2 Тимофейге

Тимофейге ийиги чагаа

Киирилде

Тимофейге ийиги чагаа Павелдиң бижээн чагааларының эң сөөлгүзү боору ылап хире.

Чагаада Павел катап база бодунуң шынчы дузалакчызы Тимофей-биле чугаа кылган. Павел, бодунуң байдалы аар-берге-даа болза, бүгү чуртталгазында ону деткип келген Бурганны алдаржыдып турар. Өлүмден ол кортпас, Христос-биле харылзаалыг мөңге амыдырал ону манап турар дээрзинге ол бүзүрээр. Ындыг-даа болза, христиан ниитилелдер Иисуска бүзүрели дээш истеп-сүрүүшкүннерге таваржырын билир болгаш, Павел олар дээш сагыш човап турар. Ынчангаш ол Тимофейни (ооң-биле кады бүгү христианнарны) хилинчек-човалаңны көрүп тургаш безин, Христоска чайгылыш чок шынчы боор кылдыр сургап турар. Ол ышкаш Павел Тимофейге Буянныг Медээни үргүлчү суртаалдаарын база улусту Дээрги-Чаяакчы дугайында алыс шынга өөредирин сагындырган.

Киирилде сөстер

¹ Христос Иисус-биле сырый харылзаалыг апаргаш, Бурганның аазааны мөңге амыдыралды медеглээри-биле Ооң күзел-соруун ёзугаар айбылаткан кижиден, Христос Иисустуң элчини Павелден байыр. ² Ханы ынак оглум Тимофей сеңээ бижидим . Бурган Адавыстан база Дээргивис Христос Иисустан келген авырал, өршээл база амыр-тайбың сеңээ доктаазын!

Буянныг Медээни суртаалдаарынга шынчы чорук

³ Сени сактып, дүне, хүндүс үргүлчү мөргүл кылган санымда-ла , ада-өгбем дег, арыг арын-нүүр-биле бараан бооп чоруурум Бурганга өөрүп четтирер-дир мен . ⁴ Карааң чажын сактып чор мен, ол ышкаш сени аажок көрүксеп тур мен: ужурал мени өөрүшкү-биле бүргептер боор! ⁵ Сеткилиң ханызындан бүзүрээниңни сактыр-дыр мен: кырган-аваң Лоида биле аваң Эвника база ынчалдыр бүзүреп чораан болгай. Оларныы дег бүзүрел сенде база бар дээрзинге ыяк бүзүрээр мен.

⁶ Аңаа сылдап алгаш, сагындырып ор мен: холдарымны сеңээ дегзиримге , Бургандан алганың ачы-буянныг белектиң одун өжүрбейн көр. ⁷ Бурган биске коргуушкуннуң сүлдезин эвес, а күчү-күштүң, ынакшылдың, бодамчалыг боорунуң Сүлдезин берген болгай . ⁸ Ынчангаш Дээргивисти херечилээринден ыятпа , Ол дээш хоругдаттырган менден база ыятпа. Харын Бурганның сеңээ бээри күшке даянгаш, Буянныг Медээни суртаалдааным ужун хилинчээмни үлежип көр . ⁹ Бурган бисти камгалааш, Ооң ыдыктыг улузу боору-биле кыйгырып алган. Ол ону бистиң кылган ажыл-херээвис дээш эвес , а Ооң Бодунуң сорулгазы база авыралы дээш кылган. Ол биске ук авыралын Христос Иисусту дамчыштыр үе-шагның мурнунда хайырлаан. ¹⁰ А ам Бурган оозун Камгалакчывыс Христос Иисустуң биске чедип келгенин дамчыштыр көргүскен. Христос өлүмнү күш чок болдурган база Буянныг Медээни дамчыштыр мөңге амыдырал биле өлүм чок чоруктуң чырыын бо делегейге эккелген .

¹¹ Бурган мени ол Буянныг Медээниң медээчизи, элчини база башкызы кылдыр шилип томуйлап каан! ¹² Мен ам ол бүгү чүүлдер дээш, хилинчек көрүп тур мен . Ынчалза-даа ол дээш ыятпас мен , чүге дээрге Кымга бүзүрээнимни билир болгаш, сөөлгү хүнге чедир Ооң меңээ идегээн чүүлүн кадагалап шыдаарынга бүзүрээр мен .

¹³ Менден дыңнааның сөстерден туттун, олар сеңээ шынныг өөредигниң үлегери болзун, Христос Иисус-биле сырый харылзаалыг апаргаш, бүзүрелдиг база ынакшылдыг бооп амыдыра. ¹⁴ Сеңээ идегээн бүгү буянны бисче сиңнигип кире берген Ыдыктыг Сүлдениң күжү-биле кадагала .

¹⁵ ·Асия девискээринде хамык улус, ооң иштинде Фигелл биле Эрмоген, мени каапкаш барганын билир сен . ¹⁶ Онисифорнуң өг-бүлезинге Дээрги-Чаяакчы Бодунуң өршээлин көргүссүн, чүге дээрге ол мени чеже-даа катап часкарып келген база мээң кинчилерим көргеш-даа , менден ыятпаан болгай . ¹⁷ Ол Римге кээп чорааш, кызымак дилеп тургаш, мени тып алган. ¹⁸ Сөөлгү хүн кээрге, Дээрги-Чаяакчы аңаа Бодунуң өршээлин хайырлазын. Ооң Эфеске меңээ кайы хире дузалаанын бодуң кончуг эки билир сен.

Христос Иисуска бердинген дайынчы

¹ Оглум Тимофей, Христос Иисустан келген авыралдан күш кирип көр. ² Хөй санныг херечилер мурнунга менден дыңнаан өөредиглериңни өскелерни өөредип шыдаар шынчы улуска идегеп берип каг. ³ Христос Иисустуң бердинген дайынчызы дег , хилинчекти кады шыдажып эртеринге белен бол . ⁴ Кандыг-даа дайынчы тайбың амыдыралдың ажыл-херээ-биле бодун чардыктырбас, ол чүгле ону албан-хүлээлгеже кыйгырган шериг даргазының аайындан эртпезин бодаар. ⁵ Дүрүмнер ёзугаар маргылдашпас болза, спортчу маргылдаага киришкен кым-даа тиилекчиниң шаңналын албас . ⁶ Кара дерин төп ажылдаан тараачын дүжүттен бодунуң үлүүн баштайгы ээлчегде алыр ужурлуг . ⁷ Мээң чүнү чугаалаанымны бодап көр. Бо бүгүнү угааптар арганы Дээрги-Чаяакчы сеңээ бээр.

⁸ Мээң суртаалдап турарым Буянныг Медээде чугаалааны дег, өлүглер аразындан катап дирлип келген Иисус Христосту – ·Давидтиң үре-салгалын сактып чор . ⁹ Буянныг Медээни суртаалдааным дээш, хилинчек көрүп, херектен дег бектиг-дир мен . Ынчалза-даа Бурганның медээзин бектээри болдунмас! ¹⁰ Бурганның шилээн улузу база Христос Иисусту дамчыштыр кээр камгалалды мөңге алдар-биле катай алзыннар дээш , оларны бодаанымдан, чүнү-даа шыдажып чор мен .

¹¹ Шынныг сөстер бо-дур :

«Ооң-биле кады өлген болзувусса,

Ооң-биле кады амыдыраар бис .

¹² Ам шыдажып турар болзувусса,

Ооң-биле кады чагырар бис.

Оон ойталаар болзувусса,

Ол база бистен ойталаар .

¹³ Аңаа шынчы эвес-даа болзувусса,

Ол шынчы бооп артар ,

чүге дээрге Ол Бодунга Боду өскерлир эвес» .

Бурганның чүүлзүнгени бараан болукчу

¹⁴ Хамык улуска бо дугайында сагындыр. Сөстер дугайында маргышка киришпезиннер дээш , оларны Бурганның мурнунга шыңгыы кичээндир. Дыңнакчыларга ооң ажыы чок, а чүгле хора чедирер . ¹⁵ Бурганның мурнунга шылгаттынган, алыс шынныг медээни улуска хажытпайн дамчыдып турар ажылчын, ыядыр чүвези чок кижи кылдыр көстүп, Ол сени чүүлзүнзүн дээш, бар шааң-биле оралдаш.

¹⁶ А Бурганны дорамчылаан хоозун чугаалардан чайлап чор . Оларга алзыпкан кижи Бургандан улам-на ырап бар чыдар. ¹⁷ Ындыг улустуң өөредии, ириңнедир оюлган дег, үгдереп, тарап-ла орар. Оларның аразында Именей биле Филит ийи бар. ¹⁸ Олар алыс шынның оруундан өскээр баргаш: «Катап дирлиишкин болуп каапкан» – дижип , чамдык улустуң бүзүрелин бойладып турарлар. ¹⁹ Ынчалза-даа Бурганның салып кааны быжыг үндезин мындыг сөстер-биле таңмалаттынгаш, тендиш дивейн тур: «Дээрги-Чаяакчы кымның Аңаа хамааржырын билир» , а ол ышкаш: «Дээрги-Чаяакчыга хамааржыр мен дээн кижи бүрүзү бузуттан ырай берзин» .

²⁰ Улуг бажыңда чүгле алдын, мөңгүн эвес, а ыяш, дой сава-саңга база бар : оларның чамдыызы хүндүлүг ажыглалда, а өскелерин хүн бүрүде ажыглаар. ²¹ Бодун хамык бузуттуг-бак чүүлдерден арыглап алган кижи хүндүлүг ажыглалдың савазы боор: ону ыдыктап каан, ол Ээге ажыктыг база кандыг-даа буянныг херек кылырынга белен турар.

²² Чалыы үениң күзээшкиннеринден чайла, Дээрги-Чаяакчыдан дуза дилеп, арыг чүрээнден кыйгырган улус-биле кады чөптүг-шынныг амыдыралче, бүзүрелче, ынакшылче болгаш амыр-тайбыңче чүткү . ²³ Мелегей болгаш ужур-утка чок маргылдааларга киришпе , оларның алгыш-кырыш-биле доостурун билир-ле болгай сен. ²⁴ Дээрги-Чаяакчының чалчазы боор кижи алгыш-кырыш кылбаза эки. Харын ол хамык улус-биле эвилең-ээлдек, өөредиг берип билир, шыдамыккай боор ужурлуг. ²⁵ Ол аңаа удур улусту безин эп-чөп-биле эдип-чазазын . Чүге дээрге Бурган оларга бачыдын миннип, алыс шынны билип аар арганы бээр чадавас . ²⁶ Олар ооң соонда сергей бээр база оларны аспактап алгаш, бодунуң күзел-соруунга чагыртырынче албадапкан эрликтиң туттуруундан ушта халый бээр чадавас .

Сөөлгү хүннерниң бүзүрел чогу

¹ Сөөлгү хүннерде аар-берге үе чедип кээрин билип ал . ² Улус чүгле боттарын бодаар, акша-мөңгүнге ынак , мактаныычал, туразы улуг, өгү-дылын караңнадырынга өй болу бээр. Олар ада-иезин дыңнавас, өөрүп четтирерин билбес, ыдыктыг чүүлдерден ойталаар, ³ ынакшыыр, кээргээр сеткили чок , нүгүлчү, бодун туттунуп билбес база каржы, буянны көөр хөңнү чок улус болу бээр. ⁴ Олар өскерликчи, хай-чагырга чок, адыыргак, боттарының күзээшкиннерин хандырарынга Бургандан артык ынак улус болу бээр. ⁵ Ындыг улус Бурганны хүндүлээриниң чүгле даштыкы хевиринден туттунар, а Ооң ылаптыг күжүнден ойталаар. Олар-биле черле чоокшулашпа.

⁶ Оларның чамдыызы улустуң бажыңнарынче оп-биле аагайлап киргеш, кошкак херээженнерни дуурайлап кааптар. Ол херээженнер дээрге бачыдының аяа долган, янзы-бүрү күзээшкиннериниң аайындан эртпес улус-тур. ⁷ Ындыглар кезээде-ле өөрениксээрлер, ынчалза-даа алыс шынны кажан-даа долузу-биле билип ап шыдавастар. ⁸ Моисейге удурланган Ианний биле Иамврий кара олчаан, ол улус база алыс шынга удур туржуп турар. Олар дээрге угааны бойлаан, бүзүрели меге, алыс шынга удур улус-тур. ⁹ Ынчалза-даа оларның оруу муңгаш: Моисейге удурланганнарның угаан чогу бодун көргүзүпкени дег , оларның угаан чогу база бүгү улуска көскү апаар.

Павелдиң Тимофейге чагыы

¹⁰ А сен мээң өөредиимге, канчаар чурттап келгенимге, амыдыралчы сорулгаларымга, бүзүрелимге, шыдамыымга, ынакшаанымга, туруштуумга, ¹¹ истедип-сүрдүрүүшкүннерим болгаш хилинчээмге мени эдерип келдиң. Антиохия, Икония болгаш Листрага мээң-биле болган бүгү чүүлдү , өске-даа хамык качыгдалдарымны билир-дир сен. Коргунчуг истеп-сүрүүшкүннерни шыдажып эрттим. Ынчалза-даа Дээрги-Чаяакчы мени оларның шуптузундан камгалап каан . ¹² Бурганны хүндүлеп, Христос Иисус-биле сырый харылзаалыг амыдыраар дээн улустуң шуптузу истедип-сүрдүре бээр . ¹³ А бузуттуглар болгаш хуурмак хейлер багынга улам өнемчип , өскелерни будулдурар, оон боттары база будулар.

¹⁴ А сен өөренип алганың, бүзүрээниң чүүлден салдынма. Сээң башкыларың кымнар боорун билир сен, ¹⁵ Ыдыктыг Бижилгелерни база чажыңдан-на билир сен . А Бижилгелер Христос Иисуска бүзүрээрин дамчыштыр кээр камгалалче аппаар мерген угаанны сеңээ берип шыдаар. ¹⁶ Бүгү Бижилге Бурганның аксындан үндүр тынган сөзү-дүр , ол алыс шынны өөредиринге, чазыгларны айтып, эдеринге, чөптүг-шынныг амыдыралды суртаалдаарынга ажыктыг. ¹⁷ Ындыг болганда, Бурганның кижизи бүрүнү-биле мергежээн база кандыг-даа буянныг херек кылыры-биле чепсегленген боор.

¹ Бурганның-даа мурнунга, ээп кээп хааннай бергеш, дириг-даа, өлүг-даа улусту шииде бээр Христос Иисустуң-даа мурнунга сеңээ айыткап тур мен: ² Бурганның медээзин суртаалда, таарымчалыг-даа, таарымчалыг эвес-даа үеде даалгаң күүседиринге белен бол, улусту эдип чаза, чазыгларын сойгала , сеткилин сергет база шыдамыккай өөрет. ³ Улустуң шынныг өөредигни дыңнаар безин хөңнү чок апаары үе чедип кээр. Олар боттарының күзээшкиннериниң аайы-биле, чүгле оларның дыңнаксаан чүүлүн чугаалаар янзы-бүрү башкыларны шилип эгелээрлер. ⁴ Олар алыс шындан кулаан бөөшкүннеп, хоозун меге тоолчургу чугаалар дыңнаарлар. ⁵ А сен бүгү чүүлге серемчилелдиг боор , бергелерни шыдажып эртер , Буянныг Медээни суртаалдаар ажыл-херээңни шуудадыр, бараан болуушкунуңну эчизинге чедир күүседир ужурлуг сен.

⁶ А меңээ хамаарыштыр – амы-тынымны өргүл дег салып каан-дыр , кызыл-дустаар үем чоокшулаан-дыр . ⁷ Мен төлептии-биле демисештим , мөңге амыдыралды, чарышты төндүр маңнадым , бүзүрелди кадагаладым. ⁸ Мени ам актыг-шынныг тиилекчиге бээр шаңнал манап турар , чөптүг Шииткекчи боор Дээрги-Чаяакчы, сөөлгү хүн кээрге, ону меңээ тыпсыр. Ол шаңналды чүгле меңээ эвес, а Ооң ээп кээрин ынакшыл-биле манаан бүгү улуска база тыпсыр.

Амы-хуунуң сүмелери болгаш дилеглери

⁹ Менче дүрген чедип кээрин кызыт, ¹⁰ чүге дээрге Димас мени каапкаш барды. Ол амгы бо делегейге хандыкшааш , Фессалоникаже чорупту. Крискент – Галатияда, а Тит – Далматияда барган. Мээң чанымда чүгле Лука бар . ¹¹ Кээриңде, Маркты эдертип эккел, чүге дээрге ол мээң бараан болуушкунумга дузалап шыдаар кижи. ¹² Мен Тихикти Эфесче чорудуптум.

¹³ Бээр кээриңде, Троадада Карп сугда каапкан тонумну, а ол ышкаш номнарымны, ылаңгыя эттээн хөмде бижээннерин, эккеп көр.

¹⁴ Александр дарган меңээ эңдерик хөй хора халдаткан кижи, ооң ажыл-херээ дээш, Дээрги-Чаяакчы ону кезедир! ¹⁵ Сен база оон кичээн, чүге дээрге ол бистиң суртаалывыска аажок удурланып турар-дыр.

¹⁶ Мээң херээмни шииткел черинге бир дугаар дыңнап турда, кым-даа меңээ болчуп келбеди, хамык улус мени каапкаш барды. Ону оларның буруузу кылдыр көрбезинем! ¹⁷ Ынчалза-даа Дээрги-Чаяакчы мээң-биле кады бооп, хамык өске чоннар улузу ону дыңназын дээш, Буянныг Медээни аксым-биле суртаалдаар күштү меңээ берген. Ол мени арзылаң аксындан камгалады . ¹⁸ Дээрги-Чаяакчы мени кандыг-даа бузуттан камгалаар база Бодунуң Дээрде Чагыргазынче бүдүн-бүрүн чедире бээр. Аңаа кезээ мөңгеде алдар! ·Аминь.

Түңнел байыр чедириишкиннери

¹⁹ Прискилла биле Акилага , а ол ышкаш Онисифорнуң өг-бүлезинге байырым чедир . ²⁰ Эраст Коринфиде артып калган, а Трофимни мен аарыының ужун Милитте каапкан мен. ²¹ Кыш бетинде бээр чедип кээрин оралдаш. Эввул, Пуд, Лин, Клавдия база хамык бүзүрээн ха-дуңмавыс сеңээ байыр чедирип турлар.

²² Дээрги-Чаяакчы сеткил-чүрээң-биле кады болзун! Бурганның авыралы силерге доктаазын!