Titus

Titus

¹ Oo Titus, itu yo surat kiat so aku si Paulus iloga’ ku nai so ikau. Uripon aku nu Kinoringan om pinongoorapan ni Yisus Kristus. Pinili’ om sinuu’ aku montuduk nu lobuw pinili’ Niyo, pobasag nu koimaidan nosiro, om potuduk nu pontudukan obana musuat so koinginan nu Kinoringan. ² Kiat so pontudukan obana oono, umarap toko sono nu miau toko musingkolaid, so’ ono yo su nijanji nu Kinoringan nu dai po nowaal wonuo tu ri, om dai momudut ong Kinoringan. ³ Iya nu notatap-o laid Niyo, niintolang-o Niyo so aku janji oono, ono yo si Yisus Kristus. Om ono yo su nipongaarap om nisuu’ so aku nu Kinoringan, Poowiau so toko, polombus so ongo lobuw. ⁴ Oo Titus, pinokaanak ku ikau, so’ muido koimaidan to. Mindamo aku so Kinoringan Amo toko, om si Yisus Kristus, Tuhan toko, su’ d’ado ya pupus mongoborakat, mongoluluud, om posanang nu inawo mu no. ⁵ Ono yo ko’ pinoogol ku ikau so Kiriti, su’ moningompus nu gogoma’on dai ku po noopod nu laid ku dii, om momili’ nu wowaidon nu lobuw poimaid so ido koido nu bandar soko nikodau ku so ikau-i. ⁶ Lobuw pili’on mu no subai dai totopudon nu lobuw nu kisala’, dai monapil, kiawi’ anak niyo poimaid-o so si Kristus, om okon ko totopudon nu lobuw nu oraai akal intawa otangar nu lobuw nu anak oono odouraka intawa dai musimaid nu kotutuaan. ⁷ Ono yo po wowaidon nu puimpugan nu lobuw poimaid nga pinongoorapan nu Kinoringan. Indadi dai mutoop ong kuwai pounayan nu lobuw wokon pokosala’ so iyo, dai kowasa musingkaayo-ayo, dai obingungot, okon ko moomuinum, dai kowasa mokimualod, om dai oulou nu siin. ⁸ Ala’ nai’, lobuw pili’on nu wowaidon so puimpugan subai poo’indakod nu lobuw so waloi niyo, ototom mongowaal nu owarong, moilo mogkimat nu kogoyaan niyo, otulid inowoon, kowiawan niyo no niarap so Tuhan om okodos. ⁹ Lobuw oono subai ototog koimaidan so nituduk mai obana ri, su’ kodapat iyo pobasag nu lobuw poimaid so pontudukan obana, om kopongintolang iyo nu kosola’an nu lobuw lumawan nu pontudukan obana oono. ¹⁰ Montuduk aku soko ono so’ osuang lobuw lumawan nu pontudukan obana, om montuduk nu d’ado kosudaan om mongaakal nu lobuw wokon, makin-o po ong lobuw Yaudi, iri wagu ya kolaiw kiat so ugama Yaudi ri. ¹¹ Ikau om wowaidon pili’on mu no, subai pointoron nu moomontuduk nu dai obana oono, so’ manid nosiro so waloi om mongogorusou nu sompuaanak sawo tayon ong mulaiw kiat so koimaidan so Kinoringan. Tomod-o po nosiro montuduk nu pontudukan dai obana oono nga modium-a nu siin, om sobana ko koiyu’-iyu’ gogoma’on nosiro no. ¹² Kuwai ido poo’abar nu Kinoringan gulu ri, lobuw-a nu Kiriti nokoputangar nu, “Ono yo su kinoopotan nu lobuw so wonuo nu Kiriti moomudut. Pikiran nosiro soko pikiran nu kulos-kulos orongit. Odoput nosiro nga olinggokan-a,” koo. ¹³ Kiawi’ tinangar nu poo’abar iiri, bana ya. Indadi, pogoso yo lobuw, iri dai mongowaid nu pontudukan obana ri, su’ oilaan nosiro nu nosala’ nosiro om poimaid sono nu pontudukan obana oono, ¹⁴ om dai yo mongimaid nu tutunud nu lobuw Yaudi, om oturan winaal-waal nu lobuw wokon, iri dai moingin nu pontudukan obana ri. ¹⁵ Iri lobuw owarong inowoon, mongaarap nu owarong-a onu yo po winaal nu Kinoringan. Nga iri lobuw oraai inowoon om dai poimaid nu Tuhan Yisus, monokod nu oraai-a kiawi’, so’ oraai inowoon om pomikiran nosiro. ¹⁶ Mutangar pona nosiro nu kotondu’ ya nosiro nu Kinoringan, nga oilaan-a nu dai nosiro kotondu’ nu Kinoringan so’ oraai ya kogoyaan. Dai moilo nosiro tudukan, koindoromuw nosiro, om dai koilo momaal nu owarong.

¹ Nga ikau-o po Titus, potuduko yo so nosiro pontudukan obana kiat so Kinoringan. ² Biati yo kotutuaan kusoi su’ moilo nosiro mogkuasa nu inawo kondiri, om musuat kogoyaan nosiro. Subai ototog nosiro so pontudukan obana kiat so Kinoringan, osamod nu lobuw inong koimaidan, om otangka’ nu kosonsora’an. ³ Soko ono ya pudi kotutuaan kowoinoyan-o. Biati yo nosiro nu kogoyaan owarong om musuat so lobuw poimaid so Kinoringan. Dai kowasa nosiro monimbaal, obinginum nu kaawuk, om subai oilo nosiro montuduk nu kogoyaan owarong. ⁴ Subai miau nosiro soko ono, su’ kopontuduk nosiro nu kowoinoyan omuda po monamod nu sawo om inonakan, ⁵ okodos, dai ogilat, owasa mongurug nu ingkookan nu anak sawo, om mongowaid nu ponuu’an nu sawo nosiro. Bang soko ono kogoyaan nosiro, d’ado sono lobuw pokoraai nu tinongaran nu Kinoringan. ⁶ Tuduki yo kokusoyan ongo mumuda no po su’ okodos nosiro nu onu-onu ya. ⁷ Om ikau nga poworongo ya kogoyaan mu no su’ insuwon nu lobuw omuda po. Bang montuduk ko, subai otoroido yo inawo om opatong. ⁸ Potuduko yo onu ya obana su’ dai oinsala’ totongaron mu no nu lobuw wokon, om oiyu’an sono lobuw mokilolawan so ikau-o, om d’ado pounayan nosiro monginsala’ so toko. ⁹ Tuduki yo kouriponan-o popongowaid dadan nu ponuu’an nu tuan nosiro no, su’ oondayan tuan nosiro no nu kiawi’ gogoma’on nosiro. Uripon-o yo po dai kowasa sumiwal ¹⁰ intawa monakou, ala’ nai’ opatong om ototog. Bang dadan soko ono, oilaan sono nu lobuw wokon nu owarong sobana pontudukan suat so Kinoringan, Poowiau so toko. ¹¹ Poworongon-o kogoyaan muyu soko ono, so’ sinuu’ yo nu Kinoringan si Yisus Kristus mian so wonuo tu monapul nu kiawi’ lobuw, pongilaan nu osamod Iyo. ¹² Om pagka osamod Kinoringan, moingin Iyo nu niada’ toko kogoyaan oraai, koinginan oraai so wonuo tu, okodos, otulid inowoon, om maid toko sono nu koinginan nu Kinoringan. ¹³ Patut miau toko soko ono su’ osanang toko mongindad nu runat kologa’an koimbagu ni Yisus Kristus, iri Kinoringan Obantug om Poowiau so toko. ¹⁴ Nikomouli’ Iyo matoi mongolukat so toko kiat so koraayan, su’ dai toko yo sono momaal nu koraayan, osongapan toko Niyo, om owasa momaal nu owarong. ¹⁵ Oo Titus, potuduko yo so lobuw poimaid nai no nituduk ku so ikau iitu no maid nu opatong. Sowoyo yo nosiro su’ imaidon nosiro pontudukan iitu, om poimbana sono nosiro, om kodi yo potuudi nosiro pobaba’ so ikau.

¹ Oo Titus, poiloo yo lobuw poimaid so si Yisus nu subai mongimaid nu wowaidon om lobuw kipangkat so wonuo tu, om subai waidon kiawi’ oturan nosiro, om dadan kosodia’ momaal nu onu yo po owarong. ² Om poiloo yo nosiro nu adang monimbaal so isai-isai ya, om adang mokimualod, ala’ nai’ otoua, om okodos inawo so sondad una’. ³ Toko yo po nu gulu ri d’ado po oilo-ilaan suat so Kinoringan, dai mongimaid, noburunsutan om nouripon toko nu osuang koinginan oraai, mokimurindi, mokimualun, om mubibisig-bisig. ⁴ Nga, iya nu pinointolangan nu Kinoringan, iri Moonapul so toko, nu osamod om owarong Iyo so toko, ⁵ iya yo iiri sinopulan toko Niyo. Nga okon ko koworongo nu winaal toko su kinoponopulan Niyo so toko, nga oluluudan Iyo so toko. Om sinopulan toko Niyo, so’ inugasan-o Niyo koraayan toko, om iya ya iiri soko nopuanak toko koimbagu nu Atod Niyo, iri mogkuasa so inawo toko, om ingwoguon toko. ⁶ Poorati aku po sabat suat nu itu nu, si Yisus Kristus, iri Moonapul so toko ri su minonuu’ nu Atod nu Kinoringan mogkuasa so toko. ⁷ Pagka osamod Iyo so toko, winaal Niyo soko ono, tayon ong kopuwarong toko koimbagu so Kinoringan om kikowiawan toko musingkolaid, iri orap-orapon toko ri. ⁸ Kiawi’ tinangar ku oono obana ya. Moingin aku ong nipoorati mu bana potuduk itu no so kiawi’ lobuw poimaid-o nu Kinoringan, su’ mogkari’-kari’ sono nosiro mugogoma’on nu owarong om kikosudaan so lobuw wokon. ⁹ Nga ikod-o kigawul nu pusombut-sombutan d’ado kosudaan, om tuturan suat nu solusuk-monolusuk nu odu aki, om puoolodan intawa pusisiwalan suat nu Ukum ni Musa, so’ kiawi’ nu ono ado kosudaan om ado kountungan. ¹⁰ Bang kuwai mongogorusou om poputotondiang nu lobuw poimaid, otago yo momogos insan intawa induo. Bang dai ya nosiro mongkinongou so ikau, adang-o mokimuuna’-una’ so nosiro, ¹¹ so’ oilaan mu yo nu lobuw soko ono oraai om minulaiw-o kiat so pontudukan obana, om ono yo gogoma’on niyo oraai oono su pointolang nu otoop insaadan iyo nu Kinoringan. ¹² Oo Titus, bang kologa’ si Artimas intawa si Tikikus iri suu’on ku mian nai so ikau-i, sumangkom ko sono so aku osikap so bandar Nikupulis, so’ tinantu ku yo nu mogol aku po dii laid nu kodarun tu. ¹³ Om tobango yo si Jinas, moongodaawa ri, om si Apulus, om taaki yo nosiro nu kosukupan nu laid nosiro so poponowan kiat so wonuo nu Kiriti. ¹⁴ Om tuduki yo sobana lobuw poimaid nai no su’ mugogoma’on nosiro modium nu mookan om koponabang nu lobuw kikurang kabus. Dai musuat ong odoput lobuw poimaid so Kinoringan so’ d’ado kosudaan ong soko ono. ¹⁵ Kiawi’ kosusulodan mido-ido so aku tuui, pokodau nai so ikau. Om lombusi yo kodau mai tu so kouna’an toko songinong koimaidan. Muda-mudaan ong borokatan kou ya kiawi’ nu Kinoringan.