Hiob

Hiob Nhoma

¹Ɔbarima bi tenaa ase wɔ Us1.1 Us yɛ ɔman bi a na ɛda Yordan apuei fam. Na Hiob nyɛ Israelni. asase so a na ne din de Hiob. Na ne ho nni asɛm na ɔyɛ pɛ; na osuro Onyankopɔn, na ɔtwe ne ho fi bɔne ho. ²Na ɔwɔ mmabarima baason ne mmabea baasa, ³na ɔwɔ nguan mpem ason, yoma mpem abiɛsa, anantwi mpamho ahannum ne mfurumbere ahannum, na ɔwɔ asomfo bebree. Na ɔyɛ onipa kɛse pa ara wɔ nnipa a wɔwɔ Apuei fam nyinaa no mu.

⁴Na ne mmabarima no to pon nnidiso nnidiso wɔ wɔn afi mu, na wɔto nsa frɛ wɔn nuabeanom baasa no ne wɔn bɔ mu didi, nom. ⁵Sɛ aponto nna no twa mu a, Hiob soma kɔfrɛ wɔn na wodwira wɔn ho. Ɔsɔre anɔpahema bɔ ɔhyew afɔre ma wɔn mu biara, efisɛ na osusuw sɛ, “Ebia na me mma no ayɛ bɔne na wɔadome Onyankopɔn wɔ wɔn koma mu.” Eyi yɛ dwuma a na Hiob di no bere ano bere ano.

Hiob Sɔhwɛ A Edi Kan

⁶Da bi, abɔfo no de wɔn ho bɛkyerɛɛ Awurade, na Satan kaa wɔn ho bae. ⁷Awurade bisaa Satan se, “Wufi he na wobaa ha?”

Satan buaa Awurade se, “Mifi asase so akyinkyinakyinkyin ne emu akɔneabadi mu.”

⁸Na Awurade bisaa Satan se, “Woadwene me somfo Hiob ho ana? Obiara nte sɛ ɔno wɔ asase so, ne ho nni asɛm na ɔteɛ, ɔyɛ onipa a osuro Onyankopɔn na okyi bɔne.”

⁹Satan buaa Awurade se, “Hiob suro Onyankopɔn kwa ana? ¹⁰Wunnyee ban mfaa ɔno, ne fie ne biribiara a ɔwɔ ho ana? Woahyira ne nsa ano adwuma so, enti ne nguan ne nʼanantwi ase atrɛw asase no so. ¹¹Na wo de, teɛ wo nsa na sɛe nea ɔwɔ nyinaa, na obegyina wʼanim na wadome wo.”

¹²Awurade ka kyerɛɛ Satan se, “Eye, nea ɔwɔ nyinaa wɔ wo nsam, nanso ɔno ankasa de, mfa wo nsateaa nka no.”

Na Satan fii Awurade anim kɔe.

¹³Da bi a Hiob mmabarima ne ne mmabea redidi na wɔrenom bobesa wɔ wɔn nuabarima panyin fi no, ¹⁴ɔbɔfo bi baa Hiob hɔ bɛkae se, “Anantwi no refuntum na mfurum no redidi wɔ wɔn nkyɛn no, ¹⁵Sabiafo1.15 Na Sabiafo yɛ atubrafo a na wɔte Arabia anafo fam. bɛtow hyɛɛ yɛn so, sesaw wɔn kɔe. Wɔde afoa kunkum apaafo no, na me nko ara na miguanee a merebɛbɔ wo saa amanneɛ yi.”

¹⁶Bere a ogu so rekasa no, ɔbɔfo foforo bi ba bɛkae se, “Onyankopɔn gya fi soro abɛhyew wo nguan ne wo nguanhwɛfo no nyinaa, na me nko ara na miguanee a merebɛbɔ wo amanneɛ yi.”

¹⁷Ogu so rekasa no, ɔbɔfo foforo bi bɛkae se, “Kaldeafo1.17 Na Kaldeafo yɛ atubrafo a wɔte sare a ɛwɔ Mesopotamia so. Wɔn ara na wɔbɛtenaa Babilonia yɛɛ no ahemman. de akorɔmfo akuw abiɛsa baa wo yoma so bɛsoaa wɔn kɔe. Wɔde afoa kunkum asomfo no na me nko ara na miguanee a merebɛbɔ wo amanneɛ yi.”

¹⁸Bere a ogu so rekasa no, ɔbɔfo foforo bi ba bɛkae se, “Na wo mmabarima ne wo mmabea redidi na wɔrenom bobesa wɔ wɔn nuabarima panyin fi, ¹⁹na prɛko pɛ, ahum bi bɔ fii sare no so bedwiraa ofi no ntwea anan no. Ofi no dwiriw guu wɔn so na akunkum wɔn, na me nko ara na miguanee a merebɛbɔ wo amanneɛ yi.”

²⁰Eyi maa Hiob sɔre gyinaa hɔ, sunsuan nʼatade mu na oyii ne tinwi. Afei ɔtenaa fam sɔree Awurade²¹kae se,

“Adagyaw na mede fi me na yam bae,

na adagyaw na mede bɛsan akɔ.

Awurade de mae, na Awurade afa;

nhyira nka Awurade din!”

²²Eyi nyinaa mu no, Hiob anyɛ bɔne sɛ ɔbɛbɔ Onyankopɔn sobo.

Hiob Sɔhwɛ A Ɛto So Abien

¹Da foforo bi, abɔfo no baa Awurade anim bio na Satan nso kaa wɔn ho bae. ²Awurade bisaa Satan se, “Wufi he na wobaa ha?”

Satan buaa Awurade se, “Mifi asase so akyinkyinakyinkyin ne emu akɔneabadi mu.”

³Na Awurade bisaa Satan se, “Woadwene mʼakoa Hiob ho ana? Obiara nte sɛ ɔno wɔ asase so, ne ho nni asɛm na ɔteɛ. Ɔyɛ onipa a osuro Onyankopɔn na okyi bɔne. Ɛwɔ mu sɛ wohyɛɛ me sɛ mensɛe no a minni nnyinaso biara de, nanso ɔda so gyina ne pɛpɛyɛ no mu.”

⁴Satan buaa Awurade sɛ, “Were pere were. Onipa de nea ɔwɔ nyinaa bɛma de apere ne nkwa. ⁵Sɛ ebetumi a teɛ wo nsa fa ka ne honam ne ne nnompe, na ɔbɛdome wo wɔ wʼanim!”

⁶Awurade ka kyerɛɛ Satan se, “Eye, ɔwɔ wo nsam na ne nkwa de gyaa mu ma no.”

⁷Enti Satan fii Awurade anim, na ɔmaa akuru a ɛyɛ yaw totɔɔ Hiob ho fi ne nʼanan ase kosii nʼapampam. ⁸Afei, na kyɛmfɛre na Hiob de twiw ne ho, bere a ɔte nsõ mu.

⁹Ne yere bisaa no se, “Woda so kura wo pɛpɛyɛ no mu ara? Dome Onyankopɔn, na wu!”

¹⁰Na Hiob buaa no sɛ, “Wokasa sɛ ɔbea a ɔyɛ ɔkwasea. Ade pa de yɛagye afi Onyankopɔn nsam na ade bɔne na yɛmpo ana?”

Eyi nyinaa mu no, Hiob anka asɛm bɔne.

Hiob Nnamfo Baasa No

¹¹Bere a Hiob nnamfo baasa bi a wɔne Temanni Elifas,2.11 Na Elifas yɛ Edomni a ofi Teman. Suhini Bildad ne Naamani Sofar tee amanehunu a aba Hiob so no, wofii wɔn afi mu, hyia yɛɛ adwene sɛ wɔbɛkɔ akɔhwɛ no na wɔakyekye ne werɛ. ¹²Wohuu Hiob fii akyiri no, wɔanhu sɛ ɛyɛ ɔno; wɔhyɛɛ ase twaa agyaadwo, sunsuan wɔn ntade mu, tuu mfutuma guu wɔn ti so. ¹³Na wɔne no tenaa fam nnanson, awia ne anadwo. Na obiara ankasa, efisɛ wohuu sɛ nʼamanehunu no nyɛ adewa.

Hiob Kasa

¹Akyiri no Hiob kasae, na ɔdomee da a wɔwoo no. ²Ɔkae se,

³“Ma da a wɔwoo me no nyera,

ne anadwo a wɔkae se, ‘Wɔawo ɔbabarima no!’

⁴Saa da no nnuru sum;

mma Ɔsoro Nyankopɔn nhwehwɛ akyi kwan;

mma hann biara ntɔ ngu so.

⁵Ma sum ne owusum nnye no mfa;

ma omununkum nkata so;

na sum mmunkam ne hann so.

⁶Ma sum kabii nnye saa anadwo no mfa;

ma wonyi saa anadwo no mfi asranna so

na wɔmmfa nhyɛ ɔsram biara mu.

⁷Saa anadwo no nyɛ obonin;

mma wɔnnte anigye nteɛmu wɔ mu.

⁸Ma wɔn a wɔdome nna no nnome saa da no;

wɔn a wɔayɛ krado sɛ wɔbɛkanyan dɛnkyɛmmirampɔn no.

⁹Ma nʼanɔpa nsoromma nnuru sum;

na ɔntwɛn adekyee kwa

a onhu anɔpawia nsensanee a edi kan no,

¹⁰efisɛ anto nea ɔwoo me no awotwaa mu ama wawo me

na anka mʼani renhu saa abɛbrɛsɛ yi.

¹¹“Adɛn nti na manwu awoe hɔ,

bere a mifi me na awotwaa mu no?

¹²Adɛn nti na nkotodwe gyee me

ne nufu sɛ minnum?

¹³Anka sesɛɛ meda hɔ asomdwoe mu;

anka mada regye mʼahome

¹⁴me ne wiase ahemfo ne fotufo,

wɔn a wosisii adan maa wɔn ho na nnɛ yi abubu no,

¹⁵me ne ahenemma a na wɔwɔ sika kɔkɔɔ,

wɔn a wɔde dwetɛ hyɛɛ wɔn afi mu ma.

¹⁶Anaasɛ adɛn nti na wɔansie me sɛ ɔpɔnba,

te sɛ akokoaa a wanhu adekyee hann da?

¹⁷Ɛhɔ na amumɔyɛfo gyae basabasayɛ,

na abrɛfo nya ahomegye.

¹⁸Nneduafo nso nya wɔn ahofadi;

na wɔnte nnommumfo wuranom ateɛteɛ bio.

¹⁹Nketewa ne akɛse wɔ hɔ,

na akoa de ne ho fi ne wura nsam.

²⁰“Adɛn nti na wɔma mmɔborɔfo hann,

na ɔkra mu ahohiahiafo nya nkwa,

²¹wɔn a wɔn kɔn dɔ owu nanso ɛmma,

wɔn a wɔbrɛ hwehwɛ owu sen sɛnea wɔhwehwɛ nnwetɛbona,

²²wɔn a anigye ahyɛ wɔn ma

na wodu ɔda mu a wodi ahurusi.

²³Adɛn nti na wɔde nkwa ma onipa a

ne kwan ahintaw,

nea Onyankopɔn aka no ahyɛ mu?

²⁴Ahomekokogu adan mʼaduan;

na mʼapinisi gu te sɛ nsu.

²⁵Nea na misuro no aba me so;

nea na ɛbɔ me hu no ato me.

²⁶Minni ahotɔ, minni asomdwoe;

minni ahomegye na mmom, ɔhaw nko ara.”

Elifas Mmuae A Edi Kan

¹Na Temanni Elifas buaa Hiob se,

²“Sɛ obi pɛ sɛ ɔne wo kasa a, worennya ntoboase ana?

Hena na wobetumi aka nʼano ato mu?

³Dwene sɛnea wakyerɛkyerɛ nnipa bebree,

sɛnea woahyɛ nsa a emu ayɛ mmerɛw no den.

⁴Wo nsɛm ahyɛ wɔn a wɔahintiw no den;

woahyɛ nkotodwe a ayɛ mmerɛw mu den.

⁵Na afei a ɔhaw aba no, wʼaba mu abu;

adwira wo, na wo werɛ ahow.

⁶So ɛnsɛ sɛ wo nyamesuro yɛ wʼahotoso

na wʼakwan a ɛho nni asɛm no yɛ wʼanidaso ana?

⁷“Dwene ho: Wɔasɛe obi a ne ho nni asɛm pɛn ana?

Ɛhefa na wɔsɛee obi a ɔyɛ pɛ?

⁸Sɛnea mahu no, wɔn a wofuntum bɔne

ne wɔn a wodua ɔhaw no twa so aba.

⁹Onyankopɔn home ano, wɔsɛe;

nʼabufuw turuw a wɔyera.

¹⁰Gyata betumi abobɔ mu na wɔaworo so,

nanso wɔabubu gyata akɛse no se.

¹¹Gyata annya hanam a owu,

na gyatabere mma no bɔ hwete.

¹²“Wɔbɛkaa kokoamsɛm bi kyerɛɛ me

na mʼaso tee no sɛ asomsɛm.

¹³Wɔ anadwo daeso basabasa mu,

bere a nnipa adeda nnahɔɔ no,

¹⁴ehu ne nketenkete kyeree me

ɛmaa me nnompe nyinaa wosowee.

¹⁵Honhom bi twaa mʼani so,

na me ho nwi sɔre gyinae.

¹⁶Egyinae,

nanso, manhu nʼabɔsu.

Biribi begyinaa mʼanim,

na metee nne bɔkɔɔ bi a ɛrebisa se,

¹⁷‘Onipa desani betumi ateɛ asen Onyankopɔn?

Na mpo ɔhoɔdenfo betumi ayɛ kronkron asen ne Yɛfo ana?

¹⁸Sɛ Onyankopɔn ntumi mfa ne ho nto nʼankasa asomfo so,

sɛ ɔka nʼabɔfo mfomso kyerɛ wɔn a,

¹⁹na nkantom wɔn a wɔtete dɔte afi mu,

wɔn a wɔn fapem sisi mfutuma mu

na wɔdwerɛw wɔn ntɛm so sen abubummaba!

²⁰Efi anɔpahema kosi anwummere wobubu wɔn mu nketenkete;

na wɔyera korakora a obiara nhu wɔn bio.

²¹So wommiamia wɔn ntamadan ahama mu,

a ɛno nti wowuwu a wonni nyansa ana?’

¹“Wobɛfrɛ a frɛ, na hena na obegye wo so?

Akronkronfo no mu hena nkyɛn na wobɛkɔ?

²Ahisɛm kum ɔkwasea,

na anibere kum atetekwaa.

³Mʼankasa mahu ɔkwasea a ɔrefefɛw,

nanso mpofirim, wɔdomee ne fi.

⁴Ne mma ne bammɔ ntam kwan ware,

wɔdwerɛw wɔn wɔ asennii a wonni ɔkamafo.

⁵Nea ɔkɔm de no no di ne nnɔbae,

na ɔfa fi nsɔe mu mpo,

na nea osukɔm de no no pere di nʼahode akyi.

⁶Ahokyere mpue mmfi dɔte mu

na ɔhaw nso mfifi mmfi fam.

⁷Nanso wɔwo nnipa to ɔhaw mu

mpɛn dodow a gyaframa turuw kɔ soro no.

⁸“Nanso sɛ ɛyɛ me a, anka meguan atoa Onyankopɔn;

na mede mʼasɛm ato nʼanim.

⁹Ɔyɛ anwonwade a wontumi nhwehwɛ mu,

ne nsɛnkyerɛnne a wontumi nkan ne dodow.

¹⁰Ɔtɔ osu gu asase so;

na ɔde kɔ wuram.

¹¹Ɔde ahobrɛasefo si nea ɛkorɔn,

na ɔma wɔn a wodi awerɛhow nya asomdwoe.

¹²Ɔsɛe aniferefo nhyehyɛe,

ma wɔn nsa si fam.

¹³Ɔkyere anyansafo wɔ wɔn anifere mu,

na ɔbɔ anitewfo nhyehyɛe gu.

¹⁴Sum duru wɔn awia ketee;

na wɔkeka wɔ owigyinae mu te sɛ anadwo.

¹⁵Ogye ahiafo fi afoa a ɛhyɛ wɔn anom;

ogye wɔn fi ahoɔdenfo nkyehama mu.

¹⁶Enti ahiafo wɔ anidaso,

na ntɛnkyew ka nʼano to mu.

¹⁷“Nhyira ne onipa a Onyankopɔn teɛ no,

enti mmu Otumfo nteɛteɛ no animtiaa.

¹⁸Efisɛ ɔno na opira na ɔno ara akyekyere;

opira nanso ne nsa sa yare.

¹⁹Obegye wo afi ɔhaw ahorow asia mu;

ason so no, bɔne biara renka wo.

²⁰Ɔkɔm ba a, obegye wo afi owu mu,

na ɔko mu nso, obegye wo afi afoa ano.

²¹Wɔbɛbɔ wo ho ban afi ntwirii ho

na sɛ ɔsɛe ba a ɛnsɛ sɛ wusuro.

²²Wobɛserew ɔsɛe ne ɔkɔm;

na ɛnsɛ sɛ wusuro asase so mmoa.

²³Wo ne afuw so abo bɛyɛ apam,

na emu nkekaboa nso ne wo bɛtena asomdwoe mu.

²⁴Wubehu sɛ wo ntamadan wɔ bammɔ;

na sɛ wosese wʼahode a wubehu sɛ hwee nyeraa ɛ.

²⁵Wubehu sɛ wo mma bɛyɛ bebree;

na wʼase bɛfɛe sɛ asase so sare.

²⁶Wode ahoɔden bɛkɔ ɔda mu,

te sɛ afiafi a wɔaboa ano wɔ otwabere mu.

²⁷“Yɛahwehwɛ eyi mu, na ɛyɛ nokware

ɛno nti tie na fa toto wʼabrabɔ ho.”

Hiob Bua Elifas

¹Na Hiob buae se,

²“Sɛ wobetumi akari mʼawerɛhowdi

na me haw nso wɔde agu nsania so a,

³anka emu bɛyɛ duru asen nwea a ɛwɔ po mu nyinaa,

enti ɛnyɛ nwonwa sɛ me nsɛm ayɛ hagyahagya.

⁴Otumfo agyan no wɔ me mu,

me honhom nom ano bɔre no;

wɔahyehyɛ Onyankopɔn ahunahuna nyinaa atia me.

⁵Wuram afurum su wɔ bere a wanya sare ana,

na nantwi nso su wɔ bere a wanya nʼaduan ana?

⁶So wodi aduan a nkyene nni mu?

Na ɔdɛ bi wɔ nkesua mu fufu mu ana?

⁷Mempɛ sɛ mede me nsa ka;

aduan a ɛte saa no bɔ me yare.

⁸“Ao sɛ me nsa bɛka mʼabisade,

sɛ Onyankopɔn bɛyɛ nea mʼani da so no ama me,

⁹sɛ Onyankopɔn bɛpɛ sɛ ɔdwerɛw me

sɛ ɔbɛtwe ne nsa na wakum me,

¹⁰ɛne anka mɛkɔ so anya saa awerɛkyekye yi,

a ɛyɛ anigye a mewɔ wɔ ɔyaw a entwa da yi mu,

ne Ɔkronkronni no nsɛm a mimmuu so yi.

¹¹“Ahoɔden bɛn na mewɔ a enti ɛsɛ sɛ minya anidaso?

Daakye nneɛma pa bɛn nti na ɛsɛ sɛ minya ntoboase?

¹²Mewɔ ahoɔden sɛ ɔbo ana?

Me honam yɛ kɔbere mfrafrae ana?

¹³So mewɔ tumi bi a mede bɛboa me ho

saa bere yi a nkonimdi apare me yi ana?

¹⁴“Obiara a ɔbɔ nʼadamfo ayamye sɛn no

gyaw Otumfo no ho suro.

¹⁵Nanso ahotoso nni me nuanom mu sɛ nsuwansuwa a eyiri na ɛyow,

sɛ nsuwansuwa a eyiri

¹⁶bere a sukyerɛmma renan

na mparuwbo nso redan nsu,

¹⁷nanso owiabere mu no ɛsen bio

na ɔhyew nti nsu no tu yera.

¹⁸Akwantufo man fi wɔn akwan so;

wɔforo kɔ nsase a awuwu so ma wowuwu.

¹⁹Tema akwantufo hwehwɛ nsu,

Seba aguadifo akwantufo de anidaso hwehwɛ nsu.

²⁰Wɔn ho yeraw wɔn, efisɛ na wɔwɔ awerehyɛmu;

woduu hɔ, na wɔn anidaso yɛ ɔkwa.

²¹Afei, wo nso woakyerɛ sɛ wo so nni mfaso;

wuhu biribi a ɛyɛ hu na wusuro.

²²So maka pɛn se, ‘Me nti momma biribi,

sɛ mumfi mo ahode mu ntua me ti so sika,

²³sɛ munnye me mfi mʼatamfo nsam,

ne atirimɔdenfo nkyehama mu ana?’

²⁴“Monkyerɛkyerɛ me, na mɛyɛ komm;

monkyerɛ me mfomso a mayɛ.

²⁵Nokwareka yɛ yaw,

na mo adwenkyerɛ no kosi dɛn?

²⁶So mokyerɛ sɛ mubesiesie sɛ nea meka no,

na moafa mʼahometew nsɛm sɛ mframa ana?

²⁷Mpo mobɛbɔ ayisaa so ntonto,

na mode mo adamfo adi nsesagua.

²⁸“Afei momfa ahummɔbɔ nhwɛ me.

Metumi adi atoro wɔ mo anim ana?

²⁹Montɔ mo bo ase, mummu ntɛnkyew;

monsan nnwen ho, efisɛ eyi fa me pɛpɛyɛ ho.

³⁰Amumɔyɛsɛm wɔ mʼano ana?

Minnim papa ne bɔne ntam nsonoe ana?

¹“Asase so som nyɛ den mma onipa ana?

Ne nkwanna nte sɛ ɔpaani de?

²Sɛnea akoa ani gyina anwummere sunsuma,

anaasɛ ɔpaani ho pere no nʼakatua ho no,

³saa ara na wɔatwa asram hunu ato me hɔ,

ne anadwo a ɔhaw wɔ mu ama me.

⁴Sɛ meda a, midwen bisa se, ‘Bere bɛn na ade bɛkye?’

Nanso anadwo twa mu nkakrankakra, na mepere kosi ahemadakye.

⁵Asunson ne aporɔporɔw afura me nipadua,

me were atetew na ɛrefi nsu.

⁶“Me nna kɔ ntɛm sen ɔnwemfo akurokurowa,

na ɛkɔ awiei a anidaso biara nni mu.

⁷Ao, Onyankopɔn, kae sɛ me nkwanna te sɛ ɔhome;

na mʼani renhu anigye bio da.

⁸Ani a ehu me mprempren no renhu me bio;

mobɛhwehwɛ me, nanso na minni hɔ bio.

⁹Sɛnea omununkum yera na etu kɔ,

saa ara na nea ɔkɔ ɔda mu no nsan mma bio.

¹⁰Ɔrensan mma ne fi da biara da bio;

nʼatenae renkae no bio.

¹¹“Ɛno nti meremmua mʼano;

mifi me honhom ahoyeraw mu akasa,

mefi me kra ɔyaw mu anwiinwii.

¹²So meyɛ ɛpo anaa aboa kɛse a ɔwɔ bun mu,

na mode me ahyɛ ɔwɛmfo nsa yi?

¹³Sɛ midwen sɛ minya awerɛkyekye wɔ me mpa so,

na mʼakongua adwudwo mʼanwiinwii ano a,

¹⁴ɛno mpo na wode adaeso yi me hu

na wode anisoadehu hunahuna me,

¹⁵ɛno nti mepɛ ɔsɛn ne owu,

sen me nipadua yi.

¹⁶Mimmu me nkwa; mentena ase afebɔɔ.

Munnyaa me; na me nna nka hwee.

¹⁷“Ɔdesani ne hena a ne ho hia wo sɛɛ,

na wʼani ku ne ho,

¹⁸na wohwehwɛ ne mu anɔpa biara

na wosɔ no hwɛ bere biara?

¹⁹Worennyi wʼani mfi me so da,

anaasɛ worennyaa me bere tiaa bi mpo ana?

²⁰Sɛ mayɛ bɔne a, dɛn na mayɛ wo,

Ao adesamma so wɛmfo?

Adɛn nti na watu wʼani asi me so?

Mayɛ adesoa ama wo ana?

²¹Adɛn nti na wonkata me mmarato so

na womfa me bɔne nkyɛ me?

Ɛrenkyɛ biara, mɛda mfutuma mu.

Wobɛhwehwɛ me nanso na minni hɔ bio.”

Bildad Asɛnka A Edi Kan

¹Na Suhini Bildad buae se:

²“Wobɛkɔ so aka saa nsɛm yi akosi da bɛn?

Wo nsɛm yɛ mframa huhuw.

³Onyankopɔn kyea atɛntrenee ana?

Otumfo kyea nea ɛteɛ ana?

⁴Bere a wo mma yɛɛ bɔne tiaa no no,

ogyaw wɔn maa wɔn bɔne so akatua.

⁵Nanso sɛ wode wʼani bɛto Onyankopɔn so

na woabɔ Otumfo no mpae,

⁶sɛ woyɛ kronkron, na woteɛ a,

wo nti, ɔbɛma ne ho so mprempren

na wama wo asi wo dedaw mu.

⁷Wo mfiase bɛyɛ nkakrankakra

na daakye woanya ama abu so.

⁸“Bisa awo ntoatoaso a atwa mu no,

na hwehwɛ nea wɔn agyanom hui,

⁹na wɔwoo yɛn nkyɛe na yennim hwee,

yɛn nna wɔ asase yi so te sɛ sunsuma.

¹⁰Wɔrenkyerɛkyerɛ wo na wɔrenka nkyerɛ wo ana?

Wɔremfi wɔn ntease mu nka nsɛm bi ana?

¹¹So paparɔso betumi anyin akɔ soro wɔ baabi a ɛnyɛ ɔwora?

Demmire betumi afifi baabi a nsu nni ana?

¹²Bere a ɛrenyin a wontwae no,

ɛhyew ntɛm so sen sare.

¹³Saa na wɔn a wɔn werɛ fi Onyankopɔn no awiei te;

saa ara na wɔn a wonni nyamesu no anidaso nkosi hwee.

¹⁴Biribiara a nʼani da so no nni ahoɔden;

nea ɔde ne ho to so no yɛ ananse ntontan.

¹⁵Otweri ne ntontan, nanso ɛtetew;

oso mu dennen, nanso ɛnyɛ yie.

¹⁶Ɔte sɛ afifide a wogugu so nsu yiye a esi owia mu,

ɛtrɛtrɛw ne mman mu wɔ turo no so;

¹⁷Ne ntin nyin fa abotan ho,

na ɛhwehwɛ ɔkwan kɔ abo mu.

¹⁸Nanso sɛ wotu fi ne sibea a,

saa beae no nnim no bio na ɛka se, ‘Minhuu wo da.’

¹⁹Ampa ara ne nkwa twa mu,

na afifide foforo nyin asase no so.

²⁰“Ampa ara Onyankopɔn mpo onipa a ne ho nni asɛm

na ɔnhyɛ amumɔyɛfo nsa mu den.

²¹Ɔbɛma woaserew bio,

na wode ahosɛpɛw ateɛteɛ mu.

²²Wɔde aniwu befura wɔn a wɔtan wo,

na amumɔyɛfo ntamadan bɛsɛe.”

Hiob Bua Bildad

¹Na Hiob kasaa bio se:

²“Yiw, minim sɛ eyi yɛ nokware.

Na ɛbɛyɛ dɛn na ɔdesani bɛteɛ wɔ Onyankopɔn anim?

³Sɛ obi pɛ sɛ ɔne Onyankopɔn yiyi ano a,

ɔrentumi nyi nsɛm apem mu baako mpo ano.

⁴Ne nyansa mu dɔ, na ne tumi so.

Hena na ɔne no adi asi na ne ho baabiara anti?

⁵Otutu mmepɔw a wonnim ho hwee

obubu wɔn fa so wɔ nʼabufuw mu.

⁶Ɔwosow asase fi ne sibea,

na ɔma ne nnyinaso wosow biribiri.

⁷Ɔkasa kyerɛ owia na ɛnhyerɛn,

na ɔsɔw nsoromma hyerɛn ano.

⁸Ɔno nko ara na ɔtrɛw ɔsoro mu,

na ɔnantew po asorɔkye so.

⁹Ɔno ne Nyankrɛnte, Akokɔbeatan ne ne mma Yɛfo;

anafo fam nsorommakuw no.

¹⁰Ɔyɛ anwonwade a wontumi nte ase,

nsɛnkyerɛnne a wontumi nkan.

¹¹Sɛ ɔnam me ho a, minhu no;

sɛ ɔsen a, minhu no.

¹²Sɛ ohwim kɔ a, hena na osiw no kwan?

Hena na obetumi abisa no se, ‘Dɛn na woreyɛ yi?’

¹³Onyankopɔn nkora nʼabufuw so;

Rahab aboafo mpo ho popo wɔ nʼanim.

¹⁴“Na me ne hena a mene no beyiyi ano?

Mɛyɛ dɛn anya nsɛm a me ne no de begye akyinnye?

¹⁵Sɛ minnim ho hwee mpo a, merentumi nyi nʼano;

ɛno ara ne sɛ mɛsrɛ ahummɔbɔ afi me temmufo nkyɛn.

¹⁶Mpo, sɛ mefrɛ no na ɔba a,

minnye nni sɛ obetie mʼasɛm.

¹⁷Ɔde asorɔkye bɛhwe me

ama mʼapirakuru adɔɔso kwa.

¹⁸Ɔremma minnya mʼahome, bio,

ɔde awerɛhow bɛhyɛ me ma tɔ.

¹⁹Sɛ ɛyɛ ahoɔden asɛm a, ɔyɛ ɔhoɔdenfo!

Na sɛ ɛba atɛntrenee nso a, hena na ɔne no bedi asi?

²⁰Sɛ midi bem mpo a, mʼano bebu me kumfɔ;

sɛ me ho nni asɛm a, ebebu me fɔ.

²¹“Ɛwɔ mu sɛ midi bem de,

nanso mimmu me ho;

abrabɔ afono me.

²²Ne nyinaa yɛ pɛ; ɛno nti na meka se,

‘Ɔsɛe nea ne ho nni asɛm ne omumɔyɛfo.’

²³Bere a amanehunu de owu aba no,

ɔserew nea ne ho nni asɛm no abawpa.

²⁴Bere a asase akɔ amumɔyɛfo nsam no,

ofura ɛso atemmufo ani.

Sɛ ɛnyɛ ɔno a, na ɛyɛ hena?

²⁵“Me nna ho yɛ hare sen ommirikatufo;

ɛsen kɔ a anigye kakra mpo nni mu.

²⁶Etwa mu kɔ sɛ akorow a wɔde paparɔso ayɛ

te sɛ akɔre a wɔretow akyere wɔn hanam.

²⁷Sɛ meka se, ‘Me werɛ mfi mʼanwiinwii,

mɛsakra me nsɛnka, na maserew a,’

²⁸me yaw ahorow no bɔ me hu ara.

Na minim sɛ, woremmu me bem.

²⁹Woabu me fɔ dedaw nti,

adɛn na ɛsɛ sɛ mehaw me ho kwa?

³⁰Mpo sɛ ɛba sɛ mede samina guare

na mede samina hohoro me nsa ho a,

³¹wobɛtow me akyene dontori amoa mu,

ama mʼatade mpo akyi me.

³²“Ɔnyɛ onipa te sɛ me na mayi nʼano,

na yɛakogyina asennii abobɔ yɛn nkuro.

³³Sɛ anka obi wɔ hɔ a obesiesie yɛn ntam

na waka yɛn baanu abɔ mu,

³⁴obi a obeyi Onyankopɔn abaa afi me so,

na nʼahunahuna ammɔ me hu bio.

³⁵Anka mɛkasa a merensuro no,

nanso saa tebea a mewɔ mu yi de, mintumi.

¹“Abrabɔ afono me;

enti mɛka mʼasɛm a meremfa hwee nsie

na mɛkasa afi me kra yawdi mu.

²Mɛka akyerɛ Onyankopɔn se: Mmu me kumfɔ,

na mmom kyerɛ kwaadu a wobɔ me.

³Ɛyɛ wo fɛ sɛ wohyɛ me so,

de po wo nsa ano adwuma,

na woserew hwɛ amumɔyɛfo nhyehyɛe?

⁴Wowɔ ɔhonam mu ani ana?

Wuhu ade te sɛ ɔdesani ana?

⁵Wo nkwanna te sɛ ɔdesani

anaa wo mfe te sɛ onipa hoɔdenfo,

⁶a enti ɛsɛ sɛ wohwehwɛ me mfomso

na wopɛɛpɛɛ me bɔne mu?

⁷Ɛwɔ mu, wunim sɛ minni fɔ,

na obiara nso ntumi nnye me mfi wo nsam.

⁸“Wo nsa na ɛnwenee me na ɛbɔɔ me.

Afei wobɛdan wo ho asɛe me ana?

⁹Kae sɛ wonwen me sɛ dɔte.

Na wobɛdan me ayɛ me mfutuma bio ana?

¹⁰So woanhwie me sɛ nufusu

na woammɔ me toa sɛ srade,

¹¹amfa were ne honam ankata me ho

ankeka nnompe ne ntin antoatoa mu ana?

¹²Womaa me nkwa, yii ayamye kyerɛɛ me,

na ɔhwɛsie mu wohwɛɛ me honhom so.

¹³“Nanso eyi na wode siee wo koma mu,

na minim sɛ na eyi wɔ wʼadwene mu.

¹⁴Sɛ meyɛɛ bɔne a anka wobɛhwɛ me

na wobɛma me so asotwe.

¹⁵Na sɛ midi fɔ a, nnome nka me!

Na sɛ mpo midi bem a, merentumi mma me ti so,

efisɛ aniwu ahyɛ me ma

na mʼamanehunu amene me.

¹⁶Na sɛ mema me ti so a, wodɛɛdɛɛ me sɛ gyata,

na bio woda wʼanwonwatumi no adi tia me.

¹⁷Wode nnansefo foforo betia me

na woma wʼabufuw ano yɛ den wɔ me so;

wʼasraafo tu ba me so bere biara.

¹⁸“Adɛn nti na woma wɔwoo me?

Ɛkaa me nko a anka miwui ansa na ani bi rehu me.

¹⁹Sɛ anka mamma nkwa yi mu,

anaasɛ wɔsoaa me fi awotwaa mu de me kɔɔ ɔda mu tee!

²⁰So ɛnkaa kakraa bi na me nna kakraa no to ntwaa ana?

Gyaa me na minya anigye bere tiaa bi

²¹ansa na makɔ koransan

kusuuyɛ ne sunsuma kabii asase so,

²²asase a ɛyɛ anadwo sum kabii,

sum kabii ne sakasaka,

baabi a ɛhɔ hann mpo te sɛ sum.”

Sofar Mmuae A Edi Kan

¹Na Naamani Sofar buae se,

²“Ɛnsɛ sɛ woyi saa nsɛm yi ano ana?

Ɛsɛ sɛ wobu saa ɔkasafo yi bem ana?

³Wo nsɛm hunu no bɛma nnipa ayɛ komm ana?

Sɛ wudi fɛw a obiara nka wʼanim ana?

⁴Woka kyerɛ Onyankopɔn se, ‘Me gyidi ho nni asɛm

na meyɛ pɛ wɔ wʼani so.’

⁵Ao, anka mepɛ sɛ Onyankopɔn kasa,

anka ɔnkasa ntia wo

⁶na ommue nyansa mu ahintasɛm so nkyerɛ wo,

efisɛ nyansa turodoo yɛ afanu.

Hu sɛ Onyankopɔn werɛ afi wo bɔne no bi mpo.

⁷“Wubetumi ate Onyankopɔn anwonwade ase ana?

Wubetumi abɔre ahu nea Otumfo no tumi kɔpem ana?

⁸Ɛkorɔn sen ɔsoro, dɛn na wubetumi ayɛ?

Emu dɔ sen ɔda ase tɔnn, dɛn na wubetumi ahu?

⁹Ne nsusuwii mu ware sen asase

na ɛtrɛw sen po.

¹⁰“Sɛ ɔba de wo bɛto afiase

ansa na osi nkongua a, hena na obetumi asiw no kwan?

¹¹Ampa ara ohu nnipa nnaadaafo;

na sɛ ohu bɔne a, ɔnhyɛ ne nsow ana?

¹²Nanso ogyimifo rentumi nyɛ onyansafo da

na wɔawo afurum ba sɛ onipa.

¹³“Na sɛ wode wo koma ma no

na wopagyaw wo nsa kyerɛ no,

¹⁴sɛ wugyaa bɔne a wukura no mu

na woamma amumɔyɛ antena wo ntamadan mu a

¹⁵ɛno de, bɔne nni wo ho, wobɛma wo ti so;

wubegyina pintinn a worensuro.

¹⁶Wo werɛ befi wʼahokyere,

na wɔbɛkae no sɛ nsu a asen kɔ.

¹⁷Abrabɔ bɛhyerɛn asen owigyinae,

na sum bɛyɛ sɛ adekyee hann.

¹⁸Wubenya bammɔ, efisɛ anidaso wɔ hɔ;

wobɛhwɛ wo ho ahyia, na wahome asomdwoe mu.

¹⁹Wobɛda ahome, na obi renhunahuna wo,

na bebree bɛhwehwɛ mmoa afi wo nkyɛn.

²⁰Amumɔyɛfo ani befura,

wɔrentumi nguan;

na wɔn anidaso bɛdan owu ahomegu.”

Hiob Bua Sofar

¹Na Hiob buae se,

²“Akyinnye nni ho, mo ne nnipa no

na muwu a na nyansa asa!

³Nanso mewɔ adwene sɛ mo ara

monnsen me.

Hena na onnim saa nneɛma yi nyinaa?

⁴“Mayɛ aserewde ama me nnamfonom,

mefrɛɛ Onyankopɔn na obuae,

aserewde teta bi, nanso meteɛ na me ho nni asɛm.

⁵Nnipa a wɔn ho tɔ wɔn no bu amanehunu animtiaa

sɛnea wobu wɔn a wɔn nan rewatiri no awiei animtiaa no.

⁶Wɔmmfa wɔn nsa nka akorɔmfo ntamadan,

na wɔn a woyi Onyankopɔn abufuw wɔ bammɔ

na Onyankopɔn bɔ nea ɔde ma wɔn ho ban.

⁷“Bisa mmoa no, na wɔbɛkyerɛ wo

anaasɛ wim nnomaa no, na wɔbɛka akyerɛ wo

⁸anaasɛ kasa kyerɛ asase, na ɛbɛkyerɛ wo,

anaasɛ ma po mu mpataa nka nkyerɛ wo.

⁹Wɔn nyinaa mu hena na onnim sɛ

Awurade nsa na ayɛ eyi.

¹⁰Ne nsam na abɔde nyinaa home wɔ

ne adesamma nyinaa home.

¹¹So aso nsɔ nsɛm nhwɛ

sɛnea tɛkrɛma ka aduan hwɛ no ana?

¹²Wonnya nyansa mfi mpanyin nkyɛn,

na ɛnyɛ onyinkyɛ na ɛde ntease ba ana?

¹³“Nyansa ne tumi yɛ Onyankopɔn de;

afotu ne ntease yɛ ne dea.

¹⁴Nea obubu gu no, obiara rentumi nsi;

nea ɔde no to afiase no, obiara rentumi nyi no.

¹⁵Sɛ ɔma osu gyae tɔ a, asase no so yɛ wosee;

sɛ ogyaa osutɔ mu a, ɛsɛe asase no.

¹⁶Ahoɔden ne nkonimdi yɛ ne de

osisifo ne nea wosisi no no nso yɛ ne de.

¹⁷Ɔpa afotufo ho ntama ma wɔkɔ

na ɔma atemmufo yɛ nkwasea.

¹⁸Ɔworɔw ahemfo nkyehama

na ɔde abɔso bɔ wɔn asen.

¹⁹Ɔpa asɔfo ho ntama,

na otu nnipa a wɔn ase atim akyɛ gu.

²⁰Ɔka afotufo a wogye wɔn di no kasaboa hyɛ,

na ogye mpanyimfo nhumu.

²¹Ɔde animguase gu atitiriw so

na otintim gye ahoɔdenfo nsam akode.

²²Ɔda sum mu nneɛma a ahintaw adi

na ɔde sum kabii ba hann mu.

²³Ɔyɛ aman akɛse, na ɔsɛe wɔn;

ɔtrɛw aman mu, na ɔhwete wɔn mu.

²⁴Ogye wiase akannifo adwene fi wɔn nsam;

na ɔma wokyinkyin asase wosee a ɔkwan nna so so.

²⁵Wɔkeka wɔ sum mu a wonni kanea;

na ɔma wɔtɔ ntintan sɛ asabowfo.”

¹“Mʼani ahu eyinom nyinaa,

mʼaso ate, na ate ase.

²Nea wunim no, me nso minim;

wonyɛ abomfiaa mma me.

³Nanso mepɛ sɛ mekasa kyerɛ Otumfo no

na mekyerɛkyerɛ mʼasɛm mu kyerɛ Onyankopɔn.

⁴Mode atoro mmom na asra me ho;

mo nyinaa moyɛ ayaresafo a munsi hwee!

⁵Sɛ mobɛyɛ komm koraa a

ɛno na ɛbɛyɛ nyansa ama mo!

⁶Afei muntie mʼano asɛm;

muntie mʼanoyi.

⁷Mobɛka amumɔyɛsɛm ama Onyankopɔn ana?

Mobɛka nnaadaasɛm ama no ana?

⁸Mobɛkyea mo aso ama no?

Mobɛka Onyankopɔn asɛm ama no ana?

⁹Sɛ ɔhwehwɛ mo mu a, ebesi mo yiye ana?

Mubetumi adaadaa no sɛnea modaadaa nnipa no ana?

¹⁰Sɛ mokyeaa mo aso wɔ kokoa mu a,

sɛnea ɛte biara, ɔbɛka mo anim

¹¹Nʼanuonyam mmɔ mo hu ana?

Ne ho suro ntɔ mo so ana?

¹²Mo kasatɔmmɛ yɛ mmɛbu a ɛte sɛ nsõ;

mo anoyi yɛ dɔte twann anoyi.

¹³“Monyɛ komm mma menkasa;

na nea ɛbɛyɛ me biara mmra me so.

¹⁴Adɛn nti na mede me ho to amane mu

na mede me nkwa to me nsam?

¹⁵Ɛwɔ mu sɛ okum me de, nanso ne so na mʼani bɛda;

ampa ara medi mʼakwan ho adanse wɔ nʼanim.

¹⁶Nokware, eyi na ɛbɛyɛ me nkwagye,

efisɛ nea onsuro Onyankopɔn no rentumi nkɔ nʼanim!

¹⁷Muntie me nsɛm yi yiye;

monyɛ aso mma nea meka.

¹⁸Afei a masiesie me nkurobɔ yi,

minim sɛ medi bem.

¹⁹Obi betumi abɔ me kwaadu ana?

Sɛ ɛte saa de a, anka mɛyɛ komm na mawu.

²⁰“Onyankopɔn, yɛ saa nneɛma abien yi pɛ ma me,

na afei meremfa me ho nhintaw wo:

²¹Yi wo nsa fi me so kɔ akyirikyiri,

na gyae wo ho hu a wode hunahuna me no.

²²Ɛno de, samena me na mɛba,

anaa ma menkasa na bua me.

²³Mfomso ne bɔne dodow ahe na mayɛ?

Kyerɛ me me mfomso ne me bɔne.

²⁴Adɛn nti na wode wʼanim asie me

na wudwen sɛ meyɛ wo tamfo?

²⁵Wobɛyɛ ahaban a mframa rebɔ no ayayade ana?

Wobɛtaa ntɛtɛ a awo ana?

²⁶Wokyerɛw sobo a ɛyɛ yaw tia me,

na woka me mmabunmmere mu bɔne nyinaa gu me so.

²⁷Wode nkyehama gu mʼanan;

wohwɛ mʼanammɔnkwan nyinaa so yiye

na wode agyiraehyɛde ayeyɛ mʼanammɔn mu.

²⁸“Enti onipa nkwa sa te sɛ ade a aporɔw,

te sɛ atade a nwewee adi.

¹“Nnipa a ɔbea awo wɔn

nna yɛ tiaa bi na ɔhaw ahyɛ mu mma.

²Ɔfefɛw te sɛ nhwiren na etwintwam;

ɔte sɛ sunsuma a ɛretwa mu akɔ, ɔntena hɔ nkyɛ.

³Woma wʼani kɔ saa onipa yi so?

Wode no bɛba wʼanim abebu no atɛn ana?

⁴Hena na obetumi ayi nea ɛyɛ kronkron afi fi mu?

Obiara nni hɔ.

⁵Woahyehyɛ onipa nkwa nna;

woahyɛ nʼasram dodow ato hɔ

na woahyɛ no bere a ɔrentumi ntra.

⁶Enti yi wʼani fi ne so na ɔnyɛ nea ɔpɛ,

kosi sɛ obewie nʼadwuma sɛ ɔpaani.

⁷“Dua mpo anidaso wɔ hɔ ma no:

Sɛ wotwa a, ɛbɛfefɛw bio,

na ne mman foforo no rempenpan.

⁸Ne ntin betumi anyin akyɛ asase mu

na ne dunsin nso awu wɔ dɔte mu,

⁹nanso, onya nsu a ɛfefɛw,

na eyiyi mman sɛ dua a wɔatɛw.

¹⁰Nanso sɛ nnipa wu a wɔde no hyɛ fam;

ɔhome nea etwa to a, na afei onni hɔ bio.

¹¹Sɛnea nsu tu yera wɔ po mu no,

anaa sɛnea suka mu yowee no,

¹²saa ara na onipa tɔ fam na ɔnsɔre bio;

enkosi sɛ ɔsoro betwa mu no, nnipa rensɔre

na wɔrennyan wɔn mfi wɔn nna mu.

¹³“Sɛ anka wode me besie ɔda mu

de me ahintaw kosi sɛ wʼabufuw betwa mu!

Sɛ anka wobɛhyɛ me bere

na afei woakae me!

¹⁴Sɛ onipa wu a ɔbɛba nkwa mu bio ana?

Mʼaperedi nna mu nyinaa

mɛtwɛn akosi sɛ me foforoyɛ bɛba.

¹⁵Wobɛfrɛ na megye wo so;

wʼani begyina abɔde a wo nsa ayɛ.

¹⁶Afei wobɛkan mʼanammɔntu

na worenni me bɔne akyi.

¹⁷Wɔbɛsɔ me bɔne ano wɔ kotoku mu,

na woakata mʼamumɔyɛ so.

¹⁸“Nanso sɛnea mmepɔw so hohoro na ɛpompono

na ɔbotan nso twe fi ne sibea no,

¹⁹sɛnea nsu yiyi abo ho

na osuhweam twe dɔte kɔ no

saa ara na wosɛe onipa anidaso.

²⁰Wutintim ne so prɛko pɛ, na otwa mu kɔ;

wosakra ne nipasu na wugya no kwan.

²¹Sɛ wɔhyɛ ne mmabarima anuonyam a, onnim;

na sɛ wɔbrɛ wɔn ase a, onhu.

²²Ɔno ara were mu yaw na ɔtee

na ɔno ara ne ho na ogyam.”

Elifas Mmuae A Ɛto So Abien

¹Na Temanni Elifas buae se,

²“Enti onyansafo de nsɛm a aba biara nni mu beyi nʼano

anaasɛ ɔde apuei mframa a emu yɛ hyew bɛhyɛ nʼafuru ma?

³Ɔde nsɛm huhuw begye akyinnye,

aka nsɛm a mfaso biara nni so ana?

⁴Wototo onyamesuro ase mmom

na wusiw Onyankopɔn som ho kwan.

⁵Wo bɔne kyerɛ wʼano nea ɔnka;

na woafa anitew tɛkrɛma.

⁶Wʼankasa wʼano bu wo kumfɔ, ɛnyɛ me de;

wʼankasa wʼano di adanse tia wo.

⁷“Wone onipa a wɔwoo wo dii kan ana?

Wɔwoo wo ansa na wɔrewo nkoko ana?

⁸Wutie Onyankopɔn afotu ana?

Wo nko ara na wunim nyansa ana?

⁹Dɛn na wunim a, yennim?

Nhumu bɛn na wowɔ a yenni?

¹⁰Nea wafuw dwen ne akwakoraa wɔ yɛn afa

wɔn a wɔanyinyin sen wʼagya mpo.

¹¹Onyankopɔn awerɛkyekye

ne nsɛm a wɔka no brɛoo kyerɛ wo no sua ma wo ana?

¹²Adɛn nti na wo koma atwe wo akɔ

adɛn nti na wʼani asɔ gya,

¹³na woadan wʼabufuw agu Onyankopɔn so

na woma saa nsɛm yi pue fi wʼano?

¹⁴“Ɔdesani ne hena a obetumi ayɛ pɛ,

anaasɛ nea ɔbea awo no bɛn na obetumi ayɛ ɔtreneeni?

¹⁵Onyankopɔn nni ahotoso wɔ nʼakronkronfo mu

ɔsorosoro mpo nyɛ kronkron wɔ nʼani so,

¹⁶na me ne onipa debɔneyɛfo ne omumɔyɛfo a

ɔnom bɔne sɛ nsu.

¹⁷“Tie me, na mɛkyerɛ wo mu;

ma menka nea mahu nkyerɛ wo,

¹⁸nea anyansafo apae mu aka,

a wɔamfa biribiara a wonya fii wɔn agyanom hɔ no ansie

¹⁹(wɔn nko ara na wɔde asase no maa wɔn

bere a ananafo biara nni wɔn mu):

²⁰Omumɔyɛfo kɔ ahohia mu, ne nkwanna nyinaa,

na basabasayɛni nso, ne mfe a wɔahyehyɛ ama no nyinaa.

²¹Nnyigyei a ɛyɛ hu hyɛ nʼasom ma;

na sɛ ɛyɛ sɛ nneɛma rekɔ yiye ma no a, akorɔmfo tow hyɛ ne so.

²²Ɔpa abaw sɛ obeguan afi sum mu;

wɔabɔ no ato hɔ ama afoa.

²³Okyinkyin hwehwɛ aduan;

onim sɛ sum da no abɛn.

²⁴Ɔhaw ne ahoyeraw yi no hu;

ɛhyɛ ne so sɛ ɔhene a wasiesie ne ho ama ɔko,

²⁵efisɛ ɔteɛteɛ ne nsa kyerɛ Onyankopɔn

na ɔma ne ho so tia Otumfo,

²⁶wɔde nkatabo a mu piw na ɛyɛ den

kɔ ne so a, onsuro obiara.

²⁷“Ɛwɔ mu sɛ srade ama nʼafono atotɔ

na nʼasen mu nam abubu agu so de,

²⁸nanso ɔbɛtena nkurow a agu so

na watena afi a obi nte mu,

afi a ɛrebubu mu.

²⁹Ɔrenkɔ so nyɛ ɔdefo bio, na nʼahonya rennyina,

na nʼagyapade so bɛtew na ayera wɔ asase so.

³⁰Ɔrenguan sum no;

ogyaframa bɛhyew ne mman,

na Onyankopɔn anom ahomegu bɛsoa no akɔ.

³¹Ɛnsɛ sɛ ɔde ne ho to nneɛma huhuw so de daadaa ne ho,

efisɛ ɔrennya hwee mfi mu.

³²Ansa na ne da bedu no, wobetua no ka a bi nka,

na ne mman renyɛ frɔmfrɔm.

³³Ɔbɛyɛ sɛ bobedua a wɔaporow so aba a ennyin ɛ,

te sɛ ngodua a ne nhwiren reporow gu fam.

³⁴Na abɔnefo fekuw a wonnim Onyankopɔn no rensow aba,

na ogya bɛhyew wɔn a wɔdɔ kɛtɛasehyɛ no ntamadan.

³⁵Wonyinsɛn ɔhaw na wɔwo bɔne;

wɔn awotwaa siesie nnaadaa.”

Hiob Mmuae

¹Afei Hiob buae se,

²“Mate nsɛm bebree a ɛte sɛ eyinom;

na mo nyinaa moyɛ ogyamserewfo!

³So mo kasa tenten no remma awiei ana?

Dɛn na ɛhaw mo nti a mugu so regye akyinnye yi?

⁴Anka me nso metumi akasa sɛ mo,

sɛ mo na mowɔ me tebea yi mu a,

anka metumi akeka nsɛm a ɛyɛ dɛ atia mo

na mabu mo animtiaa.

⁵Nanso anka mɛhyɛ mo den;

anka awerɛkyekye nsɛm a ebefi mʼanom no bɛma mo ahotɔ.

⁶“Nanso sɛ mekasa a ɔyaw a mete no remmrɛ ase;

na sɛ mankasa nso a, ɛrennyae.

⁷Onyankopɔn, ampa ara woama mabrɛ

woasɛe me fi pasaa.

⁸Woakyekyere me, ama abɛyɛ adansedi;

me so tew ara na ɛtew na edi adanse tia me.

⁹Onyankopɔn tow hyɛ me so tetew me wɔ nʼabufuw mu

na ɔtwɛre ne se gu me so;

nea ɔne me anya no pɔkyere nʼani hwɛ me.

¹⁰Nnipa bue wɔn ano di me ho fɛw;

wɔbɔ me sotɔre de bu me animtiaa

na wɔka wɔn ho bɔ mu de tia me.

¹¹Onyankopɔn de me ama abɔnefo

watow me ato amumɔyɛfo nsam.

¹²Na biribiara kɔ yiye ma me, nanso ɔdwerɛw me;

osoo me kɔn mu, tow me hwee hɔ.

Ɔde me asi nʼani so;

¹³nʼagyantowfo atwa me ho ahyia,

ohwirew mʼasaabo mu a wanhu me mmɔbɔ

maa me bɔnwoma petee fam.

¹⁴Ɔba me so bere biara;

na ɔtow hyɛ me so sɛ ɔkofo.

¹⁵“Mapam atweaatam akata me were so

na masie mʼanintɔn wɔ mfutuma mu.

¹⁶Agyaadwotwa ama mʼani ayɛ kɔɔ;

sunsuma kabii atwa mʼani ho ahyia,

¹⁷nanso me nsa nyɛɛ basabasayɛ biara

na me mpaebɔ yɛ kann.

¹⁸“Asase, nkata me mogya so;

na mma me sufrɛ to ntwa da!

¹⁹Mprempren mpo, me danseni wɔ ɔsoro;

me kamafo wɔ soro hɔ.

²⁰Me dimafo yɛ mʼadamfo

bere a mʼaniwa tew nisu gu Onyankopɔn so yi;

²¹ogyina onipa anan mu di ma no wɔ Onyankopɔn anim

sɛnea obi di ma nʼadamfo no.

²²“Mfe kakraa bi akyi

ansa na metu kwan akɔ koransan.

¹Me honhom atɔ beraw,

me nna so atwa,

na ɔda retwɛn me.

²Ampa ara fɛwdifo atwa me ho ahyia;

ɛsɛ sɛ mehwɛ wɔn atutuwpɛ.

³“Ao Onyankopɔn, hyɛ me bɔ a wuhia.

Hena bio na ɔbɛma me bammɔ?

⁴Wɔato wɔn adwene mu a wɔnte asɛm ase;

enti woremma wonni nkonim.

⁵Sɛ obi sopa ne nnamfonom de gye akatua a,

ɛbɛhwere ne mma aniwa.

⁶“Onyankopɔn de me ayɛ asɛm a ɛda obiara ano,

obi a wɔte ntasu gu nʼani so.

⁷Awerɛhow ama mʼani ayɛ siamoo

me nipadua nyinaa yɛ sunsuma.

⁸Ɛyɛ atreneefo nwonwa;

wɔn a wodi bem tia wɔn a wonni nyamesu.

⁹Nanso atreneefo bɛkɔ wɔn anim,

na wɔn a wɔn nsa ho tew no bɛkɔ so anya ahoɔden.

¹⁰“Mo nyinaa monsan mmra mmɛsɔ nhwɛ!

Na merennya onyansafo wɔ mo mu.

¹¹Me nna atwa mu, me nhyehyɛe apansam.

Nanso me koma apɛde

¹²ma anadwo dan awia;

sum mu koraa no hann bɛn.

¹³Sɛ ofi a mʼani da so nkutoo ne ɔda,

sɛ mesɛw me kɛtɛ wɔ sum mu,

¹⁴sɛ meka kyerɛ porɔwee se, ‘Wo yɛ mʼagya,’

ne osunson se, ‘Me na’ anaa ‘Me nuabea’ a,

¹⁵na afei mʼanidaso wɔ he?

Hena na obetumi anya anidaso bi ama me?

¹⁶Ebesian akɔ owu pon ano ana?

Yɛn nyinaa besian akɔ mfutuma mu ana?”

Bildad Mmuae A Ɛto So Abien

¹Na Suhini Bildad buae se,

²“Bere bɛn na wubegyae kasa tenten yi?

Dwene ho yiye, na afei yebetumi akasa.

³Adɛn nti na wofa yɛn sɛ anantwi

na wususuw sɛ yennim nyansa yi?

⁴Wo a wode abufuw tetew wo mu nketenkete,

wo nti na yemfi asase so

anaasɛ wonnwiriw abotan mfi wɔn sibea ana?

⁵“Omumɔyɛfo kanea adum;

na ne gya nnɛw bio.

⁶Hann a ɛwɔ ne ntamadan mu duru sum;

kanea a esi ne ho no dum.

⁷Nʼanammɔntu mu ahoɔden ano bɛbrɛ ase;

nʼankasa nhyehyɛe hwe no ase.

⁸Nʼanammɔn de no kɔ afiri mu,

na okyinkyin kɔtɔ ne tan mu.

⁹Afiri so ne nantin

na eso ne mu dennen.

¹⁰Wɔasum no afiri ahintaw wɔ fam;

afiri wɔ ne kwan mu.

¹¹Ahunahuna ma ɔbɔ huboa wɔ ne ho nyinaa

na ɛhaw no wɔ nʼanammɔntu biara mu.

¹²Atoyerɛnkyɛm kɔn dɔ no;

na sɛ ɔhwe ase a, amanehunu retwɛn no.

¹³Ɛwewe ne honam ani baabi;

na owu di kan sɛe nʼakwaa.

¹⁴Wɔtwe no fi ne ntamadan bammɔ mu

na wɔde no brɛ ahunahunahene.

¹⁵Ogya te ne ntamadan mu;

na wɔabɔ sufre a ɛredɛw apete nʼatenae.

¹⁶Ne ntin wuwu wɔ ase

na ne mman nso wu wɔ soro.

¹⁷Wɔnnkae no asase so bio;

na onni din wɔ asase so.

¹⁸Wɔka no fi hann mu kɔ sum mu

na wɔpam no fi wiase.

¹⁹Onni mma anaa nananom wɔ ne nkurɔfo mu,

na nʼaseni biara renka wɔ baabi a ɔtenae.

²⁰Nnipa a wofi atɔe fam ho adwiriw wɔn wɔ nea ato no no ho;

na aninyanne bunkam wɔn a wɔwɔ apuei fam no so.

²¹Ampa ara, sɛɛ na omumɔyɛfo atenae te;

sɛɛ ne beae a nea onnim Onyankopɔn no te.”

Hiob Bua Bildad

¹Na Hiob buae se,

²“Mobɛhyɛ me ɔyaw

na mode nsɛm abubu me akosi da bɛn?

³Mpɛn du ni a moasopa me;

mo ani nwu sɛ motow hyɛ me so.

⁴Sɛ ɛyɛ nokware sɛ mafom ɔkwan a,

me mfomso yɛ me nko ara asɛm.

⁵Sɛ ampa sɛ mobɛma mo ho so asen me

na mode mʼanimguase ayɛ adanse atia me a,

⁶ɛno de munhu sɛ Onyankopɔn ayɛ me bɔne

na ɔde ne tan atwa me ho ahyia.

⁷“Ɛwɔ mu, misu se, ‘Wɔafom me’ de, nanso obiara mmua me;

meteɛ mu pɛ mmoa, nanso atɛntrenee biara nni hɔ.

⁸Wasiw me kwan enti mintumi nsen;

ɔde sum aduru mʼakwan so.

⁹Wayi mʼanuonyam afi me so

na watu mʼahenkyɛw afi me ti so.

¹⁰Wasɛe me akwannuasa nyinaa so de awie me;

watu mʼanidaso ase te sɛ dua.

¹¹Nʼabufuw huru tia me;

na wakan me afra nʼatamfo mu.

¹²Nʼakofo ba anibere so;

wosisi mpie de tia me

na wotwa me ntamadan ho hyia.

¹³“Wayi me nuabarimanom afi me ho;

na mʼamanifo atwe wɔn ho koraa.

¹⁴Mʼabusuafo kɔ;

na me nnamfonom werɛ afi me.

¹⁵Mʼahɔho ne me mmaawa bu me sɛ ɔhɔho;

mete sɛ ɔnanani ma wɔn.

¹⁶Mefrɛ me somfo, na ommua;

mpo, metew mʼano srɛ no.

¹⁷Me home bɔn me yere;

me ho afono mʼankasa nuabarimanom.

¹⁸Mpo, mmarimaa nkumaa bu me animtiaa;

sɛ mipue a wodi me ho fɛw.

¹⁹Me nnamfo ankasa nyinaa kyi me;

mʼadɔfo asɔre atia me.

²⁰Maka were ne nnompe,

nea mede aguan nkutoo ne me se akyi nam.

²¹“Munhu me mmɔbɔ, me nnamfonom, munhu mmɔbɔ,

na Onyankopɔn nsa abɔ me.

²²Adɛn nti na motaa me sɛnea Onyankopɔn yɛ no?

Na mommfa me honam yi saa ara?

²³“Ao, sɛ anka wɔde me nsɛm bɛhyɛ nhoma mu,

anka wɔbɛkyerɛw wɔ nhoma mmobɔwee so,

²⁴anka wɔde dade pɛe bɛkyerɛw wɔ sumpii so,

anaa wobekuruakyerɛw wɔ ɔbotan so afebɔɔ!

²⁵Minim sɛ me dimafo te ase,

na awiei no ɔbɛsɔre agyina asase so.

²⁶Na wɔasɛe me were awie no,

mefi me were mu ahu Onyankopɔn.

²⁷Me ara mehu no

mede mʼani, na ɛnyɛ obi foforo ani, behu no.

Sɛnea me koma ho pere wɔ me mu!

²⁸“Sɛ moka se, ‘Yɛbɛteetee no,

efisɛ ɔhaw no fi ɔno ara a,’

²⁹ɛsɛ sɛ mo ankasa musuro afoa no

na abufuw nam afoa so de asotwe bɛba,

na mubehu sɛ atemmu wɔ hɔ.”

Sofar Mmuae A Ɛto So Abien

¹Na Naamani Sofar buae se,

²Me tirim mu ntew me, na ɛhyɛ me sɛ mimmua

efisɛ me ho yeraw me yiye.

³Mate animka bi a egu me ho fi,

na ntease a minya no hyɛ me sɛ mimmua.

⁴“Ampa ara wunim sɛnea nneɛma te fi tete,

efi bere a wɔde nnipa duaa asase so no,

⁵sɛ amumɔyɛfo ani gye bere tiaa bi mu,

na wɔn a wonsuro nyame nso anigye nkyɛ.

⁶Ɛwɔ mu sɛ nʼahohoahoa kodu ɔsoro,

na ne ti kɔpem omununkum koraa a,

⁷ɔbɛyera afebɔɔ te sɛ nʼankasa nʼagyanan;

na wɔn a wohuu no no bebisa se, ‘Ɔwɔ he?’

⁸Otu kɔ te sɛ ɔdae, na wɔrenhu no bio,

wɔn werɛ fi te sɛ anadwo mu anisoadehu.

⁹Ani a ehuu no no renhu no bio;

na ne sibea nso renhu no bio.

¹⁰Ne mma bɛpata ahiafo;

ɛsɛ sɛ nʼankasa de nʼahonya san ma.

¹¹Ne mmerantebere mu ahoɔden a ahyɛ ne nnompe ma no

ne no bɛkɔ mfutuma mu.

¹²“Ɛwɔ mu sɛ bɔne yɛ nʼanom dɛ

na ɔde sie ne tɛkrɛma ase,

¹³ɛwɔ mu sɛ ontumi nnyaa mu

na ɔma ɛka ne dudom,

¹⁴nanso, nʼaduan bɛyɛ nwen wɔ ne yafunu mu;

ɛbɛyɛ ɔwɔ ano bɔre wɔ ne mu.

¹⁵Ɔbɛfe ahonyade a ɔmenee no;

Onyankopɔn bɛma ne yafunu apuw agu.

¹⁶Ɔbɛfefe awɔ bɔre;

Ɔnanka se bekum no.

¹⁷Ɔrennya nsuwansuwa no nnom

nsubɔnten a nufusu ne ɛwo sen wɔ mu no.

¹⁸Ɔbɛdan nea ɔbrɛ nyae no aba a ɔrenni bi;

ɔremfa nʼaguadi mu mfaso nnye nʼani.

¹⁹Efisɛ ɔhyɛɛ ahiafo so ma wodii ohia buruburoo;

ɔde ne nsa ato afi a ɛnyɛ ɔno na osii so.

²⁰“Ampa ara ɔrennya ahomegye mfi nea wapere anya no mu;

ɔrentumi mfa nʼademude nnye ne ho nkwa.

²¹Wafom nneɛma nyinaa awie;

ne nkɔso nnu baabiara.

²²Nʼadedodow nyinaa mu no, ɔbɛkɔ ɔhaw mu;

na amanehunu a emu yɛ den bɛto no.

²³Bere a nʼafuru ayɛ ma no,

Onyankopɔn bɛtɔ nʼabufuw gya agu ne so

na wabobɔ no basabasa.

²⁴Ɛwɔ mu sɛ oguan fi dade akode ano

nanso bɛmma a ano yɛ kɔbere mfrafrae bɛwɔ no.

²⁵Ɔtwe bɛmma no fi nʼakyi,

ano hyɛnhyɛn no fi ne brɛbo mu.

Ehu bɛba ne so;

²⁶sum kabii retwɛn nʼademude.

Ogya a ɛnnɛw mu bɛhyew no,

na asɛe nea aka wɔ ne ntamadan mu.

²⁷Ɔsoro bɛda nʼafɔdi adi,

na asase asɔre atia no.

²⁸Nsuyiri bɛtwe ne fi akɔ,

saa ara na asuworo bɛyɛ Onyankopɔn abufuwhyew da no.

²⁹Eyi ne nkrabea a Onyankopɔn de ma amumɔyɛfo,

agyapade a Onyankopɔn de ato hɔ ama wɔn ne no.”

¹Na Hiob buae se,

²Muntie me nsɛm no yiye.

Momma eyi nyɛ awerɛkyekye a mode ma me.

³Munnya ntoboase mma me bere a merekasa,

na sɛ mekasa wie a, monkɔ so nni fɛw.

⁴“Minwiinwii hyɛ onipa ana?

Adɛn nti na ɛsɛ sɛ minya ntoboase?

⁵Monhwɛ me, na mo ho nnwiriw mo;

momfa mo nsa nkata mo ano.

⁶Sɛ midwen eyi ho a, mebɔ hu;

na me ho popo.

⁷Adɛn nti na amumɔyɛfo tena nkwa mu?

Wonyin kyɛ na wɔkɔ so di tumi.

⁸Wohu wɔn mma a atwa wɔn ho ahyia no nkɔso,

wohu wɔn nenanom.

⁹Ɔhaw nni wɔn afi mu, na ehu nni hɔ;

Onyankopɔn asotwe mma wɔn so.

¹⁰Wɔn anantwinini nnyɛ asaadwe;

na wɔn anantwibere nwo a wɔmpɔn.

¹¹Wɔka wɔn mma bɔ mu te sɛ nguankuw;

na emu mmotafowa no huruhuruw.

¹²Wɔto nnwom wɔ akasae ne sanku so;

na wɔde atɛntɛbɛn nnyigyei gye wɔn ani.

¹³Wodi yiye wɔn nkwanna mu

na wɔkɔ ɔdae mu asomdwoe mu.

¹⁴Nanso wɔka kyerɛ Onyankopɔn se, ‘Fi yɛn so!

Yɛmpɛ sɛ yehu wʼakwan.

¹⁵Hena ne otumfo no a ɛsɛ sɛ yɛsom no?

Sɛ yɛbɔ no mpae a mfaso bɛn na yebenya?’

¹⁶Nanso wɔn nkɔso no nni wɔn nsam,

enti metwe me ho fi amumɔyɛfo afotu ho.

¹⁷“Nanso mpɛn ahe na wodum amumɔyɛfo kanea?

Mpɛn ahe na amanehunu ba wɔn so,

nea Onyankopɔn fi nʼabufuw mu de ba no?

¹⁸Mpɛn ahe na wɔyɛ sɛ sare wɔ mframa ano,

te sɛ ntɛtɛ a mframaden bi apra wɔn?

¹⁹Wɔka se, ‘Onyankopɔn kora onipa asotwe so de twɛn ne mma.’

Ɛsɛ sɛ ɔtwe onipa no ankasa aso ma ohu.

²⁰Ma ɔno ankasa ani nhu ne sɛe;

ma Otumfo abufuwhyew no nka nʼani.

²¹Dɛn na ɛfa wɔn ho fa wɔn abusuafo a woagyaw wɔn akyi no ho

bere a asram a wɔatwa ama no aba awiei no?

²²“Obi betumi akyerɛ Onyankopɔn nyansa,

wɔ bere a obu atitiriw mpo atɛn?

²³Obi wu wɔ bere a ɔwɔ ahoɔden

ne ho tɔ no na nʼaso mu adwo no,

²⁴na ne nipadua ayɛ frɔmfrɔm,

na hon ahyɛ ne nnompe ma.

²⁵Ɔfoforo nso de ɔkra mu yawdi wu,

a wanka asetena pa anhwɛ da.

²⁶Wosie wɔn nyinaa wɔ mfutuma koro mu,

ma asunson nnunu wɔn nyinaa.

²⁷“Mahu mo adwene,

ɔkwan a mobɛfa so afom me.

²⁸Moka se, ‘Onipa kɛse no fi wɔ he,

ntamadan a omumɔyɛfo no tenaa mu no?’

²⁹So mummmisaa wɔn a wotu kwan no asɛm da?

Wɔn amanneɛbɔ mu nsɛm ho nhiaa mo

³⁰sɛ onipa bɔne nya ne ti didi mu amanehunu da,

na wogye wɔn abufuwhyew da no ana?

³¹Hena na ɔde ne suban si nʼanim?

Hena na otua no nea wayɛ so ka?

³²Wɔsoa no kɔ ɔda mu,

na wɔwɛn nʼaboda.

³³Obon mu dɔte yɛ no dɛ;

nnipa nyinaa di nʼakyi,

na dɔm a wontumi nkan wɔn di nʼanim.

³⁴“Enti ɛbɛyɛ dɛn na mode mo nsɛnhunu bɛkyekye me werɛ?

Mo mmuae nyɛ hwee sɛ atoro!”

Elifas Mmuae A Ɛto So Abien

¹Na Temanni Elifas buae se,

²“Onyankopɔn benya onipa so mfaso ana?

Mpo onyansafo so bɛba no mfaso ana?

³Sɛ woyɛ ɔtreneeni a, anigye bɛn na Otumfo no benya?

Sɛ wʼakwan ho nni asɛm a, mfaso bɛn na obenya?

⁴“Wo kronkronyɛ nti na ɔka wʼanim

na ɔbɔ wo kwaadu ana?

⁵Ɛnyɛ wʼamumɔyɛ na ɛso?

Ɛnyɛ wo bɔne na ɛdɔɔso dodo?

⁶Wopɛɛ bammɔ fii wo nuanom nkyɛn a emfi hwee so;

wopaa nnipa ho ntama ma wɔdaa adagyaw.

⁷Woamma abrɛfo nsu annom

na wode aduan kamee nea ɔkɔm de no,

⁸nanso na woyɛ obi a ɔwɔ tumi, wɔ nsase,

onuonyamfo a ɔte so.

⁹Wopam akunafo ma wɔkɔɔ nsapan

na womaa ayisaa nso ahoɔden sae.

¹⁰Ɛno nti na mfiri atwa wo ho ahyia,

na amanehunu a ɛba ntɛm so bɔ wo hu yi,

¹¹ɛno nti na sum kabii aduru a wunhu ade,

na asorɔkye akata wo so yi.

¹²“So Onyankopɔn nni ɔsoro akyirikyiri ana?

Hwɛ sɛnea ɔsoro akyirikyiri nsoromma korɔn!

¹³Nanso woka se, ‘Dɛn na Onyankopɔn nim?

Sum yi mu na obu atɛn ana?

¹⁴Omununkum kabii akata nʼanim nti onhu yɛn

bere a ɔnenam ɔsoro kontonkurowi mu.’

¹⁵So wobɛkɔ so afa ɔkwan dedaw a

abɔnefo anantew so no so ana?

¹⁶Wɔpraa wɔn kɔe ansa na wɔn bere reso,

na nsuyiri hohoroo wɔn fapem.

¹⁷Na wɔka kyerɛɛ Onyankopɔn se, ‘Gyaa yɛn!

Dɛn na Otumfo betumi ayɛ yɛn?’

¹⁸Nanso ɛyɛ ɔno na ɔde nnepa hyɛɛ wɔn afi mu,

nti metwe me ho fi amumɔyɛfo afotu ho.

¹⁹Atreneefo hu wɔn asehwe ma wɔn ani gye;

na wɔn a wɔn ho nni asɛm serew wɔn ka se,

²⁰‘Wɔasɛe yɛn atamfo,

na ogya ahyew wɔn agyapade.’

²¹“Fa wo ho ma Onyankopɔn na nya asomdwoe wɔ ne mu;

saa ɔkwan yi so na yiyedi bɛfa ayɛ wo kyɛfa.

²²Tie akwankyerɛ a efi nʼanom,

na fa ne nsɛm sie wo koma mu.

²³Sɛ wosan kɔ Otumfo no nkyɛn a obegye wo ato mu bio:

sɛ wuyi amumɔyɛsɛm fi wo ntamadan mu

²⁴na wotow wo sika mpɔw gu mfutuma mu

ne Ofir sikakɔkɔɔ gu abotan a ɛwɔ abon mu no so a,

²⁵ɛno de Otumfo bɛyɛ wo sikakɔkɔɔ

ɔbɛyɛ dwetɛ ankasa ama wo.

²⁶Afei nokware wubenya anigye wɔ Otumfo mu

na wobɛpagyaw wʼani akyerɛ Onyankopɔn.

²⁷Wobɛbɔ no mpae, na obetie wo,

na wubedi wo bɔhyɛ so.

²⁸Nea woyɛ wʼadwene sɛ wobɛyɛ no bɛba mu,

na hann bɛtɔ wʼakwan so.

²⁹Sɛ nnipa hwe ase na woka se, ‘Ma wɔn so!’ a,

obegye wɔn a wɔahwe ase no nkwa.

³⁰Obegye abɔnefo mpo,

ɔnam wo nsa a ɛho nni fi so begye wɔn.”

Hiob Mmuae

¹Na Hiob buae se,

²“Nnɛ mpo, mʼanwiinwii mu da so yɛ den;

ne nsa ayɛ den, mʼapinisi nyinaa akyi.

³Sɛ minim baabi a mehu no;

anaasɛ metumi akɔ ne tenabea a

⁴anka mɛka mʼasɛm wɔ nʼanim

na magye akyinnye bebree.

⁵Anka mɛte mmuae a ɔde bɛma me,

na madwen nea ɔbɛka ho.

⁶Ɔbɛsɔre atia me dennen ana?

Dabi, ɔremmɔ me kwaadu.

⁷Ɛhɔ de, nnipa trenee betumi aka nʼasɛm wɔ nʼanim,

na wobegye me afi me temmufo nsam afebɔɔ.

⁸“Nanso sɛ mekɔ apuei fam a onni hɔ;

sɛ mekɔ atɔe fam nso a minhu no.

⁹Sɛ ɔreyɛ adwuma wɔ atifi fam a minhu no;

sɛ ɔdan ne ho kɔ anafo fam a, mʼani nhye ne ho.

¹⁰Nanso onim ɔkwan a menam so;

na sɛ ɔsɔ me hwɛ a mepue sɛ sikakɔkɔɔ.

¹¹Madi nʼanammɔn akyi pɛɛ;

na manantew nʼakwan so a mamman.

¹²Mentwee me ho mfii mmara nsɛm a efi nʼanom no ho,

mama asɛm a efi nʼanom ho ahia me asen me daa aduan.

¹³“Nanso obiara nni hɔ ka ne ho, na hena na obetumi atia no?

Ɔyɛ biribiara a ɔpɛ.

¹⁴Ɔde ne mmaransɛm di dwuma tia me;

ɔda so kora nhyehyɛe a ɛte sɛɛ bebree.

¹⁵Ɛno nti na mebɔ hu wɔ nʼanim;

na sɛ midwen eyinom nyinaa ho a, misuro no.

¹⁶Onyankopɔn ama me koma abotow;

Otumfo ama mabɔ huboa.

¹⁷Nanso sum no mma menka mʼano nto mu,

sum kabii a ɛkata mʼanim no.

¹“Adɛn nti na Onyankopɔn nhyɛ bere mma atemmu?

Adɛn nti na ɛsɛ sɛ wɔn a wonim no no hwɛ saa da no anim nanso ɛmma da?

²Nnipa yiyi abo a wɔde ato ɔhye;

na wɔde nguankuw a wɔawia kɔ hɔ adidi.

³Wɔpam ayisaa mfurum

na wogye akunafo anantwi sɛ awowaside.

⁴Wosum ahiafo fi kwan so

na wɔhyɛ asase no so ahiafo ma wɔkɔtetɛw.

⁵Sɛnea sare so mfurum yɛ no

saa ara na ahiafo no yɛ wɔn adwuma de pɛ aduan;

asase kesee no so na wonya aduan ma wɔn mma.

⁶Wɔboaboa mmoa aduan ano wɔ mfuw no so

na wodi mpɛpɛ wɔ amumɔyɛfo bobe nturo mu.

⁷Wonni ntama, na wɔda adagyaw anadwo;

wonni hwee a wɔde kata wɔn ho wɔ awɔw mu.

⁸Mmepɔw so osu tɔ fɔw wɔn kyam

na wɔtetare abotan no ho, efisɛ wonni nnae.

⁹Wɔtew ayisaa fi nufu ano;

na wɔfa ohiani abotafowa de si ne ka anan mu.

¹⁰Wɔnenam adagyaw a wonni ntama;

wɔsoa awi afiafi, nanso ɔkɔm de wɔn ara.

¹¹Wokyi ngo wɔn adan mu;

wotiatia nsakyiamoa mu, nanso osukɔm de wɔn.

¹²Wɔn a wɔrewuwu no apinisi fi kuropɔn no mu,

na apirafo kra su pɛ mmoa.

Nanso Onyankopɔn mfa bɔne nto obiara so.

¹³“Ebinom wɔ hɔ a wɔsɔre tia hann no,

wɔn a wonnim nʼakwan

anaasɛ wɔnnantew nʼatempɔn so no.

¹⁴Sɛ adekyee hann no kɔ a, owudifo no sɔre

na okum ohiani ne mmɔborɔni;

anadwo, mu owiawia ne ho sɛ ɔkorɔmfo.

¹⁵Ɔwaresɛefo twɛn bere a anim rebiribiri;

ɔka se, ‘obiara renhu me,’

na ɔde nʼanim hintaw.

¹⁶Sum mu na nnipa bubu apon wura afi mu,

na adekyee, wɔtoto wɔn ho apon mu;

wɔne hann nni hwee yɛ.

¹⁷Sum kabii yɛ adekyee ma wɔn nyinaa;

wɔne sum mu nneɛma a ɛyɛ hu fa nnamfo.

¹⁸“Nanso wɔte sɛ ahuru a ɛte nsu ani;

wɔadome wɔn kyɛfa wɔ asase no so,

enti obiara nkɔ bobe nturo no mu.

¹⁹Sɛnea ɔhyew ne ɔpɛ hwim sukyerɛmma a anan kɔ no,

saa ara na ɔda de wɔn a wɔayɛ bɔne kɔ ne no.

²⁰Awotwaa werɛ fi wɔn,

na osunson di wɔn nam;

nnipa bɔne de wɔnnkae wɔn bio

na mmom wobubu te sɛ dua.

²¹Wɔde ɔbea bonin a onni ba yɛ hanam,

na wonhu akunafo mmɔbɔ.

²²Onyankopɔn nam ne tumi so twe atumfo kɔ;

ɛwɔ mu sɛ wonya asetena pa de, nanso wonni nkwa ho bɔhyɛ.

²³Otumi ma wɔn tena ase asomdwoe mu,

nanso nʼani wɔ wɔn akwan so.

²⁴Wɔma wɔn so bere tiaa bi, na afei wonni hɔ bio;

wɔbrɛ wɔn ase boaboa wɔn ano sɛ nnipa nyinaa;

wotwitwa wɔn gu te sɛ aburow ti.

²⁵“Sɛ eyi nte saa a, hena na obetumi agye me akyinnye

na ama nea maka no ayɛ nsɛnhunu?”

Bildad Mmuae A Ɛto So Abiɛsa

¹Na Suhini Bildad buae se,

²“Tumi ne suro wɔ Onyankopɔn;

ɔno na ɔhyehyɛ pɛpɛyɛ wɔ ɔsorosoro.

³Wobetumi akan nʼakofo ana?

Hena na ne hann nhyerɛn wɔ ne so?

⁴Ɛno de, ɛbɛyɛ dɛn na ɔdesani betumi ateɛ wɔ Onyankopɔn anim?

Ɛbɛyɛ dɛn na nea ɔbea awo no no bɛyɛ kronn?

⁵Mpo sɛ ɔsram nhyerɛn

na nsoromma nyɛ kronn wɔ nʼani so a,

⁶na nkantom onipa a ɔte sɛ nsaammoa,

onipa ba a ɔyɛ osunson bi kɛkɛ!”

Hiob Kyerɛ Nyankopɔn Kɛseyɛ

¹Na Hiob kasaa bio se,

²“Woaboa nea onni tumi!

Woagye basa a enni ahoɔden!

³Woatu nea onnim nyansa fo!

Na woada nhumu pa ara adi!

⁴Hena na ɔboaa wo ma wokaa saa nsɛm yi?

Hena honhom na ɛkasa faa wo mu?

⁵“Awufo wɔ ahoyeraw kɛse mu,

wɔn a wɔwɔ nsu ase ne nea ɛte mu nyinaa.

⁶Asaman da adagyaw Onyankopɔn anim;

Ɔsɛe nso nni nkataso.

⁷Ɔtrɛw wim atifi fam kata nea ɛda mpan so;

na ɔde asase sensɛn ohunu so.

⁸Ɔbɔ nsu boa hyɛ ne omununkum mu,

nanso nsu no mu duru ntumi mpae no.

⁹Ɔtrɛw ne omununkum mu

de kata ɔsram ani.

¹⁰Ɔhyɛ agyirae wɔ nsu so

de to ɔhye wɔ hann ne sum ntam.

¹¹Ɔsoro nnyinaso wosow,

na nʼanimka ma wɔn ho dwiriw wɔn.

¹²Ɔde ne tumi wosow po

ne nyansa mu, otwitwaa Rahab mu asinasin.

¹³Ɔde ne home maa wim tewee;

na ne nsa wɔɔ ɔwɔ a ɔrewea.

¹⁴Eyinom yɛ ne nnwuma kakraa bi;

ne tumi kakraa bi kɛkɛ!

Na hena na obetumi ate ne tumi mmubomu no ase?”

¹Hiob toaa nʼasɛm so se,

²“Sɛ Onyankopɔn te ase yi, nea wammu me atɛntrenee no,

Otumfo a wama madi me kra mu awerɛhow,

³mmere dodow a nkwa wɔ me mu,

na Onyankopɔn home wɔ me mu yi,

⁴mʼano renka amumɔyɛsɛm,

na me tɛkrɛma rentwa nkontompo.

⁵Merennye nto mu da sɛ nea woka no yɛ nokware;

merenka me mudi nhyɛ, kosi sɛ mewu.

⁶Mekura me trenee mu, merennyaa mu;

sɛ mete ase yi, me tiboa remmu me fɔ.

⁷“Ma mʼatamfo nyɛ sɛ amumɔyɛfo,

na wɔn a wokyi me nyɛ sɛ atorofo.

⁸Anidaso bɛn na wɔn a wonni nyamesu no wɔ wɔ wɔn wu akyi,

bere a Onyankopɔn agye wɔn nkwa afi wɔn nsam no?

⁹So Onyankopɔn tie wɔn sufrɛ

bere a amanehunu aba wɔn so no ana?

¹⁰So wɔn ani begye wɔ Otumfo no mu?

Wobesu afrɛ Onyankopɔn bere biara ana?

¹¹“Mɛma mo Onyankopɔn tumi ho nkyerɛkyerɛ;

meremfa Otumfo no akwan nhintaw.

¹²Mo ankasa moahu eyinom nyinaa.

Afei nsɛnhunu yi ase ne dɛn?

¹³“Eyi ne nea Onyankopɔn ahyɛ ato hɔ ama omumɔyɛfo,

agyapade a otirimɔdenfo nya fi Otumfo no nkyɛn:

¹⁴Sɛ ɔwɔ mma dodow dɛn ara, wɔn nkrabea ne afoa;

na nʼasefo rennidi mmee da.

¹⁵Ɔyaredɔm besie wɔn a wɔbɛka wɔ nʼakyi,

na wɔn akunafo rensu wɔn.

¹⁶Ɛwɔ mu sɛ ɔhɔre dwetɛ te sɛ mfutuma

na ɔboa ntama ano sɛ dɔte,

¹⁷nea ɔpɛ gu hɔ no, atreneefo na wobefura

na pɛpɛyɛfo no nso akyekyɛ dwetɛ no.

¹⁸Ofi a osi no te sɛ ananse abubummaba,

ɛte sɛ pata bi a ɔwɛmfo abɔ.

¹⁹Ɔda hɔ te sɛ ɔdefo, nanso ɔrenna saa bio;

ɔbɛtew nʼani no na ne nyinaa atu ayera.

²⁰Ahunahuna ba ne so sɛ nsuyiri;

ahum hwim no kɔ anadwo.

²¹Apuei mframa soa no kɔ, na onni hɔ bio;

ɛtwe no fi ne tenabea.

²²Ɛbɔ no a ahummɔbɔ nni mu

bere a ɔreguan afi ne tumi ase.

²³Ɔde fɛw bɔ ne nsam

na ɔpam no fi ne tenabea.”

¹“Beae a wotu dwetɛ wɔ hɔ

ne beae a wɔnan sika kɔkɔɔ.

²Wotu dade fi fam,

na wɔnan kɔbere fi dadebo mu.

³Onipa ma sum ba awiei;

na ɔhwehwɛ kɔ akyirikyiri asase mu

kɔhwehwɛ dadebo wɔ sum kabii mu.

⁴Wɔde fagudetu afiri hyɛ beae a ɛmmɛn ɔdesani atenae,

mmeae a nnipa anan nsii hɔ da,

baabi a ɛmmɛn nnipa no, ɛhɔ na wodi aforosian.

⁵Asase a ɛbɔ aduan no,

wɔdan ase no te sɛ nea wɔde ogya na ayɛ;

⁶hoabo fi nʼabotan mu

na sikakɔkɔɔ mpɔw nso wɔ ne mfutuma mu.

⁷Ɔkɔre biara nnim saa kwan a ahintaw no,

akoroma biara ani nhuu ɛ.

⁸Mmoa ahantanfo nsi hɔ

na gyata nkɔdɛɛdɛɛ wɔ hɔ.

⁹Onipa nsa paapae abotan dennen

na ɔma mmepɔw ase da hɔ.

¹⁰Otwa aka fa abotan mu,

na ohu nʼademude nyinaa.

¹¹Ɔhwehwɛ baabi a nsubɔnten ti wɔ

na ɔda nneɛma a ahintaw adi.

¹²“Nanso ɛhe na yebehu nea nyansa hyɛ?

Ɛhe na ntease te?

¹³Onipa renhu ne bo a ɛsom;

wɔrenhu wɔ ateasefo asase so.

¹⁴Na ebun ka se, ‘Enni me mu’;

na po nso se, ‘Enni me nkyɛn.’

¹⁵Wɔrentumi mfa sikakɔkɔɔ ankasa ntɔ,

na wɔrentumi mfa dwetɛ nkari ne bo.

¹⁶Wɔrentumi mfa Ofir sikakɔkɔɔ ntɔ

apopobibiribo anaa hoabo nso saa ara.

¹⁷Wɔrentumi mfa ahwehwɛ anaa sikakɔkɔɔ ntoto ho,

na wɔrentumi mfa sikakɔkɔɔ nnwinne nsesa.

¹⁸Ɛnsɛ sɛ yɛbɔ ahene panyin ne ahwehwɛbo din;

nyansa bo sen nhene pa.

¹⁹Etiopia akraatebo ne no nsɛ;

wɔrentumi mfa sikakɔkɔɔ kronkron ntɔ.

²⁰“Ɛno de, na ɛhe na nyansa fi?

Ɛhe na ntease te?

²¹Wɔde asie abɔde biara ani,

wɔde asie wim nnomaa mpo.

²²Ɔsɛe ne Owu ka se,

‘Yɛate no huhuhuhu kɛkɛ.’

²³Onyankopɔn te ɔkwan a ɛkɔ hɔ ase,

na ɔno nko ara na onim faako a ɛte,

²⁴efisɛ ɔhwɛ kodu nsase ano

na ohu biribiara a ɛwɔ ɔsoro ase.

²⁵Bere a ɔhyɛɛ mframa ano den too hɔ

na osusuw nsuwa no,

²⁶bere a ɔkaa no ɔhyɛ so kyerɛɛ osutɔ

na otwaa kwan maa aprannaa no,

²⁷afei ɔhwɛɛ nyansa na ɔkarii no hwɛe;

na ogyee no too mu na ɔsɔɔ no hwɛe.

²⁸Na ɔka kyerɛɛ onipa se,

‘Awurade suro, ɛno ne nyansa;

na sɛ wokyi bɔne, yɛ ntease.’ ”

¹Hiob toaa so se,

²“Mʼani agyina asram a atwa mu no,

nna a Onyankopɔn hwɛɛ me so no,

³bere a ne kanea hyerɛn mʼatifi

na mede ne kanea nantewee sum mu no!

⁴Ao, nna a misii so no,

bere a Onyankopɔn adamfofa a emu yɛ den hyiraa me fi,

⁵bere a na Otumfo no da so ka me ho

na me mma atwa me ho ahyia no,

⁶bere a na nufusu mu srade afɔw mʼakwan

na abotan hwiee ngo sɛ nsu maa me no.

⁷“Bere a na mekɔ kuropɔn pon ano

mekɔtena mʼagua so wɔ ɔmanfo aguabɔbea,

⁸mmerante hu me a, wogyina nkyɛn

na mpanyimfo sɔre gyina hɔ;

⁹atitiriw gyae kasa

na wɔde wɔn nsa kata wɔn ano;

¹⁰mmapɔmma tɛm dinn,

na wɔn tɛkrɛma ka wɔn dudom.

¹¹Wɔn a wɔte me nka nyinaa ka me ho asɛmpa,

na wɔn a wohu me nyinaa kamfo me,

¹²efisɛ meboaa ahiafo a wosu pɛɛ mmoa,

ne ayisaa a wonni aboafo.

¹³Onipa a na ɔrewu no hyiraa me;

na memaa akunafo ani gyee wɔn koma mu.

¹⁴Mede trenee furaa sɛ mʼadurade;

atɛntrenee yɛɛ me nkataso ne mʼabotiri.

¹⁵Meyɛɛ aniwa maa anifuraefo,

ne anan maa mmubuafo.

¹⁶Meyɛɛ ahiafo agya;

na mekaa ahɔho asɛm maa wɔn.

¹⁷Mibubuu amumɔyɛfo se

na mihwim wɔn a wodi wɔn nya no fii wɔn anom.

¹⁸“Medwenee sɛ, ‘Mewu wɔ mʼankasa me fi mu,

na me nna dɔɔso sɛ nwea.

¹⁹Me ntin beduu nsu ano,

na obosu agugu me mman so anadwo mu nyinaa.

²⁰Mʼanuonyam rempa da,

na agyan ayɛ foforo wɔ me nsam daa.’

²¹“Nnipa hwehwɛɛ sɛ wotie me,

wɔyɛɛ dinn, twɛn mʼafotu.

²²Sɛ mekasa wie a wɔnnkasa bio,

efisɛ me nsɛm tɔɔ wɔn asom yiye.

²³Wɔtwɛn me sɛnea wɔtwɛn osu a ɛpete,

na wɔmenee me nsɛm sɛ osutɔ bere nsu.

²⁴Sɛ meserew mekyerɛ wɔn a, wɔntaa nnye nni;

mʼanimtew som bo ma wɔn.

²⁵Mebɔɔ kwan maa wɔn na metenaa ase sɛ wɔn hene;

metenaa ase sɛ ɔhene a ɔwɔ nʼasraafo mu;

meyɛɛ sɛ obi a ɔkyekye agyaadwotwafo werɛ.

¹“Nanso mprempren wɔserew me,

nnipa a manyin sen wɔn,

na wɔn agyanom mfata sɛ

wɔne me nguan ho akraman tena.

²Mfaso bɛn na wɔn nsa mu ahoɔden wɔ ma me,

bere a wɔn ahoɔden afi wɔn mu?

³Ohia ne ɔkɔm ama wɔn ho atetew,

wɔnantew asase kesee

ne asase bonin so anadwo.

⁴Wɔboaboaa nkyenhaban ano wɔ nkyɛkyerɛ mu,

na wɔde sare so nnua ntin yɛɛ wɔn aduan.

⁵Wɔn mfɛfo pam wɔn fii wɔn mu,

na wohuroo wɔn sɛ akorɔmfo.

⁶Wɔhyɛɛ wɔn ma wɔtenaa suka a emu awo,

abotan ne fam ntokuru mu,

⁷wosuu sɛ mfurum wɔ wuram

na wɔfofɔree so wɔ ɔdɔtɔ ase.

⁸Kuw a wɔmfra na wonni din,

wɔpam wɔn fii asase no so.

⁹“Na nnɛ yi wɔn mmabarima de dwom bɔ me akutia;

mayɛ abusude wɔ wɔn mu.

¹⁰Wokyi me na wontwiw mmɛn me;

wɔmmfɛre sɛ wɔtete ntasu gu mʼanim.

¹¹Afei a Onyankopɔn abubu me tadua na ɔde amanehunu aba me so yi,

wɔyɛ nea wɔpɛ wɔ mʼanim.

¹²Abusuakuw no tow hyɛ me so wɔ me nifa so;

wosum mʼanan mfiri,

na wosisi mpie tia me.

¹³Wosisiw mʼakwan;

na wonya me sɛe me

na obiara mmoa me.

¹⁴Wɔba te sɛ nea wofi ntokuru a ano abae mu;

wɔnam mmubui no mu munumunum ba.

¹⁵Ahunahuna ma me ho dwiriw me;

mʼanuonyam atu kɔ sɛnea mframa abɔ agu,

me bammɔ atu ayera sɛ omununkum.

¹⁶“Na mprempren, me nkwa resa;

na amanehununna akyekyere me.

¹⁷Anadwo wowɔ me nnompe mu;

ɔyaw a ɛwe me no nnyae.

¹⁸Onyankopɔn fi ne tumi mu yɛ sɛ adurade ma me;

omia me te sɛ mʼatade kɔn.

¹⁹Ɔtow me kyene dontori mu

na ɔma me yɛ sɛ mfutuma ne nsõ.

²⁰“Onyankopɔn, misu mefrɛ wo, nanso wummua me.

Mesɔre gyina, nanso wohwɛ me kɛkɛ.

²¹Woba me so anibere so;

wode wʼabasa mu tumi tow hyɛ me so.

²²Wuhwim me na wode mframa pia me;

wudenkyidenkyi me wɔ ahum mu.

²³Minim sɛ wode me bɛkɔ owu mu,

faako a woahyɛ ama ateasefo nyinaa no.

²⁴“Ampa ara obiara mfa ne nsa nka onipa a ɔrebrɛ

bere a ɔresu pɛ mmoa wɔ nʼamanehunu mu.

²⁵Mansu amma wɔn a wɔwɔ ɔhaw mu ana?

Me kra werɛ anhow amma ahiafo ana?

²⁶Nanso bere a mʼani da papa so no, bɔne bae;

bere a mepɛɛ hann no sum na edurui.

²⁷Me yafunu mu a ɛwowɔ me no nnyae da;

na nna a amanehunu wɔ mu da mʼanim.

²⁸Menenam a mabiri, nanso ɛnyɛ sɛ owia na ahyew me;

migyina aguabɔbea na misu pɛ mmoa.

²⁹Madan nnompo nuabarima,

me ne mpatu na ɛbɔ.

³⁰Me honam ani biri na ehuanhuan;

atiridii ama me ho adɔ.

³¹Me sanku bɔ kwadwom,

na mʼatɛntɛbɛn ma agyaadwotwa nnyigyei.

¹“Me ne mʼani yɛɛ apam sɛ

meremfi akɔnnɔ mu, nhwɛ ababaa.

²Dɛn ne onipa kyɛfa a efi ɔsoro Nyankopɔn nkyɛn?

Dɛn ne nʼagyapade a efi ɔsoro Tumfo no nkyɛn?

³Ɛnyɛ ɔsɛe mma amumɔyɛfo,

atoyerɛnkyɛm mma wɔn a wɔyɛ bɔne ana?

⁴Onhu mʼakwan

na ɔnkan anammɔn biara a mitu ana?

⁵“Sɛ manantew wɔ nkontompo mu

anaasɛ matu mmirika adi nnaadaasɛm akyi a,

⁶ma Onyankopɔn nkari me wɔ nsania papa so

na obehu sɛ me ho nni asɛm;

⁷sɛ mʼanammɔntu afom ɔkwan,

sɛ me koma adi mʼani akyi,

anaasɛ me nsa ho agu fi a

⁸ɛno de ma afoforo nni nea madua,

na ma wontutu me nnɔbae ngu.

⁹“Sɛ ɔbea bi atɔ me koma so,

anaasɛ matɛw me yɔnko bi pon akyi a,

¹⁰ɛno de, me yere nyam ɔbarima foforo aduan,

na mmarima afoforo ne no nna.

¹¹Efisɛ anka ɛno na ɛbɛyɛ aniwusɛm

ne bɔne a ɛsɛ sɛ wɔtwe aso wɔ so.

¹²Ɛyɛ ogya a ɛhyew kodu Ɔsɛe mu;

na ebetumi atutu me nnɔbae ase.

¹³“Sɛ mabu mʼasomfo mmarima ne mmea ntɛnkyew,

bere a wɔne me nyaa asɛm,

¹⁴sɛ Onyankopɔn de si mʼanim a dɛn na mɛyɛ?

Sɛ wɔfrɛ me akontaabu a, mmuae bɛn na mɛma?

¹⁵Ɛnyɛ nea ɔbɔɔ me wɔ ɔyafunu mu no na ɔbɔɔ wɔn?

Ɛnyɛ onipa koro no na ɔyɛɛ yɛn baanu wɔ yɛn nanom yafunu mu?

¹⁶“Sɛ mamma ahiafo nea wɔn koma pɛ

anaa mama akunafo ani ayɛ wɔn yaw,

¹⁷sɛ mabɔ mʼaduan ho atirimɔden a

mamma ayisaa bi,

¹⁸nanso efi mmerantebere mu matetew no sɛnea agya bɛyɛ,

na efi ɔyafunu mu, mahwɛ akunafo.

¹⁹Sɛ mahu obi a onni adurade na ɔrebrɛ,

anaa ohiani bi a onni atade,

²⁰na sɛ wɔamfi koma mu anhyira me

sɛ mede me nguan ho nwi kaa wɔn hyew,

²¹sɛ mama me nsa so atia ayisaa bi,

esiane sɛ mewɔ tumi wɔ asennii nti a,

²²ɛno de, ma me basa mpan mfi me mmati,

ma emmubu mfi nʼapɔw so.

²³Misuroo ɔsɛe a efi Onyankopɔn nkyɛn,

na nʼanuonyam ho suro nti mantumi anyɛ saa nneyɛe no.

²⁴“Sɛ mede me werɛ ahyɛ sikakɔkɔɔ mu

anaasɛ maka akyerɛ sikakɔkɔɔ ankasa se, ‘Wo na wobɔ me ho ban,’

²⁵sɛ masɛpɛw me ho wɔ mʼahode bebrebe nti,

ahode a me nsa aka yi,

²⁶sɛ mahwɛ owia ne ne hyerɛn

anaa ɔsram a ɔnam anuonyam mu,

²⁷ama aka me koma a obiara nnim

na me nsa yɛɛ wɔn atuu de nidi maa wɔn a,

²⁸ɛno de, na eyinom nso bɛyɛ bɔne a wobu ho atɛn,

efisɛ na manni Onyankopɔn a ɔte ɔsoro no nokware.

²⁹“Sɛ mʼani gyee wɔ me tamfo amanehunu nti

anaa mesrew no wɔ ɔhaw a aba ne so nti,

³⁰memmaa mʼano nyɛɛ bɔne

sɛ mɛdome ne nkwa,

³¹sɛ nnipa a wɔwɔ me fi mu nkaa da sɛ,

‘Hena na Hiob pon so nam mmee no da?’

³²Ɔhɔho biara anna abɔnten so da,

efisɛ me pon ano daa hɔ da biara maa akwantufo,

³³Makata me bɔne so sɛnea nnipa yɛ

de mʼafɔdi ahyɛ me koma mu

³⁴esiane sɛ misuroo nnipadɔm

ne ahohora a efi mmusua hɔ no nti

na meyɛɛ komm a mamfi adi.

³⁵(“Ao, sɛ anka mewɔ obi a obetie me.

Mede me din ahyɛ mʼanoyi ase, ma Otumfo no mmua me;

ma nea ɔbɔ me kwaadu no nkyerɛw ne sobobɔ.

³⁶Ampa ara, mɛhyɛ wɔ me mmati,

mɛhyɛ sɛ ahenkyɛw.

³⁷Mebu mʼanammɔntu biara ho akontaa akyerɛ no;

mɛkɔ nʼanim sɛ ɔheneba.)

³⁸“Sɛ mʼasase teɛ mu tia me

na nusu fɔw ne nkɔ nyinaa,

³⁹sɛ madi so aba a mintuaa ka

anaasɛ mabu so apaafo no aba mu a,

⁴⁰ma nsɔe mfifi nsi awi anan mu

na wura mfuw nsi atoko anan mu.”

Hiob nsɛm no asi.

Elihu Adwenkyerɛ

¹Enti saa mmarima baasa yi ammua Hiob bio, efisɛ na ɔteɛ wɔ ɔno ara ani so. ²Na Busini Barakel babarima Elihu a ofi Ram abusua mu no bo fuw Hiob yiye sɛ obu ne ho bem na ommu Onyankopɔn mmom bem. ³Ne bo fuw nnamfonom baasa no sɛ wɔantumi anya nnyinaso bi ammɔ Hiob nsɛm no angu, nanso wobuu no fɔ. ⁴Elihu twɛn sɛ afoforo no bɛkasa akyerɛ Hiob, efisɛ na wɔanyinyin sen no. ⁵Na ohuu sɛ nnipa baasa no nni asɛm biara ka bio no, nʼabufuw no sɔree.

⁶Enti Busini Barakel babarima Elihu kae se,

“Meyɛ abofra,

na moyɛ mpanyimfo;

ɛno nti na misuroo sɛ

mɛka nea minim akyerɛ mo.

⁷Medwenee sɛ, ‘Ɛsɛ sɛ mpanyimfo kasa;

ɛsɛ sɛ wɔn a wɔn ani afi kyerɛ nyansa.’

⁸Nanso honhom a ɛte onipa mu,

Otumfo no home no na ɛma ntease.

⁹Ɛnyɛ mpanyimfo nko na wɔyɛ anyansafo,

ɛnyɛ wɔn a wɔn ani afi nko na wɔte nea eye ase.

¹⁰“Enti mise: Muntie me;

me nso mɛka mʼadwene.

¹¹Metwɛn wɔ bere a na morekasa,

mitiee mo adwenkyerɛ;

bere a na munhu nea monka no,

¹²meyɛɛ aso maa mo pa ara,

nanso mo mu biara antumi ankyerɛ sɛ Hiob ayɛ mfomso;

mo mu biara anyi ne nsɛm no ano.

¹³Monnka se, ‘Yɛahu nyansa;

momma Onyankopɔn mmɔ nʼasɛm no ngu, na ɛnyɛ onipa.’

¹⁴Nanso Hiob nkasa ntia me,

na merennyina mo adwenkyerɛ so mmua no.

¹⁵“Wɔn ho adwiriw wɔn, wonni hwee ka bio;

wɔn nsɛm asa.

¹⁶So ɛsɛ sɛ metwɛn wɔ bere a wɔayɛ komm yi,

saa bere yi a wogyinagyina ha yi a wonni mmuae biara no?

¹⁷Me nso mɛka bi

me nso mɛka mʼadwene.

¹⁸Efisɛ nsɛm ahyɛ mʼanom ma,

na honhom a ɛte me mu no hyɛ me sɛ menka;

¹⁹Me mu no, mete sɛ nsa a ɛhyɛ toa mu

te sɛ nsa kotoku foforo a ɛrebɛpae.

²⁰Ɛsɛ sɛ mekasa na me ho tɔ me;

ɛsɛ sɛ mibue mʼano na mema mmuae.

²¹Merenyɛ nhwɛanim

na merennɛfɛdɛfɛ obiara;

²²na sɛ makwadaw adɛfɛdɛfɛ mu a,

anka me Yɛfo beyi me afi hɔ ntɛm so.

¹“Na afei, Hiob, tie me nsɛm;

yɛ aso ma biribiara a mɛka.

²Merebebue mʼano;

me nsɛm aba me tɛkrɛma so.

³Me nsɛm fi koma a ɛteɛ mu;

na mʼano de ahonim pa ka nea minim.

⁴Onyankopɔn Honhom na abɔ me;

Otumfo no home ma me nkwa.

⁵Sɛ wubetumi a, ma me mmuae;

siesie wo ho, na ka si mʼanim.

⁶Wo ne me nyinaa yɛ pɛ wɔ Onyankopɔn anim;

me nso wɔbɔɔ me fii dɔte mu.

⁷Ɛnsɛ sɛ wusuro me,

na ɛnsɛ sɛ me nsa yɛ den wɔ wo so.

⁸“Nanso woaka ama mate,

mete saa nsɛm no, na wokae se,

⁹‘Meyɛ kronkron na minni bɔne;

me ho tew na afɔdi biara nni me ho.

¹⁰Nanso Onyankopɔn anya me ho mfomso

wafa me sɛ ne tamfo.

¹¹Ɔde me nan hyɛ mpokyerɛ mu;

na nʼani wɔ mʼakwan nyinaa so.’

¹²“Nanso meka mekyerɛ wo se, eyi mu de woayɛ mfomso,

efisɛ Onyankopɔn so sen ɔdesani.

¹³Na adɛn nti na wunwiinwii hyɛ no

sɛ ommua onipa nsɛm biara ana?

¹⁴Nanso Onyankopɔn kasa wɔ akwan ahorow so,

na ebia nnipa nte.

¹⁵Ɔkasa wɔ daeso ne anadwo anisoadehu mu,

bere a nna afa nnipa

na wɔada hatee wɔ wɔn mpa so no,

¹⁶otumi kasa gu wɔn asom

na ɔde kɔkɔbɔ yi wɔn hu,

¹⁷sɛ ɔbɛdan onipa afi nneyɛe bɔne ho

na watwe no afi ahantan ho,

¹⁸sɛ ɔmma ne kra nkɔ amoa mu

na ɔnhwere ne nkwa wɔ afoa ano.

¹⁹Anaasɛ wotumi de mpa so yaw twe onipa aso

nnompe mu yaw a ennyae da,

²⁰kosi sɛ ne kɔn nnɔ aduan

na ne kra nso po aduan a ɛyɛ akɔnnɔ pa ara;

²¹ɔfɔn yɛ basaa,

na ne nnompe a anka ɛho akata no, ho da hɔ.

²²Ne kra bɛn ɔda,

na ne nkwa bɛn owu abɔfo.

²³“Nanso sɛ ɔbɔfo bi wɔ nʼafa

sɛ odimafo a, ɛyɛ apem mu baako,

na ɔbɛkyerɛ no nea eye ma no,

²⁴obehu no mmɔbɔ na waka se,

‘Munnyaa no na wankɔ ɔda mu;

na manya mpatade ama no,’

²⁵afei ne were yɛ foforo sɛ abofra;

na esi ne dedaw mu yɛ sɛ mmerantebere mu de.

²⁶Ɔbɔ Onyankopɔn mpae na onya adom fi ne hɔ,

ohu Onyankopɔn anim na ɔde ahosɛpɛw teɛ mu;

na Onyankopɔn gye no bio sɛ ɔtreneeni.

²⁷Afei ɔba nnipa mu bɛka se,

‘Meyɛɛ bɔne na mekyeaa nea ɛteɛ,

nanso mannya nea ɛfata me.

²⁸Ogyee me kra na wamma no ankɔ ɔda mu,

enti mɛtena ase na madi hann no mu dɛ.’

²⁹“Onyankopɔn yɛ eyinom nyinaa ma onipa,

mprenu ne ne mprɛnsa so,

³⁰sɛnea ne kra renkɔ ɔda mu,

na nkwa hann no ahyerɛn ne so.

³¹“Yɛ aso, Hiob, na tie me;

yɛ dinn na menkasa.

³²Na sɛ wowɔ biribi ka a, bua me;

kasa, na mepɛ sɛ wobu wo bem.

³³Sɛ ɛnte saa nso a, ɛno de tie me.

Yɛ dinn na mɛkyerɛ wo nyansa.”

¹Afei Elihu kae se,

²“Mo anyansafo, muntie me nsɛm;

mo nimdefo monyɛ aso mma me.

³Efisɛ aso sɔ nsɛm hwɛ

sɛnea tɛkrɛma ka aduan hwɛ no.

⁴Momma yɛnsese, nhu nea eye ma yɛn.

Momma yɛn nyinaa mmɔ mu nsua nea eye.

⁵“Hiob ka se, ‘Me ho nni asɛm,

nanso Onyankopɔn abu me ntɛnkyew.

⁶Ɛwɔ mu sɛ mʼasɛm da kwan mu,

nanso wobu me ɔtorofo;

ɛwɔ mu sɛ menyɛɛ bɔne biara,

nanso ne bɛmma no ama me apirakuru a enwu da.’

⁷Onipa bɛn na ɔte sɛ Hiob a

ɔnom animtiaabu sɛ nsu?

⁸Ɔne amumɔyɛfo nantew;

na ɔne atirimɔdenfo nso bɔ.

⁹Efisɛ ɔka se, ‘Sɛ onipa bɔ mmɔden sɛ ɔbɛsɔ Onyankopɔn ani a

onnya so mfaso biara.’

¹⁰“Enti mo mmarima a mowɔ ntease muntie me.

Ɛmpare Onyankopɔn sɛ ɔbɛyɛ bɔne,

sɛ Otumfo no bɛyɛ mfomso.

¹¹Nnipa nneyɛe so na ɔhwɛ tua wɔn ka;

nea ɛfata ne nneyɛe na ɔma ɛba ne so.

¹²Ɛmfata sɛ wɔde mfomso susuw Onyankopɔn,

na ɛmfata sɛ wɔde ntɛnkyew susuw Otumfo.

¹³Hena na ɔde no sii asase so?

Hena na ɔde wiase nyinaa hyɛɛ ne nsa?

¹⁴Sɛ ɛyɛɛ ne pɛ

na oyii ne Honhom ne nʼahome a,

¹⁵anka adesamma nyinaa bɛbɔ mu ayera,

na onipa bɛsan akɔ mfutuma mu.

¹⁶“Sɛ mowɔ nhumu a, muntie eyi;

muntie nea meka.

¹⁷So obi a okyi atɛntrenee betumi adi nnipa so?

Mubetumi abu Ɔtreneeni kɛse no fɔ ana?

¹⁸Ɛnyɛ Ɔno na ɔka kyerɛ ahemfo se, ‘Mo so nni mfaso,’

na ɔka kyerɛɛ atitiriw se, ‘Moyɛ atirimɔdenfo,’

¹⁹nea ɔnhwɛ mmapɔmma anim

na onyiyi adefo ne ahiafo mu,

efisɛ wɔn nyinaa yɛ ne nsa ano adwuma.

²⁰Wowuwu mmere tiaa bi mu, wɔ anadwo dasu mu;

nnipa no ho wosow na wɔsen kɔ;

ahoɔdenfo totɔ a emfi nipa.

²¹“Nʼani hwɛ nnipa akwan;

na ohu wɔn anammɔntu biara.

²²Baabiara nni hɔ a aduru sum, sum kabii,

a amumɔyɛfo betumi ahintaw.

²³Ɛho nhia Onyankopɔn sɛ ɔbɛhwehwɛ nnipa mu bio,

a enti ɛsɛ sɛ wɔba nʼanim begye atemmu.

²⁴Ɔbobɔ abirɛmpɔn gu a ɔnyɛ nhwehwɛmu biara,

na ɔde afoforo sisi wɔn anan mu.

²⁵Efisɛ ohu wɔn nneyɛe,

otu wɔn gu anadwo na wɔdwerɛw wɔn.

²⁶Otua wɔn amumɔyɛsɛm so ka

wɔ faako a obiara betumi ahu wɔn,

²⁷efisɛ wɔman fii nʼakyi kɔe

na wɔampɛ nʼakwan biara anhwɛ.

²⁸Wɔmaa ahiafo sufrɛ duu nʼanim

na ɛma ɔtee mmɔborɔni su.

²⁹Nanso sɛ ɔyɛ komm a, hena na obetumi abu no fɔ?

Sɛ ɔde nʼanim hintaw nso a, hena na obehu no?

Nanso odi onipa ne ɔman so pɛpɛɛpɛ,

³⁰ɔmma onipa a onnim Nyame nni hene,

sɛnea ɔrensum nnipa no mfiri.

³¹“Sɛ ɛba sɛ onipa ka kyerɛ Onyankopɔn se,

‘Mayɛ bɔne na merenyɛ bɔne bio.

³²Kyerɛ me na minhu;

na sɛ mayɛ bɔne a, merenyɛ saa bio.’

³³So ɛsɛ sɛ Onyankopɔn gyina nea woka so tua wo ka,

wɔ bere a woayɛ sɛ worennu wo ho ana?

Ɛsɛ sɛ wusi gyinae, ɛnyɛ me;

enti ka nea wunim kyerɛ me.

³⁴“Nnipa a wɔwɔ ntease pae mu ka,

nimdefo a wotie me ka kyerɛ me se,

³⁵‘Hiob nkasa nimdeɛ kwan so;

aba biara nni ne kasa mu.’

³⁶Ao, sɛ wɔsɔɔ Hiob hwɛ kɔɔ akyiri a anka eye,

efisɛ oyiyii nsɛm ano sɛ omumɔyɛfo!

³⁷Ɔde atuatew ka ne bɔne ho;

ɔde ahantan bɔ ne nsam gu yɛn so

na ɔma ne nsɛm a ɔka tia Onyankopɔn no dɔɔso.”

¹Afei, Elihu kae se:

²“Wugye di sɛ, eyi fata?

Woka se, ‘Onyankopɔn betwitwa agye me.’

³Nanso wubisa no se, ‘Mfaso bɛn na menya,

na sɛ manyɛ bɔne a, mfaso bɛn na menya?’

⁴“Mepɛ sɛ mibua wo

ne wo nnamfonom nyinaa.

⁵Ma wʼani so kyerɛ soro na hwɛ;

hwɛ omununkum a ɛwɔ wʼatifi sorosoro nohɔ. ⁶Sɛ woyɛ bɔne a, ɔkwan bɛn so na ɛfa haw no?

Mpo sɛ wo bɔne dɔɔso a, nsunsuanso bɛn na enya wɔ ne so?

⁷Sɛ woteɛ a, dɛn na wode ma no

anaasɛ dɛn na onya fi wo nsam?

⁸Wʼamumɔyɛ ka onipa a ɔte sɛ wo

na wo trenee ka nnipa mma nko ara.

⁹“Nnipa su bere a wɔhyɛ wɔn so;

na wɔsrɛ mmoa fi nea ɔwɔ tumi nsam.

¹⁰Nanso obi mmisa se, ‘Ɛhe na Onyankopɔn, me Yɛfo no wɔ,

nea ɔma nnwom anadwo no,

¹¹nea ɔkyerɛ yɛn nimdeɛ bebree sen asase so mmoa

na ɔma yehu nyansa sen wim nnomaa no?’

¹²Sɛ nnipa su teɛ mu a, ommua,

amumɔyɛfo ahantan nti.

¹³Ampa ara Onyankopɔn rentie wɔn nkotosrɛ hunu no;

na Otumfo remmu.

¹⁴Ɛno de adɛn na ɔrentie

bere a woka se wunhu no,

na woka se wʼasɛm wɔ nʼanim

enti ɛsɛ sɛ wotwɛn no,

¹⁵na bio, nʼabufuw mmfa asotwe mma

na nʼani nni amumɔyɛsɛm akyi pii?

¹⁶Enti Hiob bue nʼano ka nsɛnhunu;

nimdeɛ a onni nti, ɔkeka nsɛm bebree.”

¹Elihu toaa ne kasa so se,

²“Montɔ mo bo ase kakra mma me, na mɛkyerɛ mo sɛ

aka bebree a ɛsɛ sɛ yɛka ma Onyankopɔn.

³Minya me nimdeɛ fi akyirikyiri;

mɛka se me Yɛfo bu atɛntrenee.

⁴Munnye nto mu sɛ me nsɛm yɛ nokware turodoo;

na meyɛ obi a ne nimdeɛ so wɔ mo mu.

⁵“Onyankopɔn so, nanso, ontwiri nnipa;

ɔkorɔn na osi pi wɔ ne botae mu.

⁶Ɔmma amumɔyɛfo ntena nkwa mu,

na ɔde amanehunufo kyɛfa ma wɔn.

⁷Onnyi nʼani mfi ɔtreneeni so,

ɔma wɔne ahemfo di ade

na ɔma wɔn so afebɔɔ.

⁸Na sɛ wɔde mpokyerɛ gu nnipa

na amanehunu hama akyekyere wɔn papee a,

⁹ɔka nea wɔayɛ kyerɛ wɔn

sɛ wɔnam ahantan so ayɛ bɔne.

¹⁰Ɔma wotie nteɛso

na ɔhyɛ wɔn sɛ wonnu wɔn ho wɔ wɔn bɔne ho.

¹¹Sɛ wɔyɛ osetie na wɔsom no a,

wobedi yiye wɔ wɔn nna a aka no mu

na wɔn mfe nyinaa ayɛ anisɔ ama wɔn.

¹²Na sɛ wɔantie no a, wɔbɛyera wɔ afoa ano,

na wɔawuwu a wonni nimdeɛ.

¹³“Wɔn a wonnim Nyame no kora abufuw so;

mpo sɛ ogu wɔn nkɔnsɔnkɔnsɔn a wonsu mpɛ mmoa.

¹⁴Wowuwu wɔ wɔn mmabunmmere mu,

wɔ mmarima nguamanfo a wɔtete abosonnan mu.

¹⁵Nanso wɔn a wohu amane no, ogye wɔn;

na ɔkasa kyerɛ wɔn wɔ wɔn haw mu.

¹⁶“Ɔregye wo afi ahohia mu

de wo akɔ beae a hɔ bae a ahokyere nni,

nea wowɔ asomdwoe, na nnuan pa ayɛ wo pon so ma.

¹⁷Nanso mprempren, atemmu a ɛfata amumɔyɛfo na aba wo so;

atemmu ne atɛntrenee aso wo mu.

¹⁸Hwɛ yiye na obi amfa ahonya annaadaa wo;

mma adanmude kɛse bi ntwe wo.

¹⁹Wʼahonya anaasɛ mpo

wʼahohia bebrebe nyinaa nti,

worenkɔ amanehunu mu ana?

²⁰Mpere anadwo ho,

sɛ ammɛpra nnipa mfi wɔn afi mu.

²¹Hwɛ na woannan ankɔ bɔne ho,

nea ayɛ sɛ wopɛ sen amanehunu.

²²“Onyankopɔn yɛ ɔkɛse wɔ ne tumi mu.

Hena na ɔyɛ ɔkyerɛkyerɛfo sɛ ɔno?

²³Hena na wahyehyɛ nʼakwan ama no

anaa waka akyerɛ no se, ‘Woayɛ mfomso.’

²⁴Kae na kamfo nʼadwuma a

nnipa de nnwonto akamfo no.

²⁵Adesamma nyinaa ahu;

nnipa fi akyirikyiri hwɛ no haa.

²⁶Onyankopɔn yɛ ɔkɛse, ɛboro yɛn ntease so!

Ne mfe dodow mu nni hwehwɛbea.

²⁷“Ɔtwetwe nsu a ɛsosɔ,

ma ɛdan osu gu nsuten mu;

²⁸na omununkum tɔ obosu gu fam

na osu pete mmoroso gu adesamma so.

²⁹Hena na obetumi ate sɛnea ɔtrɛtrɛw omununkum mu no ase,

sɛnea ɔbobɔ mu fi ne suhyɛ ase no?

³⁰Hwɛ sɛnea ɔhwete nʼanyinam mu wɔ ne ho

ma ɛkɔ po bun mu.

³¹Eyi ne ɔkwan a ɔfa so di amanaman no so

na ɔma aduan bu wɔn so.

³²Ɔde anyinam hyɛ ne nsam ma

na ɔhyɛ no sɛ ɛmpa nʼagyiraehyɛ.

³³Nʼaprannaa bɔ ahum a ɛreba no ho nkae;

na anantwi mpo ma wohu sɛ ɛreba.

¹“Eyi ma me koma bɔ kitirikitiri

na ehuruw fi nʼatenae.

²Tie! Tie ne nne mmubomu,

ne huuyɛ a efi nʼanom reba no.

³Ogyaa nʼanyinam mu wɔ ɔsoro ase nyinaa

na ɔma ekodu asase ano.

⁴Ɛno akyi na ne mmubomu no ba;

ɔde nne kɛse bobɔ mu.

Sɛ ɔkasa a,

biribiara nsianka no.

⁵Onyankopɔn nne bobɔ mu ma no yɛ nwonwa;

ɔyɛ nneɛma akɛse a ɛboro yɛn adwene so.

⁶Ɔka kyerɛ sukyerɛmma se, ‘Tɔ gu asase so,’

ne osu nso se, ‘Yɛ osutɔ kɛse.’

⁷Sɛnea nnipa a wabɔ wɔn nyinaa behu nʼadwuma nti,

ɔma nnipa nyinaa gyae wɔn adwumayɛ.

⁸Wuram mmoa kɔtetɛw;

wɔkɔhyehyɛ wɔn abon mu.

⁹Ahum tu fi ne pia mu,

na awɔw nso fi mframa a ɛrebɔ mu.

¹⁰Onyankopɔn home de sukyerɛmma ba,

na nsu tamaa no kyen.

¹¹Ɔde fuonwini hyɛ omununkum ma;

na otwa nʼanyinam fa mu.

¹²Ɔhyɛ ma wokyinkyin

fa asase so nyinaa hyia

yɛ nea ɔhyɛ sɛ wɔnyɛ biara.

¹³Ɔde omununkum ba bɛtwe nnipa aso,

anaasɛ ɔma ɛtɔ gu asase so de kyerɛ nʼadɔe.

¹⁴“Tie eyi, Hiob;

gyae na dwene Onyankopɔn anwonwade ho.

¹⁵Wunim sɛnea Onyankopɔn si fa di omununkum so,

na ɔma nʼanyinam twa?

¹⁶Wunim sɛnea omununkum si fa sensɛn wim,

nea ɔwɔ nimdeɛ a so nni no anwonwade no?

¹⁷Mo a mufi fifiri wɔ mo ntade mu

bere a anafo mframa ma asase no yɛ dinn no,

¹⁸wubetumi aboa no ama watrɛw wim,

a ɛyɛ den sɛ kɔbere mfrafrae ahwehwɛ?

¹⁹“Kyerɛ yɛn nea ɛsɛ sɛ yɛka kyerɛ no;

yɛrentumi nka yɛn asɛm, efisɛ yennim.

²⁰Ɛsɛ sɛ wɔka nea mepɛ sɛ meka kyerɛ no ana?

Onipa bi wɔ hɔ a ɔbɛpɛ sɛ wɔbɛmene no ana?

²¹Obiara rentumi nhwɛ owia,

sɛnea ɛhyerɛn wɔ wim

bere a mframa abɔ ama wim atew.

²²Ofi atifi fam ba wɔ anuonyam sononko mu;

Onyankopɔn ba wɔ ahenni nwonwaso mu.

²³Otumfo no korɔn wɔ yɛn so na wɔpagyaw no wɔ tumi mu;

nʼatɛntrenee ne treneeyɛ kɛse akyi no mpo, ɔnyɛ nhyɛso.

²⁴Ɛno nti nnipa de nidi ma no,

efisɛ onnwen koma mu anyansafo nyinaa ho ana?”

Awurade Bisa Hiob Nsɛm

¹Afei, Awurade fi ahum mu buaa Hiob se,

²“Hena ne nea ɔde nsɛm a nimdeɛ nni mu

kata me nhyehyɛe so?

³Hyɛ wo ho den sɛ ɔbarima;

mebisa wo nsɛm,

na wubebua me.

⁴“Bere a metoo asase fapem no, na wowɔ he?

Sɛ wote ase, ka ɛ.

⁵Hena na osusuw ne tenten ne ne trɛw? Ampa ara wunim!

Hena na ɔtwee susuhama faa ani?

⁶Dɛn so na egyina,

anaa hena na ɔtoo ne tweatibo no,

⁷bere a anɔpa nsoromma bɔɔ mu too dwom,

na abɔfo nyinaa de anigye teɛɛ mu no?

⁸“Hena na ɔkaa po hyɛɛ apon akyi,

bere a epue fii ɔyafunu mu,

⁹bere a mede omununkum yɛɛ nʼadurade

na mede sum kabii kyekyeree no,

¹⁰bere a metoo ɔhye maa no

na misisii nʼapon ne nʼadaban,

¹¹bere a mekae se, ‘Ɛha ara na wubedu na worentra ha;

ɛha na wʼahantan asorɔkye no bɛso no?’

¹²“So woahyɛ mmara ama adekyee da?

Na woakyerɛ ahemadakye nso afa,

¹³sɛ ɛnkɔka asase ano

na ontu amumɔyɛfo mfi so?

¹⁴Asase fa ne bɔbea sɛ dɔte a ɛhyɛ nsɔwano ase;

na ɛsow tebea da wɔn ho adi te sɛ atade.

¹⁵Wɔde amumɔyɛfo hann akame wɔn,

na wɔn abasa a wɔama so no mu abu.

¹⁶“So woapɛɛpɛɛ mu ahu nea po aniwa wɔ

anaa woanantew ne bun mu pɛn?

¹⁷So wɔde owu apon akyerɛ wo?

Woahu owu sunsuma apon ana?

¹⁸Woate wiase a ɛda hɔ tamaa no ase ana?

Sɛ wunim eyinom nyinaa a, ka kyerɛ me.

¹⁹“Ɔkwan bɛn na ɛkɔ hann atenae?

Na ɛhe na sum te?

²⁰Wubetumi de wɔn akɔ wɔn sibea?

Wunim akwan a ɛkɔ wɔn atenae?

²¹Ampa ara wunim, efisɛ na wɔawo wo dedaw.

Woanyin yiye!

²²“Woakɔ sukyerɛmma adekoradan mu da

anaa woahu mparuwbo adekoradan

²³a makora so ama ahohia bere,

ɔsa ne akodi nna?

²⁴Ɔkwan bɛn na ɛkɔ faako a anyinam fi ba,

anaa faako a apuei mframa fi na ɛbɔ fa asase so?

²⁵Hena na otwaa ɛka maa osuhweam,

ne ɔkwan maa aprannaa mmubomu,

²⁶sɛ ɛbɛtɔ agu asase a obiara nte so so,

nweatam a obiara nni so,

²⁷na ama asase kesee a ɛda mpan afɔw

na sare afifi wɔ so?

²⁸Osu wɔ agya ana?

Hena na ɔyɛ agya ma obosu a ɛsosɔ?

²⁹Hena yafunu mu na sukyerɛmma fi?

Hena na ɔwoo sukyerɛmma mporoporowa fi soro

³⁰bere a nsu kyen dan sɛ ɔbo,

na bun ani kyen?

³¹“Wubetumi de hama akyekyere Akokɔbeatan ne ne mma?

Wubetumi asan Nyankrɛnte hama ana?

³²Wubetumi de anɔpa nsoromma aba wɔ ne bere mu

anaasɛ wubetumi ayi sisi ne ne mma afi hɔ?

³³So wunim mmara a ɛfa ɔsoro ho?

Wubetumi de Onyankopɔn ahenni aba asase so ana?

³⁴“Wubetumi ama wo nne adu omununkum so

na wode nsu akata wo ho ana?

³⁵Wutumi ma anyinam twa?

Wɔka kyerɛ wo se, ‘Yenni’ ana?

³⁶Hena na ɔde nyansa ma koma

anaasɛ ɔde ntease hyɛ adwene mu?

³⁷Hena na ɔwɔ nyansa a wɔde kan omununkum?

Hena na obetumi akyea ɔsoro nsu nkotoku,

³⁸bere a mfutuma ayɛ den

ama dɔte atɔwatɔw keka bɔ mu.

³⁹“Wokɔ ahayɛ ma gyatabere

ma gyata didi mee

⁴⁰bere a wobutubutuw wɔn abon ano

anaasɛ wɔtetɛw adɔtɔ ase?

⁴¹Hena na ɔma kwaakwaadabi aduan

bere a ne mma su frɛ Onyankopɔn

na wonni aduan nti wokyinkyin?

¹“So wunim bere a bepɔw so mmirekyi wowo?

Woahwɛ, ahu bere a ɔforote nyinsɛn ne ba?

²So woakan asram dodow a wɔde nyinsɛn?

Wunim bere a wɔwo ana?

³Wɔkotow wowo wɔn mma;

wɔn awoko yaw to twa.

⁴Wɔn mma nyin ahoɔden so wɔ wuram;

na wogyaw wɔn awofo hɔ a wɔnnsan nkɔ wɔn nkyɛn bio.

⁵“Hena na ɔma wuram afurum fa ne ho di?

Hena na ɔsan ne hama?

⁶Mede asase kesee maa no sɛ ne fi,

ne nkyene asase tamaa sɛ nʼatenae.

⁷Ɔserew kurom gyegyeegyeyɛ;

na ɔnte ɔkafo nteɛteɛmu.

⁸Okyinkyin mmepɔw no so sɛ ne didibea

ɛhɔ na okyin hwehwɛ wura amono biara.

⁹“Ɛko bɛpene sɛ ɔbɛsom wo ana?

Ɔbɛtena wo mmoa adididaka nkyɛn anadwo ana?

¹⁰Wubetumi asa no wɔ funtumfiri so ana?

Ɔbɛfɛntɛm aku a ɛda wʼakyi no ana?

¹¹Wubetumi de wo ho ato no so esiane nʼahoɔden dodo nti?

Wubegyaw wʼadwuma a ɛyɛ den no ama no ana?

¹²Wugye di sɛ ɔde wʼaburow bɛba

na waboa ano de akɔ awiporowbea ana?

¹³“Sohori bɔ ne ntaban mu anigye so,

nanso wontumi mfa ntoto asukɔnkɔn de ho.

¹⁴Ɔtow ne nkesua gu asase so

ma mfutuma ka no hyew,

¹⁵ɛmfa ne ho sɛ ɛnan bi bɛpɛtɛw no,

sɛ wuram aboa bi betiatia so.

¹⁶Ɔbɔ ne mma atirimɔden sɛnea wɔnyɛ ne dea;

ɛmfa ne ho sɛ nʼadwuma bɛyɛ ɔkwa,

¹⁷efisɛ Onyankopɔn amma no nyansa

wamma no nhumu biara.

¹⁸Nanso sɛ ɔtrɛw ne ntaban mu tu mmirika a,

ɔserew ɔpɔnkɔ ne ne sotefo.

¹⁹“Wo na woma ɔpɔnkɔ no nʼahoɔden

anaa woma ne kɔn mu nwi kuhaa no?

²⁰Wo na woma no huruw te sɛ mmoadabi,

na ɔde ne nkotɔ hunahuna ana?

²¹Ɔde ne nan tintim fam dennen, na nʼani gye nʼahoɔden mu,

na afei ɔbɔ wura ɔko mu.

²²Ɔmmɔ hu, na onsuro biribiara;

ohu afoa a onguan.

²³Bɛmma wosow wɔ ne nkyɛn mu boha mu,

na peaw ne pɛmɛ nso di ahim wɔ ne ho.

²⁴Ofi ahopere mu de nʼano sisi fam;

na sɛ wɔhyɛn torobɛnto a ontumi nnyina faako.

²⁵Sɛ torobɛnto hyɛn a ɔka se, ‘Wiɛ!’

ɔte ɔko ho hua fi akyirikyiri,

ɔsahene no nteɛmu ne ɔko mu osebɔ.

²⁶“Wo nyansa na ɛma akoroma tu

na ɔtrɛw ne ntaban mu fa anafo?

²⁷Wo na wohyɛ ɔkɔre ma no tu kɔ sorosoro

kɔyɛ ne berebuw wɔ hɔ?

²⁸Ɔbotan mu na ɔte na ɛhɔ na ɔda;

ɔbotan sorɔnsorɔn yɛ nʼabandennen.

²⁹Ɛhɔ na ofi kɔhwehwɛ nʼaduan;

nʼani hu ade a ɛwɔ akyirikyiri.

³⁰Mogya yɛ ne mma aduan,

na faako a atɔfo wɔ no, ɛhɔ na ɔwɔ.”

¹Afei Awurade buaa Hiob se,

²“Nea ɔne Otumfo no wɔ asɛm no bɛteɛ ne so ana?

Ma nea ɔbɔ Onyankopɔn kwaadu no mmua no ɛ!”

³Na Hiob buaa Awurade se,

⁴“Mensɛ na memfata, ɛbɛyɛ dɛn na matumi anya mmuae?

Mede me nsa mua mʼano.

⁵Makasa baako, nanso minni mmuae

mprenu so, na merenkasa bio.”

⁶Afei, Awurade fi ahum mu buaa Hiob se,

⁷“Hyɛ wo ho den sɛ ɔbarima;

mebisa wo nsɛm,

na ɛsɛ sɛ wubua me.

⁸“Wobɛka mʼatemmu ho asɛm bɔne ana?

Wubebu me fɔ de abu wo ho bem ana?

⁹Wowɔ abasa te sɛ Onyankopɔn de,

na wo nne betumi abobɔ mu sɛ ne de ana?

¹⁰Ɛno de fa anuonyam ne ɔhyerɛn hyehyɛ wo ho,

na fura nidi ne kɛseyɛ.

¹¹Hwie wʼabufuwhyew mmoroso no gu,

hwɛ ɔhantanni biara na brɛ no ase,

¹²hwɛ ɔhantanni biara na si no fam

na tiatia amumɔyɛfo so wɔ faako a wogyina hɔ.

¹³Sie wɔn nyinaa bɔ mu wɔ mfutuma mu;

kata wɔn anim wɔ ɔda mu.

¹⁴Na afei mʼankasa megye ato mu sɛ

wo ara wo basa nifa betumi agye wo nkwa.

¹⁵“Hwɛ susono,

nea meyɛɛ no kaa wo ho

na ɔwe sare te sɛ nantwi.

¹⁶Hwɛ ahoɔden a ɔwɔ wɔ nʼasen mu

ne ahoɔden a ɛwɔ ne yafunu so were mu!

¹⁷Ne dua hinhim sɛ sida;

ne srɛ mu ntin yɛ peperee.

¹⁸Ne nnompe te sɛ kɔbere mfrafrae dorobɛn,

nʼabasa ne ne nʼanan te sɛ nnade praban.

¹⁹Odi Onyankopɔn nsa ano adwuma mu kan,

nanso ne Yɛfo betumi de nʼafoa akɔ ne so.

²⁰Nkoko fifi wɔn nnɔbae ma no,

na wuram mmoa nyinaa goru bɛn hɔ.

²¹Nsɔensɔe nnua ase na ɔda,

na dontori mu demmire akata no so.

²²Nsɔensɔe nwini no kata ne so;

na nsunoa nnua twa ne ho hyia.

²³Nsu nworoso nhaw no;

mpo sɛ Yordan bobɔ ba nʼano a, onni ɔhaw.

²⁴Obi betumi akyere no animono;

anaa obi betumi de afiri ayi no na wabɔre ne hwene mu ana?

¹“So wubetumi de darewa atwe ɔdɛnkyɛmmirampɔn

anaa wubetumi de hama akyekyere ne tɛkrɛma?

²So wubetumi de hama afa ne hwenem,

anaasɛ wubetumi de darewa aso nʼabogye mu?

³Ɔbɛkɔ so asrɛ wo sɛ hu no mmɔbɔ ana?

Ɔne wo bɛkasa brɛoo ana?

⁴Ɔbɛpene ne wo ayɛ apam

ama wode no ayɛ wʼakoa afebɔɔ ana?

⁵Wubetumi de no ayɛ abɛbɛ te sɛ anomaa

anaa wubetumi asa no hama de no ama wo mmabea?

⁶So aguadifo bɛpɛ sɛ wode no bedi nsesagua?

Wɔbɛkyekyɛ ne mu ama aguadifo ana?

⁷Wubetumi de mpeaw awowɔ ne were mu

anaasɛ wode mpataa mpɛmɛ bɛwowɔ ne ti ho?

⁸Wode wo nsa ka no a,

wobɛkae sɛnea ɔbɛwosow ne ho, nti worenyɛ saa bio!

⁹Ɔkwan biara nni hɔ a wobɛfa so akyere no;

ani a ɛbɔ ne so kɛkɛ no ma nnipa dwudwo.

¹⁰Obiara ntumi nsi ne bo nhwanyan no.

Afei hena na obetumi ne me adi asi?

¹¹Hena na mede no ka a ɛsɛ sɛ mitua?

Biribiara a ɛhyɛ ɔsoro ase no yɛ me de.

¹²“Me werɛ remfi sɛ mɛka nʼakwaa,

nʼahoɔden ne ne bɔbea fɛfɛ no ho asɛm.

¹³Hena na obetumi aworɔw ne ho ahama,

na hena na ɔde nnareka bɛkɔ ne ho?

¹⁴Hena na obetumi abue nʼabogye,

a ɛse a ɛyɛ hu ayɛ no ma no?

¹⁵Nʼakyi wɔ bona a ɛsesa so,

ɛtetare so a ɔkwan nna mu koraa;

¹⁶sɛnea ɛtetare so fa no nti,

mframa biara mfa ntam.

¹⁷Ɛtoatoa mu denneennen a

emu ntumi ntetew.

¹⁸Sɛ ɔnwansi a, ɛpepa gya;

nʼaniwa aba te sɛ adekyeenim hann.

¹⁹Agyatɛn turuw fi nʼanom

na nsramma turuturuw fi mu.

²⁰Wusiw sen fi ne hwene mu

te sɛ ɔsɛn a esi gya so.

²¹Ne home ma gyabiriw ano sɔ,

na ogyaframa tu fi nʼanom.

²²Ne kɔn mu wɔ ahoɔden ankasa;

wɔn a wohu no no aba mu bu.

²³Ne were a abubu agu so no yɛ peperee;

ayɛ pemee a ɛnka ne ho.

²⁴Ne koko so yɛ den sɛ ɔbotan

ɛyɛ den sɛ awiyammo.

²⁵Sɛ ɔsɔre a, ahoɔdenfo bɔ huboa;

sɛ ɔwosow ne ho a woguan.

²⁶Afoa wɔ no a, ɛnka no,

peaw, pɛmɛ ne agyan nso saa ara.

²⁷Ɔfa dade sɛ wura bi

na kɔbere mfrafrae te sɛ dua a awu bi ma no.

²⁸Agyan mma no nguan;

ahwimmo mu aboa yɛ ntɛtɛ ma no.

²⁹Kontibaa te sɛ sare wɔ nʼani so;

na ɔserew pɛmɛ nnyigyei.

³⁰Abon a ano yɛ nnam tuatua ne yafunu so.

Ɔtwe ne ho ase wɔ fam fa dontori mu a, eyiyi akam.

³¹Ɔma bun mu huru sɛ nsu a ɛwɔ ɛsɛn mu

na onunu po mu sɛ srade a ɛwɔ kuku mu.

³²Nea ɔbɛfa no, ɛhɔ nsu no pa yerɛw yerɛw;

na obi besusuw sɛ po bun adan ayɛ dwen.

³³Asase so biribiara ne no nsɛ.

Ɔyɛ abɔde a onsuro hwee.

³⁴Ommu wɔn a wɔyɛ ahantan no mu biara;

ɔyɛ wɔn a wɔyɛ ahomaso no nyinaa so hene.”

Hiob Bua Awurade

¹Na Hiob buaa Awurade se,

²“Minim sɛ wutumi yɛ nneɛma nyinaa;

obiara rentumi nsɛe wo nhyehyɛe.

³Wubisa se, ‘Hena ni a onni nimdeɛ nso osiw mʼafotu ho kwan?’

Ampa ara mekaa nneɛma a mente ase no ho nsɛm,

nneɛma a ɛyɛ nwonwa ma me.

⁴“Wokae se, ‘Tie na menkasa;

mebisa wo nsɛm

na ɛsɛ sɛ woma me mmuae.’

⁵Mate wo nka pɛn,

na mprempren de, mʼani ahu wo.

⁶Ɛno nti mibu me ho animtiaa

na mete mfutuma ne nsõ mu de kyerɛ mʼahonu.”

Awiei

⁷Na Awurade kaa nsɛm yi kyerɛɛ Hiob wiei no, Awurade ka kyerɛɛ Temanni Elifas se, “Me bo afuw wo ne wo nnamfonom baanu no, efisɛ moanka me ho asɛm a ɛyɛ nokware sɛnea me somfo Hiob kae no. ⁸Afei, momfa anantwi ason ne adwennini ason, na monkɔ me somfo Hiob nkyɛn, na monkɔbɔ ɔhyew afɔre mma mo ho. Me somfo Hiob bɛbɔ mpae ama mo, na metie ne mpaebɔ no na merenyɛ mo sɛnea ɛfata mo nkwaseasɛm no, nsɛm a moka faa me ho no nyɛ nokware sɛnea me somfo Hiob yɛe no.” ⁹Enti Temanni Elifas ne Suhini Bildad ne Naamani Sofar yɛɛ sɛnea Awurade hyɛɛ wɔn no; na Awurade tiee Hiob mpaebɔ.

¹⁰Hiob bɔɔ mpae maa ne nnamfonom akyi no, Awurade san yɛɛ no ɔdefo bio na ɔde nʼahode a na ɔwɔ kan no mmɔho abien maa no. ¹¹Afei, ne nuabarimanom, ne nuabeanom nyinaa ne obiara a na onim no dedaw no baa ne fi ne no bedidii. Wɔkyekyee ne werɛ wɔ amanehunu a Awurade ma ɔkɔɔ mu no ho, na wɔn mu biara brɛɛ no dwetɛ ne sikakɔkɔɔ kaa.

¹²Awurade hyiraa Hiob nkwa awiei sen ne mfiase. Onyaa nguan mpem dunan, yoma mpem asia, anantwinini mpamho apem ne mfurum abere apem. ¹³Bio onyaa mmabarima baason ne mmabea baasa. ¹⁴Ɔtoo ne babea piesie no din Yemima, na nea odi so no Kesia na nea ɔto so abiɛsa no de Keren-Hapuk. ¹⁵Asase no so nyinaa, na mmaa biara nni hɔ a wɔn ho yɛ fɛ sɛ Hiob mmabea no, na wɔn agya de wɔn kaa wɔn nuabarimanom no ho maa wɔn agyapade.

¹⁶Eyi akyi no, Hiob dii mfirihyia ɔha aduanan; ohuu ne mma ne ne nenanom awo ntoatoaso anan. ¹⁷Afei owui a na wabɔ akwakoraa pa ara.