1 Timutius

¹ - ² Surat iitu kiat so aku, si Paulus, pinongoorapan ni Kristus mongowaid nu koinginan nu Kinoringan, iri Poowiau so toko, om si Yisus Kristus, iri orap-orapon toko ri. Iloga’ ku surat iitu so ikau, Timutius, pinokaanak ku sobana so’ muido koimaidan to so si Kristus. Mindamo aku so Kinoringan, Amo toko, om Tuhan toko si Yisus Kristus su’ d’ado pupus mongoborakat so ikau, oluluudan so ikau, om posanang nu inawo mu no. ³ Iya nu lumombus aku mian so wonuo nu Makadunia ri, tinangar ku ikau nu poogolon ko po so bandar Ipisus, om tongaron ku po so surat ku iitu. Pinoogol ku po ikau so Ipisus, so’ kuwai tinu-tinu koyuwan montuduk nu pontudukan dai obana, om subai poingkoyodon mu nosiro potuduk nu ono. ⁴ Suuo yo nosiro mintoron boguru’ nu tutunud om tuturan suat nu solusuk-monolusuk d’ado pupus-o, so’ iri yo po nga kourug nu puolodan om okon ko posundur nu tomod nu Kinoringan, iri noilaan toko kiat so koimaidan toko so si Kristus. ⁵ Tomod ku yo po monuu’ soko ono, tayon ku ong oborisi inawo nosiro, owarong pomikiran nosiro sampai d’ado ponokodan so inawo nu osala’, opiot koimaidan so Tuhan, om kiat nu ono kopusosamod sono nosiro. ⁶ Nga kuwai yo tinu-tinu koyuwan minulaiw kiat so pontudukan iitu, om tinumapik sono so pusombut-sombutan d’ado kosudaan. ⁷ Pudi pona mokiuurug nosiro nu moomontuduk nu Ukum ni Musa, nga insan nosiro ya dai koorati ong onu tongaron nosiro, intawa pontudukan nosiro. ⁸ Oilaan toko nu Ukum ni Musa oono owarong ong waidon sobana tomod-o. ⁹ Ondomo yo nu kiawi’ ukum oono okon ko suat so lobuw owarong, sondiang ko suat so lobuw odouraka, lobuw oraai, lobuw dai poimaid nu Kinoringan, lobuw dai opatong, lobuw dai orumat nu Kinoringan, lobuw momatoi nu ino amo om momatoi nu lobuw wokon, ¹⁰ lobuw ongo gigilat, mugama’ sondad kusoi om sondad woinoi, moonguripon nu lobuw, moomudut, moonimbaal, om lobuw momaal nu onu yo po oraai lumawan nu pontudukan obana nu Kinoringan. ¹¹ Pontudukan obana oono nga kiat so Abar Owarong, iri obantug nipongaarap nu Kinoringan so aku polongkop potuturan-i. Obantug sobana Kinoringan, om otoop royowon. ¹² Mongunsopot aku so si Tuhan Yisus Kristus so’ pinobasag aku Niyo mugogoma’on suat so Iyo, om tinokod-o Niyo nu otoop aku mugogoma’on suat so Iyo, om ono yo ko’ pinili’ aku Niyo nu uripon Niyo. ¹³ Pudi pona inindoraai ku Iyo nu gulu ri, om ininsokitan ku lobuw songapan Niyo, om pinubaagan ku Iyo, linuluudan aku ya nu Kinoringan, so’ iya iiri, dai ku po otondu’an pontudukan obana, om dai aku po poimaid so Iyo. ¹⁴ Sobana ko sinomodan aku ni Tuhan Yisus Kristus, nu nopoimaid aku sono so Iyo, om osamod aku so sondad una’. Soko ono ya gama’ nu Kinoringan so kiawi’ lobuw kopuido yo so si Yisus Kristus. ¹⁵ Bana ya tuturan iitu, om subai poimaid kiawi’ lobuw, ono yo linumoga’ si Yisus so wonuo tu monapul nu lobuw kiat so koraayan. Kiat so kiawi’ lobuw, aku yo su maayo po koraayan. ¹⁶ Nga pagka osuang sobana koraayan ku, ono yo ko’ linuluudan aku nu Kinoringan, tayon Niyo ong kointolang so lobuw kootaan nu inawo ni Yisus Kristus, mongidu’ nu koraayan suang ku ri. Winaal Niyo soko ono tayon Niyo ong ourug aku nu insuwon nu lobuw moingin poimaid so Iyo ong wagu, om kikowiawan sono nu obana om musingkolaid. ¹⁷ Ido-ido ya Kinoringan om dai Iyo osiou. Iyo yo su Raja nu kiawi’ lobuw so wonuo tu om dai matoi. Opatut nu orumaton om royowon Iyo. Amin! ¹⁸ Oo anak ku Timutius, niarap ku yo so ikau kodau ku iitu. Itu yo su tinongaran musuat nu nokokoilo yo laid nu poo’abar maid nu kuasa nu Kinoringan nu gulu ri, om ikau-o su kuanon nu iri. Ondomo yo sobana tinongaran oono, so’ ono yo su pinokosindata lumawan nu koraayan so wonuo tu. ¹⁹ Popioto yo koimaidan mu om poworongo yo pomikiran nu inawo mu. Kuwai tinu-tinu koyuwan dai momoduli’ nu pomikiran nu inawo nosiro, pudi pona oilaan-o nosiro nu obana ya, om mintoron sono poimaid so Kinoringan. ²⁰ Soko si Iminius om si Aliksandir, su nipoinsaad ku nu Wowaidon nu Moinat, tayon ku ong rumorogo mubaag nu Kinoringan.

¹ Pagka soko ono, itu yo su indomoon ku nu oogot bana waalon muyu lobuw poimaid so si Kristus, ono yo pogdu’a kou yo suat so kosimpitan om koogutan nu kiawi’ lobuw, om pogdu’a kou yo mongunsopot so Kinoringan nu winaal Niyo so nosiro. ² Mogdu’a yo suat nu ongo raja om kiawi’ lobuw kipangkat su’ miau toko osanang. Subai oorumat toko nu Kinoringan om owarong so sondad una’, ³ so’ ono yo su owarong om kosanang nu inawo nu Kinoringan, iri Poowiau so toko ri. ⁴ Koinginan-o po nu Kinoringan nga kiawi’ lobuw koorati nu pontudukan obana om osopulan nosiro. ⁵ Ido-ido ya Kinoringan om ido yo kodapat popuwarong so toko om Iyo, ono yo si Yisus Kristus, iri linumoga’ so wonuo tu om sinumiliw nu lobuw. ⁶ Nitaak Niyo koyuwan Niyo nu matoi mongolukat nu kiawi’ lobuw kiat so koraayan musuat nu iya notantu yo nu Kinoringan pointolangan Niyo nu, moingin Iyo ong kiawi’ lobuw kikowiawan musingkolaid. ⁷ Ono yo ko’ pinili’ aku nu Kinoringan ourug nu pinongoorapan, om sinuu’ aku Niyo montuduk nu kodau oono. Kiawi’ tinangar ku oono bana ya. Pinili’ aku Niyo tayon ong mian aku montuduk so lobuw okon ko Yaudi om poimaid nosiro sono nu pontudukan oono. ⁸ Ono yo ko’ moingin aku sobana ong kokusoyan so kiawi’ puimpugan dadan mogdu’a. Om iya mogdu’a nosiro, subai d’ado yo koraayan so inawo, om d’ado yo koungotan intawa pusongkiwalan. ⁹ Om suat so kowoinoyan, subai mupokakas nu koinsuatan, nu dai koiyu’-iyu’, om adang-o posurugawon su obuk, om adang-o momakai nu poroomasan otaas sobana nu pokiroyowan. ¹⁰ Ala’ nai’, ono yo su patut tondayan sobana nosiro inawo om mugogoma’on owarong, soko wokon kowoinoyan iri mongowaid nu koinginan nu Kinoringan-i. ¹¹ Opatut ong modog-odog nosiro mongkinongou nu pontudukan om musimbaba’. ¹² Dai su mongolila’ nu kowoinoyan montuduk so puimpugan intawa monuu’ nu kokusoyan. Owarong ong modog-odog nosiro. ¹³ Mutangar aku soko ono so’ si Adam-a su gulu winaal nu Kinoringan, om si Awa nai’, ¹⁴ om okon-a ko si Adam su noburunsutan, nga si Awa ya su dai minongowaid nu nisuu’ nu Kinoringan. ¹⁵ Ono yo ko’ orogonan kowoinoyan muanak. Nga pudi pona soko ono, pagka nosiro yo su muanak, osopulan-a nosiro ong otatap-a nosiro poimaid so si Kristus, osamod-a nosiro so lobuw wokon, om sobana ko owarong om otoop kogoyaan nosiro.

¹ Sobana ko osuat totongaron iitu no nu, “Iri yo po lobuw mokiuurug nu wowaidon nu lobuw poimaid, pinili’ yo niyo gogoma’on sobana ko owarong,” koo ri. ² Ono yo po wowaidon nu lobuw poimaid, okon ko totopudon nu lobuw nu kisala’, dai monapil, okodos, moilo momikir, opatong, poo’indakod nu lobuw so waloi niyo, om moilo montuduk nu lobuw. ³ Wowaidon nu lobuw poimaid dai kowasa musingawuk, intawa mokimualod, ono yo nga otulid inowoon, dai mokimusiwal om okon ko oulou nu siin. ⁴ Wowaidon nu lobuw poimaid subai moilo momoriara’ nu anak sawo, om montuduk nu inonakan su’ waidon om orumaton iyo nosiro. ⁵ So’ bang dai oilo momoriara’ nu anak sawo, dai ya oilo momoriara’ nu lobuw poimaid so Kinoringan. ⁶ Om ono yo po lobuw sumiliw nu wowaidon-o, okon ko owagu ya poimaid so si Yisus, so’ bang owagu ya koimaidan niyo, musingkaayo-ayo sono iyo om oinsaadan nu Kinoringan soko iri Wowaidon nu Moinat-i. ⁷ Om lobuw siliwon nu wowaidon-o, subai otondu’an nu lobuw dai po poimaid nu owarong kogoyaan, su’ dai iyo insola’on om dai osulung nu tawos nu Wowaidon nu Moinat. ⁸ Soko ono ya pudi moonabang nu puimpugan, subai oorumaton nu lobuw wokon, dai moonginum nu kaawuk, om okon ko oulou nu siin. ⁹ Sumundur-o nosiro tumatap so koimaidan om pontudukan obana, iri niintolang-o nu Kinoringan, om otulid inowoon nu dai totopudon nu lobuw. ¹⁰ Kinaman po laid nu bang tatap-a nu d’ado kosola’an nosiro om d’ado ido ya monapud so nosiro, topuson nai’ nu urugon nosiro nu moonabang so puimpugan. ¹¹ Sawo nosiro no nga subai owarong kogoyaan, orumaton nu lobuw wokon, dai olinsugat, okon ko moonginum, om opongoorapan nu onu-onu ya. ¹² Lobuw moonabang oono subai dai monapil, om moilo momoriara’ nu anak sawo, ¹³ so’ bang owarong poomurogama’ nu moonabang so puimpugan oono, kiawi’ lobuw nga mongorumat so iyo, om kooku’ po sono iyo paabar nu ido-ido ya si Yisus koponapul so nosiro. ¹⁴ Pudi pona so pomikiran ku nu dai yo olaid aku kopongondaa so ikau, nga nipoowit ku ya surat iitu nai so ikau, ¹⁵ su’ olaid aku pona kologa’, oilaan muyu so surat ku iitu ong onu kogoyaan mupatut toko lobuw poimaid so Kinoringan. Toko yo po songsuku-sakat so Kinoringan, ono yo puimpugan nu Kinoringan miau musingkolaid. Om toko yo po soko pasok om popanggor nu pontudukan obana kiat so Kinoringan. ¹⁶ Oilaan toko kiawi’ nu kaalib sobana pontudukan suat so si Yisus Kristus niintolang nu Kinoringan nu ono sono tu, iri nisusut Niyo gulu ri nu. Si Kristus-o su linumoga’ sumiliw nu lobuw. Pinointolang nu Atod nu Kinoringan nu obana Iyo nu Anak nu Kinoringan. Nosiou Iyo nu ongo susuu’on nu Kinoringan. Iyo yo su nituturan so kiawi’ bansa, om imaidon nu lobuw so pilolongkop nu wonuo tu. Iyo yo su kinakat mido so Kinoringan so surga.

¹ Nokokoilo yo nu Atod nu Kinoringan, nu kuwai tinu-tinu koyuwan mulaiw kiat so pontudukan nu koimaidan toko ong wagu, om mongkinongou nu komoinatan iri momalid, om poimaid nu pontudukan nu komoinatan. ² Pontudukan ono nituturan nu ongo lobuw odupang om moomudut, om dai yo sono kotolunda’ nosiro so koworongan, so’ pomikiran nosiro soko onsi nu d’ado yo sono oirosaanan. ³ Nosiro oono montuduk nu dai kowasa montun lobuw poimaid so Kinoringan om kuwai ginis nu ingkookan dai kowasa okanon. Pontudukan oono dai obana, so’ kiawi’ ingkookan, inurug nu Kinoringan okanon nu kiawi’ lobuw poimaid so si Kristus, om poimaid nu pontudukan obana, om mongunsopot toko ya nu ono. ⁴ Oilaan toko nu owarong kiawi’ winaal nu Kinoringan, om d’ado ido nipogos pookan ong kopongunsopot toko yo so Iyo nu ookanon oono. ⁵ Oilaan toko kiat so tinongaran nu Kinoringan nu, kiawi’ kowasa toko ya okanon ong mongunsopot toko ya. ⁶ Oo Timutius, bang nituduk mu pontudukan ku iitu so lobuw wokon poimaid, ourug ko sono nu moonabang owarong so si Yisus Kristus, om ikau kondiri sumundur koilo nu tinongaran nu Kinoringan iri imaidon toko, om pontudukan obana, iri winaid mu nu laid iiri. ⁷ Kodi yo rongowo tutunud oraai d’ado kosudaan kiat so odu aki ri, om okon ko suat so Kinoringan, ono ya nga pogkari’-kari’ yo mongowaid nu koinginan nu Kinoringan. ⁸ Kikosudaan nai’ mongoopot nu koyuwan, nga makin po kikosudaan musingopot mongowaid nu koinginan nu Kinoringan, so’ ono yo su kountungan nu kowiawan toko nu ono sono tu om so sunduron tu. ⁹ Sobana ko musuat totongaron iitu no, om opatut waidon nu kiawi’ lobuw. ¹⁰ Ono yo su tomod to mogkari’-kari’ potuturan nu Abar Owarong, umarap Kinoringan, iri miau, so’ Iyo yo su Poowiau nu kiawi’ lobuw, gulu po lobuw poimaid so Iyo. ¹¹ Potuduko yo kiawi’ tinangar ku iitu so lobuw, om suuo yo nosiro mongowaid nu ono. ¹² Kodi yo posimaidi lobuw pobaba’ so ikau nu omulok ko po kosiowan nosiro, nga urug-o nu lobuw owarong insuwon nu lobuw poimaid so totongaron mu, kogoyaan mu, poonamod mu nu wokon, koimaidan mu so si Kristus, om koowarong nu inowoon mu so sondad una’. ¹³ Pogkari’-kari’ yo mongobasa’ nu totongaron nu Kinoringan so puimpugan nu lobuw poimaid, om potarang nu ono om montuduk so nosiro musingkologa’ ku nai. ¹⁴ Kodi yo pokomaai-maayi ponaak nu Kinoringan so ikau oono, iri notangar-o laid nu ongo poo’abar maid nu kuasa nu Kinoringan, iya nu potopop wowaidon nu puimpugan nu palad nosiro so ulu mu no ri, ponondu’an nu pinili’ ko mugogoma’on suat so Tuhan. ¹⁵ Kodi yo lupai kiawi’ tinangar ku oono, om waido yo sobana, su’ otolang oilaan nu kiawi’ lobuw nu sumundur-a owarong kogoyaan mu no. ¹⁶ Kimati yo kogoyaan mu om pontudukan mu. Ikod-o kotopodan mugogoma’on nu itu, so’ bang waidon mu ono, miau ko om soko ono ya pudi lobuw mongkinongou so ikau-o.

¹ Bang monawoi ko nu kusoi otuo yo, adang-o mangas-langas, nga popuinongo ya nu poonawoi mu nu amo mu kondiri. Om poomontuduk mu nu koomulokan, popuinongo ya nu poomontuduk mu nu sulod mu kondiri. ² Om poomontuduk mu nu woinoi otuo no yo, popuinongo ya nu poomontuduk mu nu ino mu kondiri. Om poomontuduk mu nu kororaa’an, popuinongo ya nu poomontuduk mu nu sulod mu kondiri, maid nu otulid inowoon. ³ Orumato om tobango yo ongo balu, iri d’ado muad pokiporiora’an. ⁴ Nga bang iri balu kianak intawa kimongkupu ri, tuduki yo nosiro nu nosiro yo su otoop mogulu momoriara’ nu ino intawa odu nosiro, om ono yo ko’ orumaton nosiro, so’ bang sumuli’ momokan nu kotutuaan, ono yo su koinginan nu Kinoringan. ⁵ Iri yo po balu d’ado muad pokiporiora’an-i, umarap-a so Kinoringan, om awi runat mogdu’a mokitabang so Kinoringan. ⁶ Nga iri balu manou-panou-a gogoma’on om mogkosonangan so wonuo tu, pudi pona miau po, soko minatoi-o. ⁷ Tuturani yo pontudukan iitu so ongo lobuw poimaid, om suuo yo nosiro mongimaid, su’ dai nosiro pokoraayon nu lobuw wokon. ⁸ Bang kuwai ido koyuwan poimaid dai momoduli’ nu suku-sakat intawa anak sawo niyo, mongolim iyo nu poimaid so si Kristus, om oraai po iyo ko’ lobuw dai poimaid. ⁹ Iri yo balu opatut podoptaron ngaran niyo nu tobangon, ong labi yo onom nopulu toun umur, om insan-a nokoontun, ¹⁰ om obantug nu owarong kogoyaan, ono yo momoriara’ nu inonakan, poo’indakod nu lobuw wokon so waloi niyo nu miau po sawo niyo ri, monabang nu lobuw songapan nu Kinoringan, obintabang nu lobuw kikosusaan, om dadan mugogoma’on nu owarong. ¹¹ Nga kodi yo doptari balu omuda no po nu tobangon, so’ bang dai iyo kokodos nu koinginan, kalu mokiontun po nosiro koimbagu, om dai sono mugogoma’on suat so si Kristus, ¹² om kisala’ sono nosiro so si Kristus, om ukumon nu Kinoringan so’ dai minongowaid nu janji nosiro so si Kristus. ¹³ Sondiang ko ono, dumoput sono nosiro om manid gumosayun so waloi nu lobuw, om oraai po su olinsugat om popuasa’ nosiro nu lobuw om mutangar nu dai mupatut tongaron. ¹⁴ Ono yo ko’, moingin aku nu balu omuda no po mokiontun po, om kianak nosiro, om momoriara’ nu anak sawo kondiri, su’ d’ado pounayan nu alod-alod toko pokoraai so toko lobuw poimaid. ¹⁵ Mutangar aku soko ono so’ kuwai balu minulaiw-o kiat so koimaidan nosiro, om mimaid sono so Wowaidon nu Moinat. ¹⁶ Bang kuwai woinoi poimaid so Kinoringan, kisuku-sakat nu balu, poriora’on-o bana niyo balu oono, su’ dai koinsuang nu tobangon nu ongo lobuw poimaid. Indadi koponabang sono puimpugan oono nu balu d’ado muad pokiporiora’an. ¹⁷ Iri wowaidon so puimpugan nu lobuw poimaid owarong poomurogama’ ri, opatut oinduo gama’ so nosiro mongobarai kiat so koopotan, makin-o po iri lobuw owasa potuturan nu Abar Owarong om montuduk-i. ¹⁸ Soko ono yo tangar so Buuk nu Kinoringan nu, “Dai kowasa kogosan kobang nu sapi popongupogon nu paroi-o,” koo ri. Om, “Mupatut-a nu borayan iri lobuw mugogoma’on-i,” koo ri. ¹⁹ Adang-o osikap poimaid nu ponopudan nu lobuw suat so wowaidon so puimpugan, ong d’ado ya duo intawa tolu koyuwan nokosiou nu ponopudan so iyo no. ²⁰ Bang sumundur po iyo momaal nu kosola’an, sowoyon-o wowaidon oono so tiningkuangon nu lobuw suang su’ dai minsuw so iyo wowaidon wokon. ²¹ So tiningkuangon nu Kinoringan om si Yisus Kristus om ongo susuu’on nu Kinoringan nu nopili’, mindamo aku so ikau nu waido yo sobana pontudukan iitu, su’ dai ko popupinig nu lobuw, insan wowaidon-a intawa lobuw-a koopotan, nu bang nokosala’ yo, ikod-o koontara monawoi. ²² Owarong-a ong ooyadan mu po laid momikir om tontuon mu nai’ lobuw posiliw nu wowaidon nu puimpugan mugogoma’on suat so Kinoringan. Om ikod-o kiwaid-waid so kosola’an nu lobuw wokon. Kimato yo sobana kootulid nu inowoon mu no su’ dai ko gumilat. ²³ Okon ko sungoi-o po su inumon mu, nga monginum ko ya sabat nu anggur, su’ koubat nu koyuwan mu so’ dadan ko nima dai kaatu’. ²⁴ Kuwai lobuw nu mogtuui oilaan kosola’an niyo pudi pona dai po obisara’. Kuwai ya lobuw wokon nu tadi’ ya oilaan kosola’an niyo ong obisara’ yo. ²⁵ Soko ono ya, kuwai lobuw nu osikap kointolang gogoma’on niyo owarong, om kuwai ya lobuw nu olaid kointolang gogoma’on niyo owarong, nga kointolang-a ong wagu.

¹ Iri yo po uripon poimaid so si Kristus subai mongorumat nu tuan nosiro, su’ d’ado pokoraai nu Kinoringan om pontudukan toko. ² Kouriponan poimaid so Tuhan iri nouripon nu inong poimaid, opatut orumaton po nosiro tuan nosiro oono, so’ tuan oono sonsulod-a so nosiro nu muido koimaidan. Goma’on-o kowarong-warong nisuu’ nu tuan-o, so’ ono lobuw koirasa nu gogoma’on nosiro no sulod-a nosiro so koimaidan om kosomodan nu Kinoringan. Tuduki om biati yo lobuw nu popongowaidon nu kiawi’ totongaron ku. ³ Isai potuduk nu sondiang ko pontudukan obana ni Tuhan Yisus Kristus, om pontudukan suat so koinginan nu Kinoringan, ⁴ musingkoilo-ilo ya lobuw oono, ampa d’ado oilo-ilaan. Kototoman-o po niyo nga mokimusambut-sambut om mokimusiwal suat nu pongingoranan. Om ono yo su kourug nu puririndian, pupipinigan, pusisimbaalan, putotontaman nu oraai, ⁵ om pusosombutan d’ado koopodan maid nu lobuw dai oilo momikir, om dai koorati nu onu yo po obana. Ponontaman nosiro nu kumaya ong maid nosiro nu ugama. ⁶ Nga bang maid toko nu koinginan nu Kinoringan om mogsadang sukur nu ontob kuwai no, kikountungan toko maayo. ⁷ D’ado ya inowit toko masuw so wonuo tu iya nu kinopuonakan so toko, om d’ado ya oowit toko mulaiw kiat so wonuo tu ong matoi toko yo. ⁸ Ono yo ko’ musuat ong kuwai po ingkookan om pokakas toko. ⁹ Nga iri lobuw mokikokaya ri, ointotayag om oburunsut nu osuang koinginan koowit so nosiro lumowong, sampai dai yo sono maid so Kinoringan om osonsara’ nosiro musingkolaid orawu’ so Kinoringan. ¹⁰ Ono yo mokisisiin-o su impuunon nu momaal nu kiawi’ oraai. Kuwai tinu-tinu koyuwan mokisisiin-o po om mingkoyod sono nosiro poimaid so si Kristus, nga koompusan osuang kosonsora’an tumokuli’ so nosiro. ¹¹ Nga, ikau-o su uripon nu Kinoringan. Adang-o maid-waid nu kogoyaan mokisisiin-o. Pogkari’-kari’ yo sumundur so kogoyaan owarong, mongowaid nu koinginan nu Kinoringan, poimaid so si Kristus, osamod nu lobuw inong koimaidan, otaan mongirasa nu kosonsora’an om olimomod. ¹² Soko lobuw muimbas mundak mokimomanang su’ kaalap nu odia, soko ono ya pogkari’-kari’ yo miau mongimaid bana so si Kristus, su’ kikowiawan ko musingkolaid, so’ ono yo su kinopomaawan nu Kinoringan so ikau poimaid so Iyo, iya nu nopaabar ko nu poimaid so si Kristus so tiningkuangon nu lobuw. ¹³ Om kosiono mutangar aku so ikau so tiningkuangon nu Kinoringan, impuunon nu kowiawan, om so tiningkuangon ni Yisus Kristus, iri minutangar so si Puntius Pilatus nu isai Iyo, ¹⁴ waido yo sobana niongosuu’ nu Kinoringan, su’ dai ko otapud nu lobuw nu kisala’ ko, musingkologa’ koimbagu ni Yisus Kristus, Tuhan toko, ¹⁵ iri pologa’on nu Kinoringan iya nu notatap-o Niyo ri. Kinoringan-o po nga ido yo Momogkuasa Maayo, om patut royowon om mogkuasa nu kiawi’ raja om tuan. ¹⁶ Ido yo Iyo su dai matoi. Molak Iyo so konowawan nu dai ologa’ nu isai ya, om d’ado po ido lobuw nokosiou so Iyo, om Iyo nga dai osiou. Muda-mudaan ong royowon Iyo om mogkuasa musingkolaid! Amin. ¹⁷ Oo Timutius, pogoso yo lobuw doyaan, su’ dai musingkaayo-ayo om dai umarap nu gonggamon nosiro dai otiru no. Ono ya nga, opatut ong umarap nosiro so Kinoringan, so’ Iyo yo su koponukup nu onu-onu ya om dai mawi’, su’ osudu’an toko sono. ¹⁸ Suuo yo lobuw doyaan poimaid-i popomaal nu owarong, obintaak, om obintabang nu lobuw wokon. ¹⁹ Bang soko ono waalon nosiro, soko mongimpug nosiro nu gonggamon kiorogo, om ourug ono nu impuunon nu kowiawan nosiro so surga, om kikowiawan sono nosiro musingkolaid maid so Kinoringan. ²⁰ Oo Timutius, kimato yo bana onu yo po niarap so ikau nu Kinoringan. Kodi yo imaido totongaron d’ado orati om pusongkiwalan d’ado kosudaan, so’ ponontaman nosiro nu ono yo oilo-ilaan nosiro no su obana, ²¹ so’ kuwai yo lobuw mutangar nu kipongilaan kolaai, nga koompusan mingkoyod sono nosiro mongowaid nu pontudukan toko obana no. Muda-mudaan ong borokatan ko ya nu Kinoringan.