Markus

Markus

¹ Itu yo su ponimpuunan nu Abar Owarong suat so si Yisus Kristus, Anak nu Kinoringan, ² soko nokosurat so buuk ni Yisaya, iri poo’abar nu Kinoringan gulu ri nu, “Koo Kinoringan, ‘Itu yo sinuu’ Ku, suu’on Ku yo iyo mogulu so Ikau monginduas nu lolanan Mu,’ koo. ³ Maau-paau ido koyuwan so padang pantai nu, ‘Posodiaa yo inawo muyu no, nu kologa’an nu TUHAN, soko monginduas kou nu lalan ong lumoga’ raja,’ koo iyo” koo si Yisaya. ⁴ Linumoga’ yo sono si Yuanis Moongodiu’ iiri so padang pantai, mongodiu’ nu lobuw. Mutongaro yo iyo nu, “Rorogo kou yo momaal nu koraayan om mokidiu’ yo. Bang waalon muyu ono, ompunan kou nu Kinoringan kiat so koraayan muyu,” koo. ⁵ Osuang sono lobuw kiat so pilolongkop nu wonuo nu Yudia om kiat so bandar Yirusalim minian dii so iyo mongaabar so tiningkuangon nu lobuw suang nu koraayan nosiro, om diuo yo ni Yuanis so Bowang Yurdan-i. ⁶ Minupokakas si Yuanis nu bulu nu unta winaal, kambot niyo ri nga kulit, om ookanon niyo kokapu om paa’ nu munsong. ⁷ Minongaabar iyo nu, “Lumoga’ po ido koyuwan maayo kopogboya’an ko’ aku, om dai su otoop monguripon so Iyo. ⁸ Mongodiu’ aku so kou nu sungoi, nga Iyo yo su monaak so kou nu Atod nu Kinoringan pororogo so kou momaal nu koraayan,” koo si Yuanis. ⁹ Iya iiri linumoga’ si Yisus kiat so Najarit so wonuo nu Galilia, om diniu’ Iyo ni Yuanis so Bowang Yurdan. ¹⁰ Laid Niyo tumindal-i, nosiou Niyo nopitas su langit, om minuntiba Atod nu Kinoringan soko asang sinumangkad so ulu Niyo ri. ¹¹ Norongou-o sono bongut nu Kinoringan kiat so surga nu, “Ikau-o su anak Ku nu koosomodan Ku. Koinsanang Ko bana nu inawo Ku,” koo. ¹² Mogtuui inowit si Yisus nu Atod nu Kinoringan so padang pantai. ¹³ Opat nopulu runat laid Niyo dii-dii kininaman nu Wowaidon nu Moinat, om mido-ido nu kulos-kulos ongo sisiau, nga tinabang-a Iyo nu ongo susuu’on nu Kinoringan. ¹⁴ Nojiil-o po si Yuanis, linumoga’ yo si Yisus dii so Galilia potuturan nu Abar Owarong kiat so Kinoringan nu, ¹⁵ “Oduruk-o mogkuasa Kinoringan. Indadi rorogo kou yo momaal nu koraayan om poimaid-o nu Abar Owarong oono,” koo. ¹⁶ Laid ni Yisus manou-panou so imbing nu Liu’ Galilia ri, nosiou Niyo duo musulod momukot, si Simun om si Andrias. ¹⁷ Tongaro yo Niyo nosiro nu, “Waid kou yo s’aku. Tudukan Ku kou mongingol nu lobuw maid so Aku,” koo. ¹⁸ Ogoli ya sono nosiro pukot nosiro ri, om maido yo so si Yisus. ¹⁹ Nokolombus-lombus nosiro, nosiou ni Yisus duo musulod si Yakubus om si Yuanis, inonakan ni Jibidius, mongatag nu pukot so alud. ²⁰ Paawo yo ni Yisus nosiro om ogoli yo nosiro amo nosiro ri om ongo kukumoraja ri, om maido yo so si Yisus. ²¹ Nokologa’ yo sono si Yisus om mompomaid Niyo ri so Kapornaum. Runat Pongintoronan-i, mosuwo yo si Yisus so waloi sosombooyangan-i om montuduko yo. ²² Noiranan kolobuwan-i so’ montuduk Iyo maid nu kopogboya’an, okon ko soko moomontuduk nu Ukum ni Musa. ²³ Mosuwo yo sono ido koyuwan sinorungan nu moinat, om gumonsoko yo nu, ²⁴ “Oo Yisus, lobuw Najarit, onu ka waalon Mu so kai? Mongobinasa Ko bo gaam so kai. Otondu’an ku ya Ikau. Ikau-o su osusi sinuu’ nu Kinoringan,” koo. ²⁵ Suuo yo ni Yisus moinat sinumarung iiri nu, “Ukokop-o! Pulaiw-o kiat so lobuw iitu!” koo. ²⁶ Pokoporo yo sono nu moinat-i koyuwan nu lobuw-i maid nu ginumonsok, om inuyud-a lumabus. ²⁷ Lobuw suang-i nga noiranan nu iri, om mududuat nu, “Okon ko nogina-gina tangar Niyo iiri. Kikuasa iyo monusub nu komoinatan om musimaid nosiro nu ponuu’an Niyo,” koo. ²⁸ Nokololongkop-o sono abar suat so si Yisus so wonuo nu Galilia. ²⁹ Noopod iri, lumobuso yo si Yisus kiat so waloi sosombooyangan-i, om miano yo nosiro si Yakubus om si Yuanis so waloi ni Simun om ni Andrias. ³⁰ Nokaasuw si Yisus so waloi-i, pokoiloo yo sono Iyo nu kolobuwan-i nu tumogom iwan ni Simun om migi-gili so poomoturuwan. ³¹ Mobio yo si Yisus so woinoi iiri om kuyuti yo Niyo longon-i monuud potungag. Iya ya iiri nopoli’an-o woinoi-i om pookano yo niyo nosiro. ³² Nolidop su runat, osuang lobuw minongowit nu lobuw sumakit om sinorungan nu moinat dii si Yisus. ³³ Muimpugo yo lobuw suang kiat so pilolongkop nu bandar iiri so natad nu waloi-i. ³⁴ Polii yo sono ni Yisus lobuw suang iiri nu boroginis nu osakit om sususubo yo Niyo komoinatan-i. Pagka otondu’an Iyo nu komoinatan-i, dai linila’an Niyo nosiro mutangar. ³⁵ Otuong-tuong po nu susuab-i, tumungago yo si Yisus om miano yo so tontong oyiyingo so dilabus nu bandar-i mogdu’a. ³⁶ Diumo yo sono Iyo ni Simun om kouna’an niyo ri. ³⁷ Nooyangan-o po nosiro si Yisus, tongaro yo nosiro nu, “Kiawi’ lobuw modium so Ikau,” koo. ³⁸ Nga, sumombuto yo si Yisus nu, “Lumombus toko yo so bandar wokon so kumoronian. Subai montuduk Aku ya pudi dii, so’ ono yo su tomod Ku,” koo. ³⁹ Lumongkopo yo sono si Yisus so wonuo nu Galilia ri montuduk so ongo waloi sosombooyangan om monusub nu moinat. ⁴⁰ Kuwai lobuw binolangon minian dii si Yisus. Sumorukudo yo iyo so tiningkuangon ni Yisus om mutongaro yo nu, “Bang moingin Ko Tuan, opoli’an Mu ya aku,” koo. ⁴¹ Noluluudan si Yisus nu lobuw iiri. Kaangi yo sono Niyo palad Niyo ri potopop so lobuw iiri om mutongaro yo nu, “Moingin aku ya. Opoli’an ko yo sono,” koo. ⁴² Iya ya iiri nopoli’an-o lobuw-i. ⁴³ Suuo yo sono ni Yisus lobuw iiri pouli’ om kinodawan nu oogot nu, ⁴⁴ “Rongowo yo, kodi yo itu no obar-obari so isai-isai ya, nga panou-o osikap mian so imam mokiudio. Oopod ono pongusaa’ yo suat so kinopoli’an mu soko iri nisuu’ ni Musa, pongilaan nu lobuw suang nu nopoli’an ko yo sono,” koo si Yisus. ⁴⁵ Nga minompanou-a lobuw iiri paabar so siombo-ombo ya, om dai sono kaasuw si Yisus so bandar ong osiou nu lobuw suang. Indadi minogol-a sono Iyo so tontong obubulun so dilabus nu bandar-i. Soko iri pona, osuang-a lobuw kiat so ombo-ombo lumoga’ dii so Iyo.

¹ Kotinu-tinuan kiat nu iri, mululio yo si Yisus so Kapornaum. Noilaan-o nu lobuw suang nu dii-dii Iyo so waloi. ² Indadi osuang sono lobuw linumoga’ muimpug so waloi Niyo ri, sampai ado yo polakan. So longobon-i nga nodasok-a nu lobuw. Nopaabar-o sono si Yisus so nosiro nu kodau kiat so Kinoringan. ³ Laid Niyo mutangar-i, lumogaa yo opat koyuwan minonganggung nu lobuw kakung mongowit dii so Iyo. ⁴ Nga pagka nodasok waloi-i nu lobuw, dai ya nosiro kaasuw mongowit nu kakung iiri dii si Yisus. Indadi mindokodo yo sono nosiro so dilanggau nu waloi-i om uangi yo taap kosaau dii si Yisus, om uluwi yo nosiro kakung-i maid nu lapik niyo ri. ⁵ Noilaan-o po ni Yisus nu opiot koimaidan nosiro so Iyo, mutongaro yo Iyo so lobuw kakung-i nu, “Oo lakitu, noompunan-o koraayan mu ri,” koo. ⁶ Tinu-tinu moomontuduk nu Ukum ni Musa mogom-ogom dii, mongiro-kiro so inawo nu, ⁷ “Isai ka lobuw iitu no? Opogi Iyo mubaag nu Kinoringan. D’ado boto kopongampun nu koraayan sondiang ko Kinoringan!” koo. ⁸ Noilaan-a ni Yisus kiro-kiroon nosiro ri, mutongaro yo sono Iyo nu, “Nokuro ka su mongiro-kiro kou soko ono? ⁹ Ombo ka su musuat tongaron so lobuw iitu no nu, ‘Noompunan-o koraayan mu ri,’ intawa, ‘Tungag-o om panou-o,’ koo? ¹⁰ Nga kosiono pointolang Aku so kou nu Aku yo su Anak nu Riniba, om kikopogboya’an Aku so riniba tu mongampun nu koraayan,” koo. Tongaro yo sono ni Yisus lobuw kakung iiri nu, ¹¹ “Undii yo, kokato yo poomoturuwan mu no om uli’ yo!” koo. ¹² Mundiio yo lobuw iiri, kokato yo poomoturuwan niyo ri, om lumobuso yo siou-siowan nu ongo lobuw-i. Sobana ko noiranan nosiro om minongorayou nu Kinoringan. Mutongaro yo nosiro nu, “Dai toko po insan nokosiou nu soko itu,” koo. ¹³ Nopupus iri, miano yo si Yisus so Liu’ Galilia. Osuang lobuw minian dii, om montuduko yo Iyo so nosiro. ¹⁴ Laid ni Yisus manou-panou dii ri, nosiou Niyo ido moomumpung nu sukai ingoranan so si Liwi, anak ni Alpius, mogom-ogom so poonorima’an nu sukai. Tongaro yo iyo ni Yisus nu, “Waid-o so Aku,” koo. Mundiio yo si Liwi om maido yo so si Yisus. ¹⁵ Nokologa’ yo po si Yisus om mompomaid Niyo ri so waloi ni Liwi, pookano yo sono niyo nosiro. Osuang moomumpung nu sukai om wokon lobuw kikoraayan minaid so si Yisus om kosuangan so nosiro songogoman so Iyo om mompomaid Niyo ri mongokan. ¹⁶ Nosiou-o po nu tinu-tinu moomontuduk nu Ukum kiat so puimpugan nu Parisi, nu mido si Yisus mongokan so moomumpung nu sukai om wokon lobuw kikoraayan iiri, tongaro yo sono nosiro mompomaid Niyo ri nu, “Monguro ka Iyo murung mongokan so moomumpung nu sukai om lobuw kikoraayan?” koo. ¹⁷ Norongou-a ni Yisus tinangar nosiro iiri, sumombuto yo sono Iyo nu, “Lobuw kaatu’ no ya, dai muru’ nu duktur, ono-ono ya lobuw dai kaatu’ no,” koo. ¹⁸ Ido runat, minupuasa ongo mompomaid ni Yuanis om lobuw Parisi ri. Miano yo sono tinu-tinu koyuwan dii si Yisus mongoduat nu, “Nokuro ka su kai om lobuw Parisi no mupuasa, nga mompomaid Mu no dai?” koo. ¹⁹ Sumombuto yo si Yisus nu, “Odapat muyu ka popupuasa lobuw mususuung so rami-rami muontun ong mido-ido po pongantin kusoi-o so nosiro? Tantu dai! ²⁰ Nga bang kolaiw-o yo pongantin kusoi-o nai so nosiro, mupuasa nai’ nosiro. ²¹ D’ado ya lobuw popipil nu kumut owagu po so sabung olaid-o, so’ bang kumut otaan nipipil so sabung orobuk-o, rumarad pisi’ nu sabung orobuk-o oono. ²² Soko ono ya, d’ado lobuw pogalin nu sungoi nu anggur owagu so poianan olaid-o, so’ tumodak poianan-o. Sungoi nu anggur-o nga ouyaban, poianan-o nga ousiba’. Sungoi nu anggur owagu, subai nigalin so poianan owagu,” koo si Yisus. ²³ Ido Runat Pongintoronan, laid ni Yisus om mompomaid Niyo ri tumalib so umo, mongotuo yo mompomaid Niyo ri nu paroi om okano yo. ²⁴ Mutongaro yo sono tinu-tinu lobuw Parisi ri nu, “Nokuro ka su momaal kou nu nipogos nu Ukum toko so Runat Pongintoronan?” koo. ²⁵ Sumombuto yo si Yisus nu, “Dai kou po ka nokobasa’ nu winaal ni Raja Daud gulu ri, nu winitilon iyo om kouna’an niyo ri? ²⁶ Iya nu Imam Maayo si Abiatar, minasuw iyo so Waloi nu Kinoringan mongalap nu baang-baang, nokousaa’ yo so Kinoringan, inokan niyo om tinaakan-a niyo kouna’an niyo ri, ampa, mongowaid nu Ukum, imam-a su kowasa mongokan nu baang-baang iiri. ²⁷ Lobuw-o su kinopomaalan nu Runat Pongintoronan, om okon-a ko Runat Pongintoronan su kinopomaalan nu lobuw tu. ²⁸ Aku yo su Anak nu Riniba. Aku yo su kopogbaya’ pudi ong Runat Pongintoronan,” koo si Yisus.

¹ Mululio po si Yisus so waloi sosombooyangan-i. Dii kuwai ido koyuwan kimai sompodi longon. ² Tinu-tinu koyuwan dii modium nu pounayan monginsala’ so si Yisus. Indadi, tinoyinu ya nosiro nu momali’ ka Iyo nu Runat Pongintoronan ko’ dai. ³ Mutongaro yo si Yisus so lobuw kimai sompodi longon iiri nu, “Tuui ko yo!” koo. ⁴ Mongoduato yo Iyo nu ongo lobuw dii ri nu, “Mongowaid nu Ukum toko, onu ka kowasa waalon toko nu Runat Pongintoronan, monabang ko’ mongoraai nu lobuw? Kowasa ka monapul intawa momatoi?” koo. Nga dai ya sinumambut nosiro. ⁵ Aagut sono inawo ni Yisus nu kookosog nosiro. Monomburorowo yo Iyo so pililiwut Niyo ri mungot, om mutongaro yo so lobuw iiri nu, “Kaangi yo longon mu no,” koo. Kaangi yo nu lobuw-i longon niyo ri, om sonduun-duun-a nopoli’an. ⁶ Lumobuso yo sono lobuw Parisi ri so waloi sosombooyangan-i, om muupokato yo nu lobuw ni Irudis nu momatoi so si Yisus. ⁷ - ⁸ Nopupus iri, miano yo si Yisus om mompomaid Niyo ri so imbing nu Liu’ Galilia, om osuang lobuw minaid so nosiro kiat so Galilia, Yudia, Yirusalim, wonuo nu Idumia, so sondipawon nu Bowang Yurdan, om so bandar Tirus om Sidun. Linumoga’ nosiro dii so Iyo so’ nokorongou-o nosiro nu pinuwaal Niyo. ⁹ Pagka osuang sobana lobuw-i, suuo yo sono ni Yisus mompomaid Niyo ri mongalap nu alud sokoyan Niyo. ¹⁰ Osuang lobuw pinoli’an Niyo, om muimpit-impit lobuw kiosakit-i rumani dii so Iyo tayon ong okuyutan Niyo. ¹¹ Koduung osiou si Yisus nu kolobuwan sinorungan nu moinat-i, mogtuui sumurukud nosiro so tiningkuangon Niyo om gumonsok nu, “Ikau-o su Anak nu Kinoringan!” koo. ¹² Nga sinawoi ni Yisus nosiro nu dai ipotuturan ong isai Iyo. ¹³ Nopupus iri, tumidongo yo si Yisus so ido bulud, om paawo yo lobuw koinginan Niyo ri. Lumogaa yo nosiro, ¹⁴ om momilio yo Iyo opulu om duo so nosiro om iningoranan Niyo nu pinongoorapan. Mutongaro yo Iyo so nosiro nu, “Pinili’ Ku yo kou nu maid s’Aku om suu’on Ku kou paabar nu Abar Owarong kiat so Kinoringan, ¹⁵ om kikopogboya’an kou sono monusub nu moinat,” koo. ¹⁶ Itu yo su ngaran nu opulu om duo koyuwan iiri, si Simun (paawon so si Pitrus), ¹⁷ si Yakubus om sulod niyo, si Yuanis, iri inonakan ni Jibidius (iningoranan ni Yisus nosiro so si Buanirgis, orati, “Anak nu Korud”), ¹⁸ si Andrias, si Pilipus, si Bartulumius, si Matius, si Tumas, si Yakubus anak ni Alpius, si Tadius, si Simun, iri kiat so puimpugan lumawan nu lobuw Ruum, ¹⁹ om si Yudas Iskariut, iri minongoraai sono so si Yisus. ²⁰ Nopupus iri, mulio yo sono si Yisus om mompomaid Niyo ri. Nga osuang po lobuw linumoga’ dii so nosiro muimpug, sampai dai kotodiri nosiro mongokan. ²¹ Norongou-o po iri nu suku-sakat Niyo ri, miano yo nosiro moongoi so Iyo, so’ kuwai minutangar nu, “Minulou-o Iyo!” koo. ²² Mutongaro yo moomontuduk nu Ukum kiat so Yirusalim-i nu, “Sinorungan Iyo ni Biiljibul! Wowaidon nu komoinatan oono yo su minonaak so Iyo nu kuasa monusub nu moinat,” koo nosiro. ²³ Paawo yo ni Yisus nosiro om monuturano yo Iyo nu salig-salig nu, “Onu koo ka moinat-o koponusub nu moinat? ²⁴ Bang muimpolanu mualod kolobuwan so ido tontong om musosondiang, tantu obinasa tontong oono. ²⁵ Om soko ono ya ong mualod sompinunguan om mususub, tantu dai tumaan nu olaid. ²⁶ Soko ono ya pudi Wowaidon nu Moinat om komoinatan-o ong mupipinig om mualod, kopogkuosaan nosiro no nga dai otatap tumaan, sondiang ko olaid-o po d’ado yo sono. ²⁷ Wowaidon nu Moinat oono soko ido koyuwan obasag om osukup sindata mongipat nu waloi niyo no. Kiawi’ orata’ niyo no osopulan. Nga bang lumoga’ ido koyuwan obasag po ko’ iyo mongodoog, lobuw oono koponolod nu kiawi’ orata’ nosongapan niyo no. Aku yo soko lobuw obasag oono. ²⁸ Ondomo muyu yo, kiawi’ koraayan om totongaron mubaag, oompunan-a, ²⁹ nga bang totongaron mubaag nu Atod nu Kinoringan, dai oompunan, so’ ono yo po koraayan musingkolaid,” koo. ³⁰ (Tinangar ni Yisus soko iri so’ kuwai minutangar nu, “Sinorungan Iyo nu moinat,” koo.) ³¹ Nopupus iri, lumogaa yo sono ino om kosusulodan ni Yisus. Minongindad-a nosiro so dilabus-i, om minonuu’ nu lobuw monogina so Iyo. ³² Iya oono osuang lobuw mogom-ogom so pililiwut ni Yisus. Mutongaro yo nosiro so Iyo nu, “Dii maadi so dilabus ino om kosusulodan Mu ri, mokisosambat so Ikau,” koo. ³³ Nga sumombuto yo si Yisus nu, “Isai ka ino om kosusulodan Ku?” koo. ³⁴ Siowi yo Niyo lobuw minogom so pililiwut Niyo ri, om mutongaro yo nu, “Itu yo su ino om kosusulodan ku! ³⁵ Isai momaal nu koinginan nu Kinoringan, iyo yo su sulod Ku woinoi kusoi, om ino Ku,” koo.

¹ Montuduko po si Yisus so imbing nu Liu’ Galilia ri. Lumogaa yo sono lobuw suang tumutuk dii so Iyo, indadi sinumakoi-a Iyo so alud om lobuw-i minundii so imbing-i. ² Osuang nituduk Niyo so nosiro maid nu salig-salig nu, ³ “Rongowo muyu yo! Ido koyuwan noposasad nu sampug. ⁴ Posasad iyo ri, kuwai nopitak so lalan, om lumogaa yo sono su bombolog mongaawi’ moninduk nu sampug iiri. ⁵ Kuwai ya nopitak so tana’ kikowotuan om onipis su tana’. Tinumuu’ ya sampug oono, ⁶ nga kumodato yo po, linumonot sono so’ dai nokolalom su wakat. ⁷ Kuwai ya nopitak so koruwian. Tinumuu’ ya nga notopu’an nu koruwian-i, om nolonot om dai nokopubua’. ⁸ Nga kuwai ya nopitak nu sampug iiri so tana’ owarong. Tinumuu’ yo sono, om inumokang om minubua’. Pinumpung-i kuwai yo tolu nopulu, onom nopulu om kuwai ya sampai maatus minitalan,” koo si Yisus. ⁹ Mutongaro po Iyo nu, “Bang kitolingo kou ya, rongowo muyu yo,” koo. ¹⁰ Iya nu ido-ido si Yisus, lumogaa yo sono dii so Iyo opulu om duo mompomaid Niyo ri om wokon moongowaid so Iyo ri mongoduat ong onu orati nu salig-salig iiri. ¹¹ Sumombuto yo si Yisus so nosiro nu, “Tinaakan kou yo nu Kinoringan nu pongoorotian suat so gama’ Niyo mogkuasa soko raja nu lobuw poimaid so Iyo. ¹² Ono yo ko’ solig-soligon Ku montuduk so nosiro tayon ong, ‘Monsiou pona nosiro nga soko dai ya kotondu’. Orongou pona nosiro nga soko dai ya korongou om dai koorati. Bang kotondu’ nosiro om koorati, mululi’ ya nosiro so Kinoringan om ompunan Niyo,’ koo ri,” koo si Yisus. ¹³ Mutongaro yo sono si Yisus so nosiro nu, “Bang dai muyu oorotian salig-salig iiri, dai kou ya koorati nu salig-salig wokon. ¹⁴ Lobuw posasad iiri soko lobuw potuturan nu tinongaran nu Kinoringan. ¹⁵ Sampug nopitak so lalan-i, iri yo su soko lobuw mongorongou nu tinongaran nu Kinoringan, nga dai ya oorotian nosiro. Lumogaa yo sono Wowaidon nu Moinat monolod nu tinongaran iiri so inawo nosiro om olupaan sono. ¹⁶ Sampug nopitak so tana’ kikowotuan-i, iri yo lobuw nu insan-o mongorongou nu tinongaran iiri om poimaid sono nu sobana ko osudu’ inawo, ¹⁷ nga dai ya kosondot so inawo nosiro, om sontagal-o olupaanan-o. Bang kikoogutan-o nosiro intawa indoraayon so’ nopoimaid nu ono, dai yo sono poimaid nosiro. ¹⁸ Om sampug nokosasad so koruwian-i, iri yo kolobuwan mongorongou nu tinongaran iiri, ¹⁹ nga gumagau-o po nosiro suat so kokoyaan, om koinginan so kowiawan nosiro kondiri, olupaan-o sono nosiro tinongaran nu Kinoringan, om gogoma’on nosiro nga dai yo musuat so koinginan Niyo. ²⁰ Nga sampug nokosasad so tana’ owarong-i, iri yo lobuw mongorongou nu tinongaran nu Kinoringan, poimaid-o sono om gogoma’on nosiro musuat so koinginan nu Kinoringan, soko sampug nisasad om osuang pinumpung. Kuwai yo tolu nopulu, onom nopulu om kuwai ya maatus minitalan,” koo si Yisus. ²¹ Mutongaro po si Yisus nu, “D’ado ya lobuw monikit nu politaan om tutuban sono nu montaya, intawa isusuk so poomoturuwan, sondiang ko nisiit so dilanggau. ²² Ono sono tu, kuwai yo pontudukan Ku dai oorotian nu lobuw, nga ong wagu kointolang-a nu Kinoringan om oorotian nai’. ²³ Bang kitolingo kou ya, rongowo muyu yo itu no kowarong-warong!” koo si Yisus. ²⁴ Mutongaro po si Yisus so nosiro nu, “Kimati muyu yo onu yo po rongowon muyu! Sukuban pokayon muyu so lobuw, ono ya su pokayon nu Kinoringan suat so kou. ²⁵ Lobuw mongkinongou om mongoorati nu pontudukan Ku no, koorati iyo. Nga lobuw dai mongkinongou nu pontudukan Ku no, nokuro ong sabat-a oorotian nga lumiong,” koo si Yisus. ²⁶ Mutongaro po si Yisus nu, “Koduung ong mogkuasa Kinoringan soko raja, gama’ Niyo soko ido koyuwan posasad nu linsou so umo. ²⁷ Awi moturuw iyo, runat mugogoma’on iyo, linsou iiri tumuu’ yo sono om inumokang, nga dai ya oilaan niyo ong onu kourug-urug nu iri. ²⁸ Iri yo tana’ ri su nopookang nu tuu’ nu linsou iiri, gulu po tangkai, taruk, om bua’ nai’ kionsi. ²⁹ Noonsak-o po bua’ iiri, kotuo yo sono nu lobuw noposasad-i iya nu poongotu’an,” koo. ³⁰ Mutongaro po si Yisus nu, “Mongaabar Aku nu gama’ ong mogkuasa yo Kinoringan soko raja, ono yo ³¹ soko linsou oworos nisasad so umo. Togna ri oworos om dai poduli’on nu lobuw, ³² nga kotuu’ po, ourug sono nu kayu okutuw, osiou nu lobuw suang, om murumun su bombolog so raan-o,” koo. ³³ Soko ono yo poomontuduk ni Yisus nu lobuw suang maid nu boroginis salig-salig ontob oorotian nosiro. ³⁴ Dai Iyo mutangar-tangar so nosiro ong okon ko solig-soligon Niyo. Nga bang Iyo ya om mompomaid Niyo ri, potarang Iyo sono nu kiawi’-awi’ oono. ³⁵ Awi-awi nu runat iiri, tongaro yo ni Yisus mompomaid Niyo ri nu, “Kayo toko yo muripau,” koo. ³⁶ Laiwi yo nosiro lobuw suang iiri, om sumokoyo yo mompomaid ni Yisus so alud sokoi-sokoyan laid Niyo ri, om tumulako yo nosiro. Kuwai ya alud wokon sinokoyan nu lobuw sumuut so nosiro. ³⁷ Muoso yo sono nu opogon, om liu’ ri nga ginumumbang sampai nosungoyan alud-i, ³⁸ nga moturuw si Yisus so muri ri. Riosi yo Iyo nu mompomaid Niyo ri om tongaro yo nu, “Oo Guru! Dai mu ka poduli’on? Matoi toko yo itu!” koo. ³⁹ Rumioso yo si Yisus om suuo yo Niyo uos-i nu, “Odog-o!” koo, om gumbang-i, “Intoron-o!” koo. Minintoron-o sono muos, om liu’ ri nga d’ado yo muad gimpung. ⁴⁰ Mutongaro yo si Yisus so mompomaid Niyo ri nu, “Nokuro su lumaa’ kou? Dai po ka poimaid kou?” koo. ⁴¹ Sobana ko linumaa’ nosiro om mutotongar-tongaro yo nu, “Isai ka lobuw iitu no su uos om gumbang nga musimaid suu’on Niyo?” koo.

¹ Indadi nokologa’ yo sono nosiro so sondipawon nu Liu’ Galilia so wonuo nu Gorasa. ² Nokotindal-a si Yisus so alud-i, lumogaa yo ido kusoi kiat so kolobongan sumambat so Iyo. ³ Lobuw iiri sinorungan nu moinat om polak-polak-o po so kolobongan. Dai yo okogosan iyo pudi rantai su pongkogos. ⁴ Obulit-o kogosan nu rantai akod longon niyo, nga owukat-o po om bosi niapid so akod niyo ri opodang-a niyo. Sobana ko obasag iyo sampai d’ado koponguut so iyo. ⁵ Awi runat mogilolongkop iyo so kolobongan om so kobubuludan, maid nu muap-luap om musimpilat nu watu. ⁶ Orawu’ po, nosiou-o niyo si Yisus. Mundako yo iyo sumamung om sumurukudo yo so tiningkuangon Niyo ri. ⁷ Lumuapo yo iyo nu, “Oo Yisus, Anak nu Kinoringan Opangkat! Kuroon Mu ka aku? Mindamo aku so Ikau so ngaran nu Kinoringan, kodi aku yo sonsoraa!” koo. ⁸ (Minutangar iyo soko iri, so’ sinuu’ ni Yisus moinat-i polaiw kiat dii so iyo). ⁹ Duato yo iyo ni Yisus nu, “Isai ka ngaran mu?” koo. Sumombuto yo lobuw iiri nu, “Ngaran ku si Ligiun, so’ bana ko osuang kai!” koo. ¹⁰ Minindamo sobana lobuw iiri so si Yisus, nu dai niposusub moinat-i kiat dii. ¹¹ Orani dii, osuang ulod moingpoongokan so ombaron. ¹² Mutongaro yo sono moinat-i so si Yisus nu, “Lilai kai yo sumarung so ulod oono,” koo. ¹³ Lilai yo ni Yisus nosiro, om lumobuso yo kiat so lobuw-i sumarung so ulod-i. Mundako yo sono ulod-i tumuop so liu’ ri, om nolosod-a sono. Koosuang nu ulod iiri kiro-kiro duo noribu. ¹⁴ Mundako yo moongipat nu ulod-i potuturan nu iri so lobuw so bandar om kampung so kumoronian-i, om osuang lobuw minian monsiou nu iri. ¹⁵ Miano yo nosiro dii si Yisus om nosiou-o nosiro lobuw sinorungan nu moinat-i mogom-ogom. Kipokakas-o sono iyo om osayu yo pongindan. Nosiro kiawi’ linumaa’. ¹⁶ Lobuw nokosiou kondiri nu iri, nopotuturan so nosiro nu nourug so lobuw sinorungan nu moinat-i om ulod-i. ¹⁷ Suuo yo sono si Yisus nu ongo lobuw-i polaiw. ¹⁸ Iya ni Yisus sumakoi koimbagu so alud-i, mindomoo yo lobuw baya’ sinorungan nu moinat iiri nu maid. ¹⁹ Nga dai linila’an ni Yisus. Ala’ nai’ tinangar nu, “Uli’ yo om tuturani yo so anak sulod mu poonabang om koowarong nu Kinoringan so ikau,” koo si Yisus. ²⁰ Momponowo yo lobuw iiri so tontong ingoranan nu Opulu Bandar potuturan nu pinonobangan ni Yisus so iyo ri. Noiranan sono lobuw nokorongou nu tuturan niyo ri. ²¹ Mululio po si Yisus muripau so liu’ ri. Lumogaa yo sono lobuw suang muimpug so pililiwut Niyo ri. ²² Si Yairus, wowaidon so waloi sosombooyangan so bandar iiri, nga linumoga’ ya. Nosiou-o po niyo si Yisus, mundako yo iyo lumoga’ sumurukud so tiningkuangon Niyo ri ²³ mindamo nu, “Sumakit sobana anak woinoi ku ri. Tobango aku yo. Loga’ yo dii potopop nu palad Mu no so koyuwan niyo su’ opoli’an,” koo. ²⁴ Maido yo sono si Yisus so iyo om osuang-a lobuw minaid. ²⁵ Kuwai sono ido woinoi morosakit nu tumuntug opulu yo om duo toun laid. ²⁶ Naawi’ yo niyo pobarai kiawi’ orata’ niyo ri so lobuw moongubat so iyo, nga dai ya iyo opoli’an, ala’ nai’ sumosooi. ²⁷ Norongou-o po niyo abar suat so si Yisus, sumurato ya iyo so lobuw suang-i rumani dii si Yisus kiat so tinoudion, ²⁸ so’ oilaan niyo so inawo nu, otudul pona niyo sabung ni Yisus, opoli’an-o iyo! ²⁹ Tudulo yo niyo sabung ni Yisus om sonduun-duun-a minintoron tumuntug, om noilaan-o niyo nu nopoli’an-o. ³⁰ Iya ya iiri, noirosaan ni Yisus nu kinumurang kuasa Niyo. Kumowiio yo sono Iyo mongoduat so lobuw suang-i nu, “Isai ka minonudul nu sabung Ku tu?” koo. ³¹ Sumombuto yo sono mompomaid Niyo ri nu, “Siowi bo! Osuang lobuw muimpit-impit. Nokuro su mongoduat Ko po nu isai minonudul nu sabung Mu no?” koo. ³² Nga monomburorowo yo si Yisus so pililiwut Niyo ri mongudio ong isai minonudul nu sabung Niyo ri. ³³ Noilaan-o po nu woinoi iiri onu nourug so iyo, miano yo iyo sumurukud so tiningkuangon ni Yisus maid nu mikip-kikip lumaa’ om paabar nu iyo yo su minonudul. ³⁴ Mutongaro yo sono si Yisus so woinoi-i nu, “Oo, anak! Pagka nopoimaid ko, nopoli’an ko yo! Panou-o om ikod-o kigagau. Dai yo sono sumoup osakit mu ri!” koo. ³⁵ Laid ni Yisus mutangar, lumogaa yo tinu-tinu susuu’on kiat so waloi ni Yairus pokoilo nu, “Minatoi-o anak mu ri. Kodi yo oguto guru iitu no,” koo. ³⁶ Dai ya pinoduli’ ni Yisus pinutangar nosiro ri, nga tongaro yo Niyo si Yairus nu, “Ikod-a kilaa’! Poimaid-o!” koo. ³⁷ Lumombuso yo si Yisus, nga dai linila’an Niyo ongo lobuw-i maid so Iyo, sondiang ko si Pitrus, om duo musulod si Yakubus om si Yuanis. ³⁸ Nokologa’ nosiro so waloi ni Yairus, nosiou ni Yisus lobuw dii botongi’an om bousoyan. ³⁹ Mosuwo yo sono Iyo om mutongaro yo so nosiro nu, “Nokuro su umogutan om tumangi’ kou? Okon-a ko minatoi lolaing oono, moturuw-a,” koo. ⁴⁰ Muoyako yo sono nosiro so Iyo. Pagka soko iri, suuo yo nosiro ni Yisus polabus. Ingoli yo Niyo ino amo nu lolaing iiri om tolu mompomaid Niyo ri masuw so bilik ginilian nu lolaing-i. ⁴¹ Kuyuti yo ni Yisus longon nu lolaing iiri om mutongaro yo nu, “Talita kum,” koo. Orati nu iri, “Oo su woinoi, tungag-o!” ⁴² Tumungago yo roraa iiri om musimponowo yo. Umur niyo opulu yo om duo toun. Noiranan sono lobuw nokosiou nu iri. ⁴³ Nga sobana ko pinogos ni Yisus nosiro potuturan nu iri so isai-isai ya. Mutongaro yo Iyo nu, “Pookano muyu yo lolaing iitu,” koo.

¹ Dai olaid kiat nu iri, mululio yo si Yisus om mompomaid Niyo ri so inungkiaton Niyo ri. ² Runat Pongintoronan, miano yo si Yisus montuduk so waloi sosombooyangan. Noiranan kiawi’ lobuw nokorongou nu pontudukan Niyo ri om minutangar nu, “Siombo gaam pinoguru’an Niyo? Om kiat siombo kuasa Niyo momaal nu koiran-iran? ³ Okon ka ko Iyo yo iri tukang kayu ri? Ino Niyo si Maria, om kosusulodan Niyo si Yakubus, si Yusup, si Simun om si Yudas. Kosusulodan Niyo woinoi nga tuui-a minolak,” koo. Pagka soko iri, tinulak sono Iyo nosiro. ⁴ Mutongaro yo si Yisus so nosiro nu, “Koduung poo’abar nu Kinoringan, orumaton so kiawi’ tontong, nga dai orumaton so tontong om kosusulodan niyo kondiri,” koo. ⁵ Pagka dai nopoimaid nosiro, dai ya minomaal Iyo nu koiran-iran dii, onu ko po nopotopop nu palad Niyo so ulu nu tinu-tinu koyuwan morosakit, momali’ so nosiro. ⁶ Noiranan sobana si Yisus nu dai nosiro nopoimaid. Miano yo sono si Yisus so kampung orani so tontong iiri montuduk nu lobuw. ⁷ Impugo yo Niyo opulu om duo mompomaid Niyo ri, taaki yo Niyo nosiro nu kopogboya’an monusub nu moinat om suuo yo Niyo soro duo-duo koyuwan. ⁸ Kodawi yo Niyo nosiro nu, “Ikod kou yo pongowit nu onu-onu ya suat so pomponowan muyu, sondiang ko susukud. Adang-o mongowit nu baata’, ombubut intawa siin. ⁹ Pukasut kou yo, nga ikod kou yo pongowit nu imoraan. ¹⁰ Bang kologa’ kou so ido bandar, intawa kampung, podium kou yo nu lobuw oingin polakan muyu, om ogol kou yo nai musingkologa’ nu lombusan muyu. ¹¹ Bang dai kou pologa’on nu lobuw intawa mongkinongou so kou, laiwi muyu ya nosiro, om puyaso muyu koris so rompam muyu no, pongilaan nu insaadan nosiro nu Kinoringan,” koo si Yisus. ¹² Miano yo sono nosiro paabar so ongo lobuw nu subai rumorogo momaal nu koraayan. ¹³ Minonusub nosiro nu komoinatan, nopotuntug nu inosak lanung so lobuw morosakit, om minomali’ so nosiro. ¹⁴ Si Raja Irudis nga nokorongou-a nu noongourug iiri, so’ siombo-ombo nga obantug si Yisus. Kuwai minutangar nu, “Noluli’an-o si Yuanis Moongodiu’. Ono yo ko’ kikuasa Iyo momaal nu koiran-iran oono,” koo. ¹⁵ Nga wokon-i minutangar nu, “Iyo oono si Ilia,” koo. Kuwai ya minutangar nu, “Iyo oono poo’abar nu Kinoringan gulu ri,” koo. ¹⁶ Norongou-o po iri ni Irudis, mutongaro yo sono iyo nu, “Tantu si Yuanis Moongodiu’ ono noluli’an, iri nipopunggol ku ulu ri,” koo. ¹⁷ Gulu ri minonuu’ iyo nu nipaakom si Yuanis nu jiilon. Winaal niyo soko iri so’ inontun niyo si Irudias, sawo ni Pilipus, sulod niyo ri, ¹⁸ om obulit-o iyo tongaron ni Yuanis soko itu, “Dai kowasa ontunon mu sawo nu sulod mu no,” koo. ¹⁹ Iri yo ko’ sinumona si Irudias so si Yuanis om mokipopomatoi so iyo, nga dai linila’an ni Irudis. ²⁰ Lumaa’ iyo so si Yuanis so’ oilaan niyo nu lobuw warong iyo om sinuu’ nu Kinoringan. Nokoponuu’ yo iyo nu lobuw popongipat so iyo so jiil om pudi pona aagut iyo nu totongaron oono, ototom-a bana iyo mongorongou. ²¹ Nologa’ rami-rami pongoondoman nu kinopuonakan so si Irudis, nokooyang-a sono si Irudias nu kopotoi-potoyan so si Yuanis. Iya oono minonogina si Irudis nu ongo pogawai, wowaidon nu soujar, om lobuw Galilia kipangkat-i. ²² Minonari sono anak woinoi ni Irudias so tiningkuangon nu lobuw suang-i, om sobana ko noondayan si Irudis nu poonari nu roraa oono. Mutongaro yo sono iyo so roraa ri nu, “Onu-onu ya koinginan mu taakan ku ya ikau,” koo. ²³ Mongiboto yo iyo so roraa oono nu, “Onu yo po pokitaakon mu tumbaidon ku ya, pudi pona songintonga’ nu tana’ pogkuosaan ku no,” koo. ²⁴ Lumobuso yo roraa ri mongoduat so ino niyo ri nu, “Onu ka su owarong pokitaakon ku?” koo. Sumombuto yo ino ri nu, “Pokitaako yo ulu ni Yuanis Moongodiu’ ri,” koo. ²⁵ Mosuwo yo roraa ri om tongaro yo si Irudis nu, “Pokitaakon ku ulu ni Yuanis Moongodiu’ nu ono sono tu ya,” koo. ²⁶ Sobana ko aagut si Irudis nu iri nga dai yo niyo oolim so’ nokopongibot-o iyo so tiningkuangon nu tombuoi niyo ri. ²⁷ Mogtuui suuo niyo ido soujar niyo ri popongunggol nu ulu ni Yuanis. Miano yo soujar iiri so jiil om punggolo yo niyo ulu ni Yuanis. ²⁸ Sokoyi yo niyo ulu iiri so talam, om owito yo potaak so roraa ri, om taaki yo sono nu roraa ri so ino niyo ri. ²⁹ Norongou-o po iri nu mompomaid ni Yuanis, miano yo nosiro moongoi nu bangkai niyo ri om lobongi yo. ³⁰ Mululio yo sono pinongoorapan ni Yisus potuturan so Iyo, nu kiawi’ winaal om nituduk nosiro ri. ³¹ Osuang lobuw minian dii, sampai dai kotodiri nosiro mongokan. Pagka soko iri, mutongaro yo si Yisus so pinongoorapan Niyo ri nu, “Mian toko yo so tontong oyiyingo mintoron sontagal,” koo. ³² Sumokoyo yo sono nosiro so alud om miano yo so tontong oyiyingo. ³³ Nga osuang lobuw nokosiou so nosiro nu mungkayas nosiro ri om notondu’an-a. Murongkato yo lobuw so pilolongkop iiri minontas-a mogulu so loga’an ni Yisus om mompomaid Niyo ri. ³⁴ Nokotindal-o po Iyo so alud-i, nosiou Niyo osuang lobuw dii. Noluluudan sono Iyo so nosiro so’ soko osuang koogutan nosiro om d’ado monabang, soko baanan nu dumba d’ado moongipat. Tumugulo yo sono Iyo montuduk so nosiro. ³⁵ Awi-awi ri, lumogaa yo mompomaid Niyo ri, om mutongaro yo nu, “Oo Guru, pagka tumuong-o om oyiyingo tuui, ³⁶ owarong suu’on Mu nosiro momoli nu ingkookan so kampung,” koo. ³⁷ Sumombuto yo Iyo nu, “Adang-a poponowon nosiro, pookano muyu ya,” koo. Mutongaro yo mompomaid Niyo ri nu, “Oo Guru, moingin ko bo gaam ong kai su mian momoli nu baang-baang, orogo duo naatus siin pirok, ipookan so nosiro?” koo. ³⁸ Mutongaro yo Iyo nu, “Impaa muyu ong komuro po baang-baang muyu,” koo. Noimpa’ yo po, sumombuto yo nosiro nu, “Limo po nowatu baang-baang om duo nokayu pait,” koo. ³⁹ Suuo yo Niyo lobuw-i poogom mututuruk-turuk so korikutan-i. ⁴⁰ Mogomo yo nosiro mututuruk-turuk, kuwai maatus sonturuk om kuwai ya limo nopulu. ⁴¹ Olapo yo Niyo limo nowatu baang-baang om duo nokayu pait-i, om tumingaa’o yo mongunsopot so Kinoringan. Noopod iri, kobi-kobio yo Niyo baang-baang-i om taaki yo so mompomaid Niyo ri nu ipotayad-tayad so lobuw suang-i. Soko iri ya winaal Niyo pudi pait-i. ⁴² Mongokano yo ongo lobuw-i sampai nowasug. ⁴³ Noopod iri, pumpungo yo nu mompomaid Niyo ri olu’-olu’ ri, nokoponu’ po opulu om duo podaka. ⁴⁴ Koosampuw nu lobuw minongokan iiri kiro-kiro limo noribu, sondiang po kowoinoyan om kololaingan. ⁴⁵ Suuo yo ni Yisus mompomaid Niyo ri sumakoi nu alud mogulu so kampung Baitsaida so diipau nu liu’ ri nu laid Niyo pouli’ nu ongo lobuw-i. ⁴⁶ Nokouli’ yo po nosiro, tumidongo yo si Yisus so ido bulud mogdu’a. ⁴⁷ Tumuong-i, nokolintonga’ yo mompomaid Niyo so liu’ ri, om kakal po Iyo so tona’on-i. ⁴⁸ Nosiou Niyo mompomaid Niyo ri monginoontob gumou so’ sobana ko opogon uos-i om osunsulakan po nosiro. Pagka soko iri, duruk sumuab-i lumogaa yo Iyo dii so nosiro minompanou-a so kulit nu sungoi-i, om soko mokipopogulu ya Iyo. ⁴⁹ Nga nosiou-o po nosiro si Yisus minompanou so kulit nu sungoi-i, tinokod nosiro nu moinat Iyo om ginumonsok lumaa’ nu, “Moinat-o!” koo. ⁵⁰ Nga tongaro yo ni Yisus nosiro nu, “Ikod kou kigawa! Aku ya itu no! Ikod kou ya kilaa’!” koo. ⁵¹ Sumokoyo yo sono Iyo so alud nosiro ri om uos-i nga miningkoyod-o. Sobana ko noiranan nosiro, ⁵² so’ kakal po dai noorotian nosiro winaal Niyo suat so limo baang-baang iiri. ⁵³ Muripawo yo sono nosiro so liu’ iiri, om nokologa’ so Ginisarit. Dumudulo yo nosiro dii. ⁵⁴ Nokotindal-o po nosiro, notondu’an-o sono si Yisus nu ongo lobuw-i. ⁵⁵ Owito yo nosiro isai yo po morosakit dii so Iyo so siombo-ombo ya ianan Niyo. ⁵⁶ Siombo-ombo ya loga’an Niyo, so ongo kampung ka, so bandar ka intawa so koumaan, nai yo nosiro mongowit nu lobuw morosakit. Mokililaa yo nosiro so si Yisus monaambai nu insan ririg-a nu sabung Niyo ri, om kiawi’ nosiro nopoli’an.

¹ Lumogaa yo dii si Yisus tinu-tinu lobuw Parisi, om moomontuduk nu Ukum kiat so Yirusalim. ² Nosiou sono nosiro mompomaid Niyo ri mongokan dai mongowaid nu poroodatan nu odu aki suat so poomuugas nu palad. ³ Lobuw Parisi om kiawi’ lobuw Yaudi mongowaid nu poroodatan nu odu aki nosiro. Dai nosiro mongokan ong dai po kopuugas nu palad, mongowaid nu adat notantu yo iiri. ⁴ Kuwai po adat nosiro nu dai kookan nu onu-onu ya wolion so pasar ong dai po ougasan, om osuang adat wokon soko gama’ mongugas nu sangkir, mangkuk, om gonggamon tombaga winaal. ⁵ Pagka soko iri, duato yo sono nosiro si Yisus nu, “Nokuro su dai mongowaid mompomaid Mu no nu poroodatan nu odu aki toko ri? Mongokan nosiro nga dai musuat poomuugas nosiro nu palad,” koo. ⁶ Sumombuto yo si Yisus nu, “Kou yo lobuw musingkopoimaid-poimaid! Bana ya nima tinangar nu Kinoringan nituturan nu poo’abar Niyo gulu ri si Yisaya nu, ‘Totongaron-a nu kolobuwan iitu no mongorumat so Aku, nga inawo nosiro d’ado ya pongoondom so Aku. ⁷ D’ado ya kosudaan nu poongusaa’ nosiro so Aku, so’ oturan-a nu lobuw nituduk nosiro no, okon-a ko oturan Ku,’ koo ri. ⁸ Mongowaid kou nu poroodatan nu lobuw, nga dai mongowaid nu niongosuu’ nu Kinoringan,” koo si Yisus. ⁹ Mutongaro po Iyo nu, “Moilo kou mongoganti’ nu oturan nu Kinoringan nu poroodatan nu lobuw-a. ¹⁰ Nilombus ni Musa oturan nu Kinoringan nu gulu ri nu, ‘Orumato yo ino amo muyu no, om isai yo po pokoraai nu ino amo niyo, subai potoyon,’ koo. ¹¹ Nga montuduk kou sono nu, bang ido koyuwan kuwai otoop itaak so ino amo niyo, nga mutangar iyo nu, ‘Dai ku iri kotaak so kou, so’ nokotaak ku yo so Kinoringan,’ koo, ¹² lobuw oono dai yo muru’ monabang po nu ino amo niyo, koo kou. ¹³ Indadi, gama’ muyu iitu poogot kou nu poroodatan muyu, om pokomaai-maayan muyu niongosuu’ nu Kinoringan. Osuang totongaron muyu osala’ om nituduk so lobuw wokon,” koo si Yisus. ¹⁴ Mutongaro yo si Yisus so kolobuwan iiri nu, “Rongowo om orotio muyu yo. ¹⁵ Okon-a ko onu yo po ookan nu lobuw tu su koinsaim nu lobuw om dai sono otoop mongusaa’ nu Kinoringan, sondiang ko onu yo po oraai kiat so inawo. ¹⁶ Pagka soko ono, bang kitolingo kou ya, rongowo muyu yo,” koo si Yisus. ¹⁷ Nokolaiw-o po si Yisus kiat so lobuw suang-i, om nokaasuw so waloi, duato yo sono Iyo nu mompomaid Niyo ri ong onu orati nu salig-salig iiri. ¹⁸ Mutongaro yo si Yisus so nosiro nu, “Dai muyu po ka oorotian tinangar Ku iiri? Orati yo po nu iri nga, onu yo po okanon nu lobuw tu niasuw so kobang, lumombus so tian om taion sono. ¹⁹ Obana ya ono so’ dai masuw so inawo, nga ontob-a so tian, om taion-a sono,” koo Iyo. Totongaron ni Yisus iiri nopoorati nu kiawi’ ookanon kowasa ya okanon. ²⁰ Mutongaro po si Yisus nu, “Onu yo po lumabus kiat so ido koyuwan, ono yo su koinsaim so iyo, ²¹ so’ ungkiat-o so inawo mintolang popoduon oraai, sumundal, monakou, mokipopomatoi, ²² lumapa’, moinsolon, rumoraayan so lobuw, oropuk, mokimurindi, odouraka, musingkaaku-aku om olowong. ²³ Kiawi’ nu ono musit kiat so inawo, om ono yo su koinsaim nu lobuw,” koo si Yisus. ²⁴ Nopupus iri, mulaiwo yo si Yisus kiat dii om miano yo so ido tontong orani so bandar Tirus om Sidun. Minasuw Iyo so ido waloi, om dai Iyo moingin ong oilaan nu lobuw nu dii Iyo, nga noilaan-a. ²⁵ Ido ino kianak nu woinoi sinorungan nu moinat, nokorongou nu dii si Yisus. Miano yo sono iyo dii si Yisus om sumurukudo yo so tiningkuangon Niyo ri. ²⁶ Woinoi iiri okon ko bansa Yaudi, nga nopuanak so wonuo nu Punisia so Siria. Minindamo iyo so si Yisus nu iposusub moinat-i kiat so anak niyo ri. ²⁷ Sumombuto yo si Yisus nu, “Dai musuat ong isumad so asu ingkookan ipookan so inonakan,” koo. ²⁸ Sumombuto yo woinoi iiri nu, “Bana ya nai’ ono Tuan, nga insan asu no ya mongokan-a nu pinitak nu inonakan,” koo. ²⁹ Mutongaro yo si Yisus so woinoi iiri nu, “Pagka soko ono sambut mu, uli’ yo! Linumabus-o moinat-i kiat so anak mu ri,” koo. ³⁰ Mulio yo sono iyo om nosiou niyo anak niyo ri mili-gili so poomoturuwan, om bana-bana ya nu linumabus-o moinat-i. ³¹ Nopupus iri, mulaiwo yo si Yisus kiat so Tirus mian so Liu’ Galilia, tinumalib so Sidun, nokolalan so wonuo Opulu Bandar. ³² Owito yo sono nu kolobuwan ido koyuwan bongol om bobou dii so Iyo ipoingkam tayon ong opoli’an. ³³ Owito yo Niyo lobuw iiri sumondiang om susuki yo Niyo tontuduk Niyo ri so tolingo nu lobuw-i, om durai yo tontuduk Niyo ri, om tuduli yo so dila’ nu lobuw-i. ³⁴ Nopupus iri, tumingaa’o yo Iyo om muinowoo yo kaayo om tongaro yo lobuw iiri nu, “Ipata”, koo, orati niyo “Osukab-o”. ³⁵ Iya ya iiri korongou om koputangar-o sono lobuw-i. ³⁶ Pogoso yo Niyo nosiro nu dai ipotuturan iri so isai-isai ya, nga nituturan-a nosiro. ³⁷ Kiawi’ lobuw nokorongou nu iri noiranan om mutangar nu, “Sobana ko owarong gogoma’on Niyo no. Lobuw bongolon om bobou nga poli’an Niyo,” koo.

¹ Dai po olaid kiat nu iri, minuimpug-o ongo lobuw dii. Nosiou-o po ni Yisus nu d’ado ingkookan nosiro, paawo yo Niyo mompomaid Niyo ri om tongaro yo nu, ² “Oluluudan Aku nu kolobuwan iitu no so’ kotoluan-o nosiro maid-waid so Aku, om kosiono noowi’an-o nu ingkookan. ³ Dai su moingin pouli’ so nosiro ong dai po kookan. Lumaa’ Aku nu oodan nosiro so lolanon-o, so’ kuwai so nosiro orawu’ uli’an,” koo. ⁴ Sumombuto yo mompomaid Niyo ri nu, “Siombo ka podiuman so padang pantai iitu no nu ingkookan muuma’ so nosiro?” koo. ⁵ Mongoduato yo si Yisus so nosiro nu, “Komuro po ka nowatu baang-baang muyu?” koo. “Turu po,” koo nosiro. ⁶ Suuo yo sono Niyo lobuw suang-i poogom so tana’ ri. Olapo yo Niyo turu nowatu baang-baang-i om mongunsopoto yo so Kinoringan. Nopupus iri, kobi-kobio yo Niyo om taaki yo Niyo so mompomaid Niyo ri, nu toyad-toyadon so lobuw-i. ⁷ Kuwai ya tinu-tinu nokayu pait nosiro. Mongunsopoto yo Iyo nu iri so Kinoringan om suuo yo Niyo mompomaid Niyo ri poponayad nu pait-i. ⁸ Mongokano yo sono nosiro sampai nowasug om impugo yo nu mompomaid Niyo ri olu’-olu’ ri, turu po nopodaka suang. ⁹ Koosampuw nu lobuw minongokan iiri kiro-kiro opat noribu. ¹⁰ Nopupus iri, suuo yo Niyo kolobuwan-i pouli’, om sumokoyo yo sono Iyo so alud mian so wonuo nu Dalmanuta. ¹¹ Tinu-tinu lobuw Parisi minian dii si Yisus mokimusiwal so Iyo monginam-nginam. Sinuu’ Iyo nosiro momaal nu koiran-iran pongilaan nu kikuasa Iyo kiat so Kinoringan. ¹² Muinowoo yo Iyo kaayo tanda’ nu notopodan nu indomoon nosiro dadan om sumombuto yo nu, “Nokuro ka lobuw iitu no su moingin ong momaal Aku nu koiran-iran? Dai ya su momaal suat so nosiro,” koo. ¹³ Laiwi yo Niyo nosiro om sumokoyo yo so alud muripau so liu’ ri. ¹⁴ Nokolupo mompomaid ni Yisus mongowit nu baang-baang muuma’ so nosiro. Sombatu yo noowit nosiro. ¹⁵ Mutongaro yo Iyo so nosiro nu, “Otago muyu yo! Mingat-ingat kou yo nu pongombang nu lobuw Parisi om ni Irudis,” koo. ¹⁶ Norongou-o po nosiro tinangar Niyo ri, mutotongar-tongaro yo nosiro nu, “Ono yo ko’ mutangar Iyo nu soko ono so’ dai toko nokopongowit nu baang-baang,” koo. ¹⁷ Noilaan-a ni Yisus pinutongar-tongaran nosiro ri, mutongaro yo sono Iyo nu, “Nokuro su umogutan kou nu d’ado baang-baang muyu no? Dai kou po ka koorati ong isai Aku? Okosog sobana inawo muyu. ¹⁸ Kimato om kitolingo kou ya nga dai kou kosiou om korongou! ¹⁹ Kakal kou po dai koorati! Dai muyu ka oondoman limo yo nowatu baang-baang kinobi-kobi Ku ri om tinayad-tayad so lobuw limo noribu sampuw, om komuro po kosuang olu’-olu’ inimpug muyu?” koo. Sumombuto yo nosiro nu, “Oo, opulu om duo nopodaka,” koo. ²⁰ Mongoduato po si Yisus nu, “Om tinu po podaka noimpug muyu nu olu’-olu’ nu pinookanan Ku nu lobuw nu turu yo nowatu baang-baang-i?” koo. Sumombuto yo nosiro nu, “Turu nopodaka,” koo. ²¹ Mutongaro yo Iyo nu, “Indadi nokuro su kakal kou po dai koorati?” koo. ²² Nokologa’ po nosiro so Baitsaida, owito yo nu lobuw suang dii si Yisus lobuw bolou, om minindamo nu ipoingkam so Iyo. ²³ Kuyuti yo ni Yisus longon nu lobuw bolou iiri om tonudo yo lumabus kiat so bandar-i. Durai yo Niyo mato nu lobuw bolou iiri, topopo yo Niyo om mongoduato yo nu, “Kosiou ko yo ka?” koo. ²⁴ Monomburorowo yo lobuw iiri om mutongaro yo nu, “Oo, kosiou aku yo nu lobuw sompanou-panou, nga soko puun nai’ nu kayu kosiowan ku,” koo. ²⁵ Topopi po ni Yisus palad Niyo ri so mato nu lobuw iiri, om sonduun-duun-a nopali’ om kowawai-o sono. ²⁶ Tongaro yo iyo ni Yisus nu, “Uli’ yo om ikod-o kipululi’ so bandar oono,” koo. ²⁷ Miano yo si Yisus so ongo kampung orani so bandar Kaisaria Pilipi. Nokologa’ dii, tongaro yo Niyo mompomaid Niyo ri nu, “Ponokod nu lobuw, isai Aku ka itu?” koo. ²⁸ Sumombuto yo nosiro nu, “Kuwai mutangar nu si Yuanis Moongodiu’, kuwai ya nu si Ilia, om wokon po mutangar nu poo’abar nu Kinoringan gulu ri,” koo. ²⁹ “Nga ponokod muyu, isai Aku ka?” koo si Yisus. Sumombuto yo si Simun Pitrus nu, “Ikau-o su Raja Nijanji nu Kinoringan,” koo. ³⁰ Tongaro yo ni Yisus nosiro nu dai ipotuturan so isai-isai ya ong isai Iyo. ³¹ Tumugulo yo si Yisus montuduk nu mompomaid Niyo ri nu, “Aku yo Anak nu Riniba om subai osuang kosonsora’an oirosaan Ku kiat so kotutuaan, wowaidon nu imam, om moomontuduk nu Ukum. Potoyon Aku, nga oluli’an-a so kotolu no,” koo. ³² Binontol-a ni Yisus potuturan ono so mompomaid Niyo ri, nga pudiko yo Iyo ni Pitrus, om tongaro yo nu dai otoop ong ourug soko ono. ³³ Kumowiio yo sono si Yisus om tongaro yo si Pitrus nu, “Pulaiw-o su moinat! Pikiran mu no, pikiran-a nu lobuw okon ko pikiran nu Kinoringan,” koo. ³⁴ Soginaa yo ni Yisus lobuw suang dii ri om mompomaid Niyo ri om mutongaro yo nu, “Lobuw mokiwowaid so Aku, subai lupaan onu yo po koinginan niyo kondiri, om soko monimban nu salib, orati maid so Aku sumonsara’ musingkopatoi. ³⁵ Isai landu momikir nu kowiawan niyo kondiri, oliongan nai’ nu kowiawan. Nga isai dai landu momikir nu kowiawan niyo kondiri so’ osulut so Aku, om Abar Owarong nituturan Ku no, kikowiawan iyo musingkolaid maid so Kinoringan. ³⁶ D’ado kosudaan nu lobuw kosongapan nu kiawi’ so wonuo tu ong oraag-a kowiawan niyo insaadan nu Kinoringan musingkolaid. ³⁷ D’ado onu-onu otoop pongoganti’ niyo nu kowiawan niyo. ³⁸ Om isai moiyu’an so Aku, Anak nu Riniba om pontudukan Ku, Aku nga moiyu’an-a so lobuw oono, iya nu kologa’an Ku mogkuasa soko raja. Iya oono kuwai po binaang kiat so Kinoringan maid nu ongo susuu’on Niyo kiat so surga,” koo si Yisus.

¹ Mutongaro po si Yisus nu, “Ondomo muyu yo, kuwai so kou tuui dai po matoi ong dai po kosiou nu Kinoringan mogkuasa soko raja,” koo. ² Koonoman kiat nu iri, owito yo ni Yisus si Pitrus, si Yakubus, om si Yuanis sulod ni Yakubus tumidong so bulud opangkat nu siro ya siro, om mininda sono buatan Niyo kosiowan nosiro. ³ Pokakas Niyo ri nga milat-kilat nu kooputi’. So wonuo tu ado lobuw kopomupu nu pokakas koinong nu iri kooputi’. ⁴ Mintolango yo sono si Musa om si Ilia osiowan nosiro mutangar-tangar so si Yisus. ⁵ Mutongaro yo sono si Pitrus so Iyo nu, “Oo Guru, owarong bana toko tuui. Bang moingin Ko, momosalag aku tuui tolu, ido Dikau, ido ni Musa, om ido ni Ilia,” koo. ⁶ Sobana yo dai oilaan ni Pitrus ong onu otoop tongaron niyo, so’ sobana ko lumaa’ nosiro. ⁷ Dai po nopupus si Pitrus mutangar, kuwai sono kawut onawau tinumapu’ dii so nosiro, om kiat so kawut iiri nokorongou nosiro nu bongut nu, “Itu yo su Anak sinomodan Ku. Koinsanang sobana Iyo nu inawo Ku. Rongowo muyu yo totongaron Niyo no,” koo. ⁸ Monomburorowo yo sono nosiro so pililiwut nosiro ri, nga d’ado yo nosiou nosiro sondiang ko si Yisus po. ⁹ Tumaad nosiro so bulud-i, pogoso yo ni Yisus mompomaid Niyo ri nu, “Bang dai po oluli’an Aku, Anak nu Riniba, kodi muyu po obar-obari so isai yo po nopusiou muyu sisuna ri,” koo. ¹⁰ Inasip-a nosiro tinangar Niyo iiri, nga minududuat nosiro ong onu kuanon Niyo nu koluli’an. ¹¹ Mongoduato yo mompomaid Niyo ri nu, “Nokuro su minutangar moomontuduk nu Ukum nu si Ilia po su gulu lumoga’?” koo. ¹² Sumombuto yo si Yisus nu, “Bana ya nu si Ilia po gulu lumoga’. Om iyo yo nai’ su monodia’ nu onu yo po. Nga Aku, Anak nu Riniba okon ko soko ono. Nokosurat-o so Buuk nu Kinoringan nu, Aku yo po osuang kosonsora’an om pokoraayon nu lobuw. ¹³ Nga mutangar Aku so kou, nokologa’ yo si Ilia. Pubaag-baagan-a iyo nosiro mongowaid nu koinginan nosiro musuat nu nokosurat so Buuk nu Kinoringan suat so iyo,” koo si Yisus. ¹⁴ Nokopululi’ si Yisus om tolu mompomaid Niyo ri so mompomaid wokon-i, nosiou nosiro osuang lobuw om ongo moomontuduk nu Ukum mokimusiwal so nosiro. ¹⁵ Nosiou-o po Iyo nu lobuw suang-i, noiranan nosiro, om mundako yo lumoga’ dii so Iyo. ¹⁶ Mongoduato yo Iyo so nosiro nu, “Onu ka pinuupokatan muyu om moomontuduk nu Ukum iiri?” koo. ¹⁷ Sumombuto yo ido koyuwan kiat so nosiro nu, “Oo Guru, inowit ku anak ku iitu tuui so Ikau so’ sinorungan nu moinat om nobobou sono. ¹⁸ Bang sumoup-o iyo, mogilamba yo so tana’ no, muputa-puta su kobang, muatip su nipon, om kumosig koyuwan niyo no. Minindamo aku yo so mompomaid Mu no nu iposusub ku moinat oono nga dai ya osusub,” koo. ¹⁹ Tongaro yo ni Yisus nosiro nu, “Kou su lobuw kisala’ dai poimaid. Dai Aku osanang mido-ido so kou, nga tinaanan Ku ya nu laid iiri. Owito yo lolaing mu no tuui!” koo. ²⁰ Owito yo sono nu lobuw iiri lolaing-i dii so Iyo. Nosiou-o po nu moinat-i si Yisus, unggogo yo niyo lolaing-i sampai nogupol om muid-luid, om muputa-puta su kobang. ²¹ Duato yo sono Niyo amo nu lolaing iiri nu, “Komuro yo ka kolaid lolaing oono soko itu?” koo. Sumombuto yo amo ri nu, “Kiat po koworos. ²² Dadan moinat oono posubo so iyo so apui om potuop so sungoi nu momatoi so iyo. Indadi bang kodapat Ko, luluudi om tobangi kai yo,” koo. ²³ Mutongaro yo si Yisus nu, “Onu tinangar mu ri? Ong kodapat Ko, k’ikau? Onu yo po ourug-a ong poimaid-a,” koo. ²⁴ Lumuapo yo amo ri nu, “Oo Tuhan! Poimaid aku, nga koimaidan ku owako po. Tobango aku yo su’ sobana ko poimaid aku,” koo. ²⁵ Nosiou ni Yisus nu osuang sono lobuw muimpug, suuo yo Niyo moinat iiri nu, “Oo su moinat mongobongol om mongobobou, labus-o so lolaing iitu no, om ikod-o sono kipululi’,” koo. ²⁶ Lumuapo yo moinat-i om unggogo yo niyo lolaing-i om lumobuso yo. Nosiou nosiro lolaing iiri nu soko bangkai, sampai nokoputangar nosiro nu, “Minatoi-o lolaing-o,” koo. ²⁷ Nga kuyuti yo ni Yisus longon nu lolaing-i om tuudo yo Niyo potungag, om tumungago yo sono. ²⁸ Nokouli’ si Yisus, lumogaa yo mompomaid Niyo ri mongoduat nu, “Nokuro su dai mai nosusub moinat iiri?” koo. ²⁹ Sumombuto yo Iyo nu, “Moinat soko iri, dai osusub ong dai mogdu’a po laid,” koo si Yisus. ³⁰ Mulaiwo yo sono si Yisus om mompomaid Niyo ri kiat dii, om lumombuso yo linumalan so Galilia. Dai Iyo moingin nu oilaan nu lobuw ong siombo Iyo, ³¹ so’ montuduk Iyo sono nu mompomaid Niyo ri nu, “Dai olaid ikomouli’ Aku, Anak nu Riniba so kopogboya’an nu lobuw. Potoyon Aku, nga so kotolu no oluli’an Aku ya,” koo. ³² Dai noorotian nosiro nituduk Niyo ri, nga dai kooku’ nosiro mongoduat so Iyo. ³³ Nokologa’ yo sono nosiro so Kapornaum om dii so waloi-i, duato yo ni Yisus mompomaid Niyo ri nu, “Onu ka pinusisiwalan muyu sisuna so lolanon-i?” koo. ³⁴ Nga dai ya sinumambut nosiro so’ minudodaawa nosiro so lolanon-i ong isai su oogot so nosiro. ³⁵ Mogomo yo si Yisus om paawo yo Niyo opulu om duo mompomaid Niyo ri, om mutongaro yo nu, “Lobuw moingin nu oogot po ko’ kiawi’ wokon, subai mugogoma’on suat so lobuw suang,” koo. ³⁶ Owito yo ni Yisus ido lolaing so tiningkuangon nosiro ri om koromi yo Niyo maid nu mutangar nu, ³⁷ “Isai monorima’ nu lobuw soko lolaing iitu, so’ poimaid so Aku, monorima’ ya so Aku. Om lobuw monorima’ so Aku, okon ko Aku ya su torima’on, nga monorima’ po so Iyo ono minonuu’ so Aku no,” koo si Yisus. ³⁸ Mutongaro yo si Yuanis so si Yisus nu, “Oo Guru! Nokosiou kai nu lobuw minonusub nu moinat mongorait nu ngaran Mu. Pinogos mai iyo, so’ okon-a ko kiat so puimpugan toko,” koo. ³⁹ Nga sumombuto yo si Yisus nu, “Adang-o pogoson iyo, so’ d’ado ido kopomaal nu koiran-iran mongorait nu ngaran Ku, om mongoraai-a sono so Aku. ⁴⁰ Om isai dai lumawan so toko, iyo yo su kouna’an toko. ⁴¹ Ondomo muyu yo, isai poinum so kou so’ moongowaid kou so Aku, Raja Nijanji nu Kinoringan, tantu kotorima’ iyo nu tutungkap kiat so Kinoringan. ⁴² Isai koowit-owit nu lobuw wokon momaal nu koraayan, oinsaadan. Owarong po korobotuan liou niyo no nu watu maayo om itobung so raat. ⁴³ Bang longon mu no su koowit so ikau momaal nu koraayan, totoko yo om odai. Owarong po sompopodi longon mongimaid so Kinoringan ko’ duo nga kosubo so noraka. [ ⁴⁴ So tontong oono yo dai matoi giuk, om apui-o dai moda’.] ⁴⁵ Bang akod mu no su koowit so ikau momaal nu koraayan, totoko yo om odai. Owarong po sompopodi akod mongimaid so Kinoringan ko’ duo akod nga kosubo so noraka. [ ⁴⁶ So tontong oono yo dai matoi giuk, om apui-o dai moda’.] ⁴⁷ Sungkito om odai yo mato mu no nu koowit so ikau momaal nu koraayan. Owarong po sompopodi mato masuw so Pogkuosaan nu Kinoringan so surga, ko’ duo maam mato nga kosubo so noraka. ⁴⁸ So tontong oono yo dai matoi giuk, om apui-o dai moda’. ⁴⁹ Kosonsora’an-o yo su poidu’ nu koraayan kiat so lobuw poimaid, soko asin koimbarong nu ingkookan iri niusaa’ so Kinoringan. ⁵⁰ Bang malo yo asin-o, d’ado yo sono kosudaan. Soko ono ya pudi kou mompomaid Ku. Bang dadan kou mualod, ado yo sono kosudaan. Indadi, adang-o mualod, nga pususulut kou yo,” koo.

¹ Noopod iri mulaiwo yo si Yisus kiat dii om miano yo so wonuo nu Yudia so diipau nu Bowang Yurdan. Muimpugo yo sono lobuw suang dii so Iyo om soko koopotan, tumugulo yo Iyo montuduk. ² Lumogaa yo sono tinu-tinu lobuw Parisi monginam so Iyo nu, “Mongowaid nu Ukum ni Musa, kowasa ya ka paada’ nu sawo?” koo. ³ Sumombuto yo Iyo nu, “Onu ka ponuu’an ni Musa so kou?” koo. ⁴ Sumombuto yo nosiro nu, “Minongolila’ si Musa nu lobuw paada’ nu sawo ong monaak-a nu surat kopuoda’an,” koo nosiro. ⁵ Nga mutongaro yo si Yisus so nosiro nu, “Linila’an kou ni Musa paada’ nu sawo so’ osigor kou. ⁶ Nga togna nu Kinoringan minongurug nu lobuw, kuwai notangar nu, ‘Kinoringan-o su minongurug nu lobuw tu, pinopupinaa nu kusoi om woinoi,’ koo iri. ⁷ ‘Ono yo ko’ koputondiang kusoi nu ino amo niyo om muido molak nu sawo niyo no, ⁸ om ourug nosiro nu soko ido yo koyuwan,’ koo ri. Okon-o sono ko duo po koyuwan, nga ido yo. ⁹ Ono yo ko’, onu yo po pinopuido yo nu Kinoringan, dai kowasa popusondiangon nu lobuw,” koo si Yisus. ¹⁰ Nokouli’ nosiro, mongoduato yo mompomaid Niyo ri suat nu iri. ¹¹ Mutongaro yo sono si Yisus so nosiro nu, “Kusoi paada’ nu sawo niyo no om montun nu woinoi sondiang, nokolapa’ yo so sawo niyo no. ¹² Soko ono ya pudi woinoi. Bang niada’ niyo nu sawo niyo no, om montun nu kusoi sondiang, nokolapa’ ya,” koo. ¹³ Minongowit lobuw nu kololaingan dii si Yisus su’ topopon Niyo ulu nosiro ri mongoborakat, nga inungotan nosiro nu mompomaid Niyo ri. ¹⁴ Nosiou iri ni Yisus, mungoto yo Iyo om mutongaro yo so nosiro nu, “Posimaidi muyu ya kololaingan oono lumoga’ tuui so Aku! Kodi muyu ya pogoso so’ kolobuwan-o nu soko itu su koirasa nu kosonangan so Pogkuosaan nu Kinoringan. ¹⁵ Ondomo muyu yo, isai dai monorima’ nu pontudukan Ku no soko kololaingan iitu, dai koirasa nu kosonangan so Pogkuosaan nu Kinoringan,” koo. ¹⁶ Koromi yo ni Yisus kololaingan-i, om onido yo Niyo monopop ulu nosiro ri mongoborakat. ¹⁷ Laid ni Yisus manou-panou-i, mundak-undak ido omulok lumogaa dii so Iyo. Sumurukudo yo iyo so tiningkuangon ni Yisus om mutongaro yo nu, “Oo Guru owarong, onu ka mupatut goma’on ku su’ kikowiawan aku musingkolaid?” koo. ¹⁸ Sumombuto yo Iyo nu, “Nokuro ka su pokoworongon mu Aku? D’ado ido owarong sondiang ko Kinoringan. ¹⁹ Tantu oilaan mu ponuu’an nu Kinoringan nu, ‘Adang momatoi, adang lumapa’, adang monakou, adang monimbaal, adang mongaakal, om orumato yo ino amo mu,’ koo ri,” koo. ²⁰ Sumombuto yo omulok iiri nu, “Oo, kiawi’ ponuu’an oono winaid ku yo kiat koworos ku,” koo. ²¹ Siowi yo iyo ni Yisus maid nu oluluudan om mutongaro yo nu, “Ido po suu’ oogot waalon mu, ono yo panou-o, wolii yo kiawi’ orata’ mu no, om taaki orogo no so lobuw omiskin, su’ kaalap ko nu orata’ kiat so Kinoringan nu dai musiba’. Oopod ono pululi’ yo tuui om waid-o so Aku!” koo si Yisus. ²² Norongou-o po nu omulok iiri tinangar ni Yisus, mulaiwo yo iyo maid nu oogutan, so’ sobana ko doyaan iyo. ²³ Siowi yo ni Yisus mompomaid Niyo ri om mutongaro yo nu, “Tongaron Ku kou nu, orogon sobana lobuw doyaan osongapan nu Kinoringan,” koo. ²⁴ Noiranan sono mompomaid Niyo ri nu tinangar Niyo iiri, nga mutongaro yo Iyo koimbagu nu, “Oo inonakan Ku, orogon sobana sumiliw nu songapan nu Kinoringan! ²⁵ Oruoi po unta sumuluw so uang nu lawus, ko’ lobuw doyaan osongapan nu Kinoringan,” koo. ²⁶ Norongou-o po nu mompomaid Niyo pinutangar Niyo iiri, noiranan nosiro om mududuato yo nu, “Bang soko ono, isai yo su osopulan nu Kinoringan?” koo. ²⁷ Siowi yo ni Yisus nosiro om mutongaro yo nu, “Bang lobuw-a dai kopongurug nu ono, nga Kinoringan, kopongurug nu kiawi’,” koo. ²⁸ Mutongaro yo sono si Pitrus nu, “Nga onu koo ka so kai nu nopoogol-o nu onu yo po om minaid so Ikau?” koo. ²⁹ Sumombuto yo si Yisus nu, “Isai yo po nopoogol-o nu waloi, kosusulodan woinoi kusoi, ino amo, inonakan, intawa umo niyo om mongowaid so Aku om Abar Owarong kiat so Kinoringan, ³⁰ lobuw oono kotorima’ inggatus koosuang nu waloi, kosusulodan, ino, inonakan, umo pudi pona osonsara’, om kikowiawan po musingkolaid ong wagu. ³¹ Nga osuang lobuw nu ono sono tu kipangkat ourug nu d’ado pangkat, om lobuw d’ado pangkat-o ourug nu kipangkat,” koo si Yisus. ³² Manou-panou-o sono si Yisus om mompomaid Niyo ri sundur so Yirusalim. Si Yisus so pinoguluon om ginumawa sono mompomaid Niyo ri, om ongo lobuw so tinoudion nosiro ri nga linumaa’. Insan po inowit Niyo opulu om duo mompomaid Niyo ri sumondiang monuturan ong onu ourug so Iyo ong wagu nu, ³³ “Rongowo muyu yo! Kosiono sundur toko so Yirusalim. Dii yo ikomouli’ Aku, Anak nu Riniba, so ongo wowaidon nu imam om moomontuduk nu Ukum, om ukumon nu potoyon. Opupus ono, ikomouli’ Aku so kolobuwan okon ko Yaudi. ³⁴ Nosiro yo su monoruru, mononsara’ om momatoi so Aku, nga so kotolu no oluli’an Aku ya,” koo. ³⁵ Rumonio yo sono si Yakubus om si Yuanis anak ni Jibidius dii si Yisus mutangar nu, “Oo Guru! Kuwai indomoon mai nu waalon Mu so kai,” koo. ³⁶ Duato yo ni Yisus nosiro nu, “Onu ka indomoon muyu waalon Ku so kou?” koo. ³⁷ Sumombuto yo nosiro nu, “Moingin kai musompodi ya mogom so obi’ Mu no ong mogkuasa Ko yo soko raja ong wagu,” koo. ³⁸ Mutongaro yo Iyo so nosiro nu, “Kou kondiri dai koilo ong onu indomoon muyu oono. Kotaan kou ya ka mongirasa nu kosonsora’an Ku no?” koo. ³⁹ “Oo! Kotaan-a,” koo nosiro. Mutongaro yo Iyo so nosiro nu, “Koirasa ya nai’ pudi kou nu kosonsora’an Ku oono. ⁴⁰ Nga suat so isai su koogom umpak so gibang wanan Ku, okon ko Aku su monantu, ono ya nga Kinoringan, Amo Ku so surga no,” koo. ⁴¹ Norongou-o po nu opulu koyuwan wokon mompomaid Niyo ri inindamo nu duo musulod iiri, ungoti yo nosiro. ⁴² Pagka soko iri, paawo yo ni Yisus nosiro kiawi’ om mutongaro yo nu, “Oilaan muyu nu ongo wowaidon so wonuo tu iri dai kotondu’ nu Kinoringan, osokakan mogkuasa so poranak nosiro. ⁴³ Nga adang kou yo soko ono. Ono ya nga, bang kuwai so kou mokipopangkat, subai muripon so inong niyo. ⁴⁴ Om bang kuwai so kou mokisisiliw nu wowaidon, subai musimbaba’ mugogoma’on suat so inong niyo. ⁴⁵ Soko Aku, Anak nu Riniba, linumoga’ so wonuo tu okon ko monguripon, ono ya nga muripon, minonganggur matoi mongolukat nu lobuw suang,” koo. ⁴⁶ Nokologa’ yo sono si Yisus om mompomaid Niyo ri so bandar Yiriku. Iya nosiro lumombus kiat dii, osuang lobuw minaid so nosiro. Kuwai ido koyuwan bolou moomokisodaka mogom-ogom so isan nu lalan-i, ngaran niyo si Bartimius anak ni Timius. ⁴⁷ Norongou-o po niyo nu si Yisus, lobuw Najarit, tumalib iiri, gumonsoko yo iyo nu, “Oo Yisus, Mongkupu ni Raja Daud! Luluudi aku yo,” koo. ⁴⁸ Sowoyo yo iyo nu lobuw suang dii ri, nga sumangat nai’ iyo gumonsok nu, “Oo Mongkupu ni Raja Daud! Luluudi aku yo!” koo. ⁴⁹ Mintorono yo si Yisus om mutongaro yo nu, “Soginaa muyu yo lobuw bolou oono,” koo. Soginaa yo sono nosiro om tongaro yo iyo nu, “Posonango yo inawo mu no! Undii yo, soginaan ko ni Yisus,” koo. ⁵⁰ Luuso yo niyo sabung niyo okapal-i, om mogtuui mundiio yo mian dii si Yisus. ⁵¹ Duato yo ni Yisus lobuw bolou iiri nu, “Onu ka koinginan mu?” koo. Sumombuto yo lobuw bolou-i nu, “Oo Guru! Moingin aku kosiou,” koo. ⁵² Mutongaro yo Iyo nu, “Pagka nopoimaid ko, opoli’an ko yo. Panou-o!” koo. Iya ya iiri, kosiou-o sono iyo om maido yo so si Yisus.

¹ Nokologa’ nosiro so bandar Bitpagi so Bulud Jaitun, orani yo so Yirusalim, suuo yo ni Yisus duo mompomaid Niyo ri popogulu, ² om kodawi yo Niyo nu, “Ian kou yo so kampung so sunduron muyu no. Kologa’ kou yo po nai, kosiou kou nu ido anak nu koladai mogos-kogos, dai po insan ogondaran. Uyadi muyu koladai oono, mongowit tuui. ³ Bang duaton kou nu lobuw nu, ‘Kuraan muyu ka nu ono?’ koo, sombuti muyu ya nu, ‘Kuwai pomokayan nu Tuhan, om niuli’ ya niyo osikap,’ koo ya muyu ya,” koo. ⁴ Momponowo yo duo mompomaid Niyo iiri, om nokosiou-o sono nu koladai mogos-kogos so pintu nu waloi so imbing nu lalan, om uyadi yo nosiro. ⁵ Mongoduato yo lobuw mundii-dii ri so nosiro nu, “Nokuro ka su uyadan muyu koladai oono?” koo. ⁶ Sombuti yo nosiro lobuw-i nu soko iri nikodau ni Yisus so nosiro ri. Potuudi yo sono nosiro nu lobuw-i mongowit nu koladai-i. ⁷ Nokologa’ nosiro dii si Yisus, lopiki yo nosiro likud nu koladai-i nu sabung nosiro ri om gumondaro yo Iyo. ⁸ Osuang lobuw nopokokar nu sabung nosiro so lolanan ni Yisus, om wokon-i nopokanat nu raan nu kayu oiyau po. ⁹ Lobuw suang manou-panou so pinoguluan om so tinoudian Niyo ri songgonsok-gonsok nu, “Royowon-o Kinoringan! Oborokatan-o Iyo, ono sinuu’ nu TUHAN Kinoringan-o! ¹⁰ Oborokatan-o pogkuosaan Niyo so sunduron tu, pogkuosaan ni Raja Daud, iri aki toko ri! Royowon-o Kinoringan so polak Niyo so surga!” koo nosiro. ¹¹ Nokologa’ yo po si Yisus so Yirusalim, mosuwo yo Iyo so Waloi Maayo nu Kinoringan-i. Minonomburorou Iyo so pililiwut-i, nga pagka tumuong-o, miano yo Iyo om mompomaid Niyo ri so Bitania. ¹² Susuab-i, laid nosiro manou-panou kiat so Bitania, winitilon si Yisus. ¹³ Orawu’ po, nokosiou Iyo nu nunuk, oguwun roun-i. Miano yo sono Iyo so puun-i, mongimpa’ nu kibua’ ko’ d’ado. Nga, nokologa’ Iyo, d’ado ya nosiou Niyo nu bua’, sondiang ko roun-o, so’ iya iiri okon po ko poomubua’an nu nunuk. ¹⁴ Indadi, sumpai yo sono Niyo nu, “Kiat kosiono d’ado yo sono lobuw kookan nu bua’ mu no!” koo. Norongou-a nu ongo mompomaid Niyo ri tinangar Niyo iiri. ¹⁵ Nokologa’ yo sono nosiro so Yirusalim, om miano yo koimbagu si Yisus so Waloi Maayo nu Kinoringan. Susubo yo sono Niyo lobuw muwowoli-woli ri. Iniob Niyo su mija pongogonti’an nu siin om oogoman nu poowoli nu asang. ¹⁶ Om ido pona koyuwan nga dai lila’an Niyo mongowit nu onu-onu ya tumalib so natad nu Waloi Maayo nu Kinoringan iiri. ¹⁷ Montuduko yo Iyo nu lobuw dii ri nu, “Nokosurat-o so Buuk nu Kinoringan totongaron Niyo nu, ‘Waloi Ku no yo po nga poomogdu’aan nu kiawi’ bansa,’ koo ri, nga inurug muyu sono nu sususutan nu moonakou” koo si Yisus. ¹⁸ Linumaa’ sono so si Yisus ongo wowaidon nu imam om moomontuduk nu Ukum nokorongou nu tinangar Niyo ri, so’ kiawi’ lobuw-i nopudik nu pontudukan Niyo ri, om iri yo sono su pounayan nosiro modium nu kopatoi-patoi so Iyo. ¹⁹ Mintutuong-i, lumobuso yo Iyo om mompomaid Niyo ri kiat so bandar iiri. ²⁰ Susuab koimbagu ri, laid nosiro tumalib so puun nu nunuk-i, siowi nosiro su nolonot-o sampai so wakat-i. ²¹ Noondoman sono ni Pitrus nourug nu runat nokotalib-i. Mutongaro yo sono iyo so si Yisus nu, “Oo Guru! Siowi po bo nunuk sinumpaan Mu no ri nga linumonot-o!” koo. ²² - ²³ Sumombuto yo si Yisus nu, “Bang otoroido kou nai’ poimaid, kopomaal kou ya nu soko winaal Ku oono. Om okon ko ono ya, nga koponuu’ kou po nu bulud iitu no nu, ‘Kakat-o su bulud om tobung so raat-o,’ koo, om tantu ourug-a ono. ²⁴ Ono yo ko’ ondomo muyu yo itu nu bang mogdu’a kou nu mindamo, poimaid kou yo nu onu yo po indomoon muyu taakan kou ya nu Kinoringan. ²⁵ Om bang mogdu’a kou om kakal po mungot kou so inong lobuw, ompuno muyu po laid lobuw oono, su’ kou nga ompunon-a nu Kinoringan so surga. [ ²⁶ Nga bang dai kou mongampun nu lobuw kikoraayan so kou, Amo muyu so surga no nga dai ya mongampun so kou,” koo.] ²⁷ Mululio po nosiro so Yirusalim. Laid ni Yisus manou-panou tumutuk so natad nu Waloi Maayo nu Kinoringan-i, lumogaa yo dii so Iyo ongo wowaidon nu imam, moomontuduk nu Ukum, om wowaidon nu lobuw Yaudi ri, ²⁸ mongoduat nu, “Isai ka so kopogboya’an Mu momaal nu kiawi’ oono? Isai su minonuu’ so Ikau momaal nu ono?” koo. ²⁹ Sumombuto yo Iyo nu, “Aku nga mongoduat-a so kou. Bang osombutan muyu ya, sombutan Ku nai’ kou. ³⁰ Isai so kopogboya’an ni Yuanis mongodiu’ nu lobuw, Kinoringan ko’ lobuw?” koo. ³¹ Muupokato yo sono nosiro ong onu nisambut nu, “Bang tongaron toko nu, ‘Kiat so Kinoringan,’ koo toko, sombutan Niyo nu, ‘Bang soko ono nokuro su dai kou poimaid so iyo?’ koo ono. ³² Nga bang tongaron toko nu, ‘Kiat so lobuw,’ koo toko, lobuw suang su kolaa’an toko, so’ nosiro kiawi’ monokod nu si Yuanis-o po poo’abar nu Kinoringan,” koo. ³³ Pagka soko iri, sombuti yo nosiro nu, “Dai mai oilaan,” koo. Mutongaro yo sono si Yisus nu, “Bang soko ono, Aku nga dai ya mongaabar so kou nu inungkiaton nu kopogboya’an Ku momaal nu kiawi’ oono,” koo.

¹ Tumugulo yo si Yisus monalig-salig so ongo wowaidon nu imam, moomontuduk nu Ukum, om wowaidon nu lobuw Yaudi ri nu, “Ido koyuwan minomulo nu anggur, om rininding niyo pililiwut-i nu watu. Noopod iri minonguang iyo nu poomoga’an nu anggur om minomaal nu bosalag opangkat poongipatan. Noopod iri, niposiwa sono niyo tonoman oono so tinu-tinu koyuwan om murongkato yo so tontong sondiang. ² Nologa’ yo po poongotu’an nu bua’ nu anggur, monuuo yo sono songapan nu anggur oono nu ido kukumoraja niyo ri mian so pinosiwaan nu anggur-i mongalap nu boogian niyo. ³ Nga okomo yo nosiro kukumoraja oono om lubako yo, om suuo yo pouli’ d’ado owit-owit. ⁴ Monuuo yo songapan nu anggur oono nu kukumoraja niyo wokon, nga lubako yo ulu niyo ri nu pinosiwaan-i, om susubo yo. ⁵ Monuuo po songapan nu anggur oono nu kukumoraja niyo wokon, nga pinatoi nai’ nosiro kukumoraja iiri, om soko ono ya gama’ nosiro nu kukumoraja wokon. Kuwai yo linubak om kuwai ya pinatoi. ⁶ Indadi, ido po sono koyuwan, iri anak niyo kosomodan niyo ri. Suuo yo sono niyo anak oono mian so pinosiwaan nu anggur-i nu, Tantu orumaton-a nosiro ong anak ku no, koo so inawo niyo. ⁷ Nga muupokato yo pinosiwaan nu anggur-i nu, ‘Iyo yo su kopusaka nu tana’ iitu. Potoyo toko iyo su’ osongapan toko pusaka niyo no!’ koo nosiro. ⁸ Okomo yo nosiro anak oono om potoyo yo om odai yo nosiro bangkai niyo ri so dilabus nu tonoman nu anggur-i,” koo. ⁹ Mongoduato yo sono si Yisus so nosiro nu, “Bang muli’ songapan nu tonoman iiri, onu waalon niyo so pinosiwaan niyo nu tonoman-i? Potoyon niyo lobuw ongo roraai oono, om niposiwa sono tonoman oono so lobuw sondiang. ¹⁰ Tantu nokobasa’ kou yo so Buuk nu Kinoringan nu, ‘Iri watu niada’ nu moomuwaloi, oogot po nai’ kosudaan ko’ kiawi’ watu so waloi oono. ¹¹ Itu yo su gogoma’on nu TUHAN nu sobana ko owarong,’ koo ri,” koo si Yisus. ¹² Norongou-o po nu ongo wowaidon nu imam, om lobuw Parisi ri salig-salig ni Yisus, noorotian-o nosiro nu nosiro yo su kuanon nu tangar Niyo ri. Nga pagka lumaa’ nosiro nu lobuw suang-i, minulaiw-a sono nosiro. ¹³ Tinu-tinu lobuw Parisi om wokon kiat so puimpugan ni Irudis sinuu’ mongoburunsut so si Yisus nu ongo duduat. ¹⁴ Lumogaa yo nosiro dii so Iyo om mutongaro yo nu, “Oo Guru, oilaan mai nu Ikau-o po otulid inowoon. Montuduk Ko suat so koinginan nu Kinoringan goma’on nu lobuw, om dai Ko moominig. Pagka soko ono, obari kai yo nu, mongowaid nu Ukum ni Musa, kowasa toko ya ka mongobarai nu sukai so Raja Maayo nu Ruum, ko’ dai?” koo. ¹⁵ Noilaan-a Niyo padu-padu oraai nosiro iiri, mutongaro yo sono Iyo nu, “Oo su lobuw musingkopoimaid-poimaid. Nokuro su mongoburunsut kou so Aku? Posiowo muyu Aku nu siin pongobarai muyu nu sukai-o!” koo. ¹⁶ Taaki yo Iyo nosiro songkaping siin pirok. Mongoduato yo Iyo nu, “Isai ka so gambar om ngaran iitu no?” koo. Sumombuto yo nosiro nu, “Gambar om ngaran nu Raja Maayo nu Ruum,” koo nosiro. ¹⁷ Mutongaro yo sono Iyo nu, “Bang soko ono, taaki muyu yo so Raja Maayo nu Ruum songapan niyo no, om so Kinoringan songapan Niyo no,” koo. Noiranan nosiro nu tinangar Niyo ri. ¹⁸ Tinu-tinu koyuwan kiat so puimpugan nu lobuw Saduki linumoga’ dii si Yisus. Lobuw Saduki dai poimaid nu oluli’an lobuw minatoi. ¹⁹ Musingkoduat-duato yo sono nosiro so Iyo nu, “Oo Guru, minonurat si Musa nu ukum iitu no so toko nu, ‘Bang kuwai ido kusoi matoi om d’ado po anak, sulod niyo no subai montun nu balu niyo oono su’ kisolusuk iyo,’ koo. ²⁰ Indadi, gulu ri, kuwai turu sonsulod. Ongko bana ri minontun, om minatoi d’ado anak. ²¹ Koduo ri minontun nu balu niyo ri, nga minatoi-a pudi iyo d’ado anak. Soko ono ya pudi kotolu ri, ²² sampai so koturu ri. Balu iiri nga minatoi-o sono. ²³ Runat koluli’an nu lobuw minatoi, isai ka sono sawo nu woinoi iiri, so’ koturu-turu nu sonsulod iiri nokoontun-o so iyo?” koo nosiro. ²⁴ Sumombuto yo si Yisus nu, “Sobana ko dai musuat pomikiran muyu so’ dai kou koorati nu pontudukan so Buuk nu Kinoringan intawa onu yo po owaal Niyo. ²⁵ Mutangar Aku soko ono so’ lobuw minatoi-o, oluli’an po dai yo sono montun, soko susuu’on nu Kinoringan so surga. ²⁶ Om suat so lobuw oluli’an, dai kou po ka nokobasa’ so Buuk sinurat ni Musa suat so sinupot mikit-sikit iiri? Nokosurat so buuk oono totongaron nu Kinoringan so si Musa nu, ‘Aku yo su Kinoringan usaa’on ni Abraham, ni Isak, om ni Yakub,’ koo ri. ²⁷ Kinoringan oono okon ko Kinoringan nu lobuw minatoi, nga Kinoringan nu lobuw miau. Sobana ko nosala’ kou!” koo si Yisus. ²⁸ Lumogaa yo sono ido moomontuduk nu Ukum mongkinongou nu putongar-tongaran ni Yisus om ongo lobuw Saduki ri. Noilaan nu moomontuduk nu Ukum iiri nu nosuat sobana sambut ni Yisus. Indadi, mongoduato yo sono iyo so si Yisus nu, “Ombo ka nu ponuu’an oogot po ko’ kiawi’ ponuu’an?” koo. ²⁹ Sumombuto yo si Yisus nu, “Itu yo su ponuu’an oogot sobana, ono yo, ‘Oo su lobuw Israil, rongowo muyu yo! Ido-ido ya Kinoringan toko, ado yo sondiang. ³⁰ Somodi yo Kinoringan nu otoroido inawo, pomikiran om gogoma’on muyu,’ koo ri. ³¹ Soko ono ya ponuu’an koduo, ono yo, ‘Somodi yo inong muyu, soko poonamod nu kondiri,’ koo ri. D’ado yo ponuu’an wokon oogot po ko’ duo ponuu’an oono,” koo. ³² Mutongaro yo sono moomontuduk nu Ukum iiri so Iyo nu, “Oo Guru, osuat sobana tinangar Mu no. Kinoringan toko ido-ido ya, om d’ado yo sondiang. ³³ Lobuw subai monamod nu Kinoringan nu otoroido inawo, so pomikiran om gogoma’on niyo. Om subai monamod-a iyo nu inong niyo soko monamod nu kondiri. Owarong po ono ko’ niusaa’ nu tunuan om niusaa’ wokon so Kinoringan,” koo. ³⁴ Noilaan ni Yisus nu nosuat sobana sambut nu moomontuduk nu Ukum iiri. Mutongaro yo sono Iyo nu, “Ogon-ogon ko yo osongapan nu Kinoringan,” koo. Noopod iri d’ado yo sono kooku’ mongoduat so si Yisus. ³⁵ Laid ni Yisus montuduk so Waloi Maayo nu Kinoringan-i, mongoduato yo Iyo nu, “Onu koo ka ongo moomontuduk nu Ukum mutangar nu ono yo po Raja Nijanji nu Kinoringan-o solusuk ni Raja Daud? ³⁶ Si Daud kondiri tinudukan nu Atod nu Kinoringan, minutangar soko itu nu, ‘Minutangar TUHAN Kinoringan so Tuhan ku nu, Ogom-o umpak so wanan Ku, om kiawi’ alod-alod Mu no ipodoog Ku so Ikau!’ koo ri. ³⁷ Nosala’ moomontuduk nu Ukum oono so’ tokodon nosiro nu Raja Nijanji nu Kinoringan oono, solusuk-a ni Raja Daud, so’ si Daud kondiri momaau nu Raja Nijanji nu Kinoringan oono nu ‘Tuhan ku’,” koo si Yisus. Noondayan sobana lobuw suang-i mongkinongou so Iyo. ³⁸ Mutongaro yo si Yisus so nosiro nu, “Ingat-ingat kou yo nu ongo moomontuduk nu Ukum. Ototom nosiro manou-panou musabung nu olanggau om mokiorumaton so pasar. ³⁹ Momili’ nosiro nu oogoman nu lobuw kipangkat so koimpug-impugan intawa so waloi sosombooyangan. ⁴⁰ Ongo balu nga okalan om solodan nosiro nu waloi om mogdu’a nai’ nu olanggau, pongolikup nu koraayan nosiro. Nga ono yo su koowit nu ukuman nu owogat sobana so nosiro,” koo si Yisus. ⁴¹ Insan minogom si Yisus so obi’ nu poianan nu siin so Waloi Maayo nu Kinoringan, mongudio nu ongo lobuw paasuw nu siin dii. Ongo lobuw okaya ri nopaasuw nu siin osuang. ⁴² Lumogaa ya ido balu omiskin nopaasuw nu duo yo nokaping siin tombaga, omura sobana. ⁴³ Soginaa yo ni Yisus mompomaid Niyo ri om mutongaro yo nu, “Orotio muyu yo itu. Osuang po siin niasuw nu balu omiskin oono ko’ siin niasuw nu lobuw wokon-o. ⁴⁴ Mutangar Aku soko ono, so’ nosiro yo po potaak nu ombo olu’-olu’ nu orata’ nosiro no, nga balu oono, pudi pona omiskin, nitaak-a niyo onu yo po kuwai so iyo no, ono poomoli niyo nu kowiwiau-o,” koo.

¹ Lumabus si Yisus so Waloi Maayo nu Kinoringan-i, mutongaro yo ido mompomaid Niyo ri so Iyo nu, “Oo Guru, siowi po bo waloi maayo oono. Udioo watu no, okon ko nogina-gina nu koowarong!” koo. ² Sumombuto yo si Yisus nu, “Monsiou ko gaam nu ongo waloi maayo oono! D’ado ido nu watu pinomaal nu ono oolu’ so pinopolakan-o. Kiawi’ nga uyason,” koo. ³ Miano yo si Yisus mogom so timpak nu Bulud Jaitun so otingkuangan nu Waloi Maayo nu Kinoringan. Lumogaa yo sono si Pitrus, Yakubus, Yuanis om si Andrias mokimutangar-tangar so Iyo siro ya siro nu, ⁴ “Tuturani kai yo ong sombiya ourug ono, om onu ponondu’an nu ologa’ yo ono,” koo. ⁵ Sumombuto yo si Yisus nu, “Ingat-ingat kou yo su’ dai kou ookalan nu lobuw. ⁶ Mutangar Aku soko ono so’ osuang lobuw lumoga’ ong wagu mongaakal nu, ‘Aku yo su Raja Nijanji nu Kinoringan,’ koo. ⁷ Korongou kou nu ugod-ugod mualod om puobaran nu muwiwintos, nga ikod kou yo kilaa’. Subai ourug kiawi’ oono nga okon po ko sonduun-duun pongoowi’an nu wonuo tu. ⁸ Ido bansa lumawan nu bansa wokon, om bansa so ido tontong muimpolanu mualod. Siombo-ombo nga kilikop om gumunggun su tana’. Kiawi’ nu ono ponimpuunan nai’ nu kosonsora’an, soko woinoi ingoton nu mokipupuanak-o. ⁹ Indadi koingat-ingato muyu yo, so’ kou yo po ono okomon om owiton so poomubisora’an. Kou kiawi’ lubakon so ongo waloi sosombooyangan. Owiton kou tumingkuang so ongo lobuw kikopogboya’an om raja, so’ mongowaid kou so Aku. Om ono yo su kosiwatan muyu potuturan so nosiro nu Abar Owarong kiat so Kinoringan. ¹⁰ Subai niabar po Abar Owarong oono so kiawi’ bansa. ¹¹ Bang okomon om owiton kou so poomubisora’an, adang-o gumagau onu tongaron muyu. Ologa’ yo putongaran, tongaro muyu ya onu nikoilo so kou nu iya oono, so’ totongaron muyu nu iya oono okon ko totongaron muyu kondiri, nga kiat so Atod nu Kinoringan. ¹² Kuwai lobuw monindoraai nu sulod niyo nu potoyon. Soko ono ya pudi amo so anak. Inonakan lumawan nu ino amo niyo om pokomouli’ so nosiro nu potoyon. ¹³ Kou kiawi’ bisigon nu lobuw so’ mongowaid kou so Aku, nga isai yo po tumaan mongowaid so Aku sampai so pongoowi’an nu wonuo tu, osopulan iyo,” koo si Yisus. ¹⁴ Mutongaro po si Yisus nu, “Bang osiou muyu yo ‘Koobisigan nu Kinoringan’ nu sobana ko dai otoop nitou’ so Waloi Maayo nu Kinoringan, lobuw so Yudia nu iya oono, subai mulaiw so kobubuludan. (Isai yo po mongobasa’, otagon-o itu mongoorati!) ¹⁵ Lobuw mutingongis so taap nu waloi, adang-o muntiba mongalap nu onu-onu ya so rinuang nu waloi-o. ¹⁶ Lobuw mugogoma’on so umo, adang-o muli’ so waloi mongalap nu pokakas. ¹⁷ Iya oono sobana ko kolaa’-laa’ so kowoinoyan momontian, om so woinoi potiti’ po nu anak. ¹⁸ Pogdu’a kou yo su’ dai ono koiya nu kodarun. ¹⁹ Mutangar Aku soko ono so’ koogutan nu iya oono dai po noimboya’an nu isai ya kiat nu nowaal wonuo tu, om dai yo ourug koimbagu. ²⁰ Bang dai poipakon nu Kinoringan iya koogutan oono, tantu d’ado ido osapul. Nga pagka oluluudan Iyo nu lobuw pinili’ Niyo, poipakon-a ono Niyo. ²¹ Indadi, bang mutangar lobuw so kou nu iya oono nu, ‘Siowi muyu, tuui Raja Nijanji nu Kinoringan!’ intawa ‘Dii Iyo!’ koo, kodi muyu yo imaid-o, ²² so’ lumoga’ nu iya oono tinu-tinu moomudut nu nosiro yo Raja Nijanji nu Kinoringan om musingkopoo’abar nu Kinoringan. Mugogoma’on nosiro nu koiran-iran pomalid nu lobuw, om insan lobuw-a pinili’ nu Kinoringan ookalan-a nosiro. ²³ Indadi ondomo muyu yo! Niabar Ku yo ono so kou nu dai po ourug-o,” koo si Yisus. ²⁴ Mutongaro po si Yisus nu, “Dai olaid kiat nu ono, tumuong sono su runat om wulan. ²⁵ Bopuritakan su korombituon om kiawi’ moomogkuasa so puola’an nu kawut om langit tu minsid kiat so pinolakan-o. ²⁶ Iya oono, tumangi’ kiawi’ bansa so wonuo tu ong osiou nosiro Aku, Anak nu Riniba, lumoga’ nosolui nu kawut maid nu kuasa om binaang nu sobana ko otarang. ²⁷ Nipoimpug Ku sono so ongo susuu’on Ku lobuw nopili’ Ku yo, kiat so pilolongkop nu wonuo tu,” koo si Yisus. ²⁸ Mutongaro po si Yisus nu, “Orotio muyu yo iri nunuk, olapon nu poinongan. Bang mutolotad-o om mupusuk-o, oilaan muyu nu oduruk-o mimpuas. ²⁹ Soko ono ya, bang osiou muyu yo nu ourug-o pinutangar Ku oono, oilaan muyu nu oduruk-o loga’an Ku. ³⁰ Ondomo muyu yo nu dai po matoi kiawi’ lobuw nu ono sono tu, ourug-o kiawi’ tinangar Ku oono. ³¹ Lumiong ong tana’ om langit tu, nga tinongaran Ku musingkolaid,” koo. ³² Mutongaro po si Yisus nu, “Soko ono pona, d’ado ido koilo ong sombiya ourug ono sondiang ko Kinoringan Amo so surga. Insan ongo susuu’on so surga om Aku, Anak Niyo kondiri, dai ya koilo nu ono. ³³ Indadi, kimati om mingat-ingat kou yo, so’ dai muyu oilaan ong sombiya ourug ono. ³⁴ Kogoyaan nu iya oono soko ido koyuwan poogol nu waloi niyo om mian so tontong orawu’. Suu’on niyo ongo kukumoraja niyo no nu gogoma’on musosondiang, om mongodau so minongipat nu pintu ri nu matag mingat-ingat. ³⁵ Ono yo ko’, koingat-ingato muyu yo, so’ dai muyu oilaan ong sombiya Aku lumoga’, kalu umpak nu awi-awi, tonga’ nu awi, duruk sumuab, intawa minsosarap. ³⁶ Bang milok po om lumoga’ Aku, adang-o osunsungan kou moturuw. ³⁷ Onu yo po tongaron Ku so kou iitu no, tongaron Ku po so kiawi’ lobuw nu mingat-ingat-o!” koo.

¹ Koduaan po om ologa’ yo Paska om Rami-Rami nu Baang-Baang D’ado Pongombang. Muupokato yo sono ongo wowaidon nu imam om moomontuduk nu Ukum-i ong onu kaakom-akom om kopatoi-patoi so si Yisus, nga pagka osuang lobuw ong Paska, ² mutongaro yo nosiro nu, “Adang toko yo niiya nu Paska so’ kalu rumoraayan ongo lobuw tu,” koo. ³ Laid ni Yisus so Bitania, so waloi ni Simun, iri baya’ binolangon-i, lumogaa yo ido woinoi dii so Iyo minongowit nu pusung kiasuw nu inosak lanung landu boorogo. Laid ni Yisus mongokan-i, isuo yo nu woinoi-i ulu Niyo ri nu iri. ⁴ Nosiou-o po nu ongo lobuw-i ginama’ nu woinoi iiri, minungot sono nosiro, om minutangar nu, “Pusingraagan-a inosak lanung oono! ⁵ Owarong po niwoli ono tolu naatus siin pirok, om orogo no nitaak so lobuw omiskin!” koo. ⁶ Nga mutongaro yo si Yisus nu, “Posimaidan-a iyo! Nokuro su umungot kou so iyo? Mugogoma’on iyo nu owarong bana suat so Aku. ⁷ Sombiya-biya ya koponabang kou nu lobuw omiskin, nga Aku, oduruk-o kotondiang so kou. ⁸ Minomaal-o woinoi iitu no nu onu su ogoosan niyo momaal. Orati yo po nu nopoisu’ iyo so Aku nu inosak lanung-o, nga putimos-timosan niyo nu polobongan so Aku. ⁹ Ondomo muyu yo tangar Ku iitu: Siombo-ombo ya poobaran nu Abar Owarong kiat so Kinoringan so pilolongkop nu wonuo tu, ginama’ nu woinoi iitu nga kotuturan-a nu pongoondoman so iyo,” koo. ¹⁰ Miano yo sono si Yudas Iskariut, ido kiat so opulu om duo mompomaid ni Yisus, so ongo wowaidon nu imam. ¹¹ Osudu’an sobana nosiro mongorongou nu upakat ni Yudas iiri, om minujanji nu taakan iyo nu siin. Kiat-o sono nu iri mogkari’-kari’ yo iyo pokomouli’ so si Yisus so lobuw oono. ¹² Nologa’ yo po ponimpuunan nu Rami-Rami nu Baang-Baang D’ado Pongombang, laid nu ongo lobuw mongogaras nu uyog nu dumba, lumogaa yo ongo mompomaid ni Yisus dii so Iyo mongoduat nu, “Siombo ka koinginan Mu ponodia’an mai nu iinokanon nu Paska?” koo. ¹³ Indadi monuuo yo sono Iyo nu duo koyuwan kiat so nosiro om tongaro yo nu, “Ian kou yo so bandar. Nai kosambat kou nu ido kusoi kiinowit nu sosagob kisungoi. Waid kou yo so iyo. ¹⁴ So waloi osuwan niyo no, tongaro muyu songapan nu waloi-o nu, ‘Minongodau guru mai ri ong siombo pongoromayan Niyo om mompomaid Niyo ri nu Paska,’ koo yo muyu ya. ¹⁵ Tudukan kou ya nu lobuw oono ido bilik maayo so tingkat koduo, nu nosodia’ yo onu-onu ya pokayon mongokan,” koo si Yisus. ¹⁶ Miano yo duo koyuwan iiri so bandar, om dii nooyangan nosiro kiawi’ tinangar ni Yisus so nosiro ri, om sodiaa yo sono nosiro iinokanon nu Paska. ¹⁷ Awi ri, lumogaa yo sono si Yisus om opulu om duo mompomaid Niyo ri so bilik iiri. ¹⁸ Laid nosiro mongokan-i, mutongaro yo Iyo nu, “Pokoiloon Ku kou! Ido koyuwan so kou mongoraai so Aku,” koo. ¹⁹ Olunggui sono mompomaid Niyo ri norongou tinangar Niyo iiri. Mutongaro yo nosiro soro ido-ido so Iyo nu, “Oo Tuhan, tantu okon-a ko aku su kuanon Mu,” koo. ²⁰ Sumombuto yo Iyo nu, “Iyo yo po nga ono yo kopuurung so Aku nu mangkuk-o. ²¹ Matoi Aku ya nai’, Anak nu Riniba, soko tinangar nu poo’abar nu Kinoringan gulu ri nokosurat so Buuk Niyo. Nga aagut-o lobuw mongoraai so Aku no. Gaam nai’ dai iyo nopuanak,” koo si Yisus. ²² Laid nosiro mongokan-i, mongolapo yo si Yisus nu baang-baang om mongunsopoto yo so Kinoringan. Kobi-kobio yo Niyo baang-baang iiri om boogio yo so mompomaid Niyo ri maid nu mutangar nu, “Olapo om okano muyu yo itu! Itu yo su koyuwan Ku,” koo. ²³ Nopupus iri, olapo yo Niyo sawan kiasuw nu anggur-i om mongunsopoto yo so Kinoringan. Taaki yo Niyo iri so mompomaid Niyo ri, om monginumo yo nosiro nu anggur iiri. ²⁴ Noopod iri mutongaro yo Iyo nu, “Itu yo su raa’ Ku, pinonapus nu janji nu Kinoringan. Nituntug ono suat so lobuw suang. ²⁵ Pokoiloon Ku kou nu, kiat kosiono dai yo su monginum nu anggur iitu no musingkoinum toko nu anggur owagu so Pogkuosaan nu Amo Ku,” koo. ²⁶ Nopupus iri, muloguo yo nosiro mongorayou nu Kinoringan. Nokopulagu po, miano yo nosiro so Bulud Jaitun. ²⁷ Mutongaro yo sono si Yisus so mompomaid Niyo ri nu, “Putongiasan muyu Aku mongolaiw ong wagu, so’ nokosurat-o so Buuk nu Kinoringan nu, ‘Potoyon nu Kinoringan wowaidon oono, om mompomaid Niyo no botongiasan mulaiw,’ koo ri. ²⁸ Nga oluli’an Aku ya om mogulu Aku so kou mian so Galilia,” koo. ²⁹ Mutongaro yo si Pitrus so Iyo nu, “Dai! Poogol pona nosiro kiawi’ so Ikau, nga Aku dai ya,” koo. ³⁰ Nga mutongaro yo Iyo so si Pitrus nu, “Ondomo yo! Dai po kopongingkukuuk piu’ no induo nu awi tu, intolu ko yo mongolim nu dai otondu’an mu Aku,” koo. ³¹ Nga sinobana ni Pitrus sumambut nu, “Monganggur aku matoi maid so Ikau, ikod-a nu mongolim aku so Ikau,” koo. Wokon mompomaid-i nga soko iri ya tinangar. ³² Nokologa’ nosiro so ido tontong ingoranan nu Gitsamani, mutongaro yo si Yisus so mompomaid Niyo ri nu, “Ogom kou po tuui. Mian Aku po dii mogdu’a,” koo. ³³ Ingoli yo Niyo si Pitrus, si Yakubus om si Yuanis. Umogutan sobana Iyo om gumagau. ³⁴ Mutongaro yo Iyo so nosiro nu, “Sobana ko maagut inawo Ku no om moipopatoi yo koirosaan Ku. Ogol kou yo tuui om maid kou yo so Aku mingat-ingat,” koo. ³⁵ Rumowu-rowuo po Iyo om sumurukudo yo so tana’ ri mogdu’a tayon ong dai koirasa nu kosonsora’an iiri ong odapat nu, ³⁶ “Oo Amo! D’ado onu-onu dai Mu owaal. Bang moingin Ko, kodi yo poirosai so Aku kosonsora’an iitu, nga okon-a ko koinginan Ku no su ourug, sondiang ko koinginan Mu no ya,” koo. ³⁷ Nopupus iri, mululio yo Iyo dii so nosiro, om nosunsungan Niyo nosiro moturuw. Mutongaro yo Iyo so si Simun Pitrus nu, “Oo Simun! Moturuw ko ka? Insan sonjaam ka, nga dai ko koingat-ingat? ³⁸ Pogdu’a om koingat-ingato muyu yo, su’ dai kou kowaid so ponginaman. Inawo muyu no mokipopomaal dadan nu owarong, nga dai kou kogoos momaal nu ono so’ kou yo po lobuw-a,” koo. ³⁹ Mululio yo Iyo mogdu’a, om iri ya iri tinangar Niyo. ⁴⁰ Nopupus iri, mululio yo Iyo so mompomaid Niyo ri om nosunsungan-a Niyo nosiro moturuw po, so’ sobana ko dinudu’on nosiro. Dai yo sono oilaan nosiro ong onu nisambut so Iyo. ⁴¹ Kointolu po Niyo muuli’-uli’ dii so nosiro ri, mutongaro yo Iyo nu, “Dai kou po ka norios? Siowi muyu yo! Nologa’ yo pokomouli’an so Aku so lobuw oraai. ⁴² Rios kou yo, om kayo toko yo! Orani yo lobuw mongoraai so Aku no,” koo. ⁴³ Dai po nopupus si Yisus mutangar, lumogaa yo si Yudas, ido kiat so opulu om duo mompomaid Niyo ri, minongowit nu lobuw suang, wokon kibosi, wokon kibangkau, om wokon kigayang. Sinuu’ nosiro nu ongo wowaidon nu imam, moomontuduk nu Ukum, om wowaidon nu lobuw Yaudi. ⁴⁴ Pinokoilo laid ni Yudas ongo lobuw iiri nu, “Lobuw singudan ku no, Iyo yo su okomo muyu om ipati muyu kowarong-warong su’ dai kolaiw,” koo. ⁴⁵ Tumorus-o ya si Yudas dii si Yisus om mutongaro yo nu, “Oo Guru,” koo, om singudi yo si Yisus. ⁴⁶ Indadi rumonio yo sono lobuw suang-i mongaakom om mongkogos so si Yisus. ⁴⁷ Ido koyuwan dii minongaawut nu badung om wintoso yo uripon Imam Maayo ri, noutas tolingo ri. ⁴⁸ Mutongaro yo si Yisus so nosiro nu, “Lobuw oraai Aku bo gaam su linumoga’ kou maid nu badung om bangkau mongaakom so Aku? ⁴⁹ Runat-runat montuduk Aku so kou so Waloi Maayo nu Kinoringan, nga dai muyu ya Aku inakom,” koo. ⁵⁰ Nopupus iri, mulaiwo yo kiawi’ mompomaid Niyo ri. ⁵¹ Ido omulok minaid so si Yisus minupindung-a nu kumut oputi’. Pinokiookoman sono iyo nu ongo lobuw-i, ⁵² nga luuso ya niyo kumut-i om mundako yo mulaiw lobas-lobas. ⁵³ Owito yo si Yisus so waloi nu Imam Maayo ri, om nokopuimpug-o dii ongo wowaidon nu imam om wowaidon nu lobuw Yaudi om moomontuduk nu Ukum-i. ⁵⁴ Pagka poki’iimpotongan ni Pitrus ong onu koompusan so si Yisus, sumuuto yo iyo so natad nu waloi nu Imam Maayo ri, om mogomo yo mintarang maid nu moongipat nu waloi oono. ⁵⁵ Mogkari’-kari’ ongo wowaidon nu imam, om kiawi’ wokon so Poongobisora’an nu Ugama ri modium nu pounayan mongukum so si Yisus nu potoyon, nga dai muad kooyang nosiro. ⁵⁶ Osuang lobuw sinogina monimbaal suat so Iyo, nga simbaalan nosiro ri musosondiang. ⁵⁷ Mundiio yo sono tinu-tinu koyuwan monimbaal so Iyo nu, ⁵⁸ “Baya’ mai norongou Iyo minutangar nu, ‘Uyason Ku Waloi Maayo nu Kinoringan winaal nu lobuw, om so kotolu no momaal Aku nu sondiang okon ko winaal nu lobuw,’ koo Iyo,” koo nosiro. ⁵⁹ Nga simbaalan nosiro ri musosondiang. ⁶⁰ Mundiio yo sono Imam Maayo ri om duato yo si Yisus nu, “Dai Ko ya ka sumambut nu topudan so Ikau-o?” koo. ⁶¹ Nga minukokop nai’ si Yisus. Tongaro po Iyo nu Imam Maayo ri nu, “Bontolo yo paabar so kai ong Ikau-o su Raja Nijanji nu Kinoringan, ono yo Anak nu Kinoringan roroyowon mai,” koo. ⁶² Sumombuto yo Iyo nu, “Nosuat mu bana mutangar. Pagka soko ono, kiat kosiono poimaid kou yo nu osiou muyu Aku ong wagu mogom umpak so wanan nu Kinoringan, om osiou muyu Aku lumoga’ koimbagu so wonuo tu nosolui nu kawut,” koo. ⁶³ Pisi’-pisio yo sono nu Imam Maayo ri pokakas niyo ri om mutongaro yo nu, “Dai muru’ modium nu wokon lobuw monapud so Iyo, ⁶⁴ so’ kou kiawi’ nokorongou-o nu tinangar Niyo no mongusiba’ nu Kinoringan. Indadi, onu dikou pomikiran kosiono?” koo Imam Maayo ri. Minonantu yo sono nosiro nu kisala’ si Yisus om otoop potoyon. ⁶⁵ Tumugulo yo sono tinu-tinu koyuwan mongodura’, monombol nu mato, om mongolubak so Iyo, om mutangar nu, “Tokodo yo ong isai monampar so Ikau-o,” koo. Ongo moongipat-i nga minonampar-a so si Yisus. ⁶⁶ Laid ni Pitrus so natad nu waloi nu Imam Maayo ri, lumogaa yo sono ido woinoi uripon nu Imam Maayo ri. ⁶⁷ Nosiou-o po niyo si Pitrus mintarang dii, potongi yo niyo monsiou buatan ni Pitrus om mutongaro yo nu, “Okon ka ko ikau nga una’ ya ni Yisus, lobuw Najarit-i?” koo. ⁶⁸ Nga mongolimo yo si Pitrus nu, “Dai ku oorotian tongaron mu no,” koo. Miano yo sono si Pitrus so pintu nu galang nu natad-i, om iya iiri mongingkukuuko yo su piu’. ⁶⁹ Siowi po iyo koimbagu nu roraa iiri om mutongaro yo so lobuw dii ri nu, “Iyo oono, tantu una’ ya nosiro,” koo. ⁷⁰ Nga minongolim-a si Pitrus. Dai po olaid, mutongaro yo ongo lobuw dii ri so iyo nu, “Tantu ikau iitu kouna’an nosiro, so’ ungkiat ko ya so Galilia,” koo. ⁷¹ Mutongaro yo iyo maid nu mongibot nu, “Dai ku otondu’an lobuw oono,” koo. ⁷² Soko iri po, mongingkukuuko yo koinduo piu’ ri. Noondoman-o sono ni Pitrus tinangar ni Yisus so iyo ri nu, “Tadi’ mongingkukuuk piu’ no induo, ong intolu ko yo mongolim nu dai otondu’an mu Aku,” koo ri. Monginoontobo yo sono iyo tumangi’.

¹ Susuab-i, muupokato yo sono ongo wowaidon nu imam, wowaidon nu lobuw Yaudi, om moomontuduk nu Ukum-i. Kogosi yo nosiro si Yisus, om owito yo pokomouli’ dii si Pilatus. ² Nokologa’ si Yisus dii si Pilatus, duato yo niyo si Yisus nu, “Raja Ko ka nu lobuw Yaudi?” koo. “Oo. Bana ya tangar mu no,” koo si Yisus. ³ Ongo wowaidon nu imam-i nga monapud-a so Iyo. ⁴ Mongoduato po si Pilatus so Iyo nu, “Soko ono yo kosuang topudan nosiro so Ikau. Nokuro su dai Ko sumambut?” koo. ⁵ Nga dai ya muad sinumambut Iyo sampai noiranan si Pilatus. ⁶ Koopotan, koduung Paska, polabus si Gobonor Pilatus ido koyuwan kiat so jiil, mongowaid nu koinginan nu lobuw suang. ⁷ Iya iiri, ido koyuwan obantug koraayan ingoranan so si Barabas nojiil maid nu wokon moomatoi om lulumawan nu momogkuasa. ⁸ Muimpugo yo sono lobuw suang-i mindamo so si Pilatus nu polabus ido koyuwan kiat so jiil soko koopotan. ⁹ Mongoduato yo si Pilatus so nosiro nu, “Ipolabus muyu ka pinokoraja nu lobuw Yaudi iitu?” koo. ¹⁰ Tinangar ni Pilatus soko iri so’ noilaan-o niyo nu inakom nosiro si Yisus om nikomouli’ so iyo, so’ mokimurindi nosiro so Iyo. ¹¹ Nga mongaagar nai’ ongo wowaidon nu imam-i nu lobuw suang-i mindamo so si Pilatus nu nipolabus si Barabas. ¹² Indadi duato po ni Pilatus lobuw suang iiri nu, “Pagka soko ono, onu su otoop waalon ku so lobuw pinokoraja nu lobuw Yaudi muyu iitu?” koo. ¹³ Gumonsoko yo nosiro nu, “Solibon Iyo!” koo. ¹⁴ Sumombuto yo iyo nu, “Onu ka koraayan Niyo?” koo. Sumangat nai’ nosiro gumonsok nu, “Solibon Iyo!” koo. ¹⁵ Pagka moingin si Pilatus poinsanang nu inawo nu lobuw suang iiri, lobusi yo sono niyo si Barabas om monuuo yo nu lobuw popongolubak om posalib so si Yisus. ¹⁶ Owito yo si Yisus nu soujar-i so natad nu waloi ni Gobonor Pilatus, om soginaa yo kiawi’ posukan soujar-i muimpug. ¹⁷ Sulungi yo nosiro si Yisus nu sabung olanggau, mongkomiang-miang, om tolungasi yo nu wakau kiruwi, pinokotupi nosiro nu raja, om sontoli yo so ulu Niyo ri. ¹⁸ Noopod iri, tobio yo nosiro mubaag nu, “Otogui Ko yo su Raja nu lobuw Yaudi,” koo. ¹⁹ Lubako yo sono nosiro ulu Niyo ri nu tutungkud, om durai yo buatan Niyo ri, om sumurukudo yo nosiro so tiningkuangon Niyo ri. ²⁰ Notopodan-o po nosiro mubaag so Iyo, luuso yo nosiro sabung olanggau iiri om popusobungo yo nu sabung Niyo kondiri, om owito yo Iyo lumabus nu nisalib. ²¹ So lolanon-i, minonosog nosiro nu ido koyuwan poponimban nu salib ni Yisus. Lobuw oono koolabus-a kiat so kampung sundur so bandar, ngaran niyo si Simun, kiat so Kirini, amo ni Aliksandir om ni Rupus. ²² Owito yo nosiro si Yisus so tontong ingoranan nu Gulguta, orati, “tontong nu doupuk”. ²³ Poinumo yo Iyo nosiro nu anggur ginowulan nu muur, nga noirosaan-o po Niyo anggur oono, dai ya ininum Niyo. ²⁴ Solibi yo sono Iyo nosiro, om musuuso yo ong isai su kosongapan nu pokakas Niyo ri. ²⁵ Mirotu yo nu pinosoliban nosiro so Iyo ri. ²⁶ Nopopopak nosiro nu papan so dilanggau nu ulu ni Yisus, pinosuratan nu pinounayan nosiro momatoi so Iyo nu, Itu Yo Su Raja Nu Lobuw Yaudi. ²⁷ Kuwai ya duo koyuwan oraai nisalib nosiro, pinotalad so musompodi Niyo ri. [ ²⁸ Om soko iri po, notuman-o nokosurat so Buuk nu Kinoringan nu, “Tokodon Iyo nu lobuw oraai,” koo ri.] ²⁹ Ongo lobuw tumalib-i, milog-pilog maid-a muragam so Iyo om mutangar nu, “Minutangar Ko nu uyason Mu Waloi Maayo nu Kinoringan om kotoluan Ko yo mongatag. ³⁰ Indadi, ulus-o su’ osopulan Ko,” koo. ³¹ Ongo wowaidon nu imam om moomontuduk nu Ukum-i nga monoruru ya so Iyo nu, “Monabang Iyo nu lobuw sondiang, nga Iyo kondiri dai otabang. ³² Bang bana nu raja Iyo nu Israil, mulus Iyo nu ono sono tu om poimaid kai nai’ so Iyo,” koo. Kiduo lobuw oraai nisalib so musompodi Niyo ri nga minubaag-a so Iyo. ³³ Tonga’ runat-i, rinumondom sono pilolongkop nu tontong iiri solaid tolu nojaam. ³⁴ Jaam kotolu nu awi-awi ri, gumiako yo si Yisus so tangar Niyo nu, “Ili, Ili, Lama Sabaktani?” koo. Orati yo po nu iri nga, “Oo Kinoringan Ku, nokuro su linaiwan Mu Aku?” ³⁵ Mutongaro yo ongo lobuw nokorongou nu tinangar Niyo iiri nu, “Momaau Iyo so si Ilia,” koo. ³⁶ Mongolapo yo sono ido koyuwan so nosiro nu golugut, om loobi yo so sungoi nu anggur mousom, tonongi yo niyo so pompod nu kayu, om suloyi yo so munung ni Yisus maid nu mutangar nu, “Imati toko ya ong lumoga’ ka si Ilia monabang so Iyo ko’ dai,” koo. ³⁷ Gumiako po Iyo, om minatoi-o sono. ³⁸ Iya ya iiri, tabir so Waloi Maayo nu Kinoringan nga nointonga’ nopisi’. ³⁹ Wowaidon nu soujar mundii-dii so tiningkuangon nu salib iiri, nokosiou nu kinopotoyan Niyo ri, mutongaro yo sono nu, “Bana-bana ya nu Anak Iyo nu Kinoringan,” koo. ⁴⁰ Tinu-tinu kowoinoyan dii nokosiou nu noongourug iiri, ono yo si Maria Magdalina, sangai niyo, ino ni Yakubus omuda po, si Yusup om si Salumi. ⁴¹ Nosiro yo su minaid om minonabang so si Yisus nu laid Niyo so Galilia ri. Om osuang po woinoi wokon dii, iri nokologa’ so Yirusalim minaid so Iyo ri. ⁴² Pagka tumuong-o sono, om runat iiri yo purigap-rigapan suat so Runat Pongintoronan, ⁴³ sumombato yo sono si Yusup so si Pilatus mokilila’ nu olapon bangkai ni Yisus. Si Yusup oono lobuw nu Arimatia, nokowaid so puimpugan nu Poongobisora’an nu Ugama om orumaton iyo. Mindad-indad iyo nu mogkuasa Kinoringan soko raja. ⁴⁴ Norongou-o po ni Pilatus nu minatoi-o si Yisus, noiranan sono iyo. Monoginaa yo iyo ido wowaidon nu soujar om duato yo niyo ong olaid-o ka kinopotoyan ni Yisus. ⁴⁵ Notuturanan-o po iyo nu soujar-i, lilai yo niyo si Yusup mongalap nu bangkai ni Yisus. ⁴⁶ Momolio yo sono si Yusup nu koukuputi om untibai yo niyo bangkai ni Yisus kiat so salib-i, om soluyo yo niyo nu kumut iiri, om polaki yo niyo so lobong winaal so bulud nu watu. Noopod iri, tutubi yo niyo nu watu maayo. ⁴⁷ Laid niyo momaal nu iri, inudio ya ni Maria Magdalina, om ni Maria ino ni Yosis ong siombo polobongan so si Yisus.

¹ Nokotalib Runat Pongintoronan-i, momoli-molio yo si Maria Magdalina, om sangai niyo iri ino ni Yakubus, om si Salumi nu kolonung-lonungan ponuntug nu bangkai ni Yisus. ² Susuab nu runat minggu iiri, miano yo nosiro so lobong ni Yisus. ³ Laid nosiro manou-panou-i, mududuato yo nosiro nu, “Isai gaam pokitobangan toko mongoluid nu watu pinonutub nu lobong-i?” koo. ⁴ Nga nokologa’ nosiro dii, siowi nosiro su noluid-o watu pinonutub-i. ⁵ Mosuwo yo nosiro so lobong-i, nokotigog-a nosiro nu nokosiou nu lobuw kisabung nu olanggau oputi’ umpak so wanan nosiro ri. ⁶ Nga mutongaro yo lobuw iiri so nosiro nu, “Adang lumaa’! Oilaan ku nu modium kou so si Yisus, lobuw Najarit nisalib-i. Ado yo Iyo tuui, noluli’an-o. Siowi muyu ya pinopolakan so Iyo tu ri. ⁷ Panou kou yo, om tuturani muyu yo itu no so mompomaid Niyo ri, om so si Pitrus pona. Minogulu yo Iyo so kou so Galilia om dii yo kosombatan muyu soko notangar-o Niyo laid so kou ri,” koo. ⁸ Lumobuso yo nosiro kiat so lobong-i om mulaiwo yo so’ nokotigog om nokolaa’. D’ado yo binongutan nosiro, nu koolaa’. ⁹ Noluli’an-o po si Yisus, susuab nu Runat Minggu ri, mokisiowo yo sono Iyo gulu po so si Maria Magdalina, iri baya’ sinusuban Niyo turu moinat-i. ¹⁰ Indadi momponowo yo sono si Maria Magdalina paabar nu iri so kouna’an niyo, iri mosaan moupus om mutotangi’ ri. ¹¹ Nga norongou-o po nosiro nu miniau si Yisus, om si Maria su nokosiou, dai nosiro nopoimaid. ¹² Nopupus iri, mokisiowo yo si Yisus so duo mompomaid Niyo ri nu laid nosiro manou-panou so umo. ¹³ Indadi, mululio yo sono nosiro potuturan nu iri so kouna’an nosiro wokon-i, nga dai ya nopoimaid nosiro. ¹⁴ Mokisiowo yo sono si Yisus so opulu om ido mompomaid Niyo ri nu laid nosiro mongokan-i. Insolaa yo Niyo nosiro, so’ orumbut koimaidan nosiro om okosog sobana sampai dai poimaid nu lobuw nokosiou-o so Iyo ri. ¹⁵ Mutongaro yo Iyo so nosiro nu, “Panou kou yo so pilolongkop nu wonuo tu, paabar nu Abar Owarong kiat so Kinoringan oono so kiawi’ lobuw. ¹⁶ Lobuw poimaid osopulan om diu’on, nga lobuw dai poimaid ukumon. ¹⁷ Om itu yo ponondu’an nu poimaid nosiro, ono yo koponusub nosiro nu moinat mongorait nu ngaran Ku, om koputangar nosiro nu totongaran dai insan orongou. ¹⁸ Koingkag nosiro nu topirik intawa koinum nu kowowanit, dai ya nosiro oinsokitan. Bang potopop nosiro nu palad nosiro so ulu nu lobuw sumakit, lobuw oono opoli’an,” koo si Yisus. ¹⁹ Noopod si Tuhan Yisus mutangar so nosiro, kinakat-o sono Iyo so surga, om dii mogkuasa Iyo maid nu Kinoringan. ²⁰ Indadi momponowo yo sono nosiro paabar nu abar kiat so Kinoringan siombo-ombo ya, om Tuhan nga monabang-a so nosiro maid nu gogoma’on koiran-iran ponondu’an nu bana ya nituturan nosiro ri.