FILIPENSES

LIꞋI JAꞋ SVUN TI APOXTOL PABLOE TI ISTSꞋIBABE TI MUCHꞋUTIC XCHꞋUNOJIC SCꞋOP RIOX TA FILIPOSE

¹Voꞌon Pabloon, xchiꞌuc li Timoteoe, ti yajtuneloticotic ti Jesucristoe, chajcꞌoponticotic tal ta vun ta acotolic, voꞌoxuc ti slecubtasoj xa avoꞌonic ti Jesucristoe ti liꞌ nacaloxuc ta jteclum Filipose, xchiꞌuc voꞌoxuc ti chachanubtasvanic ta scꞌop Rioxe, xchiꞌuc voꞌoxuc ti chacuentainic ti cꞌusitic chaqꞌuic li jchiꞌiltactic ta xchꞌunel li scꞌop Rioxe. ²Acꞌu yacꞌboxuc crasia ti Jtotic Riox ta vinajele xchiꞌuc ti Cajvaltic Jesucristoe. Junuc me avoꞌonic, mu me cꞌusi xal avoꞌonic.

Jaꞌ liꞌ yaloj ti iscꞌoponbe Riox ti muchꞌutic xchꞌunojic scꞌop Riox ta Filipos ti Pabloe

³Cꞌalal chayulic ta jol juꞌechꞌele, “colaval, Cajval”, chcut ti Rioxe ti achꞌunic xa ti cꞌusi yaloje. ^4-5Cꞌalal chajcꞌoponbeic Rioxe, jun coꞌon tajmec yuꞌun coꞌol ta jcolta jbatic ta yalel aꞌyuc ti jaꞌ chacꞌ jcuxlejaltic ta sbatel osil ti Cajvaltic Jesucristoe. Jaꞌo lic atambeic yalel aꞌyuc ti cꞌalal achꞌunique. Yechoxuc o cꞌal tana. ⁶Lavi islecubtas xa avoꞌonic ti Rioxe, jpatoj coꞌon ti chaꞌicꞌatic onox echꞌel ta vinajel ti cꞌalal xchaꞌsut tal ti Jesucristoe. ⁷Lec ti xꞌelan jchꞌunoje yuꞌun jcꞌanojoxuc tajmec. Yuꞌun chquil ti coꞌol ta jcolta jbatique acꞌu mi tiqꞌuilon ta chuquel li voꞌone, acꞌu mi teyon ta stojol jmeltsanejcꞌopetic yoꞌ xcalbe o ti jaꞌ chacꞌ jcuxlejaltic ta sbatel osil ti Jesucristoe, jnaꞌoj ti coꞌol ta jcolta jbatique. ⁸Ti Rioxe yiloj ti jcꞌanojoxuc acotolique chac cꞌu chaꞌal scꞌanojotic ti Jesucristoe. ^9-10Chajcꞌoponbeic Riox yoꞌ más xacꞌanvanic oe, yoꞌ xanopic o lec ti cꞌu xꞌelan chacolta abaic jujuntale. Mi yech chapasique, mu cꞌusi amulic chul staoxuc ti cꞌalal xchaꞌsut tal ti Jesucristoe. ¹¹Jaꞌ chascoltaic ti Jesucristoe yoꞌ spas o avuꞌunic li cꞌusitic leque, yoꞌ xavaqꞌuic o ta ichꞌel ta mucꞌ ti Rioxe, yoꞌ lec o scꞌoplal avuꞌunique.

Jaꞌ liꞌ yaloj ti jaꞌ noꞌox ta yoꞌon chacꞌ ta ichꞌel ta mucꞌ Jesucristo ti Pabloe

¹²Voꞌotic ti jchiꞌil jbatic ta xchꞌunel li scꞌop Rioxe, chacalbe avaꞌiic ti oy stu ti liꞌ tiqꞌuilon ta chuquele. Yuꞌun ep xa muchꞌutic icalbe ti jaꞌ chacꞌ jcuxlejaltic ta sbatel osil ti Cajvaltic Jesuse. ¹³Scotol li yajsoltero preserentee xchiꞌuc li yan crixchanoetique yaꞌyojic xa ti jaꞌ liꞌoch o ta chuquel ti quichꞌoj ta mucꞌ ti Cristoe. ¹⁴Lavi ochemon ta chuquele, jutuc xa mu scotolicuc iꞌochic ta yalel aꞌyuc scꞌop Riox li muchꞌutic xchꞌunojic xae. Muc ta alel yuꞌunic mi xꞌochic o ta chuquel uc. Yuꞌun ixchꞌunic uc ti chcoltaatic ta yalel aꞌyuc yuꞌun ti Cajvaltique.

¹⁵Ta melel oy jlom ti mu ta slequiluc yoꞌon chalbeic scꞌoplal ti Cristoe yuꞌun scꞌacꞌalicon yoꞌonic. Jaꞌ noꞌox tsqꞌuelic mi ep tsta sviniquic. Li jlome ta slequil yoꞌon chalic. ¹⁶Li jlome jaꞌ noꞌox chalbeic scꞌoplal Cristo yoꞌ xꞌichꞌeic o ta mucꞌ li stuquique, maꞌuc ta slequil yoꞌonic chalic. Ti yalojique, jaꞌ noꞌox chiyacꞌbeic cat coꞌon lavi liꞌ tiqꞌuilon ta chuquele. ¹⁷Li jlome scꞌanojicon yechꞌo ti chalic aꞌyuque, yuꞌun chilic ti mu cꞌu xcut li voꞌone. Yuꞌun snaꞌojic ti Riox iscꞌan ti liꞌ tiqꞌuilon ta chuquele yoꞌ xcalbe o yaꞌiic li jmeltsanejcꞌopetique ti jaꞌ chacꞌ jcuxlejaltic ta sbatel osil ti Cajvaltic Jesucristoe. ¹⁸¿Pero cꞌusi jcuenta o snaꞌojic un? Mi ta slequil yoꞌon chalic, o mi iꞌi, jaꞌ noꞌox lec chcaꞌi ti acꞌu svinajesbeic scꞌoplal ti Cristoe. Ti xꞌelan tspasique, mu xcat o coꞌon. Más to jun o coꞌon ti chvinaj scꞌoplal ti Cristoe.

¹⁹Lavi chacꞌoponbecon Riox li voꞌoxuque, ta onox xiscolta ti Chꞌul Espíritue ti jun xchiꞌuc ti Cajvaltic Jesucristoe, yoꞌ ti mu xquicta o jba ta yichꞌel ta mucꞌ ti Cajvaltique. ²⁰Yechꞌo un jun coꞌon jmalaoj chiyiqꞌuic echꞌel ta stojol li preserentee. Yuꞌun jchꞌunoj ti chiscolta ti Cristoe, yechꞌo un mu xixiꞌ mu xiqꞌuexav ti cꞌalal xicꞌote. Jamal chcalbeic scꞌoplal ti Cristoe chac cꞌu chaꞌal ta jpas onoxe yoꞌ xcacꞌ o ta ichꞌel ta muqꞌue acꞌu mi jaꞌ xilaj o. ²¹Lavi cuxulon toe, jaꞌ noꞌox chcacꞌ ta ichꞌel ta mucꞌ ti Cristoe. Ti mi lichame, más lec yuꞌun chba jchiꞌin. ²²Mi cuxulon toe, lec, yuꞌun oy to muchꞌutic chichꞌ ta mucꞌ cuꞌun ti Cajvaltique. Yechꞌo un mu jnaꞌ bu jotucal ti leque. ²³Yuꞌun coꞌol noꞌox lec. Li voꞌone lec chcaꞌi ti mi lichame yuꞌun chba jchiꞌin ti Cristoe, yuꞌun más lec teyoꞌe. ²⁴Lavi chacꞌanic to chanubtasel chquil xchiꞌuc ti muchꞌutic yan xchꞌunojique, más lec ti cuxulon toe. ²⁵Ti chacꞌanic to chanubtasel acotolique, yechꞌo un jnaꞌoj ti mu to bu chichame yoꞌ más xachꞌunic o li scꞌop Rioxe. Mi más achꞌunique, más to jun avoꞌonic. ²⁶Cꞌalal xiyul yoꞌ bu tsoboloxuque, más to “colaval”, chavutic ti Jesucristoe ti lilocꞌ xa ta chuquele.

^27-28Jaꞌ me xavalic, jaꞌ me xapasic li cꞌusi xcoꞌolaj xchiꞌuc ti cꞌusi iyal ti Jesucristoe yuꞌun jaꞌ yech smelol. Jaꞌ tscꞌan ti yech chapasic oe. Acꞌu mi xtal jqꞌueloxuc, acꞌu mi iꞌi, ta jcꞌan chcaꞌi acꞌoplalic mi coꞌol ajolic ta stojol ti Rioxe, mi coꞌol chavalic aꞌyuc ti jaꞌ noꞌox chacꞌ jcuxlejaltic ta sbatel osil ti Cajvaltic Jesuse, mi mu xaxiꞌic o ti muchꞌutic chascrontainique. Ti mi mu xaxiꞌique, jaꞌ ta xyulesbat ta sjolic yuꞌun Riox ti chacuxiic o ta sbatel osile, ti ch-ochic ta cꞌocꞌ ta sbatel osil li stuquique. ²⁹Ti lastꞌujic ti Rioxe, mu cꞌajomuc noꞌox ti chavichꞌic ta mucꞌ ti Cristoe; lastꞌujic ti chavacꞌ avocolic yuꞌun ti Cristoe. ³⁰Coꞌol abol jbatic. Avilic cꞌu xꞌelan abol jba ti cꞌalal liꞌone. Lavie loꞌil xa noꞌox chavaꞌiic ti staoj yav abol jbae.

Jaꞌ liꞌ yaloj ti jchꞌunejmantal ti Cristoe yechꞌo ti iꞌaqꞌue ta ichꞌel ta muqꞌue

^1-2Jun coꞌon avuꞌunic ti jaꞌ chapasic cꞌusi lec chil ti Cristoe yuꞌun laspatbe xa avoꞌonic. Laxchiꞌinic xa ti Chꞌul Espíritue yechꞌo ti chacꞌuxubinvanique. Pero jaꞌ ta jcꞌan ti mu xavacꞌbecon cat coꞌone. Jaꞌ ta jcꞌan ti coꞌol chapasic cꞌusi lec chil ti Cristoe, ti coꞌol chacꞌan abaique, ti coꞌol ajolique. ³Mu me xacꞌanic o ichꞌel ta mucꞌ, mu me xavalic ti mu xa muchꞌu xastaique. Coꞌolcoꞌol xachꞌunbe abaic, coꞌolcoꞌol xavichꞌ abaic ta mucꞌ. ⁴Mu me xapasic ti cꞌusitic jun o avoꞌon atuquique. Jaꞌ tscꞌan chapasic ti cꞌusi jun o yoꞌonic li yan uque.

⁵Jaꞌuc me yechoxuc chac cꞌu chaꞌal ti Jesucristoe. ⁶Ti stuque acꞌu mi jun xchiꞌuc ti Rioxe, pero muc stoy o sba ti jun xchiꞌuque. ⁷Iyicta comel li yabtel ta vinajele, jchꞌunejmantal iyul liꞌ ta balamile. Iꞌayan chac cꞌu chaꞌal voꞌotic. ⁸Ti xꞌelan jchꞌunejmantale, ixchꞌun milel. Qꞌuexlal sba tajmec ti cꞌu xꞌelan ichame yuꞌun ta cruz ismilic. ⁹Yechꞌo un stuc noꞌox iꞌaqꞌue ta ichꞌel ta mucꞌ yuꞌun ti Rioxe. Muc muchꞌu yech ichꞌbil ta mucꞌ. ¹⁰Ta sta yora ti ta jquejletatic jcotoltic ti Jesuse, acꞌu mi cuxulotic toꞌox, acꞌu mi chamemotic xaꞌox, cꞌalal ta anjeletic, cꞌalal ta pucujetic. ¹¹“Voꞌot noꞌox jpasvanejot ta mantal”, chcutic jcotoltic ti Jesucristoe. Ti xꞌelan chcaltique, jaꞌ ch-ichꞌe ta mucꞌ ti Jtotic Riox ta vinajele yuꞌun jaꞌ iyacꞌbe yabtel ti Xchꞌamale.

Jaꞌ liꞌ yaloj ti coꞌol xchiꞌuc luzotic yaꞌele yuꞌun chcacꞌtic iluc ti lec li scꞌop Rioxe

¹²Voꞌoxuc ti jcꞌanojoxuque, lec ti achꞌunic spasel ti cꞌusi tscꞌan ti Rioxe ti cꞌalal liꞌ toꞌox jchiꞌucoxuque. Pero mu me cꞌajomuc noꞌox ti cꞌalal liꞌ toꞌox jchiꞌucoxuque. Acꞌu mi nomon, jaꞌ me yech xapasulanic o. Jujuntal xanopic ti cꞌusi tscꞌan Riox chapasique. Albeic scoltaoxuc ti Rioxe yoꞌ xavaqꞌuic o ta ichꞌel ta muqꞌue. ¹³Ti Rioxe chascoltaic yoꞌ ti chac xa apasic o ti cꞌusi tscꞌane, yoꞌ ti spas o avuꞌunic li cꞌusi snopoj chapasique.

^14-16Mu me ta epalcꞌopuc xapasic, mu me ta saꞌsaꞌcꞌopuc xapasic yoꞌ muc muchꞌu saꞌ o amulique, yoꞌ xilic o ti xchꞌamaloxuc Riox ti muchꞌutic chopol sjolique. Coꞌol xchiꞌuc luzoxuc yaꞌel yuꞌun chavaqꞌuic iluc ti lec li scꞌop Rioxe. Mi yech chapasique, jun coꞌon avuꞌunic ti cꞌalal xchaꞌsut tal ti Cristoe, yuꞌun mu yechuc noꞌox ti ical avaꞌiic li scꞌop Rioxe. ¹⁷Lavi atacbecon tal jmotone, yuꞌun achꞌunojic ti chascoltaic ta saꞌel ti Rioxe. Acꞌu mi vocol ataic, pero xamuyubajic xa ti itsob avuꞌunique. Yechꞌo un ximuyubaj xa uc. Mi yech tscꞌan ti Rioxe ti oy cꞌusi chcacꞌbe uque, muc ta alel mi lichame, jun coꞌon. ¹⁸Mi lichame, junuc noꞌox avoꞌonic uc.

Jaꞌ liꞌ yaloj ti muc muchꞌu yech chac cꞌu chaꞌal ti Timoteoe xchiꞌuc ti Epafroditoe

¹⁹Mi yech tscꞌan ti Cajvaltic Jesuse, ta jtac tal ta ora li Timoteoe yoꞌ xcaꞌi o cꞌu xaꞌelanique, yoꞌ jun o coꞌone. ²⁰Muc muchꞌu yech chac cꞌu chaꞌal li Timoteoe ti sjunul yoꞌon chascoltaique. ²¹Li yane jaꞌ noꞌox tspasic ti cꞌusi tscꞌan yoꞌon stuquique, jaꞌ muc bu tspasic ti cꞌusi tscꞌan ti Jesucristoe. ²²Li voꞌoxuque avilojic xa cꞌu xꞌelan li Timoteoe. Coꞌol xchiꞌuc jchꞌamal chcaꞌi yuꞌun chiscolta ta yalel aꞌyuc li scꞌop Rioxe. Coꞌol xchiꞌuc chꞌamalil ti tscolta li stote. ²³Mi chquil ti mu xismeltsanbeic jcꞌoplal ta orae, ta jtac jelavel tal li Timoteoe. ²⁴Jaꞌ jpatoj o coꞌon ti Cajvaltique ti chilocꞌ ta ora ta chuquele, chtal noꞌox jqꞌueloxuc uc.

²⁵Ijnop noxtoc ti ijtac sutel tal li Epafroditoe, ti ataquic tal scoltaone, ti liyichꞌbe tal li jmoton atsobique. Coꞌol chitunoticotic yuꞌun ti Cajvaltique. Coꞌol itsꞌic cuꞌunticotic crontainel. ²⁶Li stuque tscꞌan chtal sqꞌueloxuc acotolic, yuꞌun chat yoꞌon ti avaꞌiic ti iꞌipaj toꞌoxe. ²⁷Ta melel ta xcham xaꞌox yilel, pero icꞌuxubinat yuꞌun ti Rioxe. Mu stucuc noꞌox icꞌuxubinat; lixcꞌuxubin ti Riox uque ti muc xchame. Ti ichamuque, icat coꞌon tajmec ti yechuque. ²⁸Yechꞌo ti persa ijtac tal ta orae yoꞌ ti xamuyubajic xa lavi avilic xa noxtoque. Jaꞌ noꞌox yech mu xa masuc chcat coꞌon uc. ²⁹Lavi iyule, muyubajanic, ichꞌic ta mucꞌ. “Colaval”, utic ti Cajvaltique. Ti muchꞌutic jaꞌ yech yoꞌonic chac cꞌu chaꞌal li Epafroditoe, ichꞌic ta mucꞌ. ³⁰Lavi jaꞌ ox ta xcham o ti chtun yuꞌun ti Cristoe. “Muc ta alel mi jaꞌ lilaj oe”, xi xa. Lec itun cuꞌun yuꞌun snaꞌoj ti avoꞌonicuc acoltaicone, pero mu cꞌu xavutic, jaꞌ li nomoxuque.

Jaꞌ liꞌ yaloj ti “jaꞌ noꞌox ta jnop ti chba jchiꞌin ti Rioxe”, xi ti Pabloe

¹Voꞌotic ti jchiꞌil jbatic ta xchꞌunel li scꞌop Rioxe, slajeb xa chacalbeic ti junuc me avoꞌonic yuꞌun ti Cajvaltique. Li voꞌone mu cꞌusi vocol chcaꞌi mi chajchaꞌtsꞌibabeic tal li cꞌusi lajtsꞌibabeic onoxe yoꞌ mu xachꞌunic o loꞌloele. ²Qꞌuelo me abaic, mu me xachꞌunic ti cꞌusi chayalbeic ti muchꞌutic chopol sjole ti yoꞌonicuc yacꞌboxuc circuncisione. Yech xa noꞌox tsyayijes abecꞌtalic, mu xa cꞌu stu. ³Voꞌotic ti sjunul coꞌontic quichꞌojtic ta mucꞌ ti Rioxe, ti jchꞌunojtic ti listojbotic jmultic ti Jesucristoe, quichꞌojtic xa circuncisión chiyilotic ti Rioxe. Muꞌnuc oy cꞌusi ijpastic ti chꞌabal jmultic chiyilotique, ta slequil noꞌox yoꞌon stuc. ⁴Ti chicuxioticuc o ta sbatel osil li smantaltac Rioxe, li voꞌone mu xa cꞌu jnaꞌ ti yechuque yuꞌun más ijchꞌun. Más muc bu xchꞌunoj li yan jchiꞌiltaque. ⁵Xvaxaquibal toꞌox cꞌacꞌal cayanel iquichꞌ circuncisión. Li voꞌone jꞌisraelon. Jaꞌ jmucꞌtatot ti Benjamín ti ta más voꞌnee. Jꞌisrael li jtot jmeꞌe. Jaꞌ toꞌox yech jchꞌunoj chac cꞌu chaꞌal xchꞌunojic li jfariseoetique, yechꞌo un jchꞌunojbe smantaltac Riox ti caloje. ⁶Ti xꞌelan jchꞌunojbe smantaltac ti Rioxe, iquilbajin ti muchꞌutic xchꞌunojic ti cꞌusi yaloj ti Cajvaltic Jesucristoe. Ti caloje, jaꞌ ta jpas cꞌusi tscꞌan ti Rioxe. Chꞌabal jmul ti caloje. ⁷Ti cꞌusitic ijchꞌune, jaꞌ chicuxi o ta sbatel osil ti caloje. Lavi ijchꞌun xa ti cꞌusi yaloj ti Cristoe, iquil ti mu cꞌu bal o li cꞌusitic jchꞌunoj toꞌoxe. ⁸Lavi iquichꞌ xa ta mucꞌ ti Cristoe, ti jaꞌ xa cajvalinoje, iquil ti mu xa cꞌusi yan lec chiyilotic o ti Rioxe. Li cꞌusitic ijpas toꞌoxe, iquil xa ti mu cꞌu bal oe. Coꞌol xchiꞌuc cꞌaꞌep yaꞌel, yechꞌo ti iquictae. Stuc xa noꞌox chquichꞌ ta mucꞌ ti Cristoe yoꞌ xba jchiꞌin oe. ⁹Lavi ijchꞌun xa ti jaꞌ chiyacꞌbe jcuxlejal ta sbatel osile, mu xa jchꞌun ti jaꞌ chicuxi o li smantaltac Rioxe. Jnaꞌoj xa ti chꞌabal jmul chiyil ti Rioxe lavi jchꞌunoj xa ti jaꞌ listojbe jmul ti Cristoe. ^10-11Jaꞌ xa noꞌox ta jcꞌan ti más chquichꞌ ta mucꞌ ti Cristoe, ti tsots syuꞌele, ti ichaꞌcuxie, yoꞌ xcuch o cuꞌun scotol ti cꞌusitic chtal ta jtojole chac cꞌu chaꞌal icuch yuꞌun ti cꞌalal istoj jmultique, yoꞌ xicuxi o ta sbatel osile.

¹²Mu xuꞌ xcal ti pasem xa cuꞌun scotole. Mu xuꞌ xcal ti toj lecone. Pero mu xquicta o jba. Jpatoj coꞌon ti tspas onox cuꞌune yuꞌun jaꞌ liyicꞌ o ti Jesucristoe. ¹³Voꞌotic ti jchiꞌil jbatic ta xchꞌunel li scꞌop Rioxe, mu xuꞌ xcal ti pasem xa cuꞌune. Li cꞌusi ta jpas li voꞌone, ta jchꞌay ta jol ti cꞌusi echꞌem xae. Jaꞌ ta jnop li cꞌusi mu to ch-echꞌe. ¹⁴Jaꞌ ti chiyicꞌ echꞌel ti Rioxe yuꞌun quichꞌoj xa ta mucꞌ ti Jesucristoe. Jaꞌ jtojol ti chba jchiꞌine.

¹⁵Li voꞌotique jnaꞌtic xa lec cꞌusi tscꞌan ti Rioxe, jaꞌuc me yech acꞌu jnoptic jcotoltic. Mi yan o cꞌusi chanopique, tey tsyules ta ajolic ti Rioxe. ¹⁶Jaꞌ acꞌu jpastic ti cꞌusi caꞌyojtic xa onox jujuntale.

¹⁷Voꞌotic ti jchiꞌil jbatic ta xchꞌunel li scꞌop Rioxe, jaꞌ chanic ti cꞌu xiꞌelane. Qꞌuelic me noxtoc cꞌu xꞌelan li muchꞌutic jaꞌ xchanojic ti cꞌu xiꞌelanoticotique. ¹⁸Ep xa ta echꞌel lacalbeic, pero chacalbeic to lavie, chiꞌocꞌ chacalbeic tal, yuꞌun ep to ti muchꞌutic xchꞌunojic scꞌop Riox ti yalojique ti jaꞌto yech tspasic chac cꞌu chaꞌal ti muchꞌutic mu xchꞌunic ti jaꞌ icham ta scoj jmultic ti Cristoe. ¹⁹Ti xꞌelan tspasique, ch-ochic onox ta cꞌocꞌ ta sbatel osil yuꞌun jaꞌ noꞌox tsnopic li cꞌusitic tscꞌan yoꞌonique. Mu xqꞌuexavic, mu xa muchꞌu xtaon chaꞌiic. Jaꞌ noꞌox tsnopic li cꞌusitic scuenta sba balamile. ²⁰Yan li voꞌotique jaꞌ xa jlumaltic li vinajele. Jaꞌ xa noꞌox ta jmalatic ti chtal yicꞌotic ti Cajvaltic Jesucristoe. ²¹Ti cꞌalal xtale, chiyachꞌubtasotic, chicoꞌolajotic chac cꞌu chaꞌal ti stuque. Xuꞌ chiyachꞌubtasotic yuꞌun oy syuꞌel. Stuc noꞌox tspas mantal.

Jaꞌ liꞌ yaloj ti muyubajcotic ti xchꞌamalotic xa ti Cajvaltic Jesuse

¹Voꞌotic ti jchiꞌil jbatic ta xchꞌunel li scꞌop Rioxe, ti jcꞌanojoxuque, coꞌonuc tal jqꞌueloxuc. Jaꞌ jun o coꞌon avuꞌunic. Xvinaj ti litun yuꞌun ti Cajvaltique yuꞌun achꞌunojic, yechꞌo un mu me xavicta abaic.

²Chacalbeic uc, Evodia xchiꞌuc Síntique, coꞌoluc me ajolic, mu me xavut abaic. Coꞌoluc me tunanic yuꞌun ti Cajvaltique. ³Voꞌot ti coꞌol chitunotic yuꞌun ti Cajvaltique, abulajan coltao li chaꞌvoꞌ antsetic chcale. Yuꞌun coꞌol icuch cuꞌunticotic ilbajinel ta yalel aꞌyuc scꞌop Riox xchiꞌuc li Clementee, xchiꞌuc li yan ti lixchiꞌine. Tey xa tsꞌibabil sbiic ta vinajel ti chcuxiic ta sbatel osile.

⁴Ti xchꞌamaloxuc xa ti Cajvaltic Jesuse, muyubajanic scotol cꞌacꞌal. Chacalbeic otro jꞌechꞌel, muyubajanic. ⁵Acꞌbeic yil scotol crixchanoetic ti lec avoꞌonique, ti scotol chcuch avuꞌunique. Yuꞌun poꞌot xa xchaꞌsut tal ti Cajvaltic Jesucristoe.

⁶Mu me cꞌusi xloꞌilaj o avoꞌonic. Mi oy cꞌusi chacꞌanique, cꞌanbeic ti Rioxe. “Colaval ti chacꞌuxubinone”, xavutic noxtoc. ⁷Ti avichꞌojic ta mucꞌ ti Jesucristoe, ti Rioxe ta onox spas ta jun avoꞌonic. Mi jun avoꞌonique, mu xa cꞌu xloꞌilaj o avoꞌonic yuꞌun chanaꞌic ti chayacꞌbeic li cꞌusitic chacꞌanbeique.

Jaꞌ liꞌ yaloj ti jaꞌuc noꞌox acꞌu jnoptic li cꞌusitic leque

⁸Voꞌotic ti jchiꞌil jbatic ta xchꞌunel li scꞌop Rioxe, slajeb xa chacalbeic tal ti jaꞌ noꞌox me xanopic li cꞌusitic yeche, li cꞌusitic leque, li cꞌusitic chalecubic oe, li cꞌusitic jun o avoꞌonic acotolique.

⁹Li cꞌusitic xꞌelan lajchanubtasique, li cꞌusitic ical avaꞌiique, li cꞌusitic ijpas avilique, jaꞌ me yech xapasic uc. Jaꞌ tspas o ta jun avoꞌonic ti Rioxe.

Jaꞌ liꞌ yaloj ti iscoltaic Pablo ti muchꞌutic xchꞌunojic scꞌop Riox ta Filipose

¹⁰Coliyal Cajvaltic ti ataquic tal jmoton noxtoque. Mu xuꞌ xcal ti achꞌayicon xa ta ajolique, jaꞌ noꞌox ti mu toꞌox cꞌu xavutique. ¹¹Ti xꞌelan chacalbeique, muc bu abol jba chcaꞌi. Acꞌu mi oy cꞌusuc cuꞌun, acꞌu mi chꞌabal, jun coꞌon yuꞌun ijchanbe xa smelol. ¹²Mi mu cꞌusi jlajese, xuꞌ mu xiveꞌ. Mi oy tajmeque, chꞌacbil noꞌox ta jlajes. Yechꞌo un jchanoj cꞌu xꞌelan cꞌalal oy tajmeque, cꞌalal chꞌabale. ¹³Xcuch cuꞌun scotol yuꞌun jaꞌ chiscolta ti Cristoe. ¹⁴Pero lec ti acoltaicone, ti anaꞌojic ti abol jbae.

¹⁵Voꞌoxuc ti liꞌ nacaloxuc ta Filipose, anaꞌojic ti muc muchꞌu yan liscolta ti cꞌalal lilocꞌ ta estado Macedoniae cꞌalal primero toꞌox ay cal avaꞌiic li scꞌop Rioxe. Atuquic noꞌox acoltaicon. ¹⁶Atuquic noꞌox acoltaicon noxtoc cꞌalal teyon toꞌox ta Tesalónicae. Xchaꞌechꞌelal atacbecon tal jmoton taqꞌuin. ¹⁷Muꞌnuc ta jcꞌan jmoton ti xꞌelan chcale. Jaꞌ ta jcꞌan ti acꞌu yacꞌboxuc bentisyon ti Rioxe. ¹⁸Lec ti cꞌu yepal avacꞌbeic tal li Epafroditoe, mu xa cꞌusi yan ta jcꞌan. Lec chil Riox ti xꞌelan apasique. Jaꞌ chac cꞌu chaꞌal lec iyil cꞌalal ichicꞌbat smoton ti ta voꞌnee. ¹⁹Yechꞌo un ti Riox quichꞌoj ta muqꞌue chayacꞌbeic scotol ti cꞌusitic chtun avuꞌunique ti avichꞌojic ta mucꞌ ti Jesucristoe. Mu xa cꞌusi yan chacꞌanic. ²⁰Yechꞌo ti chquichꞌtic ta mucꞌ ta sbatel osil ti Cajvaltique, jaꞌ ti Jtotic Riox ta vinajele. Toj lec ti jaꞌ yech chcꞌote.

Jaꞌ liꞌ yaloj ti iꞌalbatic chabanicuc ti muchꞌutic xchꞌunojic li scꞌop Rioxe

²¹Chabanuc xavalbe li jchiꞌiltactic ta xchꞌunel li scꞌop Rioxe. Chabanicoxuc la xalic li muchꞌutic xchꞌunojic scꞌop Riox ti liꞌ jchiꞌuque. ²²Chabanicoxuc la xalic uc li muchꞌutic xchꞌunojic scꞌop Riox liꞌ ta jteclume. Chabanicoxuc la xalic li muchꞌutic tsobol ch-abtejic xchiꞌuc li preserente Césare ti xchꞌunojic xa li scꞌop Riox uque.

²³Acꞌu yacꞌboxuc crasia acotolic ti Cajvaltic Jesucristoe.