2 Timutius

¹ - ² Oo Timutius, ikau-o pinokaanak ku om kosomodan ku bana. Itu yo surat kiat so aku, si Paulus, pinongoorapan ni Yisus Kristus, musuat nu koinginan nu Kinoringan potuturan nu kikowiawan lobuw musingkolaid, iri nijanji nu Kinoringan ong mido nosiro so si Yisus Kristus. Mindamo aku so Kinoringan, Amo, om so si Yisus Kristus, Tuhan toko su’ d’ado pupus mongoborakat, mongoluluud om posanang nu inawo mu no. ³ Mongunsopot aku so Kinoringan, iri usaa’on ku maid nu inawo ku dai totopudon, soko gama’ nu odu aki ku silaid-i. Dadan ku ya ikau oondoman koduung mogdu’a aku yo mongunsopot so Kinoringan awi runat. ⁴ Om koduung oondoman ku tinongi’an mu nu pinutondiangan to ri, sobana ko oimpong aku so ikau, om mokisosambat aku yo so ikau, su’ osanang inawo ku tu. ⁵ Oondoman ku ya nu opiot sobana koimaidan mu so si Kristus, soko koimaidan ni ino mu si Uniki om ni odu mu si Luis, om aarap aku nu otatap-a koimaidan mu oono nu kosiono tu. ⁶ Ono yo ko’, poondomon ku ikau nu sumundur ko mugogoma’on momakai nu ponaak nu Kinoringan so ikau-i maid nu kuasa nu Atod Niyo, iya nu pinonopopan ku nu ulu mu no, ponondu’an nu pinili’ ko mugogoma’on suat so Tuhan. ⁷ Ono yo po Atod nu Kinoringan nitaak Niyo so toko no, okon ko potalou, ala’ nai’ monaak nu kuasa om montuduk so toko nu poponamod nu wokon, om pokodos so toko. ⁸ Ono yo ko’, adang-o moiyu’an potuturan nu Abar Owarong suat nu Tuhan toko, om adang-o moiyu’an nu nojiil aku so’ nopotuturan nu Abar Owarong suat so si Kristus. Ono ya nga, waid-o sumonsara’ potuturan nu Abar Owarong oono maid nu kuasa nu Kinoringan, iri maid-waid so ikau. ⁹ Sinopulan om pinaau toko nu Kinoringan ourug nu songapan Niyo, nga okon-a ko ono su kinoponopulan Niyo so toko so’ owarong gogoma’on toko, sondiang ko ono yo su notantu Niyo, om osamod Iyo so toko. Dai po nowaal wonuo tu ri, osamod-o Kinoringan so toko om koosamod Niyo oono niintolang Niyo dii si Yisus Kristus. ¹⁰ Om kosiono nokointolang-o nu osamod Iyo so’ nokologa’ yo si Yisus Kristus, Poowiau so toko. Nodoog-o ni Yisus kiawi’ kololaa’an suat so kopotoyan, om kiat so Abar Owarong, nopointolang Iyo nu kikowiawan wagu nu ono sono tu om musingkolaid. ¹¹ Ono yo ko’ pinili’ aku nu Kinoringan sumiliw nu pinongoorapan om moomontuduk paabar nu Abar Owarong, ¹² om ono yo su nokosonsara’ om kinopongojiilan so aku. Nga, dai ya su moiyu’an, so’ otondu’an ku ya nu, isai koimaidan ku, ono yo si Yisus Kristus, om otatap-a inawo ku no nu Iyo yo su mongipat nu Abar Owarong nipongaarap Niyo so aku musingkologa’ nu runat kopululi’an Niyo so wonuo tu mongobisara’. ¹³ Waido yo sobana pontudukan owarong, iri nituduk ku so ikau-i, sumundur ko yo poimaid om monamod nu lobuw wokon so’ kopuido ko yo so si Yisus Kristus, ¹⁴ om ipati yo bana Abar Owarong niarap so ikau, maid nu ponobangan nu Atod nu Kinoringan, iri mogkuasa so toko. ¹⁵ Oilaan mu nu linaiwan aku nu kiawi’ lobuw poimaid so pilolongkop nu Asia. Insan si Pigilus om si Irmuginis, nga, minulaiw-a. ¹⁶ Nga muda-mudaan ong luluudan-a nu Kinoringan sompungu no Unisipurus, so’ iyo po su muuli’-uli’ mongondaa om monginsosamod so aku, om dai moiyu’an iyo sumambat so aku pudi tuui aku so jiil. ¹⁷ Koduung nokologa’ iyo tuui so Ruum, mogtuui dinium aku niyo, om nooyangan aku tuui so jiil. ¹⁸ Om noilaan mu ya nu sobana ko monabang iyo so aku nu laid ku po so Ipisus nu gulu ri. Muda-mudaan ong oluluudan-a Kinoringan so iyo nu runat kopululi’an koimbagu ni Yisus mongobisara’.

¹ Oo anak ku Timutius, kooku’ ko yo posundur nu gogoma’on mu nu wowaidon, so’ iri yo borakat nu Kinoringan kiat dii si Yisus Kristus su pooku’ so ikau. ² Om onu yo po norongou mu kiat so aku nu laid ku montuduk so lobuw suang-i, polombuso yo potuduk so lobuw wokon opongoorapan mu, om oilo potuduk nu ono. ³ Soko soujar sumonsara’ ong mian iyo mutuda’, ikau nga soko ono ya nu subai tumaan sumonsara’ suat so si Yisus Kristus. ⁴ Insuw-o nu soujar, dai yo mukokowii po so tinoudion, ono yo dai yo mongoondom nu kowiawan niyo kondiri, su’ koinginan iyo nu wowaidon niyo. ⁵ Insuw-o nu lobuw muimbas mundak nu subai mongowaid nu oturan notantu yo su’ kaalap iyo nu odia. ⁶ Om insuw-o nu moomutanom, monginoontob mutanom om iyo yo su otoop kookan mogulu nu ginoma’an niyo. ⁷ Ondomo yo sobana totongaron ku iitu, so’ Kinoringan-o su monaak so ikau nu pongoorotian nu onu yo po. ⁸ Ondomo yo si Yisus Kristus, iri noluli’an kiat so pinotoyan-i, so’ Iyo yo su solusuk ni Raja Daud, om Iyo yo su kinuan so Abar Owarong, iri nituduk ku so ikau-i. ⁹ Om ono yo pinonuturanan ku nu Abar Owarong oono su kinosonsora’an ku, sampai nokogosan nu rantai soko bana lobuw raai aku. Nga soko ono pona, d’ado ido ya koponginkoyod potuturan nu tinongaran nu Kinoringan. ¹⁰ Ono yo ko’ taanan ku ya kosonsora’an monabang nu ongo lobuw pinili’ nu Kinoringan, tayon ku ong nosiro nga kikowiawan-a musingkolaid so’ poimaid nosiro so si Yisus Kristus, om koido so Kinoringan so tontong owarong sobana musingkolaid. ¹¹ Oo Timutius, tumaan-o sumonsara’ so’ itu yo su tangar obana nu, “Bang kowaid toko so Iyo matoi, kowaid toko ya so Iyo miau. ¹² Bang tumaan toko ya sumonsara’, kowaid toko ya so Iyo mogkuasa, om bang mongolim toko so Iyo, Iyo nga mongolim-a so toko. ¹³ Pudi pona dai ototog toko so Iyo, dadan-a ototog Iyo so toko, so’ onu yo po tongaron Niyo, tumanon-a Niyo,” koo ri. ¹⁴ Poondomi yo tinangar ku iitu so lobuw montuduk nu lobuw wokon-i, om sowoyo yo nosiro so tiningkuangon nu Kinoringan su’ dai nosiro musisiwal suat nu pongingoranan, so’ d’ado ya kosudaan ong musisiwal, ala’ nai’ mongoraag-a nu koimaidan nu lobuw korongou nu ono. ¹⁵ Pogkari’-kari’ yo sumiliw nu lobuw koinginan nu Kinoringan, soko lobuw dai oiyu’an mugogoma’on nu nipogama’ so iyo no, om subai osuat poomontuduk mu nu pontudukan obana kiat so Kinoringan. ¹⁶ Adang-o maid-waid nu totongaron d’ado kosudaan, so’ koompusan nu lobuw mutangar soko ono, mulaiw sono kiat so Kinoringan. ¹⁷ Pontudukan nosiro dai obana oono, soko kupos munana’ dai opali’-pali’. Muinong nu pontudukan ni Iminius om ni Pilitus. ¹⁸ Minulaiw-o nosiro kiat so pontudukan obana, so’ minutangar nosiro nu, “Nokotalib-o poongoluli’an nu Kinoringan nu lobuw minatoi,” koo. ¹⁹ Ono yo po pontudukan nu Kinoringan-o dai opinda, soko popolakan nu waloi dai ounggog, so’ nokosurat-o so Buuk nu Kinoringan nu, “Otondu’an-a nu Tuhan lobuw songapan Niyo no,” koo, om “Isai yo po mutangar nu songapan iyo nu Tuhan, subai mingkoyod momaal nu kosola’an,” koo ri. ²⁰ Iri yo po gonggamon so waloi nu lobuw doyaan okon-a ko kiawi’ omas om pirok winaal, nga kuwai ya nu kayu om dokuton winaal. Gonggamon omas om pirok oono pokayon ong murami-rami, nga bang gonggamon kayu om tana’ dokuton winaal oono, opakai-a dadan. ²¹ Soko ono ya pudi lobuw dai maid so pontudukan dai obana om maid sono nu pontudukan obana nu Kinoringan, boorogo sobana iyo so Kinoringan om opakai sono nosiro momaal nu onu-onu ya owarong. ²² Ono yo ko’, pulaiw-o kiat so kogoyaan oraai, iri koinginan nu koomulokan. Simpor-o so lobuw mokiponobangon so Tuhan maid nu inawo owarong, nu tumotos mongowaid nu koinginan nu Kinoringan, ototog so Iyo, osamod nu lobuw inong koimaidan om mususulut so nosiro. ²³ Adang-o gumawul nu pusosombutan nu lobuw olowong d’ado oilo-ilaan, so’ oilaan mu yo nu ono yo su puun nu puolodan. ²⁴ Lobuw-o po mugogoma’on suat so Tuhan dai otoop mokimualod, ala’ nai’ otoua so kiawi’, moilo montuduk om okodos mungot. ²⁵ Subai osolimod iyo montuduk nu lobuw lulumawan, kalu potolunda’on-a nu Kinoringan om rumorogo sono, om kotondu’ nu pontudukan obana. ²⁶ Bang soko ono, oindanan sono nosiro koimbagu, om kolaiw nosiro kiat so kuasa nu Wowaidon nu Moinat, iri minongaakom so nosiro su’ maid nu koinginan niyo.

¹ Oo Timutius, ondomo yo nu koduung ong oduruk-o pongoowi’an nu wonuo tu, osuang sono musit nu kosonsora’an. ² Iya oono, kuwai lobuw nu kondiri ya su poduli’on, oulou nu siin, om musingkaaku-aku. Musingkaayo-ayo nosiro, mongusiba’ nu sondad nosiro, om dai mongkinongou nu pontudukan nu ino amo. Dai mongunsopot nosiro, om sobana ko dai momoduli’ nu ugama. ³ Dai nosiro osamod so sondad una’, om dai muad oluluudan. Olinsugat nosiro om dai okodos mungot, orampus, om dai moingin nosiro nu onu-onu ya owarong. ⁴ Mongimpolanu nosiro mongindoraai, om dai momikir po gulu suat nu koompusan nu gogoma’on nosiro oraai oono. Musingkoilo-ilo nosiro, om pikiran nosiro suat-a so kosonangan so wonuo tu, okon ko suat nu samod so Kinoringan. ⁵ Owasa nosiro sumombaayang kosiowan, nga dai poimaid bana nosiro nu kikuasa Kinoringan. Nga ikau-o po, rawu’ yo kiat so lobuw oono. ⁶ Kosiono tu kuwai tinu-tinu koyuwan kouna’an nosiro manid so kowoloyan montuduk om mongobobayat nu kowoinoyan d’ado pongoilaan, iri osuang koraayan om kinuasa nu boroginis nu koinginan oraai. ⁷ Kowoinoyan oono dadan mokitudukon, nga dai insan kotondu’ ong ombo su pontudukan obana kiat so Kinoringan. ⁸ Om iri yo po kokusoyan mongoboyayat nu kowoinoyan oono, soko si Yanis om si Yambris, iri linumawan so si Musa nu gulu ri. Lumawan nosiro nu pontudukan obana om oraai sobana pomikiran nosiro, om koimaidan nosiro so si Kristus nga sontagal-a. ⁹ Nga d’ado ya koompusan nu gogoma’on nosiro oono, so’ kinomuro pona, oilaan-a nu kiawi’ lobuw nu olowong nosiro, soko si Yanis om si Yambris. ¹⁰ Nga ikau Timutius, nokoilo yo nu pontudukan ku. Nokosiou ko yo nu kogoyaan ku om tomod nu kowiawan ku. Oilaan mu yo nu sobana ko poimaid aku so si Yisus Kristus om tinumaan mongirasa nu kosonsora’an, poonamod ku nu lobuw songinong koimaidan, om kootangka’ ku. ¹¹ Ikau-o kondiri nokosiou nu kosusaan om kosonsora’an ku. Noilaan mu yo poongindoraai so aku dii so bandar Antiukia, so Ikunium om so Listra, nga sinopulan aku ya nu Tuhan kiat so kiawi’ oono. ¹² Nga koo ya koo nai’ ong lobuw poimaid so si Yisus Kristus om moingin mongowaid nu koinginan nu Kinoringan, kolalag nu pongindoraayan. ¹³ Nga lobuw oraai om moongaakal, sumundur po bana kooraai nosiro. Mongoborunsut nosiro nu lobuw om nosiro kondiri oburunsutan-a. ¹⁴ Nga ikau-o po Timutius, sundur-o mongowaid nu pontudukan obana, iri nituduk so ikau om imaidon mu ri, om dadan mongoondom nu lobuw minontuduk so ikau-i. ¹⁵ Ondomo yo nu iri lolaing ko ri po, nokoilo ko yo nu totongaron so Buuk nu Kinoringan, iri montuduk so ikau nu pongoilaan su’ kaalap ko nu kowiawan musingkolaid so’ poimaid ko so si Yisus Kristus. ¹⁶ Kiawi’ tinongaran nokosurat so Buuk nu Kinoringan, iri nituduk nu Kinoringan so inawo nu lobuw, kiguna pokayon montuduk nu onu yo po obana, pointolang nu kosola’an nu lobuw, poimpolanu nu lobuw kiat so kosola’an, om montuduk nu lobuw su’ mongowaid nu koinginan nu Kinoringan. ¹⁷ Kiat so totongaran nu Kinoringan oono, toko lobuw mugogoma’on suat so Iyo kopomaal sono nu onu yo po owarong.

¹ Lumoga’ po koimbagu si Yisus Kristus so wonuo tu, mongobisara’ nu lobuw miau po om minatoi-o om mogkuasa soko raja. Ono yo ko’, suu’on ku ikau so tiningkuangon nu Kinoringan om ni Yisus Kristus nu, ² tuturani yo tinongaran nu Kinoringan om totos-o porongou nu ono, dai kiro moingin intawa dai moingin lobuw mongkinongou. Om poorotio yo sobana sampai poimaid lobuw tuturanan mu no, om sowoyo yo lobuw nokosala’, om potaano yo inawo mu montuduk nu lobuw su’ waalon nosiro onu su obana. ³ Olulut ko yo montuduk so nosiro, so’ ong wagu dai yo sono moingin lobuw mongorongou nu pontudukan obana, ala’ nai’ mongowaid nu koinginan nosiro kondiri om mongimpug nu moomontuduk nu pontudukan owarong korongou-rongowan. ⁴ Iya oono, tombolon nosiro tolingo nosiro no ong korongou-o nu pontudukan obana, nga mongorongou-a nu tutunud d’ado orati ri. ⁵ Nga ikau-o po Timutius, kodosi ya inawo mu no, om taani ya onu yo po kosusaan, om sundur-o potuturan nu Abar Owarong so lobuw dai po nokorongou, om gomaa yo kowarong-warong gogoma’on mu soko uripon nu Kinoringan. ⁶ Suat so aku, oirosaanan ku nu dai yo olaid ologa’ sukud ku, iya nu olapon aku nu Kinoringan kiat so kowiawan ku so wonuo tu. ⁷ Tinumotos aku yo mugogoma’on nu kiawi’ nipogama’ nu Kinoringan so aku, om nokologa’ aku yo so pongoowi’an, om ototog aku ya poimaid nu pontudukan obana. ⁸ Om ono sono tu nokosodia’ yo so surga odia kinomonangan ku so’ gama’ ku miau obana, iri nitaak nu Tuhan, Moongobisara’ ooluk, nu runat intolangan Niyo koimbagu. Om okon ko aku ya su otaakan nu odia oono, nga iri pona kiawi’ lobuw murosiou nu intolangan Niyo no. ⁹ Oo Timutius, sikap-o ya mian tuui. ¹⁰ Linaiwan aku yo ni Dimas so’ noboyayat iyo nu kosonangan so wonuo tu, om minian-o so Tisalunika. Si Kriskis nga minian-o so Galatia, om si Titus minian-o so Dalmatia. ¹¹ Si Lukas po una’ ku. Bang mian ko yo tuui, ingoli sono si Markus, su’ pokitobangan ku tuui. ¹² Si Tikikus nga sinuu’ ku mian so Ipisus. ¹³ Bang mian ko yo tuui, owito sono iri sabung okapal ku ri, noogol ku so Toruas so waloi ni Karpus, om owito ya ongo buuk-i, om iri koratas winaal kiat so kulit nu kambing-i. ¹⁴ Si Aliksandir, iri moomaal nu tombaga ri sobana ko osuang koraayan winaal niyo so aku, nga ombo ya Tuhan monunsuli’ nu onu-onu ya pinuwaal niyo oono. ¹⁵ Koingat-ingato yo nu lobuw oono, so’ sobana ko lumawan iyo nu pontudukan toko no. ¹⁶ Iya nu minusintapan aku so pubisora’an-i, ado ido koyuwan tinumabang so aku, ala’ nai’ minulaiw kiawi’. Muda-mudaan ong dai ya posola’on nosiro nu Kinoringan. ¹⁷ Soko iri pona, waid-waidon aku ya nu Tuhan monaak nu kobosagan, om nokoponuturan aku sono nu Abar Owarong so lobuw okon ko Yaudi. Iyo ya su nopolabus s’aku kiat so poomatoi. ¹⁸ Om koimaid aku nu sopulan aku ya nu Tuhan kiat so onu-onu ya koraayan, om owiton aku Niyo masuw so pogkuosaan Niyo so surga. Muda-mudaan ong royowon-a Iyo musingkolaid! ¹⁹ Obari yo kodau ku so si Priskila om si Akwila om sompungu no Unisipurus. ²⁰ Si Irastus minogol po dii so Kurintus, nga si Trupimus niogol ku po so Militus so’ dai kaatu’ iyo. ²¹ Owarong ong mian ko tuui osikap nu dai po ologa’ kodarun. Si Ibulus, si Pudis, si Linus, si Klaudia om kiawi’ kosusulodan koimaid tuui pokodau so ikau. ²² Muda-mudaan ong waid-waidon ko ya nu Tuhan. Muda-mudaan ong borokatan kou ya nu Tuhan.