1 Yuanis
11 Onsi yo po nu surat iitu no nga suat so si Yisus Kristus. Iyo yo su Tinongaran kowiau. Tinongaran oono kuwai yo nu dai po nowangun wonuo tu. Norongou mai yo tinongaran Niyo, om mato mai yo su nokosiou so Iyo. Notondu’an mai yo Iyo om nokuyutan-o nu palad mai. 2 Nokointolang-o Iyo so wonuo tu om nosiou mai yo. Ono yo ko’ niabar mai so kou suat so si Kristus. Om Iyo yo su Tinongaran kowiau musingkolaid, nokoido so Kinoringan, Amo Niyo om nokointolang-o tuui so toko. 3 Onu yo po nosiou om norongou mai, ono yo su nituturan mai so kou, su’ koido kou so kai om kowaid mongirasa nu kowiawan maid nu Amo om Anak Niyo si Yisus Kristus. 4 Sinurat mai itu no so kou su’ orunsum koosudu’ nu inawo toko. 5 Itu yo su tinongaran norongou mai kiat so Anak Niyo om nituturan mai so kou, ono yo Kinoringan-o su onawau om d’ado muad otuong nai so Iyo. 6 Bang mutangar toko nu koido kowiawan toko so Iyo, nga kakal po molak toko so kotuongan, ono yo oraai kogoyaan toko, momudut toko ya om dai toko momaal nu onu yo po obana. 7 Nga bang molak toko so konowawan, ono yo owarong kogoyaan toko soko Kinoringan, koido toko sono so lobuw poimaid, om iri raa’ ni Yisus, Anak nu Kinoringan, mongidu’ nu kiawi’ koraayan toko. 8 Bang mutangar toko nu d’ado ya koraayan toko, musingakal toko ya, om dai mido Kinoringan so toko. 9 Nga bang okunon toko so Kinoringan kiawi’ koraayan toko, ompunon toko sono Niyo om idu’on Niyo kiawi’ nowaal toko osala’, so’ Iyo yo po dai insan mongaakal om tumanon Niyo janji Niyo. 10 Nga bang olimon toko koraayan toko, koorotian pokowudut toko nu Kinoringan, so’ minutangar Iyo nu, “Kiawi’ lobuw kikoraayan,” koo. Bang soko ono, d’ado tinongaran nu Kinoringan so inawo toko.
21 Oo su inonakan ku, monurat aku nu itu so kou, tayon ku ong dai kou kopomaal nu koraayan. Nga, bang nokopomaal ido koyuwan nu koraayan, kuwai ido koyuwan popusulut so toko so Kinoringan, ono yo si Yisus Kristus, iri d’ado muad koraayan-i. Mindamo Iyo so Kinoringan, Amo Niyo suat so toko, 2 om Iyo yo su sogit suat nu kiawi’ koraayan toko. Om okon ko suat so koraayan toko ya, nga koraayan pona nu kiawi’ lobuw. 3 Bang waidon toko onu yo po nisuu’ nu Kinoringan, ono yo pongilaan nu kotondu’ toko so Iyo. 4 Bang kuwai mutangar nu, “Kotondu’ aku nu Kinoringan,” koo, nga dai ya waidon niyo ponuu’an nu Kinoringan, lobuw oono moomudut om dai mido Kinoringan so iyo. 5 Nga isai mongowaid nu tangar nu Kinoringan, lobuw oono yo su sobana ko osamod nu Kinoringan. Ono yo ponondu’an nu koido kowiawan toko so Kinoringan. 6 Isai mutangar nu otatap iyo koido so Kinoringan, subai minsuw nu kogoyaan ni Yisus Kristus. 7 Oo su kosusulodan ku, ponuu’an-o po suraton ku so kou iitu no okon-a ko ponuu’an owagu. Ponuu’an iitu olaid-o norongou muyu, om ono yo su notorima’ muyu kiat nu timpuun muyu poimaid so si Kristus. 8 Soko ono pona, ponuu’an laid sinurat ku iitu no soko ponuu’an owagu ya, so’ ponuu’an oono nokointolang-o so kowiawan ni Kristus om so kowiawan muyu. Soko ono yo ourug, so’ dai yo olaid lumiong kotuongan, om tumogu’ yo sono onawau kiat so Kinoringan. 9 Isai mutangar nu miau iyo so onawau, indama’ obisig-a nu sulod niyo, kakal-a iyo miau so kotuongan. 10 Isai osamod nu sulod niyo, iyo yo su miau so konowawan, om d’ado ido pona gogoma’on niyo koowit nu lobuw wokon momaal nu koraayan. 11 Nga isai obisig nu sulod niyo, miau po iyo so kotuongan. Maid iyo so koraayan soko lobuw molak so kotuongan. Dai iyo kopomikir ong onu owarong waalon niyo, so’ soko notongkuban inawo niyo nu kotuongan. 12 Oo su inonakan ku, pagka noompunan kou yo ni Kristus kiat so koraayan muyu ri, monurat aku nu itu so kou. 13 Oo su ongo amo, pagka notondu’an muyu yo si Kristus, iri kuwai yo kiat nu togna ri, monurat aku nu itu so kou. Oo su koomulokan, pagka nodoog muyu yo Wowaidon nu Moinat, monurat aku nu itu so kou. 14 Oo su inonakan, pagka notondu’an muyu yo Amo, ono yo Kinoringan, monurat aku nu itu so kou. Oo su ongo amo, pagka notondu’an muyu yo Iyo, iri kuwai yo nu dai po nowaal wonuo tu ri, monurat aku nu itu so kou. Oo su koomulokan, pagka obasag kou, om nikorod muyu so inawo tinongaran nu Kinoringan, om nodoog muyu yo Wowaidon nu Moinat, monurat aku nu itu so kou. 15 Adang-o osamod nu wonuo tu intawa onu-onu ya so wonuo. Bang osamod kou nu wonuo tu, dai kou osamod nu Amo muyu, ono yo Kinoringan. 16 Onu yo po so wonuo tu okon ko kiat so Kinoringan, ono yo koinginan nu lobuw oraai, om onu yo po osiou om pokisosongopanan sono, om onu yo po kopongondosan. 17 Wonuo tu yo po om kiawi’ asuw-o, ono koinginan nu lobuw, lumiong-a ong wagu. Nga isai mongowaid nu koinginan nu Kinoringan, miau musingkolaid. 18 Oo su kosusulodan ku, oduruk-o pongoowi’an nu wonuo tu! Nokaabar-o so kou nu gulu ri nu kuwai lumoga’ nu Alod-alod ni Kristus. Na, kosiono tu nokologa’ yo osuang lumawan so Iyo, om ono yo ponondu’an nu oduruk-o pongoowi’an nu wonuo tu. 19 Nosiro oono ungkiat-a tuui so toko, nga tinumondiang nosiro so’ okon-a ko bana-bana nu koransum nosiro so toko. Bang poimaid nosiro sobana soko toko, koransum-a nosiro so toko. Nga pagka tinumondiang-o nosiro kiat so toko, otarang-o sono nu d’ado ido so nosiro koransum so toko. 20 Nga, kou yo po nokuasa yo nu Atod nu Kinoringan nitaak ni Yisus Kristus. Ono yo ko’ koorati kou nu pontudukan obana suat so si Kristus. 21 Pagka koorati kou yo nu pontudukan obana om noilaan muyu yo nu d’ado wuwudut so pontudukan oono suat so Kinoringan, ono yo ko’ monurat aku nu itu so kou. Dai ya su monurat nu itu so kou ong dai kou po koorati nu pontudukan obana oono. 22 Ono yo su moomudut lobuw mutangar nu, si Yisus-o po okon-a ko Raja Nijanji nu Kinoringan. Lobuw oono yo su Alod-alod ni Kristus, mongolim iyo nu Amo om Anak. 23 Isai mongolim nu si Yisus Anak nu Kinoringan, mongolim-a nu Amo, nga isai mongakun nu si Yisus-o su Anak nu Kinoringan, mongakun-a nu Amo. 24 Pagka soko ono, onu yo po norongou om inimaid muyu kiat nu togna nu, si Yisus-o su Anak nu Kinoringan, pototapo muyu yo ono so inawo muyu. Bang pototapon muyu ono so inawo muyu, miau kou koido so Anak om so Amo. 25 Itu yo su nijanji ni Kristus kondiri so toko, ono yo kowiawan musingkolaid. 26 Tomod ku yo po monurat nu itu so kou, pokoilo nu kuwai lobuw moingin mongaakal so kou. 27 Nga, kou yo po tinaakan-o ni Kristus nu Atod nu Kinoringan mogkuasa so kou. Om laid po Niyo mogkuasa so kou, dai muru’ tudukan kou po nu lobuw, so’ Atod oono yo kondiri su montuduk so kou nu onu yo po, om kiawi’ nituduk Niyo no obana, okon-a ko owudut. Indadi, waido muyu yo pontudukan nu Atod oono, om totog kou yo mido so si Kristus. 28 Oo su inonakan ku, totog kou yo mido so si Kristus, su’ bang lumoga’ Iyo koimbagu so wonuo tu, kosoromo toko tumingkuang so Iyo om dai sumusut oiyu’an. 29 Noilaan muyu yo nu kowiawan-o po ni Kristus mongowaid nu koinginan nu Kinoringan, om noilaan muyu ya nu isai miau mongowaid nu koinginan nu Kinoringan, iyo yo su anak nu Kinoringan.
31 Orotio muyu yo nu osamod sobana Kinoringan, Amo so toko, sampai mononganak Iyo so toko, om toko yo nai’ su inonakan nu Kinoringan. Nga lobuw so wonuo tu dai koilo nu toko yo po inonakan nu Kinoringan, so’ dai kotondu’ nosiro so Iyo. 2 Oo su kosusulodan ku, inonakan toko yo sono nu Kinoringan, nga dai po oilaan ong onu ourug so toko ong wagu. Nga, bang lumoga’ koimbagu si Kristus, oilaan toko yo nu osiliw toko muinong so Iyo so’ osiou toko sono Iyo. 3 Isai yo po so toko mongaarap nu osiliw soko si Kristus nu loga’an Niyo koimbagu no, subai mogkimat nu kogoyaan niyo nu dai yo momaal nu koraayan, soko si Kristus su d’ado koraayan. 4 Iri yo po lobuw momaal nu koraayan, lumawan nu ukum nu Kinoringan, so’ orati yo po nu koraayan nga dai mongowaid nu ukum nu Kinoringan. 5 Noilaan muyu yo nu tomod-o po ni Kristus lumoga’ so wonuo tu mongidu’ nu koraayan toko, om Iyo yo po d’ado muad koraayan. 6 Kiawi’ lobuw nokoido yo so si Kristus, dai yo sumundur momaal nu koraayan, nga isai sumundur-a momaal nu koraayan dai insan kosiou intawa kotondu’ so Iyo. 7 Oo su inonakan ku, adang-o musimaid pudi kuwai lobuw momalid so kou. Isai momaal nu koinginan nu Kinoringan, iyo yo su anak nu Kinoringan, soko si Kristus. 8 Iri yo po lobuw sompini momaal nu koraayan, iyo yo su nokuasa nu Wowaidon nu Moinat, so’ Wowaidon nu Moinat-o yo su moomaal nu koraayan kiat nu togna. Ono yo ko’ linumoga’ Anak nu Kinoringan, mongusiba’ nu gogoma’on nu Wowaidon nu Moinat oono. 9 Lobuw nosiliw-o nu anak nu Kinoringan, dai yo sumundur momaal nu koraayan, so’ nokuasa yo iyo nu Atod nu Kinoringan. Pagka Kinoringan-o su Amo niyo, dai yo iyo sumundur po momaal nu koraayan. 10 Itu yo su kopusondiangan nu anak nu Kinoringan om anak nu Wowaidon nu Moinat, ono yo isai dai momaal nu koinginan nu Kinoringan, intawa dai oluluudan nu sulod niyo, okon ko anak nu Kinoringan. 11 Itu yo pontudukan norongou muyu nu gulu ri, ono yo musosamod toko yo. 12 Adang-o minsuw so si Kain. Kinuasa iyo nu Wowaidon nu Moinat, om pinatoi niyo sono sulod niyo ri. Pinatoi niyo sulod niyo ri so’ kiawi’ winaal nu sulod niyo ri obana, nga kiawi’ winaal niyo nokosala’. 13 Oo su kosusulodan ku, pagka soko ono, adang-o oiranan ong bisigon kou nu lobuw so wonuo tu. 14 Oilaan toko nu okon-o ko soko lobuw minatoi toko, nga miau toko yo sono, so’ osamod toko nu kosusulodan toko. Lobuw dai osamod nu sulod niyo, kakal-a matoi musingkolaid. 15 Isai obisig nu sulod, soko moomatoi iyo, om oilaan muyu nu lobuw moomatoi d’ado kowiawan musingkolaid. 16 Itu yo koilaan toko ong nokuro su monamod toko nu wokon, ono yo nikomouli’ yo ni Kristus koyuwan Niyo matoi suat so toko. Indadi, toko nga subai pokomouli’ ya nu koyuwan toko suat so kosusulodan toko. 17 Bang kuwai lobuw okaya kosiou nu sulod niyo kikosimpitan, nga dai ya taakan niyo nu kosukup-sukupan sulod niyo oono, dai koputangar iyo nu osamod iyo nu Kinoringan. 18 Oo su inonakan ku, adang-o osamod ong ontob-a nu tangar. Bang osamod kou, pointolango muyu yo ono so gogoma’on muyu owarong-o, ponondu’an nu sobana ko osamod kou. 19 Ono yo koilaan toko nu inonakan toko yo bana nu Kinoringan, om osanang inawo toko so tiningkuangon Niyo. 20 Bang momikir toko nu dai toko otoop so tiningkuangon nu Kinoringan, oilaan toko nu kaalib po koilaan nu Kinoringan so pikiran toko, om onu yo po oilaan-a Niyo. 21 Indadi bang dai toko momikir soko ono, kosoromo toko sono tumingkuang so Kinoringan mogdu’a, 22 om onu yo po indomoon toko so Iyo, tumbaidon-a Niyo, so’ mongowaid toko ya nu ponuu’an Niyo om koinsanang nu inawo Niyo. 23 Monuu’ Iyo so toko poimaid nu Anak Niyo, ono yo si Yisus Kristus, om subai osamod toko nu inong lobuw, soko iri nokosuu’ yo ni Kristus so toko nu gulu ri. 24 Isai momaal nu ponuu’an nu Kinoringan, koido so Kinoringan, om mido-ido Kinoringan so iyo. Om oilaan toko ya nu mido-ido Kinoringan so toko so’ nokuasa toko yo nu Atod Niyo.
41 Oo su kosusulodan ku, adang-o osikap poimaid nu lobuw mutangar nu nokuasa nosiro nu Atod nu Kinoringan. Kinami muyu po laid nosiro su’ oilaan muyu nu bana ka nu Atod nu Kinoringan su mogkuasa so nosiro intawa okon-a, dama’ osuang-o lobuw musingkopoo’abar mongkop-longkop. 2 Soko itu yo gama’ muyu monginam nu atod oono nu Atod ka nu Kinoringan intawa okon, ono yo isai mongakun nu linumoga’ si Yisus Kristus so wonuo tu om sinumiliw nu lobuw, iyo yo kinuasa nu Atod nu Kinoringan. 3 Nga, isai dai mongakun nu ono suat so si Yisus, dai iyo kinuasa nu Atod nu Kinoringan. Lobuw oono kinuasa nu atod nu Alod-alod ni Kristus. Norongou muyu yo nu lumoga’ atod oono, om kosiono nokologa’ yo. 4 Nga, kou yo po songapan-o nu Kinoringan. Nodoog muyu yo ongo poo’abar moomudut, so’ kikuasa po Atod nu Kinoringan minogkuasa so kou no ko’ atod mogkuasa so lobuw songapan nu wonuo tu. 5 Lobuw musingkopoo’abar oono mutangar suat-a nu onu yo po so wonuo tu, om rongowon nosiro nu lobuw okon ko songapan nu Kinoringan, so’ nosiro yo po songapan nu wonuo tu. 6 Nga, toko yo po inonakan-o nu Kinoringan. Isai kotondu’ nu Kinoringan, iyo yo su mongkinongou nu totongaron toko. Lobuw okon ko songapan nu Kinoringan, dai mongkinongou nu totongaron toko. Ono yo su gama’ toko monondu’ nu Atod montuduk nu obana om atod moomudut. 7 Oo su kosusulodan kosomodan ku, kayo toko monamod nu wokon, so’ samod oono kiat so Kinoringan. Isai yo po osamod, iyo yo su anak nu Kinoringan om kotondu’ so Iyo. 8 Isai dai osamod, dai kotondu’ nu Kinoringan, so’ Kinoringan-o po dadan osamod so toko. 9 Itu yo gama’ nu Kinoringan pointolang nu osamod Iyo so toko, ono yo sinuu’ Niyo Anak Niyo ido yo lumoga’ so wonuo tu, su’ miau toko musingkolaid. 10 Itu yo orati nu osamod: Okon ko toko su osamod nu Kinoringan, nga Kinoringan-o su osamod so toko, om sinuu’ Niyo Anak Niyo lumoga’ so wonuo tu nu matoi ourug nu sogit mongidu’ nu koraayan nowaal toko. 11 Oo su kosusulodan kosomodan ku, pagka osamod Kinoringan so toko, toko nga subai musosamod-a. 12 D’ado ido nokosiou-o nu Kinoringan. Nga, bang d’ado pupus toko musosamod, mido Kinoringan so toko, om osiowan sono nu lobuw nu osamod Kinoringan kiat so poonamod toko. 13 Pagka nokuasa toko yo nu Atod nu Kinoringan, oilaan toko sono nu koido toko so Kinoringan, om mido-ido Iyo so toko. 14 Nosiou mai yo kondiri Anak nu Kinoringan, om obaran mai kou nu Iyo yo su sinuu’ nu Kinoringan Amo sumiliw nu Poowiau nu lobuw so wonuo tu. 15 Isai mongakun nu si Yisus-o su Anak nu Kinoringan, mido Kinoringan so lobuw oono, om iyo nga koido so Kinoringan. 16 Oilaan om poimaid toko yo nu osamod Kinoringan so toko. Kinoringan-o po osamod. Isai dadan osamod nu lobuw wokon, koido iyo so Kinoringan, om Kinoringan mido so iyo. 17 Bang otoroido yo inawo toko osamod nu Kinoringan, dai toko sono lumaa’ tumingkuang so Iyo nu Runat Pongukuman, so’ laid toko po so wonuo tu, minsuw toko yo nu kogoyaan ni Kristus. 18 Isai otoroido osamod nu Kinoringan, dai yo sono iyo lumaa’, so’ samod oono mongidu’ nu kolaa’an. Indadi otarang-o sono nu isai lumaa’ tumingkuang so Iyo nu Runat Pongukuman, lobuw ono yo su dai po otoroido inawo osamod nu Kinoringan. 19 Musosamod toko yo, so’ minonamod-o Kinoringan so toko. 20 Bang mutangar lobuw nu, “Osamod aku nu Kinoringan,” koo, nga dai ya osamod nu kosusulodan niyo, momudut-a lobuw oono, so’ bang dai iyo osamod nu sulod niyo nu osiou-o ya, makin po ong Kinoringan su dai niyo osiou nga dai ya niyo kosomodan. 21 Ono yo ko’ minonuu’ si Kristus so toko nu isai osamod nu Kinoringan, subai osamod-a nu sulod niyo.
51 Isai poimaid nu si Yisus-o Raja Nijanji nu Kinoringan, lobuw oono anak nu Kinoringan. Om isai osamod nu Kinoringan Amo, osamod-a nu Anak nu Kinoringan. 2 Bang osamod toko nu Kinoringan om mongowaid nu ponuu’an Niyo, oilaan toko yo sono nu osamod toko nu inonakan nu Kinoringan. 3 Bang mongowaid toko nu ponuu’an Niyo, osamod toko ya so Iyo. Om dai ya orogon waidon ponuu’an Niyo oono, 4 so’ kiawi’ anak nu Kinoringan kopongodoog nu kogoyaan oraai so wonuo tu. Om koimaidan toko no yo su pongodoog nu wonuo tu. 5 D’ado ido kopongodoog nu wonuo tu, sondiang ko lobuw poimaid nu si Yisus-o po Anak nu Kinoringan. 6 Si Yisus Kristus-o su linumoga’ so wonuo tu sinuu’ nu Kinoringan maid nu sungoi om raa’. Linumoga’ Iyo okon ko maid nu sungoi ya, nga maid nu sungoi om raa’. Atod-o nu Kinoringan kondiri su nopointolang nu obana ya ono, so’ dai insan momudut ong Atod oono. 7 - 8 Kuwai tolu nopointolang suat so si Yisus [dii so surga, ono yo Amo, Tinongaran, om Atod nu Kinoringan. Kitolu-tolu nu ono muido ya. Om kuwai tolu nopointolang so wonuo tu], ono yo Atod, sungoi, om raa’. Kitolu-tolu nu ono nga ido-ido ya. 9 Poimaid toko nu onu-onu ya niintolang nu lobuw suat so si Yisus, nga oogot po niintolang nu Kinoringan ko’ niintolang nu lobuw. Niintolang nu Kinoringan nokotuturan-o kiat po nu gulu ri nu, si Yisus-o su Anak Niyo. 10 Ono yo ko’, isai poimaid nu Anak nu Kinoringan, nokuasa yo nu Atod nu Kinoringan, ono pointolang so inawo niyo nu si Yisus-o su Anak nu Kinoringan. Nga, isai dai poimaid nu Kinoringan, lobuw oono pokowudut nu Kinoringan, so’ dai poimaid nu onu yo po niintolang nu Kinoringan suat so Anak Niyo. 11 Itu yo niintolang iiri, ono yo notaakan toko yo nu Kinoringan nu kowiawan musingkolaid, om Anak Niyo no yo su inungkiaton nu ono. 12 Isai poimaid nu Anak oono, kotorima’ nu kowiawan, om isai dai poimaid nu Anak oono, dai kotorima’ nu kowiawan. 13 Pagka nopoimaid kou ya nu Anak nu Kinoringan, suraton ku itu so kou, su’ oilaan muyu nu nokotorima’ kou yo nu kowiawan musingkolaid. 14 Kosoromo toko tumingkuang so Kinoringan, so’ poimaid toko nu tumbaidon-a Niyo indomoon toko ong mindamo toko nu onu yo po musuat so koinginan Niyo. 15 Oilaan toko nu rongowon-a Niyo ong mindamo toko so Iyo. Nadi, oorotian toko nu taakan toko ya nu indomoon toko so Iyo no. 16 Bang koimpa’ kou nu ido koyuwan inong muyu poimaid kowaal nu koraayan, om koraayan oono dai ya koowit so iyo so kopotoyan musingkolaid, pogdu’a kou yo so Kinoringan su’ taakan iyo nu kowiawan musingkolaid. Ono yo po suat-a so koraayan dai ya koowit so kopotoyan musingkolaid. Nga, kuwai ya koraayan koowit so kopotoyan musingkolaid. Suat nu ono, dai aku ya monuu’ so kou mogdu’a so Kinoringan. 17 Kiawi’ gogoma’on kosala’, koraayan-a, nga kuwai ya koraayan dai koowit so kopotoyan musingkolaid. 18 Oilaan toko yo nu, kiawi’ lobuw nosiliw-o nu inonakan nu Kinoringan, dai yo sumundur momaal nu koraayan, so’ ingoligan nosiro nu Anak Niyo, om dai yo sono kopomaal moinat-o nu onu-onu ya so toko. 19 Pudi pona nokuasa nu Wowaidon nu Moinat pilolongkop nu wonuo tu, oilaan toko nu songapan toko yo nu Kinoringan. 20 Om noilaan toko nu nokologa’ yo Anak nu Kinoringan poorati so toko, su’ kotondu’ toko nu Kinoringan obana. Nokoido yo kowiawan toko so Iyo om nokoido toko yo so Anak Niyo si Yisus Kristus. Iyo yo su Kinoringan obana, om Iyo yo su impuunon nu kowiawan musingkolaid. 21 Oo su inonakan ku, pagka soko ono, ikod kou yo pongusaa’ nu pinokokinoringan.