Kulusi

Kulusi

¹ - ² Oo su kosusulodan ku so bandar Kulusi, iri songapan nu Kinoringan om ototog maid so tinongaran ni Kristus, itu yo surat kiat so aku, si Paulus, iri pinili’ nu Kinoringan maid nu koinginan Niyo nu pinongoorapan ni Kristus, om kiat so si Timutius, sulod toko. Mindamo kai so Kinoringan, Amo toko su’ mongoborakat om posanang nu inawo muyu no. ³ Koduung mogdu’a kai yo suat so kou, mongunsopot kai ya so Kinoringan, Amo ni Yisus Kristus, Tuhan toko, ⁴ so’ norongou mai nu sobana ko poimaid kou so si Yisus Kristus, om osamod kou nu kiawi’ lobuw songapan nu Kinoringan. ⁵ Ono yo ko’ poimaid kou so si Kristus om monamod kou nu lobuw songapan nu Kinoringan, so’ umarap kou nu taakan kou nu nijanji yo laid nu Kinoringan so kou dii so surga. Norongou muyu janji nu Kinoringan oono iya nu nokorongou kou nu pontudukan obana nu gulu ri, ono yo Abar Owarong suat so si Kristus. ⁶ Abar Owarong nokotuduk so kou oono, nokolongkop-o so wonuo tu, om kiat nu ono, muririnuang sono kogoyaan owarong nu lobuw. Om kou nga soko ono ya kiat nu nokorongou om nokoilo kou nu gama’ nu Kinoringan osamod so kou. ⁷ Ono yo su nituduk so kou ni Ipapras, una’ mai mugogoma’on om kosomodan mai. Iyo yo po nga moomugogoma’on suat so si Kristus, om ototog monabang so kou. ⁸ Om iyo yo su nopokoilo so kai nu osamod kou nu lobuw wokon maid nu ponobangon nu Atod nu Kinoringan. ⁹ Ono yo ko’, norongou mai yo po abar muyu, d’ado pupus mai mindamo so Kinoringan suat so kou, su’ taakan kou Niyo nu pongoilaan om pongoorotian kiat so Atod Niyo, sampai koilo kou sobana nu onu yo po koinginan nu Kinoringan waalon muyu. ¹⁰ Koompusan nu ono, miau kou sono mongowaid nu koinginan nu Tuhan, om dadan mugogoma’on nu koinsanang nu inawo Niyo, om muririnuang sono oilaan muyu suat so Kinoringan. ¹¹ - ¹² Mindamo kai ya so Kinoringan su’ popioton Niyo koimaidan muyu nu kuasa maayo Niyo, om kotaan kou sono mongirasa nu kosonsora’an. Maid nu osudu’an, pongunsopot kou yo so Kinoringan, Amo, iri nopotoop so toko koompit nu onu-onu ya nijanji Niyo so ongo lobuw songapan Niyo so Pogkuosaan Niyo so surga, iri polak Niyo kibinaang-i. ¹³ Sinopulan toko yo nu Kinoringan kiat so pogkuosaan nu Wowaidon nu Moinat om inowit toko yo so pogkuosaan nu Anak Niyo, iri kosomodan Niyo ri, ¹⁴ ono yo linukat toko om inidu’ Niyo koraayan toko ri. ¹⁵ Si Kristus-o su pointolang ong okuro-kuro Kinoringan, so’ Kinoringan-o yo po dai osiou toko. Om si Kristus-o su soko anak ongko nu opangkat po ko’ kiawi’ pinuwaal nu Kinoringan. ¹⁶ Si Kristus-o su sinuu’ nu Kinoringan mongurug nu kiawi’ so surga, iri dai osiou, om so wonuo tu, iri osiou-i, om kiawi’ komoinatan iri obasag om mogkuasa om kikopogboya’an so langit-o. Kiawi’ so wonuo tu winaal ni Kristus om Iyo yo su songapan. ¹⁷ Dai po nowaal wonuo tu ri, kuwai yo si Kristus om Iyo yo su mongogonggom nu onu yo po. ¹⁸ Iyo yo su mogkuasa nu kiawi’ lobuw poimaid nu Kinoringan, soko ulu nu koyuwan, om Iyo yo su impuunon nu kowiawan nu koyuwan oono, so’ Iyo yo su gulu linuli’an kiat so pinotoyan, tayon ong maayo po pangkat Niyo ko’ onu yo po, ono yo Iyo yo su mogkuasa nu kiawi’. ¹⁹ Ono yo su notantu yo laid nu Kinoringan, nu onu yo po kogoyaan Niyo kondiri, nga kuwai ya so Anak Niyo no. ²⁰ Om notantu yo nu Kinoringan nu, maid nu ponobangan nu Anak Niyo, popuworongon Niyo koimbagu onu yo po tuui so wonuo tu om so surga. Gama’ yo po nu Kinoringan popuwarong nu onu yo po, nga iri yo kinopotoyan ni Kristus iya nu nokotuntug raa’ Niyo so pinosoliban so Iyo ri. ²¹ Suat so kou, gulu ri nokosondiang kou so Kinoringan, om alod-alod kou Niyo, so’ oraai pikiran om gogoma’on muyu. ²² Nga kosiono, nokopuwarong kou yo sono so Iyo koimbagu nu kinopotoyan nu Anak Niyo, su’ ourug kou nu lobuw dai totopudon nu kisala’ om aawi’-awi’ owarong kogoyaan muyu so tiningkuangon nu Kinoringan ong wagu. ²³ Indadi, sumundur kou yo poimaid nu kodau obana kiat so Kinoringan, ono yo subai otatap kou poimaid so si Kristus, om sumundur kou yo umarap nu koworongan Niyo, iri norongou muyu so lobuw nopaabar nu Abar Owarong suat so si Yisus Kristus so kou ri. Abar Owarong oono norongou-o nu lobuw suang so siombo-ombo ya, om aku, si Paulus nga nourug-a nu moomugogoma’on polongkop potuturan nu Abar Owarong oono. ²⁴ Indadi, insan osonsara’ aku ya nu kosiono tu, nga osudu’ aku ya, so’ itu yo su gama’ ku monabang so kou. Ono yo, kiat so kosonsora’an ku iitu mongoopod aku nu nisuu’ ni Kristus, monabang nu lobuw songapan nu Kinoringan so puimpugan Niyo, iri soko koyuwan ni Kristus. ²⁵ Om nourug aku yo nu moomoriara’ nu puimpugan nu lobuw poimaid, musuat nu nisuu’ nu Kinoringan so aku posisid sobana potuduk nu tinongaran Niyo so kou, lobuw okon ko Yaudi. ²⁶ Orati nu tinongaran oono, dai po niintolang nu Kinoringan so lobuw nu gulu ri, nga kosiono tu niintolang-o sono Niyo so lobuw songopanon Niyo. ²⁷ Om tinantu yo Niyo nu pointolangon orati nu tinongaran oono so lobuw okon ko Yaudi, ono yo mido-ido si Kristus so kou, indadi, kaarap kou nu taakan-a nu kobontugan nu Kinoringan. ²⁸ Si Kristus oono yo su nituturan mai so kiawi’ lobuw. Poondom om montuduk kai so ido soido soko moomontuduk oilo, tayon mai ong kiawi’ lobuw songapan Niyo sobana ko obinsuut so Iyo, om oowit so tiningkuangon nu Kinoringan. ²⁹ Om ono yo su ponginoontoban ku mugogoma’on maid nu kobosagan nitaak ni Kristus so aku om mogkuasa so koyuwan ku, su’ otuman kiawi’ oono.

¹ Pokoilo aku so kou nu mogkari’-kari’ aku mugogoma’on suat so kou lobuw poimaid so Kulusi, om kiawi’ lobuw poimaid so Laudikia, om lobuw poimaid dai po kotondu’ so aku no. ² Waalon ku soko ono, tayon ku ong ototog inawo muyu om nosiro, om muido inawo muyu so’ musosamod kou, om tayon ku ya ong sobana ko koorati kou om nosiro nu kodau kiat so Kinoringan, iri dai noilaan nu lobuw gulu ri, ono yo kodau suat so si Kristus. ³ Bang nokoido kou yo so si Kristus, koorati kou sono bana nu kodau oogot Niyo, iri dai oilaan nu lobuw nu gulu ri nga niintolang Niyo nu ono sono tu. ⁴ Niabar ku ono so kou, su’ dai kou oburunsutan nu totongaron nu lobuw owudut, iri soko obana korongowan-i. ⁵ Om oingin aku ong oilaan muyu nu, pudi pona okon ko nai-nai aku so kou, nga dadan aku ya momikir so kou, om osudu’ aku so’ oilaan ku nu kopuido kou, om sobana ko poimaid kou so si Kristus. ⁶ Pagka mutangar kou nu, si Yisus Kristus-o Tuhan muyu, miau kou yo nu kopuido so Iyo. ⁷ Totog kou yo mido so Iyo, om waido muyu yo dadan ponuu’an Niyo so kowiawan muyu. Tumatap kou yo poimaid so si Kristus, iri nituduk so kou ri, om pongunsopot kou yo dadan so Kinoringan. ⁸ Koingat-ingato muyu yo su’ dai kou kowaid-waid nu pontudukan d’ado kosudaan, so’ kiawi’ pontudukan oono okon ko kiat dii si Kristus, nga ombo yo nu kiat so lobuw, om kiat so komoinatan mogkuasa so pilolongkop nu wonuo tu. ⁹ Ingato muyu yo nu dai kou maid nu pontudukan oono, so’ laid nu miau po si Kristus so wonuo tu ri, d’ado muad kopusondiangan Niyo om Kinoringan. ¹⁰ Pagka nokoido kou yo so si Kristus, kou nga notaakan-a nu kowiawan obana. Om maayo po kuasa Niyo ko’ kiawi’ kuasa wokon tuui so wonuo tu om so langit-o. ¹¹ Iya nu nokoido kou so si Kristus, sinunatan kou yo, nga okon ko sunat winaal nu longon nu lobuw, nga nilabus kou ni Kristus kiat so koinginan oraai so inawo muyu. ¹² So’ iya nu diniu’ kou, soko minatoi kou, om nokowaid kolobong so si Kristus. Om iya nu noluli’an si Kristus kiat so kinopotoyan, soko linuli’an kou nu Kinoringan maid so Iyo, so’ nopoimaid kou nu kuasa Niyo minongoluli’ so si Kristus kiat so pinotoyan. ¹³ Kou lobuw okon ko Yaudi, gulu ri soko minatoi kou so’ kikoraayan kou om soko dai kou po nosunatan ni Kristus, ono yo dadan kou mongowaid nu koinginan oraai so inawo muyu. Nga kosiono, linuli’an kou yo nu Kinoringan maid so si Kristus. Inidu’ yo Niyo kiawi’ koraayan toko ri. ¹⁴ Inidu’ yo Niyo kiawi’ utang toko nokosurat-i, ono yo utang nu dai toko minongowaid nu oturan Niyo, om ponginsaadan Niyo so toko suat so utang toko oono nga inidu’ yo Niyo, iya nu pinopopakan so si Yisus so kayu salib-i. ¹⁵ Om iri yo kinopotoyan ni Kristus so kayu salib-i su pinongodoog Niyo nu komoinatan iri mogkuasa om kikopogboya’an, soko alod-alod kinogosan om sosogan nosiro mompanou so tinoudion, pongilaan nu kiawi’ lobuw nu nodoog nosiro. ¹⁶ Indadi, ikod kou yo pongkinongou nu isai-isai ya monapud so kou, nu mongokan kou nu itu, monginum kou nu ono, dai kou maid nu adat suat so rami-rami, intawa adat suat so kousitan nu wulan wagu, intawa adat suat so Runat Pongintoronan. ¹⁷ Mongowaid lobuw nu kiawi’ oturan oono so’ moingin nosiro kaalap nu koworongan kiat so Kinoringan. Nga gama’ yo po musuat nu koolapan nu koworongan kiat so Kinoringan ono yo mongimaid so si Kristus. ¹⁸ Ikod kou yo pusimaid ookalan nu lobuw iri mutangar nu, dai kou torima’on nu Kinoringan so’ dai kou maid nu kiawi’ ponuu’an Niyo, ono yo monuu’ iyo musingkobaba’-baba’ om mongusaa’ nu ongo susuu’on nu Kinoringan. Lobuw-o po oono musingkaayo-ayo, om mongondos nu kuwai nosorou-sorou niyo, nga d’ado ya pounayan niyo musingkaayo-ayo, so’ pikiran niyo no ombo yo nu pikiran nu lobuw momolak-polak so wonuo tu. ¹⁹ Om dai yo sono iyo potuduk nu pontudukan obana suat so si Kristus, iri wowaidon nu lobuw poimaid nosongapan nu Kinoringan. Soko koyuwan nu lobuw pinoputanong su ongo uat om puungolan, soko ono yo popuido si Kristus nu lobuw songapan Niyo om miau sono nosiro musuat so koinginan nu Kinoringan. ²⁰ Pagka soko nokowaid kou yo so si Kristus minatoi, om nokolabus kou yo kiat so kuasa nu komoinatan, iri mogkuasa so pilolongkop nu wonuo tu, dai yo sono otoop ong maid kou po nu oturan om adat soko lobuw wokon, iri mutangar nu, ²¹ “Dai kowasa mongkuyut nu itu, dai kowasa mongirasa nu itu, dai kowasa pudi monudul-a nu itu,” koo. ²² Adang kou yo mingkoyod momakai nu onu ya, so’ koinginan nu Kinoringan pokayon muyu kiawi’. Om adang-o maid nu oturan intawa pontudukan nosiro, so’ ono yo po ombo yo nu oturan om pontudukan winaal-waal nu lobuw. ²³ Pudi pona soko oilo sobana pontudukan nu lobuw oono, nu popongusaa’on nosiro lobuw nu susuu’on nu Kinoringan, om monuu’ nosiro musingkobaba’-baba’, om musinsonsara’, nga d’ado ya kosudaan nu ono, so’ dai ya kopongingkoyod nu koinginan oraai.

¹ Linuli’an si Yisus Kristus kiat so pinotoyan om soko nokowaid kou yo so Iyo linuli’an, so’ kikowiawan musingkolaid toko. Pagka soko ono, kiro-kiroo muyu yo dadan onu yo po so surga, so’ nai yo inogolan ni Kristus so umpak wanan nu Kinoringan, tontong opangkat sobana. ² Toroidoo muyu yo momikir onu yo po koinginan muyu kopusuat so surga, okon ko so wonuo tu ya, ³ so’ kou yo po soko minatoi-o om miningkoyod kou yo nu kogoyaan muyu gulu ri. Miau kou yo sono maid so si Kristus, iri kopuido so Kinoringan. ⁴ Si Kristus-o su impuunon nu kowiawan muyu, om bang mintolang Iyo koimbagu so wonuo tu, kou nga kowaid-a so Iyo, om kointolang sono nu Kinoringan koowarong muyu om koowarong ni Kristus. ⁵ Pagka soko ono, iduo muyu yo koinginan oraai nu koyuwan so wonuo tu, iri monuu’ so inawo muyu no, ono yo gumilat, monongkowoinoyan, osokakan koinginan, om lumigot, so’ bang lumigot kou nu orata’, soko gonti’an muyu Kinoringan nu orata’ so inawo muyu no. ⁶ Dai kowasa miau soko ono, so’ insaadan nu Kinoringan lobuw dai mongowaid nu koinginan Niyo. ⁷ Gulu ri, soko ono ya kogoyaan muyu, nu dai kou po nokowaid so Kinoringan. ⁸ Nga kosiono, dai kowasa ong waalon muyu itu, ono yo mungot, obinsona, mononsara’ nu lobuw, monimbaal, mutotongaron nu koimbuar om ⁹ muwuwudut, so’ nokoingkoyod kou yo nu kogoyaan silaid-i. ¹⁰ Kosiono, notaakan kou yo nu kogoyaan wagu, ono yo ingwoguan nu Kinoringan, iri minomaal nu kogoyaan wagu poinongon nu kogoyaan Niyo kondiri, su’ kotondu’ kou sobana so Iyo. ¹¹ Pagka soko ono, d’ado yo sono pusondiangan lobuw okon ko Yaudi om lobuw Yaudi. D’ado yo sono pusondiangan nu lobuw nosunatan om dai nosunatan. Muinong-a lobuw noboguru’ om lobuw dai noboguru’, uripon om okon ko uripon. Suat so toko lobuw ingwoguon nu Kinoringan, ido-ido ya si Yisus Kristus su oogot. ¹² Pagka toko yo su pinili’ nu Kinoringan nu songopanon Niyo om kosomodan Niyo, subai pointolangon-o poongoluluud toko so lobuw wokon, koowarong nu inowoon toko, koobaba’ nu inawo toko, koolimomod toko, om kootangka’ toko no. ¹³ Subai otaan kou so sondad una’, om puaampun-ampun kou yo ong kuwai kororaayan muyu, so’ Tuhan nga minongampun-a so kou. ¹⁴ Oogot sobana nu musosamod kou. Bang musosamod kou, kopuido bana kou sono. ¹⁵ Pagka nokopusulut kou yo ni Kristus, wiau kou yo mususulut, so’ ono yo su nisuu’ so kou nu Kinoringan, om ourug nu soko ido yo koyuwan, om pongunsopot kou yo dadan so Iyo. ¹⁶ Pagka noilaan muyu yo pontudukan ni Kristus, pogkari’-kari’ kou yo mongoorati nu pontudukan oono sampai kosondot so inawo muyu. Pututuduk om pubibiat kou yo nu ono nu musuat gama’. Pulagu kou yo nu nokosurat so buuk Lagu, om ongo lagu pongorayou so Tuhan, iri nituduk nu Atod nu Kinoringan-i. Pulagu kou yo mongorayou nu Tuhan maid nu mongunsopot nu koowarong Niyo so kou. ¹⁷ Onu yo po waalon intawa tongaron muyu, waalo muyu yo nu soko gama’ nu lobuw poimaid so si Tuhan Yisus, om pongunsopot kou yo so Kinoringan, Amo toko, nu kiawi’ pinuwaal ni Kristus so kou. ¹⁸ Oo su kowoinoyan, subai olila’ kou maid nu tangar nu sawo muyu no, so’ ono yo su otoop waalon muyu, lobuw songapan nu Tuhan. ¹⁹ Oo su kokusoyan, somodi muyu yo sawo muyu no, om adang-o mongindoraai so nosiro. ²⁰ Oo su kololaingan, waido muyu yo pontudukan nu ino amo muyu no, so’ ono yo su kosudu’ nu inawo nu Kinoringan. ²¹ Oo su ongo amo, kodi muyu yo insokiti inawo nu inonakan muyu no ong montuduk kou so nosiro, su’ dai kumous nosiro. ²² Oo su ongo uripon, waido muyu yo kiawi’ ponuu’an nu tuan muyu. Okon ko so tiningkuangon-a nosiro su owarong kou nu poinsiou so nosiro, ono ya nga, otulid po inowoon muyu mugogoma’on suat so nosiro, so’ mongorumat kou so si Tuhan Yisus. ²³ Onu yo po waalon muyu, subai maid nu otoroido inawo, so’ mugogoma’on kou okon ko suat-a so lobuw, nga suat po so Kinoringan. ²⁴ Ondomo muyu yo nu Tuhan-o su monuli’ so kou, ono yo taakan kou Niyo nu nijanji Niyo so lobuw Niyo, so’ si Kristus-o su tuan muyu sobana ²⁵ Nga isai-isai ya momaal nu kosola’an, suli’an-a nu Kinoringan musuat nu kosola’an niyo, so’ dai mominig ong Kinoringan.

¹ Oo su ongo tuan songapan nu uripon, subai musuat om owarong gama’ muyu so uripon muyu, om adang-o mominig. Ondomo muyu yo nu kou nga kuwai ya Tuan so surga. ² Oo su kosusulodan, subai owasa kou mogdu’a maid nu mingat-ingat, om pongunsopot kou yo so Kinoringan. ³ Pogdu’a kou yo suat so kai, su’ kolongkop kai paabar nu kodau suat so si Kristus, iri dai oorotian nu lobuw gulu ri, so’ ono yo su kinopongojiilan s’aku. ⁴ Indadi pogdu’a kou yo suat so aku su’ kopongaabar aku koimbagu nu kodau oono om poorati, so’ ono yo su patut goma’on ku. ⁵ Om subai dadan oilo kou powarong nu kogoyaan muyu osiowan nu lobuw dai po poimaid so si Kristus, om sombiya-biya kikosiwatan kou, momaal-o nu owarong so nosiro. ⁶ Mutangar kou yo so nosiro nu totongaron owarong om koinginan nosiro mongkinongou. Subai oilo kou sumambut so ido soido nu lobuw ombo opatut sombutan muyu. ⁷ Suu’on ku si Tikikus nai so kou, mongaabar suat so aku. Iyo yo po inong toko poimaid sinomodan ku sobana. Ototog iyo maid so aku mugogoma’on suat so Tuhan Yisus. ⁸ Indadi, suu’on ku iyo mongondaa so kou. Bang kologa’ iyo, pokoilo sono iyo so kou ong muro-kuro kai tuui so Ruum. ⁹ Om powaidon ku po si Unisimus. Si Unisimus nga inong toko ya poimaid sinomodan mai sobana, om kiat-a iyo nai so kou. Pokoilo nosiro so kou nu noongowaal ku tuui. ¹⁰ Si Aristarkus, iri nokowaid so aku nojiil-i pokodau so kou, om soko ono ya pudi si Markus, pinsan ni Barnabas. (Minutangar aku gulu ri so kou nu, bang lumoga’ iyo, torimaa muyu yo iyo.) ¹¹ Om si Yusua iri iningoranan so si Yustus, nga pokodau so kou. Nosiro yo po tolu koyuwan nga lobuw Yaudi, kouna’an ku potuturan nu Abar Owarong nu mogkuasa Kinoringan nu lobuw songapan Niyo, om nosiro po su koinsanang nu inawo ku no. ¹² Si Ipapras, iri kiat nai so kou ri nga pokodau so kou. Iyo nga mugogoma’on-a suat so si Yisus Kristus. Dadan iyo mogdu’a suat so kou su’ sumukod koimaidan muyu so si Yisus Kristus, om otoroido inawo muyu mongowaid nu koinginan nu Kinoringan. ¹³ Om aku yo kondiri su nokosiou nu sobana ko tumotos iyo mugogoma’on suat so kou om lobuw so Laudikia, om so Irapulis. ¹⁴ Si Lukas, iri duktur kosomodan toko ri om si Dimas nga, pokodau-a so kou. ¹⁵ Logai muyu yo kodau mai so kosusulodan toko so Laudikia, om si Nimpa om lobuw moomuimpug sumombaayang so waloi niyo ri. ¹⁶ Bang muimpug kou, bosa’on-o surat iitu no so lobuw suang. Obasa’ muyu, niapit sono so puimpugan so Laudikia su’ obasa’ nosiro, om surat niapit ku so nosiro ri, nga owarong nu bosa’on muyu ya. ¹⁷ Tongaro muyu yo si Arkipus nu, “Opod-o yo gogoma’on niarap nu Kinoringan so ikau-i,” koo yo muyu ya. ¹⁸ Aku, si Paulus, pokodau so kou, om aku kondiri minonurat nu itu no. Kodi muyu yo lupai mogdu’a suat so aku tuui so jiil. Muda-mudaan borokatan kou nu Kinoringan.