jwahaŋ ’kwani ma Israyiil gun jina ji isi monṯal ’de/ mo dhali oyi uni gwo mo ki: TAP̱A jin ta’da Arumgimis gi ibabam bum mo a’di jin ta’da Arumgimis ma Ibrahiim mo dhali Arumgimis ma Is/hak mo dhali Arumgimis ma Yakuub mo a’di i piki aha/ i is mo mmo/o gwo mo ki: Aha/ nyiṯẖkina um mo gom to kun miikunu um mo e Pam Masir mo be. ¹⁷ Dhali aha/ ona gwo is mo ki aha/ mina susi um ka pije/ mo ’peni mii jin woci um is she/ ’peni miiŋ ’kwani gi Pam Masir mo mmop̱u’d mo e Paŋ ḵanaan mo dhali Pa Hiṯẖṯẖa mo dhali Pan Amuur mo dhali Pam P̱aaris mo dhali Pa Hayp̱a mo dhali Pa Yabuus mo e mo jin ’bor ma ’cesh ki ’bor mo.

¹⁸ Dhali uni mini ciḵ ’twam pini mo dhali /e dhali gwany jwahaŋ ’kwani ma Israyiil um mini ii eya maliḵ gi ’kwani gi Pam Masir mo dhali o a’di gwo mo ki: TAP̱A jin ta’da Arumgimis gi ’kwani ma Ibraniyiin mo tani a’di buṯki’di aman mo. Dhali shwane/ aman doṯa /e ’twa/ mo ki /e mini dhal aman bway ki aman mina ii mo jin ḵala’da cimi kwara e mombwaasho mo ki aman mina ’ciṯẖ to e ’kus mmomiiya bas gom Tap̱a Arumgimis bam mo be. ¹⁹ Aha/ misha ka maliḵ gi Pam Masir midi diki dhal um bway mo hili isi ciki/ a’di minu gac̱ ki dhan me’d jin ’bitha’bi’th mo be. ²⁰ Wakan aha/ mina he’th me’d pem mo dhali dor ’Kwani Masir mo ka ris miimer mo uni kun miga/ mii mo. Yan’ko’d mo tani a’di midi dhal um bway mo be.

²¹ Dhali aha/ mina raḵ ’kwani gwansan mmoc̱i um monyca mo. Dhali ki um mini ii mo tani um mini ’koki ii bwam me’d ’te/ mo be. ²² Up̱ ’Kwani Israyiil ka ’deṯe/ ’deṯe/ mini ii gu’b gi ’Kwani Masir kun ’dish uni is mo dhali mini doṯ to ’peni uni mo dhali ’peni uni ilu/ gun ’koni gu’b buni mo. Dhali uni mini doṯ uni dhiriny ’dolkon kush mo dhali dhiriny ’dolkon gana/ mo dhali burrinye/ mo. Dhali um mini hi’thki iya/m bum burrinye/ i/is mo dhali i’bwa/m bum si’da/ mo. Dhali um beseene/ mini bu’th mal gi ’kwani Pam Masir ki mom’bi’th bum mo be.

Jamas Mii goma Musa mo

¹ AMusa thoḵki gwo mo ki: Waḵki/ uni ’koki gam gwom pem is mo walla ciḵ ’twam pem mo dhali o aha/ gwo mo ki: TAP̱A yisa piki /e i is mo yisa tani, aha/ mina mii ata mo?

² Dhali yan’ko’d TAP̱A ki o a’di gwo mo ki: Atinta i di’di me’d pini mo sa/? A’di ki thoḵ a’di gwo mo ki: Alukaas mo be.

³ Dhali TAP̱A ki o gwo mo ki: Biṯi a’di a’cesh mo ma. Wakan a’di biṯki a’di a’cesh mo dhali a’di warki’d ki tasha/ mo dhala Musa guski’d ’peni a’di mo be. ⁴ Yan’ko’d TAP̱A oki’da Musa gwo mo ki: Luŋi ma dhali buthi a’di i thin mo. Wakan a’di luŋki’d mo dhali bu’th a’di mo dhali a’di warki’d ka lukaas doḵ e mo e me’d piti mo be. ⁵ Wakan ki uni mini gam gwo is ki TAP̱A a’di piki /e i is mo, a’di jin ta’da Arumgimis jin ta ji gi ibabam buni mo, Arumgimis ma Ibrahiim mo dhali Arumgimis ma Is/haḵ mo dhali Arumgimis ma Yakuub mo.

⁶ Doḵ e TAP̱A ki o a’di gwo mo ki: Dwari me’d abor pini mo ma, dhali a’di miiki’d kan mo. Dhali ki a’di buḵki a’di ka pije/ mo tani me’d piti ’koshkina monthus mo mmokusha/ kush me’d ’thip̱iny gana/ mo be.

⁷ Dhali yan’ko’d Arumgimis ki o a’di gwo mo ki: Dwari me’d pini ka nyaŋ’ko’d abor pini mo. Wakan a’di dwarki me’d ka nyaŋ’ko’d abor piti mo. Dhali ki a’di buḵki a’di ka pije/ mo tani a’di dhelelkunu ka nyaŋ’ko’d mo me’d isi is pitiŋ gana/ mo be.

⁸ Dhali TAP̱A ki o gwo mo ki: Waḵki/ uni mini ’koki gam /e gwo is mo tani, walla ’koki c̱iya hirdhe/ ki to gi miimer jin ṯwa/a/ mo tani uni mini gam gwo is ki miimer yansan mo be. ⁹ Waḵki/ uni ’koki gam gwo is, isi gom to gi miimera su/ gwansan mo walla ’koki c̱iya hirdhe/ ki ’twam pini mo tani /e mini pash yi’de/ ’peni ḵumma/ yi’de/ mo dhali gac̱ a’di ap̱owa ’cesh jin ḵuthaḵu’th mo dhali yi’de/ midi war ka bas mo be.

¹⁰ Hila Musa thoḵki TAP̱A gwo mo ki: Ayy Tap̱am pem, aha/ mola gwo o ka ḵar e ki ’bore/ ki sule/ mo, ’peni nṯwa/a/ nniin wala ’peni embul jin ṯela /e mii ’pen mmowal ’twa/ ki aha/ mo. Hili aha/ diṯa ’twa/ wal ki diṯ mo mmo/o gwo mo dhala le’d c̱umpula/ c̱umpul mo be.

¹¹ Dhali yan’ko’d TAP̱A ki o a’di gwo mo ki: Kaja a’di i uḵki ’twa/ gi wathi/ mo? Dhali kaja a’di i karki a’di mo mmota amanmol ’twa/ wal mo walla mmota ’diye/ mo walla mmomish to p̱ar e mo walla mmota aja’da/ mo? A’di diki ta aha/ mo ’taa jin tana TAP̱A mo? ¹² Shwane/ yaku/ mo dhali aha/ mina di e ’twam pini mo dhali ṯor /e gwo jin mina /e i o mo be.

¹³ Hili aMusa thoḵki gwo mo ki: Ayy Tap̱a, hashki wathiŋ kamu/ mo ma mmomii wakan mo.

¹⁴ Dhali yan’ko’d TAP̱A diṯkina bwa ap̱o/a Musa ki ’bi’th mo dhali a’di ki o gwo mo ki: Din ma Haruun ki ta akam pini ’peni ’kwani Lawi mo ’taa? Aha/ misha ki a’di mish gwo o ki ’bore/ mo dhali a’di yayi’di bway mmogam /e ’kup̱ mo. Dhali ki a’di midi mish /e mo tani a’di mina bwa i ’bor kagahara mo be. ¹⁵ Dhali /e mini o a’di gwo mo dhali ṯor ki a’di gwo jin mina a’di o mo. Dhali aha/ mina di e ’twam pini mo dhali di e ’twam piti mo dhali ṯorki um gwo mo gom to kun mina umi mii mo be. ¹⁶ A’di midi o gwo mo gom /e e ’kwani mo dhali midi ta ’twa/ gom /e mo. Dhali /e a’di i mini wa a’di e ka Arumgimis mo be. ¹⁷ Dhali /e mini ḵala lukaas yan i me’d mo mmoṯor miimer ka ris mo.

AMusa Doḵki’d Bway Pam Masir mo

¹⁸ Yan’ko’d aMusa doḵki’d ka nyaŋ’ko’d eya Rau/iil mo a’di jin ta’da mar piti mo dhali o a’di gwo mo ki: /E doṯga/ ’twa/ mo ki: Dhalki aha/ bway mmodoḵ ka nyaŋ’ko’d i ’kwanim pem e Pa Masir mo dhali p̱ar uni e mo waḵki/ ’kon ki e mo. Dhala Rau/iil ki owa Musa gwo mo ki: Yaku/ ki moŋḵu’th is mo. ¹⁹ Dhali ka Musa di’d e Pam Midyaan naskina/ mo tani TAP̱A ki o a’di gwo mo ki: Doḵi ka nyaŋ’ko’d e Pam Masir mo, haali/ aris ’kwani kun ŋap̱ki /e mmo’kosh jwa mo tani uni wukin mo be. ²⁰ Wakana Musa suski ash mo dhali iya/m piti isu/ mo dhali dhu uni i ’ku thuluny mo dhali ṯel ’pen mmodoḵ ka nyaŋ’ko’d eya ’cesh gi Pam Masir mo. Dhali e me’d piti mo tani a’di ki ḵala lukaas ma Arumgimis mo be.

²¹ Dhali TAP̱A ki owa Musa gwo mo ki: Ki /e mini doḵ ka nyaŋ’ko’d e Pam Masir mo tani hili ki ’bore/ mmomiiya ris miimeri ’baar mo ibwambor ma P̱irawn mo uni kun c̱ikika/ /e mom’bi’th mmomii mo. Hili aha/ mina ’bi’thki a’di adum piti is me’d wosh mo, wakan ki a’di midi diki dhal ’kwani bway mo mmo/ii mo be. ²² Dhali /e mini owa P̱irawn gwo mo ki: Yase ta gwo jin ona TAP̱A ki is piti mo ki: Israyiil ta’da bwanyaraŋ gwaṯẖ pem mo be. ²³ Dhali aha/ ṯora /e gwo mo ki: Dhalki ya/m pem ya’d mo ki a’di midi mii mii mmotaḵ aha/ mo. Dhali /e ushun mo mmodiki dhal a’di bway mmoya mo. Gom kan aha/ mina ’kosha bwanyaraŋ gwaṯẖ pini mo be.

²⁴ E mo jin ishkina uni mo e bway mo tani TAP̱A gamki a’di ’kup̱ mo dhali ŋap̱ a’di mmo’taki ’kosh jwa mo be. ²⁵ Dhali yan’ko’da Sap̱uura ki ’de’k wosh jin kaaka dhali ’ci’th ya/m piti amunyjal yis mo dhali ta aMusa sho’k piti ki a’di mo. Dhali a’di ki o gwo mo ki: /E ka jiŋ gana/ tana kaṯhim pem ka bas e aha/ mo be. ²⁶ Gom gwo gi wakan mo tani TAP̱A dhalki a’di mo. Dhali yan’ko’d a’di waka’d mo kan me’d jin okin ma yim a’di mo ki: /E tana kaṯẖim pem ka bas mo. A’di o gwo yan goma munyjal yis jin ’ciṯẖu mo be.

²⁷ Dhali TAP̱A oki’da Haruun gwo mo ki: Yaku/ e mombwaasho mo mmogama Musa ’kup̱ mo. Gom kan mo tani a’di yaki’d mo dhali gam a’di ’kup̱ mo e wosha turga/ ma Arumgimis mo dhali p̱i aMusa ’twa/ mo be. ²⁸ Dhala Musa ṯorki’da Haruun aris gwo gi TAP̱A mo jin hashkina TAP̱A a’di mo. Dhali a’di si’da/ ṯorki’da Haruun aris jamas miimer mo jin ḵankina TAP̱A a’di mo mmomii mo be.

²⁹ Dhala Musa uni ka Haruun iikin mo dhali tula ris gwanyjwahaŋ ’kwani ma Israyiil isi monṯal ’de/ mo. ³⁰ Dhala Haruun oki’da ris gwo ’baar mo uni kun ṯorkina TAP̱A aMusa mo. Dhali a’di ki mii jamas miimer i bwambori ’kwani ’baar mo be. ³¹ Dhali ’kwani gamki gwo is mo. Dhali uni ciḵki gwo ki TAP̱A yaya’di ’kwani ma Israyiil mo dhali ki a’di si’da/ ta gi bwaŋ kulum ki nyanye/ gom isa nyor buni jin wo’cki uni is she/ mo. Dhali uni luŋkina luŋ mo be.

Ka Cim jin Ṯwa/a/ i Bwambora P̱irawn

¹ Yan’ko’da Musa dhala Haruun iikina P̱irawn mo dhali o a’di gwo mo ki: Yase/ ta gwo jin ona TAP̱A mo a’di jin ta’da Arumgimis gi ’kwani ma Israyiil mo ki: Dhalki ’kwanim pem iin mo mmota gi dhan moshwan to mmotaḵ aha/ e mombwaasho mo.

² Hila P̱irawn oki gwo mo ki: Kaja i taki TAP̱A mo ki aha/ mina c̱i a’di embul mo dhali dhala Israyiil bway mo mmo/ii mo? Aha/ yisa misha TAP̱A yisa. Dhali aha/ yisa mina dhala Israyiil bway mo mmo/ii mo yisa.

³ Dhali yan’ko’d uni ki o gwo mo ki: Arumgimis gi ’kwani Ibraniyiin a’di nyaḵki is tul ki aman mo. Aman ’thona /e bway mo mmodhalki aman iina mo ari ii jin tura ’ba/ gom jasa cimi kwara mo e mombwaasho mo. Aman mina mii TAP̱A abasa ’cesh mo a’di jin ta’da Arumgimis bam mo, isi ciḵi/ ki a’di midi diki biṯa p̱o/ aman mo ki ’ba’th jin woci ’kwani is she/ mo walla ki mo ma mee mo be.

⁴ Hila maliḵ gi ’kwani Pa Masir oki uni gwo mo ki: Musa um ka Haruun, ata ŋap̱a um mo mmosus ’kwani mo ’pena ṯu’c buni mo? Doḵi ka nyaŋ’ko’da ṯu’c bum mo ma. ⁵ Dhala P̱irawn ki o gwo mo ki: ’Kwani kun ’koni bampa/ yansan mo tani uni tana ris ka ris mo. Um ki dosh uni mo ’pena ṯu’c buni gomata?

⁶ Ka tenten ’de/ yan mo tani aP̱irawn ḵanki’da ris imanjiya ṯu’c kun ta ’Kwani Masir gwo mo dhali imahil tiya kun ta ’kwani ma Israyiil mo. ⁷ Um mini doḵ e c̱i ’kwani ḵun’tush i me’d mo mmo’thoḵa jeŋgu’b yisa. Dhalki uni iini ŋap̱i ḵun’tush ki is buni mo. ⁸ Uni mini mii uḵa jeŋgu’b me’d jin miina uni iṯwa/a/ mo. Ajeŋ gu’ba ’deŋ kamu/ yisa midi p̱iya. Uni tana p̱iny is ka p̱iny is mo. Wakan a’di ona uni gwo ki: Dhalki aman iina i miiya Arumgimis bam abasa ’cesh ’te/ mo. ⁹ Dhalka ṯu’c kun diṯadiṯ i ’thiḵkunu ’kwani i ’ba/ mo ki uni mini miiya ṯu’c mo dhali ’koki c̱i ’ce mo gom gwo ma maḵ ka ris mo.

¹⁰ Wakan imanjiya ṯu’c dhali imanhil tiya kun ta ’kwani ma Israyiil mo tani uni iikin ka pije/ mo dhali o ’kwani gwo mo ki: Yase ta gwo jin on ma P̱irawn mo ki aha/ mina diki c̱i um ḵun’tush mo be. ¹¹ Iiyi ki is bum mo dhali ḵali ḵun’tush ’peni mo jin mina umi gami a’di mo. Hili aṯu’c bum mina sheŋ kamu/ i p̱o’d yisa ki sule/ mo. ¹² Wakan aris ’kwani c̱ekerki bwa mo mmopwaḵ is e Pa Masiri ’baar mo mmotula wusha is mo me’d ḵun’tush mo be. ¹³ Dhali imanjiya ṯu’c buni naskina/ ’kon mmopucur uni ka ṯu’c mo mmo/o gwo mo ki: Miiyi aṯu’c bumi ’baar mo me’d jin miina um a’di ka cimi ’baar mo jin c̱inu um ḵun’tush inniin mo. ¹⁴ Dhali imanhil tiya ’peni ’kwani ma Israyiil uni kun dhuna imanmiiya ṯu’c ma P̱irawn ki imanhil tiya mo tani uni si’da/ dorkunu mo dhali doṯkunu gwo mo ki: Atinta ’kona um ki miiya risa ṯu’c bum mo mmo/uḵa jeŋgu’b ka nimira shwane/ dhali katili mo me’d mii jin miikina um a’di iṯwa/a/ mo?

¹⁵ Yan’ko’d imanhil tiya ’peni ’kwani ma Israyiil p̱u’dkin mo dhali ḵum cuuwa eya P̱irawn mo ki: Atinta ṯu/ula /e aman ki mii gi wakan mo? ¹⁶ ḵun’tusha kamu/ yisa di’da jin ḵalunu c̱iŋkinam pini mo. Hili uni ’kon mo mmoc̱a’bi o aman gwo mo ki: ’Thoḵa jeŋgu’b mo. P̱ari c̱iŋkinam pini e ’koshu kata? Hili ’kwanim pini uni a’di ṯẖu’th mii mo.

¹⁷ Hila maliḵ ki thoḵ uni gwo mo ki: Um tana p̱iny is ka p̱iny is mo. A’di ona um gwo ki: Dhalki aman iina mo mmomii TAP̱A abasa ’cesh mo. ¹⁸ Doḵi ka nyaŋ’ko’d mo dhali miiya ṯu’c mo haali/ ḵun’tusha kamu/ minu c̱i ki um yisa. Hili um mini uḵa jeŋgu’b ki nyanye/ mo mmonyaḵki jin ṯwa/a/ mo. ¹⁹ Imanhil tiya ’peni ’kwani ma Israyiil uni mishki mo mo ki uni ’kokin mo e embul jin ḵaŋkama ḵaŋkam mo ka P̱irawn oki gwo mo ki: Um mini dhalku/ miiŋ kamu/ ki guwa wuy mo ’pena ṯuca jeŋgu’b mo a’di jin ta toma e me’d mo. ²⁰ Uni gamki iMusa ’kup̱ mo uni ka Haruun mo ki uni c̱orki uni mo me’d jin iiyina uni ka pije/ mo ’pena P̱irawn mo be. ²¹ Dhali uni ki thoḵ uni gwo mo ki: Dhalki TAP̱A hilki’da p̱o/ um mo dhali dwall um gwo mo haali/ um dhuki aman mo mmota imankola kol mo e jis e ma P̱irawn mo dhali aris imanmii a’di to mo dhali um dhu gandala turga/ e me’d buni mo mmo’kosh aman jwa mo be.

Arumgimis Oki Gwo Is gom To jin Minu Mii mo

²² Dhali yan’ko’da Musa doḵko’d mo e TAP̱A mo dhali o gwo mo ki: Ayy Tap̱a, atinta miikina /e to jin shi/ashi/ wakan ap̱o/ ’kwani gwansan mo? Dhali atinta sa/ i hashina /e aha/ wakan mo? ²³ Haali/ me’d jin yakika/ aP̱irawn mo dhali o gwo ki gway pini mo tani a’di boṯki mii ton thus ki nyanye/ ap̱o/ ’kwani gwansan mo. Dhali /e si’da/ yisa ’cuḵki ’kwanim pini gwansan yisa ki sule/ sule/ mo.

¹ Yan’ko’d TAP̱A thoḵki’da Musa gwo mo ki: Shwane/ /e mini mish to jin miga/ miiya P̱irawn mo haali/ ki me’d pem jin ’bitha’bi’th mo tani aP̱irawn midi hashki uni ka pije/ mo. Nye, ki me’d pem jin ’bitha’bi’th mo tani a’di midi ur uni ka pije/ ’peni bampam piti mo be.

Arumgimis Yuḵki’da Musa mo

² Dhali Arumgimis ki owa Musa gwo mo ki: Aha/ tana TAP̱A mo. ³ Aha/ pikina Ibrahiim i is dhala Is/haḵ dhala Yakuub mo me’da Arumgimis jin c̱a’b ki dem dem mo. Hili gom gway pem jin taka/ TAP̱A mo tani aha/ dina ki dhal gway yan bway mo uni ki mish aha/ mo be. ⁴ Aha/ si’da/ ṯela gwom pem jin gamga/ me’d ki mondeḵ nyaḵki uni mmoc̱iki uni Paŋ Kanaan mo e bampa/ jin ’kona uni ’pena gush ki hilkina/ mo be. ⁵ Dhali aha/ si’dayi ciḵa ohon gi ’kwani ma Israyiil mo uni kun dhukina ’Kwani Masir mo mmota c̱iŋkinam buni mo. Dhali aha/ kakina gwom pem e jin gamga/ me’d mo.

⁶ Oyi gwo cikise/ mo e ’kwani ma Israyiil mo ki: Aha/ tana TAP̱A mo dhali aha/ mina sus um ka pije/ mo ’peni ton diṯin gi ’kwani Pa Masir mo dhali aha/ mina ’cu’k um mo ’peni mii jin miina uni um ki c̱iŋkina/ mo. Dhali aha/ mina wan um ’ba/ mo ka bim pem jin miga/ ye’th ka pije/ mo dhali ki dhan mii jin caaca ki gwon dwall mo be. ⁷ Dhali aha/ mina bu’th um ki ’kwanim pem mo dhali aha/ mina ta Arumgimis bum mo. Dhali um mini mish mo mo ki aha/ tana TAP̱A Arumgimis bum mo a’di jin suski um ka pije/ mo ’peni aris ton diṯin gi ’Kwani Masir mo be. ⁸ Dhali aha/ mina sus um ka pije/ mo e bampa/ jin oka/ gwo is ki gwon deḵ mo mmoc̱ika Ibrahiim mo dhala Is/haḵ mo dhala Yakuub mo be. Aha/ mina c̱i ki um a’di mo mmota mo jin mina umi bu’th is mo. Aha/ be i tana TAP̱A mo be.

⁹ Musa si’da/ oki yase e ’kwani ma Israyiil mo, hili uni ’koki ciḵ gwo ma Musa haali/ shi/in buni i ’ce’dkunu bwa mo dhali gom miiny c̱iŋkinam buni jin maṯẖamaṯẖ mo be.

¹⁰ Dhali TAP̱A ki owa Musa gwo mo ki: ¹¹ Yaku/ /e mo dhali ṯora P̱irawn gwo mo a’di jin ta’da maliḵ gi ’kwani Pam Masir mo mmodhalki ’kwani ma Israyiil bway mo mmo/ii ka pije/ mo ’peni bampam piti mo.

¹² Hila Musa thoḵki TAP̱A gwo mo ki: Hili waḵki/ ’kwani ma Israyiil ush gwo ciḵ ’peni aha/ mo tani bakata i min ma P̱irawn i ciḵ aha/ ’twany c̱umpulgam pem yan mo? ¹³ Hili TAP̱A oki iMusa uni ka Haruun gwo mo gom ’kwani ma Israyiil mo dhali goma P̱irawn mo a’di jin ta’da maliḵ gi ’kwani Pam Masir mo. Dhali a’di ḵanki iMusa mmosus ’kwani ma Israyiil ka pije/ mo ’peni Bampa/ Masir mo be.

Kuŋ Gu’b ma Musa dhala Haruun

¹⁴ Gwansan uni tana ’kaŋ’kup̱ gom kuŋ gu’b gi ibabam buni mo, gway gi iya/ ma Ra/ubiin mo a’di jin ta’da bwanyara/ ma Israyiil mo: Hanuuḵ dhala P̱allu dhala Hasruun dhala ḵarmi mo. Uni gwansan i tana waḵ ma Ra/ubiin mo be.

¹⁵ Gway gi iya/ ma Shim/uun si’da/ aniihe/ mo. Yamu/iil dhala Yamiin dhala Uhad dhala Yakiin dhala Suhar dhala Sha/uul jin ta ya/ ’pena ’bom gi Paŋ Kanaan mo. Uni i tana waḵ ma Shim/uun mo be.

¹⁶ Gwansan si’da/ i ta gway gi iya/ ma Lawi mo isi me’da nyaḵum yil buni kun tana uni mo: Jirshuun dhala Gahaat dhala Maraari mo. Dhali yil ma Lawi jin dikina a’di ki e mo tani ’koni 137 mo be. ¹⁷ Dhali gway gi iya/ ma Jirshuun aniihe/ mo: Libni dhala Shim/i nyaḵka waḵ buni mo be.

¹⁸ Dhali gway gi iya/ ma Kahaat aniihe/ mo: Amraam dhala Yishaar dhala Hibruun dhala Usi/iil mo. Dhali yil jin dikin ma Kahaat ki e mo ’koni 133 mo be.

¹⁹ Dhali gway gi iya/ ma Maraari aniihe/ mo: Mahli dhala Mushi mo: Gwansan uni tana waḵ gi ’kwani Lawi mo isi me’da nyaḵum yil buni mo be.

²⁰ Amraam bu’thki’da ’bom jin yuḵu ka Yukabed mo a’di jin ta ’bwah ma babam piti mo dhala yim dho’thki a’diya Haruun mo dhala Musa mo. Dhali yil piti jin dikina a’di ki e mo tani a’di ’koni 137 mo be.

²¹ Dhali gway gi iya/ ma Yashar aniihe/ mo: ḵuurah dhala Napu’c dhala Sikri mo be.

²² Dhali gway gi iya/ ma Usi/iil aniihe/ mo: Misha/iil dhala Elsap̱aan dhala Sitri mo be.

²³ Haruun si’da/ bu’thki’da ’bom jin yuḵu gway ka Alishaba/ mo a’di jin ta ’bwa/ ma Aminadab mo dhali a’di jin ta ’bwah ma Nahshuun mo. Dhali ayim dho’thki a’di aNadaab dhala Abiihu dhala Eli/asar dhala Iṯẖamaar mo be.

²⁴ Dhali gway gi iya/ ma ḵuurah aniihe/ mo: Assiir dhala Elḵana dhala Abi/asaap̱ mo. Gwansan uni i tana waḵ gi ’kwaniŋ ḵuurah mo.

²⁵ Ili/assar a’di jin ta ya/ ma Haruun mo a’di bu’thki’da ’bom ’de/ mo ’peni ’bwa/ ma Puṯi/iil mo. Dhala ayim dho’thki a’di a P̱inihas mo. Gwansan uni i tana ’kaŋ’kup̱ gu’b ’kwani ma Lawi mo ’pena waḵ buni mo be.

²⁶ AHaruun dhala Musa uni anansan kun ona TAP̱A gwo mo ki: Susu ’kwani ma Israyiil ka pije/ mo ’peni Bampa/ Masir mo ka waḵ buni mo. ²⁷ Uni i ta uni kun oki gwo eya P̱irawn jin ta’da maliḵ gi ’kwani Pa Masir mo mmomuri susu ’kwani ma Israyiil ka pije/ mo ’peni Pam Masir mo, aMusan ’de/ yan mo dhala Haruun mo be.

AHaruun Midi Ta Amanluḵ Goma Musa mo

²⁸ Ka tee yin jin okina TAP̱A gwo eya Musa e Bampa/ Masir mo tani ²⁹ TAP̱A oki’da Musa gwo mo mmo/o ki: Aha/ tana TAP̱A mo. Ṯori aP̱irawn jin ta’da maliḵ gi ’Kwani Masir aris gwo kun oka/ /e ’baar mo.

³⁰ Hila Musa thoḵki TAP̱A gwo mo ki: Aha/ wana ’twam pemi c̱umpula/ ki jin ta’da tinta i min ma P̱irawn i ciḵ ’peni aha/ mo?

¹ Dhali TAP̱A oki’da Musa gwo mo ki: Hili ma. Aha/ mina mii /e me’da Arumgimis ibwambora maliḵ mo. Akam pini ka Haruun midi o gwom pini goma maliḵ me’d isa manc̱i gwo ma Arumgimis jin o gwo ma Arumgimis gom ’kwani mo. ² Ṯorka Haruun aris to ’baar mo kun ḵankika/ /e mo dhala Haruun midi luḵ ka P̱irawn gwo mo mmodhal ’kwani ma Israyiil bway mo mmo/ii ka pije/ mo ’peni bampam piti mo. ³ Hili aha/ mina ’bitha P̱irawn adum piti mo, dhali ba aha/ mina mara ris jamas miim pem is mo dhali momer mo e Bampa/ Masir mo be. ⁴ P̱irawn yisa midi ciḵ gwo ’peni /e mo. Dhali yan’ko’d aha/ mina dor Pam Masir mo dhali susa waḵ pem ka ’deṯe/ ’deṯe/ ka pije/ mo uni kun ta ’kwanim pem mo ’peni Bampa/ Masir mo. ⁵ Dhali ’kwanim Pam Masir mini mish mo mo ki aha/ tana TAP̱A mo me’d jin miga/ dor Pam Masir mo dhali susu ’kwani ma Israyiil ka pije/ mo ’peni bwam uni mo be.

⁶ AMusa dhala Haruun uni miikin kan mo me’d isi ji gi ḵankina TAP̱A uni gwo mo be. ⁷ Ka tee jin okina uni a P̱irawn gwo mo tani aMusa i ’kona yili iss ’kwanim pa i doŋon mo dhala Haruun i ’kona yili iss ’kwanimpa i doŋon i ’ce’dka kwara ap̱o/ mo be.

Alukaas ma Musa Warka’d ki Tasha/ mo be

⁸ Dhali TAP̱A oki’da Musa dhala Haruun gwo mo ki: ⁹ Waḵka P̱irawn midi ḵan um mmomii miimer mo tani /e mini owa Haruun gwo mo ki: Budhi cwam pini mo dhali biṯi a’di a ’cesh i bwambor ma P̱irawn mo ki a’di midi war ki tasha/ mo.

¹⁰ Wakana Musa dhala Haruun uni iikina P̱irawn mo dhali miiki a’di me’d jin ḵankina TAP̱A uni gwo mo. Haruun biṯki’da lukaas piti a’cesh ibwambor ma P̱irawn mo dhali aris imanmiiya ṯu’c piti mo dhali a’di warki’d ki tasha/ mo be. ¹¹ Dhali yan’ko’d si’da/ P̱irawn yuḵki ’kwanim piti kun yuḵayuḵ mo dhali aris ŋarim piti mo. Dhali uni si’da/ miiki to jin nyaḵan mo ki miilaṯṯ buni mo. ¹² Haali/ aris uni ka ’deṯe/ ’deṯe/ biṯkina lukaas buni mo dhali uni warkin ki tasha/ mo. Hila lukaas ma Haruun a’di i loski’da lukaas buni i ’baar mo be. ¹³ Naskina/ adu ma P̱irawn wa ki wosh jin ’bitha’bi’th mo dhali ushki gwom buni gam is mo me’d gwo jin ṯorkina TAP̱A uni mo be.

Mompal jin Wo’c ’kwani is she/ ka Bas mo

¹⁴ Dhali yan’ko’d TAP̱A ki owa Musa gwo mo ki: Adu ma P̱irawn a’di ’bitha’bi’th mo. A’di ushki’d mo mmodhal ’kwani bway mo mmo/ii mo be. ¹⁵ Yaku/ a P̱irawn mon’thamo/ mo me’d isi mii jin miikina a’di mo mmoya ka pije/ e ḵumma/ Yi’de/ Niil mo. C̱ori a’di e yana gap̱ mo dhali ḵala lukaas pini yani me’d mo a’di jin warki’d ki tasha/ mo. ¹⁶ Dhali /e mini o a’di gwo mo ki: TAP̱A jin ta’da Arumgimis gi ’kwani ma Ibraniyiin a’di i hashki aha/ i /e mo mmo/o /e gwo mo ki: Dhalki ’kwanim pem iin mo ki uni mini luŋ aha/ mo e mom bwaasho mo. Dhali /e ushki gwo ha e naskina/ mo be. ¹⁷ Yase i ta gwo jin ona TAP̱A mo. ’Peni mii yan mo tani /e mini mish gwo ’ban ki aha/ tana TAP̱A mo. Aha/ mina dor ḵumma/ yi’de/ mo ka lukaas pem mo a’di jin diki’d e me’d pem mo dhali a’di midi war ka bas mo be. ¹⁸ Dhali wa’c kun ’kokini ḵumma/ yi’de/ yan mo tani uni mini wu mo dhali ḵumma/ yi’de/ midi bulabul mo be. Dhali ’kwani Pam Masir mini mol yi’de/ p̱i ’peni ḵumma/ yi’de/ yansan mo.

¹⁹ Dhali TAP̱A ki owa Musa gwo mo ki: Owa Haruun gwo mo ki: Budha lukaas pini mo dhali yetha bim pini mo ap̱o/ aris moŋ’kulu yi’de/ ka ris mo gi Pam Masir mo eya ris wor buni i ’baar mo dhali eya kanycal buni mo dhali eya ris ushi mo kun doshkina yi’dem buni dhali eya al buni ’baar mo, ki uni mini war ka bas mo. Dhali abas minu mish ki tur mo e Bampa/ Masiri ’baar mo eya ris bwaman toŋ’kul bwa mo kun ta cwa mo dhali e bwaman wosh kun ta ton tantar bwa mo be.

²⁰ Musa dhala Haruun uni miikin me’d jin ḵankina TAP̱A gwo mo. E jis e ma P̱irawn dhali aris imanmiiya ṯu’c piti mo tani Haruun ’de’kki’da lukaas mo dhali dora p̱o/ ḵumma/ Yi’de/ Niil mo. Dhala ris yi’de/ kun ’kokin mo eya Niil mo tani uni warkunu ka bas mo be. ²¹ Dhali aris wa’c kun ’kokin eya Niil mo tani uni wukin mo dhala Niil ki bul mo mo. Wakan ’kwani Pam Masir uni molki yi’de/ p̱i ’pena Niil mo. Dhali abas si’da/ ishki’d ki tur e Bampa/ Masiri ’baar mo be.

²² Hili ŋari gi Pam Masir mo tani uni si’da/ mii to jin nyaḵan ki miilaṯ buni mo. Wakan adu ma P̱irawn wa ki wosh jin ’bitha’bi’th mo. Dhali a’di diki ha uni gwo e mo me’d gwo jin okina TAP̱A mo be. ²³ AP̱irawn ṯu’kki’d mo dhali ya gu’b piti mo dhali a’di si’dayi diki kar ’cem piti gom to yan mo. ²⁴ Dhala ris ’kwani Pam Masir si’da/ uni c̱wanyki jis e yana Niil ka ris mo gom yi’de/ mmop̱i mo, haali/ uni molki yi’de/ p̱i ’pena Niil mo be.

Mompal jin Wo’c ’Kwani Is She/ ka ’Dwa/ mo

²⁵ Acim ’koni pesu/ kun pekin ’ko’di TAP̱A warki yi’den Niil ka bas mo be.

¹ Dhali yan’ko’d TAP̱A oki’da Musa gwo mo ki: Yaku/ mo eya P̱irawn mo dhali ṯori a’di gwo mo ki: Yase ta gwo jin ona TAP̱A mo ki: Dhalki ’kwanim pem bway mo mmo/ii mo ki uni mini mii mii mmotaḵ aha/ mo. ² Hili waḵki/ /e mini ush mo mmodiki dhal uni bway mo mmo/ii mo tani, aha/ mina ’kosh aris bampam pini ka ma’dinya ’dwa/ mo be. ³ Dhali ḵumma/ Yi’de/ Niil minu ’tu’d mo ka risa ’dwa/ mo. Uni mini seku bway gu’b pini mo dhali bway gu’b ish pini mo dhali ap̱owa cim pini mo dhali eya ris gu’b gi imanmii tom pini mo dhali ’kwanim pini mo dhali eya ris mo ma p̱urun pini mo dhali e bwaman ma sahan kun miikunu /eya gana’th mo. ⁴ Arisa ’dwa/ mini seku /e i is mo dhali ap̱o/ ’kwanim pini mo dhali ap̱o/ aris imanmiiya ṯu’c pini mo be.

⁵ Yan’ko’d TAP̱A oki’da Musa gwo mo ki: Ṯora Haruun gwo mo mmo’deḵa lukaas piti ap̱o/ aris yi’de/ kun son mo dhali ap̱owa risa kanycal dhali ap̱owa risa al mo. Dhali raḵa risa ’dwa/ mmoseyu/ ap̱o/ Bampa/ Masir mo.

⁶ Wakana Haruun ’de’kki’da lukaas piti mo ap̱owa ris yi’de/ gi Pam Masir mo. Dhali arisa ’dwa/ p̱u’dkin ka pije/ mo dhali kum Bampa/ Masir mo be. ⁷ Hili ŋari si’da/ miiki miilaṯ buni gun gama uni adu is mo kun nyaḵkan ki mii gi iMusa mo. Dhali uni si’da/ raḵana arisa ’dwa/ mmoseyu/ ka pije/ mo e Bampa/ Masir mo be.

⁸ Dhali yan’ko’da P̱irawn yuḵki’da Musa dhala Haruun mo dhali o uni gwo mo ki: ’Thoyi TAP̱A mo ma ki a’di midi ḵalka risa ’dwa/ mo ’peni aha/ mo dhali ’peni ’kwanim pem mo, dhali aha/ mina dhal ’kwani bway mo mmo/ii mo mmomii TAP̱A a basa ’cesh mo be.

⁹ Musa oki’da P̱irawn gwo mo ki: Aha/ mina bwa ’kuny mo mmo’tho gom /e mo. Ṯori atente/ jin ŋap̱a /e aha/ ki ’tho gom /e mo dhali goma ris imanmiiya ṯu’c pini mo dhali gom ’kwanim pini mo ka risa ’dwa/ minu ’ce’d sho’k mo dhali minu dhalku/ mo mmo’ko jasi e ḵumma/ Yi’de/ Niil mo be.

¹⁰ Dhala P̱irawn ki o gwo mo ki: Ka’thamo/ mo. AMusa thoḵki gwo mo kan ki: Dhalki mii yan miinu wakan mo me’d jin okina /e mo ki /e mini mish mo mo ki jaŋ kamu/ yisa di’da jin wa ki TAP̱A Arumgimis bam mo. ¹¹ Ama’dinya ’dwa/ mini dhal um ’pen mo dhali aris gu’b pini mo dhali aris imanmii tom pini kun mii ki /eya ṯu’c mo dhali ’kwanim pini mo. Dhali momboc̱ ma ’dwa/ mina uni ’ko jasi e ḵumma/ Yi’de/ Niil mo be.

¹² Wakana Musa dhala Haruun uni iikin ka pije/ mo ’pena P̱irawn mo. Dhala Musa ’thoki’d ki ’bi’th mo e TAP̱A mo isi gom gwo ma ’dwa/ mo jin hashkina a’di a P̱irawn mo. ¹³ Dhali TAP̱A miiki a’di mo isi me’d gwo ma Musa mo. Dhali arisa ’dwa/ wukin mo eya ris gu’bi ’baar mo dhali eya ris bwaagoŋi ’baar mo dhali e mondhe’di ’baar mo. ¹⁴ Dhali uni tulki uni is i monṯal ’de/ ka ŋul’kup̱ mo dhali bampa/ bulabul mo be. ¹⁵ Hili ka P̱irawn p̱arki mo e mo ka ’dwa/ wukin mo tani a’di ’bi’thki’da dum piti mo dhali diki’d ki gwo i bwa mo mmo/ush gwo ma Musa dhala Haruun mo me’d jin ṯorkina TAP̱A uni gwo mo be.

Mompal jin Wo’c ’Kwani Is She/ ka Shokom mo

¹⁶ Dhali yan’ko’d TAP̱A ki owa Musa gwo mo ki: Ṯora Haruun gwo mo ki: ’Deki alukaas pini mo dhali dori bu’da ’cesh mo ki a’di midi war ka shokom ki tur mo e Bampa/ Masiri ’baar mo. ¹⁷ Wakan aHaruun dorki’da ’cesh ka lukaas piti mo dhali dhan bu’d ’ce’dki’d ki to’bo/ to’bo/ mmowar ka shokom mo dhali shwa ’kwanim Pam Masiri ’baar mo dhali to em buni si’da/ mo be. ¹⁸ Dhali ŋari si’da/ palki mii mo mmo’taki raḵa shokom mmoseyu/ ka pije/ ki miilaṯ buni mo jin gama uni adu is tani, hili uni p̱ikunu e mo. Ashokom ishki’d e ’kwani mo dhali to e mo be.

¹⁹ Dhali ŋari ṯorkina P̱irawn gwo mo ki: Yansan ta me’d ma Arumgimis mo. Hila P̱irawn i ’bi’thkin ma du mo dhali a’di si’da/ ush gwom buni ciḵ mo me’d gwo jin okina TAP̱A mo be.

Mompal jin Wo’c ’Kwani Is She/ ka ḵanthi/ mo

²⁰ Dhali yan’ko’d TAP̱A ki owa Musa gwo mo ki: Cuyi mis mo mon’thamo/ ka’tum mo dhali yayi dosha bora P̱irawn mo me’d jin yakina a’di ka pije/ bwaya Niil mo, dhali ṯor a’di gwo mo ki: Yase ta gwo jin ona TAP̱A mo ki: Dhalki ’kwani bway mo mmo/ii mo ki uni mini mii mii mmotaḵ aha/ ki momaŋ mo. ²¹ Waḵki/ /e mini diki dhal ’kwanim pem bway mo mmo/ii mo tani aha/ mina hash ka dhana buhanya ḵan’thi/ ap̱o/ /e mo dhali ap̱o/ imanmiiya ṯu’c pini mo dhali ap̱o/ ’kwanim pini mo dhali eya ris bwaŋgu’b pini mo. Dhali eya ris bwaŋgu’b gi ’kwani Pam Masir mo tani uni minu ’tu’d mo ka dhana buhanya ḵan’thi/ mo dhali i tagi mo jin karkina Bampa/ Masir ’kup̱ mo be.

²² Hili ka tee c̱aan mo tani aha/ mina ḵwa/ Bampa/ Jaasaan bwa mo a’di jin ’kokina ’kwanim pem i cine/ mo, wakan ka buhanya ḵan’thi/ ’deŋ kamu/ midi diki di imun mo, ki /e mini mish gwo ’ban ki aha/ tana TAP̱A jin di’d e bwaman gi mony’cesh mo. ²³ Yaase/ i ta mii jin miga/ mii mo mmoḵwa/a ḵwa/ bwa mo e bwaman ’kwanim pem dhali ’kwanim pini mo. Ka’thamoŋ gana/ mo tani a’di i mina to mer yan i di mo be.

²⁴ Dhali TAP̱A miiki mii gi wakansan mo. E mun mo tani adhana buhanya ḵan’thi/ p̱u’dkin mo e gu’b ma P̱irawn mo dhali gu’b ma ris imanmii tom piti mo. Dhali eya ris Bampa/ Masiri ’baar mo uni shi/kunu is mo ki ’kup̱ gwo ma ḵan’thi/ mo be.

²⁵ Dhali yan’ko’d a P̱irawn yuḵki’da Musa dhala Haruun mo dhali o uni gwo mo ki: Iiku/ mo dhali miiya Arumgimis bum abasa ’cesh e bampa/ Masir mo.

²⁶ Hila Musa thoḵki gwo o ki: A’di yisa midi ’bora mmomii mii gi wakan mo haali/ aman mina mii TAP̱A Arumgimis bam abasa ’cesh mo. Mii yan midi bulabul mo gom ’kwani Pam Masir mo. Waḵki/ aman miina abasa ’cesh jin bulabul mo e jis e gi ’kwani Pam Masir mo tani uni mini ’koki ’kosh aman jwa mo ki wosh mo ’te/ tana? ²⁷ Aman mina mii ii mo goma cimi kwara mo e mom bwaasho mo dhali mii TAP̱A Arumgimis bam abasa ’cesh mo me’d gwo jin ḵankina a’di aman mo be.

²⁸ Wakana P̱irawn oki gwo mo ki: Aha/ mina dhal ki um bway mo mmo/ii mo dhali mii TAP̱A Arumgimis bum abasa ’cesh mo e mombwaasho mo hili um mini ii i si’dasi’d yisa. ’Thoyi gom aha/ si’da/ mo.

²⁹ Dhali yan’ko’da Musa oki gwo mo ki: Aha/ yana mo ka pije/ mo ’peni /e mo dhali aha/ mina ’tho TAP̱A ki a’di midi hashka buhanya ḵan’thi/ mo ’peni /e mo jin tana P̱irawn mo dhali ’peni imanmiiya ṯu’c pini mo, dhali ’peni ’kwanim pini mo ka’thamoŋ gana/ mo. P̱irawn, dhalku/ ki c̱a’bi heka he’k em p̱us mo doḵ e mo mmodiki dhal ’kwani bwayi ii mo mmomii TAP̱A abasa ’cesh mo.

³⁰ Yan’ko’d aMusa a’di yaki’d ka pije/ mo dhali ’thoki TAP̱A mo be. ³¹ Dhali TAP̱A miiki’d wakan mo me’d jin okin ma Musa a’di mo dhali ḵalki’da buhanya ḵan’thi/ mo ’pena P̱irawn mo dhali ’peni imanmiiya ṯu’c piti mo dhali ’peni ’kwanim piti mo. Jan ’deŋ kamu/ yisa boc̱o’da. ³² Hila P̱irawn ’bi’thki’da dum piti is mo doḵ e ka tente/ yansan gana/ si’da/ mo, dhali diki dhal ’kwani bway mo mmo/ii mo be.

Mompal jin Wo’c ’Kwani Is She/ gom To/e kun Thip̱u mo

¹ Dhali yan’ko’d TAP̱A oki’da Musa gwo mo ki: Yaku/ mo eya P̱irawn mo dhali o a’di gwo mo ki: Yase/ ta gwo jin ona TAP̱A Arumgimis gi ’kwani Ibraniyiin mo ki: Dhalki ’kwanim pem bway mo mmo/ii mo ki uni mini mii mii mmotaḵ aha/ mo. ² Waḵki/ /e mini ush mo mmodhal uni bway mo mmo/ii mo dhali di mmonon uni ’kup̱ mo tani ³ me’d gi TAP̱A midi biṯa p̱o/ to em pini ki ’ba’th jin shi/ashi/ mo e uni ’baar kun ’kon eya pije/ mo, shumarum dhali thuluny dhali kalman dhali bip̱ dhala ma’diny ḵa’bal dhali miya si’da/ mo be. ⁴ Hili TAP̱A midi ḵwa’th to e gi ’kwani ma Israyiil mo ’peni bwaman ji gi ’Kwani Masir mo. Wakan ki jin ṯal ’de/ midi diki wu mo ’peni aris uni kun ta ku ma Israyiil mo be.

⁵ Dhali TAP̱A karki’da cim ’pen ka pije/ mo dhali o gwo mo ki: Ka’thamoŋ gana/ aha/ TAP̱A mina mii to yansan mo be. ⁶ Dhali mon’thamoŋ gana/ mo tani TAP̱A miiki to yansan mo. Aris to e gi ’kwanim Pam Masir wukin mo. Hili to e gi ’kwani ma Israyiil mo tani ṯal ’deŋ kamu/ yisa wu’da. ⁷ Dhala P̱irawn hashki’da hash mmo’kar to e gi ’Kwani ma Israyiil mo. Dhali jan ’deŋ kamu/ yisa di’da ’peni ji gi ’kwani ma Israyiiil jin wu’da. Hila P̱irawn ’bi’thki’da dum piti mo dhali a’di diki dhal ’kwani bway mo mmo/ii mo be.

Mompal jin wo’c ’kwani is she/ ki ’Ba’th Jamany Jwa mo

⁸ Dhali TAP̱A oki’da Musa gwo mo dhala Haruun ki: Muthi ’pinyi ’tu’d me’d bum mo ’peni bwam ma gwaṯa/ mo dhali dhalka Musa yeḵ uni i mis mo e jis e ma P̱irawn mo. ⁹ Dhali a’di midi war ki bu’da ’cesh gana/ mo ap̱owa ris Pa Masiri ’baar mo. Dhali ’ba’th jamany jwa midi mu/ ’kwani is dhali ki to e ilu/ ki tur mo e Pa Masiri ’baar mo be.

¹⁰ Wakan uni mu’thki ’piny mo ’peni bwam ma gwaṯa/ mo dhali dosh mo ibwambor ma P̱irawn mo. Dhala Musa yeḵki ’piny mo isi mis mo dhali a’di warki’d ki ’ba’th jamany jwa mo ap̱o/ i’kwanim pa ki to e ilu/ mo be. ¹¹ Dhali ’kwani kun miiki to ki e ma rum thus molki dosh mo ibwambor ma Musa mo gom jamany jwa mo haali/ jamany jwa biṯki’da p̱o/ uni mo dhali ap̱o/ ’kwani Pam Masir i ’baar mo be. ¹² Hili TAP̱A i ’bi’thki’da P̱irawn adum piti is mo. Dhali a’di diki ciḵ gwom buni mo me’d isi gwo jin ṯorkina TAP̱A aMusa mo be.

Mompal jin Wo’c ’Kwani Is She/ ka Wassa/ mo

¹³ Dhali yan’ko’d TAP̱A oki’da Musa gwo mo ki: Cuyi mis mon’thamo/ ka ’tum mo dhali doshi ibwambor ma P̱irawn mo dhali oyi a’di gwo mo ki: Yase/ ta gwo jin ona TAP̱A Arumgimis gi ’kwani ma Ibraniyiin mo ki: Dhalki ’kwanim pem bway mo mmo/ii mo ki uni mini mii mii mmotaḵ aha/ ki momaŋ mo. ¹⁴ Ka tee yansan aha/ mina hash mom’bi’th gi mompal jin wo’c ’kwani is she/ pem ap̱o/ /e mo dhali ap̱owa ris imanmiiya ṯu’c pini mo dhali ap̱o/ aris ’kwanim pini mo, wakan ki /e mini mish mo mo ki wathiŋ kamu/ yisa wa ki aha/ eya ris mony’ceshi ’baar mowah. ¹⁵ Waḵki/ aha/ mina ’taki ’de’k me’d pem mmodor /e mo ki ’kwanim pini ilu/ mo tani um minu ’taki ’ce’d ki sho’k mo ’peni ’dishesan mo ’peni mony’cesh mo ki ’ba’th jin wo’cki ’kwani is she/ ki ra’b ra’b mo. ¹⁶ Hili gom ’kup̱ mii yan mo tani aha/ dhalkina /e mo mmoṯor /e mom’bi’th pem mo, wakan ki gway pem minu bah ki tur mo eya ris mony’ceshi ’baar mo be. ¹⁷ /E din naskina/ mo mmokar is pini ki ca mo ap̱o/ ’kwanim pem mo dhali diki dhal uni bway mo mmo/ii mo be. ¹⁸ Gom kan mo tani ka’thamoŋ gana/ ka tente/ gi wakansan mo tani aha/ mina rasa dhana wassa/ kun diṯadiṯ mo, ji gi wakan yisa mishkunu e Pam Masir mo yisa, ’pena cim c̱aan jin ḵa’bkunu Pa Masir mo ntagi shwanesan mo be. ¹⁹ Hashi gwo mo mmotulu to em pini isi ’baar mo uni kun takina /e mo eya pije/ mo ki /e mini dhu uni ki ’danṯar e bwaŋ’kwarany ma darha’da/ mo haala wassa/ mini wolu ka ’cesh mo ap̱o/ ’kwani ’baar mo dhali ap̱o/ to e mo kun ’kokin apije/ mo. Dhali waḵki/ uni ’konuki ’doyu/ pa mo tani uni mini wu mo be.

²⁰ Dhali yan’ko’d uni kun ḵo/ki gwo gi TAP̱A mo e bwaman ’kwani kun miikina P̱irawn aṯu’c mo tani uni dhuki aris c̱iŋkina/ dhali to em buni mo mmosoyu/ bway bwaŋ gu’b mo be. ²¹ Hili gwaṯṯan kun dina gwon TAP̱A ki thoṯẖ ki is mo tani uni dhalki c̱iŋkinam buni kun yola uni mo dhali to em buni eya pije/ mo be.

²² Dhali TAP̱A oki’da Musa gwo mo ki: Yethi me’d pini ’kup̱ ki momis mo ka wassa/ midi rasu/ ap̱o/ Pam Masiri ’baar mo ap̱o/i ’kwani mo dhali ap̱o/i to e mo dhali eya ris to kun sinu eya pije/ ki tur mo e Bampa/ Masir mo be. ²³ Wakana Musa ’de’kki cwam piti mo ’kup̱ ki mis mo dhali TAP̱A hashki mondor ma sho’k mo dhala wassa/ dhali o’d iikina war war ka ’cesh mo. Wakan TAP̱A a’di i he’thki’da wassa/ mo ap̱o/ Bampa/ Masir mo be. ²⁴ Awassa/ raski’d, dhali awara sho’k su’kki’d ki dwa/a’d dwa/a’d ki sule/ sule/ mo ’peni bwaman ma wassa/ mo. ’Tham si’da/ bucurki’d ki ’bi’th mo. Ji gi wakansan yisa mishkunu yisa e Bampa/ Masiri ’baar mo ’pena dhamo/ me’dyin dina a’di ki war ki kal mo. ²⁵ Awassa/ raski’da p̱o/a ’cesh eya ris to kun ’kona pije/ mo uni kun sikunu mo ki tur mo eya ris Bampa/ Masir mo ki ’kwani ilu/ mo dhali to e ilu/ si’da/ mo dhali dhera ris cwa bwa ’baar mo kun ’kokin e bwam bunto si’da/ mo be. ²⁶ Dhali mon ’de/ jin dina a’di ki ’ce’d sho’k ka wassa/ mo tani ta’da ’cesh gi Pany Jaasaan jin ’kona uc̱i ma Israyiil i cine/ mo be.

²⁷ Dhali yan’ko’da P̱irawn hashki’da hash mo dhali yuḵa Musa dhala Haruun mo dhali o uni gwo mo ki: Aha/ miikina miinthus ka tee yan mo. TAP̱A a’di i mii’d ki ’bore/ mo dhali aha/ dhali ’kwanim pem mo tani aman a’di i thamkina mii mo be. ²⁸ ’Thoyi TAP̱A mo ma, haali/ a’di ’kosh jwa mo ’peni kon dor ma sho’k yan mo dhala wassa/ mo. Aha/ mina dhal um bway mo mmo/ii mo. Um mini mii dhalku/ ki mii ’ko ki rash rash kan mo.

²⁹ Musa ki thoḵ a’di gwo mo ki: Ki aha/ mina ya mo ’peni ’peŋkuman bampa/ ki ’ta’b mo tani aha/ mina ṯe’d me’d pem e TAP̱A mo dhali ’tho mo. Dhali mondor ma sho’k midi dosh mo dhala wassa/ si’da/ mini ’koki ’ko mo doḵ e ki /e mini mish gwo ’ban ki mony’cesh ta ji gi TAP̱A mo be. ³⁰ Hili gom /e mo dhali aris ’kwanim pini kun miiki /eya ṯu’c mo tani, aha/ misha ki um ’koki ḵo/ TAP̱A Arumgimis naskina/ moyi.

³¹ Emen to ma yin dhali ḵala uni i’ce’dkunu sho’k mo haali/ ḵala isi’d mo dhali emen to ma yin di’d e pimpal mo be. ³² Hila gameh yisa i’ce’dkunu sho’k mo haali/ a’di iski’d i ’ko’d mo be.

³³ Wakan aMusa a’di yaki’d ka pije/ mo ’peni ’peŋkuman bampa/ mo ’pena P̱irawn mo dhali ṯe’d me’d piti e TAP̱A mo. Dhali mondor ma sho’k dhala wassa/ uni doshkin mo dhali asho’k yisa doḵ e hethi yi’de/ ap̱o/ mony’cesh mowa. ³⁴ Hili ka P̱irawn mishki’d ka sho’k dhala wassa/ dhali mondor ma sho’k doshkin mo tani a’di miiki miinthus naskina/ doḵ e mo. Dhali a’di ’bi’thki’da dum piti ki ’bi’th mo, a’di i nyaḵki/ uni kun miiki a’di aṯu’c si’da/ mo be. ³⁵ Wakan adu ma P̱irawn a’di ’bi’thki’d mo dhali a’di diki dhal ’kwani ma Israyiil bway mo mmo/ii mo me’d gwo jin ṯorkina TAP̱A eya Musa mo be.

Mompal jin Wo’c ’Kwani Is She/ ka Kuyu/ mo

¹ Dhali yan’ko’d TAP̱A oki’da Musa gwo mo ki: Yaku/ aP̱irawn mo haali/ aha/ i’bi’thkina a’di adum piti is mo dhala du gi aris ’kwani kun miiki a’di aṯu’c mo ki aha/ mina mii aris miimer pem gwansan i bwamani uni mo. ² Dhali ki /e mini mii ṯor gwo mo ki uc̱im pini mo dhal ki uc̱i gi iya/in mo gom mon’the is jin ’thekika/ ’kwani Pam Masir mo ka tee jin miikika/ miimer e bwaman uni mo. Um ’baar mo mini mish mo mo ki aha/ tana TAP̱A mo.

³ Wakana Musa dhala Haruun uni iikina P̱irawn mo dhali o a’di gwo mo ki: Yase/ ta gwo jin ona TAP̱A mo a’di jin ta ’da Arumgimis gi ’kwani Ibraniyiin mo. Me’di ekata i mina /e i c̱a’bi ush is pini kar ki gwa’d kan mo ibwambori aha/ mo? Dhalki ’kwanim pem bway mo mmo/ii mo ki uni mini mii mii mmotaḵ aha/ ki momaŋ mo be. ⁴ Haali/ waḵki/ /e mini ush ’kwanim pem dhal bway mo mmo/ii mo tani, ka’thamoŋ gana/ aha/ mina hasha waambuhanya kuyu/ e bampam pini mo. ⁵ Dhali uni mini tiḵa ’cesh e mo, wakan ki wathin ṯal ’deŋ kamu/ midi diki misha ’cesh mo. Dhali uni mini shwa to ki c̱a’ba c̱a’ba kun urki ’kup̱ mo i’ko’da wassa/ mo. Dhali uni mini shwa aris cwam bumi ’baar mo kun cakin mo e mondhe’d mo be. ⁶ Dhali uni si’da/ mini ’tu’d aris gu’b pini mo dhali aris gu’b gi ’kwanim pini kun miiki /eya ṯu’c mo dhali aris gu’b gi ’kwani Pam Masiri ’baar mo. To gi wakansan yisa mishkina ibabam pini mo dhali idhan cim mo ’pena tee c̱aan jin p̱u’dkina uni e mo yan mo ntagi shwane/ mo yisa. Dhali yan’ko’d aMusa ṯu’kki’da bor mo ’pena P̱irawn mo dhali ya ka pije/ mo be.

⁷ Dhali ’kwani kun miikina P̱irawna ṯu’c mo tani oki a’di gwo mo ki: Me’d ekata i mina wathi/ yan ic̱a’bi yap̱ ana ka gumme/ wakan mo? Dhalki ’kwani iin mo ki uni mini mii mii mmotaḵ TAP̱A Arumgimis buni mo. /E mala ṯumu’c pini mmomol gwo ’ban naskinaŋ gana/ mo? Dina /e ki mish gwo ’ban ki Pam Masir ’ce’dkunu shoka?

⁸ Yan’ko’d aMusa dhala Haruun uni susunu ka nyaŋ’ko’d eya P̱irawn mo. Dhala P̱irawn ki o uni gwo mo ki: Iiku/ mo mmomii mii mmotaḵ TAP̱A jin ta’da Arumgimis bum mo. Hili ija uni i mini ii mo?

⁹ Dhala Musa ki thoḵ a ’di gwo mo ki: Aman mina ii nyaḵki dhuru’c bam mo dhali nyaḵki ’kwani kun tana dhan mo. Dhali aman mina ii nyaḵki iya/m bam mo dhali i’bwa/m bam mo dhali ura ma’diny ḵa’bal bam mo dhali aris bip̱ bam mo haali/ aman mina mii ta gi dhan moshwan to mmotaḵ TAP̱A mo be.

¹⁰ Dhala P̱irawn ki o uni gwo mo ki: Dhalki TAP̱A di’d e um mo ma, waḵki/ aha/ dhala um bway mo mmo/ii mo nyaḵki uc̱im bum mo. Um ta gi gwon thusa tiya eya dum bum mo ba/. ¹¹ Yisa wakan ’teya. Iiku/ mo um ’kwaniŋgwaṯẖ um ’cena mo dhali miiyi mii mmotaḵ TAP̱A mo. Haali/ mii a’dan jin gwon ma dum bum mo. Dhala Musa uni ka Haruun urkunu ka pije/ ’peni buŋ’kus ma P̱irawn mo be.

¹² Dhali TAP̱A oki’da Musa gwo mo ki: ’Deki me’d pini mo ap̱o/ Bampa/ Masir mo goma kuyu/ mo ki uni mini ṯẖathu ki sheŋ ’kup̱ mo eya ’cesh gi Pam Masir mo dhali shwa aris to kun sinu mo e bwam bunto mo aris uni ’baar mo kun urkin ma wassa/ ’kup̱ mo be.

¹³ Wakan aMusa a’di ihe’thki’da lukaas piti mo ap̱o/ Bampa/ Masir mo. Dhali TAP̱A ḵalki ’tham gi mom’pesho’k mo mmoposh ka enthus mo ka cim c̱aan ki mon’thiny ilu/ mo. Dhali ki mo ta mon’thamo/ mo tani ’tham gi mom’pesho’k a’di i ḵala’da risa kuyu/ mo be. ¹⁴ Dhala waambuhanya kuyu/ ṯẖa’thkin ap̱owa ’cesh gi Pam Masir mo dhali thoson is buni mo mmo’ko mo e dhan Bampa/ Masiri ’baar mo. Adhana kuyu/ shwan ma risa nyor kagahara mo. Ji gi wakansan yisa mishkunuwa, dhali a’di midi doḵ e di ki sule/ sule/ mo yisa. ¹⁵ Uni kumkina ’ceshi ’baar mo. Wakan a’cesh ki ḵar ’kup̱ ki dhurum mo mo. Dhali uni shwaki to kun sikunu mo e mony’cesh mo dhali aris maman to ’peni uni kun urkin ma wassa/ ’kup̱ mo. Ton dhi/i’da kamu/ yisa boc̱o’da walla cwa si’da/ walla to kun sinu mo em bunto mo ki tur eya ’cesh gi Pam Masir mo.

¹⁶ Dhali yan’ko’da P̱irawn yuḵki’da Musa dhala Haruun ki jahanne/ mo dhali o uni gwo mo ki: Aha/ miikina miinthus ap̱o/ TAP̱A Arumgimis bum mo dhali ap̱o/ um mo be. ¹⁷ Dhali shwanesan gwami aha/ miinthus pem jasi me’d ’deŋ gana/ mo. Dhali ’thoyi TAP̱A Arumgimis bum mo gom aha/ mo mmojoc̱ ki mompal jin ’kosho’da ’kosh jwa mo ’peni aha/ mo.

¹⁸ Wakan aMusa yaki’d ka pije/ ’pena P̱irawn mo dhali ’thoki TAP̱A mo be. ¹⁹ Dhali TAP̱A aḵki ’tham gi mompesho’k a’ban e mo mmowar ka bora luŋgu’b mo jin ’bitha’bi’th mo a’di jin yu’dki’da buhanya kuyu/ mo dhali ḵal uni sho’k mo e Yi’deŋ ḵummam ’Per mo. Ara kuyuŋ kamu/ ’de/ yisa di’d jin dhalkunu mo e Bampa/ Masira. ²⁰ Hili TAP̱A ’bi’thki’da P̱irawn adum piti is mo dhali a’di diki dhal ’kwani ma Israyiil bway mo mmo/ii mo be.

Mompal jin Wo’c ’Kwani Is She/ ki Mondhurumi’d mo

²¹ Dhali yan’ko’d TAP̱A oki’da Musa gwo mo ki: Ṯe’dki me’d pini ’kup̱ ki momis mo ki mondhurumi’d jin ’ceṯẖe’da ’tum midi wuma p̱o/ Pam Masiri ’baar mo. Mondhurumi’d mina moŋkusha kamu/ i diki di ce e mo. ²² Wakan aMusa ṯe’dki me’d piti ’kup̱ ki momis mo dhali dhan mondhurumi’da ’tum diki’d mo e Bampa/ Masir goma cimi kwara mo be. ²³ Wathiŋ kamu/ yisa di’da jin mishi tiyan tiya p̱ar e mo yisa. Walla jin ṯal ’deŋ kamu/ yisa cuki mis mo ’peni mom piti mo ka cimi kwara mo. Hili aris ’kwani ma Israyiil uni a’di i ta gi moŋkush mo e mo jin ’kokina uni mo be.

²⁴ Dhali yan’ko’d aP̱irawn yuḵki’da Musa mo dhali o gwo mo ki: Iiku/ mo mmomii mii mmotaḵ TAP̱A mo ki up̱ bumi lu/ mo. Dhali uc̱im bum si’da/ mini nyaḵ ii ki um mo. Hili dhalka ma’diny ḵa’bal dhali aris bip̱ bum i mini ’koku/ maṯaan mo.

²⁵ Hila Musa thoḵki gwo mo ki: /E mini mii dhal aman bway si’da/ mo mmota gi to jin mina aman i miiya basa ’cesh mo dhali to kun miinu mo kun c̱inu ki me’d mo jin ’thanu o’d ka kuluny ki aman mina c̱iki a’di TAP̱A Arumgimis bam mo be. ²⁶ To em bam si’da/ mini mii ii nyaḵki aman mo, To e ’deŋ kamu/ yisa minu dhalku/ i’ko’d yisa, haali/ aman mina mii bu’th uni mo dhali mii mii mmotaḵ TAP̱A Arumgimis bam mo. Dhali aman yisa misha to kun mina aman i mii i ’ci’th ’kus naskina/ gom TAP̱A yisa ntagi aman mina p̱u’dku/ i mun mo be.

²⁷ Hili TAP̱A a’di i ’bi’thki’da P̱irawna du is mo dhali a’di diki dhal uni bway mo mmo/ii mo be. ²⁸ Dhala P̱irawn ki owa Musa gwo mo ki: Guki jis em pini mo ’peni aha/ mo. Mishi gwo ’ban ki /e mini diki doḵu/ ka nyaŋ’ko’d doḵ e mo. Dhali ka cim jin mina /e i p̱ar jis em pem e mo tani /e mini wu mo be.

²⁹ Musa thoḵki a’di gwo mo ki: Me’d jin ona /e mo tani aha/ si’da/ mina diki p̱ar jis em pini e ki sule/ doḵ e mo be.

Mompal jin Wo’c ’Kwani Is She/ Goma Bwanyara/ ma Dho’th mo

¹ Iṯwa/a/ TAP̱A ṯorki’da Musa gwo mo ki: Mompala kamu/ jin wo’c ’kwani is she/ diyi’di ’de/ naskina/ mo a’di jin miga/ ḵala p̱owa P̱irawn mo dhali ap̱o/ ’kwanim piti mo. Yan’ko’d mo tani a’di midi dhal um bway mo mmo/ii mo beseene/ mo. Ki a’di midi dhal um bway mo mmo/ii mo tani, a’di midi ur um ka kuluny mo. ² Ṯori ’kwaniŋ gwaṯẖ gwo mo ki up̱ ilu/ ki uni mini doṯ tiya kun ’dish uni gu’b is mo gom dhiriny ’dolkon kush dhali ’dolkon gana/ mo be. ³ Dhali TAP̱A c̱iki ’kwani mii ma ’the i jis e gi ’kwani Pam Masir mo. Dhali aMusa ki is piti mo tani a’di karu ki dhan gump̱a/ mo e Pam Masir mo e jis e ma ris ’kwani kun miikina P̱irawn aṯu’c mo dhali e jis e gi ’kwani mo be.

⁴ Wakan aMusa oki’da P̱irawn gwo mo ki: Yase/ i ta gwo jin ona TAP̱A mo. Ki mo midi ta mombwam/e mo tani aha/ mina yaku/ e bwaman ’Kwani Masir mo. ⁵ Dhala bwanyara/ uc̱iŋ gwaṯẖi ’baar mo gun ’kon e Pam Masir mo tani mini wu mo ’pena bwanyara/ ma P̱irawn jin c̱a’bka’da ḵurse/ ma maliḵ mo ntaga bwanyara/ gi c̱iŋkinam piti kun miina yo mo dhali i ta ga bwanyaram bip̱ si’da/ mo be. ⁶ Dhali e mun mo tani adhan cuuwa minu ’ther ki tur mo e Bampa/ Masiri ’baar mo. Mii gi wakan yisa mishkunu me’d ’de/ yisa walla mii yan midi doḵ e di yisa ki sule/ mo. ⁷ Hili e bwaman ’kwani ma Israyiil mo tani a’kaŋ kamu/ yisa midi buḵ wathiŋ kamu/ wala to e ilu/ yisa. Yan’ko’d um mini mish ki TAP̱A kar ki mo jin ḵwa/uwa ḵwa/ bwa ’peni ’kwanim Pam Masir nyaḵki ’kwani ma Israyiil mo be. ⁸ Dhali aris ’kwanim pini kun miiki /e to mo tani uni mini dhorothu aha/ mo dhali luŋa luŋ gom aha/ mo dhali o gwo mo ki: Yaku/ /e ka pije/ mo dhali aris ’kwani kun baṯẖki /e nsho’k ’baar mo. Dhali yan’ko’d mo tani aha/ mina ya ka pije/ mo. Dhali a’di yaki’d ka pije/ ’pena P̱irawn ka nyor jin ’batha’ba’th mo.

⁹ Dhali iṯwa/a/ TAP̱A oki’da Musa gwo mo ki: AP̱irawn midi ciḵ gwo ’peni /e yisa mo. Wakan ki miimer pem miga/ mar is mo e Pam Masir mo be. ¹⁰ Musa dhala Haruun miikina ris to mer gwani ’baar mo i ibwambor ma P̱irawn mo. Hili TAP̱A ’bi’thki’da P̱irawn adum piti is mo dhali a’di diki dhal ’kwani ma Israyiil bway mo mmo/ii mo ’peni bampam piti mo be.

Mompe’kup̱anyolos mo

¹ Dhali TAP̱A oki iMusa uni ka Haruun gwo mo e Pam Masir mo ki: ² Appee yansan a’di ta’da ppee jin ṯwa/a/ ki yil gom um jin mina umi ṯel ’pen goma risa ppee i ’baar mo. A’di midi ta appee jin ṯwa/a/ ki yil gom um mo be. ³ Ṯora risa ŋul ’kup̱ ’kwani ma Israyiil gwo yan mo ka cima ’kume’d ka ppee yansan mo tani uni mini bu’th ushi ḵa’bal gwaṯẖan mo, wathi/ ka ’deṯe/ ’deṯe/ ’peni gu’b gi ibabam buni mo isi me’d jin wana a’di kan mo, ḵa’bala ’de/ gom gu’b ka kuluny mo be. ⁴ Dhali waḵki/ kuŋgu’b ka kuluny gwa’da she/ mo gom ḵa’bala ’de/ mo tani dhalki uni nyaḵ ḵa’bal ki gu’ba kamu/ mo jin ’dish uni is mo. Uni mini deŋ ’kwani e me’d isa nimira jin midi p̱ar shum isi me’d mo be. ⁵ ḵa’bal bum mini mii dar gi thalkin mo, ’pena rasan jin dina yili ’de/ gana/ mo. Um mini bu’th a’di ’peni bwaŋ ḵa’bal mo walla ’peni bwam mi mo. ⁶ Dhali um mini dhu uni ki ’bore/ mo ntaga cimi ’kume’d i’ce’d ka doŋon ka ppee yansan mo. ’Kwani ma Israyiil ka ŋul ’kup̱i ’baar mo mini ’kosh ḵa’bal buni jwa mom ’penḵaskum mo be. ⁷ Dhali yan’ko’d mo tani uni mini ’thup̱a bas mo dhali ’kosh a’di e cwa gi ’twaŋkal gu’b ka ’ban su/ mo dhali i cwa gi buŋ’kup̱ ma campur gu’b mo kun ’kokina uni mmo’ka shum mo be. ⁸ Uni mini ’thos shum ki isi o’d dhali ’ka a’di ki mon’thinya ’de/ c̱aan mo! Dhali uni mini ’ka a’di nyaḵki jasse/ jin ḵa/aḵa/ mo dhali nyaḵki maaŋḵuthu’d jin miinu ki dar ga cumaṯ mo. ⁹ Dhalku/ shum ki ’ka ki ’de/ mo walla dhalku/ a’di ki shun ki yi’de/ mo. Hili ’thosi a’di ki o’d mo ki ’kup̱ ilu/ mo dhali ki ’basho’k ilu/ mo dhali ka ris to ’baar kun ’koni bwaman buŋgwar is ilu/ mo be. ¹⁰ Dhali um mini dhalku/ shuma kamu/ ki boc̱ ntagi mon’thamo/ mo. Waḵki/ kun tiya boc̱a umi ta gi mon’thamo/ tani ’thayyi um uni o’d mo ka jiŋ gana/ mo. ¹¹ Bwaya ’dihe/ jin mina um i ’ka a’di mo: Deḵi wac̱kan e empa’d bum mo dhali hitha p̱p̱am bum mo dhali ḵala lukaas e me’d bum mo, dhali um mini ’ka shum ki yap̱ yap̱ ise/ ki jahanne/ mo. Haali/ a’di ta Mompe’kup̱anyolos gi TAP̱A mo be.

¹² Dhali aha/ mina pe ki tur e Bampa/ Masir ki mon’thiny c̱aan mo. Dhali aha/ mina ’kosha bwanyara/ gi Pam Masir ’baar mo uni kun tana gwaṯẖ mo dhali ki to e ilu/ mo. Dhali arum p̱inycon jin luŋa uni mo tani aha/ mina dor uni mo. Aha/ be i tana TAP̱A mo be. ¹³ Abas a’di i midi ta jamas mmomish gwo ’ban gom moŋ’kom bum mo. Dhali ki aha/ mina p̱ara bas e mo tani aha/ mina pe um ’kup̱a nyolos mo. Dhali mii shi/gaŋ kamu/ yisa midi biṯa p̱o/ um mo mmo’ce’d um sho’k mo me’d jin miga/ ’kosh Bampa/ Masir mo yisa.

¹⁴ Atee midi ta jim bum jin mina umi ka e mo. Um mini ta gi dhan moshwan to mmotaḵ TAP̱A mo. Um mini nyoŋ a’di me’d gwoŋḵan jin mina umi mii ki tur e emen bum ki sule/ sule/ mo be. ¹⁵ Um mini shwa maaŋḵuthu’d jin miinu ki dar ga cumaṯ goma cimi pesu/ mo. Dhali ka cim jin ṯwa/a/ mo tani um mini ḵala cumaṯ bum sho’k ka pije/ mo ’peni aris gu’b bum mo. Jan ṯal ’deŋ kamu/ midi diki shwa ji gi din ma cumaṯi e mo’pena cim jin ṯwa/a/ ntaga cimi pesu/ mo. Haali/ waḵki/ wathiŋ kamu/ shwa to ka maḵ tani minu ’ciṯẖ ’twa/ mo ’peni ’kwani ma Israyiil mo be. ¹⁶ Ka cim jin ṯwa/a/ mo tani um mini ta gi mo ma tul ’kup̱ jin ḵogu mo. Dhali ka cimi pesu/ mo doḵ e um mini ta gi mo ma tul ’kup̱ jin ḵogu mo. Aṯuca kamu/ minu mii ka tee gwansan yisa, hili jasi to jin miin ma ris ’kwani ’baar ka ’deṯe/ ’deṯe/ i shwa mo a’di mina umi i mii thoson jasi is mo be.

¹⁷ Um mini kar Dhan Moshwan To gi Maaŋḵuthu’d jin miinu ki dar ga cumaṯ mmotaḵ TAP̱A ki sule/ mo be. Haali/ a’di ta’da tee yan gana/ jin ḵalkika/ waḵ bum ka pije/ ’peni Pam Masir mo. Ka cim yansan ’ko’di yili ’baar mo tani um mini shwa maaŋḵuthu’d jin miinu ki dar gi cumaṯ mo ki dhan mombuṯ yan mo be. ¹⁸ Dhali ka cim jin ṯwa/a/ jin ta’da ’kume’d i’ce’d ka doŋon ma ppe mo mom’pimpili/ mo tani um mini shwa maaŋḵuthu’d jin miinu ki dar ga cumaṯ mo dhali wakan si’da/ ntaga cim iss ’de/ i’ce’d ’de/ ka ppe mo mom’pimpili/ mo be. ¹⁹ Haali/ goma cima pesu/ mo tani acumaṯa kamu/ minu gam yisa eya ris gu’b mowa. Dhali waḵki/ unin tiya shwaki maaŋḵuthu’d jin miikunu ka cumaṯ mo tani ’kwani gwansan minu ’ciṯẖ ’twa/ mo ’pena ŋul’kup̱ gi ’kwani ma Israyiil mo be. Nyaḵka’d kan waḵki/ a’di ta wathi/ jin yayi yilkina/ mo walla wathi/ gi bampa/ mo be. ²⁰ Dhalku/ maa jin minu ka cumaṯ ki shwa mo. E mo ’baar kun ’kona um mo tani, um mini mii shwa to kun minu ki dar ga cumaṯ mo be. ²¹ Dhala Musa yuḵki’da ris ’kwani jwaha/ ma Israyiil mo dhali ṯor uni gwo mo ki: Lahi ushi ḵa’bal gom is bum mo me’d isa waḵ bum mo dhali ’koshi uni mo goma Cim gi Mompe’kup̱anyolos yan mo. ²² Budhi deḵken cwan ’tasha cal bip̱ mo dhali ’thup̱i a’di ka bas jin diki’d mo e bwaman ma sahan mo. Dhali ’koshi a’di i buŋ’kup̱ ma campur mo dhali ka ’ban su/ cwa ma campur mo ka bas jin diki’d e bwaman ma sahan mo. Dhali jan ṯal ’deŋ kamu/ yisa midi ya ka pije/ ka campur gu’b piti mo ntagi mon’thamo/ mo be. ²³ Haali/ TAP̱A a’di i midi ya pe ki tur mo mmo’kosh ’kwani Pam Masir mo. A’di midi p̱ara bas e mo e buŋ’kup̱ ma campur dhali ’ko’d gwara su/ mo. Dhali a’di midi peya campur ’kup̱ mo dhali midi diki dhala aman’ce’da ’ce’d sho’k bway mo mmoci’c aris gu’b bum mo mmo’kosh um mo be.

²⁴ Um mini ha gwoŋḵan e mo, um dhali iya/m bum ki sule/ sule/ mo. ²⁵ Dhali ki um mini ci’c mo e bampa/ c̱aan jin okina TAP̱A mo mmoc̱i um mo me’d isi gwo jin okina a’di is mo tani um mini kar Mompe’kup̱anyolos yansan mo be. ²⁶ Dhali uc̱im bum mini o um gwo mo ki: ’Pemen mii yan ta’da tinta jin ona um gom miin to yan mo? Ki uni mini o um gwo kan mo tani ²⁷ um mini o gwo mo ki: A’di ta mii ma basa ’cesh gi TAP̱A mo gom mompe’kup̱anyolos mo haali/ a’di peki gu’b gi ’kwani ma Israyiil ’kup̱ e Pam Masir mo. A’di ’koshki ’kwani Pam Masir mo hili a’di i ’tashki gu’b bana ’twa/ mo be. Dhali ’kwani ṯaki ’kup̱ buni ka luŋgu’b mo dhali luŋa luŋ mo be. ²⁸ Dhali ’kwani ma Israyiil uni iikin mo dhali mii a’di wakansan mo me’d gwo jin ḵankina TAP̱A aMusa mo dhala Haruun mo.

²⁹ Ki mombwam/e mo tani TAP̱A ’koshki’da risa bwanyara/ gi Bampa/ Masir mo. A’di ’koshki’da bwanyara/ ma P̱irawn mo a’di jin c̱a’bki’da ḵursem piti mo. Dhali a’di ’koshki’da ris uni ’baar mo si’da/ ntaga bwanyara/ gi a’di jin di’da sijina ’kulga/ mo dhali arisa bwanyara/ gi to e mo be. ³⁰ Dhali aP̱irawn cuki mis mo mon’thiny mo, a’di dhali aris imanmii a’di to mo dhali aris ’kwani Pam Masiri ’baar mo. Dhali adhan mo jin ḵumu/ ko caaca kagahara mo e Bampa/ Masir mo haali/ gu’ba kamu/ yisa di’da jin dina jan ṯal ’deŋ kamu/ ki wu i bwaman mowa.

Mmo/ii ka Pije/ mo

³¹ Dhali a’di yuḵki’da Musa dhala Haruun ki mon’thinya ’de/ c̱aan mo dhali o gwo mo ki: Cuyi um mis mo dhali iiku/ mo ka pije/ ’peni bwaŋ ’kwanim pem mo isi um gwan dhali ’kwani ma Israyiil mo. Dhali iiku/ um mo dhali mii ki montaḵ gom TAP̱A mo me’d jin okina um mo be. ³² Budhi arisa ma’diny ḵa’bal bum dhali aris bip̱ bum mo me’d gwo jin okina um mo. Dhali iiyi mo dhali ’borki aha/ mii si’da/ mo.

³³ Dhali ’kwanim Pam Masir uni di’bki ’kwani is mo mmo/iiku/ mo ki yap̱ yap̱ ki jahanne/ ’peni bampam buni mo haali/ uni oki gwo mo ki: Amani ’baar mo mura wu mo be. ³⁴ Gom kan mo tani ’kwani ḵalkina gana’th buni ki dar ga cumaṯ i e mo. Aḵwalal buni jin ’thoḵa uni to nycine/ mo tani koṯẖkina uni is mo ki burrinyem buni mo dhali shir uni mo e ’kup̱a bim buni mo be. ³⁵ Dhali ’kwani ma Israyiil miikin mo me’d jin ṯorkin ma Musa uni gwo mo. Uni ’thoki ’kwani Pam Masir dhiriny ’dolkon kush mo dhali ’dolkon gana/ mo dhali burrinye/ mo be. ³⁶ Dhali TAP̱A c̱iki ’kwani mii ma ’the e jis e gi ’kwani Pam Masir mo. Uni c̱iki uni to gun doṯa uni mo be. Yase/ i ta mii jin ḵalkina uni ’kwani Pam Masir to mo be.

³⁷ Dhali ’kwaniŋ gwaṯẖ ma Israyiil thum ii ka ji sho’k mo ’peni Pa Ramisiis mo ntagi Pan Suḵuuṯ mo. ’Kwani ’kona alip̱i suttu miyya mo kun iikin ki sho’k mo mmodiki deŋ up̱ e dhali uc̱i mo be. ³⁸ ’Kwanin tiya ka ris iikin nyaḵki uni mo dhali to e kun tana ris ka ris mo nyaḵka ma’diny ḵa’bal mo dhali aris bip̱ mo be. ³⁹ Dhali uni ’thoḵki maaŋḵuthu’d ki dar ga cumaṯ i e mo ’pena gana’th jin ḵalina uni mo ka pije/ ’peni Pam Masir mo. Uni ’konuki miiya cumaṯ i e mo haali/ uni dhi’thunu sho’k ka pije/ mo ’peni Pam Masir mo. Uni yisa tan ga tenteŋ kamu/ mo mmothoson is buniŋ gana/ mo gom tonṯe/ gom bway mo yisa.

⁴⁰ Yil gun ’kokina ’kwani ma Israyiil mo e Pam Masir mo tani ta’da urbu/ miyya wa talatiin mo be. ⁴¹ Dhali e she/ yil ma urbu miyya wa talatiin mo ’pena cim gana/ ’de/ yan mo tani ku gi TAP̱A ’baar mo iikin ka pije/ mo ’peni Pa Masir mo. ⁴² A’di ta mon’thiny jin jikina TAP̱A aji mo mmosusu uni ka pije/ mo ’peni Pam Masir mo. Wakan ki mon’thiny yansan jin nyaḵka’d mo tani ’kwani ma Israyiili ’baar mo mini jiya ji ka tee yan eya risa nyaḵum yil buni mo be.

Gwoŋḵan Gom Mompe’kup̱anyolos mo

⁴³ Dhali TAP̱A oki’da Musa dhala Haruun gwo mo ki: Yansan a’di i ta gwoŋḵan gom mompe’kup̱anyolos mo be. Wathi/ gi paŋ kamu/ midi ’ka a’di mo yisa.

⁴⁴ Hili aris c̱iŋkina/ kun yolu ka guurush mo tani uni a’di i mini ’ka a’di mo ŋ’ko’di /e mini ’ciṯẖ uni amunyjal yis buni mo be. ⁴⁵ Hili ’kwani gun iiyi yilkina/ mo walla ’kwani gun kwanyu ki imanmiiya ṯu’c mo tani uni mini ’ka yisa.

⁴⁶ E gu’ba ’de/ mo tani a’di i minu ’ka a’di mo. Um mini dhalku/ shum ki ḵal ka pije/ mo ’peni gu’b mo dhali um si’da/ mini dhalka sima/ ki ’ce’d bwa mo ’peni uni mo be. ⁴⁷ Adhana waḵ ’kwani ma Israyiil ka kuluny mini mii moshwan to yan mmotaḵ TAP̱A mo be.

⁴⁸ Dhali waḵki/ wathi/ jin dina e ki she/ di’di nyaḵki um mo dhali ŋap̱a’d mmokar Mompe’kup̱anyolos gi TAP̱A mo tani dhalka ris unim piti ka kuluny kun tana gwaṯẖ ’ciṯhuwa munyjal yis mo, dhali yan’ko’d a’di midi yayu/ mo mmo’dish mo is mo dhali kar a’di mo. A’di si’da/ midi wa e ki wathi/ gi bampa/ mo. Hili wathi/ jin di’d ka munyjal yisi e mo tani midi diki ’ka shum yan mo. ⁴⁹ Gwoŋḵan midi ṯal ’de/ gom wathi/ gi bampa/ mo dhali gom wathi/ jin dina e ki she/ jin nyaḵki di ki um mo be.

⁵⁰ Yase/ i miikina ’kwani ma Israyiil i ’baar mo me’d jin ḵankina TAP̱A aMusa gwo dhala Haruun mo. ⁵¹ Dhali ka cima ’deŋ gana/ yan mo tani TAP̱A suski ’kwani ma Israyiil ka pije/ mo ’peni Bampa/ Masir mo ka waḵ buni ’peni e kun ’ko uni ki she/ ki she/ mo be.

Monyc̱iya Bwanyara mo

¹ Dhali TAP̱A oki’da Musa gwo mo ki: ² C̱iyi aha/ arisa bwanyara/ mo ’peni kuŋ gwaṯẖ, uni kun ḵa’dki bwa ma dho’th gi ’kwani ma Israyiil mo ’peni wathiŋ gwaṯh mo dhali to e mo. Uni ta kum pem mo.

³ Dhali aMusa oki ’kwani gwo mo ki: Kayi atee yansan e mo a’di jin pikina um ka pije/ mo ’peni Bampa/ Masir mo, ’peni mo jin miinu um ki miiny c̱iŋkina/ mo. Haali/ ki me’d gi TAP̱A jin ’bitha’bi’th mo tani i suskina a’di um ka pije/ mo ’peni mo yansan mo. Maaŋḵuthu’da kamu/ yisa mina umi shwa jin din ma cumaṯi e mo yisa. ⁴ Ka ppee jin ṯwa/a/ jin yuḵu ka Abiib+ 13:4 Abiib ta’da ppee ki ’dish ma sho’k mmohe’th mo. mo tani um mini ii ki sule/ suleŋ gana/ mo. ⁵ TAP̱A oki gwo is gom ibabam bum mmoc̱i ki um a’cesh gi Bampa/ Kanaan mo dhali Bampa/ Hathaṯẖ mo dhali Bampa/ Amuur mo dhali Bampa/ Hawb mo dhali Bampa/ Yabuus mo. Ki a’di midi ’doyu/ um eya ’cesh jin ta pa ki pa mo, um mini mii moshwan to yan ka ppee jin ṯwa/a/ ’ko’di yili ’baar mo be. ⁶ Goma cimi pesu/ um mini shwa maaŋḵuthu’d jin miinu ki dar ga cumaṯ mo. Dhali ka cim pesu/ mo tani dhan moshwan to midi di mmotaḵ TAP̱A mo be. ⁷ Maaŋḵuthu’d jin miinu ki dar ga cumaṯ mo tani a’di i minu i shwa ka cim pesu/ mo. Maaŋḵuthu’da kamu/ jin miinu ka cumaṯ yisa minu mii mishi um mo dhali acumaṯ yisa si’da/ minu mii i mishi um eya ris gwayu/ moŋ’kom bumi ’baar mo yisa. ⁸ Dhali /e mini ṯor iya/m pini gwo ka tee c̱aan mo ki: Mii yan miikika/ gom to jin miina TAP̱A gom aha/ mo ki aha/ pikina ka pije/ ’peni Bampa/ Masir mo be. ⁹ Dhali a’di midi ta jamas mii e me’d pini mo dhali me’d mo jin kanuwa ka e e buyem pini mo, ki gwoŋḵan gi TAP̱A midi di e ’twam pini mo. Haali/ ki me’da ’bi’thga/ gi TAP̱A mo tani a’di i suski /e ka pije/ mo ’peni Pam Masir mo be. ¹⁰ Gom gwo gi wakansan mo tani /e mini kar gwoŋḵan yansan ka ḵanne ka cim jin karu a’di gom ki sule/ ’ko’di yili ’baar mo be.

¹¹ Dhali TAP̱A midi susi /e e Bampaŋ Kanaan mo isi me’d mii jin thulkina a’di gwo me’da p̱o/ mo gom /e mo dhali ibabam pini mo. Dhali ki a’di midi c̱iki /e a’di mo tani ¹² /e mini dhu to ki she/ gom TAP̱A mo, uni kun ṯwa/a/ mo kun ḵa’dki bwama dho’th mo. Arisa bwanyaran to em pini mo uni kun tana rasan mo uni ta kun TAP̱A mo be. ¹³ Eya risa bwanyara ma rasan thuluny mo tani /e mini wan uni ’ba/ ki ḵa’bal mo. Walla waḵki/ /e diki wan uni ’ba/ mo tani ’ce’di a’di ’ba/ piti mo. Dhali arisa bwanyara/ uc̱iŋgwaṯẖ kun dho’thkunu mo e bwaman iya/m pini mo tani /e mini wan uni ’ba/ mo be.

¹⁴ Dhali ka tee midi p̱u’du/ mo tani ya/m pini midi doṯ /e gwo mo ki: ’Pemen gwo yan ta’da tinta mo? /E mini thoḵ a’di gwo mo ki: Ki me’d gi TAP̱A jin ’bitha’bi’th mo tani a’di i suskina a’di aman ka pije/ mo ’peni Pam Masir mo ’pena ’cesh gi miiny c̱iŋkina/ mo be. ¹⁵ Haali/ ka P̱irawn yan ushki’d ki ’tash mo mmodhal aman bway mo mmo/ii mo tani TAP̱A ki ’kosh arisa bwanyara/ kun dhodhu e Bampa/ Masiri ’baar mo ’peni uc̱iŋ gwaṯẖ kun tana bwanyara/ mo dhali ’pena risa bwanyaran to e mo. Gom gwo gi wakan mo tani aha/ miikina TAP̱A abasa ’cesh mo ’peni aris to e kun ta gwaṯẖan mo kun ḵa’dki bwama dho’th ’twa/ mo. Hila bwanyara/ gi iya/m pem ’baar mo tani aha/ wankina/ uni ’ba/ mo be. ¹⁶ A’di midi ta jamas gom /e e me’d pini mo walla e buyem pini mo ki me’da ’bi’thga/ gi TAP̱A a’di i suski aman ka pije/ ’peni Pam Masir mo be.

Mony’ci’th ḵumma/ Yi’de/ mo

¹⁷ Ka P̱irawn dhalki ’kwani bway mo mmo/ii mo tani Arumgimis diki shu uni bway mo ki bway Pam P̱ilisṯiyiin mo, ba ki a’di ’disha’dish mo kan de. Haali/ Arumgiimis oki gwo mo ki: Waḵki/ uni mini p̱ar mo/as e mo tani uni wari mini rica du is mo dhali doḵ bway Pam Masir ka nyaŋ’ko’d mo ba/. ¹⁸ Hili Arumgimis suski ’kwani ka kukul is mo ki bway gi mombwaasho mo ’kup̱ ki ḵumma/ Yi’de/ jin ta gi ’Per mo. Dhali ’kwani ma Israyiil uni iikin ka pije/ mo ’peni Bampa/ Masir mo mmonyaŋ is gom mo ma mee mo be.

¹⁹ Dhali aMusa ḵalki’da sima/ ma Yuusup̱ mo nyaḵki a’di mo haala Yuusup̱ ṯeki gwo gom ’kwani ma Israyiil mmo/o is mmomii kan mo be. A’di ki o gwo mo ki: Arumgimis midi yayu/ i woṯẖ um mo. Dhali yan’ko’d mo tani um mini mii ḵala simam pem nyaḵki um mo ’peni mahan mo.

²⁰ Dhali uni joc̱kin mo ’peni Pa Suḵuṯẖ mo dhali bu’th moŋ’ko me’d e Pan Iṯẖaam mo e shemen gi mombwaasho mo be. ²¹ Dhali TAP̱A a’di i yaki uni ibwambor montee ka raḵ jin wana e ka ḵa’dum ki jamas piti mo mmoshu uni bway ki sule/ sule/ mo. Dhali mon’thiny si’da/ o’d jin wana e ka ḵa’dum ki jamas piti c̱iki uni moŋkush mo ki uni mini mish ii montee dhali mon’thiny mo be. ²² Araḵa ḵa’dum montee dhali araḵa ḵa’dum o’d mon’thiny mo uni ’koki dhal ’kwani ’pen mo ’peni jis em buni mo be.

Mmo’ciṯẖ ḵumma/ Yi’dem ’Per mo

¹ Dhali yan’ko’d TAP̱A oki’da Musa gwo mo ki: ² Ṯori ’kwani ma Israyiil gwo mo mmoṯuka bor ka nyaŋ’ko’d mo dhali thum gu’b burrinyem buni mo i bwambor ma P̱ihaahiiruṯẖ mo. A’di di’da nuss bwaman gi i Majduul dhali ḵumma/ yi’de/ mo jin ’dish pa Baalsap̱un is mo. ³ Haala P̱irawn midi ṯosh ki ’kwani ma Israyiil ii ki ii ma wukura/ e mombwaasho mo dhali mombwaasho si’da/ mu’thki uni ki jiṯ mo e bwaman mo. ⁴ Dhali aha/ mina ’bitha P̱irawn adum piti is me’d wosh mo dhali a’di midi ur um i sho’k mo dhali aha/ mina gam monyca ’pena P̱irawn mo dhali ’pena jesh piti mo. Dhali ’kwani Pam Masir mini mish mo mo ki aha/ tana TAP̱A mo. Dhali ’kwani ma Israyiil miikin wakan si’da/ mo be.

⁵ Ka maliḵ gi ’kwanim Pam Masir ṯorkunu gwo mo ki ’kwani sokin bway bwaasho mo tani bwa ma P̱irawn aḵ e nyaḵki imanmii tom piti mo ’kup̱ ki uni mo. Dhali uni oki gwo mo ki: Atinta a’dan jin miikina ana mo? Ana ki dhala Israyiil bway mo mmo/ii mo ’peni mo jin miikina uni ana to mo. ⁶ Wakan a’di thosonki’da arabiyam piti jin dira shumarum ki jahanne/ mo dhali sus ’kwani ma meem piti nyaḵki a’di mo be. ⁷ Dhali a’di dilki’da arabiya sho’k i’baar mo gun dira shumarum mo e bwaman uni kun tana suthumiyya i ’bora’bor mmobol tiya e mo. I bwaman uni ta gi ’kwaniny can ka ’deṯe/ ’deṯe/ mo. ⁸ Dhali TAP̱A ’bi’thki’da du ma P̱irawn is mo a’di jin ta’da maliḵ gi ’Kwani Masir mo dhali a’di urki ’kwani ma Israyiil i sho’k mo me’d jin iikina uni mo ki dar gi moŋḵo/ is mo. ⁹ ’Kwani Pam Masir uni urki uni i sho’k mo, aris shumarum ma P̱irawn mo dhali arisa arabiya kun dira shumarum mo dhali ’kwanim piti kun merki shumarum ap̱o/ mo dhali ’kwanim piti mo dhali ’kwani ma meem piti mo. Dhali uni ’baar mo ur uni sho’k dhali dil uni is mo ki ’kwani ma Israyiil thumki gu’b burrinyem buni i shemen ḵumma/ yi’de/ mo ki bway gi Bampa/ Pan P̱ihahiiruṯẖ mo jin ’dish Bampa/ Baalsip̱uun is mo be.

¹⁰ Ka P̱irawn ’dishki mo is mo tani ’kwani ma Israyiil uni ’deki em buni ’kup̱ ki mis mo dhali ’kwani Pam Masir uni yakina ye’c ye’c i’ko’di uni mo. Dhali uni shwakin ma kap̱e/ kagahara mo. Dhali ’kwani ma Israyiil uni gwo ki ’twa/ en TAP̱A mo. ¹¹ Dhali uni okina Musa gwo mo ki: A a’di bese/ i ta mii mo haali/ jis jwa jin minu kan ’kwani e Pam Masir p̱iyina? I suskina /e am mo mmowu mo mombwaasho kana? Atinta miikina /e aman kan mo mmosusu aman ka pije/ ’peni Pam Masir mo? ¹² A’di diki ta gwo jin ona aman /e e Pam Masir ki: Dhalki aman mo. Dhalki aman miikina ’kwani Pam Masir to mo. Haali/ a’di midi ’taki ha me’d ki isi haŋ gana/ mo gom aman mo mmomii ki ’kwani Pam Masir to mo mmo’koki wu mo e mombwaasho mo be.

¹³ Dhala aMusa oki ’kwani gwo mo ki: Dhalku/ is ki ḵo/ mo. Doshi ṯel shoka ’cesh ’te/ mo dhali p̱ar mowoṯẖ gi TAP̱A e mo a’di jin mina a’di i miiya ṯuca p̱o/ shwane/ gom um mo. ’Kwani Pam Masir kun p̱arkina um e mo shwane/ tani mina umi ’koki p̱ar e doḵ e ki sule/ sule/ mo. ¹⁴ TAP̱A a’di i midi as gom um mo dhali um a’di ’te/ i mini ṯel jasi shoka ’cesh mo.

¹⁵ TAP̱A oki’da Musa gwo mo ki: Atinta i gwokina /e ’twa/ i aha/ mo? Ṯori ’kwani ma Israyiil gwo mo mmo/ii mo ki seṯẖ. ¹⁶ ’Deki cwam pini ’kup̱ ki mis mo dhali yethi me’d pini ap̱o/ ḵumma/ yi’de/ mo dhali ḵwa/i a’di bwa mo ki uni mini mish ii ap̱o/a ’cesh jin ḵuthaḵu’th ki tur mo e ḵumma/ yi’de/ mo be. ¹⁷ Dhali aha/ mina ’bitha du gi ’kwani Pam Masir is mo wakan ki uni mini i baṯẖ uni i sho’k mo. Dhali aha/ mina gam monyca ’pena P̱irawn mo dhala risa jesh piti mo dhali aris shumarum piti kun dirina arabiya mo dhali aris ’kwani ma meem piti kun mer shumaruma p̱o/ mo be. ¹⁸ Dhali ’kwani Pam Masir mini mish mo mo ki aha/ tana TAP̱A mo ki aha/ mina gam monyca mo ap̱owa P̱irawn mo dhali arisa arabiyam piti kun dira shumarum mo dhali aris ’kwani ma meem piti kun merki shumaruma p̱o/ mo be.

¹⁹ Dhali yan’ko’d aman’doyu/ gwo ma Arumgimis jin yaki’da jesh gi ’kwani ma Israyiil ibwambor mo tani a’di joc̱ki’d mo dhali ya i’ko’di uni mo. Dhali araḵa ḵa’dum si’da/ joc̱ki’d mo ’peni bwambori uni bway ’ko’d mo be. ²⁰ A’di dwarki’di embul bwaman ma jesh ’Kwani Masir mo dhala jesh ’kwani ma Israyiil mo be. Araḵ ḵali mondhurumi’d gom ’kwani pa Masir mo, hili a’di ki c̱iki moŋkush gom ’kwani ma Israyiil mo. Dhali mon’thiny yaki’di pe mo ki dar gi jin ṯal ’deŋ kamu/ mmoyaku/ mmo’disha kamu/ is ki mon’thiny c̱ani ’baar mo be.

²¹ Dhali yan’ko’d aMusa ye’thki me’d piti mo ap̱o/ ḵumma/ yi’de/ mo. Dhali TAP̱A halki ḵumma/ yi’de/ ka nyaŋ’ko’d ki ’tham gi mom’pesho’k jin ’bitha’bith mo mon’thinyi ’baar mo dhali a’di ki kar ḵumma/ yi’de/ mo mmota a’cesh jin ḵuthaḵu’th mo dhali aris yi’de/ uni ḵwa/kunu bwa mo be. ²² Dhali ’kwani ma Israyiil uni iikin mo e bwaman ḵumma/ yi’de/ ap̱owa ’cesh jin ḵu’th ma p̱o/ ki ḵu’th mo. Aris yi’de/ ḵarki ’kup̱ ki ta gaŋgara/ gom uni mo ki ’ban sum buni mo be.

²³ ’Kwani Pam Masir uni urkina uri sho’k mo dhali iikin mmobaṯẖ uni gi sho’k mo e bwaman ḵumma/ yi’de/ mo, aris shumarum ma P̱irawn mo dhali arisa arabiyam piti mo dhali aris ’kwani ma meem piti kun merki shumaruma p̱o/ mo be. ²⁴ Dhali i ṯwa/a/ gi mon ’twash e TAP̱A hilki mo ka luŋgu’b ’peni bwam ma ḵa’dum o’d dhali araḵ mo ap̱o/ ’kwani ma mee Pam Masir mo dhali duŋgur uni ’kup̱ is mo be. ²⁵ A’di raḵki’da arabiyam buni kun dirkina shumarum mo. Wakan mombor buni uni diṯkin ki diṯ mo. Dhali ’kwani Pam Masir uni oki gwo mo ki: Dhalki ana sona mo ’peni ’kwani ma Israyil mo haali/ TAP̱A a’di i aski’d gom uni mo ap̱o/ ana mo be.

²⁶ Dhali yan’ko’d TAP̱A oki’da Musa gwo mo ki: Yethi /e me’d pini mo ap̱o/ ḵumma/ yi’de/ mo ki yi’de/ midi doḵu/ ka nyaŋ’ko’d ap̱o/ ’kwani Pam Masir mo dhali ap̱owa ris arabiyam buni mo dhali ap̱o/ ’kwani ma meem buni kun merki shumaruma p̱o/ mo. ²⁷ Wakan aMusa a’di i ye’thki me’d piti mo ap̱o/ ḵumma/ yi’de/ mo. Dhali mon’twash e ḵumma/ yi’de/ a’di doḵki’d ka nyaŋ’ko’d bway mo jin gusina a’di mo be. Dhali ’kwani Pam Masir uni sokin ’peni yi’de/ mo hili TAP̱A a’di belki uni mo e bwaman ḵumma/ yi’de/ mo be. ²⁸ Yi’de/ doḵki’d ka nyaŋ’ko’d mo dhali kuma p̱o/ a/arabiya kun dirkina shumarum mo dhali ’kwani ma mee kun merki shumaruma p̱o/ mo dhala risa jesh ma P̱irawn mo uni kun baṯẖki ’kwani ma Israyiil i sho’k mo e ḵumma/ yi’de/ mo. Jan ṯal ’deŋ kamu/ dhalu ki e yisa.

²⁹ Hili ’kwani ma Israyiil uni iin ki tur eya ’cesh jin ḵuthaḵu’th mo e ḵumma/ yi’de/ mo, yi’de/ i warki’d ka gaŋgara/ gom uni ki ’bana bim poros buni mo dhali ki ’bana biny cam buni mo be. ³⁰ Yase/ i ta mii gi TAP̱A mo mmota Israyiil is ki me’d mo ka tee c̱aan mo ’peni me’d gi ’kwani Pam Masir mo. Dhala Israyiil mishki ’kwani Pam Masir wukin mo e yana gap̱ gi ḵumma/ yi’de/ mo be. ³¹ Dhala Israyiil mishki dhan mom’bi’th jin miikina TAP̱A ap̱o/ ’kwani Pam Masir mo. Dhali ’kwani uni ḵo/ki TAP̱A mo. Dhali uni gamki gwo is e TAP̱A mo dhali e c̱iŋkinam piti ka Musa mo be.

Gway Yuḵ ma Musa mo

¹ Dhali yan’ko’da Musa dhali ’kwani ma Israyiil yuḵi gway yansan mo e TAP̱A mo mmo/o gwo mo ki:

Aha/ mina yuḵ gway e TAP̱A mo

haali/ a’di karu ki ji gi eḵa/ eḵ mo.

Shumarum dhali com piti mo tani

uni belkunu mo e ḵumma/ yi’de/ mo be.

² TAP̱A a’di i ta mom’bi’th pem mo dhali moroc̱ pem mo

dhali a’di warki’d ki mowoṯẖ pem mo.

A’di i ta’da Arumgimis pem mo dhali aha/ mina maŋ a’di mo,

Arumgimis jin ta ji gi ibabam pem mo dhali aha/ mina kar a’di ki ji gi eḵa/ eḵ mo.

³ TAP̱A a’di i ta a’di gi mo/as mo,

gway piti i ta TAP̱A mo.

⁴ Arabiya ma P̱irawn kun dirkina shumarum ka ris mo dhali ajesh piti mo tani uni i ṯa’kkina a’di mo e ḵumma/ yi’de/ mo.

Dhali ’kwaniny can piti kun yuḵayuḵ gun bol tiya e ki yuḵ mo tani uni loskina ḵumma/ Yi’de/ jin Ta gi ’Per mo be.

⁵ Agannu/ yi’de/ i kumki uni mo,

uni iikin ka ’cesh mo ki si’d si’d me’d wosh gana/ mo be.

⁶ Me’da bim poros pini ayy TAP̱A, a’di eḵa/eḵ e mom’bi’th mo.

Me’da bim poros pini, ayy TAP̱A a’di i c̱ekerki ’kwaniŋ ’kup̱ bwa mo.

⁷ E monycam pini jin caaca kagahara mo e mo jin eḵa/ /e ki eḵ mo tani

/E yocorki ’kwani ’twa/a ’cesh kun ta ’kup̱ ki /e mo.

/E hashkina nyor pini jin ’batha’ba’th mo

a’di shwa ki uni mo me’da wusha/ mo be.

⁸ Eya le’dan gi jisan shush pini mo tani aris yi’de/ p̱alan ka pije/ mo.

Dhali agannu/ yi’de/ a’di doshki’d ka jisho’k me’da gaŋgara/ mo

dhali moŋ’kulga/ gi ḵumma/ yi’de/ wara’d ki boro’th mo.

⁹ ’Kwani kun ta ’kup̱ oki gwo mo ki: Aha/ mina ura uri sho’k mo, dhali aha/ mina bu’th uni mo.

Dhali aha/ mina ḵwa/ mal buni bwa mo, dhali dil ku gi o aha/ bwa mo.

Dhali aha/ mina buḵ gandala turgam me’d pem mo.

Dhali me’d pem a’di i midi i ’ce’d uni sho’k mo be.

¹⁰ /E ’theḵki ’tham pini mo dhali ḵumma/ yi’de/ i kumki uni ’twa/a ’cesh mo be.

Uni loskina yi’de/ mo ki ’kolo’c me’da hathiṯẖ mo, e yi’de/ jin c̱a’b ki dem dem mo.

¹¹ Kaja a’di wana e ki /e, ayy TAP̱A, i bwaman ma risa ruma ’cesh mo kun yeru gway ka wuny is mo?

Kaja a’di wana e ki /e mo?

/e jin cayaa/ e ki ca mo e mo jin ḵogu mo.

/e dar ki liil e monycam pini jin miina /e to mo

/e miiki miimer ka ris mo.

¹² /E ye’thki me’d pini jin ta’da bim poros mo tani mony’cesh loski uni mo be.

¹³ ’Kwani kun wankina /e ’ba/ mo tani

/E shuki uni bway ki mo/en pini jin ṯelkunu sho’k mo.

/E shuki uni bway ki mom’bi’th pini mo

e moŋḵogum pini jin dina /e nycine/ mo.

¹⁴ Ka ŋul’kup̱ ’kwani i ciḵkin mo tani uni dekin ki bir bir mo be,

dhali akap̱e bu’thki ’kwani P̱ilisṯiyiin mo be.

¹⁵ Dhali aris tap̱a gi Pa Aduum uni si’da/ ḵalkina jwa mo

dhali aris tap̱a gi ’kwani Mu/ab mo tani mo jin denu ki bir bir mo tani a’di bu’thki uni mo.

Dhali aris ’kwani kun ’kokin mo e Paŋ Kanaan mo tani uni thiski mo ma dum ’bi’thgam buni e mo be.

¹⁶ Akap̱e/ dhali mo jin ṯagu is jwa mo a’di i biṯki’da p̱o/ uni mo.

Gom monyca ma bim pini mo tani

uni doshkin mo mmoḵu’th guŋkuru/ me’d wosh mo, Ayy TAP̱A.

Ntagi ’kwanim pini pekin mo uni kun ’cuḵkina /e mo be,

¹⁷ /E mini susi uni mo dhali i dhu uni e ’kuwosha turgam pini mo,

ayy TAP̱A, e mo jin karkina /e mmota mondim pini jin ḵogu/ mo

jin nyaŋkina /e ki me’d pini mo.

¹⁸ TAP̱A /e i mini ta aMaliḵ gom ki sule/ sule/ ya ye ’ba/ mo be.

Gway Yuḵ ma Miriyam

¹⁹ Ka arabiyaŋ ’kwani Pa Masir dhali shumarum ki imanmer uni ilu/ ’ceṯẖki bway ḵumma/ yi’de/ mo tani TAP̱A ḵalki yi’de/ ka nyaŋ’ko’d ’peni ḵumma/ yi’de/ ap̱o/ uni mo be. Hili ’kwani ma Israyiil uni iikin ap̱o/a ’cesh jin ḵuthaḵu’th e bwaman ḵumma/ yi’de/ mo be.

²⁰ Dhali yan’ko’d aMiriyam jin ta’da amanc̱i gwo jin ta’da yim mo a’di jin ta ’bwah ma Haruun mo a’di ’bu’thki’da jallugga/ e me’d piti mo. Dhali aris up̱i ’baar mo iikin mo ka pije/ mmobaṯẖa yimi sho’k ka jalluggam buni i me’d mo dhali sa mo be. ²¹ Dhala Miriyam yuḵki uni gway mo mmo/o gwo mo ki:

Yuḵi gway e TAP̱A mo haali/ a’di p̱iki mii e ki monycaŋ gana/ mo.

Shumarum dhali imanmer uni ap̱o/ mo tani uni belkunu mo e ḵumma/ yi’de/ mo be.

Yi’deŋ ḵa/ga/ mo

²² Dhali yan’ko’d aMusa suski’da Israyiil ki seṯẖ mo ’peni ḵumma/ Yi’dem ’Per mo. Dhali uni iikin mo e mombwaasho jin yuḵu gway ka Shur mo. Uni iikin ka cimi kwara/ e mombwaasho mo dhali ’koki gam yi’deŋ kamu/ mo be. ²³ Ki uni p̱u’dkin e mo jin yuḵu gway ka Murrah mo tani uni molki yi’de/ p̱i ’peni a’di mo haali/ a’di ḵa/aḵa/ kagahara mo. Gom gwo gi wakan mo tani a’di i yuḵkunu a’di gway ka Murrah mo. ²⁴ Dhali ’kwani miikina gumgum ap̱owa Musa mo mmo/o gwo mo ki: Atinta a’di mina ana i p̱i mo?

²⁵ Dhala Musa gwo ki ’twa/ e TAP̱A mo dhali TAP̱A ṯorki a’di cwa mo. Dhali a’di birki a’di mo e yi’de/ mo dhali yi’de/ c̱a’b ki dhel dhel mo. E mun mo tani TAP̱A c̱iki uni gwoŋḵan ki ’twa/ mmomii mo. Dhali e mun mo tani a’di palki uni mo. ²⁶ A’di o gwo mo ki: Waḵki/ um mini ha gwom pem e ki ’bor ’bor mo tani dhali mii jasi tom ’boron e jis em pem mo tani dhali c̱iya hirdhe/ ki gwoŋḵan pem mo dhali dhuwa ris gwoŋḵan gi ’twam pem mo tani, aha/ mina dhu ’batha tiya ap̱o/ um yisa me’d kun dhukika/ ap̱o/ ’Kwani Masir mo. Haali/ aha/ tana TAP̱A jin wac̱ um mo.

²⁷ Dhali yan’ko’d uni p̱u’dkin mo e Pa Iliim mo e mo yin jin ’kokina yi’de/ gun du’dun i ’kume’d i’ce’dka su/ mo dhali cwan jeṯkum ’kokina iss ’kwanimpa ikwara i’ce’dka ’kume’d mo. Dhali uni thumki gu’b burrinyem buni mo e yan yi’de/ mo be.

AManna/ dhali ḵuskun mo

¹ Arisa ŋul’kup̱ ’kwani ma Israyiil uni iikin mo ’peni Pa Iliim dhali p̱u’dkin mo e mom bwaasho jin yuḵu gway ka Sinaa/ mo a’di jin diki’d mo em bwaman gi Pa Iliim dhali Pa Sinaa/ mo. A’di ta’da cim ma ’kume’d i ’ce’dka mudhe’d ka ppee jin ’kon ma p̱o/ i su/ mo i’ko’di monycum buni ’peni Bampa/ Masir mo. ² Dhali e mombwaasho tani uni miikina gumgum ap̱owa Musa dhala Haruun mo. ³ Dhali uni oki uni gwo mo ki: Midi ’taki ’bor ki aman mina wuyu/ mo e me’d gi TAP̱A e Bampa/ Masir mo. E mun tani aman misha ’ko a’cesh dhali ’ka shum mo dhali shwa aris to gun o am bwa i kap̱ mo. Hili um bala suski aman ka pije/ mo e mom bwaasho mo i ’kosha tul ’kup̱ kwani ’baar mo ki ṯe/ mo ba/.

⁴ Dhali yan’ko’d TAP̱A oki’da Musa gwo mo ki: Aha/ mina rasku/ tonṯe/ ’peni momis me’da sho’k mo gom um mo. Dhali ’kwani mini ii ka pije/ isa yempa/ mo dhali tul tonṯe/ is mo gom jasa cima ’de/ c̱aan mo ki aha/ mina nyo/ uni mo waḵki/ uni mini ii e gwoŋḵan pem walla yisa mo. ⁵ Ka cim pe’de/ mo tani uni mini ḵal tonṯe/ ka ’buḵum ’ban mo dhali thoson a’di mo.

⁶ Wakan aMusa dhala Haruun ṯorkina ris ’kwani ma Israyiil gwo mo ki: Ki mo midi ta mom’pimpili/ mo tani um mini mish gwo ’ban ki TAP̱A a’di suski um ka pije/ mo ’peni Pa Masir mo. ⁷ Dhali ki mon’thamo/ um mini p̱ar monyca gi TAP̱A e mo haali/ a’di ciḵki’da gumgum bum ap̱o/ a’di mo. Haali/ aman tana ija mo, jin miikina uma gumgum ap̱o/ aman kan mo? ⁸ Dhala Musa oki gwo mo ki: Um mini mish ki a’di ta TAP̱A jin c̱i ki um shum mmo’ka mom’pimpili/ mo dhali maaŋḵuthu’d mmoshwa mon’thamo/ mo haali/ TAP̱A ciḵki’da gumgum bum mo ap̱o/ a’di mo. Aman tana ija sa/? Mo ma gumgum bum di’d ap̱o/ aman yisa hili ap̱o/ TAP̱A mo be.

⁹ Dhali a Musa oki’da Haruun gwo mo ki: Oyi arisa ŋul’kup̱ ’kwani ma Israyiil gwo mo ki: Iiyu/ ibwambori TAP̱A mo haali/ a’di ciḵki’da gumgum bum mo. ¹⁰ Dhali me’d jin ṯorkin ma Haruun aŋul’kup̱ ’kwani ma Israyiil gwo mo tani uni hilki mo mo ’kup̱ ki mom bwaasho mo dhali monyca gi TAP̱A a’di piki’d mo eya raḵ mo be. ¹¹ Dhali TAP̱A oki’da Musa gwo mo ki: ¹² Aha/ ciḵkina gumgum gi ’kwani ma Israyiil mo. Ṯori uni gwo mo ki: Mom’pen ḵaskum mo tani um mini ’ka shum mo, dhali mon’thamo/ mo tani um mini shwa maa i kap̱ mo. Dhali yan’ko’d mo tani um mini mish mo mo ki aha/ tana TAP̱A Arumgimis bum mo be.

¹³ Ki mo ta mom’pimpili/ mo tani ḵuskun ṯẖa’thkin ka ris mo dhali kuma ’cesh c̱aan ’baar mo. Dhali mon’thamo/ jap̱e/ ’kaka’d mo be. ¹⁴ Dhali ki jap̱e/ birki is mo tani yan’ko’d bunya jin p̱o’dap̱o’d diki’d mo eya p̱o/a ’cesh gi mom bwaasho mo me’da ḵwarma’c to mo jin wana e ka ḵomo/ mo be. ¹⁵ Ki ’kwani ma Israyiil p̱arki a’di e mo tani uni oki gwo ka rem ’kup̱ mo ki: Atinta a’di a’dan mo? Haali/ uni ’koki mish a’di gi wakan mo. Dhala Musa oki uni gwo mo ki: A’di ta tonṯe/ jin c̱ikina TAP̱A um mo mmoshwa mo be. ¹⁶ Yansan a’di ta gwo jin ḵankina TAP̱A mo ki: Tuli tonṯe/ is mo um ’baar ka ’deṯe/ ’deṯe/ mo ki nyanye/ me’d jin mina umi ŋap̱ a’di mo. Um mini bar a’di ka balapip̱ isu/ mo isi me’da ris ’kwani gi gu’b pini mo.

¹⁷ Dhali ’kwani ma Israyiil miiki a’di wakan mo, uni tulki uni is mo. Kun tiya tulki is ki nyanye/ mo dhali kun tiya tulki is ki gwa’d gwa’d mo be. ¹⁸ Hili ki uni barki a’di bwa mo tani a’di jin tul kum piti is ki nyanye/ mo tani a’di be i ’kosh jwa ’peni ji gi ŋap̱u mmodiki ur ’kup̱ mo. Dhali a’di jin tulki is ki gwa’d gwa’d mo tani a’di yisa hara toŋ kamuwa. Aris uni tulki uni is mo isi me’d jin mina uni i shwa a’di mo be. ¹⁹ Dhali aMusa oki uni gwo mo ki: Wathiŋ kamu/ yisa di’da jin midi boc̱ a’di itagi mon’thamo/ mo. ²⁰ Hili unin tiya ciḵ gwo ’pena Musa yisa. Kun tiya boc̱ki ’bana tiya i tagi mon’thamo/ mo dhali a’di shwakin ma yish mo dhali c̱a’b ki bul bul mo, dhali aMusa shwa’da nyor ap̱o/ uni mo be, ²¹ Mon’thamo/ isa yempa/ uni tulki uni is mo aris uni ka ’deṯe/ ’deṯe/ me’d isi ji gi mina uni shwa a’di mo. Hili ka tente/ caki’d ka nyor piti ki ’ba’th ’ba’th mo tani uni gun boc̱kona ’cesh ṯo’dkin mo be.

²² Ka cim pe’de/ mo tani uni tulki a’di is ki nyanye/ me’di su/ me’d tonṯe/ mo ka balapip̱i i doŋon gom uni ka ’deṯe/ ’deṯe/ mo. Dhali aris tap̱a ka ŋul ’kup̱ p̱u’dkin mo dhali ṯor ka Musa gwo mo. ²³ A’di oki uni gwo mo ki: Yansan a’di i ta gwo jin ḵankina TAP̱A wakan mo ki: Ka’thamo/ a’di ta’da tee jin minu dosh shoka ’cesh mo mmosi/is mo jin ḵogu gom TAP̱A mo. ’Thoḵi to jin ŋap̱a umi ’thoḵ mo dhali shuni to gun ŋap̱a umi shun mo. Dhali aris uni gun urki ’kup̱ mo tani thoson ki uni mo ki uni minu dhuku/ mo ntaga ’thamo/ mo be. ²⁴ Wakan uni thosonki uni mo ntagi mon’thamo/ mo me’d gwo jin ḵankin ma Musa uni mo. Dhali uni ’koki bul mo mo dhali ayisha kamu/ yisa di’di e uni mowaa. ²⁵ Musa oki gwo mo ki: Shwayi a’di shwane/ mo ma, haali/ shwane/ a’di i ta’da cim ma pesu/ jin sinu is jin ta’da cim jin c̱inu ki TAP̱A mo. Shwane/ um yisa mini gam tonṯeŋ kamu/ apije/ mo yisa. ²⁶ Goma cim pe’de/ mo tani um mini tul uni is mo hili ka cima pesu/ mo tani a’di jin ta’da cim mosi/is mo, um yisa mini gam tonṯeŋ kamu/ yisa mowa.

²⁷ Ka cima pesu/ mo tani ’kwanin tiya uni iikin ka pije/ mo mmotul tonṯe/ is mo hili uni gam toŋ kamuwa? ²⁸ Yan’ko’d TAP̱A oki’da Musa gwo mo ki: Me’d e kata ushkina um gwoŋḵan pem e mo ’peni gwo jin c̱ika um ki ’ce’de/ ’ce’de/ mo? ²⁹ Kayi gwo e ki TAP̱A c̱iki uma cim gi mosi/is mo dhali gom kan mo tani ka cim pe’de/ mo aha/ c̱ikina um tonṯe/ goma cimi su/ mo ba/. Dhalka ris ’kwani ka ’deṯe/ ’deṯe/ ’kon e mom buni mo. Dhalku/ ki dhal wathin ’de/ bway mo mmoya ka pije/ mo ’peni mom piti ka cima pesu/ mo. ³⁰ Wakan ’kwani si/ki is mo ka cima pesu/ mo be.

³¹ Wakan ’kwani ma Israyiil yuḵki a’di gway mo ka manna+ 16:31 Manna: ’pemen piti ta atinta a’dan? mo. A’di wana e ki emen to jin miinu a’tash dhali ta gi kush mo. Dhali ’kuny piti waka biskwiita p̱o’d ’ban jin miinu ka yina dham mo be. ³² Dhali aMusa oki gwo mo ki: TAP̱A ḵanki ana mmodhuwa mannan tiya gom emen bana jin mina uni mish tonṯe/ ’peni ji gi c̱ikina a’di ana mmoshwa e mombwaasho mo me’d jin suskina a’di ana ka pije/ mo ’peni Pa Masir mo be. ³³ Dhali aMusa oki’da Haruun gwo mo ki: Buthi dhur mo dhali ’thuṯẖa manna jin baru ka balapip̱ i bwaman mo. Dhali kar ki a’di ibwambor gi TAP̱A mo ki a’di minu kar ki tur mo gom emen bana mo. ³⁴ Me’d gwo jin ḵankina TAP̱A aMusa mo tani wakan aHaruun karki’da manna e mo jin mina a’di di ki sule/ mo ibwambora sanduuḵ jin dina gwoŋḵan jin ṯenu mo be. ³⁵ Dhali ’kwani ma Israyiil uni shwakina manna ki yili issu/ mo ntagi uni p̱u’dkin mo e bampaŋ Kanaan mo dhali ’ko mo.

³⁶ Tom bar yan wana e ka balapip̱ iss ’de/ mo be.

Yi’de/ ’Pena Kuluny Wosh mo

¹ Arisa ŋul’kup̱ ’kwani ma Israyiil ’baar mo uni joc̱kin mo ’peni mombwaasho jin yuḵu gway ka Siin mo dhali joc̱kon e mon tiya ka ris mo isi me’d gwoŋḵan gi TAP̱A mo. Dhali uni ki thum moŋ’kom buni e Pan Rep̱idiim mo hili yi’deŋ kamu/ yisa di’da jin mina ’kwani i p̱i mo. ² Gom gwo gi wakan mo tani ’kwani miikina gumgum ap̱owa Musa o ki: C̱i am yi’de/, aman ki p̱i mo ma. Dhala Musa thoḵki uni gwo mo ki: Atinta miikina uma gumgum ap̱o/ aha/ kan mo? Atinta si’da/ pala um TAP̱A kan?

³ Hili ’kwani ḵu’thkina ’kus guŋkuru/ mo imun gom yi’de/ mo dhali ’kwani miikina gumgum ap̱o/ aMusa naskina/ mo dhali o gwo mo ki: Atinta i susina /e aman ka pije/ mo ’peni Pa Masir mo mmo’kosh aman dhali uc̱im bam dhali to em bam jwa mo ki yi’dem bu’th kan mo?

⁴ Wakana Musa ’thoki TAP̱A mo ki: Atinta i miga/ mii mo gom ’kwani gwansan mo? Uni ’dishkina ’twa/ mo mmo’kosh aha/ ki wosh mo be.

⁵ Dhali TAP̱A oki’da Musa gwo mo ki: Yayi ibwambori ’kwani mo. Susi ’kwaniŋ gwanyjwaha/ ma Israyiila tiya nyaḵki /e mo dhali guyi cwam pini i me’d mo a’di jin dorkina /e yi’de/ ma Niil mo dhali yaku/ mo. ⁶ Aha/ mina dosh ibwambori /e ap̱o/ wosh mo e Wosh Sinaa/ mo. Dhali /e mini dor wosh mo dhali yi’de/ midi gac̱u/ ka pije/ mo ’peni a’di mo jin mina ’kwani i p̱i a’di mo. Dhali aMusa miiki a’di wakan mo e jis e gi gwanyjwahaŋ ’kwani ma Israyiil mo be. ⁷ Dhali a’di yuḵki yansan gway ka Massa+ 17:7 Massa: ’pemen piti ta mompal * mo dhala Miiriba+ 17:7 Meriba: ’pemen piti ta mo ma gumgum mo haali/ ’kwani ma Israyiil miikina gumgum mo dhali uni palki TAP̱A mmo/o gwo mo ki: A TAP̱A di’di bwamani ana ’te/ tana walla p̱iyi’d mo?

’Kwani ma Amaliiḵ P̱ikunu E mo

⁸ Yan’ko’d ’kwani Amaliiḵ p̱u’dkin mo dhali as ’kwani ma Israyiili cine/ mo e Pa Rep̱idiim mo be. ⁹ Dhali aMusa oki’da Jeshuwa gwo mo ki: Kwanyi ’kwanim bana mo. Dhali iiyi um ka pije/ mo mmo/as ’kwani Amaliiḵ nycine/ mo. Ka’thamo/ aha/ mina dosh i ’kup̱an wosh mo ki cwa ma Arumgimis e me’d pem mo be. ¹⁰ Wakana Jeshuwa miiki’d mo me’d jin ḵankin ma Musa a’di gwo mo. Dhali uni as ki ’kwani Amaliiḵ nycine/ mo. Dhala Musa dhala Haruun dhala Huur iikin ka gagamis i ’kup̱an wosh mo be. ¹¹ Me’d jin ’de’kkin ma Musa me’di mis mo tani Israyiil p̱iki mii e mo. Dhali me’d jin thulkina a’di me’d piti ka ’cesh mo tani ’kwani Amaliiḵ uni p̱iki mii e mo be. ¹² Hili me’d ma Musa i wuki e mo. Wakan uni ḵalki wosh mo gom a’di mmoc̱a’b ap̱o/ a’di mo. Dhali aHaruun dhala Huur bu’thki me’d piti mo, jan ṯal ’deŋ kamu/ ki ’bana ’deŋ kamu/ mo dhali jaŋ kamu/ ka ’bana kamu/ mo. Wakan me’d piti ’bi’thkina is mo ntagi mo jin yakin ma tente/ jis mo be. ¹³ Ki mii yan mo tani Jeshuwa dorki ’kwani Amaliik ’twa/a ’cesh mo ki gandala turga/ mo be.

¹⁴ Dhali TAP̱A oki’da Musa gwo mo ki: ’Kwari gwo yansan mo ki gwo jin minu ka e mo e bwaman ma warkaŋ ’kuc̱ mo. Dhali bahi gwo yansan e bwany ’ce ma Jeshuwa mo haali/ aha/ mina ’ce’d ’Kwani Amaliiḵ sho’k ka kuluny mo be. ¹⁵ Dhali a Musa nyaŋki’da gwaṯa/ mo dhali yuḵ a’di gway mo ki: TAP̱A a’di i ta’da berḵam pem mo. ¹⁶ A’di o gwo mo ki: ’Deka berkam piti isi mis mo. TAP̱A midi as ’kwani Amaliiḵ nycine/ mo ki sule/ sule/ mo be.

ARau/iil Ya ki Yilkina/ Bway Pa Musa mo

¹ Rau/iil jin ta’da mar ma Musa ta’da gasiis gi Pam Midyaan mo. A’di ciḵki gwo goma ris to ’baar mo jin miikin ma Arumgimis goma Musa mo dhali ’kwanim piti ka Israyiil mo. Dhali a’di ciḵki gwo ki TAP̱A suski ’Kwani Israyiil ka pije/ ’peni Bampa/ Masir mo.

² Dhala Rau/iil jin ta’da mar ma Musa mo a’di suski’da Sippuura mo a’di jin ta asha Musa mo i’ko’da Musa hashki’da yim mo nyaḵki uc̱iŋ gwaṯẖ ma yim su/ mo ’peni a’di mo, ³ dhali uc̱iŋ gwaṯẖ ma yim su/ mo. Jan ṯal ’de/ yuḵkunu gway mo ka Jirshuum+ 18:3 Jirshuum: Gway yan wana e ki gwo jin onu ki: Wathi/ ’peni bampaŋ kamu/ mo ki ’twaŋ ’kwani Ibraniyiin mo. mo, haali/ aMusa oki gwo mo ki: Aha/ yakina yany c̱a/ mo e bampa/ ’kwanin tiya mo.

⁴ Dhali gway gi jaŋ kamu/ mo tani a’di i ta’da Iliyaasir+ 18:4 Eliyaasir: Gway yan wana e ki gwo jin onu ki: Arumgimis woṯẖi aha/ mo. haali/ a’di oki gwo mo ki: Arumgimis ma babam pem mo tani a’di ta’da manwoṯẖ aha/ mo dhali woṯẖ aha/ mo ’peni gandal ma P̱irawn mo be. ⁵ Dhala Rau/iil p̱u’dki’d mo nyaḵki asha Musa dhali iya/ i su/ mo e mo jin bu’thkin ma Musa mondi me’d e mombwaasho e wosha turga/ ma Arumgimis mo be. ⁶ Dhali a’di hashki’da Musa gwo mo ki: Amar pini ka Rau/iil a’di yayi’d nyaḵki ashin mo dhali uc̱iŋ gwaṯẖ ma yimi su/ mo be.

⁷ Wakana Musa yaki’d mo dhali gama mar piti ’kup̱ mo dhali ’tuḵ a’di i is mo dhali p̱i a’di ’twa/ mo. Dhali uni theki me’di monṯal ’de/ mo dhali uni iiki bway gu’b burrinye/ mo be. ⁸ Dhali yan’ko’da Musa ṯorki’da mar piti aris to ’baar mo jin miikina TAP̱A a P̱irawn mo dhali aris ’kwani Pam Masir i ’baar mo gom gway ma Israyiil mo. Dhali a’di ṯorki’da ris ton diṯga/ kun p̱u’dkina p̱o/ uni i bway mo dhali mii jin woṯẖkina TAP̱A uni mo be.

⁹ Dhala Rau/iil ’kunykina bwa mo gom tom ’borga/ jin miikina TAP̱A goma Israyiil mo e mii jin miikina a’di mmo’cuḵ uni ka pije/ ’peni me’d gi ’kwani Pam Masir mo be. ¹⁰ Dhala Rau/iil oki gwo mo ki: Mom’bor mii gom TAP̱A mo a’di jin ’cuḵki um ka pije/ mo ’peni me’d gi ’kwani Pam Masir mo dhali ’peni me’d ma P̱irawn mo. Dhali mom’bor mii gom TAP̱A jin ’cuḵki ’kwani ’peni mii c̱iŋkinam buni mo be. ¹¹ Shwane/ aha/ misha ki TAP̱A a’di i eḵki’d mo mmobola risa ruma tiya e mo haali/ a’di ’cuḵki ’kwani mo ’peni bwaŋ ’kwariny me’d gi ’kwani Pam Masir mo ki uni ṯu/ulki uni ki mii maṯẖ mo. ¹² Dhala Rau/iil a’di jin ta’da mar ma Musa mo a’di c̱iki to jin c̱inu ki me’d jin ’thanu o’d dhali miiya Arumgimis abasa ’cesh mo. Dhala Haruun dhali aris ’kwaniŋ gwanyjwaha/ ma Israyiil uni p̱u’dkin mo dhali shwa tonṯe/ jin karu ki she/ goma Arumgimis mo nyaḵka mar ma Musa mo be.

¹³ Dhali ka’thamo/ ki eŋ kamu/ mo tani aMusa c̱a’bki’d mo dhali dwall ’kwani gwo mo. Dhali ’kwani doshkin mo mmo’kama Musa is ki deḵ mo ’peni mon’thamo/ ntagi mom’pimpili/ mo be. ¹⁴ Ka mar ma Musa p̱arki’da ris to gwansan e mo kun miikina a’di mo gom ’kwani mo tani a’di oki gwo mo ki: Atinta a’dan jin miikina /e ’kwani mo? Atinta dina /e /e ’de/ kan dhali aris ’kwani doshkini ’kam /e is mo ’peni mon’thamo/ ntagi mom’pimpili/ mo?

¹⁵ Dhali a Musa thoḵki’da mar piti gwo mo ki: Haali/ ’kwani p̱u’dkini aha/ mo mmotheke’th gwo mo goma Arumgimis mo be. ¹⁶ Ki uni su’kkin ki gwo mo tani yan’ko’d uni ki iiyu/ i aha/ mo dhali aha/ ki mish gwo pwaḵ bwa bese/ i bwamani uni gun su’kkin ki gwo mo. Dhali aha/ ki dhu uni mo mmomish gwoŋḵan ma Arumgimis kun ’kwarkunu mo dhali gwoŋḵan piti kun c̱inu mo be.

¹⁷ Mar ma Musa oki a’di gwo mo ki: To jin miikina /e yisa ’boro’da. ¹⁸ /E dhali aris ’kwani gun iiyini /e mo tani um mina isi wu e mo, haali/ to diṯadiṯ gom /e mo. /E yisa mini mish ṯel shoka ’cesh /e ’de/ mo yisa. ¹⁹ Ciḵi gwo gi ’twam pem mo. Aha/ mina logom /e ki gwo mo dhali Arumgimis midi di nyaḵki /e mo. A’di ’boro’d gom /e ki dosh i bwaman ’kwani dhali Arumgimis mo dhali ḵala ris tom buni kun ṯoci uni ’kus eya Arumgimis mo be. ²⁰ Dhali /e mini ṯor uni gwoŋḵan mo dhali gwo gom moŋ’ko mo. Dhali dhuyi uni mo mmomish bway mo a’di jin mina uni mish ii nycine/ mo gom to jin mina uni i mii mii mo be.

²¹ Hili kwanyi ’kwani kun mishi mii mo si’da/ ’peni aris ’kwani mo, dhali dhu uni ki jwaha/ ap̱o/ ’kwani alip̱ mo dhali ap̱o/ iss ’kwanimpa ka mudhe’d mo dhali ap̱o/ iss ’kwanimpa isu/ i’ce’dka ’kume’d mo dhali ap̱o/ ’kwani ka ’kume’d mo be. Uni mini mii ta ’kwani gun ḵo/on Arumgimis mo, ’kwaniŋgwaṯẖ kun dhelel ma du mo dhali uni kun shi/ki mii kun wanu ’kwani is ki ton tiya i e mo. ²² Dhali dhalki uni a’di i dwall ’kwani gwo isa yempa/ mo. Eya ris dhan mii kun p̱iki e mo tani uni mini mishi uni ḵalu i /e mo. Hili ushi mii kun p̱o’da she/ mo tani uni a’di mini pwaḵ uni bwa mo uni ki is buni uni ’cena mo. Wakan a’di i mina to i ’dish mii ki ’dish gom /e mo dhali uni mini mish ton diṯin nyaḵ ḵal ki /e mo be. ²³ Waḵki/ /e mini mii mii yan mo tani dhali Arumgimis ḵanki /e wakan mo tani yan’ko’d /e mini mish ’dim ’kup̱ mo. Dhali aris ’kwani gwansan si’da/ mini ii mom buni ki moŋḵu’th is mo be.

²⁴ Gom gwo gi wakan mo tani aMusa a’di c̱iki’da hirdhe/ ki gwo ma mar piti mo dhali miiya ris to gwansani ’baar mo jin okina a’di mo be. ²⁵ AMusa a’di kwanyki ’kwaniŋ gwaṯẖ kun mishki mii mo ’peni aris ’kwani ma Israyiil mo dhali dhuki uni mmota tap̱a ap̱o/i ’kwani mo, i tap̱a kun ji ’kwani alip̱ mo dhali ’kwani iss ’kwanimpa i mudhe’d mo dhali a/iss ’kwanimpa isu/ i ’ce’dka ’kume’d mo dhali imandwall gwo i ’kume’d mo be. ²⁶ Dhali uni dwallki ’kwani gwo isa yempa/ mo. Gwo kun ’bitha’bi’th mo tani uni ḵalki a’di ka Musa mo, hili ushi mii kun p̱o’da she/ mo tani misha uni dwall ki is buni uni ’cena mo be.

²⁷ Dhali yan’ko’da Musa dhalki’da mar piti bway mo mmoya mo dhali a’di yaki’d mo ki bway bampam piti mo be.

E ’Kuwosh Sinaa/ mo

¹ ’Kwani ma Israyiil iikin ka pije/ mo ’peni Pa Rep̱idiim mo. Dhali ka cima ’de/ ka ppee ’kup̱i kwara ’ko’di uni iikin mo ’peni Pa Masir mo tani uni p̱u’dkin mo e mombwaasho ma Sinaa/ mo be. Dhali imun mo tani Israyiil bu’thki moŋ’ko me’d i bum’pen i wosha turga/ mo be.

³ Dhali aMusa seki mis wosh mmogam Arumgimis ’kup̱ mo. Dhali TAP̱A yuḵki a’di mo ’peni wosha turga/ mo dhali o gwo mo ki: Yase/ i mina /e i ṯor ’kwani ma Israyiil gwo mo ki: ⁴ Um mishki to kun miikika/ ’kwani Pa Masir me’dyin mo dhali bahili aha/ borkina um ka bi ma wulu/ mo dhali susu um e aha/ mo be. ⁵ Dhali waḵki/ um mini ha gwo gi ’twam pem e mo dhali ṯel gwom pem jin gamu/ me’d mo tani um mini ta ’kwani gun kwanyka/ ka me’d pem kun miga/ nyuny mo e bwaman ma aris ’kwani mo haali/ aris mony’ceshi ’baar mo tani uni ta kum pem mo be. ⁶ Dhali um mini ta kum pem gun c̱inu aha/ aha/ ’de/ mo. Dhali um mini dhu miim pem me’d igasiis mo. Gwo gwansan a’di i mina /e i ṯor ’kwani ma Israyiil mo be.

⁷ Wakan aMusa thulki’d mo dhali yuḵki gwanyjwahaŋ ’kwani mo dhali ṯor uni aris gwo gwansani ’baar mo uni gun ḵankina TAP̱A a’di mo be. ⁸ Dhali aris ’kwani ’baar mo thoḵki gwo imonṯal ’de/ mo dhali oki gwo mo ki: Aris gwo gwansan kun okina TAP̱A mo tani mina amani mii mo. Dhali aMusa doḵki gwoŋ ’kwani ka nyaŋ’ko’d bway TAP̱A mo be.

⁹ Dhali TAP̱A oki’da Musa gwo mo ki: Aha/ mina yaku/ i /e ka raḵ jin dhinya/ e ki dhiny mo ki ’kwani mini mish ki aha/ ṯora ṯor nyaḵki /e mo. Dhali uni si’da/ mini gam /e gwo is ki sule/ sule/ mo. Dhali yan’ko’d aMusa ṯorki gwoŋ ’kwani e TAP̱A mo be.

¹⁰ Dhali TAP̱A oki’da Musa gwo mo ki: Yaku/ i ’kwani mo dhali dhu uni ki she/ shwane/ mo dhali ka’thamo/ mo. Dhali dhalki uni wusi burrinyem buni mo ¹¹ dhali thosoni is mo goma ’thamo/ c̱an mo. Haali/ ka’thamo/ c̱an mo tani TAP̱A a’di midi i thulu ka ’cesh mo ap̱o/ ’Kuwosh Sinaa/ mo e jis e gi ’kwani ’baar mo. ¹² Dhali /e mini kar gwayu/ ka kukul is mo ki ’ko’d gwar wosh jin mina ’kwani ’koki ’ciṯẖ a’di mo. Dhali oyi gwo mo ki: Hili ki ’bore/ ki um ’koki se ’ku wosh mo walla ’dish a’di is mo. Ba a’di yin jin midi ta Wosh Sinaa/ is ki me’d mo tani minu ’kosh jwa mo be. ¹³ Me’da kamu/ yisa midi ta a’di is ki me’d yisa mo hili a’di minu ’kosh ki wosh mo walla minu shin ka thop̱a mo. Waḵki/ ta to e walla wathimpa mo tani a’di midi mish di ki e yisa. Ka poome/ midi ko mo tani yan’ko’d uni mini iiku/ ’kup̱ ki wosh mo.

¹⁴ Wakan aMusa yaki’d ka ’cesh mo ’peni ’kuwosha turga/ mo e ’kwani mo dhali ṯor ’kwani gwo mmothoson is mmoluŋ mo. Dhali uni wuski burrinyem buni mo be. ¹⁵ Dhali a’di oki ’kwani gwo mo ki: Thosoni is mo goma ’thamo/ c̱an mo. Dhalku/ up̱ ki mii ’dish is mo.

¹⁶ Mon’thamo/ jin ’kon ma p̱o/i kwara mo tani kon dor ma sho’k diki’d mo dhala wara sho’k mo dhali araḵ jin ’cethe’da ’tum ap̱o/ ’kuwosha turga/ mo. Dhali ko ma poome/ dhi’thki’d ki nyanye/ mo. Wakan aris ’kwani kun ’kokin e mo jin butha uni moŋ’ko me’d mo tani uni dekin ki bir bir mo. ¹⁷ Dhali yan’ko’da Musa suski ’kwani ka pije/ mo ’peni moŋ’kom buni mmogama Arumgimis ’kup̱ mo. Dhali uni doshkin mo e bum’pen wosha turga/ mo. ¹⁸ Dhali ’kuwosh Sinaa/ ka kuluny a’di koṯẖkunu is ka ku’d mo haali/ TAP̱A i thulki’di a’di ki o’d mo. Dhali aku’d piti a’di yaki mis mo me’d ji ma p̱urun mo. Dhali wosha turga/+ 19:18 Awarkaŋ ’kuc̱a tiya o gwo ki: ’Kwani dekin ki bir bir mo. kakulu mo tani a’di yiḵinki is kagahara ki nyanye/ mo. ¹⁹ Dhali ki ko ma poome/ gwoki’d ki nyanye/ dhali ki nyanye/ mo tani aMusa ṯorki’da ṯor mo dhali Arumgimis thoḵki a’di gwo ki ’twa/ jin wa ki kon dor ma sho’k mo be.

²⁰ Dhali TAP̱A thulki’d ka ’cesh eya liman wosh Sinaa/ mo dhali yuḵa Musa bwaya liman wosh mo. Dhala Musa a’di i seki ’kuwosh mo be. ²¹ Dhali TAP̱A oki’da Musa gwo mo ki: Thulku/ ka ’ceshi ’kwani dhali rumi ’kwani ki gwo mo isi ciki/ ki uni mini ’koki ’ceṯẖku/ ki tur mo mmohil aha/ mo ka ’thime/ mo. Haali/ waḵki/ miinu kan tani uni ka ris ka ris mini wu mo be. ²² Dhali si’da/ dhalki igasiis uni kun iiyin ki ’dishe/ e TAP̱A dhagam is buni mo isi ciki/ ki TAP̱A midi diki dor uni mo.

²³ Dhali aMusa oki TAP̱A gwo mo ki: ’Kwani mini molku/ seku/ bway ’kuwosh Sinaa/ mo haali/ /e ki is pini ḵanki aman gwo mo mmo/o ki: Kari gwayu/ mo mmo’kam ’kuwosha turga/ is mo dhali dhagami a’di mo.

²⁴ Dhali TAP̱A oki a’di gwo mo ki: Yaku/ ka ’cesh mo dhali susa Haruun nyaḵki /e bway aha/ mo. Hili dhalku/ ki dhal igasiis bway dhali aris ’kwani mo mmo’ciṯẖ gwayu mo mmo/ii i aha/ mo haali/ waḵki/ miina uni kan mo tani aha/ mina dor uni mo be. ²⁵ Wakan aMusa a’di i yaki’d ka ’cesh mo e ’kwani mo dhali ṯorki uni gwo jin okina TAP̱A mo be.

Gwoŋḵan kun ’Koni ’Kume’d mo

¹ Arumgimis oki’da ris gwo gwansani ’baar mo mmo/o ki:

² Aha/ tana TAP̱A Arumgimis pini jin suski /e ka pije/ mo ’peni Pa Masir mo ’peni mo jin miikunu /e ki miiny c̱iŋkina/ mo.

³ /E mini mii dhalku/ ki mii luŋa ruma tiya mo. /E mini mii luŋ jasi aha/ ’de/ mo.

⁴ /E mini mii dhalku/ to ki mii uḵ mo jin mina /e i luŋ mo, a’di jin wana e ki toŋ kamu/ jin di’d e momis walla jin di’di mony’cesh walla jin di’d e yi’de/ e bwaŋ’kwariny mony’cesh mo.

⁵ /E mini mii dhalku/ ki mii luŋ to/uḵa kamu/ mo walla mii uni to mo. Haali/ aha/ tana TAP̱A Arumgimis pini mo. Aha/ yisa mina dhal /e bway mmoluŋa ruma kamu/ mo. Aha/ dora ’kwani gun shi/aa/ i e dhali gun ush gwom pem mo. Dhali aha/ dora emen buni ka lonthoṯẖ i taga p̱o/ doŋon mo. ⁶ Hili aha/ ṯora mo/en jin ṯelu sho’k mo gom emena alip̱ kun enki aha/ mo dhali dhu gwoŋḵan pem mo.

⁷ /E mini mii dhalku/ ki yer gway gi TAP̱A Arumgimis pini ka wuny is ka ṯor mo haali/ TAP̱A midi diki dhal a’di jin yeri gway piti ka ṯor mo be.

⁸ Kayi acima pesu/ e mo mmokar a’di ki she/ ki dhelel dhelel mo.

⁹ /E ta ga cimi pe’de/ mo mmomiiya risa ṯu’c pini ’baar mo. ¹⁰ Hili acim ma pesu/ mo tani a’di ta’da cim gi mo si/is gom aha/ mo be. E a’di mo tani /e mini mii dhalka ṯu’c pini mo, /e dhali ya/m pini mo dhali ’bwa/m pini mo walla c̱iŋkina/ wathiŋ gwaṯẖ jin mii’da ṯu’c pini mo dhali c̱iŋkina/ nyara/ jin mii’da ṯu’c pini mo dhali bip̱ pini mo dhali wathi/ jin yayi yilkina/ e pum mo. ¹¹ Haali/ acim pe’de/ mo tani aha/ jin tana TAP̱A uḵkina momis mo dhali mony’cesh mo dhali ḵumma/ yi’de/ mo dhali aris to kun ’kokin e bwaman uni mo. Bahili ka cim ma pesu/ mo aha/ sikina is mo. Gom gwo gi wakan mo tani aha/ ’borkina cim ma pesu/ mii mo dhali kar a’di ki ji gi ḵogu mo be.

¹² Taḵi cim dhali kwan mo ma, ki yil pini jin dina /e ki e mo mini ta ris mo e mo jin min ma Arumimisi c̱iki /e mo be.

¹³ /E mini mii dhalka mee ki ’kosh mo.

¹⁴ /E mini mii dhalku/ miinyc̱al ki mii mii mo.

¹⁵ /E mini mii dhalku/ to ki ḵwal mo.

¹⁶ /E mini mii dhalka ṯor ki ḵal ap̱o/ wathiŋ kamu/ mo.

¹⁷ /E mini mii dhalku/ bwa ki mii ’thoṯẖ gom gu’b gi wathiŋ kamu/ mo. /E mini mii dhalku/ bwa ki ’thoṯẖ goma ’bom gi wathiŋ kamu/ mo walla gom wathi/ jin ta c̱iŋkinam piti mo walla nyarany c̱iŋkinam piti mo walla mor bip̱ piti mo walla thuluny piti mo walla ton ṯal ’deŋ kamu/ jin di’d e gu’b gi wathiŋ kamu/ mo be.

’Kwani ḵo/ Is mo

¹⁸ Dhali ki ’kwani nyiṯẖ mondor ma sho’k mo dhala wara sho’k mo dhali ko ma poome/ mo dhali wosha turga/ mmoyakina a’di aku’d mo tani ’kwani ḵo/ki is mo dhali den ki bir bir mo dhali uni doshkin isa dhana mo be. ¹⁹ Dhali uni ki owa Musa gwo mo ki: /E a’di i mini wal ’twa/ nyaḵki aman mo dhali aman mina ciḵ gwo mo. Hili aman ḵo/a is gom waḵka Arumgimis a’di midi wal ’twa/ i nyaḵki aman mo tani aman mina wu mo be.

²⁰ Dhali aMusa oki ’kwani gwo mo ki: Dhalki is ki ḵo/ mo ma, haali/ Arumgimis p̱u’dki’d mo mmopal um mo dhali woṯẖ um mmoha gwom piti e mo ki um mini ’koki mii miinthus mo be

²¹ Hili ’kwani doshkin isa dhanaŋ gana/ mo imun mo. Jasa Musa a’di ’de/ ’dishki’da raḵa dhiny e is mo e mo jin dikin ma Arumgimis mo be.

To kun Uḵu dhala Gwaṯa/

²² Dhali TAP̱A oki’da Musa gwo mo ki: Yase a’di i mina /e i o ’kwani ma Israyiil mo ki: Um mishkin ki is bum ki aha/ ṯorkina aṯor nyaḵki um ’peni momis mo. ²³ Um mini mii dhalka ruma kamu/ ki mii uḵ ’peni ’dolkon kush walla ’dolkon gana/ mo mmokar ka p̱ar ki aha/ mo, jin mina umi luŋ mo. ²⁴ Agwaṯa/ ma ’cesh a’di i mina umi uḵ mo mmomii aha/ abasi cine/ mo ’peni ḵa’bal pini dhali bip̱ pini mo mmota to jin c̱inu ki me’d goma Arumgimis mo. Kun tiya minu c̱i mmo’tha o’d ka kuluny dhali kun tiya minu c̱i gom moŋḵu’th is goma Arumgimis mo. E mo guni ’baar mo jin raḵ gway pem kakunu e mo tani aha/ mina p̱u’dku/ i um mo dhali ’bor um mii mo be.

²⁵ Dhali ki um mini uḵa gwaṯa/ ’peni wosh mo tani um mini mii dhalki a’di ki uḵ ’peni wosh jin paṯẖu ki ’doro/ mo haali/ waḵki/ um mini paṯẖ a’di ki ’doro/ mo tani a’di yisa midi ’kosh jwa mo yisa gom to jin ḵogu mo. ²⁶ Dhali um mini ’koki seya bor ki mis gi ushi mon tan eya gwaṯam pem mo haali/ um mini ṯora yir buŋgwar is bum eya tente/ mo be.