2 Фессалоникчилерге

Фессалоникчилерге ийиги чагаа

Киирилде

Павел бо чагааны Фессалоникчилерге бирги чагааның соонда үр болбайн бижээн хире.

Фессалоникада чамдык христианнар Иисустуң ээп кээриниң дугайында Павелдиң өөредиин шын эвес билип алган болган. Олар Павелдии деп бодааны меге чагаа алгаш, будалы берген чадавас. Кандыг-даа болза, олар делегейниң төнчүзүнүң дугайында мурнундазындан артык хөлзеп-дүвүреп, Иисус чер кырынче доп-дораан эглип кээр деп санап турганнар. Харыызынга Павел Христостуң чер кырынче ээп кээрин мурнай болур бир-ле көскү демдектер бар дээрзин тайылбырлап турар. Ынчангаш христианнар истеп-сүрүүшкүн ортузунга шыдамык болур болгаш идегеп манап чурттаар, ынчалза-даа моон соңгаар кандыг-бир ажыл кылыры утка чок апарган-даа дег, хөлес-шөлээн болбас ужурлуг.

Киирилде сөстер

¹ Павел, Сила база Тимофейден байыр. Фессалоникада Бурган Адавыс болгаш Дээрги Иисус Христоска бүзүрээннер ниитилелинге бижидим.

² Бурган Адавыс болгаш Дээрги Иисус Христостан келген авырал биле амыр-тайбың силерге доктаазын!

Бурганның шииткелиниң дугайында

³ Ха-дуңма, силер дээш, Бурганга үргүлчү өөрүп четтирер ужурлуг бис . Ындыг боору чөп, чүге дээрге силерниң бүзүрелиңер өй-кызыгаар чок өзүп, бот-боттарыңарга ынакшылыңар улам улгадып орар. ⁴ Ынчангаш бис боттарывыс-ла силерниң шыдажып эртип турарыңар бүгү истеп-сүрүүшкүннер, хилинчектер ортузунга туруштууңар база бүзүрелиңер дугайында Бурганга бүзүрээннерниң өске ниитилелдеринге чоргаарал-биле чугаалап турар бис.

⁵ Бурганның шииткели чөптүг дээрзиниң бадыткалы бо-дур: ол дээш, хинчектенип турарыңар Бурганның Чагыргазынче алызы барып киреринге төлептиг кылдыр санаттырар силер. ⁶ Бурган чөптүг: хилинчээңер дээш буруулуг улуска Ол хилинчек-биле орнун эгидер , ⁷ а ам хилинчек көрүп чоруур силерге бис-биле катай Дээрги Иисустуң ээп кээр хүнүнде амыр-дышты хайырлаар. Христос дээрден Бодунуң күчүлүг төлээлери-биле кады ⁸ оттуң чалбыыжынга бүргеткен чедип келгеш , Бурганны билип албаан база Дээргивис Иисустуң Буянныг Медээзинге чагыртпаан улуска кеземчени эккээр. ⁹ Олар мөңге өлүмнүң кеземчези-биле санажыр: оларны Дээрги-Чаяакчының чанынга турарындан база Ооң өндүр бедик күжүнден чарып, ойладып чорудуптар . ¹⁰ Аңаа бүзүрээн бүгү улузун магададып, оларның аразынга алдаржыыры-биле Христостуң чедип кээри хүнде ол бүгү чогуп бүдер . Бистиң херечилеливиске бүзүрээш, силер база Ооң улузунуң санынче кирген силер.

¹¹ Ынчангаш силер дээш үргүлчү мөргүп, Бургандан дилеп тур бис : Ол силерни Бодунуң олче кыйгырган амыдыралынга төлептиг кылып кагзын, силерниң хамык буянныг сагыжыңарны, бүзүрээниңерден укталган ажыл-херээңерни Бодунуң күжү-биле эчизинге чедирзин. ¹² Ынчан силерниң ачыңарда Дээргивис Иисустуң ады алдаржыыр, а силер база Бурганывыстың болгаш Дээрги Иисус Христостуң авыралы-биле Ооң ачызында алдаржыыр силер.

Бузуттуг язы болгаш Иисус Христостуң ээп кээри

¹ Ха-дуңма, Дээргивис Иисус Христостуң ээп кээринге база бистиң Ону уткуур дээш, канчаар чыглырывыска хамаарыштыр силерден дилээривис болза: ² угааныңар ышкынмаңар база Дээрги-Чаяакчының чедип кээр ужурлуг хүнү келген-дир деп турар кандыг-даа өттүр билген медеглелдер, ·ажыдыышкынныг сөстер азы бисти бижээн деп турар меге чагаалар-даа силерни дүүретпезин. ³ Силер кымга-даа, канчаар-даа болза дуурайлатпаңар . Чүге дээрге Дээрги-Чаяакчының ол хүнү кээр мурнуу чарыында баштай Бурганга удур тура халыышкын үнер база өлүм-чидимге чыгаттырган, бузуттуг-бак язы чедип кээр ужурлуг . ⁴ Ол язы улустуң «Бурган» дээри азы ыдыктыг деп мөгеери бүгү чүүлге удурланып, бодун өрү көрдүнер, оон туржук, Бурганның өргээзинге дүжүлгеже саадаптар база бодун «Бурган мен» деп чарлаттынар .

⁵ Силер-биле кады тургаш, ол дугайында чугаалап турдум чоп, сагынмас-тыр силер бе? ⁶ Ол язы чогуур үе-шагы кээр бетинде бодун көргүзер дээрге, ону чүү дуй туруп турарын ам билир силер. ⁷ Бузуттуң чажыт күштери амдыгааштан салдарын көргүзүп кирипкен , ынчалза-даа амдыызында оларны доктаадып турар күш, Бурган ону оруктан чайлатпааже, бузуттуң оруун дуй турарын уламчылаар. ⁸ Ынчан ол бузуттуг язы бодун ажыы-биле көргүзер, ынчалза-даа Дээрги Иисус Бодунуң ээп кээр хүнүнде ону Бодунуң аксындан үнген тыныш-биле өлүрүп, узуткап каар . ⁹ Бузуттуг язының көстүп кээри – эрликтиң ажыл-херээ боор – ол улуг күчү-күш-биле меге кайгамчык демдектер кылып база ¹⁰ янзы-бүрү хевирниң бузуттуг дуурайлаашкыны бооп, бодун илередир. Алыс шынга ынакшыырындан база ооң ачызында камгалал алырындан ойталааш, өлүмче бар чыдар улус аңаа алзып алыр. ¹¹ Ынчангаш Бурган оларны будулар чорукка чагыртыптарга , олар мегеге бүзүрей бээр. ¹² Алыс шынга бүзүревейн, бузутка алыскан хамык улус шииттирзин дээш, Ол ынчаар кылган.

Чаныш-сыныш чок туржуңар

¹³ Дээрги-Чаяакчының ынакшааны ха-дуңма, силер дээш Бурганга үргүлчү өөрүп четтирер ужурлуг бис! Чүге дээрге Ыдыктыг Сүлдениң силерни Бурганга аңгылаанын дамчыштыр база алыс шынга бүзүрээниңер дамчыштыр камгалалды алзыннар дээш, Бурган силерни баштайгы дүжүдү кылдыр шилип алган. ¹⁴ Дээргивис Иисус Христостуң өндүр бедиинден үлүг алзыннар дээш, силерге суртаалдаанывыс Буянныг Медээ дамчыштыр Ол силерни ук камгалалче кыйгырган болгай . ¹⁵ Ха-дуңма, ынчангаш чаныш-сыныш чок туржуңар! Силерге аас-биле-даа, чагаага бижип-даа дамчытканывыс өөредигден быжыы-биле туттунуңар.

¹⁶ Ам Дээргивис Иисус Христос болгаш биске ынак база Бодунуң авыралы-биле мөңге аргалалды, ачылыг идегелди биске хайырлаан Бурган Адавыс ¹⁷ чүректериңерни сорук киирзин, а ол ышкаш кандыг-даа буянныг ажыл-херээңер, чугаа-сөзүңер дээш, быжыктырзын .

Бис дээш мөргүңер

¹ Ха-дуңма, түңнелинде бис дээш мөргүүрүңерни дилеп тур бис . Дээрги-Чаяакчының медээзи оккуру-биле нептереп, силерниң араңарга дег, алдаржый берзин. ² Оон аңгыда будалган болгаш бузуттуг-бак улустан Бурган бисти камгалазын дээш мөргүңер : чамдык улус Буянныг Медээге бүзүревес-ле болгай.

³ Ынчалза-даа Дээрги-Чаяакчы сөзүнге шынчы . Ол силерни быжыктырар база бузуттуг эрликтен кадагалаар . ⁴ А бис силерниң айыткан чүүлүвүстү күүседип келгениңерге база ам-даа күүседириңерге Дээрги-Чаяакчының мурнунга ыяк бүзүрелдиг бис. ⁵ Дээрги-Бурган-Чаяакчы чүректериңерге Бодунуң бээри ынакшылче база Христостуң бээри шыдамык чорукче орукту айтып берзин .

Ажыл чок орбаңар

⁶ Ха-дуңма, Дээргивис Иисус Христостуң ады-биле силерге айыткап тур бис: кылыр ажыл чок амыдырап чоруур база бистен шиңгээдип алганы өөредигни эдербес ха-дуңмаңарның чанынче чагдаваңар. ⁷ Бисти канчаар өттүнер ужурлууңарны боттарыңар билир-ле болгай силер . Чүге дээрге силерниң араңарга чалгаа улус диртпээн бис. ⁸ Кымның-даа кескинди хлевин халаска чип, азыратпадывыс, харын кайы-бирээңерге аартык болбас дээш, дүне-хүндүс дивейн, карак кызыл ажылдап келдивис . ⁹ Силерден дуза дилээр эргевис чогундан-даа эвес , а бистен үлегер аарыңарны күзээш, ынчаар кылдывыс . ¹⁰ Кады турар үевисте, силерге мындыг дүрүм арттырган бис: «Кым ажылдаар хөңнү чогул, ол чем чивезин!»

¹¹ А ам араңарда чамдык улустуң кылыр ажыл чок чурттап турары биске дыңналып тур. Олар боттары каяа-даа ажылдавайн, өскелерниң ажыл-херээнче холгаарлаарынга өйлежип турар дээр-дир . ¹² Ындыг улусту химиренмейн ажылдап, амыдыраар кошкулун боттары тыпсын деп, Дээрги Иисус Христостуң адындан дужаап база кыйгырып тур бис. ¹³ А силер, ха-дуңма, буян тарыырын могаг-шылаг чокка уламчылаңар-ла .

¹⁴ Бо чагаада айтыышкыннарывысты дыңнавас кандыг-бир кижи бар болза, ону демдектей көрүп алыңар. Аңаа ыянчыг болзун дээш, ооң-биле харылзашпаңар. ¹⁵ Ындыг-даа болза, аңаа дайзыныңарга дег хамаарылга көргүспеңер, а ха-дуңмаңарны дег, билиндир сургаңар .

Түңнел байыр чедириишкиннери

¹⁶ Амыр-тайбыңның үнер дөзү боор Дээрги-Чаяакчы Боду амыр-тайбыңны силерге кажан-даа, кандыг-даа арга-биле хайырлазын. Дээрги-Чаяакчы шуптуңар-биле кады болзун! ¹⁷ Бодумнуң холум-биле бижип олур мен : Павелден байыр . Ол чагаа мээңии-дир деп көргүзер дээш, чагааларымның шуптузун ынчаар демдектеп тур мен. ¹⁸ Дээргивис Иисус Христостуң авыралы силер бүгүдеге доктаазын!