Михей медээчиниң ному
Киирилде
Михей – Исайя медээчиниң үежизи. Ол Бурганның сөзүн израиль чонга VIII вектиң ийиги чартыында медээлеп турган. Ол чылдарда күчүлүг Ассирия күрүнениң аг-шерии соңгу болгаш мурнуу еврей күрүнелерге чаңгыс эвес удаа кыжанып турган.
Михей медээчи иудейлерниң бачыттары дээш, ооң мурнунда Самария хоорай дег, Иерусалим Бургандан кеземче алыр – чурттакчылары узуткаттырып, өске чуртче көжүртүр деп сагындырып турар. Михей чагырыкчыларны албаты чонну дарлап турары дээш, карачал улусту – оларның ак-сеткилдиг эвези дээш, а Бурганның медээчилерин – оларның шынында Дээрги-Чаяакчыдан келбээн, меге сөстер-биле чонну аргалап турары дээш чемелеп турар. Ооң кадында чон чүгле чаңгыс Дээрги-Чаяакчыга эвес, өске бурганнарга база мөгейип турган.
Ындыг-даа болза, Бурганның шииткелиниң дугайында сөстер (1:1–2:11; 3:1-12; 6:1–7:7) Ооң камгалалының дугайында идегел киирер сөстер-биле (2:12-13; 4:1–5:15; 7:8-20) солчуп турар. Давид хаанның салгакчызы хаанның чонга бодунуң дайзыннарын долузу-биле тиилээр арга бээри хүн үнүп кээр, ынчан чонну ооң бүгү бужар-багындан арыглап-аштаар (5-ки эге).
11 Дээрги-Чаяакчы Морешет чурттуг Михейге Иудеяның хааннары Иоафам, Ахаз болгаш Эзекия оларның чагырып турган чылдарында Бодунуң сөзүн ажыткан. Самария биле Иерусалим дугайында Михейниң көргени көстүүшкүн бо-дур .
Бурганның израиль чонну кезедири-биле чедип кээри
2 Бүгү аймак-чоннар, дыңнаңар ,
чер-делегей болгаш ону долган бүгү чүве, мону кичээнгейге алыңар!
Дээрги-Бурган-Чаяакчы силерге удур херечи боор-дур,
Дээрги Бодунуң ыдыктыг өргээзинден чугаалаар-дыр .
3 Көрүңер даан, Дээрги-Чаяакчы Бодунуң чурттап турар черинден үнүп ор :
Ол куду бадып, черниң бедиктерин базып тур .
4 Даглар Ооң будунуң адаанда эстип тур , шынаалар чарлып тур,
олар отка эзилген чук дег, тейниң ийинден агып баткан суг дег апаар.
5 Иаковтуң салгалдарының кемниг херектери дээш,
израиль чоннуң бачыттары дээш ол бүгү болуп турар-дыр.
Израильдиң кем-буруузу кайыын тывылганыл?
Самариядан эвес бе?
Иудеяның дүрзү-бурганнарга тураскааткан бедик черлери кайдал?
Иерусалимде эвес бе?
6 «Ынчангаш Мен Самарияны хову-шөлде бузундулар оваазы кылып каар мен,
чүгле үнүш олуртурунга тааржыр чер кылып каар мен.
Хоорай ханазының даштарын шынааже дүжүр октап,
ооң таваан чанагаштап каар мен.
7 Ооң шупту даш көжээлери буза шаптырар,
ооң бүгү дүрзү-бурганнарын үрегдеп узуткаар мен ,
ооң шупту өргүл белектери отка өрттеттирер.
Самария ол өргүл белектерин самыын-садар херээженниң төлевири дег кылдыр ап турган болгай ,
ол белектер самыыраан улуска катап база төлевир апаар».
Иудеяның хоорайлары эжелеттирер
8 Самарияның буурааны дээш ыглап-сыктаар мен ,
качыгдалдан кызыл-даван, чанагаш улчуп чоруптар мен ,
шөө-бөрүлер ышкаш улуур мен,
страус куштар ышкаш хомудап ыглаар мен .
9 Чүге дээрге Самарияның балыы эмнеттинмес-тир ,
ол балыгланыышкын Иудеяда чеде берген-дир,
Мээң чонумнуң хаалгазында, Иерусалимниң бодунда барган-дыр.
10 Иудейлер, кел чыдар кеземче дугайында Геф хоорайга чугаалаваңар ,
аңаа шуут ыглашпаңар.
Бет-Леафра суурга качыгдалдан довурак-доозунга боражып алыңар .
11 Шафирниң чурттакчылары, бужартаан, шалдаң боттарыңар өскээр көжер силер;
Цаанда чурттап турар улус дезип үнүп шыдавас;
Бет-Эцелдиң чурттакчылары кажыыдап ыглажып турар,
олардан дуза ап шыдавас силер.
12 Мароттуң чурттакчылары эки медээлер манап чадааш, могап турупкан,
чүге дээрге Дээрги-Чаяакчының ыдыпкан айыыл-халавы
Иерусалимниң хаалгазында безин чедип келген-дир .
13 Лахистиң чурттакчылары, чүгүрүк аъттарыңарны ·дайынчы тергелерге кожуңар!
Израильдиң кемниг херектерин өттүнгеш,
силер ·Сион-кысты бачытче киирип каан силер.
14 Иудей чон, сен ам Морешет-Гефче чарлыышкынның белектерин чорудар сен.
Ахзив хоорай Израильдиң хааннарының манаан идегелин мегелеп каар.
15 Морешаның чурттакчылары, Бурган силерже эжелекчи эккээр,
Израильдиң алдар-аттыг улузу Одолламда куйларже чаштынар ужурга таваржыр .
16 Эргим ынак оолдарыңар дээш качыгдап,
бажыңар дүгүн чулуп, дас куш ышкаш тас апарыңар ,
чүге дээрге оларны силерден чарып, тудуп аппаар-дыр.
Кызагдакчылар ат болур
21 Орун-дөжээнге чыткаш , кемниг херек, бузут үүлгедир бодалдыг улус ат болур!
Олар – даң адып кээрге, ук бодалдарын күүседиптер күш-шыдалдыг улус-тур.
2 Ол улус шөлдер күзээр болза, хунаап аар-дыр,
бажыңнар күзээр болза, былаап аар-дыр.
Бажыңнарга чурттап олурган улусту олар кызагдап,
бажың ээзин-даа, ооң өг-бүлезин-даа үптеп-тонап,
оларның ээлел черин бодунга ап аар-дыр .
3 Ынчангаш Дээрги-Чаяакчы ол чонга удур мынча дээн:
«Мээң бодалдарым база бар:
Мен силерже адырлып шыдавазыңар айыыл-халапты ыдар деп тур мен.
Моон соңгаар адыыргап базып турар харыыңар чок апаар,
чүге дээрге айыыл-халап үези келген-дир.
4 Ол хүн улус силерниң дугайыңарда качыгдал ырлары чогаадыр,
ажыыңар ажып ыглажыр: „Бис шуут-ла хоозурап калдывыс!
Чонувустуң хувааглыг черин Ол өскээр хемчээп, былаап алды.
Бистиң шөлдеривисти Бурганга шынчы эвес улуска үлеп берип тур“».
5 Ынчангаш Дээрги-Чаяакчының чонунуң аразынга
кым-даа силерге хувааглыг чер үлеп бербес.
Чон чүгле меге медээчилерге ынак
6 Улус: «Өттүр билип медеглевеңер!
Ол дугайында өттүр билип медеглеп болбас.
Бистиң адывыс баксыравас!
7 Дээрги-Чаяакчы ындыг килеңнээчел бе?
Ол ындыг чүвени кылып болур бе?» – деп чугаалап турар.
«О, Иаковтуң салгалы, ынча деп болур бе?
Мээң сөстерим чөптүг амыдырап чоруур кижиге ачылыг болбас бе?
8 Ооң мурнунда Мээңии турган чон дайзын дег тура халаан ;
айыыл дугайында каразывайн чаныңар-биле эртип турар тайбың улустуң хевин ушта тыртып,
былаап ап турар-дыр силер.
9 Мээң чонумнуң херээженнерин эптиг бажыңнарындан үндүр сывыртап турар-дыр силер;
оларның ажы-төлүнден Мээң хайырлаан ачы-буянымны
кезээ шагда хунаап ап турар-дыр силер.
10 Дораан чоруй барыңар – бо черге ам амыр-дыш турбас,
ону ·арыг эвези дээш буурадып каар ,
ол болза коргунчуг буураашкын боор.
11 Бир эвес мегечи азы бузурукчу кижи келгеш:
„Мен силерге арага база өске-даа эзиртир суксун дугайында өттүр билип медеглээр мен“ – дээн болза,
ол кижи бо чонга таарымчалыг медээчи боор турган болду бе».
Аазап каан камгалал
12 «О, Иаковтуң салгалы, Мен силерни шуптуңарны ыяап чыып аар мен,
Израильдиң артынчызын ыяап каттыштырып каар мен.
Кажаалаткан хойларны дег, одарга кодан хойну дег,
силерни каттыштырып, чыыр мен –
бо черни чыылган хөй кижиниң шимээни дола бээр.
13 Силерниң мурнуңарга орук ажыдыкчызы чоруур;
силер хоорайның хаалгазын чаза таварып үне бээр силер.
Хааныңар силерниң мурнуңарга чоруур,
Дээрги-Чаяакчы силерни баштаар ».
Төлеп чок чагырыкчылар болгаш бүдүү билирлер
31 Мен ынчан: «Иаковтуң салгалының ·баштыңнары,
израиль чоннуң чагырыкчылары, дыңнаңар!
Чөптүг шииткелди билир ужурлуг эвес силер бе?
2 А силер – буянны көөр хөңнү чок, бузутка ынак,
кижилерниң кежин союп, эъдин сөөгүнден шылып турар улус-тур силер;
3 мээң чонумнуң эъдин чип, кежин соя тыртып,
сөөктерин сыйып, чанчарылдыр үүрмектеп турар,
пашче каар дээн дег, эъдин доорап турар улус-тур силер! » – дээн мен.
4 Үе кээрге, олар Дээрги-Чаяакчыны кыйгырып, дуза дилээр,
а Ол харыылавас .
Ол үеде Дээрги-Чаяакчы олардан үүлгеткен бузуду дээш хая көрнү бээр.
5 Дээрги-Чаяакчы мынча дээн:
«Мээң чонумну будулдуруп турар бүдүү билирлерге хамаарыштыр .
Силерни чемгерер улуска амыр-тайбың медеглээр-дир силер ,
а аъш-чем бербес улуска кыжанып, дайын чарлаар-дыр силер.
6 Ол дээш, силерни көстүүшкүннер чок дүн сыырыптар,
өттүр билген медеглелдер чок дүмбейге бүргеттирер силер .
Бурганның медээчилери дирткен силерниң кырыңарда хүн ажа бээр,
чырык хүн силерге караңгылай бээр .
7 Өттүр көөр улус ыядып каар, бүдүү билирлерниң ады баксыраар ;
силер шупту аксыңар хаап аар силер,
чүге дээрге Бурган силерге харыылавас».
8 А мен болза Дээрги-Чаяакчының Сүлдези берген күшке,
шынныг чорукка болгаш дидим чорукка бүргеткен мен,
Иаковтуң салгалынга – ооң кемниг херээниң дугайында,
израиль чонга – ооң бачыдының дугайында чугаалаар мен.
9 Иаковтуң салгалының ·баштыңнары, израиль чоннуң чагырыкчылары, мону дыңнаңар!
Силер чөптүг шииткелди херекке албайн, бүгү шын чүвени хажыдып турар-дыр силер.
10 Силер – ·Сионну өлүрүүшкүн-биле, Иерусалимни кемниг үүлгедиишкин-биле
тудуп тургузуп турар улус-тур силер!
11 Иерусалимниң баштыңнары хээли ап, шиидип турар-дыр ,
Бурганның бараалгакчылары төлевир ап, өөредип турар-дыр,
Бурганның медээчилери акша-мөңгүн ап, төлгелеп турар-дыр .
Ооң кадында Дээрги-Чаяакчыга даянып:
«Дээрги-Чаяакчы бистиң аравыста эвес чүве бе?
Бисти айыыл-халап таварбас!» – дижирлер .
12 Ынчангаш силерниң хайыңар-биле ·Сионну шөл ышкаш аңдарып кааптар ,
Иерусалим бузундулар оваазы апаар,
Бурганның өргээзин туткан даг арга-ыяш үнген чер апаар .
Дээрги-Чаяакчының даа
(Иса. 2:2-4)
41 Сөөлгү хүннер кээрге, Дээрги-Чаяакчының өргээзи турар дагны
Ол өске бүгү тейлер, даглардан бедидир тургузуп каар;
өске аймактар ынаар чедип кээр,
2 эңдерик чоннар аңаа чыглып кээр .
Олар бот-боттарынга: «Барып, Дээрги-Чаяакчының даанче,
Иаковтуң Бурганының өргээзинче үне берээли .
Бурган бисти Ооң оруктары-биле чоруурунга өөредип каар,
бис Ону эдерер бис» – дижир.
·Сиондан ыдыктыг хоойлу дүжүп кээр,
Иерусалимден Дээрги-Чаяакчының сөзү тараар.
3 Аймактарның херээн Ол шиитпирлээр,
ырак чурттарда күштүг чоннарның чаргы-чаалызын Ол үзер.
Олар боттарының хылыштарын андазыннарже,
чыдаларын – хол кадыырларынче эде соп кылып аар .
Бир чон өске чонга удур хылыш көдүрбес,
олар моон соңгаар дайын чорударынга өөренмес .
4 Кижи бүрүзү бодунуң виноградын, бодунуң фига ыяжын
болбаазырадып, тайбың чурттаар ,
оларны моон соңгаар кым-даа коргудуп-дүвүретпес ,
чүге дээрге Аг-шериглиг Дээрги-Чаяакчы ынча деп чугаалаан болгай.
5 Бүгү өске чоннар боттарының бурганнарының аайы-биле чурттап турар ,
а бис кезээ мөңгеде Бурганывыс Дээрги-Чаяакчының аайы-биле чурттаар бис.
Дээрги-Чаяакчының бодалы
6 «Ол хүн Мен аскак-бүскек чонну чыыптар мен – деп, Дээрги-Чаяакчы медеглээн. –
Шөлүттүрген улусту, Мээң оларже айыыл-халап ытканым улусту
чыглыр кылыптар мен .
7 Аскак-бүскек чондан Израильдиң артынчызын тургузар мен,
ойлаттырган улусту күштүг чон кылып каар мен.
Шак ол хүнден эгелээш, Дээрги-Чаяакчы мен оларны
·Сион дагдан кезээ мөңгеде чагырар мен.
8 А сеңээ хамаарыштыр, Сион тей.
Сен Бурганның Бодунуң чонун, кадарчы кижи кодан малын хайгаарааны дег,
көрүп турар суургазы сен.
Биеэги эрге-чагыргаң сенче эглип кээр,
Иерусалимге катап база күрүне доктаап турар.
9 Сен чүү дээш алгырып тур сен? Хааның чок чүве бе?
Сээң чөвүлекчиң чок апарган бе?
Божуп чыдар херээжен дег, аарышкыга алзып чооруң ол?
10 ·Сион-кыс, божуп чыдар херээжен дег, хилинчектенип, човуурта,
чүге дээрге сен ам хоорайны каапкаш, ажык шөлге турумчуп аар сен,
Вавилонче чеде бээр сен .
Ооң соонда аңаа камгалал алыр сен,
Дээрги-Чаяакчы сени аңаа дайзыннар холундан хостап аар.
11 Ам сеңээ удур хөй чоннар чыглып келгеш:
„Ол бужартазын! Бистиң карактарывыс ·Сионнуң буураарын
мага хандыр көрүп алзын!“ – дижип турар-дыр.
12 Ынчалза-даа ол чоннар Дээрги-Чаяакчының бодалдарын билбейн турар-дыр .
Бурган оларны тараа шаңынга моожалар дег чыып алган,
а олар Ооң бодаан чүүлүн угаап билбээн-дир.
13 Көдүрлүп келгеш, ол моожаларны таптай бастыр-ла, ·Сион-кыс;
Мен сени демир мыйыстыг , хүлер дуюгларлыг буга дег кылып каар мен,
хөй чоннарны чылча шавар сен.
Оларның эт-хөреңгизин Дээрги-Чаяакчыга,
оларның байлаан – бүгү чер-делегейниң Чагырыкчызынга бараалгадыр сен ».
Вифлеемге төрүттүнер ужурлуг чагырыкчы
51 Аг-шериглиг хоорай, аг-шерииңни белеткеп ал,
бис бүзээлеттирип алган-дыр бис.
Израильдиң ·баштыңы чаагынче шыкпыыш-биле соктурар-дыр.
2 «А сен, Вифлеем-Эфрата ,
Иудеяның төрел бөлүктериниң аразында чөгенчиг суур-даа болзуңза,
Израильдиң чагырыкчызы апаар кижи сенден үнүп , Мээңии боор-дур.
Ооң ызыгууру эрте-бурун шагда, үе-дүпте-ле укталган-дыр».
3 Бурган израиль чонну кезек үеде кааптар.
А иштиг херээжен демги чаш төлдү божуп аарга,
израиль чонче оларның арткан ха-дуңмазы ээп кээр.
4 Израильдиң чагырыкчызы туруп келгеш,
коданын Дээрги-Чаяакчының күжү-биле,
бодунуң Бурганы Дээрги-Чаяакчының алдарлыг ады-биле кадарар .
Чон ынчан айыыл чок чурттаар ,
чүге дээрге чагырыкчының өндүр ат-алдары чер-делегейниң ужу-кыдыынга чедир нептерээр .
5 Чагырыкчы чонга амыр-тайбыңны хайырлаар .
Бистиң чуртувусче ассирийлер кирип келгеш,
ордуларывысты таптаар болза,
оларга удур чеди азы сес баштыңчыны көдүрер бис.
6 Олар Ассирияның черин хылыш-биле чагырар,
Нимродтуң черин хынындан ужулган хылыш-биле чагырар.
Бир эвес ассирий аг-шериг чуртувустуң кызыгаарын үреп кирип кээр болза,
чагырыкчывыс бисти Ассириядан камгалаар.
7 Израиль чоннуң артынчызы хөй чоннар аразынга
Дээрги-Чаяакчының дүжүргени шалың, оът-сигенде элбек чаъс-чайык суу дег боор;
олар улуска идегевес, кижи амытанга ынанмас.
8 Израиль чоннуң артынчызы өске чоннар аразынга,
хөй аймактар аразынга черлик аң-мең аразында арзылаң дег,
кодан хойлар аразында аныяк арзылаң дег болур –
ол халып үнгеш, оларны кемдедип, үзе-чаза тыртар,
кым-даа оон адырып шыдавас.
9 Сээң холуң дайзыннарыңга удур көдүрлүр,
сээң бүгү өжээтеннериң кырдырып аар.
10 «Ол хүн сээң аъттарыңны узуткап,
·дайынчы тергелериңни үреп каар мен – деп, Дээрги-Чаяакчы медеглээн. –
11 Сээң чериңде хоорайларны узуткап, бүгү шивээлериңни үреп бузуп каар мен .
12 Караң көрнүр чорууңну узуткап каар мен –
чонуңнуң аразынга төлгелээр улус артпас .
13 Сээң дүрзү-бурганнарыңны, ыдыктыг көжээлериңни узуткап каар мен –
бодуңнуң холуң-биле кылып алган чүүлдериңге моон соңгаар мөгейбес сен .
14 ·Ашера бурганга тураскааткан адагаштарны тура тыртып ,
сээң хоорайларыңны үреп бузуп каар мен.
15 Мени тооп дыңнавайн барган чоннарга килеңнеп,
ажынып-хорадап, олардан өжээн негээр мен».
Дээрги-Чаяакчының израиль чон-биле чаргызы
61 Дээрги-Чаяакчының чугаалаар чүвезин дыңнаңар.
Чон база туруп келгеш, дагларның мурнунга херээн чугаалазын,
тейлер ооң сөзүн дыңназын.
2 Даглар, чер-делегейниң быжыг үндезиннери,
Дээрги-Чаяакчының чаргызын дыңнаңар .
Чүге дээрге Ол Бодунуң чону-биле чаргылдажып турар-дыр ,
Израиль-биле Ол маргыжып турар-дыр:
3 «Мээң чонум, сени Мен канчапкан мен?
Чүнүң-биле сээң шыдамыыңны шенедим?
Меңээ харыылап көр.
4 Мен сени египет черден үндүре берген мен,
кулданыышкындан хостап каан мен.
Моисей, Аарон болгаш Мариам оларны сени баштаар кылдыр чоруткан мен .
5 Мээң чонум, Моавтың хааны Валактың чүнү бодап алганын,
Беорнуң оглу Валаамның аңаа чүү деп харыылаанын сактып кел ,
Ситтимден Галгалга чедир орууңну бодап кел.
Дээрги-Чаяакчының чөптүг херектерин билип алыңар».
6 Чүнүң-биле Дээрги-Чаяакчының мурнунга кээр мен,
Дээди Өрүкү Бурганның мурнунга чүнүң-биле кээп мөгеер мен?
Ооң мурнунга бүрүн өрттедир өргүлдерлиг,
бир харлыг бызааларлыг кээр мен бе?
7 Муң-муң кошкарлар-биле, эмге-тикчок хемнер дег аккан олива үзү-биле
Дээрги-Чаяакчының күзелин хандырып болур бе?
Кем-буруум дээш Аңаа дун оглумну өргүүр мен бе,
сагыш-сеткилимниң бачыды дээш иштимден үнген үре-төлүмнү бээр мен бе?
8 О, кижи амытан, Бурган сеңээ Ооң экизинер чүүлү чүдел дээрзин чугаалап каан ийик.
Дээрги-Чаяакчы сенден чүнү негеп турар ийик :
ажыл-херектериңге чөптүг бооруңну,
энерел көргүзеринче чүткүлдүг бооруңну болгаш
Бурганыңның мурнунга томаарып чурттаарыңны эвес чүве бе?
Израильдиң кем-буруузу болгаш кеземчези
9 Дээрги-Чаяакчы хоорайны кыйгырып тур
(мерген угаан дээрге Сээң адыңдан коргары болгай):
«Чагырга мергезин база ону тургузуп каан Бурганны тооп дыңнаңар .
10 Бузуттуг улустуң бажыңында байлакты
багай үүлгедиг-биле чедип алган эвес чүве бе?
Эвээжедип каан, каргаттырган хемчээл ажыглап турар эвес чүве бе?
11 Шын эвес деңзилер, меге хемчээлдер ажыглаар кижини агартыр мен бе?
12 Сээң байларың каржы-дошкун-дур ,
чурттакчыларың меге чүве чугаалаар-дыр,
оларның аксындан чүгле меге үнер-дир .
13 Ол дээш, Мен сээң когуң үзүп эгелээн мен,
бачыттарың дээш сени хоозурадып эгелээн мен.
14 Чемненгеш-даа, тотпас сен, ишти-хырның куруг болур ;
чыып шыгжааш-даа, камнап ап шыдавас сен:
камнап шыдаптар-даа болзуңза,
ол чүвеңни хылышка хүлээдип бээр мен.
15 Тарып олурткаш-даа, дүжүт ажаап албас сен,
оливкаларны сыскыргаш-даа, үзү-биле чагдынмас сен;
виноград чулуун сы баскаш-даа, арага ишпес сен .
16 Омри хаанның чаңчылдарын,
Ахав хаанның өг-бүлезиниң бүгү бузуттуг херектерин
хевээр арттырып алган сен,
оларның сүмелерин ёзугаар кылып турган сен .
Ынчангаш Мен хоорайны хоозуралга,
ооң чурттакчыларын – бак атка киреринге таварыштырар мен;
силер өске чоннарның дорамчылалынга таваржыр силер ».
Чоннуң бужар байдалы
71 Аа халак! Мен ам чайгы чимистерни чыып каапкан соонда,
виноградты ажаап каапкан соонда келген кижи дег апардым –
чипки дег чаңгыс-даа салбак кат чок,
мээң чиксээрим чаңгыс-даа бышкан фига чимизи чок .
2 Чер кырында Бурганга бердинген кижилер артпаан,
улус аразында чөптүг кижилер чок .
Бүгү улус хан төгер дээш кедег кылып турар,
кижи бүрүзү ха-дуңмазынга какпа-дузак салып турар .
3 Оларның холдары бузут үүлгедир талазы-биле мергежээн;
чагырыкчы кижи белектер негеп турар,
шииткекчи хээли ап турар ,
бай-шыдалдыглар боттарының күзел-соруун албадап күүсеттирер –
олар шупту аразында дугуржулгалыг.
4 Оларның эң дээрези – тенниг хараган дег, эң чөптүү – тенниг бок үнүштен дора .
Оларже медээчилериниң медеглеп турган хүнү келген-дир;
олар ам кеземчеге онаажыр, олар ам дүвүрелге алзыптар.
5 Өңнүүңерге бүзүревеңер, эжиңерге ынанмаңар.
Хойнуңда чыдар кадайың-биле безин оваарымчалыг чугаалаш .
6 Чүге дээрге оглу адазын куду көөр-дүр,
уруу – авазынга, кенни – кунчуунга удурланыр-дыр,
кижиниң дайзыннары – ооң өг-бүлезинде боор-дур .
7 А меңээ хамаарыштыр алыр болза, Дээрги-Чаяакчыже ынаныштыг көөр мен,
мээң Камгалакчым Бурганны манаар мен .
Бурганым мени дыңнап каар.
Израильдиң катап тургустунары
8 Дайзыным, буурааным дээш өөрүве!
Барып ушкан-даа болзумза, база катап туруп кээр мен .
Караңгыда олурар-даа болзумза, Дээрги-Чаяакчы меңээ чырык апаар .
9 Дээрги-Чаяакчының килеңин чүктээр ужурлуг мен,
чүге дээрге Аңаа удур бачыт үүлгеткен мен.
Бурган мээң таламда апарбаан шаанда,
меңээ болчуп эгелевээн шаанда, ындыг болур.
Оон Ол мени чырыкче үндүрүп каар ,
мен Ооң шынныын көрүп каар мен.
10 Дайзыным база ону көрүп каар;
меңээ: «Сээң Бурганың Дээрги-Чаяакчы кайыл?» – деп турган болгаш ,
ооң ады баксыраар.
Мен ооң кудумчуда малгаш дег таптадып турарын мага хандыр көөр мен .
11 Иерусалим, сээң ханаларыңны тудар, кызыгаарларыңны делгемчидер хүн кээр.
12 Ол хүн улузуң Ассириядан-даа, Египеттиң хоорайларындан-даа,
Евфрат хемден-даа, далайлар, даглардан-даа сенче чедип кээр .
13 А чер-делегей ооң чурттакчыларының үүлгедиглери дээш хоозуралга таваржыр.
Бурганның Израильге өршээлдии болгаш аңаа шынчызы
14 Бодуңнуң чонуңну шыкпыыжың-биле кадарып көрем .
Сээң өнчүң болур кодан хой шырыштарда аңгы чурттап чоруур-дур,
а долгандыр дүжүткүр одар-белчиирлер бар-дыр.
Хойларың, шаг шаанда ышкаш,
Васан биле Галаад деп эки черлерге оъттазын .
15 Египет черден үне берген үеңде ышкаш,
кайгамчык чүүлдериңни биске көргүзүп көрем .
16 Өске чоннар ону көрүп кааш,
боттары чеже-даа күчү-күштүг болза, бак атка кирер .
Олар аксын холу-биле дуглап аар ,
оларның кулактары дүлейлеп каар.
17 Олар, чылан ышкаш, черде соястаан курттар дег, довурак чылгаар ,
боттарының быжыглалдарындан сириңейнип союп үнүп кээр ,
бистиң Бурганывыс Дээрги-Чаяакчы сенче эглип кээр,
Сенден коргуп-сүртээр.
18 Сен ышкаш өске Бурган бар бе?
Сен бачытты өршээп турар сен,
Бодуңнуң чонуңнуң артынчызының кем-буруузунче көрбейн турар сен.
Мөңгези-биле килеңневес-тир сен ,
чүге дээрге энерел көргүзери Сеңээ таарымчалыг-дыр .
19 Бурганывыс, Сен биске база катап ээ-хайыралыг боор сен;
бистиң бачыттарывысты таптап кааптар сен,
бүгү кем-буруувусту дүп чок далайже октаптар сен .
20 Бистиң ада-өгбевиске шаг шаанда даңгыраглааның дег ,
Иаковтуң салгалынга шынчы боор сен,
Авраамның ук-салгалынга энерелдиг боор сен.