1 Фессалоникчилерге

Фессалоникчилерге бирги чагаа

Киирилде

Фессалоника хоорай Македония областың найысылалы турган. Павел Буянныг Медээни ол хоорайга 50 чылда суртаалдаан. Удурланыкчылары Павелди Фессалониканы каапкаш баар кылдыр албадапкан соонда, чаа христианнар Иисус Христоска бүзүрелинден ойталаар чадавас деп ол сагыш човап турган. Ынчангаш ол бодунуң дузалакчызы Тимофейни Коринф хоорайдан Фессалоникада христиан ниитилелдиң байдалын билип келзин дээш айбылап чорудупкан. Тимофей ээп кээрде, эки медээлер эккелген: христианнарны хоорайда истеп-сүрүп-даа турза, олар чайгылыш чогун көргүзүп, Христоска бүзүрелин быжыы-биле сагып турган.

Ындыг-даа болза, Павел оларның бүзүрелин бодунуң бижээн чагаазы-биле быжыглаары чугула херек деп көрген. Чагааны бижээн үш кол сорулга: 1) Павелдиң оларга ак сагыштыг хамаарылгазының дугайында кандыг-даа чигзинигни чайладыры; 2) чаа христианнарга биеэги бачыттарындан адырлып аарынга дузалажыры; 3) оларның өлүм болгаш Христостуң келир үеде чер кырынче ээп кээриниң дугайында бодалдарын тодарадыры.

Киирилде сөстер

¹ Павел, Сила болгаш Тимофейден байыр! Фессалоникада Бурган Ада болгаш Дээрги Иисус Христоска бүзүрээннер ниитилелинге бижидим. Силерге авырал биле амыр-тайбың доктаазын!

Фессалоникчилерниң бүзүрели болгаш амыдыралы

² Мөргүл кылган санывыста-ла, силерни сактып, дөгереңер дээш, Бурганга үргүлчү өөрүп четтирер-дир бис . ³ Силерниң бүзүрелиңерге үндезилеттинген ажыл-херээңерни, ынакшылыңардан сорук кирген ажылыңарны, Дээргивис Иисус Христоска идегелиңерниң чайгылыш чогун Бурган Адавыстың мурнунга доктаамал сактып чор бис.

⁴ Ха-дуңма, Бурганның силерге ынаан, Ооң силерни шилип алганын билир бис . ⁵ Чүге дээрге бистиң эккелгенивис Буянныг Медээ силерге чүгле сөс кырында эвес, а күчүлүү-биле, Ыдыктыг Сүлдениң шынзыткан бадыткалы-биле чедип келген. Араңарга тургаш, силерге буянныг болзун дээш, канчаар амыдырап келгенивисти көрген болгай силер . ⁶ Бисти база Дээрги-Чаяакчыны боттарыңарга өттүнер үлегер кылып алган силер . Буянныг Медээни улуг хилинчек көрүп , ынчалза-даа Ыдыктыг Сүлдениң бээри өөрүшкү-биле хүлээп алган силер .

⁷ Ынчангаш Македония болгаш Ахаия девискээрлеринде бүгү бүзүрээн улуска үлегер апардыңар. ⁸ Дээрги-Чаяакчының медээзи ам силерни дамчып, чүгле Македония болгаш Ахаияга эвес, а чер болганга нептерей берген. Бурганга бүзүрээниңер кайда-даа билдингир апарган, бис ам ол дугайында чүнү-даа чугаалавайн барып боор бис. ⁹ Бисти канчаар хүлээп алганыңар дугайында, дүрзү-бурганнардан ойталааш, алыс шын дириг Бурганга бараан боору-биле Олче канчаар ээлгениңер дугайында бүгү өске улус боттары биске чугаалап турар апарды. ¹⁰ Улус силерни Бурганның Оглу Иисустуң дээрден чедип кээрин манап турарлар дээр-дир . Бурган Иисусту өлүглер аразындан катап диргискен, а Ол бисти Бурганның кел чыдар килеңинден камгалаар .

Павелдиң Фессалоникага ажыл-чорудулгазы

¹ Бистиң силерге кээп чораанывыс түңнел чок болбаанын боттарыңар билир силер, ха-дуңма. ² Ооң мурнунда Филиппы хоорайга биске күштүг удурланыышкын болуп турда , хилинчек көрүп, дорамчыладып турган-даа болзувусса (ол база силерге билдингир-дир), Бурганывыс биске Ооң Буянныг Медээзин силерге коргуш чок суртаалдаар арганы берген.

³ Силерни кыйгырган өөредивиисте кандыг-даа будулгаазынныг, чүдек-бужар сагыш чок, бис кымны-даа мегелевейн турар бис . ⁴ А Буянныг Медээни суртаалдаарын дагзыры-биле Бурганның шылгааны улус дег чугаалап тур бис . Ынчангаш бис чугаалап тура, улустуң эвес, а чүректеривисти билир Бурганның сеткили ханзын дээш, кызыткан бис . ⁵ Шынап-ла, силер билир силер, кажан-даа авыяастап чорбаан бис, чажырар хире хуу ажык-кончаа сүрген сагыжывыс-даа чок турган; херечивис – Бурган ол-дур! ⁶ Христостуң элчиннери болгаш, улустан онза хүндүлел негээр эргелиг-даа болзувусса , силерден-даа, өске улустан-даа алдар-мактал дилевээн бис. Харын иениң чаш төлдери дээш сагыш човаары дег, силерге аажок уян-чымчак хамаарылга көргүстүвүс . ⁸ Силерге ындыг күштүг ынак болгаш , чүгле Буянныг Медээни эвес, а амы-тынывысты силерге хүлээдип бээринге белен турдувус. Биске ол хире эргим болдуңар!

⁹ Ха-дуңма, кайы хире чилчик үзүлдүр ажылдап , бергелерни эртип келгенивисти билир силер. Бурганның Буянныг Медээзин силерге суртаалдап тура, кайыңарны-даа шүүдетпес дээш, дүне-хүндүс дивейн ажылдап, бүзүрээн силерге хамаарыштыр боттарывысты Бурганның мурнунга арыг-шынчы, төлептиг ап келгенивисти билир силер, Бурган база ону херечилээр. ¹¹ Ада кижиниң ажы-төлүн эки көөрү дег , силерниң кижи бүрүзүн ынчаар эки көрүп келгенивисти билир силер: ¹² «Бодунуң өндүр бедик Чагыргазынче силерни кыйгырган Бурганның мурнунга төлептиг чурттаңар» – деп, бис силерни сорук киирип, өөредип база үттеп-сургап келген бис.

Иудеяда христианнарның үлегери

¹³ Бистен дыңнааныңар Бурганның медээзин хүлээп аарда, ону кижи сөзү дег эвес, а ооң херек кырында кандыызы дег: бүзүрей бээриңерге, силерге күчүлүг салдар чедирип турар Бурганның сөзү дег кылдыр хүлээп алган силер . Үзүк-соксаал чокка Бурганга өөрүп четтиреривистиң база бир чылдагааны ол-дур. ¹⁴ Иудеяда турар Христос Иисуска башкарткан Бурганга бүзүрээннер ниитилелиниң үлегерин эдерген болгай силер, ха-дуңма . Чүге дээрге оларның иудейлерден когарааны дег, силер база боттарыңарның-на чаңгыс чер чурттугларыңардан когарап турар-дыр силер . ¹⁵ Иудейлер, ооң мурнунда медээчилерин өлүрүп турганнары дег , Дээрги Иисусту өлүрүп кааннар, а бисти истеп-сүрүп турганнар . Оларның ажыл-херээ Бурганга таарымча чок база бүгү кижи төрелгетенге удур бооп турар. ¹⁶ Олар биске камгалал дугайында Буянныг Медээни өске чоннарга чедиреринге шаптык кадып , ооң-биле бачыттарының аяан долдуруп турарлар. Ынчалза-даа Бурганның килеңи ам-на оларның кырынче чылча дүжер!

Павелдиң Фессалоникаже аажок катап келиксээни

¹⁷ Ха-дуңма, кезек өйде бисти силерден чарыптарга, сеткиливис тудуш харылзаалыг хевээр-даа болза , өскүссүрээн дег бооп, силер-биле арын көржүп ужуражырын аажок күштүг күзеп келдивис. ¹⁸ Ийе, бис силерже катап медээжок келикседивис, Павел мен база чаңгыс эвес удаа чеде бээрин шенедим, ынчалза-даа эрлик бистиң оруувусту дуй туруп турду . ¹⁹ Силер эвес болза, өске кымнар идегеливис, өөрүшкүвүс боорул? Дээргивис Иисус чедип келгеш, шаңнал кылдыр оваадай бээрге, өске кымнарга чоргаарланып болур бис? ²⁰ Ийет, ылап-ла силер – чоргааралывыс болгаш өөрүшкүвүс силер!

¹ Ынчангаш бис, силер-биле чарлыышкынны оон ыңай ууп шыдавайн баргаш, Афиныга ийи бодувус артып каар деп шиитпир үндүрдүвүс . ² А силерже Тимофейни , Христостуң дугайында Буянныг Медээни суртаалдаар кижини, Бурганның ажыл-херээнге бистиң-биле деңге ажылдаан дуңмавысты, чоруттувус . Ол силерни сорук киирзин база бүзүрелиңер быжыктырзын деп бодаан бис. ³ Ол хире кончуг истеп-сүрүүшкүннер ужун кым-даа Буянныг Медээден чайгыла бербезин дээш ынчалдывыс. Шак ол шенелделер биске албан таваржырын билир-ле болгай силер . ⁴ Бисти истеп-сүре бээри чайлаш чогун силер-биле кады турар үевисте-ле чугаалап шаг болган бис. Ол ынчалдыр болган-даа деп, силер ам билир силер. ⁵ Ынчангаш мен, оон ыңай манаар харык чок апаргаш, силерниң бүзүрелиңер дугайында билип эккелзин дээш, Тимофейни чоруттум. Күткүкчү эрлик силерни орууңардан астыктыра бербээн бе дээш, ажыл-херээвис хей черге болбаан бе дээш, сестип турдум .

Эки медээлер

⁶ Ындыг-даа болза, Тимофей силерден мырыңай чаа ээп келгеш , бүзүрелиңер болгаш ынакшылыңар дугайында эки медээлер эккелди. «Бистиң дугайывыста чаагай сактыышкын фессалоникчилерде артып калган, ынчангаш оларны көрүксээнивистен дудак чок, бисти көрүксээш, четтикпейн турар улус-тур» – деп, ол чугаалап келди. ⁷ Байдалывыс чеже-даа берге бооп, истеп-сүрүүшкүннер турза-даа, бүзүрелиңер бисти сорук киирип, улуг деткимче болду, ха-дуңма. ⁸ Чүге дээрге силерниң Дээрги-Чаяакчы-биле эвилелиңер ыяк быжыг боорга, бис ам база катап тынгарлы бердивис. ⁹ Силер дээш база Бурганывыстың мурнунга бисти өөрткениңер дээш, Бурганга өөрүп четтиргенивисти канчаар долузу-биле ажыдарыл?! ¹⁰ Силер-биле база катап арын көржүп ужуражыр дээш, бүзүрелиңерниң ам-даа четпейн турар чүүлүн немеп бээр дээш, бис дүне-хүндүс дивейн , бар шаавыс-биле мөргүп тур бис.

¹¹ Ынчанганда Бурган Адавыс Боду база Дээргивис Иисус силерже баар орукту биске айтып берзин . ¹² Силерниң бот-боттарыңарга база арткан хамык улуска ынакшылыңарны Дээрги-Чаяакчы улам өстүргеш, бистиң силерге ынакшылывыс дег кылдыр, кызыгаар чокка өстүрүп берзин . ¹³ Дээргивис Иисустуң Аңаа хамааржыр хамык ыдыктыг төлээлери-биле кады ээп кээр хүнүнге чедир Бурган Адавыстың мурнунга чүректериңер кем-буруу чок болгаш ыдыктыг бооп артсын дээш, Ол силерни быжыктырзын . ·Аминь.

Бурганга таарымчалыг амыдырал

¹ Түңнелинде, ха-дуңма, Дээрги Иисустуң ады-биле силерден ээрежип база кыйгырып тур бис: Бурганга таарымчалыг кылдыр канчаар амыдыраар ужурлуун силерге өөредип каанывыс дег, улаштыр ынчалдыр амыдыраңар . Ам безин ынчалдыр амыдырап турар силер , ындыг-даа болза, ынчаар амыдыраарын оон-даа чүткүлдүг уламчылаңар. ² Дээрги Иисустуң эрге-чагыргазы-биле силерге кандыг чагыглар бергенивисти билир силер. ³ Бурган ыдыктыы-биле амыдыраарыңарны болгаш кандыг-даа самыыраар чоруктан ойталаарыңарны күзеп турар . ⁴ Эр кижи бүрүзү бодунуң мага-бодунуң күзээшкиннерин тудуп , ыдыктыг, мактал-хүндүге төлептиг амыдыразын. ⁵ Бурганны билбес улус дег, туралаан хандыкшылының аайынга кирбезин . ⁶ Ындыг таварылгада эр кижи бүзүрээн эжин карак ажыттап, ооң бүзүрелин ажыглай бербезин халак. Чүге дээрге мооң мурнунда-ла силерге чугаалап база кичээндирип турганывыс дег, шак ындыг бачыттар дээш, Бурган кеземче онаар. ⁷ Ол бисти чүдек-бужар боорунче эвес, а ыдыктыг амыдыралче кыйгырган болгай . ⁸ Ындыг болганда, кым ол чагыгларны хүлээп албааныл, оозу-биле кижини эвес, а силерге Бодунуң Ыдыктыг Сүлдезин берип турар Бурганны хүлээп албаан-дыр.

⁹ Бүзүрээн ха-дуңмавыска ынакшыл дугайында силерге оон ыңай бижээн херээвис чок боор, чүге дээрге Бурган силерни бот-бодуңарга ынак боорунга өөредип каан болгай . ¹⁰ Бүгү Македонияда чурттаан ха-дуңмаңарга чогум-на ынчалдыр ынак силер. Ындыг-даа болза, ха-дуңма, бот-бодуңарга оон-даа күштүг ынак бооруңарны дилеп тур бис. ¹¹ Тайбың-шөлээн амыдыралче чүткүңер , ооң мурнунда силерге чагып турганывыс дег, кижи бүрүзү бодунуң ажыл-херээн чогудуп, амыдыраар кошкулун бодунуң холу-биле ажылдап аар ужурлуг . ¹² Ынчалдыр кылыр болзуңарза, өске улус силерниң канчаар амыдырап чорууруңарны хүндүлээр база хереглелдериңерге кымдан-даа хамаарылга чок боор силер.

Дээрги-Чаяакчының ээп кээри

¹³ Ха-дуңма, өлген улус-биле чүү боорун билип аарыңарны күзеп тур бис. Силер, идегээр чүвези чок өске улус дег , өлгеннер дээш муңгараваңар. ¹⁴ Бир-тээ, Иисус өлгеш, оон катап дирилген деп бүзүрээр болганывыста , Иисуска бүзүревишаан өлген улусту Бурган Ооң-биле кады дедир эккээр деп база бүзүрээр бис . ¹⁵ Дээрги-Чаяакчының чугаалаан сөстерин барымдаалап, силерге чугаалап тур бис: Ооң чедип кээринге чедир бистиң аравыстан дириг артар улус мөчээннер мурнунче кирбес бис . ¹⁶ Улус дээрниң кол төлээзиниң үнүн болгаш Бурганның трубазының эткенин дыңнап каар . Дээрги-Чаяакчы Боду дээрден дүжүп келгеш , дужаалын медеглептер. Христоска бүзүревишаан өлгеннер ынчан кымны-даа мурнай катап дирлип кээр . ¹⁷ А ооң соонда бис, дириг улус, Дээрги-Чаяакчыны агаарга уткуур дээш, олар-биле кады булуттар кырынче көдүртүп үндүртү бээр база оон соңгаар кезээ мөңгеде Дээрги-Чаяакчы-биле кады артар бис . ¹⁸ Ынчангаш ол сөстер-биле бот-бодуңарны аргалап чоруңар.

Дээрги-Чаяакчының ээп кээринге белен болуңар

¹ Ха-дуңма, силерге үелер болгаш хуусаалар дугайында бижээн херээ чок боор . ² Дүне када оор дег, Дээрги-Чаяакчының шииткел хүнү хенертен чедип кээрин боттарыңар кончуг эки билир силер . ³ Улус: «Кайда-даа амыр-тайбың-дыр, айыыл чок-тур» – деп чугаалажы бээрге, ынчан хенертен, сааттыг херээженниң эъди аарый бээри дег , оларны өлүм-чидим хөме таварыыр база кым-даа оон дезип шыдавас!

⁴ Ха-дуңма, ынчалза-даа силер дүмбей караңгыда эвес силер , ол хүн, оор дег, силерниң кырыңарга хеп-хенертен келбес. ⁵ Чүге дээрге силер – чырыктың болгаш хүннүң ажы-төлү силер . Бис дүнге база дүмбей караңгыга хамаарышпас бис. ⁶ Ындыг болганда, өске улус ышкаш, уйгуга бастырбаалы. Серемчилелдиг болгаш хынамчалыг болуңар . ⁷ Уйгужу улус дүне удуур, арагачылар база дүне эзиртир ижер болгай. ⁸ А бис, хүнге хамааржыр болганывыста, хынамчалыг болуулу, бүзүрел болгаш ынакшылды – куяк хеп дег, а камгалалга идегелди – куяк бөрт дег кедип аалы . ⁹ Чүге дээрге Бурган бисти, Ооң килеңиниң хүнүнде шиидер дээш эвес, а Дээргивис Иисус Христосту дамчыштыр камгалаар дээш шилип алган . ¹⁰ Христос бис дээш, Ооң ээп кээр хүнүнде дириг-даа, өлүг-даа турар болзувусса , Ооң-биле тудуш апарып, амыдыраарывыс дээш өлген. ¹¹ Ынчангаш ам ынчалдыр кылып турарыңар дег, бот-боттарыңарны моон-даа соңгаар аргалаңар база быжыглаңар.

Түңнел чагыг-сүмелер болгаш байыр чедириишкиннери

¹² Ха-дуңма, улуу-биле дилеп тур бис: араңарда кызымак ажылдап турар, Дээрги-Чаяакчы-биле харылзаалыг амыдыралга силерни углап-баштап, чагып-сургап турар удуртукчуларны хүндүлеп көрүңер . ¹³ Кылып турар ажыл-херээ дээш, оларны ханы хүндүлеңер, оларга ынак болуңар. Араңарда эп-найыралдыг амыдыраңар . ¹⁴ Ха-дуңма, күштүү-биле дилеп тур бис: ажыл кылбас чалгааларны билиндириңер , кортуктарны сорук киириңер , кошкактарга чөленгииш болуңар, хамык улус-биле чымчак, чазык болуңар . ¹⁵ Кайыңар-даа силерге чедирген хора дээш хора-биле харыылай бербезин халак , харын бот-боттарыңарга база өске бүгү улуска буяндан үргүлчү кылып чоруңар.

¹⁶ Үргүлчү өөрүп чоруңар! ¹⁷ Соксаал чок мөргүлдеңер . ¹⁸ Кандыг-даа байдалга тургаш, Бурганга өөрүп четтирип чоруңар – Христос Иисус-биле харылзаа тургускан силерниң ынчалдыр чурттаарыңарны Бурган күзеп турар .

¹⁹ Ыдыктыг Сүлдениң одун өжүрбеңер : ²⁰ өттүр билген медеглелдерни куду көрбеңер, ²¹ ынчалза-даа шуптузун хынап чаңчыгыңар ; буяндан туттунуңар, ²² кандыг-даа бузуттан чайлап чоруңар.

²³ Амыр-тайбыңның үнер дөзү боор Бурган Боду силерни бүгү тала-биле ыдыктыг кылып кагзын. Дээргивис Иисус Христостуң ээп кээр хүнүнге чедир силерниң сүлдеңер, сагыш-сеткилиңер база мага-бодуңар кем чок арыг кадагалаттынып артсын. ²⁴ Силерни кыйгырган Бурган Бодунуң сөзүнге шынчы, Ол аазаашкынын күүседир!

²⁵ Ха-дуңма, бис дээш база мөргүлдеп көрүңер . ²⁶ Бурганның бүгү улузун ыдыктыг ошкаашкын-биле мендилеңер . ²⁷ Дээрги-Чаяакчының эрге-чагыргазы-биле силерге дужаап тур мен: бо чагааны бүгү бүзүрээн ха-дуңмага номчуп бериңер . ²⁸ Дээрги-Чаяакчывыс Иисус Христостуң авыралы силерге доктаазын!