Pilipi

Pilipi

¹ Surat iitu kiat so aku, si Paulus om si Timutius, uripon ni Yisus Kristus, niloga’ mai nai so kou, wowaidon om moonabang maid nu kiawi’ lobuw songapan nu Kinoringan so bandar Pilipi, iri nokopuido yo dii si Yisus Kristus. ² Mindamo aku so Kinoringan, Amo toko, om si Yisus Kristus, Tuhan toko, su’ d’ado pupus mongoborakat om posanang nu inawo muyu. ³ Koduung oondoman ku yo kou, munsopot aku yo so Kinoringan. ⁴ Om koduung mogdu’a aku yo suat so kou, osanang sobana inawo ku. ⁵ Munsopot aku so Kinoringan, so’ kiat nu timpuun muyu poimaid so si Kristus, sampai ono sono tu, tinabang muyu aku polongkop potuturan nu Abar Owarong kiat so Kinoringan. ⁶ Om otantu ku nu Kinoringan-o kondiri su minonimpuun nu gogoma’on owarong oono so inawo muyu, om poimaid aku nu sumundur-a Iyo mugogoma’on nu ono musingkoopod, ong kologa’ koimbagu ni Tuhan Yisus. ⁷ Otoop nai’ nu osanang inawo ku no so kou so’ dadan ku kou oondoman, om kou kiawi’ nga nokotabang so aku potuturan nu Abar Owarong, iri nisuu’ nu Kinoringan so aku ri. Kiat nu dai po su nojiil-i, tumabang kou yo so aku sampai kosiono tu su nojiil aku yo, gama’ ku mogkari’-kari’ poorati so lobuw lulumawan nu Kinoringan, nu obana ya kodau Niyo suat so si Yisus Kristus. ⁸ Oilaan-a nu Kinoringan nu obana ya totongaron ku nu oimpong aku sobana so kou om osamod soko koosamod ni Yisus Kristus so kou. ⁹ Mindamo aku so Kinoringan suat so kou, su’ sumundur kou osamod nu Kinoringan om inong lobuw, om muririnuang po pongoorotian muyu suat so Kinoringan, om oilo kou sono popupinig onu su obana om dai obana. ¹⁰ Om kiat nu ono, oilaan muyu momili’ onu yo po owarong sobana. Mogdu’a aku po su’ osiliw kou nu lobuw owarong om d’ado ido pona topudan ong kologa’ koimbagu si Kristus. ¹¹ Mindamo aku nu kiawi’ oono su’ sumundur kou mugogoma’on nu sobana ko owarong, maid nu ponobangan ni Yisus Kristus, om orumaton om royowon sono Kinoringan. ¹² Oo su kosusulodan ku inong poimaid. Oingin aku oilaan muyu nu, kiat so onu-onu nololagan ku nu oraai, osuang sono lobuw korongou om poimaid nu Abar Owarong iitu. ¹³ Koompusan, kiawi’ moongipat so waloi nu raja om lobuw wokon so bandar iitu nokoilo nu, ono yo ko’ jiniil aku so’ mugogoma’on aku suat so si Kristus. ¹⁴ Om koompusan nu pinongojiilan so aku, sinumundur sono opiot koimaidan nu kosuangan nu lobuw poimaid so si Kristus so bandar iitu, om opogi po nosiro paabar nu kodau nu Kinoringan om dai maa’-laa’. ¹⁵ Kuwai ya so nosiro paabar suat so si Kristus so’ mokimurindi nosiro so aku, om moingin nosiro kaalib so aku. Nga wokon-o owarong-a tomod paabar nu kodau oono, ¹⁶ so’ osamod nosiro so Kinoringan om aku, om oilaan-o nosiro nu Kinoringan-o su minonuu’ so aku potarang so lobuw lulumawan nu obana ya Abar Owarong oono. ¹⁷ Nga iri lobuw wokon mokimurindi ri, tomod-o po nosiro potuturan nu abar suat so si Kristus nga moingin musingkaalib-alib so aku, om ponontaman nosiro nu sumundur aku po osonsara’ so jiil tu ong soko ono waalon nosiro. ¹⁸ Nga dai ya monguro ono. Oraai owarong tomod nosiro nga bang si Kristus-a su nituturan nosiro, osanang-a inawo ku no. Om dadan-a nai’ osanang inawo ku no, ¹⁹ so’ oilaan ku nu kiat so du’a muyu om ponobangon nu Atod ni Yisus Kristus, polobuson aku ya kiat so jiil tu. ²⁰ Ono yo su sobana ko koinginan om orapan ku, dai su kopomaal nu onu-onu ya koiyu’-iyu’ so gogoma’on ku, ala’ nai’ runat-runat, om makin po nu ono sono tu opogi aku sobana, sampai kiawi’ totongaron om gogoma’on ku kopongobantug so si Kristus, nu miau aku po intawa matoi aku yo. ²¹ Suat so aku, laid nu miau aku po, subai mongowaid aku nu ponuu’an ni Kristus. Indadi bang matoi aku, ountung aku ya. ²² Nga bang laid nu miau aku po, kopugogoma’on aku nu bana ko kikountungan suat so si Kristus. Nadi dai ku oilaan ong ombo su otoop pili’on ku. ²³ Orogonan aku momili’ so’ kiduo-duo nga sobana ko koinginan ku. Oingin aku mulaiw kiat so wonuo tu om mido dii si Kristus, so’ ono yo su sobana ko owarong. ²⁴ Nga, bang suat so kou, owarong po ong miau aku su’ koponabang aku so kou. ²⁵ Poimaid aku nu miau aku po om mido so kou, su’ koponabang aku popiot nu koimaidan muyu om osanang inawo muyu so’ poimaid kou. ²⁶ Ono yo ko’, bang kolabus aku kiat so jiil tu om kopululi’ aku nai so kou, kou nu nokoido yo dii si Kristus, makin po kipounayan mongorayou so si Kristus. ²⁷ Indadi, ono yo su oogot nu ono sono tu, miau kou musuat nu pontudukan nu Abar Owarong suat so si Kristus, su’ kopusambat toko ko’ dai, nga orongou ku ya nu ototog kou om kopuido inawo muyu om koinginan mogkari’-kari’ poorati so lobuw lulumawan so kou no nu obana ya kodau kiat so Kinoringan suat so si Yisus Kristus. ²⁸ Om subai opogi kou dadan. Adang-o lumaa’ nu alod-alod muyu. Kiat-o nai kointolang muyu nu odoog-a nosiro, om omanang kou, so’ Kinoringan-o su pomanang so kou. ²⁹ So’ okon ko ontob-a nu poimaid so si Kristus su kinopomaawan nu Kinoringan so kou, nga sumonsara’ kou po suat so Iyo. ³⁰ Ono yo ko’ pogkari’-kari’ kou yo om sumonsara’ polombus nu Abar Owarong, soko gama’ ku nosiou muyu mogkari’-kari’ so bandar Pilipi, om soko norongou muyu suat so aku tuui so bandar Ruum nu ono sono tu.

¹ Pagka nokopuido kou so si Kristus, obasag kou sono. Pagka osamod Iyo so kou, osudu’ sono inawo muyu no. Om pagka kinuasa kou nu Atod nu Kinoringan om mongoluluud kou nu lobuw wokon, ² mindamo aku so kou nu bana-bana ko monginsudu’ kou nu inawo ku, ono yo wiau kou yo nu koputotaayun, musosamod so kiawi’ lobuw d’ado kopupinigan, om puido kou yo nu pomikiran om tomodon. ³ Adang-o mugogoma’on nu onu-onu ya ong suat-a so kou kondiri intawa pusingkooyo-oyoan muyu ya. Om adang-o momikir nu owarong kou po ko’ lobuw wokon, nga pikiro muyu yo nu owarong po lobuw wokon ko’ kou. ⁴ Podulio muyu yo kosimpitan nu lobuw wokon, okon ko kosimpitan muyu no ya. ⁵ Owarong ong minsuw kou nu kogoyaan ni Yisus Kristus, ono yo, ⁶ Dai po nokologa’ si Kristus so wonuo tu, Iyo yo su Kinoringan soko Amo Niyo, nga dai ya pinakai Niyo pangkat oono, momaal nu koinginan Niyo kondiri. ⁷ Ala’ nai’, linaiwan Niyo pangkat ono, om nolila’ sumiliw nu uripon. Sinumiliw Iyo nu lobuw, om siowan Iyo nu lobuw nu soko lobuw-a bana. ⁸ Minusimbaba’ Iyo, om obingasip so Kinoringan sampai minatoi Iyo so salib, om poomatoi oono yo su nopoiyu’ so Iyo. ⁹ Ono yo ko’ pinopangkat Iyo sobana nu Kinoringan, nu kaalib po so kiawi’ mogkuasa wokon. ¹⁰ Om kiawi’ piningwaalan so surga om so wonuo tu, om so konomotayan, mongusaa’ so si Yisus, nu pongorumat so Iyo. ¹¹ Nosiro kiawi’ nga paabar nu si Yisus Kristus-o su Tuhan, om soko ono po obantug sono Kinoringan, iri Amo toko kiawi’ ri. ¹² Oo su kosusulodan sinomodan ku, pagka soko ono, soko iri dadan kou maid so aku nu mido-ido aku po so kou ri, makin po nu ono sono tu su kopurawu’ toko, nga waido muyu yo ponuu’an ku so kou. Insuw kou yo so aku mogkari’-kari’ miau maid nu kogoyaan otoop so lobuw nosopulan nu Kinoringan. Waalo muyu yo soko ono nu oorumat so Iyo, ¹³ so’ Iyo yo su mugogoma’on so kowiawan muyu, sampai olila’ kou mugogoma’on nu koinsanang nu inawo Niyo. ¹⁴ Onu-onu ya goma’on muyu, adang-o maid nu rumoraayan intawa sumiwal, ¹⁵ - ¹⁶ su’ dai kou pokoraayon nu lobuw, om ourug kou nu soko d’ado sala’, om ado kogoyaan oraai, so’ kou yo su pinokaanak nu Kinoringan mido-ido so lobuw dai otulid inawo om oraai sobana kogoyaan. Pagka soko ono, nowawo muyu yo nosiro, soko korombituon mongonawau so langit otuong, iya muyu potuturan nu tinongaran koponaak so nosiro nu kowiawan musingkolaid. Bang soko ono kogoyaan muyu, osudu’ sono inawo ku so kou nu kologa’an ni Kristus koimbagu, so’ nourug kou sono nu lobuw pointolang nu kikoompusan gogoma’on ku so kou ri. ¹⁷ Pagka nokoimaid kou yo nu kodau nu Kinoringan suat so si Kristus, kowiawan muyu no yo su nitaak muyu so Kinoringan, soko niusaa’ so Iyo. Om insan potoyon aku ya om kotuntug raa’ ku no, soko kowaid so niusaa’ muyu no, osanang aku ya om kowaid-a so kou sumudu’an. ¹⁸ Om kou nga subai osanang-a om kosimpor-a so aku sumudu’an. ¹⁹ Indadi, umarap aku nu tobangon aku ni Tuhan Yisus, su’ osuu’ ku osikap si Timutius mongondaa so kou, om osanang inawo ku no ong korongou nu abar muyu. ²⁰ Si Timutius-o su suu’on ku, so’ iyo yo su koilo nu inawo ku om sobana ko momoduli’ so kou. ²¹ Nga ong wokon-o momoduli’ ya nu kowiawan nosiro kondiri, om okon ko posundur nu gogoma’on suat so si Yisus Kristus. ²² Nga si Timutius-o po, kou yo kondiri nokoilo nu ototog sobana mugogoma’on suat so Kinoringan, om tinumabang iyo so aku polongkop potuturan nu Abar Owarong, soko anak ku kondiri. ²³ Ono yo ko’, suu’on ku iyo mian nai so kou, ong oilaan ku yo onu koompusan so aku. ²⁴ Om umarap aku ya nu tobangon aku nu Tuhan su’ kopongondaa aku osikap so kou. ²⁵ Suat nu sulod toko si Ipapruditus, iri pinoponabang muyu so aku ri, popululi’on ku nai so kou. Iyo nga una’ ku ya potuturan nu Abar Owarong, om una’ ku ya soko soujar ni Kristus. ²⁶ Oimpong sobana iyo so kou, om oogutan iyo so’ norongou muyu nu dai iyo kaatu’. ²⁷ Om bana ya nu dai iyo nokaatu’ om mokipopatoi-o, nga linuluudan-a iyo nu Kinoringan, om okon ko iyo ya su luluudan nu Kinoringan, nga aku pona, tayon ong dai aku sumundur umagut. ²⁸ Ono yo ko’ sinuu’ ku iyo popululi’ nai so kou, su’ osudu’ kou ong kosambat so iyo, om osanang sono inawo ku. ²⁹ Indadi pologaa muyu yo iyo maid nu osanang inawo soko sulod muyu so koimaidan. Orumato muyu yo kiawi’ lobuw soko iyo, ³⁰ so’ sinumonsara’ yo iyo om ogon po matoi mugogoma’on suat so si Kristus, nu ginumanti’ so kou monabang so aku.

¹ Oo su kosusulodan ku, dai ku po oompusan surat ku iitu, tongaron ku po nu sumudu’an kou yo so’ nokoido kou yo so Tuhan. Dai aku ya orogonan monurat koimbagu nu nituduk ku, iri nosurat ku yo so kou ri, om oilaan muyu sobana tomod ku, tayon ku ong opiot koimaidan muyu so si Kristus, om dai kou oburunsutan nu lobuw. ² Ono yo, ingati muyu yo alod-alod muyu, iri lobuw odupang om kikogoyaan soko asu, iri momaal nu koraayan om monosog so kou popusunat. ³ Adang-o poimaid nu lobuw oono, so’ okon ko nosiro su tokodon nu Kinoringan nu kopuwarong so Iyo. Toko yo su tokodon Niyo nu songapan Niyo so’ mongusaa’ toko so Iyo maid nu ponobangon nu Atod Niyo om sumudu’an toko nu pinuwaal ni Yisus Kristus so toko, om dai toko yo sono umarap nu oturan om adat. ⁴ Sobana yo aku nga kuwai ya pounayan umarap nu ongo oturan om adat oono. Bang kuwai lobuw momikir nu kaarap iyo nu ono, makin-o po ong aku. ⁵ Kowoluan nai’ umur ku, nosunatan aku yo mongowaid nu adat mai, so’ aku nga lobuw-a nu Israil, kiat so suku-sakat ni aki Binyamin, om kiawi’ porookian ku poomutangar nu Ibrani. Kiat aku so puimpugan nu Parisi, iri ototog sobana mongowaid nu Ukum ni Musa. ⁶ Sobana ko owasa aku mongowaid nu Ukum oono, om ono yo su pinounayan ku mongindoraai nu lobuw poimaid so si Kristus. Bang kopuwarong lobuw tu so Kinoringan ong mongowaid nu kiawi’ Ukum ni Musa, soko d’ado sala’ ku, so’ nowaal ku yo kiawi’ Ukum oono. ⁷ Nga onu yo po tokodon ku nu gulu ri nu kountungan ku, oilaan ku nu ono sono tu nu d’ado kosudaan so’ maid aku yo sono so si Kristus. ⁸ Okon ko ono ya, nga pikiran ku sono nu kiawi’ oono d’ado yo kosudaan. Songapan ku nu ono sono tu boorogo po, ono yo kotondu’ aku so si Yisus Kristus, Tuhan ku. Pagka maid aku sono so Iyo, niada’ ku yo kiawi’ gogoma’on koopotan ku nu gulu ri, om tokodon ku kiawi’ iiri soko sinupot-a, so’ poimaid aku yo so Iyo. ⁹ Om bana-bana ko koido aku so Iyo. Indadi dai yo sono su momikir nu obana aku so tiningkuangon nu Kinoringan ong ontob-a nu mongowaid nu Ukum ni Musa. Ala’ nai’ kopuwarong aku so Iyo so’ poimaid aku so si Kristus. Kinoringan-o su nopopuido so aku so si Kristus nu gama’ ku poimaid so Iyo. ¹⁰ Ido-ido yo sono koinginan ku, ono yo kotondu’ aku sobana so si Kristus, om moingin aku ong taakan aku nu Kinoringan nu kuasa miau suat so Iyo, soko iri kuasa pinongoluli’ Niyo so si Kristus. Om moingin aku sumonsara’ soko kinosonsora’an Niyo, pudi ko matoi aku soko Iyo, su’ opatoi iri kogoyaan ku nu gulu ri. ¹¹ Om umarap aku nu luli’an aku ya Niyo kiat so pinotoyan. ¹² Okon ko mutangar aku nu nokoinong aku yo sobana so si Kristus, intawa d’ado yo sono koraayan ku. Nga ono yo mogkari’-kari’ aku miau maid so koinginan Niyo, orapan ku ourug aku nu lobuw kikogoyaan nu koinginan Niyo, so’ ono yo su kinopongurugan Niyo so aku nu songapan Niyo. ¹³ - ¹⁴ Oo su kosusulodan ku, sobana yo, okon ko monokod aku nu koinong aku yo sobana so si Kristus, nga kuwai ido waalon ku, ono yo soko muimbas mundak, mongolupo aku nu onu yo po so tinoudion ku, om monginoontob mundak maid nu monsiou so sunduron ku, su’ kikowiawan aku musingkolaid, iri niodia so aku, so’ ono yo su kinopomaawan nu Kinoringan popuido so aku so si Yisus Kristus. ¹⁵ Indadi, toko nu nosukod-o so koimaidan, subai momikir soko ono. Nga bang kuwai so kou kipomikiran nu sondiang, niintolang-a ono nu Kinoringan so kou. ¹⁶ Indadi, komuro pona, sumundur toko yo miau musuat so koinginan nu Kinoringan, iri nokotuduk-o so toko nu laid iiri. ¹⁷ Oo su kosusulodan ku, insuw kou yo so aku om udioo muyu yo ongo lobuw dadan minsuw nu kogoyaan ku, so’ ono yo su opatut insuwon muyu. ¹⁸ Obulit aku yo mutangar so kou, om kosiono tongaron ku po sampai kotangi’ nu, osuang lobuw mutangar nu mompomaid nosiro ni Kristus kolaai, nga kogoyaan nosiro no mulawan nu tomod nu kinopotoyan ni Kristus so salib. ¹⁹ Om koompusan-o po nu kowiawan nosiro nga ukumon nu Kinoringan om nisubo so noraka musingkolaid, so’ ono yo su pinokokinoringan nosiro, koinginan nu koyuwan, om iri nai’ koiyu’-iyu’ so nosiro ri su niondos-ondos om pokiroyowan nosiro, om toroidoon-a nosiro momikir koinginan so wonuo tu. ²⁰ Nga toko yo po okon ko so wonuo tu ya polak musingkolaid, nga polak toko bana dii so surga, om kiat-o so surga si Kristus, iri Tuhan om Poowiau so toko lumoga’ koimbagu. Iyo yo su purosiou-siowon toko nu lumoga’. ²¹ Kologa’ yo po Iyo, pindaan sono Niyo koyuwan toko iri musuat so wonuo tu om matoi, nu poinongon nu koyuwan Niyo kondiri nu sobana ko obantug om musuat so surga. Owaal Niyo soko ono momakai nu kuasa maayo Niyo, so’ kopogkuasa Iyo nu onu yo po.

¹ Oo su kosusulodan kosomodan ku, sobana ko oimpong aku so kou. Kou yo su koinsanang nu inawo ku, om kou yo su soko koompusan nu gogoma’on ku. Indadi moingin aku ong sumundur kou yo bana miot poimaid so Tuhan. ² Oo Iudia om Sintiki, oingin aku nu kopuido inawo muyu, so’ songapan kou nu Tuhan. ³ Oo Sunsugus, una’ ku ototog, oingin aku nu biatan mu duo woinoi oono su’ mintoron nosiro mudaawa. So’ nosiro yo po oono, maid so si Klimin om kouna’an ku wokon nga nosonsara’ yo monabang so aku potuturan nu Abar Owarong suat so si Kristus. Ngaran nosiro no nokosurat-o nu Kinoringan so buuk nu lobuw miau musingkolaid. ⁴ Oo su kosusulodan ku, sumudu’an kou yo dadan so’ nokoido kou yo so Tuhan. Insan po tongaron ku, sumudu’an kou yo! ⁵ Pointolango muyu yo so kiawi’ lobuw nu sobana ko owarong inawo muyu so wokon so’ dai yo olaid kologa’an koimbagu ni Tuhan toko. ⁶ Adang-o gumagau momikir nu onu yo po, nga bang kikoogutan kou, mogdu’a yo so Kinoringan, om indamo kou yo so Iyo nu onu yo po kosimpitan muyu, maid nu mongunsopot. ⁷ Bang waalon muyu ono, sobana ko osanang inawo muyu so’ poimaid kou so si Yisus Kristus om koworongan kiat so Kinoringan, iri dai oorotian nu lobuw, mongipat nu inawo om pomikiran muyu, so’ nokoido kou yo so si Yisus Kristus. ⁸ Oo su kosusulodan ku, pongoompusan nu tongaron ku so kou, ono yo pikiro muyu yo onu yo po owarong, otoop royowon, obana so ponsiowan nu Kinoringan om lobuw, dai ogilat, kosanang nu lobuw, om otoop orumaton. ⁹ Waido muyu yo onu yo po nituduk ku so kou kiat so totongaron intawa gogoma’on ku, su’ maid-waid so kou Kinoringan iri popusulut so kou. ¹⁰ Osudu’an aku sobana om mongunsopot so Tuhan nu tobangon muyu aku koimbagu nu kosiono tu, om oilaan ku ya nu mokipoponabang kou ya so aku nu laid oono ri, nga d’ado kosiwatan muyu. ¹¹ Mutangar aku soko itu, okon-a ko umarap nu taakan muyu aku nu onu yo po, so’ notopodan aku nu onu yo po pudi osuang intawa sabat-a. ¹² Nokoirasa aku yo nu sobana ko osimpit om sobana ko kikosukupan, om onu yo po nga noopot aku yo, witilon intawa owasug. ¹³ Maid nu kuasa nitaak ni Kristus so aku, kogoos aku sono moningkuang nu onu-onu ya ololagan ku. ¹⁴ - ¹⁵ Oo su kosusulodan ku so Pilipi, sobana ko owarong gogoma’on muyu monabang so aku so koogutan ku. Oilaan muyu yo nu, iri tumimpuun aku nai’ potuturan nu Abar Owarong nu pinomponowan ku kiat so wonuo nu Makadunia gulu ri, puimpugan muyu ya su minonabang so aku, ono yo tinaakan muyu aku nu siin. D’ado po wokon puimpugan nu lobuw poimaid so si Kristus nu soko ono gama’. ¹⁶ Laid ku po so bandar Tisalunika ri, okon ko insan induo kou ya poowit nu siin monabang nu kosimpitan ku. ¹⁷ Nga okon ko ontob-a nu moingin aku monorima’ nu niongotaak muyu, nga ono yo moingin aku po ong rumuang po bana gogoma’on muyu owarong om osuli’an kou nu Kinoringan kiat so gogoma’on muyu. ¹⁸ Kosiono, obaran ku kou nu notorima’ ku yo kiat so si Ipapruditus kiawi’ nipoowit muyu so aku ri, om ongo nipoowit muyu iri laba’ ya ko kosukup. Niongotaak muyu iiri soko niusaa’ muyu so Kinoringan olanung sobana om torima’on Niyo nu osanang inawo. ¹⁹ Sobana ko doyaan ong Kinoringan ono usaa’on ku no, om kiat so kokoyaan Niyo, taakan kou Niyo nu kiawi’ kosimpitan muyu, so’ nokoido kou yo so si Yisus Kristus. ²⁰ Royowon-o Kinoringan, Amo toko musingkolaid! Amin. ²¹ Logai muyu yo kodau ku tu so kiawi’ lobuw songapan nu Kinoringan nu nokoido yo so si Yisus Kristus, om torimaa muyu yo kodau kiat so kosusulodan mido-ido so aku tuui. ²² Kiawi’ lobuw songapan nu Kinoringan so bandar iitu, om lobuw mugogoma’on so waloi ni Raja Maayo nu Ruum, nga pokodau so kou. ²³ Muda-mudaan ong maid-waid so kou koworongan ni Tuhan Yisus Kristus.