Эфесчилерге

Эфесчилерге чагаа

Киирилде

Павел элчин бо чагааны филипчилерге, колосчуларга болгаш Филимонга чагаалары-биле кады, бистиң эраның 60-гы чылдарының эгезинде рим кара-бажыңга хоругдалының үезинде бижээн чадавас.

Эфес – ·Асия деп рим областың кол хоорайы (амгы Турцияның барыын эрик кыдыы). Павел маңаа Буянныг Медээ суртаалдап база чаа христиан ниитилелге бут кырынга туруп аарынга дузалап, ийи чыл ажыг турган.

Чагааны ийи кол кезекке чарып болур. Бирги кезээнде (1–3 эгелер) Павел номчукчуларны Буянныг Медээниң ачызында боттанган Бурганның чажыт, үе-дүптен бээр бодап алган күзели – христиан ниитилел дугайында болгаш ында Иисус Христоска бүзүрел бүгү улусту – еврейлерни-даа, өске чоннарны-даа – камгалап база каттыштырып турарының дугайында өөредип турар. Ийиги кезээнде (4–6 эгелер) Павел бүзүрээннерни Бурганның ол бодалын бүгү улуска чарлап көргүзер дээш, канчаар чаңгыс эптиг, ынакшылдыг болгаш арыг чурттаар ужурлугул деп сургап турар.

Бо чагаада илереткен бодалдар хөй чүүлдер талазы-биле колосчуларга бижээн чагаага дөмей, ынчалза-даа мында Христос дугайында шынныг өөредигни хажытканнар-биле маргылдаа чок.

Киирилде сөстер

¹ Бурганның күзел-соруун ёзугаар Христос Иисустуң элчини болган Павелден байыр. Эфесте Христос Иисуска бүзүрээн Бурганның улузунга бижидим.

² Бурган Адавыс болгаш Дээргивис Иисус Христостан келген авырал биле амыр-тайбың силерге доктаазын!

Христос – бисче чорудупкан ачы-буян

³ Дээргивис Иисус Христостуң Адазы Бурганга алдар! Ол биске Сүлдеден кээр бүгү-ле ачы-буянны дээрлер оранынга Христосту дамчыштыр хайырлады. ⁴ Ооң мурнунга ыдыктыг, кем чок улус бооп чурттазын дээш , Бурган бисти өртемчейни чаяар бетинде-ле Христосту дамчыштыр шилип алган. Бодунуң биске ынакшылы-биле ⁵ Бурган бисти ажы-төлү кылдыр азырап алырын Иисус Христосту дамчыштыр баш удур шилээн-дир. Ооң сорулгазы-даа, күзел ханыышкыны-даа ол-дур! ⁶ Ындыг болганда, Бодунуң ынак Оглун дамчыштыр Бурган биске авыралын хайырлааны дээш, Аңаа алдар-мактал!

⁷ Бис Христостуң өлүмүн дамчыштыр хосталып, бачыттарывыс дээш өршээл алдывыс . Бурганның авыралы ындыг элбекшилдиг-дир! ⁸ Бурган Бодунуң авыралын бисче бүгү мерген угааны болгаш угаап билиишкини-биле харам чокка сиңниктир төктү. ⁹ Ооң күзел-соруу-биле Христосту дамчыштыр боттанзын деп шиитпирлээни чажыт сорулгазын Ол биске илеретти: ¹⁰ чогуур үе кээрге, Ол сорулгазынга чүүлдештир бүгү чаяалганы – дээрде база черде бар бүгү чүүлдерни Баштыңчы Христосту долгандыр каттыштырыптар .

¹¹ Бүгү чүвени Бодунуң күзел-соруу ёзугаар боттандырып турар Бурган ынчалдыр баш удур шилип каан болганда, Христосту дамчыштыр Ооң чону апаар чолдуг болдувус. ¹² Ынчангаш бис – Христоска эң баштай идегээн улус – Бурганны алдаржыдып мактаар салымныг бис.

¹³ Христосту дамчыштыр алыс шынның сөзүн – камгалалыңар дугайында Буянныг Медээни дыңнап каан болгаш, Аңаа бүзүрээн силер. Аазааны Ыдыктыг Сүлдезин силерге бергеш, Бурган силерни Бодунуң улузу кылдыр таңма-биле дег демдектеп алган . ¹⁴ Ыдыктыг Сүлде болза Бурганның аазаан өнчүзүн салгаарывыстың магадылалы боор. Бурган биске бүрүн хосталга бээрге, ол өнчүнү ээлеп алыр бис. Ол бүгү дээш, Аңаа алдар-мактал!

Бурганның күчү-күжү камгалал дамчыштыр илерээр

¹⁵ Ынчангаш мен база Дээрги Иисуска бүзүрээниңер, Бурганның бүгү улузунга ынааңар дугайында дыңнап кааш , ¹⁶ мөргүлдеримге силерни сактып, силер дээш, Бурганга үзүк-соксаал чок өөрүп четтирип келдим. ¹⁷ Дээргивис Иисус Христостуң Бурганы – өндүр бедик Ада мерген угаан болгаш ·ажыдыышкын бээр Сүлдени силерге хайырлап, Ону эки билип аар арга берзин деп мөргүп тур мен. ¹⁸ Ооң силерни чүү ындыг идегелче кыйгырганын билзиннер дээш, Ооң чону-биле үлежириңер өнчүнүң кайы хире өндүр байлаан көрзүннер дээш , Бурган силерниң угаан-сарыылыңарны чырыдып берзин деп мөргүп тур мен. ¹⁹ Аңаа бүзүрээн биске салдар чедирген Ооң күчү-күжүнүң чүнүң-биле-даа деңнээр аргажок өндүр улуун база көрзүннер деп мөргүп тур мен. ²⁰ Бурган Бодунуң өндүр улуг күчү-күжүн мынчаар илереткен: Христосту өлүглер аразындан катап диргискеш, Ону дээрге, Бодунуң оң талазынга, олуртуп алган . ²¹ Ындыг арга-биле Бурган Ооң адын чүгле амгы үеде эвес, харын келир үеде база бүгү чагырыкчылардан, эрге-чагырга ээлеринден, күштерден болгаш дээргилерден бедик кылып каан . ²² Бурган бүгү чүвени Христостуң будунуң адаанга чагырткаш , Ону бүгү-ле христиан ниитилелдиң бажынга салып каан . ²³ А христиан ниитилел – Ооң мага-боду-дур . Ол Боду бүгү чаяалганы бүрүнү-биле бүргей ап турар .

Өлүмден амыдыралче шилчиишкин

¹ Боттарыңарның кемниг херектериңер ужун база бачыттарыңар ужун өлүг чораан силер . ² Бачытка борашкаш, силер ол шагда бо делегейниң оруктары-биле чоруп, дээр адааның күштериниң чагырыкчызынга (ол амгы үеде Бурганны дыңнавастарны удуртуп турар) чагыртып чораан силер . ³ Бис шуптувус база херек кырында Бурганны дыңнавастарның санынче кирип, бачыттыг бүдүжүвүс аайы-биле чурттап, мага-бодувустуң, угаан-бодалывыстың бүгү күзээшкиннерин хандырып келген бис . Бүдүжүвүс ындыг боорга, өске бүгү улус-биле деңге, Бурганның килеңи бисти кезедир дээш манап турду.

⁴ Ынчалза-даа Бурганның өршээли эгээртинмес байлак, Ооң биске ынакшылы өндүр улуг . ⁵ Ынчангаш Ол бачыттыг херектеривис ужун өлгүлээн бисти Христос-биле кады тынгарып кагды . Камгалалды Ооң авыралы-биле алган силер! ⁶ Бурган бисти Христос Иисус-биле кады катап диргискеш, дээрже өрү көдүргеш, Ооң чанынга олуртуп кагды . ⁷ Ол ынчаар кылгаш, Христос Иисусту дамчыштыр биске хайырлааны буянныг сагыжының, Бодунуң авыралының эгээртинмес байлаан бүгү келир үелерге көргүзер бодаан.

⁸ Ийе, силер Бурганның авыралы-биле бүзүрелиңер дамчыштыр камгалал алган силер . Ол дээрге силерниң ачы-хавыяаңар эвес, а Бурганның белээ-дир! ⁹ Камгалалды кым-даа ажыл-херээ-биле чедип албас , ындыг болганда, кым-даа ынчалдым деп мактанып шыдавас . ¹⁰ Бурганның чаяалгазы бис. Ооң биске баш удур белеткеп кааны буянныг херектерни боттандырып чурттаарывыс дээш , Ол бисти Христос Иисус-биле харылзаалыг кылдыр чаяап каан.

Христоска бүзүрээннер – чаңгыс чон

¹¹ Ынчангаш силер, төрүмелинден «·кыртыжап демдектетпээннер» деп адаткан өске чоннар улузу (мага-ботту кижи холу-биле кыртыжап демдектээр ёзулалды эртип алган иудейлер силерни ынча дээр), мону утпаңар: ¹² ол шагда Христос чок амыдырап чораан болгаш, израиль чоннуң санынче кирбейн, аңгы чораан силер . Бурганның аазаашкыннары кирген чагыг-керээлер силерге хамаарышпас турган . Бо делегейге идегел болгаш Бурган чок амыдырап чордуңар!

¹³ Ынчалза-даа ам, Христос Иисус-биле харылзаалыг апаргаш, бир шагда ырак-коңчак чораан боттарыңар , Христостуң өлүмүнүң ачызында, Бурганга чоок апардыңар. ¹⁴ Чүге дээрге Христос – амыр-тайбыңывыстың үнер дөзү . Ол Бодунуң мага-бодун өргүлге салгаш, иудейлер биле өске чоннар улузун аңгылай турупкан өжээргелдиң ханазын бузуп каапкаш, шуптувусту чаңгыс чон кылдыр каттыштырган . ¹⁵ Ол ыдыктыг хоойлуну ооң хамык дүрүмнери, сагылгалары-биле катай-хаара күш чок болдурган . Ооң сорулгазы мындыг: амыр-тайбыңны догуннадып, Боду-биле харылзаалыг кылдыр ийи аңгы улустан чаңгыс чаа улусту чаяары. ¹⁶ Христос Бодунуң ·белдир-ыяшка өлүмүн дамчыштыр ийи аңгы чораан бисти чаңгыс мага-ботка Бурган-биле эптештиргеш , өжээргелди узуткаар күзелдиг. ¹⁷ Ынчангаш Христос чедип келгеш, Бургандан ыракка чораан силерге-даа, Аңаа чоок чурттап чораан улуска-даа бүгүдеге амыр-тайбың дугайында Буянныг Медээни суртаалдаан . ¹⁸ Чүге дээрге бис – иудейлер-даа, өске чоннар улузу-даа чаңгыс Сүлдеге башкарткаш, Адага Христосту дамчыштыр чеде бээр аргалыг болган бис. ¹⁹ Ындыг болганда, ам силер, өске чоннар улузу, хары даштыкылар эвес, а Бурганның чонунуң дең эргелиг албатылары болгаш Ооң өг-бүлезиниң кежигүннери силер .

²⁰ Силерни база элчиннер биле медээчилерниң салып кааны үндезинге тудуп үндүрген , а Христос Иисус – бажыңның таваанга салыр эң чугула даш-тыр . ²¹ Ооң Боду бүгү бажыңның чөленгиижи болур, а бажың улам-на бедип, Дээрги-Чаяакчының ыдыктыг өргээзи кылдыр шилчип турар . ²² Христостуң ачызында Бурганның Сүлде дамчыштыр чурттаар бажыңы апарзыннар дээш, Ол силерни база тудуп үндүрүп турар-дыр .

Бурганның чажыт бодалын ажытканы

¹ Христос Иисустуң бараан болукчузу болгаш, өске чоннар улузу силер дээш, хоругдал адаанда турар Павел мен шак ол чылдагаан-биле мөргүп тур мен. ² Бурганның авыралын силерге дамчыдарын меңээ дааскан дээрзин дыңнааныңар чугаажок боор . ³ Мээң үстүнде каксы бижээним дег, Ооң ол чажыдын ·ажыдыышкын дамчыштыр билип алган мен . ⁴ Ынчангаш ону номчуптар болзуңарза, Христостуң чажыдын канчаар билип турарымны угаап шыдаптар силер. ⁵ Кижи төрелгетенниң ооң мурнундагы салгалдарынга ол чажытты чугаалаваан турган, ынчалза-даа Сүлде ам ону Бурганның ыдыктыг элчиннери болгаш медээчилеринге ажыдып берген. ⁶ Ук чажыт мындыг – Христос Иисустуң Буянныг Медээзиниң ачызында өске чоннар улузу, иудейлер-биле деңге, ол-ла өнчүнүң салгакчылары , чаңгыс ол-ла мага-боттуң тургузукчу кезектери апаар , Бурганның аазаашкыннары оларга база хамааржыр . ⁷ Ооң күчү-күжүнүң салдарын дамчыштыр меңээ элбээ-биле хайырлаан Бурганның авыралының ачызында, ол Буянныг Медээниң бараан болукчузу апарган мен .

⁸ Христостуң эгээртинмес эртине-байлааның дугайында Буянныг Медээни өске чоннар улузунга суртаалдаар авыралды Бурганның хамык улузунуң аразында эң чөгенчии боор меңээ хайырлаан . ⁹ Бүгүдениң Чаяакчызы Бурганның өртемчейни чаяаганындан бээр чажырып келгени ол чажыттың чырыын бүгү улуска көргүзерин база меңээ бүзүреп дааскан . ¹⁰ Бурганның бодалы ёзугаар христиан ниитилелди дамчыштыр Ооң хөй талалыг мерген угааны дээрде күштерге база эрге-чагырга ээлеринге чүгле ам чаа билдине берген . ¹¹ Бурган Бодунуң үе-дүпте бээр бодап келген чажыдын Дээргивис Христос Иисусту дамчыштыр боттандырган, ¹² а бис Христоска бүзүрей бергеш, Аңаа башкартканывыстың ачызында, Бурганга коргуш чок чеде берип боор бис . ¹³ Ынчангаш силер дээш көрүп турар хилинчээм ужун ундаравазыңарны дилеп тур мен, чүге дээрге ол хилинчээм силерге алдар эккээр .

Христостуң ынакшылы

¹⁴ Шак Ол чылдагаан-биле мен Аданың мурнунга дис кырынга мөгейип тур мен. ¹⁵ (Дээрде база черде бар аймак бүрүзү ат-сывын Ададан алган чүве-дир) . ¹⁶ Бурган Бодунуң өндүр-чаагай эртине-байлаандан силерге күштү хайырлазын дээш, Бодунуң Сүлдезин дамчыштыр угаан-сагыжыңарны быжыктырзын дээш, мөргүп тур мен . ¹⁷ Бүзүрелиңер ачызында, Христос чүректериңерге амыдырай берзин дээш, а ынакшыл – дазылыңар болгаш үндезиниңер болзун дээш , мөргүп тур мен. ¹⁸ Силер ынчан Бурганның хамык улузу-биле кады Христостуң ынакшылы кайы хире өй-хемчээл, кызыгаар чогун угааптар шаг-шинектиг апаар силер. ¹⁹ Кижиниң угаап шыдаар деңнелин оранчок ажып-даа турар болза , ол ынакшылды билип шыдаптар силер. Бурганның бүдүжү ынчан амыдыралыңарны бүрүнү-биле бүргей бээр .

²⁰ А ам биске салдарын чедирип турар күчү-күжүнүң ачызында, дилеп аар азы бодап чоруур бүгү чүүлүвүстен оранчок хөйнү кылып шыдаар Бурганга алдар! ²¹ Ийе, Бурганга кезээ мөңгеде, солуп кээр бүгү салгалдарда христиан ниитилелди база Иисус Христосту дамчыштыр алдар доктаазын! ·Аминь .

Мага-боттуң чаңгыс эви

¹ Ынчангаш мен, Дээрги-Чаяакчыга хамааржырым дээш хоругдаттырган кижи , силерден дилеп тур мен: Бурганның силерни ол дээш кый деп алганы хүлээлгеңерге төлептиг амыдыраңар . ² Үргүлчү томаанныг, биче сеткилдиг бооп көрүңер . Бот-боттарыңарга шыдамык болгаш ынакшылдыг хамаарылгадан көргүзүңер . ³ Сүлдеге башкартып тура, силерни тудуштурган амыр-тайбың ачызында чаңгыс эпти кадагалаарынче чүткүңер . ⁴ Чүгле чаңгыс мага-бот , чаңгыс Сүлде бар болгай , а Бурган силерни чаңгыс идегелди үлешсиннер дээш кыйгырган. ⁵ Чүгле чаңгыс Дээрги-Чаяакчы, чаңгыс бүзүрел база чаңгыс ·сугга суктурары бар . ⁶ Чүгле чаңгыс Бурган, шуптувустуң Адавыс бар . Чүгле Ол – шуптувустуң бажывыста, шуптувусту дамчып Бодун көргүзер база шуптувуста амыдырап турар.

⁷ Бистиң шуптувуска, Христостуң кижи бүрүзүнге тускайлап айыткан хемчээлин ёзугаар, авыралды үлеп берген . ⁸ Ынчангаш Бижилге:

«Ол бедидир өрү көдүрүлгеш, хөй улусту тудуп алгаш,

кижилерге белектерни үлеп берген» – деп чугаалап турар.

⁹ А «өрү көдүрүлгеш» дээн ужуру чүл? Ооң мурнунда Ол чер кырынче бадып турган дээни ол эвес бе? ¹⁰ Куду бадып турган ол-ла Кижи, бүгү өртемчейни Боду-биле бүргээр дээш, хамык дээрлерниң үстүнче көдүрлүп үне берген эвес бе?

¹¹ Христос Боду кымга – элчиннер, кымга – медээчилер, кымга – Буянныг Медээниң суртаалчылары, а кымга – удуртукчулар болгаш башкылар боорун айтып, белектерин үлээн . ¹² Бурганның улузун бараан болуушкунга, Христостуң мага-бодун тургузар , быжыглаар ажыл-херекке белеткээр дээш, Ол ынчанган. ¹³ Бис шуптувус бүзүрелге, Бурганның Оглун билип аарынга чаңгыс эпке келбээн шаавыста; четчип-быжа бергеш, Христостуң дээди деңнелинге чеде бербээн шаавыста , быжыгланыр ужурлуг бис.

¹⁴ Бис ынчан янзы-бүрү өөредиглерниң чалгыглары болгаш хаттарынга, кажарлап амдажаан улустуң оптуг мегезинге ужур шаптырткан бичии уруглар эвес боор бис . ¹⁵ Харын алыс шынны ынакшылдыг чугаалап тура, бүгү тала-биле Христосче чоокшулап, өзүп-мандыыр ужурлуг бис . А Ол дээрге – мага-боттуң Бажы-дыр. ¹⁶ Ол бүгү мага-ботту хамык кезектери аразында ажыглап-ла болгу дег быжыг харылзаалар-биле тудушкан бүдүн-бүрүн чаңгыс эп кылдыр каттыштырыпкан. Мага-боттуң кезек бүрүзү бодунуң хүлээлгелерин күүседип турда, ооң бүгү боду өзүп-мандып, ынакшылдың ачызында быжыгып орар.

Эрги эвес, чаа амыдырал

¹⁷ Ынчангаш мен ол бүгүнү чугаалап, Дээрги-Чаяакчының адындан ыяк чагып тур мен: хоозун бодал-сагыштыг бүзүрели чок улус дег амыдыраваңар . ¹⁸ Олар угааны караңгылаан, Бурганны билбес, бүдүүлүк болгаш , Ооң бээри амыдыралдан оспаксыраан база чүректери дашталган улус-тур . ¹⁹ Олар арын-нүүрүн артынга каггаш, самыыраан күзээшкиннеринге чагыртып, кандыг-даа хевирлиг бужар чүүлдерни үүлгедип турарлар .

²⁰ Ол дээрге Христостуң дугайында билип алганыңарга көңгүс таарышпас чүүлдер-дир. ²¹ А силер Ооң дугайында дыңнаан база Ооң өөреникчилери апарган болгаш, Иисуста бар алыс шынны билип алган-дыр силер. ²² Мурнунда канчаар амыдырап чорааныңардан – биеэги бодуңардан, дуурайлаан күзээшкиннер ириткен бачыттыг бүдүжүңерден ойталаңар . ²³ Угаан-медерелиңер болгаш сагыш-сеткилиңерни чаартып алгаш , ²⁴ ылап-ла чөптүг-шынныг база ыдыктыг амыдыралы-биле онзаланыр, Бурганның овур-хевиринге үлегерлей чаяаган чаа кижи бооп амыдыраңар .

²⁵ Ынчангаш мегеден ойталаңар , шуптуңар бот-боттарыңарга шынны чугаалаңар , чүге дээрге бис шупту Христостуң мага-бодунуң кезектери-дир бис . ²⁶ Килеңнээш-даа, бачыт үүлгетпеңер . Килеңиңерни хүн ашпаанда-ла чавырып алыңар; ²⁷ силерни күткүп, амыдыралыңарже сыңныр чай-хосту эрликке бербеңер! ²⁸ Ооржу кижи оорланырын соксатсын , а ооң орнунга бодунуң кызыл күжү-биле амыдыралынга ажылдап ап , тыпкан олча-кежиин ядыылар-биле үлежир шаг-шинектиг болзун . ²⁹ Аксыңардан кандыг-даа бак сөс үнмезин , а чүгле кандыг-даа байдалдарда улустуң хереглелдерин хандырарынга ажыктыг, дыңнакчыларга ачылыг сөстер үнзүн. ³⁰ Бурганның Ыдыктыг Сүлдезиниң хөңнүн баксыратпаңар . Бүрүн хосталыр хүнүңер дээш, силер Ооң таңмазы-биле демдектедип алган болгай силер . ³¹ Дошкууралдан, килеңден, алгы-кышкыдан, каргыштан база өске кандыг-даа хевирлиг бузуттан адырлып алыңар . ³² Бот-боттарыңарга буянныг, энерелдиг болуңар, Бурганның силерни Христосту дамчыштыр өршээгени дег, бот-боттарыңарны өршээңер .

Чырыктың ажы-төлү дег амыдыраңар

¹ Ындыг болганда, Бурганның ынак ажы-төлү дег, Аңаа дөмей боорун оралдажыңар . ² Христос биске ынакшааш, Бодунуң амы-тынын бис дээш Бурганга салган чаагай чыттыг, күзел ханар өргүл дег берипкен . Ооң ынчаар ынакшааны ышкаш, ынчалдыр ынакшылга бүргедип амыдыраңар .

³ Үй-балай самыырал азы кандыг-даа бужар чорук болгаш алыксак-чиксек чорук ышкаш чүүлдер дугайында араңарга чугаа безин көдүрүлбезин. Ындыг үүлгедиглер Бурганның ыдыктыг улузунга көңгүс таарышпас. ⁴ Ааска эптешпес сөстер, хоозун куруг чугаалар болгаш үй-балай баштактар чугааңарже кирбезин , ол бүгү чүүл чок! Бурганга өөрүп четтирери оон канчап-даа дээре! ⁵ Харын бүзүреп боор силер: чаңгыс-даа самыыраан, бодун бужартаткан база чазый кижи (а ол дүрзү-бурганга чүдүүрлерден ынай-даа ылгалбас) Христостуң база Бурганның Чагыргазынга өнчү албас .

⁶ Силерни кым-даа хоозун сөстер-биле дуурайлавазын! Чүге дээрге чогум-на ол чүүлдер дээш, Бурганның килеңи Ону дыңнавастарже халдаар . ⁷ Ынчангаш олар-биле силерниң араңарга дөмей чүү-даа турбазын! ⁸ Боттарыңар кажан-бир шагда караңгыга бүргеткен улус чораан силер , а ам, Дээрги-Чаяакчыга башкарткаш, чырыкка бүргедиптиңер. Чырыктың ажы-төлү дег амыдыраңар! ⁹ А чырыктың үре-түңнели – кандыг-даа янзылыг буянныг херек, чөптүг-шынныг чорук болгаш алыс шын боор. ¹⁰ Дээрги-Чаяакчыга таарымчалыг чүүлдү тодарадып аарын оралдажыңар . ¹¹ Караңгының үре-түңнел чок үүле-херээнге киришпеңер, харын оларны сойгалаңар . ¹² Чүге дээрге ындыг ёражоктарның бүдүү чүнү үүлгедип турарын чугаалаары безин ыянчыг-дыр. ¹³ Ынчалза-даа чырыктың сойгалааны бүгү чүүл көскү апаар . ¹⁴ А чырыктың көскү кылыпканы бүгү чүүл боду база чырык апаар. Ынчангаш мынча деп чугаалаар бис:

«Удаан кижи, оттуп кел!

Өлүг кижи, дирлип кел,

сени ынчан Христос херелдендир чырыдыптар!»

¹⁵ Таптыг көрүңер, оваарымчалыг болуңар: боттарыңарны мелегей эвес, а угаанныг улус ышкаш ап чоруңар . ¹⁶ Кандыг-даа арганы чөп ажыглаарын оралдажыңар, чүге дээрге бузуттуг-бак чорук көвүдээн үе-дир бо. ¹⁷ Ынчангаш сарыыл чок болбаңар, а Дээрги-Чаяакчының күзел-соруун билип аарын оралдажыңар . ¹⁸ Араганы эзиртир ишпеңер, оон чүгле үрелир силер . Ооң орнунга Сүлдеге бүргеттириңер. ¹⁹ Ыдыктыг ырлар, йөрээлдер болгаш Сүлдеден кээр ырлар күүседип , араңарда ынчалдыр харылзажыңар. Ырлажыңар, чүректериңер ханызындан Дээрги-Чаяакчыны алгап-йөрээңер . ²⁰ Дээргивис Иисус Христостуң ады-биле Бурган Адага бүгү чүве ужун үргүлчү өөрүп четтириңер .

Христиан өг-бүле

(Кол. 3:17–4:1)

²¹ Христосту хүндүлээриңерниң демдээ кылдыр бот-боттарыңарга чагыртыңар.

²² Херээжен улус, Дээрги-Чаяакчыга дег, ашактарыңарга чагыртыңар . ²³ Христостуң Бодунуң ниитилели болур мага-бодунуң Бажы болгаш Камгалакчызы болганы дег, ашаа кадайынга баштыңчы боор . ²⁴ Христостуң ниитилелиниң Анаа чагыртканы дег, кадайлар база ашактарынга бүрүнү-биле чагыртыр ужурлуг.

²⁵ А силер, ашактар, Христостуң Бодунуң ниитилелинге ынаа ышкаш, кадайларыңарга ынак болуңар . Ол Бодунуң амы-тынын ол дээш өргээн болгай. ²⁶ Христиан ниитилелди ·сугга чуп , арыглааш, Бодунуң сөзү-биле ыдыктап, аңгылап алыр дээш, ²⁷ ону Бодунуң мурнунга бүрүн каазы-биле: четпес-дудуу чүве чок, бокка борашпаан – бачыт база кем чок бооп көзүлзүн дээш , Ол ынчаар кылган. ²⁸ Ашактар база ынчалдыр, бодунуң мага-бодунга дег, кадайларынга ынак боор ужурлуг. Кадайынга ынак кижи бодунга база ынак. ²⁹ Бодунуң мага-бодун көөр хөңнү чок чаңгыс-даа эр кижи кажан-даа туруп көрбээн, харын ол оозун чемгерер, ажаап-тежээр болгай. Христос Бодунуң ниитилели дээш база ынчалдыр сагыш човаар. ³⁰ А бис Ооң мага-бодунуң кезектери-дир бис .

³¹ Ынчангаш эр кижи ада-иезин каапкаш, кадайы-биле катчы бээр,

ынчан ийи кижи чаңгыс мага-бот апаар .

³² Мында аажок ханы чажыт бар, ол чажыт Христоска болгаш Ооң ниитилелинге хамааржырын чугаалап тур мен. ³³ Силерниң эр кижи бүрүзү база, бодунга боду дег, кадайынга ынак боор ужурлуг, а кадайы ашаан хүндүлезин .

Ажы-төл болгаш ада-ие

¹ Ажы-төл, Дээрги-Чаяакчыга башкарткаш, ада-иеңерни дыңнаңар, ынчаар кылыры чөптүг-шынныг болур . ² Бурганның аазаашкынынга коштунган Ооң бирги айтыышкынын утпаңар:

«Ачаң биле аваңны хүндүлеп чор.

³ Сеңээ ынчан буян-кежик доктаап,

чер кырынга үр амыдыраар сен» .

⁴ Ада-иелер, ажы-төлүңерни бужургандырбаңар! Оларны Дээрги-Чаяакчының чурумун болгаш өөредиин ёзугаар өстүрүп-кижизидиңер база сургаңар .

Кулдар болгаш оларның ээлери

⁵ Кулдар, чер кырында ээлериңерни, Христоска чагыртып турган-даа дег, хүндүткеп база коргуп-сүрээдеп, чүрээңер ханызындан дыңнаңар . ⁶ Улустуң эки хамаарылгазын чаалап аар дээн чашпаачылар дег, карак чаап эвес, а Бурганның күзел-соруун сеткилиниң ханызындан күүседип турар Христостуң кулдары дег ажылдаңар . ⁷ Улуска эвес, а Дээрги-Чаяакчыга бараан бооп турган дег, чүткүлдүү-биле бараан болуңар. ⁸ Кымның-даа: кул-даа, хостуг-даа кижиниң кылган буянныг ажыл-херээ дээш, Дээрги-Чаяакчы шаңнал бээрин билип алыңар .

⁹ А ээлер силер, кулдарыңарга база шак ындыг хамаарылгалыг болуңар, кыжаныгдан туттунуңар . Оларда-даа, силерде-даа дээрде чаңгыс Дээрги-Чаяакчы бар, а Ол кымны-даа өскелерден ылгай көрбес дээрзин утпаңар .

Бурганның берген бүрүн чепсек-херексели

¹⁰ Адак сөөлүнде чугаалап каайн: Дээрги-Чаяакчыга башкарткаш, Ооң өндүр улуг күчү-күжү-биле бодуңарны быжыглаңар. ¹¹ Бурганның берген бүрүн чепсек-херекселин кедип алыңар , эрликтиң хамык кара сагыжынга удур ынчан туржуп шыдаар силер . ¹² Чүге дээрге бис эът-бот биле хандан бүткен улуска удур эвес, а эрге-чагырга ээлеринге, бистиң амыдыраан дүмбей үевисте тергиидээн каптагайның чагырыкчыларынга база дээрлерде кара күштерге удур демисежип турар-дыр бис.

¹³ Ынчангаш бузут тергидээр хүн кээрге, оларга удур туржур шаг-шинектиг бооп, шупту халдаашкыннарны ойтур шаап, тура тутчур дээш, Бурганның чепсек-херекселин кедип алыңар. ¹⁴ Чаныш-сыныш чок туржуңар! Алыс шынны чыыра куржангаш , чөптүг-шынныг чоруктуң куяк хевин кедип алыңар . ¹⁵ Амыр-тайбың дугайында Буянныг Медээни суртаалдаарынга белениңер – бутка кедер идииңер болзун . ¹⁶ А ол бүгүден аңгыда, бүзүрелдиң дозуг-камгалалын тудуп алыңар – ооң-биле бузуттуг эрликтиң хамык оттуг согуннарын дозуп шыдаар силер. ¹⁷ Камгалалды – куяк бөрттү дег, а Бурганның сөзүн – Сүлдениң силерге бээр хылыжын дег хүлээп алыңар . ¹⁸ Мөргүлдүң бүгү хевирлери-биле мөргүңер. Кандыг-даа үеде Бургандан дилег кылып, Сүлдеге башкарткаш, мөргүңер . А ындыг болганда, серемчилелдиг бооп , Бурганның бүгү улузу дээш, чүткүлдүү-биле мөргүңер.

¹⁹ Мени бодааш – чугаалай бээримге-ле, Бурган меңээ херектиг сөстерни айтып берзин дээш база Буянныг Медээниң чажыдын коргуш чок суртаалдаарым дээш – мөргүңер-ле . ²⁰ Демирледип-даа алган болзумза , ол Буянныг Медээ ужун Иисус Христостуң бүрүн эргелиг элчизи мен . Хүлээлгемни чогууру-биле күүсетпишаан, ону дидими-биле база ажыы-биле медеглеп шыдаарым дээш мөргүңер.

Түңнел байыр чедириишкиннери

(Кол. 4:7-8)

²¹ Мээң канчаар амыдырап, чүнү кылып турарымны билип алыксап тур силер бе? Адырам, ол бүгүнү силерге Тихик , ханы ынак бүзүрээн дуңмам, Дээрги-Чаяакчының шынчы бараан болукчузу, чугаалап чеде бээр. ²² Бистиң дугайывыста дыңнааш, чүректериңер сорук кирзин дээш, мен ону силерже ылап-ла ол сорулга-биле чорудуп тур мен .

²³ Ха-дуңма, силер бүгүдеге Бурган Адавыстан, Дээрги Иисус Христостан келген амыр-тайбың, ынакшыл болгаш бүзүрел доктаазын! ²⁴ Дээргивис Иисус Христоска өлүм билбес ынакшыл-биле ынакшаан бүгү улуска Бурганның авыралы доктаазын!