Romanos

LA EPÍSTOLA DEL APÓSTOL SAN PABLO A LOS ROMANOS

Salutación

¹Huēj gu̱ꞌnaj Pablo, tsínj huin apóstol garun nuguanꞌ nan. Ni̱ ꞌyaj sūnj rian Jesucristo. Ni̱ gaquínj Jesucristo manꞌānj sisi̱ ga̱huin ninīj ga̱ꞌmī si-nu̱guanꞌ Yanꞌanj rian ni ngüi̱ aj. ²Ni̱ hua gataj yya Yanꞌanj nuguanꞌ daj rian ni tsínj gaꞌmi si-nu̱guanꞌ Yanꞌanj asi̱j ná. Ni̱ garun ni síꞌ nuguanꞌ daj rian yanj.

³Ni̱ nuguanꞌ daj aꞌmi xiꞌí daꞌníj Yanꞌanj huin Jesucristo, tsínj nicaj sun rian néꞌ. Ni̱ hué sij huin daꞌníj daꞌni̱ siꞌni̱ xíꞌ David gaꞌnga sij xungüi̱ nan. ⁴Sani̱ güenda niman sij, ni̱ huin sij daꞌníj Yanꞌanj, gataj Espíritu Santo huin Espíritu sa̱ꞌ. Ni̱ hua nucuaj sij, gataj Espíritu Santo nej. Ni̱ niꞌi néꞌ sisi̱ nucuaj sij xiꞌí si ganáꞌnij sij scanij ni níman, guiꞌyaj Yanꞌanj anj.

⁵Ni̱ xiꞌí Jesucristo guiꞌyaj Yanꞌanj ꞌngo̱ sinduj rian ni únj sisi̱ ga̱ꞌmi únj nuguanꞌ sa̱ꞌ daj rian ni ngüi̱. Hué dan ni̱ nga̱ daranꞌ ni xungüi̱ ma̱n chruhua xungüi̱ gui̱man ni ngüi̱ xu̱man ruhua ni̱ꞌyaj Jesucristo. Ni̱ xiꞌí si ꞌi̱ ruhua ni sij niꞌyaj ni sij síꞌ, ni̱ da̱gahuin ni sij si-nu̱guanꞌ síꞌ nej. ⁶Ni̱ gaquínj Yanꞌanj manꞌan ni é re̱ꞌ nej sisi̱ gui̱nicaj dugüiꞌ a ni é re̱ꞌ nga̱ Jesucristo.

⁷Ni̱ aꞌnī nuguanꞌ nan rian daranꞌ ni é re̱ꞌ ma̱n xumanꞌ Roma. Ni̱ ꞌi̱ ruhua Yanꞌanj niꞌya a ni é re̱ꞌ. Ni̱ gaquínj Yanꞌanj ni é re̱ꞌ sisi̱ ga̱huin sa̱ꞌ niman án re̱ꞌ. Ni̱ huin ruhuāj sisi̱ Yanꞌanj huin chréꞌ nga̱ Señor Jesucristo gui̱ꞌyaj sinduj rian án re̱ꞌ. Ni̱ ga̱huin dinꞌinj ruhua ni é re̱ꞌ, ruhuāj aj.

Deseo de Pablo de visitar a Roma

⁸Hua sini ni̱ aꞌuīj si guruhua Yanꞌanj rian xiꞌí a ni é re̱ꞌ. Ni̱ hué daj aꞌmī xiꞌí Jesucristo. Daj si ni̱nꞌ ga̱chraꞌ aꞌmi ni ngüi̱ da̱j xuman ruhua ni é re̱ꞌ niꞌyaj ni é re̱ꞌ Jesucristo aj. ⁹Ni̱ ꞌyaj sūnj rian Yanꞌanj aꞌmī si-nu̱guanꞌ daꞌni Jesucristo rian ni ngüi̱. Ni̱ xiꞌí daj niꞌi Yanꞌanj sisi̱ yaꞌyoj nu̱n ruhuāj niꞌīnj ni é re̱ꞌ ngaa achínj jniꞌyā rian Yanꞌanj. ¹⁰Ni̱ achínj jniꞌyā rian Yanꞌanj sisi̱ ga̱ꞌuej ruhua Yanꞌanj, ni̱ ga̱ꞌue gui̱sī rian ma̱n a ni é re̱ꞌ aj. ¹¹Daj si huin ruhuāj gui̱niꞌīnj ni é re̱ꞌ, ni̱ chra̱cuij yunꞌūn ꞌngo̱ nuguanꞌ sa̱ꞌ güenda niman ni é re̱ꞌ. Ngaa ni̱ ga̱huin ni̱ca niman ni é re̱ꞌ nga̱ si-chrej Yanꞌanj, ruhuāj aj. ¹²Ngaa ni̱ ngaa na̱riꞌ dugüiꞌ néꞌ, ni̱ na̱riꞌ nucuaj niman néꞌ xiꞌí si xuman ruhua néꞌ niꞌi néꞌ Jesucristo. ¹³Ni̱ huin ruhuāj si gui̱niꞌi a ni é re̱ꞌ sisi̱ gaꞌi̱ gahuin ruhuāj ga̱nꞌanj ni̱ꞌyā rian ma̱n ni é re̱ꞌ huin ni é re̱ꞌ jnān nga̱ xicaꞌuī. Sani̱ asi̱j acuanꞌ naꞌue si gui̱sī rian ma̱n án re̱ꞌ si hua ꞌngo̱ rasu̱n ꞌyaj. Daj si huin ruhuāj si ga̱huin nucuaj chruhua niman ni é re̱ꞌ, gui̱ꞌyaj si-nu̱guanꞌānj. ¹⁴Ni̱ hua nia̱n si ga̱ꞌmī nuguanꞌ sa̱ꞌ rian ni ngüi̱ aꞌmi snanꞌanj griego nga̱ ni ngüi̱ aꞌmi ango snanꞌanj nej. Ni̱ hua nia̱n si ga̱ꞌmī nuguanꞌ sa̱ꞌ rian ni ngüi̱ chru̱n sa̱ꞌ nga̱ ni ngüi̱ nitaj si chru̱n nej aj. ¹⁵Xiꞌí daj ni̱ huin ruhuāj sisi̱ ráꞌyanj gui̱man néꞌ ga̱ꞌmī si-nu̱guanꞌ Yanꞌanj rian a ni é re̱ꞌ ma̱n xumanꞌ Roma aj.

El poder del evangelio

¹⁶Nitaj si huin na̱ꞌā nga̱ nuguanꞌ sa̱ꞌ xiꞌí Cristo mánj. Daj si nuguanꞌ daj huin si nucuaj ni̱nꞌ ruhua xiꞌí si nacaj Yanꞌanj ni ngüi̱ xuman ruhua niꞌyaj Jesucristo. Ni̱ huin ruhua manꞌan Yanꞌanj na̱caj sinij ni ngüi̱ israelita. Sani̱ huin ruhua Yanꞌanj na̱ca ni ngüi̱ ꞌna̱ꞌ anéj chrej nej. ¹⁷Ni̱ xiꞌí si xuman ruhua néꞌ niꞌyaj néꞌ Yanꞌanj, ni̱ digyán nuguanꞌ sa̱ꞌ daj sisi̱ ꞌyaj ni̱ca Yanꞌanj nga̱ néꞌ. Ni̱ ꞌyaj Yanꞌanj daj sisi̱ gu̱xuman ruhua néꞌ ni̱ꞌyaj néꞌ Jesucristo. Ni̱ hué daj garun ni tsínj gaꞌmi si-nu̱guanꞌ Yanꞌanj asi̱j ná. Ni̱ gataj ni sij: “Hua ni̱ca ruhua ni tsínj xuman ruhua niꞌyaj Jesucristo. Ni̱ ga̱ne ni̱ganj ni síꞌ nga̱ Yanꞌanj anj.” Daj gataj ni sij.

La culpabilidad del hombre

¹⁸Ni̱ hua digyán Yanꞌanj rian néꞌ sisi̱ aꞌman ruhua Yanꞌanj niꞌya daranꞌ si xi̱ꞌi ꞌyaj ni ngüi̱. Ni̱ hué daj aꞌman ruhua Yanꞌanj niꞌya ni tsínj nitaj si ꞌyaj ni̱ca nej. Daj si arij hui̱ ni sij nuguanꞌ xa̱ngaꞌ güenda si acaj ni sij ango chrej quij hua achéj ni sij. ¹⁹Daj si hua niꞌi yya ni sij daranꞌ nuguanꞌ ga̱ꞌue gui̱niꞌi néꞌ xiꞌí Yanꞌanj si hua digyán yya Yanꞌanj ni nuguanꞌ daj chruhua niman ni sij. ²⁰Ni̱ naꞌue gui̱niꞌi rian néꞌ Yanꞌanj mánj. Sani̱ asi̱j guiꞌyaj Yanꞌanj xungüi̱, ni̱ guiniꞌi yya ni ngüi̱ da̱j nucuaj manꞌan Yanꞌanj. Ni̱ guiniꞌi ni sij xiꞌí ni rasu̱n nico guiꞌyaj Yanꞌanj. Ni̱ xiꞌí daj sisi̱ ga̱taj ni sij sisi̱ nun niꞌi ni sij Yanꞌanj, ngaa ni̱ tsínj nne̱ huin ni sij. Daj si hua guiniꞌi ni sij daranꞌ rasu̱n guiꞌyaj Yanꞌanj anj.

²¹Ni̱ nu̱nj si guiniꞌi ni sij da̱j hua Yanꞌanj, sani̱ nun gataj ni sij sisi̱ hua sa̱ꞌ Yanꞌanj mánj. Ni̱ naꞌuej ruhua ni sij ga̱ꞌuiꞌ ni sij si guruhua Yanꞌanj nej. Sani̱ si ani ruhua ni sij nitaj si níꞌyanj mánj. Ni̱ hua ru̱miꞌ niman ni sij ꞌyaj si nunun ni sij. ²²Ataj ni sij si chru̱n sa̱ꞌ ni sij. Sani̱ huin ni sij tsínj ni̱ꞌyun. ²³Sani̱ nu̱n yanꞌanj ni sij ni yanꞌanj guiꞌyaj raꞌa ni sij. Ni̱ da̱j rúnꞌ hua ꞌngo̱ tsínj nga̱ xataj nej, xucu nu̱n ga̱nꞌanj raꞌa nej, xucu aca riqui rian yoꞌój huin yanꞌanj guiꞌyaj raꞌa ni sij. Ni̱ xiꞌí si hué daj ꞌyaj ni sij, ni̱ ga̱ni ruhua ango ni ngüi̱ sisi̱ hué daj hua manꞌan Yanꞌanj xa̱ngaꞌ nej.

²⁴Xiꞌí daj ni̱ gaꞌninꞌ ruhua Yanꞌanj sisi̱ gui̱ꞌyaj quij ni sij da̱j rúnꞌ ga̱ranꞌ ruhua ni sij, gui̱ꞌyaj ni sij. Ngaa ni̱ guiꞌyaj ni sij ni rasu̱n hua na̱ꞌaj nga̱ ni manꞌan ni dugüiꞌ ni sij. ²⁵Ni̱ nuguanꞌ xa̱ngaꞌ ꞌna̱ꞌ rian Yanꞌanj, ni̱ nun xu̱man ruhua ni sij. Sani̱ nanoꞌ ni sij nuguanꞌ yya̱. Ni̱ nu̱n yanꞌanj ni sij nicoꞌ ni sij ni rasu̱n guiꞌyaj Yanꞌanj. Sani̱ nitaj si guinicoꞌ ni sij manꞌan Yanꞌanj mánj. Ni̱ hua nia̱n si ga̱ꞌmi sa̱ꞌ néꞌ ni̱ganj ni̱nꞌ xiꞌí Yanꞌanj. Amén.

²⁶Xiꞌí daj ni̱ gaꞌninꞌ ruhua Yanꞌanj sisi̱ gui̱ꞌyaj quij ni sij nga̱ ni rasu̱n hua na̱ꞌaj da̱j rúnꞌ garanꞌ ruhua ni sij. Daj si duna ni yunꞌunj xa̱na si gaꞌmi unj nga̱ nica̱ unj. Ni̱ da̱j rúnꞌ ꞌyaj ꞌngo̱ yunꞌunj ngaa aꞌmi unj nga̱ ꞌngo̱ tsínj, hué daj guiꞌyaj unj gaꞌmi unj nga̱ dugüiꞌ unj. ²⁷Ni̱ hué daj gaxi̱ꞌi guiꞌyaj ni tsínj nej. Daj si duna ni sij si gaꞌmi ni sij nga̱ nica̱ ni sij. Ni̱ ni̱nꞌ ruhua huin ruhua ni sij ga̱ꞌmi ni sij nga̱ ni dugüiꞌ ni sij nej. Ni guiꞌyaj ni sij ꞌngo̱ rasu̱n na̱ꞌaj nga̱ ango ni tsínj huin dugüiꞌ ni sij. Ni̱ ri̱an xiꞌí gaquinꞌ daj huin guiranꞌ ni sij castigo güenda si duna ni sij si-chrej Yanꞌanj.

²⁸Ni̱ ri̱an naꞌuej ruhua ni sij xacaj ni sij cuenta xiꞌí Yanꞌanj, ni̱ gaꞌninꞌ ruhua Yanꞌanj si ga̱ni quij ruhua ni sij. Xiꞌí daj ni̱ guiꞌyaj ni sij ni rasu̱n si̱ gaꞌue gui̱ꞌyaj néꞌ. ²⁹Ni̱ nu̱n ni nuguanꞌ quij chruhua niman ni sij xiꞌí si nitaj si ꞌyaj ni̱ca ni sij nga̱ dugüiꞌ ni sij. Ni̱ huin ruhua ni sij gui̱ꞌyaj squi̱raꞌ ni sij nga̱ dugüiꞌ ni sij. Ni̱ nu̱n nuguanꞌ xi̱ꞌi chruhua niman ni sij nej. Ni̱ huin ruhua ni sij si-ꞌyaj dugüiꞌ ni sij. Ni̱ nu̱n nuguanꞌ hua quij chruhua niman ni sij. Ni̱ xicoj ruhua ni sij nej. Ni̱ dagahuiꞌ ni sij níman nej. Ni̱ ununꞌ ni sij nga̱ ni dugüiꞌ ni sij. Ni̱ digyaꞌ yunꞌunj ni sij ni dugüiꞌ ni sij. Ni̱ ꞌyaj ni sij ango ni rasu̱n quij hua nej. ³⁰Ni̱ aꞌmi quij ni sij xiꞌí ango ni dugüiꞌ ni sij. Ni̱ nun huin xa̱nꞌ ni sij niꞌyaj ni sij Yanꞌanj. Ni̱ nunun ni sij si aꞌmi dugüiꞌ ni sij. Ni̱ nne̱ ni̱nꞌ ruhua ni sij. Ni̱ huin yanꞌanj ruhua ni sij nga̱ dugüiꞌ ni sij. Ni̱ nanoꞌ ni sij ꞌngo̱ chrej quij hua. Ni̱ nun ráj xina ni sij rian chrej ni sij nga̱ nni ni sij. ³¹Tsínj ni̱ꞌyun huin ni sij. Ni̱ nun síj ni sij nga̱ si-nu̱guanꞌ ni sij. Ni̱ nitaj si ꞌi̱ ruhua ni sij niꞌyaj ni sij go̱ꞌngo ni dugüiꞌ ni sij. Ni̱ nun niꞌi ni sij gui̱nicaj ni sij ꞌngo̱ niman nico. Ni̱ naꞌue ga̱ni yaco ruhua ni sij ni̱ꞌyaj ni sij ni dugüiꞌ ni sij. ³²Ni̱ nu̱nj si niꞌi sa̱ꞌ ni sij sisi̱ ga̱huin castigo ni ngüi̱ ꞌyaj ni gaquinꞌ daj, gui̱ꞌyaj Yanꞌanj, sani̱ hua gue̱ ꞌyaj ni sij gaquinꞌ daj. Ni̱ huin nia̱ꞌ ruhua ni sij niꞌi ni sij si ꞌyaj ango dugüiꞌ ni sij gaquinꞌ daj.

El justo juicio de Dios

¹Nitaj si guiꞌya sisi̱ u̱n tsínj huín re̱ꞌ. Sisi̱ utáꞌ re̱ꞌ gaquinꞌ dugüíꞌ re̱ꞌ, ni̱ daꞌui manꞌán re̱ꞌ gaquinꞌ nej aj. Sisi̱ atáj re̱ꞌ si daꞌui dugüíꞌ re̱ꞌ gaquinꞌ, sani̱ utáꞌ re̱ꞌ gaquinꞌ manꞌán re̱ꞌ nej. Daj si uyan ꞌyaj manꞌán re̱ꞌ gaquinꞌ nga̱ dugüíꞌ re̱ꞌ. ²Ni̱ niꞌi néꞌ sisi̱ duguꞌna̱j huaj sisi̱ gui̱ꞌyaj Yanꞌanj castigo ni tsínj ꞌyaj ni rasu̱n quij. Daj si xa̱ngaꞌ manꞌan Yanꞌanj. ³Ni̱ sisi̱ utáꞌ re̱ꞌ gaquinꞌ ni dugüíꞌ re̱ꞌ ngaa hué daj ꞌyaj manꞌán re̱ꞌ nej, ngaa ni̱ si̱ gani ruhuá re̱ꞌ si gui̱nani re̱ꞌ rian si-castigo Yanꞌanj mánj. ⁴Ni̱ nu̱nj si huin sa̱ꞌ ruhua Yanꞌanj niꞌyáj re̱ꞌ, ni̱ ꞌueé ni̱nꞌ ruhua huin ruhua Yanꞌanj niꞌyáj re̱ꞌ nej, ni̱ aꞌninꞌ ruhua Yanꞌanj niꞌya re̱ꞌ nej, sani̱ nitaj ducuánj nicáj re̱ꞌ ga̱ꞌmi re̱ꞌ rian Yanꞌanj mánj. Ni̱ nun niꞌí re̱ꞌ sisi̱ daranꞌ ni nuguanꞌ sa̱ꞌ daj ꞌyaj Yanꞌanj nga̱ re̱ꞌ huin güenda si ga̱nani ruhuá re̱ꞌ xiꞌí si-ga̱quinꞌ re̱ꞌ.

⁵Ni̱ ri̱an nunún re̱ꞌ, ni̱ naꞌuej ruhuá re̱ꞌ ga̱nani ruhuá re̱ꞌ xiꞌí si-ga̱quinꞌ re̱ꞌ, ni̱ na̱anj sa̱ꞌ utáꞌ re̱ꞌ doj gaquinꞌ xiráj re̱ꞌ güi ga̱ꞌnaꞌ Yanꞌanj gui̱ꞌya castigo ni ngüi̱ aj. Ni̱ hua ni̱ca daranꞌ si gui̱ꞌyaj Yanꞌanj gui̱niꞌi ni ngüi̱. ⁶Ni̱ da̱j ni̱ca guiꞌyaj go̱ꞌngo néꞌ chruhua xungüi̱ nan, ni̱ hué daj gui̱ꞌyaj Yanꞌanj nga̱ néꞌ.

⁷Ni̱ gui̱ꞌyaj Yanꞌanj sisi̱ ga̱ne ni̱ganj ni tsínj duguꞌnunꞌ gui̱ꞌyaj sa̱ꞌ ni sij nga̱ dugüiꞌ ni sij. Daj si nanoꞌ ni sij ga̱ne ꞌueé ni sij nga̱ Yanꞌanj. Ni̱ huin ruhua ni sij ga̱huin sa̱ꞌ ni sij rian Yanꞌanj. Ni̱ ga̱ne ni̱ganj ni sij nga̱ Yanꞌanj, ruhua ni sij. ⁸Sani̱ ga̱ꞌman ruhua Yanꞌanj gui̱ꞌya castigo ni tsínj nunun si naꞌuej ruhua ni sij gu̱nun ni sij nuguanꞌ xa̱ngaꞌ. Daj si ununꞌ ni sij nga̱ ni dugüiꞌ ni sij. Ni̱ huin ruhua ni sij ga̱che ni sij chrej quij hua. ⁹Ni̱ daranꞌ ni tsínj ꞌyaj gaquinꞌ, sani̱ gui̱ranꞌ ni sij ꞌngo̱ sayun nico. Ni̱ ga̱nani nico ruhua ni sij. Ni̱ hué daj gui̱ranꞌ sini ni tsínj israelita. Sani̱ gui̱ranꞌ sayun ni tsínj ꞌna̱ꞌ anéj chrej nej.

¹⁰Sani̱ ni ngüi̱ ꞌyaj sa̱ꞌ, ni̱ gui̱man sa̱ꞌ ni sij rian Yanꞌanj. Ni̱ ga̱huin dinꞌinj ruhua ni sij nej. Ni̱ ga̱ꞌmi sa̱ꞌ ni ngüi̱ xiꞌí ni sij nej. Ni̱ hué daj ga̱huin sini nga̱ ni tsínj israelita. Ni̱ uyan ga̱huin nga̱ ni tsínj ꞌna̱ꞌ anéj chrej nej. ¹¹Daj si uyan hua daranꞌ néꞌ rian Yanꞌanj.

¹²Ni̱ hua go̱ꞌngo ni ngüi̱ ꞌyaj gaquinꞌ ngaa nitaj si niꞌi ni sij si-ley Moisés. Ni̱ ga̱huiꞌ ni sij ngaa achin gui̱niꞌi ni sij ley daj. Ni̱ hua ango ni ngüi̱ ꞌyaj gaquinꞌ ngaa niꞌi ni sij si-ley Moisés. Ngaa ni̱ ga̱huin ni sij castigo rúnꞌ ataj ley daj. ¹³Nitaj si ga̱taj Yanꞌanj si hua ni̱ca niman néꞌ xiꞌí si unun néꞌ si-ley Moisés. Maan si ga̱taj Yanꞌanj si hua ni̱ca niman néꞌ xiꞌí si ꞌyaj néꞌ si ataj ley daj. ¹⁴Ni̱ ma̱n ni tsínj ꞌna̱ꞌ anéj chrej nitaj si-ley Moisés nicaj ni sij. Sani̱ ngaa ꞌyaj ni sij da̱j rúnꞌ ataj ley daj, ni̱ nu̱nj si nitaj ley nicaj ni sij, sani̱ aꞌmi niman ni sij si gui̱ꞌyaj sa̱ꞌ ni sij rian Yanꞌanj. ¹⁵Ni̱ hué daj digyán ni sij sisi̱ nu̱n ley daj chruhua niman ni sij, guiꞌyaj Yanꞌanj xa̱ngaꞌ. Ni̱ hua ꞌngo̱ yu̱n, ni̱ aꞌmi niman ni sij si daꞌui ni sij gaquinꞌ xiꞌí si guiꞌyaj ni sij. Ni̱ ango yún, ni̱ aꞌmi niman ni sij sisi̱ nitaj gaquinꞌ daꞌui ni sij. ¹⁶Ni̱ hué daj ga̱huin güi gui̱ꞌyaj Yanꞌanj nga̱ Jesucristo castigo xiꞌí ni nuguanꞌ garij hui̱ ni ngüi̱. Ni̱ gui̱ꞌyaj Yanꞌanj da̱j rúnꞌ hua ni̱ca nuguanꞌ aꞌmī rian ni ngüi̱.

Los judíos y la ley

¹⁷Ni̱ atáj re̱ꞌ si hué re̱ꞌ huin ꞌngo̱ tsínj israelita. Ni̱ ani ruhuá re̱ꞌ sisi̱ ga̱huin sa̱ꞌ re̱ꞌ, gui̱ꞌyaj si-ley Moisés. Ni̱ xiꞌí daj nicaj dugüíꞌ re̱ꞌ nga̱ Yanꞌanj, ruhuá re̱ꞌ aj. ¹⁸Ni̱ niꞌí re̱ꞌ si aranꞌ ruhua Yanꞌanj. Ni̱ digyán si-ley Yanꞌanj ꞌngo̱ chrej sa̱ꞌ rián re̱ꞌ. Ni̱ ga̱ꞌue na̱cui re̱ꞌ ꞌngo̱ chrej sa̱ꞌ ga̱nꞌanj re̱ꞌ, ruhuá re̱ꞌ. ¹⁹Ni̱ ani ruhuá re̱ꞌ sisi̱ hué re̱ꞌ huin ꞌngo̱ tsínj ga̱ꞌue di̱gyán chrej rian ni ngüi̱ na̱ꞌue gui̱niꞌi si-nu̱guanꞌ Yanꞌanj. Ni̱ ani ruhuá re̱ꞌ sisi̱ ga̱ꞌue gui̱xiguin rian ni ngüi̱ achéj rian hua ru̱miꞌ hua, gui̱ꞌyáj re̱ꞌ nej. ²⁰Ni̱ ga̱ꞌue di̱gyán re̱ꞌ rian ni ngüi̱ ni̱ꞌyun, ruhuá re̱ꞌ. Ni̱ ga̱ꞌue di̱gyán re̱ꞌ rian ni tsinꞌ, ruhuá re̱ꞌ nej. Daj si ani ruhuá re̱ꞌ sisi̱ xiꞌí si diguiꞌyún re̱ꞌ si-ley Moisés, ni̱ ga̱ꞌue ga̱huin chru̱n re̱ꞌ daranꞌ nuguanꞌ xa̱ngaꞌ. ²¹Ni̱ sisi̱ so̱ꞌ huin ꞌngo̱ si digyán rian ni ngüi̱, ni̱ u̱n sin huin, ni̱ naꞌue di̱gyán re̱ꞌ rian manꞌán re̱ꞌ únj. Sisi̱ hué re̱ꞌ nataꞌ rian ni ngüi̱ sisi̱ si̱ guiꞌyaj tu̱ néꞌ, ni̱ u̱n sin huin ni̱ ꞌyaj tu̱ manꞌán re̱ꞌ únj. ²²Ni̱ atáj re̱ꞌ sisi̱ si̱ gaꞌue ga̱ꞌmi hui̱ néꞌ nga̱ nica̱ dugüiꞌ néꞌ. Sani̱ u̱n sin huin ni̱ aꞌmi hui̱ manꞌán re̱ꞌ nga̱ nica̱ dugüíꞌ re̱ꞌ únj. Ni̱ atáj re̱ꞌ si nun huin xa̱nꞌ ruhuá re̱ꞌ niꞌyáj re̱ꞌ ni yanꞌanj ꞌyaj raꞌa ni ngüi̱. Sani̱ u̱n sin huin ni̱ ꞌyaj tu̱ re̱ꞌ ni rasu̱n ma̱n chruhua ni nuhui ma̱n ni yanꞌanj da únj. ²³Aꞌmi nne̱ re̱ꞌ xiꞌí si nicáj re̱ꞌ si-ley Moisés. Sani̱ ri̱an nun dagahuín re̱ꞌ si ataj ley daj, ni̱ nitaj si nu̱n yanꞌánj re̱ꞌ Yanꞌanj mánj. ²⁴Hué daj xa̱ngaꞌ ni̱ hua ni̱ca rian yanj da̱j garun ni tsínj gaꞌmi si-nu̱guanꞌ Yanꞌanj asi̱j ná. Ni̱ gataj ni sij: “Xiꞌí si nitaj si ꞌyaj sa̱ꞌ ni é re̱ꞌ, ni̱ aꞌmi quij ni ngüi̱ ꞌna̱ꞌ anéj chrej xiꞌí Yanꞌanj anj.” Daj gataj ni sij.

²⁵Xa̱ngaꞌ yya sisi̱ da̱gahuín re̱ꞌ si ataj si-ley Moisés, ni̱ hua yya níꞌyanj sisi̱ gu̱taꞌ ni sij daꞌngaꞌ nnee̱ cúj re̱ꞌ. Sani̱ sisi̱ nitaj si da̱gahuín re̱ꞌ si ataj ley daj, ni̱ rúnꞌ huaj sisi̱ nun gu̱taꞌ ni sij daꞌngaꞌ daj. ²⁶Hué dan ni̱ sisi̱ hua ꞌngo̱ tsínj nitaj si ta̱j daꞌngaꞌ nnee̱ cúj sij, sani̱ ꞌyaj si da̱j rúnꞌ ataj si-ley Yanꞌanj, ngaa ni̱ ga̱huin sij rúnꞌ huin ꞌngo̱ tsínj ta̱j daꞌngaꞌ daj, ruhuāj aj. ²⁷Ni̱ hua ꞌngo̱ tsínj dagahuin si ataj si-ley Yanꞌanj. Ni̱ nu̱nj si nun gu̱taꞌ ni sij daꞌngaꞌ nnee̱ cúj síꞌ, sani̱ digyán síꞌ sisi̱ daꞌui manꞌán re̱ꞌ gaquinꞌ xiꞌí si ꞌyaj sa̱ꞌ síꞌ. Ni̱ nun dagahuín re̱ꞌ si ataj si-ley Yanꞌanj nu̱nj si nicáj re̱ꞌ si-ley Yanꞌanj. Ni̱ gutaꞌ ni sij daꞌngáꞌ re̱ꞌ nej.

²⁸Sé tsínj israelita huin néꞌ nga̱ xiꞌí si guiꞌyaj néꞌ nga̱ nnee̱ cúj néꞌ mánj. Ni̱ sé urin ne̱ꞌ chrej xe̱ꞌ néꞌ ta̱j daꞌngaꞌ da mánj. ²⁹Sani̱ ngaa ta̱j daꞌngaꞌ daj, ni̱ huin ruhuaj gata sisi̱ niman néꞌ hua ni̱ni rian Yanꞌanj. Ni̱ tsínj hua ni̱ni rian Yanꞌanj, ni̱ hué síꞌ huin xa̱ngaꞌ ꞌngo̱ tsínj israelita. Ni̱ sé si-ley Moisés ꞌyaj da mánj. Sani̱ Espíritu Santo ꞌyaj sisi̱ hua ni̱ni sij rian Yanꞌanj. Ni̱ si ruhuaj ni̱ nitaj si ga̱ꞌmi sa̱ꞌ ni ngüi̱ xiꞌí tsínj hua ni̱ni daj. Sani̱ aꞌmi sa̱ꞌ Yanꞌanj xiꞌí sij aj.

¹Hua sa̱ꞌ si huin néꞌ tsínj israelita níꞌ. Ni̱ hua sa̱ꞌ si ta̱j daꞌngaꞌ nnee̱ cúj néꞌ níꞌ. ²Hua sa̱ꞌ xa̱ngaj. Hua sini ga̱tā rián re̱ꞌ sisi̱ asi̱j ná, ni̱ gaꞌuiꞌ Yanꞌanj si-nu̱guanꞌanj rian ni tsínj israelita aj. ³Ni̱ hua daꞌaj ni tsínj israelita nun dagahuin rian Yanꞌanj. Ngaa ni̱ huin ruhuaj gata sisi̱ nitaj si̱caꞌ Yanꞌanj únj. ⁴Sé daj huin mánj. Daj si ni̱ganj ꞌyaj Yanꞌanj daranꞌ si hua ni̱ca xa̱ngaꞌ nu̱nj si aꞌmi yya̱ daranꞌ ni ngüi̱. Daj si gataj yya si-nu̱guanꞌ Yanꞌanj:

Hua nia̱n si gui̱niꞌi ni ngüi̱ sisi̱ hua yya si aꞌmi si-nu̱guanꞌ re̱ꞌ huín re̱ꞌ Yanꞌanj.

Ni̱ hua nia̱n si gui̱ꞌyaj ganá re̱ꞌ ngaa aꞌmi ni ngüi̱ sisi̱ nitaj si ꞌyaj sa̱ꞌ re̱ꞌ mánj.

Hué daj garun ni tsínj gaꞌmi si-nu̱guanꞌ Yanꞌanj asi̱j ná.

⁵Ni̱ sisi̱ digyán si-ga̱quinꞌ ꞌyaj néꞌ sisi̱ hua ni̱ca ꞌyaj Yanꞌanj, ngaa ni̱ da̱j ga̱taj néꞌ únj. Ga̱taj néꞌ sisi̱ nitaj si ꞌyaj ni̱ca Yanꞌanj si gui̱ꞌya castigo néꞌ níꞌ. (Aꞌmī da̱j rúnꞌ aꞌmi ni ngüi̱ aj.) ⁶Sé daj huin mánj. Sisi̱ hué daj huin, ni̱ da̱j ga̱ꞌue na̱guiꞌyaj yya Yanꞌanj nga̱ si-ga̱quinꞌ ni ngüi̱ ma̱n chruhua xungüi̱, ruhuá re̱ꞌ únj. ⁷Ni̱ ango nuguanꞌ huin sisi̱ si-nu̱guanꞌānj digyaꞌ yunꞌunj ꞌyaj sisi̱ ga̱ꞌmi sa̱ꞌ ni ngüi̱ xiꞌí si ꞌyaj sa̱ꞌ Yanꞌanj, ngaa ni̱ u̱n sin huin, ni̱ gui̱ꞌyaj Yanꞌanj castigo yūnj únj. ⁸Ni̱ ga̱ꞌue ga̱taj néꞌ (sisi̱ gui̱ꞌyaj néꞌ doj gaquinꞌ, ngaa ni̱ ga̱ꞌnaꞌ si sa̱ꞌ rian néꞌ. Sani̱ nuguanꞌ nan huin nuguanꞌ yya̱ si aꞌmi go̱ꞌngo ni ngüi̱. Ataj ni sij sisi̱ hué daj digyán ni únj rian ni ngüi̱.) Sani̱ sé daj huin mánj. Ni̱ sa̱ꞌ huin si gui̱ꞌyaj Yanꞌanj castigo ni ngüi̱ aꞌmi nuguanꞌ yya̱ da aj.

No hay justo

⁹Hué dan ni̱ hua sa̱ꞌ ni únj huin ni únj ni tsínj israelita daj nga̱ ango ni ngüi̱, ruhuá re̱ꞌ níꞌ. Sé daj huin mánj. Daj si hua gatā sisi̱ daꞌui daranꞌ néꞌ gaquinꞌ. Uyan daꞌui ni tsínj israelita gaquinꞌ nga̱ ni tsínj ꞌna̱ꞌ anéj chrej nej. ¹⁰Ni̱ hué daj gataj si-nu̱guanꞌ Yanꞌanj nej:

Nitaj a̱ ꞌngo̱ ni ngüi̱ ꞌyaj ni̱ca mánj.

¹¹Nitaj a̱ ꞌngo̱ ngüi̱ ráj daꞌngaꞌ ruhua mánj.

Ni̱ nitaj a̱ ꞌngo̱ ngüi̱ nanoꞌ Yanꞌanj mánj.

¹²Ni̱ duna daranꞌ ni sij si-chrej Yanꞌanj.

Ni̱ ꞌngo̱ hua nu̱guanꞌan daranꞌ ni sij nitaj si níꞌyanj rian Yanꞌanj.

Ni̱ nitaj a̱ ꞌngo̱ ngüi̱ ꞌyaj sa̱ꞌ mánj.

¹³Ni̱ da̱j rúnꞌ guinꞌ rian achinꞌ níman, ni̱ daꞌngaꞌ daj hua nuguanꞌ ahui duꞌua ni sij aꞌmi ni sij.

Aꞌmi snanꞌanj ni sij nga̱ yya ni sij.

Ni̱ da̱j rúnꞌ hua nnee xunaj nu̱n duꞌua xucuáj, hué daj hua nuguanꞌ ahui duꞌua ni sij.

¹⁴Ni̱ maan ni̱nanj nuguanꞌ chre aꞌmi ni sij.

Daj si nun huin xa̱nꞌ ruhua ni sij niꞌyaj ni sij dugüiꞌ ni sij.

¹⁵Ni̱ yo̱o ni sij ga̱nꞌanj da̱gahuiꞌ ni sij níman.

¹⁶Ni̱ ni̱nꞌ ruhua ranꞌ ni ngüi̱ sayun, ꞌyaj ni sij.

¹⁷Ni̱ nun gui̱niꞌi ni sij chrej ꞌyaj si ga̱huin dinꞌinj ruhua ni sij mánj.

¹⁸Ni̱ nitaj si xuꞌuiꞌ ni sij rian Yanꞌanj mánj.

Hué daj gataj si-nu̱guanꞌ Yanꞌanj xiꞌí ni sij.

¹⁹Ni̱ niꞌi néꞌ sisi̱ aꞌninꞌ si-ley Yanꞌanj sun rian ni tsínj nicoꞌ ley daj. Ni̱ si-ley Yanꞌanj ꞌyaj sisi̱ dínj gahuin duꞌua daranꞌ ni ngüi̱ xiꞌí si niꞌi ni sij sisi̱ daꞌui ni sij gaquinꞌ. Ni̱ niꞌi daranꞌ néꞌ sisi̱ hua nia̱n gui̱ꞌyaj Yanꞌanj castigo ni ngüi̱ ꞌyaj gaquinꞌ, ꞌyaj ley da nej. ²⁰Ni̱ a̱ ꞌngo̱ néꞌ nun gui̱sij da̱gahuin daranꞌ si aꞌninꞌ ley da mánj. Ni̱ naꞌue ga̱huin so̱ꞌ rian Yanꞌanj, gui̱ꞌyaj ley da mánj. Níꞌyanj si-ley Yanꞌanj urin si xa̱caj néꞌ cuenta sisi̱ daꞌui néꞌ gaquinꞌ rian Yanꞌanj anj.

La justicia es por medio de la fe

²¹Sani̱ yya̱j ni̱ digyán ni̱ni Yanꞌanj ango chrej sa̱ꞌ rian ni ngüi̱ sisi̱ da̱j ga̱ꞌue ga̱huin ni̱ca ruhua niman néꞌ. Ni̱ hua yya sisi̱ digyán si-ley Yanꞌanj nga̱ si garun ni tsínj gaꞌmi si-nu̱guanꞌ Yanꞌanj asi̱j ná da̱j hua chrej da nej. ²²Ni̱ chrej daj gataj sisi̱ hua ni̱ca niman néꞌ xiꞌí si xuman ruhua néꞌ niꞌyaj néꞌ Jesucristo. Ni̱ hué daj ga̱huin nga̱ daranꞌ ni ngüi̱ xuman ruhua niꞌyaj Jesús. Daj si uyan huin daranꞌ ni ngüi̱ rian Yanꞌanj anj. ²³Daj si daranꞌ ni ngüi̱ guiꞌyaj gaquinꞌ. Ni̱ achin si ga̱huin sa̱ꞌ ni sij rian Yanꞌanj. ²⁴Ni̱ guiꞌyaj Yanꞌanj ꞌngo̱ sinduj xxi rian néꞌ. Daj si naruꞌue Jesucristo manꞌan síꞌ xiꞌí si-ga̱quinꞌ néꞌ. Xiꞌí daj, ni̱ gahuin sa̱ꞌ néꞌ rian Yanꞌanj anj. ²⁵Ni̱ guiꞌyaj Yanꞌanj si naránj si-tun manꞌan Jesucristo rian si-ga̱quinꞌ néꞌ. Ni̱ xiꞌí si gayanj si-tun manꞌan Jesús, ni̱ ga̱ꞌue gui̱nicaj Yanꞌanj ꞌngo̱ niman nico rian si-ga̱quinꞌ néꞌ huin néꞌ ni ngüi̱ xuman ruhua niꞌyaj Jesús. Ni̱ nuguanꞌ nan digyán sisi̱ hua ni̱ca ruhua Yanꞌanj. Daj si gaꞌninꞌ ruhua Yanꞌanj nun guiꞌyaj-áꞌ castigo ni ngüi̱ guimán asi̱j ná. ²⁶Ni̱ xiꞌí si gahuiꞌ Jesucristo, ni̱ digyán Yanꞌanj yya̱j rian néꞌ sisi̱ hua ni̱ca ruhua Yanꞌanj. Ni̱ xiꞌí si guiꞌyaj Jesucristo, ni̱ gataj Yanꞌanj sisi̱ hua sa̱ꞌ niman ni ngüi̱ xuman ruhua niꞌyaj Jesús.

²⁷Ngaa ni̱ si̱ gaꞌue ga̱taj néꞌ sisi̱ ꞌyaj sa̱ꞌ néꞌ rian Yanꞌanj mánj. Daj si sé xiꞌí si dagahuin sa̱ꞌ néꞌ rian si-ley Moisés ꞌyaj si hua sa̱ꞌ chruhua niman néꞌ mánj. Sani̱ hua guxuman ruhua néꞌ niꞌi néꞌ Cristo. Ni̱ xiꞌí daj hua sa̱ꞌ chruhua niman néꞌ rian Yanꞌanj anj. ²⁸Hué dan ni̱ ga̱ꞌue ga̱taj néꞌ sisi̱ hua sa̱ꞌ niman néꞌ rian Yanꞌanj xiꞌí si xuman ruhua néꞌ niꞌyaj néꞌ Jesús. Ni̱ guiꞌyaj Jesús sisi̱ hua sa̱ꞌ niman néꞌ rian Yanꞌanj ngaa hua gue̱ achin da̱gahuin sa̱ꞌ néꞌ si-ley Yanꞌanj. ²⁹Ni̱ sé urin Danꞌanj ni ngüi̱ israelita huin Yanꞌanj mánj. Sani̱ hué gue̱ Yanꞌanj huin Danꞌanj ango ni ngüi̱ ꞌna̱ꞌ anéj chrej. Ni̱ niꞌi sa̱ꞌ néꞌ sisi̱ ga̱ꞌue na̱caj Yanꞌanj ni ngüi̱ ꞌna̱ꞌ anéj chrej nej. ³⁰Daj si urin Yanꞌanj hua rian néꞌ: Ni̱ sisi̱ gu̱xuman ruhua ni ngüi̱ israelita ni̱ꞌyaj ni sij Jesús, ni̱ ga̱taj Yanꞌanj sisi̱ hua sa̱ꞌ niman ni sij. Ni̱ sisi̱ gu̱xuman ruhua ni ngüi̱ ꞌna̱ꞌ anéj chrej ni̱ꞌyaj ni sij Jesús, ni̱ ga̱taj Yanꞌanj sisi̱ hua sa̱ꞌ niman ni síꞌ nej.

³¹Hué dan ni̱ ataj ni únj sisi̱ nitaj si níꞌyanj si-ley Yanꞌanj, ruhua á re̱ꞌ níꞌ. Sé daj huin mánj. Maan si ataj únj sisi̱ ngaa gu̱xuman sa̱ꞌ ruhua néꞌ ni̱ꞌyaj néꞌ Jesús, ngaa ni̱ ga̱ꞌue da̱gahuin sa̱ꞌ néꞌ si-ley Yanꞌanj nej aj.

El ejemplo de Abraham

¹Ngaa ni̱ u̱n sin huin ga̱taj néꞌ si guiriꞌ xíꞌ Abraham tsínj gane asi̱j ná únj. ²Ni̱ sisi̱ hua ni̱ca niman Abraham xiꞌí si guiꞌyaj sa̱ꞌ síꞌ, ngaa ni̱ ga̱ꞌue ga̱ꞌmi xa̱can síꞌ xiꞌí manꞌan síꞌ. Sani̱ sé daj huin rian Yanꞌanj mánj. ³Ni̱ gataj rian si-nu̱guanꞌ Yanꞌanj: “Guxuman ruhua Abraham niꞌi sij Yanꞌanj. Ni̱ xiꞌí daj gataj Yanꞌanj sisi̱ hua sa̱ꞌ niman sij.” Daj gataj si-nu̱guanꞌ Yanꞌanj.

⁴Ni̱ ngaa ꞌyaj sun ꞌngo̱ tsínj daj rian ꞌngo̱ xuruꞌue, ni̱ daꞌui síꞌ rian tsínj ꞌyaj sun daj. Ni̱ sé ꞌngo̱ sinduj huin naruꞌue síꞌ güenda ꞌyaj sun sij mánj. ⁵Sani̱ ga̱ꞌue ga̱taj Yanꞌanj sisi̱ hua sa̱ꞌ niman néꞌ xiꞌí si xuman ruhua néꞌ niꞌyaj néꞌ Jesús nu̱nj si achin gui̱ꞌyaj sa̱ꞌ néꞌ rian Yanꞌanj anj.

⁶Ni̱ hué daj gaꞌmi xíꞌ David xiꞌí ꞌngo̱ tsínj achin guiꞌyaj sa̱ꞌ. Sani̱ hua gataj Yanꞌanj sisi̱ hua sa̱ꞌ niman tsínj daj. Ni̱ gaꞌmi David sisi̱ hua ꞌueé rian tsínj daj. ⁷Ni̱ gataj David:

Hua ꞌueé rian tsínj ri̱an xi̱ꞌi si-ga̱quinꞌ si̱ guinicaj Yanꞌanj ꞌngo̱ niman nico.

Ni̱ nun xa̱caj Yanꞌanj cuenta xiꞌí si-ga̱quinꞌ sij mánj.

⁸Ni̱ hua ꞌueé rian tsínj rian nun acaj cuenta Yanꞌanj xiꞌí si-ga̱quinꞌ sij.

Hué daj gataj David.

⁹Ngaa ni̱ sé urin ni tsínj israelita ga̱ꞌue ga̱huin nia̱ꞌ ruhua nga̱ nuguanꞌ nan. Sani̱ ga̱ꞌue ga̱huin nia̱ꞌ ruhua ni tsínj ꞌna̱ꞌ anéj chrej nej. Daj si hua gatā rian án re̱ꞌ sisi̱ hua sa̱ꞌ niman Abraham gataj Yanꞌanj xiꞌí si xuman ruhua sij niꞌyaj sij Yanꞌanj.

¹⁰Ni̱ nachínj snanꞌān ni é re̱ꞌ. Ni̱ a̱man gataj Yanꞌanj si hua ni̱ca niman Abraham, ruhua ni é re̱ꞌ únj. Asi̱j ne̱ꞌ ru̱cu gutaꞌ ni sij daꞌngaꞌ nnee̱ cúj Abraham níꞌ. Asi̱ asi̱j sini sa̱ꞌ. Hué asi̱j sini huin anj. ¹¹Ni̱ ne̱ꞌ ru̱cu huin gutaꞌ sij daꞌngaꞌ nnee̱ cúj manꞌan sij. Ni̱ éꞌ huin ꞌngo̱ daꞌngaꞌ digyán Yanꞌanj sisi̱ hua sa̱ꞌ niman Abraham xiꞌí si guxuman ruhua sij niꞌyaj sij Yanꞌanj. Ngaa ni̱ ga̱ꞌue ga̱huin Abraham chrej daranꞌ ni tsínj xuman ruhua niꞌyaj Yanꞌanj nu̱nj si nun gu̱taꞌ daꞌngaꞌ nnee̱ cúj ni tsínj daj. Ni̱ hué daj ga̱ꞌue ga̱taj Yanꞌanj si hua sa̱ꞌ niman ni tsínj daj huin ni tsínj ꞌna̱ꞌ anéj chrej. ¹²Ni̱ ga̱ꞌue ga̱huin Abraham chrej ni tsínj hua gutaꞌ daꞌngaꞌ manꞌan ni sij. Ni̱ hué daj huin sisi̱ gu̱xuman ruhua ni sij da̱j rúnꞌ guxuman ruhua Abraham ngaa achin gu̱taꞌ daꞌngaꞌ síꞌ nej.

La promesa realizada mediante la fe

¹³Ni̱ gaꞌníj duꞌua Yanꞌanj rian ni da̱ꞌnij Abraham sisi̱ ga̱ꞌuiꞌ-íꞌ xungüi̱ nan na̱huin raꞌa ni sij. Sani̱ sé güenda si dagahuin Abraham si-ley Moisés huin sisi̱ hué daj gataj Yanꞌanj nuguanꞌ nan gunun ni sij mánj. Sani̱ gataj Yanꞌanj sisi̱ hua sa̱ꞌ niman Abraham xiꞌí si guxuman ruhua síꞌ niꞌyaj síꞌ manꞌan Yanꞌanj anj. ¹⁴Ni̱ sé xiꞌí si dagahuin ni tsínj si-ley Moisés ꞌyaj si na̱huin raꞌa ni sij xungüi̱ nan mánj. Daj si sisi̱ hué daj huin, ni̱ nitaj si níꞌyanj si xuman ruhua ni sij niꞌyaj ni sij Yanꞌanj mánj. Ni̱ nitaj si níꞌyanj nuguanꞌ hua gataj yya Yanꞌanj gunun ni sij mánj. ¹⁵Daj si si-ley Moisés ꞌyaj sisi̱ ga̱huin ni ngüi̱ castigo. Sani̱ sisi̱ nitaj ley daj, ni̱ nitaj si daꞌui ni ngüi̱ gaquinꞌ mánj.

¹⁶Hué dan ni̱ xiꞌí si xuman ruhua néꞌ niꞌyaj néꞌ manꞌan Yanꞌanj, ni̱ na̱huin raꞌa néꞌ nuguanꞌ xa̱ngaꞌ guiꞌyaj yya Yanꞌanj nga̱ ni daꞌníj Abraham. Hué dan ni̱ xacaj néꞌ cuenta nga̱ xiꞌí sinduj guiꞌyaj Yanꞌanj nga̱ néꞌ. Ni̱ sé urin rian ni ngüi̱ dagahuin ley daj guiꞌyaj yya Yanꞌanj. Sani̱ guiꞌyaj yya Yanꞌanj rian daranꞌ ni ngüi̱ xuman ruhua niꞌyaj Yanꞌanj da̱j rúnꞌ guxuman ruhua xíꞌ Abraham. Ni̱ hué síꞌ huin chrej daranꞌ néꞌ. ¹⁷Daj si gataj si-nu̱guanꞌ Yanꞌanj: “Guiꞌyā sisi̱ ga̱huín re̱ꞌ chrej nico rian ni ngüi̱.” Daj gataj Yanꞌanj gunun Abraham. Ngaa ni̱ gahuin síꞌ chrej daranꞌ néꞌ rian Yanꞌanj. Ni̱ guxuman ruhua síꞌ niꞌyaj síꞌ Yanꞌanj. Ni̱ Yanꞌanj ꞌyaj sisi̱ ga̱naꞌnij ni níman. Ni̱ ꞌyaj Yanꞌanj ni rasu̱n achin si gu̱rugüiꞌ aj.

¹⁸Ni̱ ngaa gachin güi ruhua Abraham si gui̱ꞌyaj sa̱ꞌ Yanꞌanj nga̱ sij, ni̱ hua gue̱ guxuman ruhua sij niꞌyaj sij Yanꞌanj. Ni̱ xiꞌí si hué daj guiꞌyaj sij, ni̱ gahuin sij “chrej nico ni ngüi̱”. Daj si hua gataj Yanꞌanj gunun sij: “Hué daj gui̱xiꞌnanj nico daꞌníj re̱ꞌ.” ¹⁹Ni̱ nun ga̱ꞌninꞌ ruhua Abraham si guxuman ruhua sij niꞌyaj sij Yanꞌanj (nu̱nj si achin do̱j gui̱sij sij ꞌngo̱ ciento yoꞌ). Ni̱ acaj sij cuenta sisi̱ achin do̱j ga̱huiꞌ nu̱ngüej nica̱ sij Sara. Ni̱ gachin yoꞌ ga̱ꞌnga daꞌníj nica̱ sij Sara nej. ²⁰Ni̱ nun ga̱ni hui̱j ruhua sij nga̱ nuguanꞌ gataj yya Yanꞌanj gunun sij. Sani̱ guxuman doj ruhua sij niꞌyaj sij Yanꞌanj. Ni̱ gaꞌmi sa̱ꞌ ꞌueé sij rian Yanꞌanj. ²¹Ni̱ gani sa̱ꞌ ruhua sij sisi̱ nicaj Yanꞌanj fuerza gui̱ꞌyaj-áꞌ daranꞌ ni nuguanꞌ hua gataj yya-áꞌ gunun sij.

²²Ni̱ xiꞌí si guxuman ruhua sij niꞌyaj sij Yanꞌanj, ni̱ gataj Yanꞌanj sisi̱ hua sa̱ꞌ niman sij. ²³Ni̱ garun ni sij sisi̱ hua sa̱ꞌ niman Abraham gataj Yanꞌanj. Sani̱ sé rian urin Abraham huin garun ni sij da mánj. ²⁴Sani̱ garun ni sij nuguanꞌ daj xiꞌí néꞌ xiꞌí si xuman ruhua néꞌ niꞌyaj néꞌ Yanꞌanj. Ngaa ni̱ gataj Yanꞌanj sisi̱ gahuin sa̱ꞌ niman néꞌ nej. Ni̱ Yanꞌanj guiꞌyaj sisi̱ ganáꞌnij Jesús huin síꞌ Señor nicaj sun rian néꞌ. ²⁵Ni̱ nagaꞌuiꞌ Yanꞌanj manꞌan síꞌ sisi̱ ga̱huiꞌ síꞌ xiꞌí si-ga̱quinꞌ néꞌ. Ni̱ ganáꞌnij síꞌ, guiꞌyaj Yanꞌanj güenda si ga̱ꞌue ga̱taj Yanꞌanj sisi̱ hua sa̱ꞌ niman néꞌ.

Resultados de la justificación

¹Hué dan ni̱ xiꞌí si guxuman ruhua néꞌ niꞌyaj néꞌ Jesucristo, ni̱ gahuin sa̱ꞌ niman néꞌ rian Yanꞌanj. Ni̱ hua dinꞌinj ruhua néꞌ rian Yanꞌanj, ꞌyaj Jesucristo huin síꞌ Señor nicaj sun rian néꞌ. ²Ni̱ xiꞌí si xuman ruhua néꞌ niꞌyaj néꞌ Jesucristo, ni̱ na̱huin raꞌa néꞌ sinduj ꞌyaj Yanꞌanj nga̱ néꞌ. Ni̱ hua ni̱ca ruhua néꞌ, ꞌyaj sinduj daj. Ni̱ hua nia̱ꞌ ruhua néꞌ anaꞌuij néꞌ sisi̱ ga̱huin sa̱ꞌ ꞌueé néꞌ nga̱ Yanꞌanj. ³Ni̱ ango nuguanꞌ huin sisi̱ huin nia̱ꞌ ruhua néꞌ ngaa ranꞌ néꞌ sayun. Daj si niꞌi néꞌ sisi̱ na̱riꞌ nucuaj doj niman néꞌ, ꞌyaj sayun daj. ⁴Ni̱ ngaa gahuin nucuaj niman néꞌ, ni̱ gui̱sij néꞌ ga̱huin ni̱ca ruhua néꞌ nej. Ni̱ ngaa gui̱sij néꞌ ga̱huin ni̱ca ruhua néꞌ, ni̱ anaꞌuij néꞌ sisi̱ gui̱ꞌyaj sa̱ꞌ Yanꞌanj nga̱ néꞌ. ⁵Ni̱ sé ꞌngo̱ nuguanꞌ yu̱n huin si anaꞌuij néꞌ nan mánj. Daj si gahuin nucuaj niman néꞌ xiꞌí si ni̱nꞌ ruhua ꞌi̱ ruhua Yanꞌanj niꞌya néꞌ. Ni̱ Espíritu Santo ꞌyaj sisi̱ niꞌi néꞌ daj. Ni̱ Yanꞌanj riqui si gaꞌna̱ꞌ Espíritu Santo rian néꞌ.

⁶Ni̱ ngaa nun gahuin nucuaj néꞌ guiꞌyaj sa̱ꞌ néꞌ, ni̱ xiꞌí néꞌ gahuiꞌ Cristo. Ni̱ gahuin néꞌ tsínj nun gu̱xuman ruhua ni̱ꞌyaj Yanꞌanj. Ni̱ gahuiꞌ Cristo güi ngaa gani sini ruhua Yanꞌanj. ⁷Ni̱ hua yya naꞌuej ruhua néꞌ ga̱huiꞌ néꞌ xiꞌí ꞌngo̱ dugüiꞌ néꞌ tsínj hua sa̱ꞌ niman. Sani̱ si ruhuaj, ni̱ ga̱huiꞌ ꞌngo̱ néꞌ xiꞌí ꞌngo̱ tsínj hua sa̱ꞌ ni̱nꞌ. ⁸Sani̱ sé daj huin Yanꞌanj mánj. Daj si ngaa hua gue̱ daꞌui néꞌ gaquinꞌ, ni̱ gahuiꞌ Cristo xiꞌíꞌ, guiꞌyaj Yanꞌanj. Ni̱ hué daj digyán yya Yanꞌanj sisi̱ ꞌi̱ ruhua Yanꞌanj niꞌya néꞌ.

⁹Ngaa ni̱ xiꞌí si gahuin sa̱ꞌ niman néꞌ, guiꞌyaj si-tun manꞌan Cristo, hué dan ni̱ niꞌi néꞌ sisi̱ si̱ gahuin néꞌ castigo xiꞌí gaquinꞌ daꞌui néꞌ güi ga̱ꞌnaꞌ Yanꞌanj gui̱ꞌya castigo ni ngüi̱ mánj. ¹⁰Ni̱ ngaa gahuin néꞌ tsínj ununꞌ nga̱ Yanꞌanj, ni̱ gahuiꞌ daꞌni xiꞌí néꞌ. Ni̱ hué daj naguiꞌyaj yya Yanꞌanj nga̱ néꞌ. Hué daj ni̱ na̱anj ga̱ꞌue na̱caj xa̱ngaꞌ Yanꞌanj néꞌ xiꞌí si hua ni̱ꞌnaꞌ Cristo nne sij chruhua niman néꞌ. ¹¹Ni̱ sé urin nan, sani̱ huin nia̱ꞌ ruhua néꞌ nga̱ Yanꞌanj xiꞌí Jesús huin síꞌ Señor nicaj sun rian néꞌ. Daj si hué xiꞌí Cristo, ni̱ hua dinꞌinj ruhua néꞌ rian Yanꞌanj anj.

Adán y Cristo

¹²Hué dan ni̱ urin tsínj daj guiꞌyaj si gatúj gaquinꞌ chruhua xungüi̱ gu̱ꞌnaj síꞌ Adán. Ni̱ gaxi̱ꞌi gahuiꞌ ni ngüi̱ ngaa gatúj gaquinꞌ chruhua xungüi̱. Ni̱ daranꞌ ni ngüi̱ gahuin si ga̱huiꞌ xiꞌí si daꞌui daranꞌ ni sij gaquinꞌ. ¹³Ni̱ asi̱j nun ga̱ꞌuiꞌ Yanꞌanj ley rian ni ngüi̱, ni̱ hua guiꞌyaj ni sij gaquinꞌ. Sani̱ nun xacaj Yanꞌanj cuenta xiꞌí gaquinꞌ ngaa nitaj ley hua mánj. ¹⁴Ni̱ asi̱j gane Adán, ni̱ daꞌ yoꞌ gane Moisés, ni̱ gahuiꞌ ni ngüi̱. Ni̱ nun dagahuin Adán ꞌngo̱ nuguanꞌ gataj Yanꞌanj gunun sij. Sani̱ sé daj huin si-ga̱quinꞌ ni ngüi̱ gahuiꞌ daj. Ni̱ nun gui̱ꞌyaj sa̱ꞌ Adán.

Hué dan ni̱ da̱j rúnꞌ gaꞌna̱ꞌ Adán, ni̱ hué daj hua nia̱n ga̱ꞌnaꞌ ango tsínj gui̱ꞌyaj sa̱ꞌ chruhua xungüi̱ nan anj. ¹⁵Sani̱ sé rúnꞌ hua si-ga̱quinꞌ Adán sé daj hua sinduj si riqui Yanꞌanj rian néꞌ mánj. Daj si gahuiꞌ ni ngüi̱ mán ni̱nꞌ ga̱chraꞌ xiꞌí gaquinꞌ guiꞌyaj Adán. Sani̱ riqui Yanꞌanj ꞌngo̱ sinduj rian néꞌ huin néꞌ ni ngüi̱ mán ni̱nꞌ ga̱chraꞌ. Daj si gaꞌuiꞌ Yanꞌanj si ga̱ sa̱ꞌ néꞌ. Ni̱ hué daj guiꞌyaj Yanꞌanj xiꞌí sinduj guiꞌyaj urin tsínj daj xiꞌí néꞌ huin síꞌ Jesucristo. ¹⁶Ni̱ da̱j rúnꞌ gahuin guiꞌyaj urin tsínj daj gaquinꞌ, ni̱ sé daj hua sinduj riqui Yanꞌanj rian néꞌ mánj. Daj si xiꞌí urin gaquinꞌ guiꞌyaj si ga̱huin ni ngüi̱ castigo. Sani̱ xiꞌí sinduj riqui Yanꞌanj rian néꞌ, ni̱ gataj Yanꞌanj sisi̱ hua ni̱ca niman néꞌ rian daranꞌ ni gaquinꞌ guiꞌyaj néꞌ aj. ¹⁷Ngaa ni̱ xiꞌí si-ga̱quinꞌ urin tsínj daj, ni̱ ahuiꞌ daranꞌ ni ngüi̱, ꞌya. Sani̱ xiꞌí si riqui Yanꞌanj sinduj rian néꞌ, ni̱ gataj Yanꞌanj si hua ni̱ca niman néꞌ. Ngaa ni̱ ga̱ꞌue ga̱ ni̱ꞌnaꞌ néꞌ gui̱nicaj sun ni̱ganj néꞌ, guiꞌyaj urin tsínj huin Jesucristo aj.

¹⁸Hué dan ni̱ si-ga̱quinꞌ urin Adán guiꞌyaj sisi̱ ga̱huin daranꞌ ni ngüi̱ castigo. Sani̱ xiꞌí si guiꞌyaj sa̱ꞌ ꞌueé urin Jesucristo, ni̱ guiꞌyaj-áꞌ sisi̱ ga̱ꞌue ga̱ ni̱ca niman daranꞌ ni ngüi̱. Ni̱ ga̱ꞌue ꞌngo̱ ga̱ ni̱ꞌnaꞌ ni sij nej. ¹⁹Ni̱ xiꞌí si nun dagahuin urin tsínj daj rian Yanꞌanj, ni̱ gahuin daranꞌ ni ngüi̱ ni tsínj daꞌui gaquinꞌ. Sani̱ xiꞌí si dagahuin urin ango tsínj daj rian Yanꞌanj, ni̱ gahuin sa̱ꞌ nico ni ngüi̱ rian Yanꞌanj anj.

²⁰Ni̱ gaꞌuiꞌ Yanꞌanj ley rian ni ngüi̱ sisi̱ gui̱niꞌi ni sij sisi̱ hua nico gaquinꞌ daꞌui ni sij rian Yanꞌanj. Sani̱ ngaa guiꞌyaj ni ngüi̱ nico gaquinꞌ, ni̱ na̱anj nico guiꞌyaj Yanꞌanj sinduj rian ni sij aj. ²¹Hué dan ni̱ guiranꞌ ni ngüi̱ sayun xiꞌí gaquinꞌ guiꞌyaj ni sij. Sani̱ xiꞌí sinduj riqui Yanꞌanj rian néꞌ, ni̱ hua ni̱ca niman néꞌ. Ni̱ ga̱ꞌue ga̱ne ni̱ganj ni̱nꞌ néꞌ xiꞌí si gahuiꞌ Jesucristo huin síꞌ Señor nicaj sun rian néꞌ.

Muertos al pecado

¹Hué dan ni̱ u̱n sin huin gui̱ꞌyaj néꞌ, ruhua á re̱ꞌ únj. Ga̱ gue̱ gui̱ꞌyaj néꞌ gaquinꞌ güenda si ri̱qui Yanꞌanj doj sinduj rian néꞌ, ruhua á re̱ꞌ níꞌ. ²Sé daj huin gui̱ꞌyaj néꞌ mánj. Daj si rúnꞌ huin ꞌngo̱ níman gahuiꞌ naꞌue gui̱ꞌyaj gaquinꞌ daj huin néꞌ. Ngaa ni̱ si̱ gaꞌue ga̱ gui̱ꞌyaj néꞌ gaquinꞌ ga̱ mánj. ³Hua nia̱n si gui̱niꞌi a ni é re̱ꞌ sisi̱ ngaa gataꞌ nnee néꞌ, ni̱ guinicaj dugüiꞌ néꞌ nga̱ Cristo Jesús. Ni̱ rúnꞌ huin níman gahuiꞌ nu̱guanꞌan nga̱ Cristo da̱j huin néꞌ nga̱ sij. ⁴Ni̱ ri̱an gataꞌ nnee néꞌ, ni̱ huin ruhuaj gata sisi̱ gahuiꞌ nu̱guanꞌan néꞌ nga̱ Cristo. Ni̱ gachinꞌ nu̱guanꞌan néꞌ nga̱ sij nej. Hué dan ni̱ da̱j rúnꞌ ganáꞌnij Cristo, guiꞌyaj si-fuerza Yanꞌanj, hué daj ni̱ ga̱ꞌue na̱huin na̱ca ga̱ne néꞌ nej. ⁵Ni̱ sisi̱ guinicaj dugüiꞌ néꞌ nga̱ Cristo gahuiꞌ néꞌ da̱j rúnꞌ gahuiꞌ sij, ni̱ hué ducuánj daj ga̱naꞌnij néꞌ da̱j rúnꞌ ganáꞌnij sij.

⁶Ni̱ niꞌi néꞌ sisi̱ da̱j guiꞌyaj néꞌ gaquinꞌ asi̱j sini. Ni̱ gahuiꞌ nu̱guanꞌan si guiꞌyaj néꞌ daj nga̱ Cristo. Xiꞌí daj guereꞌ fuerza nicaj gaquinꞌ guiꞌyaj sini néꞌ. Hué dan ni nitaj si huaj gui̱ꞌyaj sun néꞌ rian gaquinꞌ da ga̱ mánj. ⁷Daj si da̱j rúnꞌ naꞌue gui̱ꞌyaj ꞌngo̱ níman gaquinꞌ hué daj si̱ gaꞌue gui̱ꞌyaj néꞌ gaquinꞌ ga̱ mánj. ⁸Ni̱ sisi̱ gahuiꞌ nu̱guanꞌan néꞌ nga̱ Cristo, ngaa ni̱ xuman ruhua néꞌ sisi̱ ga̱ne nu̱guanꞌan néꞌ nga̱ sij nej. ⁹Hua ganáꞌnij Cristo scanij ni níman. Hué dan ni̱ niꞌi néꞌ sisi̱ si̱ gaꞌue ga̱huiꞌ ru̱huaꞌ yún sij mánj. Hua guiꞌyaj gana Cristo rian nuguanꞌ da aj. ¹⁰Ni̱ urin yu̱n xi̱ꞌi gahuiꞌ Cristo xiꞌí gaquinꞌ. Sani̱ ganáꞌnij sij. Ni̱ nne sij ꞌyaj sij si aranꞌ ruhua Yanꞌanj anj. ¹¹Ni̱ hué ducuánj daj huin si ga̱ni ruhua a ni é re̱ꞌ sisi̱ gahuiꞌ si xi̱ꞌi ma̱n niman án re̱ꞌ. Ni̱ da̱j rúnꞌ huin níman huin a ni é re̱ꞌ naꞌue gui̱ꞌyaj ni é re̱ꞌ gaquinꞌ ga̱ mánj. Sani̱ ga̱ni ruhua ni é re̱ꞌ sisi̱ hua ni̱ꞌnaꞌ ni é re̱ꞌ rian Yanꞌanj xiꞌí si nicaj dugüiꞌ ni é re̱ꞌ nga̱ Cristo Jesús, tsínj nicaj sun rian néꞌ.

¹²Hué dan ni̱ si̱ gaꞌnij ni é re̱ꞌ chrej sisi̱ ga̱huin achij gaquinꞌ rian nnee̱ cúj ni é re̱ꞌ mánj. Daj si niꞌi néꞌ sisi̱ ga̱huiꞌ nnee̱ cúj néꞌ. Ni̱ si̱ dagahuin ni é re̱ꞌ si huin ruhua gui̱ꞌyaj nnee̱ cúj ni é re̱ꞌ ga̱ mánj. ¹³Ngaa ni̱ si̱ nagaꞌuiꞌ a ni é re̱ꞌ nnee̱ cúj ni é re̱ꞌ rian gaquinꞌ güenda gui̱ꞌyaj-áꞌ nga̱ ni rasu̱n quij hua. Sani̱ na̱gaꞌuiꞌ ni é re̱ꞌ niman ni é re̱ꞌ rian Yanꞌanj. Ni̱ ga̱ni ruhua á re̱ꞌ sisi̱ huin ni é re̱ꞌ ni ngüi̱ gahuiꞌ, ni̱ ganáꞌnij ru̱huaꞌ yún nej. Ni̱ na̱gaꞌuiꞌ a ni é re̱ꞌ nnee̱ cúj ni é re̱ꞌ rian Yanꞌanj sisi̱ ga̱ꞌue gui̱ꞌyaj sa̱ꞌ á re̱ꞌ da̱j rúnꞌ aranꞌ ruhua Yanꞌanj anj. ¹⁴Hué dan ni̱ si̱ gaꞌue gui̱nicaj gaquinꞌ fuerza rian ni é re̱ꞌ ga̱ mánj. Daj si nitaj si nicaj sun si-ley Moisés rian ni é re̱ꞌ mánj. Sani̱ ꞌni̱j ni é re̱ꞌ riqui sinduj ꞌyaj Yanꞌanj rian án re̱ꞌ aj.

Siervos de la justicia

¹⁵Hué dan ni̱ sisi̱ nitaj si nicaj sun ley rian néꞌ xiꞌí si ꞌni̱j néꞌ riqui sinduj ꞌyaj Yanꞌanj, ni̱ ga̱ꞌue gui̱ꞌyaj néꞌ gaquinꞌ, ruhua á re̱ꞌ níꞌ. Sé daj huin mánj. ¹⁶Ni̱ niꞌi sa̱ꞌ néꞌ sisi̱ ngaa aráj xina néꞌ gui̱ꞌyaj sun néꞌ rian ꞌngo̱ xuruꞌue, ni̱ hué néꞌ ga̱huin si gu̱nánj guitsi rian síꞌ. Ni̱ hué ducuánj daj huin sisi̱ gu̱nánj guitsi néꞌ rian gaquinꞌ, ngaa ni̱ ga̱huiꞌ néꞌ. Sani̱ sisi̱ unánj guitsi néꞌ rian Yanꞌanj, ni̱ ga̱huin sa̱ꞌ niman néꞌ rian Yanꞌanj anj. ¹⁷Ni̱ hué ni é re̱ꞌ gahuin sini ni ngüi̱ unánj guitsi rian gaquinꞌ. Sani̱ aꞌuiꞌ únj si guruhua Yanꞌanj sisi̱ yya̱j, ni̱ dagahuin xa̱ngaꞌ ni é re̱ꞌ si-nu̱guanꞌ Yanꞌanj digyán únj rian ni é re̱ꞌ. ¹⁸Asi̱j sini gunánj guitsi a ni é re̱ꞌ rian gaquinꞌ. Sani̱ yya̱j ni̱ gahuin ni̱ni ni é re̱ꞌ rian gaquinꞌ güenda si gu̱nánj guitsi ni é re̱ꞌ rian nuguanꞌ ni̱ca, gui̱ꞌyaj Yanꞌanj. ¹⁹(Ni̱ hué daj aꞌmī xiꞌí si naꞌue gu̱nun sa̱ꞌ ni é re̱ꞌ nuguanꞌ nan.) Ni̱ asi̱j sini ni̱ garáj xina ni é re̱ꞌ sisi̱ gui̱ꞌyaj nnee̱ cúj ni é re̱ꞌ gaquinꞌ. Ni̱ maan ni̱nanj gaquinꞌ guiꞌyaj á re̱ꞌ rian Yanꞌanj. Sani̱ yya̱j ni̱ na̱gaꞌuiꞌ ni é re̱ꞌ nnee̱ cúj ni é re̱ꞌ rian Yanꞌanj. Ni̱ hué daj ga̱ꞌue gui̱ꞌyaj ni̱ca ni é re̱ꞌ. Ngaa ni̱ ga̱huin ni é re̱ꞌ ni ngüi̱ ꞌyaj sa̱ꞌ rian Yanꞌanj nej aj.

²⁰Ni̱ ngaa huin ni é re̱ꞌ ni ngüi̱ unánj guitsi rian gaquinꞌ, ni̱ nun ga̱ꞌuej ruhua á re̱ꞌ gui̱ꞌyaj ni̱ca ni é re̱ꞌ rian Yanꞌanj. ²¹Ni̱ u̱n sin huin guiꞌyaj gana a ni é re̱ꞌ nga̱ ni gaquinꞌ guiꞌyaj ni é re̱ꞌ, ruhua á re̱ꞌ únj. Yya̱j ni̱ riꞌ ni é re̱ꞌ si-na̱ꞌaj nga̱ ni gaquinꞌ guiꞌyaj á re̱ꞌ daj. Daj si ni gaquinꞌ daj ꞌyaj si ga̱huiꞌ néꞌ, gui̱ꞌyaj Yanꞌanj. ²²Yya̱j ni̱ gahuin ni̱ni ni é re̱ꞌ rian ni gaquinꞌ daj. Ni̱ unánj guitsi ni é re̱ꞌ rian Yanꞌanj. Xiꞌí daj gahuin sa̱ꞌ ruhua ni é re̱ꞌ rian Yanꞌanj. Ni̱ ga̱ne ni̱ganj ni̱nꞌ ni é re̱ꞌ nga̱ Yanꞌanj nej. ²³Hué dan ni̱ xiꞌí gaquinꞌ ꞌyaj ni ngüi̱, ni̱ ꞌngo̱ ga̱huin anéj niman ni ngüi̱ rian Yanꞌanj. Sani̱ sinduj riqui Yanꞌanj rian néꞌ ꞌyaj si ga̱ne ni̱ganj nu̱guanꞌan néꞌ nga̱ Cristo Jesús huin Señor nicaj sun rian néꞌ.

Analogía tomada del matrimonio

¹Hué dan ni̱ niꞌi ni é re̱ꞌ da̱j hua si-ley Yanꞌanj huin ín re̱ꞌ jnān nga̱ xicaꞌuī. Ni̱ niꞌi sa̱ꞌ ni é re̱ꞌ sisi̱ aꞌninꞌ ley daj sun rian néꞌ urin ngaa hua ni̱ꞌnaꞌ néꞌ mán néꞌ chruhua xungüi̱ nan. ²Gui̱ꞌyóꞌ cuenta sisi̱ hua ꞌngo̱ yunꞌunj xa̱na xacaj tsínj snoꞌo. Ni̱ ley daj ataj sisi̱ hua nia̱n si ga̱ne unj nga̱ nica̱ unj ngaa ni̱nꞌ hua ni̱ꞌnaꞌ síꞌ. Sani̱ sisi̱ ga̱huiꞌ nica̱ unj, ni̱ nitaj si aꞌninꞌ ley sun rian unj ga̱ mánj. Ga̱ꞌue xa̱caj unj ango tsínj snoꞌo. ³Hué dan ni̱ sisi̱ xa̱caj unj ango tsínj snoꞌo ngaa ni̱nꞌ nne nica̱ unj, ni̱ daꞌui unj gaquinꞌ. Sani̱ sisi̱ ga̱huiꞌ nica̱ unj, ni̱ hua ni̱ni rian unj nga̱ si aꞌmi ley daj. Ni̱ ga̱ꞌue xa̱caj unj ango tsínj snoꞌo. Ni̱ sé ꞌngo̱ gaquinꞌ huin mánj.

⁴Ni̱ hué daj huin nga̱ ni é re̱ꞌ huin ín re̱ꞌ jnān nga̱ xicaꞌuī. Daj si ngaa gahuiꞌ nu̱guanꞌan ni é re̱ꞌ nga̱ Cristo, ngaa ni̱ gahuin ni̱ni ni é re̱ꞌ rian si-ley Moisés. Ni̱ guinicaj dugüiꞌ ni é re̱ꞌ nga̱ Cristo. Yya̱j ni̱ huin ni é re̱ꞌ Cristo, tsínj ganáꞌnij scanij ni níman. Xiꞌí daj ni̱ ga̱ꞌue gui̱ꞌyaj sa̱ꞌ néꞌ rian Yanꞌanj. ⁵Daj si asi̱j sini mán néꞌ, ni̱ gahuin ruhua néꞌ gui̱ꞌyaj néꞌ gaquinꞌ, guiꞌyaj ley daj xiꞌí si hua yai̱ rian ley si gui̱ꞌyaj néꞌ ni gaquinꞌ daj. Hué dan ni̱ ruhua ga̱huiꞌ néꞌ xiꞌí gaquinꞌ guiꞌyaj néꞌ nga̱ nnee̱ cúj néꞌ. ⁶Sani̱ yya̱j ni̱ nitaj si ꞌni̱j néꞌ riqui si-fuerza ley da ga̱ mánj. Ni̱ hua níꞌnij rian néꞌ da̱gahuin néꞌ rian Yanꞌanj ga̱che néꞌ ꞌngo̱ chrej na̱ca si riqui Espíritu Santo rian néꞌ. Ni̱ nitaj si ꞌni̱j néꞌ riqui ley garun ni sij asi̱j ná.

El pecado que mora en mí

⁷Hué dan ni̱ ga̱taj néꞌ sisi̱ si-ley Yanꞌanj huin gaquinꞌ níꞌ. Sé daj huin mánj. Sani̱ guiꞌyaj ley sisi̱ gui̱niꞌīnj da̱j hua gaquinꞌ. Ni̱ ataj ley: “Si̱ gahuin ruhua néꞌ niꞌyaj néꞌ siꞌyaj dugüiꞌ néꞌ.” Hué dan ni̱ sisi̱ nitaj ley daj, ni̱ nitaj a̱man gui̱niꞌīnj da̱j hua ga̱huin ruhuāj niꞌyā siꞌyaj dugüiꞌīj. ⁸Sani̱ ri̱an hua yai̱ rian ley si gui̱ꞌyaj néꞌ gaquinꞌ, ni̱ gaxi̱ꞌi gani ruhuāj gui̱ꞌyā ni rasu̱n nitaj si hua sa̱ꞌ. Ni̱ sisi̱ nitaj ley, ni̱ nun xa̱caj ni ngüi̱ cuenta da̱j hua gaquinꞌ. ⁹Ni̱ asi̱j sini ngaa nun gui̱niꞌi sa̱ꞌāj si-ley Yanꞌanj, ni̱ gani ruhuāj sisi̱ ꞌngo̱ tsínj sa̱ꞌ gahuīnj. Sani̱ ngaa gunun sa̱ꞌāj nuguanꞌ aꞌninꞌ Yanꞌanj sun riānj, daj guiniꞌīnj sisi̱ daꞌuīj gaquinꞌ. Ni̱ ni̱nꞌ ruhua guiꞌyā gaquinꞌ. ¹⁰Ni̱ guiniꞌīnj sisi̱ nitaj si hua sa̱ꞌ nimānj. Ni̱ ley daj huin güenda si gui̱man sa̱ꞌ ni ngüi̱ chruhua xungüi̱. Sani̱ xacaj cuentāj sisi̱ huīnj ꞌngo̱ tsínj ꞌyaj gaquinꞌ. Ni̱ guereꞌ nimānj, guiꞌyaj ley daj. ¹¹Ni̱ ngaa xacaj cuentāj da̱j hua si-ley Yanꞌanj, ni̱ gahuin ruhuāj gui̱ꞌyā da̱j rúnꞌ gataj ley daj. Sani̱ digyaꞌ yunꞌunj gaquinꞌ manꞌānj. Ni̱ gahuīnj ꞌngo̱ tsínj gue̱reꞌ nimānj.

¹²Hué dan ni̱ hua sa̱ꞌ ni̱nꞌ si-ley Yanꞌanj nga̱ nuguanꞌ aꞌninꞌ Yanꞌanj sun rian néꞌ. Ni̱ hua ni̱ca nuguanꞌ nan nej. Ni̱ duguꞌna̱j hua nuguanꞌ nan nej. ¹³Xiꞌí nuguanꞌ sa̱ꞌ nan, ni̱ guereꞌ nimānj, ruhua á re̱ꞌ níꞌ. Sé daj huin mánj. Sani̱ guereꞌ nimānj xiꞌí si daꞌuīj gaquinꞌ. Ni̱ garasu̱n gaquinꞌ rian nuguanꞌ sa̱ꞌ daj. Ni̱ xiꞌí daj xacaj cuentāj sisi̱ quij ni̱nꞌ ruhua hua gaquinꞌ daj.

¹⁴Ni̱ niꞌi néꞌ sisi̱ uyan aꞌmi si-ley Yanꞌanj nga̱ Espíritu Santo. Sani̱ yūnj huin ꞌngo̱ tsínj ꞌyaj sun rian gaquinꞌ. ¹⁵Daj si nga̱ si ꞌyā, ni̱ nitaj si ꞌyā nga̱ si huin ruhuāj gui̱ꞌyā. Maan si ꞌyā si nun huin xa̱nꞌ ruhuāj ꞌyā, ni̱ ꞌyā nánj. ¹⁶Hué dan ni̱ sisi̱ ꞌyā si nun huin xa̱nꞌ ruhuāj ꞌyā, ni̱ acaj cuentāj sisi̱ hua sa̱ꞌ si-ley Yanꞌanj. ¹⁷Hué dan ni̱ huin ruhuaj ga̱ta sisi̱ sé manꞌānj huin si ꞌyaj daj. Sani̱ gaquinꞌ nu̱n chruhua nimānj huin si ꞌyaj aj.

¹⁸Ni̱ xiꞌí si aꞌninꞌ gaquinꞌ sun riānj, ni̱ nitaj ꞌngo̱ nuguanꞌ sa̱ꞌ nu̱n chruhua nimānj. Daj si nu̱nj si huin ruhuāj gui̱ꞌyā si sa̱ꞌ hua, sani̱ naꞌue gu̱nucuā gui̱ꞌyā mánj. ¹⁹Nitaj si ꞌyaj sa̱ꞌāj si huin ruhuāj gui̱ꞌyā mánj. Sani̱ hua gue̱ ꞌyā si nun huin xa̱nꞌ ruhuāj gui̱ꞌyā nánj. ²⁰Hué dan ni̱ sisi̱ ꞌyā si nun huin xa̱nꞌ ruhuāj ꞌyā, ni̱ sé manꞌānj huin si ꞌyaj. Sani̱ gaquinꞌ nu̱n chruhua nimānj huin si ꞌyaj nánj. ²¹Ngaa ni̱ acaj cuentāj sisi̱ ngaa huin ruhuāj gui̱ꞌyā si sa̱ꞌ hua, sani̱ hua gue̱ nariꞌīj gaquinꞌ ꞌyā.

²²Ruhua nimānj ni̱ aranꞌ ruhuāj niꞌyā si-ley Yanꞌanj. ²³Sani̱ niꞌīnj sisi̱ ununꞌ ango ley nga̱ nimānj. Ni̱ hué ley daj huin si nicaj sun chruhua nimānj. Ni̱ ango ley daj huin gaquinꞌ ꞌyaj nnee̱ cúj manꞌānj.

²⁴Ducu niqui nimānj xiꞌí si gue̱reꞌ nimānj, ꞌyaj gaquinꞌ. Ni̱ u̱n tsínj ga̱ꞌue gui̱ꞌyaj si ga̱nanī rian gaquinꞌ aꞌninꞌ chruhua nimānj nan únj. ²⁵Aꞌuī si guruhua Yanꞌanj sisi̱ xiꞌí Jesucristo, ni̱ ga̱ꞌue gui̱nani néꞌ rian gaquinꞌ. Ni̱ Jesucristo huin Señor nicaj sun rian néꞌ.

Hué dan ni̱ yya̱j niꞌīnj sisi̱ dagahuin staꞌngāj rian si-ley Yanꞌanj. Sani̱ dagahuin nnee̱ cū si ataj gaquinꞌ nu̱n chruhua nimānj anj.

Viviendo en el Espíritu

¹Hué dan ni̱ si̱ gutaꞌ Yanꞌanj gaquinꞌ xiráj ni ngüi̱ nicaj dugüiꞌ nga̱ Cristo Jesús. Daj si achéj ni sij si-chrej Espíritu Santo. Ni̱ nitaj si achéj ni sij da̱j rúnꞌ ataj nnee̱ cúj ni sij. ²Daj si asi̱j sini, ni̱ ni̱nanj gaquinꞌ guiꞌyaj néꞌ. Ni̱ ruhua gue̱reꞌ niman néꞌ, guiꞌyaj gaquinꞌ daj. Sani̱ gahuin níꞌnij néꞌ rian gaquinꞌ daj, guiꞌyaj Espíritu Santo. Ni̱ Espíritu Santo ꞌyaj nga̱ Cristo Jesús sisi̱ ga̱ ni̱ꞌnaꞌ ni̱ganj néꞌ ga̱ne néꞌ. ³Ni̱ xiꞌí si hua nucuaj gaquinꞌ ꞌyaj nnee̱ cúj néꞌ, ni̱ naꞌue gu̱nucuaj si-ley Yanꞌanj na̱ca néꞌ. Sani̱ manꞌan Yanꞌanj huin si nucuaj ga̱ꞌue na̱caj néꞌ. Daj si gaꞌníj manꞌan Yanꞌanj daꞌni ga̱ꞌnaꞌ chruhua xungüi̱. Ni̱ da̱j rúnꞌ hua nnee̱ cúj néꞌ gahuin síꞌ. Ni̱ gahuiꞌ síꞌ xiꞌí si-ga̱quinꞌ néꞌ. Ni̱ hué ducuánj daj guiꞌyaj gana síꞌ rian gaquinꞌ guiꞌyaj nnee̱ cúj néꞌ. ⁴Ni̱ hué daj guiꞌyaj Yanꞌanj güenda sisi̱ ga̱ꞌue da̱gahuin néꞌ si aꞌninꞌ si-ley Yanꞌanj sun rian néꞌ. Daj si nitaj si dagahuin néꞌ si aꞌninꞌ gaquinꞌ rian néꞌ ga̱ mánj. Sani̱ dagahuin néꞌ si aꞌmi Espíritu Santo chruhua niman néꞌ aj.

⁵Ni̱ ni ngüi̱ dagahuin si huin ruhua nnee̱ cúj ni sij, ni̱ maan si nahuij ruhua ni sij nga̱ nuguanꞌ quij aꞌninꞌ rian ni sij. Sani̱ ni ngüi̱ dagahuin si aꞌninꞌ Espíritu Santo chruhua niman ni sij, ni̱ nahuij ruhua ni sij nga̱ nuguanꞌ aꞌninꞌ Espíritu Santo rian ni sij. ⁶Ni̱ sisi̱ na̱huij ruhua néꞌ urin nga̱ si huin ruhua nnee̱ cúj néꞌ, ni̱ ga̱huiꞌ niman néꞌ, gui̱ꞌyaj. Sani̱ sisi̱ na̱huij ruhua néꞌ nga̱ nuguanꞌ ꞌna̱ꞌ rian Espíritu Santo, ni̱ gui̱ꞌyaj-áꞌ sisi̱ hua dinꞌinj rian néꞌ. Ni̱ ga̱ne ni̱ganj néꞌ nga̱ Yanꞌanj nej. ⁷Ni̱ sisi̱ ni̱nanj na̱huij ruhua néꞌ nga̱ si huin ruhua nnee̱ cúj néꞌ, ni̱ ununꞌ néꞌ nga̱ Yanꞌanj. Ni̱ naꞌuej ruhua néꞌ da̱gahuin néꞌ si-ley Yanꞌanj. Ni̱ si̱ gunucuaj néꞌ da̱gahuin néꞌ ley da mánj. ⁸Ni̱ ni ngüi̱ nahuij ruhua nga̱ si huin ruhua nnee̱ cúj ni sij, ni̱ naꞌue gui̱ꞌyaj ni sij da̱j rúnꞌ aranꞌ ruhua Yanꞌanj.

⁹Ni̱ sisi̱ hua yya nne Espíritu Santo chruhua niman ni é re̱ꞌ, ni̱ nitaj si na̱huij ruhua ni é re̱ꞌ nga̱ si huin ruhua nnee̱ cúj ni é re̱ꞌ ga̱ mánj. Sani̱ na̱huij ruhua á re̱ꞌ nga̱ si huin ruhua Espíritu Santo gui̱ꞌyaj á re̱ꞌ. Ni̱ sisi̱ nitaj si nne Si-Espíritu Cristo chruhua niman ꞌngo̱ tsínj daj, ngaa ni̱ nitaj si huin síꞌ Cristo mánj. ¹⁰Sani̱ sisi̱ nne yya Cristo chruhua niman néꞌ, ni̱ gahuiꞌ yya nnee̱ cúj néꞌ xiꞌí gaquinꞌ guiꞌyaj néꞌ. Sani̱ hua ni̱ꞌnaꞌ niman néꞌ xiꞌí si gataj Yanꞌanj si hua ni̱ca niman néꞌ. ¹¹Ni̱ ganáꞌnij Jesús scanij ni níman, guiꞌyaj Yanꞌanj. Xiꞌí daj sisi̱ nne Espíritu Santo chruhua niman néꞌ, ni̱ ga̱ ni̱ꞌnaꞌ nnee̱ cúj néꞌ, gui̱ꞌyaj Yanꞌanj. Daj si nne Espíritu Santo chruhua niman néꞌ.

¹²Hué dan ni̱ nitaj si huaj si gui̱ꞌyaj néꞌ si huin ruhua nnee̱ cúj néꞌ. Si̱ chracuij néꞌ si huin ruhua nnee̱ cúj néꞌ man huin ín re̱ꞌ jnān nga̱ xicaꞌuī. ¹³Daj si sisi̱ gui̱ꞌyaj néꞌ da̱j rúnꞌ huin ruhua nnee̱ cúj néꞌ, ni̱ ga̱huiꞌ néꞌ. Sani̱ sisi̱ da̱gahuin néꞌ nuguanꞌ aꞌmi Espíritu Santo chruhua niman néꞌ, ni̱ du̱na néꞌ gaquinꞌ ꞌyaj nnee̱ cúj néꞌ. Ni̱ ga̱ ni̱ꞌnaꞌ niman néꞌ ga̱ne ni̱ganj néꞌ nga̱ Yanꞌanj. ¹⁴Daranꞌ ni ngüi̱ ga̱raj xina sisi̱ di̱gyán Espíritu Santo chrej rian ni sij, ni̱ hué ni sij huin daꞌníj Yanꞌanj anj. ¹⁵Nitaj si huin ruhua Yanꞌanj sisi̱ gu̱xuꞌuiꞌ néꞌ rian Yanꞌanj da̱j rúnꞌ ꞌyaj ꞌngo̱ tsínj ngaa ꞌyaj sun yu̱n sij rian ꞌngo̱ xuruꞌue huee. Sé daj huin mánj. Sani̱ huin ruhua Yanꞌanj gui̱niꞌi néꞌ sisi̱ huin néꞌ daꞌni. Ni̱ hua nia̱ꞌ ruhua Yanꞌanj sisi̱ ga̱taj néꞌ: “Tata chréꞌ”, rian Yanꞌanj. ¹⁶Ni̱ hué Espíritu Santo nicaj dugüiꞌ nga̱ niman néꞌ. Ni̱ ataj-áꞌ unun néꞌ sisi̱ huin néꞌ daꞌníj Yanꞌanj. ¹⁷Hué dan ni̱ xiꞌí si huin néꞌ daꞌníj Yanꞌanj, ngaa ni̱ na̱huin raꞌa néꞌ daranꞌ si ri̱qui Yanꞌanj rian néꞌ. Ni̱ da̱j rúnꞌ ganahuin raꞌa Cristo rian Yanꞌanj, ni̱ hué daj ga̱nahuin raꞌa néꞌ nej. Ni̱ sisi̱ gui̱ranꞌ nu̱guanꞌan néꞌ sayun nga̱ Cristo, ngaa ni̱ ga̱huin ꞌueé sa̱ꞌ néꞌ nga̱ sij nej.

¹⁸Ni̱ hua yya ranꞌ néꞌ sayun xungüi̱ nan. Sani̱ rian ga̱huin ꞌueé sa̱ꞌ néꞌ ango xungüi̱ ga̱ꞌnaꞌ, ngaa ni̱ xiꞌí daj ani ruhuāj sisi̱ sé si nico huin sayun ranꞌ néꞌ acuanꞌ mánj. ¹⁹Ni̱ anaꞌuij ni̱nꞌ ruhua daranꞌ ni rasu̱n ma̱n chruhua xungüi̱ da̱j ga̱huin ꞌueé sa̱ꞌ néꞌ huin néꞌ daꞌníj Yanꞌanj. ²⁰Ni̱ daranꞌ ni rasu̱n ma̱n chruhua xungüi̱ gahuin xi̱ꞌij. Sani̱ sé daj huin ruhua ni rasu̱n guiꞌyaj Yanꞌanj mánj. Sani̱ manꞌan Yanꞌanj guiꞌyaj sisi̱ hué daj huaj gahuin xi̱ꞌi daranꞌanj. Ni̱ anaꞌuij daranꞌanj sisi̱ na̱guiꞌyaj na̱ca Yanꞌanj daranꞌanj. ²¹Ni̱ ꞌna̱ꞌ güi ngaa ga̱hui sa̱ꞌ daranꞌanj. Ni̱ nitaj si gu̱chru ni rasu̱n ga̱ mánj. Ni̱ anaꞌuij sa̱ꞌ daranꞌanj sisi̱ ga̱nahuin ꞌueé sa̱ꞌ daranꞌanj da̱j rúnꞌ ga̱nahuin ꞌueé sa̱ꞌ néꞌ huin néꞌ daꞌníj Yanꞌanj.

²²Ni̱ niꞌi néꞌ sisi̱ da̱j rúnꞌ ranꞌ ꞌngo̱ yunꞌunj xa̱na sayun ngaa achin ga̱ꞌnga daꞌníj unj, ni̱ hué daj ranꞌ daranꞌ ni rasu̱n ma̱n chruhua xungüi̱. ²³Ni̱ sé urin ni rasu̱n daj ranꞌ sayun, sani̱ ranꞌ néꞌ sayun nej. Ni̱ anaꞌuij néꞌ si ga̱huin na̱ca daranꞌanj. Ni̱ riqui sini Yanꞌanj Espíritu Santo ga̱ne nga̱ néꞌ. Ni̱ xiꞌí daj anaꞌuij néꞌ sisi̱ ri̱qui Yanꞌanj ango ni rasu̱n sa̱ꞌ rian néꞌ nej. Ni̱ ni güi mán néꞌ xungüi̱ nan, ni̱ nani ruhua néꞌ da ga̱huin yya néꞌ daꞌníj Yanꞌanj. Daj si ngaa ga̱nahuij xungüi̱ nan, ni̱ na̱guiꞌyaj ꞌueé Yanꞌanj nnee̱ cúj néꞌ. ²⁴Hua ganacaj Yanꞌanj néꞌ. Sani̱ anaꞌuij néꞌ sisi̱ gui̱ꞌyaj sa̱ꞌ Yanꞌanj nga̱ néꞌ. Ni̱ sisi̱ hua guiniꞌi néꞌ gaꞌna̱ꞌ ꞌngo̱ rasu̱n anaꞌuij néꞌ, hué dan ni̱ nitaj si anaꞌuij néꞌ si ga̱ꞌnaꞌ ru̱huaꞌ yún rasu̱n daj rian néꞌ ga̱ mánj. Nitaj si huaj si ga̱naꞌuij néꞌ rasu̱n hua nicaj néꞌ mánj. ²⁵Ni̱ nun niꞌi néꞌ si gui̱ꞌyaj Yanꞌanj nga̱ néꞌ. Ni̱ sisi̱ achin gui̱niꞌi néꞌ si anaꞌuij néꞌ, sani̱ na̱naj ga̱naꞌuij néꞌ si gui̱ꞌyaj sa̱ꞌ Yanꞌanj nga̱ néꞌ aj.

²⁶Ni̱ ri̱an ni̱naj niman néꞌ, ni̱ chracuij Espíritu Santo néꞌ. Daj si nun niꞌi néꞌ da̱j ga̱chinj jniꞌyaj néꞌ rian Yanꞌanj. Sani̱ achínj jniꞌyaj ni̱nꞌ ruhua Espíritu Santo xiꞌí néꞌ rian Yanꞌanj. Ni̱ ataj Espíritu Santo rian Yanꞌanj nga̱ nuguanꞌ huin ruhua néꞌ ga̱ꞌmi néꞌ. ²⁷Ni̱ niꞌi sa̱ꞌ Yanꞌanj da̱j huin ruhua niman néꞌ. Ni̱ niꞌi sa̱ꞌ Yanꞌanj da̱j huin ruhua Espíritu Santo nej. Ni̱ da̱j rúnꞌ aranꞌ ruhua Yanꞌanj, ni̱ hué daj achínj jniꞌyaj Espíritu Santo xiꞌí néꞌ huin néꞌ ni ngüi̱ sa̱ꞌ rian Yanꞌanj anj.

Más que vencedores

²⁸Ni̱ niꞌi néꞌ sisi̱ xiꞌí ni ngüi̱ ꞌi̱ ruhua niꞌyaj Yanꞌanj, ni̱ chracuij Yanꞌanj sisi̱ ga̱ sa̱ꞌ ni sij nga̱ daranꞌ si ranꞌ ni sij. Ni̱ hua gani ruhua Yanꞌanj sisi̱ ga̱quinj-ínꞌ ga̱ꞌnaꞌ ni ngüi̱ daj gui̱nicaj dugüiꞌ ni sij nga̱ Yanꞌanj. ²⁹Ni̱ asi̱j ná hua niꞌi Yanꞌanj néꞌ. Ni̱ gani ruhua Yanꞌanj sisi̱ ga̱huin néꞌ da̱j rúnꞌ huin manꞌan daꞌníj Yanꞌanj huin síꞌ Jesús. Ngaa ni̱ ga̱huin síꞌ tsínj xa̱huaꞌ scanij nico ni jnánj síꞌ huin néꞌ. ³⁰Ni̱ asi̱j sini ni̱ gani ruhua Yanꞌanj sisi̱ ga̱quinj-ínꞌ gui̱nicaj dugüiꞌ néꞌ nga̱-áꞌ. Ni̱ gataj Yanꞌanj sisi̱ hua ni̱ca niman néꞌ rian Yanꞌanj nej. Ni̱ ri̱an gataj Yanꞌanj sisi̱ hua ni̱ca niman néꞌ, ni̱ guiꞌyaj-áꞌ sisi̱ ga̱huin ꞌueé sa̱ꞌ néꞌ nga̱-áꞌ nej.

³¹Sisi̱ daj huin, ni̱ ga̱ꞌue ga̱taj néꞌ sisi̱ nicaj dugüiꞌ Yanꞌanj nga̱ néꞌ. Ni̱ nitaj si ga̱huin sisi̱ ga̱taj ru̱hua ni ngüi̱ gui̱niꞌi ni sij néꞌ mánj. ³²Ni̱ gaꞌninꞌ ruhua Yanꞌanj sisi̱ gui̱ranꞌ daꞌni sayun ga̱huiꞌ síꞌ xiꞌí néꞌ. Ni̱ sisi̱ riqui Yanꞌanj daꞌni rian néꞌ, ni̱ ga̱ꞌue ga̱huin yya ruhua néꞌ sisi̱ ri̱qui Yanꞌanj daranꞌ ni nuguanꞌ sa̱ꞌ rian néꞌ nej. ³³Ni̱ ri̱an hua nacui Yanꞌanj néꞌ, ni̱ nitaj si ga̱huin si ga̱ꞌmi gaquinꞌ ni ngüi̱ xiꞌí néꞌ ga̱ mánj. Daj si hua gataj Yanꞌanj sisi̱ hua ni̱ca niman néꞌ. ³⁴Ni̱ ri̱an hua gahuiꞌ Cristo Jesús xiꞌí si-ga̱quinꞌ néꞌ, ni̱ nitaj si ga̱huin si ga̱taj ni ngüi̱ sisi̱ daꞌui néꞌ gaquinꞌ mánj. Ni̱ ganáꞌnij Jesús nej. Ni̱ nne síꞌ raꞌa sa̱ꞌ Yanꞌanj. Ni̱ achínj jniꞌyaj síꞌ rian Yanꞌanj xiꞌí néꞌ aj.

³⁵Ni̱ ducu ꞌi̱ ruhua Cristo niꞌya néꞌ. Ngaa ni̱ da̱j hua nuguanꞌ ga̱ꞌue gui̱ꞌyaj sisi̱ ga̱huin ni̱ni néꞌ rian Cristo, ruhua á re̱ꞌ únj. Ngaa ranꞌ néꞌ sayun níꞌ, asi̱ ngaa nun riꞌ ruhua néꞌ si gui̱ꞌyaj néꞌ níꞌ, asi̱ ngaa aꞌmi quij ni ngüi̱ rian néꞌ níꞌ, asi̱ ngaa achin xiꞌna̱ riqui néꞌ níꞌ, asi̱ ngaa achin atsij gu̱nun néꞌ níꞌ, asi̱ ngaa achéj néꞌ chrej sayun níꞌ, asi̱ ngaa ataj ni ngüi̱ sisi̱ da̱gahuiꞌ ni sij néꞌ sa̱ꞌ. Sani̱ nga̱ daranꞌ ni nuguanꞌ nan, ni̱ si̱ duna Cristo si ꞌi̱ ruhua sij niꞌyaj sij néꞌ. ³⁶Ni̱ hué daj gaꞌmi si-nu̱guanꞌ Yanꞌanj nej. Ni̱ gataj nuguanꞌ daj:

Yaꞌyoj huin ruhua ni sij da̱gahuiꞌ ni sij ni únj xiꞌí manꞌán re̱ꞌ huín re̱ꞌ Yanꞌanj.

Ni̱ da̱j rúnꞌ huin xachij ga̱huiꞌ daj huin ni únj, ruhua ni sij.

Hué daj gataj si-nu̱guanꞌ Yanꞌanj. ³⁷Ni̱ nu̱nj si ranꞌ néꞌ daranꞌ sayun nan, sani̱ gui̱ꞌyaj gana néꞌ xiꞌí si ꞌi̱ ruhua Cristo niꞌyaj sij néꞌ.

³⁸Ni̱ ꞌi̱ ruhua Yanꞌanj niꞌya néꞌ. Ni̱ gahuin yya ruhuāj sisi̱ güi yya̱j, asi̱ ni güi ga̱ꞌnaꞌ, ni̱ si̱ gaꞌue ga̱huin ni̱ni néꞌ rian Yanꞌanj mánj. Nitaj si ga̱huin si ga̱huiꞌ néꞌ. Ni̱ nitaj si ga̱huin si hua ni̱ꞌnaꞌ néꞌ nej. Ni̱ si̱ gaꞌue gui̱ꞌyaj ni ángel nga̱ ni nane̱ xi̱ꞌi sisi̱ ga̱ꞌnij raꞌa Cristo néꞌ mánj. Ni̱ si̱ gaꞌue gui̱ꞌyaj gana ni yanꞌanj ꞌyaj raꞌa ni ngüi̱ rian néꞌ nej. ³⁹Ni̱ si̱ gaꞌue gui̱ꞌyaj ni si mán xataꞌ nga̱ ni si ma̱n rian yoꞌój sisi̱ ga̱ꞌnij raꞌa Cristo néꞌ mánj. Ni̱ a̱ ꞌngo̱ ni rasu̱n guiꞌyaj Yanꞌanj si̱ gaꞌue gui̱ꞌyaj sisi̱ ga̱ꞌnij raꞌa Yanꞌanj néꞌ. Daj si ꞌi̱ ruhua Yanꞌanj niꞌya néꞌ. Ni̱ hué daj ꞌi̱ ruhua Cristo Jesús niꞌya néꞌ huin síꞌ Señor nicaj sun rian néꞌ.

La elección de Israel

¹Ni̱ nicoꞌ manꞌānj Cristo. Ni̱ nitaj si utaj chrā nuguanꞌ ga̱ꞌmī rian án re̱ꞌ. Ni̱ nne Espíritu Santo chruhua nimānj. Ni̱ aꞌmi Espíritu Santo chruhua nimānj sisi̱ nuguanꞌ aꞌmī nan huin nuguanꞌ xa̱ngaꞌ. ^2-3Ni̱ niꞌi xa̱ngaꞌ nimānj sisi̱ ni̱ganj ni̱nꞌ ruhua nani ruhuāj xiꞌí ni dugüiꞌīj huin ni ngüi̱ israelita. Ni̱ huin ꞌi̱ ruhuāj niꞌyā ni ngüi̱ daj. Ni̱ ni̱nꞌ ruhua huin ruhuāj sisi̱ na̱caj Yanꞌanj ni dugüiꞌīj. Ni̱ gaꞌuej ruhuāj ga̱huin ni̱ganj ni̱nꞌīnj castigo, gui̱ꞌyaj Yanꞌanj xiꞌí ni sij. Ni̱ gaꞌuej ruhuāj sisi̱ ga̱huin anē rian Cristo sisi̱ hué chrej daj ga̱ꞌue na̱caj Yanꞌanj ni dugüiꞌīj. ⁴Ni̱ huin ni sij ni tsínj israelita. Ni̱ guiꞌyaj Yanꞌanj sisi̱ ga̱huin ni sij daꞌníj Yanꞌanj. Ni̱ gane ꞌueé Yanꞌanj scanij ni sij. Ni̱ guiꞌyaj yya Yanꞌanj ꞌngo̱ nuguanꞌ sa̱ꞌ nga̱ ni sij. Ni̱ gaꞌuiꞌ Yanꞌanj si-ley-éꞌ rian ni sij. Ni̱ digyán Yanꞌanj da̱j gui̱ꞌyaj ni sij ngaa nahuin yuꞌ ni sij. Ni̱ gataj Yanꞌanj sisi̱ sa̱ꞌ gui̱ꞌyaj-áꞌ nga̱ ni sij. ⁵Ni̱ huin ni sij ni daꞌníj ni xíꞌ guimán asi̱j ná. Ni̱ yan sa̱ꞌ ni ngüi̱ israelita huin Cristo huin síꞌ Yanꞌanj nicaj sun rian daranꞌanj. Ni̱ ni̱ganj ga̱ꞌmi sa̱ꞌ néꞌ xiꞌí Cristo. Amén.

⁶Ni̱ sé si xa̱ngaꞌ nun gui̱sij nuguanꞌ gataj yya Yanꞌanj rian ni ngüi̱ israelita. Daj si xiꞌí si nun dagahuin daꞌaj ni sij rian Yanꞌanj, ni̱ sé si xa̱ngaꞌ daranꞌ ni daꞌníj Israel huin yya tsínj israelita. ⁷Ni̱ sé si xa̱ngaꞌ daranꞌ ni daꞌni̱ siꞌni̱ Abraham huin yya daꞌníj síꞌ. Daj si gataj Yanꞌanj gunun síꞌ: “Ni̱ daꞌni̱ siꞌni̱ re̱ꞌ ga̱ꞌnaꞌ rian tsínj gu̱ꞌnaj Isaac.” Daj gataj Yanꞌanj gunun xíꞌ Abraham. ⁸Ni̱ nuguanꞌ nan huin ruhuaj gata sisi̱ sé daranꞌ ni ngüi̱ gaꞌnga rian xíꞌ Abraham huin daꞌníj Yanꞌanj. Sani̱ urin ni ngüi̱ xuman ruhua si-nu̱guanꞌ Yanꞌanj hué ni sij huin yya ni daꞌníj Abraham. ⁹Daj si nuguanꞌ nan huin nuguanꞌ gataj yya Yanꞌanj gunun Abraham: “Ango yoꞌ na̱nicaj yūnj, ni̱ gui̱nicaj nica̱ re̱ꞌ Sara ꞌngo̱ lij.” Daj gataj Yanꞌanj gunun Abraham.

¹⁰Ni̱ ango nuguanꞌ huin sisi̱ xíꞌ Isaac huin urin chrej nu̱ngüej lij daꞌníj Rebeca huin unj nica̱ síꞌ. ^11-12Ni̱ ngaa achin ga̱ꞌnga nu̱ngüej li, ni̱ ngaa achin gui̱ꞌyaj nu̱ngüe si sa̱ꞌ, asi̱ sé si sa̱ꞌ, sani̱ hua gataj Yanꞌanj rian Rebeca sisi̱ lij ga̱ꞌnga sini hué-éꞌ da̱gahuin sun rian ango lij ga̱ꞌnga ne̱ꞌ ru̱cu. Ni̱ maan si nacui Yanꞌanj ꞌngo̱ síꞌ ga̱huin síꞌ tsínj ga̱huin achij rian jnánj síꞌ xiꞌí si hua gani sini ruhua Yanꞌanj da̱j ga̱ sun nicaj go̱ꞌngo nu̱ngüe rian Yanꞌanj. ¹³Ni̱ nuguanꞌ nan gataj Yanꞌanj: “Huin ꞌi̱ ruhuāj niꞌyā tsínj gu̱ꞌnaj Jacob. Sani̱ nun huin xa̱nꞌ ruhuāj niꞌyā tsínj gu̱ꞌnaj Esaú mánj.” Daj gataj Yanꞌanj.

¹⁴Hué dan ni̱ ga̱taj néꞌ sisi̱ nitaj si hua ni̱ca niman Yanꞌanj, ruhua á re̱ꞌ níꞌ. ¹⁵Daj si gataj Yanꞌanj rian Moisés: “Ni̱ da̱j rúnꞌ aranꞌ ruhuāj, ni̱ hué daj gui̱ꞌyā na̱cuīj ni ngüi̱ sisi̱ na̱ni yaco ruhuāj guiniꞌyā. Ni̱ hué daj gui̱ꞌyā na̱huin ꞌi̱ ruhuāj gui̱niꞌyā nej.” Daj gataj Yanꞌanj.

¹⁶Ni̱ naꞌue gui̱ꞌyaj ni ngüi̱ sisi̱ na̱cui Yanꞌanj ni sij xiꞌí si hué daj huin ruhua ni sij, asi̱ sisi̱ gui̱ꞌyaj fuerza ni sij. Sani̱ urin si nahuin ꞌi̱ ruhua Yanꞌanj niꞌyaj-áꞌ, ni̱ nacui Yanꞌanj ni sij.

¹⁷Daj si hua gataj Yanꞌanj gunun rey gu̱ꞌnaj Faraón: “Hué manꞌānj guiꞌyaj sisi̱ huín re̱ꞌ rey. Ni̱ xiꞌí manꞌán re̱ꞌ di̱gyānj da̱j nucuā rian daranꞌ ni ngüi̱ ma̱n chruhua xungüi̱. Ni̱ gui̱niꞌi ni sij da̱j hua manꞌānj nej.” Daj gataj Yanꞌanj gunun Faraón asi̱j ná.

¹⁸Hué dan ni̱ niꞌi néꞌ sisi̱ na̱ni yaco ruhua Yanꞌanj niꞌyaj-áꞌ u̱n tsínj huin ruhua-áꞌ. Ni̱ ꞌyaj Yanꞌanj sisi̱ naꞌuej ruhua ango tsínj daj da̱gahuin sij.

¹⁹Sani̱ si ruhuaj ga̱taj daꞌaj ni é re̱ꞌ: “Da̱j ga̱ꞌue ga̱ꞌmi gaquinꞌ Yanꞌanj xiꞌí ni ngüi̱ sisi̱ ni̱nanj ꞌyaj néꞌ si huin ruhua Yanꞌanj únj.” Daj ga̱taj daꞌaj ni é re̱ꞌ, si ruhuaj. ²⁰Sani̱ u̱n sin huín so̱ꞌ, ni̱ unúnꞌ so̱ꞌ nga̱ Yanꞌanj únj. Ga̱taj ꞌngo̱ chruj yoꞌój gu̱nun tsínj guiꞌyaj chruj: “Ni̱ u̱n sin huin ni̱ guiꞌyáj re̱ꞌ daj manꞌānj únj.” Hué daj ga̱ꞌmi ꞌngo̱ chruj, ruhuá re̱ꞌ níꞌ. Sé daj huin mánj. ²¹Ni̱ da̱j rúnꞌ aranꞌ ruhua tsínj ꞌyaj chruj, ni̱ hué daj ꞌyaj sij. Ni̱ hué gue̱ luti sigeꞌ daj ꞌyaj sij ꞌngo̱ chruj sa̱ꞌ ni̱nꞌ ruhua nga̱ ango chruj niqui nej. ²²Ni̱ aꞌman ruhua Yanꞌanj niꞌya ni ngüi̱ ꞌyaj quij. Ni̱ gui̱ꞌyaj Yanꞌanj castigo ni sij. Ni̱ nu̱nj si ni̱ganj ni̱nꞌ ga̱huin ni ngüi̱ daj castigo, sani̱ aꞌninꞌ acuanꞌ ruhua Yanꞌanj niꞌyaj-áꞌ ni sij. Daj si huin ruhua Yanꞌanj sisi̱ gui̱niꞌi daranꞌ ni ngüi̱ da̱j nucuaj manꞌan Yanꞌanj. ²³Ni̱ huin ruhua Yanꞌanj di̱gyanj rian ni ngüi̱ da̱j ga̱huin ꞌueé sa̱ꞌ néꞌ, gui̱ꞌyaj Yanꞌanj. Ni̱ asi̱j sini ni̱ naguiꞌyaj sa̱ꞌ Yanꞌanj néꞌ sisi̱ ga̱ne ni̱ganj néꞌ rian hua sa̱ꞌ nne manꞌan Yanꞌanj. ²⁴Ni̱ gaquínj Yanꞌanj ga̱ꞌnaꞌ ga̱ne néꞌ nga̱ Yanꞌanj. Ni̱ daꞌaj néꞌ huin ni ngüi̱ israelita. Ni̱ ango daꞌaj néꞌ huin ni ngüi̱ ꞌna̱ꞌ anéj chrej.

²⁵Ni̱ hué daj gataj Yanꞌanj garun xíꞌ Oseas asi̱j ná:

Ni̱ hua ni ngüi̱ nun gui̱nicoꞌ sini manꞌānj.

Sani̱ ga̱huin ni sij ni ngüi̱ nicoꞌ manꞌānj.

Ni̱ asi̱j sini ni̱ nun gahuin ꞌi̱ ruhuāj niꞌyā ni ngüi̱ daj.

Sani̱ ga̱huin ꞌi̱ ruhuāj niꞌyā ni sij aj.

²⁶Ni̱ ri̱an gatā gunun ni sij sisi̱ sé ni ngüi̱ nicoꞌ manꞌānj huin ni sij, ni̱ hué yuꞌuj daj ga̱huin daꞌnī ni sij huin manꞌānj Yanꞌanj hua ni̱ꞌnaꞌ.

Daj gataj Yanꞌanj rian tsínj gu̱ꞌnaj Oseas.

²⁷Ni̱ gaꞌmi nucuaj Isaías xiꞌí ni ngüi̱ israelita. Ni̱ gataj síꞌ asi̱j ná:

Ni̱ nu̱nj si ga̱huin nico ni ngüi̱ israelita da̱j rúnꞌ mán nico yoꞌój chru mán duꞌua nnee yanꞌanj, sani̱ do̱j ni sij ga̱nacaj Yanꞌanj anj.

²⁸Daj si ꞌngo̱ hora ga̱ꞌnaꞌ castigo ni̱nꞌ ga̱chraꞌ xungüi̱, gui̱ꞌyaj Yanꞌanj.

Daj gataj tsínj gu̱ꞌnaj Isaías.

²⁹Ni̱ hué daj gataj Isaías nej:

Ni̱ nucuaj ni̱nꞌ ruhua manꞌan Yanꞌanj.

Ni̱ sisi̱ gahuiꞌ daranꞌ néꞌ xiꞌí gaquinꞌ daꞌui néꞌ, ni̱ hua gahuin xánj néꞌ da̱j rúnꞌ hua xumanꞌ Sodoma nga̱ xumanꞌ Gomorra.

Sani̱ nacaj Yanꞌanj do̱j néꞌ.

Daj gataj Isaías asi̱j ná.

La justicia que es por fe

³⁰Ngaa ni̱ nu̱nj huin si ruhuaj gata nuguanꞌ nan, ruhua á re̱ꞌ únj. Huin ruhuaj gata sisi̱ hua ni̱ca niman ni ngüi̱ ꞌna̱ꞌ anéj chrej rian Yanꞌanj xiꞌí si xuman ruhua ni sij niꞌyaj ni sij Yanꞌanj. Ni̱ nun na̱noꞌ ni sij sisi̱ hué daj gui̱ꞌyaj Yanꞌanj nga̱ ni sij. ³¹Sani̱ guiꞌyaj fuerza ni ngüi̱ israelita sisi̱ da̱gahuin ni sij da̱j rúnꞌ ataj si-ley Yanꞌanj güenda sisi̱ na̱huin sa̱ꞌ niman ni sij rian Yanꞌanj. Sani̱ nun ga̱ꞌue da̱gahuin ni sij si ataj ley da mánj. ³²Ngaa ni̱ u̱n sin huin ni̱ nun gahuin sa̱ꞌ niman ni sij, ruhua á re̱ꞌ únj. Daj si nun ga̱ꞌuej ruhua ni sij gu̱xuman ruhua ni sij ni̱ꞌyaj ni sij Jesucristo. Maan si gani ruhua ni sij nga̱ xiꞌí si gui̱ꞌyaj sa̱ꞌ manꞌan ni sij, ni̱ a̱ hua ni̱ca niman ni sij, ruhua ni sij. Hué dan ni̱ natúj ni sij guiꞌyaj yej garij ni sij dacój ni sij daj. Ni̱ yej daj huin Jesucristo.

³³Ni̱ hué daj gaꞌmi ni̱ca si-nu̱guanꞌ Yanꞌanj asi̱j ná:

Hué xumanꞌ Sión, ni̱ gu̱rū yej gui̱ꞌyaj na̱tu ni ngüi̱.

Ni̱ ni ngüi̱ gu̱xuman ruhua ni̱ꞌyaj Jesucristo, ni̱ si̱ gahuin na̱ꞌaj ni sij mánj.

Sani̱ ga̱hui sa̱ꞌ ni sij, gui̱ꞌyaj Yanꞌanj.

Ni̱ yej daj huin Jesucristo.

Hué daj gataj Yanꞌanj.

¹Ducu huin ruhuāj sisi̱ na̱caj Yanꞌanj ni ngüi̱ israelita huin ín re̱ꞌ jnān nga̱ xicaꞌuī. Ni̱ hué daj achínj jniꞌyā rian Yanꞌanj nej. ²Ga̱ꞌue ga̱tā sisi̱ ꞌyaj fuerza ni sij sisi̱ da̱gahuin ni sij rian Yanꞌanj. Sani̱ nunun ni sij da̱j gui̱ꞌyaj ni sij, ni̱ ga̱ꞌue ga̱huin sa̱ꞌ ni sij rian Yanꞌanj. ³Ni̱ nun niꞌi ni sij sisi̱ urin Yanꞌanj ꞌyaj sisi̱ hua ni̱ca niman ni ngüi̱ rian Yanꞌanj. Ni̱ nanoꞌ ni sij sisi̱ ga̱ ni̱ca niman ni sij rian Yanꞌanj xiꞌí si guiꞌyaj manꞌan ni sij. Ni̱ nun ga̱ꞌuej ruhua ni sij da̱j rúnꞌ gataj Yanꞌanj si gui̱ꞌyaj ni sij. ⁴Daj si manꞌan Cristo guiꞌyaj sisi̱ guisíj dagahuin néꞌ si ataj si-ley Yanꞌanj. Daj si Cristo guiꞌyaj sisi̱ hua ni̱ca niman néꞌ xiꞌí si xuman ruhua néꞌ niꞌyaj néꞌ manꞌan sij.

⁵Ni̱ garun Moisés sisi̱ da̱j ga̱ ni̱ca niman ni ngüi̱ xiꞌí si dagahuin ni sij ley daj. Ni̱ gataj síꞌ: “Sisi̱ da̱gahuin ni ngüi̱ ni nuguanꞌ daj, ni̱ ga̱ ni̱ꞌnaꞌ xa̱ngaꞌ ni sij, gui̱ꞌyaj ni nuguanꞌ daj.” Daj garun Moisés. ⁶Sani̱ Cristo ꞌyaj sisi̱ hua ni̱ca niman néꞌ rian Yanꞌanj xiꞌí si xuman ruhua néꞌ niꞌyaj néꞌ manꞌan sij. Hué dan ni̱ si̱ gani ruhua néꞌ: “Un tsínj ga̱ꞌue ga̱hui xataꞌ” ―daj si nitaj si huaj si ga̱nꞌanj xa̱caj néꞌ Cristo ga̱ꞌnaꞌ ru̱huaꞌ yún síꞌ ne̱ꞌ ni̱caꞌ. ⁷Ni̱ si̱ gani ruhua néꞌ: “Un tsínj ga̱ꞌue gui̱nij ga̱nꞌanj riqui yoꞌój” ―daj si nitaj si huaj si ga̱nꞌanj xa̱caj néꞌ Cristo ga̱naꞌnij ru̱huaꞌ yún síꞌ scanij ni níman.

⁸Ni̱ aꞌmi néꞌ nuguanꞌ sa̱ꞌ rian ni dugüiꞌ néꞌ. Daj si: “Gahuin ni̱chrunꞌ nuguanꞌ sa̱ꞌ nan nu̱n duꞌua néꞌ nga̱ niman néꞌ.” Ni̱ hué nuguanꞌ sa̱ꞌ nan huin si nataꞌ ni únj sisi̱ gu̱xuman ruhua néꞌ ni̱ꞌyaj néꞌ Jesucristo. ⁹Ni̱ sisi̱ na̱taꞌ re̱ꞌ rian ni dugüíꞌ re̱ꞌ sisi̱ Jesús huin Señor nicaj sun rian néꞌ, ni̱ sisi̱ gu̱xuman xa̱ngaꞌ ruhuá re̱ꞌ sisi̱ ganáꞌnij Jesús scanij ni níman, guiꞌyaj Yanꞌanj, hué dan ni̱ na̱caj Yanꞌanj manꞌán re̱ꞌ. ¹⁰Daj si sisi̱ gu̱xuman ruhua néꞌ ni̱ꞌyaj néꞌ Jesucristo, ni̱ ga̱huin sa̱ꞌ néꞌ rian Yanꞌanj. Ni̱ sisi̱ na̱taꞌ duꞌua néꞌ sisi̱ nicoꞌ néꞌ Jesús, ni̱ na̱caj Yanꞌanj néꞌ nej aj.

¹¹Ni̱ gataj Yanꞌanj: “Daranꞌ ni tsínj xuman ruhua niꞌyaj Yanꞌanj, ni̱ si̱ gahuin na̱ꞌaj ni sij. Sani̱ ga̱hui sa̱ꞌ ni sij.” Hué daj gataj si-nu̱guanꞌ Yanꞌanj. ¹²Ni̱ uyan huin ni ngüi̱ israelita nga̱ ni ngüi̱ griego rian Jesucristo. Daj si urin Señor Jesucristo nicaj sun rian daranꞌ néꞌ. Ni̱ ni̱nꞌ ruhua riqui Jesucristo nuguanꞌ sa̱ꞌ rian daranꞌ ni ngüi̱ achínj jniꞌyaj rian sij. ¹³Daj si hué daj gataj si-nu̱guanꞌ Yanꞌanj: “Daranꞌ ni ngüi̱ achínj jniꞌyaj rian Yanꞌanj nga̱ si-xugüi Señor, ni̱ na̱caj Yanꞌanj ni sij.” Daj gataj si-nu̱guanꞌ Yanꞌanj.

¹⁴Sani̱ ngaa hua ni̱nꞌ achin gu̱xuman ruhua ni sij ni̱ꞌyaj ni sij Señor, ni̱ naꞌue ga̱chinj jniꞌyaj ni sij rian Señor mánj. Ni̱ si̱ gaꞌue gu̱xuman ruhua ni sij ni̱ꞌyaj ni sij síꞌ ngaa ni̱nꞌ achin gu̱nun ni sij xiꞌí síꞌ. Ni̱ si̱ gaꞌue gu̱nun ni sij ngaa nitaj tsínj na̱taꞌ nuguanꞌ sa̱ꞌ rian ni sij mánj. ¹⁵Ni̱ si̱ gaꞌue na̱taꞌ ꞌngo̱ ni tsínj daj nuguanꞌ sa̱ꞌ rian ni ngüi̱ sisi̱ nitaj ꞌngo̱ tsínj ga̱ꞌnij ga̱nꞌanj na̱taꞌ ni sij rian ni ngüi̱. Ni̱ gataj si-nu̱guanꞌ Yanꞌanj: “Ni̱ ꞌueé ni̱nꞌ ruhua ꞌyaj ni tsínj ganꞌanj ga̱ꞌmi nuguanꞌ sa̱ꞌ rian ni ngüi̱.” Hué daj gataj si-nu̱guanꞌ Yanꞌanj.

¹⁶Sani̱ sé daranꞌ ni ngüi̱ ráj xina nga̱ nuguanꞌ sa̱ꞌ ꞌna̱ꞌ rian Yanꞌanj da mánj. Ni̱ hué daj gaꞌmi tsínj gu̱ꞌnaj Isaías ngaa nachínj snanꞌanj sij rian Yanꞌanj. Ni̱ gataj sij: “Señor, u̱n sin huin ni̱ do̱j ni ngüi̱ guxuman ruhua nuguanꞌ nataꞌ ni únj únj.” Daj gataj Isaías gunun Yanꞌanj.

¹⁷Hué dan ni̱ ngaa guisíj gunun ni ngüi̱ nuguanꞌ sa̱ꞌ, ni̱ ga̱ꞌue gu̱xuman ruhua ni sij ni̱ꞌyaj ni sij Cristo. Ni̱ ga̱ꞌue ga̱ra daꞌngaꞌ ruhua ni sij ngaa aꞌmi ꞌngo̱ tsínj daj si-nu̱guanꞌ Yanꞌanj rian ni sij.

¹⁸Sani̱ sé si xa̱ngaꞌ si nun gunun ni sij nuguanꞌ sa̱ꞌ daj. Daj si gataj si-nu̱guanꞌ Yanꞌanj:

Hua gaxaꞌni̱ nuguanꞌ sa̱ꞌ ni̱nꞌ ga̱chraꞌ chruhua xungüi̱.

Ni̱ daꞌ ganun ni̱nꞌ xiꞌí xungüi̱ guisíj nuguanꞌ sa̱ꞌ daj.

Daj gataj si-nu̱guanꞌ Yanꞌanj.

¹⁹Sani̱ sé si xa̱ngaꞌ si nun acaj ni ngüi̱ israelita cuenta xiꞌí sa̱ꞌ daj. Daj si gataj Moisés asi̱j hua ná:

Ni̱ gui̱ꞌyā sisi̱ ga̱huin xicoj ruhua ni é re̱ꞌ ni̱ꞌyaj ni é re̱ꞌ ni ngüi̱ ꞌna̱ꞌ anéj chrej.

Ni̱ gui̱ꞌyā sisi̱ ga̱ꞌman ruhua ni é re̱ꞌ gui̱niꞌyaj ni é re̱ꞌ ni ngüi̱ nitaj ducuánj nicaj ga̱ꞌmi.

Daj gataj Yanꞌanj garun Moisés rian ni ngüi̱ israelita.

²⁰Ni̱ hué daj guisíj ruhua Isaías gataj síꞌ nej:

Ni ngüi̱ nun na̱noꞌ yūnj, ni̱ hua nariꞌ ni sij manꞌānj.

Ni̱ digyán manꞌānj rian ni ngüi̱ nun na̱chinꞌ snanꞌanj si-xugüīj.

Daj gataj Yanꞌanj garun Isaías.

²¹Sani̱ ngaa gaꞌmi Isaías xiꞌí ni ngüi̱ israelita, ni̱ gataj síꞌ: “Nugüi ni̱ganꞌ, ni̱ dugüiꞌīnj raꞌāj sisi̱ ga̱ꞌnaꞌ ni sij riānj huin ni sij ni tsínj nun dagahuin riānj. Ni̱ ununꞌ ni sij nga̱ manꞌānj nej.” Daj gataj Yanꞌanj garun Isaías.

El remanente de Israel

¹Hué dan ni̱ xa̱ngaꞌ si danica̱j Yanꞌanj ni ngüi̱ israelita níꞌ. Sé daj huin mánj. Daj si hué manꞌānj huin ꞌngo̱ tsínj israelita nej. Ni̱ yūnj huin daꞌni̱ siꞌni̱ Abraham. Ni̱ nicōj xiꞌninꞌ huin Benjamín. ²Sé si danica̱j Yanꞌanj ni ngüi̱ israelita mánj. Ni̱ asi̱j sini ya̱n ngaa achin ga̱ꞌnga ni ngüi̱ israelita, ni̱ hua guiniꞌi Yanꞌanj ni sij.

Ni̱ hua niꞌi ni é re̱ꞌ da̱j ataj si-nu̱guanꞌ Yanꞌanj xiꞌí tsínj gu̱ꞌnaj Elías asi̱j ná. Ni̱ ngaa gachínj jniꞌyaj síꞌ rian Yanꞌanj, ni̱ gaꞌmi gaquinꞌ sij xiꞌí ni ngüi̱ israelita. Ni̱ gataj síꞌ:

³Señor, dagahuiꞌ ni sij ni tsínj gaꞌmi si-nu̱guanꞌ manꞌán re̱ꞌ.

Ni̱ duguane ni sij ni altar huin si-nná re̱ꞌ nej.

Ni̱ ango rin manꞌānj gunā hua ni̱ꞌnaꞌ nánj.

Ni̱ hué daj huin ruhua ni sij da̱gahuiꞌ ni sij manꞌānj nej.

Daj gataj Elías gunun Yanꞌanj.

⁴Sani̱ gataj Yanꞌanj gunun Elías: “Ni̱ hua ri ninīj ichij mí ni ngüi̱ israelita naꞌuej ga̱ne ráj da̱coj rian yanꞌanj gu̱ꞌnaj Baal.” Daj gataj Yanꞌanj gunun Elías.

⁵Ni̱ hué ducuánj daj huin nga̱ ni ngüi̱ israelita güi yya̱j. Daj si guiꞌyaj Yanꞌanj sinduj rian ni sij. Ni̱ nacui Yanꞌanj do̱j ni sij. ⁶Nacui Yanꞌanj ni sij xiꞌí si ꞌya sinduj nga̱ ni sij. Ni̱ sé xiꞌí si ꞌyaj sa̱ꞌ ni sij, ni̱ nacui Yanꞌanj ni sij mánj. Ni̱ sisi̱ hué daj huin, ni̱ sinduj ꞌyaj Yanꞌanj nga̱ ni sij, ni̱ sé ꞌngo̱ sinduj huin ga̱ mánj.

⁷Hué dan ni̱ huin ruhua ni ngüi̱ israelita ga̱hui sa̱ꞌ niman ni sij rian Yanꞌanj. Sani̱ nun guiriꞌ ni sij si gahuin ruhua ni sij. Sani̱ ni ngüi̱ ganacui Yanꞌanj, ni̱ hué néꞌ guiriꞌ aj. Ni̱ naꞌuej ruhua ango ni sij gu̱nun ni sij, guiꞌyaj Yanꞌanj. ⁸Ni̱ hué daj gataj si-nu̱guanꞌ Yanꞌanj nej:

Ni̱ guiꞌyaj Yanꞌanj sisi̱ na̱ꞌue ga̱ra daꞌngaꞌ ruhua ni sij nuguanꞌ sa̱ꞌ.

Ni̱ hué daj huin da güi acuanꞌ nej.

Daj si nu̱n rian ni sij, sani̱ naꞌue xigui̱n ni̱ꞌyaj ni sij.

Ni̱ nu̱n chraquij ni sij, sani̱ naꞌue gu̱nun ni sij mánj.

Daj gataj Yanꞌanj xiꞌí ni ngüi̱ israelita. ⁹Ni̱ hué daj gataj David asi̱j ná nej:

Huin ruhuāj sisi̱ guiꞌyanj ꞌyaj ni ngüi̱ daj ga̱nahuin-ínꞌ xiꞌ nga̱ nnánj.

Ni̱ gui̱ranꞌ ni sij sayun da̱j rúnꞌ ranꞌ xucu ataꞌ raꞌngaꞌ.

Ni̱ ga̱natuj ni sij ga̱huin ni sij castigo xiꞌí gaquinꞌ guiꞌyaj ni sij.

¹⁰Ni̱ huin ruhuāj sisi̱ ga̱huin duri rian ni sij.

Ni̱ si̱ guixigui̱n gui̱niꞌyaj ni sij mánj.

Ni̱ ga̱che nitu ni sij ni̱ganj ni̱nꞌ, ruhuāj aj.

Daj gataj David.

La salvación de los gentiles

¹¹Hué dan ni̱ atā gu̱nun ni é re̱ꞌ sisi̱ sé si gue̱reꞌ ni̱ganj ni ngüi̱ israelita rian Yanꞌanj mánj. Daj si ngaa nun dagahuin ni sij, ni̱ nacaj Yanꞌanj ni ngüi̱ ꞌna̱ꞌ anéj chrej. Xiꞌí daj ni̱ ga̱huin xicoj ruhua ni sij ni̱ꞌyaj ni sij ni ngüi̱ ꞌna̱ꞌ anéj chrej daj. ¹²Ni̱ ri̱an guereꞌ ni ngüi̱ israelita rian Yanꞌanj, ni̱ hua sa̱ꞌ rian ni ngüi̱ ma̱n chruhua xungüi̱. Ni̱ ganacaj Yanꞌanj ni ngüi̱ ꞌna̱ꞌ anéj chrej xiꞌí si guereꞌ ni sij nej. Ni̱ sisi̱ hué daj huin, ni̱ sa̱ꞌ ni̱nꞌ ga̱huin ngaa gui̱nicoꞌ ru̱huaꞌ yún ni ngüi̱ israelita Yanꞌanj.

¹³Yya̱j ni̱ ga̱ꞌmī rian ni é re̱ꞌ huin ni é re̱ꞌ ni ngüi̱ ꞌna̱ꞌ anéj chrej. Ni̱ gaꞌníj Jesucristo ga̱nꞌān rian án re̱ꞌ huīnj apóstol aꞌmī si-nu̱guanꞌ síꞌ. Ni̱ xiꞌí daj ni̱ ꞌyaj fuerzāj nga̱ si-sūnj. ¹⁴Daj si huin ruhuāj sisi̱ ga̱huin xicoj ruhua ni ngüi̱ israelita gui̱niꞌi ni sij ni é re̱ꞌ. Ngaa ni̱ ga̱ꞌue na̱caj Yanꞌanj daꞌaj ni sij. ¹⁵Ngaa danica̱j Yanꞌanj ni ngüi̱ israelita, ni̱ gahuin nu̱guanꞌan ni ngüi̱ mán ni̱nꞌ ga̱chraꞌ chruhua xungüi̱ nga̱ Yanꞌanj. Ngaa ni̱ ga̱huin sa̱ꞌ ni̱nꞌ ni ngüi̱ israelita ngaa gui̱nicaj dugüiꞌ ru̱huaꞌ yún Yanꞌanj nga̱ ni sij. Daj si da̱j rúnꞌ huin ni tsínj gahuiꞌ huin ni sij yya̱j. Sani̱ ga̱naꞌnij ni sij, gui̱ꞌyaj Yanꞌanj. ¹⁶Sisi̱ hua sa̱ꞌ do̱j quinj, ni̱ daranꞌ quinj daj hua sa̱ꞌ. Ni̱ sisi̱ hua sa̱ꞌ yaꞌa̱ siu̱ chrun daj, ni̱ hua sa̱ꞌ ꞌngo̱ gue̱ chrun nga̱ raꞌa nej.

¹⁷Ni̱ da̱j rúnꞌ ꞌyaj néꞌ ngaa aꞌninꞌ néꞌ raꞌa chrun, ni̱ hué daj guiꞌyaj Yanꞌanj nga̱ ni ngüi̱ israelita. Ni̱ hué ni é re̱ꞌ huin rúnꞌ huin ꞌngo̱ raꞌa chrun ꞌna̱ꞌ riqui quij. Ni̱ naꞌníj Yanꞌanj scanij chrun sa̱ꞌ olivo ni é re̱ꞌ yuꞌuj guimán ni ngüi̱ israelita. Ngaa ni̱ ga ni̱ꞌnaꞌ ni é re̱ꞌ guiꞌyaj yaꞌa̱ siu̱ chrun olivo daj. Ni̱ rúnꞌ huin raꞌa chrun olivo sa̱ꞌ huin ni ngüi̱ xuman ruhua niꞌyaj Yanꞌanj. ¹⁸Xiꞌí daj ni̱ si̱ gani ruhua ni é re̱ꞌ sisi̱ sa̱ꞌ huin ni é re̱ꞌ daj nga̱ ni ngüi̱ israelita. Ni̱ sisi̱ hué daj ani ruhua ni é re̱ꞌ, ngaa ni̱ na̱nun sa̱ꞌ ruhua ni é re̱ꞌ sisi̱ hua ni̱ꞌnaꞌ ni é re̱ꞌ, guiꞌyaj yaꞌa̱ siu̱ chrun. Ni̱ sé ni é re̱ꞌ guiꞌyaj sisi̱ hua ni̱ꞌnaꞌ yaꞌa̱ siu̱ chrun mánj. ¹⁹Ni̱ si ruhuaj, ni̱ ga̱taj ni é re̱ꞌ: “Gaꞌninꞌ Yanꞌanj ni raꞌa chrun daj xiꞌí si na̱ꞌnij-íꞌ ni é re̱ꞌ scanij chrun sa̱ꞌ olivo daj.” ²⁰Hué daj huin xa̱ngaꞌ. Sani̱ ri̱an nun gu̱xuman ruhua ni ngüi̱ israelita, ni̱ guereꞌ ni sij rian Yanꞌanj. Ni̱ ꞌni̱j ni é re̱ꞌ scanij chrun daj urin si xuman ruhua á re̱ꞌ niꞌyaj á re̱ꞌ Yanꞌanj. Ngaa ni̱ si̱ ga nne̱ é re̱ꞌ si ꞌni̱j ni é re̱ꞌ scanij chrun daj. Maan si ga̱ cuidado ni é re̱ꞌ nga̱ chrej huaj á re̱ꞌ nánj.

²¹Ni̱ sisi̱ nun gui̱nicaj Yanꞌanj ꞌngo̱ niman nico xiꞌí si-ga̱quinꞌ ni ngüi̱ israelita huin ni sij raꞌa chrun daj, ngaa ni̱ si̱ guinicaj Yanꞌanj ꞌngo̱ niman nico xiꞌí ni é re̱ꞌ nej. ²²Ni̱ꞌyaj ni é re̱ꞌ yya̱j. Huin sa̱ꞌ ruhua Yanꞌanj niꞌya ni ngüi̱. Sani̱ sun duꞌua Yanꞌanj rian ni ngüi̱ nej. Ni̱ gahuin castigo ni ngüi̱ israelita, guiꞌyaj Yanꞌanj. Sani̱ gui̱ꞌyaj sa̱ꞌ Yanꞌanj nga̱ manꞌan ni é re̱ꞌ. Ni̱ hué daj gui̱ꞌyaj Yanꞌanj sinduj rian án re̱ꞌ sisi̱ si̱ ganꞌanj anéj ni é re̱ꞌ rian Yanꞌanj. Daj si sisi̱ si̱ dagahuin ín re̱ꞌ rian Yanꞌanj, ni̱ hué daj ga̱ꞌninꞌ Yanꞌanj ni é re̱ꞌ nej nánj. ²³Ni̱ sisi̱ ga̱ꞌuej ruhua ni ngüi̱ israelita gu̱xuman ruhua ni sij ni̱ꞌyaj ni sij Yanꞌanj, ngaa ni̱ na̱ꞌninj ru̱huaꞌ yún Yanꞌanj ni sij scanij chrun daj. Daj si si-fuerza manꞌan Yanꞌanj ga̱ꞌue gui̱ꞌyaj sisi̱ na̱ꞌninj ru̱huaꞌ yún-únꞌ ni sij. ²⁴Ni̱ sé ni é re̱ꞌ huin ni ngüi̱ israelita mánj. Hué ni é re̱ꞌ huin ꞌngo̱ raꞌa chrun ꞌna̱ꞌ riqui quij gaꞌninꞌ Yanꞌanj. Ni̱ naꞌnínj Yanꞌanj ni é re̱ꞌ scanij chrun olivo sa̱ꞌ hua. Ni̱ sisi̱ ni ngüi̱ israelita huin raꞌa chrun olivo sa̱ꞌ hua daj, ngaa ni̱ huaj doj ga̱ꞌue ga̱naꞌnij ru̱huaꞌ yún Yanꞌanj ni sij scanij chrun olivo da aj.

La restauración de Israel

²⁵Ni̱ huin ruhuāj sisi̱ gui̱niꞌi ni é re̱ꞌ huin ni jnān nga̱ ni xicaꞌuī ꞌngo̱ nuguanꞌ sa̱ꞌ garij hui̱ Yanꞌanj. Ngaa ni̱ guisíj gunun ni é re̱ꞌ nuguanꞌ nan, ni̱ si̱ güin ga̱ꞌmi xa̱can án re̱ꞌ mánj. Daj si daꞌaj ni ngüi̱ israelita naꞌuej ruhua gu̱nun si gataj Yanꞌanj rian ni sij. Ni̱ hué daj ga̱ ni ngüi̱ israelita da gui̱sij güi gu̱xuman ruhua daranꞌ ni ngüi̱ nacui Yanꞌanj huin ni sij ni ngüi̱ ꞌna̱ꞌ anéj chrej. ²⁶Ni̱ ngaa hué daj ga̱huin, ni̱ ga̱nacaj Yanꞌanj daranꞌ ni ngüi̱ israelita. Ni̱ hué daj gataj si-nu̱guanꞌ Yanꞌanj nej:

Ne̱ꞌ xumanꞌ Sión ga̱ꞌnaꞌ ꞌngo̱ tsínj ga̱nacaj ni ngüi̱.

Ni̱ ga̱ꞌne sij si-ga̱quinꞌ ni du̱güiꞌ Jacob huin ni sij ni ngüi̱ israelita.

²⁷Ni̱ nan huin nuguanꞌ gui̱ꞌyaj yyāj nga̱ ni sij güi ga̱ꞌnē si-ga̱quinꞌ ni sij.

Daj gataj si-nu̱guanꞌ Yanꞌanj.

²⁸Ni̱ ununꞌ ni ngüi̱ israelita nga̱ Yanꞌanj xiꞌí si naꞌue gu̱xuman ruhua ni sij nga̱ nuguanꞌ sa̱ꞌ ꞌna̱ꞌ rian Yanꞌanj. Ni̱ xiꞌí si hué daj ꞌyaj ni sij, ni̱ hua níꞌnij ga̱tu ni é re̱ꞌ si-chrej Yanꞌanj. Sani̱ hua gue̱ ꞌi̱ ruhua Yanꞌanj niꞌyaj-áꞌ ni sij xiꞌí si hua ganacui Yanꞌanj ni xi ni sij asi̱j hua ná. ²⁹Ni̱ nitaj a̱man na̱duna Yanꞌanj si-nu̱guanꞌanj. Ni̱ si̱ gaꞌue ga̱ꞌne ru̱huaꞌ yún Yanꞌanj nuguanꞌ riquij riúnꞌ. Ni̱ sisi̱ gaquínj Yanꞌanj néꞌ, ni̱ si̱ nanicaj ruhua-áꞌ nga̱ nuguanꞌ da ga̱ mánj.

³⁰Ni̱ güi gachin, ni̱ nun dagahuin ni é re̱ꞌ rian Yanꞌanj huin ni é re̱ꞌ tsínj ꞌna̱ꞌ anéj chrej. Ni̱ xiꞌí si nun dagahuin ni ngüi̱ israelita, ni̱ nani yaco ruhua Yanꞌanj niꞌya ni é re̱ꞌ yya̱j.

³¹Ni̱ nun dagahuin ni ngüi̱ israelita rian Yanꞌanj. Hué dan ni̱ xiꞌí si nani yaco ruhua Yanꞌanj niꞌya ni é re̱ꞌ, ni̱ ga̱ꞌue na̱ni yaco ruhua Yanꞌanj ni̱ꞌya ni ngüi̱ israelita nej. ³²Ni̱ xiꞌí si uyan guiꞌyaj ni ngüi̱ israelita nga̱ ni ngüi̱ ꞌna̱ꞌ anéj chrej gaquinꞌ, ni̱ gataj Yanꞌanj sisi̱ uyan daꞌui daranꞌ ni sij gaquinꞌ. Xiꞌí daj ni̱ ga̱ꞌue na̱ni yaco ruhua Yanꞌanj niꞌya daranꞌ ni sij.

³³Yanꞌanj ni̱nꞌ ruhua huin si sa̱ꞌ xiꞌí néꞌ. Chru̱n ni̱nꞌ ruhua Yanꞌanj, ni̱ niꞌi-ínꞌ daranꞌ nuguanꞌ nej. Naꞌue ga̱ra daꞌngaꞌ ruhua néꞌ da̱j ani ruhua Yanꞌanj. Ni̱ si̱ guisíj néꞌ gui̱niꞌi néꞌ da̱j hua si-chrej Yanꞌanj nej. ³⁴Ni̱ si̱ guisíj néꞌ gui̱niꞌi néꞌ nuguanꞌ sa̱ꞌ ahui chra̱ Señor. Ni̱ si̱ guisíj néꞌ ga̱ꞌuiꞌ néꞌ ꞌngo̱ chrej rian Yanꞌanj anj. ³⁵Ni̱ nitaj a̱ ꞌngo̱ tsínj ga̱ꞌue ga̱ꞌuiꞌ xiquínj ꞌngo̱ rasu̱n rian Yanꞌanj, ngaa ni̱ na̱ruꞌue Yanꞌanj rian sij mánj. ³⁶Daj si Yanꞌanj guiꞌyaj daranꞌ ni rasu̱n mán. Ni̱ daranꞌ ni rasu̱n huin güenda manꞌan Yanꞌanj. Ni̱ na̱nicaj daranꞌ ni rasu̱n rian Yanꞌanj nej. Xiꞌí daj ni̱ ga̱ꞌmi sa̱ꞌ ꞌueé ni̱ganj ni̱nꞌ néꞌ rian Yanꞌanj. Amén.

Deberes cristianos

¹Ni̱ xiꞌí si nani yaco ruhua Yanꞌanj niꞌya néꞌ, ni̱ ga̱taj snanꞌān rian án re̱ꞌ sisi̱ na̱gaꞌuiꞌ ni é re̱ꞌ manꞌan ni é re̱ꞌ rian Yanꞌanj. Ni̱ da̱j rúnꞌ hua ni̱ꞌnaꞌ ni xucu gaꞌuiꞌ ni ngüi̱ rian Yanꞌanj asi̱j ná, ni̱ hué daj na̱gaꞌuiꞌ ni é re̱ꞌ manꞌan án re̱ꞌ sisi̱ da̱gahuin ni é re̱ꞌ rian Yanꞌanj nej. Ni̱ ga̱huin ni̱ni ni é re̱ꞌ rian ni gaquinꞌ. Ni̱ hué daj ga̱ꞌue gui̱ꞌyaj ni é re̱ꞌ da̱j rúnꞌ aranꞌ ruhua Yanꞌanj. Ni̱ niꞌíꞌ sisi̱ hué daj hua nia̱n gui̱ꞌyóꞌ. ²Ni̱ si̱ guiꞌyaj á re̱ꞌ da̱j rúnꞌ ꞌyaj ni ngüi̱ ma̱n chruhua xungüi̱ gaquinꞌ nan mánj. Sani̱ ga̱ꞌuej ruhua á re̱ꞌ ga̱huin sa̱ꞌ niman án re̱ꞌ, gui̱ꞌyaj Yanꞌanj anj. Ngaa ni̱ ga̱ꞌue ga̱huin chru̱n sa̱ꞌ ni é re̱ꞌ gui̱niꞌi ni é re̱ꞌ nuguanꞌ sa̱ꞌ huin ruhua Yanꞌanj gui̱ꞌyaj á re̱ꞌ. Ni̱ aranꞌ ruhua Yanꞌanj niꞌya nuguanꞌ daj. Ni̱ hua ni̱ca nuguanꞌ daj nej.

³Ni̱ ri̱an riqui Yanꞌanj sinduj riānj, ni̱ ꞌyaj fuerzāj rian daranꞌ ni é re̱ꞌ sisi̱ si̱ gani ruhua ni é re̱ꞌ si huin achij ni é re̱ꞌ mánj. Sani̱ ga̱ni ruhua ni é re̱ꞌ xiꞌí manꞌan ni é re̱ꞌ da̱j rúnꞌ huin yya ni é re̱ꞌ sisi̱ da̱j riqui Yanꞌanj si xuman ruhua go̱ꞌngo ni é re̱ꞌ.

⁴Ni̱ niꞌi néꞌ sisi̱ urin nnee̱ cúj néꞌ hua. Sani̱ naduna hua go̱ꞌngo yuꞌuj ni̱nꞌ ga̱chraꞌ nnee̱ cúꞌ. Ni̱ ni̱ni sun ꞌyaj sun go̱ꞌngo yuꞌuj daj. ⁵Ni̱ hué daj huin néꞌ huin néꞌ ni ngüi̱ nicaj dugüiꞌ nga̱ Cristo. Ni̱ nu̱nj si gaꞌi̱ ni̱nꞌ ruhua néꞌ huin, sani̱ urin nnee̱ cúj Cristo huin néꞌ. Ni̱ uyan nicaj dugüiꞌ néꞌ nga̱ ni dugüiꞌ néꞌ da̱j rúnꞌ hua nnee̱ cúj néꞌ aj. Ni̱ chracuij néꞌ go̱ꞌngo ni dugüiꞌ néꞌ. ⁶Ni̱ ni̱ni riqui Yanꞌanj sun rian go̱ꞌngo néꞌ. Ngaa ni̱ gui̱ꞌyaj sun go̱ꞌngo néꞌ sun riqui Yanꞌanj rian go̱ꞌngo néꞌ. Ni̱ sisi̱ gaꞌninꞌ Yanꞌanj sun ga̱ꞌmi ꞌngo̱ néꞌ si-nu̱guanꞌ-ánꞌ rian ni dugüiꞌ néꞌ, hué dan ni̱ ga̱ꞌmi néꞌ nuguanꞌ daj da̱j rúnꞌ xuman ruhua néꞌ aj. ⁷Ni̱ sisi̱ hué daj gaꞌninꞌ Yanꞌanj sun rian ango néꞌ güenda chra̱cuiꞌ ni dugüíꞌ, ni̱ hué daj gui̱ꞌyóꞌ rian ni dugüíꞌ. Ni̱ sisi̱ gaꞌninꞌ Yanꞌanj sun rian ango néꞌ güenda di̱gyúnꞌ rian ni dugüiꞌ néꞌ, ni̱ daꞌuíꞌ si di̱gyúnꞌ rian ni dugüíꞌ. ⁸Ni̱ sisi̱ hua sun rian ango ni dugüíꞌ güenda ga̱ꞌuiꞌ sij chrej rian dugüiꞌ sij, ni̱ da̱ꞌui sij ga̱ꞌuiꞌ sij chrej rian dugüiꞌ sij. Ni̱ sisi̱ hua sun rian ango ni dugüiꞌ néꞌ güenda ga̱ꞌuiꞌ sij rasu̱n rian ni ngüi̱ niqui, ngaa ni̱ ga̱huin nia̱ꞌ ruhua sij, gui̱ꞌyaj sij daj. Ni̱ sisi̱ hua ango néꞌ nicaj sun rian ni dugüiꞌ néꞌ, ni̱ gui̱ꞌyaj sa̱ꞌ sij nga̱ si-sun sij. Ni̱ sisi̱ hua sun rian ango néꞌ chra̱cuij sij ni dugüiꞌ néꞌ, ni̱ ga̱huin nia̱ꞌ ruhua sij nga̱ si ꞌyaj sij daj.

⁹Si̱ gataj á re̱ꞌ sisi̱ ꞌi̱ ruhua á re̱ꞌ niꞌyaj á re̱ꞌ ni dugüiꞌ a ni é re̱ꞌ sisi̱ sé daj huin xa̱ngaꞌ. Ni̱ si̱ gaꞌuej ruhua á re̱ꞌ si gui̱ꞌyaj á re̱ꞌ si xi̱ꞌi. Sani̱ gui̱ꞌyaj sa̱ꞌ ni é re̱ꞌ aj. ¹⁰Ni̱ ga̱huin ꞌi̱ ruhua á re̱ꞌ ni̱ꞌyaj á re̱ꞌ ni du̱güiꞌ ni é re̱ꞌ huin ni sij ni tsínj nicoꞌ Jesús. Ni̱ ga̱ra xina ni é re̱ꞌ sisi̱ ga̱huin rian ni dugüiꞌ ni é re̱ꞌ daj nga̱ manꞌan án re̱ꞌ. ¹¹Ni̱ gui̱ꞌyaj fuerza ni é re̱ꞌ nga̱ niman ni é re̱ꞌ. Ni̱ si̱ guinichre ni é re̱ꞌ nga̱ si-sun Señor mánj. ¹²Ni̱ ga̱huin nia̱ꞌ ruhua ni é re̱ꞌ xiꞌí si anaꞌuij ni é re̱ꞌ si gui̱ꞌyaj sa̱ꞌ Yanꞌanj nga̱ ni é re̱ꞌ. Ni̱ ga̱ꞌninꞌ ruhua ni é re̱ꞌ ngaa ranꞌ ni é re̱ꞌ sayun. Ni̱ si̱ duna ni é re̱ꞌ ga̱chinj jniꞌyaj ni é re̱ꞌ rian Yanꞌanj mánj. ¹³Chra̱cuij ni é re̱ꞌ ngaa achin ꞌngo̱ rasu̱n rian ni ngüi̱ xuman ruhua niꞌyaj Yanꞌanj. Ni̱ ga̱naꞌni ni é re̱ꞌ rian ducuá ni é re̱ꞌ ga̱tu ni ngüi̱ ꞌna̱ꞌ chrej.

¹⁴Ga̱chinj jniꞌyaj ni é re̱ꞌ rian Yanꞌanj sisi̱ gui̱ꞌyaj sa̱ꞌ Yanꞌanj nga̱ ni ngüi̱ chranꞌ yunꞌunj ni é re̱ꞌ. Ni̱ si̱ gaꞌmi quij ni é re̱ꞌ rian ni sij mánj. ¹⁵Ga̱huin nia̱ꞌ ruhua ni é re̱ꞌ nga̱ ni ngüi̱ hua nia̱ꞌ ruhua. Ni̱ ga̱co ni é re̱ꞌ nga̱ ni ngüi̱ aco nej. ¹⁶Ni̱ uyan ga̱ ruhua daranꞌ ni é re̱ꞌ. Ni̱ si̱ guiꞌyaj á re̱ꞌ si ga̱huin achij ni é re̱ꞌ rian ni dugüiꞌ ni é re̱ꞌ mánj. Maan si gui̱nicaj dugüiꞌ ni é re̱ꞌ nga̱ ni ngüi̱ niqui. Ni̱ si̱ gahuin ruhua ni é re̱ꞌ sisi̱ chru̱n ni é re̱ꞌ mánj.

¹⁷Si̱ guiꞌyaj quij ni é re̱ꞌ nga̱ ni ngüi̱ ꞌyaj quij nga̱ ni é re̱ꞌ mánj. Sani̱ du̱guꞌnunꞌ ni é re̱ꞌ gui̱ꞌyaj sa̱ꞌ ni é re̱ꞌ rian daranꞌ ni ngüi̱. ¹⁸Ni̱ sisi̱ ga̱ꞌuej ruhua ni ngüi̱, ni̱ gui̱man dinꞌinj ni é re̱ꞌ nga̱ daranꞌ ni sij. ¹⁹Huin ꞌi̱ ruhuāj niꞌyā ni é re̱ꞌ. Ni̱ si̱ guiꞌyaj á re̱ꞌ da̱j rúnꞌ ꞌyaj ni ngüi̱ chranꞌ yunꞌunj ni é re̱ꞌ mánj. Sani̱ ga̱ꞌninꞌ ruhua ni é re̱ꞌ sisi̱ Yanꞌanj gui̱ꞌyaj castigo ni sij. Daj si gataj si-nu̱guanꞌ Yanꞌanj: “Manꞌānj huin si gui̱ꞌyaj castigo ni sij. Manꞌānj na̱ruꞌue xiꞌí si quij guiꞌyaj ni sij.” Daj gataj Señor. ²⁰Hué dan ni̱ sisi̱ achin xiꞌna̱ riqui ni ngüi̱ ununꞌ nga̱ ni é re̱ꞌ, ngaa ni̱ ga̱ꞌuiꞌ ni é re̱ꞌ xa̱ ni sij. Ni̱ sisi̱ na̱goꞌoj ni sij nnee, ni̱ ga̱ꞌuiꞌ ni é re̱ꞌ go̱ꞌo ni sij. Ni̱ sisi̱ hué daj gui̱ꞌyaj sa̱ꞌ ni é re̱ꞌ nga̱ ni sij, ni̱ ga̱huin na̱ꞌaj ni sij nga̱ xiꞌí quij guiꞌyaj ni sij. ²¹Si̱ duna ni é re̱ꞌ sisi̱ gui̱ꞌyaj gana nuguanꞌ quij hua rian ni é re̱ꞌ mánj. Sani̱ gui̱ꞌyaj gana ni é re̱ꞌ nga̱ nuguanꞌ sa̱ꞌ rian ni nuguanꞌ quij hua.

¹Da̱gahuin daranꞌ ni é re̱ꞌ rian ni tsínj nicaj sun huin gobierno chruhua xungüi̱ nan. Daj si daranꞌ ni sun ꞌna̱ꞌ rian Yanꞌanj. Ni̱ Yanꞌanj guiꞌyaj sisi̱ gui̱nicaj ni sij sun chruhua xungüi̱ nan. ²Ngaa ni̱ ni ngüi̱ ununꞌ nga̱ tsínj nicaj sun, ni̱ ununꞌ ni sij nga̱ nuguanꞌ aꞌninꞌ Yanꞌanj sun rian néꞌ. Ni̱ ni ngüi̱ ununꞌ daj, ni̱ ga̱huin castigo ni sij, gui̱ꞌyaj Yanꞌanj. ³Daj si nitaj si xi̱ꞌi huin sisi̱ gu̱xuꞌuiꞌ ni ngüi̱ ꞌyaj sa̱ꞌ rian ni tsínj nicaj sun. Sani̱ ni ngüi̱ ꞌyaj quij, ni̱ hua ꞌngo̱ si xi̱ꞌi gu̱xuꞌuiꞌ ni sij niꞌi ni sij ni tsínj nicaj sun. Gui̱ꞌyaj sa̱ꞌ re̱ꞌ, ngaa ni̱ si̱ guxuꞌuíꞌ re̱ꞌ rian ni tsínj nicaj sun mánj. Hué dan ni̱ xa̱caj cuenta ni tsínj nicaj sun si ꞌyaj sa̱ꞌ re̱ꞌ. Ni̱ ga̱ꞌmi sa̱ꞌ ni sij xiꞌí re̱ꞌ. ⁴Hué ni sij nicaj sun xiꞌí Yanꞌanj. Ni̱ nne ni sij güenda sisi̱ chra̱cuij ni sij manꞌán re̱ꞌ. Sani̱ sisi̱ gui̱ꞌyáj re̱ꞌ gaquinꞌ, ni̱ gu̱xuꞌuiꞌ re̱ꞌ rian ni sij. Daj si nitaj si ata chre ni sij chrun niꞌí mánj. Ni̱ ꞌni̱j nicaj sun ni sij sisi̱ ga̱ꞌue gui̱ꞌyaj ni sij castigo ni ngüi̱ ꞌyaj quij hua. ⁵Xiꞌí daj ni̱ hua nia̱n da̱gahuin néꞌ rian ni tsínj nicaj sun. Ni̱ sé xiꞌí urin si gui̱ꞌyaj ni sij castigo néꞌ, sani̱ da̱gahuin néꞌ xiꞌí si hué daj aꞌninꞌ nimúnꞌ rian manꞌan néꞌ. ⁶Ni̱ hué xiꞌí daj aꞌuiꞌ ni é re̱ꞌ sanꞌanj rian ni tsínj nicaj sun. Daj si nicaj sun ni sij xiꞌí Yanꞌanj. Ni̱ yaꞌyoj dagahuin ni sij nga̱ si-sun ni sij. ⁷Hué dan ni̱ daranꞌ si daꞌui néꞌ, ni̱ ga̱ꞌuiꞌ néꞌ. Sisi̱ daꞌui néꞌ rian ni tsínj nicaj sun, ni̱ na̱gaꞌuiꞌ néꞌ si daꞌui néꞌ. Ni̱ gu̱ruꞌue néꞌ rian ni tsínj aꞌnej sanꞌanj. Ni̱ ga̱ níꞌyanj néꞌ nga̱ ni tsínj huin achij. Ni̱ gui̱nun yanꞌanj néꞌ ni tsínj huin rian nej.

⁸Si̱ daꞌui ni é re̱ꞌ xiquínj rian ni ngüi̱ mánj. Maan si da̱ꞌui ni é re̱ꞌ si ga̱huin ꞌi̱ ruhua á re̱ꞌ ni̱ꞌyaj ni é re̱ꞌ ni dugüiꞌ ni é re̱ꞌ. Daj si néꞌ ꞌi̱ ruhua niꞌyaj dugüíꞌ, ni̱ hua dagahuin néꞌ si aꞌninꞌ si-ley Yanꞌanj rian néꞌ. ⁹Ni̱ hua aꞌninꞌ si-ley Yanꞌanj sun rian néꞌ. Ni̱ gataj ley daj: “Si̱ gaꞌmi néꞌ nga̱ nica̱ dugüiꞌ néꞌ. Ni̱ si̱ dagahuiꞌ néꞌ ni ngüi̱ mánj. Ni̱ si̱ guiꞌyaj tu̱ néꞌ nga̱ siꞌyaj ni dugüiꞌ néꞌ mánj. Ni̱ si̱ gaꞌmi snanꞌanj néꞌ xiꞌí ni dugüiꞌ néꞌ mánj. Ni̱ si̱ gahuin ruhua néꞌ nga̱ siꞌyaj ni dugüiꞌ néꞌ mánj.” Daj hua si-ley Yanꞌanj. Ni̱ gataj ango si-ley Yanꞌanj: “Ga̱ꞌi ruhua néꞌ niꞌyaj néꞌ ni dugüiꞌ néꞌ da̱j rúnꞌ ꞌi̱ ruhua néꞌ niꞌyaj néꞌ ni manꞌan néꞌ.” Daj hua ley daj. Ni̱ sisi̱ da̱gahuin néꞌ ley nan ni̱ dagahuin néꞌ daranꞌ ango ley aꞌninꞌ Yanꞌanj sun rian néꞌ. ¹⁰Ni̱ sisi̱ ꞌi̱ ruhua néꞌ niꞌyaj néꞌ ni dugüiꞌ néꞌ, ni̱ nitaj si gui̱ꞌyaj quij néꞌ nga̱ ni dugüiꞌ néꞌ ga̱ mánj. Hué dan ni̱ sisi̱ ꞌi̱ ruhua néꞌ niꞌyaj néꞌ ni dugüiꞌ néꞌ, ngaa ni̱ da̱gahuin xa̱ngaꞌ néꞌ si gataj si-ley Yanꞌanj rian néꞌ.

¹¹Ni̱ hué nan huin si gui̱ꞌyaj néꞌ xiꞌí si niꞌi néꞌ da̱j hua chruhua xungüi̱ mán néꞌ. Ni̱ síj hora si na̱ri néꞌ nnej rian néꞌ. Daj si ngaa guxuman sini ruhua néꞌ niꞌyaj néꞌ Jesucristo, ni̱ gahuin ni̱chrunꞌ ga̱ꞌnaꞌ Yanꞌanj na̱ca néꞌ, ruhua néꞌ. Sani̱ yya̱j ni̱ gahuin ni̱chrunꞌ doj si ga̱ꞌnaꞌ Yanꞌanj na̱ca néꞌ. ¹²Ni̱ da̱j rúnꞌ hua ru̱miꞌ xungüi̱ ngaa hua ru̱miꞌ, ni̱ daꞌngaꞌ daj hua ni ngüi̱ ma̱n chruhua xungüi̱. Sani̱ ga̱huin ni̱chrunꞌ güi ga̱ꞌnaꞌ Jesucristo, ngaa ni̱ gui̱xiguin rian néꞌ. Ngaa ni̱ si̱ guiꞌyaj néꞌ da̱j rúnꞌ ꞌyaj ni ngüi̱ ma̱n rian ru̱miꞌ ga̱ mánj. Ni̱ gui̱ꞌyaj néꞌ da̱j rúnꞌ ꞌyaj ni ngüi̱ ma̱n rian xigui̱n hua. ¹³Ga̱che sa̱ꞌ néꞌ da̱j rúnꞌ hua ngaa achéj néꞌ ngaa xigui̱n ne̱ꞌ guníꞌyanj. Ni̱ si̱ xa na̱saꞌ néꞌ mánj. Ni̱ si̱ guixini néꞌ ga̱che néꞌ mánj. Ni̱ si̱ guiꞌyaj néꞌ guiꞌyanj ngaa aguáj ni ngüi̱ mánj. Ni̱ si̱ guiꞌyaj squi̱raꞌ néꞌ mánj. Ni̱ si̱ gununꞌ néꞌ nga̱ ni dugüiꞌ néꞌ mánj. Ni̱ si̱ gahuin xicoj ruhua néꞌ nga̱ ni dugüiꞌ néꞌ mánj. ¹⁴Sani̱ gui̱ꞌyaj néꞌ da̱j rúnꞌ huin ruhua Jesucristo si gui̱ꞌyaj néꞌ. Ni̱ si̱ gaꞌnij néꞌ chrej gui̱ꞌyaj néꞌ da̱j rúnꞌ huin ruhua nnee̱ cúj néꞌ mánj.

Los débiles en la fe

¹Gui̱nicaj dugüiꞌ néꞌ nga̱ ni ngüi̱ achin gu̱xuman sa̱ꞌ ruhua niꞌi Jesucristo. Ni̱ si̱ gununꞌ néꞌ nga̱ ni sij mánj. ²Gui̱ꞌyoꞌ cuenta sisi̱ ani ruhua ꞌngo̱ tsínj daj sisi̱ ga̱ꞌue xa̱ sij daranꞌanj. Sani̱ hua ango tsínj achin gu̱xuman sa̱ꞌ ruhua, sani̱ urin cuej xa síꞌ. ³Ngaa ni̱ si̱ gataj tsínj xa daranꞌanj sisi̱ tsínj nun niꞌi huin ango tsínj da mánj. Ni̱ tsínj naꞌue xa̱ daranꞌanj, ni̱ si̱ gaꞌue ga̱taj sij sisi̱ gaquinꞌ huin ngaa xa ango tsínj daranꞌanj. Daj si hua nahuin raꞌa Yanꞌanj tsínj daj. ⁴Ni̱ u̱n sin ni̱ diguíj re̱ꞌ nga̱ ꞌngo̱ tsínj unánj guitsi rian Señor únj. Manꞌan Señor ga̱taj sisi̱ ꞌyaj sa̱ꞌ sij sisi̱ nun ꞌyaj sa̱ꞌ sij. Ni̱ gu̱nucuaj sij gui̱ꞌyaj gana sij si Señor huin si nicaj fuerza da̱j gui̱ꞌyaj gana sij.

⁵Ni̱ hua ꞌngo̱ tsínj ataj: Hua ꞌngo̱ güi gue̱ rian sij. Ni̱ hua ango tsínj ataj: Uyan huin daranꞌ ni güi rian sij. Hua nia̱n si ga̱ xitinj ruhua go̱ꞌngo néꞌ nga̱ si ani ruhua néꞌ. ⁶Tsínj ataj sisi̱ gue̱ ꞌngo̱ güi daj, ni̱ hué daj ataj sij xiꞌí Señor. Ni̱ tsínj ataj sisi̱ uyan huin daranꞌ ni güi, ni̱ hué daj ataj sij xiꞌí Señor nej. Ni̱ tsínj xa daranꞌanj daj, ni̱ hué daj ꞌyaj sij xiꞌí Señor. Ni̱ aꞌuiꞌ sij si guruhua Yanꞌanj. Ni̱ tsínj naꞌue xa̱ daranꞌanj, ni̱ hué daj ꞌyaj sij xiꞌí Señor. Ni̱ aꞌuiꞌ sij si guruhua Yanꞌanj nej. ⁷Sé si ma̱n néꞌ güenda manꞌan néꞌ mánj. Ni̱ sé si ga̱huiꞌ néꞌ nga̱ güenda manꞌan néꞌ mánj. ⁸Sisi̱ ma̱n néꞌ, sani̱ ma̱n néꞌ güenda Señor. Ni̱ sisi̱ ga̱huiꞌ néꞌ, sani̱ ga̱huiꞌ néꞌ güenda Señor. Ngaa ni̱, asi̱ ma̱n néꞌ, asi̱ ga̱huiꞌ néꞌ, sani̱ nicaj dugüiꞌ néꞌ nga̱ Señor. ⁹Ni̱ gahuiꞌ Cristo. Ni̱ ganáꞌnij sij. Ni̱ hué daj guiꞌyaj sij sisi̱ ga̱huin sij Señor gui̱nicaj sun sij rian ni ngüi̱ gahuiꞌ nga̱ ni ngüi̱ hua ni̱ꞌnaꞌ nej.

¹⁰Ngaa ni̱ u̱n sin huin ni̱ atáj re̱ꞌ si ꞌyaj jnánj re̱ꞌ gaquinꞌ únj. Ni̱ u̱n sin huin ni̱ aꞌmí re̱ꞌ sisi̱ tsínj nun niꞌi huin dugüíꞌ re̱ꞌ únj. Hua nia̱n si ga̱nꞌanj daranꞌ néꞌ ga̱niquinꞌ néꞌ rian Cristo sisi̱ na̱guiꞌyaj yya sij si-ga̱quinꞌ daranꞌ néꞌ. ¹¹Daj si gataj si-nu̱guanꞌ Yanꞌanj:

Da̱j rúnꞌ hua yya hua ni̱ꞌnaꞌ manꞌānj, ni̱ hué daj hua yya sisi̱ ga̱niquinꞌ ráj da̱coj daranꞌ ni ngüi̱ riānj.

Ni̱ ga̱ꞌmi sa̱ꞌ ꞌueé daranꞌ ni sij rian Yanꞌanj.

Daj gataj Señor. ¹²Daj si ꞌna̱ꞌ güi ngaa na̱gaꞌuiꞌ daꞌ go̱ꞌngo néꞌ cuenta rian Yanꞌanj xiꞌí si guiꞌyaj néꞌ.

¹³Xiꞌí daj ni̱ si̱ gaꞌmi néꞌ gaquinꞌ rian ni dugüiꞌ néꞌ mánj. Sani̱ ga̱ cuidado néꞌ sisi̱ si̱ guereꞌ ꞌngo̱ ni dugüiꞌ néꞌ nga̱ si-chrej Yanꞌanj mánj. Daj si nitaj si hua sa̱ꞌ si du̱na sij si xuman ruhua sij niꞌyaj sij Yanꞌanj. ¹⁴Ni̱ xuman ruhuāj niꞌyā Señor Jesús. Xiꞌí daj ni̱ hua xitinj ruhuāj sisi̱ nitaj a̱ ꞌngo̱ rasu̱n quij hua. Sani̱ sisi̱ ꞌngo̱ néꞌ ani ruhua sisi̱ quij hua ꞌngo̱ rasu̱n, sani̱ quij hua rasu̱n daj güenda xa tsínj daj. ¹⁵Ni̱ sisi̱ rasu̱n xá re̱ꞌ ꞌyaj sisi̱ na̱ni ruhua dugüíꞌ re̱ꞌ, ngaa ni̱ nun hua sa̱ꞌ si xa̱ re̱ꞌ rasu̱n daj. Daj si sisi̱ ꞌi̱ ruhuá re̱ꞌ niꞌyáj re̱ꞌ dugüíꞌ re̱ꞌ, ni̱ sé daj gui̱ꞌyáj re̱ꞌ mánj. Ni̱ si̱ guiꞌyáj re̱ꞌ sisi̱ du̱na dugüíꞌ re̱ꞌ si-chrej Yanꞌanj xiꞌí rasu̱n xá re̱ꞌ mánj. Daj si gahuiꞌ Cristo xiꞌí dugüíꞌ re̱ꞌ daj. ¹⁶Ni̱ sisi̱ ani ruhuá re̱ꞌ si sa̱ꞌ ꞌyáj re̱ꞌ, ni̱ si̱ duná re̱ꞌ si ga̱ꞌmi quij ni ngüi̱ xiꞌí si ꞌyáj re̱ꞌ mánj.

¹⁷Daj si ngaa nne néꞌ rian nicaj Yanꞌanj sun, ni̱ hua ni̱ca ꞌyaj néꞌ. Ni̱ hua dinꞌinj ruhua néꞌ nej. Ni̱ hua nia̱ꞌ ruhua néꞌ, ꞌyaj Espíritu Santo nej. Ngaa ni̱ si̱ nani ruhua néꞌ xiꞌí si xa̱ néꞌ nga̱ xiꞌí si go̱ꞌo néꞌ mánj. ¹⁸Ni̱ sisi̱ hué chrej nan da̱gahuin sa̱ꞌ néꞌ rian Cristo, ngaa ni̱ ga̱ranꞌ ruhua Yanꞌanj ni̱ꞌyaj néꞌ. Ni̱ ga̱ꞌmi sa̱ꞌ ni ngüi̱ xiꞌí néꞌ nej.

¹⁹Hué dan ni̱ gui̱ꞌyaj fuerza néꞌ sisi̱ hua dinꞌinj scanij ni dugüiꞌ néꞌ. Ni̱ chra̱cuij néꞌ sisi̱ gu̱xuman sa̱ꞌ ruhua go̱ꞌngo ni dugüiꞌ néꞌ. ²⁰Ni̱ si̱ guiꞌyáj re̱ꞌ sisi̱ du̱na ꞌngo̱ dugüíꞌ re̱ꞌ si-chrej Yanꞌanj xiꞌí ꞌngo̱ rasu̱n xá re̱ꞌ mánj. Xa̱ngaꞌ ni̱ daranꞌ ni rasu̱n hua sa̱ꞌ xa̱ néꞌ. Sani̱ sisi̱ du̱na ꞌngo̱ dugüiꞌ néꞌ si-chrej Yanꞌanj xiꞌí si xa̱ néꞌ, ni̱ nitaj si hua sa̱ꞌ mánj. ²¹Ni̱ sisi̱ du̱na ꞌngo̱ ni dugüiꞌ néꞌ si-chrej Yanꞌanj xiꞌí si xá néꞌ nnee̱ nga̱ xiꞌí si goꞌo néꞌ vino nga̱ xiꞌí ango ni rasu̱n ꞌyaj néꞌ, hué dan ni̱ nitaj si hua sa̱ꞌaj si ꞌyaj néꞌ ni nuguanꞌ daj.

²²Ni̱ gui̱ꞌyáj re̱ꞌ sisi̱ urin manꞌán re̱ꞌ nga̱ Yanꞌanj gui̱niꞌi da̱j ani ruhuá re̱ꞌ xiꞌí ni nuguanꞌ daj. Hua ꞌueé rian néꞌ sisi̱ niꞌíꞌ si hua sa̱ꞌ chruhua néꞌ. Ni̱ nitaj si utaꞌ gaquinꞌ munꞌúnꞌ nga̱ si ꞌyaj néꞌ mánj. ²³Ni̱ sisi̱ nun niꞌi ꞌngo̱ néꞌ sisi̱ ga̱ꞌuej Yanꞌanj xóꞌ ꞌngo̱ rasu̱n daj, ngaa ni̱ daꞌui néꞌ gaquinꞌ rian Yanꞌanj xiꞌí si xóꞌ rasu̱n daj. Ni̱ nun hua sa̱ꞌ sisi̱ xa̱ néꞌ ꞌngo̱ rasu̱n ngaa nun niꞌi néꞌ sisi̱ gaꞌuej Yanꞌanj xa̱ néꞌ. Daj si gaquinꞌ huin daranꞌ si ꞌyaj néꞌ ngaa nun niꞌi néꞌ sisi̱ ga̱ꞌuej Yanꞌanj gui̱ꞌyaj néꞌ.

¹Sisi̱ hua ni̱ca ruhua néꞌ nga̱ si-nu̱guanꞌ Yanꞌanj, ni̱ chra̱cuij néꞌ ni ngüi̱ achin ga̱huin ni̱ca ruhua nga̱ si-nu̱guanꞌ Yanꞌanj. Ni̱ si̱ guiꞌyaj néꞌ da̱j rúnꞌ ni̱nanj aranꞌ ruhua néꞌ, gui̱ꞌyaj néꞌ mánj. ²Ni̱ daranꞌ néꞌ gui̱ꞌyaj da̱j rúnꞌ aranꞌ ruhua dugüiꞌ néꞌ. Ni̱ gui̱ꞌyaj sa̱ꞌ néꞌ ni rasu̱n güenda manꞌan ni sij. Hué ducuánj daj ga̱ꞌue ga̱huin ni̱ca ruhua ni sij nga̱ si-chrej Yanꞌanj, gui̱ꞌyaj néꞌ. ³Daj si nun gui̱ꞌyaj Cristo si garanꞌ ruhua sij gui̱ꞌyaj sij. Daj si gataj Cristo rian si-nu̱guanꞌ Yanꞌanj: “Ni̱ gaꞌmi ni ngüi̱ nuguanꞌ quij hua rián re̱ꞌ huín re̱ꞌ Yanꞌanj. Sani̱ hué riānj huin si gaꞌmi quij ni sij nuguanꞌ daj rúnꞌ huaj.” Daj gataj Cristo gunun Yanꞌanj. ⁴Ni̱ daranꞌ ni nuguanꞌ garun ni sij asi̱j ná huin güenda si ga̱huin chru̱n néꞌ, garun ni sij. Ni̱ xiꞌí ni nuguanꞌ daj, ni̱ ga̱huin nucuaj néꞌ gui̱ꞌyaj gana néꞌ rian sayun. Ni̱ ga̱nariꞌ nucuaj niman néꞌ, gui̱ꞌyaj si-nu̱guanꞌ Yanꞌanj. Hué daj ni̱ ga̱huin yya ruhua néꞌ si gui̱ꞌyaj sa̱ꞌ Yanꞌanj nga̱ néꞌ. ⁵Ni̱ Yanꞌanj ꞌyaj sisi̱ huin nucuaj niman néꞌ. Ni̱ Yanꞌanj ꞌyaj si nariꞌ nucuaj niman néꞌ nej. Hué dan ni̱ huin ruhuāj sisi̱ uyan ga̱ ruhua ni é re̱ꞌ gui̱ꞌyaj Yanꞌanj si hué daj digyán Jesucristo rian néꞌ. ⁶Ngaa ni̱ ꞌngo̱ chréꞌ ga̱ ruhua daranꞌ néꞌ si ga̱ꞌmi sa̱ꞌ néꞌ rian Yanꞌanj huin chrej Jesucristo huin síꞌ Señor nicaj sun rian néꞌ.

El evangelio a los gentiles

⁷Hué dan ni̱ na̱huin raꞌa ni é re̱ꞌ ni dugüiꞌ ni é re̱ꞌ da̱j rúnꞌ nahuin raꞌa Cristo ni é re̱ꞌ aj. Ngaa ni̱ gui̱niꞌi ni ngüi̱ si ꞌyaj sa̱ꞌ Yanꞌanj. ⁸Ni̱ ataj snanꞌān gu̱nun ni é re̱ꞌ si gaꞌna̱ꞌ Cristo guiꞌyaj sun síꞌ rian ni ngüi̱ israelita. Ni̱ hué daj guiꞌyaj síꞌ güenda da̱gahuin síꞌ nuguanꞌ guiꞌyaj yya Yanꞌanj nga̱ ni xi néꞌ ni tsínj guimán asi̱j ná. Ngaa ni̱ gahuin yya da̱j rúnꞌ gataj Yanꞌanj rian ni síꞌ, guiꞌyaj Cristo. ⁹Ni̱ gaꞌna̱ꞌ Cristo sisi̱ ga̱ꞌmi sa̱ꞌ ni ngüi̱ ꞌna̱ꞌ anéj chrej rian Yanꞌanj xiꞌí si nahuin yaco ruhua Yanꞌanj niꞌyaj-áꞌ ni sij. Ni̱ hué daj gataj si-nu̱guanꞌ Yanꞌanj xiꞌí Cristo:

Xiꞌí daj ni̱ ga̱ꞌmi sa̱ꞌ manꞌānj scanij ni ngüi̱ ꞌna̱ꞌ anéj chrej xiꞌí re̱ꞌ.

Ni̱ si-xugüí re̱ꞌ ga̱rā chraꞌ.

Daj gataj si-nu̱guanꞌ Yanꞌanj xiꞌí Cristo. ¹⁰Ni̱ gataj ango nuguanꞌ daj nej:

Ga̱huin nia̱ꞌ ruhua ni é re̱ꞌ nga̱ ni ngüi̱ nicoꞌ Yanꞌanj huin ni é re̱ꞌ ni ngüi̱ ꞌna̱ꞌ anéj chrej.

Daj gataj nuguanꞌ daj.

¹¹Ni̱ gataj ango nuguanꞌ daj nej:

Ga̱ꞌmi sa̱ꞌ ni é re̱ꞌ rian Señor huin ni é re̱ꞌ ni ngüi̱ ꞌna̱ꞌ anéj chrej nga̱ ni ngüi̱ ma̱n ni̱nꞌ ga̱chraꞌ chruhua xungüi̱.

Daj gataj nuguanꞌ daj.

¹²Ni̱ gataj ru̱huaꞌ yún Isaías:

Ga̱ꞌnga ꞌngo̱ lij ga̱huin daꞌníj tsínj gu̱ꞌnaj Isaí.

Ni̱ ga̱chij lij daj.

Ni̱ gui̱nicaj sun sij rian ni ngüi̱ ꞌna̱ꞌ anéj chrej.

Ni̱ ga̱naꞌuij ni síꞌ sisi̱ na̱guiꞌyaj sa̱ꞌ sij si-chrej ni síꞌ.

Daj gataj Isaías.

¹³Ni̱ Yanꞌanj riqui si anaꞌuij néꞌ. Ni̱ huin ruhuāj sisi̱ ni̱nꞌ ruhua ga̱huin nia̱ꞌ ruhua ni é re̱ꞌ, gui̱ꞌyaj Yanꞌanj anj. Ni̱ ga̱huin dinꞌinj ruhua ni é re̱ꞌ nej xiꞌí si xuman ruhua ni é re̱ꞌ niꞌyaj ni é re̱ꞌ Yanꞌanj. Ngaa ni̱ ga̱huin yya ruhua á re̱ꞌ doj sisi̱ ga̱hui sa̱ꞌ á re̱ꞌ, gui̱ꞌyaj Espíritu Santo, ruhuāj aj.

¹⁴Ni̱ hua yya ruhuāj sisi̱ nu̱n ruhua ni é re̱ꞌ ni nuguanꞌ sa̱ꞌ gahuin chru̱n ni é re̱ꞌ huin ni é re̱ꞌ jnān nga̱ xicaꞌuī. Ni̱ niꞌīnj sisi̱ ga̱ꞌue ga̱ꞌuiꞌ go̱ꞌngo ni é re̱ꞌ chrej sa̱ꞌ rian dugüiꞌ ni é re̱ꞌ nej. ¹⁵Ni̱ yanj nan guisíj ruhuāj garūnj go̱ꞌngo nuguanꞌ rian án re̱ꞌ. Ni̱ huin ruhuāj sisi̱ ga̱ niguiꞌij ni é re̱ꞌ nga̱ ni nuguanꞌ nan. Daj si riqui Yanꞌanj sinduj riānj sisi̱ gui̱nicaj sūnj. ¹⁶Ni̱ ꞌyaj sūnj rian Jesucristo xiꞌí ni ngüi̱ ꞌna̱ꞌ anéj chrej. Ni̱ da̱j rúnꞌ ꞌyaj sun ꞌngo̱ chrej rian Yanꞌanj, ni̱ hué daj ꞌyaj sūnj aꞌmi manꞌānj nuguanꞌ sa̱ꞌ huin si-nu̱guanꞌ Yanꞌanj rian án re̱ꞌ. Ni̱ natāj nuguanꞌ si da̱j ga̱ꞌue ga̱nacaj Yanꞌanj ni ngüi̱ ꞌna̱ꞌ anéj chrej. Ni̱ hué daj ꞌyā xiꞌí si ga̱ꞌue na̱gaꞌuīj ni ngüi̱ ꞌna̱ꞌ anéj chrej rian Yanꞌanj. Ni̱ huin ruhuāj sisi̱ ga̱ranꞌ ruhua Yanꞌanj nga̱ ni ngüi̱ na̱gaꞌuīj daj. Ni̱ ga̱huin sa̱ꞌ niman ni sij, gui̱ꞌyaj Espíritu Santo. ¹⁷Ni̱ xiꞌí si chracuij Cristo manꞌānj, ni̱ ga̱ꞌue ga̱ꞌmi sa̱ꞌ manꞌānj xiꞌí si-sūnj huin si-sun Yanꞌanj.

¹⁸Daj si guisíj ruhuāj ga̱ꞌmī xiꞌí urin nuguanꞌ guiꞌyaj Cristo ngāj. Ni̱ hué nan huin sisi̱ da̱gahuin ni é re̱ꞌ huin ni é re̱ꞌ ni ngüi̱ ꞌna̱ꞌ anéj chrej si-nu̱guanꞌ Yanꞌanj. Ni̱ da̱gahuin ni é re̱ꞌ xiꞌí si natāj nuguanꞌ sa̱ꞌ rian án re̱ꞌ. Ni̱ da̱gahuin ni é re̱ꞌ xiꞌí sun guiꞌyaj sūnj scanij ni é re̱ꞌ nej. ¹⁹Ni̱ gahuin nucuaj si-nu̱guanꞌānj, guiꞌyaj Yanꞌanj. Ni̱ guiꞌyā si sa̱ꞌ, guiꞌyaj Espíritu Santo nej. Ni̱ hué daj hua natāj nuguanꞌ sa̱ꞌ xiꞌí Cristo rian ni ngüi̱ sisi̱ ga̱nacaj Yanꞌanj ni sij. Ni̱ gaxi̱ꞌi natāj nuguanꞌ daj xumanꞌ Jerusalén da ni̱nꞌ ga̱chraꞌ ni xumanꞌ ngaj daꞌ estado Ilírico nej. ²⁰Ni̱ ni̱nanj gahuin ruhuāj natāj nuguanꞌ sa̱ꞌ daj rian ni ngüi̱ achin gunun si-nu̱guanꞌ Cristo. Daj si naꞌuej ruhuāj na̱tāj nuguanꞌ daj rian hua gunun ni ngüi̱, guiꞌyaj ango tsínj. ²¹Ni̱ hué daj gataj si-nu̱guanꞌ Yanꞌanj nej:

Gui̱niꞌi ni ngüi̱ nun gahuin gunun xiꞌí si-nu̱guanꞌ Cristo.

Ni ngüi̱ nitaj a̱man gunun, sani̱ ga̱ra daꞌngaꞌ ruhua ni sij xiꞌí si-nu̱guanꞌ sij.

Daj gataj si-nu̱guanꞌ Yanꞌanj.

Pablo se propone ir a Roma

²²Xiꞌí daj ni̱ guisíj gaꞌi̱ naꞌue gu̱chiꞌ ni̱ꞌyā rian ma̱n ni é re̱ꞌ mánj. ²³Ni̱ yya̱j guisíj guiꞌyaj sūnj ni xumanꞌ nan. Ni̱ guisíj gaꞌi̱ yoꞌ huin ruhuāj gu̱chīj gui̱man néꞌ. ²⁴Hué dan ni̱ ngaa ga̱nꞌān estado España, ni̱ gu̱chiꞌ ni̱ꞌyā ni é re̱ꞌ, ruhuāj aj. Ni̱ ngaa ga̱huin nia̱ꞌ ruhuāj nga̱ ni é re̱ꞌ, ni̱ huin ruhuāj si chra̱cuij ni é re̱ꞌ si gui̱sī estado España.

²⁵Sani̱ yya̱j ni̱ ga̱nꞌān xumanꞌ Jerusalén. Ni̱ ga̱nꞌanj chra̱cuī ni ngüi̱ nicoꞌ Yanꞌanj ma̱n xumanꞌ daj. ²⁶Daj si gahuin sa̱ꞌ ruhua ni ngüi̱ ma̱n estado Macedonia nga̱ estado Acaya chra̱cuij ni sij sanꞌanj ni ngüi̱ yaco ranꞌ nicoꞌ Yanꞌanj mán xumanꞌ Jerusalén. ²⁷Ni̱ gahuin nia̱ꞌ ruhua ni sij sisi̱ da̱j guiriꞌ ni sij gaꞌuiꞌ ni sij rian ni síꞌ. Ni̱ duguꞌna̱j guiꞌyaj ni sij. Daj si gaꞌuiꞌ ni tsínj israelita ma̱n xumanꞌ Jerusalén si-nu̱guanꞌ Yanꞌanj rian ni sij huin ni sij ni tsínj ꞌna̱ꞌ anéj chrej. Xiꞌí daj hua nia̱n chra̱cuij ni tsínj ꞌna̱ꞌ anéj chrej ni ngüi̱ yaco ranꞌ nicoꞌ Yanꞌanj mán xumanꞌ Jerusalén. ²⁸Ni̱ ngaa gui̱sij ga̱nahuij si-sūnj nan na̱gaꞌuīj sanꞌanj daj rian ni ngüi̱ ma̱n xumanꞌ Jerusalén, ngaa ni̱ ga̱chinj ni̱ꞌyā rian ma̱n ni é re̱ꞌ. Ngaa ni̱ ga̱nꞌān estado España. ²⁹Ni̱ niꞌīnj sisi̱ ngaa gui̱sī rian ma̱n án re̱ꞌ, ni̱ gui̱ꞌyaj Cristo ꞌngo̱ sinduj nico ngāj. Ni̱ ga̱huin ni̱ca ruhua á re̱ꞌ, gui̱ꞌyaj si-nu̱guanꞌ sij.

³⁰Nicaj dugüiꞌ daranꞌ néꞌ nga̱ Señor Jesucristo. Ni̱ ꞌi̱ ruhua néꞌ niꞌyaj néꞌ ni dugüiꞌ néꞌ, ꞌyaj Espíritu Santo huin ni é re̱ꞌ jnān nga̱ xicaꞌuī. Ni̱ achínj jniꞌyā rian ni é re̱ꞌ sisi̱ chra̱cuij ni é re̱ꞌ manꞌānj ga̱chinj jniꞌyaj néꞌ rian Yanꞌanj xiꞌīj. ³¹Ga̱chinj jniꞌyaj ni é re̱ꞌ rian Yanꞌanj sisi̱ ga̱nani manꞌānj rian ni tsínj nun xu̱man ruhua ni̱ꞌyaj Jesús ma̱n estado Judea. Ni̱ ga̱chinj jniꞌyaj ni é re̱ꞌ sisi̱ na̱huin raꞌa sa̱ꞌ ni ngüi̱ nicoꞌ Yanꞌanj ma̱n Jerusalén sanꞌanj ga̱ꞌuīj rian ni sij. ³²Hué dan ni̱ sisi̱ ga̱ꞌuej ruhua Yanꞌanj, ni̱ ga̱huin nia̱ꞌ ruhuāj ngaa gui̱sij ni̱ꞌyā rian ma̱n ni é re̱ꞌ. Ngaa ni̱ ga̱ꞌue na̱riꞌ nucuaj daranꞌ néꞌ nga̱ si-nu̱guanꞌ Yanꞌanj. ³³Yanꞌanj ꞌyaj sisi̱ hua dinꞌinj ruhua niman daranꞌ néꞌ. Ni̱ huin ruhuāj sisi̱ ga̱ne Yanꞌanj nga̱ daranꞌ ni é re̱ꞌ aj. Amén.

Saludos personales

¹Gui̱sij ꞌngo̱ xicaꞌuij néꞌ rian ma̱n ni é re̱ꞌ gu̱ꞌnaj únꞌ Febe. Ni̱ nicoꞌ únꞌ Jesucristo. Ni̱ ꞌyaj sun únꞌ rian ni ngüi̱ nicoꞌ Yanꞌanj ma̱n xumanꞌ Cencrea. ²Ni̱ da̱j rúnꞌ guꞌyun néꞌ nicaj dugüiꞌ néꞌ nga̱ ni ngüi̱ xuman ruhua niꞌyaj Señor, ni̱ hué daj na̱huin raꞌa á re̱ꞌ únꞌ. Ni̱ chra̱cuij ni é re̱ꞌ daranꞌ rasu̱n achin ga̱rasun únꞌ. Daj si ni̱nꞌ ruhua chracuij únꞌ gaꞌi̱ ni ngüi̱. Ni̱ chracuij únꞌ manꞌānj nej.

³Ni̱ aꞌnī ꞌngo̱ nuguanꞌ rian yunꞌunj gu̱ꞌnaj Priscila nga̱ tsínj gu̱ꞌnaj Aquila huin nu̱ngüej nica̱ sij si ꞌyaj sun nu̱guanꞌan ngāj xiꞌí si-sun Cristo Jesús. ⁴Ni̱ ngaa guiranꞌ manꞌānj ꞌngo̱ sayun, ni̱ gaꞌuej ruhua nu̱ngüej nica̱ sij ga̱huiꞌ sij xiꞌīj. Ni̱ sé urīnj nagaꞌuiꞌ si guruhua nu̱ngüej sij, sani̱ hué daj ꞌyaj daranꞌ ni ngüi̱ nicoꞌ Yanꞌanj ꞌna̱ꞌ anéj chrej nej. ⁵Ni̱ hué daj aꞌnī ꞌngo̱ nuguanꞌ rian ni ngüi̱ nicoꞌ Jesús nahuin yuꞌ ducuá nu̱ngüej nica̱ sij. Ni̱ aꞌnī ꞌngo̱ nuguanꞌ rian tsínj gu̱ꞌnaj Epeneto huin síꞌ ꞌngo̱ tsínj ꞌi̱ ruhuāj niꞌyā. Ni̱ huin síꞌ tsínj guxuman sini ya̱n ruhua niꞌyaj Jesús rian daranꞌ ni ngüi̱ ma̱n estado Acaya.

⁶Ni̱ aꞌnī ꞌngo̱ nuguanꞌ rian María. Daj si guiꞌyaj sun ni̱nꞌ ruhua unj scanij ni é re̱ꞌ. ⁷Ni̱ aꞌnī ꞌngo̱ nuguanꞌ rian tsínj gu̱ꞌnaj Andrónico nga̱ Junias huin nu̱ngüej sij dugüiꞌīj. Ni̱ gunu̱n nu̱ngüej sij ducuaga̱ꞌ ngaa gunūnj nej. Ni̱ ꞌyaj sa̱ꞌ Adrónico nga̱ Junias scanij ni apóstol ni tsínj aꞌmi si-nu̱guanꞌ Jesús rian ni ngüi̱. Ni̱ ngaa achin gu̱xuman ruhuāj niꞌyā Cristo, ni̱ hua guxuman ruhua nu̱ngüej sij. ⁸Ni̱ aꞌnī ꞌngo̱ nuguanꞌ rian tsínj gu̱ꞌnaj Amplias si ꞌi̱ ruhuāj niꞌyā síꞌ xiꞌí Señor. ⁹Ni̱ aꞌnī ꞌngo̱ nuguanꞌ rian Urbano, tsínj ꞌyaj sun ngāj xiꞌí Cristo. Ni̱ aꞌnī ꞌngo̱ nuguanꞌ rian tsínj ꞌi̱ ruhuāj huin Estaquis nej.

¹⁰Ni̱ aꞌnī ꞌngo̱ nuguanꞌ rian tsínj gu̱ꞌnaj Apeles. Niꞌi néꞌ sisi̱ digyán sa̱ꞌ síꞌ si xuman ruhua síꞌ niꞌyaj síꞌ Cristo. Ni̱ hué daj aꞌnī ꞌngo̱ nuguanꞌ rian ni du̱güiꞌ Aristóbulo nej. ¹¹Ni̱ aꞌnī ꞌngo̱ nuguanꞌ rian Herodión huin síꞌ dugüiꞌīj. Ni̱ aꞌnī ꞌngo̱ nuguanꞌ rian ni du̱güiꞌ Narciso huin ni sij ni tsínj xuman ruhua niꞌyaj Señor. ¹²Ni̱ aꞌnī ꞌngo̱ nuguanꞌ rian yunꞌunj gu̱ꞌnaj Trifena nga̱ Trifosa huin nu̱ngüej únꞌ yunꞌunj ꞌyaj sun rian Señor. Ni̱ hué daj aꞌnī ꞌngo̱ nuguanꞌ rian Pérsida si ꞌi̱ ruhua néꞌ niꞌi néꞌ unj. Ni̱ ducu guiꞌyaj sun unj si-sun Señor. ¹³Ni̱ aꞌnī ꞌngo̱ nuguanꞌ rian Rufo, tsínj ganacui Señor. Ni̱ hué daj aꞌnī ꞌngo̱ nuguanꞌ rian nni síꞌ nej. Daj si rúnꞌ ꞌyaj ꞌngo̱ nni néꞌ daj guiꞌyaj únꞌ nga̱ manꞌānj.

¹⁴Ni̱ aꞌnī ꞌngo̱ nuguanꞌ rian tsínj gu̱ꞌnaj Asíncrito nga̱ Flegonte nej, Hermas nej, Patrobas nej, Hermes nej, nga̱ daranꞌ ni ngüi̱ nicoꞌ Yanꞌanj mán nga̱ ni sij nej. ¹⁵Ni̱ hué daj aꞌnī ꞌngo̱ nuguanꞌ rian tsínj gu̱ꞌnaj Filólogo nga̱ Julia nej, nga̱ nu̱ngüej xicaꞌuij Nereo nej, Olimpas nej, nga̱ daranꞌ ni ngüi̱ nicoꞌ Yanꞌanj mán nga̱ ni sij. ¹⁶Ga̱ꞌnij a ni é re̱ꞌ ꞌngo̱ nuguanꞌ rian ni dugüiꞌ ni é re̱ꞌ. Ni̱ ga̱run duꞌua ni é re̱ꞌ ni dugüiꞌ ni é re̱ꞌ xiꞌí si nicaj dugüiꞌ ni é re̱ꞌ rian Cristo. Daranꞌ ni ngüi̱ mán ni̱nꞌ ga̱chraꞌ nicoꞌ Cristo aꞌníj ꞌngo̱ nuguanꞌ rian ni é re̱ꞌ aj.

¹⁷Ni̱ achínj jniꞌyā rian ni é re̱ꞌ huin ni jnúnꞌ nga̱ ni xicaꞌuíꞌ sisi̱ gui̱niꞌyaj sa̱ꞌ ni é re̱ꞌ nga̱ ni ngüi̱ ꞌyaj si ununꞌ ni du̱güiꞌ ni é re̱ꞌ. Ni̱ chranꞌ yunꞌunj ni sij ni é re̱ꞌ xiꞌí nuguanꞌ sa̱ꞌ gahuin chru̱n ni é re̱ꞌ. Gu̱xun anéj ni é re̱ꞌ manꞌan án re̱ꞌ rian ni ngüi̱ daj. ¹⁸Daj si sé si ꞌyaj sun ni sij rian Señor Jesucristo. Sani̱ maan si ꞌyaj sun ni sij si aranꞌ ruhua riqui ni sij. Sa̱ꞌ naguiꞌyaj ni sij si-nu̱guanꞌ manꞌan ni sij. Sani̱ digyaꞌ yunꞌunj ni sij niman ni ngüi̱ nun niꞌi sa̱ꞌ nga̱ nuguanꞌ daj. ¹⁹Niꞌi daranꞌ ni ngüi̱ sisi̱ dagahuin sa̱ꞌ ni é re̱ꞌ si-nu̱guanꞌ Yanꞌanj. Xiꞌí daj ni̱ gahuin nia̱ꞌ ruhuāj xiꞌí ni é re̱ꞌ. Ni̱ huin ruhuāj sisi̱ga̱huin chru̱n ni é re̱ꞌ gui̱ꞌyaj ni é re̱ꞌ ni nuguanꞌ sa̱ꞌ. Sani̱ naꞌuej ruhuāj sisi̱ ga̱huin chru̱n ni é re̱ꞌ gui̱ꞌyaj ni é re̱ꞌ si xi̱ꞌi. ²⁰Ni̱ ꞌyaj Yanꞌanj si hua dinꞌinj ruhua néꞌ. Ni̱ ráꞌyanj gui̱ꞌyaj gana ni é re̱ꞌ rian sichre, gui̱ꞌyaj Yanꞌanj. Ni̱ huin ruhuāj si gui̱ꞌyaj Señor Jesucristo sinduj rian ni é re̱ꞌ aj.

²¹Ni̱ aꞌníj tsínj gu̱ꞌnaj Timoteo ꞌngo̱ nuguanꞌ rian ni é re̱ꞌ huin síꞌ tsínj ꞌyaj sun nu̱guanꞌan ngāj. Ni̱ aꞌníj tsínj gu̱ꞌnaj Lucio nga̱ Jasón nej, Sosípater nej, ꞌngo̱ nuguanꞌ rian án re̱ꞌ huin ni síꞌ ni dugüiꞌīj. ²²Ni̱ manꞌānj huin tsínj gu̱ꞌnaj Tercio, arūn si-nu̱guanꞌ Pablo nan. Ni̱ hué daj aꞌnī ꞌngo̱ nuguanꞌ rian ni é re̱ꞌ xiꞌí Señor. ²³Ni̱ aꞌníj tsínj gu̱ꞌnaj Gayo ꞌngo̱ nuguanꞌ rian ni é re̱ꞌ nej. Ni̱ nnēj ducuá sij. Ni̱ chra̱cuij sij ducuá sij sisi̱ ga̱ꞌnaꞌ daranꞌ ni ngüi̱ nicoꞌ Yanꞌanj. Ni̱ hué daj aꞌníj tsínj gu̱ꞌnaj Erasto ꞌngo̱ nuguanꞌ rian ni é re̱ꞌ nej. Hué síꞌ huin tesorero xumanꞌ nan. Ni̱ aꞌníj Cuarto ꞌngo̱ nuguanꞌ rian ni é re̱ꞌ nej. ²⁴Ni̱ huin ruhuāj sisi̱ gui̱ꞌyaj Jesucristo sinduj rian ni é re̱ꞌ huin síꞌ Señor nicaj sun rian néꞌ. Amén.

Doxología final

²⁵Ni̱ ga̱ꞌue gui̱ꞌyaj Yanꞌanj si ga̱huin ni̱ca niman ni é re̱ꞌ xiꞌí nuguanꞌ natāj rian ni é re̱ꞌ huin nuguanꞌ sa̱ꞌ xiꞌí Jesucristo. Asi̱j ngaa ná, ni̱ nun ga̱ꞌue xacaj ni ngüi̱ cuenta xiꞌí si-nu̱guanꞌ Yanꞌanj. Sani̱ yya̱j ni̱ digyán Yanꞌanj rian ni ngüi̱ da̱j hua nuguanꞌ daj. ²⁶Ni̱ hua yya digyán Yanꞌanj nuguanꞌ daj rian ni ngüi̱. Daj si gaꞌníj Yanꞌanj sun rian ni tsínj gaꞌmi si-nu̱guanꞌ Yanꞌanj asi̱j ná sisi̱ ga̱run ni sij si-nu̱guanꞌ Yanꞌanj rian yanj. Yya̱j ni̱ niꞌi daranꞌ ni ngüi̱ ma̱n ni̱nꞌ ga̱chraꞌ chruhua xungüi̱ daj hua nuguanꞌ guixij hui̱ daj. Ni̱ huin ruhua Yanꞌanj sisi̱ gu̱xuman ruhua ni sij si-nu̱guanꞌ Yanꞌanj. Ni̱ da̱gahuin ni sij nuguanꞌ daj nej. Ni̱ nne ni̱ganj Yanꞌanj.

²⁷Urin Yanꞌanj huin. Ni̱ niꞌi sa̱ꞌ Yanꞌanj daranꞌanj. Ni̱ ga̱ꞌmi sa̱ꞌ ꞌueé ni̱ganj néꞌ rian Yanꞌanj nga̱ xiꞌí Jesucristo nej. Amén.