Малахия медээчиниң ному
Киирилде
Малахия дээрге «Мээң төлээм» дээн уткалыг ат. Ол болза хуу ат эвес, а бижилгеге адын салбаан авторнуң шолазы чадавас. Номнуң бижиттинген үези бистиң эрага чедир V век болгу дег.
Израиль чоннуң бир кезии Вавилонга туттуруушкундан ээп келгеш, Иерусалимде Бурганның өргээзин катап тургузуп каан-даа болза, израиль чон Бурганның олче сагыш салып турарынга чигзинип турган. Чон аразында, Бурганның бараалгакчыларының аразында безин, Бурганга мөгейип, бараан болурда, тоомча чок, салдынчак чорук бар апарган. Оларның өргүлдери Дээрги-Чаяакчыга төлеп чок болуп, а амыдыралы Ооң хоойлузунга дүүшпейн турган.
Малахияның кол сорулгазы – Дээрги-Чаяакчының өндүр улуг ынакшылын чонга сагындырары база Бурган биле Израильдиң аразында чарган чагыг-керээге шынчы чоруун база катап көргүзеринче улус-чонну кыйгырары. Ол оон ыңай Дээрги-Чаяакчы Бодунга орук белеткеп бээр кылдыр Бодунуң төлээлекчизин айбылап чорудар деп аазап турар. Бурган чедип келгеш, чөптүг чорукту катап тургузуп, бузуттуг-бак улусту кезедир база чонну бачыттан арыглаар.
11 Өттүр билген медеглел. Дээрги-Чаяакчының израиль чонга Малахияны дамчыштыр ажыткан сөзү.
Бурганның Израильге онза ынаа
2 Дээрги-Чаяакчы: «Мен силерге ынак мен» – деп чугаалады .
А силер: «Сээң биске ынакшылың чүден көстүп турарыл?» – дээр-дир силер.
«Иаков биле Исав ийистер эвес чүве бе? – деп, Дээрги-Чаяакчы харыылады. – Ындыг-даа болза, Иаковка ынак мен, 3 а Исавка хөңнүм чок . Мен Исавтың даглыг чуртун хоозурадып кагдым, ооң ээлээн черин ээн кургаг хову кылдыр хуулдуруп, шөө-бөрүлерге бериптим ».
4 Эдом чурттуглар: «Бис чылча шаптыртывыс, ынчалза-даа хоозураан чуртувусту катап тургузуп аар бис» – деп тургай аан. А Аг-шериглиг Дээрги-Чаяакчы: «Олар катап тудуп аар-даа болза, Мен үрегдеп каар мен . Оларның чуртун бузуттуг чер деп адаар, а боттарын Дээрги-Чаяакчының кезээ шагда килеңнээни чон деп адаар. 5 Силер боттарыңар ону көрүп кааш: „Дээрги-Чаяакчы Израильдиң кызыгаарларындан дашкаар-даа өндүр бедик!“ – деп чугаалаар силер» – диди.
Бурганга төлеп чок өргүлдер
6 «Оглу адазын, а чалча кижи – дээргизин хүндүлээр. Бир эвес Мен Адаңар болзумза , Меңээ хүндүткелиңер кайыл? Бир эвес Мен Дээргиңер болзумза, чүге Мени хүндүлевес силер?» Бурганның адын баксырадып чоруур бараалгакчылар , Аг-шериглиг Дээрги-Чаяакчының силерге чугаалаан чүвези ол-дур.
А силер: «Сээң адыңны канчаар баксыраттывыс?» – деп тур силер.
7 «Силер Мээң өргүл салыр бедигээжимче бужартадып каан аъш-чем эккеп салыр-дыр силер».
А силер: «Бис Сени чүнүң-биле бужартадып кагдывыс?» – деп тур силер.
«Дээрги-Чаяакчыга өргүл салыр бедигээшти херекке албайн барып болур деп санаар-дыр силер. 8 Өргүл кылыры-биле согур малдар эккээр-дир силер, ол кем-буруу эвес бе?! Аскак-бүскек, аарыг мал эккээр-дир силер, ол кем-буруу эвес бе?! Ындыг малды чагырыкчыга аппарып бээрин шенеп көр даан! Ол таарзынар деп бе, сенче ээ көрнүр деп бе?» Аг-шериглиг Дээрги-Чаяакчының чугаалаан чүвези ол-дур.
9 «„Бурган чонувусту өршээр кылдыр, Аңаа чаннып, мөргүңер че“ – деп турар-дыр силер. Ынчалза-даа силерниң холуңардан ындыг өргүлдер кээп турда, Ол силерже ээ көрнүр деп бе?» Аг-шериглиг Дээрги-Чаяакчының чугаалаан чүвези ол-дур.
10 «Силерниң кайы-бирээңер Бурганның өргээзиниң хаалгазын хаап каан болза эки боор. Ынчан Меңээ өргүл салыр бедигээшке хей черге от кывыскан херээ чок боор ийик. Силер Мээң сеткилимге кирбес-тир силер – деп, Аг-шериглиг Дээрги-Чаяакчы чугаалаан. – Мен силерниң холуңар салган өргүлге таарзынмас мен . 11 Мээң адым хүн үнер чүктен хүн ажар чүкке чедир өске чоннар аразынга өндүр бедик . Каяа-даа Мээң адымга тураскааткан чаагай чыттыг чүүлдер кыпсыр, ·арыг өргүлдер кылыр, чүге дээрге Мээң адым ол чоннар аразынга өндүр бедик ». Аг-шериглиг Дээрги-Чаяакчының чугаалаан чүвези ол-дур.
12 «А силер Мээң адымны баксырадып: „Дээргиге өргүл салыр бедигээш чаржынчыг-дыр“ – деп турар-дыр силер, аңаа салган аъш-чемни херекке албайн барып болур деп санаар-дыр силер. 13 Силер: „Кандыг кончуг берге үүле боор!“ – дээш, Мени херекке албас-тыр силер – деп, Аг-шериглиг Дээрги-Чаяакчы чугаалаан. – Оорлап алган , аскак азы аарыг малды өргүл кылдыр эккеп салырыңарга, ындыг өргүлдү Мен силерниң холуңардан хүлээп аар мен бе? – деп, Дээрги-Чаяакчы чугаалаан. – 14 Коданында эки эр малдыг, оозун Дээргиге өргүүр бооп даңгыраглапкан, а оон өргүл кылдыр четпес-дудуу мал эккеп салган кара сагыштыг кижи каргаттырар! Мен – өндүр улуг Хаан болгай мен , бүгү чоннар аразында Мээң адым ханы хүндүткелдиг ».
Аг-шериглиг Дээрги-Чаяакчының чугаалаан чүвези ол-дур.
Бурганның бараалгакчыларын чемелээни
21 «Бурганның бараалгакчылары , силерге ам бээр айтыышкыным бо-дур: 2 Мээң адымны алдаржыдыңар. А бир эвес Мени тооп дыңнавас база Мээң адымны алдаржыдарын чүрээңерге хүлээп албас болзуңарза, Мен силерже каргыш ыдар мен , силерниң алгыш-йөрээлиңерни каргыш кылдыр хуулдуруптар мен – деп, Аг-шериглиг Дээрги-Чаяакчы чугаалаан. – Каргап эгелей бердим, чүге дээрге силер Мээң адымны алдаржыдарын чүрээңерге хүлээп албаан-дыр силер.
3 Силерниң үре-салгалыңарны кезедир мен . Байырлалдарда өргээн малыңарның чинин арыннарыңарже хөме чашканнап кааптар мен, силерни ол чин-биле кады үндүр октаптар мен . 4 Мээң Левийден укталган аймааңар-биле чарган чагыг-керээм күштүг бооп артсын дээш, силерге ол айтыышкынны бергенимни билип алыңар – деп, Аг-шериглиг Дээрги-Чаяакчы чугаалаан. – 5 Мээң Левийниң аймаа-биле чарган чагыг-керээм силерге эки-чаагай амыдыралды бээр ужурлуг турган, ол бүгүнү Мен хайырладым-даа. Левиттер Менден коргар ужурлуг турган, ынчангаш Менден коргуп, Мээң адымны ханы хүндүлеп турган. 6 Левийниң салгакчылары алыс шын өөредигни чугаалап турган, оларның аксындан меге сөс үнмээн. Олар Меңээ туралыы-биле, шынныы-биле бараан болуп турган, хөй улусту бачыттан чайлаткан .
7 Бурганның бараалгакчызының аксы-сөзү угаан-билигни кадагалаар ужурлуг , ынчан улус ооң чугаа-сөзүнден өөредигни дыңнаксаар , чүге дээрге ол – Аг-шериглиг Дээрги-Чаяакчының төлээлекчизи-дир. 8 А силер ол оруктан өскээр барган-дыр силер, боттарыңарның өөредииңер-биле хөй улусту буураткан-дыр силер. Левийниң аймаа-биле чарган чагыг-керээмни үрээн-дир силер – деп, Аг-шериглиг Дээрги-Чаяакчы чугаалаан. – 9 Ынчангаш Мен силерни бүгү чоннуң мурнунга чөгенчиг, куду көрдүрген улус кылып каан мен, чүге дээрге силер Мээң оруктарым эдербээн-дир силер, ыдыктыг хоойлуну ажыглаарда, улусту ылгай көрүп турган-дыр силер ».
Иудейлерниң боттарының кадайларынга шынчы эвес чоруу
10 Бис шуптувус чаңгыс Адалыг эвес бис бе? Бисти чаңгыс Бурган чаяап каан эвес чүве бе? А чүге бис Ооң ада-өгбевис-биле чарган чагыг-керээзин үреп, бот-боттарывыска кара сагыштыг болганывыс ол?
11 Иудейлер кара сагыштыг болган-дыр. Израиль чоннуң аразында, Иерусалим хоорайда чүдек-бужар чүве үүлгеттинип турар-дыр. Иудейлер Дээрги-Чаяакчының ынак ыдыктыг черин бужартаткан-дыр: олар өске бурганнарга мөгеер херээженнерге хандыкшып, өгленчип алган-дыр . 12 Аг-шериглиг Дээрги-Чаяакчы ынчаар кылып турар кижи бүрүзүн Израильдиң аал-ораннарындан чайладып каапсын, ындыг кижиге Аңаа өргүл кылыр арга бербес болзун!
13 Оон ыңай мындыг чүве кылып турар-дыр силер: Дээрги-Чаяакчыга өргүл салыр бедигээшче карак чажын хөме кудуп каапкан-дыр силер. Ыглап-сыктап, хомудап турар-дыр силер, чүге дээрге Дээрги-Чаяакчы силерниң өргүлдериңерже ам көрүнмейн турар-дыр, оларны силерниң холуңардан хүлээп албас апарган-дыр. 14 «Чүге ындыгыл?» – деп айтырып тур силер. Чүге дээрге Дээрги-Чаяакчы аныяаңда өгленишкен кадайың биле сээң араңарда херечи-дир: ол херээжен кижи сээң кыс эжиң, өгленчир дугайында дугуржулга ёзугаар кадайың-даа болза, сен аңаа шынчы эвес болган-дыр сен.
15 Бурган ашак-кадай улусту чаңгыс мага-боттуг, сагыш-сеткилдиг боор кылдыр чаяап каан болгай. А чүге Ол олар тудуш чаңгыс болзун деп күзээрил? Бурганга таарымчалыг үре-салгал ботталдырзын дээш. Ынчангаш силер сеткил-чүрээңерни кадагалаңар, кым-даа бодунуң аныяанда өгленишкен кадайынга шынчы чоруун үревезин. 16 «Бир эвес кандыг-бир кижи бодунуң кадайынга хөңнү чок апарып, ооң-биле чарлыр болза , ол кижи дерзии чорук-биле, хеви-биле дег, шыптынып аар – деп, Израильдиң Бурганы, Аг-шериглиг Дээрги-Чаяакчы чугаалаан. – Ынчангаш сеткил-чүрээңерни кадагалаңар, ындыг кара сагыштыг чорук кылбаңар ».
Бурганның чонну шын шиидер дээш кээри
17 Дээрги-Чаяакчыны чугаа-сөзүңер-биле бужургандырып алган-дыр силер . «Чүвүс-биле Аңаа бужурганчыг апарганывыс ол?» – деп айтырар-дыр силер.
«Дээрги-Чаяакчы бузут үүлгедип турар улусче эки көрнүп турар, Ооң сеткилинге ындыг улус кирип турар» – деп хыйланып турарыңар-биле база «Чөптүг шииткел кылыр Бурган кайыл?» – деп айтырып турарыңар-биле .
31 Аг-шериглиг Дээрги-Чаяакчы: «Көрүңер, Меңээ оруктан белеткеп берзин дээш, Мен Бодумнуң төлээмни мурнай чорудуп тур мен . Силерниң чүткүп турарыңар Дээрги Бодунуң өргээзинге хенертен чедип кээр, силерниң көрүксеп турарыңар чагыг-керээмни медеглээр төлээм мыя бо кел чыдыр» – деп харыылаан-дыр.
2 Ооң чедип кээр хүнүн кым шыдап эртерил? Ол көстүп кээрге, кым шыдажырыл? Ол эзилдирер от, саваң дег болур. 3 Ол мөңгүн арыглаар эзилдирикчи дег олуруп алгаш, Левийниң аймаан арыглап, оларны алдын-мөңгүн дег эзилдирип каар . Ынчан олар Дээрги-Чаяакчыга чөптүг өргүл кылыр. 4 Ынчан Иудея биле Иерусалимниң өргүлдери, шаандакы үеде-даа дег, эрткен чылдарда-даа дег, Дээрги-Чаяакчыга өөрүнчүг болур.
5 Аг-шериглиг Дээрги-Чаяакчы: «Мен силерге шииткел үндүрүп чедип кээр мен. Караң көрнүрлерге , кады чурттаан эжинге шынчы эвестерге, мегелеп даңгыраглаарларга , хөлечиктерниң ажыл төлевирин бербестерге , дулгуяк херээженнерни база өскүс кижилерни кызагдаарларга, даштыкы улустуң эргелерин казыырларга – Менден кортпас улуска удур саадал чокка херечилеп, оларның буруузун илередир мен» – деп чугаалаан.
6 Аг-шериглиг Дээрги-Чаяакчы: «Мен, Дээрги-Чаяакчы, өскерилбес мен . А силер Иаковтуң үре-салгалы болуп артпышаан-на болгай силер . Ада-өгбеңерниң үезинден-не Мээң дүрүмнеримни үреп, оларны сагывайн турган силер . Менче эглип келиңер, Мен база силерже эглип кээр мен » – деп чугаалаан.
А силер: «Канчап эглип кээр бис?!» – деп тур силер.
Бурганга хамааржыр чүүлдерни оорлап болбас
8 «Кижи Бурганга хамааржыр чүүлдерни оорлап болур бе? А силер Мээң чүүлдеримни оорлап турар-дыр силер».
«Сеңээ хамааржыр чүүлдерни канчаар оорлап турдувус?» – деп тур силер.
«Меңээ бээр ужурлуг бүгү чүвеңерниң оннуң бир кезээ-биле, өргүл-белектериңер-биле. 9 Силер – бүгү чон – каргаттырар силер , чүге дээрге Мээң чүүлдеримни оорлап турар-дыр силер. 10 Шыгжамырларже дүжүттүң оннуң бир кезээн бүрүнү-биле эккелиңер – Мээң өргээмге аъш-чем турзун – деп, Аг-шериглиг Дээрги-Чаяакчы чугаалаан. – Оон Мени шенеп көрүңер даан: дээрниң эжиктерин силерге ажыдып бербес-тир мен бе , силерже ачы-буянымны сыңырар чер чок кылдыр харамнанмайн бадырып бербес-тир мен бе? 11 Мен силерниң дүжүдүңерни хоралакчыларга чиртпес мен, шөлдериңерде виноград сыптарында чимис база черже кээп дүшпес – деп, Аг-шериглиг Дээрги-Чаяакчы чугаалаан. – 12 Ынчан бүгү чоннар силерни амыр-чыргалдыг деп адаар, чүге дээрге силерниң чериңер кайгамчык эки болур». Аг-шериглиг Дээрги-Чаяакчының чугаалаан чүвези ол-дур.
Бурган Бодунуң чөптүг-шынныын көргүзер
13 «Силер Меңээ удур кадыг сөстер чугаалап турдуңар» – деп, Дээрги-Чаяакчы чугаалаан.
А силер: «Бис Сеңээ удур чүнү чугааладывыс?» – деп тур силер.
14 Силер: «Бурганга бараан боорга, ажык чок-тур. Аг-шериглиг Дээрги-Чаяакчының дүрүмнерин сагып, Ооң мурнунга качыгдап ыглаан улус дег муңгарап чоруп тургаш, кандыг ажык-дуза алдывыс? 15 Бис ам бардам улусту амыр-чыргалдыг деп санаар-дыр бис. Бузуттуглар чедиишкинниг болуп тур, олар Дээрги-Чаяакчыга чөңгээлеп тура безин, кеземче чок артып каар-дыр» – деп турган силер .
16 А Бургандан коргар улус ол үеде аразында чугаалажырга, Дээрги-Чаяакчы оларже кичээнгей салып, дыңнап турган. Ынчаарга Дээрги-Чаяакчыдан коргар, Ооң алдар-адының дугайында бодаар улустуң аттарын киирген тураскаалдыг ном Ооң мурнунга бижиттинип турган.
17 «Олар Меңээ хамааржыр – деп, Аг-шериглиг Дээрги-Чаяакчы чугаалаан. – Мээң хөделип үнер хүнүмде олар Мээң улуг үнелиг өнчү-хөреңгим болур . Мен оларга, ада кижи аңаа бараан болуп турар оглунга дег, хайыралыг боор мен . 18 Ынчан силер Бурганга бараан болуп турар чөптүг-шынныг кижи биле Аңаа бараан болбайн турар бузуттуг кижиниң аразында ылгалды катап база билип каар силер ».
41 «Көрүңер, суугу ышкаш кызыдыр изидер үе кел чыдар-дыр. Бүгү бардам, бузуттуг улус кадып калган ыяш дег апаар, ол үеде оларны өрттедиптер – деп, Аг-шериглиг Дээрги-Чаяакчы чугаалаан, – олардан будуктар-даа, дазыл-даа артпас . 2 Ынчалза-даа силерге – Мээң адымны ханы хүндүлээр улуска – чөптүг чорукту эккээр хүн үнүп кээр, ооң херелдери экиртир эмнээр . Ынчан силер, челеден чежип салган бызаалар дег, дешкилеп ыңай болур силер, 3 бузуттуг улусту таптаар силер. Мээң хөделип эгелээр үемде олар силерниң будуңар адаанга бок-доозун дег апаар». Аг-шериглиг Дээрги-Чаяакчының чугаалаан чүвези ол-дур.
Түңнел сөс
4 «Мээң чалчам Моисейниң хоойлузун – ·Хорив дагга аңаа бүгү израиль чонга хамаарыштыр бергеним хоойлу-дүрүмнерни утпайн сактып чоруңар . 5 Дээрги-Чаяакчының өндүр улуг, коргунчуг шииткел хүнү чедип кээр бетинде, Мен силерже Илия медээчини чорудуптар мен . 6 Ол адаларның чүректерин ажы-төлүнче, а ажы-төлдүң чүректерин – адаларынче ээлдирер . Оон башка Мен келгеш, чер-чуртту бүрүнү-биле узуткап каар мен».