Иоил медээчиниң ному
Киирилде
Номунуң баштайгы ийи эгезинде Иоил медээчи бодунуң чуртунче шартылааның коргунчуг халдаашкынын тодарадып бижээн. Медээчи шартылаа дугайында Бурганның Бодунуң ыдыпканы, оруунга таварышкан бүгү чүвени узуткап турар дайзынның аг-шерииниң дугайында дег чугаалап турар. (Мында шартылааның овур-хевирин дамчыштыр ёзулуг аг-шеригниң халдаашкынын көргүскен деп удурланышкак бодал база бар.) Иоил израиль чонга боттарының бачыттарын минниринче Бурганның кыйгырыын база оларның менди-чаагай чоруун эгидип, оларны Бодунуң Сүлдези-биле бүргээр деп Ооң аазаашкынын дамчыдып турар.
Шартылааның халдаашкыны – Бурганның шииткелиниң хүнүнде болур чүвени баш бурунгаар көргүскени-дир (3-кү эге). Ол хүнде Дээрги-Чаяакчы бүгү чоннарга Ооң шилип алган чонунга чедирген хамык хора-багы дээш харыысалга онаар. Буруулуглар кеземче алыр, а Бурганның чону элбек ачы-буян алыр.
11 Дээрги-Чаяакчының Патуилдиң оглу Иоилге ажыткан сөзү бо-дур.
Мөөң шартылааның халдаашкыны
2 Ирейлер, дыңнаңар, чер-чурттуң бүгү чурттакчылары, кичээнгей салыңар!
Силерниң чурттап турар үеңерде азы ада-өгбеңерниң чурттап турган үезинде
ол ышкаш чүве болган бе?
3 Ол дугайында ажы-төлүңерге чугаалап бериңер,
а олар боттарының ажы-төлүнге дамчытсын,
а оларның ажы-төлү дараазынга салгалга чугаалап берзин .
4 Шартылаа чиген соонда арткан чүвени чаш шартылаа чип турган,
чаш шартылааның соонда арткан чүвени шерги чип турган,
а шергиниң соонда арткан чүвени чаш шерги төндүр чип каапкан .
5 Арагачылар, оттуп келгеш, ишкирнигип ыглаңар .
Виноград арагазы ижип турар бүгү улус,
ооң чулуунуң ажыын ажып, ыглаңар,
чүге дээрге ону силерниң аксыңардан хунаап алган-дыр.
6 Мээң черимче күштүг, санап четпес хөй чон келген-дир.
Ооң диштери – арзылаң диштери, азыглары – кыс арзылаңныы-ла .
7 Ол чон виноградым сыптарын хоозурадып каапкан,
фига ыяштарымны сыйып каапкан –
ооң чөвүрээзин карттап кааптарга, будуктары агарып калган.
8 Качыгдал хевин кеткен, ынак эжиниң ажыын ажып турар
кыс ышкаш ыглап-сыктаңар.
9 Дээрги-Чаяакчының өргээзинде далган-тараа болгаш арага өргүлү ам чок-тур.
Дээрги-Чаяакчының бараан болукчулары, Бурганның бараалгакчылары
качыгдап ыглажып тур.
10 Шөлдер хоозураан, чер ыглап чыдар ,
чүге дээрге тараа узуткаттынган,
виноград чулуу хайлып калган , олива ыяш кургап калган.
11 Тараачыннар, муңгараңар , виноград ажаакчылары, ишкирнигип ыглаңар.
Шөлдерде арбай, кызыл-тас чок болган-дыр,
12 виноград сыптары кургап, фига ыяштары кадып калган-дыр.
Гранат, пальма ыяштары болгаш яблонялар шупту
шөлде кургап калган-дыр,
ынчангаш кижи амытанның хөглээшкини соксаан-дыр .
Бурганга чаннырынче чонну кыйгырганы
13 Бурганның бараалгакчылары, качыгдал хевин кедип алыңар, ыглап-сыктаңар.
Өргүл бедигээжиниң мурнунда бараан болуп турар улус, ишкирнигип ыглаңар .
Мээң Бурганымның бараан болукчулары, чедип келгеш,
качыгдал хевин кеткеш, өргээге дүннү эрттириңер,
чүге дээрге Бурганыңарның өргээзинде далган-тараа болгаш арага өргүлдери ам чок-тур .
14 Ыдыктыг шээрлээшкинден доктаадыңар, онзагай чыыштан чарлаңар,
чоннуң ·баштыңнарын болгаш чурттуң бүгү чурттакчыларын
боттарыңарның Бурганыңар Дээрги-Чаяакчының өргээзинге чыылдырыңар,
дуза дилеп, Ону кыйгырыңар .
15 Аа халак! Дээрги-Чаяакчының шииткел хүнү чоокшулаан-дыр .
Ол хүннүң чедип кээри күчүлүг Бургандан келген хоозураашкын дег боор.
16 Бис көрүп турувуста-ла, аъш-чемивис чок апарып,
Бурганывыстың өргээзинден өөрүшкү биле хөглээшкин чиде берген эвес-тир бе?
17 Тараа үрезини чер иштинге бырыжып калган,
аңмаарлар үрелип, тараа урар черлер куруглаан,
чүге дээрге тараа ам чок-тур.
18 Мал-маганның човууртап турарын!
Өөр малдар муңгаргай тояап чоруур,
чүге дээрге оларның одар-белчиири чок.
Кодан хойлар база хилинчек көрүп турар.
19 Дээрги-Чаяакчы, мен дуза дилеп, Сени кыйгырып тур мен,
чүге дээрге ховуда одар-белчиирни от чипти,
шөлде бүгү ыяштарны чалбыыш өрттедипти .
20 Черлик дириг амытаннар безин Сеңээ чаннып тур ,
чүге дээрге дамырак суглар соглуп калган-дыр,
ховуда одар-белчиирни от чипкен-дир.
Бурганның аг-шерииниң халдаашкыны
21 ·Сионга трубадан этсиңер,
Бурганның ыдыктыг даанга дүвүрээзин медээзин бериңер .
Чер-чурттуң бүгү чурттакчылары сирилезин,
чүге дээрге Дээрги-Чаяакчының шииткел хүнү кел чыдар-дыр,
ол хүн чоокшулап келген-дир.
2 Ол дээрге кара булуттарлыг, дүмбей караңгы хүн-дүр .
Хөй санныг, күштүг чон имир ышкаш чаттылыпкан кел чыдыр .
Эрте-бурунгу үелерде-даа турбаан, келир салгалдарда-даа турбас чон ол-дур.
3 Ол чоннуң мурнунда хөме ап турар от бар,
а артында – өрттендир чип турар чалбыыш бар .
Ол бээр келбээнде, бо чер Эдемниң сесерлии дег турган ,
а ол келгеш баарга, кургап калган хову дег апаар.
Кым-даа ол чондан камгаланып шыдавас.
4 Ооң хевири аъттар хевири дег, ол халдып орда, чүгүрүк аъттар-ла .
5 Ол чон даглар бажы-биле ·дайынчы тергелер даажы дег шимээргеп,
чалбыыштыг оттуң оът-сигенде дазырааны дег шимээн үндүрүп,
тулчуру-биле чыскаалыпкан аг-шериг ышкаш халдып орар.
6 Ол аг-шеригни көргеш, өске чоннар сирилей бээр,
бүгү улустуң арыннары агарып каар .
7 Ол чон мөгелер дег маңнажып халдаар,
ханаларже дайынчылар дег халбактанып үнер.
Олар шупту чыскаалган аайы-биле чоруп,
бар чыдар уг-шиинден өскээр барбас .
8 Олар аразында баскылашпас, кайызы-даа чиге мурнунче бар чыдар;
чыскаалын үревейн, камгалалды өттүр чаза булгаар .
9 Олар хоорайже чүткүп кирип, ханаларны дургаар маңнажып,
бажыңнарже, оорлар ышкаш, соңгалар таварып кире бээр .
10 Оларның мурнунга чер сириңейнип, дээр чайганып,
хүн биле ай өжүп, сылдыстар чырытпастаар .
11 Дээрги-Чаяакчының үнү Ооң аг-шерииниң мурнунга дыңналыр,
Ооң аг-шерии дүк-түмен, Ооң сөзүнүң күүседикчилери күчү-күштүг.
Дээрги-Чаяакчының шииткел хүнү өндүр улуг болгаш аажок коргунчуг.
Ону кым шыдап эртерил?
Бурганның чонга Бодунче эглирин дужааганы
12 Дээрги-Чаяакчы: «Ам безин Менче бүгү чүлдү-чүрээңерден,
·шээрленип база ишкирнип ыглап тургаш, эглип келиңер » – деп медеглээн.
13 Качыгдалдан хевиңер эвес, чүректериңер чара тырткаш,
боттарыңарның Бурганыңар Дээрги-Чаяакчыже эглип келиңер,
чүге дээрге Ол килеңнээчел эвес, ээ көрнүүчел,
кээргээчел, өндүр улуг энерелдиг-дир ,
Ол аазаан кеземчезин күш чок болдурарынга белен.
14 Кым билир боор? Ол өскээр боданып, кезетпейн баарын,
харын силерге ачы-буянныг бооп артып каарын .
Ынчан Бурганыңар Дээрги-Чаяакчыга өргүүр далган-тараа биле арага четчир боор .
15 ·Сионга трубадан этсиңер ,
ыдыктыг шээрлээшкинден доктаадып, онзагай чыыштан чарлаңар .
16 Чонну бөлүп, ыдыктыг чыыштан кылыңар,
ирейлерни чалаңар, элээди, чаш уругларны кыйгырып эккелиңер .
Күдээ оол безин бодунуң өрээлинден,
келин кыс – өгленчир бажыңындан үнүп келзин.
17 Дээрги-Чаяакчының өргээзиниң мурнунда,
серилиг чер биле өргүл салыр бедигээш аразында турар
Бурганның бараалгакчылары ыглап-сыктап, мынча дишсин:
«Дээрги-Чаяакчы, Бодуңнуң чонуңга хайыраңны көргүзем,
Бодуңнуң өнчүң болур улусту бак сөглетпем,
бисти өске чоннар кыжырбазын;
чүге ол чоннар аразында: „Оларның Бурганы кайыл?“ – дижип турарыл? »
Израиль чонга ачы-буян кээр
18 Дээрги-Чаяакчы ынчан Бодунуң чери дээш хүннээчелин база
Бодунуң чонунга кээргелин көргүзер.
19 Дээрги-Чаяакчы Бодунуң чонунга мынча деп харыылаар:
«Мен силерже далган-тараа, чаа арага болгаш олива үзү чорудуп бээр мен –
ол бүгү-биле тодар силер,
моон соңгаар өске чоннарга силерни бак сөглетпес мен.
20 Мен соңгу чүктен келген аг-шеригни силерден ырадып,
куруг, кургап калган черже үндүр сывырыптар мен.
Оларның мурнукуларын чөөн чүкте далайже,
а соондагыларын – барыын чүкте далайже чорудуптар мен ,
оларның мөчү-сөөктеринден бак чыт үнер, хоралыг чыт тараар .
Чүге дээрге олар хөй бузутту үүлгеткен-дир ».
21 Чер-чурт, кортпа! Сен өөрүп-хөгле,
чүге дээрге Дээрги-Чаяакчы өндүр улуг чүүлдү кылыр-дыр .
22 Черлик дириг амытаннар, кортпаңар ,
чүге дээрге хову-шөлдерде одар-белчиирлер ногаарара берген-дир,
ыяштар чимизин берип турар-дыр,
фига ыяжы биле виноград сывы элбек дүжүт берип турар-дыр.
23 ·Сионнуң чону, өөрүңер,
боттарыңарның Бурганыңар Дээрги-Чаяакчыга хамааржырыңар дээш хөглеңер!
Ол силерге чөптүг-шынныы-биле чаъсты хайырлаар ,
ооң мурнунда дег, күскү, часкы чаъстарны хайырлаар .
24 Тараа шаңнарын дүжүт дола бээр,
доскаарларны чаа арага болгаш олива үзү чык дола бээр.
25 «Силерже ыдыпканым өндүр улуг аг-шериим болур
шартылаа биле шергиниң дүжүттү чип турган чылдары дээш ,
Мен силерге орнун тургузуп бээр мен .
26 Пөккүже чемненип, тода бээр силер,
Бурганыңар Дээрги-Чаяакчының адын алдаржыдар силер.
Мен силерни бодааш, кайгамчык чүүлдү кылдым,
Мээң чонум моон соңгаар кажанда-даа бак атка кирбес.
27 Ынчаарга Мээң израиль чоннуң аразында турарымны,
Мени – силерниң Бурганыңар Дээрги-Чаяакчы деп,
өске Бурган чок деп билип аар силер .
Мээң чонум моон соңгаар кажанда-даа бак атка кирбес».
Бурганның Бодунуң Сүлдезин бээри хүн
(Аж.-ч. 2:17-21)
28 «Ооң соонда мындыг боор:
Мен Бодумнуң Сүлдем-биле бүгү улусту бүргей аптар мен .
Силерниң оглу-кызыңар өттүр билип медеглеп эгелээр,
кырганнарыңар өттүр билген дүштер дүжээр,
аныяк оолдарыңар онзагай көстүүшкүннер көөр.
29 Ол хүннерде Мен эр, кыс чалчаларны безин
Бодумнуң Сүлдем-биле бүргей аптар мен.
30 Дээрге база черге кайгамчык бадыткал демдектери:
хан, от болгаш дүргектелген ышты көргүзер мен .
31 Дээрги-Чаяакчының өндүр улуг, коргунчуг шииткел хүнү чедип кээр бетинде
хүн дүмбей караңгы бооп, ай хан өңнүг бооп хуула бээр .
32 Ынчан Дээрги-Чаяакчының адын кыйгырган кижи бүрүзү камгалал алыр .
Дээрги-Чаяакчының аазаанын ёзугаар
·Сион дагга база Иерусалимге хоргадаан чон дириг артар ;
Дээрги-Чаяакчының Бодунче кыйгырып алган улузу өлбейн баар».
Иудеяның дайзыны чоннарны Бурганның шиидери
31 «Ол хүннерде, ол үеде,
кажан Мен Иудеяга база Иерусалимге эки чолду эгидипкенимде ,
2 Мен бүгү чоннарны чыггаш , Иосафат шынаазынга эккелгеш,
оларны аңаа Мээң чонум дээш, Мээң өнчүм болур Израиль дээш шиидер мен .
Чүге дээрге олар Мээң чонумну өске чоннар аразынга тарадып каапкан-дыр,
Мээң черимни үлежип алган-дыр.
3 Олар Мээң чонумну үлежип, төлге даштары октаан;
самыын-садар херээженнерге төлевир бээри-биле база арагалаары-биле
чонумнуң бичии оолдар, кыстарын кул кылдыр садып турган .
4 Тир, Сидон хоорайларның база бүгү филистим девискээрлерниң чурттакчылары ,
силер Меңээ чүү апарган силер?
Менден өжээн негээр деп тур силер бе?
Ынчаар-даа болзуңарза, Мен силерниң өжээн негээшкиниңерни
удавас боттарыңарның бажыңарже амыр-белен халдадыр мен.
5 Силер Мээң алдын-мөңгүнүмнү ап алган,
улуг үнелиг эртинелеримни боттарыңарның бурганнарыңарның өргээлеринче
ап алган-дыр силер .
6 Иудея биле Иерусалимниң улузун оларның төрээн чуртундан ырадыры-биле
гректерге садып турдуңар.
7 Көрүңер, Мен иудейлерни силерниң садып чорудупкан черлериңерден
көдүрүп эккээр мен, үүлгедииңерни боттарыңарның бажыңарже халдадыр мен.
8 Силерниң оглу-кызыңарны Иудеяның чонунга садыптар мен,
а иудейлер оларны ыракта Шеваның чурттакчыларынга садыптар».
9 Ол чоннар аразынга мону чарлап чугаалаңар:
дайынга белеткениңер!
Эрес-дидим дайынчыларны көдүрүңер!
Бүгү шериглер чоокшулап келзин, халдап кирзин.
10 Андазыннарыңарны хылыштарже,
хол кадыырларыңарны чыдаларже эде соп кылып алыңар .
Кошкак кижи безин: «Күш-шыдалдыг мен!» – дизин.
11 Бүгү чоннар, чер болгандан далаш-биле келиңер,
Шииткел шынаазынга чыглыңар.
О, Дээрги-Чаяакчы, дайынчыларыңны ынаар эдертип аппар!
12 «Бүгү чоннар оттуп келзин, Иосафат шынаазынче чедип келзин,
чүге дээрге Мен аңаа долгандыр турар чоннарны шиидери-биле саадап олурар мен .
13 Оларны, бышкан тараа дег, дүжүт ажаар херекселдер-биле кезип эгелеңер .
Барып, оларны виноград дег сы базыңар, арага доскаарларның эриин ажып турзун –
ол чоннарның бузут-багы кончуг улуг-дур.
14 Шииткел шынаазында эңдерик хөй чон мөөңнежип тур,
чүге дээрге Дээрги-Чаяакчының хөделип үнер хүнү
Шииткел шынаазынче чоокшулап келген-дир!
15 Хүн биле ай өжүп, сылдыстар чырытпастап турар-дыр .
16 Дээрги-Чаяакчы ·Сиондан диңмирээр, Иерусалимден дыңзыдыр алгырар ,
чер биле дээр сириңейни бээр.
Ынчалза-даа Дээрги-Чаяакчы Бодунуң чонунга хоргадаар чер болур ,
израиль чонга – шивээ болур.
17 Ынчан Мени силерниң Бурганыңар Дээрги-Чаяакчы деп,
Бодумнуң ыдыктыг даам ·Сионда чурттап турарымны билип аар силер.
Иерусалим ыдыктыг хоорай болур,
хары улус оон ыңай кажан-даа олче халдап келбес апаар .
18 Ол хүн виноград чулуу даглардан сыстып үнер,
тейлерден сүт агып бадар , Иудеяның бүгү хем уннары долу суглуг апаар .
Дээрги-Чаяакчының өргээзинден суг бажы аттыгып үнгеш ,
Ситтим шынааны суггарар .
19 Египет ээнзиреп каар . Эдом ээн кургаг хову апаар .
Иудеяның чонун каржы-дошкуну-биле аажылап,
ол черге буруу чок хан төп турганы дээш, ындыг болур.
20 Иудея мөңге чурттаар, Иерусалим салгалдан салгал дамчып амыдыраар .
21 Мен оларның ам-даа чуп бербээним ханын чуп кааптар мен .
Дээрги-Чаяакчы ·Сионга чурттаар!»