Ipisus

Ipisus

¹ Oo su kosusulodan ku songapan nu Kinoringan nai so Ipisus, iri ototog poimaid so si Yisus Kristus, itu yo surat kiat tuui so aku, si Paulus, iri pinili’ nu Kinoringan sumiliw nu pinongoorapan ni Yisus Kristus musuat nu koinginan Niyo. ² Muda-mudaan ong d’ado ya pupus nu Kinoringan, Amo toko om si Yisus Kristus, Tuhan toko, mongoborakat om posanang nu inawo muyu no. ³ Royowo toko yo Kinoringan Amo nu Tuhan toko Yisus Kristus, so’ pagka nokopuido toko yo dii si Kristus, nitaak Niyo so toko kiawi’ borakat so atod toko nu ono sono tu om musingkolaid. ⁴ Otoop royowon Iyo so’ dai po nowangun wonuo tu nu Kinoringan, pinili’ toko yo laid Niyo nu songopanon ni Kristus, su’ bang tumingkuang toko so Iyo, dai yo sono oraai inowoon toko, om dai topudon nu kikosola’an. Pagka osamod Iyo so toko, ⁵ tinapus-o laid nu Kinoringan nu siliwon toko nu inonakan Niyo maid so kopuidaan toko so si Yisus Kristus, iri minatoi suat so toko. Winaal Niyo soko ono tayon ong ⁶ royowon Iyo nu inonakan Niyo so’ kiat so koowarong Niyo, nopointolang-o Iyo nu sobana ko osamod Iyo so toko, nu kopuido toko nu Anak kosomodan Niyo no. ⁷ - ⁸ Soko ono yo ourug so’ pagka sobana ko osamod Iyo so toko, linukat toko yo nu Kinoringan nu iri kinopotoyan ni Kristus, ono yo noidu’ yo koraayan toko. Maid nu pongoorotian om koo’ilo nu Kinoringan ⁹ pinointolang Niyo so toko koinginan Niyo momaal, iri dai po niintolang Niyo so lobuw silaid-i. Om notantu yo Niyo laid nu, koinginan Niyo momaal oono si Kristus su mongorunsum, nu iri pinonuu’an Niyo so si Yisus Kristus matoi suat so toko. ¹⁰ Koinginan-o po nu Kinoringan nu notantu yo Niyo oono nga onu yo po so surga om so wonuo tu popuidoon Niyo dii si Kristus, om si Kristus-o su wowaidon om mogkuasa nu kiawi’ oono. ¹¹ Dai po nowangun Niyo wonuo tu, pinili’ toko yo nu Kinoringan ourug nu inonakan Niyo, so’ kopuido toko so si Kristus. Kiawi’ oono tumanon Niyo musuat nu notapus-o Niyo, ¹² tayon ong kai lobuw Yaudi, iri nokopogulu yo mongaarap nu lumoga’ si Kristus, mongorayou so Iyo nu sobana ko obantug. ¹³ Soko ono ya pudi kou okon ko Yaudi nu nopoimaid-o, nosiliw kou ya nu inonakan nu Kinoringan, iya nu nokorongou kou nu Abar Owarong suat so gogoma’on ni Kristus monapul so kou. Nopoimaid kou so si Yisus Kristus, om notaakan kou nu Kinoringan nu Atod Niyo, iri nijanji Niyo nu gulu ri, pongilaan nu nosongapan kou Niyo. ¹⁴ Atod Niyo oono yo su ponopusan toko nu kaalap toko nu onu yo po nijanji nu Kinoringan nu itaak so inonakan Niyo ong wagu, om polobuson toko Niyo, lobuw songapan Niyo. Royowo toko yo koobantug Niyo. ¹⁵ Norongou ku yo po nu poimaid kou so si Yisus, Tuhan toko, om osamod kou nu kiawi’ lobuw nosongapan nu Kinoringan, ¹⁶ dadan aku mongunsopot so Kinoringan suat so kou, om dadan ku kou soobion koduung mogdu’a aku so Kinoringan. ¹⁷ Iyo yo su otoop orumaton om orumaton po Iyo ni Yisus Kristus, Tuhan toko om Iyo yo Amo toko nu sobana ko owarong so surga. Mindamo aku so Iyo su’ taakan kou Niyo nu Atod Niyo, posondot poorati om potondu’ so kou nu kiawi’ obana suat so Kinoringan, sampai otondu’an muyu Iyo. ¹⁸ Mindamo aku so Kinoringan su’ potoromon pomikiran muyu om oilaan muyu onu yo po kiat so Iyo, ono yo orap-orapon muyu so sunduron tu, iri kinopomaawan Niyo so kou, om koilo kou nu sobana ko owarong om osuang borakat nijanji Niyo so lobuw songapan Niyo, ¹⁹ om oilaan muyu po nu sobana ko maayo kuasa Niyo monabang so toko lobuw poimaid so Iyo. Kuasa Niyo monabang so toko oono muinong nu kuasa ²⁰ pinongoluli’ Niyo so si Kristus kiat so pinotoyan, om popangkat sono so Iyo mogom so umpak wanan Niyo maid so Iyo mogkuasa so surga. ²¹ Opangkat po si Kristus ko’ kiawi’ susuu’on nu Kinoringan om moinat, om pangkat Niyo kaalib po ko’ kiawi’ kipangkat nu ono sono tu intawa so sunduron om musingkolaid. ²² Kiawi’ nga nipokuasa nu Kinoringan so si Kristus, om inurug Niyo si Kristus nu wowaidon nu kiawi’ lobuw songapan Niyo. ²³ Iri yo po puimpugan nu kiawi’ inonakan nu Kinoringan nga soko koyuwan ni Kristus, om Iyo soko ulu. Nosiro yo su mongorunsum so si Kristus, om si Kristus-o su mongorunsum nu onu yo po so siombo-ombo ya.

¹ Suat so kou lobuw poimaid okon ko Yaudi, gulu ri soko minatoi kou so kosola’an om koraayan muyu, so’ dai kou po poimaid so Kinoringan. ² Iya iiri minaid kou nu poroodatan so wonuo tu, iri gogoma’on nu lobuw oraai. Mongusaa’ kou nu komoinatan iri pinokokinoringan muyu nai so puola’an nu tana’ om langit-o, mogkuasa nu lobuw dai mongkinongou nu tinongaran nu Kinoringan. ³ Sobana yo, toko kiawi’ nu gulu ri nga muinong-a so nosiro. Miau toko mongowaid nu kogoyaan oraai nu lobuw, mongowaid toko nu onu yo po koinginan kondiri, momikir toko nu oraai, om toko nga kikogoyaan koungotan nu Kinoringan, soko lobuw wokon. ⁴ Nga sobana ko oluluudan om osamod Kinoringan so toko, ⁵ nu pudi pona soko minatoi toko so’ dai toko mongimaid so Iyo, soko noluli’an toko Niyo maid so si Kristus. Sinopulan kou yo nu Kinoringan, nu koowarong Niyo so kou. ⁶ Pagka nokoido toko yo so si Yisus Kristus, soko noluli’an toko nu Kinoringan om maid so Iyo mogkuasa so surga. ⁷ Winaal nu Kinoringan soko ono tayon ong osiowan ong wagu nu kiawi’ lobuw nu sobana ko owarong Iyo, iri niintolang Niyo nu koosamod Niyo, ono yo sinuu’ si Yisus Kristus monabang so toko. ⁸ - ⁹ Maid so koworongan nu Kinoringan, sinopulan kou Niyo so’ nopoimaid kou so si Yisus. Kinosopulan muyu oono okon-a ko pinogkori’an muyu, nga ono yo su taak nu Kinoringan, so’ dai moingin Iyo ong kuwai ido musingkaayo-ayo nu onu yo po nowaal niyo kondiri. ¹⁰ Toko yo po nga winaal nu Kinoringan, om inurug toko koimbagu kopuido so si Yisus Kristus tayon Niyo ong mugogoma’on toko nu owarong, iri nosodia’ yo nu Kinoringan nu waidon toko. ¹¹ Oo su kosusulodan ku okon ko Yaudi, ondomo muyu yo nu, gulu ri minutangar lobuw Yaudi nu, kou yo po dai mongowaid nu Kinoringan so’ dai kou musunat soko nosiro, ono yo sunat waalon nu lobuw so koyuwan. ¹² Iya iiri dai kou po nokoido so si Kristus. Okon ko lobuw Israil kou, iri pinili’ Niyo nu inonakan Niyo, dai kou koompit nu porojonjian nu Kinoringan so nosiro ri, d’ado orapan muyu so wonuo tu, om dai kou kotondu’ nu Kinoringan. ¹³ Nga pudi pona gulu ri orawu’ kou po so Kinoringan, nga pagka nokoido kou yo so si Yisus Kristus, nokorani kou yo sono so Iyo, nu minatoi Iyo mongolukat so kou kiat so koraayan muyu. ¹⁴ Si Kristus-o su nopoingkoyod so toko mubibisig om popusulut so toko lobuw Yaudi om okon ko Yaudi. Pinopuido toko yo Niyo, ourug nu ido yo bansa. Koompusan nu kinopotoyan Niyo, dai yo sono mubisig nosiro, soko monguyas nu rinding pinonapad so nosiro. ¹⁵ Ukum ni Musa maid nu kiawi’ ponuu’an om oturan nga inidu’ yo ni Kristus, su’ osiliw Niyo duo bansa oono nu ido yo sono bansa wagu kopuido so Iyo. Ono yo su gama’ Niyo popusulut so toko. ¹⁶ Nga kinopotoyan Niyo so salib, okon ko ido yo tomod popusulut nu lobuw Yaudi om okon ko Yaudi, tomod-o po Niyo koduo nga mongurug so nosiro nu ido yo koyuwan om popusulut so nosiro om Kinoringan soko ido bansa. ¹⁷ Ono yo ko’ linumoga’ si Kristus paabar nu Abar Owarong suat nu kopusulutan toko so Kinoringan, kiat-o so kou lobuw okon ko Yaudi nu gulu ri nokorawu’ so Kinoringan, kumoo yo so lobuw Yaudi iri nokorani yo so Kinoringan. ¹⁸ Koompusan nu gogoma’on ni Kristus, toko kiawi’, kiat-o so lobuw Yaudi kumoo yo so okon ko Yaudi, nga kooku’ tumingkuang so Amo toko Kinoringan mogdu’a, maid nu ponobangon nu ido yo Atod nu Kinoringan. ¹⁹ Nadi, okon-o sono ko soko porantau kou lobuw okon ko Yaudi, ono ya nga, kosiono tu kou om inonakan nu Kinoringan soko ido yo polak, om sonsuku-sakat so Iyo. ²⁰ - ²¹ Kou kiawi’, lobuw Yaudi om okon ko Yaudi soko ido waloi maayo, so’ tinudukan kou yo nu ongo pinongoorapan ni Yisus om poo’abar nu tinongaran nu Kinoringan, soko moomuwaloi powansuk nu pasok ponimpuunan nu waloi. Montuduk nosiro nu lobuw om muririnuang sono lobuw poimaid, soko moomuwaloi momakai kiawi’ porokakas waalon nu ido yo waloi. Si Yisus Kristus-o su mongurug so toko lobuw poimaid nu ido puimpugan om soko ido waloi toko mongusaa’ so Iyo, om Iyo soko pasok impuunon nu waloi su’ otagap om dai ouyas. ²² Soko lobuw molak so waloi ong noopod-o momaal, soko ono ya pudi Atod nu Kinoringan mido so inonakan Niyo, iri lobuw Yaudi om okon ko Yaudi.

¹ Ono yo ko’, jiniil aku si Paulus so’ mugogoma’on aku suat so si Yisus Kristus montuduk so kou lobuw okon ko Yaudi. ² Tantu nokorongou kou yo nu, kiat so koworongan nu Kinoringan, tinaakan aku Niyo nu gogoma’on montuduk so kou. ³ Kosiono tu niintolang-o nu Kinoringan so aku, onu notantu yo Niyo suat so kou, iri dai po niintolang Niyo so lobuw silaid-i, soko iri notangar ku yo so kou sisuna ri. ⁴ Om bang obasa’ muyu itu no, oorotian muyu sono tomod nu Kinoringan, soko aku su koorati, iri dai oorotian nu lobuw nu gulu ri, nga kosiono tu nokointolang-o sono ni Kristus. ⁵ Dai insan nipokoilo nu Kinoringan so lobuw nu gulu ri tomod Niyo, nga kosiono tu niintolang-o sono nu Atod nu Kinoringan so pinongoorapan ni Yisus om poo’abar so Iyo ri. ⁶ Orati yo po nu tomod nu Kinoringan, iri dai po niintolang Niyo nu gulu ri nga soko itu: Lobuw okon ko Yaudi nga kosongapan-a nu borakat kiat so Kinoringan, so’ poimaid nosiro nu Abar Owarong iri nisuu’ Niyo so si Kristus, om ourug nosiro nu ido puimpugan, soko koyuwan ni Kristus, om nosiro nga koompit-a nu janji nu Kinoringan so’ kopuido nosiro so si Yisus Kristus. ⁷ Pinili’ aku nu Kinoringan polombus nu Abar Owarong iitu, okon ko mongowaid so pongoilaan ku, nga kiat so samod Niyo, om tinaakan aku Niyo nu kuasa mugogoma’on nu itu. ⁸ Aku yo su sobana ko d’ado kosudaan om d’ado kinoinong-inongan so lobuw wokon songapan nu Kinoringan. Soko ono pona, pinongoorapan aku ya nu Kinoringan nu gogoma’on paabar nu Abar Owarong so lobuw okon ko Yaudi, suat nu koowarong ni Kristus nu d’ado ontob, iri otorima’ toko ong poimaid toko so Iyo ri. ⁹ Om tinaakan aku po Niyo nu kuasa potarang so kiawi’ lobuw nu notantu yo nu Kinoringan, iri dai po niintolang Niyo so lobuw silaid-i, tayon ong koilo nosiro nu tumanon nu Kinoringan notantu yo Niyo iiri so lobuw okon ko Yaudi. Gulu ri, dai oingin Iyo pointolang nu notantu yo Niyo oono. Iyo yo su minongurug nu onu yo po. ¹⁰ Tomod-o po Niyo pointolang nu notantu yo Niyo oono nga tayon ong osiowan nu kiawi’ mogkuasa so langit onu winaal Niyo so inonakan Niyo, om oilaan sono nosiro nu sobana ko oilo Kinoringan so kiawi’ gogoma’on Niyo. ¹¹ Nopointolang Kinoringan nu koo’ilo Niyo musuat nu notantu yo Niyo kiat nu timpuun, om nilombus sono murogama’ ni Yisus Kristus, Tuhan toko. ¹² Indadi, ono sono tu, pagka nokoido toko so si Kristus om nopoimaid so Iyo, kooku’ toko sono tumingkuang so Kinoringan mogdu’a. ¹³ Ono yo ko’, mindamo aku so kou nu, adang kou yo umogutan nu kosiou kou nu kosonsora’an ku suat so kou, so’ sobana yo kosonsora’an ku oono koponabang so kou. ¹⁴ Pagka sobana ko binorokatan toko nu Kinoringan, iri nopoimaid-o so si Kristus, ono yo ko’ mogdu’a aku so Amo toko so surga, ¹⁵ iri nopourug nu kiawi’ lobuw poimaid nu sonsuku-sakat so Iyo, iri miau po so wonuo tu intawa minatoi-o om nokoian so surga. ¹⁶ Om mindamo aku so Kinoringan, su’ monuu’ nu Atod Niyo pobasag nu inawo muyu, ¹⁷ om mogdu’a aku po su’ sumundur si Kristus mogkuasa nu inawo muyu, so’ poimaid kou so Iyo, om kiawi’ gogoma’on muyu nga maid so osamod kou so lobuw wokon om so Kinoringan. ¹⁸ - ¹⁹ Mindamo aku ya so Kinoringan, su’ koorati kou om kiawi’ lobuw nosongapan Niyo, nu sobana ko osamod si Kristus so toko, kaalib po ko’ oorotian nu lobuw. Om mogdu’a aku ya, su’ koorati kou nu poonamod ni Kristus so toko, om koinong kogoyaan muyu nu kogoyaan nu Kinoringan. ²⁰ Otoop royowon toko Kinoringan so’ Iyo yo su kopomaal nu osuang po ko’ pokitaakon intawa kiro-kiroon toko, om waalon Niyo ono maid nu kuasa Niyo so kowiawan toko. ²¹ Indadi, royowo toko yo Kinoringan musingkolaid so’ nosongapan toko Niyo om kopuido yo so si Yisus Kristus. Amin.

¹ Pagka soko ono, aku iri jiniil so’ mugogoma’on suat so Tuhan, mindamo so kou nu poworongo muyu yo dadan kogoyaan muyu no musuat nu tomod nu Kinoringan momaau so kou. ² Subai obaba’ inawo muyu, owarong inowoon so sondad una’ om okodos. Pointolango muyu so gama’ muyu mutotabang-o nu osamod kou so sondad una’. ³ Pinopuido kou yo nu Atod nu Kinoringan. Indadi pogkari’-kari’ kou yo sumundur mususulut su’ ototog kou kopuido. ⁴ Oilaan muyu yo nu ido yo puimpugan muyu, om ido yo Atod nu Kinoringan nai so kou, om kinopomaawan nu Kinoringan so kou nga ido-ido ya, ono yo umarap nu kotorima’ kou nu koworongan nijanji Niyo. ⁵ Ido yo Tuhan wowaidon muyu, om ido yo koimaidan muyu, ono yo si Kristus, om kou kiawi’ diniu’, ponondu’an nu nosongapan muyu si Kristus, ⁶ om ido yo Kinoringan, Amo nu kiawi’ lobuw. Iyo yo su mogkuasa so kou, om pinakai kou Niyo momaal nu koinginan Niyo, om nai Iyo so kou. ⁷ Kiawi’ so toko nokotorima’ nu odia nitaak ni Kristus kiat so kooliban Niyo. ⁸ Soko nokosurat-o so Buuk nu Kinoringan nu, “Mindakod Iyo so surga ri, minongowit Iyo nu ongo lobuw naakom, om minonaak Iyo nu odia so ongo lobuw so wonuo tu,” koo ri. ⁹ Indadi, onu ka orati nu, “Mindakod Iyo,” koo ono? Ido yo orati nu ono, ono yo, gulu ri minuntiba Iyo so wonuo tu. ¹⁰ Om Iyo nu minuntiba oono, Iyo ya su minindakod so surga, om mogkuasa nu kiawi’-awi’. ¹¹ Iyo yo su nopotaak nu odia so ongo lobuw inurug nu pinongoorapan, poo’abar, pootuturan nu Abar Owarong, moongipat om moomontuduk so puimpugan. ¹² Soko ono yo gama’ nu Kinoringan, tayon ong sobana ko kosodia’ lobuw songapan Niyo no om kopugogoma’on suat so Tuhan pobasag nu puimpugan nu lobuw poimaid, ¹³ sampai kopuido toko nu koimaidan om pongoorotian suat nu Anak nu Kinoringan, sumukod koimaidan so Kinoringan, om orunsum soko si Kristus. ¹⁴ Soko ono po, okon-o sono ko soko lolaing toko po musimaid owiton dii-tuui nu lobuw mongoburunsut nu osuang pontudukan kopalid. ¹⁵ Ono ya nga, pokoilo toko so lobuw nu pontudukan obana suat so Kinoringan om sumundur musosamod, om laid nu laid muinong kogoyaan toko so si Kristus, wowaidon toko no, so’ Iyo yo su soko ulu om toko soko koyuwan Niyo. ¹⁶ Suat so koyuwan nu lobuw, bang kaatu’ mugogoma’on kiawi’ boogian nu koyuwan, koyuwan oono kaatu’ om tumuu’ nu owarong. Soko ono ya pudi si Kristus monundan sobana nu inonakan Niyo, ong kopuido lobuw nosongapan Niyo, om otoop mugogoma’on. Musosamod nosiro sono om laid nu laid opiot koimaidan om mugogoma’on suat so Kinoringan. ¹⁷ Ono yo ko’ maid nu kuasa nitaak nu Tuhan so aku, monawoi aku so kou nu adang kou yo miau soko lobuw dai osongapan ni Kristus, iri d’ado kosudaan nu pikiran nosiro. ¹⁸ Otuong pomikiran nosiro. Dai kotondu’ nosiro nu kowiawan nitaak nu Kinoringan, om d’ado oilo-ilaan nu onu-onu suat so Kinoringan. Soko ono nosiro so’ okosog inawo nosiro. ¹⁹ Dai koorati nosiro nu onu yo po koiyu’-iyu’ om momaal nu osuang koraayan soko obingawuk, ogilat, om dai otopodan nosiro momaal nu ono. ²⁰ Nga pontudukan so kou suat so si Kristus okon ko soko ono. ²¹ Tantu nokorongou kou yo suat so Iyo! Om iya nokowaid kou so Iyo, notudukan kou yo nu gama’ miau nu obana minsuw nu kowiawan ni Yisus kondiri. ²² Pagka soko ono, ingkoyod kou yo nu soko gulu ri mongowaid nu koinginan muyu oraai, so’ koinginan oono laid nu laid momalid so kou. ²³ Inowoon om pikiran muyu subai ingwoguon. ²⁴ Kowiawan muyu subai soko kowiawan nu lobuw wagu inurug nu Kinoringan muinong so Iyo kondiri. Wiau kou yo maid nu pontudukan kiat so Kinoringan, ono yo owarong so lobuw wokon om dai pokoraayon nu lobuw. ²⁵ Oo su kosusulodan ku, pagka lobuw wagu kou inurug nu Kinoringan, adang-o sono momudut. Kou kiawi’ subai mutangar nu obana so sondad una’, so’ toko kiawi’ nokopuido yo so ido puimpugan nu lobuw poimaid, ono yo soko koyuwan ni Kristus. ²⁶ Bang mungot kou, adang-o momaal nu koraayan, om subai oingkoyod koo’ungot muyu oono nu dai po tumuong. ²⁷ Adang-o posimaidan Wowaidon nu Moinat mongoboyayat so kou momaal nu koraayan. ²⁸ Lobuw moonakou, adang-o sono monakou, otulid-o inowoon mugogoma’on suat so ingkookan om monabang nu lobuw kikosimpitan. ²⁹ Adang-o osaim kokobangon. Onu ya nga mutangar-o nu owarong nu koponabang nu wokon, su’ koponabang Kinoringan nu lobuw mongorongou nu totongaron owarong oono. ³⁰ Adang-o polunggui nu Atod nu Kinoringan nu gogoma’on muyu, so’ nitaak-o Atod oono ponondu’an nu kou yo po inonakan Niyo, om osopulan kou kiat so koraayan muyu. ³¹ Ingkoyodi muyu yo kiawi’ iitu, ono yo mokimurindi, obingungot, muap-luap, mokimusagka’ om pokoraai nu lobuw. ³² Ono ya nga, subai owarong inawo muyu om obingluluudan nu wokon, om mongampun soko Kinoringan su mongampun-a so kou so’ kopuido kou yo so si Kristus.

¹ Kou yo su inonakan nu Kinoringan om sinomodan Niyo. Indadi pogkari’-kari’ kou yo minsuw so Iyo. ² Pointolango muyu yo so gogoma’on muyu nu osamod kou, soko si Kristus su nopointolang nu osamod Iyo so toko, nu minatoi Iyo soko niusaa’ so Kinoringan pongidu’ nu koraayan toko, om nokoponginsanang nu inawo Niyo. ³ Pagka inonakan kou yo nu Kinoringan, dai musuat ong gumilat kou intawa monolod nu sawo nu lobuw, intawa mokisisiin. ⁴ Om dai otoop ong osaim kokobangon intawa muimbuar. Ono ya nga, pongunsopot kou yo so Kinoringan. ⁵ Noilaan muyu yo nu dai kowaid so Pogkuosaan ni Kristus om Kinoringan musingkolaid ong lobuw ogilat, monolod nu sawo nu lobuw, intawa mokisisiin (so’ mokisisiin oono muinong nu mongusaa’ nu pinokokinoringan). ⁶ Adang kou yo maid-waid nu totongaron owudut, iri dai pokobana nu pontudukan oono, so’ ono yo su koungotan nu Kinoringan so nosiro ong dai obinsuut so Iyo. ⁷ Nadi, adang-o mokimuuna’-una’ nu lobuw soko ono. ⁸ Gulu ri, soko so kotuongan kou dai koilo ong onu koo gama’ miau musuat so koinginan nu Kinoringan, nga kosiono so konowawan kou yo. Indadi, wiau kou yo musuat so koinginan nu Kinoringan. ⁹ Bang miau toko mongowaid nu koinginan nu Kinoringan, gogoma’on toko nga owarong, obana, om opatong. ¹⁰ Pogkari’-kari’ kou yo mugogoma’on nu onu yo po koinsanang nu inawo nu Tuhan. ¹¹ Adang-o maid-waid so gogoma’on d’ado kosudaan, soko gogoma’on nu lobuw so kotuongan, dai koilo ong onu mutoop waalon nosiro. Ono ya nga, pokoiloon-o nosiro nu oraai sobana gogoma’on oono. ¹² Insan dai ya osiou nu lobuw gogoma’on nosiro no, nga bang putotongaran-a ono, sobana ko koiyu’-iyu’. ¹³ Onu yo po so konowawan, osiowan-a. ¹⁴ Soko ono ya, ong osiou nu lobuw gogoma’on nosiro osala’, nosiro sono soko lobuw miau so onawau, ono yo oilaan nosiro onu obana om osala’. Soko ono yo orati nu totongaron nu lobuw gulu ri nu, “Ikau nu moturuw, rios-o om tungag-o kiat so pinotoyan, om urugon ko ni Kristus nu onawau,” koo ri. ¹⁵ Indadi ipati muyu yo bana kogoyaan muyu no. Adang-o miau soko lobuw olowong, nga miau-o soko lobuw oilo. ¹⁶ Pomaal kou yo dadan nu owarong, so’ ono sono tu osuang lobuw momaal nu koraayan. ¹⁷ Ono yo ko’, adang-o olowong. Pikiron-o bana onu yo po koinginan nu Tuhan. ¹⁸ Adang-o musingawuk, so’ ono yo su kosindoraai so kou. Ala’ nai’ pokikuasa kou yo nu Atod nu Kinoringan. ¹⁹ Bang muimpug kou, mutotangar-tangar-o nu totongaron kiat so Buuk Lagu nu Kinoringan, lagu royowan so Kinoringan, om lagu nituduk nu Atod nu Kinoringan. Pulagu kou yo pongorayou so Tuhan maid nu osudu’ inawo. ²⁰ Pongunsopot kou yo dadan so Kinoringan, Amo so surga, nu kiawi’ winaal ni Yisus Kristus Tuhan toko so kou. ²¹ Imaido muyu yo ponuu’an nu lobuw otoop monuu’ so kou, nu mongorumat kou so si Kristus. ²² Oo su kowoinoyan, imaido muyu yo ponuu’an nu sawo muyu, soko poongimaid muyu so Tuhan. ²³ Otoop ong kusoi su monuu’ nu sawo niyo, soko si Kristus otoop monuu’ nu puimpugan nu lobuw poimaid, so’ Iyo yo su minonapul om minongurug so nosiro ido yo puimpugan, soko koyuwan Niyo kondiri. ²⁴ Indadi kowoinoyan subai mongimaid nu ponuu’an nu sawo soko puimpugan su mongimaid nu ponuu’an ni Kristus. ²⁵ Oo su kokusoyan, somodi muyu yo nu sawo muyu, soko si Kristus su monamod nu lobuw Niyo, sampai sinumonsara’ Iyo matoi suat so nosiro. ²⁶ Minatoi si Kristus tayon ong ourug Niyo nosiro nu d’ado koraayan kiat so pontudukan Niyo, om soko ugasan Niyo nosiro nu sungoi, om osongapan sono nu Kinoringan. ²⁷ So’ moingin Iyo ong oborisi sobana kolobuwan Niyo om dai totopudon nu lobuw, soko kumut owagu, sobana ko oparu’ om dai osaim. ²⁸ Soko ono ya pudi kou su kokusoyan, subai mongipat nu sawo, soko mongipat nu kondiri. Isai mongipat nu sawo, mongipat nu kondiri. ²⁹ Oilaan muyu nu d’ado ido mongindoraai nu kondiri. Ono ya nga, runat-runat mongokan iyo om musingipat, soko si Kristus mongipat nu lobuw songapan Niyo, ³⁰ so’ toko yo su soko boogian nu koyuwan Niyo. ³¹ Soko totongaron nu Kinoringan so Buuk Niyo nu, “Ono yo ko’ koputondiang kusoi nu ino amo niyo om muido molak nu sawo niyo no, om ourug sono nosiro nu soko ido yo,” koo ri. ³² Kiat nu ono pointolang Kinoringan nu ido pontudukan dai oorotian nu lobuw, om boyo-boyoon ku si Kristus-o om lobuw songapan Niyo su kuanon nu ono. ³³ Nga totongaron oono suat po so kou, ono yo kusoi subai osamod nu sawo niyo soko koosamod nu kondiri, om woinoi nga subai mongorumat nu sawo niyo.

¹ Oo su inonakan, pagka songapan kou nu Tuhan, waido muyu yo ponuu’an nu ino amo muyu, so’ ono yo su otoop waalon muyu. ² - ³ Soko ono yo tangar nu Kinoringan so buuk Niyo nu, “Podulio yo ino amo mu, su’ osanang om otogui kou,” koo ri. Itu yo su suu’ togna nu Kinoringan maid nu janji. ⁴ Oo su ongo amo, adang-o poungot nu inonakan muyu nu totongaron intawa gogoma’on muyu, ala’ nai’ ipatan, tudukan om tobangan-o su’ oilaan nosiro onu koinginan nu Kinoringan waalon nosiro. ⁵ Oo su kouriponan, waido muyu yo suu’ nu tuan muyu no. Orumato muyu yo nosiro maid nu otulid inawo, so’ bang waalon muyu ono, muinong-a nu mongowaid kou so si Kristus. ⁶ Adang-o musingkowaal-waal nu owarong ong iya ya nu oipatan nu mokirayou-a, nga pugogoma’on kou yo suat so si Kristus. Indadi pugogoma’on kou yo nu owarong, so’ ono yo su koinginan nu Kinoringan. ⁷ Pugogoma’on kou yo maid nu osudu’ inawo nu okon ko suat-a so lobuw, nga suat po so Tuhan. ⁸ Bang waalon muyu soko ono, Tuhan-o su monuli’ so kou, uripon intawa okon ko uripon. ⁹ Oo su ongo tuan nu uripon, worongo muyu yo uripon muyu no. Adang-o dadan mongogoratak so nosiro. Ondomo yo, ido-ido ya kosongapan nu kiawi’ lobuw, ono yo Tuhan so surga, nu dai mominig nu lobuw. ¹⁰ Itu yo pongoowi’an nu tongaron ku so kou nu subai obasag kou so’ nokoido kou yo so Tuhan, om Iyo yo su pobasag so kou. ¹¹ Putimos-timos kou yo soko soujar nu dai po koungkayas mutuda’. Olapo muyu yo kiawi’ itaak nu Kinoringan monabang so kou, su’ odoog Wowaidon nu Moinat ong lumoga’ lumawan so kou. ¹² Waalo muyu yo soko ono, so’ lumawan toko okon ko mongodoog nu sondad toko, ono ya nga lumawan mongodoog nu kuasa nu moinat so langit, om kiawi’ mogkuasa so langit obasag sobana, iri usaa’on nu lobuw. ¹³ Indadi, pokayo muyu yo kiawi’ sindata pomutuda’ nu Kinoringan oono, su’ sombiya-biya ya ologa’ runat oraai, odoog muyu sono kiawi’ alod-alod muyu, om kakal-a obasag kou so kopupusan. ¹⁴ Indadi, purigap-rigap kou yo, ono yo oilo om poimaid kou yo nu pontudukan nu Kinoringan, su’ kosodia’ kou lumawan nu Wowaidon nu Moinat, soko soujar mutangkos nu uyud mutuda’. Om pomaal kou yo dadan nu obana so’ ono yo su soko ponangkub so inawo muyu, soko sabung bosi ponangkub so koyuwan nu soujar. ¹⁵ Om putimos-timos kou yo mian paabar nu Abar Owarong iri popusulut, ono yo soko mukasut kou, soko soujar mukasut ong mian mutuda’. ¹⁶ Poimaid kou yo dadan so Kinoringan nu moonabang so kou, soko mongkuyut kou nu sindata ponangkis, su’ dai kou sono kowaid-waid momaal nu oraai ong kinaman kou nu Wowaidon nu Moinat, soko alod-alod popana nu ramok kiapui. ¹⁷ Sundur kou yo poimaid, soko soujar mutupi nu tupi bosi, ponangkub nu ulu. Dai kou po oburunsutan nu Wowaidon nu Moinat. Indamo kou yo so Atod nu Kinoringan su’ kosambut kou maid nu totongaron kiat so Buuk nu Kinoringan, soko soujar momakai nu karis otarom mongodoog nu alod-alod. ¹⁸ Putimos-timos kou yo soko ono, om suat so onu-onu ya, pogdu’a kou yo mokitabang so Kinoringan. Ikod kou yo kotopodan mogdu’a suat nu kiawi’ lobuw nosongapan nu Kinoringan. ¹⁹ Pogdu’a kou yo suat so aku, su’ tudukan aku nu Kinoringan nu totongaron musuat so pubisora’an, om kooku’ aku sono mutangar om poorati so lobuw nu Abar Owarong, nu sinuu’ Niyo si Yisus Kristus monabang so nosiro. ²⁰ Sinuu’ aku nu Kinoringan potuturan Abar Owarong oono, om ono yo su kinopongojiilan so aku. Pogdu’a kou yo su’ kooku’ aku potuturan nu Abar Owarong oono. ²¹ Indadi, suu’on ku si Tikikus mian nai pokoilo so kou ong muro-kuro aku tuui. Iyo yo po sulod kosomodan toko, om ototog mugogoma’on suat so Tuhan. ²² Ono yo ko’ sinuu’ ku iyo paabar nai so kou poilo ong muro-kuro kai, su’ oinsosomodan kou. ²³ Mindamo aku so Kinoringan, iri Amo toko, om Tuhan toko si Yisus Kristus, su’ popusulut so kou, musosamod om otatap poimaid so si Kristus. ²⁴ Mindamo aku so Kinoringan nu d’ado ya pupus Niyo monamod nu kiawi’ lobuw iri monamod so si Yisus Kristus, Tuhan toko.