Pagpanyataꞌ

In Pagpanyataꞌ

Hi Īsa Kan Yahiya

Pahāti

In nagsulat sin būk ini amuna hi Yahiya hambuuk pilisu nakabutang ha pūꞌ sibiꞌ-sibiꞌ pagngānan Patmus, sabab duun siya piyabugit sin parinta Rūm. Iban hangkan siya piyabugit karnaꞌ diyugalan sila pasal sin pagnasīhat niya sin Parman sin Tuhan iban pagbawgbug niya kan Īsa. (Kitaa ha bāb 1, ayat 9)

In sulat ini mamaytaꞌ pasal sin manga pakaradjaan piyanyataꞌ hi Īsa Almasi kan Yahiya. In manga pakaradjaan ini dumatung pa manga mānusiyaꞌ ha dunya. In katān baytaꞌ ha lawm sulat ini naug dayn ha Tuhan piyasampay hi Īsa Almasi mawn kan Yahiya. Na, siyulat hi Yahiya in baytaꞌ ini ha supaya in manga Almasihin amu in makabacha sin sulat ini, kumusug iban humugut in huwat-huwat iban pangandul nila kan Īsa Almasi, labi awla na ha waktu nimananam sila kasigpitan iban kabinsanaan pasal sin pagꞌagad nila ha Almasi. In manga pakaradjaan piyanyataꞌ sin Almasi kan Yahiya, malawm in maana niya, sagawaꞌ minsan biyaꞌ hādtu, matampal tuud in baytaꞌ sin sulat ini, sin in katān kimukuntara ha Tuhan, labi awla in Nakuraꞌ sin manga Saytan, daugun da kaagi hi Īsa Almasi ha susūngun.

Kumuyag in Makabacha sin Sulat ini

¹ In sulat ini amuna in mamaytaꞌ pasal sin parakalaꞌ amu in piyanyataꞌ hi Īsa Almasi. In baytaꞌ ini amu in kiyawakil sin Tuhan kaniya, ha supaya siya magpahāti pa manga daraakun sin Tuhan pasal sin manga pakaradjaan, amu in marayꞌ na maawn ha susūngun. Na, piyanaug hi Īsa in hambuuk malāikat magpanyataꞌ sin manga pakaradjaan ini mawn pa hambuuk daraakun niya, hi Yahiya. ² Yari na kiyasulat ha sulat ini in katān kītaꞌ hi Yahiya, amu in pahāti dayn ha Tuhan iban sin kasabunnalan piyanyataꞌ hi Īsa Almasi. ³ Na, hisiyu-siyu in macha sin sulat ini kumūg in atay niya, iban hisiyu-siyu in dumungug sin baytaꞌ ini, iban magkahagad sin katān kiyasulat ha lawm sin sulat ini, kumuyag da isab in atay niya, karnaꞌ masuuk na dumatung in waktu maawn in manga pakaradjaan piyanyataꞌ ini katān.

Salam-duwaa pa Manga Pitu Langgal

⁴ In sulat ini naug dayn kākuꞌ, hi Yahiya, dumatung mari pa manga jamaa Almasihin sin pitu langgal ha hulaꞌ Asiya.

Piyapangayuꞌ ku duwaa bang mayan kamu karihilan tulung-tabang iban kasannyangan atay dayn ha Tuhan, dayn ha Rū niya, iban dayn kan Īsa Almasi. In hikaisa niya dayn ha Tuhan, amu in diꞌ magkapinda dayn sin tagnaꞌ pa bihaun, sampay pa salama-lama. In hikaruwa niya dayn ha Rū sin Tuhan, amu in duun ha alupan sin kursi sin Tuhan. ⁵ Iban in hikatū niya dayn kan Īsa Almasi, amu in kapanghalapan natuꞌ sin baytaꞌ niya. Siya in tau nakauna nabuhiꞌ nagbalik dayn ha kamatay, iban siya isab in makapagbayaꞌ ha katān tau nagnanakuraꞌ dī ha dunya.

Malasa siya kātuꞌniyu, iban piyuas niya kitaniyu dayn ha dusa kaagi sin duguꞌ niya naasag ha sabab ta. ⁶ Hīnang niya kitaniyu manga pakil hangka-agaran magtaat pa Tuhan, Amaꞌ niya, iban amu in pagsultanan sin Tuhan. Na, hangkan subay natuꞌ sanglitun hi Īsa Almasi, sabab kaniya in kalagguan, iban siya in hambuuk-buuk sangat kawasa salama-lama. Amin.

⁷ Na, dungug kamu. In hi Īsa magkakari miyamagad ha lawm sin manga gabun.

Kakitaan siya sin mānusiyaꞌ katān,

sambil amu in manga tau limansang namatay kaniya.

Iban in manga bangsa katān dī ha lawm dunya lumanduꞌ in susa iban karukkaan nila.

Ampa tantu bunnal tuud ini. Amin.

⁸ In Panghuꞌ Tuhan Sangat Kawasa, diꞌ magkapinda dayn sin tagnaꞌ pa bihaun, iban sampay pa salama-lama. Na, hangkan nagparman in Tuhan, amu agi, “Aku in biyaꞌ sapantun Alip iban Yaꞌ, amu in panagnaan iban kahinapusan sin unu-unu katān.”

In Pagpanyataꞌ hi Īsa Mawn kan Yahiya

⁹ In aku ini hi Yahiya, amu isab in hambuuk taymanghud niyu Almasihin. Sakali sabab sin paghambuuk natuꞌ iban hi Īsa, in aku ini biyaꞌ da isab kaniyu simasabal iban simasandal sin unu-unu katān kasigpitan dumatung mari kātuꞌ karnaꞌ sin pagꞌagad natuꞌ ha pamarinta niya. In aku bakas didtu nakabutang ha pūꞌ Patmus, pasal duun aku piyabugit sin parinta, karnaꞌ diyugalan sila pasal sin pagnasīhat ku sin Parman sin Tuhan iban sin kasabunnalan piyanyataꞌ hi Īsa. ¹⁰ Manjari, hambuuk waktu, ha adlaw sin Panghuꞌ, hiyūp aku sin Rū sin Tuhan. Iban nakarungug aku suwara makusug biyaꞌ sin huyup sin sangkakala dayn ha ulihan ku. ¹¹ Na, amu agi sin suwara, “Sulatan in katān kakitaan mu. Ubus ampa mu parāhan in kiyasulat mu pa manga jamaa Almasihin sin pitu langgal ha manga pitu dāira ini: Ipisus, Ismirna, Pirgamu, Tatira, Sardis, Piladilpi iban Laudikiya.”

¹² Pagdungug ku sin suwara, limingiꞌ aku bat ku kakitaan bang hisiyu in tau nagbibichara kākuꞌ. Paglingiꞌ ku, nākitaꞌ aku pagbubutangan palitaan bulawan, pitu in taud niya. ¹³ Iban ha giꞌtungan sin manga pagbubutangan palitaan ini, awn timitindug duun biyaꞌ lupa tau. In tau ini nagjujuba, iban awn līlibud kandit bulawan ha daghal niya. ¹⁴ In buhuk niya putiꞌ tuud biyaꞌ tawas, iban in mata niya masugit mangatud maūkꞌūk dakuman, biyaꞌ laga kāyu. ¹⁵ In siki niya magsinglab biyaꞌ sin tumbaga liyabay ha kāyu iban piyunglasan. Iban in tingug sin suwara niya biyaꞌ sin lagublub sin tubig anud, amu in busay malagguꞌ tuud. ¹⁶ In tau ini nagkukumkum pitu bituun ha lawm lima niya dapit pa tuu, iban gimuwaꞌ dayn ha simud niya puddang mahayt duwang sipak in sulab. In bayhuꞌ niya magsiꞌnag biyaꞌ sin silak sin suga ha ugtuhan.

¹⁷ Pagkitaꞌ ku kaniya, saruun-duun siyūd aku bugaꞌ. Na, magtūy aku naligad ha alupan niya. Sartaꞌ nabiyaꞌ aku hambuuk tau patay, walaꞌ nakahibal sin bugaꞌ ku. Sakali iyulinan niya aku sin lima niya pa tuu sartaꞌ namung na siya, amu agi, “Ayaw kaw mabugaꞌ. Aku na ini in panagnaan iban kahinapusan sin unu-unu katān. ¹⁸ Wayruun tagnaan iban kahinapusan sin kabuhiꞌ ku. Bakas aku miyatay, sagawaꞌ nabuhiꞌ aku nagbalik, iban buhiꞌ na aku kasaumulan. Aku in tagkawasa dumihil atawa diꞌ dumihil sin kamatay. Iban aku da isab in makapagꞌagi bang pakain ku pakadtuun in manga tau miyatay.

¹⁹ “Na, sulatan in katān bakas kiyakitaan mu, iban sin kīkitaꞌ mu bihaun, iban sin manga sumunuꞌ hipakitaꞌ ku kaymu. ²⁰ Na, bihaun baytaan ta na kaw sin maana sin pitu bituun kītaꞌ mu kiyukumkum ku ha lima ku pa tuu, iban sin pitu pagbubutangan palitaan bulawan, amu in bakas walaꞌ piyaingat sin Tuhan. Yari in maana niya. In pitu bituun, amuna in pitu nakuraꞌ sin pitu langgal. Ampa in pitu pagbubutangan palitaan, amuna in pitu tumpuk sin manga jamaa Almasihin sin pitu langgal.”

In Amānat Pa Tau Ipisus

¹ Iban laung niya pa, “Sulatan in amānat ini, ampa mu parāhan pa nakuraꞌ sin manga tau agad ha Almasi ha dāira Ipisus.”

Na, yari in amānat niya. Laung niya,

“In pahāti ini naug dayn kākuꞌ (hi Īsa Almasi), amu in tagkumkuman sin pitu bituun ha lawm tuu ku, iban amu in miyamanaw ha lawm sin pitu pagbubutangan palitaan bulawan, amu in tattap kumitaꞌ kaniyu. ² Kaingatan ku in hinang niyu. Kiyaamuhan aku sin tuyuꞌ niyu maghinang, iban sin kasabal niyu sumandal sin unu-unu kasigpitan. Iban kiyaamuhan aku isab sin mahukaw kamu ha manga tau naghinang kangīan. Iban mahukaw da isab kamu ha manga tau, amu in naggulal ha baran nila tau kiyawakilan sin Tuhan, pasal napariksaꞌ niyu na in manga tau ini, nagputing sadja. ³ Iban kaingatan ku da isab in kamu yan masabal. Karnaꞌ siyandalan niyu in unu-unu katān kasigpitan, amu in kimugdan kaniyu ha pasal ku, iban walaꞌ niyu tuud biyugtuꞌ in pagꞌīman niyu kākuꞌ.

⁴ “Sagawaꞌ awn hambuuk siyallaꞌ ku kaniyu. Bihaun in lasa niyu kākuꞌ bukun na makusug biyaꞌ sin nakauna. Kimūꞌ na tuud in lasa niyu. ⁵ Pikila niyu in pagbiddaan sin lasa niyu tagnaꞌ iban sin bihaun. Pagtawbati niyu na in dusa niyu, iban hinanga niyu na magbalik in bakas hinang niyu marayaw. Pasal bang niyu diꞌ pagtawbatan in manga dusa niyu bihaun, mawn aku kaniyu iban īgan ku in pagbubutangan palitaan niyu, amu in tumpuk sin manga jamaa sin langgal niyu. ⁶ Malayngkan, awn da isab hinang niyu nakasulut kākuꞌ. Sabab in kamu biyaꞌ da isab kākuꞌ, marugal ha manga hinang mangīꞌ sin manga tau Nikulay.

⁷ “Na, in kamu taga taynga, taynghug kamu ha bichara ku ini, sabab amuna in bichara sin Rū sin Tuhan pa manga jamaa Almasihin sin kalanggalan. Hisiyu-siyu in manga tau, amu in tumatas tumanggung sin unu-unu makalubu sin īman nila, dihilan ku sila kapatutan kumaun sin bunga sin kahuy didtu ha hulaan sin Tuhan, amu in kahuy makarihil kabuhiꞌ salama-lama.”

In Amānat pa Tau Ismirna

⁸ Iban laung niya pa isab kākuꞌ, “Sulatan in amānat ini, ampa mu parāhan pa nakuraꞌ sin manga tau agad ha Almasi ha dāira Ismirna.”

Na, yari in amānat niya. Laung niya,

“In pahāti ini naug dayn kākuꞌ (hi Īsa Almasi), amu in panagnaan iban kahinapusan sin unu-unu katān. Iban aku na ini in bakas miyatay iban nabuhiꞌ nagbalik dayn ha kamatay. ⁹ Kaingatan ku in manga kabinsanaan kiyalabayan niyu. Iban kaingatan ku da isab in katān hāl sin kamiskinan niyu, sagawaꞌ yadtu in daya niyu ha surgaꞌ. Kaingatan ku in manga pamung mangīꞌ kaniyu sin manga tau simusulang kaniyu, amu in magbawꞌ-bawꞌ in sila Yahudi tau sin Tuhan, sagawaꞌ bukun bunnal, pasal in sila yan hambuuk tumpuk sin manga tindug sin Saytan Puntukan. ¹⁰ Ayaw kamu mabugaꞌ sin manga kabinsanaan, amu in marayꞌ na dumatung mawn kaniyu. Ingat kamu. In kaibanan kaniyu hiluun pa lawm jīl sin manga tau agad ha Iblis, ha supaya kaingatan bang biyaꞌ diin tuud in kusug sin īman niyu kākuꞌ. Numanam kamu kabinsanaan ha lawm hangpuꞌ adlaw. Sagawaꞌ pahuguta niyu sadja in īman niyu kākuꞌ minsan kamatay in sūngun niyu, sabab awn karayawan hirihil ku kaniyu, amu in kabuhiꞌ salama-lama didtu ha surgaꞌ.

¹¹ “Na, in kamu taga taynga, taynghug kamu ha bichara ku ini, sabab amuna in bichara sin Rū sin Tuhan pa manga jamaa Almasihin sin kalanggalan. Hisiyu-siyu in manga tau amu in tumatas tumanggung sin unu-unu makalubu sin īman nila, diꞌ sila makalabay kasiksaan salama-lama amu in pagꞌiyanun Kamatay Hikaruwa.”

In Amānat pa Tau Pirgamu

¹² Ubus namung na isab siya. Laung niya, “Sulatan in amānat ini, ampa mu parāhan pa nakuraꞌ sin manga tau agad ha Almasi ha dāira Pirgamu.”

Na, yari in amānat. Laung niya,

“In pahāti ini naug dayn kākuꞌ (hi Īsa Almasi), amu in tagkumkuman sin puddang mahayt duwa sulab. ¹³ Kaingatan ku in kamu yan, naghuhulaꞌ ha hulaꞌ bantug, sabab pagsimbahan sin Saytan Puntukan. Sagawaꞌ minsan bihayan, masi-masi in pagꞌagad niyu kākuꞌ. Iban way niyu biyutawanan in pagꞌīman niyu kākuꞌ, minsan ha waktu biyunuꞌ sin manga tau mangīꞌ hi Antipas. In hi Antipas ini tau kapangandulan ku magbaytaꞌ ha pasal ku, saꞌ biyunuꞌ siya duun ha dāira niyu, amu in piyaghuhulaan sin Saytan Puntukan.

¹⁴ “Sumagawaꞌ awn siyallaꞌ ku kaniyu. Pasal in kaibanan kaniyu himihinang sin amu in bakas kiyahinduꞌ hi Balaam kan Balak sin timpu nakauna yadtu. In hi Balaam ini amu in nakahinduꞌ kan Balak bang biyaꞌ diin in kaagi niya magpakangīꞌ ha bangsa Israil, ha supaya sila magdusa ha Tuhan, kumaun sin kakaun haram bakas piyaglabut ha manga barhalaꞌ iban magjina. ¹⁵ Damikkiyan biyaꞌ da isab ha yan in hinang sin manga tau Nikulay, amu in sīsinguran sin kaibanan duun kaniyu. ¹⁶ Hangkan, pagtawbati niyu na in manga dusa niyu, pasal bang kamu masi-masi maghinang sin mangīꞌ, mawn aku kaniyu ha masamut, ampa ku bunuun in manga tau naghihinang mangīꞌ. In pakukus hipamunuꞌ ku kanila, amuna in puddang mahayt duwa sulab yari magguwaꞌ dayn ha simud ku.

¹⁷ “In kamu taga taynga, taynghug kamu ha bichara ku ini, sabab amuna in bichara sin Rū sin Tuhan pa manga jamaa Almasihin sin kalanggalan. Hisiyu-siyu in manga tau, amu in matatas tumanggung sin unu-unu makalubu sin īman nila, dihilan ku sila sin kakaun pagtawagun ‘manna’ naug dayn ha surgaꞌ, amu in kakaun diꞌ kakitaan sin manga tau ha bihaun. Iban dihilan ku pa isab sila pakaniya-pakaniya sin batu putiꞌ iyuukkilan ngān baꞌgu, amu in way makaingat liyu dayn sin tau makataymaꞌ ha yan.”

In Amānat pa Tau Tatira

¹⁸ Na namung na isab hi Īsa. Laung niya, “Sulatan in amānat ini, ampa mu parāhan pa nakuraꞌ sin manga tau agad ha Almasi ha dāira Tatira.”

Na, yari in amānat niya. Laung niya,

“In pahāti ini naug dayn kākuꞌ (hi Īsa Almasi), amu in Anak Tuhan, amu in taga mata magsiꞌnag biyaꞌ sin laga kāyu iban in siki ku magsinglab biyaꞌ sin tumbaga piyunglasan. ¹⁹ Kaingatan ku in hinang niyu. Kaingatan ku in lasa niyu ha Tuhan iban ha pagkahi niyu mānusiyaꞌ. Kaingatan ku in kusug sin pangandul niyu kākuꞌ, iban sin pagtabang niyu ha pagkahi niyu mānusiyaꞌ karnaꞌ sabab ku, iban sin kasabal niyu simandal sin unu-unu kabinsanaan dimatung mawn kaniyu. Kaingatan ku labi marayaw in hinang niyu bihaun dayn sin nakauna.

²⁰ “Sagawaꞌ awn hambuuk siyallaꞌ ku kaniyu. Piyasāran niyu in babai yan, hi Jissibila maghinang mangīꞌ. Bang ha bichara niya, in siya naraak magpasampay sin Parman sin Tuhan. Siyasat niya in manga daraakun ku huminang sin manga hinduꞌ niya tudju pa mangīꞌ, biyaꞌ na sin magjina iban kumaun sin manga kakaun haram bakas piyanglabut ha barhalaꞌ. ²¹ Kiyarihilan ku na siya waktu magtawbat sin manga dusa niya, sagawaꞌ masi-masi niya da hīhinang in manga hinang kalumuan. ²² Hangkan in babai yan iban sin katān tau miyagad sin manga hinang niya magjina, paratungan ku sin sakit sangat makalap. Hinangun ku yan bihaun bang sila diꞌ magtawbat dayn ha dusa nahinang nila. ²³ Iban dihilan ku kamatay in manga tau, amu in agad ha hinduꞌ sin babai yan, ha supaya kaingatan sin manga tau katān agad kākuꞌ ha kalanggal-langgalan sin nasusūd ku katān in ha lawm pamikil sin manga tau, iban sin unu in kabayaan nila hinangun. Tungbasan ta kamu ha tungud sin unu in nahinang niyu.

²⁴ “Sumagawaꞌ in kaibanan kaniyu duun ha Tatira walaꞌ da miyagad sin hinduꞌ mangīꞌ sin babai yan. Iban walaꞌ nagguru sin ilmuꞌ dayn ha Saytan Puntukan, amu in pagtawagun sin kaibanan tau hinduꞌ malawm. Na, ini in hikabaytaꞌ ku kaniyu. Diꞌ aku mabayaꞌ bang kamu kahunitan. Hangkan wayruun daakan ku kaniyu dugaing dayn sin ini. ²⁵ Amu sadja subay niyu gunggungan in hinang niyu marayaw sampay pa waktu makabalik aku mawn kaniyu. ²⁶ Ampa hisiyu-siyu in manga tau, amu in matatas tumanggung sin unu-unu makalubu sin īman, iban amu in diꞌ mabugtuꞌ in paghinang sin daakan ku sampay pa adlaw kamatay niya, dihilan ku sila kawasa mamarinta biyaꞌ sin kiyarihil kākuꞌ sin Tuhan, Amaꞌ ku. Dihilan ku sila kawasa mamarinta ha manga kabangsa-bangsahan. In kusug sin pagparinta nila biyaꞌ hantang basiꞌ hipanglubak ha kibut maluhay mabagbag, iban in manga banta nila mabiyaꞌ sila sin puga magkapusat-pusat. ²⁸ Hisiyu-siyu isab in matatas tumanggung sin unu-unu makalubu sin īman nila, awn hambuuk pusakaꞌ hirihil ku kanila biyaꞌ bituun māga in sawa niya.

²⁹ “In kamu taga taynga, taynghug kamu ha bichara ku ini, sabab amuna in bichara sin Rū sin Tuhan pa manga jamaa Almasihin sin kalanggalan.”

In Amānat pa Tau Sardis

¹ Pagꞌubus namung na isab siya nagbalik. Laung niya, “Sulatan in amānat ini ampa mu parāhan pa nakuraꞌ sin manga tau agad ha Almasi ha dāira sin Sardis.”

Na, yari in amānat niya. Laung niya,

“In pahāti ini naug dayn kākuꞌ (hi Īsa Almasi), amu in tagkumkuman sin pitu bituun iban amu in tagkapatutan mangdaak ha Rū sin Tuhan. Amu ini in hibaytaꞌ ku kaniyu, kaingatan ku in hinang niyu. Kaingatan ku ha pangatud sin manga tau miyamagad tuud kamu sin manga daakan ku, sagawaꞌ in kasabunnalan niya wayruun aku ha lawm sin atay niyu. In pagꞌagad niyu kākuꞌ ulaula sadja. Bukun tuud matutuud. ² Na, hangkan jaga kamu. Pahuguta niyu na in pagparachaya iban pagpangandul niyu kākuꞌ, pasal biyaꞌ agun na malawaꞌ yan dayn kaniyu. Sabab in hinang niyu yan, bang ha liling ku isab, taga sallaꞌ, lāgiꞌ ha pangitaꞌ sin Tuhan ku. ³ Pahūpa niyu pa pamikil niyu in manga hinduꞌ ku, amu in bakas kiyahinduꞌ kaniyu iban diyungug niyu. Kahagara niyu iban pagtawbati niyu na in manga hinang niyu mangīꞌ, pasal bang kamu bukun mahalliꞌ dayn ha hinang mangīꞌ, mawn aku kaniyu ha waktu, amu in diꞌ niyu mapikil mawn aku, biyaꞌ sapantun sin hambuuk sugarul sumūd pa lawm bāy niyu ha diꞌ niyu kaingatan.

⁴ “Sumagawaꞌ awn da isab kaibanan duun kaniyu ha Sardis, hangkatiyuꞌ da, amu in walaꞌ nalamin sin manga hinang mangīꞌ. In kamu yan biyaꞌ hantang tau hiyallian nila in tamungun ha supaya wayruun tamak niya. Paagarun ta kamu kākuꞌ pasal in kamu yan suchi, amu in matūp magad kākuꞌ manamung putiꞌ. ⁵ Na, damikkiyan in hisiyu-siyu manga tau, amu in matatas tumanggung sin unu-unu makalubu sin īman, in sila yan matūp da isab manamung putiꞌ. Iban diꞌ ku papasan in ngān nila dayn ha Kitab, amu piyagsusulatan sin manga ngān sin manga tau, amu in dihilan kabuhiꞌ salama-lama. Iban hitanyag ku ha Amaꞌ ku Tuhan, iban ha manga malāikat niya, sin in manga tau yan sukuꞌ ku.

⁶ “Na, in kamu taga taynga, taynghug kamu ha bichara ku ini, sabab amuna in bichara sin Rū sin Tuhan pa manga jamaa Almasihin sin kalanggalan.”

In Amānat pa Tau Piladilpi

⁷ Pagꞌubus, namichara na isab siya nagbalik. Laung niya, “Sulatan in amānat ini, ampa mu parāhan pa nakuraꞌ sin manga tau agad ha Almasi ha dāira Piladilpi.”

Na, yari in amānat niya. Laung niya,

“In pahāti ini naug dayn kākuꞌ (hi Īsa Almasi), amu in mahasuchi iban amu in puunan sin kasabunnalan. Aku da in tagkaputan sin kunsiꞌ hi Nabi Daud (hāti niya, aku in tagkumkuman sin labayan pa lawm sin pagparintahan sin Tuhan). Bang aku in umukab sin labayan, wayruun makatambul. Bang ku isab tambulun, wayruun da isab makaukab dugaing dayn kākuꞌ. ⁸ Kaingatan ku in hinang niyu. Kaingatan ku isab in kamu yan diꞌ makagaus tuud. Sagawaꞌ nagkahagad kamu sin manga hinduꞌ ku, iban walaꞌ niyu piyayluhan sin in kamu agad kākuꞌ. Na, hangkan bang upamakun labayan, iyukab ku na kaniyu ha supaya kamu makasūd ha wayruun makatagga kaniyu. Lāgiꞌ in labayan ini wayruun makatambul dugaing dayn kākuꞌ. ⁹ Na, dungug kamu. In manga tau, amu in nagpabawꞌ-bawꞌ sin in sila manga Yahudi, tau sin Tuhan, nagputing sadja. In bunnal niya, in sila yan manga tindug sin Saytan Puntukan. Dumatung da in adlaw, in sila yan katān pasujurun ku kaniyu, ha supaya nila kaingatan in kamu kalasahan ku. ¹⁰ Iban in kamu yan nagtuyuꞌ tuud miyagad sin daakan ku, amu in daakan kaniyu sumabal sin unu-unu dimatung mawn kaniyu karnaꞌ sabab ku. Na, dayn ha sabab yan, in kamu lappasun ku dayn ha manga kasiksaan dumatung ha susūngun pa dunya, amu in hipanulay-sulay sin īman sin manga mānusiyaꞌ katān.

¹¹ “Iban in aku masuuk na magbalik mawn pa dunya. Hangkan ayaw niyu butawani in pagꞌagad niyu kākuꞌ, pasal bang niyu butawanan na, maluppas in tungbas tiyatagama ku kaniyu. Hirihil na pa dugaing. ¹² Ampa in manga tau, amu in matatas tumanggung sin unu-unu makalubu sin īman, dihilan ku sila kalagguan. Dihilan ku sila hulaꞌ mahugut paghulaan nila. Humulaꞌ na sila kakkal ha luggiyaꞌ hulaan sin Tuhan ku. Iban hisulat ku isab ha baran nila in ngān sin Tuhan ku iban sin ngān sin hulaꞌ sin Tuhan ku, amu in dāira pagngānan Awrusalam Baꞌgu, amu in dāira panaugun sin Tuhan dayn ha surgaꞌ. Iban hisulat ku da isab ha baran nila in ngān ku baꞌgu.

¹³ “Na, in kamu taga taynga, taynghug kamu ha bichara ku ini, sabab amuna in bichara sin Rū sin Tuhan pa manga jamaa Almasihin sin kalanggalan.”

In Amānat pa Tau Laudikiya

¹⁴ Na, namung na isab hi Īsa, laung niya, “Sulatan in amānat ini, ampa mu parāhan pa nakuraꞌ sin manga tau agad ha Almasi ha dāira Laudikiya.”

Na, yari in amānat niya. Laung niya,

“In pahāti ini naug dayn kākuꞌ (hi Īsa Almasi), amu in pagngānan Amin, amu in tantu kapangandulan iban amu in nanghinduꞌ sin kasabunnalan. Iban aku in tuburan sin unu-unu katān piyapanjari sin Tuhan. ¹⁵ Kaingatan ku in hinang niyu. Kaingatan ku in kamu yan biyaꞌ hantang tubig, amu in bukun mapasuꞌ, saꞌ bukun da isab mahagpay. In hāti niya in pagꞌagad niyu kākuꞌ bukun tuud matutuud. Hawal-hawal kamu. Na, in kabayaan ku bang kamu magad kākuꞌ, agad tuud kamu, bang diꞌ, diꞌ na tuud. ¹⁶ Na, pagga kamu naghawal-hawal da pasal ku, hisulak ta kamu, biyaꞌ da isab sin tubig ha ūt sin mapasuꞌ iban mahagpay, amu in hiluwaꞌ sin tau dayn ha simud nila pasal diꞌ nila kabayaan. ¹⁷ Lāgiꞌ in kamu nagꞌabbu sin dayahan kamu, marayaw sadja in kiyasūngan niyu, iban bukun kamu kulang-kabus ha unu-unu. Sumagawaꞌ diꞌ niyu kaingatan in kahālan niyu tuud. In bunnal niya, in kamu yan makaluuy tuud, way parasahan niyu, sabab kulang-kabus kamu ha īman. Biyaꞌ da kamu sin sapantun naghuhubuꞌ, pasal in kamu kulang kabus ha kalappasan sin Tuhan. Biyaꞌ da isab kamu sin hambuuk tau buta, pasal diꞌ niyu kakitaan bang biyaꞌ diin tuud in kahālan niyu. ¹⁸ Na, ini in hikahinduꞌ ku kaniyu. Pamī kamu bulawan purul dayn kākuꞌ, amu in tantu makarihil daya kaniyu. Iban pamī kamu dayn kākuꞌ tamungun putiꞌ, ha supaya kamu diꞌ maghubuꞌ iban masipug. Iban pamī kamu isab dayn kākuꞌ ubat hipagꞌubat sin mata niyu, ha supaya niyu kakitaan marayaw in kasabunnalan sin kahālan niyu.

¹⁹ “In manga tau katān kalasahan ku, bībiat ku iban piyapantun ku ha supaya dumayaw in addat-tabīat nila. Na, hangkan tuyui niyu in hinang marayaw iban pagtawbati niyu na tuud in manga hinang niyu mangīꞌ. ²⁰ Na, dungug kamu marayaw. In aku biyaꞌ sapantun hambuuk tau nagtitindug iban nagkukuꞌkuꞌ ha lawang bāy niyu. Manjari bang awn tau hisiyu-siyu na makarungug sin pagtawag ku iban ukaban niya aku lawang, na sumūd aku iban sumāw aku kumaun kaniya. ²¹ Na, hisiyu-siyu in manga tau, amu in matatas tumanggung sin unu-unu makalubu sin īman nila, dihilan ku sila kalagguan lumingkud ha daig ku ha taas sin kursi ku, iban magad mamarinta kākuꞌ. Biyaꞌ da isab kākuꞌ, diyaug ku in kusug sin Saytan Puntukan, hāti nakalingkud na aku ha daig sin Tuhan, Amaꞌ ku, ha taas sin kursi niya.

²² “Na, in kamu taga taynga, taynghug kamu ha bichara ku ini, sabab amuna in bichara sin Rū sin Tuhan pa manga jamaa Almasihin sin kalanggalan.”

In Pagtaat ha Surgaꞌ

¹ Na, pagꞌubus ini awn na isab dugaing piyakitaꞌ kākuꞌ. Kītaꞌ ku naukab in hambuuk lawang pa lawm surgaꞌ, sartaꞌ diyungug ku na isab nagbalik in suwara, amu in biyaꞌ tingug sin huyup sin sangkakala. Laung niya, “Gaban kaw mari, sabab hipakitaꞌ ku kaymu in manga pakaradjaan maawn ha susūngun.” ² Sakali, saruun-duun hiyūp aku sin Rū sin Tuhan. Kītaꞌ ku in kursi ha lawm surgaꞌ iban awn naglilingkud duun. ³ Sakali awn magsinglab sahaya dayn ha pamayhuan sin naglilingkud ha kursi. In walnaꞌ sin sahaya magsinglab biyaꞌ sin palmata jaspir iban palmata pula. Iban awn biyaꞌ hantang bāngaw ha katilibut sin kursi. Gaddung in walnaꞌ biyaꞌ sin palmata jamrud. ⁴ Iban in kursi ini līlibut sin kawhaan tagꞌupat kursi dugaing, amu in piyaglilingkuran sin kawhaan tagꞌupat nagtatau-maas. In manga kawhaan tagꞌupat nagtatau-maas ini, nagtatamung putiꞌ iban nagmamahakuttaꞌ bulawan. ⁵ Iban dayn ha kursi ini awn gimuwaꞌ manga siꞌnag sin kilat iyaagaran sin anduhud sin dawgdug. Iban awn pitu tanjuꞌ naglalaga duun ha alupan niya. In pitu tanjuꞌ ini amuna in tandaꞌ sin Rū sin Tuhan. ⁶ Iban kītaꞌ ku in dagbus sin katiluagan ha alupan sin kursi biyaꞌ madtu hantang dagat, amu in malihaw iban masawa tuud biyaꞌ sin samin.

Iban ha upat dugu sin kursi yaun awn upat malāikat nagtitindug mahal-mahal in lupa, amu in nalalapat in baran nila sin manga mata dayn ha taykud pa unahan. ⁷ In lupa sin hambuuk biyaꞌ lupa singaꞌ, in hikaruwa biyaꞌ lupa anak sapiꞌ, in hikatū biyaꞌ lupa bayhuꞌ tau, iban in hikaupat biyaꞌ lupa sambulaan limulupad. ⁸ Na, in pakaniya-pakaniya kaupat taga pikpik unum in taud, iban nalalapat sila sin manga mata, dayn ha lawm pa guwaꞌ. Lāgiꞌ wayruun bugtuꞌ sin pagkalang nila dūm-adlaw. Biyaꞌ ha ini in lapal kabtangan sin kalangan nila,

“Suchi, Suchi, Suchi,

in Panghuꞌ Tuhan Sangat Kawasa,

Tuhan diꞌ magkapinda, amu-amura dayn sin nakauna, ha bihaun sampay pa salama-lama.”

⁹ In manga upat malāikat mahal-mahal in lupa ini, nagkalang sin manga kalangan kapudjihan iban kasanglitan iban pagsarang-sukul pa Tuhan, amu in naglilingkud duun ha kursi amu in buhiꞌ salama-lama. ¹⁰ Kimalang mayan sila, in kawhaan tagꞌupat nagtatau-maas simujud na simumba pa Tuhan, amu in naglilingkud ha kursi, amu in buhiꞌ salama-lama. Pagsumba nila, inīg nila in manga mahakuttaꞌ nila biyutang pa alupan sin kursi sin Tuhan. Pagꞌubus ampa sila namung, laung nila.

¹¹ “Ū Tuhan, Panghuꞌ namuꞌ, ikaw in hambuuk-buuk tūpun lagguun iban sanglitun, pasal in ikaw sangat kawasa,

amu in nagpapanjari sin unu-unu katān.

Dayn ha kahandak mu nahinang in kaawnan sin katān,

iban dayn ha kahandak mu in manga piyapanjari mu katān dīhilan kabuhiꞌ.”

In Kātas Liyulūn iban sin Anak Bili-bili

¹ Pagꞌubus yadtu awn kītaꞌ ku kātas liyulūn iyuulinan sin tuu sin naglilingkud duun ha kursi. In kātas liyulūn ini, siyusulatan dayn ha hansipak pa hansipak, iban pīpikitan sin pitu tumbuk ha supaya diꞌ maukab. ² Sakali ini, nākitaꞌ aku hambuuk malāikat makawasa, amu in nagsuwara matanug. Amu agi, “Hisiyu in taga kawasa umaknit sin manga pikit iban umukab sin kātas liyulūn ini?” ³ Sumagawaꞌ wayruun minsan hambuuk dayn ha langit, dunya, atawa dayn ha ahirat in taga kawasa umukab iban macha sin unu in kiyasulat ha lawm sin kātas liyulūn. ⁴ Pagga wayruun tuud makarapat umukab iban macha sin unu in kiyasulat ha lawm sin kātas liyulūn, magtūy aku timangis nagkarukkaan. ⁵ Sakali namung in hambuuk nagtatau-maas. Laung niya kākuꞌ, “Ayaw kaw magtangis sabab diyaug na kaagi hi Īsa Almasi in kusug sin Saytan Puntukan. In siya hambuuk panubuꞌ dayn ha pihak hi Yudah sangat makusug biyaꞌ sin sattuwa singaꞌ, iban siya da isab in hambuuk panubuꞌ makawasa hi Nabi Daud. Hangkan siya da in hambuuk-buuk makarapat umaknit sin pikit sin pitu tumbuk iban umukab sin kātas liyulūn.”

⁶ Pagꞌubus awn kītaꞌ ku hambuuk Anak Bili-bili nagtitindug ha alupan sin kursi, piyaglibutan sin upat malāikat mahal-mahal in lupa iban sin kawhaan tagꞌupat nagtatau-maas. Kītaꞌ ku in limpaꞌ sin bakas paliꞌ niya, amu in tandaꞌ sin bakas siya piyatay nakauna. Awn pitu tanduk iban pitu mata niya. In pitu mata niya ini amuna in tandaꞌ sin Rū sin Tuhan, amu in piyakadtu niya pa manga mānusiyaꞌ ha katiluagan sin dunya. ⁷ Na, sakali in Anak Bili-bili miyanaw na harap pa kursi, ampa niya kiyawaꞌ in kātas liyulūn dayn ha lima, amu in dapit pa tuu sin amu in naglilingkud duun ha kursi. ⁸ Pagkawaꞌ niya sin kātas liyulūn, in upat malāikat mahal-mahal in lupa iban sin kawhaan tagꞌupat nagtatau-maas, simujud na pa alupan sin Anak Bili-bili, sartaꞌ simumba na kaniya. In manga katān nagtatau-maas nagdarā biyula pakaniya-pakaniya iban panunugtugan bulawan hipuꞌ sin kamanyan. Pasal in hamut sin kamanyan amuna in tandaꞌ sin pagpangayuꞌ duwaa sin manga tau sukuꞌ sin Tuhan. ⁹ Pagꞌubus ampa na sila nagkalang sin baꞌgu kalangan. Biyaꞌ ha ini in lapal kabtangan sin kalangan nila.

“Ikaw da in makarapat umaknit sin manga pikit

iban umukab sin kātas liyulūn,

sabab in ikaw piyatay sin tau.

Iban in duguꞌ mu naasag, amuna in biyaꞌ sapantun pilak piyanglukat mu ha manga mānusiyaꞌ,

amu in dayn ha dugaing-dugaing pihak, bahasa, hulaꞌ, iban bangsa, dayn ha manga dusa nila, ha supaya sila mahinang sukuꞌ sin Tuhan.

¹⁰ Hīnang mu sila manga pakil hangka-agaran magtaat pa Tuhan natuꞌ iban amu in pagsultanan sin Tuhan.

Iban mamarinta da isab sila dī ha dunya ha susūngun.”

¹¹ Pagꞌubus imatud na isab aku nagbalik. Pagꞌatud ku, diyungug ku in suwara sin salaksaꞌ malāikat. Diꞌ maitung in taud. Yaun sila nagtitindug ha katilibut sin manga nagtatau-maas, sin upat malāikat mahal-mahal in lupa iban sin kursi. ¹² Ampa sila nagkalangan matanug. Biyaꞌ ha ini in lapal sin kalangan nila,

“Matūp tumaymaꞌ sin pudji in ngiyānan Anak Bili-bili amu in bakas biyunuꞌ sin manga mānusiyaꞌ,

sabab siya na in makapagbayaꞌ-bayaꞌ ha unu-unu katān.

Iban siya in tuburan sin unu-unu na pangaltaꞌ, ilmuꞌ iban kusug.

Na, lagguun, sanglitun iban pudjihun natuꞌ siya.”

¹³ Pagꞌubus ampa ku diyungug nagkalangan in katān piyapanjari sin Tuhan ha langit, ha dunya, ha ahirat, ha dagat iban na sin katān piyapanjari ha liyukupan sin ālam. Biyaꞌ ha ini in lapal kabtangan sin kalangan nila,

“In naglilingkud duun ha kursi iban sin amu in ngiyānan Anak Bili-bili,

subay natuꞌ pudjihun, lagguun iban sanglitun salama-lama pasal sila tuud in sangat kawasa.”

¹⁴ Sakali simambag in upat malāikat mahal-mahal in lupa. Amu agi nila, “Amin.” Pagꞌubus ampa na simujud simumba in manga nagtatau-maas.

In Manga Pikit sin Kātas Liyulūn

¹ Ha saꞌbu ku nangingitaꞌ-ngitaꞌ duun, kītaꞌ ku iyaknit sin Anak Bili-bili in panagnaan pikit sin kātas liyulūn. Ubus diyungug ku nagsuwara in hambuuk malāikat mahal-mahal in lupa. Biyaꞌ dawgdug in tanug sin suwara niya. Laung niya biyaꞌ ha ini, “Lanjalan na in hinang diyaakan kaymu.” ² Magtūy, kītaꞌ ku gimuwaꞌ in kuraꞌ putiꞌ. In nangunguraꞌ ha taas niya nagdarā bawgan panaꞌ, sartaꞌ dīhilan na siya kuruna ha ū niya. Pagꞌubus ampa na siya nanguraꞌ harap pa dunya mamunuꞌ iban magpataalluk ha manga tau atu niya.

³ Sakali iyaknit na isab sin Anak Bili-bili in hikaruwa pikit sin kātas liyulūn. Sartaꞌ diyungug ku na isab nagsuwara in hikaruwa malāikat. Amu agi, “Lanjalan na in hinang diyaakan kaymu.” ⁴ Magtūy kītaꞌ ku gimuwaꞌ in kuraꞌ pula. In nangunguraꞌ ha taas niya dīhilan na puddang mahabaꞌ. In siya ini dīhilan kawasa umīg sin kasannyangan iban kasulutan ha dunya. Sartaꞌ dumā siya sin kalingugan pa mānusiyaꞌ ha supaya in manga tau magbunuꞌ pagkahi.

⁵ Pagꞌubus naaknit mayan sin Anak Bili-bili in hikatū pikit sin kātas liyulūn, diyungug ku na isab nagsuwara in hikatū malāikat mahal-mahal in lupa. Laung niya biyaꞌ ha ini, “Lanjalan na in hinang diyaakan kaymu.” Magtūy kītaꞌ ku gimuwaꞌ in kuraꞌ itum. Iban in nangunguraꞌ ha taas niya nagdarā timbangan. ⁶ Sakali awn kiyarungugan ku biyaꞌ suwara guwaꞌ dayn ha giꞌtungan sin manga upat malāikat mahal-mahal in lupa. Amu agi sin suwara, “Subay in gadji sin tau hangka-adlaw tuput sadja hipamī hangka-pansing bugas atawa tūngka-pansing layagan. Sagawaꞌ in kabbun jaytun iban anggul subay diꞌ mulahun.”

⁷ Pagꞌubus naaknit mayan sin Anak Bili-bili in hikaupat pikit sin kātas liyulūn, diyungug ku na isab nagsuwara in hikaupat malāikat mahal-mahal in lupa. Laung niya biyaꞌ ha ini, “Lanjalan na in hinang diyaakan kaymu.” ⁸ Na manjari kītaꞌ ku gimuwaꞌ in hambuuk kuraꞌ namimiyaning in pais niya biyaꞌ tau nasasakit. In nangunguraꞌ ha taas niya ngiyānan Kamatay, iban in ngiyānan Kubul amuna in imuurul ha ulihan niya. Kiyarihilan sila kawasa mamatay ha hangka-bahagiꞌ sin upat kabahagiꞌ sin manga tau ha dunya. In kaagi nila magpatay ha manga tau, paratungan nila sila bunuꞌ, gutum, sakit iban manga sattuwa talun.

⁹ Pagꞌubus naaknit mayan sin Anak Bili-bili in hikalima pikit sin kātas liyulūn, kītaꞌ ku duun ha babaꞌ sin lugal pagkukulbanan hayup, in manga tau amu in nabunuꞌ pasal sin pagnasīhat nila sin Parman sin Tuhan, iban sin pasal mataꞌgu in pagsaksiꞌ nila sin kasabunnalan pasal hi Īsa Almasi. ¹⁰ Sakali diyungug ku sila sama-sama nagsuwara matanug. Laung nila biyaꞌ ha ini, “Ū Tuhan, Panghuꞌ namuꞌ, ikaw in hambuuk-buuk sangat-kawasa, suchi iban amu in puunan sin kasabunnalan. Maunu pa in lugay sin pagtagad namuꞌ kaymu mamawli ha manga tau ha dunya amu in namunuꞌ kāmuꞌ? Kuꞌnu mu pa sila butangan hukuman iban paratungan kasiksaan?” ¹¹ Pagꞌubus yadtu kītaꞌ ku dīhilan sila juba putiꞌ pakaniya-pakaniya. Sartaꞌ biyaytaan sila, amu agi, “Tagad iban hali na kamu dayꞌ-dayꞌ. Iyampa aku mamaws bang maabut na in waktu jumukup in taud sin tau, amu in asal kiyagantaꞌ sin Tuhan mabunuꞌ sila, amu in pagkahi niyu daraakun hi Īsa Almasi. Karnaꞌ in sila yan lumabay da isab biyaꞌ sin kamatay liyabayan niyu.”

¹² Pagꞌubus yadtu naaknit mayan sin Anak Bili-bili in hikaunum pikit sin kātas liyulūn, naglinug makusug. Sartaꞌ kītaꞌ ku nanigidlum na in suga biyaꞌ sin karut itum, iban in lupa sin bulan namula na biyaꞌ duguꞌ. ¹³ Iban in manga bituun ha langit nalanas nahulug pa dunya, biyaꞌ sin paghulug sin bungang-kahuy tina amu in bulak pa bang kugdanan sin hangin makusug. ¹⁴ Iban in langit naīg biyaꞌ sin kātas lūnun sin tau. Iban in kabūd-būran iban kapūꞌ-pūan naīg dayn ha lugal kiyabutangan asal kanila.

¹⁵ Pagꞌubus yadtu nahalubilu na in katān tau ha dunya. Minsan in manga sultan iban sin manga nakuraꞌ sin kahulaꞌ-hulaan ha dunya, in manga puntukan nakuraꞌ sin manga kasundaluhan, in manga tau dayahan iban sin manga tau balkanan, in manga īpun iban sin bukun, sama-sibuꞌ na nagtapukan ha manga sungab batu iban ha sawm sin kabatuhan ha kabūd-būran. ¹⁶ Sartaꞌ nangayuꞌ-ngayuꞌ na sila bang mayan sila kahulugan da sin manga būd iban katabunan sin manga batu, ha supaya sila diꞌ kakitaan sin amu in naglilingkud ha kursi, iban ha supaya sila diꞌ kugdanan sin murkaꞌ sin Anak Bili-bili. ¹⁷ Sabab dimatung na in waktu hipananam sin Tuhan iban Anak Bili-bili in murkaꞌ nila ha manga mānusiyaꞌ katān. Ampa wayruun minsan hambuuk tau in makasandal ha murkaꞌ yan.

In Hanggatus Tagkaꞌpatan Tagꞌupat Ngaibu Tau Israil

¹ Pagꞌubus yadtu nākitaꞌ na isab aku upat malāikat nagtitindug duun ha upat pidju sin ālam. Hiyahawiran nila in hangin huyup dayn ha upat pidju sin ālam, ha supaya diꞌ kugdanan sin hangin in ginlupaan iban dagat. Iban ha supaya isab diꞌ kugdanan in manga kakahuyan minsan hambuuk. ² Iban awn isab kītaꞌ ku hambuuk malāikat guwaꞌ dayn ha subangan nagdarā sin hipagsasāp sin Tuhan, amu in buhiꞌ salama-lama. Giyasuran niya in manga upat malāikat, amu in kiyarihilan sin Tuhan kawasa magpakangīꞌ sin lupaꞌ iban dagat. ³ Laung biyaꞌ ha ini sin malāikat kanila, “Ayaw niyu na mulaha in lupaꞌ iban dagat. Ayaw niyu isab mulaha in manga kakahuy-kahuyan minsan hambuuk ha salugay namuꞌ diꞌ pa kasāpan in manga tuktuk sin manga tau daraakun sin Tuhan.” ⁴ Pagꞌubus diyungug ku in taud katān sin kiyasāpan. Awn hanggatus kaꞌpatan tagꞌupat ngaibu dayn ha katān pihak panubuꞌ sin bangsa Israil.

⁵ Dayn ha panubuꞌ hi Yudah awn hangpuꞌ tagduwa ngaibu in kiyasāpan,

dayn ha panubuꞌ hi Rubin hangpuꞌ tagduwa ngaibu,

dayn ha panubuꞌ hi Gad hangpuꞌ tagduwa ngaibu,

⁶ dayn ha panubuꞌ hi Asir hangpuꞌ tagduwa ngaibu,

dayn ha panubuꞌ hi Naptali hangpuꞌ tagduwa ngaibu,

dayn ha panubuꞌ hi Manassi hangpuꞌ tagduwa ngaibu,

⁷ dayn ha panubuꞌ hi Simiyun hangpuꞌ tagduwa ngaibu,

dayn ha panubuꞌ hi Libi hangpuꞌ tagduwa ngaibu,

dayn ha panubuꞌ hi Issakal hangpuꞌ tagduwa ngaibu,

⁸ dayn ha panubuꞌ hi Sibulun hangpuꞌ tagduwa ngaibu,

dayn ha panubuꞌ hi Yusup hangpuꞌ tagduwa ngaibu iban

dayn ha panubuꞌ hi Binjamin hangpuꞌ tagduwa ngaibu.

In Mahadjanaꞌ

⁹ Pagꞌubus yadtu nākitaꞌ na isab aku tau mabanus tuud nagtitipun. Diꞌ maitung in taud nila. In manga tau ini guwaꞌ dayn ha dugaing-dugaing pihak, hulaꞌ, bangsa, iban dugaing-dugaing in bahasa nila. Duun ku sila kītaꞌ nagtitindug ha alupan sin kursi iban sin amu in Anak Bili-bili. Nagjujuba sila katān putiꞌ iban nagdarā sila lukay pakaniya-pakaniya. ¹⁰ Pagꞌubus yadtu diyungug ku sila nagsuwara matanug, nagsama-sama. Laung nila,

“Sanglitun natuꞌ in Tuhan,

amu in limilingkud ha kursi,

iban sin amu in Anak Bili-bili sabab liyappas nila kitaniyu dayn ha manga dusa natuꞌ.”

¹¹ Manjari, kītaꞌ ku in upat malāikat mahal-mahal in lupa, duun nagtitindug ha katilibut sin kursi, siyunuan sin manga nagtatau-maas, ubus ampa sin manga malāikat. Pagꞌubus, ampa in manga malāikat katān simujud simumba ha Tuhan, amu in naglilingkud ha kursi. ¹² Laung nila biyaꞌ ha ini,

“Amin.

Pudjihun, sanglitun, lagguun

iban pagsarang-sukulan natuꞌ in Tuhan salama-lama,

amu in hambuuk-buuk makaingat sin unu-unu katān.

Siya in sangat-kawasa iban amu in tuburan sin kusug katān.

Amin.”

¹³ Sakali, iyasubu aku sin hambuuk nagtatau-maas. Laung niya, “Kaingatan mu ka bang hisiyu in manga tau yan nagjujuba putiꞌ? Iban kaingatan mu ka bang dayn hāin sila yan?”

¹⁴ Simambung aku kaniya. Laung ku, “Diꞌ ku sila kaingatan, Tuwan. Baytai kunuꞌ aku bang hisiyu sila sabab ikaw in makaingat.”

Siyambungan niya aku. Laung niya, “In sila yan amuna in manga bakas nakalabay sin kabinsanaan landuꞌ makalap. In manga juba nila maputiꞌ, pasal in duguꞌ sin Anak Bili-bili amuna in biyaꞌ sapantun tubig piyangdakdak nila sin manga yan + 7:14 Bang sayuhun siyuchi in atay nila kaagi sin duguꞌ hi Īsa. . ¹⁵ Na, hangkan bihaun,

Yan sila duun nagtitindug ha alupan sin kursi sin Tuhan.

Dūm-adlaw wayruun paghali nila maghinang ha lawman sin Tuhan.

Iban in sila yan iyuukuman sin Tuhan, amu in limilingkud ha kursi.

¹⁶ Lāgiꞌ, in sila yan diꞌ na tuud hapdiun atawa uhawun saumul-umul,

iban diꞌ na sila tuud malūs sin suga atawa sin unu-unu na mapasuꞌ.

¹⁷ Sabab in amu in ngiyānan Anak Bili-bili, amu in yaun duun ha alupan sin kursi sin Tuhan, amuna in magꞌupiksaꞌ kanila.

Iban siya in magꞌūhan dumā kanila tudju pa tuburan sin tubig kalkawsal, amu in makarihil kanila kabuhiꞌ iban kasannyangan sin pangatayan nila.

Iban pahiran sin Tuhan in katān luhaꞌ nagtūꞌ dayn ha manga mata nila.”

In Hikapitu Pikit sin Kātas Liyulūn

¹ Manjari iyaknit mayan sin Anak Bili-bili in hikapitu pikit sin kātas liyulūn, magtūy wayruun bahittuk ha lawm surgaꞌ ha lawm sin manga tungaꞌ jām.

² Pagꞌubus, kītaꞌ ku in pitu malāikat, amu in yaun timitindug ha haddarat sin Tuhan. Tiyutupuran sila sangkakala pakaniya-pakaniya.

³ Sakali awn na isab dugaing malāikat miyawn timindug ha daig sin lugal pagkukulbanan hayup. Nagdarā siya panunugtugan bulawan. Dīhilan siya kamanyan mataud, ha supaya in hamut sin kamanyan magmisraꞌ iban sin pagpangayuꞌ duwaa sin manga tau sukuꞌ sin Tuhan. Pagꞌubus, ampa siya miyadtu nanugtug pa lamisahan pagtutugtugan kamanyan, amu in hīnang dayn ha bulawan, duun ha alupan sin kursi. ⁴ Pagꞌubus, in asu sin kamanyan amu in siyunug sin malāikat ha haddarat sin Tuhan, nagmisraꞌ na iban sin pagpangayuꞌ duwaa sin manga tau sukuꞌ sin Tuhan, sartaꞌ nagꞌasu na pa taas simampay pa Tuhan. ⁵ Sakali ini, kiyāꞌ sin malāikat in panugtugan, ampa niya hīpuꞌ sin baga kāyu dayn ha lugal pagtutugtugan kamanyan. Pagꞌubus ampa niya liyaruk pa lawm dunya in baga kāyu. Na, magtūy awn anduhud sin dawgdug iyaagaran sin siꞌnag sin kilat iban awn linug.

In Manga Sangkakala

⁶ Manjari, nagsakap na in pitu malāikat humuyup sin sangkakala diyarā nila pakaniya-pakaniya.

⁷ Sakali ini, hiyuyup na sin hambuuk malāikat, amu in ha unahan, in sangkakala diyarā niya. Na, paghuyup niya, magtūy na nahulug pa lawm dunya in ays iban kāyu naglalamud iban duguꞌ. Paghulug pa lawm dunya, nasunug in hangka-bahagiꞌ sin tūngka-bahagiꞌ sin dunya iban sin hangka-bahagiꞌ sin tūngka-bahagiꞌ sin manga kakahuy-kahuyan sampay katān kaparang-parangan ha lawm sin dunya.

⁸ Pagꞌubus, hiyuyup na isab sin hikaruwa malāikat in sangkakala diyarā niya. Na, paghuyup niya, magtūy awn kītaꞌ ku biyaꞌ dagbus būd malagguꞌ nalalaga in liyaruk pa lawm dagat. Paghulug pa lawm dagat, magtūy in hangka-bahagiꞌ sin tūngka-bahagiꞌ sin dagat nahinang na duguꞌ. ⁹ Manjari, magtūy miyatay in hangka-bahagiꞌ sin tūngka-bahagiꞌ sin unu-unu na buhiꞌ ha lawm sin dagat, iban nagkangīꞌ in hangka-bahagiꞌ sin tūngka-bahagiꞌ sin manga sasakatan ha dagat.

¹⁰ Na, hiyuyup na isab sin hikatū malāikat in sangkakala diyarā niya. Paghuyup niya, magtūy awn kītaꞌ ku hambuuk bituun malagguꞌ nalalaga biyaꞌ tanjuꞌ in nahulug dayn ha taas langit harap madtu pa hangka-bahagiꞌ sin tūngka-bahagiꞌ sin manga sapaꞌ iban tuburan sin tubig. ¹¹ In bituun ini ngiyānan “Mapait” sabab in hangka-bahagiꞌ sin tūngka-bahagiꞌ sin tubig kiyahulugan niya, miyait nahinang na lassun iban mataud in mānusiyaꞌ miyatay pagꞌinum sin tubig yan.

¹² Na, hiyuyup na isab sin hikaupat malāikat in sangkakala diyarā niya. Paghuyup niya, magtūy limindum in hangka-bahagiꞌ sin tūngka-bahagiꞌ sin suga, bulan iban manga bituun. Hangkan ha lawm sin upatka-jām sin hangka-adlaw nanglindum sadja in paghulaꞌ. Damikkiyan ha lawm upatka-jām sin hangka-dūm wayruun sawa sin paghulaꞌ dayn ha langit.

¹³ Pagꞌubus, awn diyungug ku suwara matanug. Himangad aku pa taas. Paghangad ku, kītaꞌ ku in sambulaan naglulupad ha āyan. Namung in sambulaan, laung niya, “Anduꞌ Anduꞌ. Landuꞌ tuud makaluuy in manga mānusiyaꞌ katān ha dunya, sabab landuꞌ tuud makalap in kabinsanaan dumatung kanila bang humuyup na in sangkakala sin manga tū malāikat ha ulihan.”

¹ Pagꞌubus hiyuyup na isab sin hikalima malāikat in sangkakala diyarā niya. Paghuyup niya, kītaꞌ ku in pagtawagun bituun, amu in bakas nahulug dayn ha langit pa dunya. Dīhilan siya sin kunsiꞌ lawang sin lungag tigub-tiguban. ² Sakali iyukab na sin ngiyānan bituun in lungag tigub-tiguban. Pagꞌukab niya, magtūy na gimuwaꞌ in asu dayn ha lawm, biyaꞌ sin asu guwaꞌ dayn ha sunug dakulaꞌ. Pagguwaꞌ sin asu, magtūy nanigidlum in suga. Sampay in katilingkal dunya naninigidlum na sin asu yan. ³ Sakali kītaꞌ ku awn gimuwaꞌ manga ampan-dulu dayn ha lawm sin asu timapuꞌ pa lawm dunya. Piyapanjari sin Tuhan in bisa nila magpanugud biyaꞌ sin kalajangking. ⁴ Sagawaꞌ biyabaytaan sila sin diꞌ hipamula kanila in manga kaparang-parangan, kakahuy-kahuyan atawa sin unu-unu na pananum ha lawm dunya. Amura in hipamula kanila in manga tau, amu in wayruun sāp sin Tuhan ha manga tuktuk nila, amu in pangilāhan ha manga tau sukuꞌ sin Tuhan. ⁵ Malayngkan, biyabaytaan sila diꞌ hipapatay kanila in manga tau ini, saꞌ papananamun sadja kabinsanaan ha lawm lima bulan. In sakit amu in hipananam nila ha manga tau ini, biyaꞌ sin sakit kananaman sin tau bang masugud sin kalajangking. ⁶ Na, ha lawm sin lima bulan kabinsanaan ini, in manga tau ini mabayaꞌ na tuud matay. Sagawaꞌ diꞌ sila tugutan minsan iyaangut nila tuud matay.

⁷ Ampa in dagbus sin manga ampan-dulu ini, biyaꞌ sapantun sin manga kuraꞌ amu in sakap dāhun pa pagbunuan. In manga ū nila, siyasangunan sin biyaꞌ lupa kuruna bulawan, iban in lupa sin manga bayhuꞌ nila, biyaꞌ lupa bayhuꞌ tau. ⁸ In buhuk nila mahabaꞌ biyaꞌ sin buhuk sin manga babai, iban in manga ipun nila biyaꞌ sin ipun sin singaꞌ. ⁹ In daghal nila tiyatamingan sin manga sisik biyaꞌ sapantun basiꞌ. Iban in katingug sin manga pikpik nila biyaꞌ sin lagundak sin manga baanan kalisa, amu sasakatan iyuutung sin manga kuraꞌ amu in dāgan harap pa pagbunuan. ¹⁰ Iban in manga ikug nila isab magpanugud biyaꞌ sin sugud sin kalajangking. Iban in manga ikug nila, amuna in dumihil kabinsanaan ha manga tau ha lawm sin lima bulan. ¹¹ In sultan sin manga ampan-dulu ini, amu in magnakuraꞌ kanila hambuuk saytan, amu in tagkaputan sin lungag tigub-tiguban. In ngān niya bang ha bahasa Hibrani, Abaddun, bang ha bahasa Girik, Apulyun, hāti niya Manglulubu.

¹² Na, duun ha yan tumubtub in kabinsanaan, amu in makauna dumatung pa manga mānusiyaꞌ ha dunya. Sagawaꞌ pagꞌubus yan awn pa duwangka-ginis kabinsanaan dumatung.

¹³ Pagꞌubus yadtu, hiyuyup na isab sin hikaunum malāikat in sangkakala diyarā niya. Paghuyup niya, awn diyungug ku suwara dayn ha upat dugu sin lugal pagtutugtugan kamanyan, amu in hīnang dayn ha bulawan, duun ha alupan sin kursi sin Tuhan. ¹⁴ Namung in suwara pa hikaunum malāikat, amu in nagdarā sin sangkakala. Laung niya, “Hubari na in upat saytan, amu in hiyukutan duun ha daig sin sapaꞌ Alpurati.” ¹⁵ Na, hiyubaran na in upat saytan, sabab in sila ini, asal tiyatagama daakun mamatay ha hangka-bahagiꞌ sin tūngka-bahagiꞌ sin katān mānusiyaꞌ ha dunya ha waktu kiyagantaꞌ sin Tuhan, amu in waktu tuud sin adlaw ini, bulan ini, iban sin tahun ini. ¹⁶ Sakali, diyungug ku in taud sin kasundaluhan nangunguraꞌ amu in ha babaan sin upat saytan. Awn duwanggatus milyun.

¹⁷ Iban ha lawm sin indan ku yaun duun in manga nangunguraꞌ iban sin manga kuraꞌ piyangunguraan nila. In daghal nila tiyatamingan basiꞌ amu in pula biyaꞌ kāyu, bilu malutuꞌ iban biyaning biyaꞌ maylang. In ū sin manga kuraꞌ piyangunguraan nila, biyaꞌ lupa sin ū sin singaꞌ. Iban dayn ha simud sin manga kuraꞌ ini awn magguwaꞌ kāyu, asu, iban maylang nalalaga. ¹⁸ Na, hangka-bahagiꞌ sin tūngka-bahagiꞌ sin manga mānusiyaꞌ ha dunya in miyatay kaagi sin kāyu, asu, iban sin maylang nalalaga, amu in magguwaꞌ dayn ha simud sin manga kuraꞌ. ¹⁹ Iban bukun sadja isab amu in magguwaꞌ dayn ha simud sin manga kuraꞌ in nakamatay ha manga tau, sumagawaꞌ sampay in ikug nila nakamatay da isab ha manga tau. Sabab in ikug nila biyaꞌ hās taga ū, amu in hipangutkut nila ha manga tau.

²⁰ Sumagawaꞌ minsan biyaꞌ na hādtu in hunit sin kabinsanaan, in manga tau nakapin, amu in walaꞌ miyatay sin balaꞌ ini, walaꞌ nila da biyutawanan in manga tuhan-tuhan hīnang sin lima nila. Masi-masi da sila simusumba ha manga saytan iban ha manga barhalaꞌ hīnang dayn ha bulawan, pilak, tumbaga, batu iban kahuy, amu in diꞌ makakitaꞌ, makarungug iban diꞌ makapanaw. ²¹ Lāgiꞌ walaꞌ da tuud napinda in kawl-piil nila. Masi-masi da isab in pagpamunuꞌ iban pagpanghinang-hinang mangīꞌ ha manga tau. Masi-masi da isab in paghinang nila maasihat iban pagtakaw.

In Malāikat iban sin Kātas Asibiꞌ Liyulūn

¹ Sakali ini, nākitaꞌ na isab aku hambuuk malāikat makusug nimaug dayn ha surgaꞌ napuputus sin gabun, iban awn ha taas sin ū niya nagliligung bāngaw. In bayhuꞌ niya magsiꞌnag, biyaꞌ sin suga, iban in biꞌtis niya biyaꞌ sin sapantun hāg nalalaga. ² Nagdarā siya ha lima niya hambuuk kātas asibiꞌ biyubuklad amu in bakas nalulūn. Gīik niya pa babaw dagat in siki niya dapit pa tuu. Ampa in siki niya dapit pa lawa, gīik niya pa ginlupaan. ³ Pagꞌubus ampa siya nagsuwara matanug biyaꞌ sin igul sin singaꞌ. Pagꞌubus niya nagsuwara, magtūy simambag in anduhud sin dawgdug nakapitu. ⁴ Pagdawgdug nakapitu, sūng ku na hisulat in baytaꞌ sin dawgdug kākuꞌ, sagawaꞌ magtūy aku nakarungug suwara dayn ha surgaꞌ, amu agi, “Ayaw mu sulatan in suwara diyungug mu dayn ha dawgdug, amu in imanduhud nakapitu, sabab in yan subay diꞌ hipaingat.”

⁵ Sakali ini, kītaꞌ ku in malāikat, amu in bakas kītaꞌ ku gimiik sin siki niya pa babaw dagat iban ginlupaan. Siyayang niya in tuu niya harap pa langit. ⁶ Siyayang niya in lima niya pa Tuhan buhiꞌ salama-lama iban amu in nagpapanjari sin langit, sin dunya, sin dagat iban na sin katān luun nila. In pagsayang niya sin lima niya, amuna in tandaꞌ sin in Tuhan amu in saksiꞌ sin sabunnal tuud in hibichara niya. Namung siya, laung niya, “Tantu tuud palausun na sin Tuhan in kiyamaksud niya. Diꞌ na tangguhan pa waktu dugaing. ⁷ Sabab bang humuyup na in hikapitu malāikat sin sangkakala niya, tantu magmakbul na in maksud sin Tuhan. In maksud niya ini bakas niya na kiyabaytaꞌ ha manga daraakun niya kanabihan sin masa nakauna yadtu, sagawaꞌ walaꞌ niya piyaingat pa manga tau katān.”

⁸ Sakali diyungug ku na isab nagbalik in suwara dayn ha surgaꞌ. Amu agi sin suwara, “Kadtu kaw kawaa in kātas biyubuklad, amu in bakas nalulūn dayn ha lima sin malāikat, amu in nagtitindug ha babaw dagat iban ha ginlupaan.”

⁹ Na, miyadtu na aku pa malāikat, ampa ku piyangayuꞌ dayn kaniya in kātas asibiꞌ bakas nalulūn. Namung siya kākuꞌ, laung niya, “Kawaa na ampa mu kauna. Magnanam yan malimuꞌ biyaꞌ gulaꞌ ha lawm simud mu, sagawaꞌ pagtūn mu mangaslum in lawm tiyan mu.”

¹⁰ Na, nakawaꞌ ku mayan in kātas asibiꞌ bakas nalulūn dayn ha lima sin malāikat, magtūy ku siyungit pa simud ku. Pagsungit ku, in nanam niya malimuꞌ biyaꞌ gulaꞌ ha lawm simud ku. Sagawaꞌ natūn ku mayan, nangaslum in lawm tiyan ku. ¹¹ Pagꞌubus biyaytaan aku amu agi, “Subay mu hitanyag magbalik in baytaꞌ sin Tuhan pasal sin manga pakaradjaan paratungun niya pa manga tau katān dayn ha dugaing-dugaing hulaꞌ, bangsa, bahasa iban sampay pa manga kasultanan.”

In Duwa Saksiꞌ

¹ Manjari dīhilan aku hambuuk kahuy-kahuy biyaꞌ tukun hipagsukud, ampa aku biyaytaan, amu agi, “Kadtu kaw ampa mu sukura in Bāy sin Tuhan dakulaꞌ iban sin lugal pagkukulbanan hayup. Iban itunga bang pila in jamaa nangangarap pa Tuhan duun. ² Sagawaꞌ ayaw mu na lapaya in halaman sin Bāy sin Tuhan. Ayaw mu na pagsukura, sabab in yan kiyarihil na ha manga tau bukun bangsa Yahudi. In sila ini amu in magpataalluk iban mangdihil tamak pa dāira suchi, amu in dāira sukuꞌ sin Tuhan, ha lawm sin kaꞌpatan tagduwa bulan. ³ Iban daakun ku in duwa saksiꞌ ku, amu in magtatamung kakanaꞌ makasap biyaꞌ sin karut. In sila ini, amu in magpamahalayak iban magpasampay sin Parman sin Tuhan pa mānusiyaꞌ ha lawm sin hangibu duwanggatus tagkaꞌnuman adlaw ini.”

⁴ In duwa saksiꞌ ini amuna in pagꞌiyanun duwa kahuy jaytun iban duwa palitaan, amu in yaun duun ha alupan sin Tuhan, amu in Panghuꞌ sin mānusiyaꞌ katān. ⁵ Bang awn magmaksud mangjahulakaꞌ kanila, tantu mapatay sadja, pasal in duwa saksiꞌ ini awn kāyu magguwaꞌ dayn ha simud nila, amu in makasunug ha hisiyu-siyu kumuntara kanila. Na, hangkan hisiyu-siyu in sumulay manglaug kanila tantu mapatay sadja. ⁶ Lāgiꞌ, in sila yan taga kawasa diꞌ magpatūꞌ sin ulan ha salugay nila nagpapamahalayak sin Parman sin Tuhan. Iban minsan in manga tuburan tubig mapapinda nila da pa duguꞌ dayn ha kusug sin barakat nila. Iban awn da isab kawasa nila magparatung sin unu-unu balaꞌ pa lawm dunya ha unu-unu waktu kabayaan nila.

⁷ Na, bang sila maubus na magpasaplag sin Parman sin Tuhan, dāhun sila magbunuꞌ sin hambuuk sattuwa makabugaꞌ-bugaꞌ, amu in gumuwaꞌ na dayn ha lawm lungag tigub-tiguban. Daugun in duwa saksiꞌ iban mapatay sila kaagi sin sattuwa makabugaꞌ-bugaꞌ ini. ⁸ Pagꞌubus in bangkay nila pasāran na humantal duun ha dān sin dāira bantug, amu in dāira piyaglansangan pa usuk ha Panghuꞌ nila. In manga ngān sin dāira dakulaꞌ ini Sudum iban Misir. Bukun manga ngān niya tuud saꞌ piyaralil. ⁹ Hāti in manga tau katān dayn ha dugaing-dugaing hulaꞌ, pihak, bahasa, iban bangsa mangatud-ngatud sadja sin bangkay nila. Ha lawm sin tūy adlaw iban tungaꞌ, duun na sadja in bangkay nila naghahantal ha dān. Diꞌ hipakubul sin manga tau in bangkay nila. ¹⁰ Na, pagpatay sin duwa nabi ini, in manga tau ha katilingkal dunya magkūg-kuyag tuud, sartaꞌ maglami-lami iban magsarakka pakaniya-pakaniya. Sabab in duwa nabi ini, amuna in nakarā sin kabinsanaan pa manga tau ha dunya.

¹¹ Sumagawaꞌ, paglabay sin tūy adlaw iban tungaꞌ, dīhilan sila napas nagbalik sin Tuhan, iban nagbangun na sila. In tau katān nakakitaꞌ kanila, miyugaꞌ tuud landuꞌ. ¹² Pagꞌubus yadtu nakarungug in duwa nabi suwara matanug dayn ha taas langit. Amu agi sin suwara, “Kari kamu pa taas.” Na, saruun-duun narā sila sin gabun pa taas langit pa lawm surgaꞌ. In manga banta nila duun nangitaꞌ-ngitaꞌ kanila.

¹³ Nagsartaꞌ isab ha kaangkat kanila pa surgaꞌ, magtūy naglinug makusug. Paglinug makusug, nalubu in hangka-bahagiꞌ sin lawm dāira. In siyam kabahagiꞌ way nalubu. Iban awn pitu ngaibu tau in miyatay kaagi sin linug. Ampa in kaibanan nakapin, amu in walaꞌ miyatay, landuꞌ tuud miyugaꞌ. Sabab sin bugaꞌ nila, piyudji nila in Tuhan ha surgaꞌ, amu in tunggal makawasa.

¹⁴ Na, in balaꞌ hikaruwa limabay na, sagawaꞌ in hikatū balaꞌ masuuk na dumatung.

In Hikapitu Sangkakala

¹⁵ Sakali hiyuyup na sin hikapitu malāikat in sangkakala diyarā niya. Paghuyup sin sangkakala, magtūy aku nakarungug suwara matanug dayn ha surgaꞌ. Amu agi sin suwara,

“Na, bihaun matampal na tuud sin in pamarinta ha lawm dunya, sukuꞌ sin Panghuꞌ ta Tuhan iban sin Almasi niya,

amu in mamarinta sampay pa salama-lama.”

¹⁶ Pagꞌubus in manga kawhaan tagꞌupat nagtatau-maas, amu in limilingkud duun ha kursi nila ha alupan sin Tuhan, simujud na simumba pa Tuhan. ¹⁷ Iban amu agi nila,

“Ū, Panghuꞌ namuꞌ, Tuhan, Tuhan sangat-kawasa,

amu in Tuhan diꞌ magkapinda dayn sin tagnaꞌ sampay pa bihaun.

Magsarang-sukul tuud kami kaymu,

sabab piyakitaꞌ mu na sin in ikaw da hambuuk-buuk in sangat kawasa, iban tiyagnaan mu na in pamarinta mu ha lawm dunya.

¹⁸ In manga tau, amu in diꞌ magkahagad kaymu, dimugal tuud kaymu,

sagawaꞌ bihaun amuna in waktu mu magmurkaꞌ isab kanila,

iban manghukum ha manga patay.

Lāgiꞌ amuna isab ini in waktu mu manungbas ha manga daraakun mu,

ha manga kanabihan iban sin tau sukuꞌ mu katāntan,

sibuꞌ da asibiꞌ-dakulaꞌ, amu in nagmamabugaꞌ iban nagꞌaaddat kaymu.

Ini isab in waktu mu kangīun mu in sasukuꞌ sin mangdihil kangīan pa dunya.”

¹⁹ Sakali naukab na in Bāy sin Tuhan ha surgaꞌ, iban ha lawm niya kītaꞌ ku in baul kiyabubutangan sin sulat paljanjian sin Tuhan ha manga tau sukuꞌ niya. Pagꞌukab sin Bāy sin Tuhan, magtūy awn kītaꞌ ku manga siꞌnag sin kilat iyaagaran sin anduhud sin dawgdug. Naglinug iban nagꞌulan ays, matigdaꞌ tuud.

In Babai iban sin Naga

¹ Manjari nākitaꞌ aku hambuuk paltandaan sangat makaajayb gimuwaꞌ duun ha langit. Nākitaꞌ aku hambuuk babai amu in nagtatamung sin biyaꞌ sapantun siꞌnag sin suga. Iban duun siya timitindug ha babaw sin bulan. Iban awn hangpuꞌ tagduwa bituun, amu in biyaꞌ sapantun kuruna, ha taas sin ū niya. ² In babai ini sūng na umanak, hangkan nakatulik sin sakit.

³ Pagꞌubus, awn na isab hambuuk paltandaan makaajayb in gimuwaꞌ duun ha langit. Nākitaꞌ aku hambuuk naga pula landuꞌ dakulaꞌ, pitu in ū iban hangpuꞌ in tanduk iban awn kuruna sin katān ū niya. ⁴ Sakali ini, liyampin sin ikug niya in hangka-bahagiꞌ sin tūngka-bahagiꞌ sin bituun ha taas langit ampa na liyaruk pa lawm dunya. Timindug siya duun ha alupan sin babai amu in sūng magꞌanak ha supaya pagguwaꞌ sin bataꞌ-bataꞌ, magtūy niya makaun. ⁵ Manjari in babai ini imanak na hambuuk bataꞌ-bataꞌ usug, sagawaꞌ walaꞌ da nakaun sin naga. Sabab magtūy in bataꞌ-bataꞌ nabuhat sin Tuhan pa surgaꞌ pa kursi niya. Asal in gantaan sin bataꞌ-bataꞌ ini mamarinta ha katān bangsa ha waktu susūngun. Wayruun makasaggaꞌ kaniya, sabab in pamarinta niya sangat makusug, biyaꞌ hantang basiꞌ diꞌ magkabaliꞌ. ⁶ Sakali pagꞌubus sin babai nagꞌanak, miyaguy siya pa hulaꞌ wayruun tau naghuhulaꞌ, amu in hulaꞌ tiyatagama sin Tuhan kaniya. Duun siya ipatun ha lawm hangibu duwanggatus tagkaꞌnuman adlaw.

⁷ Sakali naawn in pagbunuꞌ ha surgaꞌ. Hi Mikail iban sin manga malāikat ha babaan niya, nagbunuꞌ iban sin naga, amu in nangatu iban sin manga tindug niya. ⁸ Sumagawaꞌ diyaug in naga. Hangkan in siya iban sin manga tindug niya, narūy iban diꞌ na sila manjari humulaꞌ ha lawm surgaꞌ. ⁹ Na, hangkan in naga landuꞌ dakulaꞌ liyaruk na pa guwaꞌ sin surgaꞌ. In siya ini amuna in Hās Sin Masa Nakauna yadtu, amu in pagngānan Iblis atawa Saytan Puntukan. Siya ini in nangakkal ha manga mānusiyaꞌ katān. Biyugit siya pa lawm dunya iban sin katān tindug niya.

¹⁰ Pagꞌubus, nakarungug aku suwara matanug dayn ha surgaꞌ, amu agi,

“Na, bihaun miyabut na in waktu magmakbul in pagpanglappas sin Tuhan ha manga mānusiyaꞌ.

Piyakitaꞌ na bihaun sin Tuhan in kusug sin kawasa niya mamarinta iban sin kapatutan sin Almasi niya.

Sabab in Iblis, amu in dūm-adlaw manglalawag dusa ha manga kataymanghuran natuꞌ,

iban amu in magsusumbung pa Tuhan ha haddarat niya,

kiyalaruk na pa guwaꞌ sin surgaꞌ.

¹¹ Diyaug siya sin manga kataymanghuran natuꞌ

sabab sin duguꞌ sin amu in ngiyānan Anak Bili-bili, amu in naasag ha supaya sila mapuas dayn ha dusa nila.

Damikkiyan, diyaug siya sabab sin kasabunnalan tiyanyag nila,

lāgiꞌ atas nila piyaglillaꞌ in duguꞌ-nyawa nila sampay pa kamatay.

¹² Na, hangkan pagkūg-kuyag kamu sasukuꞌ sin yan duun ha lawm surgaꞌ,

amu in kamu katān naghuhulaꞌ duun.

Sagawaꞌ landuꞌ tuud makaluuy kamu manga naghuhulaꞌ ha lawm dunya iban dagat,

sabab yaun na nimaug mawn kaniyu in Iblis.

Landuꞌ tuud siya diyurugalan

pasal kaingatan niya na sin masuuk na tumubtub in waktu kiyagantaꞌ kaniya sin Tuhan.”

¹³ Sakali, nakasayu mayan in naga sin kiyahulug na siya pa lawm dunya, iyapas niya in babai amu in nagꞌanak bataꞌ-bataꞌ usug. ¹⁴ Sagawaꞌ piyatulunan sin Tuhan in babai ini duwa pikpik sin sambulaan dakulaꞌ, ha supaya siya makalupad pa hulaꞌ wayruun tau naghuhulaꞌ, pa hulaꞌ tiyatagama kaniya. In hulaꞌ ini, amuna in pagꞌipatan kaniya ha lawm sin tū tahun iban tungaꞌ ha supaya siya diꞌ magmula kaagi sin naga. ¹⁵ Manjari, ini nagpaguwaꞌ tubig mataud tuud in naga dayn ha simud niya, ha supaya hianud in babai. ¹⁶ Daypara tiyabang sin gumi in babai ini. Nasipak nagduwa in gumi sartaꞌ naglungag malawm. Na, imanud harap pa lawm lungag in katān tubig gimuwaꞌ dayn ha simud sin naga. ¹⁷ Na, diyugalan tuud in naga ha babai ini. Pasal sin dugal niya, diyā niya nagbunuꞌ in katān anak-apuꞌ sin babai ini, amu in sasukuꞌ sin katān nagkakahagad ha daakan sin Tuhan iban namamawgbug sin kasabunnalan kiyahinduꞌ hi Īsa. ¹⁸ Sakali duun na timindug in naga ha higad dagat.

In Duwa Sattuwa Talun

¹ Manjari ini kītaꞌ ku awn gimuwaꞌ hambuuk sattuwa talun dayn ha lawm dagat. In sattuwa ini pitu in ū iban hangpuꞌ in tanduk niya. In manga tanduk niya siyasangunan kuruna, iban in manga ū niya siyusulatan sin ngān pangkal pa Tuhan. ² In sattuwa talun kītaꞌ ku ini biyaꞌ lupa halimaw, iban in siki niya biyaꞌ siki sin sattuwa baluwang. Ampa in simud niya biyaꞌ sin simud sin singaꞌ. Kiyawakilan siya sin naga dīhilan kusug iban kawasa niya makapagꞌagi ha lawm dunya. ³ In hambuuk ū sin sattuwa talun ini bakas piyalian malawm biyaꞌ lupa diꞌ na kaulian, sagawaꞌ in paliꞌ niya makamula ini kiyaulian da. Hangkan in manga mānusiyaꞌ katān ha dunya nahaylan kaniya iban nagkahagad na kaniya. ⁴ In tau katān simumba na pa naga, sabab dīhilan niya na kawasa in sattuwa talun yaun. Siyumba nila da isab in sattuwa talun. Laung nila, “Wayruun makaliyu dayn ha sattuwa talun. Wayruun makaatu kaniya.”

⁵ Sakali diyūlan in sattuwa talun ini magbayaꞌ-bayaꞌ ha dunya ha lawm kaꞌpatan tagduwa bulan. Iban diyūlan siya magꞌabbu, magbichara pangkal pa Tuhan. ⁶ Hangkan in sattuwa talun ini namung na sadja pangkal pa Tuhan. Siyuknaan niya in ngān sin Tuhan iban hulaan niya, amu in surgaꞌ, iban sin sasukuꞌ sin maghuhulaꞌ ha surgaꞌ. ⁷ Iban diyūlan da isab siya mamunuꞌ ha manga tau sukuꞌ sin Tuhan, iban daugun niya sila. Kiyarihilan pa isab siya kawasa makapagbayaꞌ-bayaꞌ ha manga tau katān dayn ha dugaing-dugaing pihak, hulaꞌ, bahasa iban bangsa. ⁸ Na, in manga mānusiyaꞌ katān ha lawm dunya sumumba na ha sattuwa ini, amu in sasukuꞌ sin walaꞌ kiyasulat in ngān nila ha Kitab sin amu in ngiyānan Anak Bili-bili. Dayn ha tagnaꞌ kaawn sin dunya asal siyusulat duun in ngān sin tau, amu in dihilan niya kabuhiꞌ salama-lama. In ngiyānan Anak Bili-bili ini, amuna in bakas biyunuꞌ sin manga tau.

⁹ Na, dungug kamu, bang kamu taga taynga da.

¹⁰ Minsan hisiyu in tau, bang kiyatakdil sin Tuhan mahinang siya banyagaꞌ,

tantu da mahinang siya banyagaꞌ.

Iban bang kiyatakdil sin Tuhan kaniya mapatay kaagi sin puddang,

tantu mapatay da siya kaagi sin puddang.

Hangkan in kamu manga sukuꞌ sin Tuhan, subay kamu magpakusug iban magpahugut sin īman niyu.

¹¹ Manjari ini, awn na isab kītaꞌ ku hambuuk sattuwa talun dugaing gimuwaꞌ dayn ha lawm sin gumi. Awn duwa tanduk niya asibiꞌ biyaꞌ lupa sin tanduk sin Anak Bili-bili, sagawaꞌ in suwara niya biyaꞌ sin suwara sin naga. ¹² In sattuwa ini kiyawakilan iban kiyarihilan kawasa kaagi sin sattuwa, amu in gimuwaꞌ nakauna, magpapanaw sin pamarinta niya. Na, liyugus sin sattuwa hikaruwa in katān mānusiyaꞌ ha dunya sumumba ha sattuwa amu in gimuwaꞌ nakauna, iban amu in bakas ambayaꞌ matay pasal sin paliꞌ niya malawm saꞌ kiyaulian. ¹³ Lāgiꞌ in sattuwa hikaruwa ini nakahinang sin manga makaajayb, biyaꞌ na sin magpanaug kāyu dayn ha langit pa lawm dunya, ha duun piyangingitaꞌ-ngitaan sin manga tau. ¹⁴ Na, in manga tau katān ha dunya kiyaakkalan sin sattuwa hikaruwa kaagi sin manga hinang niya makaajayb, amu in nahinang niya ha babaan sin sattuwa amu in nakauna gimuwaꞌ dayn kaniya. Diyaak niya in tau katān ha dunya maghinang sin barhalaꞌ hipaghulmat ha sattuwa nakauna gimuwaꞌ, amu in bakas liyagut sin puddang sagawaꞌ kiyaulian da. ¹⁵ Iban kiyarihilan pa isab in sattuwa hikaruwa kawasa dumihil napas ha barhalaꞌ, amu in hangka-dagbus sin sattuwa nakauna gimuwaꞌ. Hangkan in barhalaꞌ ini makabichara iban makapagꞌuldin magpapatay ha sasukuꞌ sin manga tau diꞌ sumumba kaniya. ¹⁶ Iban nagdaak siya subay sāpan in tuu iban tuktuk sin tau katān, sibuꞌ da manga tau balkanan iban bukun, miskin iban dayahan, īpun iban bukun. ¹⁷ Minsan hisiyu in tau, bang wayruun sāp niya, diꞌ makabī atawa makapagdagang unu-unu na. In sāp ini amuna in ngān sin sattuwa atawa sin umbul amu in hātihan sin ngān niya.

¹⁸ In tau malawm in panaliꞌ iban panghāti niya, makataliꞌ siya bang unu in hātihan sin umbul sin sattuwa, pasal ngān sin hambuuk tau in hātihan niya. In umbul ini unum ngagatus kaꞌnuman tagꞌunum.

In Anak Bili-bili iban sin Manga Tau Sukuꞌ Niya

¹ Pagꞌubus, imatud na isab aku nagbalik. Pagꞌatud ku, kītaꞌ ku in amu in ngiyānan Anak Bili-bili duun nagtitindug ha Būd Siyun. Iban yaun da isab miyamagad kaniya in hanggatus kaꞌpatan tagꞌupat ngaibu tau. In manga tau ini siyusulatan in manga tuktuk nila sin ngān sin Anak Bili-bili iban sin ngān sin Tuhan, Amaꞌ niya. ² Iban nakarungug aku suwara dayn ha surgaꞌ, biyaꞌ sin lagublub sin tubig anud dayn ha taas, amu in busay dakulaꞌ, iban anduhud sin dawgdug. Iban in suwara sin kalangan diyungug ku, biyaꞌ da isab sin luuy sin tunis dayn ha manga tau magsama-sama magbibiyula. ³ In hanggatus kaꞌpatan tagꞌupat ngaibu yaun nagtitindug ha alupan sin kursi sin Tuhan, sin upat malāikat mahal-mahal in lupa, iban sin manga nagtatau-maas. Iban nagkalang sila sin baꞌgu kalangan, amu in sila da in makaingat, sabab in sila ini amu in napīꞌ dayn ha lawm dunya liyukat dayn ha ukuman sin Saytan Puntukan. ⁴ Iban in manga tau ini way sammal-sammal nila pa Tuhan. Ibārat sila subul diꞌ maghinang mangīꞌ iban sin manga babai. In kasuchi sin atay nila biyaꞌ sapantun lanuꞌ sin budjang walaꞌ kiyabaꞌtalan. Miyamagad sila pakain-pakain in Anak Bili-bili. Sila ini in manga napīꞌ sin Tuhan dayn ha katān mānusiyaꞌ ha dunya, iban liyukat niya dayn ha ukuman sin Saytan Puntukan. Iban sila in muna nahinang sukuꞌ sin Tuhan iban sin amu in ngiyānan Anak Bili-bili. ⁵ Wayruun unu-unu puting in makawaꞌ dayn kanila, iban wayruun da isab dusa in kabaakan duun kanila.

In Tū Malāikat

⁶ Pagꞌubus yadtu, nākitaꞌ na isab aku hambuuk malāikat naglulupad ha taas sin āyan. Nagdarā siya sin Baytaꞌ Marayaw, amu in amānat diꞌ magkapinda kasaumulan. In amānat ini amu in hitanyag niya pa manga mānusiyaꞌ katān ha dunya dayn ha dugaing-dugaing bangsa, pihak, bahasa, iban hulaꞌ. ⁷ Nagsuwara siya matanug, laung niya, “Pagmabugaꞌ kamu ha Tuhan, iban pudjiha niyu siya, sabab dimatung na in waktu niya manghukum ha manga mānusiyaꞌ katān. Pagtaat kamu pa Tuhan pasal siya in nagpapanjari sin langit, sin dunya, sin dagat, iban na sin manga tuburan sin manga tubig.”

⁸ Sakali miyurul na isab in hikaruwa malāikat sartaꞌ namung na, amu agi, “Nagkangīꞌ-ngīꞌ na tuud in pagꞌiyanun hulaꞌ Babilun, amu in dāira landuꞌ bantug. Sabab in Babilun ini, amu in biyaꞌ sin sapantun babai mangīꞌ. Narā niya in manga tau katān minum sin alak amu in makahilu tuud, ha supaya sila magad kaniya huminang sin manga kalumuan.”

⁹ Pagꞌubus, miyurul na isab kanila in hikatū malāikat sartaꞌ nagsuwara siya matanug, amu agi, “Hisiyu-siyu in sumumba ha sattuwa talun amu in kiyaulian in ū niya, atawa sumumba ha dagbus niya amu in iyukkil hīnang barhalaꞌ, iban sin manga amu in tumaymaꞌ sin sāp niya ha tuktuk atawa lima nila, ¹⁰ tantu tuud pagmulkaan sila sin Tuhan. Makainum sila sin alak amu in asal na hiyahayn pa sawan amu in pagtawagun, Murkaꞌ sin Tuhan. Ampa in kusug sin murkaꞌ sin Tuhan kanila, biyaꞌ sin sapantun alak way lamud niya, amu in makamula bang inumun. Lāgiꞌ in manga tau ini katān ajab-ajabun tuud kaagi sin kāyu iban sin maylang nasusuliyab. Iban ha saꞌbu nila iyaajab-ajab, duun sila pangitaꞌ-ngitaan sin manga malāikat iban sin Anak Bili-bili. ¹¹ Iban diꞌ maghundung in pagꞌasu sin kāyu hipaniksaꞌ kanila saumul-umul. Dūm adlaw, duun sila ajab-ajabun sin kāyu way paghundung, sasukuꞌ sin simumba ha sattuwa talun iban sin dagbus niya, amu in iyukkil hīnang barhalaꞌ, sasukuꞌ isab sin tau katān piyasāpan nila in manga tuktuk atawa lima nila sin ngān sin sattuwa talun.”

¹² Hangkan in kamu sukuꞌ sin Tuhan, amu in nagkakahagad sin daakan niya iban namamawgbug kan Īsa, subay niyu pahugutun in īman niyu.

¹³ Sakali nakarungug aku suwara dayn ha surgaꞌ, amu agi, “Sulatan ini. Hisiyu-siyu in matay tagnaan dayn ha waktu bihaun ha pasal sin pagbawgbug nila ha Panghuꞌ, kumūg in lawm atay nila.”

Simambag in Rū sin Tuhan amu agi, “Tantu tuud kumuyag sila, pasal makahali-hali na sila dayn ha pagbuluk-binasa nila ha pasal sin Panghuꞌ, sabab in hinang nila marayaw, amuna in makarihil kanila palꞌuntungan bang sila didtu na ha surgaꞌ.”

In Pagꞌani ha Dunya

¹⁴ Pagꞌubus, imatud na isab aku nagbalik. Pagꞌatud ku, nākitaꞌ aku gabun putiꞌ iban awn naglilingkud duun biyaꞌ lupa tau. Siyasangunan kuruna bulawan in ū niya, iban nagdarā sasanggut mahayt ha lima niya. ¹⁵ Sakali awn hambuuk malāikat gimuwaꞌ dayn ha Bāy sin Tuhan, ampa nagsuwara pa amu in naglilingkud ha gabun. Matanug in suwara niya. Amu agi, “Tagnaꞌ na kaw pagꞌani iban sin sasanggut mu yan, pasal naabut na in musim sin pagꞌani ha dunya.” ¹⁶ Magtūy na tuud liyabaran sin amu in naglilingkud ha gabun in dunya kaagi sin sasanggut niya. Na, in katān aanihun ha dunya, natipun niya na.

¹⁷ Sakali nākitaꞌ na isab aku hambuuk malāikat dugaing gimuwaꞌ dayn ha Bāy sin Tuhan ha surgaꞌ, nagdarā da isab sasanggut mahayt.

¹⁸ Pagꞌubus, awn na isab hambuuk malāikat gimuwaꞌ dayn ha Bāy sin Tuhan ha surgaꞌ dayn ha daig lamisahan pagtutugtugan kamanyan. Siya in nagjajaga sin kāyu duun. Nagsuwara siya matanug pa malāikat, amu in nagdarā sin sasanggut mahayt. Amu agi, “Sangguta na in punguran anggul ha dunya dayn ha batangan niya, sabab in manga anggul hinug na.” ¹⁹ Magtūy na liyabaran sin malāikat in dunya kaagi sin sasanggut niya. Na, nautud na in manga bunga anggul dayn ha batangan niya. Pagꞌubus tīpun niya ampa niya liyaruk pa lawm pagpupugaan anggul. (Na, in hāti sin dalil ini, biyaꞌ ha ini in kumugdan ha manga tau pagmulkaan sin Tuhan.) ²⁰ Na, in manga anggul piyugaꞌ ha pagpupugaan didtu ha guwaꞌ sin dāira. Pagpugaꞌ sin anggul, duguꞌ in gimuwaꞌ, iban in layuꞌ sin iyanuran manga tūnggatus usuk batu. Iban in lawm sin duguꞌ tubtub pa manga kakkang sin manga kuraꞌ.

In Manga Malāikat amu in Magparatung sin Murkaꞌ

¹ Manjari awn na isab kītaꞌ ku hambuuk paltandaan makabugaꞌ ha taas langit iban sangat makahaylan. Awn pitu malāikat amu in nagdarā sin pitu ginis balaꞌ. In pitu balaꞌ ini amuna in kahinapusan sin manga balaꞌ, sabab amura yan in kahinapusan sin murkaꞌ sin Tuhan.

² Sakali kītaꞌ ku na isab in katiluagan, amu in biyaꞌ sapantun dagat matilag biyaꞌ samin, magsiꞌnag biyaꞌ kāyu. Kītaꞌ ku da isab in manga tau, amu in walaꞌ miyagad sin sasat sin sattuwa talun, iban walaꞌ simumba kaniya iban sin barhalaꞌ dagbus niya. Iban sila in manga walaꞌ nagpasāp ha tuktuk atawa lima nila sin umbul, amu in hātihan sin ngān sin sattuwa talun. Duun sila nagtitindug ha daig sin katiluagan, amu in biyaꞌ sapantun dagat, malinaw iban masawa biyaꞌ samin. Nagdarā sila biyula pakaniya-pakaniya, amu in dīhil kanila sin Tuhan. ³ Nagkalang sila sin kalangan hi Musa, amu in daraakun sin Tuhan, iban kalangan sin Anak Bili-bili. Biyaꞌ ha ini in lapal kabtangan sin kalangan nila,

“Ū, Panghuꞌ, ikaw in Tuhan hambuuk-buuk sangat-kawasa.

Makawasa iban makahaylan in manga hinang mu.

Ikaw in Sultan sin manga kabangsa-bangsahan.

In katān maksud mu mabuntul iban maamu.

⁴ In katān magmabugaꞌ kaymu, Panghuꞌ.

Wayruun in diꞌ sumanglit sin ngān mu.

Ikaw da in hambuuk-buuk Mahasuchi.

In katān kabangsahan magtipun da mawn kaymu

iban sumumba kaymu.

Sabab kīkitaꞌ sin tau katān, in manga hinang mu iban sin kaādilan mu.”

⁵ Pagꞌubus ini kītaꞌ ku naukab in Bāy sin Tuhan ha surgaꞌ, iban kītaꞌ ku in bilik ha lawm amu in pagtawagun Bilik Mahasuchi, amu in luggiyaꞌ ha Tuhan. ⁶ Sakali in pitu malāikat, amu in nagdarā sin pitu ginis balaꞌ, gimuwaꞌ na dayn ha lawm Bāy sin Tuhan ha surgaꞌ. In tamungun nila makasilaw na sin putiꞌ. Wayruun tamak atawa lummiꞌ niya. Iban awn kandit bulawan līlibud ha manga daghal nila. ⁷ Pagguwaꞌ nila, tiyupuran sila gangsaꞌ bulawan pakaniya-pakaniya kaagi sin hambuuk dayn ha upat malāikat mahal-mahal in lupa. In manga pitu gangsaꞌ bulawan ini nahihipuꞌ sin murkaꞌ sin Tuhan, amu in Tuhan buhiꞌ salama-lama. ⁸ Na, in Bāy sin Tuhan nahipuꞌ na sin asu dayn ha haddarat sin Tuhan, amu in magpakitaꞌ sin sahaya iban kawasa niya. Wayruun makasūd pa lawm ha salugay diꞌ maubus panaugun sin pitu malāikat in pitu ginis balaꞌ.

In Pitu Gangsaꞌ Hīpuꞌ sin Murkaꞌ sin Tuhan

¹ Manjari awn diyungug ku suwara matanug dayn ha Bāy sin Tuhan pa manga pitu malāikat. Amu agi sin suwara, “Kadtu na kamu, ampa niyu asagan na pa dunya in luun sin pitu gangsaꞌ yan, amu in murkaꞌ sin Tuhan ha dunya.”

² Na, iyasag na madtu sin malāikat ha unahan in balaꞌ ha lawm sin gangsaꞌ diyarā niya pa ginlupaan. Pagꞌasag sin balaꞌ, saruun-duun giyuwaan panyakit mabahuꞌ iban masakit in manga sasukuꞌ sin taga sāp sin sattuwa ha tuktuk atawa ha lima nila, iban sin manga amu in simumba sin dagbus niya.

³ Pagꞌubus, iyasag na isab sin hikaruwa malāikat in balaꞌ ha lawm sin gangsaꞌ diyarā niya pa lawm dagat. Pagꞌasag sin balaꞌ, saruun-duun in dagat nahinang duguꞌ biyaꞌ duguꞌ sin tau patay. Na, in unu-unu katān buhiꞌ ha lawm sin dagat miyatay.

⁴ Na, iyasag na isab sin hikatū malāikat in balaꞌ ha lawm sin gangsaꞌ diyarā niya pa manga kasubaan iban tuburan sin manga tubig. Na, saruun-duun nahinang duguꞌ. ⁵ Sakali diyungug ku nagsuwara in malāikat, amu in tagkaputan sin manga tubig. Amu agi,

“Ū Tuhan Mahasuchi, amu in Tuhan diꞌ magkapinda

dayn sin tagnaꞌ sampay pa salama-lama,

mabuntul tuud in hukuman mu ha manga mānusiyaꞌ ini.

⁶ Sila na yan in bakas namunuꞌ ha manga tau sukuꞌ sin Tuhan iban ha manga nagdarā sin Parman mu. Sila in nagꞌasag sin duguꞌ nila.

Hangkan bihaun dīhilan mu sila duguꞌ inumun. Na, amu yan in katutūpan hitungbas kanila.”

⁷ Sakali nakarungug na isab aku suwara dayn ha lugal pagkukulbanan. Amu agi sin suwara:

“Ū Panghuꞌ, Tuhan sangat-kawasa,

tartantu tuud mabuntul iban maamu in hukuman mu ha manga mānusiyaꞌ.”

⁸ Pagꞌubus yadtu kītaꞌ ku iyasag sin hikaupat malāikat in balaꞌ ha lawm sin gangsaꞌ diyarā niya pa suga. Manjari kimalap tuud in pasuꞌ sin suga nanglūs ha manga tau. ⁹ Na, nalūs na in manga tau kaagi sin pasuꞌ sin suga makalap. Dayn ha sabab yan namung na sila pangkal pa Tuhan, amu in nagkabayaan nagparatung kanila sin manga balaꞌ. Malayngkan walaꞌ nila da biyutawanan in manga hinang nila mangīꞌ iban walaꞌ nila da liyagguꞌ in Tuhan.

¹⁰ Manjari iyasag na sin hikalima malāikat in balaꞌ ha lawm sin gangsaꞌ diyarā niya pa kursi amu in lilingkuran sin sattuwa talun, amu in guwaꞌ dayn ha lawm dagat. Pagꞌasag sin balaꞌ, saruun-duun nanigidlum in katilingkal sin hulaꞌ piyamamarintahan sin sattuwa talun. Nakutkut sin manga tau agad kaniya in manga dilaꞌ nila, sabab sin sakit kiyananaman nila. ¹¹ Iban namung na sila pangkal pa Tuhan, amu in ha surgaꞌ, sabab sin sakit iban sin panyakit dimatung pa baran nila. Sagawaꞌ walaꞌ nila da biyutawanan in manga hinang nila mangīꞌ.

¹² Sakali iyasag na sin hikaunum malāikat in balaꞌ ha lawm sin gangsaꞌ diyarā niya pa sapaꞌ dakulaꞌ pagtawagun Alpurati. Pagꞌasag sin balaꞌ, magtūy tiyahayan in sapaꞌ, amu in nahinang labayan tiyagama ha manga sultan dayn ha hulaꞌ dapit pa subangan. ¹³ Pagꞌubus yadtu nākitaꞌ aku tū saytan, amu in biyaꞌ lupa ambak, gimuwaꞌ dayn ha simud sin naga, dayn ha simud sin sattuwa talun, iban dayn ha simud sin nabi bukun bunnal. ¹⁴ In sila ini saytan landuꞌ jīlakaꞌ, makahinang sin manga makaajayb. Iban in sila ini katū, madtu pa manga kahulaꞌ-hulaan magpatibuuk sin manga kanakuraan sin dunya papaggapiun mangatu ha Tuhan ha waktu kiyagantaꞌ niya, amu in pagtawagun Adlaw sin Tuhan, adlaw Makabugaꞌ, (sabab duun ha adlaw yan hipakitaꞌ sin Tuhan Mahatinggi in kusug sin kawasa niya).

¹⁵ Sakali nagsuwara hi Īsa, laung niya, “Dungug kamu. In aku ini mari kaniyu ha waktu diꞌ niyu mapikil mawn aku. Sabab in pagdatung ku biyaꞌ sapantun sin pagsūd sin hambuuk sugarul pa lawm bāy niyu. Kūgan tuud in manga tau amu in abutan ku batiꞌ nagtatagad kākuꞌ iban sakap na sampay pa manga tamungun nila, pasal diꞌ sila masipug minsan sila gumuwaꞌ pa katauran sin tau.”

¹⁶ Na, natipun na sin tū saytan in manga kanakuraan mawn pa hulaꞌ pagtawagun Armagiddun ha bahasa Hibrani.

¹⁷ Manjari, iyasag na sin hikapitu malāikat in balaꞌ ha lawm sin gangsaꞌ diyarā niya pa āyan. Magtūy awn suwara matanug gimuwaꞌ dayn ha kursi ha lawm sin Bāy sin Tuhan. Amu agi, “Na, natangbus na.” ¹⁸ Sakali magtūy awn kītaꞌ ku manga siꞌnag sin kilat iyaagaran sin anduhud sin dawgdug, iban naglinug sangat tuud makusug. Wayruun linug limiyu in kusug dayn ha yan dayn sin tagnaꞌ kapaawn ha mānusiyaꞌ. Dayn ha katān linug, amuna yan in mangīꞌ tuud. ¹⁹ Na, magtūy nabuak in lupaꞌ sin dāira landuꞌ bantug iban nabahagiꞌ nagtū. Iban nagkangīꞌ da isab in manga dāira ha kahulaꞌ-hulaan. Walaꞌ liyupa sin Tuhan in katān karusahan sin amu in pagꞌiyanun hulaꞌ Babilun amu in landuꞌ bantug. Na, hangkan piyainum sin Tuhan sin alak makusug ha lawm sawan niya. Hāti niya piyananam niya in Babilun sin murkaꞌ niya dakulaꞌ. ²⁰ Lāgiꞌ, in katān kapūꞌ-pūan iban kabūd-būran, naubus nalanyap dayn ha kiyabubutangan nila. ²¹ Iban iyulanan tubig batu atawa ays in manga mānusiyaꞌ. In buggat sin hambuuk tubig batu manga kayꞌman kilu. Na, dayn ha pasal ini, in manga tau namung na pangkal pa Tuhan, sabab sangat nakalanduꞌ in balaꞌ dimatung kanila.

In Bantug Babai Mangīꞌ

¹ Manjari, in hambuuk dayn ha manga pitu malāikat, amu in manga nagdarā gangsaꞌ, miyawn kākuꞌ. Laung niya kākuꞌ, “Kari kaw, hipakitaꞌ ku kaymu bang biyaꞌ diin in hukuman iban kasiksaan hiparatung ha amu in pagtawagun bantug babai mangīꞌ. In hāti niya amuna in dāira landuꞌ bantug nagbubutang ha daig sin manga kasubaan. ² In manga kanakuraan ha dunya miyagad himinang kamaasihatan iban sin bantug babai mangīꞌ ini. Iban in manga tau ha dunya miyagad simingud sin manga hinang niya mangīꞌ. Biyaꞌ sila sin ibārat hambuuk tau nahilu sin alak, amu in way sipug huminang sin unu-unu mangīꞌ.”

³ Sakali hiyūp na isab aku sin Rū sin Tuhan, sartaꞌ diyā aku sin malāikat pa hulaꞌ paslangan mahunit paghulaan sin tau. Duun ku kītaꞌ in hambuuk babai nangunguraꞌ ha taas sin sattuwa talun pula. In sattuwa talun ini pitu in ū niya, iban hangpuꞌ in tanduk niya. Iban in katilibut sin baran niya, siyusulatan sin manga ngān amu in pangkal pa Tuhan. ⁴ In babai yaun nagbabadjuꞌ taluk iban pula. Iban natutugub siya sin pamulawan, manga palmata mahargaꞌ iban manga mussaꞌ. Nagdarā siya ha lima niya sawan bulawan hipuꞌ sin amu in pagbahasahun manga kaharaman iban kalumuan nahinang niya. ⁵ Iban in tuktuk niya siyusulatan sin manga kabtangan gulalan kaniya, amu in malawm in maana niya. Ini in gulalan kaniya,

Dāira Babilun Bantug.

Puunan sin Manga Babai Mangīꞌ.

Tuburan sin Kaharaman iban Kalumuan.

⁶ Iban kītaꞌ ku in babai ini nahihilu, sabab mataud nainum niya duguꞌ sin manga tau sukuꞌ sin Tuhan, amu in manga tau miyatay sabab-karnaꞌ sin pagbawgbug nila kan Īsa.

Pagkitaꞌ ku kaniya nahaylan tuud aku. ⁷ Na, iyasubu aku sin malāikat. Laung niya, “Maytaꞌ kaw nahaylan? Bihaun, baytaan ta na kaw sin hātihan sin babai kītaꞌ mu iban sin sattuwa talun piyangunguraan niya, amu in taga ū pitu iban hangpuꞌ tanduk. ⁸ In sattuwa talun kītaꞌ mu, bakas buhiꞌ sagawaꞌ bihaun patay na. Malayngkan, bukun na malugay gumuwaꞌ da siya yan dayn ha lawm sin lungag tigub-tiguban. Sagawaꞌ pagguwaꞌ niya, duun na in katubtuban niya sabab magkangīꞌ na tuud siya. Na, mahaylan in manga tau ha dunya, amu in walaꞌ kiyasulat dayn sin tagnaꞌ kaawn sin dunya in manga ngān nila ha Kitab, amu in piyagsulatan sin ngān sin katān tau amu in dihilan kabuhiꞌ salama-lama. Landuꞌ sila mahaylan bang sila makakitaꞌ sin sattuwa talun, sabab in sattuwa talun ini bakas na miyamatay, sakali nabuhiꞌ na isab nagbalik.

⁹ “In tau malawm in panaliꞌ iban pangingat niya makahāti sin maana sin bichara ini. In hātihan sin pitu ū sin sattuwa talun, pitu būd, amu in lingkuran sin babai mangīꞌ. Iban awn pa isab hātihan niya dugaing. In pitu ū, hāti niya, pitu sultan. ¹⁰ Dayn ha manga pitu sultan ini, in lima, bakas na nakapagsultan. In hambuuk amu in nagsultan bihaun. Ampa in hikapitu, amu in way pa gimuwaꞌ, amuna in magsultan ha susūngun, sagawaꞌ hangkarayꞌ da in pagsultan niya. ¹¹ Iban in sattuwa talun amu in bakas buhiꞌ iban patay na bihaun, amuna in hikawalu sultan. In siya ini bakas hambuuk dayn ha manga pitu sultan, amu in nabuhiꞌ nagbalik. Sagawaꞌ awn katubtuban niya, sabab in siya ini kumangīꞌ da tuud.

¹² “Ampa in hangpuꞌ tanduk kītaꞌ mu, in hāti niya hangpuꞌ sultan, amu in walaꞌ pa nakapagsultan. In hangpuꞌ sultan ini iban sin sattuwa talun karihilan kawasa magsultan, sagawaꞌ dayꞌ-dayꞌ da in pagsultan nila. ¹³ Lāgiꞌ naghambuuk pikilan in hangpuꞌ sultan ini sin hirihil nila in kusug iban kawasa nila ha sattuwa talun. ¹⁴ Iban bunuun nila in amu in ngiyānan Anak Bili-bili. Sagawaꞌ daugun sila sin Anak Bili-bili iban sin manga tau napīꞌ sukuꞌ niya amu in tiyawag mawn kaniya, amu in walaꞌ nagbaluba in pagꞌagad kaniya. Iban hangkan daugun, sabab in Anak Bili-bili amuna in Panghuꞌ sin manga katān Panghuꞌ iban Sultan sin katān kasultanan.”

¹⁵ Namung pa isab in malāikat kākuꞌ. Laung niya, “In manga kasubaan kītaꞌ mu amu in lugal lilingkuran sin babai mangīꞌ, in hātihan niya, manga tau dayn ha dugaing-dugaing hulaꞌ, bangsa, pihak, iban bahasa. ¹⁶ Iban in hangpuꞌ sultan, amu in diyalil hangpuꞌ tanduk kītaꞌ mu, munsi ha babai mangīꞌ. Damikkiyan in sattuwa talun munsi da isab ha babai mangīꞌ. Kawaun nila dayn kaniya in unu-unu katān pangaltaꞌ niya. Tangtangan nila in unu-unu katān ha baran niya. Kaunun nila sampay unud niya iban sunugun nila in unu-unu makapin. ¹⁷ Na, hangkan nila mahinang in biyaꞌ ha ini, pasal dīhilan sila sin Tuhan sin pamikil ini, ha supaya maagad in kabayaan niya. Hangkan na magtaayun sila dumihil sin kawasa nila ha sattuwa talun mamarinta sampay maabut in waktu maagad in manga bichara kiyaparman sin Tuhan. ¹⁸ In babai kītaꞌ mu, in hātihan niya hambuuk dāira bantug, amu in taga kawasa iban makapagbayaꞌ ha manga katān kasultanan ha dunya.”

In Paglubu sin Hulaꞌ Babilun

¹ Pagꞌubus ini nākitaꞌ na isab aku hambuuk malāikat naug dayn ha lawm surgaꞌ. Dakulaꞌ in kawasa sin malāikat ini, iban in sahaya niya nakarihil sawa ha katilingkal dunya. ² Magtūy na tuud siya nagsuwara matanug. Amu agi,

“Nagkangīꞌ-ngīꞌ na tuud in hulaꞌ Babilun, amu in dāira landuꞌ bantug.

Nahinang na hulaan sin manga saytan

iban pagtutungguan sin manga kajīn-jīnan.

Iban nahinang na pugaran sin manga kamanuk-manukan siyasaytan kaastulan tuud sin tau.

³ Sabab in pagꞌiyanun Babilun ini, amu in biyaꞌ sin sapantun babai mangīꞌ, piyaikag niya in manga tau katān

magad huminang sin manga hinang kalumuan hīhinang niya, amu in biyaꞌ sapantun alak makusug makahilu ha manga tau.

In manga kanakuraan namamarinta ha lawm dunya, miyagad kaniya himinang kalumuan,

iban in manga tau magdaragang ha lawm dunya, amu in pamīmīhan niya sin manga unu-unu kanapsuhan niya, nagkarayahan na tuud.”

⁴ Sakali awn na isab dugaing diyungug ku nagsuwara dayn ha surgaꞌ. Amu agi sin suwara,

“Īg kamu manga tau sukuꞌ ku. Īg kamu dayn ha babai yan.

Ayaw kamu magad kaniya huminang mangīꞌ

bat kamu diꞌ malapay kugdanan sin kasiksaan dumatung kaniya.

⁵ Karnaꞌ in dusa niya yan pangkat-mamangkat na biyaꞌ taas sin langit.

Ampa walaꞌ liyupa sin Tuhan in manga kangīan nahinang niya.

⁶ Na, in manga kangīan nahinang niya kaniyu manga tau sukuꞌ sin Tuhan, subay da isab hipananam kaniya.

Subay lipatun makaruwa in kabinsanaan hipamaws sin nahinang niya.

Subay siya dihilan hambuuk sawan hipuꞌ sin murkaꞌ sin Tuhan, lipat makaruwa in kusug niya dayn sin amu in kabinsanaan dīhil niya ha manga tau kaagi sin hinang niya kalumuan.

⁷ Iban in kabinsanaan iban karukkaan hipananam kaniya,

subay magtūpan tuud iban sin pagꞌabbu niya sin kalagguan iban pagdulbayaꞌ niya sin kanapsuhan niya.

Sabab abbu sadja in ha lawm sin pikilan niya. Laung niya,

‘Aku in pangiyan amu in makapagbayaꞌ-bayaꞌ. Bukun aku hambuuk balu way parasahan.

Diꞌ tuud aku makananam kasusahan.’

⁸ Na, dayn ha manga sabab ini in siya magtaghaꞌ sadja kugdanan sin manga balaꞌ ginis-ginisan.

Magdungan-dungan dumatung mawn kaniya ha lawm sin hangka-adlaw in sakit, kasusahan iban gutum.

Iban sunugun siya sin kāyu.

Sabab in Panghuꞌ Tuhan, amu in dumihil sin hukuman kaniya, sangat kawasa.”

⁹ “Manjari magꞌasu mayan in kāyu dayn ha dāira, kitaun na sin manga kanakuraan ha lawm dunya, amu in miyamagad kaniya himinang sin manga kangīan iban kalumuan. Pagkitaꞌ nila sin asu, magkarukkaan iban magtangis tuud sila. ¹⁰ Duun sila nagtitindug mangitaꞌ-ngitaꞌ kaniya dayn ha kalayuan, pasal mabugaꞌ sila malapay sin kabinsanaan niya. Iban mamung sila, laung nila,

‘Anduꞌ, diꞌ na manjari! Kawgun tuud in dāira Babilun

amu in dāira bantug iban makusug!

Sabab hangka-sasaat da piyaratungan kasiksaan, amu in hukuman biyutang kaniya.’”

¹¹ “In manga magdaragang ha dunya magtangis iban magdukka da isab, pasal wayruun na mamī sin manga dagangan nila. ¹² Wayruun na mamī sin manga dagangan nila biyaꞌ na sin manga bulawan, pilak, palmata mahargaꞌ iban manga mussaꞌ, manga kakanaꞌ mahargaꞌ, kakanaꞌ taluk, kakanaꞌ pula, sutlaꞌ iban katān ginisan sin kahuy amu in māhang kabaakan, iban sin manga garing, kahuy mahargaꞌ, tumbaga, basiꞌ iban marbul, amu in hīnang indalupa ginis hipaglagi sin manga tau. ¹³ Iban wayruun na isab mamī sin manga dagangan nila, biyaꞌ na sin manga pamāpa, laksiꞌ, kamanyan iban manga ginisan lana mahamut, tubig anggul iban lana jaytun, tirigu, manga sapiꞌ iban bili-bili. Way da isab mamī sin manga kuraꞌ iban manga sasakatan iyuutung sin manga kuraꞌ, iban sampay manga tau amu in hinangun manga īpun.

¹⁴ “In manga tau magdaragang mamung sila ha babai, hāti niya amu in dāira Babilun. Laung nila, ‘In unu-unu katān kanapsuhan mu naway na dayn kaymu. Iban in katān altaꞌ iban sin unu-unu katān amu in nakarihil kaymu kabantugan, nalawaꞌ na dayn kaymu. Iban in manga katān yan saumul diꞌ mu na makawaꞌ magbalik.’ ¹⁵ Iban in manga tau magdaragang ini, amu in nagkarayahan sin pagdagang nila ha dāira yan, nagtitindug mangitaꞌ-ngitaꞌ dayn ha kalayuan pasal mabugaꞌ sila malapay sin kabinsanaan niya. Pagtangisan iban pagdukkahan nila. ¹⁶ Iban laung nila,

‘Anduꞌ, diꞌ na manjari! Kawgun tuud! In dāira bantug ini

biyaꞌ da sapantun babai amu in bakas namamakay sin manga tamungun mahargaꞌ, sin manga kakanaꞌ taluk iban kakanaꞌ pula.

Iban natutugub siya sin pamulawan, manga palmata mahargaꞌ iban manga mussaꞌ!

¹⁷ Sagawaꞌ hangka-jām da nalawaꞌ in katān pangaltaꞌ yan dayn kaniya!’

“Manjari, in katān nakuraꞌ sin manga kappal iban manga pasahiru, in manga naghihinang ha kappal iban sin manga tau nagꞌuusaha ha lawd, duun sila nagtitindug ha kalayuan. ¹⁸ Pagkitaꞌ nila mayan sin asu sin sunug, imulang sila. Laung nila, ‘Wayruun da dugaing dāira lumiyu in kabantugan dayn sin dāira makusug yan.’ ¹⁹ Na, magtūy nila na siyabulakan sin bagunbun in manga ū nila + 18:19 In addat sin manga tau Yahudi bang awn kasusahan nila dakulaꞌ, magsabulak bagunbun pa ū nila, tandaꞌ sin pagkarukkahan nila. . Nagtangis sila iban nagdukka. Laung nila,

‘Anduꞌ, kawgun tuud in dāira dakulaꞌ yan!

In manga tau magtutulak-tulak magdagang,

nagkarayahan dayn ha pasal sin altaꞌ niya!

Sagawaꞌ hangka-jām da in katān unu-unu naway na dayn kaniya!’

²⁰ “Pagkūg-kuyag kamu duun ha surgaꞌ, sabab naabut na in katubtuban sin dāira makusug! Damikkiyan in manga kamu tau sukuꞌ sin Tuhan, iban sin manga kiyawakilan niya, iban sin manga nabi, amu in magpapasampay sin Parman sin Tuhan, pagkūg-kuyag da isab kamu. Sabab in dāira bantug piyaratungan na sin Tuhan hukuman, amu in tungbas sin nahinang sin manga tau niya kaniyu.”

²¹ Sakali biyuhat sin hambuuk malāikat makusug in hambuuk batu landuꞌ tuud dakulaꞌ biyaꞌ lagguꞌ batu paggigilingan, ampa niya liyaruk pa lawm dagat. Pagꞌubus, ampa siya namung, laung niya,

“Biyaꞌ da isab ha yan in kumugdan ha dāira Babilun.

Magtaghaꞌ sadja magkalubu-lubu

iban diꞌ na kakitaan magbalik saumul.

²² In ikaw, dāira Babilun, in manga kalangan sin manga mangangalang, sin manga magbibiyula, sin manga magsusuling iban sin manga magtutuyup-tuyup kaymu,

diꞌ na karungugan magbalik.

Damikkiyan wayruun na kakitaan manga tau

maghihinang duun sin unu-unu kapandayan nila,

iban diꞌ na karungugan magbalik

in katingug sin paggigilingan sin manga unu-unu na.

²³ Wayruun na minsan palitaan kakitaan

ha dāira mu dumihil sin sawa niya bang dūm na.

In manga paglami-lami sin manga pagtiyaun

diꞌ na karungugan magbalik.

Bunnal, in manga magdaragang duun, sila na in makawasa dayn ha katān magdaragang ha lawm dunya.

Bunnal isab, in manga tau katān ha dunya, kiyaakkalan mu kaagi sin pagpangitaꞌ mu.

²⁴ Sumagawaꞌ piyaratungan kasiksaan in dāira Babilun,

pasal duun nabunuꞌ in manga nabi iban sin manga tau sukuꞌ sin Tuhan,

lāgiꞌ in manga tau katān nabunuꞌ ha lawm dunya,

hangkan sila miyatay sabab biyunuꞌ sin amu in diyalil dāira Babilun.”

¹ Pagꞌubus ini awn na isab diyungug ku biyaꞌ tingug sin manga mahadjanaꞌ ha surgaꞌ, amu agi,

“Pudjihun taniyu in Tuhan!

Tunggal isa-isa niya in tagsukuꞌ sin kalagguan iban kawasa. Siya da in manglalappas kātuꞌniyu dayn ha manga dusa taniyu.

² Maamu iban mabuntul in manga hukuman niya.

Biyutangan niya na hukuman in babai mangīꞌ,

amu in landuꞌ bantug nakarā-rā ha manga tau dunya himinang sin manga unu-unu mangīꞌ iban kalumuan.

Iban hangkan siya sīksaꞌ sin Tuhan pasal biyunuꞌ niya in manga daraakun sin Tuhan.”

³ Na, namung na isab sila magbalik. Matanug in suwara. Laung nila,

“Pudjihun natuꞌ in Tuhan!

In pagꞌasu sin sunug ha dāira yan diꞌ magkapūng kasaumulan.”

⁴ Pagꞌubus yadtu, in kawhaan tagꞌupat nagtatau-maas iban sin upat malāikat mahal-mahal in lupa, simujud sartaꞌ simumba na pa Tuhan, amu in naglilingkud duun ha kursi. Amu agi nila,

“Amin! Pudjihun natuꞌ in Tuhan!”

In Pagtiyaun sin Anak Bili-bili

⁵ Sakali awn na isab diyungug ku nagsuwara dayn ha lugal sin kursi. Amu agi,

“Pudjiha niyu in Tuhan natuꞌ,

kamu katān manga daraakun niya,

iban na sin katān tau, sibuꞌ da mataas iban bukun,

amu in sasukuꞌ sin nagmamabugaꞌ kaniya.

Pudjiha niyu siya.”

⁶ Pagꞌubus ampa na isab aku nakarungug suwara biyaꞌ sin tingug sin pagꞌulak sin manga tau mataud, biyaꞌ katingug sin lagublub sin busay malagguꞌ tuud, iban biyaꞌ katingug sin anduhud sin dawgdug amu in matanug tuud. Amu agi sin suwara,

“Pudjihun taniyu in Panghuꞌ!

Sabab in Tuhan natuꞌ sangat kawasa, mamarinta na.

⁷ Subay tuud kitaniyu magkūg-kuyag.

Pudjihun natuꞌ in Tuhan,

karnaꞌ bihaun dimatung na in waktu sin pagkawin sin amu in ngiyānan Anak Bili-bili iban sin manga tau sukuꞌ niya.

Amu in piyagbahasa pangantin babai asawahun niya, amu in nagsasakap na asal, namamakay sin badjuꞌ pangantin.

⁸ In piyagbahasa pangantin babai ini, dīhilan na siya badjuꞌ pangantin,

amu in maputiꞌ tuud masiꞌnag iban wayruun tuud lummiꞌ-lummiꞌ niya.”

(In hāti sin badjuꞌ pangantin ini maputiꞌ, amuna in manga hinang mabuntul sin manga tau sukuꞌ sin Tuhan.)

⁹ Sakali namung in hambuuk malāikat kākuꞌ. Laung niya, “Sulatan in hibichara ku ini. Makuyag in manga napīꞌ humadil sin piyagbahasa pagkawin sin Anak Bili-bili.” Iban siyugpatan niya pa in bichara niya. Laung niya, “In manga lapal kabtangan ini bunnal tuud dayn ha Tuhan.”

¹⁰ Na, pagꞌubus, magtūy aku simujud pa alupan niya, sagawaꞌ liyāng niya aku. Laung niya, “Ayaw kaw sumujud kākuꞌ. Subay hambuuk-buuk Tuhan in sumbahun mu. Sabab in aku ini hambuuk da isab daraakun sin Tuhan biyaꞌ kaymu iban sin manga kataymanghuran mu, amu hisiyu-siyu in mamawgbug sin kasabunnalan pasal hi Īsa. In kasabunnalan ini pasal hi Īsa, amu in asal piyalahil sin Tuhan ha manga kanabi-nabihan, amu in nagdarā sin Parman niya.”

In Nangunguraꞌ ha Kuraꞌ Putiꞌ

¹¹ Manjari ini, kītaꞌ ku naukab in surgaꞌ, iban yaun awn kuraꞌ putiꞌ. In amu nangunguraꞌ ha taas niya, amuna in pagngānan Kapangandulan iban Puunan Sin Kasabunnalan. Mabuntul siya manghukum, iban ādil in pagpapanaw niya sin kawasa niya bang siya magꞌatu iban sin manga banta niya. ¹² In mata niya masugit mangatud maūkꞌūk dakuman biyaꞌ sin sapantun kāyu nasusuliyab, iban mataud mahakuttaꞌ ha taas sin ū niya. Iban awn ngān siyusulat duun kaniya. Isa-isa niya da in makaingat sin maana niya yan. ¹³ In juba niya nahihipuꞌ sin duguꞌ. Iban in ngān hipagtawag kaniya, “Parman sin Tuhan.” ¹⁴ Nagꞌuurul ha ulihan niya in manga sundalu ha surgaꞌ. In manga sundalu ini nangunguraꞌ ha manga kuraꞌ putiꞌ, iban in juba nila maputiꞌ, iban wayruun tuud lummiꞌ-lummiꞌ niya. ¹⁵ Awn puddang mahayt gimuwaꞌ dayn ha simud niya. In ini amuna in hipangatu niya ha manga kabangsa-bangsahan amu in simusulang kaniya. Iban in pamarinta niya sangat makusug, biyaꞌ hantang basiꞌ diꞌ magkabaliꞌ. Lāgiꞌ in hisiyu-siyu umatu kaniya hinangun niya biyaꞌ sin sapantun bungang-kahuy anggul, amu in pugaun sin manga tau hinangun alak. Iban pananamun niya sila sin murkaꞌ sin Tuhan sangat kawasa. ¹⁶ In juba niya iban sin paa niya siyusulatan sin gulalan kaniya, amu in,

“Sultan sin Manga Kasultanan,

Panghuꞌ sin Manga Katān Panghuꞌ.”

¹⁷ Manjari nākitaꞌ na isab aku hambuuk malāikat duun ha taas langit timitindug ha siꞌnag sin suga. Nagsuwara siya matanug pa manga katān manuk-manuk naglulupad ha awan. Amu agi, “Kari kamu. Pagtipun kamu mari pa pagjamuhan sin Tuhan, pagjamuhan niya dakulaꞌ. ¹⁸ Kari kamu kaun sin unud sin manga patay tau, amu in unud sin baran sin manga kasultanan, sin manga jiniral iban sin manga kasundaluhan, iban da isab sin unud sin manga kuraꞌ iban sin amu in nangunguraꞌ ha taas niya. Kaun kamu sin unud sin patay tau indaginis, sibuꞌ da īpun iban bukun, tau mataas iban bukun.”

¹⁹ Pagꞌubus, kītaꞌ ku in sattuwa talun iban sin manga kasultanan ha dunya iban sin manga kasundaluhan nila nagtipun naghambuuk mamunuꞌ ha amu in nangunguraꞌ iban sin manga sundalu niya. ²⁰ Manjari ini, nasaggaw in sattuwa talun iban sin nabi bukun bunnal, amu in nakahinang sin hinang makaajayb ha babaan sin sattuwa talun. (Dayn ha sabab sin manga nahinang niya makaajayb, narupang niya in manga tau, amu in siyāpan sin ngān sin sattuwa talun iban amu in simumba sin lupa sin sattuwa, amu in iyukkil hīnang barhalaꞌ.) In sattuwa talun iban sin nabi bukun bunnal, liyaruk sin buhiꞌ pa sila pa lawm kāyu nasusuliyab iban maylang, amu in biyaꞌ dagbus lanaw dakulaꞌ nalalaga. ²¹ Na, ampa in manga sundalu nila miyatay kaagi sin amu in piyagbahasa puddang gimuwaꞌ dayn ha simud sin amu in nangunguraꞌ. Iban in unud sin baran nila kiyaun sin manga kamanuk-manukan. Kiyansuban tuud in manga manuk-manuk sin kiyaun nila.

In Hangibu Tahun

¹ Manjari, awn na isab kītaꞌ ku hambuuk malāikat nimaug dayn ha surgaꞌ. In malāikat ini nagdarā sin kunsiꞌ sin lawang sin lungag tigub-tiguban iban kadina dakulaꞌ. ² Sakali siyaggaw niya in naga, amu in Hās Sin Awal Masa amuna in Iblis atawa Saytan Puntukan. Pagꞌubus ampa niya hiyukutan sin kadina. Pagꞌubus yadtu ampa niya liyaruk in Iblis pa lawm sin lungag tigub-tiguban. Ubus ampa niya kiyunsian in lawang iban piyahugut ha supaya wayruun makaukab ha lawm sin hangibu tahun. Kiyalabusu niya in Iblis ha supaya diꞌ namān makapanglidjal ha manga kabangsa-bangsahan, ha salugay diꞌ pa mapuas in hangibu tahun. Bang mapuas na in hangibu tahun, paguwaun siya sagawaꞌ dayꞌ-dayꞌ da.

⁴ Manjari nākitaꞌ aku manga kursi. In manga limilingkud duun kiyarihilan kapatutan manghukum. Damikkiyan kītaꞌ ku da isab in manga nyawa sin manga amu in nabunuꞌ pasalan sin pagnasīhat nila sin kasabunnalan pasal hi Īsa iban sin Parman sin Tuhan. In sila ini walaꞌ simumba ha sattuwa talun atawa ha dagbus niya, amu in iyukkil hīnang barhalaꞌ. Iban walaꞌ kiyabutangan sin sāp, amu in ngān sin sattuwa talun, in manga tuktuk atawa lima nila. Na, in sila ini mabuhiꞌ magbalik, iban magad sila mamarinta ha Almasi ha lawm sin hangibu tahun. ⁵ Amuna yan in tagnaan sin pagbuhiꞌ magbalik ha manga patay. (In manga kaibanan patay diꞌ pa sila mabuhiꞌ magbalik ha salugay diꞌ pa mapuas in hangibu tahun.) ⁶ Iban kumuyag tuud iban masukud in manga amu in makaagad mabuhiꞌ ha tagnaan sin pagbuhiꞌ magbalik ha manga patay. Diꞌ sila makalabay sin kasiksaan salama-lama, amu in piyagbahasa Kamatay Hikaruwa. Iban in sila ini mahinang pakil magtaat pa Tuhan iban pa Almasi. Lāgiꞌ in sila ini makaagad da isab ha Almasi mamarinta ha lawm sin hangibu tahun.

In Karaug ha Saytan Puntukan

⁷ Pagꞌubus yadtu, pagpuas sin hangibu tahun, in Saytan Puntukan paguwaun na dayn ha lawm kalabusu. ⁸ Gumuwaꞌ na siya manglidjal pa manga kabangsa-bangsahan ha upat pidju sin ālam, amu in bangsa pagtawagun Gug iban Magug. Tipunun sin Saytan in manga tau katān dayn ha kabangsa-bangsahan ini, dāhun pa pagbunuan. In taud sin tau matipun niya biyaꞌ sapantun sin taud sin buhangin ha higad daplakan. ⁹ Na, pagpanaw nila, mamutapal sin tau in katiluagan sin hulaꞌ, sartaꞌ tikupun nila in dāira, amu in kalasahan sin Tuhan iban hulaan sin manga tau sukuꞌ niya. Sumagawaꞌ maubus sila kaunun sin kāyu naug dayn ha surgaꞌ. ¹⁰ Na, sakali in Iblis, amu in nanglidjal kanila, hilaruk na pa lawm kāyu nasusuliyab iban maylang amu in dagbus niya biyaꞌ sapantun lanaw nalalaga sin kāyu. In sattuwa talun iban sin nabi bukun bunnal bakas na kiyalaruk mari. Duun sila ajab-ajabun sin kāyu dūm-adlaw kasaumul-umulan.

In Adlaw Kahinapusan sin Paghukum

¹¹ Pagꞌubus yadtu, nākitaꞌ na isab aku hambuuk kursi putiꞌ dakulaꞌ iban sin amu in naglilingkud duun. Na, in dunya iban sin langit nalanyap na dayn ha haddarat niya iban diꞌ na kakitaan magbalik. ¹² Iban kītaꞌ ku in manga patay, sibuꞌ da mataas iban bukun in bakas pagkatau nila, duun timitindug ha alupan sin kursi. Pagꞌubus, iyukab na in manga Kitab sampay amu in Kitab bakas piyagsulatan sin ngān sin manga tau, amu in karihilan sin kabuhiꞌ salama-lama. Pagꞌubus, hiyukum in manga tau pakaniya-pakaniya. In hukuman kiyarihil kanila katān, agad ha unu-unu in nahinang nila sin buhiꞌ pa sila, amu in kiyasulat duun ha manga Kitab. ¹³ In manga sasukuꞌ sin miyatay ha lawm dagat iban ha ginlupaan, sampay na in katān tau amu in limabay dayn ha paghahantian sin manga patay, amu in pagtawagun Hīdis, gimuwaꞌ na nangarap pa Tuhan. In pakaniya-pakaniya hiyukum dayn ha ngīꞌ-dayaw sin nahinang nila sin buhiꞌ pa sila. ¹⁴ Pagꞌubus yadtu, in manga sasukuꞌ sin walaꞌ kiyasulat in manga ngān nila ha Kitab Sin Kabuhiꞌ Salama-lama, liyaruk na pa lawm sin Narkaꞌ Jahannam amu in biyaꞌ dagbus lanaw nalalaga. Amuna yan in piyagꞌiyanun Kamatay Hikaruwa. Manjari, in Hīdis, amu in paghahantian sin nyawa sin manga patay, iyagad da isab liyaruk pa lawm Narkaꞌ Jahannam. Naway na in Hīdis. Damikkiyan in kamatay naway na isab.

In Langit Baꞌgu Iban Dunya Baꞌgu

¹ Manjari kītaꞌ ku in langit baꞌgu iban sin dunya baꞌgu, sagawaꞌ wayruun na dagat, sabab in langit iban sin dunya nakauna nalanyap na. ² Iban kītaꞌ ku isab in Dāira Suchi amu in Awrusalam Baꞌgu, naug dayn ha surgaꞌ dayn ha haddarat sin Tuhan. In lingkat niya biyaꞌ sapantun hambuuk pangantin babai namamakay malingkat, amu in sūng na kawinun iban sin pangantin usug. ³ Pagꞌubus nakarungug aku suwara matanug dayn ha kursi. Amu agi sin suwara, “Na, bihaun maghambuuk na in hulaan sin Tuhan iban sin manga mānusiyaꞌ. Duun siya humulaꞌ kanila, iban sila na in manga tau niya. Magbaran na tuud in Tuhan humambuuk kanila, iban siya na in Tuhan nila. ⁴ Pahiran niya in manga luhaꞌ katān dayn ha mata nila. Iban wayruun na tau mapatay. Diꞌ na in manga tau magdukka iban magtangis, iban wayruun na sakit nanamun nila, sabab in unu-unu kahālan bakas ha lawm sin dunya nakauna naway na.”

⁵ Sakali namung in amu in naglilingkud ha kursi. Amu agi, “Na, bihaun baꞌguhun ku na in unu-unu katān.” Iban laung niya kākuꞌ, “Sulatan ini, sabab in manga kabtangan ini bunnal iban kapangandulan.”

⁶ Iban laung niya, “Natiꞌmus ku na hīnang in katān maksud ku. Aku in Alip iban Yaꞌ, sabab aku in panagnaan iban kahinapusan sin unu-unu katān. Bang awn hisiyu-siyu in iyuhaw, painumun ku siya sin tubig dayn ha tuburan kalkawsal amu in makarihil sin kabuhiꞌ salama-lama. Painumun siya ha way tungud. ⁷ Iban hisiyu-siyu in matatas tumanggung sin unu-unu na makalubu sin īman nila, amuna in kapusakaan ku sin karayawan ini. In hāti niya, aku na in Tuhan nila, iban in sila mahinang na manga anak ku. ⁸ Sumagawaꞌ in manga manaykud dayn kākuꞌ pasal sin bugaꞌ nila, iban amu in manga mamutawan na sin pangandul nila kākuꞌ, hilaruk pa lawm kāyu. Damikkiyan in sasukuꞌ sin manga naghinang sin unu-unu makasammal, manga namunuꞌ ha manga tau, sin manga naghinang maasihat, sin manga maghihinang-hinang mangīꞌ, sin manga simumba ha unu-unu na dugaing dayn ha Tuhan, iban sin manga magpuputing, amuna in palsukuan nila yan hilaruk sila katān pa lawm kāyu nasusuliyab iban maylang amu in biyaꞌ sapantun lanaw nalalaga. Amu na yan in pagꞌiyanun Kamatay Hikaruwa.”

In Awrusalam Baꞌgu

⁹ Sakali ini, in hambuuk dayn ha manga pitu malāikat, amu in imasag sin pitu balaꞌ pa lawm dunya dayn ha lawm sin gangsaꞌ diyarā nila, simuuk mawn kākuꞌ, ampa imiyan, laung niya, “Kari kaw. Hipakitaꞌ ku kaymu in manga tau, amu in pagꞌiyanun pangantin babai, amu in asawahun sin amu in ngiyānan Anak Bili-bili.” ¹⁰ Na, saruun-duun hiyūp aku sin Rū sin Tuhan. Pagꞌubus ampa aku diyā sin malāikat pa puntuk sin būd mataas. Piyakitaꞌ niya kākuꞌ in Awrusalam, amu in Dāira Suchi, amu in piyanaug sin Tuhan dayn ha surgaꞌ. ¹¹ In dāira yaun magsinglab dayn ha sahaya sin Tuhan. Magsinglab in dāira yaun biyaꞌ sin palmata mahalgaꞌ pagtawagun jaspir, amu in masawa tuud iban matilag biyaꞌ sin samin. ¹² In ād ha katilibut sin dāira yaun mataas tuud iban makamdus. Hangpuꞌ tagduwa in lawang niya. In pakaniya-pakaniya sin manga lawang ini awn jaga niya malāikat. In manga lawang ini siyusulatan sin ngān sin hangpuꞌ tagduwa pihak sin bangsa Israil. ¹³ Awn tū lawang pakaniya-pakaniya sin upat kīd sin ād. Tū in tampal pa subangan, tū in pa sātan, tū in pa uttaraꞌ iban tū in pa sadlupan. ¹⁴ Iban awn hangpuꞌ tagduwa batu in hīnang papagan sin ād sin dāira yaun. In pakaniya-pakaniya sin batu ini siyusulatan sin ngān sin manga hangpuꞌ tagduwa tau, amu in bakas kiyawakilan sin amu in Anak Bili-bili. ¹⁵ Manjari in malāikat amu in bakas namung kākuꞌ, nagdarā susukud bulawan, hipanukud niya sin dāira, sin manga lawang iban sin ād. ¹⁶ Iban in dāira yaun sibuꞌ da in habaꞌ sin upat kīd niya. Pagsukud sin malāikat sin dāira, in habaꞌ niya awn duwangaibu upat-ngagatus usuk batu. Biyaꞌ da isab ha yan in sukuran sin taas niya iban sin luag niya. ¹⁷ Siyukud da isab sin malāikat in ād sin dāira. In taas niya awn kaꞌpatan ngarupa. In pagsukud niya biyaꞌ sin pagsukud kiyabiyaksahan sin manga tau. ¹⁸ In piyaghinang sin ād, palmata pagtawagun jaspir. Iban bulawan in piyaghinang sin dāira yaun, amu in purul tuud bulawan, sagawaꞌ mahal-mahal in lupa sabab masawa iban matilag biyaꞌ sin samin. ¹⁹ In manga batu papagan sin ād sin dāira yaun, iyaari-arihan katān sin manga ginisan palmata mahargaꞌ. In palmata sin papagan batu ha unahan jaspir, in hikaruwa palmata bilu, in hikatū palmata kalkidun, in hikaupat palmata gaddung, ²⁰ in hikalima palmata kulit, in hikaunum palmata pula, in hikapitu palmata biyaning, in hikawalu palmata gaddung jaliꞌ-jaliꞌ, in hikasiyam palmata biyaning malutuꞌ, in hikahangpuꞌ palmata biyaning imaagaw gaddung, in hikahangpuꞌ tagꞌisa palmata bilu malutuꞌ, iban in hikahangpuꞌ tagduwa palmata taluk. ²¹ Iban in piyaghinang sin hangpuꞌ tagduwa lawang manga mussaꞌ. In piyaghinang pakaniya-pakaniya sin lawang, hambuuk mussaꞌ dakulaꞌ tuud. Iban in dān sin dāira ini purul tuud bulawan matilag iban masawa biyaꞌ sin samin.

²² Wayruun langgal kītaꞌ ku ha dāira yaun, sabab yaun na duun in Panghuꞌ Tuhan Sangat Kawasa iban sin amu in ngiyānan Anak Bili-bili. Hangkan in dāira yaun diꞌ na magkagunahan Bāy sin Tuhan. ²³ Iban in dāira yaun diꞌ magkagunahan sin sawa sin suga atawa bulan, sabab in sahaya sin Tuhan amuna in dumihil sawa kaniya. Iban in Anak Bili-bili amuna in ilaw niya. ²⁴ In pagpanawan sin tau katān ha dunya karihilan na sawa sin ilaw dayn ha dāira yaun. Iban in manga kasultanan ha lawm dunya dumā na sin manga altaꞌ nila pa dāira yaun. ²⁵ In manga lawang sin dāira yaun diꞌ pagtambulun. Ukab sadja dayn ha adlaw pa adlaw, sabab diꞌ magdūm duun ha dāira yaun. ²⁶ In katān pangaltaꞌ iban kalagguan sin manga katān bangsa, dāhun na mawn pa dāira yaun. ²⁷ Sumagawaꞌ wayruun makasammal in makasūd pa dāira yaun. Damikkiyan in manga maghihinang mangīꞌ iban sin manga magpuputing, diꞌ da isab makasūd pa dāira yaun. Amura in makasūd pa dāira yaun in manga tau, amu in kiyasulat in ngān nila ha Kitab sin Anak Bili-bili. In Kitab yan amu in piyagsusulatan sin manga ngān sin manga tau amu in dihilan niya kabuhiꞌ salama-lama.

¹ Sakali piyakitaꞌ na isab kākuꞌ sin malāikat in sapaꞌ, amu in sapaꞌ sin tubig kalkawsal, amu in makarihil sin kabuhiꞌ salama-lama. In sapaꞌ yaun, amu in nagꞌaanud dayn ha kursi sin Tuhan iban sin amu in ngiyānan Anak Bili-bili, masawa tuud iban matilag biyaꞌ palmata. ² In sapaꞌ yaun anud dayn ha giꞌtungan dān sin dāira. Hāti ha duwang sipak higad sin sapaꞌ yaun awn timutubuꞌ kahuy, amu in kahuy makarihil sin kabuhiꞌ. Ha lawm sin hangka-tahun, in kahuy ini makahangpuꞌ tagduwa magbunga. Makaminsan magbunga ha lawm hangka-bulan. Iban in manga dahun sin kahuy ini hīnang ubat, hipagpauliꞌ sin sakit ha kahulaꞌ-hulaan. ³ Iban wayruun tuud kabaakan unu-unu na satruꞌ sin Tuhan duun ha dāira yaun.

In kursi sin Tuhan iban sin amu in ngiyānan Anak Bili-bili yaun na duun ha dāira yaun. Iban yaun duun in manga daraakun niya mamudji kaniya. ⁴ Kakitaan na sin manga daraakun niya in bayhuꞌ niya, iban in ngān niya siyusulat ha manga tuktuk nila. ⁵ Iban diꞌ magdūm duun ha dāira yaun. Diꞌ na sila magkagunahan palitaan atawa siꞌnag sin suga, sabab in Panghuꞌ Tuhan amuna in ilaw nila. Lāgiꞌ in sila magsultan na sampay pa kasaumulan.

In Pagkari hi Īsa

⁶ Sakali namung na isab kākuꞌ in malāikat. Laung niya, “In manga lapal kabtangan ini bunnal iban kapangandulan, sabab in Panghuꞌ Tuhan natuꞌ, amu in bakas nagpatulun sin Rū niya pa manga nabi, diyaak niya in malāikat niya mamaytaꞌ pa manga tau daraakun niya pasal sin manga pakaradjaan amu in marayꞌ na maawn ha susūngun.”

⁷ Sakali simambung hi Īsa. “Dungug kamu,” laung hi Īsa. “Masuuk na in pagkari ku. Awn kakuyagan sin manga tau amu in magkahagad sin baytaꞌ ha lawm sin sulat ini.”

⁸ Manjari, in aku ini, hi Yahiya, amu in nakarungug iban nakakitaꞌ sin katān pakaradjaan ini. Naubus ku mayan diyungug iban kītaꞌ in manga katān pakaradjaan ini, simujud na aku pa alupan sin malāikat, sūng na aku sumumba kaniya, amu in nagpanyataꞌ kākuꞌ sin manga pakaradjaan ini. ⁹ Sagawaꞌ laung sin malāikat kākuꞌ, “Ayaw kaw sumumba kākuꞌ, sabab sibuꞌ da kita daraakun sin Tuhan. Sibuꞌ da aku iban sin manga kataymanghuran mu kanabi-nabihan, iban sin manga sasukuꞌ sin magkahagad sin baytaꞌ ha lawm sulat ini. Subay hambuuk-buuk Tuhan in sumbahun mu.”

¹⁰ Iban laung niya pa isab kākuꞌ, “Ayaw mu pagtapukan in manga baytaꞌ, amu in Parman naug dayn ha Tuhan, kiyabutang ha lawm sulat yan, sabab masuuk na dumatung in waktu maawn in manga pakaradjaan yan. ¹¹ Hisiyu-siyu in manga naghihinang mangīꞌ iban sin manga unu-unu na haram, gām mayan dumuhun in kangīan iban kaharaman sin manga hinang nila. Ampa in manga naghihinang sin mabuntul iban sin manga unu-unu na suchi, gām mayan sumūng in kabuntulan iban kasuchihan sin hinang nila.”

¹² Sakali simambung na isab hi Īsa. “Dungug kamu” laung hi Īsa. “Masuuk na in pagkari ku manungbas kaniyu katān sin manga unu-unu katān bakas nahinang niyu. ¹³ Aku in Alip iban Yaꞌ, sabab aku in ha unahan iban ha ulihan. Aku in tagnaan iban kahinapusan sin unu-unu katān.

¹⁴ “Awn kakuyagan sin manga amu in naglalanuꞌ sin manga tamungun nila ha supaya wayruun tamak iban lummiꞌ-lummiꞌ niya. Hāti niya suchi na in atay nila. Sabab in sila yan kiyarihilan kapatutan sumūd pa lawm dāira dayn ha manga lawang sin ād, lāgiꞌ kiyarihilan kapatutan kumaun sin bunga sin kahuy, amu in makarihil kabuhiꞌ. ¹⁵ Sagawaꞌ ha guwaꞌ sin dāira, yaun duun in manga naghihinang mangīꞌ, in manga manghihinang-hinang, in manga naghihinang maasihat iban mamumunuꞌ, in manga magsusumba sin unu-unu na dugaing dayn ha Tuhan, iban sin manga mangangakkal iban magpuputing.

¹⁶ “In aku ini, hi Īsa, amu in nagdaak ha malāikat magpanyataꞌ sin pakaradjaan ini pa manga kamu jamaa Almasihin sin kalanggalan, amu in sukuꞌ sin Tuhan. In aku ini hambuuk panubuꞌ hi Nabi Daud. Aku ini in biyaꞌ sapantun bituun masawa amu in kakitaan bang lapit adlaw.”

¹⁷ Sakali simambung in Rū sin Tuhan iban sin manga tau amu in pagꞌiyanun pangantin babai, amu agi, “Kari kaw.”

Damikkiyan hisiyu-siyu in makarungug sin lapal kabtangan ini subay isab imiyan, “Kari kaw.”

Kari kamu, hisiyu-siyu kamu in iyuhaw. Inum kamu mari sin tubig kalkawsal amu in makarihil kabuhiꞌ. Hipagpainum in tubig ini ha wayruun tungud niya ha hisiyu-siyu in mabayaꞌ.

In Kahinapusan Kabtangan

¹⁸ In aku ini, hi Yahiya, yari magbāndaꞌ kaniyu, amu in sasukuꞌ sin nakarungug sin baytaꞌ ha lawm sulat ini. Hisiyu-siyu in gumanap sin unu-unu walaꞌ kiyabaytaꞌ ha lawm sin sulat ini, paratungan siya sin Tuhan sin manga balaꞌ amu in kiyabaytaꞌ ha lawm sin sulat ini. ¹⁹ Damikkiyan hisiyu-siyu isab in dumagdag sin baytaꞌ ha lawm sulat ini, īgan sin Tuhan in palsukuan niya sumūd pa lawm sin Dāira Suchi, iban diꞌ na siya makakaun sin bunga sin kahuy, amu in makarihil kabuhiꞌ, amu in yari kiyabaytaꞌ ha lawm sulat ini.

²⁰ Biyaꞌ ha ini in bichara sin amu in simaksiꞌ sin kasabunnalan sin katān pakaradjaan, amu in piyalahil ha sulat ini. Amu agi niya, “Tartantu tuud. Masuuk na in pagkari ku.”

Na, mura-murahan bang mayan kaw magbalik na mari, ū Panghuꞌ Īsa.

²¹ Mura-murahan isab bang mayan kamu katān dihilan tulung-tabang sin Panghuꞌ Īsa.

Wassalam.