Yakubus

Yakubus

¹ Oo su kosusulodan inong ku poimaid so opulu om duo bansa lobuw Yaudi, iri noias so pilolongkop nu wonuo tu! Itu yo surat kiat s’aku, si Yakubus, uripon nu Kinoringan om ni Tuhan Yisus Kristus. ² Oo su kosusulodan ku, tokodo muyu ya nu kountungan ong koirasa kou nu boroginis nu kosusaan, ³ so’ oilaan muyu nu bang ototog-a koimaidan muyu iya nu kikosusaan kou, koompusan, kotaan kou sono mongirasa nu onu-onu ya kosusaan. ⁴ Kimati muyu yo su’ rumuang kotaanan nu inawo muyu mongirasa nu onu-onu ya sampai osukod om opiot koimaidan so Kinoringan so onu-onu ya. ⁵ Bang kuwai so kou owako po koilaan, owarong mindamo iyo so Kinoringan, su’ otaakan sono iyo, so’ Kinoringan-o po obintaak so kiawi’ lobuw maid nu osanang inawo. ⁶ - ⁸ Nga bang mindamo kou so Iyo, adang-o mupiduo inawo nu poimaid om dai, so’ ono yo po lobuw mupiduo inawo no, d’ado kototogan nu kowiawan. Soko gumbang iyo muuli’-uli’ otouruk. Lobuw soko ono, adang-o miman-iman nu kotorima’ po nu onu-onu ya kiat so Kinoringan. ⁹ Lobuw omiskin poimaid so Tuhan, sumudu’an-o ong popongkaton iyo nu Kinoringan. ¹⁰ Soko ono ya pudi lobuw doyaan poimaid so Tuhan subai sumudu’an-a ong poboba’on iyo nu Kinoringan om umarap sono so Kinoringan-a, so’ lobuw doyaan oono idu’on-a so wonuo tu ong wagu soko wusak lumiong. ¹¹ Iya nu musit su runat nu bana ko maamut, lumonot sono su rikut om tumontag wusak-o, om koowarong-o nga oidu’. Soko ono ya pudi lobuw doyaan, matoi iyo nu laid niyo mogkari’-kari’ modium nu kokoyaan. ¹² Osanang-o lobuw otaan mongirasa nu ponginaman, so’ bang kotaan iyo mongirasa nu ono, kotorima’ iyo nu odia, ono yo kowiawan nijanji nu Kinoringan so lobuw osamod so Iyo. ¹³ Bang kuwai so kou ointotayag so koraayan, adang-o mutangar nu, “Noboyayat aku nu Kinoringan,” koo, so’ dai ointotayag ong Kinoringan momaal nu koraayan om dai ya Iyo mongoboyayat nu lobuw. ¹⁴ Nga ono yo koinginan oraai toko kondiri no su koboyayat so toko. ¹⁵ Indadi, bang waalon toko koinginan oraai oono, kikoraayan toko sono, om bang sumundur toko ya momaal nu koraayan oono, koompusan matoi. ¹⁶ Oo su kosusulodan sinomodan ku, adang kou yo ookalan momikir nu Kinoringan-o su mongintotayag nu lobuw, ¹⁷ so’ kiawi’ nitaak nu owarong om odia owarong sobana no kiat-a so surga, nitaak nu Kinoringan, iri minomaal nu kiawi’ mongonawau so langit. Iyo yo Kinoringan dai mupinda-pinda. ¹⁸ Musuat nu koinginan Niyo, pinokaanak toko Niyo iya nu nokoorati toko nu tinongaran Niyo obana, tayon ong kaalib toko po ko’ kiawi’ pinuwaal Niyo wokon. ¹⁹ Oo su kosusulodan sinomodan ku, orotio muyu yo itu! Kiawi’ lobuw subai oining mongkinongou, nga adang osikap sumambut om adang oruoi rumoraayan, ²⁰ so’ bang rumoraayan toko, dai toko sono kopomaal nu owarong, ono koinginan nu Kinoringan so toko no. ²¹ Ono yo ko’, odai muyu yo kiawi’ kinoopotan nu sobana ko osaim om oraai. Pobobaa yo inawo muyu no monorima’ nu tinongaran nu Kinoringan iri nikorod so inawo muyu, so’ tinongaran oono koponapul so kou musingkolaid. ²² Waalo muyu yo onu yo po pinutangar nu Kinoringan. Bang ontob-a nu mongorongou kou om dai muyu ya goma’on, musingakal kou ya ono. ²³ Lobuw korongou nu tinongaran nu Kinoringan, nga dai goma’on niyo, ado kosudaan nu tinongaran oono so iyo. Muinong iyo nu lobuw monsiou nu buatan so soromin om dai muatag-atag. ²⁴ Oopod-o po monsiou nu buatan niyo no so soromin, mompanou-o sono om mogtuui olupaanan ong okuro-kuro buatan niyo. ²⁵ Totongaron nu Kinoringan d’ado muad oraai om kopongingkoyod nu lobuw momaal nu koraayan. Isai mongatag mongoorati om obinsuut nu totongaron oono, om okon ko ontob-a nu mongorongou om lupaanan-o, lobuw oono borokatan nu Kinoringan so onu yo po gogoma’on niyo. ²⁶ Bang kuwai lobuw momikir nu sobana ko ototog iyo mongusaa’ nu Kinoringan, nga dai ya mogkimat nu kokobangon, musingakal-a iyo om d’ado ya kosudaan nu poongusaa’ niyo so Kinoringan-o. ²⁷ Itu yo su poongusaa’ musuat so ponokodan nu Kinoringan, ono yo monabang nu asi-asi om balu, om ingkoyodan kogoyaan oraai so wonuo tu, soko kogoyaan nu lobuw lumawan nu Kinoringan.

¹ Oo su kosusulodan ku! Pagka poimaid kou so Tuhan Yisus Kristus, iri Tuhan orumaton toko, ikod kou yo popupinig nu lobuw suat so binuotanon nosiro. ² Onu koo ka ong kuwai duo koyuwan masuw so waloi sosombooyangan muyu, ido no okaya kipondulung nu omas om owarong pokakas niyo, nga iri koduo ri omiskin om otalup-o pokakas niyo ri. ³ Bang orumaton mu po lobuw doyaan oono om mutangar ko so iyo nu, “Oo tuan, ogom-o so oogoman owarong bana tu,” k’ikau, nga tongaron mu lobuw omiskin oono nu, “Undii ya dii-i”, intawa “Ogom-a so suliw tu,” k’ikau, ⁴ osala’ kou, so’ popupinig kou nu sondad una’ nu oraai tomod. ⁵ Oo su kosusulodan sinomodan ku, orotio muyu yo! Lobuw owako orata’ so wonuo tu, nosiro yo su pili’on nu Kinoringan nu popioton koimaidan, om nosiro yo su songopanon nu Kinoringan soko nijanji Niyo so isai-isai ya osamod so Iyo. ⁶ Nga, rogam-rogamon muyu nai’ lobuw omiskin, ombo pala su ono yo lobuw doyaan-o su mongoraai-raai om mongowit so kou so pongobisora’an. ⁷ Nosiro yo su minongoragam nu ngaran ni Yisus nu bana ko oorumat om mononsongapan so kou. ⁸ Momaal kou nu onu yo po obana ong waidon muyu ponuu’an nu Kinoringan oogot sobana nokosurat so buuk Niyo nu, “Somodi yo inong mu soko poonamod mu nu kondiri!” koo ri. ⁹ Nga bang popupinig kou nu lobuw, nokopomaal kou yo nu koraayan, om kosalag kou nu Ukum. ¹⁰ Lobuw dai mongowaid nu ido pona ponuu’an so Ukum, nokosalag-o iyo nu kiawi’ Ukum oono, ¹¹ so’ Kinoringan-o su minutangar nu, “Adang-o lumapa’,” om “Adang-o momatoi” koo. Nga, insan dai kou nokolapa’ ong momatoi kou ya, nokosalag kou ya nu Ukum. ¹² Kimato muyu yo totongaron om gogoma’on muyu, so’ kiawi’ so toko bisora’on-a nu Ukum, om ono yo su polabus so toko su’ kowaid toko so Iyo. ¹³ Dai ya oluluudan Kinoringan nu lobuw dai moongoluluud nu inong niyo, nga iri lobuw mongoluluud nu inong niyo, dai ukumon nu Kinoringan. ¹⁴ Oo su kosusulodan ku, d’ado kosudaan mutangar nu, “Poimaid aku nu Kinoringan,” koo, ong dai ya mongowaid nu koinginan nu Kinoringan. Koimaidan soko ono dai musuat om dai koponapul kiat so ukuman nu Kinoringan. ¹⁵ Soko itu, bang kuwai lobuw inong toko poimaid woinoi intawa kusoi kikurang kabus nu mookan intawa pokakas, ¹⁶ om mutangar toko sono so iyo nu, “Otago muyu ya! Umarap kai nu kaalap kou nu mookan om pokakas,” koo, nga ado kosudaan nu totongaron toko oono ong dai toko ya taakan iyo nu ingkookan intawa pokakas. ¹⁷ Soko ono ya pudi koimaidan, bang dai ya niintolang so gogoma’on toko, d’ado ya kosudaan. ¹⁸ Kalu mutangar lobuw nu, “Kuwai lobuw umarap nu koimaidan niyo om lobuw wokon umarap nu gogoma’on niyo,” koo, sombutan ku lobuw oono nu, “Obari aku ka ong onu koo lobuw kikoimaidan ong okon-a ko maid nu gogoma’on, om obaran ku ikau nu gogoma’on ku no, pongilaan nu kikoimaidan aku,” k’aku so lobuw oono. ¹⁹ Poimaid toko nu ido-ido ya Kinoringan. Owarong nai’ ono, nga dai ono muuma’. Insan komoinatan-o ya poimaid-a nu ono, maid nu kumikip ololaa’an so’ oilaan nosiro nu ukumon nosiro nu Kinoringan ong wagu. ²⁰ Olowong kou sobana! Patut oilaan muyu yo nu ado kosudaan pudi kikoimaidan ong okon-a ko goma’on koimaidan oono. ²¹ Ondomon-a sono si Abraham, aki rumpungan toko ri. Tinokod iyo nu Kinoringan nu kopuwarong so Iyo so’ ginama’ niyo, iri nisuu’ nu Kinoringan so iyo nu nipogaras anak niyo si Isak, niusaa’ so Kinoringan. ²² Kiat nu ono, otolang sobana nu koimaidan niyo subai waidan-a nu gogoma’on om opiot sono sobana koimaidan niyo. ²³ Om ono minusuat nu tinongaran so Buuk nu Kinoringan iitu nu, “Nopoimaid si Abraham nu Kinoringan om iri yo ko’ tinokod iyo nu Kinoringan nu kopuwarong sono so Iyo,” koo ri. Ono yo ko’ iningoranan si Abraham nu una’-una’ nu Kinoringan. ²⁴ Indadi, oilaan toko yo kosiono nu ono ya gogoma’on nu lobuw-o su koponorima’an nu Kinoringan, om okon ko ontob-a nu poimaid. ²⁵ Ondomon-a pudi si Raab, iri woinoi osundal-i. Tinorima’ iyo nu Kinoringan nu kopuwarong so Iyo kiat so gogoma’on niyo owarong-i. Ono yo nisusut niyo so waloi niyo ri lobuw moonoluku sinuu’ ni Yusua, om minonuud so nosiro mulaiw maid nu lalan sondiang. ²⁶ Na, bang d’ado yo inawo nu ido koyuwan, oilaan toko nu minatoi-o om ado yo kosudaan. Soko ono ya pudi koimaidan ong dai ya waidan nu gogoma’on nu owarong, d’ado ya kosudaan.

¹ Oo su kosusulodan ku, oogot sobana totongaron toko. Ono yo ko’, dai musuat ong osuang so kou mokisisiliw nu moomontuduk, so’ oilaan muyu nu owogat po ukuman nu Kinoringan so toko moomontuduk ko’ lobuw wokon. ² Toko yo po so wonuo tu dadan kowaal nu kosola’an. Nga lobuw dai insan osala’ totongaron, d’ado yo sono koraayan om kopogkuasa nu koyuwan niyo kondiri. ³ Bang mongipat toko nu kuda, songaban toko nu bosi oworos kobang niyo no, su’ ombo ya koinginan toko mompanou nai ya ponowan niyo. ⁴ Soko ono ya pudi kapal nu raat-o. Pudi pona maayo sobana om otouruk nu uos opogon, nga otulid-a nu bonsaan opodok siombo-ombo ya koinginan nu sarang-o sumundur. ⁵ Om soko ono ya pudi dila’ nu lobuw tu. Pudi pona oworos, nga kopusingkaayo-ayo ya. Kiro-kiroo muyu oba’on, pudi pona sobana ko maayo, nga oompu’ ya nu apui oworos. ⁶ Dila’ nu lobuw tu nga soko apui ya. Dila’ no yo su impuunon nu kiawi’ koraayan om polongkop nu koraayan oono so koyuwan toko. Laid nu laid, dila’ oono kopongindoraai nu pomikiran om inawo toko om osiliw sono nu koopotan, om mononsara’ so toko solaid nu miau toko, om muinong nu apui so noraka. ⁷ Oilaan toko nu koponuyu’ lobuw nu onu-onu ya ginis nu kulos-kulos orongit, bombolog, lulumoloi, om pait, ⁸ nga ado ido kopogkuasa nu dila’ niyo kondiri. Sobana ko oraai dila’ toko om dai opogkuosaan. Dila’ tu yo po nga d’ado kointoronan poimbosang nu totongaron oraai. Soko topirik, kopatoi. ⁹ Dila’ toko tu yo su pongunsopot so Tuhan om Amo toko, nga dila’ ya oono su pongawag nu sondad una’, iri inurug nu Kinoringan nu koogio so Iyo. ¹⁰ Koiran-iran sobana, su kobang tu yo su pongawag om pongunsopot-a. Oo su kosusulodan ku, sobana ko dai ono musuat! ¹¹ D’ado sungoi opalo om opait musit kiat so ido yo impuunon nu sungoi. ¹² Oo su kosusulodan ku, d’ado ya puun nu nunuk mubua’ nu jaitun, om d’ado ya puun nu anggur mubua’ nu nunuk. D’ado ya musit nu sungoi opalo so impuunon nu sungoi maasin. ¹³ Isai yo po so kou opintar om osuang oilo-ilaan, pointolangon-o niyo so gogoma’on niyo owarong, om obaba’ inawo. ¹⁴ Nga bang mokimurindi kou om kondiri ya su poduli’on, adang-o mongondos nu koo’ilo oono, so’ bang soko ono gama’ muyu, lumawan kou nu pontudukan obana kiat so Kinoringan. ¹⁵ Koo’ilo soko ono okon ko kiat so Kinoringan, nga kiat so wonuo tu, okon ko nitaak nu Atod nu Kinoringan nga kiat so Wowaidon nu Moinat. ¹⁶ Bang kuwai lobuw so ido puimpugan mokimurindi om kondiri ya su poduli’on, nai ya kuwai puolodan om boroginis nu koraayan. ¹⁷ Nga lobuw kikoilaan nitaak nu Kinoringan, gulu po, miau iyo bana-bana maid nu koinginan nu Kinoringan, osulut nu sondad una’, otoua, okon ko okosog nga musimaid tudukan, obingluluud, moilo mugogoma’on nu owarong, dai mokimupinig, om dai musingkopoimaid-poimaid. ¹⁸ Lobuw popusulut, mongowit nu kopusulutan om koompusan koworongan.

¹ Oilaan muyu nu impuunon-o po nu poomuolodan om poomusogka’an nai so kou no, ono yo koinginan muyu modium nu kosonangan-o, om koinginan oono dadan mulawan nu koinginan owarong so inawo muyu. ² Mokisosongapan kou nu onu-onu ya, nga dai kou kaalap nu ono, om mokipopomatoi kou sono. Oinsolon kou nu onu-onu ya so lobuw, nga dai kou kooyang. Musosagka’ om mualod kou sono. D’ado ya onu-onu aalap muyu so’ dai kou mindamo so Kinoringan. ³ Om manod mindamo kou, nga dai kou ya kaalap so’ tomod muyu mokitaak nu ono dai musuat. Onu yo po indomoon muyu suat-a so kou kondiri. ⁴ Kou yo su lobuw dai ototog so Kinoringan! Tantu oilaan muyu yo nu, bang mokimuuna’-una’ kou nu wonuo tu, alod-alod kou sono nu Kinoringan. ⁵ Oilaan muyu nu osuat sobana tinangar nu Kinoringan so Buuk Niyo nu, “Iri yo po atod nitaak so toko nu Kinoringan, osuang koinginan oraai,” koo ri. ⁶ Soko ono pona, kaalib po koluluudan nitaak nu Kinoringan so toko, ko’ koinginan nu atod toko oono. Ono yo ko’ nokosurat-a pudi so Buuk nu Kinoringan nu, “Luluudan nu Kinoringan lobuw obaba’ inawo, nga lobuw musingkaayo-ayo lowanon Niyo,” koo ri. ⁷ Pagka soko ono, waido yo Kinoringan om lowano yo Wowaidon nu Moinat om mulaiw sono iyo kiat nai so kou. ⁸ Rani yo so Kinoringan om rumani ya Iyo so kou. Oo su lobuw kikoraayan, ogoli yo kogoyaan muyu oraai-o! Oo su lobuw mupiduo inawo, posimaidi yo Kinoringan mongimbarong nu pikiran om inawo muyu no. ⁹ Pususun kou yo nu koraayan muyu. Polungguyo yo inawo muyu no om tangi’ kou yo. Ingkoyod kou yo muayak om tangi’ kou yo. Ingkoyod kou yo sumudu’an om sumusaan kou yo. ¹⁰ Pobobaa yo inawo muyu no so tiningkuangon nu Kinoringan, om popongkaton kou sono Niyo. ¹¹ Oo su kosusulodan ku, adang-o muroraai-raai intawa muiinsala’. Isai mongoraai intawa monginsala’ nu inong niyo poimaid, koorotian pokoraai om pokosala’ iyo nu Ukum. Bang waalon niyo soko ono, dai yo sono mongowaid iyo Ukum nu oogot sobana. Om bang monginsala’ kou nu Ukum, dai kou ya mongowaid nu Ukum oono, sondiang ko kou nai’ su moonantu nu Ukum. ¹² Kinoringan-o su kopogbaya’ monaak nu ukum om mongobisara’ nu lobuw. Iyo yo su koponapul intawa mongoraag nu lobuw. D’ado ya kopogboya’an nu lobuw monginsala’ nu inong niyo. ¹³ Rongowo muyu yo pontudukan ku so kou tu su lobuw mutangar nu, “Kosiono intawa suab murongkat kai so ido bandar om molak dii sontoun laid, mudagang om modium nu siin,” koo. ¹⁴ Nga kou kondiri dai koilo onu kourugan nu kowiawan muyu suab! Kou yo po soko lisun, sontagal-o osiowan om lumiong-o. ¹⁵ Patut soko itu yo tongaron muyu, “Bang lila’an kai nu Kinoringan, mugogoma’on kai nu itu om ono,” koo kou. ¹⁶ Nga, kosiono osumbung kou om moglabi-labi nu totongaron. Kiawi’ totongaron soko ono dai musuat. ¹⁷ Ono yo ko’, iri lobuw koilo yo nu onu mupatut goma’on nga dai ya niyo goma’on, osala’ iyo.

¹ Oo su kosusulodan ku ongo kokaya! Rongowo muyu yo pontudukan ku tu. Tangi’ om upus kou yo so’ koirasa kou nu kosonsora’an om kosusaan so sunduron tu. ² Rinumaag-o orata’ muyu no om pokakas muyu no kinokot-o nu gagat. ³ Naawus-o nu togor omas om pirok muyu no, om togor oono yo su pongilaan nu odoot kou. Ono yo ko’ owogat sobana ukuman so kou, soko apui mongompu’ nu onsi so runat pongoowi’an. Nokopongimpug kou yo nu orata’ so pongoowi’an nu wonuo tu. ⁴ Dai muyu gojian lobuw mugogoma’on so umo muyu. Rongowo muyu yo kosiono ponginsola’an nosiro so kou! Gumonsok nosiro mokiponobangon, om norongou-o ono nu Kinoringan, Tuhan Maayo Kuasa. ⁵ Sobana ko osanang kou so’ pinakai muyu yo orata’ muyu mogkosonangan so wonuo tu. Nolomu kou yo musingkologa’ nu Runat Pongukuman, soko lobuw polomu nu kambing nosodia’ yo nu runat poongogorasan. ⁶ Ukumon om potoyon muyu ongo lobuw d’ado sala’, om dai ya lumawan nosiro. ⁷ Oo su kosusulodan ku! Pagka soko ono, pototogo yo inawo muyu no musingkologa’ koimbagu ni Tuhan Yisus. Minsuw-o nu koototog nu moomutanom, mongindad nu uran iya nu poomuwusakan om poomoroyan, om kipinumpung sono iyo nu owarong. ⁸ Pototogo muyu yo inawo muyu no om umarap-a, so’ oduruk-o kologa’an koimbagu nu Tuhan. ⁹ Oo su kosusulodan ku! Adang-o mungot om muiinsala’, su’ dai kou ukumon nu Tuhan. Ingati muyu! Oduruk-o lumoga’ Moongobisara’. ¹⁰ Oo su kosusulodan ku! Ondomo muyu yo poo’abar nu Kinoringan gulu ri. Otatap inawo nosiro om otaan mongirasa nu kosonsora’an. Indadi, insuw kou yo so nosiro. ¹¹ Pokosonangon nosiro nu lobuw so’ otatap inawo nosiro. Nokorongou kou yo nu kootatap ni Ayub, gama’ nu Tuhan mongoborakat so iyo koimbagu. Kiat nu ono, oilaan muyu nu sobana ko kikoluluudan om owarong inawo nu Kinoringan. ¹² Oo su kosusulodan ku, itu yo su oogot sobana, ono yo ikod kou yo pongibot momakai nu langit, wonuo, intawa onu-onu ya. Bang bana ya, “Oo”, koo yo muyu ya, om bang dai ya obana, “Dai!”, koo yo muyu ya, su’ dai kou ukumon nu Kinoringan. ¹³ Bang kuwai osusaan so kou, owarong mogdu’a iyo so Kinoringan. Bang kuwai osudu’an so kou, owarong mulagu iyo mongorayou nu Kinoringan. ¹⁴ Bang kuwai so kou dai kaatu’, owarong monogina nu ongo wowaidon nu lobuw poimaid mogdu’a nu lobuw oono, om mongisu’ nu inosak lanung maid nu mokiponobangon nu Tuhan. ¹⁵ Bang mogdu’a om sobana ko poimaid nosiro, poli’an-a nu Kinoringan lobuw oono om oompunan koraayan niyo ri. ¹⁶ Ono yo ko’ pukokoilo kou yo nu koraayan om pududu’a kou yo su’ opoli’an kou. Du’a yo po nu lobuw mongowaid nu koinginan nu Kinoringan, sobana ko kikuasa. ¹⁷ Kuwai ido poo’abar nu Kinoringan gulu ri, ingoranan so si Ilia. Iyo nga inong toko ya lobuw. Nga nobogdu’a iyo sobana-bana su’ dai muran, om bana-bana ya nu dai minuran tolu notoun om putonga’ laid. ¹⁸ Nokotalib iri, nobogdu’a po iyo su’ muran, om bana-bana nu minuran-a om tinumuu’ sono tonoman-i nu olabung. ¹⁹ Oo su kosusulodan ku, bang kuwai ido koyuwan nai so kou minulaiw kiat so pontudukan obana nu Kinoringan, om kuwai wokon popululi’ koimbagu so iyo mongowaid nu pontudukan oono, ²⁰ ondomon-o totongaron iitu. Iri yo po lobuw popululi’ koimbagu nu lobuw kikoraayan mongowaid nu pontudukan obana nu Kinoringan, lobuw oono koponapul nu atod nu lobuw kikoraayan oono kiat so poomatoi musingkolaid om osuang koraayan niyo idu’on nu Kinoringan.