Ibrani

Ibrani

¹ Gulu ri muuli’-uli’ Kinoringan mutangar so ongo poo’abar nu Kinoringan, nipolombus so odu aki toko ri. Osuang gama’ Niyo mutangar so nosiro om osuang abar nikoilo Niyo so nosiro. ² Nga ono sono tu, iya so pongoowi’an, minutangar Kinoringan so Anak Niyo ri, om nilombus so toko. Om Anak Niyo oono yo su sinuu’ nu Kinoringan mongurug nu wonuo tu om kiawi’ asuw-o. Om Anak Niyo oono yo su tinantu nu Kinoringan nu monongapan nu kiawi’ so wonuo tu. ³ Om Iyo yo su’ ponondu’an nu koworongan nu Kinoringan om muinong-a Iyo nu Kinoringan. Om Iyo yo su, inungkiaton nu suu’ Niyo nu sobana ko kikuasa, sumundur mongipat nu wonuo tu, iri inurug Niyo. Noopod Iyo mongidu’ nu kosola’an nu lobuw, minogom sono Iyo so kopogboya’an so surga maid nu Kinoringan Maayo Kuasa. ⁴ Anak oono maayo po pangkat ko’ ongo susuu’on nu Kinoringan, om pinongingoranan so Iyo nu Kinoringan, nga kaalib po nu pinongingoranan so ongo susuu’on nu Kinoringan. ⁵ Dai insan Kinoringan mutangar so susuu’on Niyo ri nu, “Ikau-o su Anak Ku, om runat tu pokoilo Aku nu, Aku yo su Amo mu.” koo. Om dai insan mutangar Kinoringan so susuu’on Niyo ri nu, “Ourug Aku nu Amo niyo, om urugon Ku iyo nu Anak Ku,” koo. ⁶ Nga iya nu Kinoringan monuu’ nu ido yo Anak Niyo so wonuo tu ri, minutangar po Iyo nu, “Kiawi’ susuu’on Ku subai mongusaa’ so Iyo,” koo. ⁷ Om suat so ongo susuu’on Niyo ri, minutangar Iyo nu, “Inurug Ku ongo susuu’on Ku nu sobana ko olangkas pologa’ nu abar Ku soko uos, om ongo uripon Ku taakan Ku nu kuasa soko kudilop,” koo. ⁸ Nga suat so Anak Niyo iiri, minutangar Iyo nu, “Taakan Ku Ikau nu pogkuosaan ototog musingkolaid. Om ooluk Ko mogkuasa nu poranak Mu. ⁹ Oingin Ko nu kogoyaan owarong om bisigon Mu kogoyaan oraai. Ono yo ko’, pinili’ Ko nu Kinoringan, kaalib po pangkat Mu ko’ kouna’an Mu om taakan Ko Niyo nu kosonangan maayo,” koo ri. ¹⁰ Minutangar po koimbagu Kinoringan suat so Anak Niyo ri nu, “Ikau-o TUHAN, su minongurug nu wonuo tu nu togna ri, om longon Mu no yo su minongurug nu langit. ¹¹ Pudi pona oluwus kiawi’ oono, nga ong Ikau kakal-a. Soko pokakas nosiro tumalup, nga Ikau dai tumalup. ¹² Raagon Mu wonuo tu om iada’ Mu soko pokakas otalup-o nu lobuw, om gonti’an nu owagu. Nga Ikau dai tumalup, om dai Ko matoi musingkolaid,” koo ri. ¹³ Dai insan mutangar Kinoringan so ongo susuu’on Niyo ri nu, “Ogom-o umpak so wanan Ku maid so Aku mogkuasa, om doogon Ku sono kiawi’ alod-alod Mu,” koo ri. ¹⁴ Ongo susuu’on-o po nu Kinoringan nga atod mugogoma’on suat so Kinoringan moonabang nu kolobuwan Niyo, iri kotorima’ nu kosopulan.

¹ Ono yo ko’, poimaid toko yo nu pontudukan obana norongou toko ri, su’ dai toko ooba’ kiat so koimaidan toko. ² Kodau nilombus nu ongo susuu’on nu Kinoringan so odu aki toko ri, nokointolang-o nu obana ya, om isai dai poimaid, insaadan nu Kinoringan. ³ Indadi bang dai toko yo sono poimaid nu pontudukan suat nu kosopulan oono, insaadan toko nu Kinoringan, so’ si Tuhan Yisus-o su togna nopaabar nu kosopulan oono. Om kolobuwan togna nokorongou-i, nopoorati yo so toko nu obana ya ono. ⁴ Nopoorati Kinoringan nu obana ya itu kiat so koiran-iran winaal nosiro maid nu Atod Niyo, musuat nu koinginan Niyo. ⁵ Okon-a ko susuu’on su pinili’ nu Kinoringan mogkuasa so wonuo wagu. ⁶ Ono ya nga, soko nokosurat so Buuk nu Kinoringan nu, “Oo Kinoringan, moiranan aku nu mongondom Ko sono nu ongo lobuw nu sobana ko obaba’. Pudi pona sobana ko oogot Ko, ipatan Mu ya nosiro. ⁷ Sontagal-a poboba’on Mu lobuw tu kiat so susuu’on Mu, nga popongkaton om orumaton Mu sono. ⁸ Sinuu’ Mu nosiro mogkuasa nu kiawi’ winangun Mu,” koo ri. Indadi bang tongaron nu Kinoringan nu lobuw tu su “mogkuasa nu kiawi’”, koorotian, ado ido dai okuasa nu lobuw. Pudi pona soko ono, oilaan toko nu dai po kopogkuasa toko nu kiawi’ nu ono sono tu. ⁹ Nga nosiou toko yo nu kikuasa ya si Yisus. Pudi pona soko ono, pinobaba’ Iyo sontagal kiat so susuu’on, su’ kiat so koowarong nu inawo nu Kinoringan, osonsara’ po Iyo om matoi suat nu kiawi’ lobuw. Nga noilaan toko yo nu ono sono tu nu pinangkat om inorumat Iyo mogkuasa nu kiawi’-awi’. ¹⁰ Otoop-a nu soko ono waalon nu Kinoringan iri minomangun nu kiawi’-awi’, so’ kiat nu ono nourug si Yisus nu moonapul nu kiawi’ lobuw om kiat so kinosonsora’an Niyo ri, osuang lobuw kowaid mogkuasa so Iyo, so’ Iyo yo su pootolunda’ nu lobuw tu mian so kosopulan. ¹¹ Si Yisus-o su minongidu’ nu kosola’an toko, om toko nu inidu’an tu, kopuido ya Amo, ono yo Kinoringan. Ono yo ko’ dai moiyu’an si Yisus pokosulod so toko. ¹² Soko tinangar Niyo nokosurat so Buuk nu Kinoringan nu, “Oo su Kinoringan, nituturanan ku gogoma’on Mu so inong ku nu bansa. Iya nu muimpug nosiro mongusaa’ so Ikau, royowon ku Ikau,” koo ri. ¹³ Minutangar po Iyo nu, “Umarap Aku so Kinoringan,” koo. Om minutangar-a Iyo nu, “Nokosodia’ Aku yo om inonakan Ku nitaak Mu yo so Aku no mongowaid nu koinginan Mu,” koo. ¹⁴ Suat so toko, iri pinokaanak nu Kinoringan, matoi-a. Ono yo ko’ sinumiliw si Yisus nu lobuw so’ moingin Iyo mido so toko, om kiat so kinopotoyan Niyo, kopongodoog Iyo nu Wowaidon nu Moinat, iri inungkiaton nu kopotoyan. ¹⁵ Om soko ono po, polabus Iyo so toko kiat so ponguriponan nu lumaa’ matoi. ¹⁶ Indadi, otantu yo nu okon-a ko susuu’on nu Kinoringan su tobangan Niyo, ono ya nga solusuk ni Abraham. ¹⁷ Pagka soko ono, subai sumiliw Iyo nu soko toko kosulodan Niyo so kiawi’ su’ ourug Iyo nu Imam Maayo ototog om kiluluud, om opatong Iyo mugogoma’on suat so Kinoringan, mongidu’ nu kosola’an toko. ¹⁸ Indadi koponabang sono Iyo so toko ong osuat toko nu ponginaman so’ Iyo kondiri nokobaya’ ya kininaman om nosonsara’.

¹ Oo su kosulodan ku inong koimaidan iri pinaau nu Kinoringan, ondomo muyu yo sobana si Yisus. Iyo yo su sinuu’ nu Kinoringan om sinumiliw soko Imam Maayo, om Iyo yo su wowaidon toko. ² Obingasip Iyo nu Kinoringan, iri minonuu’ so Iyo nu gogoma’on Niyo, soko si Musa gulu ri obingasip-a so gogoma’on niyo ri. ³ Nga otoop nu orumaton po si Yisus ko’ si Musa, soko moomuwaloi, maayo po koorumatan ko’ waloi winaal niyo no. ⁴ Bana ya nu lobuw su minomaal nu kiawi’ waloi, nga Kinoringan-o su minomaal nu onu-onu ya. ⁵ Ototog si Musa mugogoma’on suat so ongo lobuw nu Kinoringan, om iyo yo ponondu’an nu onu yo po nipokoilo nu Kinoringan ong wagu. ⁶ Nga ong si Yisus Kristus, ototog Iyo mongipat nu lobuw nu Kinoringan, so’ Iyo yo su Anak nu Kinoringan. Om toko yo su lobuw Niyo, ong bana-bana nu sumundur toko poimaid so si Yisus om kooku’ toko paabar suat so koimaidan toko so lobuw wokon. ⁷ Pagka soko ono, waido toko yo tinangar nu Atod nu Kinoringan nu, “Kosiono, bang korongou kou nu tinongaran nu Kinoringan, ⁸ kodi muyu yo pokosogo inawo muyu no, soko odu aki muyu ri nu linowanan nosiro so Kinoringan om minonginam nu Kinoringan so padang pantai nu ukumon ka Niyo nosiro ko’ dai,” koo ri. ⁹ Minutangar Iyo nu, “Pudi pona nosiou-o nosiro kiawi’ gogoma’on Ku koiran-iran solaid opat nopulu toun, dadan-a odu aki muyu ri lumawan om monginam s’Aku. ¹⁰ Ono yo ko’ minungot Aku so nosiro sampai nokoputangar Aku nu, ‘Dadan dai obinsuut nosiro om dai mongowaid nu ongo ponuu’an Ku no,’ k’Aku. ¹¹ Om pagka sobana ko minungot Aku, minongibot Aku sono nu, ‘Dai koian nosiro so tontong koinginan Ku potaak nu intoronan nosiro no!’ k’Aku,” koo. ¹² Oo su kosusulodan ku, kimato muyu yo bana su’ d’ado ido so kou sobana ko oraai inawo om d’ado koimaidan, om mulaiw sono iyo kiat so Kinoringan iri miau musingkolaid-i. ¹³ Nga, ono yo pubibiat kou yo nu ono sono tu, solaid toko po miau so wonuo tu, su’ d’ado ido so kou oburunsutan nu koraayan om lumawan sono nu Kinoringan. ¹⁴ Bang tumatap toko poimaid so si Kristus, soko iri timpuun toko poimaid so Iyo sampai so pongoowi’an, tantu kowaid toko so Iyo mogkuasa. ¹⁵ Itu yo su nokosurat so Buuk nu Kinoringan nu, “Kosiono, bang korongou kou nu tinongaran nu Kinoringan, kodi muyu yo pokosogo inawo muyu no, soko odu aku muyu ri nu linowanan nosiro so Kinoringan,” koo ri. ¹⁶ Lobuw-o po nokorongou nu tangar nu Kinoringan om linumawan so Iyo nga iri yo ongo lobuw Israil inowit ni Musa lumabus kiat so Masir muli’ so wonuo nosiro kondiri ri. ¹⁷ Om lobuw-o po inungotan nu Kinoringan solaid opat nopulu tinounan-i nga iri yo lobuw Israil minomaal nu koraayan sampai nopatoi so padang pantai. ¹⁸ Om lobuw-o po sinumpaan nu Kinoringan nu, “Dai nosiro kopolak so wonuo pointoronan Ku so nosiro,” koo ri, nga iri yo ongo lobuw Israil dai minongowaid nu tinongaran Niyo. ¹⁹ Kosiono, oilaan toko yo sono nu dai kaasuw nosiro so wonuo pointoronan nu Kinoringan so nosiro ri, so’ dai nosiro poimaid so Kinoringan.

¹ Pudi pona soko ono, tumanon-a nu Kinoringan janji Niyo so toko, nu kopolak toko so iintoronan popolakan Niyo so toko maid so Iyo. Indadi, kimato toko yo bana su’ ado ido so toko niogol om dai koian so iintoronan nijanji nu Kinoringan oono. ² Soko odu aki toko ri, nokorongou toko yo nu Abar Owarong oono, nga ado kosudaan nu Abar oono suat so nosiro so’ dai nosiro nopoimaid. ³ Toko yo po nu nopoimaid-o nu Kinoringan kosiono tu, popolakon Niyo so pointoronan nijanji Niyo ri, so’ insan noopod-o Niyo momaal wonuo tu, nga minutangar po Iyo nu gulu ri suat so lobuw dai poimaid so Iyo soko itu nu, “Pagka sobana ko minungot Aku so nosiro, sumpaan Ku nosiro nu dai kopolak so wonuo pointoronan Ku so nosiro no,” koo ri. ⁴ Nokosurat-o so Buuk nu Kinoringan suat so runat koturu iya nu pinongurugan nai’ Niyo nu wonuo tu ri nu, “Minintoron Kinoringan mugogoma’on so runat koturu, nu noopod-o Niyo momaal wonuo tu ri,” koo ri. ⁵ Tinangar po ono koimbagu nu Kinoringan nu, “Dai koian nosiro so tontong, iri koinginan Ku pointoronan so nosiro no!” koo ri. ⁶ Ono yo ko’ oilaan toko nu, iri kolobuwan gulu yo nokorongou nu Abar Owarong oono, dai koian so pointoronan nijanji nu Kinoringan oono, so’ dai nosiro nopoimaid. Nga, oilaan toko ya nu kuwai lobuw wokon kopolak nai. ⁷ Oilaan toko ono so’ notantu yo nu Kinoringan nu, ido runat kaasuw toko ya nai, soko iri tinangar Niyo nu, “Runat tu,” koo ri. Nobotoun-o pinutongaran nu Kinoringan nipolombus so si Daud nokosurat so Buuk nu Kinoringan sisuna ri nu, “Kosiono, bang korongou kou nu tinongaran nu Kinoringan, kodi muyu yo pokosogo inawo muyu no,” koo ri. ⁸ Suat so odu aki toko gulu ri, bang nokotaak-o ni Yosua so nosiro pointoronan otatap, iri nijanji nu Kinoringan-i, ado yo kosudaan ong mutangar po Kinoringan suat so sondiang nu runat pointoronan so toko. ⁹ Ono yo ko’, oilaan toko nu kuwai po ido runat sondiang pointoronan nu ongo lobuw nu Kinoringan, soko Kinoringan minintoron nu runat koturu, iya nu pinongurugan nai’ Niyo nu wonuo tu ri. ¹⁰ Isai koian so pointoronan nijanji nu Kinoringan oono, bana-bana ko kointoron iyo kiat so kiawi’ gogoma’on niyo, soko inintoronan nu Kinoringan mugogoma’on-i. ¹¹ Pagka soko ono, mogkari’-kari’ toko yo su’ kopolak toko so intoronan nijanji yo nu Kinoringan oono. Om adang-o nu ido pona dai kopolak so intoronan oono, soko odu aki toko gulu ri, so’ dai nopoimaid so Kinoringan. ¹² Sobana ko kikuasa om kopomiau nu lobuw tinongaran nu Kinoringan. Tinongaran nu Kinoringan otarom po ko’ karis kitarom musompodi. Tinongaran nu Kinoringan kosondot so inawo sampai so atod toko om pointolang nu kiawi’ pomikiran, tomodon om koinginan toko. ¹³ Ado ido kosusut so Kinoringan, onu yo po nga kointolang so tiningkuangon Niyo. Om Iyo yo su mongudio nu onu yo po gogoma’on toko. ¹⁴ Ono yo ko’, sumundur toko yo sobana so koimaidan toko, so’ kuwai yo Imam Maayo toko, nokoian-o so tiningkuangon nu Kinoringan, ono yo si Yisus, Anak nu Kinoringan. ¹⁵ Imam Maayo toko oono obingluluud so toko nu dai obasag koimaidan tu, so’ Iyo kondiri nokolalag-a nu ponginaman, nga dai ya nokopomaal nu koraayan. ¹⁶ Ono yo ko’, adang toko yo maa’-laa’ mogdu’a so Kinoringan, iri obingluluud nu lobuw mokiponobangon so Iyo. Om iya nu osimpitan toko, oluluudan-a Iyo so toko om tobangon toko ya Niyo.

¹ Ido soido nu Imam Maayo silaid-i pinili’ kiat so sondad-a lobuw. Gogoma’on-o po nosiro nga pousaa’ so Kinoringan nu pongayam gorason pongidu’ nu koraayan nu kolobuwan. ² Imam Maayo oono koirasa ya nu iyo kondiri osuang koraayan. Ono yo ko’ oluluudan-a iyo nu lobuw d’ado ooroti-rotian om obinsala’ no. ³ Om ono yo ko’ subai pousaa’ iyo so Kinoringan suat so koraayan niyo om koraayan nu lobuw wokon. ⁴ Ado ido kopusingkoImam Maayo ong okon-a ko Kinoringan su mongurug so iyo, soko iri poomili’ so si Arun nu gulu ri. ⁵ Indadi, si Kristus nga soko ono ya nu okon-a ko kinumondiri Iyo modium nu koorumatan sumiliw nu Imam Maayo, nga Kinoringan-o su minomili’ so Iyo. Om minutangar Kinoringan so Iyo nu, “Ikau-o su Anak Ku. Runat tu pokoilo Aku so lobuw nu Aku yo su Amo Mu,” koo. ⁶ Om nokosurat-a tinangar nu Kinoringan nu, “Ikau-o po nga imam musingkolaid, soko si Milkisidik, iri imam nu gulu ri,” koo. ⁷ Laid nu tuui po si Yisus so wonuo tu ri, minogdu’a Iyo maid nu tumangi’ mokitobangon so Kinoringan, iri kikuasa powiau so Iyo kiat so kopotoyan. Om rinongou-a nu Kinoringan du’a Niyo ri, so’ minusimbaba’ Iyo om bana ko minongowaid nu koinginan nu Kinoringan. ⁸ Pudi pona Anak si Yisus nu Kinoringan, subai osonsara’ po Iyo om oilaan nai’ Niyo gama’ mongowaid nu koinginan nu Kinoringan. ⁹ Nokaalib-o po Iyo nu kiawi’ lobuw, nourug sono Iyo nu otoop sobana wowaidon nu inonakan nu Kinoringan, om nourug Iyo nu impuunon nu kowiawan suat so kiawi’ lobuw mongimaid so Iyo no. ¹⁰ Om Kinoringan nga nopointolang-o nu si Yisus-o su Imam Maayo, muinong so si Milkisidik nu gulu ri. ¹¹ Oo su kosusulodan ku, osuang po nipokoilo mai so kou suat so si Yisus ong onu kopuinongan Niyo so si Milkisidik, nga orogon kai potarang, so’ obuut kou mongoorati. ¹² Olaid kou yo poimaid so si Yisus, om otoop nu montuduk kou yo sono. Nga dai kou po kopontuduk, so’ dai kou po koorati bana pudi pona pontudukan oruoi-a, om subai otudukan kou po nu lobuw. Kou yo po nu ono sono tu soko lolaing nu kakal po tumiti’ om dai po kopongokan nu okanon. ¹³ Isai dai po koilo nu pontudukan nu Kinoringan ong onu su obana om dai obana, kakal-a potiti’on soko lolaing po. ¹⁴ Iri yo po pontudukan olalom nga soko kookanan okotou, iri ookanon nu lobuw nosukod-o, ono yo boogian nu lobuw noopot-o mongkunam, koorotian koilo yo popupinig nu owarong om oraai.

¹ Pagka soko ono, sumundur toko yo bana so pontudukan iri orogon oorotian-i, om adang-o puuli’-uli’on-a mongiro-kiro iri pontudukan oruoi oorotian-i. Om adang toko yo mululi’ so pontudukan nu impuunon nu koimaidan toko nu, subai rumorogo toko momaal nu koraayan, poimaid so Kinoringan, ² mokidiu’, suat nu monopop nu ulu nu lobuw mokiborakat, pontudukan suat nu koluli’an kiat so pinotoyan, om pongukuman nu Kinoringan musingkolaid. ³ Bang lila’an toko nu Kinoringan, sumundur toko yo mongoorati nu pontudukan orogon oorotian. ⁴ - ⁶ Subai soko ono toko, so’ bang dai yo poimaid lobuw so si Kristus, dai yo sono iyo kopululi’ koimbagu om rumorogo. So’ iri yo po lobuw olaid-o nokoorati sobana nu Abar Owarong suat so si Kristus, om nokoirasa yo nu kuasa nu Kinoringan, om nokotorima’ yo nu Atod nu Kinoringan, om noilaan-o niyo nu obana ya tinongaran nu Kinoringan, om nokoilo yo iyo nu kuosaan iyo nu Kinoringan, dai yo sono nosiro odapat popululi’ poimaid om rumorogo, ong mintoron iyo poimaid so si Kristus, so’ sobana ko oraai kogoyaan nosiro, ono yo soko momatoi nosiro koimbagu nu Anak nu Kinoringan om mongusiba’ so Iyo so tiningkuangon nu ongo lobuw. ⁷ Iri yo po lobuw mongowaid nu koinginan nu Kinoringan, soko tana’ borokatan nu Kinoringan, ono yo obulit ouranan om tumuu’ sono su tonoman sampai mubua’ om kikountungan songapan nu tana’ oono. ⁸ Nga, bang kutad om ruwi su tumuu’ so tana’ oono, d’ado ya kosudaan nu tana’ oono, om osuat sono nu sumpa nu Kinoringan om susulan. Soko ono yo koompusan nu lobuw mintoron poimaid so si Kristus ukumon nu Kinoringan. ⁹ Oo su kosusulodan ku, pudi pona soko itu tinangar mai, nga bana-bana ko oimaidan kai ya so kou. Oilaan mai nu nosongapan muyu ongo borakat maid so kinosopulan so kou. ¹⁰ Kinoringan-o po nga otulid inowoon. Ondomon-a Niyo onu yo po gogoma’on muyu suat so Iyo, om oilaan-a Niyo nu osamod kou so Iyo kiat so poonabang muyu nu lobuw songapan Niyo kiat nu gulu ri om ono sono tu. ¹¹ Moingin aku nu mogkari’-kari’ kou sumundur mugogoma’on nu owarong musingkopatoi maid so si Yisus, su’ otorima’ muyu onu yo po orap-orapon muyu. ¹² Dai musuat ong odoput kou, ala’ nai’ moingin aku ong minsuw kou nu lobuw, iri sumundur poimaid so Kinoringan, om kiat nu ono koompit sono nosiro nu nijanji nu Kinoringan iiri. ¹³ Iya nu pinujonjian nu Kinoringan so si Abraham nu gulu ri, minongibot Iyo nu tumanon-a Niyo onu yo po nokojanji yo Niyo ri. Pagka d’ado ido opangkat po ko’ Kinoringan, ngaran-a sono Niyo kondiri rinait Niyo mongibot, monapus nu janji Niyo oono. ¹⁴ Minutangar Iyo nu, “Mongojanji Aku nu borokatan Ku ikau, om posuangon Ku sobana solusuk mu,” koo. ¹⁵ Om si Abraham nga otaan mongindad musingkotuman nu Kinoringan nu janji Niyo ri. ¹⁶ Ong kuwai lobuw mongojanji, pokayon niyo ngaran nu lobuw opangkat po ko’ iyo, monapus nu janji niyo oono. ¹⁷ Tinapus-o nu Kinoringan janji Niyo iiri, so’ moingin Iyo ong koorati lobuw kotorima’ nu janji Niyo iiri nu, dai ya Niyo pindaan janji Niyo oono. ¹⁸ Duo gogoma’on nu Kinoringan dai odapat mominda nu isai ya. Koido, janji Niyo, om koduo pinonopusan Niyo nu janji Niyo. Indadi koorati toko sono nu Kinoringan-o po nga dai moomudut. Ono yo ko’, toko lobuw poimaid so Iyo opiot sobana koimaidan, om umarap toko nu kiawi’ nijanji Niyo iiri. ¹⁹ - ²⁰ Obasag sobana om opiot orapan toko nu tumanon-a nu Kinoringan janji Niyo, so’ ido yo Iyo koimaidan toko. Om suat so si Yisus, Iyo yo wowaidon toko. Mundii Iyo so tiningkuangon nu Kinoringan, om sinumiliw nu Imam Maayo musingkolaid suat so toko, soko si Milkisidik, imam nu gulu ri.

¹ - ² Si Milkisidik-o po nga raja dii so bandar Salim nu gulu ri po. Duo orati nu Milkisidik, koido, Raja Obana, om koduo, pagka Raja Salim iyo, orati yo po nu Raja Salim nga Raja Popusulut nu Lobuw. Om sondiang ko ono, si Milkisidik nga imam-a momugogoma’on suat so Kinoringan Maayo Kuasa. Ido iya, nokouli’ si Abraham om ongo soujar niyo kiat so pinongodoogan nosiro nu ongo soujar nu opat raja, binorokatan sono si Abraham ni Milkisidik. Om iya iiri, minonaak sono si Abraham so si Milkisidik sombaagi’ opulu nu kiawi’ gonggamon sinolod niyo ri. ³ Nga d’ado nokosurat suat so si Milkisidik ong isai ino amo niyo, odu aki niyo, om suat so kinopuonakan so iyo intawa kinopotoyan niyo. Iyo yo po nga soko Anak nu Kinoringan, so’ soko ado impuunon niyo om ado kopupusan niyo mugogoma’on soko imam musingkolaid. ⁴ Indadi oilaan toko yo nu sobana ko maayo pangkat ni Milkisidik, so’ insan si Abraham-a su amo nu bansa toko ri, nga minonaak-a so iyo sombaagi’ opulu nu pinusolod niyo ri. ⁵ Indadi, suat nu ongo imam nu lobuw Yaudi, iri solusuk ni Liwi, pinili’ nosiro nu Kinoringan om mongowaid nu Ukum ni Musa, kaalap-a nosiro sombaagi’ opulu nu kountungan nu inong nosiro lobuw Yaudi, pudi pona nosiro kondiri solusuk ni Abraham. ⁶ Si Milkisidik-o po okon ko solusuk ni Liwi, nga notaakan-a iyo ni Abraham sombaagi’ opulu kiat so pinusolod niyo iiri, om binorokatan sono iyo ni Milkisidik. ⁷ Om oilaan toko yo kiawi’ nu, iri yo po lobuw mongoborakat nu lobuw wokon nga maayo po pangkat ko’ lobuw borokatan-o. ⁸ Om suat so ongo imam solusuk ni Liwi, iri koompit nu sombaagi’ opulu nu kountungan nu lobuw Yaudi ri, minatoi-a. Nga ong si Milkisidik, iri kinuan so Buuk nu Kinoringan, om nokaalap sombaagi’ opulu nu pinusolod ni Abraham, soko miau-a iyo! ⁹ Om suat so si Liwi, iri aki nu kiawi’ imam nu lobuw Yaudi, oorotian toko yo nu iya nu minonaak si Abraham so si Milkisidik nu sombaagi’ opulu iiri, soko si Liwi ya kondiri minonaak so si Milkisidik. ¹⁰ Indadi, oorotian toko soko ono, so’ iya nu nokopusambat si Milkisidik om si Abraham, soko dii-dii po si Liwi so koyuwan ni Abraham, aki niyo ri, om iya iiri d’ado po si Liwi. ¹¹ Oilaan toko nu, iya nu notaakan nu Kinoringan porookian toko lobuw Yaudi silaid-i nu Ukum, sinuu’ sono Niyo ongo imam, solusuk ni Liwi potuduk nu Ukum oono so lobuw Israil. Pagka dai winaal nosiro nu musuat ponuu’an oono, subai kuwai sono imam wokon soko si Milkisidik, okon ko kiat so solusuk ni Arun. ¹² Indadi, bang pindaan-o oturan nu imam, Ukum ni Musa nga opinda ya. ¹³ - ¹⁴ Suat so Tuhan toko si Yisus, iri paawon nu imam wagu, Iyo yo po kiat so suku-sakat wokon, ono yo suku-sakat ni Yahuda, om d’ado po ido kiat so suku-sakat Niyo nourug nu imam. Om oilaan toko nu, Tuhan toko no kiat so suku-sakat ni Yahuda, om d’ado pontudukan ni Musa gulu ri nu kuwai osiliw nu imam kiat so suku-sakat ni Yahuda. ¹⁵ Nga otolang-o sono nu nopinda yo nu Kinoringan oturan suat nu imam silaid-i om Ukum ni Musa, so’ nokologa’ yo si Kristus sumiliw nu imam wagu, soko si Milkisidik. ¹⁶ Si Yisus-o po okon ko soko imam wokon nu nourug nu imam so’ solusuk nu Liwi mongowaid nu Ukum ni Musa. Nga sinumiliw Iyo nu imam so’ maayo kuasa Niyo om miau Iyo musingkolaid. ¹⁷ Nokosurat-o so Buuk nu Kinoringan nu, “Ikau-o su Imam musingkolaid, soko si Imam Milkisidik gulu ri,” koo ri. ¹⁸ Kiat nu ono, oorotian toko nu, ginonti’an-o nu Kinoringan oturan toko gulu ri, so’ d’ado kosudaan nu oturan nu ugama oono om dai ya koponabang so toko. ¹⁹ Iri yo po Ukum ni Musa dai kopongimbarong sobana nu kogoyaan toko so tiningkuangon nu Kinoringan. Ono yo ko’ minonaak Kinoringan so toko nu orapan owarong po om kiat so orapan toko oono korani toko sono so Iyo. ²⁰ Sondiang ko ono, pinongurugan nu Kinoringan so si Yisus nu imam nga maid po nu ibot. Okon ko soko ono nu gulu ri, iya nu urugon lobuw kiat so kotuturan ni Liwi nu imam. ²¹ Nga si Yisus-o po siniliw nu imam maid nu ibot iya nu pinutongaran nu Kinoringan soko itu nu, “Suat so Aku, Kinoringan, mongibot Aku nu dai yo mupiduo inawo Ku no nu, Ikau-o su imam musingkolaid,” koo ri. ²² Pagka minongojanji Kinoringan soko iri suat so si Yisus, si Yisus nga monuman nu porojonjian wagu nu owarong po ko’ porojonjian laid-i. ²³ Gulu ri, bang matoi ido imam solusuk ni Liwi, subai ogonti’an iyo nu lobuw wokon nu gogoma’on nu imam. ²⁴ Nga si Yisus-o po miau musingkolaid, om gogoma’on Niyo soko imam d’ado yo wokon kosulang. ²⁵ Ono yo ko’ kopomiau Iyo nu ono sono tu om musingkolaid nu isai-isai ya lumoga’ so Kinoringan ong maid nosiro so Iyo, so’ miau Iyo musingkolaid om mindamo Iyo so Kinoringan suat so nosiro. ²⁶ Si Yisus-o su Imam Maayo toko om moonabang so toko. Pinotondiang Iyo nu Kinoringan kiat so lobuw kikoraayan, om Iyo yo su maayo pangkat so surga. ²⁷ Si Yisus-o po okon ko soko Imam Maayo gulu ri, nu subai runat-runat pousaa’ suat so kosola’an nosiro kondiri om kosola’an nu lobuw suang. Nga bang si Yisus insan-insan-a Iyo nopousaa’ so Kinoringan, iya nu minatoi Iyo suat nu kosola’an nu kolobuwan. ²⁸ Mongowaid nu Ukum ni Musa, lobuw-a su siliwon nu Imam Maayo pudi pona kikoraayan nosiro. Nga kiat nu iri, ginonti’an-o nu Kinoringan Ukum silaid-i, ono yo tinapus-o Niyo Anak Niyo, iri d’ado muad koraayan-i sumiliw nu Imam Maayo musingkolaid.

¹ Tomod ku yo po mutangar soko ono tayon ku ong oorotian toko nu kuwai Imam Maayo toko mogom-ogom so umpak wanan nu Kinoringan nu ono sono tu mogkuasa maid so Iyo, ono yo si Yisus. ² Mugogoma’on Iyo soko Imam dii so sosombooyangan obana so surga winaal nu Tuhan, okon ko winaal nu lobuw. ³ Ido soido nu Imam Maayo nu gulu ri tinantu yo nu potaak nu onu yo po nitaak toomod so Kinoringan, om pousaa’ so Iyo nu pongayam. Soko ono ya pudi Imam Maayo toko nga kuwai ya sogit nitaak Niyo so Kinoringan. ⁴ Bang tuui-tuui so wonuo tu si Yisus, okon ko imam Iyo so’ kuwai yo imam wokon so wonuo tu solusuk ni Liwi, potaak nu onu yo po so Kinoringan, mongowaid nu ponuu’an so Ukum ni Musa. ⁵ Gogoma’on-o po nu ongo imam iiri soko gambar-a nu onu yo po gogoma’on ni Yisus so surga, nga dai po otolang bana nu tuui-tuui po so wonuo tu. Oilaan toko ono, so’ iya nu pinomaalan ni Musa nu Bosalag Sosombooyangan-i, tinangar iyo nu Kinoringan nu, “Ondomo yo, subai waalon mu kiawi’ oono mongowaid nu niposiou Ku so ikau so timpak nu bulud-i,” koo. ⁶ Nga kosiono tu, gogoma’on ni Yisus soko imam, owarong po ko’ gogoma’on nu ongo imam gulu ri. Om soko ono ya gama’ Niyo nu ono sono tu nu koponorima’ toko nu Kinoringan, owarong po bana ko’ gama’ nu gulu ri. Om gama’ nu ono sono tu oono, impuunon nu ongo janji wagu nu Kinoringan owarong po ko’ janji laid-i. ⁷ Gama’ nu Kinoringan togna ri, dai koponabang bana so toko, so’ bang koponabang ono so toko, ado yo kosudaan mongojanji po Kinoringan koinduo. ⁸ Nga dai musuat so koinginan nu Kinoringan kogoyaan nu ongo lobuw dai minongimaid nu janji Niyo laid-i, so’ nokosurat-o tangar Niyo so Buuk nu Kinoringan nu, “Kuwai ido iya ong wagu gonti’an Ku porojonjian Ku gulu ri nu porojonjian wagu so lobuw Israil om lobuw Yahuda. ⁹ Porojonjian wagu Ku oono okon ko soko porojonjian Ku so odu aki nosiro ri iya nu pinongowitan Ku so nosiro lumabus so wonuo nu Masir-i. Dai minaid nosiro nu porojonjian Ku so nosiro ri, ono yo ko’ dai pinoduli’ Ku nosiro. ¹⁰ Nga ono sono tu, mongojanji Aku koimbagu so lobuw Israil nu, ologa’ ong wagu, poorati Aku so nosiro nu kiawi’ tomod Ku no sampai obingasip nosiro so Aku. Om Aku yo su Kinoringan usaa’on nosiro, om osongapan Ku nosiro. ¹¹ Indadi dai yo muru’ mututuduk nosiro sondad bansa suat so Aku. Om dai muru’ kuwai po lobuw potarang so sondad nosiro nu bansa ong isai Aku, so’ iya oono kiawi’ lobuw, kiat-o so d’ado pangkat kumoo yo so kipangkat nga kotondu’ ya so Aku. ¹² Ompunon Ku kiawi’ kosola’an nosiro no, om lupaanan Ku yo kiawi’ koraayan nosiro no,” koo ri. ¹³ Indadi, pagka nokoputangar-o Kinoringan nu janji wagu, koorotian ado yo kosudaan nu janji laid-i. Onu yo po otalup om olaid-o, gonti’an sono nu owagu.

¹ Iya nu minongojanji Kinoringan so lobuw Israil nu togna ri, minontuduk Iyo so nosiro nu gama’ mongusaa’ so Iyo, om kuwai poongusaa’an nosiro so Iyo nu lobuw su minomaal. ² Poongusaa’an oono bosalag kimbos winaal, om kuwai duo bilik. Bilik dilabus-i ingoranan nu Bilik Osusi. So Bilik Osusi oono kuwai potimpakan nu politaan om potimpakan nu baang-baang niusaa’ so Kinoringan. ³ Bilik dilalom-i ingoranan nu Bilik Sobana ko Osusi, om kuwai tabir niwolad so puola’an nu duo bilik oono. ⁴ So asuw nu Bilik Sobana ko Osusi oono tinou’an nosiro nu ranggar omas poonusulan nu komanyan, om kuwai po nitou’ nosiro nu Boul Porojonjian linopisan nu omas pinoosuwan nu janji nu Kinoringan, togoyog omas kiasuw nu ingkookan kiat so Kinoringan ingoranan nu maana, susukud ni Arun minutolotad-i, om duo nokaping watu aalus pinosuratan nu opulu ukum nu Kinoringan. ⁵ So timpak nu Boul oono, kuwai duo tinindobuw kiolad ingoranan nu korub. Korub oono soko ponondu’an nu dii-dii Kinoringan so asuw nu bilik oono. Niungkolad kiduo korub oono so tutub nu boul-i, iri yo tontong pokiompunan nu kosola’an nu lobuw. Nga kiawi’ nu ono dai ku odapat potarang nu ono sono tu nu osorisid. ⁶ Soko ono yo gama’ pinongoturan nu kiawi’ so asuw oono, om runat-runat ongo imam masuw so bilik togna ri mugogoma’on nu onu yo po nisuu’ nu Kinoringan. ⁷ Nga bilik koduo ri, Imam Maayo ya su kowasa masuw, om insan-o sontoun masuw iyo dii. Koduung masuw iyo nai, subai mongowit iyo nu raa’ nu pongayam niusaa’ so Kinoringan, mongidu’ nu kosola’an niyo om lobuw wokon, iri kosola’an okon ko tinomod-i. ⁸ Nopointolang Atod nu Kinoringan so kiawi’ oturan iiri, nu dai po kaasuw lobuw kosuangan so Bilik Sobana ko Osusi iiri ong kakal po mongusaa’ lobuw so bosalag sosombooyangan iri kimbos winaal-i. ⁹ Indadi, kiawi’ oono poinongan nu iya nu kosiono tu. Orati yo po nu ono nga onu yo po niusaa’ nu ongo lobuw so Kinoringan, dai ya kopongidu’ nu kosola’an nu lobuw mongusaa’ oono, musingkoilo nosiro so inawo nu noidu’an-o nosiro nu kosola’an. ¹⁰ Poongusaa’ so Kinoringan maid nu adat suat so mongokan, monginum om poomuugas, nga so dilabus-a nu koyuwan mongowaid nosiro nu adat oono, dai ya kosondot so inawo nosiro. Kikosudaan-a ono musingkologa’ nu pongogonti’an nu Kinoringan nu oturan wagu. ¹¹ Nga nokologa’ yo si Yisus, sumiliw nu Imam Maayo suat so oturan wagu nu ono sono tu nu owarong po ko’ gulu ri. Om minasuw Iyo so waloi sosombooyangan owarong po, nu okon ko winaal nu lobuw om okon ko so wonuo tu. ¹² Om insan-o minasuw si Yisus so Bilik Sobana ko Osusi so waloi sosombooyangan dii so surga musingkolaid. Okon ko minongowit Iyo nu raa’ nu kambing kusoi intawa raa’ nu uyog nu sapi, nga raa’ Niyo kondiri su inowit Niyo. Om ono yo su pinongolukat Niyo so toko kiat so pongukuman nu Kinoringan musingkolaid. ¹³ Silaid-i po, maid nu oturan nu ugama, bang kuwai ido koyuwan nosaiman, subai tiasan nu raa’ nu kambing om sapi om tiasan po nu awu nu uyog nu sapi inompu’, su’ ougasan lobuw osaim oono. ¹⁴ Indadi, bang raa’ nu pongayam nga kopongidu’ nu koraayan nu lobuw, makin-o po ong raa’ ni Yisus su kikuasa nga kopongidu’ nu koraayan so inawo toko. Kogoyaan toko ado kosuda-sudaan-i inugasan-o nu raa’ ni Kristus su’ kopugogoma’on toko nu obana suat so Kinoringan miau musingkolaid. ¹⁵ Om ono yo ko’ nourug si Kristus nu wowaidon toko lumoga’ so Kinoringan mongowaid nu gama’ so porojonjian wagu, su’ toko nu pinaau nu Kinoringan ourug nu songapan Niyo, kotorima’ nu kiawi’ koworongan nijanji nu Kinoringan. Ourug soko ono, so’ minatoi-o si Yisus mongidu’ nu kosola’an toko iya nu maid-waid toko po nu porojonjian laid-i. ¹⁶ Bang kuwai lobuw monurat nu janji nu nipopusaka niyo onu yo po orata’ niyo so anak niyo ong matoi iyo, subai otantu yo sobana nu minatoi-o iyo om osongapan nai’ nu anak oono orata’ niyo no. ¹⁷ Dai po opakai janji niyo oono ong miau po iyo. Nga bang minatoi-o iyo opakai nai’ sono janji niyo oono. ¹⁸ Ono yo ko’ tadi’ opakai porojonjian togna ri ong kuwai yo gorason nu pongayam niusaa’ so Kinoringan. ¹⁹ Togna po, nopaabar si Musa nu kiawi’ ponuu’an so Ukum niyo so ongo lobuw Israil. Noopod iri, minongogaras iyo sono nu uyog nu sapi om kambing kusoi om raa’ ri ginowulan nu sungoi, om minoongoi iyo nu ombiau om pinopuongkos nu bulu nu dumba omiang, om niloob niyo so raa’ ri, om nitias sono so buuk pinosuratan nu Ukum iiri om so ongo lobuw Israil-i. ²⁰ Laid niyo momaal nu iri, minutangar iyo nu, “Itu yo raa’ pinonopusan nu janji nu Kinoringan, iri nisuu’ Niyo so kou nu subai waidon muyu,” koo. ²¹ Noopod iri, nitias sono niyo raa’ iiri so waloi sosombooyangan-i om so kiawi’ gonggamon so waloi oono, iri popokayon mongusaa’ ri. ²² Bana yo, mongowaid nu Ukum ni Musa, ogon-ogon kiawi’ tiniasan nu raa’ su’ oborisi so tiningkuangon nu Kinoringan, so’ subai kiraa’ om oidu’ nai’ koraayan nu lobuw. ²³ Suat so waloi sosombooyangan nu lobuw Yaudi so wonuo tu om kiawi’ popokayon mongusaa’, kiawi’ nu ono soko gambar-a nu waloi sosombooyangan dii so surga. Om kiawi’ popokayon mongusaa’ nu Kinoringan so waloi sosombooyangan oono tiasan nu raa’ pongugas. Nga waloi sosombooyangan so surga, subai raa’ ni Yisus su pongugas, iri owarong po ko’ raa’ nu pongayam. ²⁴ Ono yo ko’ minatoi si Yisus om nokotuntug raa’ Niyo om minasuw Iyo so waloi sosombooyangan obana so surga. Om dai insan Iyo minasuw so Bilik Sobana ko Osusi so waloi sosombooyangan so wonuo tu, so’ ono yo po soko gambar-a nu waloi sosombooyangan obana so surga. Om kosiono tu, Iyo yo su wowaidon toko om moonabang so toko so tiningkuangon nu Kinoringan. ²⁵ Suat so Imam Maayo nu lobuw Yaudi, toun-toun masuw iyo so Bilik Sobana ko Osusi so waloi sosombooyangan so wonuo tu pousaa’ nu raa’. Nga ong si Yisus, insan-o minatoi nopotuntug nu raa’ Niyo, om okon ko dadan. ²⁶ Bang soko ono dadan, koorotian kiat po so kinourugan nai’ nu wonuo tu sampai kosiono, subai muuli’-uli’ Iyo osonsara’ matoi. Nga okon-a ko soko ono, so’ insan-o Iyo linumoga’ mongidu’ nu koraayan toko, nu iri kinopotoyan om kinotuntugan nu raa’ Niyo ri. ²⁷ Tinantu yo nu Kinoringan nu, kiawi’ lobuw insan-o matoi, om ukumon sono Niyo nosiro. ²⁸ Soko ono ya pudi si Kristus, insan-o Iyo minatoi, nopousaa’ nu koyuwan Niyo pongidu’ nu koraayan nu lobuw suang. Ong lumoga’ Iyo koimbagu so wonuo tu, okon-o sono ko mongidu’ po Iyo nu koraayan nu lobuw, nga momiau nu ongo lobuw, iri mongimat nu kologa’an Niyo.

¹ Oorotian toko nai’ nu ono sono tu nu iri yo po Ukum ni Musa nga soko gambar-a nu onu yo po owarong sobana lumoga’ ong wagu, ono yo gogoma’on ni Kristus. Om mongowaid nu Ukum ni Musa, subai toun-toun pousaa’ so Kinoringan, om kiat nu ono oorotian toko bana nu niusaa’ so Kinoringan oono dai kopongimbarong nu lobuw sumiliw nu d’ado muad koraayan so tiningkuangon Niyo. ² So’ bang bana-bana nu koidu’ niusaa’ oono nu kiawi’ koraayan nosiro, iri lobuw pousaa’ ri dai yo koirasa nu kakal po kikoraayan nosiro, om mingkoyod-o sono nosiro pousaa’ so Kinoringan nu pongayam. ³ Nga sobana yo, iri yo po niusaa’ nosiro toun-toun-i poondom so nosiro nu kuwai po koraayan nosiro, ⁴ so’ raa’ nu sapi om kambing kusoi iiri dai ya kopongidu’ nu koraayan. ⁵ Oilaan toko nu iri yo po raa’ nu pongayam dai ya koidu’ nu koraayan, so’ iya nu kinologa’an ni Kristus so wonuo tu, minutangar Iyo so Kinoringan Amo Niyo nu, “Inurug Mu yo koyuwan Ku tu ganti’ nu pongayam niusaa’ so Ikau, ⁶ so’ dai Ko yo moingin nu pongayam tinunuan nu niusaa’ intawa raa’ nu pongayam, pongidu’ nu kosola’an nu lobuw,” koo. ⁷ Minutangar po si Kristus so Kinoringan nu, “Oo Kinoringan, tidi Aku yo, linumoga’ Aku momaal nu onu yo po nisuu’ Mu ri, soko iri nokosurat so Buuk ni Musa, nu Aku su kuanon,” koo ri. ⁸ Gulu po minutangar si Kristus so Kinoringan nu, “Dai Ko yo moingin nu kuwai po gorason nu niusaa’ so Ikau, om dai Ko yo moingin nu pongayam tunuan niusaa’ so Ikau, om dai Mu yo torima’on raa’ nu pongayam pongidu’ nu koraayan,” koo. Minutangar Iyo soko ono pudi pona gama’ oono ponuu’an-a nu Ukum ni Musa. ⁹ Om minutangar po si Kristus nu, “Oo Kinoringan, tidi Aku yo. Linumoga’ Aku momaal nu onu yo po nisuu’ Mu ri soko nokosurat so Buuk ni Musa, nu Aku su kuanon,” koo. Na orati yo po nu ono, ginonti’an-o nu Kinoringan poongusaa’ so Iyo nu gulu ri nu poongusaa’ so Iyo wagu, nu kinopotoyan ni Kristus. ¹⁰ Om pagka nowaid-o ni Yisus koinginan nu Kinoringan, nu insan-o Iyo minatoi, noidu’an toko yo sono nu kiawi’ koraayan. ¹¹ Runat-runat imam nu Yaudi posundur nu gogoma’on nosiro pousaa’ so Kinoringan mongowaid nu Ukum ni Musa, nu iri ya om iri niusaa’ nosiro, nga ongo niusaa’ nosiro oono dai ya kopongidu’ nu koraayan. ¹² Nga ong si Yisus, insan-o minatoi mongidu’ nu koraayan, om ado ya kosudaan muuli’-uli’ Iyo pousaa’. Om noopod-o po Niyo gogoma’on oono, minogom-o sono so umpak wanan nu Kinoringan maid mogkuasa. ¹³ Om dii-dii yo Iyo nu kosiono tu, mongindad nu iya wagu nu nipodoog nu Kinoringan so Iyo alod-alod Niyo. ¹⁴ Iri yo kinopotoyan Niyo ri su nokopongidu’ nu koraayan toko, om nosiliw toko nu lobuw songapan Niyo musingkolaid. ¹⁵ Om Atod nu Kinoringan nga pokoilo so toko nu obana ono musuat nu tinangar nu Kinoringan nu, ¹⁶ “Itu yo su porojonjian wagu Ku so lobuw songapan Ku. Poorati Aku so nosiro nu kiawi’ tomod Ku sampai otatap nosiro mongowaid so Aku,” koo. ¹⁷ Om minutangar-a Atod nu Kinoringan nu, “Lupaanan Ku yo kiawi’ kosola’an om koraayan nosiro ri,” koo ri. ¹⁸ Indadi, pagka noidu’ yo kosola’an om koraayan, d’ado yo sono kosudaan nu kuwai po niusaa’ toko pongidu’ nu koraayan. ¹⁹ Oo su kosusulodan ku, pagka minatoi-o si Yisus, dai toko yo sono lumaa’ mogdu’a so Iyo, soko mian so Bilik Sobana ko Osusi so waloi sosombooyangan so surga. ²⁰ Tinaakan toko yo ni Yisus nu kowiawan musingkolaid kiat so kinopotoyan Niyo ri. ²¹ Om Iyo yo su Imam Maayo nu ono sono tu suat so toko lobuw poimaid so Kinoringan. ²² Pagka soko ono, rumani toko yo so Kinoringan maid nu owarong inawo om opiot koimaidan, so’ noilaan toko yo nu noborisi toko yo nu Kinoringan nu kinopotoyan ni Yisus, ono yo noidu’ yo koraayan toko, om nodiu’ toko yo, ponondu’an nu nougasan toko yo nu Kinoringan. ²³ Oilaan toko nu opongoorapan sobana Kinoringan, om waalon Niyo onu ya nijanji Niyo so toko. Indadi sumundur toko yo bana umarap nu kaalap toko nu kowiawan musingkolaid ong wagu. ²⁴ Opatut ong mupopoduli’ toko, su’ kopusosamod toko om mutotabang nu gogoma’on owarong. ²⁵ Om sumundur toko yo owasa muimpug mongusaa’ so Kinoringan. Adang-o minsuw nu wokon lobuw poimaid odoput mian mongusaa’. Ala’ nai’ muiingol toko yo muimpug mongusaa’, so’ oilaan toko nu dai yo olaid kologa’an koimbagu ni Tuhan Yisus. ²⁶ Nga bang koorati toko yo nu pontudukan obana kiat so Kinoringan, om tomodon toko ya sumundur momaal nu koraayan, d’ado yo sono niusaa’ torima’on nu Kinoringan poidu’ nu koraayan toko. ²⁷ Ono po su kuwai pongukuman nu Kinoringan om koo’ungot Niyo soko apui mongompu’ nu kiawi’ lobuw lumawan so Iyo no! ²⁸ Gulu ri, isai dai mongowaid nu Ukum ni Musa, potoyon nu d’ado muad luluud, maid nu duo intawa tolu koyuwan pointolang. ²⁹ Indadi, bang soko ono, owogat po pongukuman so lobuw mongobisig nu Anak nu Kinoringan, om momikir nu d’ado kosudaan nu kinopotoyan ni Kristus, om mongusiba’ nu Atod nu Kinoringan, iri monamod so toko, om momikir nu d’ado kosudaan nu kinopotoyan ni Kristus, ampa raa’ yo Niyo ri su ponondu’an nu porojonjian nu Kinoringan nu idu’on Niyo koraayan nosiro. ³⁰ Om musuat nai’ nu owogat sobana pongukuman so nosiro so’ noilaan toko yo nu Kinoringan-o su minutangar nu, “Aku yo su opatut monunsuli’. Aku yo su mongukum so nosiro suat so kogoyaan nosiro oraai-o,” koo. Om minutangar po Iyo nu, “Aku yo su mongobisara’ nu kolobuwan Ku,” koo. ³¹ Sobana ko koindolaa’ pongukuman nu Kinoringan, iri miau musingkolaid. ³² Oo su kosusulodan, ondomo muyu yo gulu ri, iya nu tumimpuun kou nai’ koorati nu pontudukan obana, om nopoimaid kou yo sono so si Yisus. Iya iiri nosonsara’ kou sobana, nga otatap kou ya tumaan, om dai kou ya minulaiw kiat so koimaidan muyu. ³³ Oilaan ku nu inusiba’an kou so tiningkuangon nu lobuw suang om kowaid-waid kou so lobuw wokon sumusaan, iri nosuat nu kosonsora’an soko ono. ³⁴ Om kosimpor kou oluluudan nu lobuw nojiil. Om pudi pona nosolodan kou nu orata’, osanang-a inawo muyu, so’ oilaan muyu nu kuwai orata’ muyu owarong po om otaan musingkolaid dii so surga. ³⁵ Pagka soko ono, adang kou yo osikap oliongan nu orapan, nga tumatap-o bana poimaid, so’ taakan kou ya nu owarong po kiat so Kinoringan. ³⁶ Totog kou yo sumundur momaal nu koinginan nu Kinoringan, musingkotorima’ muyu nu janji notapus-o Niyo iiri. ³⁷ Waalo muyu yo ono so’ nokosurat-o so Buuk nu Kinoringan suat so si Kristus nu, “Sontagal po om lumoga’ yo Iyo, iri kuanon nu lumoga’ ri, om lumoga’ Iyo osikap. ³⁸ Om iri yo po lobuw otulid inawo so’ poimaid so Aku, taakan nu kowiawan musingkolaid. Nga bang kuwai so nosiro mulaiw kiat tuui so Aku, sobana ko dai osanang inawo Ku so nosiro,” koo ri. ³⁹ Nga, toko yo po su kosusulodan ku, okon ko lobuw minulaiw kiat so koimaidan toko om insaadan sono nu Kinoringan, ono ya nga toko yo po poimaid so Kinoringan om sinopulan kiat so pongukuman Niyo.

¹ Orati yo po nu kikoimaidan nga ono yo otatap inawo toko koilo nu taakan toko nu Kinoringan nu onu yo po orap-orapon toko, om kiat so koimaidan toko, oilaan toko nu obana ya onu yo po dai po osiowan toko. ² Suat so lobuw silaid-i, rinayou nosiro nu Kinoringan so’ poimaid nosiro so Iyo. ³ Pagka kikoimaidan toko, oilaan toko nu kiawi’ so wonuo tu inurug nu Kinoringan kiat so tangar Niyo. Ono yo ko’, oilaan toko nu onu yo po osiou nourug kiat so onu yo po dai osiou. ⁴ Pagka kikoimaidan si Abil gulu ri, nitaak niyo so Kinoringan owarong po ko’ nitaak nu aka’ niyo si Kain. Tinorima’ nu Kinoringan nitaak ni Abil om pagka poimaid iyo nu Kinoringan, rinayou iyo nu Kinoringan nu iyo yo su lobuw obana. Pudi pona olaid-o patoi ni Abil, kakal-a otudukan toko niyo nu ono sono tu nu koopiot nu koimaidan niyo ri. ⁵ Om si Inuk nga kinakat miau-wiau so surga so’ nopoimaid iyo nu Kinoringan, su’ dai iyo koirasa nu kopotoyan. Om ado ido nokooyang so iyo so’ inowit-o iyo nu Kinoringan. Nokosurat so Buuk nu Kinoringan nu, dai po nokakat iyo so surga, nokoponginsanang iyo nu Kinoringan. ⁶ Nga lobuw d’ado koimaidan, dai koponginsanang nu inawo nu Kinoringan. Isai lumoga’ so Kinoringan, subai poimaid nu kuwai ya Kinoringan, om poimaid po nu kuwai itaak nu Kinoringan isuli’ so lobuw modium so Iyo no. ⁷ Pagka opiot koimaidan ni Nuu, pinokoilo iyo gulu ri nu Kinoringan nu lusuon, om nopoimaid-a si Nuu pudi dai po osiou nu lusuon-o. Indadi, minomaal iyo sono nu kapal maayo om kapal-o oono su nokoponapul so iyo om anak sawo om nokotakin so iyo, nu nologa’ yo sono lusuon. Pagka nopoimaid si Nuu, pinokobana iyo nu Kinoringan, om inukum sono nu Kinoringan lobuw kikoraayan-i. ⁸ Pagka opiot koimaidan ni Abraham, minongowaid-a iyo nu ponuu’an nu Kinoringan nu poianon so tontong, iri nijanji nu Kinoringan so iyo ri, om minompanou-a iyo pudi dai oilaan niyo ong siombo kologa’an niyo. ⁹ Pagka opiot koimaidan niyo, minolak iyo soko porantau so tontong nijanji nu Kinoringan so iyo iiri. Minogol iyo so bosalag kimbos. Om soko iri ya pudi si Isak om si Yakub nokotorima’ ya nu janji kiat so Kinoringan nu iposongapan so nosiro tana’ iiri. ¹⁰ Minogol iyo dii, mongindad nu bandar dai oraag musingkolaid dii so surga. Om Kinoringan-o su mongowaal nu bandar oono. ¹¹ Om pagka kikoimaidan si Sara, sawo ni Abraham, kianak-a iyo pudi otuo yo sobana om tomonang po sono. Oilaan-a niyo nu tumanon-a nu Kinoringan janji Niyo ri. ¹² Pudi pona otuo yo sobana si Abraham om dai yo kaabut, nga kisolusuk-a iyo soko korombituon koosuang om pantai so imbing nu raat. ¹³ Nga kiawi’ lobuw kikoimaidan so Kinoringan nu gulu ri minatoi-o, dai po nosongapan nosiro tana’ nijanji nu Kinoringan iiri. Pudi pona soko ono, kakal-a nosiro poimaid so’ oilaan nosiro nu otorima’ ya nosiro ong wagu nijanji nu Kinoringan so nosiro ri, soko osiou nosiro kiat so dirawu’, om koirosaan nosiro nu soko notorima’ ya nosiro. Iri yo ko’ minutangar nosiro nu, okon-a ko so wonuo tu su polak bana yo nosiro. ¹⁴ Lobuw mutangar soko ono pointolang nu okon-a ko tuui so wonuo su polak nosiro otatap, nga modium po nosiro nu tontong kototogan-o nosiro molak. ¹⁵ Nga okon-a ko wonuo nolaiwan-o nosiro ri su orap-orapon nosiro, so’ bang iri po orap-orapon nosiro, tantu kopululi’ po nosiro so wonuo iiri. ¹⁶ Nga koimpongan-o po sobana nosiro so wonuo owarong po ko’ ono, ono yo so surga. Ono yo ko’, dai ya oiyu’an Kinoringan nu paawon nosiro nu Iyo yo su Kinoringan nosiro, so’ nowaalan-o nosiro nu Kinoringan nu tontong popolakan so nosiro. ¹⁷ Pagka kikoimaidan si Abraham, niusaa’ niyo so Kinoringan ido yo anak niyo ri, si Isak, iya nu pinonginaman so iyo nu Kinoringan. Pudi pona minongojanji Kinoringan so si Abraham nu Kinoringan nu kisolusuk iyo, nga nolila’ ya iyo pousaa’ nu anak niyo oono so Kinoringan. ¹⁸ Nokoputangar-o Kinoringan so si Abraham suat nu janji Niyo iiri nu, “Kiat-o so anak mu si Isak su kodopatan mu nu osuang solusuk iri janji Ku so ikau gulu ri,” koo. ¹⁹ Pagka poimaid si Abraham nu kikuasa ya Kinoringan mongoluli’ nu lobuw minatoi, iri yo ko’ notantu yo ni Abraham nu oluli’an-a si Isak. ²⁰ Pagka kikoimaidan si Isak, binorokatan niyo si Yakub om si Isau anak niyo ri suat so sunduron nosiro. ²¹ Pagka kikoimaidan si Yakub, binorokatan niyo inonakan ni Yusup uyud niyo matoi-i, om sinumondiu iyo so susukud niyo ri, om minongusaa’ so Kinoringan. ²² Pagka kikoimaidan si Yusup, uyud niyo matoi-i, minutangar iyo nu kolabus-a solusuk nu Israil kiat so Masir, om nipoowit niyo so nosiro bangkai niyo ri polobong so wonuo loga’on nosiro ri. ²³ Pagka kikoimaidan ino amo ni Musa, dai ya nosiro linumaa’ nu ponuu’an nu raja Masir nu nipopatoi kiawi’ anak kusoi nu lobuw Yaudi, ala’ nai’ nisusut nosiro si Musa tolu nowulan laid kiat nu kinopuonakan so iyo ri, so’ osiou nosiro nu oparu’ sobana lolaing oono. ²⁴ Pagka kikoimaidan si Musa, naayo po iyo, minulaiw sono iyo kiat so waloi nu raja ri so’ dai iyo moingin paawon nu anak iyo nu raja woinoi nu Masir. ²⁵ Moingin po iyo maid sumonsara’ so lobuw nu Kinoringan ko’ sontagal-o koirasa nu kosonangan so wonuo tu. ²⁶ Tinapus-o niyo nu owarong po rogam-rogamon iyo nu murosiou iyo nu kologa’an nu raja nijanji nu Kinoringan, ono yo si Kristus, ko’ kosongapan nu kiawi’ orata’ otaas sobana, iri songapan nu lobuw Masir, so’ mongindad iyo nu itaak nu Kinoringan ong wagu. ²⁷ Pagka kikoimaidan si Musa, minulaiw iyo kiat so Masir nu okon-a ko maid nu maa’-laa’ oungotan nu raja. Ono ya nga sinumundur-a iyo soko bana nosiou-o niyo Kinoringan nu dai osiou-o. ²⁸ Om kiat-a so koimaidan ni Musa, minurami-rami iyo nu Paska, pongoondoman nu kinolaiwan nosiro kiat so Masir. Om minonuu’ iyo paanid potias nu raa’ so longobon nu waloi nu lobuw Israil-i, su’ dai opatoi inonakan ongko kusoi nosiro nu Susuu’on Moomatoi. ²⁹ Pagka kikoimaidan so Kinoringan bansa Israil, odu aki toko ri, minuripau nosiro so Raat Omiang, soko mompanou-a nosiro so tona’on, nga iri soujar nu Masir-i noongolosod iya nu muripau nosiro. ³⁰ Pagka kikoimaidan lobuw Israil, nokologa’ nosiro so rinding watu so bandar nu Yiriku, linumiwut nosiro koturuan laid sampai rinuntu’ nu Kinoringan rinding watu iiri. ³¹ Om gulu ri so bandar Yiriku, kuwai ido woinoi sundal ingoranan so si Raab, minonabang nu soujar nu Israil, moonoyinu nu bandar oono. Indadi, dai ya sono nokowowaid iyo so kolobuwan lumawan so Kinoringan-i nopatoi, so’ kikoimaidan-a iyo. ³² Osuang po tongaron ku suat so koimaidan ni Gidiun, ni Barak, ni Simsun, ni Ipta, ni Raja Daud, ni Samuil om ongo poo’abar nu Kinoringan, nga dai ku osorisid mutangar gogoma’on nosiro ri. ³³ Pagka kikoimaidan nosiro, kuwai so nosiro nokopongodoog nu pogkuosaan nu raja so wonuo wokon, om nokopogkuasa sono nu ooluk. Om kuwai ya so nosiro nokotorima’ nu nijanji nu Kinoringan so nosiro ri, om kuwai ya so nosiro nokoponuyu’ nu singa nga dai nopatoi. ³⁴ Kuwai so nosiro nisubo so apui, nga dai ya noompu’, om kuwai ya so nosiro dai nopatoi nu alod-alod nosiro. Kuwai ya so nosiro okugui, nga obasag sono so’ kikoimaidan nosiro. Om kuwai nu sobana ko opogi, sampai kopongodoog nu ongo soujar kiat so wonuo sondiang. ³⁵ Om kowoinoyan opiot koimaidan nu gulu ri nu opiot koimaidan, noluli’an koimbagu anak nosiro. Om kuwai ya lobuw poimaid so Kinoringan gulu ri pinujiil. Om pudi pona nosonsara’ nosiro sampai minatoi, nga dai ya minintoron nosiro poimaid, so’ moingin nu kowiawan owarong po. ³⁶ Kuwai po lobuw poimaid nu gulu ri pinubaagan, tinampar, kinogosan nu rantai om jiniil. ³⁷ Kuwai ya pinilai nu watu sampai matoi, om kuwai ya piniduo mongogorogadi, om kuwai ya winintos. Kuwai ya nu kulit-o nu dumba intawa kulit nu kambing su pokakas nosiro manou-panou, ponondu’an nu sobana ko omiskin nosiro. Inindoraai om sinonsara’ nosiro. ³⁸ Kuwai so nosiro sinosogan mulaiw kiat so waloi nosiro om manou-panou sono soko lobuw nopalid so padang pantai om so kobubuludan, om mogol nosiro so uang nu watu om uang nu tana’. Ogon-ogon dai otoop nosiro miau so wonuo tu so’ owarong nosiro om opiot koimaidan. ³⁹ Sobana ko osanang inawo nu Kinoringan so lobuw oono so’ kikoimaidan nosiro. Nga soko ono pona, dai nokotorima’ nosiro nu iri nijanji nu Kinoringan so nosiro ri. ⁴⁰ Dai nokotorima’ nosiro nu ono so’ kuwai yo tinantu nu Kinoringan nu owarong po suat so toko. Moingin Iyo ong minsuw toko so nosiro nu gulu ri sampai d’ado yo koraayan toko so tiningkuangon Niyo.

¹ Suat so toko, poimaid toko so Kinoringan om soko muimbas toko mundak. Om osuang po poimaid nu gulu ri nopoorati so toko nu sobana ko opatong Kinoringan. Pagka soko ono, wiliwi toko yo onu yo po kopudik nu inawo toko om koraayan mogkuasa so toko no. Om monotos toko yo mundak sumundur so loga’on toko. ² Toroidoo toko yo momikir si Yisus, so’ Iyo yo su koimaidan toko kiat nu timpuun, om Iyo yo su mongipat so toko sampai so pongoowi’an. Om pagka nopikiran-o Niyo laid nu kikosudu’an Iyo ong wagu, tinaanan-a Niyo kosonsora’an Niyo so kayu salib om dai yo Niyo inondom koiyu’-iyu’ Niyo nu matoi so salib. Om ono sono tu, mogom-ogom Iyo so umpak wanan nu Kinoringan maid mogkuasa. ³ Ondomo muyu yo nu sobana ko owogat kosonsora’an ni Yisus iya nu ininsosona Iyo nu lobuw kikoraayan om mongobisig so Iyo. Om adang-o lumuoi inawo muyu no om mingkoyod sono mongimaid so Iyo, ⁴ so’ pudi pona mongolawan kou nu koraayan, nga d’ado ido so kou nokobaya’ lumawan om pinatoi nu lobuw. ⁵ Adang-o lupaanan pontudukan nu Kinoringan so kou, inonakan Niyo nu, “Oo anak Ku, orotio muyu yo kowarong-warong pomogosan Ku so kou. Om adang-o lumuoi inawo muyu no ong sowoyon Ku kou, ⁶ so’ isai kosomodan Ku, iyo yo su tudukan Ku, om isai yo pongokanon Ku, iyo yo su insaadan Ku,” koo ri. ⁷ Indadi bang kuwai kosonsora’an muyu, taani muyu ya, so’ ono yo po nga gama’ nu Kinoringan montuduk so kou, om ono yo ko’ tudukan kou Niyo so’ inonakan kou yo Niyo. D’ado ido anak dai insaadan nu amo montuduk so iyo. ⁸ Bang dai kou insaadan tudukan nu Kinoringan soko poomontuduk Niyo nu inonakan Niyo wokon, koorotian okon ko anak kou bana Niyo, nga pungou. ⁹ Kiamo toko kiawi’ so wonuo tu montuduk so toko om oinsaadan toko, om mongowaid toko sobana nu pontudukan nosiro. Indadi, otoop po mongowaid toko nu pontudukan nu Amo toko so surga, su’ kaalap toko nu kowiawan musingkolaid. ¹⁰ Suat so amo toko so wonuo tu, sontagal-a insaadan toko nu montuduk musuat nu onu yo po owarong so pomikiran nosiro. Nga ono yo po nituduk so toko nu Kinoringan, Amo toko so surga, kosonangan toko ya su’ koinong toko so Iyo d’ado koraayan. ¹¹ Bang osonsara’ toko tudukan nu Kinoringan, dai osanang inawo toko om mungot toko sono. Nga bang kotalib po kosonsora’an toko oono, om oilaan toko nu iri yo po nga montuduk so toko, osanang-o sono inawo toko om owarong-o sono kogoyaan toko. ¹² - ¹³ Pagka soko ono, adang-o mulaiw kiat so koimaidan muyu, nga sumundur kou yo poimaid, soko lobuw pobasag nu longon niyo maalon-o, om soko lobuw mikip-kikip su otud om tumoor sono mundii. Om waid kou yo dadan so lalan otulid, su’ opiot koimaidan nu lobuw dai po bana opiot-o, soko lobuw kolimpo opali’ om owarong-o sono poomompanou. ¹⁴ Oo su kosusulodan ku, pogkari’-kari’ kou yo mususulut so kiawi’ lobuw, om pogkari’-kari’ kou yo miau d’ado koraayan, so’ bang okon ko soko ono, dai kou kosambat nu Tuhan. ¹⁵ Kimato toko yo su’ d’ado ido pona so toko mulaiw kiat so Kinoringan, iri minongoborakat so toko ri. Kimato toko yo su’ d’ado musit nu oraai so inawo toko, kopongaagut nu lobuw wokon om koinsaim nu lobuw suang. ¹⁶ Om kimato muyu yo su’ ado ido so kou lumapa’ intawa tumolikud kiat so Kinoringan soko si Isau, so’ iyo yo su anak ongko om kopusaka nu orata’ nu amo niyo ri, nga d’ado pikiran niyo suat so Kinoringan om niganti’ sono niyo nu somangkuk-o sinarug nu bolatung. ¹⁷ Noilaan muyu nu, kiat nu iri ososog iyo sobana mokiborakat so amo niyo ri, nga dai yo sono binorokatan iyo. Pudi pona mangi’-tangi’ iyo mokiborakat, nga dai yo iyo noborokatan so’ dai yo obuli popugonti’on koimbagu. ¹⁸ Oo su kosulodan ku, gama’ toko rumani so Kinoringan iri nituduk so toko ri okon ko soko gama’ nu odu aki toko lobuw Israil silaid-i. Linumoga’ nosiro so Bulud Sinai, iri osiou-i, om nokosiou nosiro nu sinikit ookang, om tinumuong sobana om minuos nu opogon. ¹⁹ Nokorongou nosiro nu kai-kai nu surumpit om bongut nu Kinoringan nu sobana ko osangat sampai nokolaa’ nosiro, om minindamo so si Musa nu dai yo sono nosiro moingin mongkinongou nu bongut nu Kinoringan iiri, ²⁰ so’ dai kotaan nosiro mongkinongou nu nisuu’ nu Kinoringan nu, “Ono po ka ong lobuw, insan kulos-kulos-a ong kokuyut so bulud oono, subai pilayon nu watu sampai matoi,” koo ri. ²¹ Onu yo po nosiou nosiro sobana ko koindolaa’, sampai nokoputangar si Musa nu, “Kokikip aku lumaa’,” koo. ²² Nga okon ko soko ono ong lumoga’ toko so Kinoringan. Toko yo po nokologa’ yo so Bulud Siun om so bandar nu Kinoringan, iri miau musingkolaid, ono yo Yirusalim dii so surga, om nai yo puimpugan nu bolaksa-laksa susuu’on nu Kinoringan. ²³ Ono yo soko nokologa’ toko yo so puimpugan nu inonakan nu Kinoringan gulu ri, iri nokoongodaptar-o su ngaran nosiro so surga. Om nokorani toko po so Kinoringan, iri moongobisara’ nu kiawi’ lobuw. Om soko nokorani toko yo so lobuw poimaid minatoi-o, iri noidu’an-o nu kiawi’ koraayan-i. ²⁴ Om nokorani toko yo dii si Yisus, iri poopulatas nu janji owagu nu Kinoringan so toko. Kiat so kinopotoyan Niyo, noidu’an toko nu koraayan. Kinopotoyan om raa’ Niyo ri yo su ponondu’an nu kopuworongan nu Kinoringan so toko. Om raa’ ni Yisus oono owarong po ko’ raa’ ni Abil, so’ iri yo po raa’ ni Abil pinongoondoman-a nu oukuman si Kain suat so kinopotoyan ni Abil. ²⁵ Oo su kosusulodan, pagka soko ono, kimato muyu yo, kodi muyu yo tulako iri tinongaran nu Kinoringan so toko ri, so’ bang iri lobuw Israil-i nga dai ya kolaiw kiat so ukuman nu Kinoringan iya nu minonulak nosiro so si Musa, tantu toko nga dai ya kolaiw kiat so ukuman nu Kinoringan ong tulakon toko si Yisus, iri montuduk so toko kiat so surga. ²⁶ Gulu ri, ontob kogunggun su tana’ ong mutangar Kinoringan, nga ono sono tu, kuwai po koimbagu janji Niyo nu, “Insan po pogunggunon Ku tana’ tu, om okon ko tana’ tu ya, nga maid po nu langit-o,” koo ri. ²⁷ Orati yo po nu, “Insan po gunggunon Ku,” koo oono, nga pokoilo nu onu yo po pinuwaal iri ogunggun-i nga oliong, om ombo yo po dai ogunggun-i, ono yo su oolu’. ²⁸ Pagka soko ono, opatut nu mongunsopot toko so Kinoringan, so’ nokotorima’ toko yo nu pogkuosaan dai ogunggun musingkolaid maid so Kinoringan. Kayo toko mongunsopot om mongusaa’ nu Kinoringan, maid nu oorumat om maa’-laa’, musuat nu koinginan Niyo, ²⁹ so’ mongukum Kinoringan soko apui mongompu’ nu kiawi’.

¹ Oo su kosusulodan ku, sundur kou yo musosamod so’ kou yo po sonsulod so koimaidan muyu so si Yisus. ² Ikod kou yo koontara poindakod nu lobuw dai muyu po otondu’an-o so waloi muyu, so’ kuwai lobuw gulu ri nopoindakod nu lobuw dai po otondu’an niyo, ombo pala su susuu’on nu Kinoringan iri. ³ Om tobango muyu yo lobuw jiniil so’ poimaid nosiro so si Kristus, om tumopanan kou yo so nosiro umogutan. Om tobango muyu yo lobuw nosonsara’ so’ poimaid nosiro so si Kristus, soko kou kondiri su osonsara’. ⁴ Sompikototog kou yo sompusondamin. Adang-o lumapa’, so’ bang lumapa’ ukumon nu Kinoringan. ⁵ Om adang kou yo osokakan mokisisiin, nga pogsadang sukur kou yo nu onu-onu ya kuwai nai so kou no, so’ minutangar Kinoringan nu, “Dai Ku ya kou posimaidan, om dai Ku ya kou laiwan,” koo. ⁶ Pagka soko ono, kooku’ toko sono mutangar nu, “Dai aku lumaa’ nu onu-onu ya waalon nu lobuw so aku so’ tantu tobangon aku ya nu Kinoringan,” koo. ⁷ Adang-o lupaanan nu wowaidon muyu, iri nopotuturan nu pontudukan suat so Kinoringan nai so kou nu gulu ri. Udioo muyu yo kogoyaan nosiro om insuwo muyu yo koimaidan nosiro no, ⁸ so’ si Yisus Kristus-o po nga dai minda kiat nu gulu ri, ono sono tu, om musingkolaid. ⁹ Ikod kou yo kiwaid nu ono yo po pontudukan sondiang ko’ pontudukan obana nokotuduk-o nai so kou. Owarong po ong pobosagon toko koimaidan toko niungkiat so samod nu Kinoringan okon ko niungkiat so kogoyaan toko maid-waid-a nu adat nu dai kowasa mongokan nu itu om ono, iri d’ado kosudaan. ¹⁰ Nga toko yo po poimaid so si Yisus Kristus, iri insan-o minatoi soko niusaa’ so Kinoringan poidu’ nu koraayan toko, nga ong lobuw Yaudi iri kakal po mongowaid nu oturan gulu ri, dai koompit nu koworongan nu kinopotoyan Niyo ri. ¹¹ Oilaan muyu so oturan gulu ri nu, ong kuwai niusaa’ toko pongidu’ nu koraayan toko, subai owiton nu Imam Maayo toko raa’ no masuw so Bilik Sobana ko Osusi so waloi sosombooyangan toko so Yirusalim, nga bangkai nu pongayam ginaras iiri, owiton rumawu’ kiat so polak om susulan sono. ¹² Indadi, si Yisus nga soko ono ya nu nosonsara’ om pinatoi so dilabus nu bandar, mongidu’ nu koraayan nu lobuw songapan Niyo, nu raa’ Niyo ri su pinongidu’. ¹³ Pagka soko ono, kayo toko rumawu’ kiat so polak, ono yo lumabus toko kiat so oturan nu lobuw Yaudi, om lumoga’ toko dii si Yisus om maid so Iyo sumonsara’, ¹⁴ so’ tuui yo po so wonuo tu d’ado polakan toko nu otatap. Nga umarap toko nu kopolak toko so ido polakan wagu musingkolaid. ¹⁵ Pagka ido yo si Yisus Imam Maayo toko, otoop ong dadan toko mongorayou nu Kinoringan, soko niusaa’ toko so Iyo. Mongunsopot toko yo dadan so Kinoringan. ¹⁶ Kodi muyu yo lupai dadan mugogoma’on nu owarong om putotabang kou yo, so’ ono yo su soko niusaa’ muyu koinsanang nu inawo nu Kinoringan. ¹⁷ Orumato muyu yo wowaidon muyu no, om waido muyu yo ponuu’an nosiro so kou no, so’ nosiro yo su mongipat so kou. Ologa’ ong wagu, mongudio Kinoringan so nosiro nu olulut-a ka gama’ nosiro mongipat so kou ko’ dai. Bang mongowaid kou ya so nosiro, osanang inawo nosiro. Nga bang dai kou mongowaid, dai sono osanang inawo nosiro mugogoma’on, om kou nga soko ono ya. ¹⁸ Pogdu’a kou yo suat so kai. Oilaan mai nu dai kai otapud so’ moingin kai nu obana kiawi’ gogoma’on mai. ¹⁹ Om insan po mindamo aku so kou nu mogdu’a kou yo bana suat so aku, su’ popululi’on aku osikap nu Kinoringan nai so kou. ²⁰ Kinoringan-o su minongoluli’ so si Yisus kiat so pinotoyan. Nokotuntug-o raa’ Niyo, ponondu’an nu nopopiot Kinoringan nu porojonjian wagu om musingkolaid so toko. Om pagka soko ono, nourug sono Iyo nu Moongipat obantug so toko dumba Niyo. ²¹ Muda-mudaan ong sukupan kou nu Kinoringan nu onu yo po owarong su’ kopomaal kou nu koinginan Niyo. Om muda-mudaan ong ourug toko nu lobuw koponginsanang nu inawo nu Kinoringan, so’ poimaid toko so si Yisus Kristus. Om muda-mudaan ong royowon Iyo musingkolaid nu kiawi’ lobuw. Amin! ²² Oo su kosusulodan ku, mindamo aku so kou nu olulut kou mongkinongou nu kiawi’ pontudukan ku so surat iitu no so’ dai ya olanggau bana surat ku iitu. ²³ Om moingin aku pokoilo so kou nu nokolabus-o sulod toko si Timutius kiat so jiil. Bang kologa’ yo iyo tuui so aku, owiton ku ya iyo mongondaa so kou. ²⁴ Logai muyu yo kiawi’ kodau mai iitu so kiawi’ wowaidon muyu om kiawi’ lobuw poimaid so Kinoringan. Om pokodau po so kou kosusulodan toko kiat so Italia. ²⁵ Muda-mudaan ong borokatan kou ya kiawi’ nu Kinoringan.