2 Pitrus

¹ Surat iitu kiat so aku, si Simun Pitrus, uripon om pinongoorapan ni Yisus Kristus. Poowit aku nu surat iitu no so kou, inong poimaid so si Yisus Kristus, so’ maid nu kobonaan nu Kinoringan om si Yisus Kristus, Poowiau so toko, nitaak-o so kou koimaidan iri sobana ko boorogo, ono yo koimaidan nitaak so kai ri. ² Pagka kotondu’ kou sobana nu Kinoringan om si Yisus Kristus, Tuhan toko, mindamo aku so Kinoringan, su’ d’ado pupus Niyo mongoborakat om posanang nu inawo muyu. ³ Maid nu kuasa nu Kinoringan nitaak so si Yisus Kristus, om koo’ilo toko so Iyo, tinaakan toko ni Yisus Kristus nu onu yo po kikosudaan su’ miau toko mongowaid nu koinginan nu Kinoringan. Pinaau toko Niyo mongirasa nu koworongan om kobontugan Niyo. ⁴ Ono yo su gama’ nu Kinoringan monaak so toko nu borakat sobana ko owarong, iri nijanji yo Niyo laid-i. Waalon Niyo soko ono tayon Niyo ong koidu’ kou kiat so kiawi’ koinginan sobana ko oraai om kopongoraag so wonuo tu, om koinsuw kou sono nu kogoyaan nu Kinoringan. ⁵ Ono yo ko’, pogkari’-kari’ kou yo sumundur poimaid so si Kristus, maid nu kogoyaan owarong, om pogkari’-kari’ kou yo mongoruang nu pongoilaan muyu suat so koinginan nu Kinoringan. ⁶ Sondiang ko ono, subai okodos kou nu onu ya koinginan muyu, om subai otaan inawo muyu moningkuang nu onu-onu ya kosusaan, om miau mongowaid nu koinginan nu Kinoringan. ⁷ Sondiang ko miau mongowaid nu koinginan nu Kinoringan, pusosamod kou yo soko sompususulod so koimaidan, om somodi muyu yo kiawi’ lobuw. ⁸ Bang soko ono kogoyaan muyu om oruangan po ono, sobana ko kikosudaan pongoilaan muyu suat so Tuhan Yisus Kristus, om kikoompusan gogoma’on muyu. ⁹ Nga iri yo po lobuw d’ado kogoyaan soko ono, soko lobuw dai kowawai intawa bolou, so’ nolupaanan niyo nu noidu’ yo nu Kinoringan koraayan niyo ri. ¹⁰ Oo su kosulodan ku, mindamo aku nu pogkari’-kari’ kou yo pointolang so lobuw nu pinaau, om pinili’ kou nu Kinoringan nu songopanon Niyo. Bang waalon muyu ono, dai kou yo sono mintoron poimaid so si Kristus. ¹¹ Kiat nu ono, lila’an kou yo sono nu Kinoringan masuw musingkolaid so Pogkuosaan ni Tuhan Yisus Kristus iri Poowiau so toko. ¹² Ono yo ko’, dadan aku poondom so kou nu ono, pudi pona noilaan muyu yo ono om otoop gama’ muyu sumundur poimaid nu pontudukan obana, iri nituduk so kou ri. ¹³ Laid nu miau aku tu po, pikiran ku nu otoop ong dadan aku poondom so kou nu ono. ¹⁴ Pagka pinokoilo aku yo nu Tuhan toko si Yisus Kristus, oilaan ku sono nu oduruk aku yo matoi. ¹⁵ Ono yo ko’ mogkari’-kari’ aku monurat nu itu poorati so kou nu ono sono tu, su’ matoi aku pona nga kakal-a oondoman muyu. ¹⁶ Iri yo po nituturan mai so kou gulu ri suat so koobantug nu kologa’an koimbagu ni Tuhan toko si Yisus Kristus, obana ya, okon-a ko ombo yo nu tutunud winaal-waal nu lobuw oilo monutunud. Kai yo kondiri nokosiou nu kobontugan ni Kristus oono. ¹⁷ Dii-dii kai ya nu pinongorumatan om pinongobontugan so Iyo nu Kinoringan Amo toko. Iya iiri, norongou mai Kinoringan Sobana ko Obantug minutangar nu, “Itu yo su Anak kosomodan Ku. Sobana ko koinsanang Iyo nu inawo Ku!” koo ri. ¹⁸ Kai kondiri nokorongou nu bongut iiri kiat so surga, nu dii-dii kai so timpak nu bulud osusi ri maid so si Yisus. ¹⁹ Ono yo ko’, makin po sono poimbana kai nu kodau nu Kinoringan nilombus nu poo’abar Niyo gulu ri. Indadi kou nga subai mongoorati ya nu kodau oono, so’ ono yo po soko politaan tumogu’ so kotuongan musingkologa’ nu Runat Kopululi’an ni Kristus, om musingkousit nu korombituon, ingoranan nu korombituon mingkas, ono yo si Kristus mululi’ koimbagu poorati so inawo muyu. ²⁰ Itu yo oogot sobana ondomon muyu nu, iri yo po kodau nu Kinoringan nituturan nu poo’abar Niyo gulu ri, dai odapat poorati ong ontob-a nu koilaan kondiri. ²¹ Ono yo ko’ dai odapat poorati ong ontob-a nu koilaan kondiri, so’ d’ado ido kodau nu Kinoringan nituturan nu poo’abar gulu ri kiat so koilaan nu lobuw-a, nga Atod-o nu Kinoringan su mogkuasa nu lobuw, iya potuturan nosiro nu abar Niyo.

¹ Gulu ri tinu-tinu koyuwan lobuw Israil minusingkopoo’abar. Soko ono ya pudi kosiono tu, kuwai lobuw musingkomoomontuduk obana musit nai so kou, polongkop nu pontudukan dai obana suat so Kinoringan, om poputondiang nu lobuw kiat so Iyo. Mongolim nosiro nu kotondu’ so si Yisus Kristus, iri minatoi monapul so nosiro kiat so koraayan nosiro ri. Pagka soko ono, ukumon nosiro osikap nu Kinoringan. ² Soko ono pona, osuang-a lobuw maid nu kogoyaan oraai nu moomontuduk owudut oono. Om pagka osiowan nu lobuw dai poimaid kogoyaan oraai nu lobuw poimaid oono, oraai sono totongaron nosiro suat so pontudukan obana nu Kinoringan. ³ Om koompusan nu kogoyaan nosiro nu osuang koinginan d’ado ontob-o, mogkari’-kari’ sono nosiro modium nu kountungan botuturan so kou nu tuturan winaal-waal nosiro kondiri. Nga olaid-o nokosodia’ Kinoringan mongukum om monginsaad so nosiro om tantu binosaan Niyo nosiro. ⁴ Ongo susuu’on nokopomaal nu koraayan nu gulu ri nga inukum-a nu Kinoringan. Niada’ Niyo nosiro so noraka, kinogosan om kinurung so kotuongan musingkologa’ nu Runat Pongukuman. ⁵ Wonuo tu silaid nga inukum-a nu Kinoringan. Pinoloni’ Niyo nu maayo, momatoi nu ongo lobuw oraai kogoyaan nu iya iiri. Iri po su pinowiau nu Kinoringan si Nuu om turu koyuwan anak sawo niyo ri, so’ iyo po su mongowaid nu koinginan nu Kinoringan. ⁶ Soko iri ya pudi bandar Sodom om Gomura inukum nu Kinoringan. Rinaag Niyo bandar iiri nu apui, tayon Niyo ong oilaan nu ongo lobuw nu kosiono om so sunduron tu, ong onu koompusan nu lobuw oraai kogoyaan. ⁷ Nga si Lut pinolaiw nu Kinoringan kiat so bandar iiri, so’ si Lut po su mongowaid nu koinginan Niyo, om sobana ko aagut inawo ni Lut nu koosundal nu lobuw so bandar iiri. ⁸ Laid po ni Lut mido-ido so nosiro, awi runat kosiou om korongou iyo nu gogoma’on nu lobuw oraai, sampai osakit sobana inawo niyo ri. ⁹ Kiawi’ nituturan ku sisuna iiri, oilaan toko yo gama’ nu Kinoringan monapul nu lobuw kiat so ponginaman mongowaid nu koinginan Niyo, om gama’ Niyo pokurung nu lobuw dai mongowaid nu koinginan Niyo, om sonsora’on nu Runat Pongukuman, ¹⁰ makin po so lobuw mongowaid nu koinginan oraai om osaim, om dai mokikuasa nu Kinoringan. Sobana ko dai moiyu’an ongo moomontuduk owudut oono om osumbung, sampai d’ado loman-loman nosiro mongusiba’ nu moomolak-polak so surga, ono maid mogkuasa so Kinoringan-o. ¹¹ Ampa, insan ongo susuu’on-a nu Kinoringan, iri obasag om kikuasa po ko’ moomontuduk owudut oono, dai ya mongusiba’ so tiningkuangon nu Tuhan nu moomolak-polak maid mogkuasa so Kinoringan oono. ¹² Nga moomontuduk owudut oono soko kulos-kulos orongit. Ono yo po kulos-kulos-o, d’ado pikiran om ono-ono ya su kosudaan so nosiro okomon om potoyon nu lobuw. Soko ono ya pudi moomontuduk owudut oono, d’ado pikiran nosiro om songkotangar-a. Mugogoma’on nosiro mongowaid nu koinginan kondiri om sumongkiwal nu onu yo po dai oorotian nosiro maid nu totongaron oraai. Pagka soko ono, oraag nosiro nu kogoyaan oraai oono, soko kulos-kulos orongit. ¹³ Sonsora’on nosiro nu Tuhan so’ minononsara’ nosiro nu lobuw wokon. Awi runat musinsonangan nosiro, musintopod nu koinginan kondiri. Bang kopuido nosiro so kou so rami-rami, moilulua’ kou nu kogoyaan nosiro oono. Ososonangan nosiro so’ ookalan kou nosiro. ¹⁴ Dadan modium nosiro nu woinoi susumundal, om dai otopodan momaal nu koraayan. Lobuw dai obasag koimaidan, boyoyaton nosiro tayon ong kowaid nu kogoyaan nosiro. Noopot-o nosiro nu osuang koinginan d’ado ontob. Indadi, sumpaan nosiro nu Kinoringan. ¹⁵ Pagka dai yo nosiro mongowaid nu pontudukan nu Kinoringan obana, nopalid sono nosiro. Mininsuw nosiro nu gogoma’on ni Biliam, anak ni Biur. Si Biliam-o po moingin sobana gojian momaal nu oraai, ¹⁶ nga sinawoi iyo nu Kinoringan so’ minongowaid iyo nu koinginan kondiri om okon ko koinginan nu Kinoringan. Oilaan muyu onu koo gama’ nu Kinoringan monginsala’ so iyo? Iya oono, inurug nu Kinoringan koladai niyo ri moilo mutangar soko lobuw, monawoi nu nipoingkoyod gogoma’on niyo mulou-ulou iiri. ¹⁷ Moomontuduk owudut oono muinong nu towud nu sungoi noosakan, om kawut notilib nu uos opogon. Nosodia’an-o nosiro nu Kinoringan nu intoronan sobana ko otuong. ¹⁸ Ono yo totongaron nosiro aanggai-anggai om d’ado orati no, om gogoma’on nosiro sumundal-o su pongoboyayat nosiro nu lobuw wagu ya poimaid, tayon ong kowaid nu koraayan nosiro no. ¹⁹ Mongojanji moomontuduk owudut oono so ongo lobuw nu, kodapat nosiro miau mongowaid nu koinginan kondiri, ampa nosiro kondiri nouripon nu ongo gogoma’on oraai kototoman, iri mongowit so nosiro so kopotoyan, so’ onu yo po mongodoog nu lobuw, ono yo su monguripon nu lobuw oono. ²⁰ Iri yo po lobuw nokotondu’ yo so si Yisus Kristus, Tuhan om Poowiau, nokolabus-o kiat so kogoyaan koinsaim so wonuo tu, nga bang oboyayat po nosiro om okuasa nu kogoyaan koinsaim oono, oraai po sono kogoyaan nosiro ko’ iri dai po nokotondu’ nosiro so si Kristus. ²¹ Indadi, owarong po ong dai insan oilaan nosiro gama’ miau musuat so koinginan nu Kinoringan, ko’ oilaan-o om dai sono mongowaid nu ono. ²² Indadi, onu yo po gogoma’on nosiro, musuat nu sinsiriban iitu nu, “Tila’an koimbagu nu asu lua’ niyo,” om, “Iri ulod nokopodiu’ ri yo, mongindolobuon po koimbagu so butak,” koo ri.

¹ Oo su kosusulodan kosomodan ku! Itu yo su surat koduo ku so kou. So kiduo-duo nu surat iitu no, mogkari’-kari’ aku posundur nu pongoorotian obana muyu nu gama’ miau otoop so lobuw poimaid. ² Moingin aku ong oondoman muyu totongaron nu poo’abar nu Kinoringan gulu ri, om ponuu’an nu Tuhan om Moonapul, iri niloga’ nai so kou kiat tuui so kai, pinongoorapan ni Yisus. ³ Togna po, subai oorotian muyu nu, runat kologa’an ni Yisus, musit ongo lobuw kinuasa nu koinginan kondiri nu oraai. Mubaag nosiro so kou, ⁴ maid nu mutangar nu, “Okon ka ko minongojanji Tuhan nu lumoga’ ya! Siombo yo Iyo su d’ado po lumoga’? Minatoi-o aki rumpungan toko ri, nga d’ado ya pinindaan nu onu-onu kiat nu koowangun nu wonuo tu!” koo nosiro. ⁵ Tomodon-a nosiro dai poimaid nu, gulu ri minutangar Kinoringan om nourug-o sono su langit om wonuo tu. Wonuo tu inurug kiat so sungoi, ⁶ om sungoi ya su pinongoraag nu wonuo tu om kolobuwan silaid-i, iya nu loni’ maayo ri. ⁷ Nga langit om wonuo nu kosiono tu, tinatap soko itu nu Kinoringan, su’ ompu’on-a Niyo ong ologa’ yo Tuhan mongukum nu lobuw oraai, iri dai mongowaid nu koinginan nu Kinoringan. ⁸ Oo su kosusulodan kosomodan ku! Ido yo itu nipoondom ku so kou, ono yo suat so Tuhan d’ado pusondiangan nu sondunat om oribu toun. Kiduo nu ono muinong-a so pongirosaan Niyo. ⁹ Dai musuat pikiran nu lobuw nu, obuut Tuhan momaal nu onu yo po nojanji yo Niyo ri. Ala’ nai’, tumaan Iyo so kou, so’ dai Iyo oingin pudi ido ya obinasa. Nga, oingin Iyo ong kiawi’ lobuw rumorogo kiat so koraayan nosiro. ¹⁰ Nga runat kologa’an nu Tuhan, dai opongilaan soko moonakou. Iya oono, lumiong su langit maid nu kai-kai oguru. Om onu yo po nai so langit-o nga aawi’ oompu’, om wonuo tu nga aawus maid nu kiawi’ so wonuo tu. ¹¹ Nadi, bang kiawi’ nu ono aawus nu soko ono, onu kowiau-wiau muyu? Ono yo ko’ waido muyu yo sobana koinginan nu Kinoringan su’ dai kou kopomaal nu koraayan, ¹² solaid muyu mongindad nu runat pongobisora’an nu Kinoringan nu wonuo tu. Om pugogoma’on kou yo nu onu yo po musuat, nu kosikap-sikapan nu ologa’ runat oono. Iya oono, aawus oompu’ langit-o, om onu yo po pointoron so langit nga oungou so’ sobana ko maamut. ¹³ Nga toko yo po mongimat nu langit om wonuo owagu, iri nijanji yo nu Kinoringan so toko polakan nu lobuw mongowaid nu koinginan Niyo, nu d’ado yo sono koraayan dii. ¹⁴ Oo su kosusulodan kosomodan ku! Ono yo ko’, pogkari’-kari’ kou yo mongowaid nu koinginan nu Kinoringan, su’ bang tumingkuang kou so Iyo, d’ado yo ponopudan so kou nu kikoraayan. ¹⁵ Pikiro muyu yo nu, ungkiat so kotaanan nu Tuhan, ono yo su kosiwatan muyu kotorima’ nu kowiawan musingkolaid. Om si Paulus, sulod kosomodan toko ri nga soko ono ya sinurat niloga’ nai so kou maid nu koo’ilo nitaak nu Kinoringan so iyo. ¹⁶ Obulit si Paulus monuturan suat nu ono so kiawi’ surat niyo. Om kuwai ya so surat niyo pontudukan olalom om orogon oorotian. Om iri sono lobuw d’ado oilo-ilaan om orukung po koimaidan-i, monuntuad potarang nu orati nu pontudukan oono, om kuwai po tinu-tinu boogian so Buuk nu Kinoringan tuntuadon nosiro potarang orati no. Gogoma’on nosiro oono kobinasa so nosiro. ¹⁷ Oo su kosusulodan kosomodan ku, pagka noilaan muyu yo laid tinangar ku oono, kimati muyu yo su’ dai kou poimaid nu pontudukan dai obana no, om dai kou oliongan nu koimaidan muyu opiot. ¹⁸ Indadi moingin aku nu makin kou koirasa nu oluluudan so kou si Yisus Kristus, Tuhan om Poowiau so toko, om ruang-rumuang oilaan muyu suat so Iyo. Royowo om bontugo toko yo si Kristus kiat kosiono om musingkolaid. Amin.