Захария медээчиниң ному
Киирилде
Захария медээчи Бурганның сөзүн бистиң эрага чедир 520-518 чылдарда Вавилонга туттуруушкундан төрээн чуртунче ээп келген иудейлерге дамчыдып турган. Ол үеде (Персияның хааны Дарийниң чагыргазының эгези) еврей чон Зоровавел чагырыкчы (Давид хаанның үре-салгалы) биле Бурганның дээди бараалгакчызы Иисуска баштадып алгаш, үрегдеп каапкан Бурганның өргээзин катап база кызымак тудуп эгелээн турган. А Захария (Аггей медээчи-биле кады) чонга Бурган олче ам-даа сагыш салып турар деп, бүгү чүве чедимчелиг болур деп идегел берип турган чүве-дир.
Номну ийи кол кезекке чарып болур:
1) 1–8 эгелерде Бурганның Захарияже чорутканы сес көстүүшкүн болгаш олар-биле харылзаалыг сургаалдар база аазаашкыннар тодараттынып бижиттинген. Ол көстүүшкүннер колдуунда Иерусалимни база Бурганның өргээзин катап тургузары, израиль чонну бачыттарындан арыглаары болгаш ооң чырык келир үези-биле харылзаалыг. Ол эгелерде биеэги вектерде турган Бурганның медээчилериниң сөстеринче айтыглар бо-ла таваржып турар.
2) 9–14 эгелерде дайзыннарын Бурганның шиидериниң дугайында болгаш чөптүг чорук биле амыр-тайбыңны катап тургузар дээш, Ооң шилип алган хаанының чедип кээриниң дугайында өттүр билген медеглелдер чыгдынган.
1Дээрги-Чаяакчыже эглиринче кыйгырыг
1 Дарий хаанның чагыргазының ийиги чылының сес айда Дээрги-Чаяакчы Аддонуң оглунуң оглу , Берехияның оглу Захарияга Бодунуң сөзүн ажыткан: 2 «Дээрги-Чаяакчы силерниң ада-өгбеңерге дыка килеңнээн турган-дыр. 3 Ынчангаш бо чонга Аг-шериглиг Дээрги-Чаяакчының чугаалаан чүвезин дамчыт: Менче эглип келиңер, ынчан Мен база силерже эглип кээр мен . 4 Ада-өгбеңер дег болбаңар . Оларны Бурганның биеэде турган медээчилери кыйгырып, Аг-шериглиг Дээрги-Чаяакчының: „Бузуттуг оруктарыңардан база багай үүлгедиглериңерден ойталаңар“ – деп чугаалаан чүвезин дамчыдарга, олар Мени тооп дыңнаваан, Менче кичээнгей салбаан болгай – деп, Дээрги-Чаяакчы медеглээн. – 5 Ам ол ада-өгбеңер кайыл? Мээң медээчилерим-даа болза мөңге чурттаар деп бе? 6 А Мээң чалча-медээчилеримге айыткаан сөстерим ада-өгбеңер-биле боттанмаан чүве бе? Олар ынчан бачыттарын миннип: „Аг-шериглиг Дээрги-Чаяакчы биске хамаарыштыр, Боду канчаар доктаадып кааныл, ынчаар кылды – бистиң оруктарывыс болгаш үүлгедиглеривис ёзугаар кылды “ – дээн болгай».
Бирги көстүүшкүн: аъттар
7 Шеват дээр он бир айның чээрби дөртте, Дарийниң чагыргазының ийиги чылында Дээрги-Чаяакчы Аддонуң оглунуң оглу, Берехияның оглу Захария медээчиге Бодунуң сөзүн ажыткан. 8 Дүне када көстүүшкүн көрдүм: шилги аът мунган кижи көстүп келди . Ол кижи ыйгыл черде мирт ыяштар аразында турду, а ооң артында шилги, доруг болгаш ак чүзүннүг аъттар көзүлдү .
9 Мен: «Дээргим, бо чүү деп чүвел?» – деп айтырдым.
Мээң-биле чугаалажып турган ·дээрниң төлээзи: «Мен сеңээ ол чүү деп чүвел дээрзин айтып берейн» – диди.
10 Мирт ыяштар аразында турар кижи: «Оларны Дээрги-Чаяакчы черни эргий кезип эртсин дээш чоруткан-дыр» – деп харыылады.
11 Аъттыг улус мирт ыяштар аразында турган Дээрги-Чаяакчының төлээзинге: «Бис черни эргий кезээш келдивис, бүгү чер кыры оожум, амыр-тайбың-дыр» – диди.
12 Дээрги-Чаяакчының төлээзи ынчан: «Аг-шериглиг Дээрги-Чаяакчы, Сен Иерусалимге база Иудеяның хоорайларынга кээргел көргүзеринден кажанга чедир ойталаар сен? Оларга ам чеден чыл килеңнеп тур сен » – дээн.
13 Дээрги-Чаяакчы мээң-биле чугаалажып турган Бодунуң төлээзинге ачы-буянныг, сагыш-сеткил оожургадыр сөстер-биле харыылады. 14 Ынчан мээң-биле чугаалажып турган дээрниң төлээзи меңээ мынча дээн: «Аг-шериглиг Дээрги-Чаяакчының чугаалаан чүвезин улуска медеглеп дамчыт: Мен Иерусалим дээш, ·Сион дээш кедергей хүннеп тур мен , 15 а амыр-шөлээн чурттап турар чоннарже кедергей хорадап тур мен. Израильчилерге килеңнээним шоолуг эвес турда, ол чоннар хора халдадырын күштелдирген-дир .
16 Ынчангаш Дээрги-Чаяакчының чугаалаан чүвези бо-дур: Мен Иерусалимче кээргээр сеткилдиг эглип келдим, аңаа Мээң өргээмни катап тудар . Иерусалимни катап база хемчээп , тудар.
17 Оон ыңай Аг-шериглиг Дээрги-Чаяакчының чугаалаан чүвезин улуска медеглеп, дамчыт: Мээң хоорайларымны катап база бай-байлак чык дола бээр, Дээрги-Чаяакчы ·Сионну катап база аргалаар , Иерусалим катап база Мээң шилиттинген хоорайым боор ».
Ийиги көстүүшкүн: мыйыстар болгаш ус-дарганнар
18 Мен оон топтап көргеш, дөрт мыйысты эскерип кагдым. 19 Мээң-биле чугаалажып турган дээрниң төлээзинден: «Бо чүү боор?» – деп айтырдым.
Ол: «Бо дээрге Иудея, Израиль болгаш Иерусалимниң чонун тарадыр үзүпкен күштер-дир» – деп харыылады .
20 Ооң соонда Дээрги-Чаяакчы меңээ дөрт ус-дарган кижини көргүстү. 21 Мен: «Олар маңаа чүнү кылыр деп турары ол?» – деп айтырдым.
Ол: «Дуу мыйыстар дээрге Иудеяның чонун кым-даа бажын көдүрүп шыдавас кылдыр тарадыр октапкан чоннар-дыр. Олар иудей черге удур мыйызын көдүрген боорга, ус-дарганнар оларны барып коргудуп, мыйыстарын дүжүр шаап кааптар» – деп харыылады.
Үшкү көстүүшкүн: Иерусалимни хемчээксээр кижи
21 Мен катап база топтап көргеш, холунда чер хемчээр хендир туткан кижини эскерип кагдым . 2 «Кайнаар бар чыдыр сен?» – деп айтырдым.
Ол: «Иерусалимниң доора база узун дуртун билип аар дээш, ону хемчээрим ол-дур » – деп харыылады.
3 Оон дээрниң мээң-биле чугаалажып турган төлээзи бурунгаар чоруптарга, өске төлээзи аңаа уткуштур үнүп келди. 4 Бирги төлээ ийигизинге мынча дээн: «Маңнап баргаш, дуу ол аныяк оолга мынча де: „Чурттакчы чону, мал-маганы хөй болгаш , Иерусалим ханаларынга сыңмас хоорай апаар . 5 Мен Бодум хоорайны долгандыр турар оттуг хана боор мен – деп, Дээрги-Чаяакчы медеглеп тур. – Өндүр чырыымны ооң ортузунга көргүзер мен “».
Бурганның Бодунуң чонун кыйгырганы
6 «Эйт, эйт! Соңгу чүкте чурттан бээр дезип маңнажыңар! Силерни дээрниң дөрт хады-биле тарай шаапкан болгай мен – деп, Дээрги-Чаяакчы медеглээн. – 7 Эйт, Вавилонда чурттап турар ·Сионнуң чону, ол хоорайдан адырлып үнүңер ». 8 Чүге дээрге Аг-шериглиг Дээрги-Чаяакчы силерни олчалап ап турган чоннарга хамаарыштыр (алдарлыг Бурган мени айбылап чоруткан соонда) мынча дээн: «Мээң чонумга дээп турар улус Мээң караамның огунга дээп турары ол-дур . 9 Мен оларже холумну анныр мен, олар ынчан боттарының кулдарының олчазы апаар ». (Ынчан мени Аг-шериглиг Дээрги-Чаяакчының чорутканын билип аар силер .)
10 «·Сион-кыс, ырлап, өөрүп-байырла! Мен чедип келгеш, силерниң араңарга чурттай бээр мен – деп, Дээрги-Чаяакчы медеглээн. – 11 Ол хүн хөй чоннар Дээрги-Чаяакчы Меңээ каттыжып кээп , Мээң чонум апаар. Иерусалимниң чону, Мен силерниң араңарга чурттай бээр мен». (Ынчан мени силерже Аг-шериглиг Дээрги-Чаяакчының чорутканын билип аар силер.)
12 Дээрги-Чаяакчы ыдыктыг чер-чуртка Иудеяны Бодунуң хувааглыг чери кылдыр ээлеп аар , Иерусалим катап база Ооң шилиттинген хоорайы боор .
13 Кижи амытан бүрүзү Дээрги-Чаяакчының мурнунга ыыды чиде берзин! Чүге дээрге Ол туруп келгеш, Бодунуң ыдыктыг чурттаар черинден кел чыдар-дыр.
Дөрткү көстүүшкүн: дээди бараалгакчы
31 Оон Дээрги-Чаяакчы меңээ Бодунуң төлээзиниң мурнунда турар дээди бараалгакчы Иисусту көргүстү. Ооң чанында ону буруудадырынга белен ·эрлик турду . 2 Дээрги-Чаяакчы эрликке: «Дээрги-Чаяакчы сени чемелеп тур, эрлик! Иерусалимни шилип алган Дээрги-Чаяакчы сени чемелээр-дир! Ол кижи оттан ушта соп эккелген кезек дег-дир » – дээн.
3 Хирлиг хептиг Иисус ·дээрниң төлээзиниң мурнунда турган. 4 Дээрниң төлээзи Иисустуң мурнунда турар өске төлээлерге: «Ооң хирлиг хевин уштуп кааптыңар» – дээн . Оон Иисустуң бодунга: «Көр даан, Мен сээң кем-бурууңну уштуп кааптым, ам сеңээ байырлал хеви кедирип тур мен» – дээн .
5 Мен ынчан: «Ооң бажынга арыг тюрбан бөрттен кедирип кагзын » – дээн мен. Олар ооң бажынга арыг тюрбан кедиргеш, хепкерип кагды. А Дээрги-Чаяакчының төлээзи ооң чанында хевээр турду.
6 Дээрги-Чаяакчының төлээзи Иисуска даалга берип, мынча диди: 7 «Аг-шериглиг Дээрги-Чаяакчының чугаалаан чүвези бо-дур: бир эвес сен Мээң оруумну эдерип, Мээң дүрүмнеримни күүседир болзуңза, Мээң өргээмге башкарар эрге сенде болур, Мээң өргээмниң девискээрин сен хайгаараар сен. Ынчан мында турар төлээлерим дег, Менче хостуг кирер арганы сеңээ хайырлаар мен. 8 Дээди бараалгакчы Иисус, сен база сеңээ башкарткан бараалгакчылар, эки келир үениң бадыткал демдээ болур улус, дыңнаңар: Мен Бодумнуң чалчамны – Өзүмнү чорудуптар мен. 9 Көрүңер, Иисустуң мурнунга бир дашты салып тур мен . Ол даш чеди кырлыг , Мен аңаа тускай бижик оя кезип каар мен – деп, Аг-шериглиг Дээрги-Чаяакчы медеглээн. – Бо черниң кем-буруузун чаңгыс хүн дургузунда чайладып кааптар мен. 10 Ол хүн силер хувааглыг чериңерге виноградтыг, фига ыяштарлыг амыр-шөлээн амыдырап , бот-боттарыңар удур-дедир чаалажыр силер». Аг-шериглиг Дээрги-Чаяакчының медеглээн чүвези ол-дур.
Бешки көстүүшкүн: алдын чырыткы болгаш ийи олива ыяжы
41 Мээң-биле чугаалажып турган ·дээрниң төлээзи ээп келгеш, мени, удаан кижини дег, оттурупту . 2 Ол менден: «Чүнү көрүп тур сен?» – деп айтырды.
Мен: «Алдын чырыткы көрүп тур мен . Ооң кырында олива үзү кудар саважыгаш болгаш чеди дең тур. Дең бүрүзүнде чеди хоолайжыгаш бар-дыр. 3 Оон ыңай чырыткының чанында ийи олива ыяжын көрүп тур мен : бирээзи саважыгаштың оң талазында, өскези солагай талазында тур» – деп харыыладым. 4 Мээң-биле чугаалажып турган дээрниң төлээзинден: «Бо чүү деп чүвел, дээргим?» – деп айтырдым.
5 Дээрниң төлээзи: «Бо чүү деп чүвел дээрзин билбезиң ол бе?» – деп удур айтырды.
«Билбес мен, дээргим» – деп харыыладым.
6 Ынчан ол меңээ мынча диди: «Дээрги-Чаяакчының Зоровавелге чугаалаан сөзү бо-дур : чедимче күчү-күштүг шеригден эвес, а Мээң Сүлдемден кээр – деп, Аг-шериглиг Дээрги-Чаяакчы чугаалаан. – 7 Сен чүү сен, өндүр бедик даг? Зоровавелдиң мурнунга оргулааш апаар сен! Ол Бурганның өргээзиниң эң кол дажын салып каарга , улус: „Бурганның ээ көрнүүшкүнү ында-дыр! “ – деп алгыржы бээр».
8 Дээрги-Чаяакчы меңээ Бодунуң сөзүн ажыткан: 9 «Зоровавелдиң холдары бо өргээниң таваан салган , база-ла ооң холдары ону тудуп доозар. (Ынчан мени силерже Аг-шериглиг Дээрги-Чаяакчының чорутканын билип аар силер .) 10 Бичии эгелээшкиннер хүнүн кым херекке албазыл? Улус Зоровавелдиң холунда тудугга ажыглаар херексел көргеш, өөрүп-байырлаар. А демги чеди дең Дээрги-Чаяакчының бүгү чер-делегейни эргий көрүп турар карактарынче айтып турар ».
11 Мен ынчан дээрниң төлээзинден: «Чырыткының оң болгаш солагай талазында ийи олива ыяжы чүнү көргүзүп турары ол?» – деп айтырдым.
12 Оон ыңай: «Олива ыяштарында ийи будук бар, ол будуктар ийи алдын хоорза дамчыштыр суук алдын үндүр аксып турар. Ол чүү деп чүвел?» – деп айтырдым.
13 Төлээ харыызынга: «Оларның чүнү көргүзүп турарын билбес сен бе кай?» – деп айтырды.
«Билбес мен, дээргим» – деп харыыладым.
14 Ынчан ол: «Бо ыяштар дээрге бүгү чер-делегейниң Чагырыкчызынга бараан болуп турар, олива үзү-биле шилип чаап каан ийи кижи-дир» – диди.
Алдыгы көстүүшкүн: ужуп чоруур дүрүг ном
51 Катап база топтап көөрүмге, дүрүг-ном ужуп бар чытты . 2 Дээрниң төлээзи: «Чүнү көрүп тур сен?» – деп айтырды.
«Ужуп чоруур дүрүг-ном көрүп тур мен, ооң узуну чээрби кыры дурту, а дооразы он кыры дурту-дур» – деп харыыладым.
3 Ол меңээ мынча диди: «Бүгү чер кырынче диргелип келген каргыш ол-дур ; номнуң бир талазында бижип кааны дег, оорланыр бүгү улус кырдырар, а өске талазында бижип кааны дег, меге даңгырак берген бүгү улус кырдырар . 4 Аг-шериглиг Дээрги-Чаяакчы: „Мен бо каргышты ыдыптар мен . Оорнуң бажыңынче база Мээң адым-биле мегелеп даңгыраглап турар кижиниң бажыңынче ол кире бээр . Аңаа турумчуп алгаш, оларның бажыңнарын: ыяшты-даа, дашты-даа ол узуткап кааптар“ – деп медегледи».
Чедиги көстүүшкүн: доскаар иштинде херээжен кижи
5 Мээң-биле чугаалажып турган ·дээрниң төлээзи бурунгаар үнүп келгеш: «Ам база топтап көрем, чүү кел чыдар-дыр?» – диди.
6 Мен: «Бо чүү деп чүвел?» – деп айтырдым.
Ол: «Доскаар ышкажыл – деп харыылады. – Ол доскаар бүгү чер-чурттуң чурттакчыларының кем-буруузу-биле долдунган-дыр ».
7 Доскаарның коргулчун халывы көдүрлү бээрге, ооң иштинде бир херээжен кижи олурар болду. 8 Дээрниң төлээзи: «Бо херээжен дээрге бачыт-тыр!» – дээш, ону доскаарже дедир суккаш, коргулчун халып-биле дуглап кагды.
9 Оон топтап көргеш, шилен куштуу ышкаш чалгыннарлыг ийи херээжен кижи ужуп бар чыдарын эскерип кагдым, оларның чалгыннарын хат хөлбеңнедип турар болду. Олар доскаарны көдүрүп алгаш, чер биле дээр аразынга ужуп чорупту. 10 Дээрниң мээң-биле чугаалажып турган төлээзинден: «Олар доскаарны кайнаар аппаары ол?» – деп айтырдым.
11 «Сеннаар черже , орта аңаа өргээ тудуп бээр дээш – деп, ол меңээ харыылады. – Кажан өргээ белен апаарга, доскаарны орта тавак кырынга тургузуп каар».
Сески көстүүшкүн: аъттар биле дайынчы тергелер
61 Мен катап база топтап көргеш, ийи хүлер даг аразындан үнүп орар дөрт ·дайынчы терге эскерип кагдым . 2 Бирги тергени шилги аъттар сөөртүп чорду, ийигизин – дас кара аъттар, 3 үшкүзүн – ак аъттар, дөрткүзүн – ала-шокар, күштүг аъттар . 4 Мен ынчан мээң-биле чугаалажып турган ·дээрниң төлээзинден: «Бо чүү деп чүвел, дээргим?» – деп айтырдым.
5 Дээрниң төлээзи меңээ: «Олар дээрге бүгү чер-делегейниң Чагырыкчызының турар черинден үнүп келген дөрт хат-тыр . 6 Дас кара аъттар соңгу чүкте чуртче бар чыдары ол-дур, ак аъттар – оларның соо-биле , ала-шокар аъттар – мурнуу чүкче» – деп харыылады.
7 Күштүг аъттар үнүп келгеш, чер-делегейни эргий халыксап, чүткүп турду. Дээрниң төлээзи: «Барып, чер-делегейни эргип кезиңер!» – дээрге, олар халдып чорупту.
8 Ол ынчан дыңзыдыр: «Көр даан, соңгу чүкте чуртче халдып чорупкан аъттар ол черге Дээрги-Чаяакчының Сүлдезин оожургадып кагды» – диди.
Дээди бараалгакчыга оваадайны кедиргени
9 Дээрги-Чаяакчы меңээ Бодунуң сөзүн ажыткан: 10 «Вавилонга туттуруушкундан ээп келген Хелдай, Товия болгаш Иедайя оларның белектерин ап ал. Ол-ла хүн Софонияның оглу Иосияның бажыңынче чорувут. 11 Алдын-мөңгүнден ап алгаш, оваадайдан кылгаш, Иоседектиң оглу, Бурганның дээди бараалгакчызы Иисустуң бажынга кедире салып каг. 12 Аңаа Аг-шериглиг Дээрги-Чаяакчының чугаалаан чүвезин дамчыт: көр даан, Өзүм деп аттыг кижи бо-дур . Ооң өзүмү турар черинден өзүп үнгеш, Дээрги-Чаяакчының өргээзин тургузуп каар . 13 Дээрги-Чаяакчының өргээзин ол тургузуп каар. Ол алдар-хүндүге бүргеттирер, Бодунуң дүжүлгезинге саадапкаш, чагырар. Ооң дүжүлгезиниң чанынга Бурганның бараалгакчызы турар , олар аразында эп-найыралдыг болур. 14 А ол оваадай Хелдай , Товия, Иедайя болгаш Софонияның оглу Хен дугайында тураскаал демдек бооп, Дээрги-Чаяакчының өргээзинге артып калзын».
15 Ыракта чурттап турар улус чедип келгеш, Дээрги-Чаяакчының өргээзин тударынга киржир , ынчан мени силерже Аг-шериглиг Дээрги-Чаяакчының чорутканын билип аар силер . Силерниң Бурганыңар Дээрги-Чаяакчының чугаалаан чүвезин чүткүлдүү-биле тооп дыңнаар болзуңарза, ол бүгү болдуна бээр.
Чөптүг чорук болгаш энерел шээрлээшкинден херектиг
71 Персияның хааны Дарийниң чагыргазының дөрткү чылында , Кислев деп тоску айның дөртте Дээрги-Чаяакчы Бодунуң сөзүн Захарияга ажыткан. 2 Ол үеде Вефилдиң чурттакчылары Сарецер биле Регем-Мелех деп ийи кижини боттарының улузу-биле кады Дээрги-Чаяакчыдан ээ көрүүшкүн дилеп мөргүзүн дээш чорудупкан. 3 Олар Аг-шериглиг Дээрги-Чаяакчының өргээзинде турар Ооң бараалгакчызындан база Ооң медээчилеринден: «Хөй чылдар дургузунда кылып турарывыс дег, чылдың-на беш айда качыгдап ыглап-сыктап, ·шээрленирин уламчылаар бис бе?» – деп айтырар ужурлуг турган.
4 Аг-шериглиг Дээрги-Чаяакчы Бодунуң сөзүн меңээ ажыткан: 5 «Чурттуң бүгү чонундан база Бурганның бараалгакчыларындан айтырып көр: сөөлгү чеден чыл дургузунда беш айда база чеди айда ·шээрленип, качыгдап ыглап-сыктап тура, Мени дээш ынчаар кылып турган силер бе? 6 А аштанып-чемненип тура, боттарыңар дээш дойлап турбаан силер бе? 7 Дээрги-Чаяакчы ол-ла сөстерни, кажан Иерусалим болгаш ооң чоок-кавызында хоорай-суурлар чурттакчылыг, амыр-шөлээн турда, ·Негев болгаш ·Шефела деп девискээрлер чурттакчы чоннуг турда, биеэде турган медээчилерин дамчыштыр чугаалап турган эвес чүве бе?»
8 Дээрги-Чаяакчы Бодунуң сөзүн Захарияга ажыткан: 9 «Аг-шериглиг Дээрги-Чаяакчының чугаалаан чүвези бо-дур: чөптүг-шынныг шииткелден кылыңар, бот-боттарыңарга энерелдиг, кээргээчел сеткилдиг болуңар . 10 Дулгуяк херээженни, өскүс кижини, даштыкы кижини болгаш ядыы кижини кызагдаваңар , сеткил-чүрээңерге бот-боттарыңарга удур кара сагыш тывылбазын .
11 Ынчалза-даа чонум Мени тооп дыңнаарындан ойталап, хая көрнү берген, дыңнавас дээш кулактарын дуглап алган. 12 Олар чүректерин алмаз ышкаш кадыг кылып алган , ыдыктыг хоойлуну база Аг-шериглиг Дээрги-Чаяакчының Бодунуң Сүлдези-биле биеэги медээчилерни дамчыштыр чорудуп турган сөстерин тооп дыңнавайн барган. Ынчангаш Аг-шериглиг Дээрги-Чаяакчы Мен оларже аажок килеңней берген мен.
13 Оларны кыйгырып турумда, тооп дыңнавас болду, ынчаарга олар кыйгырарга, Мен база дыңнаваан мен – деп, Аг-шериглиг Дээрги-Чаяакчы чугаалаан. – 14 Мен оларны билбес чорааны бүгү чоннарже тарадыр хадыдыптым. Оларның соонда чер-чурту ээнзиреп, ону тавартыр кым-даа ыңай-бээр чорбас апарган . Олар ынчалдыр боттарының кайгамчык чараш черин ээн куруг кылып алган».
Бурганның Иерусалимге берген аазаашкыннары
81 Аг-шериглиг Дээрги-Чаяакчының сөзү меңээ ажыттынган.
2 Аг-шериглиг Дээрги-Чаяакчының чугаалаан чүвези бо-дур: «Мен ·Сион дээш аажок хүнней бердим . Мээң хүннээшкиним ооң дайзыннарынче өндүр улуг килең бооп кыптыкты». 3 Дээрги-Чаяакчының чугаалаан чүвези бо-дур: «Мен ·Сион дагже ээп келгеш, Иерусалимге чурттаар мен . Иерусалим хоорай шынчы хоорай деп , Аг-шериглиг Дээрги-Чаяакчының даа – ыдыктыг даг деп адаттырар».
4 Аг-шериглиг Дээрги-Чаяакчының чугаалаан чүвези бо-дур: «Катап база кырган ирей-кадайлар Иерусалимниң кудумчуларынга олурар, олар назылап кыраанындан даянгыыштыг чоруур. 5 Хоорайның кудумчуларын ойнаан уруглар дола бээр».
6 Аг-шериглиг Дээрги-Чаяакчының чугаалаан чүвези бо-дур: «Чоннуң артынчызынга ол хүннерде бо бүгү кайгамчык бооп көстүр болза, Меңээ кайгамчык бооп көстүр чүве чок». Аг-шериглиг Дээрги-Чаяакчының медеглээн чүвези ол-дур.
7 Аг-шериглиг Дээрги-Чаяакчының чугаалаан чүвези бо-дур: «Мен Бодумнуң чонумну чөөн чүкте, барыын чүкте чурттардан үндүрүп эккеп , камгалап каар мен. 8 Оларны Иерусалимге чурттаар кылдыр дедир чандырып аар мен, олар Мээң чонум болур, а Мен оларның шынчы, чөптүг Бурганы болур мен ».
9 Аг-шериглиг Дээрги-Чаяакчының чугаалаан чүвези бо-дур: «Аг-шериглиг Дээрги-Чаяакчының өргээзин тудары-биле ооң таваан салып турда , ындыг сөстерни Бурганның медээчилери чугаалап турган. Силер ам ол-ла сөстерни дыңнап тур силер, холдарыңар күш-шыдал кирзин! 10 Ол үеге чедир кижиниң күш-ажылы дээш төлевир кылыры шыдаттынмас турган, ажылдадып ажыглаан мал-маганны чемгерер арга чок турган. Чорумал улуска дайзыннар амыр-дыш бербейн турган. Мен ынчан бүгү улусту бот-боттарынга удурланыштырып каан турган мен».
11 «А бо чоннуң артынчызын Мен биеэде ышкаш кылдыр аажылавас мен – деп, Аг-шериглиг Дээрги-Чаяакчы медеглээн. – 12 Улус тайбың байдалга тараа тарыыр, виноград сывы чимизин бээр, чер бодунуң дүжүдүн бээр, дээрлер чаъс-шалыңын чагдырар . Ол бүгүнү Мен бо чоннуң артынчызы эдилээр кылдыр хайырлаар мен. 13 Иудеяның чону, Израильдиң чону, силер өске чоннар аразында каргыштыг бооп турган силер, ынчалза-даа Мен силерни камгалап каар мен, силер йөрээлдиг апаар силер. Кортпаңар, холдарыңар күш-шыдал кирзин!»
14 Аг-шериглиг Дээрги-Чаяакчының чугаалаан чүвези бо-дур: «Ада-өгбеңер Мени килеңнедиптерге, силерге хора халдадыр деп шиитпир үндүргеш, ону өскертпээн болгай мен – деп, Аг-шериглиг Дээрги-Чаяакчы чугаалаан. – 15 Ам база, бо үеде, Мен шиитпир үндүрүп, Иерусалимге, Иудеяның чонунга ачы-буян көргүзер деп тур мен . Кортпаңар!
16 Силерниң кылыр ужурлуг чүвеңер бо-дур: шуптуңар бот-боттарыңарга шынны чугаалаңар , хоорайларыңарның төп шөлдеринге шииткелдер үндүрерде, алыс шынның, амыр-тайбыңның аайы-биле шиидиңер. 17 Өске-бир кижиге удур кара сагыш сеткил-чүрээңерге тывылбазын , меге даңгырак кылырынга ынак болбаңар , чүге дээрге ол бүгүнү көөр хөңнүм чок». Дээрги-Чаяакчының медеглээн чүвези ол-дур.
18 Аг-шериглиг Дээрги-Чаяакчының сөзү меңээ ажыттынган. 19 Аг-шериглиг Дээрги-Чаяакчының чугаалаан чүвези бо-дур: «Дөрт, беш, чеди болгаш он айда сагып турганыңар шээрлээшкин үелери Иудеяның чонунга өөрүшкүлүг, хөглүг болгаш аас-кежиктиг хүннер апаар; ындыг болганда, алыс шынга, амыр-тайбыңга ынак болуңар».
20 Аг-шериглиг Дээрги-Чаяакчының чугаалаан чүвези бо-дур: «Хөй чоннар, хөй хоорайларның чурттакчылары ам-даа чедип кээр. 21 Бир хоорайның чурттакчылары өске хоорайның чурттакчыларынга баргаш: „Барып, Дээрги-Чаяакчыдан ээ көрүүшкүн дилеп, мөргүүлүңер, Аг-шериглиг Дээрги-Чаяакчыже чүткүүлүңер. Бис бо бар чыдыр бис“ – дээр . 22 Хөй санныг аймактар, күштүг чоннар Аг-шериглиг Дээрги-Чаяакчыже чүткүп, Оон ээ көрүүшкүн дилеп, мөргүүр дээш Иерусалимче чедип кээр ».
23 Аг-шериглиг Дээрги-Чаяакчының чугаалаан чүвези бо-дур: «Ол хүннерде аңгы-аңгы дылдарда чугаалап турар бүгү чоннардан он-он кижи бир иудей кижиниң эдээнден халбактанып: „Силер-биле кады чоруурун биске чөпшээреп көрем, чүге дээрге Бурган силер-биле кады дээрзин дыңнадывыс!“ – дижир» .
Бурганның караа бүгү чоннарже көрүп турар
91 Өттүр билген медеглел. Дээрги-Чаяакчының сөзү бо-дур.
Ол Хадрах деп черге удур болур база Дамаск хоорайга турумчуп алыр,
чүге дээрге Дээрги-Чаяакчының караа ,
Израильдиң шупту аймактарынче дег, бүгү улус-чоннарже көрүп турар –
2 Дамаск-биле кызыгаарлашкак черлиг Хамат хоорайже-даа,
улуг мергежилдиг Тир, Сидон хоорайларже-даа көрүп турар.
3 Тир бодунга шивээ тудуп алган,
мөңгүннү доозун дег хөй кылдыр,
алдынны – малгаш дег эңдерик кылдыр чыып алган .
4 Көрүңер, Дээрги ооң байлаан былаап аар,
күчү-күжүн далайга узуткап каар.
Тир боду отка өрттенип каар .
5 Ол бүгүнү көргеш, Аскалон хоорай коргуушкунга алзыптар,
Газа хоорай кортканындан сириңейни бээр,
Экрон хоорай база, чүге дээрге ооң идегели ышкындырган-дыр.
Газага хаан турбас апаар, Аскалон ээнзирээр .
6 Азот хоорайга сурас өгбеден укталган улус-чон кээп чурттай бээр.
Мен филистимнерниң турамыын сый шавар мен.
7 Оларның аксындан ханныг эът-чемни ,
диштеринден – чүдек-бужар аъш-чемни ушта тыртар мен.
Филистимнерниң артынчызы база бистиң Бурганывыска хамааржып,
Иудеяның бир аймаа дег апаар,
а Экрон хоорай иевус чон дег апаар .
8 Мен Бодумнуң чуртумну таварты эртип турар аг-шеригге удур
камгалал бооп туруп аар мен.
Моон соңгаар кандыг-даа кызагдакчы олап эртпес,
чүге дээрге Мээң караам ол бүгүже көрүп турар.
Келир үедеги хаан болгаш камгалал
9 ·Сион-кыс, өөрүп-хөгле,
Иерусалим-кыс, амырап-байырла-ла!
Көр даан, хааның сенче кел чыдыр:
чөптүг, тиилелгелиг , биче сеткилдиг хаан
элчиген, кыс элчиген оглу мунуп алган кел чыдыр .
10 Мен Израильде ·дайынчы тергелерни,
Иерусалимде дайынчы аъттарны узуткап каар мен ,
дайынчы ча-согун база узуткаттырар.
Ол хаан өске чоннарга амыр-тайбыңны медеглээр,
бир далайдан өске далайга чедир,
Евфрат хемден чер-делегейниң ужу-кыдыынга чедир чагырар .
11 ·Сион-кыс, сеңээ хамаарыштыр.
Мээң сээң-биле чарып, хан-биле күштүг болдурган чагыг-керээмни бодааш ,
сээң туттурган улузуңну суг чок оңгардан хостаар мен .
12 Ам идегели бар апарган туттурган улус, шивээңерже чана бериңер,
чидирииңерни ийи катап хөй кылдыр эгидип бээримни
бөгүн силерге медеглеп тур мен.
13 Иудеяны ча дег кылдыр хере тырткаш,
Израильди согун кылдыр салып аар мен.
·Сион, сээң оолдарыңны дайынчы хылыш дег көдүрер мен;
грек чон , оларны сээң оолдарыңга удур көдүрер мен.
14 Дээрги-Чаяакчы чонунуң кырынга көстүп кээр,
Ооң согуну чаңнык дег кызаш дээр .
Дээрги-Бурган-Чаяакчы труба этсир,
мурнуу чүктен хадаан шуурган-биле чедип кээр .
15 Аг-шериглиг Дээрги-Чаяакчы чонунга дозуг-камгалал дег боор;
олар дайзыннарынче даш шывадаар, өжээтеннерин сыырыптар;
олар арага ишкен улус дег шимээргээр база
хан кудар аяктар дег, өргүл бедигээжиниң азыглары дег, дола бээрлер.
16 Израильчилерниң Бурганы Дээрги-Чаяакчы ол хүн оларны камгалаар,
Бодунуң чонун, кодан хою дег , камгалаар.
Олар Ооң черинге оваадайда улуг үнелиг даштар дег чайынналыр .
17 Ооң чону кайы хире ачылыг, кайгамчык чараш бооп көстүрүл!
Далган-тараадан, виноград чулуундан аныяк оолдар-кыстар чечектелир.
Иудея биле Израильдиң катап тургустунары
101 Чазын Дээрги-Чаяакчыдан чаъс дилеп, мөргүңер.
Ол диңмирээшкин-кызаңнаажын чайыннадып,
силерге суггур чаъс чагдырып бээр ,
кижи бүрүзүнге шөлге чемниг үнүш хайырлаар.
2 Дүрзү-бурганнар хоозун чүве чугаалаар ,
караң көрнүрлер хей-куруг көстүүшкүннер көрүп, меге дүштерин чугаалаар ;
оларның аргалалы хей болур.
Ынчангаш улус-чон хойлар дег тояап, кадарчызы чогундан түреп чоруур .
3 «Чоннуң кадарчыларынче Мээң килеңим кыптыкты,
улус-чоннуң хуналарын кезедир мен ,
чүге дээрге Аг-шериглиг Дээрги-Чаяакчы Мен
Бодумнуң коданым – Иудеяның чонунче сагыш салып,
ону көрүштүг дайынчы аъдым дег кылып аар мен.
4 Иудеядан бажыңның таваанга салыр эң кол даш ,
чадырның өргени, дайылдажыр ча-согун – бүгү чагырыкчылар үнер.
5 Олар шупту, тулчуушкун үезинде дайынчылар дег,
дайзыннарын кудумчуда малгаш ышкаш таптай базар ;
олар дайылдажып, аъттыг шериглерни безин ажып-тиилээр,
чүге дээрге Дээрги-Чаяакчы олар-биле кады болгай.
6 Иуданың салгалын быжыглаар мен,
Иосифтиң салгалын камгалаар мен.
Оларны Мен чандырар мен, чүге дээрге кээргей бердим.
Олар Меңээ кажан-даа кагдырбаан ышкаш боор.
Оларның Бурганы Дээрги-Чаяакчы – Мен болгай мен, оларга харыы бээр мен.
7 Израильчилер маадырлар дег боор,
оларның чүректери арага ишкенде дег хөглүг апаар.
Оларның ажы-төлү ол бүгүнү көргеш, өөрүүр,
оларның чүректери Дээрги-Чаяакчыга хамааржыры дээш өөрүп-байырлаар .
8 Мен оларже сыгырып имнээш, чыыптар мен;
оларны хостап аар болгай мен,
олар биеэде дег хөй санныг болур .
9 Мен оларны өске чоннар аразынче тарадып каапкан-даа болзумза,
олар Мени ырак чурттарга-даа сактып кээр.
Олар-даа, ажы-төлү-даа дириг артып, чанып кээр.
10 Чонумну египет черден чандыргаш, Ассириядан чыып алгаш,
Галаад болгаш Ливанче эккээр мен –
аңаа оларның шуптузун сыңырар чер чок болур .
11 Олар кызагдаашкын далайын кеже бээр,
хайнып-мөөрээн далайны томаартып каар.
Нил хемниң ээремнери кургап каар,
турамык Ассирия куду көрдүрер,
Египеттиң эрге-чагыргазының төнчүзү кээр .
12 Мен чонумну Дээрги-Чаяакчы-биле харылзаазының ачызында быжыглап каар мен,
олар Мээң адымга чагыртып, амыдыраар».
Дээрги-Чаяакчының медеглээн чүвези ол-дур.
Улуг күштерниң буурааны
111 Ливан, хаалгаңны ажыт, от сээң пөштериңни чипсин!
2 Чойган, ыглап-сыкта, чүге дээрге пөш кээп ушкан-дыр,
улуг-чаагай ыяштар узуткаттынган-дыр.
Васан черниң дубтары , ыглап-сыктаңар,
чүге дээрге эрттинмес эзимни кыргып каапкан-дыр.
3 Кадарчыларның ыы-сыызы дыңналып тур:
оларның байлак-чаагай одар-белчиири узуткаттынган-дыр.
Аныяк арзылаңнарның ырланган алгызы дыңналып тур:
Иордан шынаазында оларның шыргайлары узуткаттынган-дыр.
Ийи кадарчы
4 Мээң Бурганым Дээрги-Чаяакчы мынча дээн: «Дөгерер дээн кодан хойдан кадарып көр. 5 Оларны садып алган улус буруузунмайн кыра шаап кааптар, а садыпкан улус: „Дээрги-Чаяакчыга алдар, мен байый бердим! “ – дээр; кадарчылар хойларын кээргевес . 6 Мен база бо черниң чурттакчыларын моон соңгаар кээргевес мен – деп, Дээрги-Чаяакчы медеглээн. – Көр, Мен кижи бүрүзүн өске кижиниң база ооң хаанының холунга хүлээдир мен; олар черни хоозурадыр, а Мен оларның холундан кымны-даа адырбас мен».
7 Мен дөгерер дээн хойларны хой садыглаар улуска кадарып берип турдум . Ийи даянгыыш тудуп алгаш, бирээзин Буян деп, өскезин Эвилел деп адап алгаш, олар-биле хойларны кадарып эгеледим. 8 Бир ай дургузунда өске үш кадарчыны узуткап каан мен. Ол садыгжылар меңээ хөңнү чок апарган, мен база олардан хөңнүм кала берген. 9 Ынчан мен: «Моон соңгаар силерге кадарчы болбас мен. Өлүр дээн хойлар өлү берзин, чок болур дээн хойлар чок болзун . Артып калганнары бот-боттарын чипсин» – дээн мен.
10 Мен бодумнуң Буян деп даянгыыжымны тудуп алгаш, сыйып каапкаш, бүгү аймактар-биле чарган чагыг-керээмни күш чок болдурдум. 11 Чагыг-керээ ол хүн күш чок апарган. Мени хайгаарап көрүп турган хой садыгжылары Дээрги-Чаяакчының ажыдып чугаалаан сөзү ындыг дээрзин билип алган. 12 Мен оларга: «Күзээр болзуңарза, меңээ төлеңер, а күзевес болзуңарза, төлевеңер» – дээн мен. Олар меңээ үжен °шекел мөңгүн деңзилеп берди .
13 Дээрги-Чаяакчы меңээ: «Ол акша-мөңгүннү дой сава кылыкчызынга октап бер! » – диди. Оларның мени үнелээн бедик өртээ ыя ол ышкажыл! Мен үжен °шекел мөңгүннү алгаш, ону Бурганның өргээзинде дой сава кылыкчызынга октап берген мен . 14 Оон мен Эвилел деп ийиги даянгыыжымны сыйып, Иудея биле Израильдиң аразында акы-дуңмалышкы харылзааны үзүп кааптым.
15 Дээрги-Чаяакчы меңээ катап база мынча дээн: «Мелегей кадарчыга тааржыр херекселди ап ал. 16 Чүге дээрге Мен бо чуртка бир чаа кадарчы бээр мен, ол кадарчы өлүр деп барган хойларже сагыш салбас, читкен хойларны дилевес, кемдээн хойларны эмневес, кадыктарын чемгербес, харын-даа семис хойларның эъдин чиир, оларның дуюгларын үзе тыртып кааптар .
17 Кодан хоюн каапкаш баар чөгенчиг кадарчы ат болур! Хылыш ооң холунче шашсын, оң талакы караан дешсин ! Ооң холу шуут кадып калзын, оң талакы караа шуут согурара берзин!»
Иерусалимниң тиилелгези
121 Өттүр билген медеглел. Дээрги-Чаяакчының израиль чон дугайында сөзү бо-дур. Дээрни херип чаткан , черниң үндезиннерин салган, кижини амы-тынныг кылып каан Дээрги-Чаяакчы мынча деп медеглээн: 2 «Көрүңер, Мен Иерусалимни эзиртир дашка кылып каар мен , бүгү кожа чоннар эзирик улус дег кээп дүжер. Иерусалимни бүзээлеп турда, Иудеяның салым-чолу база ындыг болур. 3 Ол хүн чер-делегейниң бүгү чоннары Иерусалимге удур чыглып кээрге, Мен ону оларның шуптузунга угдунмас даш кылып каар мен. Иерусалимни көдүрер дээн бүгү чоннар кемдей бээр. 4 Ол хүн Мен дайынчы аът бүрүзүн аажок коргудуптар мен, ооң мунукчузунуң угаанын солуудадыптар мен – деп, Дээрги-Чаяакчы медеглээн. – Иудеяның чонунче кичээнгейлиг көөр мен, а өске чоннарның бүгү аъттарын согурартып каар мен . 5 Ынчан Иудеяның баштыңчылары сеткил-чүрээнде „Аг-шериглиг Дээрги-Чаяакчы оларның Бурганы болгаш, Иерусалимниң чурттакчылары күштүг-дүр“ деп бодаар. 6 Ол хүн Мен Иудеяның баштыңчыларын оттулар ыяш аразында оттуг суугу дег, моожалар аразында хып турар чырыткы дег кылып каар мен; олар чоок-кавызында – оң, солагай талазында чурттап турар бүгү чоннарны өрттендир чип кааптар . А Иерусалим бодунуң турган черинге катап база чурттакчы чоннуг апаар.
7 Дээрги-Чаяакчы баштай Иудеяның шериглеринге тиилелге хайырлаар – оон башка Давидтиң салгалының, Иерусалимниң чурттакчыларының алдары Иудеяның улузунуң алдарындан ажа бээр. 8 Ол хүн Дээрги-Чаяакчы Иерусалимниң чурттакчыларынга дозуг-камгалал болур, оларның аразында эң кошкак кижи ол үеде Давид хаан ышкаш апаар, а Давидтиң салгалы Бурган дег, чонну баштап чоруур Дээрги-Чаяакчының төлээзи дег апаар.
9 Ол хүн Мен Иерусалимче халдап турар бүгү чоннарны кыргып-хыдыырын бодаар мен».
Өттүр шанчып алганы кижи дээш кажыыдал
10 «А Давидтиң салгалын, Иерусалимниң чурттакчыларын ээ көрнүүчел болгаш Меңээ чаннып мөргүүр улус кылып каар мен. Олар өттүр шанчып алганы кижиже көөр , эр чаңгыс оолдуң ажыын ажааны дег, ооң ажыын ажып ыглап-сыктаар, дун оол дээш кажыыдааны дег , ол кижи дээш кажыыдаар. 11 Ол хүн Иерусалимге, Мегиддон шынаазында Гадад-Риммон дээш ыы-сыы дег , канчаар-даа аажок улуг ыы-сыы болур. 12 Чурттуң чону кажыыдап ыглаар – төрел бөлүк бүрүзү аңгы кажыыдап ыглаар: Давидтиң салгалының төрел бөлүү – бир аңгы, оларның херээжен улузу – бир аңгы; Нафанның салгалының төрел бөлүү – бир аңгы, оларның херээжен улузу – бир аңгы; 13 Левийниң салгалының төрел бөлүү – бир аңгы, оларның херээжен улузу – бир аңгы; Шимейниң төрел бөлүү – бир аңгы, оларның херээжен улузу – бир аңгы. 14 Арткан бүгү төрел бөлүктер база ындыг: төрел бөлүк бүрүзүнүң эр улузу – бир аңгы, оларның херээжен улузу – бир аңгы кажыыдап ыглаар».
Арыглаашкын хүнү
131 «Ол хүн Давидтиң салгалынга база Иерусалимниң чурттакчыларынга суг бажы аттыгып үнгеш, оларны бачыттан база бужар-багындан арыглап чуур .
2 Ол хүн Мен чер кырындан дүрзү-бурганнарның аттарын узуткап кааптар мен, оон ыңай улус оларны сагынмас апаар – деп, Аг-шериглиг Дээрги-Чаяакчы медеглээн. – Ол ышкаш бо черден меге медээчилерни база буктарны ырадып кааптар мен. 3 А бир эвес кандыг-бир кижи өттүр билип медеглээрин уламчылаар болза, ооң төрээн ада-иези аңаа: „Дээрги-Чаяакчының адын тудуп, мегелеп турарың дээш, өлүр ужурлуг сен“ – дээш, ол кижи өттүр билип медеглеп турда, ону өттүр шанчып каар .
4 Ол хүн ындыг бүдүү билирлер боттарының медеглээн көстүүшкүннеринден ыядып човай бээр ; олар улус мегелээри-биле Бурганның медээчизиниң селбегер бөдүүн хевин кетпес. 5 Оларның кайызы-даа: „Мен дээрге Бурганның медээчизи эвес мен, тараачын кижи мен, аныяамдан-на чер ажылы кылыр салым-чолдуг болган мен “ – дээр. 6 Улус оон: „А чүге сээң хөрээңде сорбулар бар чүвел?“ – деп айтырарга , ол кижи: „Ол балыгларны эш-өөрүмнүң бажыңынга алган мен“ – деп харыылаар».
Кадарчыны соп каан, кодан хой тарай берген
7 «Хылыш, Мээң томуйлаан кадарчымче,
Мээң чоок кижимче халда! – деп, Аг-шериглиг Дээрги-Чаяакчы медеглээн. –
Кадарчыны соп каарыңга, хойлар тарай маңнажы бээр!
А хураганнарже Мен Бодумнуң холумну көдүрер мен.
8 Бүгү чурттуң чонунуң үштүң ийи кезии кырдырып аар,
а үштүң бир кезии дириг артар – деп, Дээрги-Чаяакчы медеглээн. –
9 Чоннуң арткан кезиин отче киирер мен;
оларны мөңгүн ышкаш эзилдирип, шылгаар мен,
алдын ышкаш арыглаар мен .
Олар Мээң адымны кыйгырып, Меңээ мөргүүрге,
оларга харыылаар мен: „Бо Мээң чонум-дур“ – дээр мен.
А олар: „Дээрги-Чаяакчы – бистиң Бурганывыс!“ – дээр ».
Сөөлгү дайын-чаа болгаш Бурганның чедип кээри
141 Дээрги-Чаяакчының хөделип үнер хүнү кел чыдыр . Иерусалим, дайзыннар сээң байлааңны сээң иштиңге үлежир-дир. 2 Бүгү чоннарны Иерусалимге удур дайын чорудары-биле чыыптар мен : хоорай эжелеттирер, бажыңнар үптеттирер, а херээженнер күштеттирер . Хоорайның чурттакчыларының чартык кезиин тудуп аппаар, а арткан кезиин хоорайга арттырып каар .
3 Дээрги-Чаяакчы ынчан ол чоннарга удур үнүп келгеш, дайын-чаа үезинде тулушкан дег, олар-биле тулчур. 4 Ол хүн Ооң буттары Иерусалимниң чөөн талазында Елеон дагның кырынга туруп аар ; ол даг чөөн чүктен барыын чүкче ийи чарлы берип, дагда аажок улуг шынааны ажыдыптар. Дагның бир чартыы соңгу чүкче, өске чартыы – мурнуу чүкче чыла бээр. 5 Силер Дээрги-Чаяакчының даг шынаазы-биле дезип маңнажыр силер, чүге дээрге дагның ийи чартыының аразында шынаа Эцелге чедир чаттылар. Иудеяның хааны Озияның чагырган үезинде чер шимчээшкининден чоннуң дезип турганы дег , дезип маңнажыр силер. Ынчан мээң Бурганым Дээрги-Чаяакчы чедип кээр, Ооң бүгү ыдыктыг төлээлери кады кээр .
6 Ол хүн чырык чок боор, чырымалдар көзүлбес апаар . 7 Ол хүн болза туруп көрбээн үе болур, ону чүгле Дээрги-Чаяакчы билип шыдаар : хүн-даа үнмес, дүн-даа дүшпес, а кежээ дүжерге, чырып кээр .
8 Ол хүн Иерусалимден амыдырал хайырлаар суг агып бадар : ооң бир чартыы чөөн чүкте далайже, өске чартыы – барыын чүкте далайже киир агар ; чайын-даа, кыжын-даа ындыг боор.
9 Дээрги-Чаяакчы бүгү чер-делегейни хааннап чагырар . Ол хүн Дээрги-Чаяакчы дың чаңгыс болур , улус чүгле Ооң адынга мөгеер.
10 Бүгү бо чер соңгу чүкте Гивадан эгелээш, Иерусалимниң мурнуу чүгүнде турар Риммонга чедир оргулааш дег апаар. А Иерусалим хоорай бодунуң турар черинге бедидир көдүрлүр. Ооң кызыгаары Вениаминниң хаалгазындан Бирги хаалгага чедир, Азыгда хаалгага чедир база Хананел суургазындан хаанның виноград сыскырар оңгарларынга чедир болур. 11 Улус аңаа чурттай бээр, хоорайны оон ыңай кажан-даа бүрүнү-биле узуткавас. Иерусалим айыыл чок турар.
12 Иерусалимге удур чаалашкан бүгү чоннарже Дээрги-Чаяакчы мындыг аарыг-хайны ыдар: оларның мага-боду, боттары бут кырынга турда-ла, ирип каар, карактары – карак оңгарларынга-ла, а дылдары – аастарынга-ла ирип каар. 13 Ол хүн Дээрги-Чаяакчы оларже улуг мөгүдээшкин ыдар. Олар шупту холдарындан удур-дедир сегиржип аар, бот-боттарынче холун көдүрүп, халдап эгелээр . 14 Иудея безин Иерусалимге удур чаалажы бээр. Оон чоок-кавыдагы бүгү чоннарның байлаа: алдын-мөңгүн, идик-хеп эңдерик хөй чыгдына бээр. 15 Ол-ла аарыг-хайдан аъттар, элчигеннер, мулдар, тевелер болгаш оларның турлагларында бар бүгү өске мал-маган кырлып каар.
16 Иерусалим-биле чаалажып турган бүгү чоннардан дириг арткан улус Хаанга, Аг-шериглиг Дээрги-Чаяакчыга мөгеер дээш база Чадырлар байырлалын демдеглээр дээш чылдың-на кээп турар апаар . 17 Бир эвес чер-делегейниң чоннарының кайы-бирээзи Аг-шериглиг хаан Дээрги-Чаяакчыга мөгеери-биле Иерусалимче барбас болза, ол чон чаъс чок артар . 18 Бир эвес египет чон бээр чедип келбес болза , Чадырлар байырлалын демдеглеп келбес чоннарже Дээрги-Чаяакчының ыткан аарыг-хайы египетчилерже база халдаар. 19 Египет чон болгаш Чадырлар байырлалын демдеглеп келбес бүгү өске чоннар боттарының бачыттары дээш шак ындыг кеземче алыр.
20 Ол хүн аъттарның дериинге безин «Дээрги-Чаяакчыга ыдыктаткан» деп бижип каан боор . Дээрги-Чаяакчының өргээзинде чем хайындырар паштар өргүл салыр бедигээштиң мурнунда савалар дег ыдыктыг болур. 21 Иерусалимде база Иудеяда бүгү паш-сава Аг-шериглиг Дээрги-Чаяакчыга ыдыктаткан болур. Өргүл салыры-биле келген бүгү улус ол паш-саваны ап алгаш, өргээн малдың эъдин быжырар. Ол хүн Аг-шериглиг Дээрги-Чаяакчының өргээзинге садыгжылар турбас .