1 Тимофейге

Тимофейге бирги чагаа

Киирилде

Тимофей болза еврей иелиг, грек адалыг кижи турган. Ол Павелдиң эң бердинген дузалакчыларының бирээзи апарып, Буянныг Медээни суртаалдаар сорулгалыг аян-чоруктарга ону хөй чыл иштинде эдерип чоруп келген. Бо чагаада Павел бодунуң кады ажылдап турар аныяк эжин хей-аът киирип, христиан ниитилелче канчаар сагыш салыр талазы-биле аңаа чагыг-сургаал берип турар.

Чагааны ийи кезекке чарып болур. Бирги кезээнде (1–3 эгелер) Павел баштай Тимофейге меге өөредигге удурланыр херек дээрзин сагындырган. Ооң соонда ол христиан ниитилелдиң амыдыралында чурум дугайында, ылаңгыя Бурганга мөгейиишкинге хамаарыштыр чугаалап турар. Оон ыңай ол бүзүрээннер ниитилелиниң удуртукчулары болгаш оларның дузалакчылары кандыг болур ужурлуунуң дугайында чугаалаан. Ийиги кезээнде (4–6 эгелер) Павел Тимофейни Христоска бүзүрээриниң үлегер-чижээ болуп, ниитилелдиң кежигүннерин шын өөредиринге бодун бараан болдурар кылдыр сургап турар. Павел ол ышкаш Тимофейге бүзүрээннерниң янзы-бүрү бөлүктеринге (кырган, аныяк, дулгуяк херээженнер, кулдар) хамаарышкан сүмелер берген.

Киирилде сөстер

¹ Камгалакчывыс Бурганның база идегеливис Христос Иисустуң айтыышкыны-биле Христос Иисустуң элчини болган Павелден байыр. ² Бүзүреливис аайы-биле алыс шынныг оглум болган Тимофей сеңээ бижидим .

Бурган Адавыстан база Дээргивис Христос Иисустан келген авырал, өршээл база амыр-тайбың сеңээ доктаазын!

Меге өөредиглер дугайында кичээндириг

³ Македонияже чоруп тура, сенден дилээним дег, Эфеске артып каарыңны күзеп тур мен. Ында чамдык улус меге өөредиглер нептередип турар-дыр. Олардан соксаарын неге. ⁴ Оларга тоолчургу чугаалардан база төнмес-батпас ада-өгбе даңзылары тургузарындан ойталаарын чугаала . Ол бүгү чүгле аас-дыл үндүрер база улустуң кичээнгейин бүзүрелге үндезилээн Бурганның бодалындан чардыктырар. ⁵ А ол негелдениң сорулгазы – арыг чүректен, арыг арын-нүүрден, ак сеткилдиг бүзүрелден үнер ынакшылды өөскүдери боор . ⁶ Чамдык улус ол бүгүден хая көрүнгеш, ужур-утка чок чулчуругже дүлнү берген-дир . ⁷ Олар ыдыктыг хоойлу башкылары болуксаар, ынчалза-даа чүнү чугаалап турарын-даа, оон туржук, чүнүң дугайында улусту бүзүредип турарын-даа угаап билбестер.

⁸ Чөп ажыглаар болза, ыдыктыг хоойлу эки дээрзин билир бис . ⁹ Бурганның мурнунга актыг улуска ыдыктыг хоойлунуң херээ чогун билир бис . Ол дараазында улуска херек: хоойлу-дүрүм үрекчилеринге, чагырга билбестерге; Бурганны хүндүлевес база бачыттыг улуска; Бурганны дорамчылап, Ооң күзелинче сагыш салбас улуска; ада-иезинче холун көдүрерлерге, өлүрүкчүлерге; ¹⁰ самыырааннарга база эрлер-биле холбажып турар эрлерге; кижилер оорлап, садарларга, мегечилерге база мегелеп херечилээрлерге; алыс шынныг өөредигге удур кандыг-бир чүве үүлгеткеннерге. ¹¹ Ол өөредиг ачы-буянныг Бурганның алдарлыг Буянныг Медээзинде сиңниккен, а ук Буянныг Медээни меңээ бүзүреп дааскан .

Бурганның өршээли дээш өөрүп четтириишкин

¹² Ажыл-херээмни кылыр күштү меңээ берген Дээргивис Христос Иисуска өөрүп четтирдим. Чүге дээрге Ол мени шынчы кижи деп көргеш, Бодунга бараан боор кылдыр томуйлаан. ¹³ Ооң мурнунда Бурганны бак сөглеп, бүзүрээн улусту истеп-сүрүп, дора көрүп-даа чорзумза , Бурган меңээ өршээлин көргүскен, чүге дээрге мен ол бүгүнү үүлгедип тура, чүве билбес база бүзүревээн турдум . ¹⁴ Дээргивис Бодунуң эгээртинмес авыралын Христос Иисустан келген бүзүрел болгаш ынакшыл-биле кады менче сиңниктир төктү.

¹⁵ Чигзиниг чок хүлээп ап база бүзүреп боор шынныг сөстер бо-дур : Христос Иисус бо делегейже бачыттыг улусту камгалап аар дээш келген . Мен ындыгларның эң багы-даа болзумза, ¹⁶ өршээл алдым, чүге дээрге Христос Иисус Бодунуң кызыгаар чок шыдамыын бачыттыгларның эң багы боор меңээ көргүзерин күзээн. Христоска бүзүрээш, мөңге амыдыралды алыр хамык улуска мээң үүле-чолум үлегер болган. ¹⁷ Мөңге Хаанга, өлүм чок, көзүлбес дың чаңгыс Бурганга кезээ мөңгеде мактал-хүндү база алдар доктаазын! ·Аминь.

Павелдиң Тимофейни сорук кииргени

¹⁸ Оглум Тимофей, кажан-бир шагда сеңээ хамаарыштыр чугаалаан өттүр билген медеглелдерге сылдап , сеңээ мындыг чагыг берип ор мен. Сен ол сөстер-биле чепсегленгеш, эки чаалажып көр . ¹⁹ Бүзүрелиңни база арыг арын-нүүрүңнү кадагала, чүге дээрге ону тооваан чамдык улустуң бүзүрели буураан болгай. ²⁰ Ындыгларга Именей биле Александр хамааржыр . Бурганны бак сөглээр чоруун кагдырар дээш, мен оларны эрликтиң эргезинге хүлээдип берипкен мен .

Мөргүл дугайында

¹ Сенден чүден артык дилээм бо-дур: Бурганга дилеглерлиг, чалбарыглыг, өөрүп четтириишкинниг, өскелерге болушкан мөргүлдер – бүгү улус дээш мөргүлдер болзун. ² Хааннар биле эрге-чагырга ээлээннер база ол санче кирзин . Бистиң оожум база амыр-шөлээн, Бурганны хүндүлеп, Аңаа төлептиг амыдырап шыдаарывыс дээш, ол ындыг болзун. ³ Ындыг боорга, эки-даа, Камгалакчывыс боор Бурганга таарымчалыг-даа . ⁴ Бурган бүгү улустуң камгалалды алырын база алыс шынны билип аарын күзеп турар . ⁵ Чүге дээрге Бурган-даа чаңгыс, Бурган биле кижи төрелгетенниң эптештирикчизи – Боду база кижи – Христос Иисус-даа чаңгыс! ⁶ Ол Бодун шупту улусту хостаар дээш өргээн . Бурганның бодалын Ол чогуур үеде ынчалдыр херечилээн . ⁷ Ооң ужурунда Бурган мени бүзүрел биле алыс шынны өске чоннар улузунга медеглезин дээш , элчин база башкы кылдыр шилип томуйлап каан . Силерге чугаалаан чүвем шынныг , мен мегелевейн тур мен!

⁸ Ынчангаш эр улус каяа-даа болза мөргүп чоруурун күзеп тур мен. Олар килеңневейн, алгыжып-кырышпайн, актыг холдарын өрү сунуп, мөргүзүннер. ⁹ Шак ынчаар херээженнер база ужур-чурумга таарыштыр кеттинип, эгениичел база бодамчалыг чоруу-биле боттарын каастаар ужурлуг. Бажын аянныг таартканы, алдыны, ак шуру эртинези база үнелиг хеви-биле каастанмазыннар . ¹⁰ А ооң орнунга Бурганны хүндүлээр дээн херээженнер буянныг херектери-биле боттарын каастаар ужурлуг. ¹¹ Өөредиг ап турар херээженнер оожум, бүрүнү-биле дыңнангыр болзуннар . ¹² Херээжен кижиниң өөредирин азы эр кижини чагырарын чөпшээревейн тур мен. Ол бодун оожум ап чорзун . ¹³ Бурган баштай Адамны, а ооң соонда Еваны чаяаган-на болгай . ¹⁴ Адам-даа эвес, а Ева дуурайлаткаш, Бурганның хоойлузун үреди чоп! ¹⁵ Ындыг-даа болза, херээжен кижи бүзүрелдиг, ынакшылдыг, ыдыктыг база эки мөзүлүг амыдырап чоруур болза, ол ажы-төл божуп, камгалалды алыр .

Христиан ниитилелдиң удуртукчулары

¹ Шынныг сөстер бо-дур : кандыг-бир кижи христиан ниитилелдиң удуртукчузу боор дээш чүткүүр болза, ол эки ажыл-херек кылыксаан-дыр. ² Ынчаарга удуртукчу кижи ону буруудаткы дег чүве чок, кадайынга өскерилбес , бодун туттунуп билир, бодамчалыг, төлептиг алдынып чоруур, хүндүлээчел ээ, улусту өөредип шыдаар кижи боор ужурлуг . ³ Ол арагаже сундукпас, содаачы эвес, оожум-топтуг, эп-найыралдыг , акша-мөңгүнге чазыйлавас ; ⁴ бодунуң өг-бүлезин эки башкарып шыдаар, дыңнангыр база ону бүгү талазы-биле хүндүлээр ажы-төлдүг кижи боор ужурлуг. ⁵ (Бодунуң өг-бүлезин башкарып шыдавас кижи Бурганга бүзүрээннер ниитилели дээш канчап сагыш човаарыл?) ⁶ Ол кижи Христоска чоокта чаа бүзүрээн улус санынче кирбес ужурлуг, оон башка бодун өрү көрдүне бээр база эрликке дөмейлештир шииттирип аар . ⁷ Христиан ниитилелден дашкаар ооң ат-сураа база чүгле эки боор ужурлуг, оон башка ол бак атка кирип, эрликтиң дузаанга туттуруп аар .

Христиан ниитилелде дузалакчылар

⁸ Дузалакчылар база хүндүткелге төлептиг, ак сеткилдиг, арагага сунду чок, алыксак-чиксек эвес улус боор ужурлуг . ⁹ Олар арыг арын-нүүр-биле бүзүрелдиң ханы алыс шынын эдерер ужурлуг. ¹⁰ Дузалакчыны база баштай шенээр херек. Оларга удур кандыг-даа буруудадыышкын тывылбаза, дузалакчылар бооп бараан болгайлар аан.

¹¹ Оларның кадайлары база хүндүткелге төлептиг, хоп-чип дажывас, бодун туттунуп билир, бүгү тала-биле бүзүреп боор улус болзун . ¹² Дузалакчылар кадайларынга өскерилбес{*}, ажы-төлүн база өг-бүлезин эки башкарып шыдаар улус боор ужурлуг. ¹³ Эки бараан бооп келген улус хүндүткелдиг байдалды чедип алыр база Христос Иисуска бүзүрелди коргуш чок суртаалдаар боор.

Өндүр улуг чажыт

¹⁴ Бо бүгүнү сеңээ бижидим, ооң кадында удавас сеңээ чеде бээримге идегеп олур мен. ¹⁵ Саадай берзимзе, дириг Бурганга бүзүрээннер ниитилелинге – алыс шынның чөленгиижи болгаш үндезининге, Бурганның өг-бүлезинге бодуңну канчаар алыр ужурлууңну билип алзын дээш, бижээним ол.

¹⁶ Ийет, маргыш чок, чүдүлгевистиң чажыды өндүр улуг:

Христос кижи мага-боттуг бооп чедип келген ,

Ооң чөптүг-шынныын Сүлде көргүскен,

Ону ·дээрниң төлээлери көрген,

Ооң дугайында Буянныг Медээни элчиннер аймак-чоннарга суртаалдаан,

бо делегейниң улузу Аңаа бүзүрей берген база

Ол Бодунуң өндүр бедиин көргүзүп, дээрже көдүрлүп үне берген .

Меге башкылар дугайында

¹ Сөөлгү үелерде чамдык улустуң бүзүрелден ойталай бээрин Ыдыктыг Сүлде тодаргай чугаалап турар. Олар мегениң сүлделерин дыңнап , буктардан укталган өөредиглерни эдере бээрлер . ² Шак ындыг өөредиглер арын-нүүрүн кызыткан демир-биле оя чиртип алганзыг, ийи арынныг мегечилерден кээр. ³ Олар улустуң өгленирин азы кандыг-бир чем чиирин хоруп турарлар . А ол чемни, бүзүрээн азы алыс шынны билир улус өөрүп четтирип хүлээп алзын дээш, Бурган чаяаган болгай. ⁴ Бурганның бүгү чаяалгазы эки болганда, өөрүп четтирип хүлээп ап турар кандыг-даа чүүлдерден ойталаан херээ чок . ⁵ Чүге дээрге ону Бурганның сөзү-биле база мөргүл-биле ыдыктап турар.

⁶ Бүзүрээн ха-дуңмаңга шак ындыг суртаалдан берзиңзе, Христос Иисустуң шынчы чалчазы: бүзүрелдиң сөстери-биле база эдергениң алыс шын өөредиг-биле доруктур азыраткан кижи боор сен. ⁷ А Бурганны дорамчылаан мелегейзиг чугаалардан чайлап чор , бодуңну Бурганны хүндүлээр амыдыралга дадыктыр. ⁸ Мага-бот дадыктырары чүгле чаңгыс талазы-биле ажыктыг боор, а Бурганны хүндүлээри бүгү талазы-биле ажыктыг, чүге дээрге ында амгы-даа, келир-даа амыдыралдың аазаашкыны бар. ⁹ Бүрүн хүлээп алырынга төлептиг шынныг сөстер ол-дур . ¹⁰ Бүгү улустуң, ылаңгыя бүзүрээннерниң, Камгалакчызы боор дириг Бурганга идегээш, карак кызыл ажылдап, ол идегел дээш, демисежип чоруур-дур бис .

¹¹ Улустан ону негеп, ынчаар өөрет. ¹² Аныяк бооруңга, кым-даа сени херекке албайн барбазын . Бүгү чүүлдер талазы-биле: чугаа-сөзүң, бодуңну ап чорууруң, ынакшылың, бүзүрелиң база арыг-чаагайың-биле бүзүрээннерге үлегер бол . ¹³ Мен келгижемге чедир, Бижилгени улуска номчуурунга, суртаалдаарынга база өөредиринге бодуңну бараалгадып көр. ¹⁴ Удуртукчулар холдарын сеңээ дээскеш, өттүр билир медеглеп турда , сеңээ берген Ыдыктыг Сүлдениң ачы-буянныг белээн херексевейн барба . ¹⁵ Бо бүгүнү карак кызыл кылып көр, бүгү бодуңну хүлээлгелериңге бараалгат, ынчан сээң өзүлдеңни хамык улус көрүп каар. ¹⁶ Бодуңну болгаш өөредип турар чүүлүңнү кичээнгейлиг хайгаара. Ол бүгүден быжыг туттун. Ынчаар кылып чоруур болзуңза, бодуңну-даа, дыңнакчыларыңны-даа айыылдан кадагалап алыр сен .

Бүзүрээннерге хамаарыштыр хүлээлге

¹ Назыны дөгээн ашактарны доңгун чемелеве, а бодуңнуң ачаң-биле чугаалашканың дег, эвилең чугаалаш. Аныяк эрлерге дуңмаларыңга дег хамаарылгалыг бол. ² Кырган кадайларга – аваңга дег, аныяк херээженнерге – кыс дуңмаларыңга дег, арыг-чаагай топтуг хамаарылгалыг бол.

³ Ылап чааскаан арткан дулгуяк кадайлар дээш сагыш чова. ⁴ Дулгуяк херээженниң ажы-төлү азы уругларының уруг-дарыы бар болза, олар ада-иезиниң, кырган ада-иезиниң азыралын чандырып, чүнү-даа мурнай боттарының өг-бүлезиниң улузу дээш сагыш човап, бүзүрээнин херек кырында көргүзүп өөрензиннер. Ындыг чорук Бурганга таарымчалыг-дыр . ⁵ Чааскаан арткан, сагыш човап чедип кээр кижизи чок ылап дулгуяк кадай Бурганга идегээр база дүн-хүн дивейн мөргүп, Оон дуза дилээр. ⁶ А бодунуң таалалын сүрүп чурттаан дулгуяк херээжен диригге-ле өлүп калган боор . ⁷ Кым-даа оларны чемелээр чылдак тыппазын дээш, ол бүгүнү дулгуяктар биле оларның төрелдеринден неге. ⁸ А кандыг-бир кижи бодунуң төрелдери, ылаңгыя өг-бүлези дээш, сагыш човавас болза, ол кижи бүзүрелден ойталаан боор база бүзүрели чок кижиден дора боор.

⁹ Дулгуяк кадайлар даңзызынче чүгле алдан хардан эвээш эвес назылыг, ашаанга өскерилбейн чораан улусту киир бижи. ¹⁰ Олар дээрге буянныг херектер кылып чорааны-биле билдингир, ажы-төлүн өстүр азырап каан, аалчыларга хүндүлээчел, Бурганның улузунга бараан болуп келген, хай-халапка таварышканнарга дузалап чораан база янзы-бүрү буянныг херектерге боттарын бараалгаткан херээженнер болзун .

¹¹ А аныяк дулгуяктарны даңзыже киирбе. Оларның таалал сүрген күзээшкиннери Христоска бердингенинден күштүг апаарга, олар ашакка барыксай бээр. ¹² Христоска берген аазаашкынын ээлевээн дээш, олар буруу шавыышкынга таваржырлар. ¹³ Оон аңгыда олар, кылыр чүве чок боорга, бажыңнар кезип маңнажыр чаңчыл тып аарлар. Ажыл кылбас, амыр-шөлээн боорундан аңгыда, хоп-чип база дажып, киришпеске киржип , чугаалавас ужурлуг чүвезин чугаалап чоруп бээрлер-дир. ¹⁴ Ынчангаш аныяк дулгуяк кадайларның ашакка барып аарын саналдап тур мен . Олар ажы-төл төрүп, бажың-балгадын ажаазыннар база дайзыннарывыска бисти бак сөглээр чылдак бербезиннер . ¹⁵ Оон башка дулгуяк кадайлар аразында бүзүрелинден ойталааш, эрликти эдерип чорупканнар ам бар апарган болгай. ¹⁶ Кандыг-бир бүзүрээн херээжен дулгуяк арткан херээжен төрелдерлиг болза, олар дээш сагыш човаашкынны христиан ниитилелче чая кагбайн, бодунга хүлээнип аар ужурлуг. А христиан ниитилел ылап чааскаан арткан дулгуяктарга дузалашсын.

¹⁷ Башкарар ажылын эки кылып турар удуртукчулар, ылаңгыя суртаалдаар база өөредир ажылга кызымактар, мактал-хүндү биле төлевир алзыннар . ¹⁸ Чүге дээрге Бижилгеде мынчаар чугаалаан:

«Тараа бастырып турар шарыга хээрик кедирбе» ,

а ол ышкаш:

«Ажылдаан кижи төлевир алырынга төлептиг боор» .

¹⁹ Ийи азы үш херечи бадыткаваанда, удуртукчуга удур буруудадыышкынны хүлээве . ²⁰ Өске улус база сезинзин дээш , бачыт үүлгедикчилерин хөйнүң мурнунга сойгала .

²¹ Бурганның, Христос Иисустуң база дээрниң шилиттинген төлээлериниң мурнунга сеңээ айыткап тур мен: бо айтыышкыннарны эдерерде, кымны-даа ылгай көрбе, чүнү-даа чаңгыс талалап кылба.

²² Дээрги-Чаяакчыга бараан боору-биле ыдыктап, кымга-даа далаш-биле холуң дээспе , өскелерниң бачыдынга киришпе, бодуңну арыг хевээр кадагала .

²³ Моон соңгаар чүгле суг ижип турба, сээң ижин-баарыңга дузалаар кылдыр бичии виноград арагазындан база иш, чүге дээрге болганчок-ла аарыыр-дыр сен .

²⁴ Чамдык улустуң бачыттары амдыгааштан көңгүс илдең база шииткелче оларны дорт аппар чоруур, а өскелерниң бачыттары сөөлзүредир илереп кээр. ²⁵ Буянныг херектер база ындыг: чамдыызы амдыгааштан илдең, а ындыг көскү эвестери дөмей-ле алызы барып илерей бээрлер.

¹ Бурганның ады база христиан өөредиг бак атка кирбезин дээш, кулдар ээлерин бүрүн алдар-хүндүге төлептиг улус кылдыр көрзүннер . ² Христиан ээлерлиг кулдар, бүзүрээн ха-дуңмавыс дээш-ле , оларны хостуг чаңнавазыннар. Харын-даа улам чүткүлдүг бараан болзуннар, чүге дээрге кулдар ханы ынак, бүзүрээн ха-дуңмазынга бараан болуп, оларга ачызын көргүзүп турарлар-дыр.

Меге өөредиг база ылап шын эртине-байлак

³ Бо бүгүге өөредир база сиңниктир сургаар ужурлуг сен. Оон өске чүүлдерге өөредир, Дээргивис Иисус Христостуң шынныг сөстеринден база Бурганны хүндүлээри-биле дүгжүр өөредигден ойталаар кандыг-бир кижи турар болза , ⁴ ол дээрге менээргенгеш, сыңый дег үрдүне берген, а боду чүнү-даа билбес, аас-дыл кылып, хоозун маргылдаа үндүреринге хандыкшылдан аараан күжүр-дүр. Ооң оозундан чүгле адааргал, алгыш-кырыш, бак сөглежири, кара сагыштыг каразыглар; ⁵ угааны чайылган, алыс шындан астыккан улустуң аразынга төнмес-батпас аас былаажыр чорук үнер. Олар Бурганга бараан боорун чүгле байып аарынче орук кылдыр көрүп турарлар.

⁶ Ийет, Бурганны хүндүлээри бодунуң байдалынга сагыжы ханар кижиге кончуг улуг олча-кежик болбайн канчаар. ⁷ Бо делегейже чүнү-даа эккелбээн бис, моон чоруурда база чүнү-даа ап ап шыдавас бис . ⁸ Чемивис биле идик-хевивис-ле бар болза, ол биске четчир ужурлуг . ⁹ А кымнар бай болуксаарыл , олар күткүлгеже кире бээр. Олар улусту буураашкын болгаш өлүмче киир идип турар эңдерик хөй мелегей база хоралыг күзээшкиннерге алзып, дузакка туттурарлар. ¹⁰ Бузуттуң бүгү хевирлериниң үнер дөзү – акша-хөреңгиге хандыкшыл. Ону чедип алыксааш, бүзүрелдиң оруундан чайлай берген, боттарынга хөй хинчек онааштырган улус чок эвес болдур ийин .

Бүзүрел дээш, төлептиг демисеш

¹¹ А сен, Бурганның кижизи , ол бүгүден ойлап-дес! Чөптүг-шынныг чорукче, Бурганны хүндүлеп чурттаарынче, бүзүрелче, ынакшылче, шыдамык чорукче, чөпшүл боорунче чүткү. ¹² Бүзүрел дээш, төлептии-биле демисеш , мөңге амыдыралды чаалап ал. Ол амыдыралче Бурган сени кыйгырган болгай, а сен хөй херечилер мурнунга бүзүрелиңни ажыы-биле тулган эки медеглээн сен. ¹³ Бүгү чүүлдерни тынгарган Бурганның база ол-ла бүзүрелди ·Понтий Пилаттың мурнунга ажыы-биле тулган эки херечилээн Христос Иисустуң мурнунга сеңээ чагып тур мен: ¹⁴ Дээргивис Иисус Христостуң ээп кээр хүнүнге чедир сеңээ дужааган бүгү чүүлдү арыг-шынчы болгаш бичии-даа кем чок сагып көр. ¹⁵ Ооң ээп кээрин Бурган – дың чаңгыс амыр-чыргалдыг Чагырыкчы, хааннарның Хааны болгаш тергиидээннерниң Дээргизи , дың чаңгыс өлүм чок Бурган биске чогуур үеде ажыдып бээр. Ол кымның-даа чоокшулап шыдавазы чырыкта чурттап турар – кым-даа, кажан-даа Ону көрбээн база көрүп-даа шыдавас . Алдар-хүндү база мөңге күчү Аңаа доктаазын! ·Аминь.

Бай христианнарга чагыг

¹⁷ Амгы амыдыралынга бай улусту таптыг сурга: адыыргавазыннар, идегел чок эртине-байлакка ынанмазыннар , харын бистиң сеткил ханар бүгү чүүлүвүстү элбээ-биле хандырып бээр Бурганга ынанзыннар. ¹⁸ Буян тарыырын, буянныг ажыл-херээ-биле байыырын , экииргек боорун база өске улус-биле эртине-байлаан үлежиринге белен боорун оларга айыт . ¹⁹ Алыс шын амыдыралды чедип аар дээш, келир үеде быжыг үндезинни олар боттарынга ынчалдыр салып алзыннар.

Тимофейге түңнел чагыглар

²⁰ Тимофей, сеңээ бүзүреп каан бүгү чүүлдү кадагала . Бурганга таарымча чок шуугаазындан база улустуң «билиг» деп адап турары алыс шынга удур өөредигден чайлап чор . ²¹ Чамдык улус ону шиңгээттивис деп чарлаттынгаш, бүзүрелдиң оруундан аза берген-дир .

Бурганның авыралы силерге доктаазын!