Аггей

Аггей медээчиниң ному

Киирилде

Бистиң эрага чедир 586 чылда Иерусалимде Бурганның өргээзин вавилон аг-шериг узуткап кааш, иудей чонну туттуруушкунче аппарган. Перстер Вавилонну эжелеп аарга, Персияның хааны Кир еврейлерге туттуруушкундан төрээн черинче чана бээрин 537 чылда чөпшээрээн соонда, олар Бурганга чаа өргээ тудуп эгелээн. Ынчалза-даа акша-хөреңги чедишпезинден база кожа чоннарның удурланганындан олар удавайн оралдажыышкынын ара соксап кааннар.

520 чылда Персия күрүнеге политиктиг хөлзээзин болуп турда, Бурган иудей чонче Бодунуң медээзин – Ооң өргээзин тудар дугайында айтыышкынны – медээчизи Аггейни (Захария медээчиниң үежизи) дамчыштыр чоруткан. Чон Аггейниң сөстерин тооп дыңнааш, тудугну эгелеп алган, а Бурган оларга Бодунуң ачы-буянын аазаан. Иудеяның тус чер чагырыкчызы Зоровавел (еврей хаан Давидтиң үре-салгалы) Бурган ону Ооң дузазы-биле өндүр улуг ажыл-херектер бүдүрер кижи кылдыр шилип алган деп медээ алган.

Дээрги-Чаяакчының өргээзин тудар үе келген!

¹ Дарий хаанның чагыргазының ийиги чылында , алды айның бирээде Дээрги-Чаяакчы Аггей медээчини дамчыштыр Бодунуң сөзүн Салафиилдиң оглу, Иудеяның чагырыкчызы Зоровавелге база Иоседектиң оглу, дээди бараалгакчы Иисуска ажыдып чугаалаан. ² Аг-шериглиг Дээрги-Чаяакчы: «Бо чон „Дээрги-Чаяакчының өргээзин тудар үе ам-даа келбээн“ дээр-дир» – деп чугаалаан. ³ Дээрги-Чаяакчы Аггей медээчини дамчыштыр Бодунуң сөзүн ажыдып: ⁴ «Мээң бо өргээм хоозурап бузулган турда, каас-коя дерээн бажыңнарга чурттаар үеңер келген деп бе?» – деп чугаалаан .

⁵ Ынчангаш ам Аг-шериглиг Дээрги-Чаяакчы: «Оруктарыңарже угаан-чүрээңер угландырып, боданыңар. ⁶ Хөй үрезин тарып турар силер, ынчалза-даа дүжүдүңер эвээш-тир ; чемненип турар, ынчалза-даа тотпас-тыр силер; ижип турар, ынчалза-даа суксунуңар ханмас-тыр ; кеттинип аар, ынчалза-даа чылыкпас-тыр силер; акша ажылдап аар силер, ынчалза-даа ооңар акша хавынга ызырынмас-тыр» – деп чугаалаан.

⁷ Аг-шериглиг Дээрги-Чаяакчы: «Оруктарыңарже угаан-чүрээңер угландырып, боданыңар. ⁸ Дагларже үне бергеш, ыяштан эккеп, өргээден тудуңар, Мен ол тудугже чүүлзүнүп көрүп, аңаа алдаржыыр мен» – деп чугаалаан. ⁹ Аг-шериглиг Дээрги-Чаяакчы: «Хөйнү манап турар, ынчалза-даа эвээшти ап турар-дыр силер. Дүжүдүңерни аалыңарже эккеп аарыңарга, Мен тарадыр хадыдып кааптар-дыр мен – деп медеглээн. – А чүге? Мээң өргээм хоозурап бузулган турда, силер шупту – кижи бүрүзү бодунуң бажыңы дээш сагыш човаарынга өй-дүр силер. ¹⁰ Ынчангаш-ла дээр хагдынып, силерже чаъс-шалыңын бадырбастаан, а чер дүжүдүн бербестээн . ¹¹ Чер кырынче, дагларже кааңнаашкынны кыйгырып ыттым – далган-тарааже, виноград чулуунче, олива үзүнче, черниң беримчези болур бүгү чүвеже, кижиже, мал-маганче, кандыг-даа ажылдың үре-түңнелинче кааңнаашкынны кыйгырып ыттым ».

Бурганның чаа өргээзин тудуп эгелээни

¹² Салафиилдиң оглу Зоровавел, Иоседектиң оглу, дээди бараалгакчы Иисус база арткан бүгү чон Дээрги-Чаяакчы Бурганының сөзүн, Ооң чорутканы Аггей медээчиниң дамчыткан сөстерин тооп дыңнаан . Чон Дээрги-Чаяакчыдан корткан. ¹³ Ынчан Дээрги-Чаяакчының айбылап чорутканы Аггей медээчи чонга: «Дээрги-Чаяакчы „Мен силер-биле кады мен! “ деп медегледи» – дээн. ¹⁴ Дээрги-Чаяакчы Салафиилдиң оглу, Иудеяның чагырыкчызы Зоровавелди, Иоседектиң оглу, дээди бараалгакчы Иисусту база арткан бүгү чонну сорук киирипкен. Олар шупту чыглып келгеш, боттарының Бурганы, Аг-шериглиг Дээрги-Чаяакчының өргээзинге ажылдап эгелээн. ¹⁵ Ынчан Дарий хаанның чагыргазының ийиги чылы, алды айның чээрби дөрт турган.

Чаа өргээниң келир үедеги өндүр-чаагайы

¹ Чеди айның чээрби бирде Дээрги-Чаяакчы Аггей медээчини дамчыштыр Бодунуң сөзүн ажыткан: ² «Салафиилдиң оглу, Иудеяның чагырыкчызы Зоровавелге , Иоседектиң оглу, дээди бараалгакчы Иисуска база арткан чонга мынча деп чугаала. ³ Силерниң араңарда бо өргээниң биеэги өндүр-чаагай хевирин көрген кижи арткан бе, ам ону көөрүңерге, кандыг-дыр? Чөгенчиг чүве бооп сагындырбас-тыр бе? ⁴ Ынчалза-даа ам сорук кирип көр, Зоровавел – деп, Дээрги-Чаяакчы медеглээн. – Иоседектиң оглу, дээди бараалгакчы Иисус, сен база сорук кирип көр; черниң бүгү чону, сорук кирип, ажылдап эгелеңер, Мен, Аг-шериглиг Дээрги-Чаяакчы, силер-биле кады болгай мен . ⁵ Египеттен үнүп чоруп туруңарда, силер-биле чарган Мээң чагыг-керээмни күүседиңер, Мээң Сүлдем араңарда бар хевээр-дир , ынчангаш кортпаңар!»

⁶ Аг-шериглиг Дээрги-Чаяакчы мынча деп чугаалаан: «Үр болбайн, Мен ам бир удаа дээр биле черни, далай биле кургаг черни силгиир деп тур мен . ⁷ Бүгү чоннарны база силгиир мен, ынчан олар үнелиг белектерин эккээр, бо өргээни чаагай байлак-биле долдурар мен!» Аг-шериглиг Дээрги-Чаяакчының чугаалаан чүвези ол-дур. ⁸ «Бүгү мөңгүн – Мээңии, бүгү алдын – Мээңии! – деп, Аг-шериглиг Дээрги-Чаяакчы медеглээн. – ⁹ Бо өргээниң өндүр-чаагайы биеэги өргээниң өндүр-чаагайындан улгады бээр. Мен бо черге амыр-тайбыңны доктаадыр мен». Аг-шериглиг Дээрги-Чаяакчының медеглээн чүвези ол-дур.

Бурганның ачы-буян хайырлаары чоннуң арыындан хамааржыр

¹⁰ Дарийниң чагыргазының ийиги чылында, тос айның чээрби дөртте Дээрги-Чаяакчы Аггей медээчиге Бодунуң сөзүн ажыдыпкан: ¹¹ «Аг-шериглиг Дээрги-Чаяакчы ыдыктыг хоойлуга хамааржыр дараазында чүүлдү бараалгакчылардан айтырып көр деп тур: ¹² „Бир эвес кандыг-бир кижи ыдыктап каан эътти хевиниң эдээнге ораап алгаш чорааш, эдээ-биле далган-тараага, быдаага, арагага, үске азы өске-бир аъш-чемге дээпкен болза, ол аъш-чем база ыдыктыг апаар бе?“»

Аггей ону айтырарга, Бурганның бараалгакчылары: «Чок» – деп харыылаан.

¹³ Аггей оон: «Бир эвес кандыг-бир кижи өлүг кижиге дегген соонда, ·арыг эвес апаргаш, ол бүгү аъш-чемге дээптер болза, аъш-чем база арыг эвес апаар бе?» – деп айтырган. А бараалгакчылар: «Арыг эвес апаар» – деп харыылаан . ¹⁴ Аггей ынчан Дээрги-Чаяакчының бо медеглелин дамчыткан: «Бо чон ындыг-дыр, бо улус Мээң мурнумга ындыг-дыр, оларның ажаап ап турар дүжүдү ындыг-дыр. Ол улустуң эккеп салып турар өргүлдери шупту ·арыг эвес-тир .

¹⁵ Ынчангаш амдыгааштан эгелээш, бо чүүлдү утпайн көрүңер. Дээрги-Чаяакчының өргээзиниң таваанга чаңгыс-даа даш салдынмаан турда, байдалыңар кандыг турган ийик? ¹⁶ Бир хөпээнден чээрби хемчээл хире тараа чыып аар бодап чедип келген улус чүгле он хемчээл хирени чыып ап турду; арага дозар савадан бежен хемчээл хирени узуп аар бодап чедип кээрге, чүгле чээрби хемчээл хире арага бар боор турду. ¹⁷ Чүге дээрге Мен үнүш-дүжүдүңерже өрттендир чиир изиг хат биле дүдүк салып, тарып алган дүжүдүңерже долу чагдырып, силерни кезедип турдум . Ынчалза-даа силер Менче эглип келбедиңер – деп, Дээрги-Чаяакчы медеглээн. – ¹⁸ Амдыгааштан эгелээш, Дээрги-Чаяакчының өргээзиниң таваан салганыңар хүн – тос айның чээрби дөрттен ыңай бо чүүлдү утпайн чоруңар. ¹⁹ Аңмаарларда үрезин ам-даа бар-дыр бе? Бо өйге чедир виноград сывы, фига биле гранат ыяжы, олива-даа дүжүт бербейн келди чоп. А бо хүнден эгелээш, Мен силерге ачы-буянны хайырлаар мен ».

Бурганның Зоровавелге аазаашкыны

²⁰ Дээрги-Чаяакчы Аггейге ол-ла айның чээрби дөртте Бодунуң сөзүн база катап ажыдып чугаалаан: ²¹ «Иудеяның чагырыкчызы Зоровавелге мону дамчыт. Мен дээр биле черни силгиир деп тур мен; ²² дүжүлгелерде саадаан хааннарны дүжүрер мен, өске чоннар күрүнелериниң күчү-күжүн узуткап каар мен , ·дайынчы тергелерни башкарган улузу-биле катай ойтур октаптар мен, аъттарны-даа, мунукчуларын-даа чок кылып каар мен , ха-дуңма-даа кижилер бирээзи өскезин хылыш-биле шанчып каар ». ²³ Аг-шериглиг Дээрги-Чаяакчы мынча дээн: «Салафиилдиң оглу Зоровавел, Мээң чалчам, ол хүн Мен сени Бодумнуң таңмалыг билзээм дег кылып аар мен , чүге дээрге Мен сени шилип алган болгай мен». Аг-шериглиг Дээрги-Чаяакчының медеглээн чүвези ол-дур.