Галатчыларга

Галатчыларга чагаа

Киирилде

Галатия деп девискээрде (амгы Турцияның бир кезээ) христиан ниитилелдерни Павел бодунуң баштайгы миссионержи аян-чоруунуң үезинде, бистиң эраның 40 чылдарының төнчүзүнде үндезилеп тургузуп каан.

Павел Галатиядан чоруй барган соонда үр болбайн, чаа христианнарга өске башкылар чедип келген. Олар Бурганның камгалалын алыр дизе, Моисейниң хоойлузун сагыыры база ·кыртыжап демдектээр ёзулалды кылыры эргежок чугула дээрзин өөредип турган. Оон ыңай олар Павелде Христос дугайында Буянныг Медээни тайылбырлаар база суртаалдаар эрге-күш шынында чок деп турган. Павел ол дугайында билип кааш, аажок хараадаан болгаш ол меге өөредигге удур демисежир дээш, Галатияда бүзүрээннерниң чаа үндезилээн ниитилелдеринге бо чагааны бижээн.

Чагаа каш кезектен тургустунган: 1) канчап Христостуң элчини апарганын Павелдиң тоожааны (1:1–2:10); 2) Бурган улуска камгалалды ыдыктыг хоойлуну сагааны дээш эвес, а Иисус Христоска бүзүрелиниң ачызында берип турарының бадыткалы (2:11–5:12); 3) Буянныг Медээниң ачызында Ыдыктыг Сүлде биле ынакшылга башкартып турар амыдыралды тодарадып бижээни (5:13–6:10); 4) түңнел (6:11-18).

Киирилде сөстер

¹ Улустуң шиитпири-биле болгаш кандыг-бир кижиниң даалгазы-биле эвес , а Иисус Христостуң база Ону өлүглер аразындан катап диргискен Бурган Аданың адындан элчин апарган Павел менден, ² ол ышкаш мээң-биле кады турар бүзүрээн ха-дуңманың шуптузундан байыр! Галатия девискээринде христиан ниитилелдерге бижидим .

³ Бурган Адавыс болгаш Дээргивис Иисус Христостан келген авырал биле амыр-тайбың силерге доктаазын. ⁴ Чурттап турарывыс бузуттуг бо делегейниң эрге-чагыргазындан бисти хостаар дээш, Ол бачыттарывыс ужун Бодун өргүлге салган Бурган Адавыстың күзел-соруу ындыг болган . ⁵ Аңаа кезээ мөңгеде алдар доктаазын. ·Аминь.

Өске Буянныг Медээ чок

⁶ Силерни Христостуң авыралы-биле кый деп алган Бургандан ындыг дүрген ойталап турарыңарны , Буянныг Медээ-даа эвес өске-бир өөредигни эдерер деп барганыңарны кайгап ханмас-тыр мен. ⁷ Өске кандыг-даа Буянныг Медээ ылап-ла чок! Христостуң дугайында Буянныг Медээни өскертирин кызып, чүгле ол дээш араңарга хөлзээзин өөскүдүп турар улус бар . ⁸ Ынчалза-даа өске кым-даа, бис азы ·дээрниң төлээзи-даа дижик, ооң мурнунда медеглээнинден өске Буянныг Медээни силерге медеглей берзе, Бурган ону Бодундан бүрүнү-биле аңгылап каапсын! ⁹ Мооң мурнунда-даа чугаалап турдувус, ам база катаптап тур мен: хүлээп алганыңардан өске өөредигни силерге медеглей бээр кижини Бурган Бодундан бүрүнү-биле аңгылап каапсын!

¹⁰ Чүнү чедип алыксааным ол: мени улустуң эки көөрүн бе азы Бурганның бе? Азы улус аайынче кирер деп бардым бе? Ынчалза-даа амдыгаа дээр улус аайы-биле чоруп келген болзумза, Христостуң чалчазы турбас ийик мен.

Павелдиң канчап элчин апарганы

¹¹ Ха-дуңма, мону билип аарыңарны күзеп тур мен: силерге медеглээним Буянныг Медээ – кижиниң чогаадыы эвес-тир. ¹² Мен ону улустан албадым, меңээ ону улус-даа өөретпеди, харын ону Иисус Христостуң ·ажыдыышкынын дамчыштыр алдым!

¹³ Иудей сагылгалыг чоруур шаамда, канчаар чурттап чораанымны дыңнаан боор силер . Мен христиан ниитилелди каржызы-биле истеп-сүрүп, ону узуткаарын кызып турдум . ¹⁴ Иудей шажынны өөрениринге мээң чонумнуң иштинде үе-черге өөрүмнү мурнап чоруп турган мен, ылаңгыя ада-өгбениң чаңчылдарын эң чүткүлдүү-биле сагып чордум . ¹⁵ Ынчалза-даа Бурган Бодунуң авыралы-биле ием иштинге турумда-ла, мени шилээш, кый деп алган . Ол, Бодунуң Оглун меңээ ажыдып бергеш, «Өске чоннарның улузунга Ооң дугайында медеглээр сен» деп айыткан . Мен ынчан улус аразындан кымдан-даа арга-сүме айтырбадым. ¹⁷ Иерусалимге турган, мээң мурнумда-ла элчиннер апарган улусче-даа барбадым, а Аравияже чоруптум, ооң соонда Дамаскыже ээп келдим .

¹⁸ Ооң соонда, үш чыл эрткенде, мен Кифа Пётрга ужуражыр сорулгалыг Иерусалимге чедип келгеш, ийи чеди хонук дургузунда ооң-биле кады турдум . ¹⁹ А өске элчиннерден кымга-даа ужурашпадым, чүгле Дээрги Иисустуң дуңмазы Иаковту көрдүм. ²⁰ Силерге бижип орар бүгү чүүлүм актыг шын деп, Бурганның мурнунга аашкынып тур мен!

²¹ Мен ооң соонда Сирия болгаш Киликия девискээрлеринче чорупкан мен. ²² Ынчалза-даа Иудеяда христианнар аразынга мээң арным көрген, таныыр кижи чок турган. ²³ Олар чүгле: «Мурнунда бисти истеп-сүрүп чораан кижи бир шагда узуткаар дээш, ыйыдып шаг болганы бүзүрелди ам суртаалдап турар-дыр» – деп чугаалар дыңнааннар . ²⁴ Олар мени дээш Бурганны алдаржыдып турган.

Павелдиң өске элчиннер-биле ужурашканы

¹ Ооң соонда, он дөрт чыл эрткенде, Варнава-биле кады Иерусалимге база катап чедип келдим. Титти база эдертип чордум. ² Бургандан ·ажыдыышкын алгаш , ынаар чорупканым ол. Эң алдар-хүндүлүг деп санадыр удуртукчулар-биле аңгы ужурашкаш, өске чоннарның улузунга суртаалдап чоруурум Буянныг Медээни чугаалап бердим. Мээң амгы болгаш мооң мурнундагы ажыл-херээм хилис барбазын дээш , ону медегледим. ³ Оон чүү болган деп? Мени эдерип чораан Титти, ол грек кижи-даа болза, ·кыртыжап демдектээшкин кылырынче кым-даа албадавады . ⁴ Ол айтырыг чүгле бүзүрээн ха-дуңмавыс бооп баажыланган улус бистиң аравысче, шивишкиннер дег, шургуп кирип кээрге, көдүрлүп үндү . Олар Христос Иисустуң ачызында бисте бар хосталгавыс дугайында хайгыылдап билип алгаш, бисти катап-ла кулданып алыр бодадылар . ⁵ А бис Буянныг Медээниң алыс шынныг утказын силерге кадагалап арттырар дээш, оларның аайынче ынай-даа кирбедивис.

⁶ Алдар-хүндүлүг дирткен удуртукчу улус безин (оларның кымнар бооп чорааны меңээ кандыг-даа хамаарылга чок, чүге дээрге Бурган улусту ылгай көөр эвес) мээң суртаалдаан Буянныг Медээмге чүнү-даа немеведилер, эдип-чазавадылар. ⁷ Харын Буянныг Медээни иудейлерге суртаалдаарын Бурганның Пётрга бүзүреп хүлээткени дег, өске чоннарның улузунга суртаалдаарын меңээ бүзүреп хүлээткен деп , олар хүлээп көрдү. ⁸ (Кым Пётрну иудейлер аразынга элчинниң бараан болуушкунунче деткип кииргенил, Ол мени база өске чоннарның улузунуң аразынга бараан боору-биле деткип киирген болгай.) ⁹ Христиан ниитилелдиң быжыг баганалары деп санадып турар Иаков, Пётр болгаш Иоанн олар, Бурган меңээ авыралын хайырлаан деп хүлээп көргеш, ажыл-херээвис дөмейиниң демдээ кылдыр, мен болгаш Варнава-биле найыралдажып, хол тудуштулар. Өске чоннарның улузунче – бистиң, а иудейлерже – оларның суртаалдап чоруурунга чөпшээрештилер. ¹⁰ Олар чүгле чаңгыс дилег кылды: «Ядыыларга дуза кадарын утпаңар». А мен ону бодум-на кылып чораан мен .

Павелдиң Пётрну чемелээни

¹¹ А Пётр Антиохия хоорайга чедип кээрге, ооң бодун ап турары канчаар-даа аажок буруулуг боорга, мен аңаа ажыы-биле удурланган мен. ¹² Ооң буруузу чүдел? Пётр Иаковтуң айбылап чоруткан улузу ынаар чеде бергижеге чедир, өске чоннарның улузу-биле кады чемненип турган . А айбычылар чедип кээрге, ол ·кыртыжап демдектээриниң талалакчыларындан сезингеш, өске чоннарның улузундан аңгыланып, дедирлени берген. ¹³ Өске иудейлер база, Пётрга дөмей, ийи арынныг чоруун көргүскеннер. Варнава безин оларның салдарынга алзыпкан.

¹⁴ Буянныг Медээде айыткан алыс шынның оруундан оларның соора барганын көргеш, хамык улус мурнунга Пётрга мынча деп чугаалаан мен: «Сен, иудей бодуң, өске чоннарның улузу дег амыдырап чоруур болзуңза, чүге оларны иудей сагылгалар эдериңер деп албадаар сен? ¹⁵ Бис – өске чоннарның бачыттыг улузу эвес, а төрүмеливистен иудейлер бис. ¹⁶ Ындыг-даа болза, кымның-даа ыдыктыг хоойлуну сагып турары дээш эвес , а чүгле Иисус Христоска бүзүрээни дээш, Бурганның мурнунга актыг боорун билир бис. Ынчангаш бис база ыдыктыг хоойлуну сагаанывыс дээш эвес, а Христос Иисуска бүзүрээнивис ачызында актыг боорунга идегээш, Аңаа бүзүрей берген бис . Чүге дээрге ыдыктыг хоойлуну сагааны-биле кандыг-даа кижи актыг бооп шыдавас . ¹⁷ Ынчалза-даа Христостуң ачызында актыг боорунче чүткээш, бачыттыглар диртир болзувусса, Христос база бачыт тараарын деткээн бооп турар бе? Канчап ындыг боор!»

¹⁸ Мооң мурнунда үреп-бускан чүүлүмнү катап тургузар болзумза, бодумну ыдыктыг хоойлунуң хажыдыкчызы кылдыр көргүскеним ол. ¹⁹ Ыдыктыг хоойлу мени «өлүрүп каан», Бурган дээш амыдыраары-биле ыдыктыг хоойлуга хамаарыштыр «өлген мен». Христос-биле кады «хере шаптырттым» . ²⁰ Ынчангаш ам мен бодум эвес, а мээң-биле сырый харылзаа туткан Христос амыдырай берген . Бо мага-бодумга амгы амыдыралым дээрге меңээ ынак болгаш, мен дээш Бодун өргүлге салган Бурганның Оглунга бүзүрээним ачызында амыдырап чоруурум-дур. ²¹ Бурганның авыралындан ойталавайн тур мен, чок! Бурганның мурнунга актыг боор арганы ыдыктыг хоойлу берип шыдаар турган болза, Христос хей черге өлген-дир!

Ыдыктыг хоойлу болгаш бүзүрел

¹ О, сарыыл чок галатчылар! Силерни кым караң көрүнгеш, чагырып алды?! Иисус Христосту, араңарга хере шаптырткан-даа дег, суглуг карааңар-биле тода көрүп турган ышкаш болдуңар чоп!

² Силерден чаңгыс-ла чүүл билип алыксадым. Ыдыктыг Сүлдени чүнүң ачызында алдыңар: ыдыктыг хоойлуну сагааныңар ачызында бе азы Буянныг Медээни дыңнап кааш, бүзүрээниңер ачызында бе? ³ Амыдыралыңарны Сүлдеден эгелеп алгаш, ам кээп, мага-ботка хамааржыр дүрүмнер-биле төндүрер бодап тур силер бе? Таанда-ла ындыг сарыыл чок силер бе?! ⁴ Азы силерниң шыдажып эрткен бүгү чүүлүңер хей черге болганы ол бе? Черле ындыг болбас! ⁵ Бурган силерге чүү дээш Сүлдени хайырлап, кайгамчык чүүлдерни араңарга чаяап турарыл : Ооң медээзин дыңнап кааш, бүзүрээниңер ачызында бе азы ыдыктыг хоойлуну сагып турарыңар ачызында бе?

⁶ ·Авраамны сактып кээлиңер. Бижилгеде ооң дугайында: «Авраам Бурганга бүзүрей бээрге, Ол ону актыг-шынныг деп санаан» – деп бижээн болгай . ⁷ Бүзүрээн улус – Авраамның ылап шын ажы-төлү ол дээрзин билип ап көрүңер. ⁸ Бурган өске чоннарның улузун бүзүрели дээш агартыр деп , Бижилге баш бурунгаар көрген, ынчангаш Авраамга: «Хамык чоннар сени дамчыштыр ачы-буян алыр» – деп чугаалаптарга-ла, Буянныг Медээ эң баштай медеглеттинген. ⁹ Ындыг болганда, Бурганга бүзүрей берген Авраам-биле кады бүгү бүзүрээн улус ачы-буянны алыр.

¹⁰ Ыдыктыг хоойлуну сагыырынга идегээр хамык улуска каргыш кыжанып турар , чүге дээрге Бижилгеде:

«Ыдыктыг хоойлунуң номунче киир бижээн бүгү чүүлдү

күүсетпейн чоруур кижи бүрүзү каргаттырар» деп бижээн-дир .

¹¹ А кым-даа ыдыктыг хоойлуну дамчыштыр Бурганның мурнунга актыг болбазы дараазында сөстерден-не илдең:

«Бүзүрелиниң ачызында актыг-шынныг болган кижи амылыг артар» .

¹² А ыдыктыг хоойлу бүзүрелге кандыг-даа хамаарылга чок, харын ында мынча деп бижээн-не болгай:

«Ыдыктыг хоойлунуң дүрүмнерин сагыыр кижи

оларның ачызында амылыг артар» .

¹³ Христос бисти ыдыктыг хоойлунуң каргыжындан хостаар дээш, биске дүжер ужурлуг каргышты Бодунга хүлээп алган – Бижилгеде: «Ыяшка азып каан кижи бүрүзү – каргаттырган» деп бижээн болгай . ¹⁴ Ынчангаш Бурган Авраамга аазааны ачы-буянны Христос Иисусту дамчыштыр бүгү өске чоннарга база хайырлаарга, бис шуптувус аазап каан Сүлдени бүзүреливис ачызында ап болур бис.

Бурганның аазаашкыннары ыдыктыг хоойлудан чугула

¹⁵ Ха-дуңма, хүн бүрүнүң амыдыралындан бир чижек: кижиниң безин күштүг болдуруп бадылаан чагыын кым-даа күш чок болдуруп азы аңаа кандыг-бир чүүл немеп шыдавас. ¹⁶ Бурган Авраам биле ооң салгакчызынга аазаашкыннар берген . Бижилгеде, хөй улуска дег, «Ооң салгакчыларынга» эвес, а чаңгыс кижиге дег, «Ооң салгакчызынга» дээнин эскерип көрүңер даан, ооң дугайында чугаа чоруп турар салгакчы – Христос ол-дур. ¹⁷ Чугаалаксаан чүвем бо-дур: Бурганның ооң мурнунда күштүг болдуруп бадылаан чагыг-керээзин 430 чыл эрткенде көстүп келген ыдыктыг хоойлу күш чок болдуруп база ында бар аазаашкынны чок кылып шыдавас. ¹⁸ Өнчү салгаар эргени ыдыктыг хоойлу бээр турган болза, ону Бурганның аазаашкынын ёзугаар ап болбазы ол-дур. А Бурган ону Авраамга чогум-на ынчаар – Бодунуң аазаашкынын ёзугаар хайырлаан .

Ыдыктыг хоойлунуң сорулгазы

¹⁹ А ыдыктыг хоойлунуң сорулгазы чүдел? Ону аазаашкында айыткан Салгакчы чедип келгижеге чедир, улустуң кем-буруулуун көргүзери-биле немей киирген . Ыдыктыг хоойлуну ·дээрниң төлээлерин дамчыштыр база дугуруштурукчунуң дузазы-биле берген. ²⁰ Ынчалза-даа дугуруштурукчу чүгле чаңгыстан хөй дугуржуп турар тала барда херек . А Бурган чаңгыс!

²¹ Ындыг болганда, ыдыктыг хоойлу Бурганның аазаашкыннарынга удур бе? Канчап ындыг боор! Улуска берген ыдыктыг хоойлу мөңге амыдыралды хайырлап шыдаар турган болза, оларның Бурганның мурнунга актыг боору ыдыктыг хоойлуну сагыырындан долузу-биле хамааржыр ийик. ²² Ынчалза-даа Бижилге бо делегей бүрүнү-биле бачытка туттурган деп чугаалап турар, а ынчангаш аазаашкында айыткан чүүлдү чүгле Иисус Христоска бүзүрээрин дамчыштыр, чүгле бүзүрээн улуска хайырлап боор .

²³ Бүзүрелдиң үези чедип келгижеге чедир, ол бүзүрелдиң бодун көргүзерин манап, ыдыктыг хоойлунуң хайгааралының адаанга турган бис. ²⁴ Христос чедип келбээн шаанда, ыдыктыг хоойлу бистиң кижизидикчивис дег турган. Христоска бүзүреливис дамчыштыр актыг апаарывыс дээш ындыг болду . ²⁵ А бүзүрелдиң үези чедип кээрге, кижизидикчиниң хайгааралының адаандан үне берген бис.

²⁶ Христос Иисуска бүзүрээниңерниң ачызында силер шупту Бурганның оолдары апарган силер . ²⁷ Христостуң ады-биле ·сугга суктургаш , силер шуптуңар Христосту «кедип алдыңар» . ²⁸ Моон соңгаар иудей биле өске чоннар кижизиниң, кул биле хостуг кижиниң , эр биле херээжен кижиниң аразында ылгал чок – силер шупту Христос Иисус-биле сырый харылзаалыг чаңгыс чаа улус силер. ²⁹ А бир-тээ Христоска хамааржыр болганыңарда , силер ынчан ·Авраамның үре-салгалы, Бурганның аазаашкынының салгакчылары боор силер .

Кул эвес, а бүрүн эргелиг салгакчы

¹ Силерге база бир чижекти көргүзейн: салгакчы назы четпээн шаанда, ол бүгү өнчүнүң ээзи-даа болза, кулдан ылгалыр чүзү-даа чок. ² Ол ачазының доктаадып каан хуусаазынга чедир башкылар болгаш өг-бүле кижизидикчилериниң хайгааралының адаанга турар. ³ Бис база ындыг бис: назы четпээн шаавыста, делегейни башкарып турар хоойлу-дүрүмнериниң кулдары бооп чордувус. ⁴ Ынчалза-даа доктааткан үе чедип кээрге , херээжен кижиден төрүттүнген, ыдыктыг хоойлуга чагырткан Бодунуң Оглун Бурган чорудуп берген . ⁵ Ыдыктыг хоойлуга чагыртып чораан бисти хостазын дээш база Бурганның азыраан оолдары кылып кагзын дээш, Бурган бисче Бодунуң Оглун чоруткан-дыр. ⁶ Ам силер шупту Бурганның оолдары силер! Ооң бадыткалы кылдыр Ол Бодунуң Оглунуң Сүлдезин, «Авва! Ачай!» деп кыйгырган Сүлдени, чүректеривисче сиңниктир чорудуп берген. ⁷ Ынчангаш сен ам кул эвес, а оглу сен. А ындыг болганда, Бурганның ачызында салгакчы база сен .

Дедир орук чок

⁸ Кажан-бир шагда, Бурганны билбес чорааш, херек кырында бурганнар-даа эвес чүүлдерниң кулдары чораан силер. ⁹ Ынчалза-даа ам, Бурганны билип алгаш (азы, шынын сөглээрге, Бурган силерни билип алганда) , таанда-ла ол чөгенчиг, ажык-дүжүү чок башкарыкчы хоойлу-дүрүмнерже дедир эгликсеп, биеэде дег, оларның кулдары болуксап тур силер бе? ¹⁰ Тускай хүннер, айлар, чылдың үелери болгаш чылдар сагыыр-дыр силер . ¹¹ Силерни дээш кылган ажыл-херээм хилис барбаан бе деп бодап кээримге, коргунчуг-дур!

¹² Ха-дуңма, ээрежип дилеп тур мен: мен ышкаш бооп көрүңер. Мен база силерге дөмей болу бердим чоп. Силер меңээ кончуг эки хамаарылгалыг турдуңар. ¹³ Билир-ле болгай силер: эң баштай силерге келгенимде, чүгле аарый берген ужурумдан Буянныг Медээни силерге суртаалдаар аргалыг болган мен. ¹⁴ Мээң кадыкшыл байдалым силерге шенелде болган-даа болза, мени тоовайн барбаан, дора көрбээн силер. Харын Бурганның төлээзин дег , Христос Иисустуң бодун дег хүлээп алдыңар . ¹⁵ Ынчангы өөрүшкүңер ам кайда-чүде барды? Болдунар-ла болза, карааңарны-даа меңээ казып бээринден чалданмас турганыңарга ынчан шуут бүзүрээр турдум. ¹⁶ Ам чүү болду? Шынын чугаалапкаш, өштүүңер апардым бе?

¹⁷ Силерни бодунуң талазынче ээлдирип алыр дээш, аажок кызып турар бир-ле улус барын билир мен, ынчалза-даа оларның сагыжы кара-дыр. Олар силерни бодунуң талалакчылары кылып алыр дээш, бисти чара кирер деп турарлар. ¹⁸ А мен силерни ак сагыштыым-биле, чүгле араңарга турар өйүмде эвес, а кезээде бодумнуң таламче ээлдирип алырын күзээр-дир мен. ¹⁹ Ажы-төлүм! Төлүн божуур иениң эъди аарааны дег, силер дээш база катап хилинчээм көре бердим. Христоска дөмей апарбаан шааңарда, ол хилинчээм төнмес. ²⁰ Мен ам силер-биле кады болган болзумза! Силер-биле бир янзы чугаалашкан болза, чүге дээрге силерни та канчапса эки чүве, аай-бажын тыппастадым.

Агар биле Сарра дугайында элдээртиг

²¹ Ыдыктыг хоойлуга чагыртыр бодаан улус, чугаалап көрүңерем: ында чүү деп турарын билбезиңер ол бе? ²² Ында ·Авраам ийи оолдуг чораан деп бижээн болгай: бирээзи – кул херээженден, а өскези – хостуг херээженден төрүттүнген . ²³ Чүгле кул херээженниң оглу – кижиниң күжениишкиннеринден, а хостуг херээженниң оглу – Бурганның аазаанындан төрүттүнген . ²⁴ Бо чугаа элдээрткен уткалыг: ийи херээжен ийи чагыг-керээни көргүзүп турар. Бирээзин ·Синай дагга чарган, ол дээрге Агар болгаш ооң кул бооп төрүттүнер ажы-төлү-дүр. ²⁵ Агар Аравияда Синай дагны болгаш амгы Иерусалимни көргүзүп турар, чүге дээрге ол бодунуң ажы-төлү-биле катай кулданыышкын адаанда-дыр. ²⁶ А өскези дээрде турар Иерусалимге хамааржыр, ол – хостуг, ол – бистиң иевис! ²⁷ Бижилгеде ооң дугайында мынча дээн болгай:

«Үре-төл чок, божуп көрбээн херээжен, өөрүп-байырла!

Дыңзыдыр ырла, өөрүшкүлүг алгыр, эъди аарып көрбээн херээжен!

Ашактыг херээженге көөрде, кагдырыпкан херээженниң ажы-төлү хөй боор-дур!»

²⁸ А силер болза, ха-дуңма, Исаак ышкаш, Бурганның аазаашкынындан төрүттүнген ажы-төл-дүр силер . ²⁹ Ынчалза-даа ол шагда кижиниң күженииишкининден төрүттүнген оолдуң Сүлдеден төрүттүнген оолду истеп-сүрүп турганы дег , ам база ындыг бооп турар-дыр. ³⁰ Бижилгеде ол дугайында чүү деп турар ийик?

«Кул херээженни оглу-биле үндүр ойладывыт,

чүге дээрге кул херээженниң оглу хостуг херээженниң оглу-биле дең өнчүнү

канчап-даа салгап албас» .

³¹ Ындыг болганда, ха-дуңма, кул эвес, а хостуг херээженниң ажы-төлү-дүр бис!

Христиан хосталга

¹ Христос бисти шак ол хосталга дээш хостап каан . Ынчангаш туруштуг болуңар, кымның-даа силерни катап кулданып аарын болдурбаңар .

² Дыңнаңар, Павел мен силерге чугаалап тур мен: ·кыртыжап демдектедирин дамчыштыр ыдыктыг хоойлуже эглир болзуңарза, Христостуң силерге кандыг-даа ажыы чок . ³ Силерге база катап чугаалап тур мен: бодунга кыртыжап демдектээшкин кылырынга чөпшээрешкен кижи бүрүзү ыдыктыг хоойлуну бүрүнү-биле сагыыр ужурлуг . ⁴ Ыдыктыг хоойлуну сагыыры-биле агартыышкын алырын шенээр болзуңарза , моон соңгаар силерде Христос-биле дөмей чүү-даа чок боор. Бурганның авыралындан ам хоорулган-дыр силер. ⁵ А бис бүзүрелдиң ачызында Бурганның мурнунга актыг боорувуска идегээр болгай бис. Ол идегелди четтикпейн манаарын Сүлде биске сагыш алындырып турар. ⁶ Христос Иисус-биле сырый харылзаалыг апаар болзувусса, ·кыртыжап демдектедири-даа, кыртыжап демдектетпези-даа чугула эвес . Ынакшыл дамчыштыр бодун көргүзер бүзүрел – чүгле ол чугула.

⁷ Бүзүрелдиң оруу-биле эки маңнап олурдуңар . Ынчаарга кым силерни астыктырып, алыс шынны дыңнавас улус кылдыр хуулдурупту? ⁸ Силерни кыйгырган Бурганның ынчаар өөретпээни ылап боор! ⁹ «Хөй далган хөөй берзин дизе, ынай ажыткы херек» . ¹⁰ Дээрги-Чаяакчының мурнунга силерге бүзүрээр мен: бистиң аравыска аңгы үзел-бодал турбас. А силерни хөлзедип турар кижи, ол кым-даа болза , шииттирер.

¹¹ Ха-дуңма, мени ·кыртыжап демдектээриниң талалакчызы деп турары шын болза , олар ам мени чүү дээш истеп-сүрерил? Христостуң ·белдир-ыяшка өлүмүнүң дугайында суртаал ынчан кымга-даа моондак болбас ийик . ¹² А силерни хөлзеткен ол хейлер боттарын чүгле ·кыртыжап демдектевейн, харын ·акталап-даа каапсыннар!

Сүлдеге башкартып амыдыраары

¹³ Ха-дуңма, Бурган силерни хосталгаже кыйгырган-дыр. Чүгле ол хосталгаңарны кижи бүдүжүнүң кара туразында аажылаар чаңынче хуулдурбаңар . Харын бот-боттарыңарга ынакшылдыг бараан болуңар . ¹⁴ Чүге дээрге бүгү ыдыктыг хоойлу чаңгыс борбак домакта туттунуп турар : «Чаныңда кижиге бодуңга бодуң дег ынак бол» . ¹⁵ А бот-боттарыңарны үзе-чаза тыртарын уламчылаар болзуңарза, шуут-ла узуткажып кааптарыңардан кичээниңер.

¹⁶ Ынчангаш силерге чугаалап тур мен: Сүлдениң айыткан аайы-биле амыдыраңар , кижи бүдүжүңерниң бачыттыг күзээшкиннеринге черле алыспаңар . ¹⁷ Чүге дээрге бачыттыг бүдүштүң күзээр чүүлү Сүлдеге удурланышкак, а Сүлдениң күзээр чүүлү бачыттыг бүдүшке удурланышкак болур. Олар үргүлчү адааннажып чоруур, ооң түңнелинде кылыр бодаан чүвеңерни кылып шыдавайн баар силер . ¹⁸ Ынчалза-даа Сүлдеге башкартыр болзуңарза, ыдыктыг хоойлу силерни баш билип шыдавас .

¹⁹ Кижиниң бачыттыг бүдүжүнүң ажыл-херээ илдең көскү . Ол дээрге самыырал, бужар күзээшкиннер, туттунмас туралаашкын , ²⁰ дүрзү-бурганга чүдүүрү, караң көрнүрү, адаан-өжээн, килең-кылык, алгыш-кырыш, аңгылажыг , бактажыры, ²¹ мурнун былаажыры , арагалаары, эмин эрттир хөглеп-дойлаары болгаш өске-даа ындыг янзылыг чүүлдер-дир. Мен силерни ооң мурнунда-даа сагындырып турдум, ам база катап сагындырып каайн: ындыг чүүлдер үүлгедикчилери Бурганның Чагыргазын канчаар-даа салгап албас .

²² А Сүлдениң үре-түңнели бо-дур : ынакшыл, өөрүшкү, амыр-тайбың, шыдамык болгаш буянныг чорук, энерел, бүзүрел, ²³ томаарыыры болгаш бодун туттунуп билири. Ол бүгүнү буруу шавар кандыг-даа хоойлу чок! ²⁴ Христос Иисуска хамааржыр улус боттарының бачыттыг бүдүжүн ооң хамык күзээшкиннери болгаш хандыкшылдары-биле катай-хаара ·белдир-ыяшка хере шаап каапкан . ²⁵ Бистиң амыдыралывыстың үнер дөзү Сүлде болганда, Ооң аайы-биле амыдырап көрээли! ²⁶ Ынчангаш адыыргак болбаалы, бот-боттарывыска хорадаваалы база адааргаваалы .

Бот-боттарыңарга буяндан кылып чоруңар

¹ Ха-дуңма, кандыг-бир кижини бачыт үүлгеткен деп сойгалаар болза, силер, Сүлдеге башкарткан улус , ону эдип-чазап көрүңер . Чүгле эптиг, чымчаа-биле эдип-чазаңар , боттарыңар база күткүлгеге алзып албас дээш кичээниңер. ² Аар-бергелерни ажып эртеринге бот-бодуңарга дузалажыңар , ооң-биле Христостуң айыткан чүүлүн сагаан боор силер . ³ Алыс боду чөгенчиг кижи «Мен кончуг мен» деп ёзуургаар болза , ол бодун боду мегелеп алыр. ⁴ Кижи бүрүзү бодунуң ажыл-херээн шүгдүнзүн, ол ынчан бодун өске улус-биле деңневейн, чедиишкиннеринге чоргаарланып шыдаар. ⁵ Чүге дээрге кижи бүрүзү бодунуң үүрге-чүъгүн чүктей бээр .

⁶ Бурганның сөзүн өөренип турар кижи бодунда бар бүгү эки-чаагай чүүлүн башкызы-биле үлешсин .

⁷ Мегеге туттурбаңар: Бурганны карак ажыттаары болдунмас . Кижи чүнү тарып аарыл, оозун ажаап алыр . ⁸ Бодунуң бачыттыг бүдүжүнүң хөрзүнүнге чүве тарып турар кижи оортан өлүмнү ажаап алыр. А Сүлдениң хөрзүнүнге тарып турар кижи ол Сүлдеден мөңге амыдыралды ажаап алыр. ⁹ Буян кылып тура, кажан-даа могап-турбаалы . Ынчан, сорук-күжүвүс кошкай бербес-ле болза , чогуур үе кээрге, дүжүдүвүс ажааттына бээр. ¹⁰ Ынчангаш амдыызында арга барда, бүгү улуска, ылаңгыя бүзүрели чаңгыс ха-дуңмавыска, буяндан көргүзүп чоруулу .

Түңнээшкин болгаш байырлажыг

¹¹ Бо сөстерни мен силерге бодумнуң холум-биле бижип ор мен , кайы хире улуг үжүктер ажыглаанымны көрүп тур силер бе? ¹² Силерни ·кыртыжап демдектедиринче албадааннар – кижиниң күжениишкиннери-биле эки бооп көстүксээн улус-тур. Олар ону чүгле Христостуң ·белдир-ыяшка өлүмүнүң дугайында суртаал ужун истедип-сүрдүрбези-биле кылып турарлар. ¹³ Олар кыртыжап демдектедип-даа алган болза, боттары-ла ыдыктыг хоойлуну сагывайн турарлар. А силерни, оозу-биле мактаныр чылдак тывар дээш, кыртыжап демдектедир деп турар улус-тур. ¹⁴ А мен бодум хуумда Дээргивис Иисус Христостуң белдир-ыяшка өлүмүнден аңгыда, чүнүң-биле-даа мактаныр хөңнүм чогул . Ол белдир-ыяшка меңээ хамаарыштыр – бо делегейни, а бо делегейге хамаарыштыр – мени хере шаап каан . ¹⁵ ·Кыртыжап демдектээри-даа, кыртыжап демдектетпези-даа чугула эвес . Чаңгыс-ла чугула чүүл – Бурганның чаа чаяалгазы боору! ¹⁶ Бо дүрүмнү сагып чоруур бүгү улуска, Бурганның израиль чонунга амыр-тайбың болгаш өршээл доктаазын!

¹⁷ Черле ынчаш, кым-даа моон соңгаар мени сагыш човатпазын, чүге дээрге Иисустуң демдээ-биле мага-бодумну имнеп алган чоруур-дур мен .

¹⁸ Ха-дуңма, Дээргивис Иисус Христостуң авыралы сагыш-сеткилиңерге доктаазын! ·Аминь.