Pinongoorapan

Pinongoorapan

¹ Oo Tiupilus, so buuk ku togna ri sinurat ku yo onu-onu winaal ni Yisus om niongotuduk Niyo ri, kiat nu tinumimpuun Iyo montuduk, ² sampai runat kinoindokodan Niyo so surga ri. Dai po nokoindakod Iyo so surga ri, maid nu kuasa nu Atod nu Kinoringan, sinuu’ Niyo pinongoorapan Niyo ri potuturan so lobuw wokon suat so Iyo. ³ Solaid opat nopulu runat kiat so kinopotoyan Niyo ri, obulit Iyo mintolang so pinongoorapan Niyo, om nopoimaid-o sono nosiro nu miniau-a Iyo koimbagu. Nosiou Iyo nosiro, om monuturan Iyo so nosiro suat so Pogkuosaan nu Kinoringan. ⁴ Ido runat iya nu minuimpug nosiro, tinangar sono ni Yisus nosiro nu, “Adang kou po mulaiw kiat tuui so Yirusalim. Molak kou po tuui mongindad nu Atod nu Kinoringan, iri nijanji nu Amo Kinoringan, tinangar Ku so kou gulu ri. ⁵ Minongodiu’ si Yuanis nu lobuw, sungoi-a su pinakai, nga dai yo olaid om suu’on nu Kinoringan Atod Niyo mogkuasa so kou,” koo si Yisus. ⁶ Nokopuimpug po pinongoorapan iiri om si Yisus, mongoduato yo nosiro so Iyo nu, “Oo Tuhan, kosiono yo ka ourug Ko nu raja mogkuasa nu bansa Israil soko raja mogkuasa nu gulu ri?” koo. ⁷ Sumombuto yo si Yisus nu, “Dai kou otoop mongilo nu runat om iya kourugan Ku nu raja, so’ si Amo Kinoringan-o su monantu nu ono, maid nu kopogboya’an Niyo. ⁸ Nga otoop ong oilaan muyu nu bang lumoga’ yo Atod nu Kinoringan mogkuasa so kou, taakan kou Niyo nu kuasa mugogoma’on suat so Iyo, om paabar kou sono so lobuw wokon suat so Aku so Yirusalim, so tontong wokon so Yudia, so Samaria, om so pilolongkop nu wonuo tu,” koo. ⁹ Noopod si Yisus mutangar, kinakat-o Iyo so surga nu laid nosiro momontong so Iyo ri. Tinumapu’ su kawut dii so Iyo om dai yo sono nosiou nosiro. ¹⁰ Laid nosiro mingaa-tingaa nu kumakat si Yisus so surga, milok po su mundii-dii duo koyuwan so obi’ nosiro ri, kipokakas nu oputi’ ¹¹ om minutangar nu, “Oo su lobuw Galilia, adang-o mundii-dii tumingaa so langit-o! Si Yisus, iri kinakat so surga nosiou muyu ri, mululi’ po koimbagu soko kinoindokodan Niyo sisuna ri,” koo. ¹² Mululio yo sono pinongoorapan ni Yisus so Yirusalim kiat so Bulud Jaitun. Bulud iiri kiro-kiro ido kilumitor rawu’ kiat so bandar. ¹³ Nokologa’ yo po nosiro so Yirusalim, miano yo nosiro so waloi pinolakan nosiro ri om mosuwo yo so bilik poomuimpugan nosiro ri. Nosiro yo po oono si Pitrus, si Yuanis, si Yakubus, si Andrias, si Pilipus, si Tumas, si Bartulumius, si Matius, si Yakubus anak ni Alpius, si Simun iri lobuw kiat so puimpugan lumawan nu lobuw Ruum, om si Yudas anak ni Yakub. ¹⁴ Dadan nosiro muimpug mogdu’a maid nu kowoinoyan, si Maria, ino ni Yisus, om kosulodan Niyo ri. ¹⁵ Ido runat, minuimpug maatus duo nopulu mompomaid ni Yisus. Mundiio yo sono si Pitrus so tiningkuangon nosiro ri om mutongaro yo nu, ¹⁶ “Oo su kosulodan ku, onu yo po nokosurat so Buuk nu Kinoringan gulu ri notuman-a. Niintolang nu Atod nu Kinoringan so si Daud suat so si Yudas, iri minongowit nu lobuw mongaakom so si Yisus. ¹⁷ Si Yudas oono una’ toko ya nu gulu ri, pinili’ ni Yisus mugogoma’on maid-waid so toko,” koo si Pitrus. ¹⁸ (Nokotorima’ si Yudas nu siin kiat so gogoma’on niyo oraai. Siin oono pinomoli nu tana’ om dii yo pinusimpotoyan niyo, nopopas tian niyo ri, om nolukan kiawi’ asuw nu tian niyo ri. ¹⁹ Noilaan-a iri nu kolobuwan so Yirusalim, om iningoranan sono nosiro tana’ iiri so tangar nosiro nu Akil, orati yo po nu iri, “Tana’ Raa’”.) ²⁰ Mutongaro po si Pitrus nu, “Nokosurat-o so buuk Lagu so Buuk nu Kinoringan nu, ‘Olaiw-laiwan-o bosalag nosiro no, om insan ido po sono lobuw miau so bosalag oono,’ koo ri. Om nokosurat-a nu, ‘Lobuw sondiang su mongowaal nu gogoma’on niyo no,’ koo ri. ²¹ Nadi momili’ toko yo ido koyuwan maid so toko potuturan nu kinoluli’an ni Yisus. Nga lobuw pili’on toko no subai nokowaid-o so toko nu maid-waid toko po so si Yisus, ²² kiat nu tumimpuun si Yuanis mongodiu’ nu lobuw sampai kinoindokodan ni Yisus so surga,” koo si Pitrus. ²³ Indadi, momilio yo sono nosiro duo koyuwan potingkuangon dii so nosiro, iri yo si Matias, om si Yusup pomaawan so iyo si Barsabas (om ingoranan-a so si Yustus). ²⁴ Mogdu’aa yo sono nosiro nu, “Oo Tuhan, oilaan Mu inawo nu kiawi’ lobuw. Nadi, tuduki yo ombo su pili’on Mu nu duo koyuwan iitu, ²⁵ su’ kopugogoma’on iyo maid so kai, sumulang so si Yudas, pinongoorapan Mu minatoi-i om nokoian so tontong mutoop so iyo,” koo. ²⁶ Nopupus mogdu’a, musuuso yo nosiro om notapus-o nosiro nu si Matias su pinili’ nu Kinoringan. Iyo yo su nosuat nu koruang so opulu om ido pinongoorapan-i.

¹ Nologa’ yo po runat Rami-Rami Pintakusta, muimpugo yo kiawi’ lobuw poimaid-i so ido tontong. ² Milok po su kuwai kai-kai osangat kiat so langit soko uos opogon tumouruk orongou nu kiawi’ lobuw so waloi-i. ³ Nokosiou-o sono nosiro nu soko sinikit nu apui minsid dii-tuui so waloi-i om manid so ongo lobuw-i. ⁴ Kinuasa yo sono nosiro nu Atod nu Kinoringan, om tumimpuun-o mutangar nu sondiang tangar musuat nu nitaak nu Atod iiri so nosiro nu tongaron. ⁵ Iya iiri osuang lobuw Yaudi, iri obinsuut nu ugama nosiro, nokologa’ so Yirusalim kiat so pilolongkop nu wonuo. ⁶ Norongou-o po kai-kai iiri, osuang sono lobuw minuimpug dii. Nokotigog nosiro nu norongou lobuw poimaid-i mutangar nu tangar nosiro ido soido. ⁷ Sobana ko noiranan nosiro om mutotongar-tongaro yo nu, “Lobuw mutangar iitu lobuw nu Galilia, om d’ado ya koilo mutangar nu tangar toko dii so Galilia! ⁸ Onu ka koo’ilo nosiro mutangar nu tangar toko? ⁹ Inungkiaton toko yo po so Partia, Modia, Ilam, Misuputamia, Yudia, Kapadukia, Puntus, Asia, ¹⁰ Pirigia, Pampilia, Masir om so wonuo nu Libia orani so Kirini. Om kuwai ya so toko ungkiat so Ruum, ¹¹ lobuw Yaudi om lobuw bansa wokon iri kiugama nu Yaudi ri. Kuwai ya so toko kiat so Kiriti om so Arab, nga norongou toko nosiro mutangar so tangar toko suat nu gogoma’on obantug nu Kinoringan,” koo. ¹² Noiranan sono nosiro om mududuato yo nu, “Onu gaam orati nu iri?” koo. ¹³ Nga wokon-i muragam nu lobuw poimaid-i om mutangar nu, “Oowukan bo gaam kolobuwan iitu,” koo. ¹⁴ Nadi mundiio yo si Pitrus maid nu opulu om ido pinongoorapan-i om mutongaro yo iyo nu osangat nu, “Oo kosusulodan ku inong Yaudi om kou kiawi’ minogol so Yirusalim, rongowo muyu yo tangar ku tu. Potarang aku nu orati nu itu. ¹⁵ Kai yo po okon-a ko oowukan soko ponontaman muyu no, so’ susuab po itu, om lobuw tuui d’ado moowukan ong umpit nu susuab. ¹⁶ Nga ono yo po nosiou om norongou muyu no, notangar-o laid nu Kinoringan om nokosurat-o ni Yuil, iri poo’abar gulu ri nu, ¹⁷ ‘Soko itu waalon Ku ong ologa’ yo runat pongoowi’an, ono yo itaak Ku Atod Ku tu so kiawi’ lobuw. Inonakan muyu kokusoyan, kowoinoyan paabar-o sono nu abar Ku iitu. Kororaa’an koomulokan muyu kosiou nu onu ya obana suat so Kinoringan so ponsorowan, om kotutuaan, nga koorati nu abar obana suat so Kinoringan so upian nosiro no. ¹⁸ Om uripon Ku woinoi kusoi, taakan nu Atod Ku no nu iya oono, om nosiro nga paabar-a nu abar Ku tu. ¹⁹ Om momaal Aku nu koiran-iran so langit, om ponondu’an so riniba, ono yo raa’, apui, kawut om lisun. ²⁰ Om dai po ologa’ runat maayo om obantug, ono yo kologa’an nu TUHAN mongukum nu lobuw, rumondom su runat, om wulan nga miang soko raa’. ²¹ Iya oono, isai ya momaau mokitabang so TUHAN, dai oinsaadan nu Kinoringan suat so koraayan niyo,’ koo ri. ²² Oo su lobuw Israil, rongowo muyu yo totongaron ku tu! Si Yisus lobuw Najarit, Iyo yo su tinaakan nu Kinoringan nu kopogboya’an, om oilaan muyu nu obana ono kiat so koiran-iran om ponondu’an winaal Niyo so tiningkuangon muyu. Kou yo kondiri nokoilo nu onu-onu winaal Niyo so tiningkuangon muyu. ²³ Maid nu koinginan nu Kinoringan nu notantu yo kiat po nu timpuun-i, nikomouli’ sono si Yisus so kou. Om kou yo su minonuu’ nu lobuw oraai posalib so Iyo. ²⁴ Nga linuli’an-o Iyo nu Kinoringan, so’ dai ya Iyo okuasa nu kopotoyan. ²⁵ Minutangar si Raja Daud gulu ri suat so si Yisus nu, ‘Oo TUHAN, oilaan ku nu dadan Ko maid-waid monabang so aku, om d’ado lobuw kopongaagut so aku. ²⁶ Nadi osanang inawo ku, om mulagu aku sumudu’an. Pudi pona riniba aku, nga tumotog aku ya umarap so Kinoringan, ²⁷ so’ dai Mu ya aku niogol so konomotayan, om koyuwan ku tu dai Mu posimaidan rumunus ong matoi aku yo. ²⁸ Nopoilo Ko so aku nu lalan sumundur so kowiawan musingkolaid, om sobana ko osudu’ aku so’ maid-waid Ko so aku,’ koo ri. ²⁹ Oo su kosusulodan ku, monuturan aku suat so si Raja Daud, aki rumpungan toko ri. Minatoi iyo om nilobong, om lobong niyo ri kakal-a nu ono sono tu. ³⁰ Minongibot Kinoringan so si Daud nu mongurug Iyo nu raja kiat so solusuk niyo ri. Noilaan ni Raja Daud janji nu Kinoringan oono so’ iyo pona nga poo’abar-a nu Kinoringan. ³¹ Oorotian-a ni Raja Daud onu ya waalon nu Kinoringan. Indadi, minomirasat sono iyo suat so koluli’an nu Raja Nijanji nu Kinoringan nu, ‘Dai posimaidan Iyo nu Kinoringan kakal so konomotayan, om dai ya rumunus koyuwan Niyo no,’ koo iyo. ³² Si Yisus-o su linuli’an nu Kinoringan kiat so pinotoyan, om kai kiawi’ nokosiou nu ono. ³³ Nopupus iri, kinakat Iyo nu Kinoringan so surga so tontong kikuasa, om tinaakan Iyo nu Kinoringan nu Atod Niyo, iri nijanji Niyo ri. Atod oono yo su nitaak ni Yisus so kai om onu yo po osiou om orongou muyu nu ono sono tu, ono yo su gogoma’on nu Atod oono. ³⁴ Oilaan toko nu okon-a ko suat so iyo kondiri minutangar si Daud, so’ okon ko iyo su minindakod so surga soko si Yisus. Nga minutangar-o iyo nu, ‘Minutangar TUHAN Kinoringan so Tuhan ku, ono yo Raja Nijanji nu Kinoringan ku nu, Ogom-o umpak so wanan Ku so surga mogkuasa, ³⁵ om kiawi’ alod-alod Mu ipodoog Ku so Ikau,’ koo ri. ³⁶ Oo su lobuw Israil, orotio muyu yo sobana nu si Yisus, iri sinalib muyu ri, Iyo yo su inurug nu Kinoringan nu Tuhan om Raja Nijanji Niyo,” koo si Pitrus. ³⁷ Norongou-o po iri nu lobuw suang-i, sobana ko noogutan nosiro, soko tobok-tobokon nu pais inawo nosiro ri, om mongoduato yo so si Pitrus om kouna’an niyo ri nu, “Oo su kosusulodan, onu ka su otoop goma’on mai?” koo. ³⁸ Sumombuto yo si Pitrus nu, “Rorogo kou yo momaal nu koraayan, om pokidiu’ kou yo, ponondu’an nu poimaid kou so si Yisus Kristus, su’ ompunan koraayan muyu ri, om kotorima’ kou nu Atod nu Kinoringan. ³⁹ Minongojanji Kinoringan nu waalon Niyo soko ono, okon ko so kou ya, nga suat po so inonakan om solusuk muyu, om lobuw kiat so dirawu’, iri paawon nu Tuhan, Kinoringan usaa’on toko no,” koo. ⁴⁰ Soko iri yo nitarang ni Pitrus so nosiro om mindomoo po iyo so nosiro nu, “Posimaidi muyu yo Kinoringan monapul so kou kiat so ponginsaadan Niyo so lobuw noposalib so si Yisus,” koo. ⁴¹ Osuang sono lobuw nopoimaid nu tinangar ni Pitrus om diniu’. Kiro-kiro tolu noribu nokoruang so lobuw poimaid nu runat iiri. ⁴² Om otigi’ kolobuwan iiri mongowaid nu niongotuduk nu pinongoorapan ni Yisus, om dadan muimpug nosiro so kinosuang-i, mongokan soko sonsulod om mogdu’a. ⁴³ Kiawi’ lobuw so Yirusalim noiranan sobana nu nokosiou nu koiran-iran winaal nu pinongoorapan ni Yisus. ⁴⁴ Kiawi’ lobuw poimaid sumundur-a muimpug, om muurung-urung nosiro nu onu yo po songapan nosiro. ⁴⁵ Bang kuwai so nosiro osimpitan, powoli sono wokon-i nu gonggamon, om boogi’on nosiro orogo ri musuat nu kosimpitan nu ido soido. ⁴⁶ Runat-runat muimpug nosiro so natad nu Waloi Maayo nu Kinoringan, om mususulang mongokan so waloi nosiro, maid nu osudu’ om obaba’ inawo. ⁴⁷ Dadan nosiro mongorayou nu Kinoringan, om ponokodan nu lobuw wokon nu owarong sobana lobuw poimaid-i. Om runat-runat mongoruang Tuhan Kinoringan nu lobuw sopulan Niyo.

¹ Ido runat, minian si Pitrus om si Yuanis so natad nu Waloi Maayo nu Kinoringan iya nu pomogdu’aan, nu jaam tolu nu awi-awi. ² Dii so longobon, ingoranan nu Longobon Oparu’ ri, so rinding watu so pililiwut nu Waloi Maayo nu Kinoringan-i, mogom-ogom ido kusoi kakung kiat kopuanak. Runat-runat lobuw iiri niogom so obi’ nu longobon-i, mokitaak nu siin so lobuw masuw lumabus so natad nu Waloi Maayo nu Kinoringan-i. ³ Nosiou-o po niyo si Pitrus om si Yuanis masuw, mokitaako yo iyo nu siin. ⁴ Bontongi yo nosiro lobuw iiri om mutongaro yo si Pitrus nu, “Siowi kai yo!” koo. ⁵ Siowi yo niyo nosiro nu kalu-kalu ong taakan iyo. ⁶ Nga mutongaro yo si Pitrus so iyo nu, “D’ado siin ku, nga onu yo po tuui so aku itaak ku so ikau, ono yo pagka tinaakan aku ni Yisus Kristus, iri lobuw Najarit-i nu kuasa, suu’on ku ikau nu panou-o!” koo. ⁷ Kuyuti yo ni Pitrus longon wanan nu lobuw iiri, om tuudo yo poundii. Iya ya iiri nopali’ yo akod niyo ri. ⁸ Lumunduto yo iyo mundii om mupanou-panou. Maido yo sono iyo so nosiro masuw so natad nu Waloi Maayo nu Kinoringan-i om mulagui-lagui mongorayou nu Kinoringan. ⁹ Kiawi’ lobuw-i nokosiou-a so iyo mupanou-panou maid nu mongorayou nu Kinoringan. ¹⁰ Notondu’an-o po nosiro nu, lobuw-o po iiri nga iri yo moomokitaak nu siin so Longobon Oparu’ ri, noiranan sobana nosiro ong onu nokopali’ so iyo. ¹¹ Dai yo sono tumotak lobuw iiri so si Pitrus om si Yuanis. Nokologa’ yo po nosiro so Pontaan ni Salumu so natad nu Waloi Maayo nu Kinoringan, mutotorako yo lobuw noiranan-i rumani dii so nosiro. ¹² Nosiou-o po ni Pitrus lobuw suang iiri, mutongaro yo iyo nu, “Oo su inong ku lobuw Israil, nokuro ka su moiranan kou nu iri? Om nokuro su bontongan muyu kai? Monokod kou gaam nu dikai kondiri so kuasa intawa koobingasip mai so Kinoringan su pinomali’ mai nu lobuw kakung iitu? ¹³ Okon ko soko ono, nga Kinoringan usaa’on ni Abraham, ni Isak, ni Yakub, om odu aki toko ri, Iyo yo su nopotarang nu sobana ko owarong Uripon Niyo si Yisus. Nga nikomouli’ muyu Iyo so moomogkuasa. Tinulak muyu Iyo so tiningkuangon ni Pilatus, pudi pona pokilolobusan-a Iyo ni Pilatus. ¹⁴ Kou yo su minonulak so Iyo, ono obana om obinsuut so Kinoringan, om sinuu’ muyu si Pilatus polabus nu lobuw moomatoi. ¹⁵ Pinatoi muyu Iyo, iri impuunon nu kowiawan maid so Kinoringan, nga linuli’an-a Iyo nu Kinoringan, om kai yo su nokosiou nu ono. ¹⁶ Kuasa yo ni Yisus su nokopali’ nu lobuw kakung iitu. Onu yo po nosiou om noilaan muyu iitu, nourug so’ poimaid kai so si Yisus. Iri yo su nokopali’ nu lobuw iitu so tiningkuangon muyu tu. ¹⁷ Oo su kosusulodan ku, noilaan ku ya nu ginama’ muyu om wowaidon muyu oono suat so si Yisus, so’ dai muyu oorotian ginama’ muyu oono. ¹⁸ Nopotarang Kinoringan so poo’abar Niyo gulu ri nu ono yo po Raja Nijanji nu Kinoringan-o sonsora’on, om notuman-o sono nu Kinoringan kiawi’ nitarang nosiro ri. ¹⁹ Ono yo ko’, rorogo kou yo kiat so koraayan muyu om mululi’ so Kinoringan su’ idu’on Niyo koraayan muyu ri ²⁰ om taakan kou nu kosonangan nu inawo, om suu’on Niyo si Yisus nai so kou, iri Raja Nijanji Niyo notantu yo laid so kou. ²¹ Subai mogol Iyo so surga, sampai oingwoguan nu Kinoringan onu yo po, musuat nu notangar-o Niyo nilombus nu poo’abar gulu ri. ²² Notangar-o ni Musa nu, ‘Monuu’ TUHAN Kinoringan nu ido Poo’abar kiat so bansa muyu soko aku. Rongowo muyu yo Iyo om waalo muyu yo onu yo po tongaron Niyo. ²³ Isai dai mongorongou so Iyo, potondiangon kiat so lobuw nu Kinoringan, om oraag,’ koo. ²⁴ Kiawi’ poo’abar nu Kinoringan gulu ri, kiat-o so si Samuil om ongo nokosusuut so iyo ri, nokopomirasat-o suat so onu yo po nourug nu ono sono tu. ²⁵ Kou yo su nokaalap nu kiawi’ janji nu Kinoringan, iri nituturan nu poo’abar nu Kinoringan gulu ri. Minujanji Kinoringan so aki rumpungan muyu ri si Abraham nu, ‘Kiat so solusuk mu no, kiawi’ bansa so wonuo tu oborokatan,’ koo ri. ²⁶ Nadi pinili’ yo nu Kinoringan Uripon Niyo si Yisus, om niapit Niyo nai so kou togna po su’ mongoborakat so kou, om mongingol so kou rumorogo momaal nu koraayan,” koo si Pitrus.

¹ Laid po ni Pitrus om ni Yuanis mutangar-tangar so lobuw suang-i, lumogaa yo sono su imam, wowaidon nu moongipat nu Waloi Maayo nu Kinoringan om tinu-tinu lobuw Saduki. ² Minungot sobana nosiro so’ montuduk si Pitrus om si Yuanis so lobuw suang-i, nu noluli’an si Yisus om ono yo su pointolang nu oluli’an-a lobuw minatoi. ³ Indadi, okomo yo sono nosiro duo koyuwan-i, om pagka awi-awi-o tinaan po nosiro so jiil musingkosuab. ⁴ Nga osuang-a lobuw nopoimaid nu nokorongou nu pontudukan iiri, om rumuang sono koosuang nosiro kiro-kiro limo noribu kokusoyan. ⁵ Pogsusuab, muimpugo yo wowaidon nu imam, wowaidon nu lobuw Yaudi, om moomontuduk nu Ukum dii so Yirusalim. ⁶ Minuimpug nosiro maid nu Imam Maayo si Anas, si Kayapas, si Yuanis, si Aliksandir om wokon po kiat so suku-sakat nu Imam Maayo. ⁷ Poundiio yo nosiro si Pitrus om si Yuanis so tiningkuangon nosiro ri om duato yo nu, “Onu koo ka gama’ muyu momaal nu kiawi’ iitu? Om onu nu kuasa intawa isai inungkiaton nu kuasa pinongowaal muyu nu ono?” koo. ⁸ Kinuasa si Pitrus nu Atod nu Kinoringan om sumombuto yo sono iyo nu, “Oo su wowaidon nu imam om wowaidon nu lobuw Yaudi, ⁹ duaton muyu kai gaam nu runat iitu suat so ginama’ mai owarong so lobuw kakung iitu? Om mokikoilo kou gaam ong onu nokopali’ mai so iyo? ¹⁰ Na, pokoiloon ku kou om kiawi’ lobuw Israil nu nokopali’ yo po so iyo om mundii-dii sono so tiningkuangon muyu tu, nga iri yo kuasa ni Yisus Kristus, lobuw Najarit-i, iri sinalib muyu ri, nga linuli’an-a nu Kinoringan. ¹¹ Si Yisus-o su kuanon nu nokosurat so Buuk nu Kinoringan nu, ‘Iri watu niada’ nu moomuwaloi, oogot po nai’ kosudaan ko’ kiawi’ watu so waloi oono,’ koo ri. ¹² Si Yisus-o su koponapul nu lobuw tu, so’ d’ado wokon so wonuo tu tinaakan nu Kinoringan nu kuasa koponapul so toko,” koo si Pitrus. ¹³ Noiranan lobuw so Poongobisora’an iiri nu koopogi om koo’ilo ni Pitrus om ni Yuanis, so’ noilaan-o nosiro nu duo koyuwan oono lobuw-a koopotan om dai ya nokopoguru’, om otondu’an po nosiro nu gulu ri maid-waid duo koyuwan oono so si Yisus. ¹⁴ Nga dai nokoimbongut nosiro, so’ nosiou-a nu ongo lobuw-i lobuw nopoli’an-i mundii-dii so obi’ ni Pitrus om ni Yuanis. ¹⁵ Indadi suuo yo sono nosiro duo koyuwan oono lumabus, om muupokato yo nosiro nu, ¹⁶ “Onu ka mutoop waalon toko so duo koyuwan iitu? Kiawi’ lobuw so Yirusalim nokoilo yo nu minomaal nosiro nu koiran-iran iitu no, om dai toko oolim. ¹⁷ Indadi, owarong ong pogoson toko nosiro paabar suat so si Yisus so lobuw suang, su’ dai kolongkop abar oono,” koo. ¹⁸ Nokopuupakat-o po nosiro, poosuwo yo nosiro duo koyuwan oono koimbagu, om pogoso yo nosiro nu dai popongoobaron suat so si Yisus intawa montuduk suat so Iyo. ¹⁹ Nga sumombuto yo si Pitrus om si Yuanis nu, “Poputodi-todio muyu ya ong ombo su obana so tiningkuangon nu Kinoringan, mongowaid kai so kou, intawa mongowaid kai so Kinoringan, ²⁰ so’ d’ado kointoronan ong kai mongaabar so lobuw suang nu onu ya nosiou om norongou mai,” koo. ²¹ Nga wowaidon nu puimpugan oono koogaran nai’ momogos nu duo koyuwan-i, nga koompusan pinolabus-a nosiro. Oilaan nosiro nu d’ado po pounayan monginsaad so si Pitrus om si Yuanis, so’ lobuw suang-i mongorayou nu Kinoringan suat nu noongourug iiri. ²² Om ponokodan nu lobuw suang-i nu sobana ko koiran-iran iri, so’ lobuw nopoli’an-i talib-o opat nopulu toun umur. ²³ Nokolabus-o po si Pitrus om si Yuanis, mulio yo nosiro so kouna’an nosiro ri, om obari yo nosiro tinangar nu wowaidon nu imam om wowaidon nu lobuw Yaudi ri. ²⁴ Norongou-o po iri nu kouna’an nosiro ri, muiyaa yo nosiro mogdu’a nu, “Oo Tuhan Kinoringan, Ikau-o su minongowangun nu wonuo tu, langit, raat om kiawi’ asuw-o. ²⁵ Mongowaid nu nituduk nu Atod Mu, minutangar uripon Mu si Raja Daud, aki rumpungan mai ri nu, ‘D’ado kosudaan nu mokimulawan bansa wokon so Kinoringan om lobuw songapan Niyo, om muburung-burung mupadu-padu nu d’ado kosudaan. ²⁶ Insan wowaidon nu bansa oono mugapi’ lumawan so TUHAN om Raja Nijanji Niyo,’ koo ri, ²⁷ om nourug-a kiawi’ oono. Minuupakat si Irudis om si Puntius Pilatus maid nu lobuw okon ko Yaudi om lobuw Yaudi so bandar iitu no lumawan so si Yisus, Susuu’on Mu sobana ko owarong, iri Nijanji Mu ri. ²⁸ Minuimpug nosiro momaal nu onu-onu notantu Mu yo nu togna ri, maid nu kobosagan om koinginan Mu. ²⁹ Oo Tuhan, siowi yo gama’ nosiro pooyou so kai. Popogio kai yo, susuu’on Mu tu, su’ kosundur kai paabar nu abar Mu nu okon ko maa’-laa’. ³⁰ Polio yo lobuw sumakit su’ koorati lobuw suang nu bana ko kikuasa om obasag Ko. Om waalo yo koiran-iran mongorait nu ngaran ni Yisus, iri Uripon Mu nu sobana ko owarong,” koo du’a nosiro. ³¹ Noopod nosiro mogdu’a, gumuguro yo pinogdu’aan nosiro ri, om pobosago yo nosiro nu Atod nu Kinoringan, om tinumimpuuno sono potuturan nu tinongaran nu Kinoringan nu sobana ko opogi. ³² Iri lobuw poimaid so si Yisus kopuiido inawo. D’ado ido monokod nu otoroidaan mononsongapan onu yo po gonggamon niyo, sondiang ko songapan kiawi’. ³³ Potuturan pinongoorapan iiri suat nu kinoluli’an ni Tuhan Yisus maid nu kuasa maayo, om sobana ko binorokatan nosiro nu Kinoringan. ³⁴ D’ado ido so nosiro osimpit. Iri kitana’ om kiwaloi-i, powoli nu orata’, om orogo ri ³⁵ nikomouli’ nosiro so pinongoorapan-i, su’ boogi’on so kouna’an nosiro musuat nu kosimpitan nu ido soido. ³⁶ - ³⁷ Si Yusup nga nopowolii ya nu tana’ niyo ri om orogo ri nikomouli’ niyo so pinongoorapan-i. Si Yusup-o po solusuk nu Liwi, nopuanak so puru Siprus. Iningoranan iyo nu pinongoorapan-i so si Barnabas (orati yo po nu Barnabas nga “Lobuw koinsosamod nu Inawo”).

¹ Kuwai ido kusoi ngaran niyo si Ananias, om sawo niyo si Sapira. Nopowoli si Ananias nu tana’ songapan nosiro. ² Nitou’ niyo sombaagi’ nu siin orogo ri nu songapan nosiro, om wokon-i nitaak niyo so pinongoorapan-i, om noilaan-a iri nu sawo niyo ri. ³ Pagka soko iri, tongaro yo ni Pitrus si Ananias nu, “Sobana ko oraai su pinotuudan mu Wowaidon nu Moinat-o mogkuasa so ikau, nu minomudut ko so Atod nu Kinoringan. Inolim mu sombaagi’ nu siin orogo nu tana’ niwoli muyu ri. ⁴ Dai po nokowoli mu tana’ iiri, ikau so songapan, nga nokowoli mu ya tana’ oono, sinongapan mu ya orogo no. Nokuro su tinapus mu momaal soko ono? Okon ko momudut ko so lobuw-a, nga momudut ko po so Kinoringan!” koo si Pitrus. ⁵ Pogrongou ni Ananias nu tangar ni Pitrus iiri, linumuluk-a iyo matoi. Kiawi’ lobuw nokorongou so si Pitrus om nokosiou nu iri, sobana ko linumaa’. ⁶ Mosuwo yo sono koomulokan-i, monolui nu bangkai ni Ananias, om owito yo nosiro polobong. ⁷ Kiro-kiro tolu nojaam kiat nu iri, mosuwo yo sawo ni Ananias, nga dai noilaan niyo ong onu nourug so sawo niyo ri. ⁸ Posiowi yo ni Pitrus so iyo siin iiri om duato yo nu, “Itu yo ka kiawi’ siin orogo nu tana’ niwoli muyu ri?” koo. Sumombuto yo sawo ni Ananias nu, “Oo bana ya!” koo. ⁹ Mutongaro yo si Pitrus nu, “Oraai sobana kou su tinapus muyu monginam nu Atod nu Tuhan mongilo ong onu waalon Niyo. Rongowo yo! Nokouli’ yo lobuw nopolobong nu sawo mu ri, om mundii-dii nosiro so labus-o monganggung so ikau pona,” koo. ¹⁰ Na, linumuluk-a iyo matoi so akod ni Pitrus. Nokaasuw koomulokan-i, om noilaan nu minatoi-o sawo ni Ananias, owito yo sono nosiro polobong, pinoruruw-a so lobong nu sawo niyo ri. ¹¹ Kiawi’ lobuw nopoimaid so Yirusalim, om lobuw wokon nokorongou nu iri sobana ko linumaa’. ¹² Osuang ponondu’an om koiran-iran winaal nu pinongoorapan iiri. Kiawi’ lobuw poimaid-i dadan muimpug so Pontaan ni Salumu so natad nu Waloi Maayo nu Kinoringan. ¹³ D’ado ido koyuwan wokon kooku’ mokimuido so nosiro, pudi pona orumaton nosiro nu lobuw suang, ¹⁴ nga sumuang-a lobuw poimaid so Tuhan, woinoi kusoi. ¹⁵ Nosiou-o po nu lobuw suang-i koiran-iran winaal nu pinongoorapan-i, owito yo sono nosiro lobuw sumakit so isan nu lalan-i. Nigili nosiro so onggung om poomoturuwan su’ bang tumalib si Pitrus, pudi osuat-a nu lulungung niyo, opoli’an-o nosiro. ¹⁶ Osuang po lobuw kiat so tontong wokon so Yirusalim linumoga’ dii mongowit nu lobuw kiosakit om lobuw sinorungan nu moinat, om kiawi’ nosiro nopoli’an. ¹⁷ Laid nu laid mokimalun sono Imam Maayo, om moongowaid so iyo, ono yo lobuw so puimpugan nu Saduki, so’ moingin sobana lobuw suang-i maid so pinongoorapan-i om okon ko so nosiro. Indadi mokipopononsara’ sono nosiro nu pinongoorapan-i. ¹⁸ Okomo yo nosiro pinongoorapan-i, om jiilo yo. ¹⁹ Nga awi ri, sukabo yo pintu nu jiil-i nu ido susuu’on nu Kinoringan, om owito yo pinongoorapan-i lumabus, om tongaro yo niyo nu, ²⁰ “Ian kou yo so natad nu Waloi Maayo nu Kinoringan, potuturan so lobuw suang dii onu koo kaalap nu kowiawan musingkolaid,” koo. ²¹ Osipo yo nu pinongoorapan-i kodau nu susuu’on-i. Osarap po, mosuwo yo sono nosiro so natad nu Waloi Maayo nu Kinoringan-i montuduk. Laid nu iri, paawo yo nu Imam Maayo om moongowaid so iyo ri ongo wowaidon nu lobuw Yaudi ri popuimpug muupakat so Poongobisora’an nu Ugama. Nadi monuuo yo nosiro nu lobuw mongalap nu ongo pinongoorapan nojiil-i, nu poundiion so tiningkuangon nu puimpugan nosiro ri. ²² Nga nokologa’ yo po nosiro so jiil, dai ya nooyangan nosiro pinongoorapan-i, indadi minululi’ ya sono nosiro so puimpugan-i, pokoilo nu, ²³ “Nokologa’ kai yo so jiil, nosiou mai pintu ri nopiot-a mongondadu, om moongipat-i nga modia’-sodia’ ya so pintu ri. Nga sukabo mai pintu ri, d’ado ido koyuwan nosiou mai so dilalom-i,” koo. ²⁴ Norongou-o po tuturan nosiro iiri nu Imam Maayo om wowaidon nu moongipat nu Waloi Maayo nu Kinoringan-i, noiranan sono nosiro ong onu orati nu iri. ²⁵ Mosuwo yo sono ido koyuwan so puimpugan-i pokoilo nu, “Rongowo muyu! Lobuw jiniil muyu ri, dii so natad nu Waloi Maayo nu Kinoringan montuduk nu lobuw suang,” koo. ²⁶ Indadi, miano yo sono wowaidon nu moongipat nu Waloi Maayo nu Kinoringan om kouna’an niyo ri mongalap koimbagu nu pinongoorapan-i, nga dai ya nosiro sinosogan, so’ lumaa’ nosiro pilayon nu lobuw suang-i. ²⁷ Owito yo nosiro opulu om duo pinongoorapan iiri so tiningkuangon nu puimpugan-i, om duato yo nu Imam Maayo ri nu, ²⁸ “Pinogos mai yo boto kou nu dai popontudukon so lobuw nu nipotuduk ni Yisus so kou, nga nopolongkop kou nai’ nu ono so Yirusalim, om tinapud muyu kai nu kai yo su minomatoi so Iyo,” koo. ²⁹ Sumombuto yo si Pitrus om pinongoorapan wokon-i nu, “Subai maid kai nu suu’ nu Kinoringan, okon ko suu’ muyu no. ³⁰ Si Yisus, iri nisalib muyu ri, linuli’an-o nu Kinoringan, iri usaa’on nu odu aki toko ri. ³¹ Iyo yo su pinangkat nu Kinoringan umpak so wanan Niyo, sumiliw nu Wowaidon om Poowiau, su’ bang rumorogo ongo lobuw Israil kiat so koraayan, ompunan nosiro nu Kinoringan om miau musingkolaid maid so Iyo. ³² Pokoilo kai yo so lobuw suat so si Yisus, om tobangon kai nu Atod nu Kinoringan, iri nitaak nu Kinoringan so lobuw mongimaid nu ponuu’an Niyo,” koo. ³³ Norongou-o po iri nu lobuw so puimpugan-i, sobana ko minungot nosiro om pokipopotoyan-o nosiro pinongoorapan-i. ³⁴ Nga kuwai ido lobuw Parisi, ngaran niyo si Gamalil, moomontuduk nu Ukum nu sobana ko orumaton nu kiawi’ lobuw Yaudi. Mundiio yo iyo so tiningkuangon nu puimpugan-i, om suuo yo niyo nu polobuson sontagal pinongoorapan-i. ³⁵ Nokolabus nosiro, mutongaro yo iyo so puimpugan-i nu, “Oo su kosusulodan ku lobuw Israil, otago muyu mongiro-kiro ong onu waalon muyu so lobuw oono. ³⁶ Ondomo muyu si Tiudas iri linumawan nu lobuw Ruum nu gulu ri. Nopaabar iyo nu iyo yo su maayo pangkat, om kiro-kiro opat naatus koyuwan minongowaid so iyo. Nga nopatoi-a iyo, om kiawi’ moongowaid so iyo ri noboiasan. ³⁷ Nopupus iri, ido po koyuwan ingoranan so si Yudas kiat so wonuo nu Galilia linumawan-a nu lobuw Ruum, iya nu pongiapan nu lobuw ong komuro kosuang, om osuang-a lobuw minongowaid so iyo, nga nopatoi ya pudi iyo, om noboiasan-a moongowaid so iyo ri. ³⁸ Nadi soko ono ya pudi ono sono tu. Pokoilo aku so kou nu adang-o kuro-kuroon lobuw iitu no. Potuudan-a nosiro, so’ onu yo po pokigogoma’an, bang gogoma’on-a nu lobuw, ado kosunduran nu ono. ³⁹ Nga bang kiat itu no so Kinoringan, dai kou kopongodoog so nosiro, ala’ nai’ kopualod kou nu Kinoringan ong wagu!” koo si Gamalil. Osipo yo nosiro pongobiatan ni Gamalil. ⁴⁰ Poosuwo yo nosiro koimbagu pinongoorapan-i, lubako yo nosiro, om pinogos nu dai poponuturanon so lobuw suat so si Yisus. Nopupus iri, polobuso yo sono nosiro. ⁴¹ Mulaiwo yo ongo pinongoorapan iiri kiat so puimpugan-i maid nu osudu’an, so’ pinokotoop nosiro nu Kinoringan sumonsara’ suat so si Yisus. ⁴² Runat-runat pinongoorapan-i sumundur montuduk so natad nu Waloi Maayo nu Kinoringan om so waloi nu lobuw suang, paabar nu si Yisus-o su Raja Nijanji nu Kinoringan.

¹ Dai po olaid, pagka muririnuang lobuw poimaid so si Yisus, musosagka’ sono lobuw Yaudi mutangar nu tangar Yunani ri om lobuw Yaudi mutangar nu tangar Ibrani ri. Lobuw mutangar nu tangar Yunani ri minutangar nu, balu nosiro dai kotorima’ nu siin tulungan runat-runat suat so balu. ² Pagka soko iri, popuimpugo yo nu opulu om duo pinongoorapan ni Yisus kiawi’ lobuw poimaid-i om mutongaro yo nu, “Dai kai otoop ponuturanan dadan suat nu kosiinan tu, so’ dai kai kotoroido monuturan nu tinongaran nu Kinoringan. ³ Indadi pomili’ kou yo turu koyuwan so kou, isai su opatong, kinuasa nu Atod nu Kinoringan, om bana ko oilo, nu opongoorapan mai nu gogoma’on oono. ⁴ Bang soko ono, kotoroido kai sono mogdu’a om paabar nu tinongaran nu Kinoringan,” koo. ⁵ Kiawi’ lobuw nokotaayun-a nu upakat nu opulu om duo pinongoorapan-i, om pilio yo nosiro si Stipanus lobuw sobana ko opiot koimaidan-i, om dadan kuosaan nu Atod nu Kinoringan, om si Pilipus, si Prokurus, si Nikanur, si Timun, si Porminas, om si Nikulaus lobuw nu Antiukia okon ko bansa Yaudi nga minasuw iyo nu ugama Yaudi. ⁶ Owito yo sono turu koyuwan oono nu lobuw wokon poimaid-i sumambat so pinongoorapan-i, om mogdu’aa yo nosiro maid nu potopop nu palad nosiro so ulu nu turu koyuwan-i monapus nu gogoma’on nosiro. ⁷ Indadi sumunduro sono kolongkop paabar tinongaran nu Kinoringan. Mompomaid ni Yisus so Yirusalim nga rumuang sono, om imam nga osuang nopoimaid so si Yisus. ⁸ Si Stipanus-o po sobana ko binorokatan nu Kinoringan om tinaakan nu kuasa momaal nu koiran-iran om ponondu’an so tiningkuangon nu lobuw suang. ⁹ Nga tinu-tinu koyuwan lumawan so iyo. Nosiro oono kiat so puimpugan so waloi sosombooyangan nu lobuw nokolabus kiat so pinonguriponan. Nosiro yo po lobuw Yaudi kiat so Kirini, Aliksandria, Kilikia om kiat so wonuo nu Asia. ¹⁰ Nga Atod nu Kinoringan su nopoputangar so si Stipanus nu sobana ko oilo, sampai dai kosambut nosiro ong mutangar iyo. ¹¹ Taaki yo nosiro lobuw wokon-i nu siin, om upokato yo nu popomuduton nu, “Norongou mai si Stipanus mubaag so si Musa om Kinoringan,” koo. ¹² Soko ono yo gama’ nosiro poungot nu lobuw suang, wowaidon nu lobuw Yaudi, om moomontuduk nu Ukum ni Musa. Okomo yo sono nosiro si Stipanus potingkuang so Poongobisora’an nu Ugama ¹³ om owito yo nosiro lobuw moomudut om poputongaro yo nu, “Obulit lobuw iitu mubaag nu Waloi Maayo nu Kinoringan mai, om Ukum nu Kinoringan iri nilombus ni Musa. ¹⁴ Norongou mai iyo mutangar nu, si Yisus, lobuw Najarit-i monguyas nu Waloi Maayo nu Kinoringan iitu, om mominda nu adat noguru’ toko kiat so si Musa!” koo nosiro. ¹⁵ Lobuw suang so Poongobisora’an nu Ugama ri momontong so si Stipanus, om osiou nosiro buatan niyo soko buatan nu susuu’on nu Kinoringan.

¹ Duato yo nu Imam Maayo ri si Stipanus nu, “Bana ka ponopudan nosiro so ikau oono?” koo. ² Sumombuto yo si Stipanus nu, “Oo su kosusulodan om kotutuaan, rongowo muyu yo tongaron ku tu. Kinoringan, iri sobana ko kikuasa, minokisiou so aki rumpungan toko si Abraham nu laid po niyo molak-polak so Misuputamia, dai po nokopinda so Aran-i. ³ Minutangar Kinoringan so si Abraham nu, ‘Ogoli yo wonuo mu om suku-sakat mu no, om ian-o so wonuo nituduk Ku so ikau-o,’ koo. ⁴ Mulaiwo yo si Abraham kiat so wonuo nu Kasdim om molako yo so Aran. Minatoi-o po amo ni Abraham, tinudukan iyo nu Kinoringan nu popindaan so wonuo kinopolakan muyu iitu. ⁵ Dai ya minonaak Kinoringan so si Abraham nu tana’ osongapan niyo, nga minujanji Kinoringan so iyo nu taakan-a nu tana’ songapan niyo om solusuk niyo, pudi pona d’ado po anak niyo nu iya iiri. ⁶ Soko itu yo tangar nu Kinoringan so iyo, ‘Solusuk mu no ourug nu porantau so wonuo nu lobuw. Ouripon nosiro om sonsora’on solaid opat naatus toun. ⁷ Nga insaadan Ku ya lobuw monguripon so nosiro no, su’ kolabus nosiro, om mongusaa’ so Aku tuui,’ koo. ⁸ Om nitaak sono nu Kinoringan so si Abraham ido ponondu’an nu janji oogot so nosiro, ono yo sinunatan. Soko iri po sunati yo ni Abraham si Isak so kowalu runat kiat so kinopuonakan so iyo ri. Si Isak minonunat nu anak niyo, si Yakub, om si Yakub minonunat nu inonakan niyo kokusoyan opulu om duo ri, iri yo su aki rumpungan nu lobuw Yaudi. ⁹ Ido koyuwan kiat so opulu om duo iiri, ngaran niyo si Yusup, om pinokimuogil-ogilan iyo poroongkaan niyo ri. Niwoli sono nosiro si Yusup dii so Masir om nouripon, nga maid-waid-a Kinoringan so iyo, ¹⁰ polaiw kiat so kiawi’ koogutan niyo ri. Nokosambat si Yusup so raja Masir-i. Oingin sobana raja ri so iyo om pinangkat iyo nu raja ri nu gobonor. Iyo yo sono su mogkuasa nu tana’ so Masir om waloi nu raja ri. ¹¹ Indadi kilikop sono so pilolongkop nu wonuo Masir om Kanaan, om sobana ko osonsara’ kolobuwan dii ri. Odu aki toko ri nga sobana ko osimpit nu mookan. ¹² Norongou-o po ni Yakub nu kiingkookan po dii so Masir, suuo yo niyo inonakan niyo ri poian dii, nga insan nai’. ¹³ Koinduo nosiro mian so Masir-i, minokitondu’ yo sono si Yusup so kosusulodan niyo opulu om ido ri. Noilaan nai’ nu raja Masir-i suku-sakat ni Yusup. ¹⁴ Mongodawo yo si Yusup so amo niyo si Yakub nu posuuton so Masir, maid nu suku-sakat niyo turu nopulu om limo sampuw. ¹⁵ Murongkato yo sono si Yakub so Masir, om dii yo pinotoyan niyo om odu aki toko ri. ¹⁶ Nga bangkai nosiro ri, inowit-a so bandar Sikim so wonuo iitu, om nilobong so tana’ winoli ni Abraham so inonakan ni Imur. ¹⁷ Iya nu oduruk-o ourug iri janji nu Kinoringan so si Abraham, sinumuang-o sono bansa toko so Masir. ¹⁸ Minogkuasa sono ido raja so Masir dai kotondu’ so si Yusup. ¹⁹ Raja iiri minongoburunsut om minongusiba’ nu odu aki toko ri. Koduung kopuanak-o kowoinoyan, sosogan-o niyo nu nipolabus anak-i kiat so waloi, su’ matoi. ²⁰ Iya yo iiri, kinopuonakan so si Musa om oparu’ sobana iyo. Tolu nowulan laid pinoriara’ iyo so waloi nu amo niyo ri, ²¹ om nilabus sono kiat so waloi. Nga inalap-a iyo nu anak woinoi nu raja ri mongowit muli’, om pinoriara’ soko anak niyo kondiri. ²² Tinudukan iyo nu kiawi’ pontudukan nu bansa Masir, om sobana ko oilo mutotongaran om owarong kogoyaan. ²³ Iya nu opat nopulu toun umur ni Musa, tinapus sono niyo nu mongondaa so sondad bansa niyo Israil-i. ²⁴ Laid niyo manou-panou-i, nokosiou iyo ido lobuw Masir monginsaad nu bansa niyo Israil. Topano yo ni Musa bansa niyo ri om potoyo yo niyo lobuw Masir-i. ²⁵ (Ponokodan ni Musa nu oorotian nu bansa niyo ri nu iyo yo po nga pinakai nu Kinoringan polabus so nosiro, nga dai ya noorotian nosiro.) ²⁶ Susuab-i nokosiou-o iyo duo koyuwan bansa Israil minualod, om kininaman niyo popusulut duo koyuwan iiri nu, ‘Oo lakitu, kou yo po sonsulod. Dai kou otoop soko ono!’ koo, ²⁷ nga iri minonginsaad nu una’ niyo ri, sobana ko okosog. Tuuri yo niyo si Musa maid nu mutangar nu, ‘Ado ya minongurug so ikau nu wowaidon mongukum so kai! ²⁸ Kalu ong mokipopomatoi ko so aku, soko lobuw Masir pinatoi mu siniab-i!’ koo. ²⁹ Norongou-o po iri ni Musa, linumaa’ sono iyo om mulaiwo yo kiat so Masir om minolak so wonuo nu Midian. Nokoontun iyo dii, om kianak duo sondad kusoi. ³⁰ Opat nopulu toun kiat nu iri, minintolang sono susuu’on nu Kinoringan so padang pantai orani so Bulud Sinai. Susuu’on iiri minintolang so kosupot-supotan nu ruwi kisinikit. ³¹ Noiranan si Musa nu iri, rinumani sono iyo momatong. Nga nokorongou iyo nu tangar nu Tuhan nu, ³² ‘Aku yo su Kinoringan usaa’on nu porookian mu ri, ono yo si Abraham, si Isak om si Yakub,’ koo iri norongou niyo ri. Nokokikip sono si Musa lumaa’, om dai nokooku’ sumundur momatong. ³³ Mutongaro po Kinoringan so si Musa nu, ‘Luus-o kasut mu no so’ tuui Aku, om tontong iitu noborokatan Ku. ³⁴ Nosiou Ku yo koosonsara’ nu lobuw Ku so Masir. Norongou Ku yo tangi’ nosiro mokiluluudon, om linumoga’ Aku yo polabus so nosiro. Kayo, niapit Ku ikau koimbagu so Masir,’ koo Kinoringan. ³⁵ Si Musa yo su tinulak nu bansa Israil. Minutangar nosiro nu, ‘D’ado ya minongurug so ikau nu wowaidon mogkuasa om mongukum so kai!’ koo. Nga Kinoringan-a su minongurug so iyo nu wowaidon om poolabus maid nu ponobangon nu susuu’on nu Kinoringan, nosiou niyo so kosupot-supotan nu ruwi kisinikit-i. ³⁶ Iyo yo su minonundan nu bansa Israil mulaiw kiat so Masir, maid nu koiran-iran pointolang nu monabang Kinoringan so iyo so Masir, so Raat Omiang, om so padang pantai solaid opat nopulu toun. ³⁷ Minutangar si Musa so bansa Israil nu, ‘Monuu’ Kinoringan ong wagu nai so kou ido poo’abar bansa muyu kondiri, soko poonuu’ Niyo so aku tu,’ koo. ³⁸ Si Musa yo su minonundan nu odu aki toko bansa Israil so padang pantai, om pinokoilo iyo nu susuu’on nu Kinoringan so Bulud Sinai nu, iyo yo su pinongoobaran nu gama’ monginsanang nu inawo nu Kinoringan, om nituturan so toko. ³⁹ Nga dai poimaid odu aki toko ri so si Musa, ala’ nai’ tinulak iyo nosiro om mokipupululi’ so Masir. ⁴⁰ Laid ni Musa so Bulud Sinai, minutangar odu aki toko ri so si Arun nu, ‘Pomaal-o nu tinindobuw monundan so toko. Dai yo oilaan mai ong onu nourug so si Musa, iri minonundan so toko lumabus kiat so Masir-i,’ koo nosiro. ⁴¹ Momaalo yo sono nosiro nu tinindobuw koogio nu sapi. Iri yo sono su rooraa’on nosiro, pounayan murami-rami monginokan so’ sobana ko osudu’ nosiro nu gogoma’on nosiro ri. ⁴² Ungkiat-o dii, tinolikudan nosiro nu Kinoringan, om pinosimaidan-a Niyo nosiro mongusaa’ nu korombituon, soko iri nokosurat so Buuk nu Kinoringan nu, ‘Oo su lobuw Israil! Okon-a ko Aku su inusaa’ muyu mongoraa’ solaid opat nopulu toun so padang pantai. ⁴³ Owit-owiton muyu bosalag nu tinindobuw iri ingoranan nu Molok, om tinindobuw, ingoranan nu Ripan, pinokokinoringan muyu so korombituon-o. Tinindobuw oono yo usaa’on muyu runat-runat. Ono yo ko’, nipoowit Ku kou nu lobuw orawu’ po kotoliban kiat so wonuo nu Babil,’ koo ri. ⁴⁴ Odu aki toko ri kuwai Bosalag Sosombooyangan wokon so padang pantai. Bosalag oono winaal mongowaid nu tutuduk nu Kinoringan so si Musa. ⁴⁵ Bosalag iiri tinorima’ nu odu aki toko kiat so odu aki lombus toko silaid-i, om nosiro yo su minongowaid so si Yusua masuw so tana’ iitu no. Tana’ iitu sinolod ungkiat so bansa wokon, iri sinusub nu Kinoringan mulaiw so tiningkuangon nu odu aki toko ri. Dii-dii yo sono bosalag iiri musingkologa’ nu iya ni Daud. ⁴⁶ Sobana ko koinsanang si Raja Daud nu Kinoringan, om minokilila’ iyo so Kinoringan usaa’on ni Yakub nu momaal nu waloi sosombooyangan so Kinoringan. ⁴⁷ Nga okon ko si Daud minomaal, sondiang ko anak niyo si Salumu su minomaal nu waloi sosombooyangan. ⁴⁸ Nga Kinoringan Sobana ko Opangkat okon-a ko molak so waloi winaal nu lobuw. Nokosurat-o so buuk nu ongo poo’abar tinangar Niyo gulu ri nu, ⁴⁹ ‘Langit-o yo su soko oogoman Ku, om wonuo tu soko lapik nu akod Ku tu. Indadi dai kou kopomaal nu waloi mutoop so Aku. Om dai kou kopomaal nu intoronan mutoop so Aku. ⁵⁰ Kiawi’ iitu no obana, so’ aku yo su minongurug nu kiawi’,’ koo ri,” koo. ⁵¹ Mutongaro po si Stipanus nu, “Sobana ko okosog kou om dai koorati nu tinongaran nu Kinoringan! Soko odu aki muyu ri, dai kou moomongkinongou nu Atod nu Kinoringan. ⁵² Kiawi’ pinongoorapan nu Kinoringan gulu ri ininsaadan nu odu aki muyu ri. Pinatoi nosiro poo’abar nu Kinoringan, iri nopotuturan suat nu kologa’an nu Uripon Niyo Obana, ono yo si Yisus. Kosiono ininsaadan muyu Iyo om pinatoi muyu. ⁵³ Nokotorima’ kou yo nu Ukum ni Musa, iri niloga’ nu ongo susuu’on nu Kinoringan, nga dai kou mongowaid nu ono!” koo si Stipanus. ⁵⁴ Norongou-o po nu lobuw so Poongobisora’an nu Ugama ri tinangar ni Stipanus, minungot nosiro sobana sampai gorigitan, ⁵⁵ nga kinuasa si Stipanus nu Atod nu Kinoringan. Tumingaa’o yo iyo so langit, om nosiou niyo binaang nu Kinoringan, om si Yisus mundii-dii so pogkuosaan umpak so wanan nu Kinoringan. ⁵⁶ Mutongaro yo sono iyo nu, “Rongowo muyu! Siou-siowan ku surga nosukab, om mundii-dii Anak nu Riniba so umpak wanan nu Kinoringan,” koo si Stipanus. ⁵⁷ Indadi songgonsok-gonsok sono nosiro, maid nu monombol nu tolingo om tuminong dii si Stipanus. ⁵⁸ Owito yo nosiro si Stipanus lumabus om pilayo yo nu watu. Nipolak nosiro pokakas nosiro ri so obi’ nu omulok, ingoranan so si Saulus. ⁵⁹ Laid nosiro momilai-i, mogdu’aa yo si Stipanus nu, “Oo Yisus Tuhan ku, torimaa yo atod ku tu,” koo. ⁶⁰ Sumurukudo yo iyo om mutongaro yo nu osangat nu, “Oo Tuhan, kodi yo insaadi nosiro suat so kosola’an iitu no,” koo, om nowukatan-o sono iyo.

¹ Nokotaayun-a si Saulus nu pinatoi si Stipanus. Runat-a iiri, tumimpuuno osonsara’ ongo lobuw poimaid dii so Yirusalim. Indadi, minias sono nosiro kiawi’ mulaiw, wokon so pilolongkap nu Yudia om wokon so Samaria. Iri po pinongoorapan ni Yisus su dai minulaiw. ² Nilobong-o sono si Stipanus nu tinu-tinu lobuw moongusaa’ nu Kinoringan, om sobana ko tinumangi’ nosiro oupusan. ³ Nga si Saulus sumundur nai’ mononsara’ nu puimpugan nu lobuw poimaid iiri. Mian iyo so kowoloyan polabus nu lobuw poimaid, dai tuna woinoi kusoi, om jiilon sono niyo. ⁴ Iri yo po lobuw poimaid noias-ias-i, potuturan sono nu Abar Owarong suat so si Yisus so siombo-ombo ya. ⁵ Si Pilipus nga minian sono so ido bandar maayo so Samaria, om nopaabar so lobuw dii nu si Yisus-o su Raja Nijanji nu Kinoringan. ⁶ Nokorongou-o po lobuw suang iiri nu niabar niyo ri, om nosiou nosiro koiran-iran winaal niyo, nopoimaid sono nosiro kiawi’ nu tuturan iiri. ⁷ Osuang lobuw sinorungan nu moinat sinusuban ni Pilipus, om mulaiwo sono komoinatan-i maid nu monsok-gonsok. Om osuang po lobuw kimai om lobuw kolimpo nopoli’an. ⁸ Nadi, sobana ko osudu’an lobuw so bandar iiri. ⁹ Ido koyuwan minolak so bandar iiri, ngaran niyo si Simun. Olaid-o iyo poiran-iran nu lobuw Samaria momakai nu olimu niyo ri. Mutangar iyo nu d’ado ido koinong so iyo. ¹⁰ Kiawi’ lobuw so bandar iiri, maayo oworos, mongowaid so si Simun om mutangar nu, “Lobuw iitu no kikuasa nu Kinoringan nu obantug ingoranan nu, ‘Kuasa Maayo’,” koo nosiro. ¹¹ Mongowaid nosiro so iyo, so’ olaid-o iyo poiran-iran so nosiro momakai nu olimu niyo ri. ¹² Nga nokologa’ yo po si Pilipus dii, paabar nu Abar Owarong, nu mogkuasa Kinoringan soko raja om suat so si Yisus, nopoimaid sono nosiro nu iri. Minokidiu’ sono nosiro woinoi kusoi, pointolang nu poimaid nosiro so si Yisus. ¹³ Si Simun nga nopoimaid-a. Nodiu’ yo po iyo, maid-waid sono iyo so si Pilipus, om oiranan nu ponondu’an om koiran-iran winaal ni Pilipus. ¹⁴ Norongou-o po nu pinongoorapan ni Yisus so Yirusalim-i, nu nopoimaid lobuw dii so wonuo nu Samaria nu totongaron nu Kinoringan, opiti yo sono nosiro si Pitrus om si Yuanis dii. ¹⁵ Nokologa’ nosiro dii, mogdu’aa yo nosiro nu lobuw poimaid-i, tayon ong loga’on nu Atod nu Kinoringan, ¹⁶ so’ d’ado po ido koyuwan dii linoga’ nu Atod nu Kinoringan, ontob nai’ nu diniu’ nosiro mongorait so si Yisus. ¹⁷ Topopi yo sono ni Pitrus om ni Yuanis palad nosiro ri so ulu nu lobuw poimaid-i, om linoga’ yo sono nosiro nu Atod nu Kinoringan. ¹⁸ Nosiou-o po ni Simun nu linoga’ lobuw-i nu Atod nu Kinoringan nu notopop nu pinongoorapan ni Yisus ulu nosiro ri, mokipoponaak sono iyo nu siin so nosiro, ¹⁹ om mutongaro yo nu, “Taaki yo kuasa oono so aku su’ isai-isai ya topopan ku nu palad ku tu, loga’on lobuw oono nu Atod nu Kinoringan,” koo. ²⁰ Nga sumombuto yo si Pitrus nu, “Ikau om siin mu no kopurundun-a nisubo so noraka! Sobana ko nosala’ pongiro-kiro mu no so’ ponontaman mu nu owoli nu siin kuasa nu Kinoringan-o. ²¹ Dai ko otoop maid-waid so gogoma’on mai, so’ inawo mu no dai obana so tiningkuangon nu Kinoringan. ²² Rorogo yo kiat so pikiran mu oraai oono, om pokiampun-o so Kinoringan, ²³ so’ oilaan ku inawo mu no noponu’ nu koraayan, soko ompodu,” koo si Pitrus. ²⁴ Mutongaro yo si Simun nu, “Pogdu’a kou yo so Kinoringan, su’ dai ourug so aku kiawi’ tinangar muyu no,” koo. ²⁵ Nopupus-o po si Pitrus om si Yuanis mutangar suat so pongoilaan nosiro so si Yisus, om nopaabar nu tinongaran ni Yisus, mululio yo nosiro so Yirusalim. Laid nosiro manou-panou mululi’ ri, nopaabar nosiro nu tinongaran ni Yisus so osuang kampung so wonuo nu Samaria. ²⁶ Nopupus iri mutongaro yo ido susuu’on nu Kinoringan so si Pilipus nu, “Tungag-o om purongkat-o so solatan maid nu lalan tumaad kiat so Yirusalim mian so Gaja,” koo. (Lalan iiri sobana ko oyiyingo.) ²⁷ Murongkato yo sono si Pilipus. Laid niyo manou-panou-i nokosambat iyo nu ido wowaidon kiat so Itiupia. (Iyo yo po pinongoorapan nu kosiinan nu raja woinoi dii so Itiupia.) Wowaidon iiri koo’opod mongusaa’ nu Kinoringan so Yirusalim, ²⁸ om mosaan niyo so pomponowan muli’. Mogom-ogom iyo so korita kuda sinokoyan niyo ri, mongobasa’ nu buuk sinurat ni Yisaya, poo’abar nu Kinoringan gulu ri. ²⁹ Mutongaro yo Atod nu Kinoringan so si Pilipus nu, “Rani yo so sosokoyan oono,” koo. ³⁰ Indadi rumonio yo si Pilipus so sosokoyan-i, om norongou niyo wowaidon iiri mongobasa’ nu buuk sinurat ni Yisaya. Duato yo niyo wowaidon-i nu, “Oorotian mu ya ka bosa’on mu no?” koo. ³¹ Sumombuto yo wowaidon-i nu, “Onu ka koorati-rati ku ong d’ado ya montuduk so aku?” koo. Indadi posokoyo yo sono niyo si Pilipus so korita kuda niyo ri mokimuobi’. ³² Itu yo su binasa’ niyo, “Iyo soko dumba ginaras, om soko uyog nu dumba dai mukai ong burutan. Soko iri yo, dai muad minimbongut Iyo. ³³ Pubaagan Iyo, om dai otoop poongobisara’ so Iyo. Matoi Iyo nu d’ado solusuk,” koo ri. ³⁴ Mutongaro yo wowaidon iiri so si Pilipus nu, “Obari aku yo ong isai kuanon nu poo’abar nu Kinoringan oono, iyo ka kondiri ko’ lobuw sondiang?” koo. ³⁵ Kiat so ayat iiri, tumimpuuno yo sono si Pilipus potarang nu Abar Owarong suat so si Yisus. ³⁶ Laid nosiro manou-panou, nokolalag sono nosiro nu sungoi. Mutongaro yo wowaidon iiri so si Pilipus nu, “Siowi, kisungoi tidi. Gaam nai’ mokidiu’ aku so ikau,” koo. [ ³⁷ Mutongaro yo si Pilipus nu, “Kowasa ko ya diu’on ong bana nu poimaid ko so si Yisus,” koo. Sumombuto yo wowaidon-i nu, “Poimaid aku yo so si Yisus. Iyo yo su Anak nu Kinoringan,” koo.] ³⁸ Suuo yo nu wowaidon-i moomongkuyut nu sosokoyan-i pointoron. Sumondoto yo nosiro so sungoi-i, om diuo yo iyo ni Pilipus. ³⁹ Nokotidong nosiro, milok po su inongoi si Pilipus nu Atod nu Kinoringan kiat dii. Dai yo sono nosiou nu wowaidon-i si Pilipus, indadi lumombuso yo iyo maid nu sobana ko osudu’an. ⁴⁰ Pogsiou ni Pilipus, dii yo iyo so bandar Asdud. Lumongkopo yo sono iyo so bandar iiri paabar suat so si Yisus sampai nokologa’ so bandar Kaisaria.

¹ Laid nu iri sumundur-a si Saulus mongoraai om momatoi nu mompomaid ni Yisus. Minian iyo so Imam Maayo so Yirusalim, ² mokitaak nu surat kopogboya’an owiton niyo so waloi sosombooyangan nu Yaudi so bandar Damsik, su’ bang kolalag iyo nu lobuw woinoi kusoi poimaid so si Yisus, aakom niyo nosiro mongowit so Yirusalim om jiilon. ³ Laid niyo manou-panou mian so Damsik, nokorani-rani so bandar-i, ina’ po om pokikilap onawau kiat so langit linumiwut dii so iyo. ⁴ Nogupol sono iyo so tana’ ri om nokorongou nu bongut minutangar so iyo nu, “Oo Saulus, nokuro su mongindoraai ko so Aku?” koo. ⁵ Sumombuto yo si Saulus nu, “Isai ko ka Tuhan?” koo. Sumombuto yo bongut iiri nu, “Aku yo si Yisus, indoraayon mu no. ⁶ Nga tungag-o om lombus-o so bandar oono. Tudukan ko ya nai onu otoop goma’on mu,” koo. ⁷ Kouna’an ni Saulus manou-panou-i nga minintoron-a om nokotomos. Norongou-a nosiro bongut iiri, nga dai ya nosiou nosiro lobuw-i. ⁸ Tumungago yo si Saulus om kumolato yo, nga dai sono iyo kosiou. Indadi, tinanud-a sono iyo nu kouna’an niyo ri lumombus so Damsik. ⁹ Kotoluan iyo dai kosiou, om notatad-a iri niyo dai mongokan monginum. ¹⁰ Ido koyuwan mompomaid ni Yisus dii so Damsik, ngaran niyo si Ananias. Tongaro yo iyo nu Tuhan so ponsorowan nu, “Oo Ananias!” koo. Sumombuto yo si Ananias nu, “Onu nu iri, Tuhan?” koo. ¹¹ Mutongaro yo Tuhan nu, “Koyo, ian-o so lalan iri ingoranan nu Lalan Otulid, om diumo yo so waloi ni Yudas ido koyuwan kiat so Tarsus, ingoranan so si Saulus. Mosaan niyo mogdu’a, ¹² om so ponsorowan niyo, nosiou ko niyo lumoga’ potopop nu palad mu no dii so iyo, su’ kosiou iyo koimbagu,” koo. ¹³ Nga sumombuto yo si Ananias nu, “Oo Tuhan, osuang lobuw nopokoilo so aku suat so lobuw iitu no, nu osuang gogoma’on niyo nu sobana ko oraai so lobuw poimaid so Ikau so Yirusalim. ¹⁴ Om linumoga’ po iyo tuui maid nu kopogboya’an kiat so Imam Maayo, mongaakom nu kiawi’ lobuw mongusaa’ so Ikau,” koo. ¹⁵ Nga mutongaro yo Tuhan so iyo nu, “Panou-a, so’ pinili’ Ku yo iyo mugogoma’on paabar suat so Aku so ongo bansa okon ko Yaudi, ongo raja om so lobuw Israil ono yo lobuw Yaudi. ¹⁶ Om niintolang Ku so iyo nu osuang kosonsora’an oirosaan niyo suat so Aku,” koo. ¹⁷ Pagka soko iri, miano yo sono si Ananias so waloi iiri, mosuwo yo iyo, om topopi yo niyo palad niyo ri dii si Saulus maid nu mutangar nu, “Oo sulod Saulus! Si Yisus, iri nosiou mu so pomponowan mu ri, Iyo yo su minonuu’ so aku mian tuui so ikau, su’ kosiou ko koimbagu, om kuosaan ko nu Atod nu Kinoringan,” koo. ¹⁸ Iya ya iiri, soko gogas minitak kiat so mato ni Saulus, om kosiou-o sono iyo. Tumungago yo sono iyo om diuo yo. ¹⁹ Nokookan po iyo, noulit-o sono kobosagan niyo. Mogolo yo sono si Saulus so Damsik kotinu-tinuan, minido so ongo mompomaid ni Yisus. ²⁰ Miano yo iyo so waloi sosombooyangan paabar nu, si Yisus-o po Anak nu Kinoringan. ²¹ Noiranan kiawi’ lobuw mongorongou so si Saulus, om mududuat nu, “Okon ka ko iyo yo iri minokipopomatoi nu kiawi’ lobuw nopoimaid so si Yisus so Yirusalim? Om okon ka ko iyo yo iri linumoga’ tuui sundur mongaakom nu lobuw poimaid om mongowit so siro so tiningkuangon nu wowaidon nu imam?” koo. ²² Nga sumuang nai’ lobuw poimaid nu pontudukan ni Saulus. Nopoimaid-o sono lobuw suang-i nu si Yisus-o su Raja Nijanji nu Kinoringan, kiat so niintolang niyo so nosiro suat so si Yisus, sampai dai yo sono kosagka’ so iyo lobuw Yaudi minogol so Damsik-i. ²³ Kotinu-tinuan kiat nu iri, muupokato yo sono lobuw Yaudi ri nu potoyon si Saulus, ²⁴ nga noilaan-a niyo padu-padu nosiro ri. Awi runat mongindad lobuw Yaudi ri so pintu nu bandar-i, tayon ong osipian nosiro si Saulus momatoi. ²⁵ Nga ido awi, osuwi yo sono nu lobuw poimaid-i si Saulus so wakid, om uluwi yo nosiro so uang nu rinding watu, polaiw kiat so bandar iiri. ²⁶ Miano yo si Saulus so Yirusalim om midoo yo so mompomaid ni Yisus dii, nga lumaa’ nosiro so iyo, so’ dai po poimaid nosiro nu bana-bana ya ka nu minaid-o iyo so si Yisus ko’ dai po. ²⁷ Lumogaa yo sono si Barnabas monabang so iyo, om owito yo sumamba so opulu om ido pinongoorapan ni Yisus, om tuturani yo nu kinosiowan ni Saulus so si Tuhan so lolanon mian so Damsik, om iri pinokimutongar-tongaran nu Tuhan so si Saulus, om koopogi niyo montuduk so Damsik suat so si Yisus. ²⁸ Soko iri po, midoo yo sono si Saulus so nosiro, om opogi iyo paabar suat so si Tuhan Yisus so pilolongkop nu Yirusalim. ²⁹ Mokimuupakat om mokimudaawa yo iyo nu lobuw Yaudi, iri mutangar nu tangar Yunani, om pokipopotoyan sono iyo nosiro. ³⁰ Pagka noilaan-a iri nu lobuw poimaid-i, owito yo sono nosiro si Saulus so Kaisaria, om opiti yo iyo so Tarsus. ³¹ Soko iri po d’ado yo sono koogutan nu puimpugan nu lobuw poimaid so pilolongkop nu Yudia, Galilia, om Samaria. Mongorumat nosiro nu Tuhan, om maid nu ponobangan nu Atod nu Kinoringan, pinopiot koimaidan nosiro om muririnuang koosuang nosiro. ³² Iya iiri, minanou-panou si Pitrus mongondaa nu lobuw poimaid so siombo-ombo ya. Ido runat minongondaa iyo nu lobuw poimaid dii so Lida. ³³ Nokosambat sono iyo nu lobuw ingoranan so si Onias. Kusoi oono d’ado kaya, om walu yo notoun dai kotungag kiat so poomoturuwan niyo ri. ³⁴ Mutongaro yo si Pitrus so iyo nu, “Oo Onias, poli’an ko ni Yisus. Tungag-o om imomoso yo poomoturuwan mu no,” koo. Iya ya iiri, tumungago yo si Onias. ³⁵ Kiawi’ lobuw so Lida om so pilolongkop nu puola’an nu Yupa om Kaisaria ingoranan nu Sarun, nga nokosiou so si Onias, om nopoimaid-o sono nosiro so si Tuhan Yisus. ³⁶ Ido woinoi so Yupa ingoranan so si Tabita, sobana ko poimaid so si Yisus. (Ngaran niyo so tangar Yunani, si Durkas, orati “payou”). Owarong dadan gogoma’on niyo om moonabang nu lobuw omiskin. ³⁷ Dai sono nokaatu’ si Tabita om minatoi. Nodiu’ yo po bangkai niyo ri, polaki yo so bilik dilanggau-i. ³⁸ Dai ya orawu’ Yupa kiat so Lida. Indadi, norongou-o po nu mompomaid ni Yisus so Yupa ri nu dii-dii si Pitrus so Lida, monuuo yo nosiro duo koyuwan monogina so iyo om kinodawan nu, “Sikap-o ya lumoga’,” koo. ³⁹ Mutimos-timoso yo si Pitrus om maido yo so duo koyuwan-i. Nokologa’ iyo, owito yo iyo so bilik dilanggau-i. Kiawi’ balu ri tumapu’ dii si Pitrus, maid nu tumangi’ om posiou so iyo nu pokakas om sabung winilit ni Durkas so nosiro ri. ⁴⁰ Polobuso yo ni Pitrus kolobuwan iiri, om sumurukudo yo iyo mogdu’a. Nopupus iri, rumonio yo iyo so bangkai ni Durkas om mutongaro yo nu, “Oo Tabita, tungag-o!” koo. Kumolato yo si Tabita om nosiou-o po niyo si Pitrus, tumungago yo iyo. ⁴¹ Kuyuti yo ni Pitrus longon nu woinoi iiri, om tongguo yo poundii. Paawo yo niyo lobuw poimaid-i, om balu ri, om komoulii yo niyo si Tabita so nosiro. ⁴² Nokolongkop-o sono abar iiri so Yupa, om osuang nopoimaid so Tuhan. ⁴³ Kotinu-tinuan si Pitrus dii mido-ido so pookodat nu kulit nu kulos-kulos, ingoranan so si Simun.

¹ Ido kusoi so Kaisaria, ngaran niyo si Kurnilius, wowaidon nu posukan nu soujar nu Ruum, ingoranan nu Posukan nu Italia. ² Iyo om anak sawo niyo sobana ko obinsuut nu oturan nu ugama om mongusaa’ nu Kinoringan. Dadan iyo mogdu’a so Kinoringan om monabang nu lobuw Yaudi omiskin. ³ Ido runat, kiro-kiro jaam tolu nu awi-awi, nokosorou sono iyo nu susuu’on nu Kinoringan linumoga’ om minomaau so iyo nu, “Oo Kurnilius,” koo. ⁴ Bontongi yo ni Kurnilius susuu’on iiri maid nu maa’-laa’ om mongoduato yo nu, “Onu ka, tuan?” koo. Sumombuto yo susuu’on-i nu, “Rinongou-o nu Kinoringan du’a mu ri om nosiowan-o Niyo poonabang mu nu lobuw omiskin, om ondomon ko Niyo. ⁵ Indadi, ponuu’ yo nu lobuw mian so Yupa monogina nu lobuw ingoranan so si Simun Pitrus. ⁶ Minintoron iyo so waloi nu pookodat nu kulit, ngaran-o po si Simun. Waloi niyo no so imbing nu raat,” koo susuu’on-i so si Kurnilius. ⁷ Nokolaiw susuu’on-i, paawo yo sono ni Kurnilius duo uripon niyo ri, om ido po soujar moongipat so iyo, iri poimaid so Kinoringan-i. ⁸ Tuturani yo niyo tinangar nu susuu’on nu Kinoringan so iyo iiri, om suuo yo niyo tolu koyuwan oono mian so Yupa. ⁹ Susuab-i, orani yo nosiro so Yupa, tinumimpak sono si Pitrus so taap nu waloi-i mogdu’a kiro-kiro tonga’ runat. ¹⁰ Minokiookan sono iyo so’ witilon sobana, nga dai po noonsak ingkookan-i. Nokosorou sono iyo nu, ¹¹ minitas su langit om kumut olaab niuluw so riniba tu, mawid-tawid opat pupijuan-i, om ¹² so asuw nu kumut iiri, osuang ginis nu kulos-kulos opat akod, lulumoloi om bombolog osiau. ¹³ Norongou-o sono niyo Kinoringan mutangar nu, “Oo Pitrus, tungag-o, goraso yo ono, om okano yo sono,” koo. ¹⁴ Sumombuto yo si Pitrus nu, “Dai, Tuhan. Dai po su insan mongokan nu osabul intawa osaim,” koo. ¹⁵ Nga mutongaro po Kinoringan nu, “Kiawi’ inurug nu Kinoringan, adang-o tokodon nu osaim,” koo. ¹⁶ Intolu muuli’-uli’ nosorou niyo iiri, om nopudik-o koimbagu kumut-i so langit. ¹⁷ Sobana ko noiranan si Pitrus nu nosorou niyo iiri om laid niyo mongiro-kiro nu iri, nokologa’ yo tolu koyuwan sinuu’ ni Kurnilius so waloi ni Simun, om dii yo so pintu ri. ¹⁸ Monoginaa yo nosiro ido koyuwan, om duato yo nu, “Kuwai ka lobuw minintoron tuui, ingoranan so si Simun Pitrus?” koo. ¹⁹ Kakal po si Pitrus mongiro-kiro nu nosorou niyo iiri, mutongaro yo Atod nu Kinoringan so iyo nu, “Oo Pitrus, diumon ko nu tolu koyuwan. ²⁰ Untiba yo, om ikod-o kilaa’ maid so nosiro. Aku yo su minonuu’ so nosiro,” koo Atod nu Kinoringan-i. ²¹ Muntibaa yo sono si Pitrus om mutongaro yo so kolobuwan-i nu, “Aku yo diumon muyu no. Onu ka tomod muyu?” koo. ²² Sumobuto yo nosiro nu, “Sinuu’ kai ni Kurnilius, iri wowaidon nu soujar-i mian tuui. Iyo yo po owarong om lumaa’ nu Kinoringan, om orumaton iyo sobana nu lobuw Yaudi. Sinuu’ iyo nu susuu’on nu Kinoringan poponogina so ikau ponumbaid nu du’a niyo ri. Sinuu’ iyo mongorongou nu onu tongaron mu so iyo,” koo. ²³ Powoloyo po sono ni Pitrus nosiro dii. Susuab-i momponowo yo nosiro. Tinu-tinu koyuwan, iri nopoimaid so Yupa ri nga minaid-a so nosiro. ²⁴ So koduo runat-i nokologa’ yo nosiro so Kaisaria. Mongindad si Kurnilius om inonakan om kouna’an pinologa’ niyo ri. ²⁵ Nokologa’ yo po si Pitrus, sumomungo yo si Kurnilius so iyo om sumurukudo yo so tiningkuangon niyo ri. ²⁶ Nga mutongaro yo si Pitrus nu, “Undii yo! Aku nga lobuw-a kosuangan,” koo. ²⁷ Sambil ni Pitrus om ni Kurnilius mutangar-tangar om masuw so waloi-i, om nosiou niyo osuang lobuw noimpug. ²⁸ Mutongaro yo sono iyo so nosiro nu, “Oo su kosusulodan ku! Tantu nokoilo kou yo nu, lobuw-o po Yaudi pogoson nu ugama gumosayun intawa muupakat nu lobuw okon ko Yaudi. Nga minontuduk Kinoringan so aku, nu dai aku sono kowasa pokosaim intawa pokosabul nu isai-isai ya. ²⁹ Ono yo ko’, dai aku ya nowogatan momikir nu sogina mu ri. Indadi, kosiono mokikoilo aku ong onu nipotomod mu so aku,” koo. ³⁰ Sumombuto yo si Kurnilius nu, “Kotoluan nokotalib-i kiro-kiro soko iya iitu no, minogdu’a aku so waloi tu nu jaam tolu nu awi-awi. Milok po su mundii-dii ido kusoi so tiningkuangon ku ri, kipokakas nu milap-kilap ³¹ om minutangar so aku nu, ‘Oo Kurnilius, tinumbaid-o du’a mu ri nu Kinoringan, om pogokalan mu owarong-i nga ondomon-a Niyo. ³² Indadi ponuu’ yo nu lobuw mian so Yupa monogina so si Simun Pitrus. Minolak iyo so waloi nu pookodat nu kulit, ingoranan so si Simun. Waloi niyo ri so imbing nu raat,’ koo susuu’on-i. ³³ Ono yo ko’, minonuu’ aku nu lobuw monogina so ikau, om sobana ko minoingin ko ya mian tuui. Kosiono, minuimpug kai tuui so tiningkuangon nu Kinoringan, mongkinongou ong onu nisuu’ Niyo so ikau potuturan so kai,” koo si Kurnilius. ³⁴ Tumimpuuno yo sono si Pitrus montuduk so nosiro nu, “Noilaan ku nai’ nu ono sono tu nu dai ya mominig Kinoringan nu lobuw. ³⁵ Lobuw lumaa’ so Iyo om momaal nu onu yo po owarong, torima’on-a Niyo pudi okon ko bansa Yaudi. ³⁶ Oo su kosusulodan ku! Noilaan muyu yo orati nu abar niloga’ nu Kinoringan so lobuw Israil-i. Abar iiri Abar Owarong suat so kopusulutan ong poimaid so si Yisus Kristus, Tuhan nu kiawi’ lobuw. ³⁷ Noilaan muyu yo noongourug so pilolongkop nu Yudia, iri tinumimpuun so Galilia, nu noopod si Yuanis mongaabar suat nu pongodiu’an. ³⁸ Noilaan-o nu lobuw suang nu si Yisus lobuw Najarit, pinili’ nu Kinoringan, tinaakan nu Atod nu Kinoringan om kuasa. Om noilaan-o nu lobuw suang nu minanou-panou si Yisus so siombo-ombo ya, momaal nu owarong. Minomali’ Iyo nu lobuw kinuasa nu Wowaidon nu Moinat, so’ maid-waid Kinoringan so Iyo. ³⁹ Kai yo su nokosiou nu pinuwaal Niyo so wonuo nu lobuw Yaudi om so Yirusalim, nga nisalib om pinatoi-a Iyo nosiro. ⁴⁰ Nga so kotolu runat-i, linuli’an Iyo nu Kinoringan om minokisiou po Iyo so lobuw suang. ⁴¹ Okon-a ko so kiawi’ lobuw pinokisiowan Niyo, nga kai ya, iri pinili’ yo nu Kinoringan nu gulu ri, nu pinokiimbonaan Niyo. Nokourung kai so Iyo mongokan om monginum, nu noluli’an Iyo kiat so kinopotoyan. ⁴² Om sinuu’ kai Niyo paabar nu Abar Owarong oono so lobuw suang, om pokoilo nu Iyo yo su pinangkat nu Kinoringan, mongukum nu lobuw miau po om minatoi-o. ⁴³ Kiawi’ poo’abar nu Kinoringan gulu ri nokoputangar-o suat so Iyo. Minutangar nosiro nu isai yo po poimaid so si Yisus, ompunon-a koraayan nu kuasa ni Yisus,” koo si Pitrus. ⁴⁴ Laid ni Pitrus malak-galak-i, muntibaa yo sono Atod nu Kinoringan mogkuasa nu lobuw minongkinongou nu abar iiri. ⁴⁵ Noiranan sono lobuw Yaudi minaid so si Pitrus kiat so Yupa ri, nu nosiou nosiro nu nopotaak Kinoringan nu Atod Niyo so lobuw okon ko Yaudi, ⁴⁶ so’ orongou nosiro ongo lobuw-i malak-galak nu ginis nu tinongaran, om mongorayou nu Kinoringan suat nu gogoma’on Niyo maayo. Mutongaro yo si Pitrus nu, ⁴⁷ “Siowi muyu, kolobuwan iitu nokoompit-o nu Atod nu Kinoringan soko toko. D’ado kopomogos so nosiro nu diu’on,” koo. ⁴⁸ Suuo yo sono ni Pitrus nosiro nu diu’on mongorait nu ngaran ni Yisus Kristus. Nopupus iri, owudi po nosiro si Pitrus nu popolakon po dii kotinu-tinuan.

¹ Norongou-o sono nu pinongoorapan ni Yisus om lobuw poimaid so pilolongkop nu Yudia, nu nopoimaid-o ongo lobuw okon ko Yaudi nu tinongaran nu Kinoringan. ² Nokopululi’ yo po si Pitrus so Yirusalim kiat so Kaisaria, ininsala’ sono iyo nu lobuw Yaudi iri nopoimaid-o so si Yisus om kakal po mongowaid nu adat nu sunat iiri nu, ³ “Nokuro ka su masuw ko so waloi nu lobuw dai po nosunatan-o, om murung so nosiro mongokan?” koo. ⁴ Nga tuturani yo sono ni Pitrus kiawi’ nourug iiri kiat so timpuun sampai so pongoowi’an nu, ⁵ “Laid ku mogdu’a so Yupa, nokosorou aku nu kumut olaab niuluw so riniba tu, so tiningkuangon ku ri, mawid-tawid opat pupijuan-i. ⁶ Potongi ku yo iri om nokosiou aku so dilalom-i nu koginisan nu kulos-kulos opat akod ongo sisiau, lulumoloi, om bombolog ongo sisiau. ⁷ Mutongaro yo sono Kinoringan so aku nu, ‘Oo Pitrus, undii yo, goraso yo ono, om okano yo!’ koo, ⁸ nga sombuti ku yo nu, ‘Dai, Tuhan! Dai po su insan mongokan nu osabul intawa osaim,’ k’aku. ⁹ Mutongaro yo Kinoringan so aku nu, ‘Kiawi’ inurug nu Kinoringan, adang-o pokosobulon,’ koo. ¹⁰ Intolu minuuli’-uli’ nosorou ku iiri, om pinudik-o sono koimbagu so langit. ¹¹ Iya ya iiri, linumoga’ tolu koyuwan so waloi inintoronan ku so Yupa ri ungkiat so Kaisaria, sinuu’ poponogina so aku. ¹² Pudi pona okon ko lobuw Yaudi nosiro, pinowaid aku ya nu Atod nu Kinoringan so nosiro om dai ya su maa’-laa’ nu iri. Onom koyuwan lobuw Yaudi nopoimaid so Yupa ri nga, minaid-a so aku mian so Kaisaria, om mosuwo kai yo so waloi ni Kurnilius. ¹³ Minonuturan sono si Kornilius nu nokosorou iyo nu susuu’on nu Kinoringan minundii so asuw nu waloi niyo ri, om minutangar nu, ‘Ponuu’ yo nu lobuw mian so Yupa, monogina so si Simun Pitrus. ¹⁴ Potuturan iyo so kou nu abar koponapul so kou, om kiawi’ lobuw so waloi mu no,’ koo susuu’on-i. ¹⁵ Laid ku montuduk so nosiro ri, lumogaa yo sono Atod nu Kinoringan mogkuasa so nosiro, soko iri nourug so toko nu Runat Pintakusta ri. ¹⁶ Noondoman ku sono tangar ni Yisus gulu ri nu, ‘Mongodiu’ si Yuanis gulu ri, sungoi-a su pokayon, nga dai yo olaid om Atod nu Kinoringan-o su mogkuasa so kou,’ koo ri. ¹⁷ Indadi, otolang-o sobana nu Kinoringan-o su monaak so lobuw okon ko Yaudi nu soko iri nitaak so toko, iri tinorima’ toko nu iya toko poimaid so si Yisus gulu ri. Pagka soko ono, dai su kopomogos nu Kinoringan!” koo si Pitrus. ¹⁸ Pagka soko iri yo tinangar ni Pitrus, dai yo sono ininsala’ iyo nosiro. Minongorayou sono nosiro nu Kinoringan, om mutongaro yo nu, “Bang soko ono, lobuw okon ko Yaudi nga kikosiwatan-a rumorogo momaal nu koraayan, om miau sono musingkolaid maid so Kinoringan,” koo. ¹⁹ Nopatoi-o po si Stipanus, tumimpuun-o sono raai-raayon lobuw poimaid so si Yisus. Nokoputotondiang nosiro om minulaiw so wonuo nu Punisia, Siprus, om so bandar Antiukia, om tinuturanan nosiro lobuw Yaudi nu abar kiat so Kinoringan. ²⁰ Nga tinu-tinu koyuwan wokon poimaid so si Yisus, kiat so Siprus om Kirini, minian so Antiukia, om nopotuturan nu Abar Owarong suat so si Tuhan Yisus so lobuw okon ko Yaudi. ²¹ Waid-waidon nosiro nu kuasa nu Tuhan sampai osuang sono lobuw nopoimaid om mululi’ so Tuhan Kinoringan. ²² Norongou-o po nu lobuw poimaid so Yirusalim abar suat so lobuw poimaid dii so Antiukia, niapit sono nosiro si Barnabas dii. ²³ Nokologa’ yo po si Barnabas, om nosiou niyo nu binorokatan nosiro nu Kinoringan, sobana ko nosudu’an iyo. Mutongaro yo sono iyo so nosiro nu subai tumatap poimaid so Kinoringan, dai musio-sio om otoroido inawo. ²⁴ Si Barnabas oono sobana ko owarong kogoyaan, kinuasa nu Atod nu Kinoringan om opiot koimaidan, om osuang lobuw noingolan niyo poimaid so Tuhan. ²⁵ Nopupus iri, miano yo iyo so Tarsus modium so si Saulus. ²⁶ Nooyangan-o po niyo si Saulus, owito yo niyo mululi’ so Antiukia. Sontoun laid nosiro muimpug maid nu lobuw poimaid, om montuduk nu lobuw suang. Om dii yo so Antiukia su pinonimpuunan mongingaran nu ongo lobuw poimaid so si Yisus nu Kristian. ²⁷ Iya iiri, tinu-tinu poo’abar nu Kinoringan ungkiat so Yirusalim minian so Antiukia. ²⁸ Ido koyuwan so nosiro ingoranan so si Agabus kinuasa nu Atod nu Kinoringan. Mundiio yo sono iyo momirasat nu kilikop so pilolongkop nu wonuo tu. (Likop iiri nourug nu laid ni Raja Maayo Klaudius mogkuasa.) ²⁹ Minuupakat sono kiawi’ mompomaid ni Yisus dii ri nu poowit nu tulungan ombo kuwai so nosiro so inong poimaid so wonuo nu Yudia ri. ³⁰ Notuman-o sono pinuupokatan iiri, om suuo yo nosiro si Barnabas om si Saulus paapit nu tulungan-i so wowaidon nu lobuw poimaid so Yudia.

¹ Iya ya iiri, tumimpuuno sono si Raja Irudis mononsara’ nu lobuw poimaid so si Yisus. ² Minonuu’ iyo popomunggol nu ulu ni Yakubus, iri sulod ni Yuanis. ³ Noilaan-o po niyo nu posanang nu inawo nu lobuw Yaudi iri dai po poimaid so si Yisus gogoma’on niyo ri, monuuo po iyo nu lobuw popongaakom so si Pitrus. Pinongookoman so si Pitrus nokoiya nu Runat Maayo ingoranan Rami-Rami nu Baang-Baang D’ado Pongombang. ⁴ Naakom-o po si Pitrus, jiilo yo sono iyo, om inipatan nu opat posukan soujar. Opat koyuwan ido posukan, mususulang mongipat so si Pitrus. Padu ni Irudis, bisora’on-a si Pitrus so tiningkuangon nu lobuw suang, ong kotalib-o Paska ri. ⁵ Indadi, notaan po sono si Pitrus so jiil, nga kouna’an niyo ri bana-bana ko mogdu’a so Kinoringan suat so iyo. ⁶ Awi nu dai po nologa’ runat pongobisora’an ni Irudis so si Pitrus so tiningkuangon nu lobuw suang, nokoturuw sono si Pitrus so puola’an nu duo soujar moongipat om kinogosan musompodi longon niyo ri so longon nosiro ri. Soujar wokon-i mibon-ibon-a so pintu nu jiil-i, mongipat. ⁷ Milok po su mundii-dii yo susuu’on nu Kinoringan so obi’ ni Pitrus, om tinumogu’ onawau so rinuang nu jiil-i. Guyuo yo si Pitrus nu susuu’on-i porios om mutongaro yo nu, “Sikap-o ya tumungag!” koo. Rantai nokokogos so longon ni Pitrus, nga, minuyad-o sono. ⁸ Mutongaro po susuu’on-i nu, “Pusabung-o, pukambot-o, pukasut-o, om waid-o so aku”, koo. Osipo yo iri ni Pitrus, ⁹ om maido yo so susuu’on-i lumabus kiat so jiil, nga dai ya noilaan niyo nu bana-bana ka iri ko’ nosorou-sorou-a niyo. ¹⁰ Nokotalib-o po nosiro so tontong pongipatan togna om koduo ri, nokologa’ yo nosiro so pintu bosi, lalan mian so bandar. Sinumukab kondiri pintu iiri, om lumobuso yo nosiro minaid nu ido lalan, om milok po su linumiong-a susuu’on-i. ¹¹ Noindanan nai’ ni Pitrus nu bana-bana ya nourug iiri. Mutongaro yo sono iyo nu, “Kosiono noilaan ku nai’ nu bana-bana ya nu minonuu’ Tuhan nu susuu’on Niyo polabus so aku kiat so kopogboya’an ni Raja Irudis, om koinginan nu lobuw Yaudi suat so aku,” koo. ¹² Nokopomikir-o po si Pitrus sontagal, miano yo iyo so waloi ni Maria, ino ni Yuanis (ngaran koduo niyo si Markus). Osuang lobuw minuimpug dii mogdu’a. ¹³ Koritiko yo niyo pintu ri, om lumogaa yo ido uripon woinoi, ngaran niyo si Ruda, mongilo ong isai mongoritik-i. ¹⁴ Notondu’an nu woinoi-i bongut iiri, nu bongut ni Pitrus. Pagka osudu’an sobana iyo, dai po sinukab niyo pintu ri, nga linumalom nai’ koimbagu potuturan nu dii-dii si Pitrus so dilabus-i. ¹⁵ Mutongaro yo nosiro so iyo nu, “Mulou ko bo gaam,” koo, nga sumangat nai’ woinoi iiri mutangar nu bana ya nu si Pitrus. Mutongaro po nosiro nu, “Iri ya bo ono atod niyo ri,” koo. ¹⁶ Nga dai mintoron-toron si Pitrus mongoritik nu pintu ri om sinukab-o sono nosiro. Nosiou-o po nosiro si Pitrus, sobana ko noiranan nosiro. ¹⁷ Nga sogkai yo ni Pitrus palad niyo ri poukokop so nosiro. Tuturani yo sono niyo gama’ nu Tuhan polabus so iyo kiat so jiil om mutongaro yo iyo nu, “Tuturani muyu yo itu no so si Yakubus om so inong toko poimaid,” koo. Lumobuso yo sono iyo om miano yo so tontong wokon. ¹⁸ Susuab-i, sobana ko noogutan ongo soujar-i ong onu nourug so si Pitrus. ¹⁹ Monuuo yo si Raja Irudis nu lobuw popodium so si Pitrus, nga dai ya nooyangan. Indadi nipoduat sono ni Raja Irudis moongipat-i, om potoyon-o sono nosiro. Nopupus iri, momponowo yo iyo kiat so Yudia, om molako yo so Kaisaria kotinu-tinuan. ²⁰ Sobana ko minungot si Raja Irudis so lobuw nu Tirus om Sidun. Pagka soko iri, linumoga’ sono ido puimpugan kiat so nosiro dii si Raja Irudis mokiluluudon. Gulu po, inimuunan nosiro si Blastus, wowaidon so waloi ni Irudis, om ginumapi’ sono iyo so nosiro. Miano yo nosiro dii si Raja Irudis mokimuwarong, so’ ingkookan-o po nu lobuw suang iiri kiat-a so wonuo pogkuosaan niyo. ²¹ Ido runat nu notantu yo ni Irudis, minupokokaso iyo nu pokakas nu raja, mogomo yo so oogoman nu raja om mutongaro yo so lobuw suang-i. ²² Laid niyo mutangar-i, songgonsok-gonsok sono lobuw suang-i nu, “Poomutangar niyo no soko poomutangar nu pinokokinoringan, okon ko soko lobuw,” koo. ²³ Iya ya iiri, ininsaadan iyo nu susuu’on nu Kinoringan, so’ dai mongorumat nu Kinoringan. Minatoi sono iyo, om inokan nu lingguang. ²⁴ Rumuang nai’ lobuw korongou nu tinongaran nu Kinoringan, om poimaid sono so si Yisus. ²⁵ Noopod-o po gogoma’on ni Barnabas om ni Saulus so Yirusalim, mulio yo nosiro so Antiukia om pinowaid-a nosiro si Yuanis, iri ingoranan-a so si Markus.

¹ Tinu-tinu poo’abar nu Kinoringan om moomontuduk so puimpugan nu lobuw poimaid so Antiukia, ono yo si Barnabas, si Simiun, iri ingoranan-a so si Itom, si Lukius kiat so Kirini, si Monain una’-una’ ni Raja Irudis kiat koworos, om si Saulus. ² Laid nosiro mongusaa’ nu Kinoringan om mupuasa, tongaro yo nosiro nu Atod nu Kinoringan nu, “Pilio muyu yo si Barnabas om si Saulus mugogoma’on nu nipogama’ Ku so nosiro,” koo. ³ Noopod nosiro mupuasa om mongusaa’, topopo yo nosiro ulu nu duo koyuwan oono, om suuo yo popanou. ⁴ Miano yo sono si Barnabas om si Saulus so Soloukia musuat nu ponuu’an nu Atod nu Kinoringan so nosiro ri, om kiat dii sumokoyo yo nosiro nu kapal mian so puru Siprus. ⁵ Nokologa’ nosiro so bandar Solamis, nopaabar sono nosiro nu tinongaran nu Kinoringan so ongo waloi sosombooyangan nu lobuw Yaudi ri. Maid-waid-a si Yuanis Markus so nosiro monabang. ⁶ Linumongkop nosiro mompanou so puru oono sampai so Papos. Nokosambat sono nosiro dii nu lobuw Yaudi, ingoranan so si Bar-Yisus. Iyo yo po nga bolian om monokod nu iyo yo su poo’abar nu Kinoringan. ⁷ Bolian iiri kiuna’-una’ nu sobana ko oilo, ingoranan so si Sirgius Paulus, gobonor so puru oono. Soginaa yo ni Sirgius Paulus si Barnabas om si Saulus, so’ mokirorongou nu totongaron nu Kinoringan. ⁸ Nga pinogos nosiro ni Ilimas iri bolian-i (si Ilimas-o po ngaran ni Bar-Yisus so tangar nu Yunani). Dai moingin si Ilimas ong poimaid una’-una’ niyo iiri so si Yisus. ⁹ Nga si Saulus (ngaran koduo si Paulus) kinuasa nu Atod nu Kinoringan, minomontong nu bolian iiri, ¹⁰ om mutongaro yo nu, “Oo su anak nu Wowaidon nu Moinat! Ikau-o su alod-alod nu onu yo po owarong. Oilo ko sobana mongaakal. Ikau-o su monobon nu pontudukan nu Tuhan iri koponapul nu lobuw. ¹¹ Ingati yo kosiono! Insaadan ko nu Kinoringan. Obolou ko sono om dai kosiou nu runat kotinu-tinuan,” koo. Iya ya iiri, noirosaan ni Ilimas nu kuwai tinumombol so mato niyo ri om nobolou-o sono iyo. Mongkam-kongkam-a iyo mompanou modium nu lobuw pokitonudan. ¹² Nosiou-o po iri nu gobonor-i, nopoimaid sono iyo, so’ sobana ko noiranan nu pontudukan suat so Tuhan Yisus. ¹³ Lumoyago yo si Paulus om kouna’an niyo ri kiat so Papos, mian so Porga, ido bandar so wonuo Pampilia. Nokologa’ yo po nosiro dii, mogolo yo sono si Yuanis Markus, om mululio yo so Yirusalim. ¹⁴ Kiat so Porga linumombus nosiro so Antiukia so wonuo nu Pisidia. Runat Pongintoronan-i, miano yo nosiro so waloi sosombooyangan nu lobuw Yaudi. ¹⁵ Noopod mongobasa’ nu Buuk nu Kinoringan inalap so Ukum ni Musa, om nisurat nu poo’abar gulu ri, monuuo yo wowaidon so waloi sosombooyangan iiri nu lobuw mutangar so si Paulus om kouna’an niyo ri nu, “Tongaro muyu ya ong kuwai kodau muyu poinsanang nu inawo mai,” koo. ¹⁶ Mundiio yo sono si Paulus om poukokopo yo niyo lobuw-i, om tumimpuuno yo montuduk nu, “Oo su kosusulodan ku bansa Israil, om okon ko bansa Israil iri poimaid nu Kinoringan, rongowo muyu yo tangar ku tu. ¹⁷ Pinili’ yo nu Kinoringan bansa Israil, odu aki toko ri, om inurug nu bansa maayo nu laid nosiro so Masir soko porantau. Maid nu kuasa Niyo maayo, tinundan Niyo nosiro lumabus kiat so Masir. ¹⁸ Pudi pona oraai kogoyaan nosiro solaid opat nopulu toun so padang pantai, kakal-a inipatan nosiro nu Kinoringan. ¹⁹ Turu bansa so wonuo nu Kanaan pinatoi Niyo, om tinayad-tayad Niyo tana’ iiri so bansa Israil nu niposongapan so nosiro. ²⁰ Kiawi’ oono nourug solaid opat naatus limo nopulu toun. Nopupus iri, minomili’ Kinoringan kiat so nosiro nu moongobisara’ musingkologa’ ni Samuil iri poo’abar nu Kinoringan. ²¹ Minindamo sono nosiro nu raja, om pinili’ yo nu Kinoringan si Saul anak ni Kis, kiat so suku-sakat ni Binyamin, sumiliw nu raja nosiro solaid opat nopulu toun. ²² Nologa’ pinoingkoyodan nu Kinoringan so si Saul, pinosulang sono Niyo si Daud sumiliw nu raja wagu nosiro. Soko itu yo tangar nu Kinoringan suat so si Daud nu, ‘Osiou Ku si Daud, anak ni Yisai, koinsanang nu inawo Ku. Onu-onu koinginan Ku, waidon niyo,’ koo. ²³ Kiat so solusuk ni Raja Daud, siniliw Niyo si Yisus nu Moonapul nu bansa Israil musuat nu nijanji Niyo ri. ²⁴ Dai po nokotimpuun si Yisus nu gogoma’on nisuu’ nu Kinoringan so Iyo ri, notangar-o laid ni Yuanis so lobuw Israil nu subai rumorogo nosiro momaal nu koraayan om diu’on. ²⁵ Uyud-uyud pongoowi’an nu gogoma’on niyo, pinusou-pusowan ni Yuanis mongoduat ongo lobuw-i nu, ‘Isai aku ka itu no, ponokodan muyu? Aku yo po okon-a ko iri lobuw imat-imatan muyu ri. Ondomo muyu yo, oopod aku nu gogoma’on ku tu, om lumoga’ nai’ Iyo. Insan mongoluus nu kasut Niyo nga dai su otoop,’ koo. ²⁶ Oo su kosusulodan ku solusuk ni Abraham, om kiawi’ kosusulodan okon ko Yaudi, iri ototog poimaid so Kinoringan! Nokotaak-o nu Kinoringan so toko abar nu gama’ Niyo monapul nu lobuw. ²⁷ Nga lobuw minolak so Yirusalim-i om wowaidon nosiro dai nokoilo nu si Yisus-o su Moonapul iiri. Dai nosiro koorati nu pontudukan nu poo’abar nu Kinoringan silaid-i, iri bobosa’on runat-runat so waloi sosombooyangan koduung Runat Pongintoronan. Nga pagka inukum nosiro si Yisus nu potoyon, tinuman sono nosiro totongaron nu poo’abar oono. ²⁸ Dai pona nokooyang nosiro nu kosola’an Niyo, nu mupatut pongukuman so Iyo nu potoyon, nga sinosogan-a nosiro si Pilatus nu potoyon-a Iyo. ²⁹ Nopupus-o po nosiro mongowaal nu kiawi’ nokosurat so Buuk nu Kinoringan suat so Iyo, niuntiba yo sono nu kouna’an Niyo bangkai Niyo ri kiat so salib om nilobong. ³⁰ Nga linuli’an Iyo nu Kinoringan. ³¹ Kotinu-tinuan kiat nu kinoluli’an Niyo ri, obulit Iyo mintolang mokisiou so lobuw minaid so Iyo kiat so wonuo nu Galilia mian so Yirusalim, om nosiro yo su pointolang suat so Iyo nu kosiono so bansa Israil. ³² Indadi kosiono tu potuturan kai si Barnabas nu Abar Owarong oono so kou, nu onu yo po nijanji nu Kinoringan so odu aki toko ri, ³³ tinuman-o sono Niyo so toko nu pinongoluli’an Niyo so si Yisus. Nokosurat so buuk Lagu nu, ‘Ikau-o su Anak Ku. Runat tu pokoilo Aku nu, Aku yo su Amo Mu,’ koo ri. ³⁴ Pinowiau-o Iyo koimbagu nu Kinoringan, om dai yo sono matoi. Suat nu ono, minutangar-a Kinoringan nu, ‘Mongoborakat Aku so Ikau nu ongo wowarong om otatap nu otuman soko janji Ku so si Daud,’ koo ri. ³⁵ Kuwai ya tangar wokon nu, ‘Dai Mu ya posimaidan Uripon Mu ototog so Ikau-o rumagas so lobong,’ koo ri. ³⁶ Noopod-o po ni Raja Daud momaal nipogama’ nu Kinoringan so iyo ri, minatoi-o sono iyo, om nilobong so pinolobongan nu odu aki niyo ri, om rinumagas-a bangkai niyo ri. ³⁷ Nga bang si Yisus, iri linuli’an nu Kinoringan, dai ya rinumagas. ³⁸ - ³⁹ Oo su kosusulodan ku, mongaabar aku so kou nu noidu’ yo nu Kinoringan koraayan toko nu kinopotoyan ni Yisus. Soko ono po, subai oilaan toko nu bang ontob-a nu mongowaid nu kiawi’ Ukum ni Musa, dai toko ya kolabus kiat so koraayan, nga isai yo po poimaid so si Yisus, kolabus kiat so koraayan. ⁴⁰ Ono yo ko’, orotio muyu yo bana, adang-o ourug so kou iri tinangar nu poo’abar nu Kinoringan gulu ri, nu, ⁴¹ ‘Oo su lobuw mubaag nu totongaron nu Kinoringan, orotio muyu yo bana! Laid nu miau kou po, mugogoma’on Aku. Nga, pudi pona kuwai lobuw oorati so kou suat so gogoma’on Ku, dai kou po poimaid. Oiranan kou nga dai poimaid, indadi matoi kou,’ koo,” koo si Paulus. ⁴² Lumabus si Paulus om ni Barnabas kiat so waloi sosombooyangan-i, minutangar sono lobuw-i nu popululi’ so nosiro nu Runat Pongintoronan koimbagu, sumundur montuduk so nosiro. ⁴³ Nokolabus-o po lobuw-i kiat so waloi sosombooyangan-i, tundano yo sono si Paulus om si Barnabas nu lobuw Yaudi om okon ko Yaudi iri minasuw nu ugama Yaudi ri. Biati yo nosiro ongo lobuw iiri nu subai ototog mongowaid nu koinginan nu Kinoringan. ⁴⁴ Nologa’ Runat Pongintoronan koimbagu ri, ogon-ogon ong naawi’ lobuw so bandar iiri minian mongkinongou nu tinongaran nu Kinoringan. ⁴⁵ Nga, nosiou-o po nu lobuw Yaudi lobuw suang iiri, sobana ko nororaayan nosiro. Rinagam nosiro si Paulus om sinumagka’ nu kiawi’ tinangar niyo ri. ⁴⁶ Nga sumundur nai’ opogi si Paulus om si Barnabas mutangar nu, “Patut nai’ kou po gulu potuturanan nu tinongaran nu Kinoringan. Nga pagka tinulak muyu tinongaran oono, kou yo kondiri minonantu nu dai kou otoop kotorima’ nu kowiawan musingkolaid. Om kosiono niogol mai kou om mian kai so lobuw okon ko Yaudi. ⁴⁷ Waalon mai soko itu so’ itu yo su pinonuu’an nu Kinoringan so kai nu, ‘Tinantu Ku yo kou ourug nu mongonawau nu lobuw okon ko Yaudi, su’ koowit kou nu kowiawan so kiawi’ lobuw so wonuo tu,’ koo ri,” koo nosiro. ⁴⁸ Norongou-o po nu lobuw okon ko Yaudi ri tinangar ni Paulus, sobana ko nosudu’an nosiro, om minongorayou nu Kinoringan. Om kiawi’ lobuw, iri notantu yo nu Kinoringan nu miau musingkolaid-i nga poimaid-o sono. ⁴⁹ Nokolongkop-o sono tinongaran nu Kinoringan so wonuo iiri. ⁵⁰ Nga kokusoyan om kowoinoyan kipangkat, iri poimaid so Kinoringan so bandar iiri, sinuu’ nu lobuw Yaudi mongoraai-raai nu kolobuwan poimaid so si Yisus, popualod so nosiro so si Paulus om si Barnabas, om polaiw so nosiro kiat dii. ⁵¹ Puyaso yo sono ni Paulus om ni Barnabas koris so rompam nosiro ri, so tiningkuangon nu lobuw iiri pongilaan nu pokoraai so lobuw polaiw so nosiro ri, om lumombuso yo so Ikunium. ⁵² Lobuw poimaid so Antiukia ri sobana ko nosudu’an, om kinuasa nu Atod nu Kinoringan.

¹ Dii so Ikunium, muinong-a nololagan nosiro nu laid nosiro so Antiukia ri. Mosuwo yo si Paulus om si Barnabas so waloi sosombooyangan nu lobuw Yaudi ri montuduk so nosiro, om osuang lobuw Yaudi om okon ko Yaudi nopoimaid so si Yisus. ² Nga iri lobuw Yaudi dai poimaid-i, mongindoso popuinsakit nu inawo nu lobuw okon ko Yaudi poimaid so si Yisus om minusisindoraai sono nosiro. ³ Pagka soko iri, molako yo si Paulus om si Barnabas dii nu olaid-laid. Sumundur nosiro opogi montuduk suat so Tuhan Yisus, iri minonaak so nosiro nu kuasa momaal nu koiran-iran, ponondu’an nu bana ya tuturan nosiro suat so samod Niyo. ⁴ Minupinig sono lobuw dii ri, ono yo sombaagi’ minaid nu lobuw Yaudi dai poimaid so si Yisus, om wokon-i minaid so duo pinongoorapan-i. ⁵ Muupokato yo sono lobuw Yaudi om wowaidon nosiro ri, nu lobuw okon ko Yaudi ri mononsara’ om momilai nu duo koyuwan iiri nu watu. ⁶ Norongou-o po iri nosiro, mulaiwo yo nosiro om miano yo so Listra om so Darbi, bandar so wonuo nu Likaunia, om so pilolongkop nu kampung dii ⁷ paabar nu Abar Owarong. ⁸ Dii so Listra kuwai ido kusoi kimai kiat koworos, dai kopanou. ⁹ Mogom-ogom iyo mongkinongou nu totongaron ni Paulus. Ponsiou-siou ni Paulus nu tantu opoli’an lobuw iiri so’ poimaid nu totongaron nu Tuhan. Indadi, bontongi yo sono ni Paulus lobuw kimai iiri, ¹⁰ om mutongaro yo nu osangat nu, “Undii yo!” koo. Lobuw iiri nga minundii yo sono, om minanou-panou. ¹¹ Nosiou-o po nu lobuw suang-i gogoma’on ni Paulus, songgonsok-gonsok sono nosiro mutangar so tangar Likaunia nu, “Siowi muyu bo, nokountiba yo pinokokinoringan toko ri om sinumiliw nu lobuw,” koo. ¹² Ingorani yo sono nosiro si Barnabas so si Jius iri pinokokinoringan nosiro ri, om si Paulus iningoranan nosiro so si Irmis iri pinokokinoringan-a nosiro ri, so’ si Paulus-o su minutangar. ¹³ Lumogaa yo sono iri imam Jius, mongowit nu ongo sapi kusoi om wusak so pintu nu bandar-i, so’ moingin iyo maid so lobuw suang-i mongoraa’ so si Barnabas om si Paulus. Iri yo po waloi pinoianan nu tinindobuw nu pinokokinoringan Jius dii so dilabus nu bandar-i. ¹⁴ Norongou-o po ni Paulus om ni Barnabas padu-padu nu lobuw suang iiri, pisi’-pisio yo nosiro pokakas nosiro ri nu dai kotaayun, maid nu mundak so isop nu lobuw suang-i, om lumuap nu, ¹⁵ “Nokuro ka su momaal kou soko itu? Kai yo po lobuw-a, soko kou. Tomod mai yo po tuui nga monuturan nu Abar Owarong suat so si Yisus, su’ mongolupo kou nu tinindobuw d’ado kosudaan-o, om poimaid kou sono nu Kinoringan miau, iri minomangun nu wonuo, langit, raat om kiawi’ asuw nu wonuo tu. ¹⁶ Gulu ri, pinosimaidan nu Kinoringan kiawi’ bansa mongowaid nu koinginan nosiro. ¹⁷ Otolang sobana koworongan nu Kinoringan so gogoma’on Niyo. Tinaakan kou Niyo nu uran, om pinumpung iya nu intodon. Tinaakan kou nu okanon, om posanang nu inawo muyu no,” koo nosiro. ¹⁸ Nga soko iri pona tinangar nu duo pinongoorapan ni Yisus, ogon-ogon dai nopogos nosiro lobuw suang-i mongoraa’ so nosiro. ¹⁹ Lumogaa yo sono tinu-tinu lobuw Yaudi, kiat so Antiukia so wonuo nu Pisidia, om kiat so Ikunium, mongimuun nu lobuw suang-i su’ gumapi’ so nosiro. Pilayo yo sono nosiro si Paulus nu watu om goyato yo polabus kiat so bandar-i. Ponontaman nosiro ong minatoi-o si Paulus, ²⁰ nga laid nu lobuw poimaid-i mundii-dii so pililiwut niyo ri, tumungago yo sono iyo mundii, om mululio yo so bandar-i. Susuab-i murongkato yo nosiro mian so Darbi. ²¹ Nokologa’ si Paulus om si Barnabas so Darbi, nopaabar sono nosiro nu Abar Owarong dii, om osuang lobuw nopoimaid so si Yisus. Nopupus iri, mululio yo nosiro so Listra, Ikunium om so Antiukia so wonuo nu Pisidia. ²² Nopopiot nosiro nu koimaidan nu lobuw so si Yisus so bandar iiri. Mutongaro po nosiro nu, “Subai osuang oirosaan toko nu kosonsora’an om koirasa toko nai’ nu koworongan so Pogkuosaan nu Kinoringan,” koo. ²³ Momilio yo sono si Paulus om si Barnabas nu wowaidon so ido soido puimpugan nu lobuw poimaid. Nokopogdu’a nosiro maid nu mupuasa, komoulii yo nosiro wowaidon pinili’ nosiro iiri so Tuhan, ono yo Tuhan imaidon nosiro. ²⁴ Nokolongkop-o po si Paulus om si Barnabas so wonuo nu Pisidia, lumombuso yo nosiro so Pampilia. ²⁵ Nokotuturan-o po nosiro tinongaran nu Kinoringan so Porga, lumombuso yo nosiro so Atalia. ²⁶ Nopupus nosiro dii, lumoyago yo nosiro mululi’ so Antiukia, iri inungkiaton nosiro ri. Dii yo so Antiukia su pinokomouli’an so nosiro so Kinoringan, tayon ong ipatan Niyo nosiro so pomponowan mongaabar nu Abar Owarong. Om kosiono noopod-o nosiro ono. ²⁷ Nokologa’ yo po si Paulus om si Barnabas so Antiukia, popuimpugo yo nosiro lobuw poimaid-i, om tuturani yo nosiro onu yo po ginama’ nu Tuhan, iri nipogama’ so nosiro ri. Minonuturan-a nosiro nu tinaakan-o nu Kinoringan lobuw okon ko Yaudi nu kosiwatan poimaid so si Yisus. ²⁸ Olaid-laid-a nosiro minogol dii mido-ido so lobuw poimaid-i.

¹ Miano yo sono so Antiukia tinu-tinu koyuwan kiat so Yudia montuduk nu lobuw Yaudi poimaid so si Yisus nu, “Bang dai kou osunatan mongowaid nu Ukum ni Musa, d’ado kowiawan muyu musingkolaid kiat so Kinoringan,” koo. ² Nga sinumagka’ si Paulus om si Barnabas nu pontudukan dai musuat iiri. Indadi nopili’ sono nosiro maid nu tinu-tinu koyuwan kiat so Antiukia mian so Yirusalim, muupakat nu koogutan iiri so pinongoorapan ni Yisus om wowaidon wokon dii. ³ Opiti yo sono nosiro nu lobuw poimaid so Antiukia ri sampai so dilabus nu bandar-i. Laid nosiro manou-panou maid nu lalan so Punisia om Samaria, nopaabar sono nosiro nu nopoimaid so si Yisus lobuw okon ko Yaudi so tontong wokon. Osudu’an sobana lobuw poimaid dii ri nu nokorongou nu abar iiri. ⁴ Nokologa’ yo po nosiro so Yirusalim, somungo yo nosiro nu lobuw poimaid, pinongoorapan ni Yisus, om wowaidon-i. Nopotuturan sono nosiro nu kiawi’ winaal nu Kinoringan so lobuw okon ko Yaudi nipowaal so nosiro ri. ⁵ Nga tinu-tinu lobuw Parisi, iri nopoimaid so si Yisus, minundii om minutangar nu, “Subai sunatan lobuw okon ko Yaudi, iri nopoimaid so si Yisus, om popongowaidon nu Ukum ni Musa,” koo. ⁶ Muimpugo yo sono pinongoorapan ni Yisus om wowaidon wokon-i muupakat nu koogutan iiri. ⁷ Pagka olaid nosiro mudodaawa, mundiio yo sono si Pitrus mutangar nu, “Oo su kosusulodan ku, noilaan muyu yo nu pinili’ aku nu Kinoringan kiat nu gulu ri paabar nu Abar Owarong suat so si Yisus so lobuw okon ko Yaudi, tayon ong korongou nosiro om poimaid sono. ⁸ Om Kinoringan, iri koilo nu inawo nu kiawi’ lobuw, nopointolang-o nu tinorima’ yo Niyo lobuw okon ko Yaudi, iya nu taakan Niyo nosiro nu Atod Niyo, soko iri ya nitaak Niyo so toko ri. ⁹ D’ado ya kopusondiangan toko so nosiro so tiningkuangon nu Kinoringan. Pagka poimaid-a nosiro so si Yisus, inidu’ yo koraayan nosiro ri nu Kinoringan soko toko ya. ¹⁰ Oraai sobana kou su mongolawan nu Kinoringan. D’ado kosudaan muyu monuu’ nu lobuw okon ko Yaudi, iri poimaid so si Yisus, mongowaid nu adat owogat, so’ insan odu aki toko ri ya om toko dai kogoos mongowaid nu ono. ¹¹ Ala’ nai’, poimaid toko so si Yisus om kikowiawan toko sono kiat so luluud Niyo, om soko ono ya pudi nosiro,” koo si Pitrus. ¹² Kiawi’ lobuw minuimpug-i nokoodog om minongkinongou nu tuturan ni Paulus om ni Barnabas suat nu kiawi’ koiran-iran winaal nu Kinoringan so lobuw okon ko Yaudi, nipogama’ so nosiro ri. ¹³ Noopod-o po si Paulus om si Barnabas mutangar, mutongaro yo si Yakubus nu, “Oo su kosusulodan ku, rongowo muyu yo aku! ¹⁴ Sisuna ya potuturan ni Simun nu gama’ nu Kinoringan mongoluluud nu lobuw okon ko Yaudi, tomod-o po Niyo nga momili’ nu lobuw Niyo kiat nai so nosiro. ¹⁵ Ono yo su musuat nu tinongaran nu ongo poo’abar nu Kinoringan gulu ri nu, ¹⁶ ‘Opupus ono, mululi’ Aku ya om uliton Ku koimbagu pogkuosaan ni Daud, ¹⁷ tayon ong kiawi’ lobuw wokon lumoga’ tuui so Aku maid nu kiawi’ lobuw okon ko Yaudi, iri pinili’ Ku yo, nu osongapan Ku. ¹⁸ Soko itu yo tinongaran nu TUHAN, iri nopotuturan-o nu ono kiat nu gulu ri,’ koo ri. ¹⁹ Indadi, so pikiran ku, dai owarong ong mongaagut toko nu lobuw okon ko Yaudi, iri poimaid so Kinoringan. ²⁰ Owarong ong monurat toko montuduk so nosiro, su’ dai nosiro mongokan nu osabul, soko nokousaa’ yo so tinindobuw, om mintoron nosiro gumilat, om dai mongokan nu kulos-kulos matoi kotolon, intawa mongokan nu raa’. ²¹ So’ kiat po nu gulu ri sampai ya nu ono sono tu, bosa’on Ukum ni Musa so waloi sosombooyangan koduung Runat Pongintoronan toko, om niabar sono so kiawi’ tontong,” koo si Yakubus. ²² Momilio yo sono pinongoorapan ni Yisus, wowaidon-i om lobuw wokon poimaid-i, nu tinu-tinu koyuwan niapit so Antiukia, maid so si Paulus om so si Barnabas, ono yo si Yudas (ngaran koduo niyo si Barsabas), om si Silas. Duo koyuwan oono sobana ko orumaton nu lobuw poimaid so Kinoringan so Yirusalim. ²³ Nopoowit-a nosiro nu surat so duo koyuwan oono, om itu yo totongaron so surat oono, Orumat kiat so kai pinongoorapan ni Yisus, wowaidon om inong muyu poimaid. Surat iitu niloga’ mai so kiawi’ kosusulodan okon ko Yaudi, minolak so Antiukia, Siria, om Kilikia. ²⁴ Norongou mai nu kuwai tinu-tinu lobuw kiat tuui so kai minongaagut om nopogagau so kou nu pontudukan nosiro. Lobuw oono okon-a ko sinuu’ mai. ²⁵ Pagka soko ono minuimpug kai sono tuui muupakat, om kiawi’ nokotaayun-a nu suu’on tinu-tinu koyuwan mian nai so kou, maid so si Barnabas om si Paulus, iri sinomodan mai. ²⁶ Nosiro oono matoi miau, mugogoma’on suat so Tuhan toko si Yisus Kristus. ²⁷ Indadi sinuu’ mai yo si Yudas om si Silas potarang so kou nu onsi nu surat iitu. ²⁸ Kai om Atod nu Kinoringan nga nokotaayun-a nu dai kou oguton nu oturan owogat po ko’ opatut muyu waidon iitu, ²⁹ ono yo adang-o mongokan nu nokousaa’ yo so tinindobuw-i, mintoron kou yo gumilat, om adang-o mongokan nu kulos-kulos matoi kotolon, intawa mongokan nu raa’. Bang dai muyu ono waalon, owarong gogoma’on muyu. Soko ono ya sono surat mai, koo tangar so surat oono. ³⁰ Lumombuso yo sono so Antiukia duo koyuwan pinili’ iiri om minongimpug dii nu lobuw poimaid-i om taaki yo nosiro surat-i. ³¹ Nobasa’ yo po iri nosiro, sobana ko nosudu’an nosiro noinsosomodan nu onsi nu surat-i. ³² Olaid si Yudas om si Silas, iri poo’abar nu Kinoringan-i montuduk nu kosusulodan-i monginsosamod om posanang nu inawo nosiro. ³³ Olaid-laid-a nosiro molak-polak dii, suuo yo sono nosiro nu lobuw poimaid-i pouli’ om kinodawan nu, “Sompiatag kai ya nu lobuw minonuu’ so kou ri,” koo. ³⁴ (Nga topuso yo ni Silas nu mogol po iyo so Antiukia.) ³⁵ Si Paulus om si Barnabas nga minogol po kotinu-tinuan dii montuduk om potuturan nu totongaron nu Tuhan maid nu moomontuduk wokon. ³⁶ Tinu-tinu nowulan kiat nu iri, mutongaro yo si Paulus so si Barnabas nu, “Owarong mululi’ kito po sono mongondaa nu kosusulodan so kiawi’ bandar, iri pinoobaran to nu tinongaran nu Tuhan-i ong muro-kuro nosiro,” koo. ³⁷ Poki’iingolan ni Barnabas si Yuanis Markus, ³⁸ nga dai tinumaayun si Paulus, so’ dai tinumaan iyo maid-waid musingkaawi’ nu gogoma’on nosiro nu gulu ri, om linaiwan-a nosiro ni Markus so Pampilia. ³⁹ Pagka soko iri, minusagka’ sono si Paulus om si Barnabas sampai minutondiang nosiro. Owito yo ni Barnabas si Yuanis Markus om sumokoyo yo nosiro nu kapal mian so Siprus. ⁴⁰ Pinili’ sono ni Paulus si Silas om owito yo niyo mompanou nu noopod lobuw poimaid so Antiukia ri pokomouli’ so nosiro so Tuhan. ⁴¹ Lumongkopo yo nosiro so wonuo nu Siria om Kilikia, popiot nu koimaidan nu lobuw dii ri.

¹ Miano yo si Paulus om si Silas so Darbi, om nopupus dii lumombuso yo so Listra. Dii so Listra nokosambat nosiro nu lobuw poimaid, ngaran-o po si Timutius. Ino niyo lobuw Yaudi nopoimaid so si Yisus, nga amo niyo lobuw Yunani. ² Kiawi’ lobuw poimaid so Listra om so Ikunium, koilo nu sobana ko owarong si Timutius. ³ Poki’iingolan sono ni Paulus si Timutius, nga pinopusunat po laid iyo so’ noilaan nu ongo lobuw Yaudi ri nu amo yo po niyo bansa Yunani. ⁴ Nopupus iri, lumongkopo yo nosiro so bandar potuturan nu niongopogos notantu yo nu pinongoorapan ni Yisus om wowaidon so Yirusalim-i so lobuw poimaid okon ko Yaudi ri. ⁵ Soko iri po, sumunduro sono opiot koimaidan nosiro, om laid nu laid rumuang koosuang nu lobuw poimaid. ⁶ Nopupus iri, tumolibo ya nosiro so Prigia om Galatia so’ pinogos nosiro nu Atod nu Kinoringan mambai so wonuo nu Asia paabar nu tinongaran nu Kinoringan. ⁷ Nokologa’ nosiro so pubaatan nu Misia om Bitinia, padu nosiro mian so Bitinia, nga pinogos-a nosiro nu Atod ni Yisus. ⁸ Indadi tumolibo ya nosiro dii, lumombuso so Toruas. ⁹ Awi ri, nokosorou sono si Paulus nu ido lobuw Makadunia mundii-dii so tiningkuangon niyo ri minutangar nu, “Loga’ yo tuui so Makadunia, om tobango kai yo,” koo. ¹⁰ Topuso mai yo sono nu mian so Makadunia, so’ poimaid kai nu sinuu’ kai nu Kinoringan mian dii paabar nu Abar Owarong. ¹¹ Dii so Toruas sumokoyo kai yo nu kapal mian so Somotraki, om susuab-i lumombuso kai yo so Niapulis. ¹² Kiat dii lumombuso kai yo so bandar Pilipi, bandar maayo so wonuo nu Makadunia, om molako kai yo dii kotinu-tinuan. ¹³ Nologa’ Runat Pongintoronan, minian kai sono so imbing nu sungoi dai orawu’ so pinolakan mai ri, so’ ponontaman mai ong kuwai sosombooyangan nu lobuw Yaudi dii. Mogomo kai yo mokimutangar-tangar nu kowoinoyan minuimpug-i. ¹⁴ Ido koyuwan so nosiro, ingoranan so si Lidia, kiat so Tiatira, poowoli nu kumut otaas. Sobana ko obinsuut iyo nu Kinoringan, om laid niyo mongorongou so kai ri, kinijib sono nu Tuhan inawo niyo ri, om tinorima’ niyo pontudukan ni Paulus. ¹⁵ Diuo yo sono si Lidia om kiawi’ lobuw so waloi niyo ri. Nopupus iri soginaa kai yo sono niyo poian so waloi niyo ri, om mutongaro yo nu, “Bang oilaan muyu nu bana-bana poimaid aku so si Yisus Tuhan ku, maloi kou po dii so kai,” koo. Pagka otigol sobana si Lidia powaloi, minimaid kai yo sono. ¹⁶ Ido runat, minanou-panou kai mian so sosombooyangan so imbing nu sungoi iiri. Nokosambat kai sono ido woinoi uripon, sinorungan nu moinat om moilo momirasat suat so sunduron. Sobana ko osuang siin kountungan niyo nu gogoma’on niyo ri, nitungkap so moonguripon so iyo ri. ¹⁷ Muut-suut woinoi iiri so kai maid nu monsok-gonsok nu, “Lobuw iitu no uripon nu Kinoringan nu Sobana ko Opangkat. Linumoga’ nosiro paabar so kou nu gama’ muyu kaalap nu kowiawan musingkolaid,” koo. ¹⁸ Kotinu-tinuan woinoi iiri monsok-gonsok soko iri, sampai nokoungot-o sono si Paulus. Mongkowiio yo iyo mutangar so moinat-i nu, “Maid nu kuasa ni Yisus, susubon ku ikau kiat so woinoi iitu,” koo si Paulus. Iya ya iiri, minulaiw-o sono moinat-i kiat so woinoi-i. ¹⁹ Noilaan-o po nu moonguripon iiri nu ado yo sono ingkosisiin nu woinoi uripon niyo ri, okomo yo sono niyo si Paulus om si Silas. ²⁰ Owito yo niyo nosiro so tiningkuangon nu wowaidon moongobisara’ so pasar-i om mutongaro yo nu, “Duo koyuwan iitu lobuw Yaudi mongaagut so tontong toko tu. ²¹ Minontuduk nosiro nu adat dai musuat nu adat toko. Toko lobuw Ruum dai kowasa mongowaid nu adat oono,” koo. ²² Osuang-a sumimpor mongolawan so si Paulus om si Silas. Pisio yo sono nu wowaidon moongobisara’ ri pokakas ni Paulus om ni Silas, om monuuo yo nu lobuw popongolubak so nosiro. ²³ Nolubak-o po si Paulus om si Silas, jiilo yo sono nosiro. Wowaidon so jiil oono sinuu’ popongipat sobana so nosiro. ²⁴ Osipo yo nu wowaidon so jiil-i nisuu’ so iyo ri. Jiilo yo sono si Paulus om si Silas so dilalom sobana ri om poyuko yo akod nosiro ri nu kayu. ²⁵ Kiro-kiro tonga’ nu awi minogdu’a sono si Paulus om si Silas om minulagu mongorayou nu Kinoringan, om norongou-a nu wokon nojiil-i. ²⁶ Milok po su ginumunggun su tana’ sobana ko oontob, om nokogunggun-a waloi pinongojiilan-i. Nosukab-o sono kiawi’ pintu ri, om nouyad pinomayuk so nosiro om rantai pinongkogos nu lobuw wokon nojiil-i. ²⁷ Nosiou-o po nu wowaidon so jiil-i nu nosukab kiawi’ pintu ri, owuto yo sono niyo gayang niyo ri, padu musimpatoi, so’ ponontaman niyo ong nokolaiw-o pinujiil-i. ²⁸ Nga lumuapo yo si Paulus nu, “Ikod pusimpatoi! Tudi kai ya!” koo. ²⁹ Mokitoguo yo wowaidon so jiil-i om mundako yo masuw maid nu mikip-kikip om tumampo so tiningkuangon ni Paulus om ni Silas. ³⁰ Owito yo sono niyo duo koyuwan iiri lumabus kiat so jiil-i om mutongaro yo nu, “Oo tuan, onu ka otoop goma’on ku su’ kikowiawan aku musingkolaid?” koo. ³¹ Sumombuto yo nosiro nu, “Poimaid ko yo so si Yisus. Bang waalon mu soko ono, ikau om suku-sakat mu no kikowiawan musingkolaid,” koo. ³² Poorotio yo sono ni Paulus om ni Silas tinongaran nu Kinoringan so iri wowaidon nu jiil-i om suku-sakat niyo ri. ³³ Awi ya iiri, owito yo nosiro nu wowaidon nu jiil-i so tontong kisungoi mongugas nu pilat nosiro ri, om nopupus iri diuo yo sono iyo ni Paulus om ni Silas maid nu suku-sakat niyo ri. ³⁴ Owito yo niyo si Paulus om si Silas mindakod koimbagu so waloi niyo ri, om pookano yo niyo. Sobana ko nosudu’an iyo om suku-sakat niyo ri so’ poimaid-o sono nosiro nu Kinoringan. ³⁵ Susuab-i, suuo yo nu wowaidon moongobisara’ ri ongo pulis-i mian so jiil om kinodawan nu nipolabus nu wowaidon nu jiil-i si Paulus om si Silas. ³⁶ Mutongaro yo sono wowaidon nu jiil-i so si Paulus om si Silas nu, “Sinuu’ aku nu wowaidon moongobisara’ ri polabus so kou. Indadi, panou kou yo, om otago muyu ya!” koo. ³⁷ Nga mutongaro yo si Paulus so ongo pulis-i nu, “Linubak kai nosiro so tiningkuangon nu lobuw suang, om jiniil kai nai’ d’ado sala’, pudi lobuw kai ya nu Ruum. Om kosiono simuk-simuk nosiro polabus so kai, nga dai kai ya moingin! Subai nosiro yo su mian tuui polabus so kai,” koo. ³⁸ Mulio yo sono ongo pulis-i pokoilo so wowaidon moongobisara’ ri. Norongou-o po nu wowaidon-i nu lobuw-a nu Ruum si Paulus om si Silas, maa’-laa’ sono nosiro. ³⁹ Miano yo nosiro so jiil-i mokimuwarong so si Paulus om si Silas, om lobusi yo nosiro, om tongaro yo kowarong-warong nu polaiwon kiat dii. ⁴⁰ Mululio yo sono si Paulus om si Silas so waloi ni Lidia sumambat nu lobuw poimaid-i, monginsosamod so nosiro, om mulaiwo yo.

¹ Lumombuso yo si Paulus om si Silas so Tisalunika, minaid nu lalan kotalib so Ampipulis om Apulunia. Dii so Tisalunika, kuwai ido waloi sosombooyangan nu lobuw Yaudi. ² Miano yo si Paulus so waloi sosombooyangan oono soko kododanan koduung kolalag iyo nu waloi sosombooyangan nu lobuw Yaudi. Minuupakato sono nosiro dii nu tinongaran so Buuk nu Kinoringan solaid tolu nominggu nu Runat Pongintoronan. ³ Nopotarang si Paulus nu orati nu tinongaran so Buuk nu Kinoringan suat nu kinosonsora’an om kinoluli’an ni Yisus nu, “Si Yisus oono yo Raja Nijanji nu Kinoringan,” koo. ⁴ Tinu-tinu lobuw Yaudi nopoimaid nu pontudukan ni Paulus om minaid so nosiro. Soko iri ya osuang lobuw Yunani iri mongusaa’ so Kinoringan nopoimaid so si Yisus, om osuang po kowoinoyan kipangkat nopoimaid-a. ⁵ Nga minokimalun lobuw Yaudi ri. Modiumo yo nosiro nu lobuw oraai so pasar-i om ingoli yo nosiro mongindoraai so pilolongkop nu bandar-i. Miano yo nosiro so waloi ni Yasun, lobuw poimaid-i modium so si Paulus om si Silas nu doowaan so tiningkuangon nu lobuw suang. ⁶ Pagka dai ya nooyangan nosiro si Paulus om si Silas, sosogi yo sono nosiro si Yasun om tinu-tinu po lobuw poimaid-i mongowit so lobuw kikuasa dii, om mutongaro yo nosiro nu, “Lobuw iitu mongindoraai so siombo-ombo ya, om kosiono nokologa’ yo tuui. ⁷ Pinoindakod nosiro ni Yasun so waloi niyo ri. Kiawi’ ukum nu Raja Maayo nu Ruum dai waidon nosiro, so’ minutangar nosiro nu kuwai raja wokon ingoranan so si Yisus,” koo. ⁸ Norongou-o po nu lobuw suang om wowaidon so bandar-i tinangar iiri, noogutan sono nosiro. ⁹ Suuo yo sono nu wowaidon-i si Yasun om kouna’an niyo ri mongobarai pongolukat so nosiro, om lobusi yo nosiro. ¹⁰ Awi ri, suuo yo si Paulus om si Silas nu lobuw poimaid so bandar iiri mian so Biria. Nokologa’ nosiro dii, miano yo nosiro so waloi sosombooyangan nu lobuw Yaudi. ¹¹ Owarong po inowoon nu lobuw so Biria ko’ so Tisalunika ri. Sobana ko mokirorongou nosiro nu abar suat so si Yisus. Runat-runat mongoorati nosiro nu tinongaran so Buuk nu Kinoringan pongilaan ong bana ya ka pontudukan ni Paulus ko’ dai. ¹² Osuang so nosiro nopoimaid so si Yisus, soko ono ya pudi lobuw Yunani woinoi kusoi kipangkat-i, nga nopoimaid-a. ¹³ Norongou-o po nu lobuw Yaudi so Tisalunika nu minontuduk-a si Paulus nu tinongaran nu Kinoringan pudi so Biria, miano yo sono nosiro dii monindoraai om mongaagut nu lobuw dii ri. ¹⁴ Mogtuui opiti nu kosusulodan so Biria ri si Paulus so imbing nu raat, nga si Silas om si Timutius minogol-a. ¹⁵ Nokaapit po si Paulus so Atina, mululio yo kosusulodan iiri so Biria maid nu kodau kiat dii si Paulus, nu posuuton osikap si Silas om si Timutius. ¹⁶ Laid ni Paulus mongimat so si Silas om si Timutius so Atina, olunggui sobana iyo nu nosiou niyo bandar oono nolongkop nu tinindobuw. ¹⁷ Pagka soko iri, miano yo iyo so waloi sosombooyangan nu lobuw Yaudi, mokimuupakat nu lobuw Yaudi om lobuw wokon po moongusaa’ nu Kinoringan dii, om soko iri ya winaal niyo so pasar. ¹⁸ Moomontuduk nu Ipikurus om Istua mokimudaawa so iyo om tinu-tinu koyuwan minongoduat nu, “Onu ka oilaan nu lobuw iitu? Sabat-a pongoilaan niyo nga musingkoilo-ilo sono,” koo. Nga wokon-i mutangar nu, “Mongaabar iyo gaam suat so pinokokinoringan usaa’on nu bansa wokon,” koo. Minutangar nosiro soko iri so’ potuturan si Paulus suat so si Yisus om koluli’an nu lobuw minatoi. ¹⁹ Ingoli yo sono nosiro si Paulus mian so puimpugan nu wowaidon moongobisara’ so Ariupagus, om mutongaro yo nosiro so iyo nu, “Moki’iilo kai nu pontudukan mu, ²⁰ so’ minutangar ko nu dai insan mai orongou, om ono yo ko’ pokioorotian mai,” koo. ²¹ (Soko iri tinangar nosiro so’ kiawi’ lobuw nu Atina om porantau nai d’ado ya gogoma’on sondiang ko mongkinongou om mututuran suat so onu yo po owagu ya.) ²² Mundiio yo sono si Paulus so tiningkuangon nu lobuw so Ariupagus-i om mutongaro yo nu, “Oo su kolobuwan nu Atina, osiou ku nu sobana ko obinsuut kou nu pinokokinoringan muyu, ²³ so’ laid ku musimpanou so pililiwut nu bandar tu, monsiou nu sosombooyangan muyu, nokolalag aku sono nu sosombooyangan muyu kisurat nu, So Kinoringan Dai Otondu’an, koo. Nadi ono yo Kinoringan usaa’on muyu nga dai muyu otondu’an-o su niabar ku so kou. ²⁴ Kinoringan nu minongowangun nu wonuo tu om kiawi’ asuw, Iyo yo su moomogkuasa nu langit om wonuo. Dai ya Iyo mogol so waloi sosombooyangan winaal nu lobuw. ²⁵ Dai ya Iyo mokitabang nu lobuw, so’ Iyo yo su powiau om monaak nu onu-onu ya so kiawi’ lobuw. ²⁶ Kiat so ido koyuwan, minongurug Iyo nu kiawi’ bansa, om pointoron so nosiro so wonuo tu, om Iyo ya su minonantu kiat po nu gulu ri nu kopolakan nosiro. ²⁷ Minongurug Kinoringan nu kiawi’ bansa, tayon ong diumon Iyo nosiro, kalu ong kosambat-a nosiro so Iyo nu laid nosiro modium. Nga sobana yo, dai ya orawu’ Kinoringan tuui so toko, ²⁸ soko tinangar nu lobuw nu, ‘Kiat so kuasa Niyo, miau toko, kopuiuk-iuk, om tuui toko so wonuo tu,’ koo ri. Om soko pinutangar nu moonundait tuui so kou nu gulu ri nu, ‘Toko kiawi’ inonakan nu Kinoringan,’ koo ri. ²⁹ Pagka inonakan toko nu Kinoringan, dai musuat ong popuinongon toko Kinoringan om tinindobuw omas, pirok intawa watu winaal, iri winaal maid nu koilaan nu lobuw-a. ³⁰ Iya nu dai po noilaan nu kolobuwan onu koinginan nu Kinoringan goma’on nosiro, dai ya muad ininsaadan Niyo nosiro. Nga kosiono tu monuu’ Iyo nu kiawi’ lobuw so pilolongkop nu wonuo tu nu poingkoyodon mongusaa’ nu tinindobuw, om Iyo yo sono su usaa’on. ³¹ So’ notatap-o Niyo iya pongukuman nu wonuo tu nu ooluk gama’, om pinili’ yo Niyo ido koyuwan nu popongukumon. Om niintolang-o nu Kinoringan nu obana ya ono nu pinongoluli’an Niyo nu lobuw oono kiat so kinopotoyan!” koo si Paulus. ³² Norongou-o po nu lobuw-i nu oluli’an lobuw minatoi, oyak-oyaki yo sono nosiro si Paulus, nga wokon-i minutangar nu, “Moingin kai po ong mutangar ko koimbagu nu ono,” koo. ³³ Laiwi yo sono ni Paulus nosiro. ³⁴ Nga tinu-tinu so nosiro tumapan so si Paulus om nopoimaid so si Yisus, ono yo si Dionisius, wowaidon so poomubisora’an so Ariupagus, om ido woinoi ingoranan so si Damaris, om lobuw wokon po.

¹ Nopupus iri, lumombuso yo si Paulus kiat so Atina mian so Kurintus. ² Nokosambat iyo dii nu lobuw Yaudi ingoranan so si Akwila ungkiat so Puntus. Koologa’ ya niyo kiat so Italia maid nu sawo niyo si Priskila. Minian nosiro so Kurintus so’ pinolaiw ni Raja Klaudius kiawi’ lobuw Yaudi kiat so Ruum. Ondaa’o yo sono ni Paulus nosiro, ³ om mogolo yo dii so nosiro maid mugogoma’on momaal nu kimbos so’ ono yo su ponsaari nosiro. ⁴ Nga koduung Runat Pongintoronan, miano si Paulus so waloi sosombooyangan montuduk nu lobuw Yaudi om okon ko Yaudi, so’ moingin iyo ong poimaid nosiro so si Yisus. ⁵ Nokologa’ yo po si Silas om si Timutius kiat so Makadunia, tinoroido yo sono ni Paulus potuturan nu abar kiat so Kinoringan so lobuw Yaudi, nu si Yisus oono yo Raja Nijanji nu Kinoringan. ⁶ Nga pagka mongimbuali om monginsala’ nosiro so iyo, tontago yo sono niyo koris so sabung niyo ri, pongilaan nosiro nu kikosola’an nosiro, om mutongaro yo nu, “Bang insaadan kou nu Kinoringan, dikou ya so sala’. Ado yo ilo-ilo ku. Kiat kosiono mian aku mongaabar so lobuw okon ko Yaudi,” koo. ⁷ Indadi laiwi yo sono ni Paulus nosiro om mogolo yo so waloi nu lobuw okon ko Yaudi ingoranan so si Titius Yustus so obi’ nu waloi sosombooyangan. Lobuw oono sobana ko mongusaa’ nu Kinoringan. ⁸ Si Krispus, wowaidon so waloi sosombooyangan oono om anak sawo niyo nopoimaid-o sono so si Yisus. Om osuang-a lobuw wokon so Kurintus nokorongou nu abar nituturan ni Paulus, nopoimaid so si Yisus, om diniu’ sono. ⁹ Ido awi, nosorou sono ni Paulus nu minutangar Tuhan so iyo nu, “Oo Paulus, ikod-a kilaa’! Sundur-a potuturan nu tinongaran nu Kinoringan, ¹⁰ so’ maid-waid Aku ya so ikau. D’ado ido kopongindoraai so ikau so’ osuang lobuw tuui osongapan Ku,” koo. ¹¹ Pagka soko iri, molako yo si Paulus so Kurintus sontoun om putonga’ laid potuduk nu tinongaran nu Kinoringan so lobuw dii. ¹² Iya nu gobonor si Galiu so Akaya, inakom sono si Paulus nu lobuw Yaudi om inowit so poongobisora’an. ¹³ Obari yo nosiro so si Galiu nu, “Mongoboyayat lobuw iitu no nu lobuw suang popongusaa’ nu Kinoringan nu dai kopusuat nu Ukum ni Musa,” koo. ¹⁴ Minokisosambut maam si Paulus nga nokopogulu yo si Galiu mutangar so lobuw Yaudi ri nu, “Oo su lobuw Yaudi, bang suat po so kosola’an intawa koraayan ruputan muyu oono, rongowon ku ya. ¹⁵ Nga pagka itu yo po ontob-a nu pusombut-sombutan muyu suat nu totongaron, ngaran om ukum muyu kondiri, uruso muyu ya. Dai su mongobisara’ nu itu,” koo, ¹⁶ om polobuso yo niyo nosiro. ¹⁷ Okomo yo sono nosiro si Sustinis, iri wowaidon so waloi sosombooyangan-i, om pininlubakan so tiningkuangon nu poongobisora’an-i, nga pinosimaidan-a iri ni Galiu. ¹⁸ Minogol po si Paulus so Kurintus kotinu-tinuan mido so lobuw poimaid-i. Nopupus iri, sumoginaa yo iyo so nosiro nu mungkayas, om miano yo sono so Kingkiria maid so si Akwila om si Priskila. Nokologa’ so Kingkiria minokiburut sono si Paulus so’ notuman-o niyo ibot niyo so Kinoringan-i. Kiat dii lumoyago yo iyo om duo musondamin-i mian so Siria. ¹⁹ Nokologa’ so Ipisus, niogol-o sono ni Paulus si Priskila om si Akwila om mosuwo yo so waloi sosombooyangan mokimuupakat nu lobuw Yaudi ri. ²⁰ Inowudan sono nosiro si Paulus nu popolakon po nu olaid-laid dii, nga dai iyo tinumaayun. ²¹ Soko iri pona, uyud niyo mompanou-i, mutongaro yo iyo nu, “Bang lila’an aku nu Kinoringan, kopululi’ aku po tuui,” koo. Nokoputangar po iyo soko iri, lumombuso yo sono iyo lumayag so Kaisaria. ²² Nokodudul iyo so Kaisaria, miano yo iyo so Yirusalim sumambat nu lobuw poimaid-i, om lumombuso yo iyo so Antiukia. ²³ Nokoogol-o po iyo dii kotinu-tinuan, momponowo yo iyo so pilolongkop nu Galatia om Pirigia sumambat nu lobuw dii popiot nu koimaidan nosiro. ²⁴ Nokologa’ sono so Ipisus ido koyuwan bansa Yaudi kiat so Aliksandria, ingoranan so si Apulus. Oilo sobana iyo mutotongaron om koorati sobana nu tinongaran so Buuk nu Kinoringan. ²⁵ Notudukan-o iyo nu pontudukan suat so si Yisus, om moingin sobana iyo posondot montuduk suat so si Yisus, nga ontob nai’ nu pongodiu’ ni Yuanis oilaan niyo. ²⁶ Opogi sobana iyo montuduk so waloi sosombooyangan. Norongou-o po ni Priskila om ni Akwila pontudukan niyo ri, owito yo iyo nosiro muli’. Nokologa’ so waloi, nopotarang sono nosiro so iyo nu onu yo po obana suat nu notantu yo nu Kinoringan monapul nu lobuw ong poimaid so si Yisus. ²⁷ Soko iri po minoki’iian sono si Apulus so Akaya. Indadi monurato yo sono lobuw poimaid dii so Ipisus niloga’ so kosusulodan poimaid so Akaya nu nipotorima’ si Apulus. Nokologa’ yo po si Apulus so Akaya, sobana ko kikosudaan ponobangon niyo so lobuw dii, iri nopoimaid so si Yisus kiat so koowarong nu Kinoringan. ²⁸ Nopoorati iyo nu tinongaran so Buuk nu Kinoringan nu si Yisus-o Raja Nijanji nu Kinoringan, om ono yo su pinongodoog niyo nu lobuw Yaudi iri mokimudaawa so iyo so tiningkuangon nu lobuw suang-i.

¹ Laid ni Apulus so Kurintus, linumongkop si Paulus so wonuo nu Asia, om nokologa’ so bandar Ipisus. Nokosambat sono iyo dii tinu-tinu lobuw poimaid so si Yisus. ² Duato yo niyo nosiro nu, “Kinuasa kou yo ka nu Atod nu Kinoringan iya nu nopoimaid kou so si Yisus?” koo. Sumombuto yo nosiro nu, “Dai po! Om dai kai po insan nokorongou nu kuwai Atod nu Kinoringan,” koo. ³ Duato yo niyo nosiro nu, “Bang soko ono, onu orati nu diniu’ kou noilaan muyu?” koo. Sumombuto yo nosiro nu, “Orati yo po nu diu’on nga soko iri yo tinangar ni Yuanis Moongodiu’,” koo. ⁴ Mutongaro yo si Paulus nu, “Mongodiu’ si Yuanis nu lobuw ponondu’an nu rumorogo nosiro momaal nu koraayan. Nopokoilo ya iyo so lobuw Yaudi nu subai poimaid nosiro nu lobuw lumoga’ sumusuut so iyo, ono yo si Yisus,” koo. ⁵ Norongou-o po nosiro nu soko iri, diuo yo sono nosiro mongorait nu ngaran ni Tuhan Yisus. ⁶ Laid ni Paulus potopop nu palad niyo ri dii so nosiro, kinuasa yo sono nosiro nu Atod nu Kinoringan, om tumimpuuno yo nosiro mutangar nu totongaron owulug om potuturan nu abar kiat so Kinoringan. ⁷ Koosampuw nosiro kiro-kiro opulu om duo kokusoyan. ⁸ Tolu nowulan laid ni Paulus muian-ian so waloi sosombooyangan-i, om opogi sobana iyo montuduk nu ongo lobuw-i, om mokimuupakat tayon ong koorati bana nosiro om poimaid nu mogkuasa Kinoringan soko raja. ⁹ Nga tinu-tinu so nosiro okosog om dai poimaid. So tiningkuangon nu lobuw suang so puimpugan iiri, monginsala’ nosiro nu pontudukan suat nu kinotopusan nu Kinoringan monapul nu lobuw poimaid so si Yisus. Pagka soko iri laiwi yo ni Paulus nosiro om lobuw wokon poimaid-i, om runat-runat masuw iyo so bilik maayo poomontudukan ni Tiranus mokimuupakat nu lobuw poimaid-i. ¹⁰ Duo notoun laid soko iri yo goma’on niyo, sampai nokorongou nu tinongaran nu Tuhan kiawi’ lobuw so pilolongkop nu Asia, kiat-o so lobuw Yaudi kumoo yo so bansa wokon. ¹¹ Osuang koiran-iran winaal nu Kinoringan nu si Paulus su pinopomaal. ¹² Insan sapu tangan-a om dimpou ni Paulus ong nitopis so lobuw dai kaatu’, opoli’an-a nosiro, om osusub sono moinat sinumarung so nosiro. ¹³ Tinu-tinu bolian nu lobuw Yaudi lumongkop monusub nu moinat kiat so lobuw mongorait nu ngaran ni Yisus nu, “So ngaran ni Yisus iri nituturan ni Paulus, susubon ku kou,” koo nosiro. ¹⁴ Turu sonsulod kusoi, anak ni Iskiwa, iri Imam Maayo nu lobuw Yaudi, soko iri ya gogoma’on. ¹⁵ Nga mutongaro yo moinat-i so nosiro nu, “Otondu’an ku ya si Yisus om si Paulus, nga kou yo po dai ku otondu’an,” koo. ¹⁶ Torako yo sono nosiro monampo nu lobuw sinorungan nu moinat-i om noboundakan-a nosiro kiat so waloi iiri, noongopilatan om nolobasan, so’ inuranut pokakas nosiro ri. ¹⁷ Kiawi’ lobuw Yaudi om bansa wokon iri minogol so Ipisus nokorongou-a nu iri om songlaa’-laa’ sono, om sumundur nai’ royowon ngaran ni Tuhan Yisus. ¹⁸ Osuang lobuw nopoimaid-o so si Yisus lumoga’ om potuturan nu nosiro nga soko ono ya nu gulu ri. ¹⁹ Iri lobuw kiolimu ri, nga minongimpugo sono nu buuk pinosuratan nosiro nu olimu ri, om sinusulan so tiningkuangon nu lobuw suang-i. Orogo nu buuk iiri, kiro-kiro limo nopulu ribu kinopingan nu siin pirok. ²⁰ Kiat nu iri, nokolongkop-o sono tinongaran nu Tuhan om osuang lobuw korongou om nopoimaid. ²¹ Nopupus iri, topuso yo ni Paulus nu mian so Yirusalim, tumalib-a so Makadunia om Akaya. Mutongaro yo iyo nu, “Oopod aku dii, lumombus aku po so Ruum,” koo. ²² Suuo yo sono niyo duo koyuwan pookitobangan niyo ri, ono yo si Timutius om si Irastus, nu popoguluon so Makadunia, nu dai po kolaiw iyo kiat so wonuo nu Asia. ²³ Iya oono tumimpuuno sono koogutan so Ipisus suat nu pontudukan nu kinotopusan nu Kinoringan monapul nu lobuw poimaid so si Yisus. ²⁴ So bandar oono, kuwai moonontan nu pirok ingoranan so si Dimitrius, moomaal nu waloi-waloi pongusaa’an so si Artimis, pinokokinoringan woinoi nu lobuw dii. Gogoma’on oono yo su kountungan maayo nu lobuw mugogoma’on maid so iyo. ²⁵ Indadi, impono yo niyo lobuw mugogoma’on maid so iyo om moonontan nu pirok wokon-i, om mutongaro yo nu, “Oo kosusulodan, oilaan muyu yo, nu kikountungan toko nu gogoma’on iitu. ²⁶ Kosiono norongou om nosiou muyu yo gogoma’on ni Paulus. Minutangar iyo nu tinindobuw waalon nu lobuw okon-a ko Kinoringan. Om osuang-o lobuw nopoimaid nu pontudukan niyo no, okon ko so Ipisus tu ya, nga so pilolongkop po nu Asia tu. ²⁷ Aagut ono so kountungan toko, om osindoraai ngaran toko. Okon ko ono ya, nga waloi ni Artimis kinoringan toko no poboba’on sono om dai orumaton, ampa iyo yo su kinoringan usaa’on nu kiawi’ lobuw so Asia om so pilolongkop nu wonuo tu!” koo si Dimitrius. ²⁸ Norongou-o po iri nosiro, rinumoraayan sono nosiro om gumonsoko yo nu, “Miau si Artimis, kinoringan nu lobuw Ipisus” koo. ²⁹ Nokolongkop-o sono koogutan iiri so bandar-i. Okomo yo nu lobuw oraai so bandar iiri si Gayus om si Aristarkus, una’ ni Paulus kiat so Makadunia ri, om mogtuui owito nosiro mian so lologa’an nu lobuw suang so bandar-i. ³⁰ Minokiwowaid si Paulus so nosiro, nga pinogos iyo nu lobuw suang, iri nopoimaid so si Yisus. ³¹ Kuwai po wowaidon so tontong wokon nu Asia, una’ ya ni Paulus, minonuu’ nu lobuw popomogos so iyo nu dai pointolangon so lologa’on nu lobuw suang iiri. ³² Soko iri po, muagut-agut-o sono lobuw minuimpug-i. Kuwai gumonsok nu soko itu, kuwai ya nu soko ono, so’ kosuangan so nosiro dai koilo ong onu tomod nosiro muimpug dii. ³³ Pagka sinuu’ nu lobuw Yaudi ri si Aliksandir mian so tiningkuangon nu lobuw suang-i, tinokod sono nu tinu-tinu koyuwan nu iyo yo su nokourug nu koogutan iiri. Soko iri po, sogkai yo niyo palad niyo ri poodog nu kolobuwan-i, pokoilo nu okon ko iyo su kisala’. ³⁴ Noilaan-o po nosiro nu lobuw-a iyo nu Yaudi, muiyaa yo nosiro gumonsok solaid duo nojaam nu, “Miau si Artimis, kinoringan nu lobuw Ipisus!” koo. ³⁵ Koompusan, nodapat-a sono podoog kolobuwan-i nu moonurat so bandar iiri om mutongaro yo nu, “Oo su inong ku lobuw Ipisus! Kiawi’ lobuw, nokoilo yo nu so Ipisus tu yo po moongusaa’ nu waloi ni Artimis om watu, iri noratu kiat so langit-i. ³⁶ D’ado ido kopongolim nu ono. Indadi, odog kou yo! Adang-o momaal nu onu-onu ya ong dai muyu po okiro-kiro laid! ³⁷ Itu yo po lobuw inowit muyu tuui iitu, okon-a ko minonolod nu waloi tinindobuw intawa minubaag nu kinoringan toko. ³⁸ Bang kuwai topudan ni Dimitrius om lobuw maid mugogoma’on so iyo suat so nosiro, bisora’on-a so poongobisora’an soko koopotan. ³⁹ Nga ong kuwai po wokon koinginan muyu, bisora’on-a so puimpugan nu lobuw suang nu notantu yo laid mongowaid nu oturan, ⁴⁰ so’ nourug-o po nu runat iitu kaagut-a so toko kiawi’. Tokodon toko nu lobuw nu mongindoraai toko, so’ d’ado ya pounayan toko monapud nu soko ono,” koo moonurat-i. ⁴¹ Notangar-o po iri nu moonurat so bandar-i, poulio yo sono niyo ongo lobuw-i.

¹ Noingkoyod-o po koogutan maayo so Ipisus iiri, impugo yo sono ni Paulus lobuw poimaid so si Yisus dii ri, popiot nu koimaidan nosiro. Nopupus iri, sumoginaa yo iyo nu lumombus so Makadunia. ² Linumongkop iyo so wonuo oono montuduk nu lobuw poimaid so si Yisus, om nopopiot nu koimaidan nosiro, om lumombuso yo sono iyo so Akaya. ³ Tolu nowulan laid minogol iyo dii. Laid niyo mutimos-timos lumayag mian so Siria, nokorongou iyo nu pokipopotoyan iyo nu lobuw Yaudi. Pagka soko iri topuso yo niyo koimbagu nu mompanou-a maid so tidong lumalan so Makadunia. ⁴ Maido yo sono so iyo mian so Siria tinu-tinu koyuwan, ono yo si Sopatir anak ni Pirus kiat so Biria, si Aristarkus om si Sokundus, lobuw nu Tisalunika, si Gayus lobuw nu Darbi, si Tikikus om si Trupimus lobuw nu Asia, om si Timutius. ⁵ Minogulu ya nosiro so aku om si Paulus, om minongimat so Toruas. ⁶ Nokotalib Rami-Rami nu Baang-Baang D’ado Pongombang, lumoyago kai yo si Paulus kiat so Pilipi. Kolimaan om nokopusambat kai nai’ nu kouna’an minogulu so kai so Toruas-i, om mogolo kai yo dii koturuan. ⁷ So awi nu koturu, ono yo runat togna so minggu iiri, minuimpug kai mongokan mongoondom nu kinopotoyan ni Yisus. Minontuduk sono si Paulus so kai sampai nololongan so’ mokilolombus iyo nu susuab-i. ⁸ Osuang politaan so pinuimpugan mai ri. ⁹ Ido omulok ingoranan so si Iutikus minogom so jondila ri. Pagka olaid sobana si Paulus montuduk, dinudu’on sono iyo om nokoturuw om noratu kiat so tingkat kotolu ri. Nowukatan-o iyo nu pinongokatan nosiro so iyo ri. ¹⁰ Nga muntibaa yo si Paulus, om loubi yo niyo omulok-i om mutongaro yo nu, “Ikod kou ya kaagut. Miau po iyo!” koo. ¹¹ Mindokodo yo koimbagu si Paulus om boogio yo niyo baang-baang-i, om mongokano yo nosiro. Nosuaban iyo montuduk, om noopod-o po, lumombuso yo iyo. ¹² Tundano yo nosiro omulok iiri muli’ om sobana ko nosudu’an om noinsosomodan nosiro nu miau-a. ¹³ Sumondoto kai yo so kapal om lumoyago kai yo mogulu so Asus mongaambai so si Paulus, so’ minontas-a iyo. ¹⁴ Nokopusambat kai so Asus, sumokoyo yo si Paulus om lumoyago kai yo so Matilini. ¹⁵ Kiat dii linumayag kai, om susuab-i po notimpan mai yo puru Kios. Koduo runat-i nokotalib kai yo so puru Samus om sondunat po laid tumalib kai yo so Militus. ¹⁶ Dai yo minambai si Paulus so Ipisus so’ mokitotalib osikap so Asia, om mokilologa’ so Yirusalim, nu dai po ologa’ Rami-Rami Pintakusta. ¹⁷ Kiat so Militus, minongodau si Paulus nu mokimusambat nu wowaidon nu puimpugan so Ipisus. ¹⁸ Nokologa’ yo po nosiro, mutongaro yo si Paulus nu, “Oo su kosusulodan ku, noilaan muyu ya kogoyaan ku nu kinologa’an ku togna so wonuo nu Asia. ¹⁹ Pudi pona osonsara’ aku sampai kotangi’ nu pongindoraai nu lobuw Yaudi, mugogoma’on aku ya suat so Tuhan maid nu obaba’ inawo. ²⁰ Oilaan muyu ya nu dai ya su oontara pokoilo so kou nu onu yo po kiguna suat so kou. Montuduk aku so kou so poomuimpugan nu lobuw suang om so waloi muyu. ²¹ Dadan aku poondom so lobuw Yaudi om so lobuw bansa wokon, su’ rumorogo nosiro momaal nu koraayan, obinsuut so Kinoringan, om poimaid so Tuhan Yisus. ²² Kosiono, maid nu ponuu’an nu Atod nu Kinoringan, mian aku so Yirusalim, nga dai ku oilaan ong onu obomboran ku dii. ²³ Ono yo su oilaan ku, pinokoilo aku nu Atod nu Kinoringan so kiawi’ bandar inianan ku, nu jiilon aku om osonsara’ dii. ²⁴ Nga dai ku ya poduli’on onu kourugan nu kowiawan ku. Ono yo su koinginan ku mongaawi’ nu gogoma’on nipongaarap ni Tuhan Yisus so aku, potuturan nu Abar Owarong suat nu koworongan nu Kinoringan. ²⁵ Noondaa ku yo kou kiawi’, om notudukan ku yo nu pogkuosaan nu Kinoringan. Opurimon ku nu dai toko yo sono kopusambat. ²⁶ Indadi, tongaron ku itu so kou nu runat tu nu, bang kuwai so kou dai poimaid om matoi ukumon nu Kinoringan, okon-o sono ko sala’ ku. ²⁷ Dai su insan mulaiw kiat so gogoma’on ku potuturan nu kiawi’ notantu nu Kinoringan goma’on Niyo. ²⁸ Pusingipat kou yo om ipati muyu ya lobuw poimaid so si Yisus iri nitaak nu Atod nu Kinoringan so kou nu ipoipat-i, so’ nosiliw kou yo nu moongipat so nosiro. Ipati muyu yo nosiro soko mongipat nu dumba, so’ sinongapan-o nosiro nu Kinoringan nu kinopotoyan nu Anak Niyo pongolukat so nosiro. ²⁹ Koungkayas aku po itu, tantu lumoga’ lobuw oraai soko kulos-kulos orongit tuui so kou, om sindoraayon sono lobuw inipatan muyu no. ³⁰ Om kuwai ya so kou lobuw potuturan nu abar okon ko bana. Waalon nosiro soko ono tayon ong kowaid so nosiro lobuw nopoimaid-o so si Yisus. ³¹ Ono yo ko’ mingat-ingat kou yo bana. Ondomo muyu yo nu tolu notoun laid awi runat montuduk aku so kou, nu oluluudan so kou. ³² Kosiono nikomouli’ ku kou so Kinoringan su’ ipatan kou Niyo, om tumatap kou poimaid nu abar suat so koworongan Niyo. Iyo yo su kikuasa popiot nu koimaidan muyu om monaak so kou nu borakat iri nokosodia’ yo suat so lobuw Niyo. ³³ Dai ya su insan mokitaak nu siin intawa pokakas so isai-isai ya. ³⁴ Noilaan muyu ya nu mugogoma’on aku modium nu kosukup-sukupan nu kowiawan ku om kouna’an maid-waid so aku. ³⁵ Kiawi’ iitu no winaal ku tayon ong oilaan muyu nu subai owasa mugogoma’on om monabang nu lobuw kikosimpitan. Ondomo toko yo tinangar ni Tuhan Yisus nu, ‘Owarong po monaak ko’ taakan,’ koo ri,” koo si Paulus. ³⁶ Noopod-o po iyo mutangar, sumurukudo yo sono nosiro mogdu’a. ³⁷ Koromi yo sono nosiro si Paulus maid nu tumangi’. ³⁸ Olunggui sobana nosiro so’ minutangar iyo nu dai yo sono kopusambat nosiro. Soko iri po, opiti yo nosiro si Paulus so kapal sokoyan niyo ri.

¹ Nokopusosogina kai yo po so nosiro, lumombuso kai yo lumayag so puru Kus, om susuab-i nokologa’ kai yo so puru Rodi. Kiat dii lumombuso kai yo so dududulan nu Potara. ² Dii so Potara, nokooyang kai nu kapal sundur lumayag so Punisia. Sumokoyo kai yo so kapal oono, om lumombuso kai yo lumayag, ³ om nosiou mai yo puru Siprus umpak so gibang, nga lumombuso kai ya lumayag so Siria. Tumidongo kai yo so Tirus, so’ dii yo potindalan nu gonggamon so kapal oono. ⁴ Miano kai yo mongondaa nu lobuw poimaid so si Yisus dii, om mogolo kai yo koturuan dii so nosiro. Maid nu pontudukan nu Atod nu Kinoringan, inowudan sono nosiro si Paulus nu dai polombuson so Yirusalim. ⁵ Nokotalib koturuan, lumombuso kai yo mompanou. Niapit kai ya nosiro maid nu anak sawo nosiro so imbing, om sumurukudo kai yo dii mogdu’a. ⁶ Nokopusosogina kai yo po, sumokoyo kai yo so kapal, om nosiro nga minuli’ yo. ⁷ Lumoyago kai yo kiat so Tirus, lumoga’ so Putulimais. Minongondaa kai dii nu kosusulodan poimaid om minokilila’ so nosiro nu mogol sondunat dii. ⁸ Susuab-i lumombuso kai yo lumayag om nokologa’ kai so Kaisaria. Sumombato kai yo so ido koyuwan poolombus nu Abar Owarong, ingoranan so si Pilipus, om mogolo kai yo so waloi niyo ri. Si Pilipus-o po ido kiat so turu koyuwan pinili’ nu moonabang so Yirusalim gulu ri. ⁹ Kianak iyo opat roraa, om dadan nosiro paabar nu kodau kiat so Kinoringan. ¹⁰ Olaid-laid kai ya dii, lumogaa yo sono ido poo’abar nu Kinoringan kiat so Yudia, ingoranan so si Agabus. ¹¹ Nokologa’ yo po iyo, olapo yo niyo kambot so awak ni Paulus om musingkogoso yo nu akod longon om minutangar nu, “Itu yo su tinangar nu Atod nu Kinoringan, ono yo songapan nu kambot iitu no, kogosan soko itu dii so Yirusalim nu lobuw Yaudi, om nikomouli’ so lobuw okon ko Yaudi,” koo. ¹² Norongou mai yo po iri, pogoso mai yo om kosusulodan minogol so Kaisaria nu dai poianon si Paulus so Yirusalim. ¹³ Nga sumombuto yo iyo nu, “D’ado kosudaan muyu tumangi’ paagut nu inawo ku. Dai ku ya poduli’on ong kogosan aku dii, om pudi pona potoyon aku nga nokosodia’ aku yo suat-a so si Tuhan Yisus,” koo. ¹⁴ Pagka dai ya osawoi si Paulus, mingkoyodo kai ya sono nu, “Muda-mudaan ong ourug-a onu ya koinginan nu Tuhan suat so si Paulus,” koo kai. ¹⁵ Olaid-laid kai ya mogol dii, lumombuso kai yo so Yirusalim. ¹⁶ Tinu-tinu kosusulodan minaid kiat so Kaisaria nopaapit so kai so waloi ni Monasun, so’ dii yo intoronan mai. Si Monasun-o po kiat so Siprus om olaid-o nopoimaid so si Yisus. ¹⁷ Nokologa’ kai yo po so Yirusalim, insomungo kai yo nu kiawi’ kosusulodan dii maid nu osudu’an. ¹⁸ Susuab-i maido yo si Paulus so kai mongondaa so si Yakubus. Kiawi’ wowaidon nu puimpugan dii otoron-a. ¹⁹ Nokosogina kai yo po so nosiro, monuturano yo si Paulus nu kiawi’ ginama’ nu Kinoringan so iyo, iri nobomboran niyo so lobuw okon ko Yaudi ri. ²⁰ Norongou-o po nosiro tuturan ni Paulus, mongoroyowo yo nosiro nu Kinoringan, om mutongaro yo nu, “Oo Paulus, tantu noilaan mu yo nu boribu-ribu yo lobuw Yaudi nopoimaid so si Yisus, sobana ko mongowaid nu Ukum ni Musa. ²¹ Kosiono norongou-o nosiro nu montuduk ko nu kiawi’ lobuw Yaudi iri nokoido so bansa wokon, nu dai popongowaidon nu Ukum ni Musa. Minontuduk ko so nosiro nu dai niposunat inonakan nosiro intawa mongowaid nu adat Yaudi. ²² Tantu orongowan nu lobuw Yaudi iri nopoimaid-i yo nu nokologa’ ko tuui. Indadi onu koo yo sono? ²³ Owarong ong soko itu waalon mu, ono yo kuwai opat koyuwan tuui nokopongibot-o so Kinoringan, ²⁴ indadi, waid-o so nosiro muugas mongowaid nu adat nu lobuw Yaudi om topani yo nosiro mongobarai su’ kopuburut nosiro, pongilaan nu notuman-o ibot nosiro no, om oilaan sono nu lobuw Yaudi nu okon-a ko bana norongou nosiro oono, so’ ikau nga mongowaid-a nu Ukum ni Musa. ²⁵ Nga suat-o po so lobuw okon ko Yaudi nu nopoimaid-o so si Yisus, nokopoowit kai yo nu surat so nosiro nu kinotopusan mai iitu, ono yo dai kowasa nosiro mongokan nu osabul, soko raa’ nu kulos-kulos, onsi nu kulos-kulos matoi kotolon, om onu yo po niusaa’ so tinindobuw, om mintoron nosiro gumilat,” koo nosiro. ²⁶ Indadi, susuab-i maido yo sono si Paulus so opat koyuwan-i musingugas mongowaid nu adat nu lobuw Yaudi. Noopod iri, mosuwo yo nosiro so Waloi Maayo nu Kinoringan om pokoiloo yo ni Paulus imam-i nu koturuan po laid mongowaid nosiro nu adat nu lobuw Yaudi, om koponaak nai’ iyo nu kulos-kulos gorason niusaa’ so Kinoringan suat so nosiro ido soido. ²⁷ Uyud-uyud opupus koturuan-i, nosiou sono si Paulus nu lobuw Yaudi kiat so Asia so Waloi Maayo nu Kinoringan-i. Imuuni yo sono nosiro lobuw-i om okomo yo nosiro si Paulus, ²⁸ maid nu muap-luap nu, “Oo su lobuw Israil, tobangi kai! Lobuw-o iitu su mongoraai nu bansa Israil om Ukum ni Musa, om Waloi Maayo nu Kinoringan tu. Kosiono minongowit iyo nu lobuw okon ko Yaudi masuw so Waloi Maayo nu Kinoringan monginsaim nu waloi oono,” koo nosiro. ²⁹ (Minutangar nosiro soko iri so’ nosiou nosiro si Trupimus, lobuw nu Ipisus so bandar oono maid-waid so si Paulus, om intaman nosiro ong inowit ni Paulus masuw so natad nu Waloi Maayo nu Kinoringan-i). ³⁰ Dai olaid om kikoogutan maayo sono suat so si Paulus so pilolongkop nu bandar oono. Mundako yo lobuw-i lumoga’ dii si Paulus mongaakom om goyato yo polabus kiat so natad nu Waloi Maayo nu Kinoringan-i om mogtuui tinutub pintu nu pagar-i. ³¹ Laid nu lobuw-i mokipopomatoi so si Paulus, pokoiloo yo nu lobuw iri wowaidon nu soujar nu Ruum-i nu kikoibukan so pilolongkop nu bandar Yirusalim. ³² Owito yo sono nu wowaidon-i ongo soujar om pulis-i lumangkas mian so koibukan-i. Nosiou-o po nu wowaidon ongo soujar om pulis-i, intoroni ya sono nu ongo lobuw-i mongobobog si Paulus. ³³ Miano yo wowaidon-i dii si Paulus mongaakom so iyo, om suuo yo soujar-i mongkogos so iyo nu rantai. Duato yo nu wowaidon-i ong isai si Paulus om onu ginama’ niyo. ³⁴ Kuwai so nosiro sinumambut nu soko itu, om kuwai ya nu soko ono. Pagka soko iri koibuk, dai ya sono oilaan nu wowaidon nu soujar-i ong onu sobana yo nourug. Indadi, poowiti yo sono si Paulus mian so poomusombatan nu wowaidon nu soujar-i. ³⁵ Nokologa’ nosiro so tukad-i, onggungo yo si Paulus nu soujar-i su’ kotalib so lobuw suang mokipopomatoi so iyo ri. ³⁶ Muut-suut lobuw ongo roraai iiri so nosiro om muap-luap nu, “Potoyon-o iyo!” koo. ³⁷ Uyud-uyud nosiro masuw so poomusombatan nu soujar-i, mutongaro yo si Paulus so wowaidon nu soujar-i nu, “Oo tuan, mokilila’ aku so ikau mutangar,” koo. Sumombuto yo wowaidon-i nu, “Moilo ko bo gaam nu tangar Yunani! ³⁸ Intaman ku ong lobuw ko nu Masir, iri lumawan nu momogkuasa gulu ri, om minongowit mulaiw nu opat noribu sampuw kisindata mian so padang pantai,” koo. ³⁹ Sumombuto yo si Paulus nu, “Okon-a! Aku yo po lobuw Yaudi kiat so bandar Tarsus, bandar maayo so Kilikia. Lilai aku yo mokimutangar-tangar so lobuw oono,” koo. ⁴⁰ Nolila’an-o po si Paulus poputangar, mundiio yo iyo maid nu posagka nu palad niyo ri poodog nu lobuw-i. Nokoodog-o po nosiro, mutongaro yo sono iyo so tangar Ibrani nu,

¹ “Oo su kosusulodan om kotutuaan, rongowo muyu yo pusintopanan ku tu!” koo. ² Norongou-o po nosiro nu mutangar si Paulus nu tangar Ibrani, minodog po bana nosiro, om sumunduro yo iyo mutangar nu, ³ “Aku yo po lobuw Yaudi, nopuanak so bandar Tarsus so wonuo nu Kilikia, nga naayo aku tuui so Yirusalim. Si Gamalil su minontuduk so aku nu gama’ mongowaid nu Ukum ni Musa, iri nipolatas so odu aki toko ri, om sobana ko obinsuut aku so Kinoringan so kiawi’ gogoma’on ku, soko kou tuui nu runat tu. ⁴ Minongindoraai aku nu lobuw nopoimaid so si Yisus om nokopomatoi aku. Osuang so nosiro, woinoi kusoi pinuakom ku om jiniil ku. ⁵ Noilaan-a nu Imam Maayo om kiawi’ lobuw so Poongobisora’an nu Ugama nu obana ya totongaron ku iitu, so’ nosiro yo su minonaak so aku nu surat niposiou ku so lobuw Yaudi so Damsik. Surat oono yo su kopogboya’an ku mongaakom nu lobuw nopoimaid so si Yisus om mongowit so nosiro so Yirusalim nu ukumon,” koo. ⁶ Mutongaro yo si Paulus nu, “Iya nu tonga’ runat dai po nokologa’ so Damsik, milok po su kibinaang onawau tumogu’ kiat so langit so pililiwut ku ri. ⁷ Noluluk aku sono so tana’, om nokorongou aku nu bongut nu, ‘Oo Saulus, nokuro su mongoraai ko so Aku?’ koo. ⁸ Sumombuto aku yo nu, ‘Isai ko ka Tuhan?’ k’aku. ‘Aku yo si Yisus lobuw Najarit sindoraayon mu no,’ koo Iyo so aku. ⁹ Kolobuwan minaid so aku ri nokosiou-a nu binaang-i, nga dai noorotian nosiro bongut mokimutangar-tangar so aku ri. ¹⁰ Mutongaro aku yo koimbagu nu, ‘Oo Tuhan, onu su mupatut waalon ku?’ k’aku. Sumombuto yo Iyo nu, ‘Tungag-o om lombus-o so Damsik. Pokoiloon ko ya dii nu kiawi’ nipogama’ nu Kinoringan so ikau,’ koo. ¹¹ Nobolou aku sono nu binaang iiri. Indadi tinanud aku ya nu kouna’an ku ri lumoga’ so Damsik. ¹² Kuwai ido koyuwan dii ingoranan so si Ananias. Sobana ko obinsuut iyo so Kinoringan om owasa mongowaid nu Ukum ni Musa. Orumaton iyo nu kiawi’ lobuw Yaudi so Damsik oono. ¹³ Lumogaa yo iyo dii so aku om mundiio yo so obi’ ku ri om minutangar nu, ‘Oo sulod ku Saulus, kosiou ko yo sono koimbagu!’ koo. Iya ya iiri yinumangag aku om nosiou ku yo iyo. ¹⁴ Mutongaro po iyo so aku nu, ‘Pinili’ ko yo nu Kinoringan iri usaa’on nu odu aki toko ri, su’ oilaan mu nipogama’ Niyo so ikau, om kosiou om korongou ko so si Yisus, Uripon nu Kinoringan iri minomaal nu koinginan Niyo. ¹⁵ Pinili’ ko nu Kinoringan paabar so lobuw suang nu onu yo po nosiou om norongou mu nu pinutongaran Niyo so ikau. ¹⁶ Kodi yo imati nu olaid po. Tungago om pokidiu’ yo. Pokiidu’ yo so Kinoringan nu kiawi’ koraayan mu,’ koo si Ananias so aku. ¹⁷ Mululio aku yo sono so Yirusalim, om laid ku mogdu’a so Waloi Maayo nu Kinoringan-i, nokosorou-sorou aku sono nu ¹⁸ Tuhan minutangar so aku nu, ‘Sikap-o ya mulaiw kiat so Yirusalim tu so’ lobuw tuui dai poimaid nu pontudukan mu suat so Aku,’ koo. ¹⁹ Sumombuto aku yo nu, ‘Oo Tuhan, noilaan-o nosiro nu minasuw aku yo nu gulu ri so waloi sosombooyangan mongaakom om mongobobog nu lobuw poimaid so Ikau. ²⁰ Soko ono ya pudi si Stipanus iri potuturan suat so Ikau gulu ri. Dii-dii aku ya nu pinomotoyan so iyo ri, tinumaayun aku nu potoyon iyo, om aku yo kondiri minongipat nu sabung nu lobuw minomatoi so iyo ri,’ k’aku. ²¹ Nga minutangar po Tuhan so aku nu, ‘Panou-a! Suu’on Ku ikau mian so ongo lobuw okon ko Yaudi orawu’ tuui,’ koo,” koo si Paulus. ²² Norongou-o po nosiro nu moingin si Paulus mian so lobuw okon ko Yaudi, lumuapo yo sono nosiro nu, “Potoyon-o iyo! Dai otoop iyo miau!” koo nosiro. ²³ Puiyaon nosiro nu lumuap om polapos nu sabung, om potias nu koris so dilanggau nu koo’ungot. ²⁴ Indadi poowiti yo sono nu wowaidon nu soujar nu Ruum-i si Paulus so poomusombatan nu soujar-i nu lubakon, tayon ong niabar niyo koungotan nu lobuw Yaudi so iyo ri. ²⁵ Nga nokogosan-o po si Paulus nu sundur lubakon, mutongaro yo iyo so wowaidon nu soujar mundii-dii ri nu, “Otoop ka insaadan lobuw bansa Ruum, ong dai po oukuman laid?” koo. ²⁶ Norongou-o po nu wowaidon nu soujar-i tinangar ni Paulus, miano yo sono iyo so wowaidon niyo ri om tongaro yo nu, “Oo tuan, adang-a lubakon iyo so’ lobuw-a iyo nu Ruum kolaai,” koo. ²⁷ Miano yo wowaidon niyo iiri dii si Paulus om duato yo nu, “Bana ya ka nu bansa ko nu Ruum?” koo iyo. “Oo,” koo si Paulus. ²⁸ Mutongaro yo wowaidon nu soujar oono nu, “Aku nga nourug-a nu bansa Ruum om osuang siin nokobarai ku,” koo. Sumombuto yo si Paulus nu, “Nga aku yo po lobuw bana ya nu Ruum so’ ino amo ku lobuw Ruum,” koo. ²⁹ Indadi iya ya iiri kiawi’ soujar sinuu’ mongolubak so si Paulus rinumawu’ yo sono, om noilaan-o po nu wowaidon nu soujar-i nu lobuw-a nu Ruum si Paulus, linumaa’ sono iyo, so’ nokoponuu’ yo iyo nu soujar mongkogos so si Paulus. ³⁰ Inimutig sobana nu wowaidon nu soujar nu Ruum iiri ong nokuro su sindoraayon si Paulus nu ongo lobuw Yaudi ri. Indadi susuab-i lobusi yo sono niyo si Paulus, om suuo yo niyo wowaidon nu imam om lobuw wokon so Poomubisora’an nu Ugama ri popuimpug, om owito yo sono si Paulus tumingkuang so nosiro.

¹ Bontongi yo ni Paulus lobuw so Poomubisora’an nu Ugama ri om mutongaro yo nu, “Oo su kosusulodan, oilaan ku nu kiawi’ gogoma’on ku sampai kosiono tu koinsanang nu Kinoringan,” koo. ² Nokoputangar si Paulus soko iri, suuo yo nu Imam Maayo Ananias lobuw minundii so obi’ ni Paulus monampak nu kobang niyo ri. ³ Mutongaro yo si Paulus so Imam Maayo ri nu, “Oo su lobuw oraai musingkowarong-warong, ikau nga sompakon-a nu Kinoringan. Mongobisara’ ko so aku mongowaid nu Ukum ni Musa, nga ikau-a kondiri dai mongowaid nu Ukum oono, so’ monuu’ ko nu lobuw poponampak so aku,” koo. ⁴ Mutongaro yo lobuw so obi’ ni Paulus nu, “Dai ko otoop mubaag nu Imam Maayo nu Kinoringan,” koo. ⁵ Sumombuto yo si Paulus nu, “Oo su kosusulodan, dai ku bo noilaan nu iyo yo su Imam Maayo nu Kinoringan. Bang noilaan ku nai’, dai ya su mutangar soko ono so’ nokosurat so Buuk nu Kinoringan nu, ‘Adang-o mubaag nu wowaidon nu bansa muyu,’ koo ri,” koo. ⁶ Noilaan-o po ni Paulus nu kuwai lobuw Saduki om Parisi so poomubisora’an iiri, mutongaro yo sono iyo nu, “Oo su kosusulodan ku, aku yo po lobuw so puimpugan nu Parisi om solusuk-a nu Parisi. Binisara’ aku tuui so’ poimaid aku nu oluli’an lobuw minatoi,” koo. ⁷ Notangar-o po ni Paulus soko iri, minusosagka’ sono lobuw Parisi om Saduki ri om minupinig. ⁸ (Minupinig nosiro so’ dai poimaid lobuw Saduki nu oluli’an lobuw minatoi, om dai poimaid nu kisusuu’on nu Kinoringan, intawa kiatod, nga lobuw Parisi, poimaid nu kiawi’ oono.) ⁹ Sumunduro sono nosiro musosagka’. Mundiio yo tinu-tinu lobuw Parisi moomontuduk nu ugama ri om mutongaro yo dumaawa nu, “D’ado ya sala’ nu lobuw iitu. Kalu kuwai atod intawa susuu’on nu Kinoringan minokimutangar-tangar so iyo,” koo. ¹⁰ Sumokakan-o sono pusosogka’an iiri sampai nokolaa’ wowaidon nu soujar-i nu pisi’-pisi’on nosiro si Paulus. Monuuo yo sono iyo nu soujar mongalap so si Paulus kiat so isop nu kolobuwan-i om owito yo koimbagu so poomusombatan nu soujar-i. ¹¹ Awi ri, minintolang sono si Tuhan Yisus so obi’ ni Paulus om minutangar nu, “Pototapo yo inawo mu no. Nokaabar mu yo abar suat so Aku tuui so Yirusalim, om subai iabar mu ya ono pudi so Ruum,” koo. ¹² Susuab koimbagu ri, muupokato yo lobuw Yaudi ri nu kopatoi-patoi nosiro so si Paulus. Minongibot nosiro nu dai mongokan monginum ong dai po opatoi si Paulus. ¹³ Koosuang nosiro labi opat nopulu. ¹⁴ Miano yo nosiro so wowaidon nu imam om wowaidon nu lobuw Yaudi ri mutangar nu, “Nokopongibot kai yo nu dai mongokan monginum ong dai mai po opatoi si Paulus. ¹⁵ Indadi pongodau kou yo so wowaidon nu soujar nu Ruum nu ipoowit si Paulus koimbagu tuui, so’ moingin kou kolaai mongolugit so iyo mongoduat. Dai po kologa’ iyo tuui, potoyon mai iyo,” koo. ¹⁶ Nga norongou-a nu komonakon ni Paulus pinuupokatan nosiro ri, miano yo sono iyo so poomusombatan nu soujar-i, pokoilo nu iri so si Paulus. ¹⁷ Pagka soko iri paawo yo ni Paulus ido wowaidon nu soujar, om tongaro yo niyo nu, “Owito omulok iitu so wowaidon nu soujar Ruum oono su kuwai niabar niyo,” koo. ¹⁸ Owito yo sono omulok iiri nu wowaidon nu soujar-i mian so wowaidon nu soujar Ruum om mutongaro yo nu, “Sinuu’ aku ni Paulus, iri nojiil-i, mongowit nu omulok iitu tuui so ikau su kuwai niabar niyo,” koo. ¹⁹ Kuyuti yo nu wowaidon-i longon nu omulok-i, mongowit rumawu’ sabat om duato yo nu, “Onu ka niabar mu so aku?” koo. ²⁰ Sumombuto yo omulok-i nu, “Minuupakat lobuw Yaudi ri nu ipoowit so ikau si Paulus mululi’ koimbagu so Poomubisora’an nu Ugama ong suab, so’ moingin po bana nosiro kolaai mongolugit so iyo. ²¹ Nga kodi yo imaido suu’ nosiro oono, so’ labi opat nopulu sampuw nosiro sinumusut so lolanon. Nokopongibot-o nosiro nu dai po mongokan monginum ong dai po opatoi nosiro si Paulus. Nokoputimos-o nosiro, mongimat-a nu sambut kiat so ikau,” koo. ²² Mutongaro yo wowaidon-i nu, “Kodi yo tuturani so isai ya, nu minongaabar ko tuui so aku,” koo, om suuo yo niyo omulok-i pouli’. ²³ Indadi momaawo yo wowaidon iiri duo wowaidon nu soujar om mutongaro yo so nosiro nu, “Impugo muyu duo naatus soujar maid nu turu nopulu soujar kikuda om duo naatus soujar kibangkau. Jaam siwoi nu awi tu mompanou kou yo mian so Kaisaria. ²⁴ Sodia’on-a kuda sokoyan ni Paulus om ipati muyu yo iyo pusingkologa’ dii si Gobonor Pilik,” koo. ²⁵ Monurato yo iyo niloga’ dii si Gobonor Pilik soko itu nu, ²⁶ Oo Gobonor Pilik orumaton ku, surat iitu kiat so aku Klaudius Lisias! ²⁷ Si Paulus-o po iitu, inakom nu lobuw Yaudi nu potoyon, nga noilaan ku yo po nu lobuw iyo nu Ruum, minian aku sono maid nu ongo soujar ku monapul so iyo. ²⁸ Pagka pokiimutigan ku ong onu pinonopudan nosiro so iyo, inowit ku sono iyo so Poomubisora’an nu Ugama nosiro. ²⁹ Nga noilaan ku nu ado ya nowaal niyo nu otoop pongukuman so iyo nu potoyon intawa jiilon. Ponopudan nosiro so iyo suat-a so ukum nu ugama nosiro kondiri. ³⁰ Pinokoilo aku nu minuupakat lobuw Yaudi momatoi so iyo. Ono yo ko’ nipoowit ku iyo nai so ikau, om pinowaid ku ya lobuw monapud so iyo no pokoilo so ikau nu totapud nosiro no, koo tangar so surat oono. ³¹ Osipo yo nu soujar-i nisuu’ nu wowaidon nosiro ri. Olapo yo nosiro si Paulus om owito yo mian nu awi iiri so bandar Antipatris. ³² Susuab-i lumombuso yo soujar kikuda ri mompanou mongowit so si Paulus, om iri ado kuda ri minuli’ yo koimbagu so Yirusalim. ³³ Nokologa’ yo po soujar kikuda ri so Kaisaria, taaki yo nosiro surat-i so Gobonor om ogoli yo si Paulus dii. ³⁴ Nobasa’ yo po nu Gobonor-i surat-i, duato yo sono niyo si Paulus ong siombo inungkiaton. Noilaan-o po niyo nu kiat-a si Paulus so Kilikia, ³⁵ mutongaro yo iyo nu, “Oo, bisora’on ku ya ikau ong kologa’ yo tuui kolobuwan minonapud so ikau-i,” koo. Minonuu’ yo sono iyo nu jiilon si Paulus so waloi maayo ni Raja Irudis.

¹ Kolimaan kinologa’an ni Paulus so Kaisaria, minian sono dii si Ananias, Imam Maayo, om wowaidon nu lobuw Yaudi, om ido koyuwan moongodaawa ingoranan so si Tartulus. Tinumingkuang nosiro so si Gobonor Pilik monapud so si Paulus. ² Nopaau-o po si Paulus tumingkuang, topudo yo sono ni Tartulus iyo soko itu, “Oo tuan gobonor owarong! Kiat nu minogkuasa so tontong iitu, sobana ko osanang kai, om kiat so koo’ilo mu, osuang koworongan notorima’ nu bansa mai. ³ Sobana ko torima’on om mongunsopot kai nu kiawi’ oono siombo-ombo kai ya. ⁴ Mindamo aku so ikau nu rongowon mu tuturan ku oipak-a iitu. ⁵ Noilaan mai nu sobana ko koindolaa’ lobuw iitu. Siombo-ombo nga mongaagut iyo nu lobuw Yaudi, om iyo yo su wowaidon nu lobuw poimaid nu pontudukan okon ko bana kiat so ido lobuw Najarit. ⁶ Om insan Waloi Maayo nu Kinoringan nga padu niyo insaiman, nga inakom mai iyo. [Padu mai bisora’on iyo maid nu ukum nu ugama mai kondiri, ⁷ nga si Lisias, iri wowaidon nu soujar-i, minonolod so iyo kiat tuui so kai, ⁸ om minonuu’ nu kiawi’ moonapud tumingkuang so ikau.] Bang duaton mu lobuw iitu, ikau-o kondiri koilo kiat so iyo nu obana ya kiawi’ topudan mai so iyo no,” koo. ⁹ Lobuw Yaudi dii ri nga sinumimpor-a monapud so si Paulus, om poimbana nu kiawi’ tinangar ni Tartulus. ¹⁰ Kopoyo yo nu gobonor-i si Paulus poputangar. Mutongaro yo sono si Paulus nu, “Oo tuan, oilaan ku yo nu botoun-toun ko yo moongobisara’ so tontong iitu. Ono yo ko’, osanang aku musintapan so tiningkuangon mu. ¹¹ Ikau-o kondiri mongudio nu dai po ko opulu om duo rinunatan kinotoliban, minian aku so Yirusalim mongusaa’. ¹² Om dai insan kotoyinu lobuw Yaudi so aku mokimusagka’, intawa mongimpug nu lobuw momaal nu koogutan kiat-o so Waloi Maayo nu Kinoringan kumoo yo so ongo waloi sosombooyangan, intawa siombo-ombo ya so bandar. ¹³ Dai kointolang nosiro so ikau totapud nosiro so aku oono nu bana ko’ dai. ¹⁴ Nga suat so aku, itu yo su obana, ono yo mongusaa’ aku nu Kinoringan, iri usaa’on nu porookian mai ri, musuat nu pontudukan ni Yisus, iri tokodon nu kosuangan nu lobuw Yaudi nu osala’. Nga poimaid aku ya nu kiawi’ nokosurat so buuk ni Musa om buuk nu poo’abar nu Kinoringan gulu ri. ¹⁵ Muinong-a so nosiro, nu aku nga umarap-a so Kinoringan nu, kiawi’ lobuw, oraai owarong oluli’an ong matoi. ¹⁶ Ono yo ko’, dadan aku mogkari’-kari’ mugogoma’on nu owarong, tayon ong d’ado oirosaan ku so inawo kosola’an suat so Kinoringan om lobuw. ¹⁷ Botoun-toun aku yo noliwang, minululi’ aku yo koimbagu so Yirusalim mongowit nu siin ponabang ku nu lobuw omiskin so bansa ku kondiri, om pousaa’ nu onu-onu otoop niusaa’ ku so Kinoringan. ¹⁸ Laid ku mugogoma’on nu soko iri, nooyangan aku sono nu tinu-tinu lobuw Yaudi so Waloi Maayo nu Kinoringan, nu nopupus aku mongowaid nu oturan nu ugama mongugas nu koyuwan. Owako ya lobuw maid-waid so aku nu iya iiri, makin po ong koogutan nga d’ado ya. ¹⁹ Nga dii ya tinu-tinu lobuw Yaudi kiat so wonuo nu Asia. Nosiro yo su otoop potuturan so ikau ong kuwai ponopudan suat so aku. ²⁰ Nga pagka d’ado nosiro tuui, lobuw iitu yo su pokoilo nu kinotopusan nu pinongobisora’an so aku so Poomubisora’an nu Ugama. ²¹ Ido-ido ya su kaabar nosiro so ikau, iri niluap ku so tiningkuang nosiro ri nu, ‘Bisora’on aku nu runat iitu so’ poimaid aku nu oluli’an lobuw minatoi,’ k’aku ri,” koo si Paulus. ²² Indadi inopod-o sono pubisora’an oono ni Pilik, iri osuang oilaan nu pontudukan suat so si Yisus nu, “Topuson ku ya pubisora’an iitu no ong kologa’ yo si Lisias, iri wowaidon nu soujar-i,” koo iyo. ²³ Monuuo yo iyo nu soujar popongipat so si Paulus, nga olila’an-a iyo ondaa’on nu kouna’an niyo om monaak nu onu-onu kosukupan niyo. ²⁴ Kotinu-tinuan kiat nu iri, lumogaa yo si Pilik om sawo niyo ingoranan so si Durusila, lobuw Yaudi. Monuuo yo sono iyo nu lobuw popongalap so si Paulus, so’ mokirorongou iyo so si Paulus mutangar suat nu lobuw poimaid so si Yisus Kristus. ²⁵ Nga nokoputangar-o po si Paulus suat nu gama’ koinsanang nu Kinoringan, kumodos nu koinginan, om Runat Pongukuman nu Kinoringan nu lobuw, sobana ko linumaa’ si Pilik om mutongaro yo so si Paulus nu, “Panou-o! Soginaan ku ya ikau koimbagu ong kikosiwatan-o,” koo. ²⁶ Soko iri pona su linumaa’ si Pilik, nga dadan-a iyo monuu’ nu lobuw popongalap so si Paulus pokimutongar-tongaran tayon niyo ong taakan iyo ni Paulus nu siin. ²⁷ Duo notoun kiat nu kinologa’an ni Paulus dii, nogonti’an sono si Pilik ni Porkius Pistus sumiliw nu gobonor. Pagka mokimuwarong-warong si Pilik nu lobuw Yaudi, pinosimaidan-a niyo si Paulus dii-dii so jiil.

¹ Kotoluan kinologa’an ni Gobonor Pistus so wonuo nu Yudia, lumombuso yo sono iyo kiat so Kaisaria mian so Yirusalim. ² Nai yo nopointolang wowaidon nu imam om wowaidon nu lobuw Yaudi nu ponopudan nosiro so si Paulus. Otigi’ sobana nosiro mindamo so si Pistus, ³ tayon ong mimaid so nosiro, om monuu’ sono nu lobuw popongowit so si Paulus mian so Yirusalim, so’ minuupakat-o nosiro nu potoyon si Paulus so lolanon. ⁴ Nga sumombuto yo si Pistus nu, “Ipat-ipatan-o si Paulus so Kaisaria, om dai yo su olaid mululi’ dii. ⁵ Adi, owarong maid so aku kouna’an muyu kipangkat-o mian so Kaisaria om monapud so iyo dii, ong bana nu kikosola’an iyo,” koo. ⁶ Kiro-kiro kowoluan intawa kopuluan po minogol si Pistus so Yirusalim, om mulio yo iyo so Kaisaria. Susuab-i miano yo iyo so poomubisora’an om monuuo yo nu pologa’on si Paulus dii so iyo. ⁷ Nokologa’ yo po si Paulus, mundiio yo sono so pililiwut niyo ri lobuw nu Yaudi kiat so Yirusalim, om tumimpuuno yo monapud so iyo. Nga dai ya kointolang nosiro nu bana ya ka ponopudan nosiro ri ko’ dai. ⁸ Nga musintopano yo si Paulus nu, “D’ado ya nowaal ku nu kosola’an suat so Ukum ni Musa, Waloi Maayo nu Kinoringan, intawa Raja Maayo nu Ruum,” koo. ⁹ Nga pagka mokimuwarong-warong si Pistus nu lobuw Yaudi ri, duato yo sono niyo si Paulus nu, “Kotaayun ko ka ong owiton ku ikau so Yirusalim mongobisara’ suat so topudan iitu no?” koo. ¹⁰ Sumombuto yo si Paulus nu, “Mundii-dii aku yo boto so tiningkuangon nu Raja Maayo nu Ruum, om tuui yo su otoop pongobisora’an so aku. Ikau-o kondiri koilo nu d’ado ya sala’ ku so lobuw Yaudi. ¹¹ Bang dai su mongowaid nu ukum om minomaal aku nu mutoop nu ukumon nu potoyon, olila’ aku ya matoi. Nga bang dai ya obana topudan nosiro iitu no, ado ido koyuwan kopogbaya’ so aku. Mokibisara’ aku ya so tiningkuangon nu Raja Maayo nu Ruum!” koo si Paulus. ¹² Nokopuupakat-o po si Pistus nu moomontuduk so iyo ri, mutongaro yo iyo so si Paulus nu, “Pagka mokibisara’ ko so tiningkuangon nu Raja Maayo nu Ruum, subai mian ko dii so iyo,” koo. ¹³ Dai olaid kiat nu iri, lumogaa yo si Raja Agripa om si Borniki toudi niyo so Kaisaria sumambat so si Pistus. ¹⁴ Kotinu-tinuan nosiro dii, obari yo ni Pistus si Raja Agripa suat so si Paulus nu, “Kuwai lobuw tuui ingoranan so si Paulus tinaan ni Pilik nu gobonor po iyo ri. ¹⁵ Laid ku so Yirusalim-i, nopaabar wowaidon nu imam om wowaidon nu lobuw Yaudi suat nu lobuw oono, om minindamo nu nipoukum so aku. ¹⁶ Nga sinumambut aku nu, mongowaid nu adat nu lobuw Ruum, dai kowasa ukumon lobuw notapud ong dai po koputitingkuang nu moonapud so iyo, om taakan nu kosiwatan musintapan, k’aku. ¹⁷ Adi nokologa’ yo po nosiro tuui so Kaisaria, dai ku ya inimatan nu olaid po. Susuab-i minian aku yo so pongobisora’an om nipoowit ku lobuw oono sumambat so aku. ¹⁸ Nokoundii ongo moonapud-i paabar nu totapud nosiro, d’ado ya nokaabar nosiro nu koraayan soko ponokodan so inawo ku. ¹⁹ Kopusondiang pongoorotian nosiro om suat-a so ugama nosiro kondiri, om suat nu ido koyuwan ingoranan so si Yisus, iri minatoi-i, nga, tongaron po bana ni Paulus nu lobuw oono miau-a. ²⁰ Pagka dai su koorati nu iri, duato ku yo sono si Paulus nu, ‘Moingin ko ka ong bisora’on ko so Yirusalim nu ponopudan so ikau oono?’ k’aku. ²¹ Nga minokilila’ iyo nu tumotog po mogol tuui musingkoopod-a nu pongobisora’an nu ono ni Raja Maayo. Ono yo ko’, nipotaan ku po iyo tuui musingkologa’ nu kikosiwatan aku poowit so iyo dii so Raja Maayo,” koo si Pistus. ²² Mutongaro yo sono si Agripa so si Pistus nu, “Aku nga mokirorongou-a nu tuturan nu lobuw oono,” koo. Sumombuto yo si Pistus nu, “Suab-a om orongou mu nai’,” koo. ²³ Susuab-i mosuwo yo si Agripa om si Borniki, maid nu wowaidon nu soujar om lobuw kipangkat so bandar iiri so poomusombatan maayo ri, om sobana ko inorumat iyo nu kolobuwan dii. Si Paulus nga nipoowit ni Pistus masuw. ²⁴ Mutongaro yo si Pistus nu, “Oo Raja Agripa om kiawi’ lobuw tuui, lobuw iitu yo su bana ko indomoon nu lobuw Yaudi tuui om so Yirusalim nu potoyon ku. Muap-luap nosiro mutangar nu lobuw iitu dai opatut miau po. ²⁵ Nga ado ya oilaan ku kosola’an niyo nu otoop pongukuman so iyo nu potoyon. Pagka mokibisara’ iyo nu Raja Maayo, topuso ku yo sono nu nipoowit iyo dii. ²⁶ Nga, d’ado oilaan ku suraton ipoowit dii si Raja Maayo suat so iyo, indadi pinotingkuang ku sono iyo tuui, koido yo so ikau Raja Agripa, su’ oilaan ku onu bana yo ponopudan so iyo om suraton ku sono, ²⁷ so’ pikiran ku dai mutoop poowit dii so Raja Maayo nu ido koyuwan nojiil, ong d’ado ya otolang kosola’an niyo,” koo.

¹ Mutongaro yo sono si Raja Agripa so si Paulus nu, “Lila’an ku yo ikau musintapan,” koo. Singgori yo ni Paulus longon niyo ri pokoilo nu moingin iyo mutangar, om mutongaro yo sono nu, ² “Oo Raja Agripa, osudu’an aku bana nu kikosiwatan aku musintapan so tiningkuangon mu suat nu ponopudan nu lobuw Yaudi so aku, ³ om labi po so’ koilo ko sobana nu adat om pomusosogka’an toko lobuw Yaudi. Ono yo ko’, mindamo aku, nu otagon mu mongorongou sobana pusintopanan ku tu pudi olanggau. ⁴ Noilaan-o nu kiawi’ lobuw Yaudi kogoyaan ku kiat nu lolaing aku po. Noilaan-o nosiro nu mido-ido aku so bansa ku togna po so Kilikia, om noopod iri so Yirusalim. ⁵ Olaid-o nosiro nokoilo suat so aku. Om bang moingin nosiro, tantu koponuturan nosiro nu lobuw aku nu Parisi om bana ko sumuut aku nu oturan nu ugama mai. ⁶ Om bisora’on aku nu kosiono tu so’ poimaid aku nu janji nu Kinoringan so porookian mai ri nu oluli’an Niyo lobuw minatoi. ⁷ Awi runat mongusaa’ so Kinoringan opulu om duo suku-sakat nu bansa mai, so’ nosiro nga mimat-imat-a nu janji oono. Oo Raja Agripa, ono yo ko’ topudon aku nu lobuw Yaudi so’ poimaid aku nu janji oono. ⁸ Nokuro su kou lobuw Yaudi dai poimaid nu kopongoluli’ Kinoringan nu lobuw minatoi? ⁹ Gulu ri, nokopomikir aku nu musuat ong lumawan aku so si Yisus, iri kiat so Najarit-i. ¹⁰ Om iri yo su winaal ku so Yirusalim, maid nu kopogboya’an kiat so wowaidon nu imam. Osuang lobuw poimaid so si Yisus jiniil ku, om tinumaayun aku ya nu ukumon nu potoyan wokon lobuw poimaid. ¹¹ Obulit aku mononsara’ so nosiro so waloi sosombooyangan, monosog so nosiro popongolim nu koimaidan so si Yisus. Sobana ko ororaayan aku so nosiro, sampai suuton ku ya nosiro so bandar wokon,” koo. ¹² Sumunduro po si Paulus mutangar nu, “Iri ya pudi tomod ku mian so Damsik maid nu surat kopogboya’an kiat so wowaidon nu imam, mongaakom nu lobuw poimaid so si Yisus dii. ¹³ Oo Raja Agripa, laid ku manou-panou mian so Damsik nu tonga’ runat, milok po su nokosiou aku nu binaang tumogu’ kiat so langit nu otarang po ko’ runat so pililiwut ku om lobuw songgoyudan so aku ri, ¹⁴ sampai noluluk kai. Nokorongou aku sono nu bongut minutangar so aku so tangar Yaudi nu, ‘Oo Saulus, nokuro su mongoraai ko so Aku? Musinsaad ko ya nu ono so’ lumawan ko so Aku. Ingkoyod-o lumawan s’Aku, so’ Aku yo su tuan mu,’ koo. ¹⁵ Mutongaro aku yo sono nu, ‘Isai ko ka Tuhan?’ k’aku. Sumombuto yo Tuhan nu, ‘Aku yo si Yisus, sindoraayon mu no. ¹⁶ Undii yo. Minokisiou Aku so ikau, tomod Ku mongurug so ikau nu uripon Ku, potuturan so lobuw wokon suat so Aku, iri nosiou mu nu runat tu, om suat nu onu yo po niintolang Ku so ikau ong wagu. ¹⁷ Sopulan Ku ikau kiat so lobuw Yaudi om okon ko Yaudi, su’ dai oinsaadan ko nosiro. Om poianon Ku ikau nai so nosiro. ¹⁸ Suu’on Ku ikau potuturan su’ otondu’an om poimaid nosiro so Aku om kopogkuasa sono Kinoringan so nosiro om okon ko moinat su mogkuasa. Bang poimaid nosiro s’Aku, oompunan koraayan nosiro om koido so lobuw pinili’ nu Kinoringan,’ koo si Yisus s’aku. ¹⁹ Oo Raja Agripa, ono yo ko’ sobana ko minogkari’-kari’ aku sumulut nu onu yo po nosiou ku kiat so Kinoringan. ²⁰ Om ibanta’ ku ya pokoilo so lobuw suang nu subai rumorogo nosiro momaal nu koraayan om poimaid so Kinoringan, om pointolang so kowiawan nosiro nu nokoingkoyod-o nosiro momaal nu koraayan. Dii yo so Damsik su pinonuturanan ku togna nu itu, nopupus iri so Yirusalim nai’, so pilolongkop nu Yudia, om so lobuw okon ko Yaudi. ²¹ Ono yo ko’, inakom aku nu lobuw Yaudi so natad nu Waloi Maayo nu Kinoringan, om mokipopomatoi s’aku, ²² nga sampai-a nu kosiono tu, iningoligan aku nu Kinoringan. Indadi dai su koingkoyod monuturan nu itu so kiawi’ lobuw kipangkat d’ado pangkat. Kiawi’ tinangar ku iitu notangar-a ni Musa om poo’abar nu Kinoringan gulu ri. ²³ Nopotuturan nosiro nu subai sonsora’on sampai matoi Raja Nijanji nu Kinoringan oono, om Iyo yo su togna oluli’an om dai matoi koimbagu. Om nopotuturan po nosiro nu paabar Iyo suat so gama’ nu Kinoringan monapul, kiat-o so lobuw Yaudi kumoo yo so okon ko Yaudi,” koo si Paulus. ²⁴ Laid po ni Paulus musintapan-i, gumonsoko yo si Pistus nu, “Mulou ko sobana Paulus! Kiawi’ koo’ilo mu no, koulou so ikau,” koo. ²⁵ Nga sumombuto yo si Paulus nu, “Oo Gobonor Pistus, okon-a ko mulou aku. Obana ya totongaron ku iitu om osayu ya pikiran ku tu. ²⁶ Oilaan-a ono mongiro-kiro nu raja, nu owarong ko’ oraai. Ono yo ko’, kooku’ aku ya mutangar nu obontol so tiningkuangon niyo, om oimaidan aku nu oilaan-a niyo kiawi’ oono, so’ nokointolang-a ono om okon-a ko nourug so tontong ado lobuw. ²⁷ Oo Raja Agripa, oilaan ku nu poimaid ko ya nu tangar nu poo’abar nu Kinoringan gulu ri,” koo si Paulus. ²⁸ Sumombuto yo sono si Raja Agripa nu, “Ponontaman mu bo gaam ong oruoi-ruoi aku poimaid nu tuturan mu suat so si Yisus oono,” koo. ²⁹ Sumombuto yo si Paulus nu, “Ono sono tu ka ko’ olaid-laid po, mogdu’a aku so Kinoringan, su’ ikau om kiawi’ nokorongou so aku nu runat iitu, osiliw nu soko aku, nga okon-a ko jiilon om kogosan nu rantai,” koo si Paulus. ³⁰ Koompusan, mundiio yo sono si Raja Agripa, si Gobonor Pistus, si Borniki, om kiawi’ lobuw-i. ³¹ Nokolabus-o po nosiro, mutotongaro yo nosiro nu, “Lobuw itu no d’ado ya nowaal nu onu-onu ya nu mutoop pongukuman nu potoyon intawa jiilon,” koo. ³² Mutongaro yo sono si Raja Agripa so si Pistus nu, “Bang dai iyo mokibisara’ nu Raja Maayo nu Ruum, polobuson ku yo iyo nu ono sono tu,” koo.

¹ Notapus-o po ni Pistus nu subai lumayag kai si Paulus so Ruum so wonuo Italia, si Paulus om tinu-tinu lobuw tinaan wokon-i nipaarap sono so si Yulius wowaidon nu posukan nu soujar nu Ruum, iri ingoranan nu Posukan nu Raja Maayo. ² Sumokoyo kai yo so kapal iri nokologa’ kiat so Aduramitium, om uyud-o mian so dududulan so Asia. Si Aristarkus, kiat so bandar Tisalunika so wonuo nu Makadunia, nokowaid-a so kai. ³ Susuab-i nokologa’ kai yo so Sidun. Sobana ko owarong si Yulius so si Paulus, om linila’an iyo sumambat nu kouna’an niyo dii su’ otaakan nu onu ya kosukupan. ⁴ Kiat dii, lumombuso kai yo lumayag, nga pagka nosunsulakan mai uos-i, linumayag kai ya sono yumuyuw so imbing nu puru Siprus, nu dai otouruk. ⁵ Kiat dii, sinumondipau kai so otingkuangan nu Kilikia om Pampilia, om nokodudul kai so Mira so wonuo nu Likia. ⁶ Dii yo kinooyangan nu wowaidon nu soujar-i nu kapal kiat so Aliksandria, nu uyud-o lumayag so Italia. Nadi popindaa kai yo sono so kapal iiri. ⁷ Kotinu-tinuan kai mayag-layag nu obuut sobana, om osuang kosonsora’an mai, nga nokologa’ kai ya so bandar Konidus. Pagka opogon sobana su uos, dai kai nokolombus lumayag tumolunda’ so sunduran mai. Indadi linumayag kai sono umpak so puru Kiriti, tumalib so tomui ingoranan nu Salmuni, su’ dai kai otouruk. ⁸ Sobana ko orogonan kai lumayag yumuyuw so puru oono, nga nokolulut kai ya lumoga’ so tontong ingoranan nu Dududulan Oparu’, orani yo so bandar Lasia. ⁹ Olaid kai mudul-dudul dii sampai notaiwan kai nu iya okon ko owarong loloyagan, ono yo nokotalib-o Rami-Rami Pongompunan nu Koraayan. Pagka soko iri, mutongaro yo si Paulus nu, ¹⁰ “Oo su kosusulodan, so pomikiran ku, sobana ko aagut ong lumombus toko yo lumayag, so’ okon ko gonggamon toko ya intawa kapal toko tu su obinasa, nga insan toko matoi,” koo. ¹¹ - ¹² Dinudulan mai ri dai owarong ong kodarun. Iri yo ko’ kosuangan nu lobuw so kapal-i mokilolaiw kiat dii om mokilologa’ so Pinikis, mogol dii musingkotalib nu kodarun-i. Pinikis oono yo dududulan so puru Kiriti, umpak so lidopan. Nga dai nopoimaid wowaidon nu soujar oono nu tinangar ni Paulus, toroido ya niyo poimaid so moomongkuyut nu kapal-i om songapan nu kapal oono. ¹³ Muos-o sono kiat so solatan nu dai ya opogon bana. Iri yo ko’, ponontaman nu kukumoraja so kapal-i nu kolayag-a nosiro koimbagu. Nadi pudiko yo nosiro su jangkar om lumombuso kai yo lumayag yumuyuw so puru Kiriti. ¹⁴ Nga dai po olaid om muos-o sono nu opogon kiat so tidong, ingoranan nu Uos nu Raat Pusitan, ¹⁵ nokotouruk nu kapal mai. Pagka dai kai kosundur, pinosimaidan mai ya kapal mai ri otouruk. ¹⁶ Laid mai tumalib umpak so diipau nu puru Kouda oworos-i, dai kai otouruk bana, om dii yo pinogkori’-kori’an mai posakoi nu alud woros-i. ¹⁷ Nokosakoi mai yo po alud-i, pioto mai yo pokogos. Pagka lumaa’ kai kodampar so bolintang Sirtis so wonuo Libia, luluno mai yo layag-i om pinosimaidan mai ya otouruk. ¹⁸ Nga pagka kakal-a opogon su uos, sampai nologa’ yo susuab, tobungi mai yo sono gonggamon so kapal mai ri. ¹⁹ So kotolu ri, tobungi yo nu kukumoraja so kapal oono kolongkapan nu kapal-i. ²⁰ Kotinu-tinuan dai kai nokosiou nu runat om korombituon, om kakal-a opogon su uos, sampai d’ado yo tontam mai nu miau kai po. ²¹ Olaid-o nosiro dai nokookan, mundiio yo sono si Paulus om mutongaro yo nu, “Oo kosusulodan, bang minongimaid kou nu tangar ku nu adang toko po lumombus kiat so Kiriti, dai toko ya kobambor nu koogutan om korugian iitu. ²² Nga kosiono tu, mindamo aku so kou nu pototogo muyu yo inawo muyu no, so’ d’ado ya opatoi so kou, sondiang ko kapal toko tu su ousiba’. ²³ Minutangar aku soko ono so’ siawi linumoga’ susuu’on nu Kinoringan so aku, iri Kinoringan usaa’on ku om minonongapan so aku ri. ²⁴ Minutangar susuu’on iiri so aku nu, ‘Oo Paulus, ikod-a kilaa’, so’ tantu tumingkuang ko dii si Raja Maayo Ruum, om maid nu koowarong nu inawo nu Kinoringan so ikau, osopulan-a kiawi’ kouna’an mu no,’ koo. ²⁵ Indadi, pototapon-o inawo muyu no, so’ koimaid aku so Kinoringan nu otuman-a onu yo po tinangar so aku oono, ²⁶ nga kodampar toko ya ong wagu so ido puru,” koo si Paulus. ²⁷ Kiro-kiro tonga’ nu awi nu koopulu om opat runat-i, mantung-lantung kai yo so Raat Lintonga’. Kukumoraja so kapal oono koirasa nu mompit-rompit kapal mai so imbing. ²⁸ Nopouluw sono nosiro nu watu kinogosan nu tali, monukud ong komuro po kolalom, om noilaan sono nosiro nu koolalom-i duo po nopulu rinopaan. Dai po olaid sinukud-o nosiro koimbagu, om kolalom-i opulu po om limo rinopaan sono. ²⁹ Pagka lumaa’ nosiro nu kososod kapal-i so watu, nopotobung sono nosiro nu opat jangkar umpak so muri nu kapal-i, om murosiou bana nosiro nu susuab-o sono. ³⁰ Mokisosolinok sono mulaiw kukumoraja so kapal oono om nopotobung-o nu alud woros, soko potobung kolaai nu jangkar umpak so dulung nu kapal-i. ³¹ Nga tongaro yo ni Paulus wowaidon nu soujar om soujar wokon-i nu, “Bang dai tumotog kukumoraja so kapal tu, olosod kou kiawi’,” koo. ³² Indadi totoko yo sono nu soujar-i kogos nu alud woros-i pooba’. ³³ Duruk sumuab-i, ingoli yo ni Paulus nosiro mongokan om mutongaro yo nu, “Duo yo nominggu laid muyu mongimat, om d’ado onu-onu inokan. ³⁴ Mindamo aku so kou nu pongokan kou po insan sabat-a, su’ osigag kou koimbagu, om osopulan kou, om d’ado ido so kou opolisasa,” koo si Paulus. ³⁵ Mongolapo yo sono iyo nu baang-baang, om mongunsopoto yo so Tuhan so tiningkuangon nosiro ri. Noopod iri, boogio yo sono niyo baang-baang-i, om mongokano yo. ³⁶ Nosiou-o po nosiro nu soko iri winaal ni Paulus, aarap-o sono nosiro, om mongokano yo. ³⁷ Koosampuw nu lobuw so kapal iiri duo naatus turu nopulu om onom. ³⁸ Noopod-o po nosiro mongokan, odai yo nosiro gandum so kapal-i su’ oinggaanan. ³⁹ Susuab-i po, nokosiou-o sono kukumoraja so kapal-i nu tona’on, nga dai otondu’an nosiro. Nokosiou-o nosiro nu linsuk noosakan su pantai, mokidududul sono nosiro dii. ⁴⁰ Totoko yo nosiro tali pinongkogos nu jangkar-i, om pinosimaidan-a ololok. Uyado yo nosiro pinonawur nu bonsaan-i, om kokaro yo nosiro layag umpak so dulung, su’ otouruk so imbing-i. ⁴¹ Nga nokososod dulung nu kapal-i om dai muad gumuyu’. Muri nu kapal-i nga nouyas nu gumbang ologod. ⁴² Mokipopomatoi sono soujar-i nu lobuw notaan-i so’ lumaa’ nosiro ong wokon-i tumoyog mulaiw. ⁴³ Nga pinogos-a nosiro nu wowaidon nu soujar-i so’ mokipoponapul-a iyo so si Paulus. Suuo yo niyo lobuw wokon-i popogulu tumoyog rumapit, ⁴⁴ om wokon-i sumusuut-a tumoyog kumuyut so papan nodinsar so kapal-i. Soko iri yo korapit-rapit mai.

¹ Nokotindal kai yo po, noilaan mai nai’ nu puru oono ingoranan Malta. ² Lobuw so puru oono sobana ko otoua so kai. Owarong nosiro so kai, om pinurokitan kai nu apui, so’ minuran om osogit. ³ Minokikayu sono si Paulus om laid niyo momurakit-i, lumobuso yo sono su topirik noomutan om tinduko yo longon ni Paulus. ⁴ Nosiou-o po nu ongo lobuw-i nu miis-giis topirik-i so longon ni Paulus, mutotongaro yo nosiro nu, “Moomatoi gaam lobuw iitu su pudi pona nokolaiw-o iyo kiat so kosonsora’an so raat, nga dai ya iyo pinosimaidan miau nu pinokokinoringan Moonunsuli’,” koo. ⁵ Nga puoso yo ni Paulus topirik iiri posubo so apui-i, om insan sabat ado oirosaan niyo nu opodos. ⁶ Ponokodan nosiro nu maa’ sono longon ni Paulus om lumuluk-a matoi, nga pagka olaid-o nosiro momurimon, om ado ya onu-onu oirosaan ni Paulus, mininda yo sono pomikiran nosiro om minutangar nu, iyo yo su pinokokinoringan. ⁷ Dai orawu’ kiat dii, kuwai tana’ songapan ni Publius, gobonor so puru oono. Sobana ko owarong iyo so kai om minogol kai sono dii so iyo kotoluan laid. ⁸ Iya oono, tumogom om tumai nu raa’ amo ni Publius. Kokapo yo sono iyo ni Paulus, om minogdu’a maid nu nopotopop nu kiduo palad niyo so koyuwan nu amo ni Publius, om nopoli’an-o sono. ⁹ Pagka soko iri, lumogaa yo sono kiawi’ lobuw sumakit so puru ri dii si Paulus, om nopoli’an-a nosiro. ¹⁰ Osuang sono nitungkap nosiro so kai, om uyud mai mungkayas-i nga osuang-a nitaak nosiro nu kosukupan mai so poponowan. ¹¹ Nokotalib tolu nowulan laid mai dii, lumombuso kai yo lumayag maid nu kapal kiat so Aliksandria, nu mudul-dudul dii mongindad nu muas. Kapal iiri ingoranan nu “Pinokokinoringan Minuapid”. ¹² Nokologa’ kai yo sono so bandar Sirakusa om mombayo kai yo dii kotoluan laid. ¹³ Kiat dii linumayag kai yo om nokologa’ so bandar Rigium. Susuab-i, tumimpuun-o sono muos kiat so solatan. Koduaan om nokologa’ kai so bandar Putiuli. ¹⁴ Dii yo kinosombatan mai nu lobuw poimaid so si Yisus. Mindomoo yo sono nosiro nu poogolon kai dii koturuan. Nopupus iri, lumombuso kai yo so Ruum. ¹⁵ Norongou-o po nu kosusulodan poimaid so si Yisus so Ruum nu lumoga’ kai, miano yo nosiro so Pasar Apius om Tolu Oombayan monamung so kai. Nosambat-o po ni Paulus nosiro, noinsosomodan sono iyo om mongunsopoto yo so Kinoringan. ¹⁶ Nokologa’ kai so Ruum, linila’an-a si Paulus sumondiang nu polakan maid nu soujar moongipat so iyo ri. ¹⁷ Nokotalib kotoluan, impugo yo ni Paulus wowaidon nu lobuw Yaudi so tontong iiri. Noimpug-o po nosiro, mutongaro yo iyo nu, “Oo su kosusulodan, d’ado ya onu-onu sala’ ku so bansa toko, intawa nokopongolampos nu adat nopusaka toko kiat so odu aki toko ri. Soko ono pona, inakom aku ya so Yirusalim, om nikomouli’ so lobuw Ruum. ¹⁸ Nobisara’ aku yo po, pinokilolobusan aku yo nosiro, so’ otolang nu d’ado ya nowaal ku nu kosola’an mutoop pongukuman so aku nu potoyon. ¹⁹ Nga pagka lumawan ongo lobuw Yaudi ri so aku, sinumosog aku sono mokibisara’ so Raja Maayo Ruum. Pudi pona soko ono, okon-a ko mokimudaawa aku nu bansa ku kondiri. ²⁰ Ono yo ko’ mokimusambat aku om mokimutangar-tangar so kou pokoilo nu kinogosan aku nu rantai iitu so’ poimaid aku so Iyo, iri orap-orapon toko lobuw Israil,” koo si Paulus. ²¹ Mutongaro yo sono nosiro so si Paulus nu, “Dai kai ya insan ologa’an nu surat kiat so Yudia suat so ikau, om ado ido koyuwan linumoga’ kiat dii paabar nu oraai suat so ikau. ²² Nga oingin kai ya mongorongou suat nu koimaidan mu, so’ nokorongou kai yo nu monginsala’ lobuw siombo-ombo ya nu pontudukan winaid mu no,” koo. ²³ Indadi minonantu yo sono nosiro om si Paulus nu runat pusombatan koimbagu, om iya oono osuang lobuw linumoga’ so inogolan ni Paulus, om noowianan iyo montuduk om potuturan nu gama’ nu Kinoringan mogkuasa nu Iyo yo Raja. Minomakai si Paulus nu Ukum ni Musa om nisurat nu poo’abar nu Kinoringan silaid-i, tayon ong poimaid nosiro so si Yisus. ²⁴ Kuwai ya poimaid, nga kuwai ya dai poimaid nu tinangar niyo ri. ²⁵ Musosagka’ sono om mokilolaiw nosiro nu notangar ni Paulus so nosiro nu, “Osuat sobana onu yo po tinangar nu Atod nu Kinoringan nilombus ni Yisaya so odu aki muyu ri nu, ²⁶ ‘Panou-o om tuturani so bansa iitu nu mongorongou kou dadan, nga dai kou koorati. Monsiou kou dadan, nga dai muyu oilaan ong onu ourug. ²⁷ Ono yo ko’ soko ono, so’ okosog inawo nu bansa oono. Nobongol nosiro om nobolou. Bang okon ko soko ono nosiro, kosiou om koorati ya nosiro s’Aku. Om bang mululi’ nosiro tuui so Aku, sopulan Ku nosiro kiat so koraayan nosiro,’ koo ri,” koo si Paulus. ²⁸ Mutongaro po si Paulus nu, “Ono yo ko’, moingin aku ong oilaan muyu nu, gama’ nu Kinoringan monapul nu lobuw, nokotuturan-o nu ono sono tu so bansa okon ko Yaudi, om poimaid-a nosiro!” koo. [ ²⁹ Notangar-o po iri ni Paulus, mulaiwo yo lobuw Yaudi ri maid nu musosagka’-sagka’.] ³⁰ Duo notoun laid ni Paulus molak-polak so Ruum so waloi siniwaan niyo ri. Osanang sobana iyo pologa’ nu kiawi’ lobuw mongondaa so iyo ri. ³¹ Sobana ko kooku’ iyo paabar nu gama’ nu Kinoringan mogkuasa nu Iyo yo Raja, om montuduk so nosiro suat so si Tuhan Yisus Kristus, om d’ado ya muad momogos so iyo.