1 Pitrus

¹ - ² Oo su kosusulodan ku songapan nu Kinoringan, iri nokoias so wonuo nu Puntus, Galatia, Kapadukia, Asia om Bitinia. Itu yo surat ku, si Pitrus, pinongoorapan ni Yisus Kristus, niloga’ ku nai so kou. Muda-mudaan ong d’ado ya pupus nu Kinoringan mongoborakat om posanang nu inawo muyu. Pinili’ kou yo songopanon nu Kinoringan Amo toko, musuat nu notantu yo Niyo laid. Om inurug kou yo nu Atod nu Kinoringan nu d’ado koraayan, mugogoma’on suat-a so Kinoringan, su’ obingasip kou so si Yisus Kristus om ougasan nu raa’ Niyo. ³ Mongunsopot toko yo so Kinoringan, Amo ni Yisus Kristus, iri Tuhan toko! Otoop ong mongunsopot toko, so’ pagka sobana ko oluluudan Iyo so toko, tinaakan toko yo Niyo nu kowiawan wagu. Om ono yo su orapan toko nu oluli’an toko ong wagu, so’ noluli’an-o Niyo si Yisus Kristus. ⁴ Kiat nu ono, umarap toko po nu kaalap nu koworongan nosodia’ nu Kinoringan so lobuw songapan Niyo. Koworongan oono nitou’ Niyo so surga su’ dai ousiba’, rumobuk intawa lumiong. ⁵ Kiawi’ oono nosongapan muyu so’ nopoimaid kou yo so si Kristus. Kosiono ipatan kou nu kuasa nu Kinoringan, su’ bang pongoowi’an-o nu wonuo tu, kotorima’ kou nu kowiawan musingkolaid nosodia’ yo nu Kinoringan. ⁶ Pagka soko ono, sumudu’an kou yo pudi pona osonsara’ kou sontagal nu ono sono tu nu boroginis kosusaan. ⁷ Tomod-o po posimaid so kou koirasa nu kosusaan, nga pointolang nu bana-bana ya ka poimaid kou so si Yisus ko’ dai. Insan omas-o ya su musiba’, nga nisubo ya so apui su’ luun-luun sono omas. Koimaidan muyu boorogo po ko’ omas. Indadi subai kinaman-a su’ makin po sono opiot, om runat loga’an ni Yisus Kristus koimbagu, royowon, orumaton om bontugon kou sono so’ obana ya koimaidan muyu no. ⁸ Pudi pona dai kou nokosiou so Iyo nu gulu ri, osamod kou ya so Iyo. Om poimaid kou so Iyo pudi dai muyu osiou Iyo nu kosiono tu. Ono yo ko’ osudu’an kou sobana nu dai kointolang ong ontob-a nu totongaron koosudu’ muyu no, ⁹ so’ osopulan sono atod muyu kiat so ponginsaadan nu Kinoringan, iri orapon muyu nu kinopoimaidan muyu so si Kristus. ¹⁰ Kosopulan oono pinokoilo yo laid nu poo’abar nu Kinoringan silaid-i. Kiniro-kiro om minomirasat nosiro nu gama’ nu Kinoringan monapul nu lobuw poimaid so si Kristus so’ sobana ko maayo koworongan Niyo so toko. ¹¹ Poo’abar nu Kinoringan oono kinuasa nu Atod ni Kristus, om Atod oono minonuu’ so nosiro pokoilo laid suat nu kosonsora’an ni Kristus so wonuo tu, om kobontugan Niyo nu kotalib po kosonsora’an Niyo oono. Om minogkari’-kari’ nosiro mongilo ong onu koo ourug ono om sombiya. ¹² Nopokoilo Kinoringan so nosiro nu, kodau niabar nosiro no okon-a ko suat so iya nosiro gulu ri, nga suat so sunduron, ono yo kou. Om kosiono norongou muyu yo kodau oono kiat so lobuw pootuturan nu Abar Owarong suat so si Yisus, maid nu kuasa nu Atod nu Kinoringan sinuu’ kiat so surga, om insan susuu’on nu Kinoringan nga moki’iilo ya nu ono. ¹³ Pagka soko ono, mingat-ingat kou yo om dadan momikir nu onu yo po koinsanang nu inawo nu Kinoringan. Kimato muyu yo om umarap-o sobana nu borakat nitaak so toko nu kologa’an ni Yisus Kristus koimbagu. ¹⁴ Pagka inonakan kou yo nu Kinoringan, subai obingasip kou nu ponuu’an Niyo. Adang-o potuudan koinginan muyu oraai nu gulu ri, nu dai kou po koorati nu Abar Owarong suat so si Yisus Kristus. ¹⁵ Ala’ nai’, tondiang kou yo so gogoma’on oraai, soko Kinoringan, iri nopokaanak so kou su nokotondiang so gogoma’on oraai, ¹⁶ so’ nokosurat-o so Buuk nu Kinoringan nu, “Tondiang kou yo kiat so gogoma’on oraai, soko Aku su kotondiang,” koo ri. ¹⁷ Pagka pokoAmo toko nu Kinoringan koduung mogdu’a toko, patut orumaton toko Iyo laid nu miau toko po so wonuo tu, so’ mongukum Iyo nu kiawi’ lobuw musuat nu gogoma’on nosiro ido soido. ¹⁸ Noilaan toko yo nu nolukat toko yo kiat so adat d’ado kosudaan, iri nopusaka so odu aki toko ri. Om pinongolukat oono okon ko pirok intawa omas, iri rumaag-a, ¹⁹ sondiang ko iri yo raa’ ni Kristus nokotuntug nu sobana ko boorogo. Iyo yo su soko dumba d’ado koraayan ginaras niusaa’ so Kinoringan. ²⁰ Pinili’ yo Iyo nu Kinoringan nu dai po nowangun wonuo tu, om minintolang nu ono sono tu, nu mani-rani yo pongoowi’an nu wonuo tu monapul so kou. ²¹ Si Kristus-o su lalan muyu poimaid so Kinoringan, iri minongoluli’ so Iyo kiat so pinotoyan om nopobantug so Iyo. Indadi, kosiono poimaid kou yo sono nu Kinoringan om otoroido umarap so Iyo. ²² Pagka poimaid kou yo nu pontudukan obana, noidu’ yo sono koraayan kiat so inawo muyu om otoroido yo inawo muyu no osamod nu inong lobuw poimaid. Indadi, pusosamod kou yo nu otoroido inawo. ²³ Kiat so koimaidan muyu nu tinongaran nu Kinoringan musingkolaid, tinaakan kou nu kowiawan wagu nu okon ko kiat so lobuw, nga kiat so Kinoringan Amo toko, iri miau musingkolaid. ²⁴ Nokosurat-o so Buuk nu Kinoringan nu, “Kiawi’ lobuw so wonuo tu muinong nu rikut. Koorumatan nosiro muinong nu wusak. Lumonot-o po rikut-o, tumontag-o wusak-o. ²⁵ Nga ong tinongaran nu Kinoringan, otatap musingkolaid,” koo ri. Tinongaran oono yo su Abar Owarong, iri nituturan so kou ri.

¹ Pagka lobuw wagu kou yo sono, odai muyu yo kiawi’ gogoma’on oraai. Adang-o sono mongoburunsut, musingkopoimaid-poimaid, mokimurindi intawa pokoraai nu wokon. ² Urug kou yo nu soko lolaing koopuanak, moingin dadan tumiti’, ono yo dadan mokirorongou nu tinongaran nu Kinoringan, su’ opiot koimaidan muyu om osopulan kou. ³ Soko iri nokosurat so Buuk nu Kinoringan nu, “Nokoirasa kou yo nu koworongan nu TUHAN,” koo ri. ⁴ Pagka soko ono, loga’ kou yo so Tuhan, iri soko watu nga miau, niada’ nu lobuw so’ ponontaman nosiro nu d’ado kosudaan. Nga sobana yo, watu oono pinili’ nu Kinoringan, om kikosudaan sobana suat so Iyo. ⁵ Kou nga soko watu ya miau. Pagka soko ono, wiau kou yo nu owarong su’ pokayon kou nu Kinoringan, soko watu pokayon nu moomuwaloi. Pinili’ kou Niyo osiliw nu moomugogoma’on suat so Iyo, om gogoma’on oono yo su soko niusaa’ muyu so Kinoringan sobana ko koinsanang nu inawo Niyo, maid nu gogoma’on ni Yisus Kristus so kou. ⁶ Nokosurat-o so buuk nu Kinoringan tinangar Niyo gulu ri nu, “Rongowo muyu yo! Pinili’ Ku yo ido watu boorogo, nipolak Ku dii so Siun ourug nu soko watu obasag om kaalib po ko’ kiawi’ ponimpuunan nu waloi, om isai poimaid so Iyo dai oiman-iman ong wagu,” koo ri. ⁷ Suat so kou nu poimaid so Iyo, sobana ko boorogo Iyo, nga suat so lobuw nu dai poimaid so Iyo, niada’ nai’ Iyo nosiro, soko iri nokosurat so Buuk nu Kinoringan nu, “Iri watu niada’ nu moomuwaloi, oogot po nai’ kosudaan ko’ kiawi’ watu so waloi oono,” koo ri. ⁸ Nokosurat po so Buuk nu Kinoringan nu, “Watu oono kosoduan nu lobuw om kotunguban nosiro,” koo ri. Notantu yo laid nu gulu ri nu kosadu nosiro, so’ dai nosiro poimaid nu tinongaran nu Kinoringan. ⁹ Nga suat so kou, kou yo su bansa pinili’ nu Kinoringan. Kou yo su inurug nu soko puimpugan nu imam mugogoma’on so Kinoringan, Raja toko. Kou yo su puimpugan pinotondiang Niyo suat so Iyo. Kou yo su nosongapan nu Kinoringan. Pinili’ kou yo paabar nu waalon Niyo ongo wowarong. Iyo yo su nopolabus so kou kiat so kotuongan om poian so koonawau Niyo, nu dai odapat potarang ong ontob-a nu totongaron. ¹⁰ Gulu ri okon ko songapan kou nu Kinoringan, nga kosiono nosongapan kou yo sono Niyo. Gulu ri dai kou somodan nu Kinoringan, nga kosiono tu sinomodan kou yo sono Niyo. ¹¹ Oo su kosusulodan koluluudan ku. Kou yo po soko porantau, dai ya otatap molak so wonuo tu. Ono yo ko’ mindamo aku so kou nu adang-o sumimpor nu gogoma’on oraai nu lobuw dai poimaid, iri soko alod-alod lumawan so kou. ¹² Poworongon-o kogoyaan muyu so tiningkuangon nu lobuw dai poimaid so si Kristus, su’ pokoraayon kou pona nosiro, osiowan nosiro nu owarong-a kogoyaan muyu om mongobantug sono nosiro nu Kinoringan nu runat kologa’an Niyo. ¹³ Pagka poimaid kou so Tuhan toko Yisus Kristus, subai mongimaid kou ya nu kiawi’ lobuw mogkuasa so wonuo tu, ungkiat-o so raja ¹⁴ kumoo yo so lobuw pinili’ Niyo mongukum nu lobuw oraai, om mongorumat nu lobuw owarong. ¹⁵ Moingin Kinoringan nu poingkoyodon muyu lobuw mutotongaron nu d’ado kosuatan kiat so kogoyaan muyu owarong-o. ¹⁶ Okon-o ko uripon kou nu lobuw, nga adang-o momikir nu kopogbaya’ kou sono momaal nu onu-onu ya koinginan muyu. Ala’ nai’ pomaal kou yo nu onu yo po koinginan nu Kinoringan so’ uripon kou yo Niyo. ¹⁷ Orumato muyu yo kiawi’ lobuw. Somodi muyu yo inong muyu poimaid. Orumato muyu yo sobana Kinoringan, om orumato muyu yo raja. ¹⁸ Kou su ongo uripon, osipo muyu yo moonguripon so kou no om orumato muyu yo sobana. Okon ko ono ya owarong om otoua so kou no su osipon muyu, nga ono pona obisig so kou no. ¹⁹ Bang sonsora’on kou pudi okon ko kosola’an muyu, om tumaan kou ya mongirasa nu kosonsora’an oono so’ oilaan muyu onu koinginan nu Kinoringan, borokatan kou ya Niyo. ²⁰ D’ado ya kosudaan pudi otaan kou mongirasa nu ponginsaadan ong kisala’ kou. Nga bang otaan kou mongirasa nu kosonsora’an pudi momaal kou ya nu owarong, borokatan kou nu Kinoringan. ²¹ Ono yo tomod nu Kinoringan momili’ so kou, so’ si Kristus gulu yo nosonsara’ suat so kou om ono yo su otoop waidon muyu om minsuw kou nu kogoyaan Niyo. ²² Dai insan Iyo momaal nu koraayan om dai insan monimbaal. ²³ Pudi pona inindoraai Iyo nu lobuw, dai ya Iyo sinumuli’. Pudi pona nosonsara’ Iyo, dai ya Iyo minogintori. Nikomouli’ ya Niyo iri kiawi’ so Kinoringan, ono Moongobisara’ nu ooluk-o. ²⁴ Si Kristus-o su ginumanti’ oinsaadan suat so koraayan toko nu pinotoyan Niyo so kayu salib-i, tayon ong dai toko sumundur momaal nu koraayan, nga miau maid nu kogoyaan owarong so’ nosopulan toko yo nu pilat Niyo ri. ²⁵ Gulu ri nopalid kou soko dumba, nga kosiono inowit toko yo sono mululi’ so Moongipat so toko ri.

¹ Soko ono ya pudi kou su woinoi kisawo yo, waido muyu yo sawo muyu, su’ bang kuwai so kou kisawo nu dai poimaid nu tinongaran nu Kinoringan, insan dai tongaron muyu nosiro ong osiowan nosiro kogoyaan muyu, poimaid sono nosiro so si Kristus, ² so’ osiou nosiro kogoyaan muyu owarong om kiorumat. ³ Adang-o dadan momikir suat nu poomusimparu’ nu ontob-a nu koyuwan, soko mongatag nu obuk, momakai nu poroomasan intawa mupokakas nu ongo totaas. ⁴ Sondiang ko, kooparu’ nu kogoyaan muyu no otondu’an so koototog om koobaba’ muyu. Ono yo su kooparu’ dai tumalup musingkolaid om sobana ko boorogo so Kinoringan. ⁵ Soko itu yo poomusimparu’ nu kowoinoyan uumarap so Kinoringan nu gulu ri, ono yo mongimaid nu sawo nosiro. ⁶ Soko ono ya pudi si Sara, minongimaid so si Abraham, sawo niyo ri, sampai monontuan iyo so si Abraham. Om kou su kowoinoyan nu kosiono tu, ourug kou nu inonakan ni Sara ong momaal kou nu owarong om dai lumaa’ nu onu-onu ya koogutan muyu. ⁷ Soko ono ya pudi kou su kokusoyan kisawo yo, poworongon-o kogoyaan so sawo muyu. Oilaan muyu nu obasag kou po ko’ nosiro, nga orumato muyu yo nosiro so’ kopusaka ya pudi nosiro nu nitaak nu Kinoringan, ono yo kowiawan musingkolaid. Waalo muyu yo ono su’ rongowon du’a muyu no nu Kinoringan. ⁸ Itu yo su tomod om onsi nu totongaron ku so kou kiawi’, ono yo subai muido inawo om songinong pikiran muyu. Pusosamod kou yo soko sonsulod, mululuud om obaba’ inawo. ⁹ Bang raayon om poki’an kou nu lobuw, adang-o sumuli’. Ala’ nai’ pogdu’a kou yo so Kinoringan, mindamo nu borokatan lobuw mongoraai so kou no, so’ ono yo su kinopomaawan nu Kinoringan so kou, su’ kotorima’ kou nu borakat nijanji Niyo. ¹⁰ Nokosurat-o so Buuk nu Kinoringan nu, “Isai mokiirasa nu owarong om mokitotogui, adang-o mutangar nu oraai suat so lobuw, om adang-o ototom mongaakal. ¹¹ Dai yo iyo kowasa momaal nu koraayan, nga momaal-o nu owarong, om subai mogkari’-kari’ yo iyo mokimusulut. ¹² So’ ipatan nu TUHAN lobuw momaal nu koinginan Niyo, om tobangon Niyo ong mokiponobangon, nga lobuw oraai gogoma’on, lowanon Niyo,” koo ri. ¹³ Tantu d’ado mononsara’ so kou, ong mogkari’-kari’ kou momaal nu owarong. ¹⁴ Nga insan osonsara’ kou pudi owarong gogoma’on muyu, osanang kou ya. Indadi adang-o lumaa’ so isai-isai ya, om adang-o gumagau. ¹⁵ Ala’ nai’ orumato muyu yo si Kristus so inawo muyu, so’ Iyo yo Tuhan toko. Sumodia’ kou yo dadan potarang so isai-isai ya mongoduat suat so orapan muyu so si Yisus Kristus. ¹⁶ Waalo muyu yo ono nu owarong om kiorumat, okon ko sosog-sosogan-a. Waalo muyu yo onu oilaan muyu nu obana, su’ bang indoraayon kou nu lobuw, nosiro ya sono su oiyu’an, so’ osiou kogoyaan muyu owarong om otoop so lobuw poimaid so si Kristus. ¹⁷ Bang ono su koinginan nu Kinoringan nu osonsara’ kou, owarong po osonsara’ kou mugogoma’on nu owarong, ko’ osonsara’ mugogoma’on nu oraai. ¹⁸ Minatoi-a pudi si Yisus Kristus mongidu’ nu koraayan toko, nga insan-a. D’ado muad koraayan ong Iyo, nga minatoi-a Iyo gumanti’ so toko lobuw kikoraayan, su’ oowit toko Niyo mululi’ so Kinoringan. Iri yo po koyuwan Niyo ri pinatoi nu lobuw, nga Atod Niyo ri miau-a. ¹⁹ Om Atod Niyo ri minian potuturan nu kodau kiat so Kinoringan so ongo atod kinurung so polak nu lobuw minatoi. ²⁰ Atod-o po iiri nga atod nu lobuw minatoi, iri dai minongowaid nu pontudukan nu Kinoringan nu iya po ni Nuu gulu ri. Iya iiri, otatap inawo nu Kinoringan mongindad so nosiro nu rumorogo nu laid ni Nuu momaal nu kapal-i. Walu yo koyuwan dai nolosod nu loni’ maayo ri, iri nokosakoi so kapal-i. ²¹ Sungoi nu loni’ iiri yo su poinongan nu pongodiu’an, iri kopomiau so kou nu ono sono tu. Pongodiu’an oono okon ko orati mongugas nu sinaim kiat so koyuwan toko, sondiang ko janji muyu so Kinoringan maid nu inawo owarong nu dadan otoroido inawo muyu momaal nu obana. Pongodiu’an oono kowiau so kou, so’ noluli’an-o si Yisus Kristus kiat so pinotoyan, ²² om nokoindakod-o so surga. Kosiono mogkuasa Iyo maid so Kinoringan nu kiawi’ susuu’on om kiawi’ kikopogboya’an om kikuasa dii.

¹ Indadi pagka nokoirasa yo si Kristus nu kosonsora’an nu koyuwan, pikiran muyu subai soko pikiran-a Niyo sampai kosodia’ kou sumonsara’, so’ iri yo po lobuw nosonsara’, dai yo sono moingin sumundur momaal nu koraayan. ² Ono yo ko’, laid muyu po miau so wonuo tu, pomaal kou yo dadan nu onu yo po koinginan nu Kinoringan, okon ko koinginan kondiri. ³ Olaid kou yo sobana momaal nu onu yo po kototoman nu ongo lobuw dai poimaid nu Kinoringan. Gulu ri dai owarong kogoyaan muyu, ono yo monongkowoinoyan kou, moomusingawuk, osokakan kou murami-rami muinum, om mongusaa’ kou nu tinindobuw pudi koinsakit ono nu inawo nu Kinoringan. ⁴ Nga kosiono tu oiranan sono so kou ongo lobuw dai poimaid nu Kinoringan, so’ dai kou yo sono maid-waid so nosiro momaal nu koraayan d’ado puontoban. Ono yo ko’ raai-raayon kou nosiro. ⁵ Nga ong wagu, lobuw mongoraai-raai so kou no subai mundii potarang nu koraayan nosiro so tiningkuangon nu Kinoringan, nu nokosodia’ yo mongobisara’ nu lobuw miau po om minatoi-o. ⁶ Ono yo ko’ nokotuturan-a pudi Abar Owarong oono so lobuw minatoi-o, tayon ong miau atod nosiro soko Kinoringan su miau, pudi pona minatoi koyuwan nosiro soko kiawi’ lobuw nga matoi-a. ⁷ Oduruk-o pongoowi’an nu onu-onu ya so wonuo tu. Ono yo ko’, kodosi muyu yo kowiawan muyu no om mingat-ingat su’ kopogdu’a kou. ⁸ Nga itu po su oogot sobana, ono yo pusosamod kou yo nu otoroido inawo, so’ bang musosamod kou, ado yo sono pongoondom muyu nu kosola’an muyu gulu ri. ⁹ Poindokodo muyu yo lobuw so waloi muyu, om adang-o rumoraayan nu ogosoyunan kou. ¹⁰ Nokotorima’ kou yo nu musosondiang nitaak nu Kinoringan. Indadi, pokayo muyu yo nitaak nu Kinoringan oono monabang nu lobuw wokon, ono yo polatas nu koworongan nu Kinoringan so nosiro. ¹¹ Isai notaakan nu koilaan montuduk, potuduk-o sobana nu tinongaran nu Kinoringan. Isai notaakan nu koinginan monabang nu lobuw wokon, monabang-o maid nu kobosagan kiat so Kinoringan, su’ orayou Iyo so onu yo po, so’ tobangon iyo ni Yisus Kristus momaal nu ono. Kinoringan-o su kikuasa om otoop bontugon musingkolaid. Amin. ¹² Oo su kosusulodan sinomodan ku. Ikod kou yo koiranan nu ologa’an kou nu kosonsora’an owogat sobana monginam so kou, om soko sondiang-diang-o sono iri koirosaan toko, so’ ono yo po nga noopotan toko yo. ¹³ Ala’ nai’ sumudu’an kou yo nu nokowaid kou so si Kristus osonsara’. Bang soko ono, kaalib po koosudu’ muyu nu kologa’an Niyo koimbagu maid nu kobontugan Niyo. ¹⁴ Osanang kou yo ong raai-raayon kou so’ mompomaid kou ni Kristus. Ono yo su pongilaan nu waid-waidon kou nu Atod nu Kinoringan, ono yo Atod obantug. ¹⁵ Adang-o kuwai so kou osonsara’ suat nu gogoma’on iitu, ono yo moomatoi nu lobuw, moonakou, odouraka, intawa poopuasa’ nu lobuw. ¹⁶ Nga bang osonsara’ kou so’ poimaid kou so si Yisus Kristus, adang-o moiyu’an nu ono, ala’ nai’ mongunsopot kou yo so Kinoringan so’ mompomaid kou Niyo. ¹⁷ Oduruk-o tumimpuun Kinoringan mongobisara’ nu wonuo tu, om toko yo su poguluan Niyo mongobisara’. Indadi, bang toko yo su poguluan Niyo mongobisara’, aagut po lobuw dai poimaid nu Abar Owarong kiat so Iyo. ¹⁸ Soko ono yo nokosurat so Buuk nu Kinoringan nu, “Bang lobuw pona owarong-o nga orogon-a osopulan, makin po lobuw oraai nu dai poimaid so Kinoringan,” koo ri. ¹⁹ Indadi, isai osonsara’ so’ ono yo su koinginan nu Kinoringan, sumundur-o mugogoma’on nu owarong, om pokomouli’ nu kowiawan niyo so Kinoringan, iri Minomangun so nosiro, om monuman nu janji Niyo.

¹ Moingin aku montuduk so kou su wowaidon nu puimpugan nai no. Aku yo po wowaidon nu puimpugan om nosiou ku yo gulu ri si Yisus nosonsara’. Om oilaan ku nu kosimpor aku ya obantug ong wagu nu pointolangan nu kobontugan ni Kristus so kiawi’ lobuw. Mindamo aku so kou wowaidon wokon nai nu, ² olila’ kou mongipat nu puimpugan, iri niarap so kou nu Kinoringan musuat nu koinginan Niyo, om okon ko sosog-sosogan-a inawo muyu no, om okon ko mangut-a nu siin, nga bana-bana yo nu moingin kou mugogoma’on. ³ Adang-o dadan monuu’ nu lobuw ipatan muyu no, nga miau-o maid nu kogoyaan owarong om minsuw sono nosiro so kou. ⁴ Bang waalon muyu soko ono, kotorima’ kou nu odia nu sobana ko owarong om dai musiba’, iya nu kologa’an ni Yisus Kristus, ono yo Wowaidon nu kiawi’ moongipat. ⁵ Om kosiono mutangar aku so kou su koomulokan. Waido muyu yo tangar nu lobuw ongo tutuo no yo. Adang kou yo moglabi-labi nga putotabang kou yo maid nu obaba’ inawo, so’ nokosurat-o so Buuk nu Kinoringan nu, “Lowanon nu Kinoringan iri lobuw moglabi-labi, nga oluluudan Iyo nu lobuw obaba’ inawo,” koo ri. ⁶ Ono yo ko’ pusimbaba’ kou yo so tiningkuangon nu Kinoringan nu maayo kuasa, iri koponabang so kou. Bang waalon muyu soko ono, popongkaton kou ong ologa’ yo koinginan Niyo popangkat so kou. ⁷ Komoulii muyu yo so Kinoringan kiawi’ kogogawan muyu, so’ Iyo yo su mongipat so kou. ⁸ Mingat-ingat om kodosi muyu yo! Wowaidon nu Moinat oono yo alod-alod muyu. Mompanou iyo dii-tuui modium nu lobuw poimaid mongusiba’ nu koimaidan nosiro, soko ingongansad witilon marom-garom modium nu kulos-kulos tompaan. ⁹ Osonsara’ kou pona, sundur kou yo poimaid, so’ kosusulodan muyu inong poimaid so si Kristus so pilolongkop nu wonuo tu nga osonsara’ ya soko kou. ¹⁰ Nga, kolabus kou yo po kiat so kosonsora’an muyu, taakan kou nu Kinoringan nu kosonangan nu inawo. Pototog, pobasag om popiot Iyo so kou. Kinoringan-o su sobana ko owarong, iri minomili’ so kou maid so si Kristus mongirasa nu kobontugan Niyo musingkolaid. ¹¹ Iyo yo su mogkuasa musingkolaid. Amin! ¹² Surat oipak ku iitu no, niposurat ku so si Silas, sulod opongoorapan ku om ototog. Moingin aku mongobiat so kou nu itu yo su abar obana suat nu koworongan nu Kinoringan. Ikod kou yo kilaiw kiat so koworongan oono. ¹³ Lobuw poimaid so si Yisus Kristus tuui so Babilun, iri pinili’ nu Kinoringan soko kou, pokodau so kou. Soko ono ya pudi pinokaanak ku, si Markus. ¹⁴ Pukokodau-kodau kou yo ponondu’an nu kopusulodan muyu so koimaidan so si Kristus. Mindamo aku so Kinoringan su’ posonangon-a Niyo inawo muyu, ono nokopuido yo dii so si Kristus.