1 Tisalunika

¹ Surat iitu kiat tuui s’aku si Paulus, si Silas om si Timutius niloga’ so puimpugan so bandar Tisalunika nu nosongapan-o nu Kinoringan, Amo so surga om Anak Niyo si Tuhan Yisus Kristus. Muda-mudaan ong d’ado pupus nu Kinoringan mongoborakat om posanang nu inawo muyu. ² Dadan mogdu’a om mongunsopot kai so Kinoringan suat so kou. ³ Koduung mogdu’a kai, oondoman mai yo nu koimaidan muyu nu osiou mai so kowiawan muyu. Osiou mai nu kisamod kou so Kinoringan so’ owasa kou mugogoma’on suat so Iyo. Om osiou mai nu ototog kou umarap nu lumoga’ po Iyo koimbagu. ⁴ Oo su kosusulodan ku sinomodan nu Kinoringan, oilaan mai nu pinili’ kou Niyo sumiliw nu songapan Niyo. ⁵ Inobaran mai yo kou nu Abar Owarong, om okon ko ontob-a nu mangar-tangar kai, nga waid-waidon kai po nu kuasa nu Atod nu Kinoringan. Oilaan muyu nu owarong kogoyaan mai so kou nu laid mai po mido-ido so kou ri. ⁶ Mininsuw kou so kai om so si Tuhan Yisus. Pudi ko osuang lobuw mononsara’ so kou, koduung notorima’ muyu tuturan mai tu, sobana ko osanang kou ya so’ maid-waid Atod nu Kinoringan so kou. ⁷ Koompusan nu ono, insuwon kou sono nu kiawi’ lobuw poimaid so Kinoringan so wonuo nu Makadunia om Akaya. ⁸ Tinumimpuun nai so kou om linumongkop-o sono tinongaran nu Tuhan, okon ko so Makadunia om so Akaya ya, nga kiawi’ lobuw siombo-ombo nu tontong nokorongou-o nu abar suat so koimaidan muyu so Kinoringan. Indadi dai kai yo muru’ paabar so nosiro nu koimaidan muyu no. ⁹ Norongou nosiro iri gama’ muyu monorima’ so kai nu kinologa’an mai nai so kou ri. Niabar nosiro nu mingkoyod kou mongusaa’ nu komoinatan om pinokokinoringan om tumolunda’ kou yo so Kinoringan. Kosiono tu muripon kou yo sono so Kinoringan nu miau om obana. ¹⁰ Minongaabar-a nosiro nu mongindad kou nu kologa’an koimbagu nu Anak Niyo ri kiat so surga, ono yo si Yisus, iri linuli’an nu Kinoringan kiat so pinotoyan-i. Iyo yo su monapul so toko kiat so koungotan nu Kinoringan suat nu koraayan nu lobuw.

¹ Oo su kosusulodan ku, noilaan muyu yo nu kikosudaan kinologa’an mai nai so kou ri. ² Oilaan muyu nu dai po nokologa’ kai so Tisalunika, sobana ko nosonsara’ om inindoraai kai so Pilipi. Soko iri pona, tinaakan kai ya nu Kinoringan nu kopogian paabar nu Abar Owarong nai so kou. ³ Montuduk kai so kou okon-a ko momalid, intawa oraai tomod, intawa mongaakal, ⁴ ala’ nai’, koimaid Kinoringan so kai om pinongoorapan kai Niyo paabar nu Abar Owarong oono. Ono yo ko’ okon-a ko posanang nu inawo nu lobuw kiawi’ tinangar mai oono, nga posanang nu inawo nu Kinoringan. Oilaan-a Niyo nu inawo om tomod mai nu obana ya. ⁵ Noilaan muyu nu dai kai ya insan musingkowarong-warong nu totongaron intawa musintapan nu d’ado koraayan mai. Osiou-a ono nu Kinoringan. ⁶ Om dai kai insan mokiroyowon so kou intawa so lobuw wokon. ⁷ Pudi pona maayo kopogboya’an mai su pinongoorapan kai ni Kristus, osulut-a inawo mai, soko ino mongipat nu inonakan niyo. ⁸ Sobana ko osamod kai so kou, om okon ko ontob-a nu paabar kai so kou nu Abar Owarong, nga mogkari’-kari’ kai po suat so kou musingkopatoi. ⁹ Oo su kosusulodan ku, oondoman muyu po gaam poomogkari’-kari’ mai mugogoma’on-i. Awi runat modium kai nu ingkookan tayon mai ong dai kai kopongaagut so kou nu laid mai paabar nu Abar Owarong kiat so Kinoringan. ¹⁰ Miou-siou kou om Kinoringan nu onu yo po kogoyaan mai so tiningkuangon muyu, owarong-a, obana om d’ado koraayan. ¹¹ Oilaan muyu ya nu poomontuduk so kou ri, soko poomontuduk nu amo so inonakan niyo. ¹² Biniatan, sinuu’, om sinosogan mai kou maid so kogoyaan musuat so koinginan nu Kinoringan. Iyo yo su popoimaid so kou su’ mido-ido kou so Iyo mogkuasa so wonuo wagu nu Kinoringan. ¹³ Om ido po pongunsopotan mai so Kinoringan suat so kou, ono yo, laid mai paabar nu Abar Owarong nai so kou ri, sobana ko minongkinongou kou. Rinongou muyu ya tuturan oono so’ oilaan muyu nu tuturan oono okon ko kiat so koilaan nu riniba, ono ya nga, kiat so Kinoringan, kopongimbarong nu inawo muyu lobuw poimaid so si Kristus. ¹⁴ Muinong-a nololagan muyu om puimpugan so wonuo Yudia, iri nosongapan ni Yisus Kristus. Ininsaadan nosiro nu inong nosiro lobuw Yaudi, om soko ono kou ya ininsaadan nu inong muyu lobuw okon ko Yaudi. ¹⁵ Kolobuwan-a nu Yaudi minomatoi so si Yisus om ongo poo’abar nu Kinoringan, iri polatas nu abar Niyo gulu ri, om kai nga sinindoraai-a nosiro. Kogoyaan nosiro oono sobana ko dai koinginan nu Kinoringan, ¹⁶ sampai pogoson kai nosiro paabar nu Abar Owarong so ongo bansa okon ko Yaudi, so’ dai oingin nu osopulan nosiro nu Kinoringan. Soko ono pona, dadan-a mongoruang nu koraayan ongo lobuw Yaudi, om kosiono ungotan nosiro nu Kinoringan. ¹⁷ Oo su kosusulodan ku, pudi pona sontagal nai’ kinoputondiangan toko, nga sobana ko oimpong kai yo so kou. Pudi pona nokopusosondiang toko yo, nga dadan kai ya muropadu mongondaa so kou. ¹⁸ Mokipopongondaa kai so kou, om insan induo aku yo kuminam maam, nga inibonan kai nu Wowaidon nu Moinat. ¹⁹ Mokipupululi’ kai nai so kou so’ ono yo koimaidan muyu ototog-o su orapan, kosudu’an om pongondosan mai ong lumoga’ koimbagu si Yisus Kristus. ²⁰ Osudu’an kai sobana nu kowiawan muyu om kou yo su kopongoroyowan so kai nu ongo lobuw.

¹ Oirosaanan mai nu dai kai yo tumaan nu koo’impong so kou. Indadi tinapus mai yo nu owarong ong mogol kai ya so bandar Atina, ² om suu’on mai si Timutius, sulod toko mian nai so kou. Iyo yo po uripon nu Kinoringan om una’ mai ya polongkop nu Abar Owarong suat so si Kristus. Tomod mai yo po monuu’ so iyo, nga pobasag om popiot nu koimaidan muyu om montuduk so kou, ³ su’ bang kolalag kou nu kosonsora’an om kosusaan, kakal kou ya umarap so Kinoringan. Oilaan muyu nu kiawi’ kosonsora’an oono, noirosaanan muyu musuat nu koinginan nu Kinoringan. ⁴ Iya nu mido-ido kai po so kou ri, nokokoilo mai yo laid nu osuang lobuw mongindoraai so kou. Om nokoilo kou yo nu ono sono tu nu kiawi’ nu ono, nga nourug-a. ⁵ Pagka dai yo su tumaan koo’agut ku so kou, suu’on ku si Timutius poian nai so kou mongilo ong muro-kuro yo koimaidan muyu no om niabar niyo tuui so aku. Lumaa’ aku nu komanang Wowaidon nu Moinat monginam so kou, om onu yo po pinutangar mai so kou ri nga ado ya sono koompusan. ⁶ Nga, kosiono nokopululi’ yo si Timutius tuui so kai. Noobaran kai yo niyo nu kodau owarong nu koimaid kou sobana nu Kinoringan om kisamod kou so sondad-una’. Inobaran kai niyo nu dadan kou oimpong so kai om mokiondaa so kai, soko iri ya koinginan mai mongondaa so kou ri. ⁷ Oo su kosusulodan, ono yo ko’, pudi pona osuang kosusaan mai om osonsara’ kai nu ono sono tu, osanang kai ya suat so kou nu norongou mai tuturan ni Timutius nu opiot koimaidan muyu. ⁸ Nga kosiono, osanang kai nu norongou mai koimaidan muyu nu otatap so Kinoringan. ⁹ Dai kai otopod-topodan mongunsopot so Kinoringan suat so kou, so’ osudu’an kai sobana so kou. ¹⁰ Awi runat mogdu’a kai nu otoroido inawo, so’ aarap kai nu kopuondaa toko po koimbagu om popiot nu koimaidan muyu no. ¹¹ Mogdu’a kai su’ borokatan toko nu Kinoringan Amo toko so surga om Anak Niyo si Yisus, Tuhan toko, om kopuondaa toko sono koimbagu. ¹² Mogdu’a kai ya su’ ruangan po nu Kinoringan koosamod muyu so sondad una’, om so kiawi’ lobuw, soko poonamod mai so kou. ¹³ Mogdu’a kai ya su’ popioton inawo muyu no nu Kinoringan Amo toko, om ourug kou sono nu songapan Niyo d’ado koraayan so tiningkuangon Niyo, ong kologa’ yo si Yisus koimbagu maid nu lobuw songapan Niyo.

¹ Oo su kosusulodan ku, notudukan mai yo kou nu gama’ miau koinsanang nu inawo nu Kinoringan, om ono yo su winaid muyu nu kosiono tu. Kosiono mindamo kai sobana so kou, nu pagka nokopuido kou yo so si Tuhan Yisus, posunduro muyu ya kogoyaan muyu owarong oono, ² so’ noilaan muyu yo laid nu, iri yo po niongotuduk mai ri nga maid nu kuasa ni Tuhan Yisus. ³ Itu yo su koinginan nu Kinoringan, ono yo kogoyaan muyu subai otoop so kolobuwan nosongapan Niyo. Ono yo ko’ dai kowasa gumilat, ⁴ ala’ nai’ isai yo po kusoi subai momaal nu owarong om kiorumat so sawo niyo musuat so koinginan nu Kinoringan om lobuw. ⁵ Om adang-o mongowaid nu inowoon muyu so kowoinoyan om kolapa’ sono, soko lobuw dai kotondu’ nu Kinoringan nu dadan maid nu koinginan kondiri. ⁶ Suat so gumilat, adang-o nu kuwai po rumaai pogokalan intawa monolod nu sawo nu sulod niyo. Pinokoilo mai yo kou nu gulu ri nu insaadan nu Kinoringan lobuw momaal nu ono, ⁷ so’ kinopomaawan-o po nu Kinoringan so toko ourug nu lobuw poimaid so Iyo, nga tayon Niyo ong miau toko musuat nu koinginan Niyo, okon ko gumilat. ⁸ Isai monangkis nu pontudukan oono, okon-a ko lobuw su tongkison, ono ya nga Kinoringan, iri monaak so toko nu Atod Niyo kondiri. ⁹ Dai muru’ pokoiloon ku kou so surat iitu nu subai musosamod kou, so’ Kinoringan-o su minontuduk so kou nu ono. ¹⁰ Om bana ya nu osamod kou nu kiawi’ lobuw inong koimaidan minolak so pilolongkop nu Makadunia. Nga mindamo kai sobana so kou nu rumuang po koo’ingin muyu musosamod oono. ¹¹ Pogkari’-kari’ kou yo mususulut om pikiro muyu yo gogoma’on muyu kondiri. Podium kou yo nu ingkookan kondiri, soko iri tinangar mai nu gulu ri. ¹² Bang soko ono kogoyaan muyu, tantu orumaton kou nu lobuw dai po poimaid so si Yisus, om dai kou mongaarap nu lobuw wokon monaak so kou nu ookanon. ¹³ Oo su kosusulodan ku, moingin kai nu oilaan muyu sobana suat so ongo lobuw poimaid iri minatoi-o, su’ dai kou landu oupus soko lobuw wokon d’ado orapan. ¹⁴ Dai otoop ong oupus toko soko lobuw ado koimaidan, so’ poimaid toko nu minatoi si Yisus om noluli’an-a. Indadi poimaid toko ya nu iri yo po lobuw minatoi-o nu nopoimaid so si Yisus, luli’an-a nu Kinoringan ong lumoga’ yo koimbagu si Yisus, om owiton sono nu Kinoringan maid so Iyo. ¹⁵ Itu yo su pontudukan ni Tuhan Yisus poorotion ku so kou nu, toko yo po nu miau po nu kologa’an koimbagu Niyo, dai popoguluon so lobuw minatoi, iri nopoimaid so si Yisus. ¹⁶ Iya oono, gumonsok wowaidon nu susuu’on nu Kinoringan, om popukaion surumpit nu Kinoringan pokoilo, om muntiba yo sono si Tuhan Yisus kiat so surga. Nga poguluan po Niyo mongoluli’ kiawi’ lobuw minatoi, iri nopoimaid so Iyo ri. ¹⁷ Oopod ono, toko nu miau po nu iya oono kokaton maid so nosiro so kawut, sumambat nu Tuhan so dilanggau, om kopuido toko sono nu Kinoringan musingkolaid. ¹⁸ Indadi, puiinsosamod kou yo nu pontudukan oono.

¹ Oo su kosusulodan ku, dai muru’ pokoiloon mai kou so surat iitu ong sombiya bana yo ourug ono, ² so’ kou kondiri nga koilo yo nu dai oponontuan runat kologa’an ni Yisus monginsaad nu ongo lobuw soko moonakou nu tigog-a lumoga’ nu tonga’ nu awi. ³ Iya oono kuwai mutangar nu, “Osanang toko yo sono, d’ado yo kosusaan,” koo, nga milok po su loga’on nosiro nu kosusaan om d’ado ido kolaiw, soko woinoi mokipupuanak-o nu subai koirasa nu osakit. ⁴ Nga kou yo po su kosusulodan ku, okon ko soko lobuw miau so kotuongan. Dai opatut ong kotigog kou ong ologa’ yo ponginsaadan nu Kinoringan nu lobuw dai poimaid, soko kotigog kou ong kuwai moonakou dai opongilaan lumoga’, ⁵ so’ kou yo po miau so onawau, ono yo opogboya’an kou nu Kinoringan. Toko yo po okon ko miau so kotuongan. ⁶ Ono yo ko’ adang toko yo moturuw-a soko lobuw wokon, nga mingat-ingat toko yo om dadan murigap-rigap, ⁷ so’ lobuw moturuw-o ya, moturuw umpak nu awi, om lobuw maawuk-o, musingowukan umpak nu awi. ⁸ Nga toko yo po miau so konowawan. Ono yo ko’ mingat-ingat toko yo. Tumatap toko yo poimaid so Tuhan, monamod nu lobuw wokon maid nu umarap sobana nu sopulan toko ya nu Kinoringan. Ono yo su pinokosindata toko mongingolig so toko. ⁹ Pinili’ toko nu Kinoringan okon-a ko tomod Niyo insaadan toko, nga sopulan toko Niyo nu iri kinopotoyan ni Tuhan Yisus Kristus. ¹⁰ Minatoi Iyo suat so toko, tayon ong miau toko musingkolaid mido so Iyo ong kopululi’ yo Iyo koimbagu, dai kiro nu miau toko po ka ko’ minatoi-o nu iya oono. ¹¹ Ono yo ko’ puiinsosamod kou yo om putotabang kou yo soko waalon muyu nu ono sono tu. ¹² Oo su kosusulodan ku, mindamo kai sobana nu orumato muyu yo wowaidon, iri mogkari’-kari’ mugogoma’on suat so kou, om pinili’ nu Kinoringan montuduk so kou ri. ¹³ Orumato muyu yo sobana nosiro, maid nu osamod suat so kiawi’ pinuwaal nosiro no so kou. Ikod kou yo puaalod, nga pususulut kou yo. ¹⁴ Oo su kosusulodan ku, biati muyu yo lobuw odoput mugogoma’on-o. Pobosago muyu yo inawo nu lobuw lulumaa’. Tobangi muyu yo ongo lobuw ooluk tobangon-o, om potaanon-o inawo muyu so kiawi’ lobuw. ¹⁵ Ingato muyu yo! Ikod kou yo kisuli’ so lobuw mongoraai so kou, ala’ nai’ pogkari’-kari’ kou yo dadan mokimuwarong om monabang nu wokon. ¹⁶ Subai dadan osanang inawo muyu no, ¹⁷ om pogdu’a kou yo dadan so Kinoringan. ¹⁸ Pongunsopot kou yo so Kinoringan nu onu yo po, insan osusa ko’ osanang kou. Ono yo su koinginan Niyo waalon muyu, so’ kopuido kou yo so si Kristus. ¹⁹ Kodi muyu yo poingkoyodo gogoma’on nu Atod nu Kinoringan, soko momoda’ nu apui. ²⁰ Om kodi muyu yo purogam-rogami pontudukan nu Kinoringan nilombus nai so kou, iri nituduk nu Atod nu Kinoringan so inawo nosiro ri. ²¹ Orotio muyu yo kiawi’ pontudukan, om ombo yo po owarong-i, ono yo su waidon muyu. ²² Tolikudi muyu yo kiawi’ koraayan. ²³ Muda-mudaan ong Kinoringan-o su monaak so toko nu kosonangan nu inawo, posiliw so kou nu bana-bana miau suat so Iyo. Muda-mudaan ong ipatan-a atod, inawo om koyuwan muyu no nu Kinoringan, sampai d’ado kosola’an muyu nu kologa’an koimbagu ni Yisus, Tuhan toko. ²⁴ Tantu tumanon-a ono nu Kinoringan so’ Iyo yo imaidon muyu om ototog Iyo sobana. ²⁵ Oo su kosusulodan, pogdu’a kou yo suat so kai. ²⁶ Polombuso muyu yo kodau nu samod mai tu so kiawi’ lobuw inong koimaidan, ponondu’an nu kopusulodan dii si Kristus. ²⁷ Mindamo aku so kou so tiningkuangon nu Tuhan, nu bosaa muyu yo surat iitu so tiningkuangon nu kiawi’ kosusulodan inong poimaid. ²⁸ Muda-mudaan ong d’ado ya pupus ni Tuhan Yisus Kristus mongoborakat so kou.