1 Pitrus

Sulat Nakauna Dayn Kan

Pitrus

Pahāti

In nagsulat sin sulat ini hi Pitrus amu in taymanghud hi Andariyas. (Kitaa ha Yahiya 1:40,41) In sila karuwa mangingistaꞌ. Piyaagad sila hi Īsa nagguru kaniya. (Kitaa ha Matiyu 4:18-20) Hi Pitrus in kiyawakilan hi Īsa magpamahalayak sin Baytaꞌ Marayaw pa manga tau Yahudi. (Kitaa ha Galatiya 2:9)

Ini in tagnaꞌ sulat hi Pitrus pa manga tau sukuꞌ sin Tuhan napulak-palik ha manga kahulaꞌ-hulaan ha Asiya. Siyulatan sila hi Pitrus sabab ha lawm sila kasigpitan iban kabinsanaan. Hangkan piyasampayan sila hi Pitrus sin manga hilalaungan makapahugut sin iman nila. Hipatum-tum hi Pitrus kanila in pasal sin kamatay hi Īsa iban sin pagbuhiꞌ kaniya magbalik dayn ha kamatay iban sin janjiꞌ niya magbalik mari pa dunya. Laung niya pagga jimanjiꞌ hi Īsa sin magbalik siya mari pa dunya, subay akuhun iban sandalan sin manga Almasihin in unu-unu haggut-pasuꞌ kumugdan kanila, sabab in yan panulay-sulay sadja sin hugut sin iman nila. (Kitaa ha bāb 4, ayat 12)

In Salam-duwaa hi Pitrus

¹ Sulat ini naug dayn kākuꞌ hi Pitrus, hambuuk tau kiyawakilan hi Īsa Almasi magpamahalayak sin baytaꞌ niya.

In sulat ini hipasampay ku pa manga tau napīꞌ sin Tuhan magad kaniya, amu in way tutug hulaan, napulak-palik ha katiluagan sin hulaꞌ Puntus, Galatiya, Kapaduki, Asiya iban Bitiniya. ² Na, in kamu yan napīꞌ sin Tuhan, Amaꞌ natuꞌ, mahinang sukuꞌ niya sabab in kamu asal niya kiyaiingatan. Napīꞌ kamu sin Tuhan suchihun sin Rū niya in lawm atay niyu, magkahagad na kan Īsa Almasi, iban ha supaya mapapas na in manga dusa niyu kaagi sin duguꞌ sin Almasi.

Mura-murahan bang mayan maglabi-labihan in tulung-tabang iban kasannyangan hirihil kaniyu sin Tuhan.

In Karayawan Makawaꞌ sin Manga Tau Sukuꞌ sin Tuhan

³ Pudjihun natuꞌ in Tuhan, amu in Amaꞌ sin Panghuꞌ natuꞌ Īsa Almasi. Karnaꞌ dayn ha sabab sin lagguꞌ sin ulung sin Tuhan kātuꞌniyu pīndahan niya in addat taniyu. Biyaꞌ na kitaniyu sin sapantun piyagꞌanak nagbalik. Na, hangkan nabiyaꞌ hādtu sabab biyuhiꞌ nagbalik sin Tuhan hi Īsa Almasi dayn ha kamatay. Na, hangkan dayn ha sabab yan awn na tuud huwat-huwat natuꞌ sin mabuhiꞌ da isab kitaniyu magbalik dayn ha kamatay. ⁴ Lāgiꞌ awn na huwat-huwat taniyu makatabuk sin pusakaꞌ landuꞌ tuud marayaw, amu in tiyatawꞌ sin Tuhan ha manga tau sukuꞌ niya. Tiyatawꞌ niya in pusakaꞌ yan didtu ha surgaꞌ, amu in pusakaꞌ diꞌ magkahagin, diꞌ magkangīꞌ iban diꞌ magkaraan. ⁵ In kamu jiyajagahan tuud sin Tuhan sangat-kawasa sabab sin pangandul niyu kaniya. Jiyajagahan niya kamu bat kamu diꞌ sumihaꞌ dayn kaniya sampay maabut in waktu matabuk niyu in kajukupan sin kalappasan niyu, amu in asal saddiya na hipanyataꞌ ha adlaw mahuli.

⁶ Na, hangkan subay kamu magkūg-kuyag sin pasal yan. Minsan awn da waktu bihaun nasususa kamu pasal sin ginis-ginisan kasigpitan kiyagantaꞌ kaniyu, pagkūg-kuyag sadja kamu. ⁷ In manga kasigpitan kalabayan niyu yan panulay-sulay sadja bang biyaꞌ diin in kusug sin īman niyu. Karnaꞌ minsan isab in bulawan, amu in asal diꞌ kumakkal, palabayun da dayn ha kāyu bat mahinang purul bulawan. Na, amu pa ka isab in diꞌ sulayan in īman niyu, amu in labi mahalgaꞌ dayn ha bulawan, ha supaya matantu bang tumatas da tuud? Na, bang in īman niyu tumatas, na tantu in kamu karihilan kapudjihan, kasanglitan iban kalagguan ha adlaw pagbalik hi Īsa Almasi mari pa dunya. ⁸ In siya kalasahan niyu minsan niyu siya walaꞌ kiyakitaan. Iban nagparachaya kamu kaniya minsan niyu diꞌ pa siya kakitaan ha bihaun. Na, diꞌ hikasipat iban diꞌ hikatugilaꞌ in lagguꞌ sin kakuyagan niyu, ⁹ sabab dayn ha pasal sin pangandul niyu kaniya awn na kamakbulan sin kalappasan niyu, amu in kabuhiꞌ kumakkal didtu ha surgaꞌ.

¹⁰ Na, in pasal sin kalappasan ini kiyakannal iban piyapangadjiꞌ tuud marayaw in maana niya kaagi sin manga kanabihan ha masa nakauna yadtu amu in namaytaꞌ pasal sin karayawan, amu in asal hirihil kaniyu sin Tuhan. ¹¹ Piyatulun sin Almasi in Rū sin Tuhan pa manga kanabihan ini, namaytaꞌ kanila pasal sin kabinsanaan labayan sin Almasi iban sin kalagguan matabuk niya pagꞌubus sin kabinsanaan niya. Na, tiyuyuan tuud īngat sin manga kanabihan bang kuꞌnu maawn, iban bang biyaꞌ diin in kaawn sin manga pakaradjaan yan. ¹² Sumagawaꞌ piyaingat kanila sin Tuhan sin in manga pakaradjaan yan diꞌ maawn ha masa nila, sagawaꞌ ha susūngun, ha masa natuꞌ bihaun. Na, in yan nagmakbul na bihaun, karnaꞌ napaingat na kāmuꞌ sin manga tau nagpamahalayak sin Baytaꞌ Marayaw pasal sin Almasi. In manga tau ini nakabaytaꞌ sin manga pakaradjaan ini dayn ha kusug sin Rū sin Tuhan piyatulun kanila dayn ha surgaꞌ. Na, minsan in manga malāikat mabayaꞌ tuud humāti pasal sin manga pakaradjaan ini.

Hinduꞌ Pasal Pagpabuntul sin Atay iban Pamikil

¹³ Na, hangkan pahambuuka in pamikil niyu huminang sin kabayaan sin Tuhan. Ayad kamu dayn ha manga napsu mangīꞌ, iban pataptapa niyu tuud in pamikil niyu ha karayawan hirihil kaniyu sin Tuhan, ha waktu pagbalik hi Īsa Almasi mari pa dunya. ¹⁴ Kahagara niyu in manga daakan sin Tuhan sabab in kamu naitung na anak niya. Ayaw niyu na dūli in manga hawa-napsu niyu biyaꞌ sin nakauna, amu in ha waktu wayruun pa panghāti niyu sin kasabunnalan pasal sin Tuhan. ¹⁵ Gām mayan, pagga kamu tiyabbit na sin Tuhan Mahasuchi magad kaniya, na subay niyu pabuntulun na tuud in hinang niyu katān unu-unu na. ¹⁶ Karnaꞌ kiyasulat ha lawm Kitab in Parman sin Tuhan, amu agi, “Wajib subay kamu tau maādil sabab in aku asal mahasuchi.”

¹⁷ Bang in Tuhan manghukum ha mānusiyaꞌ diꞌ siya magdapit minsan hisiyu. In hukuman hirihil niya tumūp tuud ha nahinang sin pakaniya-pakaniya. Hangkan, pagga Amaꞌ in pagtawag niyu ha Tuhan bang kamu mangayuꞌ duwaa kaniya, na subay kamu magmabugaꞌ kaniya ha salugay niyu buhiꞌ dī ha dunya. ¹⁸ Lāgiꞌ, biyaꞌ na sin kiyaiingatan niyu, in kamu liyukat sin Tuhan dayn ha manga addat-tabīat way kapūsan, amu in diꞌ makarā kaniyu pa karayawan, nakawaꞌ niyu dayn ha manga kamaasan niyu. Iban kiyaiingatan niyu da isab sin in piyanglukat kaniyu bukun sadja hāt bulawan atawa pilak amu in kumangīꞌ da. ¹⁹ Sagawaꞌ in piyanglukat niya kātuꞌ duguꞌ-nyawa sin Almasi, amu in wayruun makasibuꞌ. Biyaꞌ siya bili-bili wayruun unu-unu sallaꞌ niya, giyantiꞌ piyagkulbanan pa Tuhan. ²⁰ Ha walaꞌ pa naawn in dunya asal kiyagantaꞌ na sin Tuhan mapatay in Almasi ha supaya malappas niya in manga mānusiyaꞌ dayn ha manga dusa nila. Na, piyanyataꞌ na siya sin Tuhan ha masa bihaun, amu in kahinapusan sin masa, ha supaya kitaniyu matabang niya. ²¹ Dayn ha sabab sin nahinang sin Almasi kātuꞌniyu, in kamu magparachaya na ha Tuhan, amu in nagbuhiꞌ nagbalik ha Almasi dayn ha kamatay iban nagdihil kaniya kalagguan. Hangkan in parachaya iban hulat-hulat niyu himugut na duun ha Tuhan.

²² Na, bihaun pagga kamu nagkahagad na sin hinduꞌ kasabunnalan hi Īsa Almasi, biyutawanan niyu na in manga hinang mangīꞌ, iban tiyubuan na kamu kasi-lasa ha manga pagkahi niyu Almasihin, amu in kasi-lasa bunnal tuud. Hangkan pahūpa tuud pa lawm atay niyu in pagkasi-lasa niyu pakaniya-pakaniya. ²³ Subay kamu maglasa-liyasahi sabab in kamu yan manga anak na sin Tuhan natuꞌ, amu in diꞌ magkamatay. In kamu biyaꞌ hantang sin piyagꞌanak nagbalik dayn ha kusug sin Parman sin Tuhan himūp pa lawm atay niyu. In Parman sin Tuhan makarihil kabuhiꞌ sabunnal iban diꞌ magkapinda kasaumulan. ²⁴ Karnaꞌ kiyasulat ha lawm Kitab, amu agi,

“In mānusiyaꞌ katān biyaꞌ sapantun parang,

iban in katān kabantugan nila biyaꞌ sapantun sumping.

In parang mangluyluy da iban in sumping mapakpak da + 1:24 Hāti niya in mānusiyaꞌ mapatay da, diꞌ mahinang batu. .

²⁵ Sagawaꞌ in Parman sin Tuhan diꞌ mapinda kasaumulan.”

In Parman sin Tuhan amuna in Baytaꞌ Marayaw piyamahalayak mari kaniyu.

Almasi in Biyaꞌ Sapantun Batu Magpahugut sin Bāy sin Tuhan

¹ Na, hangkan butawani niyu na in manga katān hinang niyu mangīꞌ. Ayaw namān kamu magputing iban magpabawꞌ-bawꞌ sadja marayaw sagawaꞌ mangīꞌ in ha lawm atay niyu. Lawaa niyu na in katān pagꞌiggil iban pagpanglimut ha pagkahi niyu. ² Subay in kusug sin bayaꞌ niyu umingat sin Parman sin Tuhan biyaꞌ sin kusug sin bayaꞌ sin bataꞌ-bataꞌ asibiꞌ dumuruꞌ gatas, ha supaya sumulig in pangandul niyu ha Tuhan iban kananaman niyu in kalappasan dayn kaniya. ³ Na, tantu in kamu yan nakananam na sin dayaw sin Panghuꞌ kaniyu.

⁴ Umpigi niyu in Panghuꞌ Īsa Almasi amu in magdirihil sin kabuhiꞌ sabunnal way kahinapusan. Siya in biyaꞌ sapantun hambuuk batu hipaghinang bāy, amu in siyulak sin manga mānusiyaꞌ sabab in pangannal nila wayruun kapūsan niya, sagawaꞌ siya in napīꞌ sin Tuhan iban labi awla mahalgaꞌ kaniya. ⁵ Na, pagga kamu isab kiyarihilan na kabuhiꞌ sabunnal, ungsuran niyu na pa Tuhan in ginhawa-baran niyu, amu in biyaꞌ sapantun batu hipaghinang sin bāy hulaan sin Tuhan. In hāti sin bāy sin Tuhan, amuna in manga tau agad kaniya kapagꞌagihan sin Rū sin Tuhan. Lāgiꞌ, kamu na yan in biyaꞌ manga imam umungsud sin manga lalabutan pa Tuhan. Malayngkan, in lalabutan niyu pa Tuhan bukun biyaꞌ sin manga imam kaibanan, karnaꞌ in hilabut niyu pa Tuhan amuna in pagsarang-sukul iban pagpudji niyu pa Tuhan. Na, dayn ha pasal sin Almasi, in Tuhan kasulutan tuud sin lalabutan niyu kaniya. ⁶ Biyaꞌ na sin pamung sin Tuhan ha Kitab kiyasulat, amu agi,

“Awn napīꞌ ku hambuuk batu mahalgaꞌ tuud,

amu in hibutang ku hipagpahugut sin bāy ku ha dāira Siyun.

Hisiyu-siyu in mangandul ha batu yan,

tantu tuud dihilan kalagguan bukun kasipugan. + 2:6 In pagꞌiyanun batu ini amuna hi Īsa Almasi. ”

⁷ Na, in batu ini tantu tuud mahalgaꞌ kaniyu manga tau nagpaparachaya kaniya. Sagawaꞌ in manga tau diꞌ magparachaya kaniya, ha susūngun makaingat da sin bunnal in kiyabaytaꞌ ha lawm Kitab, amu agi,

“In batu biyugit sin manga maghihinang bāy

amuna in batu nahinang umbulsatu mapagun hipaghinang bāy.”

⁸ Iban kiyabaytaꞌ pa isab ha lawm Kitab, amu agi,

“In batu ini amuna in pagkabungkuan sin manga tau,

hangkan na sila magkaligad.”

Na, bunnal in pamung sin Tuhan. Sabab in manga tau amu in diꞌ magparachaya ha Parman sin Tuhan, in sila yan amu in pagꞌiyanun biyaꞌ hantang naligad. Na, amu yan in kiyagantaꞌ sin Tuhan kanila + 2:8 In manga tau piyagbichara sin nabi, amuna in simulak kan Īsa sabab-karnaꞌ diꞌ sila magparachaya ha Parman sin Tuhan. .

⁹ Sagawaꞌ in kamu bukun biyaꞌ kanila, amu in magparachaya ha Tuhan, karnaꞌ in kamu amuna in pinīꞌ sin Tuhan magad kaniya. Damikkiyan, biyaꞌ da isab kamu manga imam maghulas-sangsaꞌ ha Tuhan, sultan taniyu. Lāgiꞌ in kamu nīyat niya hambuuk bangsa maādil, tau sukuꞌ niya, amu in pinīꞌ niya magpamahalayak pa manga kaibanan mānusiyaꞌ pasal sin karayawan diꞌ mapulaꞌ-pulaꞌ nahinang sin Tuhan. Inīg niya kamu dayn ha katigidluman, diyā pa lawm kasawahan + 2:9 In hāti niya bakas kamu malayuꞌ dayn ha Tuhan pasal sin manga dusa niyu, sagawaꞌ bihaun dayn ha sabab sin nahinang sin Almasi, iyampun na sin Tuhan in manga dusa niyu. . ¹⁰ Sin tagnaꞌ bukun kamu sukuꞌ sin Tuhan, sagawaꞌ bihaun sukuꞌ na kamu sin Tuhan. Iban sin tagnaꞌ wayruun pangingat niyu pasal sin luuy sin Tuhan, sagawaꞌ bihaun kaingatan niyu na, sabab piyakitaꞌ na sin Tuhan in luuy niya kaniyu.

Ayaw Magad sin Addat-tabīat sin Manga Tau Bukun Agad ha Tuhan

¹¹ Na, manga taymanghud ku kalasahan, in kitaniyu ini manghapit-hapit sadja dī ha dunya, sabab in hulaan natuꞌ tuud yadtu didtu ha surgaꞌ. Hangkan junjungun ku kaniyu, ayaw niyu tuud dūli in hawa-napsu niyu mangīꞌ, sabab amu yan in makarā kaniyu magdusa iban makakangīꞌ sin pagꞌagad niyu ha Tuhan. ¹² Parayawa niyu in addat-tabīat niyu ha manga tau diꞌ magparachaya kan Īsa Almasi, ha supaya minsan nila kamu iyanun tau mangīꞌ, pagdatung sin waktu magbalik mari in Almasi, na katumtuman nila na in dayaw sin hinang niyu iban pudjihun nila na in Tuhan.

¹³ Dayn ha sabab-karnaꞌ sin Panghuꞌ natuꞌ Īsa Almasi, pagkahagad kamu ha manga katān tau tagakapatutan ha lawm hulaꞌ. Kahagara niyu in sultan puntukan ha hulaꞌ niyu, ¹⁴ sampay pa manga nagkakaput saraꞌ ha babaan niya, amu in naraak niya tumungbas sin manga hinang mangīꞌ sin manga tau limalanggal saraꞌ iban tumungbas sin manga hinang marayaw sin manga tau miyamagad sin saraꞌ. ¹⁵ Hangkan ku ini junjungun kaniyu, sabab amu yan in kabayaan sin Tuhan hipahinang kaniyu, ha supaya dayn ha sabab sin manga hinang niyu marayaw, humundung na magbichara sin way kapūsan in manga tau, amu in kulang in panghāti (pasal sin kasabunnalan). ¹⁶ Na, pagga kamu puas na dayn ha manga dusa niyu, na in kamu limāya na, sagawaꞌ ayaw kamu magpikil sin makajari na kamu huminang sin unu-unu kabayaan niyu minsan da mangīꞌ sawkat na kamu kiyarihilan na kalimāyahan. Diꞌ niyu yan mahinang daawa. Gām mayan subay niyu hipakitaꞌ dayn ha manga hinang niyu sin in kamu īpun tuud sin Tuhan, amu in magkahagad tuud sin unu-unu katān daakan sin Tuhan. ¹⁷ Pagꞌaddati niyu in tau katān, iban kalasahi niyu in pagkahi niyu Almasihin. Pagmabugaꞌ kamu ha Tuhan, iban pagꞌaddati niyu in sultan puntukan sin hulaꞌ niyu.

Hinduꞌ ha Manga Daraakun

¹⁸ Na, in kamu manga daraakun, ini in hinduꞌ ku kaniyu. Subay niyu kahagarun tuud in daakan kaniyu sin manga piyaghinangan niyu, iban pagꞌaddati niyu tuud sila bukun sadja pasal marayaw in kasuddahan nila kaniyu, sagawaꞌ minsan isab sila mabungis iban mangīꞌ kasuddahan. ¹⁹ Karnaꞌ kasulutan iban tungbasan kamu sin Tuhan pa marayaw, bang niyu sandalan in unu-unu kabinsanaan hibutang kaniyu ha wayruun narusa niyu, sabab taptap pīpikil niyu in daakan sin Tuhan. ²⁰ Malayngkan, bang kamu sumandal kabinsanaan sabab awn kasāan nahinang niyu, na in yan diꞌ tūpun tungbasan pa marayaw. Sagawaꞌ bang kamu sumandal kabinsanaan minsan marayaw in nahinang niyu, na in Tuhan kasulutan kaniyu iban tungbasan niya kamu pa marayaw. ²¹ Na, in sabab hangkan kamu napīꞌ sin Tuhan sukuꞌ niya ha supaya kamu makasandal kabinsanaan biyaꞌ kan Īsa Almasi. Kasulutan in Tuhan bang kamu sumandal kabinsanaan ha wayruun narusa niyu, sabab in Almasi simandal kabinsanaan bukun pasal awn narusa niya, sagawaꞌ sabab-karnaꞌ niyu. Na, dīhilan niya kamu suntuan marayaw singuran niyu. Hangkan urula niyu in limpaꞌ siki niya.

²² “In siya walaꞌ tuud nakarusa

iban walaꞌ tuud nakapagputing minsan nakaminsan.”

²³ Minsan siya piyagsipug-sipug, walaꞌ siya simambung mangīꞌ. Minsan siya bīnsanaꞌ, walaꞌ tuud siya nangantup mamaws. Sagawaꞌ siyangdul niya na sadja in baran niya pa Tuhan, amu in manghukum mabuntul. ²⁴ Iyaku sin Almasi tiyanggung in manga dusa taniyu, hangkan nimanam kabinsanaan in baran niya ha kalansang kaniya pa usuk pagpatayan tau. Hīnang niya yan ha supaya mabugtuꞌ na in manga hinang natuꞌ makarusa, iban ha supaya kitaniyu makahinang na sin unu-unu mabuntul. In kamatay niya amuna in sabab hangkan in kitaniyu puas na dayn ha dusa, diꞌ na siksaun ha adlaw mahuli. ²⁵ In tagnaꞌ biyaꞌ kitaniyu manga bili-bili nalawaꞌ dayn ha nagꞌiipat kātuꞌ, sabab simihaꞌ kitaniyu dayn ha dān tudju pa Tuhan. Sagawaꞌ bihaun nagbalik na kitaniyu miyagad ha Almasi amu in nagjajaga iban nagꞌaayad kātuꞌniyu.

Hinduꞌ pa Manga Magtiyaun

¹ Na, in kamu isab manga kababaihan tagabana subay kamu magad sin kabayaan sin manga bana niyu, ha supaya bang in bana niyu diꞌ magparachaya ha Parman sin Tuhan, na lumugay dayn ha dayaw sin addat niyu marā niyu in bana niyu magparachaya ha Parman sin Tuhan. Minsan kamu diꞌ na magbichara unu-unu kanila ha hāl sin pagparachaya, ² sabab pagkitaꞌ nila sin dayaw sin addat niyu iban sin pagmabugaꞌ niyu, na, marā niyu da sila magparachaya. ³ Iban in lingkat niyu subay bukun dayn ha guwaꞌ sadja. Amu sa pagꞌiyanun dayn ha guwaꞌ bang in lingkat niyu kakitaan sadja dayn ha dayaw sin pagꞌari-ꞌari sin buhuk niyu, atawa ha manga pamulawan iban tamungun niyu malingkat. ⁴ Sagawaꞌ in lingkat niyu subay dayn ha lawm atay, amu in lingkat diꞌ magbaluba, kakitaan dayn ha dayaw sin addat iban babaꞌ sin pangatayan niyu. In lingkat biyaꞌ ha yan amu in labi mahalgaꞌ ha Tuhan. ⁵ Na, biyaꞌ ha yan in lingkat sin manga kababaihan sukuꞌ sin Tuhan ha timpu nakauna yadtu. Nangandul tuud sila ha Tuhan, iban miyamagad sila sin kabayaan sin bana nila. In lingkat nila piyakitaꞌ nila dayn ha dayaw sin addat nila. ⁶ Na, biyaꞌ ha yan in lingkat hi Sahara. Iyaagad niya in kabayaan sin bana niya hi Ibrahim, iban nīyat niya nakuraꞌ in bana niya. Na, bang niyu mahinang in marayaw biyaꞌ ha yan iban diꞌ kamu mabugaꞌ (huminang sin unu-unu marayaw), na, naurul niyu in limpaꞌ siki hi Sahara.

⁷ Na, damikkiyan in kitaniyu manga kausugan tagaasawa, subay marayaw in pagdā natuꞌ ha manga asawa taniyu. Karnaꞌ in sila yan bukun makusug in anggawtaꞌ-baran biyaꞌ kātuꞌniyu. Subay natuꞌ sila pagꞌaddatan sabab in sila yan biyaꞌ da isab kātuꞌniyu makatabuk sin pusakaꞌ sin Tuhan ha susūngun, amu in kabuhiꞌ salama-lama ha surgaꞌ. Na, subay niyu yan hinangun, ha supaya dungugun sin Tuhan in pagpangayuꞌ niyu duwaa kaniya.

Huminang sin Marayaw Minsan Lumabay Kabinsanaan

⁸ Na, mahuli dayn duun ini in hikahinduꞌ ku kaniyu katān. Subay kamu maghambuuk pikilan iban maghangka-atay. Paglasa-liyasahi kamu biyaꞌ sin magtaymanghud. Subay kamu maluuy ha pagkahi niyu, iban subay mababaꞌ in atay niyu. ⁹ Bang awn tau huminang sin mangīꞌ kaniyu, ayaw kamu mamaws huminang isab sin mangīꞌ kanila. Ayaw kamu isab mamūng-mūng ha manga tau namūngmūng kaniyu. Gām mayan tungbasi niyu sila pa marayaw. Pangayui niyu sila duwaa marayaw pa Tuhan, bat sila dihilan sin Tuhan karayawan. In kamu napīꞌ sin Tuhan dihilan karayawan, hangkan subay niyu isab mapakitaꞌ in karayawan dayn ha Tuhan. ¹⁰ Biyaꞌ na sin kiyasulat ha lawm Kitab, amu agi.

“Hisiyu-siyu in mabayaꞌ magkūg-kuyag dī ha lawm dunya ha salugay niya buhiꞌ

iban mabayaꞌ siya dumayaw in kahālan niya,

subay siya diꞌ magbichara sin mangīꞌ

iban subay siya diꞌ magputing.

¹¹ Subay niya butawanan na in manga hinang niya mangīꞌ, iban huminang na siya sin marayaw.

Subay niya pagtuyuan lawagun in dān hikapagsulut niya iban sin manga pagkahi niya.

¹² Karnaꞌ jiyajagahan sin Tuhan in manga tau mabuntul,

iban dungugun niya in pagpangayuꞌ nila duwaa.

Sagawaꞌ marugal siya ha manga tau naghihinang sin mangīꞌ.”

(Na, amu yan in bichara ha lawm Kitab.)

¹³ Lāgiꞌ hisiyu taꞌ in mangjilakaꞌ kaniyu bang kamu matuyuꞌ tuud huminang sin marayaw? ¹⁴ Bat malayngkan, minsan kamu mabinsanaꞌ sabab sin hinang niyu marayaw, pagkūg-kuyag kamu sabab awn karayawan niyu dayn ha Tuhan! Ayaw kamu mabugaꞌ minsan hisiyu in mangjilakaꞌ kaniyu iban ayaw kamu masusa. ¹⁵ Sagawaꞌ pagmabugaꞌ tuud kamu ha Almasi dayn ha lawm atay niyu. Subay siya in pagtagꞌīpunan niyu. Iban subay kamu asal sakap sumambung ha hisiyu-siyu na tau mangasubu kaniyu bang maytaꞌ kamu magparachaya ha Almasi iban unu in hiyuhuwat-huwat niyu makawaꞌ dayn kaniya. ¹⁶ Sagawaꞌ subay maayuyuꞌ iban maaddat in kaagi niyu sumambung sin pangasubu nila. Tantuha niyu tuud in baran niyu sin wayruun tuud unu-unu mangīꞌ nahinang niyu amu in makasipug kaniyu, ha supaya bang awn manipug-sipug kaniyu pasal sin hinang niyu marayaw bilang agad ha Almasi, na sila in balik-balik sumipug sin manga kiyabichara nila. ¹⁷ Karnaꞌ marayaw pa kamu numanam kabinsanaan pasal sin nahinang niyu marayaw, bang dayn ha kahandak sin Tuhan, dayn sin mabinsanaꞌ kamu pasal nakahinang kamu mangīꞌ. ¹⁸ Sabab minsan isab in Almasi nimanam da kabinsanaan iban miyatay siya, bukun pasal awn narusa niya, sabab in siya wayruun tuud dusa, sagawaꞌ miyatay siya sabab-karnaꞌ sin kitaniyu katān manga baldusa ha supaya niya kitaniyu marā magbalik pa Tuhan. Miyatay siya magꞌīg sin dusa natuꞌ saꞌ nagminsan da. Diꞌ na tuud siya mapatay magbalik. Bunnal piyatay siya sin tau, sagawaꞌ biyuhiꞌ da siya nagbalik sin Rū sin Tuhan.

¹⁹ Lāgiꞌ, dayn ha kusug sin Rū sin Tuhan yaun duun kaniya, miyadtu siya nagpamahalayak sin kamakbulan sin Baytaꞌ Marayaw pa manga nyawa napipilisu ha Ahirat. ²⁰ In manga nyawa napipilisu ini, amuna in nyawa sin manga tau walaꞌ nagkahagad ha daakan sin Tuhan ha timpu buhiꞌ pa hi Nū. Dīhilan sila waktu sin Tuhan magtawbat sin manga dusa nila ha saꞌbu hi Nū naghihinang sin bahitraꞌ. Sagawaꞌ pagdatung sin umbak tawpan, tiyuꞌ-tiyuꞌ da tau, walungka-tau da in miyagad ha bahitraꞌ, amu in nalappas walaꞌ naluꞌmus ha dagat. ²¹ Na, in kalappasan nila yadtu hambuuk pangitaan natuꞌ bihaun sin in pagliguꞌ amu in makalappas kātuꞌniyu dayn ha kasiksaan. In pagliguꞌ ini bukun pagsuchi sin anggawtaꞌ-baran, sagawaꞌ hambuuk tandaꞌ sin tuꞌlid tuud in pagpangayuꞌ natuꞌ kaampunan dayn ha Tuhan, bat maīg in unu-unu mangīꞌ dayn ha lawm atay natuꞌ. Iban hangkan kitaniyu makabaak kalappasan dayn ha kasiksaan, sabab in Almasi nabuhiꞌ nagbalik dayn ha kamatay. ²² Na, bihaun yadtu na in Almasi ha surgaꞌ limilingkud ha dapit pa tuu sin Tuhan, kiyarihilan sin salagguꞌ-lagguꞌ kawasa. Siya na in makapagbayaꞌ ha manga malāikat iban ha manga unu-unu katān tagakawasa ha surgaꞌ.

¹ Manjari, pagga natuꞌ kaingatan na sin nabinsanaꞌ in ginhawa-baran sin Almasi dī ha dunya, na subay kamu biyaꞌ kaniya sakap sumandal kabinsanaan. Sabab hisiyu-siyu in sumandal kabinsanaan (sabab-karnaꞌ sin pagꞌagad niya ha Almasi), na maīg na in bayaꞌ niya huminang sin unu-unu makarusa. ² Na, tagnaan dayn ha bihaun, subay niyu diꞌ na dūlan in manga hawa-napsu niyu mangīꞌ; sagawaꞌ subay in hinangun niyu, in unu-unu kabayaan sin Tuhan ha salugay niyu buhiꞌ. ³ Sarang na sin manga waktu limabay himinang kamu sin manga mangīꞌ biyaꞌ sin manga hinang kasūban tuud sin manga tau way Tuhan nila. Naghinang kamu sin manga unu-unu maasihat iban nagnapsu kamu sin manga unu-unu mangīꞌ. Masūb tuud kamu magꞌinum sin manga makahilu, iban nakalanduꞌ tuud in paglami-lami niyu iyaagaran niyu sin paghilu. Lāgiꞌ nagsumba kamu sin manga barhalaꞌ amu in satruꞌ tuud sin Tuhan. ⁴ Na, asal nainu-inu in manga tau way Tuhan nila, sabab diꞌ na kamu magad kanila huminang sin manga kangīan nasabbut ku yan. Iban iyudjuꞌ-udjuꞌ nila na kamu. ⁵ Sagawaꞌ awn da waktu ha susūngun in sila yan mamayhuꞌ da pa Tuhan mamaytaꞌ pasal in katān nahinang nila dī ha dunya. Na, in Tuhan asal sakap dumihil hukuman kuꞌnu-kuꞌnu waktu ha katān mānusiyaꞌ, buhiꞌ iban patay. ⁶ Hangkan na in Baytaꞌ Marayaw pasal sin Almasi piyamahalayak sampay pa manga patay (sin waktu buhiꞌ pa sila), ha supaya minsan miyatay na in anggawtaꞌ-baran nila, karnaꞌ asal amuna yan in gantaan sin mānusiyaꞌ katān, in manga nyawa nila makapaghambuuk iban Tuhan salama-lama didtu ha surgaꞌ.

In Ingat-kapandayan Natuꞌ dayn ha Tuhan Subay Hipanabang ha Manga Pagkahi Natuꞌ

⁷ Masuuk na makiyamat in dunya hangkan parayawa niyu, in pamikil niyu, iban ayad kamu dayn ha manga napsu mangīꞌ ha supaya wayruun sasat sin pagpangarap niyu pa Tuhan. ⁸ Lāgiꞌ labi awla na tuud paglasa-liyasahi tuud kamu karnaꞌ dayn ha pasal sin pagkasi-lasa natuꞌ, diꞌ na kitaniyu magparuli sin kangīan iban kasāan nahinang sin kaibanan natuꞌ. ⁹ Ayaw kamu magsumlut magpakaun iban magpahantiꞌ ha manga pagkahi niyu, bang sila mawn pa bāy niyu. ¹⁰ In kitaniyu katān pakaniya-pakaniya dīrihilan sin Tuhan ingat-kapandayan. Ginis-ginisan in ingat-kapandayan dīhil niya kātuꞌniyu. Na, in manga ingat-kapandayan natuꞌ subay hipaglagi natuꞌ ha hikarayaw hipanabang ha manga pagkahi natuꞌ. ¹¹ Na, bang kamu kiyarihilan ingat-kapandayan magnasīhat, na pagnasīhat tuud kamu marayaw biyaꞌ sin tau tūp tuud magpasampay sin Parman sin Tuhan. Bang kamu kiyarihilan sin ingat-kapandayan tumabang ha pagkahi niyu, na panabangan niyu tuud in kusug kiyarihil kaniyu sin Tuhan, ha supaya dayn ha sabab sin unu-unu marayaw nahinang niyu dayn ha tulung-tabang hi Īsa Almasi kaniyu, pudjihun sin manga tau in Tuhan. Siya tuud in tūp lagguun natuꞌ, sabab wayruun kahinapusan sin kusug sin kawasa niya. Amin.

In Kabinsanaan sin Manga Tau Agad ha Almasi

¹² Na, manga bagay ku kalasahan, ayaw kamu mainu-inu sin kabinsanaan dakulaꞌ kimugdan kaniyu, sabab in yan panulay-sulay sadja sin Tuhan sin hugut sin īman niyu. Asal in katān Almasihin numanam sadja kabinsanaan. ¹³ Gām mayan pagkūg-kuyag kamu bang kamu numanam kabinsanaan, sabab biyaꞌ da kamu imunung ha Almasi nimanam sin kabinsanaan liyabayan niya. Na, bang niyu sandalan in kabinsanaan niyu, ha susūngun magkūg-kuyag da isab kamu bang dumatung na in waktu hipanyataꞌ na tuud in kawasa iban kalagguan sin Almasi ha kakitaan sin tau katān. ¹⁴ Bang kamu sipug-sipugun sin manga tau pasal sin agad kamu ha Almasi, na amu yan in tandaꞌ sin yan himuhūp kaniyu in Rū sin Tuhan, amu in mangdirihil kalagguan. Hangkan subay kamu magkūg-kuyag. ¹⁵ Bat malayngkan tantuha niyu, bang kamu numanam kabinsanaan, in yan subay bukun pasal namunuꞌ kamu atawa nanakaw atawa nakalanggal saraꞌ atawa nanglamud-lamud sin parakalaꞌ sin kaibanan. ¹⁶ Sagawaꞌ bang kamu numanam kabinsanaan pasal sin Almasihin kamu, na ayaw kamu masipug. Gām mayan pagsarang-sukul kamu pa Tuhan sin in kamu sukuꞌ sin Almasi.

¹⁷ Karnaꞌ timagnaꞌ na bihaun in waktu sin Tuhan dumihil hukuman ha manga mānusiyaꞌ. Lāgiꞌ in kitaniyu sukuꞌ niya, amu in makauna niya butangan hukuman, hangkan na lumabay kitaniyu kabinsanaan bihaun. Na, bang in kitaniyu sukuꞌ niya butangan niya da hukuman, na amu pa ka in diꞌ niya butangan hukuman in manga tau diꞌ magparachaya sin Baytaꞌ Marayaw dayn ha Tuhan? Diꞌ hikatugilaꞌ in kabinsanaan nila yan ha susūngun! ¹⁸ Biyaꞌ na sin kiyabaytaꞌ ha lawm Kitab, amu agi.

“Bang in manga tau mabuntul kahunitan malappas,

tantu diꞌ malappas in manga tau baldusa iban manga tau diꞌ mabugaꞌ ha Tuhan.”

¹⁹ Na, hangkan bang kamu numanam kabinsanaan dayn ha kahandak sin Tuhan, ayaw niyu bugtua in hinang niyu marayaw iban pangandulan niyu tuud in baran niyu pa Tuhan, amu in nagpapanjari kaniyu, karnaꞌ diꞌ niya tuud balubahun in janjiꞌ niya kaniyu sin diꞌ niya kamu pasāran.

Hinduꞌ ha Manga Nagtatau-maas ha Manga Almasihin

¹ Na, yari awn hibichara ku ha manga nagtatau-maas ha manga Almasihin duun. In aku ini hambuuk da isab tau-maas biyaꞌ kaniyu. Kiyasaksian ku tuud sin duwa mata ku in manga kabinsanaan liyabayan sin Almasi. Lāgiꞌ ha susūngun awn lamud ku ha kalagguan dīhil sin Tuhan ha Almasi. Na, pangayuun ku tuud kaniyu, ² upiksaa niyu tuud marayaw in manga tau agad ha Almasi, amu in biyaꞌ sapantun manga bili-bili piyangandul sin Tuhan hipaipat kaniyu. In kabayaan sin Tuhan tulus-ihilas tuud in pagꞌipat niyu kanila, bukun biyaꞌ kiyalugusan sadja kamu. Hinanga in hinang niyu bukun pasal gadji in iyapas niyu, sagawaꞌ pasal sin mabayaꞌ tuud kamu maghulas-sangsaꞌ kanila. ³ Ayaw niyu pagmandahi in manga tau kiyapangandul kaniyu, sagawaꞌ subay kamu in suntuan marayaw ha supaya sila magad kaniyu. ⁴ Na, bang magbalik na mari pa dunya hi Īsa Almasi, amu in piyagbahasa umbulsatu magꞌiipat bili-bili, matabuk niyu na in tungbas sin hinang niyu, amu in kalagguan way kahinapusan niya.

⁵ Damikkiyan, in kamu manga kausugan bataꞌ baꞌgu, subay kamu magkahagad tuud sin hinduꞌ sin manga nagtatau-maas kaniyu. Iban in kamu katān subay mababaꞌ in atay niyu ha supaya kamu makapagtabang-tiyabangi pakaniya-pakaniya, karnaꞌ kiyabaytaꞌ ha lawm Kitab, amu agi,

“Satruꞌ sin Tuhan in manga tau abbuhan,

sagawaꞌ tiyatabang niya in manga tau mababaꞌ in atay.”

⁶ Hangkan pagpatibabaꞌ kamu ha Tuhan sangat-kawasa, ha supaya niya kamu lagguun bang maabut na in waktu gantaꞌ niya. ⁷ Sangdulan niyu kaniya in unu-unu katān kasusahan niyu, sabab siya in magparuli kaniyu.

⁸ Ayad kamu dayn ha manga napsu mangīꞌ, iban jaga kamu dayn ha sasat sin Saytan Puntukan, sabab in siya kuntara natuꞌ naglulunsul pawyu-pawyu biyaꞌ sin sattuwa singaꞌ, nagꞌiigul sadja maglawag sin makaun niya. ⁹ Pahuguta in pangandul niyu pa Tuhan, iban ayaw tuud kamu magad ha sasat sin Saytan Puntukun, sabab amu in tumtuma niyu bukun sadja kamu in nimananam kabinsanaan. Minsan isab in kaibanan Almasihin pagkahi niyu ha kahulaꞌ-hulaan dī ha lawm dunya nimananam da sin ginis-ginisan kabinsanaan biyaꞌ da isab sin liyabayan niyu.

¹⁰ Sagawaꞌ hangkarayꞌ da kamu numanam kabinsanaan. Pagꞌubus yadtu īgan na sin Tuhan in katān sallaꞌ niyu, pahugutun niya na in lawm atay niyu iban sin pangandul niyu kaniya. In Tuhan, amu in puunan sin katān karayawan, bayngꞌulungun tuud. Hangkan pinīꞌ niya kamu palamurun sin kalagguan niya, amu in way kahinapusan, sabab sin paghambuuk niyu iban sin Almasi. ¹¹ Matūp bang in Tuhan lagguun, sabab siya in sangat-kawasa ha unu-unu katān kasaumulan! Amin.

Kahinapusan Hilalaungan

¹² Hi Silas in nagtabang kākuꞌ nagsulat sin sulat ku ini hawpuꞌ. In siya hambuuk pagkahi natuꞌ agad ha Almasi, kapangandulan ku tuud. Na, hangkan ta kamu siyulatan ha supaya mapakusug ku in pangatayan niyu iban mapaingat ku kaniyu in kasabunnalan pasal sin lasa iban tulung-tabang sin Tuhan kaniyu katān. Na, gunggungi niyu tuud mahugut in lasa iban tulung-tabang sin Tuhan kaniyu.

¹³ Na, in manga taymanghud niyu Almasihin dī ha hulaꞌ ini, amu in (biyaꞌ sapantun) hulaꞌ Babilun, yari nagpasampay sin salam-duwaa nila kaniyu. In sila ini napīꞌ da isab sin Tuhan biyaꞌ kaniyu. Damikkiyan, in hi Markus amu in biyaꞌ na anak ku, nagpasampay da isab sin salam-duwaa niya kaniyu. ¹⁴ Pakitaan niyu in paglasa-liyasahi niyu pakaniya-pakaniya.

Na, mahuli dayn duun, mura-murahan bang mayan in kamu katān sukuꞌ sin Almasi sumannyang in lawm atay niyu.

Wassalam.