Galatia

Galatia

¹ - ³ Oo su kosusulodan ku inong poimaid so wonuo nu Galatia, itu yo surat kiat so aku si Paulus, niloga’ ku nai so kou. Aku om kiawi’ kosusulodan inong poimaid tuui mindamo so Kinoringan Amo toko om si Yisus Kristus Tuhan toko, su’ d’ado ya pupus mongoborakat om posanang nu inawo muyu. Aku yo po pinaau sumiliw nu pinongoorapan ni Yisus. Nga okon-a ko lobuw su inungkiaton nu kopogboya’an ku oono, om okon-a ko lobuw su minomili’ so aku, nga si Yisus Kristus om Kinoringan, iri minongoluli’ so si Yisus Kristus kiat so pinotoyan su minomili’ so aku. ⁴ Oilaan muyu nu mongowaid nu koinginan nu Kinoringan, Amo toko, nolila’ si Yisus potaak nu koyuwan Niyo om matoi soko niusaa’ so Kinoringan, polabus so toko kiat so koraayan, om monabang so toko su’ dai sumimpor nu gogoma’on nu lobuw lumawan nu Kinoringan nu ono sono tu. ⁵ Royowon-o Kinoringan musingkolaid! Amin. ⁶ Oiranan aku so kou nu sobana ko osikap kou mulaiw kiat so Kinoringan, iri minomili’ so kou maid nu koluluudan ni Kristus, om poimaid kou sono nu abar wokon. Abar oono paawon nu lobuw nu, abar owarong, nga kopusondiang nu Abar Owarong nituturan ku so kou ri, ⁷ om okon ko abar obana suat so si Kristus. Mutangar aku soko ono so’ kuwai lobuw popuagut-agut so kou om moingin nosiro mominda nu abar obana suat so si Kristus tayon ong opalid kou. ⁸ Nga, adang po ong lobuw sondiang, insan kai ya intawa susuu’on nu Kinoringan kiat so surga, ong potuturan so kou nu pontudukan sondiang ko iri Abar Owarong nituturan mai so kou ri, ukumon iyo nu Kinoringan om nisubo so noraka. ⁹ Notangar mai yo nu gulu ri, kosiono tongaron ku po koimbagu nu, bang kuwai lobuw potuturan nai so kou nu pontudukan, musondiang nu Abar Owarong norongou muyu yo kiat so kai, ukumon iyo nu Kinoringan om nisubo so noraka. ¹⁰ Okon ko so lobuw-a su mokimuwarong aku, nga so Kinoringan po. Om dai ya su moingin mogkari’-kari’ mongolimuuk nu lobuw-a tayon ong worongon aku nu lobuw. Bang mokimuwarong-warong aku so lobuw, okon ko uripon aku ni Kristus. ¹¹ Moingin aku ong oilaan muyu nu, okon-a ko winaal-waal nu lobuw Abar Owarong suat so si Yisus nituturan ku oono. ¹² Okon-a ko so lobuw kinorongowan ku nu Abar Owarong oono om d’ado ya lobuw minontuduk so aku nu ono, nga si Yisus Kristus kondiri su nopointolang nu Abar Owarong oono so aku. ¹³ Tantu nokorongou kou yo suat nu kowiawan ku gulu ri, iya nu owasa aku po mongowaid nu pontudukan nu ugama Yaudi, nu sobana ko mononsara’ aku nu lobuw poimaid so si Kristus, tayon ku ong mintoron nosiro poimaid so Iyo. ¹⁴ Nokaalib aku po so kosuangan nu lobuw Yaudi inong ku tinuu’an suat so koobinsuut nu ongo pontudukan nu ugama. Minogkari’-kari’ aku maid sobana nu kiawi’ oturan nituduk nu odu aki mai ri suat so gama’ miau om mongusaa’ nu Kinoringan. ¹⁵ Nga pinili’ aku yo nu Kinoringan nu dai po su nopuanak, om maid nu koowarong Niyo so aku pinaau aku posundur nu gogoma’on Niyo. ¹⁶ Pinointolang nu Kinoringan so aku Anak Niyo, si Yisus, nu isai bana yo Iyo, tayon ong koian aku so lobuw okon ko Yaudi potuturan nu Abar Owarong suat so Iyo. Om iya iiri, dai yo su minian po so lobuw sondiang mokituduk. ¹⁷ Om dai ya su minian so bandar Yirusalim mokituduk so pinongoorapan wokon ni Yisus, nga mogtuui minian aku so wonuo nu Arab. Noopod aku dii, minululi’ aku yo so bandar Damsik. ¹⁸ Tolu notoun kiat nu iri, minian aku sono so Yirusalim mokimutondu’ so si Pitrus. Opulu yo om limo runat momolak-polak aku dii so iyo, ¹⁹ nga dai ya su nokosambat nu pinongoorapan wokon-i, sondiang ko si Yakubus, sulod ni Tuhan Yisus. ²⁰ Onu yo po sinurat ku iitu no bana-bana ya. Oilaan-a nu Kinoringan nu okon-a ko momudut aku! ²¹ Kiat nu iri, lumongkopo aku yo so wonuo nu Siria om Kilikia. ²² Iya iiri, kakal po dai su otondu’an nu lobuw poimaid so Yudia. ²³ Onu ko po korongou nosiro nu tangar nu lobuw suat so aku nu, “Iri lobuw mononsara’ so kai nu gulu ri, poimaid-o sono om paabar suat so si Kristus,” koo. ²⁴ Nadi minongorayou sono nosiro nu Kinoringan suat so aku.

¹ Indadi nologa’ po opulu om opat toun, minululi’ aku yo so Yirusalim maid so si Barnabas, om si Titus nga inowit mai ya. ² Minian aku dii so’ iri yo su ponuu’an nu Kinoringan so aku. Sinumambat aku nu wowaidon nu lobuw poimaid dii, potarang so nosiro nu Abar Owarong nituturan ku so lobuw okon ko Yaudi, so’ dai su moingin ong d’ado koompusan nu gogoma’on ku nu gulu ri om kosiono tu. ³ Nga koompusan nu pinusombatan iiri, una’ ku si Titus, pudi pona lobuw iyo nu Yunani, dai ya iyo sinosogan nu ongo wowaidon-i popusunat mongowaid nu Ukum ni Musa. ⁴ Iya iiri, lobuw wokon moingin ong sunatan si Titus. Nosiro oono musingkopoimaid-poimaid nu kodau suat so si Kristus. Sumolinok nosiro masuw monoyinu so puimpugan toko ong onu waalon toko. Mongilo nosiro ong mongowaid toko ya ka nu kiawi’ nu Ukum ni Musa oono ko’ dai, nga dai toko yo sono maid nu oturan oono so’ poimaid toko yo so si Kristus. ⁵ Indadi, dai kai yo minaid nu koinginan nosiro ri, so’ oingin kai mongipat nu Abar Owarong oono otatap om dai pindaan so kou. ⁶ Dai ya minonosog wowaidon-i so aku mominda nu pontudukan nituturan ku ri. Om kinomuro pona kaayo nu pangkat nosiro, nga d’ado ya kopusondiangan ong aku, so’ Kinoringan-o po dai ya mominig nu kipangkat om d’ado pangkat. ⁷ Ala’ nai’, noilaan nosiro nu, itu yo po gogoma’on ku potuduk nu Abar Owarong so lobuw okon ko Yaudi, nga nisuu’ nu Kinoringan so aku, soko si Pitrus su sinuu’ nu Kinoringan popontuduk nu Abar Owarong so lobuw Yaudi. ⁸ Siniliw aku nu Kinoringan nu pinongoorapan, paabar so lobuw okon ko Yaudi, soko si Pitrus siniliw nu Kinoringan nu pinongoorapan so lobuw Yaudi. ⁹ Om noorotian-o sono ni Yakubus, ni Pitrus om ni Yuanis, iri tokodon nu wowaidon so puimpugan nu lobuw poimaid-i, nu aku yo po pinongoorapan nu Kinoringan nu gogoma’on iitu. Indadi, minokimusikin sono nosiro so kai si Barnabas, ponondu’an nu muinong gogoma’on mai. Noopod iri, nokoputaayun kai yo sono nu kai si Barnabas mian paabar so lobuw okon ko Yaudi om nosiro tolu mian so lobuw Yaudi. ¹⁰ Nga iri po indomoon nosiro so kai, poponobangon kai nu lobuw Yaudi omiskin, om sobana ko otigi’ aku momaal nu ono. ¹¹ Nokologa’ si Pitrus so bandar Antiukia, ininsawai ku iyo so tiningkuangon nu lobuw suang-i, so’ dai musuat gogoma’on niyo. ¹² Dai po nokologa’ lobuw sinuu’ ni Yakubus, minido iyo mongokan so lobuw poimaid okon ko Yaudi. Nga nokologa’ yo po lobuw sinuu’ ni Yakubus, sinumondiang sono si Pitrus nu inogoman, so’ lumaa’ iyo nu lobuw iri monosog popusunat nu lobuw poimaid okon ko Yaudi ri. ¹³ Lobuw Yaudi wokon poimaid-i om si Barnabas nga nokowaid-waid-a nu kogoyaan oraai ni Pitrus iiri. ¹⁴ Osiou ku gogoma’on nosiro dai musuat nu Abar Owarong oono, ininsawai ku sono si Pitrus so tiningkuangon nu lobuw-i nu, “Ikau-o po lobuw Yaudi, om noopot ko yo mongowaid nu adat nu lobuw okon ko Yaudi, om okon-o ko maid po nu adat koopotan toko ri. Indadi, nokuro su monosog ko po nu lobuw okon ko Yaudi popongowaid nu koopotan toko?” k’aku. ¹⁵ Kai yo po lobuw Yaudi dadan mongowaid nu oturan nu ugama, om lobuw bansa wokon tokodon mai nu kikoraayan so’ dai nosiro mongowaid nu oturan nu ugama mai. ¹⁶ Soko ono pona, oilaan mai nu tadi’ ya kopuwarong lobuw so Kinoringan ong poimaid so si Yisus Kristus, om okon ko koobinsuut nu Ukum ni Musa. Kai nga poimaid-a so si Yisus Kristus tayon ong kopuwarong kai nu Kinoringan nu koimaidan mai oono, om okon ko koobinsuut mai nu Ukum ni Musa. Soko tinangar nu Kinoringan nu, “D’ado ido kopuwarong so Kinoringan ong ontob-a nu obinsuut nu Ukum ni Musa,” koo ri. ¹⁷ Om kosiono, otoop nu kopuwarong kai so Kinoringan, so’ nokoido kai yo so si Kristus. Nga insan soko ono, kakal-a kikoraayan kai kosiowan nu lobuw, soko lobuw okon ko Yaudi. Mutangar sono lobuw nu, si Kristus-o su inungkiaton nu koraayan. Sobana ko dai musuat totongaron soko ono! ¹⁸ Bang mululi’ aku mongowaid nu Ukum ni Musa, iri nokaada’ ku ri yo, otolang sobana nu kikoraayan aku, so’ nokobaya’ aku dai mongowaid nu Ukum oono. ¹⁹ Oilaan ku nu dai taakan nu kowiawan musingkolaid maid so Kinoringan ong ontob-a nu obinsuut aku nu Ukum ni Musa, soko minatoi aku nu Ukum oono. Pagka nokolaiw aku so gama’ oono miau aku sono kopongowaid sobana nu ponuu’an nu Kinoringan, soko nokowaid aku so si Kristus nosalib. ²⁰ Indadi, kosiono okon-o sono ko aku su mogkuasa nu kowiawan ku, nga si Kristus su mogkuasa so aku. Kosiono, laid nu miau aku po so wonuo tu, miau aku sono musuat so koinginan nu Kinoringan, so’ umarap aku nu Anak Niyo tumabang so aku. Iyo yo su minonamod so aku, om nolila’ matoi suat so aku. ²¹ Dai ku ya pokomaai-maayan koworongan nu Kinoringan so aku. Nga bang kopuwarong lobuw so Kinoringan ong ontob-a nu obinsuut nu Ukum ni Musa, d’ado kosudaan nu kinopotoyan ni Kristus oono!

¹ Oo su lobuw poimaid so Galatia, sobana ko dai musuat pikiran muyu! Tantu binoyayat kou nu lobuw so pikiran dai musuat oono! Nokotarang ku yo so kou orati nu kinopotoyan ni Yisus Kristus so salib-i! ² Tantu oilaan muyu yo nu nokotorima’ kou nu Atod nu Kinoringan iya nu nokorongou om nopoimaid kou nu Abar Owarong suat so si Yisus Kristus, om okon ko koobinsuut muyu nu Ukum ni Musa. ³ Olowong ong momikir kou nu pudi pona nokotimpuun kou yo so kowiawan wagu maid so Atod nu Kinoringan, kosundur kou sono so kowiawan wagu oono mongowaid nu pikiran muyu kondiri. ⁴ Bang soko ono, ado gaam kosudaan nu kinosonsora’an muyu suat so Abar Owarong oono, nga dai su poimaid nu d’ado kosudaan nu kinosonsora’an muyu oono. ⁵ Indadi, moingin aku ong oorotian muyu nu tinaakan kou nu Kinoringan nu Atod Niyo om momaal nu koiran-iran, so’ nopoimaid kou so si Kristus om okon ko koobinsuut muyu nu Ukum ni Musa. ⁶ Soko ono ya, orotio muyu totongaron nisurat so Buuk nu Kinoringan suat so si Abraham nu, “Nopoimaid si Abraham nu Kinoringan om kiat nu iri kopuwarong sono iyo so Kinoringan,” koo ri. ⁷ Indadi, kiat so totongaron iitu no, oilaan muyu yo nu kiawi’ lobuw poimaid so Kinoringan soko si Abraham, nosiro yo su solusuk bana ni Abraham. ⁸ Nokosurat-o nu gulu ri so Buuk nu Kinoringan nu, “Kopuwarong lobuw okon ko Yaudi so Kinoringan ong poimaid nosiro so Iyo,” koo ri. Iri yo ko’ inobaran laid nu Kinoringan si Abraham nu Abar Owarong nu, “Pokayon Ku ikau mongoborakat nu kiawi’ bansa so wonuo tu,” koo ri. ⁹ Nopoimaid si Abraham nu Kinoringan, iri yo ko’ noborokatan iyo. Soko ono ya pudi kiawi’ lobuw poimaid, oborokatan-a nu Kinoringan soko si Abraham. ¹⁰ Iri yo po lobuw monokod nu kopuwarong nosiro nu Kinoringan ong mongowaid nu Ukum ni Musa, ukumon nosiro nu Kinoringan, so’ nokosurat-o so Buuk nu Kinoringan nu, “Isai yo po dai obinsuut nu kiawi’ Ukum, iri niposurat nu Kinoringan so buuk nu Ukum, ukumon Niyo,” koo ri. ¹¹ Indadi, otolang sobana nu d’ado ido kopuwarong nu Kinoringan pudi obinsuut nu Ukum ni Musa, so’ nokosurat-a so Buuk Niyo nu, “Ido-ido ya gama’ nu lobuw kopuwarong so Kinoringan, ono yo bang poimaid nosiro so Iyo om kikowiawan sono musingkolaid maid so Iyo,” koo ri. ¹² Nga bang mongowaid lobuw nu Ukum ni Musa, dai yo muru’ iyo poimaid so Kinoringan, so’ nokosurat-o so Buuk nu Kinoringan nu, “Lobuw obinsuut nu kiawi’ ponuu’an so Ukum, kikowiawan iyo sono musingkolaid,” koo ri. ¹³ Om oilaan toko nu ado ido kopomaal soko ono. Nga pudi pona dai toko mongowaid nu kiawi’ Ukum ni Musa, pinolabus toko ya ni Kristus kiat so ponginsaadan nu Ukum oono. Winaal ni Kristus soko ono nu nolila’ Iyo gumanti’ so toko ukumon. Oilaan toko nu obana ono so’ nokosurat-o so Buuk nu Kinoringan nu, “Bang kuwai lobuw potoyon nu solibon, koorotian noukuman-o iyo nu Kinoringan,” koo ri. ¹⁴ Winaal ni Kristus soko ono tayon ong koompit-a pudi lobuw okon ko Yaudi nu borakat iri nijanji nu Kinoringan so si Abraham, om kotorima’ sono nu Atod Niyo, iri nijanji Niyo, mogkuasa so toko lobuw poimaid so Iyo. ¹⁵ Oo su kosusulodan ku! Pokayon ku poinongan nu koopotan toko runat-runat. Bang mongojanji lobuw om notapus-o janji oono, d’ado yo kopongoliong, intawa kopongoruang nu onu-onu so janji oono so iyo. ¹⁶ Janji nu Kinoringan winaal Niyo nga suat so si Abraham om solusuk niyo. Ado nokosurat so Buuk nu Kinoringan nu, “Om suat so ongo solusuk ni Abraham,” koo, osuang lobuw. Ono-ono ya su nokosurat, “Om suat so solusuk mu,” koo, koorotian ido-ido ya koyuwan, ono yo si Kristus. ¹⁷ Orati yo po nu tongaron ku iitu, ono yo iri janji nu Kinoringan suat so si Abraham nowaal-o om notapus-o nu gulu ri po. Nga iri yo po Ukum ni Musa, nitaak nu Kinoringan opat naatus tolu nopulu toun nu toudi yo, dai kopongidu’ intawa dai potuman nu janji nu Kinoringan oono. ¹⁸ So’ bang kopuwarong lobuw so Kinoringan ong obinsuut nosiro nu Ukum ni Musa, borakat oono okon-a ko iri nijanji Niyo ri. Nga musuat-a ono so’ Kinoringan-o su minongojanji nu borakat oono, om ono yo su nitaak Niyo so si Abraham. ¹⁹ Bang soko ono, onu ka tomod nu Kinoringan monaak nu Ukum ni Musa ong taakan toko ya nu kowiawan kiat so janji Niyo? Tomod-o po Niyo monaak nu Ukum oono, nga pokoilo so lobuw nu kikoraayan nosiro. Ukum iiri kikosudaan musingkologa’ nu ido koyuwan solusuk ni Abraham, iri notangar so janji nu Kinoringan so si Abraham. Om Ukum-o po iiri pinolombus nu susuu’on so si Musa, so’ iyo yo su poolombus nu tinongaran nu Kinoringan so ongo lobuw Israil. ²⁰ Bang duo koyuwan mujanji nu oogot subai kuwai poolombus, nga dai yo momakai ong Kinoringan nu poolombus so’ Iyo yo kondiri su momaal nu onu-onu ya janji Niyo. ²¹ Bang soko ono, dai ka kopusuat Ukum ni Musa om janji nu Kinoringan? Bana ko kopusuat-a! Nga bang tomod nu Ukum oono monaak nu kowiawan so lobuw, kopuwarong-a lobuw so Kinoringan pudi ontob-a nu mongowaid nu Ukum. ²² Nga nokosurat-o so Buuk nu Kinoringan nu, kiawi’ lobuw, koinginan oraai yo po su mogkuasa so nosiro. Ono yo ko’, iri koworongan nijanji nu Kinoringan ong poimaid so si Yisus Kristus, nitaak so lobuw poimaid so Iyo. ²³ Dai po nokologa’ si Kristus, ono imaidon toko nu kosiono tu, nokuasa toko nu Ukum ni Musa, soko nokurung toko musingkologa’ nu pointolangan nu Kinoringan nu nokolabus toko kiat so pogkuosaan nu Ukum ni Musa, ono yo iya nu poimaid toko so si Yisus. ²⁴ Nadi, nosiliw Ukum oono nu soko moongipat so toko musingkologa’ ni Kristus popuwarong so toko om Kinoringan so’ poimaid toko yo so Iyo. ²⁵ Kosiono, pagka nokologa’ yo si Kristus, ono imaidon toko nu kosiono tu, dai toko yo sono oipatan nu Ukum. ²⁶ Pagka poimaid kou yo so si Yisus Kristus, koido kou yo sono so Iyo, om osiliw kou nu inonakan nu Kinoringan. ²⁷ Nopoimaid kou so si Kristus om nodiu’ kou yo kiawi’, ponondu’an nu nokoido kou yo so Iyo, om minsuw kou sono nu kogoyaan Niyo. ²⁸ Suat nu ono, d’ado yo sono pusondiangan nu lobuw Yaudi om okon ko Yaudi, uripon om okon ko uripon, kusoi om woinoi. Kou kiawi’ nokopuido yo dii si Yisus Kristus. ²⁹ Pagka songapan kou yo ni Kristus, solusuk kou ya ni Abraham, om kotorima’ kou nu onu yo po nijanji nu Kinoringan.

¹ - ² Nga oogot ong nitarang ku po tuui nu, laid nu dai po osukod ido anak nu lobuw doyaan minatoi-o, kuwai lobuw mongipat so iyo om mogkoilo nu kowiawan niyo musingkologa’ nu umur notatap-o laid nu amo niyo no. Soko uripon po iyo pudi iyo yo su kosongapan nu kiawi’ orata’ oono. ³ Soko ono ya pudi toko, laid nu dai toko po osukod, ono yo dai po poimaid so si Kristus, nouripon toko nu komoinatan mogkuasa so lobuw lumawan nu Kinoringan. ⁴ Nga nologa’ yo po iya nu notatap-o nu Kinoringan, sinuu’ yo sono Niyo Anak Niyo lumoga’ so wonuo tu. Pinuanak Iyo nu ido roraa bansa Yaudi, om minongowaid Iyo nu Ukum ni Musa. ⁵ Tomod-o po Niyo nga polabus nu lobuw iri miau mongowaid nu Ukum oono, su’ osiliw toko kiawi’ nu inonakan nu Kinoringan. ⁶ Pagka inonakan kou yo sono nu Kinoringan, sinuu’ Niyo Atod nu Anak Niyo mogkuasa so inawo toko, om koponongAmo toko sono nu Kinoringan. ⁷ Nadi, okon-o sono ko soko uripon kou kinuasa nu komoinatan, nga anak kou yo nu Kinoringan. Om pagka anak kou nu Kinoringan, onu yo po songapan Niyo songapan muyu yo. ⁸ Gulu ri dai kou po nokotondu’ nu Kinoringan, nosiliw kou soko uripon nu pinokokinoringan muyu, nga okon-a ko Kinoringan bana. ⁹ Nga kosiono kotondu’ kou yo nu Kinoringan, intawa osuat po ong tongaron nu, Kinoringan-o su kotondu’ so kou. Olowong kou sobana ong mokiuripon kou po nu komoinatan mogkuasa so wonuo tu, iri d’ado kosudaan, okugui om omiskin. ¹⁰ Osiou ku nu mogkari’-kari’ kou maid-waid-a nu Ukum ni Musa nu adat suat so runat, wulan, om toun notatap. ¹¹ Gumagau aku nu kiawi’ gogoma’on ku so kou d’ado ya sono koompusan. ¹² Oo su kosusulodan, moingin aku sobana nu minsuw kou nu kogoyaan ku, nu dai yo sono okuasa nu Ukum ni Musa, so’ aku nga nokoinsuw-o so kou lobuw okon ko Yaudi. Om dai po insan nokopomaal kou nu kosola’an so aku. ¹³ Tantu kakal po oondoman muyu nu, iri yo ko’ nokoponuturan aku nu Abar Owarong nai so kou nu togna ri so’ dai su nokaatu’. ¹⁴ Iya iiri, dai kou ya ororaayan so aku, pudi kogoyaan nu koyuwan ku tu ri soko ido ponginaman maayo so kou. Ala’ nai’, tinorima’ muyu ya aku soko monorima’ nu susuu’on nu Kinoringan kiat so surga, intawa soko monorima’ so si Yisus Kristus kondiri. ¹⁵ Sobana ko osudu’an kou nu iya iiri, nga dai kou yo sono osudu’an kosiono! Oondoman ku iya iiri, nokuro ong niposungkit ku mato muyu no nu nitaak so aku, oingin kou ya ong odapat. ¹⁶ Tokodon muyu yo sono gaam aku kosiono nu alod-alod muyu, ontob potarang aku nu obana nai so kou. ¹⁷ Lobuw wokon sobana ko mokimuwarong so kou, nga tomod nosiro oraai. Moingin nosiro popuriang so toko, tayon ong maid kou so nosiro. ¹⁸ Opatut nai’ ong mokimuwarong toko so lobuw wokon, nga tomod-a owarong. Om dadan waalon ku soko ono suat so kou, om okon ko iya ya nu mido-ido aku nai so kou. ¹⁹ Oo su kosusulodan kosomodan ku, sobana ko osonsara’ aku yo koimbagu so kou so pomikiran ku, soko koosonsara’ nu woinoi muanak, om sumundur aku ya osonsara’ nu dai po koinong kogoyaan muyu nu kogoyaan ni Kristus. ²⁰ Oimpong aku sobana mokimuido so kou nu ono sono tu, su’ kopukoyuwan toko mutangar-tangar nu ono, so’ dai ku yo oilaan ong onu po opatut tongaron ku so kou so surat iitu. ²¹ Oo su lobuw mokipopongowaid nu Ukum, rongowo muyu yo aku! Poorati aku so kou onu sobana yo nokosurat so Ukum ni Musa. ²² Nokosurat so buuk iiri nu, si Abraham kianak duo kusoi. Ino nu ido lolaing iiri uripon, om ino nu koduo lolaing-i okon ko uripon. ²³ Anak nu uripon woinoi-i pinuanak soko anak wokon-a so’ maid nu koinginan nu lobuw, nga anak nu woinoi okon ko uripon-i pinuanak maid so janji nu Kinoringan so si Abraham. ²⁴ Itu yo po ontob-a nu poinongan. Duo woinoi oono soko duo janji nu Kinoringan. Woinoi uripon-i si Agar ngaran, om minuanak iyo nu nourug nu uripon. Si Agar-o po pinoinongan nu Ukum ni Musa, iri nitaak nu Kinoringan so Bulud Sinai. ²⁵ Bulud Sinai-o po dii so wonuo nu Arab, om si Agar nga pinoinong-a nu bandar Yirusalim nu kosiono tu nu uriponon, so’ lobuw minolak so Yirusalim moongowaid nu Ukum ni Musa, soko anak ni Agar nu nouripon. ²⁶ Nga toko yo po lobuw poimaid so si Yisus soko Yirusalim so surga. Okon ko uripon toko, nga soko anak ni Sara. Nga iri yo po Yirusalim so surga pinoinongan so sawo ni Abraham, ono yo si Sara, om Yirusalim so surga oono yo su pinokoino toko lobuw poimaid so si Yisus Kristus ²⁷ Oilaan muyu nu obana ono, so’ nokosurat-o so Buuk nu Kinoringan nu, “Sumudu’an ko yo su woinoi dai insan momoganak. Dai ko insan koirasa nu osakit muanak, nga kosiono gumonsok ko sono osudu’an, so’ iri woinoi iogol-ogol nu sawo niyo, osuang po anak ko’ iri woinoi mido-ido so sawo niyo ri,” koo ri. ²⁸ Oo su kosusulodan ku, inonakan kou yo nu Kinoringan maid so janji Niyo, soko si Isak nopuanak maid so janji nu Kinoringan. ²⁹ Iya ni Abraham gulu ri, si Ismail-o po nopuanak maid nu koinginan nu lobuw, om mongindoraai iyo so si Isak, iri pinuanak maid nu koinginan nu Atod nu Kinoringan. Soko ono ya pudi kosiono tu nu, iri lobuw mongowaid nu Ukum ni Musa monindoraai nu lobuw mongowaid so si Kristus. ³⁰ Nga nokosurat-o so Buuk nu Kinoringan tangar Niyo nu, “Susubo yo uripon woinoi oono maid nu anak niyo no, so’ anak nu uripon woinoi oono dai oboogi’an nu onu-onu ya osongapan nu anak nu woinoi okon ko uripon-o,” koo ri. ³¹ Indadi, toko yo po itu okon ko soko anak nu uripon woinoi oono, nga soko anak nu woinoi okon ko uripon-o.

¹ Nokolabus toko yo kosiono kiat so ponguriponan mongowaid nu Ukum ni Musa, so’ pinolabus toko yo ni Kristus! Pagka soko ono, kimati muyu yo. Adang-o sono posimaidan lobuw monosog so kou koimbagu soko uripon kuminam dadan mongowaid nu Ukum ni Musa. ² Rongowo muyu yo. Aku, si Paulus mutangar nu itu nu, bang mokisunat kou, koorotian d’ado kosudaan muyu nu gogoma’on ni Kristus. ³ Insan aku po poondom nu lobuw mokisunat nu, bang mokisunat iyo subai waidon sono niyo kiawi’ Ukum ni Musa. ⁴ Bang mogkari’-kari’ kou mokimuwarong so Kinoringan nu ontob mongowaid nu Ukum ni Musa, koorotian sumondiang kou so si Kristus, om dai kou koirasa nu koworongan nu Kinoringan. ⁵ Nga kai yo po umarap nu kopuwarong so Kinoringan so’ poimaid kai so si Kristus kiat so ponobangon nu Atod Niyo. ⁶ Bang koido toko yo so si Yisus Kristus, mokisunat intawa dai nga muinong-a. Ono yo su oogot, poimaid so si Kristus, om koimaidan oono kointolang so poonamod toko nu lobuw wokon. ⁷ Gulu ri owasa kou momaal nu owarong, nga kosiono tu dai kou yo sono mongowaid nu koinginan nu Kinoringan. Noboyayat kou yo gaam nu lobuw. ⁸ Tantu okon-a ko Kinoringan, iri minomaau so kou ri, su minongoboyayat so kou. ⁹ Insan sabat-a koraayan waalon, koompusan umayo ya, soko pongombang nu sabat pona nga kokombang-a nu tapung waalon nu baang-baang. ¹⁰ Soko ono pona, pagka nokoido toko yo so si Kristus, kopongaarap aku nu dai kou ya maid so koimaidan wokon. Nga isai-isai mongoboyayat so kou, ukumon iyo nu Kinoringan. ¹¹ Oo su kosusulodan ku, aku yo po dai insan montuduk nu popusunat tayon ong kikowiawan musingkolaid, om ono yo su koponginsokitan nu ongo lobuw Yaudi so aku. So’ insan montuduk aku ya suat so kinopotoyan ni Kristus so kayu salib-i, om montuduk aku ya nu popusunat, dai ya rumoraayan nosiro so aku. ¹² Owarong po ong muiya ya mulaiw kiat so puimpugan lobuw mongaagut nu pikiran muyu, nu monuu’ so kou musunat-o! ¹³ Oo su kosusulodan ku, pinolabus kou yo nu Kinoringan kiat so ponguriponan mongowaid nu Ukum ni Musa. Soko ono pona, okon-a ko pounayan muyu po sono ono maid-waid nu koinginan muyu kondiri, ala’ nai’ kiat so koosamod muyu, subai mutotabang kou. ¹⁴ So’ kiawi’ Ukum ni Musa nokopuido so ido yo ponuu’an iitu nu, “Somodi yo lobuw wokon, soko poonamod mu nu kondiri,” koo ri. ¹⁵ Nga otago muyu yo so’ bang okon ko muwowarong kou ala’ nai’ musisindoraai, d’ado sono puimpugan nu lobuw poimaid. ¹⁶ Itu yo su tomod ku, ono yo posimaidi muyu yo Atod nu Kinoringan mogkuasa so kou, om ikod kou yo sono kiwaid nu koinginan nu lobuw nu ado ontob. ¹⁷ So’ koinginan nu lobuw mulawan nu koinginan nu Atod nu Kinoringan, om koinginan nu Atod nu Kinoringan mulawan nu koinginan nu lobuw. Kiduo-duo nu ono mutori, sampai dai kou kopomaal nu onu yo po koinginan muyu. ¹⁸ Nga bang dadan mongowaid kou nu suu’ nu Atod nu Kinoringan, dai yo sono otoop ong sosogan kou dadan mongowaid nu Ukum ni Musa. ¹⁹ Kogoyaan-o po nu lobuw maid so koinginan nu inawo niyo nga otolang so gogoma’on niyo, ono yo ogilat, osaim, dai mutoop, ²⁰ mongusaa’ nu moinat, momakai nu olimu, mubibisig, momusagka’, momoinga, obingungot, kondiri ya su poduli’on, musosondiang, mupipinig, ²¹ obinsolon, moomusingawuk, mogkosonangan d’ado ontob, om wokon po koraayan. Kiawi’ nu ono nipoondom ku so kou, soko iri ya pinutangar ku nu gulu ri nu, lobuw kikogoyaan soko ono dai posimaidan nu Kinoringan mido so Iyo so surga. ²² Nga bang Atod nu Kinoringan su mogkuasa so lobuw, kosunduran nosiro, ono yo musosamod, susumudu’an, osanang inawo, otaan sonsora’on nu lobuw, obintaak, owarong so lobuw wokon, ototog, ²³ obaba’ inawo om okodos. Bang soko ono kogoyaan toko, mongowaid toko nu oturan nu Kinoringan. ²⁴ Lobuw nosongapan-o ni Yisus Kristus, nokopongingkoyod-o nu koinginan nosiro oraai. ²⁵ Tinaakan toko yo nu Atod nu Kinoringan nu kowiawan wagu, ono yo ko’ posimaidan-o Iyo mogkuasa nu kowiawan toko. ²⁶ Adang toko yo musingkaayo-ayo, muiinsakit nu inawo om mokimurindi.

¹ Oo kosusulodan ku, bang koimpa’ kou nu ido koyuwan kowaal nu koraayan, kou nu nokuasa yo nu Atod nu Kinoringan, owarong potolunda’ so iyo so gogoma’on obana, nga maid nu olimomod om owarong gama’, om ingati muyu yo su’ dai kou kowaid-waid so koraayan niyo no. ² Tobango muyu yo lobuw kikoogutan. Bang waalon muyu ono, mongowaid kou nu ponuu’an ni Kristus. ³ Bang monokod ido koyuwan nu oogot sobana iyo, ampa dai ya, musingwudut-a iyo. ⁴ Isai yo po subai mongiro-kiro nu kogoyaan niyo kondiri nu owarong ko’ oraai. Bang owarong, otoop sumudu’an iyo om adang-o popuinong nu kogoyaan niyo om kogoyaan nu lobuw wokon, ⁵ so’ kiawi’ lobuw subai mogkoilo nu kogoyaan niyo kondiri. ⁶ Lobuw nokotorima’ yo nu pontudukan ni Kristus, subai taakan niyo moomontuduk so iyo no nu onu-onu ya opatut nitaak niyo. ⁷ Adang-o musingwudut! Okon ko puulilangan ong Kinoringan! Onu yo po nipulo, ono ya su imbua’on. ⁸ Soko ono ya pudi lobuw mugogoma’on mongowaid nu kogoyaan niyo kondiri, koompusan kopotoyan. Nga bang dadan iyo mongowaid nu ponuu’an nu Atod nu Kinoringan, taakan iyo nu kowiawan musingkolaid kiat so Atod oono. ⁹ Ono yo ko’ adang-o otopodan mugogoma’on nu owarong, so’ bang d’ado pupus toko nu soko ono, borokatan toko nu Kinoringan, iya nu notatap-o Niyo. ¹⁰ Nadi, laid nu kikosiwatan toko po, momaal toko yo nu owarong so kiawi’ lobuw, om gulu po so kosusulodan toko songinong koimaidan so si Kristus. ¹¹ Orotio muyu yo bana nisurat ku kondiri aayo urup itu. ¹² Iri yo lobuw mokirayou-a suat nu gogoma’on, nosiro su mokipoponosog so kou mongowaid nu oturan nu sunat. Nga, ono yo ko’ soko ono gama’ nosiro, tayon ong dai raayon nosiro nu lobuw Yaudi so’ paabar nosiro suat so kinopotoyan ni Kristus. ¹³ Nga insan ono ya lobuw nosunatan-o, dai ya mongowaid nu Ukum ni Musa. Nga ono ya ko moingin nosiro nu osunatan kou, tayon ong kuwai pounayan nosiro mongondos nu kou yo po mongowaid nu oturan musunat. ¹⁴ Nga ong aku, dai ya su moingin mongondos suat so onu-onu ya, sondiang ko si Yisus Kristus, Tuhan toko iri minatoi so kayu salib-i. Pagka minatoi-o Iyo so kayu salib, onu yo po so wonuo tu d’ado yo orati so aku, om aku nga soko minatoi suat so gogoma’on so wonuo tu. ¹⁵ Osunatan ko’ dai osunatan, muinong-a d’ado kosudaan. Ono yo su oogot so Kinoringan ong miau toko maid nu kogoyaan wagu musuat so koinginan Niyo. ¹⁶ Nga mindamo aku so Kinoringan suat so lobuw mongowaid nu pontudukan iitu, om kiawi’ lobuw Israil nu bana-bana nu songapan nu Kinoringan, su’ posonangon Niyo inawo nosiro om luluudan Niyo nosiro. ¹⁷ Adang-o oguton aku nu lobuw, so’ kibantar-o so koyuwan ku tu, ponondu’an nu uripon aku ni Yisus. ¹⁸ Oo su kosusulodan ku, mindamo aku so si Tuhan toko Yisus Kristus su’ d’ado ya pupus Niyo mongoborakat so kou. Amin!