Pinointolang

Pinointolang

¹ Onsi yo po nu surat iitu no nga suat so onu yo po ourug ong wagu. Gulu po nopokoilo Kinoringan nu ono so si Yisus, su’ niposiou Niyo so ongo susuu’on Niyo. Minonuu’ yo sono si Yisus nu susuu’on Niyo mian dii so aku si Yuanis uripon Niyo, pokoilo nu ono, ² om potuturan aku nu kiawi’ nosiou ku iiri. Itu yo su pongoobaran ku nu kodau kiat so Kinoringan om pontudukan obana niintolang ni Yisus Kristus. ³ Osanang-o lobuw mongobasa’ nu itu, om lobuw mongorongou nu abar iitu om mongowaid nu onu-onu nokosurat tuui, so’ dai yo olaid ourug kiawi’ oono. ⁴ Oo su kosusulodan ku so turu puimpugan so Asia. Itu yo surat kiat so aku si Yuanis niloga’ ku nai so kou. Umarap aku nu taakan kou nu koworongan om kopusulutan kiat so Kinoringan, Atod Niyo om si Yisus Kristus. Suat so Kinoringan, kuwai yo Iyo kiat nu gulu ri, ono sono tu, om so sunduron tu. Suat so Atod nu Kinoringan, dii-dii Iyo so tiningkuangon nu oogoman nu Kinoringan mogkuasa, om kikuasa Iyo turu boogian. ⁵ Suat so si Yisus Kristus, iri pointolang opongoorapan-i, Iyo yo su togna linuli’an kiat so pinotoyan, om mogkuasa nu kiawi’ raja so wonuo tu. Osamod si Yisus so toko, om kiat so kinopotoyan Niyo ri, nopolabus Iyo so toko kiat so kiawi’ koraayan toko. ⁶ Om pinaasuw toko so pogkuosaan Niyo mugogoma’on suat so Kinoringan, Amo Niyo. Si Yisus Kristus oono yo su obantug om mogkuasa musingkolaid. Amin! ⁷ Siowi! Lumoga’ Iyo solui-soluyon nu kawut! Kiawi’ lobuw kosiou so Iyo, om iri pona minomatoi so Iyo ri. Om kiawi’ bansa so wonuo tu sontangi’-tangi’ nu kosiou so Iyo. Otuman-o soko ono. Amin! ⁸ “Aku yo su ponimpuunan om pongoowi’an,” koo Kinoringan Maayo Kuasa, iri kuwai nu ono sono tu, gulu ri, om so sunduron tu. ⁹ Aku yo si Yuanis, sulod muyu songinong oirosaan kosonsora’an nu kiawi’ lobuw mompomaid ni Yisus. Nga tumaan toko sumonsara’ so’ nosongapan toko yo Niyo. Niada’ aku nu gulu ri so puru Patmus so’ nopotuturan aku nu kodau kiat so Kinoringan om pontudukan obana niintolang ni Yisus. ¹⁰ Iya nu runat pongoroyowan nu Tuhan, kinuasa aku nu Atod nu Kinoringan, om nokorongou aku sono nu bongut osangat soko surumpit so tinoudion ku ri nu, ¹¹ “Surati yo onu-onu ya osiou mu, om poowiti yo so turu puimpugan iitu, ono yo Ipisus, Somirna, Pirgamus, Tiatira, Sardis, Piladilpia, om Laudikia,” koo. ¹² Kumowiio aku yo monsiou ong isai tangar-tangar so aku ri. Nokosiou aku sono nu turu potimpakan nu politaan omas winaal. ¹³ So puola’an nu potimpakan oono kuwai soko ido koyuwan mundii-dii, kisabung nu olanggau kologa’ so akod, om minomakai nu pongorinding nu kuab, omas winaal. ¹⁴ Obuk Niyo ri oputi’ soko bulu nu dumba om gapas. Mato Niyo ri mikit-sikit soko apui. ¹⁵ Akod Niyo ri milat-kilat soko tombaga ompu’on, om bongut Niyo ri soko kooguru nu wosoi maayo. ¹⁶ Longon wanan Niyo ri minongkuyut turu korombituon, om kiat so kobang Niyo ri minusit ido karis otarom musompodi. Buatan Niyo ri nga otarang sobana soko runat. ¹⁷ Nosiou ku yo po iri, nokotungub aku sono so tiningkuangon Niyo ri soko lobuw minatoi, nga kuyuti yo Niyo longon wanan Niyo ri tuui s’aku om mutongaro yo nu, “Ikod kilaa’! Aku yo su ponimpuunan om pongoowi’an. ¹⁸ Aku yo su miau. Minatoi Aku yo, nga siowi yo, miau Aku musingkolaid. Aku yo su mogkuasa nu lobuw minatoi, om wonuo nu lobuw minatoi. ¹⁹ Pagka soko ono, surati yo noongosiou mu no, ono yo ourug nu kosiono tu om so sunduron tu. ²⁰ Itu yo su orati nu turu korombituon nosiou mu so longon wanan Ku ri, om potimpakan nu politaan omas winaal-i. Turu korombituon-i, ono yo susuu’on so koturu-turu nu puimpugan, om turu potimpakan nu politaan-i, ono yo turu puimpugan,” koo.

¹ Mutongaro po koimbagu si Yisus nu, “Surato yo itu so susuu’on nu puimpugan so Ipisus nu, Itu yo kodau kiat so Aku si Yisus, iri minongkuyut nu turu korombituon-i so longon wanan Ku ri, om minompanou so puola’an nu turu potimpakan nu politaan omas winaal iiri. ² Oilaan Ku onu-onu waalon muyu. Moginoontob kou mugogoma’on om sobana ko otatap inawo muyu. Oilaan Ku nu dai muyu ya posimaidan ongo lobuw oraai, om nokinaman muyu yo ongo lobuw mongakun nu pinongoorapan Ku, ampa okon-a. Om noilaan muyu nu nosiro oono moomudut. ³ Kou kiawi’ olulut. Sumonsara’ kou suat so Aku, om dai mingkoyod umarap. ⁴ Nga koponginsala’ Aku so kou, so’ dai kou yo sono monamod so Aku soko timpuun-i. ⁵ Indadi, ondomo yo nu sobana ko nokosondiang-o kogoyaan muyu kiat nu timpuun-i. Rorogo kou yo momaal nu koraayan, om waalo muyu kiawi’ winaal muyu nu timpuun-i. Bang dai, Aku kondiri mian nai so kou moongoi nu potimpakan nu politaan muyu no. ⁶ Nga kuwai ido gogoma’on muyu owarong koinginan Ku, ono yo bisigon muyu kogoyaan nu mompomaid ni Nikulaus, iri kobisigan Ku ri ya. ⁷ Isai korongou, orotion-o onu yo po tongaron nu Atod nu Kinoringan so ongo puimpugan. Isai omanang, lila’an Ku mongokan nu bua’ nu kowiawan so Tonoman nu Kinoringan oono,” koo si Yisus. ⁸ Mutongaro po si Yisus nu, “Surato yo itu so susuu’on nu puimpugan so Somirna nu, Itu yo kodau kiat so Aku si Yisus, iri ponimpuunan om pongoowi’an-i, iri minatoi-o om miniau koimbagu ri. ⁹ Oilaan Ku koogutan muyu, ono yo omiskin kou, nga sobana yo doyaan kou so ponokodan nu Kinoringan. Om oilaan Ku simbaal so kou nu lobuw minusingkolobuw Yaudi ri, nosiro oono puimpugan nu lobuw moongusaa’ nu Wowaidon nu Moinat. ¹⁰ Adang-o lumaa’ suat so kosonsora’an dai yo olaid oirosaan muyu. Ondomon-o, monginam Wowaidon nu Moinat so kou. Tinu-tinu so kou jiilon om osonsara’ kopuluan laid. Tumatap kou yo poimaid so Aku musingkopatoi, om taakan Ku kou nu kowiawan musingkolaid soko ponuli’ nu komonangan muyu. ¹¹ Isai korongou, orotion-o onu yo po tongaron nu Atod nu Kinoringan so ongo puimpugan. Isai omanang, dai yo muad koirasa nu kosonsora’an nu kopotoyan nu atod musingkolaid so noraka,” koo si Yisus. ¹² Mutongaro po si Yisus nu, “Surato yo itu so susuu’on nu puimpugan so Pirgamus nu, Itu yo su kodau kiat so Aku, si Yisus, iri minongkuyut nu karis otarom musompodi ri. ¹³ Oilaan Ku nu minogol kou so pogkuosaan nu Wowaidon nu Moinat. Om oilaan Ku nu dai kou ya minongolim nu poimaid kou so Aku pudi pona pinatoi si Antipas, pointolang so Aku ototog inawo ri, so tiningkuangon muyu dii so tontong kinuasa nu Wowaidon nu Moinat-i. ¹⁴ Soko ono pona, kuwai po tinu-tinu oinsala’ Ku so kou. Tinu-tinu koyuwan so kou mongowaid nu nituduk ni Biliam. Tinudukan ni Biliam si Raja Balak nu gama’ mongingol nu lobuw Israil momaal nu koraayan nu mongokan nu niusaa’ so tinindobuw om sumundal. ¹⁵ Om kuwai ya so kou mongowaid nu pontudukan nu mompomaid ni Nikulaus. ¹⁶ Pagka soko ono, rorogo kou yo momaal nu koraayan! Bang dai kou rumorogo, lumoga’ Aku osikap nai so kou om monginsaad nu lobuw dai rumorogo no momakai nu karis so kobang Ku no. ¹⁷ Isai korongou, orotion-o onu yo po tongaron nu Atod nu Kinoringan so ongo puimpugan. Isai omanang, pookanon Ku iyo nu maana osusut kiat so surga om taakan Ku iyo nu watu oputi’ kisurat nu ngaran wagu, nu dai oilaan nu isai-isai ya sondiang ko ono lobuw potaakan-o,” koo si Yisus. ¹⁸ Mutongaro po si Yisus nu, “Surato yo itu so susuu’on nu puimpugan so Tiatira nu, Itu yo su kodau kiat so Aku, Anak nu Kinoringan, iri mikit-sikit su mato soko apui om milat-kilat su akod soko tombaga ompu’on. ¹⁹ Oilaan Ku gogoma’on muyu, ono yo osamod kou yo nu inong muyu, osulut kou, obintabang kou, om olulut sumonsara’. Om oilaan Ku nu owasa kou po mugogoma’on nu ono sono tu ko’ gulu ri. ²⁰ Nga itu su oinsala’ Ku so kou, ono yo posimaidan muyu ya so si Ijibil, iri bolian om musingkopoo’abar-i. Montuduk iyo pomalid nu ongo lobuw poimaid so Aku, sampai sumundal nosiro om mongokan nu niusaa’ so tinindobuw. ²¹ Tinaakan Ku yo iyo nu kosiwatan rumorogo momaal nu koraayan, nga dai ya iyo mintoron sumundal. ²² Ono yo ko’, posokiton Ku iyo om dai sono kotungag. Om lobuw sumundal maid so iyo sobana ko osonsara’ ong dai rumorogo nosiro momaal nu koraayan oono. ²³ Kiawi’ mompomaid niyo no potoyon Ku ya su’ oorotian nu kiawi’ puimpugan nu Aku yo koilo nu inowoon nu kiawi’ lobuw, om sunsuli’an Ku isai-isai ya, musuat nu gogoma’on nosiro ido soido. ²⁴ Nga suat so kou lobuw wokon so Tiatira, ono dai mongowaid nu pontudukan oraai, om dai moguru’ nu oilo-ilaan nu Wowaidon nu Moinat, dai Aku yo mongoruang nu ponuu’an so kou, ²⁵ sondiang ko subai ototog mongowaid nu onu yo po noguru’ muyu kiat s’Aku musingkologa’ Ku koimbagu. ²⁶ - ²⁷ Isai omanang, om sumundur momaal nu koinginan Ku no sampai pongoowi’an, taakan Ku nu kuasa soko iri nitaak ni Amo s’Aku ri. Om kopogkuasa iyo nu kiawi’ bansa momakai nu tutungkud bosi, pongilaan nu kikopogboya’an iyo mongukum so nosiro, om mongoraag so nosiro soko monodak nu montaya. ²⁸ Om taakan Ku iyo nu korombituon, iri ingoranan korombituon mingkas pongilaan nu nomanang nosiro. ²⁹ Isai korongou, orotion-o onu yo po tongaron nu Atod nu Kinoringan so ongo puimpugan,” koo si Yisus.

¹ Mutongaro po si Yisus nu, “Surato yo itu so susuu’on nu puimpugan so Sardis nu, Itu yo kodau kiat so Aku, iri kuwai Atod nu Kinoringan kikuasa turu boogian om turu korombituon-i. Oilaan Ku onu-onu gogoma’on muyu. Kuwai mutangar nu miau kou, ampa sobana yo minatoi kou. ² Pagka soko ono, ingati muyu yo, om pobosago muyu koimaidan muyu nu sabat-o po su’ dai muad lumiong, so’ noilaan Ku nu dai owarong gogoma’on muyu so tiningkuangon nu Kinoringan. ³ Indadi ondomo yo! Waido muyu yo nokotuduk om norongou muyu nu gulu ri, om rorogo kou yo momaal nu koraayan, so’ bang dai kou mingat-ingat, lumoga’ Aku nai so kou soko moonakou nu dai muyu oilaan. ⁴ Nga tinu-tinu koyuwan so kou so Sardis dai minongowaid nu kogoyaan oraai oono. Nosiro nu ono kowaid so Aku mompanou om mupokakas nu oputi’ so’ nosiro yo su otoop maid so Aku. ⁵ Lobuw nomanang popusobungon nu olanggau oputi’, om ngaran niyo dai Ku idu’on kiat so buuk pinosuratan nu ngaran nu lobuw kikowiawan. So tiningkuangon nu Amo Ku om ongo susuu’on Ku, mongakun Aku nu songapan Ku iyo. ⁶ Isai korongou, orotion-o onu yo po tongaron nu Atod nu Kinoringan so ongo puimpugan,” koo si Yisus. ⁷ Mutongaro po si Yisus nu, “Surato yo itu so susuu’on nu puimpugan so Piladilpia nu, Itu yo kodau kiat so Aku si Yisus, iri obana om d’ado koraayan. Aku yo su mongkuyut nu kunsi songapan ni Raja Daud. Bang sukabon Ku, d’ado ido koponutub. Bang tutubon Ku, ado ido koponukab. ⁸ Oilaan Ku gogoma’on muyu. Oilaan Ku nu owako kou, nga minongowaid kou sobana nu tinongaran Ku om dai kou ya mongolim so Aku. Siowi yo! Sinukaban Ku yo kou nu pintu nu dai otutub nu isai-isai ya. ⁹ Ondomon-o itu no! Nikomouli’ Ku so kou ongo lobuw mompomaid nu Wowaidon nu Moinat, ono yo moomudut, om musingkolobuw Yaudi. Suu’on Ku nosiro mian nai so kou om sumurukud so tiningkuangon muyu mongorumat so kou. Om oilaan nosiro nu osamod Aku so kou. ¹⁰ Pagka tumaan kou mongowaid nu ponuu’an Ku, ingoligan Ku kou kiat so koogutan ourug so pilolongkop nu wonuo tu. ¹¹ Dai yo olaid lumoga’ Aku. Waido muyu yo sobana pontudukan Ku so kou su’ d’ado ido koponolod nu ponuli’ so kou, pongilaan nu komonangan muyu no. ¹² Isai kokodos dai maid-waid nu oraai, pototapon Ku iyo soko pasok so waloi sosombooyangan nu Kinoringan, iri usaa’on Ku. Mogol iyo nai musingkolaid, om nisurat Ku so koyuwan niyo ngaran nu Kinoringan Ku, om ngaran nu bandar Niyo, ono yo Yirusalim Owagu niuntiba kiat so surga. Om nisurat Ku po ngaran Ku wagu no so koyuwan niyo no. ¹³ Isai korongou, orotion-o onu yo po tongaron nu Atod nu Kinoringan so ongo puimpugan,” koo si Yisus. ¹⁴ Mutongaro po si Yisus nu, “Surato yo itu so susuu’on nu puimpugan so Laudikia nu, Itu yo kodau kiat so Aku, iri ingoranan Amin, om pointolang ototog om obana. Aku yo impuunon nu pinuwaal nu Kinoringan. ¹⁵ Oilaan Ku kogoyaan muyu nu dai ya osogit om dai ya maamut, ono yo okon ko alod-alod nga okon-a ko mompomaid Ku. Nga owarong ong maamut intawa osogit kou nai’. ¹⁶ Nga pagka okon ko maamut om okon ko osogit kou, nilua’ Ku kou. ¹⁷ Mutangar kou nu, ‘Doyaan kai om sobana ko kikosukupan, om dai kai osimpitan nu onu-onu ya,’ koo kou. Nga dai muyu oilaan nu ado orapan muyu om aagut kou. Omiskin kou nu koimaidan so Aku, soko nobolou pomikiran muyu, om soko lobas kou so’ d’ado gogoma’on muyu nu obana. ¹⁸ Pagka soko ono, montuduk Aku so kou nu pomoli kou yo nu omas tuui so Aku, ono yo omas luun-luun su’ kumaya kou so ponokodan Ku. Om pomoli kou nu pokakas oputi’ tuui so Aku su’ dai kou yo sono oiyu’an. Om pomoli kou yo nu ubat nipiid so mato muyu su’ kosiou kou. ¹⁹ Ungotan om loposon Ku isai yo po somodan Ku. Indadi rorogo kou yo om pogkari’-kari’ kou yo maid so Aku. ²⁰ Siowi yo! Mundii Aku so pintu om momaau. Bang kuwai lobuw korongou nu paau Ku, om paasuw s’Aku, masuw Aku sono om maid so iyo mongokan, om iyo nga maid-a so Aku mongokan. ²¹ Isai kokodos dai maid-waid nu oraai, lila’an Ku mogom so oogoman Ku mogkuasa maid so Aku. Soko Aku yo kosiono nomanang-o om mogom so oogoman nu Amo Ku mogkuasa maid so Iyo. ²² Isai korongou, orotion-o onu yo po tongaron nu Atod nu Kinoringan so ongo puimpugan,” koo si Yisus.

¹ Nopupus iri, nosiou ku ido pintu so surga nosukab, om nokorongou aku nu bongut iri baya’ minutangar so Aku soko surumpit-i nu, “Indakod-o tuui om posiowon Ku ikau onu yo po ourug ong wagu,” koo. ² Kinuasa aku sono nu Atod nu Kinoringan om nokosiou aku nu oogoman mogkuasa so surga om ido koyuwan minogom nai. ³ Buatan niyo ri tumarang soko watu ingoranan aspur om sardis. Oogoman oono tinutukan nu buluntung, soko wotik nu watu ingoranan nu jamrud. ⁴ So puliliwut nu oogoman oono, kuwai po duo nopulu om opat oogoman wokon, inogoman nu duo nopulu om opat kotutuaan kipokakas nu oputi’, om minutupi nu tupi omas. ⁵ Kitinarang tumogu’ kiat so oogoman mogkuasa oono, om kai-kai nu korud oguru. So tiningkuangon nu oogoman oono kipolitaan turu mikit-sikit, ono yo Atod nu Kinoringan, iri kikuasa turu boogian-i. ⁶ So tiningkuangon nu oogoman oono, kuwai ya soko raat soromin winaal oturopusan monsiou, soko watu ingoranan ablur. So pililiwut nu oogoman oono kuwai opat kiinawo noruyut nu mato so kuab om so likud. ⁷ Kiinawo togna ri soko ingongansad, koduo ri soko sapi kusoi, kotolu ri soko buatan nu lobuw, om koopat-i soko koniu mulud-tulud. ⁸ Koopat-opat nu kiinawo iiri kiolad onom om noruyut nu mato so dirimbou om dilalom. Awi runat dai mintoron kiinawo oono mulagu nu, “Osusi, osusi, osusi yo, Tuhan, Kinoringan Maayo Kuasa, iri kuwai nu ono sono tu, gulu ri om so sunduron tu!” koo. ⁹ Koopat-opat nu kiinawo oono minulagu nu pongorayou, pongorumat om pongunsopot so Iyo nu minogom so oogoman oono, iri miau musingkolaid-i. Om laid nosiro mulagu ri, ¹⁰ nokosurukud sono duo nopulu om opat kotutuaan iiri so tiningkuangon nu lobuw minogom so oogoman mogkuasa ri, om minongusaa’ so Iyo, iri miau musingkolaid-i. Nipolak nosiro tupi omas nosiro ri so tiningkuangon nu oogoman-i om mutangar nu, ¹¹ “Oo Tuhan Kinoringan mai. Ikau-o su kikuasa, otoop royowon om orumaton, so’ Ikau-o su minongurug nu kiawi’, om maid nu koinginan Mu, kiawi’ oono nourug om miau,” koo.

¹ Nokosiou aku sono nu lulun-lulun nu buuk kinuyutan nu lobuw minogom so oogoman mogkuasa iiri. Buuk iiri kisurat musompodi om kinopitan nu turu poongapit. ² Om nokosiou aku nu susuu’on nu Kinoringan obasag, monsok-gonsok nu osangat nu, “Isai ka su otoop mongolongkab nu ongo poongapit iitu om mongoyoyak nu buuk iitu no?” koo. ³ Nga ado ido so surga intawa so wonuo tu intawa so dilalom nu tana’ tu kopongoyoyak nu buuk iiri om mongobasa’. ⁴ Indadi nokotangi’ aku sono, so’ ado ido otoop mongoyoyak nu buuk iiri om mongobasa’. ⁵ Mutongaro yo ido koyuwan kiat so kotutuaan iiri so aku nu, “Adang tumangi’! Siowi! Nokomanang-o si Yisus, iri paawon nu Singa kiat so bansa Yauda, solusuk ni Raja Daud. Iyo yo su otoop mongolongkab nu turu poongapit oono om mongoyoyak nu buuk oono,” koo. ⁶ Nosiou ku sono Anak nu Dumba mundii-dii so puola’an nu oogoman iiri, tinutukan nu opat kiinawo ri om kotutuaan-i. Anak nu Dumba iiri soko nogaras-o. Kitanduk om kimato Iyo turu, ono yo Atod nu Kinoringan kikuasa turu boogian, sinuu’ yo so pilolongkop nu wonuo tu. ⁷ Miano yo Anak nu Dumba iiri moongoi nu buuk-i kiat so longon wanan nu lobuw minogom so oogoman mogkuasa ri. ⁸ Laid Niyo soko iri, nokotungub sono ongo kiinawo om duo nopulu om opat kotutuaan-i so tiningkuangon Niyo ri. Naanid nosiro minongkuyut nu kosapi om mangkuk omas kiasuw nu komanyan, ono yo du’a nu lobuw songapan nu Kinoringan. ⁹ Muloguo yo nosiro nu lagu owagu nu, “Ikau-o su otoop mongalap nu buuk iitu om mongolongkab nu poongapit-o, so’ pinatoi ko yo, om kiat so kinopotoyan mu oono, nolukat mu yo kiawi’ bansa so wonuo tu, ourug nu lobuw songapan nu Kinoringan. ¹⁰ Om niasuw mu nosiro so pogkuosaan nu Kinoringan mugogoma’on suat so Iyo om mogkuasa nosiro nu ongo raja so wonuo tu,” koo. ¹¹ Noopod iri, nokosiou om nokorongou aku nu bongut nu susuu’on nu Kinoringan. Koosuang nosiro bolaksa-laksa. Minundii nosiro tumutuk so oogoman mogkuasa, opat kiinawo, om kotutuaan-i. ¹² Muloguo yo nosiro osangat nu, “Ono yo Anak nu Dumba ginaras-i! Otoop Iyo kotorima’ nu kuasa, kokoyaan, koilaan om kobosagan. Otoop Iyo orumaton, bontugon, om royowon,” koo. ¹³ Nokorongou aku po nu kiawi’ miau so langit, so wonuo tu, so diipak nu wonuo tu, om so raat mulagu nu, “Iyo, ono minogom so oogoman-o om Anak nu Dumba oono yo su otoop royowon, orumaton, bontugon om mogkuasa musingkolaid,” koo. ¹⁴ Indadi sumombuto yo opat kiinawo iiri nu, “Muda-mudaan ong otuman-a!” koo. Om kotutuaan-i nga nokosurukud om minongusaa’ nu Kinoringan.

¹ Nopupus iri, nosiou ku Anak nu Dumba iiri mongolongkab nu poongapit togna ri. Norongou ku sono ido kiat so opat kiinawo ri mutangar nu soko kai-kai nu korud nu, “Koyo!” koo. ² Indadi nokosiou aku yo nu ido kuda, om lobuw ginumandar-i kikinuyut nu pana. Tinaakan iyo nu tupi nu raja omas winaal, pongilaan nu komanang. Mungkayas iyo mian mutuda’ om komanang-a iyo. ³ Longkabo yo nu Anak nu Dumba ri poongapit koduo ri, om norongou ku kiinawo koduo ri mutangar nu, “Koyo!” koo. ⁴ Lumobuso yo ido po kuda omiang om lobuw ginumandar-i tinaakan nu kopogboya’an mutuda’ om mupopatoi sono lobuw so wonuo tu. Om tinaakan-a iyo nu karis maayo. ⁵ Longkabo yo nu Anak nu Dumba ri poongapit kotolu ri, om norongou ku kiinawo kotolu ri mutangar nu, “Koyo!” koo. Nosiou ku sono ido kuda oitom linumabus, om lobuw ginumandar-i kikinuyut nu titimbangan. ⁶ Om norongou ku bongut soko momaau kiat so puola’an nu opat kiinawo iiri nu, “Otaas sobana dolai oono. Orogo songkilu muinong nu gaji sondunat. Om orogo nu tolu nokilu dolai ginis wokon, muinong-a nu gaji sondunat. Nga adang-o togadon puun nu jaitun om totason puun nu anggur,” koo. ⁷ Longkabo yo nu Anak nu Dumba ri poongapit koopat-i, om norongou ku kiinawo koopat-i mutangar nu, “Koyo!” koo. ⁸ Nosiou ku sono ido kuda oposi linumabus, om ngaran nu lobuw ginumandar-i Poomatoi, om muut-suut so iyo wonuo nu poomatoi. Taakan nosiro kiduo nu kopogboya’an momatoi sombaagi’ opat nu wonuo tu nu putuda’an, likop, pomayat om kulos-kulos orongit. ⁹ Longkabo yo nu Anak nu Dumba ri poongapit kolimo ri. Nosiou ku sono so saau nu ranggar-i ongo atod nu lobuw pinatoi so’ nopaabar nosiro nu tinongaran nu Kinoringan. ¹⁰ Gumonsoko yo nosiro nu osangat nu, “Oo su Kinoringan Maayo Kuasa, d’ado koraayan om obana! Komuro po ka kolaid om bisora’on mu lobuw so wonuo tu om mongukum so nosiro, ono minomatoi so kai no ri?” koo. ¹¹ Taaki yo sono nosiro ido soido nu sabung olanggau oputi’, om suuo yo nosiro mintoron-toron po, musingkogonop koosuang nu inong nosiro om kosusulodan potoyon soko nosiro. ¹² Longkabo yo nu Anak nu Dumba ri poongapit koonom-i, om gumunggun-o sono wonuo tu nu sobana ko oontob. Rinumondom sono su runat, soko kumut oitom om okosig, om wulan nga miniang soko raa’. ¹³ Korombituon nga minupipitak soko bua’ nu nunuk omulok po opupu yo otouruk nu uos. ¹⁴ Langit nga lumiong soko koratas lulunon, om kiawi’ bulud om puru nipinda kiat so polak togna no. ¹⁵ Om kiawi’ lobuw so wonuo tu, raja, lobuw kipangkat, wowaidon nu soujar, lobuw okaya om kikopogboya’an, uripon om okon ko uripon, sumusut so uang om puola’an nu watu maayo so kobubuludan. ¹⁶ Gumonsok nosiro mutangar so kowotuan-i nu, “Tongkubi kai yo om susuti kai yo kiat so ponsiowan Niyo, iri minogom so oogoman mogkuasa ri om kiat so koo’ungot nu Anak nu Dumba oono. ¹⁷ Nologa’ yo runat koindolaa’ nu kosongka’an nu ungot nosiro, om ado ido kotaan nu ono,” koo.

¹ Nopupus iri, nosiou ku opat susuu’on nu Kinoringan mundii-dii so opat pisuk nu wonuo tu. Monaan nosiro nu koopat-opat nu uos su’ dai tumouruk so tidong om so raat intawa so kokoyuan. ² Om nosiou ku po ido susuu’on nu Kinoringan minusit kiat so pusitan, minongowit nu poongapit kiat so Kinoringan nu miau oono. Om minomaau iyo nu opat susuu’on nokoongoi-o nu kuasa kiat so Kinoringan mongusiba’ nu tona’on om raat. Mutongaro yo nu osangat susuu’on oono nu, ³ “Adang po usiba’on tona’on om raat intawa kokoyuan ong dai mai po okopitan paras nu uripon nu Kinoringan toko no,” koo. ⁴ Pinokoilo aku sono nu kuwai maatus opat nopulu om opat rinibuan tinaakan nu poongapit kiat so Kinoringan iiri. Nosiro oono ungkiat so opulu om duo bansa nu Israil. ⁵ Kiat so ido bansa, soro puluan om duo ribu, ono yo bansa ni Yahuda, Rubin, Gad, ⁶ Asir, Naptali, Manasi, ⁷ Simiun, Liwi, Isakar, ⁸ Jibulun, Yusup, om Binyamin. ⁹ Noopod iri, nosiou ku ido impug nu lobuw, nu dai oiap koosuang. Nosiro oono kiat so kiawi’ bansa, kiawi’ solusuk, kiawi’ tontong so wonuo tu, om kiawi’ tinongaran. Minupokakas nosiro nu sabung olanggau oputi’ om kikinuyut nu raan ingoranan nu palma. Lobuw oono minundii so tiningkuangon nu oogoman nu Kinoringan mogkuasa om so tiningkuangon nu Anak nu Dumba ri. ¹⁰ Gumonsoko yo nosiro nu osangat nu, “Pinolabus toko yo nu Kinoringan kiat so kosonsora’an, ono minogom so oogoman mogkuasa no, om Anak nu Dumba no!” koo. ¹¹ Mundiio yo kiawi’ susuu’on nu Kinoringan tumutuk so oogoman-i om so kotutuaan-i om koopat-opat kiinawo iiri. Nokotungub nosiro so tiningkuangon nu oogoman-i mongusaa’ nu Kinoringan om mutangar nu, ¹² “Otuman-o! Obana ya itu! Unsopoton toko Kinoringan. Royowon, bontugon om orumaton toko Iyo so’ Iyo yo su oilo, kikuasa om kikobosagan musingkolaid,” koo. ¹³ Mongoduato yo sono ido koyuwan kiat so kotutuaan iri so aku nu, “Isai ka lobuw minupokakas nu oputi’ oono om siombo kiat?” koo. ¹⁴ Sumombuto aku yo nu, “Dai ku oilaan. Ikau-o su koilo,” k’aku. Mutongaro po iyo so aku nu, “Nosiro oono yo su nosopulan kiat so kosonsora’an maayo, om nougasan-o nosiro sabung olanggau nosiro no, om noputi’ yo nu raa’ nu Anak nu Dumba ri. ¹⁵ Ono yo ko’ minundii nosiro so tiningkuangon nu oogoman nu Kinoringan mogkuasa, mugogoma’on suat so Iyo awi runat so polak Niyo so surga. Om Kinoringan iri mogom so oogoman oono su mongingolig so nosiro. ¹⁶ Dai yo sono nosiro witilon om lugangon, om dai yo okodatan intawa oomutan, ¹⁷ so’ Anak nu Dumba so tiningkuangon nu oogoman mogkuasa iiri, inurug-o nu wowaidon nosiro, monundan so nosiro mian so towud nu sungoi kowiawan-i, om piidon sono nu Kinoringan ramou nosiro,” koo ido kotutuaan-i.

¹ Nolongkab-o po nu Anak nu Dumba ri poongapit koturu ri, ado sono galak-galak so surga kiro-kiro putonga’ jaam laid. ² Nosiou ku turu susuu’on nu Kinoringan mundii-dii so tiningkuangon nu Kinoringan, inanid nosiro monaak nu surumpit. ³ Lumogaa yo sono ido susuu’on wokon nu Kinoringan om minundii so obi’ nu ranggar-i, kikinuyut nu pongompu’an nu komanyan omas winaal. Tinaakan iyo nu osuang komanyan niusaa’ maid nu du’a nu lobuw songapan nu Kinoringan so timpak nu ranggar omas so tiningkuangon nu oogoman-i. ⁴ Om sumomputo sono lisun nu komanyan om du’a nu lobuw songapan nu Kinoringan kiat so longon nu susuu’on iiri so tiningkuangon Niyo ri. ⁵ Olapo yo nu susuu’on iiri pongompu’an-i, om osuwi yo nu apui om pilayi yo niyo so riniba tu. Mungkorudo yo sono maid nu kudilop om gumunggun su tana’. ⁶ Murigap-rigapo yo sono koturu susuu’on iri monurumpit-i. ⁷ Monurumpito yo susuu’on togna ri om murano yo nu maantab om apui mugawul nu raa’ so riniba tu. Om noompu’ yo sono sombaagi’ tolu nu riniba tu, om sombaagi’ tolu nu kokoyuan om kiawi’ korikutan. ⁸ Monurumpito yo susuu’on koduo ri, om kuwai yo sono soko bulud maayo mikit-sikit nipilai so raat. Minusiliw sono nu raa’ sombaagi’ tolu nu raat iiri. ⁹ Om minatoi-o sono sombaagi’ tolu nu miau so raat, om nousiba’ sombaagi’ tolu nu kapal. ¹⁰ Monurumpito yo susuu’on kotolu ri, om noratu yo sono ido korombituon maayo mikit-sikit soko solunsung om minongonsit sombaagi’ tolu nu bowang om towud nu sungoi. ¹¹ Ngaran-o po nu korombituon iiri Opait. Minaito sono sombaagi’ tolu nu sungoi. Osuang lobuw minatoi so’ nokoinum nu sungoi opait iiri. ¹² Monurumpito yo susuu’on koopat-i om tinumuong-o sono sombaagi’ tolu nu runat om wulan om korombituon, so’ nousiba’ yo om pinoipak sono iya onawau umpit nu runat sombaagi’ tolu, om soko ono ya pudi awi. ¹³ Nosiou om norongou ku sono ido koniu mulud-tulud om minutangar nu, “Atuuk, aagut sobana kiawi’ lobuw so riniba tu iya nu ponurumpitan nu tolu po susuu’on nu Kinoringan,” koo.

¹ Monurumpito yo susuu’on kolimo ri, om nosiou ku sono ido korombituon nopitak so riniba tu. Korombituon iiri soko lobuw tinaakan nu kunsi monukab nu uang d’ado nanad. ² Nosukab-o po uang-i, sumomputo yo sono su lisun, soko lisun so umo maayo sampai tinumuong wonuo tu. ³ Minusito sono su ongo kokapu kiat so lisun iiri, om nopitak-o koimbagu so tana’. Ongo kokapu iiri tinaakan nu binisa koinong nu tompoluluu. ⁴ Pinogos nosiro mongoraag nu korikutan intawa tonom-tonoman. Ono yo su goma’on nosiro mongoraag nu lobuw d’ado poongapit kiat so Kinoringan so paras nosiro ri. ⁵ Kokapu iiri dai lila’an momatoi so nosiro, sondiang ko mononsara’ ya so nosiro solaid limo nowulan. Om koosakit oono muinong nu koosakit ong obuton nu tompoluluu. ⁶ Solaid limo nowulan iiri, mokipatoi nosiro nga dai ya matoi. Musimpatoi nosiro nga dai ya matoi. ⁷ Kokapu iiri soko kuda nu murigap-rigap sundur mutuda’. So ulu nosiro, kuwai soko tupi omas winaal om buatan nosiro soko lobuw. ⁸ Obuk nosiro ri soko obuk nu woinoi, om nipon nosiro ri soko nipon nu ingongansad. ⁹ Kuab nosiro ri linokopan nu soko sabung bosi, om kai-kai nu olad nosiro ri, soko kai-kai nu osuang korita kuda sundur mutuda’. ¹⁰ Iku’ nosiro ri kibinisa soko tompoluluu. Kikuasa nosiro mononsara’ nu lobuw solaid limo nowulan. ¹¹ Raja mogkuasa so nosiro ri uripon nu Wowaidon nu Moinat. Ngaran niyo so tangar Ibrani si Abadun, om so tangar Yunani si Apuliun, orati “Moongusiba’”. Iyo yo su moongipat nu uang d’ado nanad oono. ¹² Koogutan togna ri nokotalib-o, om kosiono sumusuuto duo po koogutan. ¹³ Monurumpito yo susuu’on koonom-i om nokorongou aku nu kai-kai kiat so opat sunduk nu ranggar omas so tiningkuangon nu Kinoringan. ¹⁴ Mutongaro yo iyo so susuu’on koonom-i nu, “Lobusi yo koopat-opat nu uripon nu Wowaidon nu Moinat nokokogos so Bowang Iprat-i,” koo. ¹⁵ Lobusi yo sono koopat-opat uripon iiri, iri tinontu’an-o laid nu jaam, runat, wulan, om toun momatoi nu sombaagi’ tolu nu lobuw so wonuo tu. ¹⁶ Pinokoilo aku nu koosuang nu lobuw ginumandar nu kuda iiri, duo naatus linoksaan. ¹⁷ Nokosiou aku yo nu kuda om lobuw ginumandar-i minomakai nu sabung bosi omiang soko koomiang nu apui, obilu om osibu soko morirang. Ulu nu kuda iiri soko ulu nu ingongansad, kiapui, kilisun om kimorirang minusit kiat so kobang-i. ¹⁸ Sombaagi’ tolu nu lobuw minatoi nu tolu koogutan iiri, ono yo apui, lisun om morirang linumabus kiat so kobang nu kuda iiri. ¹⁹ Kobosagan nu ongo kuda iiri kiat so kobang om iku’ nosiro ri. Iku’ nosiro ri kiulu soko lopung. Iku’ yo nosiro ri su pononsara’ nosiro nu lobuw. ²⁰ Nga lobuw dai minatoi solaid tolu koogutan iiri, dai ya rumorogo kiat so koraayan nosiro, ono yo dai mintoron nosiro mongusaa’ nu komoinatan intawa mongusaa’ nu tinindobuw omas, pirok, tombaga, watu om kayu, nu dai kosiou, korongou, intawa kopanou. ²¹ Om dai ya nosiro rumorogo momatoi, mongamal nu olimu, gumilat om monakou.

¹ Nokosiou aku yo nu ido po susuu’on nu Kinoringan obasag minuntiba kiat so surga, solui-soluyon nu kawut. Kibuluntung so ulu niyo ri, buatan niyo ri soko runat, om akod niyo ri soko sinikit nu apui. ² Kikinuyut iyo ido lulun-lulun nu buuk oworos yinoyak. Akod wanan niyo miningkag so raat om gibang-i miningkag so tona’on. ³ Minomaau iyo nu osangat soko ingongansad mongogarom. Nokopomaau-o po susuu’on iiri, sumombuto yo turu korud nu sobana ko osangat. ⁴ Noopod-o po koturu-turu korud iiri mutangar, pinokisusuratan ku sono iri, nga nokorongou aku nu bongut kiat so surga nu, “Susuti yo onu-onu tongaron nu turu korud oono. Kodi ya surati,” koo. ⁵ Susuu’on nu Kinoringan nosiou ku mundii-dii so raat om so tona’on-i noposinggor sono nu longon wanan niyo ri so langit. ⁶ Minongibot iyo mongorait nu ngaran nu Kinoringan miau musingkolaid, iri minongurug nu langit om wonuo, raat om kiawi’ asuw nu wonuo tu. Mutongaro yo iyo nu, “Ado yo imatan! ⁷ Bang monurumpito susuu’on koturu no, monuman-o Kinoringan nu padu-padu Niyo kosusut oono, soko iri niabar-o Niyo so kouriponan Niyo ri, iri poo’abar Niyo gulu ri,” koo. ⁸ Mutongaro po koimbagu so aku bongut kiat so surga iiri nu, “Ian-o moongoi nu buuk so longon nu susuu’on miningkag so raat om so tona’on oono,” koo. ⁹ Indadi miano aku yo so susuu’on iiri mokitaak nu buuk-i. Mutongaro yo iyo nu, “Ongoyo yo itu no, om okano yo. So tian mu no opait itu, nga so kobang mu oomis itu soko paa’ nu munsong,” koo. ¹⁰ Olapo ku yo buuk iiri kiat so longon nu susuu’on-i om okano ku yo. So kobang ku oirosaan ku oomis soko paa’ nu munsong, nga notolon ku yo po, nourug sono nu opait so tian ku. ¹¹ Suuo aku yo sono nu, “Subai niabar mu koimbagu padu-padu nu Kinoringan suat so lobuw so kiawi’ bansa, musosondiang nu tangar om so kiawi’ raja,” koo.

¹ Noopod iri, tinaakan aku ido kayu poonukud, om sinuu’ aku nu, “Sukudo yo Waloi Maayo nu Kinoringan om ranggar om iap-o lobuw mongusaa’ no. ² Nga kodi yo sukudo natad-o, so’ natad oono nitaak so lobuw okon ko Yaudi, om mongingkag-ingkag nosiro nu ono solaid opat nopulu om duo wulan. ³ Monuu’ aku nu duo koyuwan pointolang kipokakas nu karut, potuturan nu padu-padu nu Kinoringan solaid oribu duo naatus onom nopulu runat,” koo. ⁴ Duo koyuwan pointolang ono, iri yo duo nopuun jaitun om duo potimpakan nu politaan-i. Duo koyuwan oono minundii so tiningkuangon nu Kinoringan songapan nu wonuo tu. ⁵ Bang raayon nosiro nu lobuw, lumabus sono apui kiat so kobang nosiro no mongoraag nu alod-alod nosiro. Soko ono yo gama’ momatoi nu lobuw mongoraai so nosiro no. ⁶ Kikopogboya’an nosiro dai pouran laid nosiro paabar nu padu-padu nu Kinoringan, om popusiliw nu towud nu sungoi nu raa’. Kikopogboya’an-a nosiro mongurug nu boroginis koogutan so wonuo tu sombiya-biya ya koinginan nosiro momaal. ⁷ Opupus nosiro paabar nu kodau nu Kinoringan, lowanon sono nosiro nu kulos-kulos ungkiat so uang d’ado nanad oono sampai odoog nosiro om matoi. ⁸ Molak-polak sono bangkai nosiro so alun-alun nu bandar maayo, iri pinosoliban nu Tuhan nosiro ri. Pongingoranan nu bandar oono Sodom intawa Masir. ⁹ Osiou sono bangkai nosiro nu lobuw kiat so kiawi’ tontong so wonuo tu, kiawi’ solusuk, kiawi’ tinongaran om kiawi’ bansa solaid tolu om putonga’ runat, om dai nosiro mongolila’ nu nilobong bangkai oono. ¹⁰ Sobana ko osudu’ lobuw so wonuo tu nu nopatoi duo pointolang oono. Murami-rami sono nosiro om mutotaak-taak, so’ kiduo poo’abar minatoi oono nokourug nu kosonsora’an so wonuo tu. ¹¹ Nokotalib tolu om putonga’ runat-i, linuli’an sono nosiro nu Kinoringan om kiawi’ lobuw kosiou so nosiro sobana ko lumaa’. ¹² Norongou-o sono nu duo koyuwan pointolang oono bongut osangat kiat so surga nu, “Indakod kou yo tuui,” koo. Mindokodo yo sono nosiro so langit maid nu solui-soluyon nu kawut, siou-siowan nu alod-alod nosiro ri. ¹³ Iya oono ginumunggun sono wonuo tu nu sobana ko koindolaa’. Om sombaagi’ opulu nu bandar iiri noruntu’ om turu noribu lobuw minatoi. Om lobuw wokon sobana ko linumaa’ om minongorayou sono nu Kinoringan so surga. ¹⁴ Ono yo su koogutan koduo, om kosiono sumusuut-o koogutan kotolu. ¹⁵ Monurumpito yo susuu’on koturu ri, om norongou-o sono bongut so surga mutangar nu, “Pogkuosaan so wonuo songapan nu Tuhan toko om ni Kristus, Raja Nijanji nu Kinoringan. Mogkuasa Iyo musingkolaid,” koo. ¹⁶ Tumungubo yo sono duo nopulu om opat kotutuaan, iri minogom so oogoman mogkuasa so tiningkuangon nu Kinoringan-i mongusaa’ so Iyo, ¹⁷ maid nu mutangar nu, “Oo Tuhan, Kinoringan Maayo Kuasa, iri kuwai yo nu gulu ri om ono sono tu! Mongunsopot kai so Ikau, so’ nokointolang Mu yo kuasa Mu maayo, om nokotimpuun Ko yo mogkuasa! ¹⁸ Minungot sono kiawi’ lobuw dai poimaid so Ikau, nga minungot Ko ya so nosiro, om nologa’ yo poongobisora’an Mu nu lobuw minatoi. Nologa’ yo ponuli’an Mu so uripon Mu, poo’abar Mu, lobuw songapan Mu, om kiawi’ lobuw obinsuut so Ikau, ono yo lobuw kipangkat om ado pangkat. Om nologa’ yo poomotoyan Mu nu lobuw mongoraag nu wonuo tu,” koo. ¹⁹ Nosukab-o sono Waloi Maayo nu Kinoringan so surga, om nosiou ku Boul Porojonjian, pinoosuwan nu janji nu Kinoringan. Om mungkudilopo yo maid nu korud, om ginumunggun wonuo tu om minuran nu osampuw om maantab.

¹ Om nokosiou aku yo nu sobana ko koiran-iran so langit, ono yo ido woinoi minupokakas nu runat, akod niyo ri mingkag-ingkag so wulan, om kitupi nu opulu om duo korombituon. ² Woinoi oono mokipupuanak-o om kogiak po ingoton. ³ Om nokosiou aku po nu sobana ko koiran-iran so langit, ono yo ido naga omiang om maayo, kiulu turu om kitanduk opulu. Naanid ulu niyo ri nu tupi omas. ⁴ Goyato yo sono niyo sombaagi’ tolu nu korombituon so langit nu iku’ niyo ri om pilayi yo so riniba tu. Mundii-dii iyo so tiningkuangon nu woinoi mokipupuanak-o iiri mokipoponolon nu lolaing-i ong olangus-o. ⁵ Nokopuanak-o sono woinoi iiri nu lolaing kusoi om iyo yo su mogkuasa nu kiawi’ bansa momakai nu tutungkud bosi. Nga sinolod lolaing iiri nu susuu’on om inowit so Kinoringan, om niogom so oogoman Niyo mogkuasa. ⁶ Mulaiwo yo woinoi iiri so padang pantai, tontong nosodia’ yo laid nu Kinoringan so iyo ri. Om inipatan iyo nai solaid oribu duo naatus onom nopulu runat. ⁷ Mututuda’ yo sono so surga. Ido susuu’on nu Kinoringan ingoranan so si Mikail om susuu’on niyo wokon minongolawan nu naga iiri om susuu’on niyo ri. ⁸ Nga nodoog-a naga iiri. Nadi dai yo sono linila’an naga om susuu’on niyo ri mogol so surga. ⁹ Naga maayo iiri nga niratu yo sono so wonuo tu maid nu susuu’on niyo wokon-i. Ngaran-o po nu naga iiri, Wowaidon nu Moinat intawa Saitan, om paawon po iyo nu lopung otuo so’ iyo yo su mongaakal nu lobuw so wonuo tu. ¹⁰ Nokorongou aku sono nu bongut osangat so surga minutangar nu, “Ono sono tu yo monapul Kinoringan nu lobuw songapan Niyo om mogkuasa so nosiro. Ono sono tu yo pointolang Iyo so nosiro nu poomogkuasa Niyo so’ Iyo yo raja. Ono sono tu yo pointolang si Kristus, Raja Nijanji ri nu kuasa Niyo, so’ nilabus-o nu Kinoringan Wowaidon nu Moinat, iri awi runat minonapud nu kosusulodan toko so tiningkuangon nu Kinoringan-i. ¹¹ Nodoog-o nu kosusulodan toko Wowaidon nu Moinat-o. Iri yo raa’ nu Anak nu Dumba om abar obana kiat so Kinoringan nituturan nosiro ri su pinongodoog nu Wowaidon nu Moinat oono. Olila’ nosiro sumonsara’ musingkopatoi. ¹² Oo su lobuw so surga, pagka soko ono, sumudu’an kou yo. Nga suat so lobuw so wonuo tu intawa so raat, sobana ko aagut kou. Nokountiba yo Wowaidon nu Moinat om sobana ko mungot iyo so’ oilaan niyo nu sontagal po miau iyo,” koo. ¹³ Noilaan-o po nu naga iiri nu niratu iyo so wonuo tu, torako yo sono niyo woinoi minuanak nu kusoi iiri. ¹⁴ Nga tinaakan woinoi iiri nu duo olad nu koniu, su’ kotulud iyo so padang pantai om ipatan iyo nai nu Kinoringan solaid tolu notoun om putonga’. ¹⁵ Potompuso yo naga iiri nu sungoi osuang so woinoi-i pongoba’ so iyo. ¹⁶ Nga tinobangan iyo nu wonuo tu. Linumota tana’ tu noporasap nu sungoi nitompus kiat so kobang nu naga ri. ¹⁷ Minungot sono naga iiri nu woinoi-i sampai minian iyo mongolawan nu solusuk wokon kiat so woinoi iiri, ono yo ongo lobuw mongowaid nu ponuu’an nu Kinoringan om obinsuut nu abar obana iri niintolang ni Yisus. ¹⁸ Mundii-dii sono naga iiri so imbing nu raat.

¹ Om nokosiou aku po ido kulos-kulos tinumindal kiat so raat, kitanduk opulu om kiulu turu. Naanid tanduk niyo ri nu tupi omas, om ulu niyo ri naanid nu ngaran pongobaag nu Kinoringan. ² Kulos-kulos nosiou ku ri soko orimau. Akod-i soko akod nu boluot om kobang-i soko kobang nu ingongansad. Tinaakan sono nu naga ri kulos-kulos iiri nu kobosagan om kopogboya’an niyo maayo ri. ³ Ido ulu nu kulos-kulos-i kibantar nu pilat kopatoi, nga nopali’ yo. Noiranan kiawi’ lobuw so wonuo tu nu nokosiou nu iri om maid-waid sono nosiro so iyo. ⁴ Inusaa’ nosiro naga iiri so’ tinaakan-o niyo kulos-kulos iiri nu kopogboya’an maayo niyo ri. Inusaa’ po nosiro kulos-kulos iiri om minutangar nu, “Ado koinong nu kuasa nu kulos-kulos iitu! Ado kopongodoog so iyo,” koo. ⁵ Linila’an kulos-kulos oono mutotongaron mongobaag nu Kinoringan, om linila’an-a iyo mogkuasa solaid opat nopulu om duo wulan. ⁶ Mutongaro yo sono iyo mongobaag nu Kinoringan, ngaran Niyo, polak Niyo, om kiawi’ minolak so surga. ⁷ Linila’an-a iyo mongolawan nu lobuw songapan nu Kinoringan om mongodoog so nosiro. Om tinaakan iyo nu kopogboya’an so kiawi’ suku-sakat, solusuk, musosondiang nu tangar om bansa. ⁸ Kulos-kulos iiri yo su usaa’on nu kiawi’ lobuw so wonuo tu. Nga lobuw, iri nokodaptar-o ngaran nosiro nu dai po nourug wonuo tu so buuk songapan nu Anak nu Dumba iri ginaras-i, dai minongusaa’ nu kulos-kulos iiri. Buuk oono pinosuratan nu ngaran nu lobuw kikowiawan. ⁹ Pagka soko ono, bang kitolingo kou, rongowo muyu yo abar iitu no. ¹⁰ Isai notantu yo nu okomon, okomon-a iyo. Isai notantu yo nu potoyon nu karis, potoyon-a iyo nu karis. Ono yo ko’ lobuw songapan nu Kinoringan subai otaan om ototog poimaid so si Kristus. ¹¹ Nokosiou aku po nu ido kulos-kulos minusit kiat so tana’, kitanduk duo soko tanduk nu uyog nu dumba. Kai-kai ri soko kai-kai nu naga. ¹² Kulos-kulos iiri minomakai nu kopogboya’an maayo kiat so kulos-kulos togna ri so tiningkuangon niyo. Sinosogan niyo ongo lobuw so pilolongkop nu wonuo tu mongusaa’ nu kulos-kulos togna, iri nopoli’an-o nu pilat-i. ¹³ Kulos-kulos koduo ri minomaal nu koiran-iran so tiningkuangon nu lobuw suang. Nopountiba iyo nu apui kiat so langit. ¹⁴ Kiawi’ lobuw so riniba tu inokalan niyo nu koiran-iran winaal niyo so tiningkuangon nu kulos-kulos togna ri. Om sinuu’ niyo nosiro momaal nu tinindobuw pongorumat nu kulos-kulos nopilat nu karis-i om kakal-a miau. ¹⁵ Kulos-kulos koduo ri tinaakan nu kuasa powiau nu tinindobuw iiri, om koputangar sono, om momatoi nu lobuw dai mongusaa’ so iyo. ¹⁶ Kiawi’ lobuw, kipangkat ado pangkat, doyaan omiskin, uripon ko’ okon, sinosogan niyo monanda’ so longon wanan intawa so paras nosiro ri. ¹⁷ Ado ido kopomoli intawa powoli nu onu-onu ya ong d’ado tanda’ oono, ono yo ngaran nu kulos-kulos-i intawa numbur potarang nu ngaran niyo. ¹⁸ Subai kikoilaan kiat so Kinoringan mongoorati nu ngaran oono. Isai oilo, koorati nu numbur nu kulos-kulos oono so’ numbur oono numbur nu ido lobuw, ono yo onom naatus onom nopulu om onom (666).

¹ Nosiou ku sono Anak nu Dumba mundii-dii so timpak nu Bulud Siun. Maatus opat nopulu om opat ribu koyuwan minaid so Iyo om kitanda’ so paras nosiro ri nu ngaran Niyo om ngaran nu Amo Niyo. ² Nokorongou aku sono nu kai-kai kiat so langit soko wosoi maayo om korud osangat, om soko kai-kai nu kosapi. ³ Muloguo yo sono maatus opat nopulu om opat ribu lobuw iiri nu lagu wagu so tiningkuangon nu oogoman mogkuasa om opat kiinawo om kotutuaan so pililiwut nu oogoman iiri. Lagu iiri dai olagu nu isai-isai ya sondiang ko’ maatus opat nopulu om opat ribu iiri, iri nolukat-o nu Kinoringan kiat so wonuo tu. ⁴ Nosiro oono kokusoyan d’ado koraayan nu dai po insan koondot nu woinoi. Maid nosiro so Anak nu Dumba oono siombo-ombo ya ianan. Linukat-o nosiro kiat so kiawi’ lobuw so wonuo tu, soko tutungkap owarong sobana so Kinoringan om Anak nu Dumba oono. ⁵ Dai insan nosiro monimbaal, om d’ado muad koraayan nosiro. ⁶ Nokosiou aku sono nu ido susuu’on wokon mulud-tulud so dilanggau. Minongowit susuu’on oono nu Abar Owarong musingkolaid, nituturan so lobuw so wonuo tu, so kiawi’ bansa, solusuk, musosondiang nu tangar, om kiawi’ tontong so wonuo tu. ⁷ Mutongaro yo iyo nu osangat nu, “Orumaton-o Kinoringan om royowon-o kobontugan Niyo no, so’ nologa’ yo poongobisora’an Niyo nu lobuw. Usaa’on-o Iyo, ono minomaal nu langit om wonuo tu, raat om kiawi’ towud nu sungoi,” koo. ⁸ Sumusuuto yo ido susuu’on wokon om mutongaro yo nu, “Noraag-o bandar maayo nu Babil. Pinaawuk niyo nu sungoi nu anggur kiawi’ bansa, ono yo kogoyaan nosiro ogilat-o,” koo. ⁹ Sumusuuto yo susuu’on kotolu so susuu’on koduo ri om mutongaro yo nu osangat nu, “Isai yo po mongusaa’ nu kulos-kulos om tinindobuw niyo om mokitanda’ so paras intawa so longon niyo no, ¹⁰ lobuw oono poinumon nu anggur, ono yo koo’ungot nu Kinoringan nosodia’ yo laid. Sungoi nu anggur obisa oono nokoiib-o nu Kinoringan so sawan, ono yo koo’ungot Niyo. Kiawi’ lobuw oono sonsora’on nu apui, om sinikit nu morirang so tiningkuangon nu susuu’on om Anak nu Dumba oono. ¹¹ Lisun nu apui mononsara’ nu lobuw oono d’ado pupus sumomput. Awi runat sonsora’on nosiro, ono yo lobuw mongusaa’ nu kulos-kulos om tinindobuw oono, om mokitanda’ nu ngaran nu kulos-kulos-o,” koo. ¹² Ono yo ko’ lobuw songapan nu Kinoringan subai obinsuut nu ponuu’an Niyo om sumundur poimaid so si Yisus. ¹³ Nokorongou aku yo nu bongut kiat so surga mutangar nu, “Surati yo itu no. Kiat nu ono sono tu osanang-o lobuw nu minatoi laid nosiro mugogoma’on suat so Tuhan,” koo. Sumombuto yo Atod nu Kinoringan-o nu, “Bana ya ono. Mintoron sono nosiro mugogoma’on so’ koompusan nu gogoma’on nosiro ri oowit so surga,” koo. ¹⁴ Nopupus iri, nokosiou aku sono nu kawut oputi’ om kuwai soko lobuw tinumimpak mogom so kawut iiri, soko Anak nu Kinoringan. Kitupi Iyo nu tupi omas om kikinuyut nu linggaman otarom. ¹⁵ Lumobuso yo ido susuu’on wokon kiat so Waloi Maayo nu Kinoringan so surga, om mutongaro yo nu osangat so lobuw minogom so kawut iiri nu, “Poporoyo yo linggaman so longon mu no, so’ nologa’ yo pomoroyan. Noonsak-o tonom-tonoman so wonuo tu,” koo. ¹⁶ Poroyi yo sono nu lobuw minogom so kawut iiri linggaman niyo ri so wonuo tu. ¹⁷ Nokosiou aku po nu susuu’on wokon lumabus kiat so Waloi Maayo nu Kinoringan so surga kikinuyut-a nu linggaman otarom. ¹⁸ Lumobuso po ido susuu’on wokon kiat so ranggar mogkuasa nu apui om mutongaro yo nu osangat so susuu’on kikinuyut nu linggaman otarom iiri nu, “Koroto yo ongo puun nu anggur so wonuo tu, so’ noonsak-o bua’ no,” koo. ¹⁹ Koroto yo sono niyo nu linggaman niyo ri puun nu anggur so wonuo tu om pilayi yo so poomoga’an maayo, ono yo koo’ungot nu Kinoringan. ²⁰ Bua’ nu anggur iiri pinoga’ so dilabus nu bandar, om lumuyu’ sono su raa’ kiat so poomoga’an iiri soko loni’ tolu naatus kilumitor langgau om duo nomitor lalom.

¹ Nopupus iri, nokosiou aku po nu sobana ko koiran-iran so langit. Kuwai turu susuu’on maid nu turu koogutan pomupusan. Kotalib po turu koogutan oono, mingkoyod-o sono Kinoringan mongukum. ² Om nokosiou aku po nu soko raat soromin winaal minugawul nu apui. Om nosiou ku ya lobuw nokopongodoog nu kulos-kulos om tinindobuw niyo om lobuw tinonda’an nu numbur niyo ri. Minundii nosiro so imbing nu raat oono kikinuyut nu kosapi nitaak nu Kinoringan so nosiro, ³ om muloguo yo sono nosiro nu lagu ni Musa, iri uripon nu Kinoringan-i, om lagu nu Anak nu Dumba nu, “Oo Tuhan, Kinoringan Maayo Kuasa, sobana ko maayo om koiran-iran gogoma’on Mu! Oo su Raja nu kiawi’ bansa, ooluk om obana kogoyaan Mu. ⁴ Oo Tuhan, kiawi’ lobuw mongorumat so Ikau, om kiawi’ lobuw moingin paabar nu kobontugan Mu, so’ Ikau-o su ado koraayan, om kiawi’ bansa mongusaa’ so Ikau, so’ nokointolang Mu yo koworongan Mu so kiawi’ lobuw,” koo nosiro. ⁵ Nopupus iri, nosiou ku sono nosukab Waloi Sosombooyangan so surga om Bosalag Sosombooyangan so dilalom-i. ⁶ Lumobuso yo turu susuu’on maid nu turu koogutan iiri kiat so Waloi Sosombooyangan so surga, kipokakas nu oputi’ milat-kilat, om minomakai nu pongolilit nu kuab omas winaal. ⁷ Taaki yo sono nu ido kiinawo ri so turu susuu’on iiri turu sawan kiasuw nu koo’ungot nu Kinoringan, iri miau musingkolaid. ⁸ Noponu’ yo sono Waloi Sosombooyangan-i nu lisun nu kobontugan om kuasa nu Kinoringan, om ado ido koyuwan kaasuw nai ong dai po opupus turu koogutan kiat so turu susuu’on iiri.

¹ Nokorongou aku sono nu bongut osangat kiat so Waloi Sosombooyangan so surga minutangar so turu susuu’on iiri nu, “Iano om tuntugi yo so wonuo tu kituru-turu sawan pinoosuwan nu koo’ungot nu Kinoringan-o,” koo. ² Miano yo susuu’on togna ri potuntug nu sawan niyo ri so wonuo tu. Kinuposon sono kiawi’ lobuw kitanda’ nu ngaran nu kulos-kulos-i om mongusaa’ nu tinindobuw niyo ri. ³ Tuntugi yo nu susuu’on koduo ri sawan niyo ri so raat. Minusiliw sono raat-i nu soko rinaat nu lobuw, om minatoi kiawi’ miau so raat. ⁴ Tuntugi yo nu susuu’on kotolu ri sawan niyo ri so ongo bowang om towud nu sungoi, om minusiliwo sono nu raa’. ⁵ Norongou ku sono susuu’on mogkuasa nu sungoi-i minutangar nu, “Oo su Kinoringan d’ado koraayan, iri kuwai yo nu gulu ri om ono sono tu, ooluk sobana ukuman Mu oono so lobuw kitanda’ nu ngaran nu kulos-kulos-i. ⁶ Pagka pinatoi-o nosiro lobuw songapan Mu om poo’abar gulu ri, pinoinum Mu sono nosiro nu raa’, om musuat sobana ukuman Mu oono so nosiro,” koo. ⁷ Nokorongou aku yo nu bongut kiat so ranggar-i nu, “Oo Tuhan, Kinoringan Maayo Kuasa, musuat om obana ukuman Mu no,” koo. ⁸ Tuntugi yo nu susuu’on koopat-i sawan niyo ri so runat. Umomuto yo sono su runat sampai koompu’ nu lobuw. ⁹ Noompu’ nosiro nu koo’amut nu runat-i, nga dai ya nosiro rumorogo momaal nu koraayan om dai ya mongorayou nu Kinoringan, ala’ nai’ sumundur nosiro mongobaag nu Kinoringan, iri kikopogboya’an suat so koogutan iiri. ¹⁰ Tuntugi yo nu susuu’on kolimo ri sawan niyo ri so oogoman mogkuasa nu kulos-kulos iiri, om tinumuong-o sono pogkuosaan niyo sampai minongobut lobuw nu dila’ tanda’ nu osokitan. ¹¹ Owagi yo sono nosiro Kinoringan so surga suat so osakit om kupos nosiro ri, nga dai ya nosiro rumorogo kiat so gogoma’on nosiro oraai-i. ¹² Tuntugi yo nu susuu’on koonom-i sawan niyo ri so Bowang Iprat, iri bowang maayo ri. Notuuwan sono bowang oono sampai koripau ongo raja kiat so pusitan. ¹³ Nokosiou aku sono tolu moinat sinumorupa nu gata’, linumabus kiat so kobang nu naga, kobang nu kulos-kulos-i om kiat so kobang nu lobuw musingkopoo’abar nu Kinoringan-i. ¹⁴ Komoinatan oono kikuasa momaal nu koiran-iran. Mian nosiro so kiawi’ raja so pilolongkop nu wonuo tu, mongimpug nu soujar lumawan nu Kinoringan Maayo Kuasa ong ologa’ Runat Pongukuman Niyo. ¹⁵ Mutongaro yo sono si Yisus nu, “Ingati muyu! Lumoga’ Aku so wonuo tu soko moonakou, nu dai oilaan ong sombiya. Nga osanang-o lobuw iri mingat-ingat-i om sumodia’ mupokakas, su’ dai nosiro mompanou lobas-lobas om oiyu’an sono so tiningkuangon nu lobuw suang,” koo. ¹⁶ Impugo yo nu moinat-i ongo raja iiri om ongo soujar-i so tontong ingoranan so tangar Ibrani nu Armagidun. ¹⁷ Tuntugi yo sono nu susuu’on koturu ri sawan niyo ri so uos, om orongou-o sono bongut osangat kiat so oogoman mogkuasa so Waloi Sosombooyangan so surga nu, “Noopod-o pongukuman Ku!” koo Kinoringan. ¹⁸ Mungkudilopo yo sono maid nu mungkorud nu osangat, om ginumunggun su tana’ nu sobana ko oontob om dai po insan nu soko iri koontob gumunggun tana’ kiat nu nowangun lobuw so wonuo tu. ¹⁹ Bandar maayo iiri, ono yo bandar Babil nopitolu noraag, om kiawi’ bandar so wonuo nga noraag-a. Dai ya nolupaan nu Kinoringan lobuw so bandar Babil. Indadi poinumo yo sono Niyo nosiro nu anggur kiat so sawan Niyo, ono yo koo’ungot Niyo. ²⁰ Kiawi’ puru om bulud nga linumiong. ²¹ Om minuran-o sono nu maantab kiro-kiro limo nopulu kilu wogat mongoonsit nu lobuw. Indadi owagi yo nosiro Kinoringan suat nu uran maantab iiri.

¹ Nopupus iri, lumogaa yo dii so aku ido kiat so turu susuu’on nu Kinoringan kikinuyut nu sawan iiri om mutongaro yo nu, “Koyo! Posiowon ku ikau nu poongobisara’ so susumundal obantug, ono yo bandar maayo so imbing nu sungoi-o. ² Ongo raja so wonuo tu sinumundal so iyo, om lobuw so wonuo tu soko noowukan nu anggur niyo, ono yo gogoma’on oraai winaal nosiro maid so susumundal oono,” koo. ³ Kinuasa aku sono nu Atod nu Kinoringan, om owito aku yo nu ongo susuu’on iiri so padang pantai. Nokosiou aku sono dii nu woinoi ginumandar so kulos-kulos omiang, noruyut nu surat pokoraai nu Kinoringan. Kulos-kulos iiri turu ulu om opulu tanduk. ⁴ Woinoi iiri kisabung oitom mongkomiang-miang om soko wusak komiang, kinopitan nu omas, watu poriasan om kumala. Kikinuyut iyo nu sawan omas kiasuw nu anggur, tanda’ nu gogoma’on oraai om osaim kiat so sinundalan niyo. ⁵ So paras niyo ri kisurat nu ngaran osusut orati, ono yo Babil Obantug Impuunon nu Kiawi’ Susumundal om Koraayan so Wonuo tu koo surat oono. ⁶ Om nosiou ku woinoi iiri moowukan so’ nokoinum nu raa’ nu lobuw sinongapan nu Kinoringan, iri pinatoi so’ obinsulut nosiro so si Yisus. Noiranan aku sobana nu nosiou ku woinoi iiri. ⁷ Mutongaro yo susuu’on iiri so aku nu, “Nokuro su oiranan ko?” koo. Kosiono, pokoiloon ku yo ikau nu orati nu woinoi om kulos-kulos ginondaran niyo no, ono kiulu turu om kitanduk opulu no. ⁸ Kulos-kulos oono nu gulu ri miau-a, nga dai yo sono miau nu kosiono tu. Dai yo olaid om lumabus iyo kiat so uang d’ado nanad om ukumon nu Kinoringan nu niada’ so kopotoyan. Om moiranan sono lobuw so wonuo tu, iri dai nokodaptar ngaran nosiro so buuk nu lobuw kikowiawan nu dai po nowangun wonuo tu ri, ong kosiou nu kulos-kulos oono, so’ kulos-kulos oono miau-a nu gulu ri, nga kosiono tu dai yo sono miau om musit po iyo koimbagu. ⁹ Orotion-o itu sobana. Orati yo po nu turu ulu oono, ono yo turu bulud inogoman nu woinoi-o. Om orati ya nu turu ulu oono, turu raja. ¹⁰ Limo raja kiat so nosiro minatoi-o, om ido po sono mogkuasa. Iri ido po koyuwan, dai po nokologa’. Ong kologa’ iyo, sontagal-a iyo mogkuasa. ¹¹ Orati yo po nu kulos-kulos miniau nu gulu ri, nga kosiono tu minatoi-o oono, iyo yo su raja kowalu om ido ya kiat so turu raja oono. Ukumon sono iyo nu Kinoringan nu niada’ so kopotoyan. ¹² Om orati nu opulu tanduk osiou mu oono, ono yo opulu raja nu dai po nokotimpuun mogkuasa. Nga taakan nosiro nu kopogboya’an mogkuasa soko raja maid nu kulos-kulos oono solaid sonjaam. ¹³ Kipulu-pulu nu raja oono muinong-a tomodon. Kiawi’ nosiro pokomouli’ nu kuasa om kopogboya’an nosiro no so kulos-kulos oono. ¹⁴ Mutuda’ nosiro lumawan nu Anak nu Dumba, nga odoog-a nosiro nu Anak nu Dumba oono om mompomaid Niyo ototog, iri pinaau om pinili’ Niyo ri. Iyo yo su Tuhan om Raja nu kiawi’. ¹⁵ Mutongaro po susuu’on-i so aku nu, “Orati yo po nu sungoi osiou mu, inogoman nu susumundal-o, ono yo ongo bansa, suku-sakat om lobuw musosondiang nu tangar. ¹⁶ Opulu tanduk osiou mu no om kulos-kulos oono mongobisig nu susumundal-o. Solodon nosiro kiawi’ songapan niyo no om lobasan. Okanon nosiro onsi niyo no om ompu’on. ¹⁷ Soko ono yo ourug so’ kinijib-o nu Kinoringan inawo nosiro no momaal nu padu-padu Niyo nu songido inawo, om pokomouli’ nu kopogboya’an nosiro so kulos-kulos iiri, tayon ong mogkuasa kulos-kulos iiri musingkotuman nu tinangar nu Kinoringan. ¹⁸ Orati yo po nu woinoi nosiou mu iiri, ono yo bandar maayo, om raja mogkuasa so bandar oono yo su mogkuasa nu kiawi’ raja so wonuo tu,” koo susuu’on-i.

¹ Nopupus iri, nokosiou aku nu ido susuu’on wokon minuntiba kiat so surga, nu sobana ko maayo kopogboya’an, om nonowawan wonuo tu nu kobontugan niyo ri. ² Mutongaro yo sono iyo nu, “Noraag-o bandar Babil obantug-i! Kosiono nourug-o nu popolakan nu komoinatan, om koginisan nu bombolog oraai om iri kobisigan nu lobuw, ³ so’ kiawi’ bansa noowukan-o nu anggur ono yo gogoma’on niyo sumundal-o. Ongo raja so wonuo tu sinumundal so iyo. Om kiawi’ moomudagang so wonuo tu kinumaya nu koogilat niyo nu d’ado ontob-o,” koo. ⁴ Nokorongou aku po nu bongut sondiang kiat so surga nu, “Oo su lobuw songapan Ku, labus kou yo kiat so bandar oono, su’ dai kou kowaid nu koraayan niyo no, om dai yo sono kowaid-waid nu ukuman so iyo, ⁵ so’ nobobumbun-o koraayan niyo sampai so langit om ondomon-a nu Kinoringan koraayan niyo oono. ⁶ Sunsulii muyu yo iyo, soko winaal niyo so kou ri. Osuwi muyu yo sawan niyo no nu anggur oinduo koobisa nu anggur sinodia’ niyo so kou ri. ⁷ Sonsoraa om pooguto muyu yo iyo, koinong nu koosuang nu kobontugan om kokoyaan noirosaan niyo, so’ dadan iyo mutangar nu, ‘Aku yo su mogkuasa. Okon ko balu aku, om dai su insan kopongulid,’ koo susumundal oono. ⁸ Pagka soko ono, sondunat-o om nosuat-o iyo nu kosusaan ono yo pomayat, pongulidan om likop. Ompu’on-a ono iyo, so’ sobana ko obasag Kinoringan mongukum so iyo no,” koo. ⁹ Moginoontob sono tumangi’ ongo raja so wonuo tu, iri sinumundal om minusintopod nu koinginan nosiro d’ado ontob maid so iyo, ong osiou nosiro lisun nu apui minongompu’ so iyo no. ¹⁰ Mundii ya nosiro so dirawu’ so’ lumaa’ nosiro osuat nu kosonsora’an oono. Mutangar nosiro nu, “Atuuk! Okon ko nogina-gina kuasa minongukum nu bandar Babil obantug om opopag oono. Sonjaam-o laid mongukum om noraag-o,” koo nosiro. ¹¹ Moomudagang so wonuo tu nga tumangi’ om mongulid so iyo so’ ado yo sono momoli nu dogangan nosiro no, ¹² ono yo omas, pirok, watu otaas orogo, kumala, koukuputi, kumut oitom mongkomiang-miang, kumut okolas ingoranan sutora, kumut omiang soko wusak, boroginis nu kayu olanung, gonggamon gading winaal, gonggamon kayu otaas, tombaga, bosi om watu ingoranan nu marmar, ¹³ kulit nu kayu oomis, rampa, lonung-lonungan, inosak lanung ingoranan nu muur, komanyan, sungoi nu anggur, inosak, tapung, gandum, sapi, dumba, kuda, korita kuda om kouriponan. ¹⁴ Mutongaro yo moomudagang oono so woinoi oono nu, “Kiawi’ koinginan mu mononsongapan-i d’ado yo sono. Kiawi’ kokoyaan om koworongan mu ri linumiong-o, om dai mu yo sono ooyangan,” koo nosiro. ¹⁵ Moomudagang nu nokaya yo so bandar oono mundii ya so dirawu’, so’ lumaa’ nosiro osuat nu kosonsora’an oono. Tumangi’ om mongulid nosiro, ¹⁶ maid nu mutangar nu, “Atuuk! Okon ko nogina-gina kuasa minongukum nu bandar obantug oono. Gulu ri momakai iyo nu koukuputi, kumut oitom mongkomiang-miang, om kumut omiang soko wusak, kinopitan nu omas, watu otaas orogo om kumala. ¹⁷ Nga sonjaam-o om noliongan-o iyo nu kiawi’ kokoyaan,” koo. Kukumoraja so kapal, lobuw sinumakoi, om kiawi’ lobuw moomonsaari so raat mundii so dirawu’, ¹⁸ om gumonsok nu nosiou nosiro lisun nu apui minongompu’ nu bandar obantug oono nu, “Dai insan kibandar obantug soko koobantug nu bandar iitu no,” koo nosiro. ¹⁹ Sosadi yo sono nosiro ulu nosiro ri nu awu tanda’ nu mongulid maid nu tumangi’ om monsok-gonsok nu, “Atuuk! Okon ko nogina-gina kuasa mongukum nu bandar obantug oono! Kokoyaan-o niyo no su nokokaya nu kiawi’ lobuw kikapal so raat. Nga sonjaam-o laid, noliongan-o iyo nu kiawi’ kokoyaan niyo no,” koo nosiro. ²⁰ Oo su minolak so surga, sumudu’an-o nu noraag bandar oono. Oo su lobuw songapan nu Kinoringan, pinongoorapan om poo’abar nu Kinoringan, sumudu’an kou yo so’ inukum-o iyo nu Kinoringan, ponuli’ nu iri winaal niyo so kou ri! ²¹ Nopupus iri, mongokato yo ido susuu’on obasag nu watu maayo muinong nu watu kisaran om pilaii yo niyo so raat inuyud mutangar nu, “Soko itu yo gama’ popilai nu bandar Babil obantug iiri, om dai yo sono ooyangan koimbagu. ²² D’ado yo sono orongou nu kai-kai nu kosapi, momulagu, musuling, om musurumpit, om d’ado yo sono ido pona lobuw moilo momaal nu onu-onu ya, om dai yo sono orongou kai-kai nu kisaran. ²³ Ado yo sono osiou sinikit nu politaan, om dai yo korongou nu rami-rami muontun so bandar Babil. Sobana ko okaya om obantug moomudagang so Babil, om kiawi’ bansa so wonuo tu nookalan nu olimu niyo no,” koo. ²⁴ Inukum bandar Babil so’ nai yo kinopotoyan nu poo’abar nu Kinoringan, lobuw songapan nu Kinoringan, om kiawi’ lobuw nu pinatoi-o so wonuo tu.

¹ Nopupus iri, nokorongou aku nu bongut nu lobuw osuang kiat so surga nu, “Royowon-o Tuhan Kinoringan! Kinoringan toko, ono yo Kinoringan powiau, obantug, om kikuasa. ² Ooluk om musuat gama’ Niyo mongukum! Iyo yo su minongukum om minonunsuli’ nu woinoi susumundal obantug-i, iri minongusiba’ nu wonuo tu nu koogilat niyo ri, om minomatoi nu uripon nu Kinoringan,” koo. ³ Gumonsok-o po lobuw oono nu, “Royowon-o Tuhan Kinoringan! Lisun nu apui minongompu’ nu bandar obantug oono dai mingkoyod musingkolaid!” koo. ⁴ Nokosurukud sono duo nopulu om opat wowaidon om opat kiinawo so pililiwut nu oogoman-i, om minongusaa’ nu Kinoringan minogom so oogoman-i maid nu mutangar nu, “Otuman-o! Royowon-o Tuhan Kinoringan!” koo nosiro. ⁵ Kuwai yo sono orongou ku bongut kiat so oogoman iiri nu, “Oo su uripon nu Kinoringan om lobuw obinsuut so Kinoringan maayo oworos, royowon-o Iyo!” koo. ⁶ Nokorongou aku po nu bongut nu impug nu lobuw osampuw, soko kai-kai nu loni’ om korud nu, “Royowon-o Tuhan Kinoringan! Mogkuasa yo nu ono sono tu, Tuhan Kinoringan toko maayo kuasa no. ⁷ Kayo toko yo mongunsopot, sumudu’an om royowon kobontugan Niyo no, so’ nologa’ yo runat ontunan nu Anak nu Dumba no. Nokopurigap-rigap-o pongantin woinoi-o nu montun. ⁸ Nokotaak-o so iyo koukuputi milat-kilat pokayon niyo,” koo. (Koukuputi oono yo su orati nu gogoma’on owarong nu lobuw songapan nu Kinoringan). ⁹ Mutongaro yo susuu’on iiri so aku nu, “Surati yo itu, ‘Osanang-o lobuw soginaan so rami-rami ontunan nu Anak nu Dumba no,’ ” koo. Om sumundur-o po iyo mutangar nu, “Itu yo abar obana kiat so Kinoringan,” koo. ¹⁰ Nokosurukud aku sono so tiningkuangon niyo mongusaa’ so iyo. Nga mutongaro yo iyo so aku nu, “Adang! Adang mongusaa’ so aku. Kinoringan-o su usaa’on so’ aku nga uripon-a soko ikau om kosusulodan mu iri tumotog mongowaid nu pontudukan obana ni Yisus,” koo. Onu yo po pontudukan obana ni Yisus, iri yo su nituduk nu Kinoringan so ongo poo’abar, iri polombus nu tinongaran Niyo. ¹¹ Nosiou ku sono surga nosukab, om kuwai ido kuda oputi’. Poomaawan so lobuw ginumandar-o, Ototog om Obana. Ooluk sobana poongoukum om poomutuda’ Niyo. ¹² Mato Niyo ri soko sinikit nu apui om so ulu Niyo no osuang tupi nu raja, om so koyuwan Niyo ri kisurat nu ngaran, om Iyo yo su koilo nu ngaran iiri. ¹³ Sabung olanggau pinakai Niyo ri niloob so raa’. Ngaran Niyo Tinongaran nu Kinoringan. ¹⁴ Kiawi’ posukan momutuda’ so surga minaid so Iyo iri ginumandar nu kuda oputi’, om minusabung nu koukuputi oborisi ri. ¹⁵ Kiat so kobang Niyo no kuwai musit nu karis otarom, pongodoog nu kiawi’ bansa. Om mogkuasa Iyo so nosiro momakai nu tutungkud bosi. Momoga’ Iyo nu anggur so poomoga’an nu anggur, ono yo koo’ungot nu Kinoringan Maayo Kuasa. ¹⁶ So sabung om so paa Niyo ri, kisurat nu ngaran, ono yo Raja om Tuhan nu Kiawi’-awi’. ¹⁷ Nokosiou aku yo ido susuu’on nu Kinoringan mundii-dii so runat. Mutongaro yo iyo nu osangat so bombolog sontulud-tulud nu, “Tuui kou yo sumuung so rami-rami maayo nu Kinoringan. ¹⁸ Tuui kou yo mongokan nu onsi nu ongo raja, wowaidon nu soujar, om ongo soujar. Tuui kou yo mongokan nu onsi nu ginumandar so kuda om onsi nu kuda no, om onsi nu lobuw, maayo oworos, uripon om okon ko uripon,” koo. ¹⁹ Nosiou ku kulos-kulos iiri om ongo raja so wonuo tu, maid nu soujar nosiro, minuimpug mongolawan nu ginumandar so kuda oputi’ ri om soujar niyo ri. ²⁰ Naakom-o sono kulos-kulos iiri maid nu poo’abar moomudut niyo, iri minomaal nu koiran-iran so tiningkuangon nu kulos-kulos-i pinongaakal nu lobuw kitanda’ nu kulos-kulos iiri, om lobuw mongusaa’ nu tinindobuw nu kulos-kulos-i. Kiduo-duo nu kulos-kulos om poo’abar moomudut iiri niada’ miau-wiau so raat nu apui om morirang nu sobana ko maamut. ²¹ Om ongo soujar nosiro ri pinatoi momakai nu karis otarom minusit kiat so kobang nu ginumandar so kuda oputi’ iiri. Indadi lumoga’ yo sono kobombologan mongokan nu onsi nosiro ri sampai notopodan.

¹ Nopupus iri, nokosiou aku nu ido susuu’on nu Kinoringan minuntiba kiat so surga, kikinuyut nu kunsi nu uang d’ado nanad om rantai pongkogos maantab. ² Okomo yo niyo naga ri, iri lopung otuo, ono yo Wowaidon nu Moinat, om kogosi yo niyo solaid oribu toun. ³ Pilaii yo naga iiri nu susuu’on-i so uang d’ado nanad, om tutubo yo niyo pintu nu uang-i om kunsio yo su’ dai yo sono kopongaakal naga iiri nu ongo bansa nu dai po opupus oribu toun oono. Noopod ono, nilabus sono iyo sontagal. ⁴ Nokosiou aku po nu oogoman mogkuasa, om lobuw so oogoman iiri tinaakan nu kuasa mongukum. Nosiou ku ya atod nu lobuw iiri pinatoi so’ nopaabar nu abar suat so si Yisus, om tinongaran nu Kinoringan. Dai nosiro minongusaa’ nu kulos-kulos om tinindobuw-i, om dai ya minokitanda’ so paras om longon nosiro. Nga noluli’an nosiro om maid so si Yisus mogkuasa solaid oribu toun. ⁵ Ono yo su koluli’an togna. (Nga lobuw minatoi-i dai po luli’an ong dai po opupus oribu toun oono.) ⁶ Osanang-o om borokatan-o lobuw minatoi kowaid oluli’an iya nu pongoluli’an togna no. Dai yo sono okuasa nosiro nu kopotoyan koinduo. Nga ourug nosiro nu lobuw mugogoma’on suat so Kinoringan om so si Kristus om maid nosiro mogkuasa solaid oribu toun. ⁷ Kotalib oribu toun oono, nilabus-o sono Wowaidon nu Moinat kiat so pinojiilan so iyo no. ⁸ Mian sono Wowaidon nu Moinat oono mongaakal nu bansa so pilolongkop nu wonuo tu. Ngaran nu bansa oono Gug om Magug. Impugon niyo nosiro nu mian mutuda’, om dai oiap koosampuw nosiro no. ⁹ Lumongkop sono nosiro so wonuo tu om mongoliwut nu lobuw songapan nu Kinoringan om bandar kosomodan Niyo. Nga muntiba apui kiat so langit mongompu’ so nosiro. ¹⁰ Nipilai sono Wowaidon nu Moinat minongaakal so nosiro oono so raat nu apui om morirang sobana ko maamut, pinooda’an nu kulos-kulos om poo’abar moomudut-i. Sonsora’on nosiro nai awi runat musingkolaid. ¹¹ Nopupus iri, nosiou ku Kinoringan mogom-ogom so oogoman mogkuasa maayo oputi’. Linumiong-o sono langit om wonuo tu so tiningkuangon Niyo, om dai yo sono osiou. ¹² Nosiou ku ya mundii-dii so tiningkuangon nu oogoman iiri lobuw minatoi maayo oworos. Noyoyak-o sono su ongo buuk, om kuwai ido buuk wokon yinoyak nosiro, ono yo buuk pinosuratan nu ngaran nu lobuw kikowiawan. Om iya ya iiri inukum-o sono ongo lobuw minatoi, musuat nu pinuwaal nosiro nokosurat so ongo buuk oono. ¹³ Usiti yo nu raat ongo lobuw nolosod. Usiti ya nu kopotoyan om wonuo nu kopotoyan lobuw minatoi nai om inukuman-o sono nosiro musuat nu pinuwaal nosiro ri. ¹⁴ Noopod iri, niada’ yo sono kopotoyan om wonuo nu kopotoyan so raat nu apui. (Raat nu apui oono yo kopotoyan koinduo.) ¹⁵ Lobuw dai nokosurat ngaran nosiro so buuk pinosuratan nu ngaran nu lobuw kikowiawan, niada’ so raat nu apui oono.

¹ Nosiou ku sono langit om wonuo owagu, so’ langit om wonuo togna noliong-o, om ado yo sono raat. ² Om nosiou ku po bandar nu Kinoringan, ono yo Yirusalim Owagu, niuntiba Niyo kiat so surga nu naatag-atag-o soko pongantin woinoi nokopuatag-atag mongimat nu kologa’ pongantin kusoi. ³ Norongou ku sono bongut osangat kiat so oogoman mogkuasa iiri nu, “Kosiono nokopuido yo sono polakan nu Kinoringan om lobuw. Miau Iyo mido so nosiro, om mourug nosiro nu songapan Niyo. Om Iyo yo su ourug nu Kinoringan nosiro. ⁴ Piidon Niyo ramou nosiro no, om d’ado yo sono matoi, mongulid, tumangi’, om sumakit. Onu yo po nu gulu ri, d’ado yo sono,” koo. ⁵ Mutongaro yo lobuw so oogoman iiri nu, “Kosiono powoguon Ku kiawi’,” koo. Om mutongaro ya Iyo so aku nu, “Surati yo itu, so’ totongaron iitu obana om opongoorapan. ⁶ Nopupus-o! Aku yo su ponimpuunan om pongoowi’an. Aku yo su Tuhan kiat nu togna sampai pongoowi’an. Isai lugangon, lila’an Ku poinum nu sungoi nitaak Ku tomod, ono yo impuunon nu kowiawan. ⁷ Isai kopongodoog nu Wowaidon nu Moinat kotorima’ nu itu kiat tuui so Aku, ono yo ourug Aku nu Kinoringan niyo, om ourug iyo nu anak Ku. ⁸ Nga iri lobuw otalou, lobuw dai poimaid, lobuw koobisigan, moomatoi, susumundal, bolian, moongusaa’ nu tinindobuw om moomudut, niada’ nosiro so raat nu apui om morirang sobana ko maamut. Ono yo kopotoyan koinduo,” koo. ⁹ Lumogaa yo dii so aku ido kiat so turu susuu’on kikinuyut nu sawan poosuwan nu koogutan om mutongaro yo nu, “Koyo, nituduk ku so ikau pongantin woinoi, ono yo sawo nu Anak nu Dumba oono,” koo. ¹⁰ Kinuasa aku sono nu Atod nu Kinoringan om owito aku yo nu susuu’on iiri so timpak nu bulud opangkat, om tuduki yo niyo so aku bandar Yirusalim nu Kinoringan, iri niuntiba Niyo kiat so surga ri. ¹¹ Milat-kilat bandar iiri nu kobontugan nu Kinoringan soko watu otaas orogo om owarong sobana, om soko watu ingoranan nu aspur, om watu oliou ingoranan ablur. ¹² Rinding nu bandar iiri opangkat om okapal, om kipintu opulu om duo, naanid nu susuu’on nu Kinoringan mongipat. So dilanggau nu opulu om duo pintu oono nokosurat ngaran nu opulu om duo bansa nu Israil. ¹³ Umpak disawa tolu pintu, umpak dirayo tolu, umpak ditaad tolu, om umpak ditidong tolu. ¹⁴ Rinding nu bandar iiri winaal so timpak nu opulu om duo watu pinosuratan nu opulu om duo pinongoorapan nu Anak nu Dumba. ¹⁵ Susuu’on minutangar so aku iiri kipoonukud omas, poonukud nu bandar oono, pintu no om rinding-o. ¹⁶ Bandar iiri posagi opat. Langgau-i muinong nu laab-i. Sukudo yo niyo bandar iiri nu poonukud niyo ri. Langgau om laab-i duo noribu opat naatus opulu om limo kilumitor, om muinong-a pangkat-i. ¹⁷ Sukudo yo nu susuu’on iiri koopangkat nu rinding-i, onom nopulu mitor. Poonukud pinakai nu susuu’on iiri muinong nu poonukud pokayon nu lobuw. ¹⁸ Rinding iiri winaal kiat so watu otaas ingoranan aspur. Bandar-i winaal kiat so omas luun-luun, soko soromin oturopusan monsiou. ¹⁹ Ongo watu pinotimpakan nu rinding nu bandar iiri tinou’an nu boroginis nu watu otaas. Watu togna ri winaal kiat so watu aspur, koduo ri nilam, kotolu ri akik, koopat-i jamrud, ²⁰ kolimo ri onik, koonom-i sardis, koturu ri ratna sompaka, kowalu ri biril, kosiwoi-i tupas, koopulu ri kalsiduni, koopulu om ido ri pirus, om koopulu om duo ri kosubung. ²¹ Opulu om duo pintu iiri winaal kiat so kumala. Ido soido nu pintu iiri ungkiat so ido kumala. Om alun-alun nu bandar-i omas luun-luun winaal soko soromin oturopusan monsiou. ²² Dai su nokosiou nu waloi sosombooyangan so bandar iiri, so’ pagka nai-nai yo polak nu Kinoringan Maayo Kuasa, om Anak nu Dumba ri, dai yo muru’ kuwai po waloi sosombooyangan. ²³ Bandar iiri dai muru’ otogu’ nu runat intawa wulan, so’ onowawan-o nu Kinoringan, om Anak nu Dumba ri yo su pinokopolitaan nai. ²⁴ Kiawi’ bansa so wonuo tu nonowawan nu tinarang Niyo no, om kiawi’ raja mongowit nu kokoyaan nosiro nai. ²⁵ Mukab-sukab dadan pintu nu bandar iiri, om dai insan tutubon so’ ado yo sono awi, ²⁶ om kiawi’ gonggamon owarong om kokoyaan owiton nai. ²⁷ Nga kiawi’ gogoma’on osaim, koiyu’-iyu’ om moomudut, dai poosuwon so bandar oono. Ono yo su poosuwon nai lobuw nokosurat ngaran nosiro so buuk nu Anak nu Dumba, ono yo buuk nu lobuw miau musingkolaid.

¹ Nopotuduk-a susuu’on iiri so aku nu bowang powiau oliou soko ablur lumuyu’ kiat so oogoman mogkuasa nu Kinoringan om Anak nu Dumba ri. ² Lumuyu’ sungoi oono so pulilintonga’an nu lalan so bandar-i, om so mutongisan nu sungoi oono, kuwai puun kowiawan, sombulan insan mubua’, ono yo sontoun impulu om duo mubua’. Om roun nu puun oono kopomali’ nu kiawi’ bansa nu lobuw. ³ So bandar iiri d’ado yo sono ido pona ukumon nu Kinoringan. Oogoman nu Kinoringan om Anak nu Dumba ri dii-dii so asuw nu bandar-i om lobuw mugogoma’on suat so Iyo nga mongusaa’ so Iyo. ⁴ Osiou sono nosiro buatan Niyo, om ngaran Niyo no nisurat so paras nosiro no. ⁵ D’ado yo sono awi dii om dai yo mupolitaan, om runat nga d’ado yo, so’ Kinoringan-a mongonawau so nosiro, om mogkuasa nosiro soko raja musingkolaid. ⁶ Mutongaro yo susuu’on iiri s’aku nu, “Kiawi’ totongaron oono opongoorapan om obana. Om Tuhan Kinoringan, iri nopotaak nu Atod Niyo so poo’abar Niyo, minonuu’ yo nu susuu’on Niyo potuduk so lobuw mugogoma’on suat so Iyo nu onu yo po ourug osikap,” koo. ⁷ Mutongaro yo si Yisus s’aku nu, “Rongowo yo! Lumoga’ Aku osikap. Osanang-o lobuw iri mongowaid nu tinangar nu poo’abar nu Kinoringan nokosurat so buuk iitu,” koo. ⁸ Suat so aku, si Yuanis, norongou om nosiou ku yo kiawi’ oono. Norongou ku yo po om nosiou ku kiawi’ oono, nokosurukud aku sono so tiningkuangon nu susuu’on nopokoilo so aku ri, mongusaa’ so iyo. ⁹ Nga mutongaro yo iyo s’aku nu, “Adang! Adang mongusaa’ so aku. Kinoringan-o su usaa’on, so’ aku nga uripon-a soko ikau om kosusulodan mu, iri poo’abar nu Kinoringan, om soko kiawi’ lobuw mongowaid nu tinongaran so buuk iitu,” koo. ¹⁰ Mutongaro po iyo nu, “Obari yo orati nu totongaron so buuk iitu su’ oilaan nu kiawi’ lobuw nu dai yo olaid ourug totongaron oono. ¹¹ Indadi, ourug-o po ono, lobuw oraai sumundur-a nosiro momaal nu koraayan, om lobuw ongo gigilat, sumundur-a gumilat. Lobuw mongowaid nu koinginan nu Kinoringan, sumundur-a mongowaid nu koinginan nu Kinoringan, om lobuw miau ado koraayan, sumundur-a nosiro miau d’ado koraayan,” koo. ¹² Mutongaro yo si Yisus nu, “Rongowo yo! Lumoga’ Aku osikap, om suli’an Ku kiawi’ lobuw musuat nu gogoma’on nosiro no. ¹³ Aku yo su ponimpuunan om pongoowi’an. Aku yo su Tuhan kiat nu togna om musingkolaid,” koo. ¹⁴ Osanang-o lobuw iri momupu nu sabung olanggau nosiro, ono yo mokiugas kiat so koraayan, so’ nosiro nu ono kookan nu bua’ kiat so puun kowiau-o, om kotolunda’ so pintu masuw so bandar oono. ¹⁵ Nga iri yo po lobuw mugogoma’on nu koiyu’-iyu’, lobuw momakai nu olimu, ogilat, moomatoi, moongusaa’ nu tinindobuw om moomudut, dai kaasuw so bandar oono. ¹⁶ Mutongaro yo si Yisus koimbagu nu “Aku, si Yisus, minonuu’ nu susuu’on Ku nai so kou, paabar nu oogot so ongo puimpugan. Aku yo su solusuk ni Raja Daud. Om aku yo soko korombituon mingkas otarang iiri,” koo. ¹⁷ Mutongaro yo Atod nu Kinoringan om pongantin woinoi iiri so si Yisus nu, “Koyo!” koo. Isai yo po korongou nu iri, subai mutangar-a nu, “Koyo!” koo. Isai lugangon, lumoga’ ya. Om isai moingin, mongalap-a nu sungoi impuunon nu kowiawan oono. ¹⁸ Aku, si Yuanis, poingat nu kiawi’ lobuw nokorongou nu totongaron niabar nu poo’abar nu Kinoringan nokosurat so buuk iitu nu, isai mongoruang nu totongaron so buuk iitu, ruangan-a nu Kinoringan pongukuman so lobuw oono, ono yo kosonsora’an nokosurat so buuk iitu. ¹⁹ Om isai mongurang nu totongaron so buuk iitu, olapon nu Kinoringan boogian niyo kiat so puun kowiawan om bandar owagu oono, iri nokotarang so buuk iitu. ²⁰ Mutongaro yo si Yisus, iri nopointolang nu pontudukan iitu no nu, “Bana ya! Lumoga’ Aku osikap,” koo. Otuman-o! Oo Tuhan Yisus, loga’ yo. ²¹ Muda-mudaan ong borokatan ni Tuhan Yisus kiawi’ lobuw songapan nu Kinoringan.