2 Tisalunika

¹ Aku si Paulus, si Silas, om si Timutius poowit nu surat iitu so puimpugan so bandar Tisalunika nu nosongapan-o nu Kinoringan, Amo so surga om si Yisus Kristus, Tuhan toko. ² Muda-mudaan ong ado pupus nu Kinoringan, Amo toko, om si Yisus Kristus, Tuhan toko mongoborakat om posanang nu inawo muyu. ³ Oo su kosusulodan, dadan kai mongunsopot so Kinoringan suat so kou so’ rumuang-o bana koimaidan om samod muyu. ⁴ Ono yo ko’ sombiya ya mian kai mongondaa so puimpugan nu Kinoringan so tontong wokon, pokoilo kai so nosiro nu sobana ko opiot kou poimaid so Kinoringan, pudi pona dadan kikosusaan om kikosonsora’an kou. ⁵ Itu yo ponondu’an nu ooluk pongukuman nu Kinoringan so gama’ muyu tumaan poimaid so kosonsora’an, ono yo kiat so kosonsora’an oono, pointolang Kinoringan nu otoop kou yo sono maid so lobuw kuosaan Niyo, ⁶ om monunsuli’ Iyo nu lobuw mononsara’ so kou no. ⁷ Toko nu osonsara’ nu ono sono tu, sopulan Niyo kiat so kiawi’ oono, ong kologa’ koimbagu si Yisus, Tuhan toko, maid nu apui mikit-sikit om ongo susuu’on nu Kinoringan ungkiat so surga. ⁸ Iya oono insaadan Niyo lobuw dai kotondu’ so Iyo om dai poimaid nu Abar Owarong suat so si Yisus, Tuhan toko. ⁹ Insaadan Niyo nosiro nu matoi musingkolaid. Potondiangon nosiro kiat so tiningkuangon nu Tuhan om so binaang nu koobantug Niyo. ¹⁰ Ourug ono ong kologa’an-o Niyo koimbagu. Tomod-o po Niyo mululi’ so wonuo tu, tayon ong royowon om bontugon Iyo nu kiawi’ lobuw poimaid so Iyo, om kou nga kowaid-a so nosiro, so’ nopoimaid kou yo nu pontudukan mai so kou ri. ¹¹ Dadan kai mogdu’a suat so kou su’ siliwon kou nu Kinoringan nu otoop maid nu koinginan Niyo. Ono yo su pinomaawan so kou. Muda-mudaan ong taakan kou nu Kinoringan nu kuasa Niyo mugogoma’on nu owarong, om mongoopod nu kiawi’ gogoma’on muyu, so’ poimaid kou so Iyo. ¹² Soko ono po, orayou muyu sono si Tuhan Yisus Kristus, om kou nga royowon-a Niyo maid so koworongan nu Kinoringan toko om si Tuhan Yisus Kristus.

¹ Oo su kosusulodan ku, moingin aku sobana poorati so kou suat so kopululi’an koimbagu ni Tuhan toko si Yisus Kristus, om suat so pongimpugan Niyo so toko mido so Iyo musingkolaid. ² Adang-o oogou-ogou umagut nu totongaron nu lobuw momudut nu, “Nokologa’ yo si Tuhan koimbagu,” koo. Adang-o poimaid nu ono, pudi kuwai musingkokuasa-kuasa om monimbaal nu kai su minutangar nu ono, intawa surat oono kiat tuui so kai. ³ Adang-o oburunsutan nu lobuw oono. Runat kologa’an ni Tuhan Yisus koimbagu, gulu po osuang lobuw mongindoraai nu Kinoringan. Om iya oono kointolang koraayan nu ido koyuwan Lobuw Oraai, iri ukumon nu Kinoringan, isubo so noraka. ⁴ Lobuw oono lumawan nu Kinoringan om musingkaayo-ayo so kiawi’ pinokokinoringan om onu yo po su usaa’on nu lobuw. Om ruang-rumuang koraayan nu lobuw oono sampai masuw so waloi sosombooyangan om mutangar sono nu, “Aku yo su Kinoringan,” koo. ⁵ Ondomo muyu yo pinutangar ku so kou suat nu Lobuw Oraai oono, laid nu mido-ido aku po so kou ri. ⁶ Oilaan muyu nu Lobuw Oraai oono noibonan po nu ono sono tu, nga kointolang-a iyo ong ologa’ yo iya notatap-o nu Kinoringan. ⁷ Nokotimpuun-o Lobuw Oraai oono mugogoma’on, nga musut-susut po nu ono sono tu. Bang kolaiw-o moongibon oono, ⁸ kointolang-o sono bana Lobuw Oraai oono. Nga, bang kologa’ yo si Yisus, potoyon-a Niyo Lobuw Oraai oono nu binaang kikuasa. Timpuon-a Niyo momatoi Lobuw Oraai oono. ⁹ Koduung kointolang-o Lobuw Oraai oono maid nu kuasa maayo kiat so Wowaidon nu Moinat, momaal sono iyo nu koiran-iran pongaakal. ¹⁰ Lobuw Oraai oono sompini momudut om momalid nu lobuw, iri insaadan nu Kinoringan, so’ dai mongimaid nu pontudukan Niyo nu koponapul so nosiro musingkolaid. ¹¹ Ono yo ko’, pinosimaidan-a nosiro nu Kinoringan oburunsutan, om poimaid sono nu onu dai obana. ¹² Pagka soko ono, isai dai poimaid nu pontudukan obana om ototom nu koraayan, ukumon nu Kinoringan. ¹³ Oo su kosusulodan sinomodan nu Tuhan, mongunsopot kai dadan so Kinoringan suat so kou, so’ pinili’ kou yo Niyo kiat po nu gulu ri nu sopulan Niyo. Maid nu kuasa nu Atod nu Kinoringan, sinongapan kou Niyo, so’ nopoimaid kou nu pontudukan obana. ¹⁴ Kinoringan-o su minomaau so kou iya nu nopaabar kai nai so kou nu Abar Owarong, so’ oingin Iyo ong kou nga koompit-a nu kobontugan ni Tuhan Yisus Kristus. ¹⁵ Oo su kosusulodan ku, pobosagon-o koimaidan muyu, om pioti muyu yo mongkuyut pontudukan obana, iri nilatas om sinurat mai ri. ¹⁶ - ¹⁷ Osamod Kinoringan Amo so toko om pagka owarong Iyo, polulut Iyo so toko umarap nu onu yo po owarong. Muda-mudaan ong si Tuhan Yisus Kristus om Amo toko oono monginsosamod om pobasag so kou su’ dadan kou mugogoma’on om paabar nu onu yo po owarong.

¹ Oo su kosusulodan ku, pogdu’a kou yo suat so kai su’ kolongkop kai paabar nu tinongaran nu Tuhan so kiawi’ lobuw om poimaid nosiro nu ono, soko kou su nopoimaid. ² Om pogdu’a kou yo su’ sopulan kai nu Kinoringan kiat so ongo lobuw oraai, so’ okon ko kiawi’ lobuw poimaid nu kodau oono. ³ Nga ototog ong si Tuhan. Popiot Iyo nu inawo muyu om ipatan kou Niyo kiat so Wowaidon nu Moinat. ⁴ Oilaan mai nu, onu yo po nituduk mai so kou ri imaidon muyu ya, so’ toko kiawi’ songapan nu Tuhan. ⁵ Muda-mudaan potolunda’on-a nu Tuhan inawo muyu poorati nu samod nu Kinoringan om koolulut nitaak ni Kristus. ⁶ Oo su kosusulodan ku, maid nu kopogboya’an nitaak nu Tuhan, suu’on mai kou nu, ikod kou yo pokimuuna’-una’ nu isai ya odoput om dai maid nu pontudukan mai no. ⁷ Oilaan muyu yo nu opatut waalon muyu soko winaal mai gulu ri, laid nu mido-ido kai po so kou ri, ono yo okon ko odoput kai. ⁸ Dai kai minokitaak nu onu yo po so lobuw, ong dai mai ya orogaan, ono ya nga awi runat kai mogkari’-kari’ modium nu ingkookan, su’ dai kai kopongaagut so kou. ⁹ Otoop-a nu mokitaak kai so kou, nga dai kai moingin, tayon ong minsuw kou so kai. ¹⁰ Laid nu mido-ido kai so kou ri, pinokoilo mai kou nu, “Isai ya dai mugogoma’on, adang mongokan,” koo kai. ¹¹ Minutangar kai soko ono, so’ norongou mai nu kuwai lobuw kikoimaidan nai so kou odoput, om ono yo su gogoma’on nosiro manid gumosayun om dai mugogoma’on kondiri. ¹² Maid nu kopogboya’an nitaak ni Tuhan Yisus Kristus, suu’on mai lobuw oono nu poworongon-o kogoyaan om modium nu ingkookan kondiri. ¹³ Nga adang kou yo otopodan momaal nu onu yo po owarong. ¹⁴ Bang kuwai dai maid nu pontudukan mai so surat iitu no, koingat-ingato muyu yo nu lobuw oono, om ikod kou yo pokimuuna’-una’ so iyo su’ oiyu’an sono iyo. ¹⁵ Nga adang-o olodon nosiro, ono ya nga biati muyu yo nu soko sulod muyu. ¹⁶ Tuhan-o su impuunon nu kopusulutan toko. Muda-mudaan ong dadan monaak Iyo so kou nu kopusulutan so onu-onu ya. Muda-mudaan ong maid-waid Tuhan so kou kiawi’. ¹⁷ Aku yo su minonurat nu itu no, ono yo orumat kiat so aku, si Paulus. Soko itu yo gama’ ku so pongoopodan nu kiawi’ surat ku ri, ponondu’an nu kiat so aku. ¹⁸ Muda-mudaan ong borokatan kou kiawi’ ni Tuhan Yisus Kristus.