Filimon

SEPINIEN XA DIAMU TE

FILIMON

Sepkilaen na Pol usil uvei ak

¹Inou Polnade nim te xeih vengan xa di nabit rat longeongen hos usil Iesu Kristo. 1:1 Efes 3:1; 4:1; Plp 1:7,13; Flm 1:9

Inou del tumali Timoti, mabit bos makoe minuk, Filimon. Xouk obe moletin hos tei te polien na Iesu nggoni xamel e eheien namel di e xouk. ²Mabit malhit bos makoe mun mi Apia, xa be hinoxoli namel. E bos makoe mun mi Akipas, xa di pol mi Iesu nggoni moletin hos tei te vaeen nan nggoni xamel. E bos makoe mun mi ngan xil xa langgusil Hi xa di lasukul e tim sam. 1:2 Kol 4:17

³Nasis tengan eheien hos e tomat na Hi Tamer e Suv nar, Iesu Kristo, iti mi xamim. 1:3 Rom 1:7; Kal 1:3; Plp 1:2

Pol misep usil eheien e neketen na Filimon

⁴Tuxoli Filimon, melele xa di nanem xatuk e sisen xil navan, vehakut di names Hi ve xouk. 1:4 Rom 1:8-9⁵Nasis mak vengan xa nalongeong usil neketen nam e Iesu Kristo, e eheien xa di opisen ni mi moletin xil na Hi. ⁶Nasis mi Hi tengan melele xa mumei vituei, isak ni neketen namim ixeih mu, e isak ni xamim mukilakil kuhi ni holesok hos xil vus xa be namim vengan mubisti del Iesu Kristo. 1:6 Plp 1:9; Kol 1:9⁷Tuxoli, eheien nam mi mosav misak ni nou nabesi pupu ni nou e di dal rat nenemien na moletin xil na Hi. 1:7 2Kor 7:4

Pol misis Filimon tengan ihur pilei slev nan xa telesae relingi

⁸Vengan xa nakil kuh eheien nam mi mosav xil, inou nakila xa xosxa nisemae minuk e his Iesu Kristo tengan upol ni neta ngan, ma xouk upol ni. ⁹E nabesi nou tang tengan nisisuk e upol ni naha xa ieok bei ve eheien nam e nou, xa nabe momatu ngamu e nade nim te xeih taxeak ve his Iesu Kristo. 1:9 Efes 3:1; 4:1; Plp 1:7,13; Flm 1:1¹⁰Nasisuk ve rin na Onesimas. Xi nggoni horamue tei navan vengan xa, melele xa nade nim te xeih, natetutou ni e xi tekamet meulien hu. 1:10 1Kor 4:15; Kal 4:19; Kol 4:9¹¹Tetiamu, melele xa telesae relinguk, xi tenave moletin hos te tutouen ti. E taxeak, xi bos tengan itutou ni xouk, e itutou ni nou mun. 1:11 Onesimas be slev tei na Filimon. His Onesimas, koute teni be ‘bos te tutouen.’ Misak ni, Pol di misep pepamen ni hisen.

¹²Eheien navan di pupu e Onesimas. E neta sav xa mak, di nasa rilomun ni bat minuk. ¹³Ieok bei tengan namur xati vate visal nou vaxolesuk tengan vatutou ni nou e melele xa nade nim te xeih ve longeongen hos xa di nabithiteni. 1:13 Plp 2:30¹⁴E ieok ti tavei napol ni ti neta xa xouk otamaen nou ti tengan napol ni. !E‑e! Ieok bei tengan nipol ni naha xa xouk kestang di onemi obit bos. Isak ni, tutouen xa usa ni minou ihusil nenemien hos nam kestang, e nave ti vengan nanggeih xatuk tengan opol ni. 1:14 2Kor 9:7; 1Pit 5:2

¹⁵Nahe xos Hi maen Onesimas telesae relinguk vuteili tengan melele xa itilomun ihat, xi mikila ita kat visaluk vehakut. ¹⁶E taxeak, xi tave slev nam ti tang. !E‑e! Xi bos mak mu mili slev tei, xi mei be tumali hos tei. Eheien navan di en, e xouk, eheien nam iti en ili, vengan xi be slev nam, e be tumali mun vari e his Suv Iesu. 1:16 1Tim 6:2

¹⁷Mak, ma xosxa onemi obit rupol mi Suv tei takes, ma uhur pilei ixoni ngan taxa ovur pilei nou. ¹⁸Xosxa xi tepol ni neta tova tesa minuk, mu pol ni kaon tei delak, inou iaxa nixal rati. ¹⁹!Pus ti mu! Nadis ngan ak ni heok xati: Inou Pol nixal rat holesok xil xa be kaon na Onesimas.(E xouk iem nabong ni kaon nam ti xa del xat nou, vengan xouk otehur meulien hu texo nou.) ²⁰Tuxoli hos navan li, ieok bei pupu tengan upol ni naha xa inou di nasisi minuk vengan ralu vus rube moletin na Iesu Kristo. Ngan ak isak ni nou nipolu ni sien.

²¹Melele xa di ladis sepinien navan xil ak, inou nakil kuhi mak xa xouk upol ni ixoni ngan xa di nasisi. !Io! E nakila xa upol ni ili. ²²Nabit nasisuk mun ve neta tei: usak mesen vontoen tova e nim mam tengan mei nita en. Vengan nake reitin xa Hi isa huit sisen namim tengan nistal ra nim te xeih ak e nihat nite visal xamim rilomun.

Sepinien kor

²³Epapras xa de nim te xeih del nou ve his Iesu Kristo, xi bit ‘bos makoe’ minuk. 1:23 Kol 1:7; 4:10,12; Pol 12:12,25; 13:13; 15:37-39; 2Tim 4:11; Pol 19:29; 27:2; 2Tim 4:10,11²⁴E Mak, Aristakas, Dimas e Luk mun xa di mapol vituei, xil mun labit lavit ‘bos makoe’ minuk.

²⁵Nasis tengan eheien hos na Suv Iesu iti mi xamim vus.