Apocalipsis

EL APOCALIPSIS DE SAN JUAN

La revelación de Jesucristo

¹Nan huin ni nuguanꞌ digyán Jesucristo rian ni tsínj ꞌyaj sun rian sij. Ni̱ Yanꞌanj huin si digyán ni nuguanꞌ nan rian Jesucristo huin ni nuguanꞌ ga̱huin ráꞌyanj. Ni̱ gaꞌníj Jesucristo si-ángel sij gaꞌna̱ꞌ guiniꞌīnj ni nuguanꞌ nan huīnj Juan tsínj ꞌyaj sun rian Jesucristo. ²Ni̱ huēj huin ꞌngo̱ tsínj nataꞌ si-nu̱guanꞌ Yanꞌanj rian ni ngüi̱ da̱j rúnꞌ gataj snanꞌanj Jesucristo riānj. Ni̱ hué daj ꞌyā nga̱ daranꞌ si guiniꞌīnj. ³Ngaa ni̱ hua ꞌueé rian ni ngüi̱ aya ni nuguanꞌ nan nga̱ ni ngüi̱ unun ni nuguanꞌ nan huin si-nu̱guanꞌ Yanꞌanj. Ni̱ hua ꞌueé rian ni sij sisi̱ da̱gahuin ni sij si ataj ni nuguanꞌ nan. Daj si hua gahuin ni̱chrunꞌ güi ngaa ga̱huin da̱j rúnꞌ ataj ni nuguanꞌ nan.

Salutaciones a las siete iglesias

⁴Huēj huin Juan. Ni̱ aꞌnī yanj carta nan huaj rian án re̱ꞌ huin ín re̱ꞌ ichij xiꞌninꞌ ni ngüi̱ nicoꞌ Jesucristo ma̱n estado Asia. Ni̱ huin ruhuāj sisi̱ gui̱ꞌyaj Yanꞌanj sinduj rian ni é re̱ꞌ, ni̱ ga̱huin dinꞌinj ruhua ni é re̱ꞌ, gui̱ꞌyaj Yanꞌanj nej. Nne Yanꞌanj acuanꞌ. Ni̱ hué Yanꞌanj gane asi̱j sini. Ni̱ hué Yanꞌanj huin si ga̱ꞌnaꞌ ru̱huaꞌ yún. Ni̱ hué daj huin ruhuāj si gui̱ꞌyaj ichij Espíritu Santo sinduj rian án re̱ꞌ, ni̱ ga̱huin dinꞌinj ruhua á re̱ꞌ. Ni̱ ichij Espíritu Santo daj niquinꞌ rian nne manꞌan Yanꞌanj. ⁵Ni̱ da̱j rúnꞌ huin ruhuāj si gui̱ꞌyaj Yanꞌanj nga̱ ichij Espíritu Santo daj nga̱ ni é re̱ꞌ, ni̱ hué daj huin ruhuāj si gui̱ꞌyaj Jesucristo nga̱ á re̱ꞌ huin sij ꞌngo̱ tsínj aꞌmi nuguanꞌ xa̱ngaꞌ. Ni̱ Jesucristo huin si ganáꞌnij sini scanij ni níman. Ni̱ hué sij nicaj sun rian ni rey ma̱n chruhua xungüi̱ nan.

Ni̱ ꞌi̱ ruhua Cristo niꞌyaj sij néꞌ. Ni̱ ganani néꞌ rian si-ga̱quinꞌ néꞌ xiꞌí si gayanj si-tun manꞌan sij xiꞌí néꞌ. ⁶Ni̱ guiꞌyaj sij sisi̱ gui̱nicaj néꞌ sun gahuin néꞌ rey nga̱ sij. Ni̱ guiꞌyaj sij sisi̱ ga̱huin néꞌ chrej rian chrej sij huin Yanꞌanj. Ni̱ huin ruhuāj sisi̱ ga̱ꞌmi sa̱ꞌ ni̱ganj ni ngüi̱ xiꞌí sij. Ni̱ ni̱ganj gui̱nicaj sij fuerza ruhuāj aj. Amén.

⁷Ni̱ꞌyaj néꞌ sisi̱ ga̱ꞌnaꞌ Cristo rian nga. Ni̱ daranꞌ ni ngüi̱ gui̱niꞌi sij. Ni̱ gui̱niꞌi ni tsínj gaꞌuiꞌ gaquíj sij nej. Ni̱ ga̱nani ruhua daranꞌ ni ngüi̱ ma̱n chruhua xungüi̱ ngaa gui̱niꞌi ni sij ga̱ꞌnaꞌ sij. Ni̱ ngaa ga̱ꞌnaꞌ sij, ni̱ ga̱co daranꞌ ni ngüi̱ ma̱n chruhua xungüi̱ xiꞌí gaquinꞌ daꞌui ni sij. Hué daj ga̱huin xa̱ngaꞌ. Amén.

⁸Ni̱ ataj Señor:

―Huēj huin ꞌngo̱ tsínj gu̱ꞌnaj Alfa nga̱ tsínj gu̱ꞌnaj Omega. Daj si Alfa huin letra gaxi̱ꞌi asi̱j sini ya̱n. Ni̱ Omega huin letra nicoꞌ da ne̱ꞌ ru̱cu. Ni̱ huēj huin tsínj nne acuanꞌ. Ni̱ huēj gane asi̱j sini. Ni̱ huēj ga̱ꞌnaꞌ ru̱huaꞌ yūnj. Ni̱ huēj nicaj daranꞌ fuerza. ―Daj ataj Señor.

Una visión del Hijo del Hombre

⁹Huēj huin Juan, ni̱ jnān huin ín re̱ꞌ. Ni̱ ranꞌ nu̱guanꞌānj sayun nga̱ á re̱ꞌ. Ni̱ gui̱nicaj sun nu̱guanꞌan néꞌ rian nicaj sun Yanꞌanj. Ni̱ gahuin nucuaj ruhua daranꞌ néꞌ guiꞌyaj fuerza néꞌ nga̱ sayun ꞌna̱ꞌ rian néꞌ. Ni̱ gahuin nucuaj ruhua néꞌ, guiꞌyaj Jesucristo. Hué dan ni̱ riqui ꞌngo̱ yoꞌój gu̱ꞌnaj Patmos huin ꞌngo̱ yuꞌuj ngaj da̱ni nnee yanꞌanj. Ni̱ yuꞌuj daj ganēj, guiꞌyaj ni tsínj ununꞌ ngāj xiꞌí si gaꞌmī si-nu̱guanꞌ Yanꞌanj rian ni ngüi̱ huin nuguanꞌ xa̱ngaꞌ gaꞌmi Jesucristo. ¹⁰Ni̱ ꞌngo̱ güi nicoꞌ néꞌ Yanꞌanj, ni̱ gaꞌníj Espíritu Santo nuguanꞌ sa̱ꞌ gaꞌna̱ꞌ chruhua nimānj. Ni̱ gunūnj ꞌngo̱ nane̱ gaꞌmi nucuaj ne̱ꞌ rucūj. Ni̱ da̱j rúnꞌ aꞌyanj ꞌngo̱ trompeta, ni̱ hué daj gunūnj ꞌngo̱ nane̱ nucuaj daj. ¹¹Ni̱ gataj nane̱ daj gunūnj:

―Huēj huin tsínj gu̱ꞌnaj Alfa nga̱ tsínj gu̱ꞌnaj Omega. Daj si huēj huin si gaxi̱ꞌi asi̱j sini ya̱n. Ni̱ huēj huin si ga̱ꞌnaꞌ da ru̱cu nej. Ga̱run re̱ꞌ si guiniꞌí re̱ꞌ rian yanj libro. Ni̱ ga̱ꞌnij re̱ꞌ libro daj rian ichij xiꞌninꞌ ni ngüi̱ nicoꞌ manꞌānj ma̱n estado Asia. Ma̱n ni sij xumanꞌ Efeso nga̱ xumanꞌ Esmirna nej, xumanꞌ Pérgamo nga̱ xumanꞌ Tiatira nej, xumanꞌ Sardis nga̱ xumanꞌ Filadelfia nej, xumanꞌ Laodicea nej. ―Daj gataj nane̱ daj gunūnj.

¹²Ni̱ nanicā niꞌyā sisi̱ u̱n sin huin nane̱ gaꞌmi daj. Ni̱ ngaa guiniꞌyā, ni̱ guiniꞌīnj ichij candelero huin gagaꞌ oro. ¹³Ni̱ da̱ni ichij candelero daj guiniꞌīnj da̱j rúnꞌ hua ꞌngo̱ daꞌníj ni ngüi̱ hua ꞌngo̱ tsínj guiniꞌīnj. Ni̱ nu̱n sij ꞌngo̱ atsij xa̱can. Ni̱ nicoj da xá xiꞌí sij. Ni̱ anumi ꞌngo̱ nnij sincho huin oro xiꞌyanj sij. ¹⁴Ni̱ rúnꞌ hua to̱ xachij ga̱tsi hua sa̱ꞌ hua chra̱ sij nga̱ huué chra̱ sij. Asi̱ rúnꞌ hua yuꞌueꞌ gatsi̱ huaj nej. Ni̱ rúnꞌ hua rian aca̱ yanꞌa̱n hua rundij rian sij. ¹⁵Ni̱ da̱j rúnꞌ aca̱ gagaꞌ mmíj ngaa gaca rian yanꞌa̱n, ni̱ hué daj ran nu̱ngüej dacój sij. Ni̱ da̱j rúnꞌ huin rian garin ni̱nꞌ ruhua nicoꞌ quin nnee, ni̱ hué daj nucuaj si-na̱ne sij. ¹⁶Ni̱ nicaj sij ichij yatiꞌ ne̱ꞌ chrej raꞌa sa̱ꞌ sij. Ni̱ gahui ꞌngo̱ espada hua̱ hui̱j rian duꞌua sij. Ni̱ da̱j rúnꞌ ꞌyaj güi ngaa xigui̱n sa̱ꞌaj, ni̱ hué daj ran rian sij.

¹⁷Ni̱ ngaa guiniꞌīnj sij, ni̱ rúnꞌ huin níman huīnj ganatū xiꞌí sij. Sani̱ gutaꞌ sij raꞌa sa̱ꞌ sij riānj. Ni̱ gataj sij gunūnj:

―Si̱ guxuꞌuíꞌ re̱ꞌ mánj. Huēj huin si gaꞌna̱ꞌ asi̱j sini ya̱n. Ni̱ huēj huin si ga̱ꞌnaꞌ da ru̱cu. ¹⁸Ni̱ huēj huin si hua ni̱ꞌnaꞌ. Asíj ni gahuīj. Sani̱ ni̱ganj ni̱nꞌ hua niꞌnāj yya̱j. Amén. Ni̱ nicaj sūnj rian ni níman nga̱ rian ma̱n ni níman nej.

¹⁹’Xiꞌí daj ni̱ ga̱run re̱ꞌ nuguanꞌ rian yanj xiꞌí si hua guiniꞌí re̱ꞌ. Ni̱ ga̱run re̱ꞌ si guiniꞌí re̱ꞌ acuanꞌ. Ni̱ ga̱run re̱ꞌ xiꞌí ni rasu̱n ga̱ꞌnaꞌ da ne̱ꞌ ru̱cu nej. ²⁰Ni̱ nan huin si ruhuaj gata ichij yatiꞌ guiniꞌí re̱ꞌ nicaj ne̱ꞌ chrej raꞌa sa̱ꞌāj nga̱ ichij candelero huin oro daj: Ni̱ ichij yatiꞌ daj huin ni ángel nicaj sun rian ichij xiꞌninꞌ ni ngüi̱ nicoꞌ manꞌānj. Ni̱ ichij candelero daj huin ichij xiꞌninꞌ ni ngüi̱ nicoꞌ manꞌānj. ―Daj gataj sij.

Mensaje a las siete iglesias: El mensaje a Éfeso

¹Ngaa ni̱ gataj ru̱huaꞌ yún sij gunūnj:

―Ga̱run re̱ꞌ yanj carta ga̱ꞌnij re̱ꞌ huaj rian ángel nicaj sun rian xiꞌninꞌ ni ngüi̱ nicoꞌ manꞌānj ma̱n xumanꞌ Efeso. Ni̱ ga̱taj re̱ꞌ gu̱nun ni sij: “Huēj huin tsínj nicaj ichij yatiꞌ ne̱ꞌ chrej raꞌa sa̱ꞌāj. Ni̱ achē scanij ichij candelero huin oro. ²Ni̱ niꞌīnj da̱j ꞌyaj ni é re̱ꞌ. Ni̱ niꞌīnj sisi̱ nucuaj ꞌyaj sun ni é re̱ꞌ. Ni̱ niꞌīnj da̱j gunucuaj ni é re̱ꞌ rian sayun. Ni̱ niꞌīnj sisi̱ naꞌuej ruhua á re̱ꞌ nga̱ si ꞌyaj ni tsínj quij. Ni̱ hué daj niꞌīnj sisi̱ xacaj ni é re̱ꞌ cuenta da̱j hua ni tsínj ataj sisi̱ huin ni sij apóstol. Sani̱ sé ni sij huin mánj. Ni̱ xacaj ni é re̱ꞌ cuenta sisi̱ tsínj digyaꞌ yunꞌunj huin ni sij. ³Ni̱ guiranꞌ ni é re̱ꞌ sayun. Sani̱ gaꞌninꞌ ruhua á re̱ꞌ nga̱ sayun daj. Ni̱ guiꞌyaj sun nucuaj á re̱ꞌ xiꞌí si ꞌi̱ ruhua á re̱ꞌ niꞌyaj á re̱ꞌ manꞌānj. Ni̱ nun gue̱reꞌ ruhua á re̱ꞌ. ⁴Sani̱ nicā ꞌngo̱ nuguanꞌ xiꞌí a ni é re̱ꞌ: Ni̱ nuguanꞌ nan huin sisi̱ nitaj si ꞌi̱ ruhua á re̱ꞌ niꞌyaj á re̱ꞌ manꞌānj da̱j rúnꞌ ga ꞌi̱ ruhua á re̱ꞌ asi̱j sini. ⁵Xiꞌí daj ni̱ ga̱nanun ruhua á re̱ꞌ da̱j guiꞌyaj á re̱ꞌ asi̱j sini. Ni̱ na̱nicaj ruhua á re̱ꞌ na̱nicoꞌ ni é re̱ꞌ manꞌānj. Ni̱ gui̱ꞌyaj á re̱ꞌ da̱j rúnꞌ guiꞌyaj á re̱ꞌ asi̱j sini. Ni̱ sisi̱ nitaj, ni̱ gu̱chiꞌ raꞌyān rian ma̱n án re̱ꞌ. Ni̱ sisi̱ si̱ nanicaj ruhua á re̱ꞌ, ni̱ ga̱ꞌnē si-candelero ni é re̱ꞌ rian niquinj. ⁶Sani̱ duguꞌna̱j ꞌyaj á re̱ꞌ: Nun huin xa̱nꞌ ruhua á re̱ꞌ niꞌyaj á re̱ꞌ si ꞌyaj ni tsínj Nicolaítas. Daj si hué daj nun huin xa̱nꞌ ruhuāj niꞌyā si ꞌyaj ni sij nej. ⁷Ni̱ sisi̱ nu̱n chraquij a ni é re̱ꞌ, ni̱ hua nia̱n si gu̱nun a ni é re̱ꞌ si ataj Espíritu Santo rian ni xiꞌninꞌ ni ngüi̱ nicoꞌ manꞌānj: Tsínj gu̱nucuaj gui̱ꞌyaj gana rian ni nuguanꞌ quij, ni̱ ga̱ꞌuīj sisi̱ xa̱ ni sij si ayu chra̱ chrun ꞌyaj si ga̱ne ni̱ganj ni ngüi̱. Ni̱ niquinꞌ chrun daj da̱ni rian hua sa̱ꞌ nne Yanꞌanj.” Daj ga̱taj re̱ꞌ gu̱nun ni sij aj. ―Daj gataj Jesús gunūnj.

El mensaje a Esmirna

⁸Ngaa ni̱ gataj ru̱huaꞌ yún sij gunūnj:

―Hué daj ga̱run re̱ꞌ yanj carta ga̱ꞌnij re̱ꞌ huaj rian ángel nicaj sun rian xiꞌninꞌ ni ngüi̱ nicoꞌ manꞌānj ma̱n xumanꞌ Esmirna. Ni̱ ga̱taj re̱ꞌ gu̱nun ni sij: “Huēj huin si aꞌmi nuguanꞌ nan. Ni̱ huēj huin si gaꞌna̱ꞌ asi̱j sini ya̱n. Ni̱ huēj huin si ga̱ꞌnaꞌ da̱ ru̱cu. Ni̱ gahuīj. Ni̱ ganáꞌnij ru̱huaꞌ yūnj nej. ⁹Ni̱ niꞌīnj da̱j guiranꞌ ni é re̱ꞌ sayun. Ni̱ niꞌīnj da̱j yaco guiranꞌ ni é re̱ꞌ. Sani̱ xuruꞌue huin ín re̱ꞌ rian Yanꞌanj. Ni̱ niꞌīnj da̱j aꞌmi quij ni tsínj ataj sisi̱ huin ni sij ni tsínj israelita. Sani̱ sé ni sij huin mánj. Ni̱ aꞌmi quij ni sij xiꞌí ni é re̱ꞌ. Maan si huin ni sij ꞌngo̱ xiꞌninꞌ ni tsínj nicoꞌ sichre Satanás. ¹⁰Ni̱ si̱ guxuꞌuiꞌ ni é re̱ꞌ nga̱ sayun gui̱ranꞌ ni é re̱ꞌ. Daj si ga̱ꞌnij sichre daꞌaj á re̱ꞌ ducuaga̱ꞌ gu̱nun ni é re̱ꞌ. Ngaa ni̱ xa̱caj sichre cuenta sisi̱ yya ga̱huin ran xa̱ngaꞌ niman ni é re̱ꞌ. Ngaa ni̱ gui̱ranꞌ ni é re̱ꞌ sayun ichiꞌ güi. Sani̱ ga̱ ni̱ca ruhua á re̱ꞌ daꞌ güi ga̱huiꞌ ni é re̱ꞌ. Ngaa ni̱ ri̱quīj ꞌngo̱ corona huin ꞌngo̱ premio gui̱ꞌyaj si ga̱ne ni̱ganj ni é re̱ꞌ nga̱ Yanꞌanj. ¹¹Ni̱ sisi̱ nu̱n chraquij re̱ꞌ, ni̱ hua nia̱n si gu̱nun re̱ꞌ si ataj Espíritu Santo rian ni xiꞌninꞌ ni ngüi̱ nicoꞌ manꞌānj. Tsínj gu̱nucuaj gui̱ꞌyaj gana rian nuguanꞌ quij, ni̱ nitaj sayun gui̱ranꞌ sij da̱j rúnꞌ gui̱ranꞌ ni tsínj ga̱huiꞌ ru̱huaꞌ yún.” Daj ga̱taj re̱ꞌ gu̱nun ni sij aj. ―Daj gataj Jesús gunūnj.

El mensaje a Pérgamo

¹²Ngaa ni̱ gataj ru̱huaꞌ yún Jesús gunūnj:

―Hué daj ga̱run re̱ꞌ yanj carta ga̱ꞌnij re̱ꞌ huaj rian xiꞌninꞌ ni ngüi̱ nicoꞌ manꞌānj ma̱n xumanꞌ Pérgamo. Ni̱ ga̱taj re̱ꞌ gu̱nun ni sij: “Huēj huin si aꞌmi nuguanꞌ nan. Ni̱ nicā espada hua̱ hui̱j rian. ¹³Ni̱ niꞌīnj da̱j ꞌyaj á re̱ꞌ. Ni̱ niꞌīnj sisi̱ nne ni é re̱ꞌ rian nicaj sun sichre. Sani̱ hua ni̱ca xa̱ngaꞌ ruhua ni é re̱ꞌ nga̱ si-xugüīj. Ni̱ nitaj si duna á re̱ꞌ si xuman ruhua á re̱ꞌ niꞌyaj ni é re̱ꞌ manꞌānj. Ni̱ nun gaꞌninꞌ ruhua á re̱ꞌ nga̱ si-nu̱guanꞌānj ngaa gahuiꞌ tsínj gu̱ꞌnaj Antipás, guiꞌyaj ni sij xánj án re̱ꞌ huin xumanꞌ nne Satanás. Ni̱ gahuin síꞌ ꞌngo̱ tsínj gaꞌmi nuguanꞌ xa̱ngaꞌ rian ni ngüi̱. ¹⁴Sani̱ nicā do̱j nuguanꞌ xiꞌí a ni é re̱ꞌ: Daj si scanij a ni é re̱ꞌ, ni̱ ma̱n ni tsínj nicoꞌ si-nu̱guanꞌ tsínj gu̱ꞌnaj Balaam. Ni̱ asi̱j ná ni̱ digyán Balaam ꞌngo̱ chrej quij rian tsínj gu̱ꞌnaj Balac. Ngaa ni̱ xiꞌí nuguanꞌ quij daj, ni̱ guiꞌyaj ni tsínj israelita gaquinꞌ. Ni̱ xa ni sij ni xucu dagahuiꞌ ni sij rian yanꞌanj guiꞌyaj raꞌa ni sij. Ni̱ guiꞌyaj squi̱raꞌ ni sij nga̱ dugüiꞌ ni sij. ¹⁵Ni̱ hué daj ma̱n go̱ꞌngo ni tsínj scanij ni é re̱ꞌ huin tsínj digyán si-nu̱guanꞌ ni tsínj nicolaítas. Ni̱ nun huin xa̱nꞌ ruhuāj niꞌyā si-nu̱guanꞌ ni síꞌ. ¹⁶Xiꞌí daj ni̱ na̱nicaj ruhua á re̱ꞌ. Sisi̱ nitaj, ni̱ gu̱chiꞌ raꞌyān rian ma̱n án re̱ꞌ. Ni̱ gu̱nūnj nga̱ ni sij nga̱ espada nu̱n duꞌuāj. ¹⁷Ni̱ sisi̱ nu̱n chraquij a ni é re̱ꞌ, ni̱ hua nia̱n si gu̱nun a ni é re̱ꞌ si ataj snanꞌanj Espíritu Santo rian ni xiꞌninꞌ ni ngüi̱ nicoꞌ manꞌānj: Tsínj gu̱nucuaj gui̱ꞌyaj gana rian nuguanꞌ quij, ni̱ ga̱ꞌuīj xa̱ sij chrachrúnj sa̱ꞌ huin maná. Ni̱ nun niꞌi ni ngüi̱ da̱j hua sa̱ꞌ maná daj. Ni̱ hué daj ga̱ꞌuīj ꞌngo̱ yej ga̱tsi tsínj gui̱ꞌyaj gana daj. Ni̱ hua ni̱ca letra rian yej daj. Ni̱ gui̱nun na̱ca si-xugüi sij. Ni̱ a̱ ꞌngo̱ tsínj si̱ gaꞌue gui̱niꞌi nuguanꞌ na̱ca gui̱nun rian yej da mánj. Sani̱ urin tsínj nahuin raꞌa gui̱niꞌi.” Daj ga̱taj re̱ꞌ gu̱nun ni sij. ―Daj gataj Señor Jesús gunūnj.

El mensaje a Tiatira

¹⁸Ngaa ni̱ gataj ru̱huaꞌ yún sij gunūnj:

―Hué daj ga̱run re̱ꞌ yanj carta ga̱ꞌnij re̱ꞌ huaj rian ángel nicaj sun rian xiꞌninꞌ ni ngüi̱ nicoꞌ manꞌānj ma̱n xumanꞌ Tiatira. Ni̱ ga̱taj re̱ꞌ gu̱nun ni sij: “Huēj aꞌmi nuguanꞌ nan huīnj daꞌníj Yanꞌanj. Ni̱ rúnꞌ hua rian aca yanꞌa̱n hua rundij riānj. Ni̱ da̱j rúnꞌ nuꞌui gagaꞌ mmíj, ni̱ hué daj ran nu̱ngüej dacō. ¹⁹Niꞌīnj daranꞌ si ꞌyaj á re̱ꞌ. Ni̱ niꞌīnj da̱j ꞌi̱ ruhua á re̱ꞌ niꞌyaj á re̱ꞌ dugüiꞌ a ni é re̱ꞌ. Ni̱ xuman ruhua á re̱ꞌ niꞌyaj á re̱ꞌ manꞌānj nej. Ni̱ ꞌyaj sun ni é re̱ꞌ rian ni dugüiꞌ ni é re̱ꞌ nej. Ni̱ niꞌīnj da̱j gunucuaj á re̱ꞌ sayun. Ni̱ ꞌyaj sun a ni é re̱ꞌ doj daj nga̱ si guiꞌyaj sun a ni é re̱ꞌ asi̱j sini. ²⁰Sani̱ ni̱cā ꞌngo̱ nuguanꞌ xiꞌí ni é re̱ꞌ. Daj si aꞌníj ni é re̱ꞌ chrej sisi̱ digyaꞌ yunꞌunj yunꞌunj xa̱na gu̱ꞌnaj Jezabel rian ni tsínj ꞌyaj sun riānj. Ni̱ ataj unj sisi̱ aꞌmi unj si-nu̱guanꞌ Yanꞌanj. Sani̱ digyán unj ꞌngo̱ chrej nitaj si hua sa̱ꞌ rian ni sij sisi̱ gui̱ꞌyaj squi̱raꞌ ni sij nga̱ ni dugüiꞌ ni sij. Ni̱ digyán unj sisi̱ xa̱ ni sij xucu dagahuiꞌ ni sij rian ni yanꞌanj ꞌyaj raꞌa ni sij. ²¹Ni̱ hua riquīj do̱j güi sisi̱ ga̱nani ruhua unj xiꞌí si-ga̱quinꞌ unj. Sani̱ naꞌuej ruhua unj du̱na unj si-ga̱quinꞌ unj. ²²Ngaa ni̱ gui̱ꞌyā sisi̱ ga̱ꞌnanꞌ unj gui̱ngaj unj rian nna. Ni̱ gui̱ꞌyā sisi̱ nico sayun gui̱ranꞌ ni tsínj ꞌyaj squi̱raꞌ nga̱ unj. Ni̱ hué daj gui̱ranꞌ ni sij sisi̱ si̱ nani ruhua ni sij xiꞌí gaquinꞌ ꞌyaj ni sij nga̱ unj. ²³Ni̱ ꞌngo̱ ga̱huiꞌ ni daꞌníj unj, gui̱ꞌyā. Ngaa ni̱ gui̱niꞌi daranꞌ ni xiꞌninꞌ huin ni ngüi̱ nicoꞌ manꞌānj sisi̱ huēj niꞌi sa̱ꞌ da̱j ani ruhua ni ngüi̱ nga̱ da̱j hua niman ni sij. Ni̱ na̱ruꞌuē rian go̱ꞌngo ni é re̱ꞌ da̱j rúnꞌ ꞌyaj go̱ꞌngo a ni é re̱ꞌ. ²⁴Ngaa ni̱ ga̱tā gu̱nun ango ni é re̱ꞌ ma̱n xumanꞌ Tiatira huin ni é re̱ꞌ ni ngüi̱ nun nicoꞌ nuguanꞌ quij digyán yunꞌunj xa̱na daj. Ni̱ nun guiniꞌi ni é re̱ꞌ nuguanꞌ hui̱ digyán ni sij xiꞌí si-du̱cuanj sichre Satanás. Ni̱ ga̱tā gunun ni é re̱ꞌ sisi̱ nitaj si ga̱ꞌnīj ango sun rian án re̱ꞌ mánj. ²⁵Maan si du̱gumi sa̱ꞌ á re̱ꞌ nuguanꞌ nicaj ni é re̱ꞌ da gui̱sij güi ga̱ꞌnaꞌ ru̱huaꞌ yūnj rian án re̱ꞌ. ²⁶Tsínj gu̱nucuaj gui̱ꞌyaj gana rian nuguanꞌ quij, ni̱ sisi̱ ni̱ganj da̱gahuin sij nuguanꞌ gaꞌnīj sun rian sij, ni̱ ga̱ꞌuīj si gui̱nicaj sun sij rian ni xungüi̱. ²⁷Ni̱ gui̱nicaj sij niꞌí gagaꞌ. Ni̱ da̱j rúnꞌ uraꞌ néꞌ chrun, ni̱ hué daj gui̱ꞌyaj sij nga̱ ni xumanꞌ daj. Daj si hué daj riqui chrē sun riānj. ²⁸Ni̱ ga̱ꞌuīj yatiꞌ stanga̱ rian sij nej. ²⁹Ni̱ sisi̱ nu̱n chraquij a ni é re̱ꞌ, ni̱ hua nia̱n si gu̱nun a ni é re̱ꞌ si ataj snanꞌanj Espíritu Santo rian ni xiꞌninꞌ huin ni ngüi̱ nicoꞌ manꞌānj.” Daj ga̱taj re̱ꞌ gu̱nun ni sij. ―Hué daj gataj Jesús gunūnj.

El mensaje a Sardis

¹Ngaa ni̱ gataj ru̱huaꞌ yún sij gunūnj:

―Hué daj ga̱run re̱ꞌ yanj carta ga̱ꞌnij re̱ꞌ rian ángel nicaj sun rian xiꞌninꞌ huin ni ngüi̱ nicoꞌ Yanꞌanj ma̱n xumanꞌ Sardis. Ni̱ ga̱taj re̱ꞌ gu̱nun ni sij: “Huēj aꞌmi nuguanꞌ nan. Ni̱ nicā ichij Espíritu Santo ꞌna̱ꞌ rian Yanꞌanj nga̱ ichij yatiꞌ nej. Ni̱ niꞌīnj da̱j ꞌyaj ni é re̱ꞌ. Ni̱ nu̱nj si aꞌmi ni ngüi̱ sisi̱ hua ni̱ꞌnaꞌ niman ni é re̱ꞌ, sani̱ rúnꞌ huin níman huin a ni é re̱ꞌ riānj. ²Hué dan ni̱ na̱nun ruhua á re̱ꞌ. Ni̱ du̱guꞌnunꞌ ni é re̱ꞌ nga̱ ni nuguanꞌ ruhua gue̱reꞌ. Daj si xacaj cuentāj sisi̱ nun gui̱sij ni é re̱ꞌ gui̱ꞌyaj sa̱ꞌ á re̱ꞌ nga̱ si-sun ni é re̱ꞌ rian Yanꞌanj. ³Ga̱nanun ruhua á re̱ꞌ nga̱ nuguanꞌ digyán ni sij rian án re̱ꞌ nga̱ nuguanꞌ gunun ni é re̱ꞌ. Ni̱ gui̱ꞌyaj á re̱ꞌ da̱j rúnꞌ ataj nuguanꞌ daj. Ni̱ ga̱nani ruhua ni é re̱ꞌ xiꞌí si-ga̱quinꞌ ni é re̱ꞌ. Ni̱ na̱nicoꞌ ni é re̱ꞌ Yanꞌanj. Ni̱ sisi̱ si̱ gunun ruhua á re̱ꞌ, ngaa ni̱ ráꞌyanj gui̱sī rian án re̱ꞌ da̱j rúnꞌ ꞌyaj ꞌngo̱ tsínj tu̱. Ni̱ si̱ guiniꞌi a ni é re̱ꞌ u̱n hora gui̱sī rian án re̱ꞌ. ⁴Sani̱ ma̱n do̱j ni ngüi̱ scanij a ni é re̱ꞌ nitaj si guiꞌyaj quij. Ni̱ gu̱nun ni sij atsij ga̱tsi. Ni̱ ga̱che ni sij ngāj. Daj si ꞌyaj sa̱ꞌ ni sij riānj. ⁵Tsínj gu̱nucuaj gui̱ꞌyaj gana rian ni nuguanꞌ quij, ni̱ gu̱nun ni sij atsij ga̱tsi. Ni̱ si̱ jnaruhuī si-xugüi ni sij ta̱j rian libro nu̱n si-xugüi ni ngüi̱ ga̱ne ni̱ganj nga̱ Yanꞌanj. Ni̱ ga̱ꞌmi sa̱ꞌāj si-xugüi ni sij rian chrē nga̱ rian si-ángel chrē nej. ⁶Ni̱ sisi̱ nu̱n chraquij a ni é re̱ꞌ, ni̱ hua nia̱n si gu̱nun a ni é re̱ꞌ si ataj snanꞌanj Espíritu Santo rian ni xiꞌninꞌ huin ni ngüi̱ nicoꞌ manꞌānj.” Daj ga̱taj re̱ꞌ gu̱nun ni sij. ―Daj gataj Jesús gunūnj.

El mensaje a Filadelfia

⁷Ngaa ni̱ ga̱taj ru̱huaꞌ yún Jesús gunūnj:

―Ni̱ ga̱run re̱ꞌ yanj carta ga̱ꞌnij re̱ꞌ huaj rian ángel nicaj sun rian xiꞌninꞌ huin ni ngüi̱ nicoꞌ manꞌānj ma̱n xumanꞌ Filadelfia. Ni̱ ga̱taj re̱ꞌ gu̱nun ni sij: “Huēj huin si aꞌmi nuguanꞌ nan huīnj tsínj sa̱ꞌ chruhua niman. Ni̱ huēj huin si aꞌmi nuguanꞌ xa̱ngaꞌ. Ni̱ nicā si-rian gagaꞌ rey David. Ni̱ ngaa naꞌnī rian hueꞌ, ni̱ a̱ ꞌngo̱ tsínj si̱ gaꞌue na̱ranj. Ni̱ ngaa narān rian hueꞌ ni̱ a̱ ꞌngo̱ tsínj si̱ gaꞌue na̱ꞌni mánj. ⁸Niꞌīnj da̱j ꞌyaj ni é re̱ꞌ. Ni̱ꞌyaj á re̱ꞌ ne̱ꞌ chrej rian án re̱ꞌ. Daj si hua naꞌnī rian ga̱tu a ni é re̱ꞌ rian ꞌngo̱ hueꞌ. Ni̱, ni̱ a̱ ꞌngo̱ tsínj si̱ gaꞌue na̱ranj rian hueꞌ daj. Ni̱ nu̱nj si do̱j nucuaj niman án re̱ꞌ sani̱ dugumi sa̱ꞌ á re̱ꞌ si-nu̱guanꞌānj. Ni̱ nitaj si duna á re̱ꞌ si gaꞌmi sa̱ꞌ á re̱ꞌ xiꞌīj aj. ⁹Ni̱ hua go̱ꞌngo ni sij nicaj dugüiꞌ nga̱ Satanás. Ni̱ ataj ni sij sisi̱ ni tsínj israelita huin ni sij. Sani̱ sé si xa̱ngaꞌ huin ni sij. Tsínj digyaꞌ yunꞌunj huin ni sij. Ni̱ gui̱ꞌyā sisi̱ gu̱chiꞌ ni sij rian ma̱n án re̱ꞌ. Ni̱ gui̱niquinꞌ ráj da̱coj ni sij rian án re̱ꞌ, gui̱ꞌyā. Ngaa ni̱ gui̱niꞌi yya ni sij sisi̱ ꞌi̱ ruhuāj niꞌyā á re̱ꞌ. ¹⁰Ni̱ xiꞌí si dagahuin a ni é re̱ꞌ nuguanꞌ gaꞌníj sun rian án re̱ꞌ sisi̱ gu̱nucuaj á re̱ꞌ rian sayun, ngaa ni̱ huēj du̱gumi ni é re̱ꞌ sisi̱ si̱ guiranꞌ ni é re̱ꞌ rian sayun xxi ga̱ꞌnaꞌ gui̱ranꞌ daranꞌ ni ngüi̱ ma̱n chruhua xungüi̱. Ni̱ ngaa ga̱ꞌnaꞌ sayun xxi daj, ni̱ xa̱caj Yanꞌanj cuenta da̱j gu̱nucuaj ni ngüi̱ nga̱ sayun xxi ga̱ꞌnaꞌ. ¹¹Ni̱ ráꞌyanj ga̱ꞌnāj rian ma̱n án re̱ꞌ. Ngaa ni̱ du̱gumi sa̱ꞌ á re̱ꞌ nuguanꞌ nicaj á re̱ꞌ. Ngaa ni̱ si̱ nacaj ango ni sij si-corona ni é re̱ꞌ huin premio guiꞌyaj gana á re̱ꞌ. ¹²Tsínj gui̱ꞌyaj gana rian nuguanꞌ quij, ni̱ gui̱ꞌyā sisi̱ ga̱huin sij da̱j rúnꞌ huin ꞌngo̱ chran xa̱can du̱guꞌnunꞌ chruhua si-nuhui Danꞌān. Ni̱ nitaj a̱man ga̱hui sij chruhua nuhui daj. Ni̱ ga̱rūnj si-xugüi Danꞌān rian sij nga̱ si-xugüi xánj Danꞌān nej huin xumanꞌ Jerusalén na̱ca ꞌna̱ꞌ xataꞌ rian Yanꞌanj. Ni̱ ga̱nahuin na̱ca si-xugüīj garūnj rian sij nej. ¹³Ni̱ sisi̱ nu̱n chraquij a ni é re̱ꞌ, ni̱ hua nia̱n si gu̱nun a ni é re̱ꞌ si ataj snanꞌanj Espíritu Santo rian ni xiꞌninꞌ ni ngüi̱ nicoꞌ manꞌānj.” Daj ga̱taj re̱ꞌ gu̱nun ni sij. ―Daj gataj Señor Jesús gunūnj.

El mensaje a Laodicea

¹⁴Ngaa ni̱ gataj ru̱huaꞌ yún sij gunūnj:

―Hué daj ga̱run re̱ꞌ yanj carta ga̱ꞌnij re̱ꞌ huaj rian ángel nicaj sun rian xiꞌninꞌ huin ni ngüi̱ nicoꞌ manꞌānj ma̱n xumanꞌ Laodicea. Ni̱ ga̱taj re̱ꞌ gu̱nun ni sij: “Huēj huin si gui̱ꞌyaj daranꞌ si gataj snanꞌān gunun a ni é re̱ꞌ. Ni̱ huīnj tsínj nataꞌ yya nuguanꞌ xa̱ngaꞌ rian ni ngüi̱. Ni̱ asi̱j sini ngaa guiꞌyaj Yanꞌanj xungüi̱, ni̱ huēj huin si guiꞌyaj daranꞌanj. ¹⁵Ni̱ niꞌīnj da̱j ꞌyaj á re̱ꞌ. Ni̱ niꞌīnj sisi̱ sé da̱j rúnꞌ hua ꞌngo̱ si nuhuij hua a ni é re̱ꞌ. Ni̱ sé da̱j rúnꞌ hua ꞌngo̱ si ya̱nꞌan hua a ni é re̱ꞌ. Ni̱ huin ruhuāj sisi̱ da̱j rúnꞌ hua ꞌngo̱ si nuhuij, asi̱ ꞌngo̱ si ya̱nꞌan ga̱ ni é re̱ꞌ aj. ¹⁶Hué dan ni̱ xiꞌí si da̱j rúnꞌ hua nnee gui̱n hua ni é re̱ꞌ, ni̱ ga̱hui ni é re̱ꞌ duꞌuāj gu̱rān da̱j rúnꞌ uránj ꞌngo̱ tsínj. Daj si sé da̱j rúnꞌ hua nnee nuhuij asi̱ nnee ya̱nꞌan hua ni é re̱ꞌ. ¹⁷Daj si ataj ni é re̱ꞌ sisi̱ xuruꞌue huin ni é re̱ꞌ. Ni̱ hua nico rasu̱n rian ni é re̱ꞌ. Ni̱, ni ango ni rasu̱n nitaj si achin rian án re̱ꞌ, ataj á re̱ꞌ. Sani̱ nun acaj ni é re̱ꞌ cuenta sisi̱ ni ngüi̱ guereꞌ ruhua huin ni é re̱ꞌ. Ni̱ ni ngüi̱ ranꞌ yaco huin ni é re̱ꞌ. Ni̱ huin ín re̱ꞌ ni ngüi̱ niqui. Ni̱ huin ni é re̱ꞌ ni ngüi̱ duri. Ni̱ huin ni é re̱ꞌ ni ngüi̱ hua nne̱ nej. ¹⁸Xiꞌí daj ni̱ riquīj ꞌngo̱ ducuánj rian án re̱ꞌ sisi̱ gui̱ran ni é re̱ꞌ gagaꞌ oro sa̱ꞌ riānj huin oro gahuin sa̱ꞌ, guiꞌyaj yanꞌa̱n. Hué dan ni̱ ga̱ꞌue ga̱huin xa̱ngaꞌ ni é re̱ꞌ xuruꞌue riānj. Ni̱ gui̱ran ni é re̱ꞌ atsij ga̱tsi riānj gu̱nun ni é re̱ꞌ. Ngaa ni̱ si̱ gahuin na̱ꞌaj ni é re̱ꞌ xiꞌí si hua nne̱ ni é re̱ꞌ. Ni̱ gui̱ran ni é re̱ꞌ gonoꞌo ga̱ꞌnij ni é re̱ꞌ rian án re̱ꞌ. Ngaa ni̱ ga̱ꞌue gui̱niꞌi ni é re̱ꞌ, ni̱ xa̱caj á re̱ꞌ cuenta, gui̱ꞌyaj gonoꞌo daj. ¹⁹Daranꞌ ni ngüi̱ ꞌi̱ ruhuāj, ni̱ gunun gaꞌī ni sij. Ni̱ ꞌyā castigo ni sij. Xiꞌí daj ni̱ du̱guꞌnunꞌ ni é re̱ꞌ sisi̱ na̱ni ruhua ni é re̱ꞌ xiꞌí si-ga̱quinꞌ ni é re̱ꞌ. Ni̱ na̱nicoꞌ ni é re̱ꞌ Yanꞌanj. ²⁰Huēj huin si niquinꞌ rian hueꞌ. Ni̱ aquīn ni é re̱ꞌ. Ngaa ni̱ sisi̱ unun ꞌngo̱ tsínj daj si aꞌmī, ni̱ na̱ꞌni sij rian ducuá sij ga̱tū. Ni̱ ga̱huin stiꞌnīj nga̱ sij. Ni̱ ga̱huin stiꞌni̱ sij ngāj nej. ²¹Tsínj gui̱ꞌyaj gana rian ni nuguanꞌ quij, ni̱ ri̱quīj rian ga̱ne sij ngāj rian chrun xilāj huin chrun xila sa̱ꞌ. Daj si hué ducuánj daj guiꞌyaj ganānj rian ni nuguanꞌ quij. Ni̱ nne nuguanꞌānj nga̱ chrē rian chrun xila sij huin chrun xila sa̱ꞌ. ²²Ni̱ sisi̱ nu̱n chraquij a ni é re̱ꞌ, ni̱ gu̱nun a ni é re̱ꞌ si ataj snanꞌanj Espíritu Santo rian ni xiꞌninꞌ ni ngüi̱ nicoꞌ manꞌānj.” Daj ga̱taj re̱ꞌ rian ni sij. ―Daj gataj Señor Jesús gunūnj.

La adoración celestial

¹Ngaa guisíj ni̱ guiniꞌyā, ni̱ guiniꞌīnj ꞌngo̱ rian hueꞌ hua níꞌnij xataꞌ. Ni̱ gunun ru̱huaꞌ yūnj nane̱ gaꞌmi sini ngāj. Ni̱ da̱j rúnꞌ aꞌyanj trompeta hué daj gaꞌmi nane̱ daj. Ni̱ gataj nane̱ daj gunūnj:

―Ga̱hui re̱ꞌ ga̱ꞌnaꞌ re̱ꞌ xataꞌ. Ni̱ di̱gyānj rián re̱ꞌ ni nuguanꞌ sisi̱ hua nia̱n ga̱huin da ru̱cu. ―Daj gataj nane̱ daj.

²Ni̱ ráꞌyanj guiniꞌi nimānj ꞌngo̱ nuguanꞌ sa̱ꞌ, guiꞌyaj Espíritu Santo. Ni̱ guiniꞌīnj niquinꞌ ꞌngo̱ chrun xila sa̱ꞌ xataꞌ. Ni̱ nne ꞌngo̱ si mán xataꞌ rian chrun xila sa̱ꞌ daj. ³Ni̱ da̱j rúnꞌ hua ꞌngo̱ yej ran sa̱ꞌ gu̱ꞌnaj jaspe, asi̱ ꞌngo̱ yej gu̱ꞌnaj cornalina, ni̱ hué daj hua si nne rian chrun xila sa̱ꞌ daj. Ni̱ xiꞌníj chrun xila daj ganica̱j xucuáj guꞌluj. Ni̱ xigui̱n xucuáj daj da̱j rúnꞌ ran ꞌngo̱ yej gu̱ꞌnaj esmeralda. ⁴Ni̱ guiniꞌīnj ango ico̱ ga̱nꞌanj chrun xila sa̱ꞌ ganica̱j xiꞌníj chrun xila sa̱ꞌ daj. Ni̱ nne ico̱ ga̱nꞌanj ni tsínj huin achij rian ni chrun xila sa̱ꞌ daj. Ni̱ nu̱n ni sij atsij ga̱tsi. Ni̱ nu̱n chra̱ ni sij ꞌngo̱ corona huin gagaꞌ oro. ⁵Ni̱ ran rian chrun xila sa̱ꞌ niquinꞌ da̱ni daj. Ni̱ gahuin gari̱n ngaa gaguáj duꞌui. Ni̱ ne̱ꞌ rian chrun xila sa̱ꞌ daj aca ichij yanꞌa̱n huin ichij Espíritu Santo ꞌna̱ꞌ rian Yanꞌanj. ⁶Ni̱ ne̱ꞌ rian chrun xila sa̱ꞌ niquinꞌ da̱ni daj, ni̱ da̱j rúnꞌ hua ꞌngo̱ nnee yanꞌanj, ni̱ hué daj hua nnee gurugüiꞌ rian chrun xila daj. Ni̱ da̱j rúnꞌ hua pidrio sa̱ꞌ, ni̱ hué daj xigui̱n sa̱ꞌ rian nnee daj.

Ni̱ da̱ni rian niquinꞌ chrun xila sa̱ꞌ daj, ni̱ ganica̱j ga̱nꞌanj ni si hua ni̱ꞌnaꞌ mán xataꞌ xiꞌníj chrun xila daj. Ni̱ ga̱nꞌanj si mán xataꞌ daj, ni̱ hua gaꞌi̱ rundij rianj ne̱ꞌ chrej ru̱cu nga̱ ne̱ꞌ chrej rianj nej. ⁷Ni̱ da̱j rúnꞌ hua ꞌngo̱ sigueꞌej xxi, ni̱ hué daj hua ꞌngo̱j. Ni̱ da̱j rúnꞌ hua cero, ni̱ hué daj hua angoj. Ni̱ da̱j rúnꞌ hua rian ꞌngo̱ tsínj, ni̱ hué daj hua ángoj. Ni̱ da̱j rúnꞌ hua xata achéj xataꞌ, ni̱ hué daj hua ángoj. ⁸Ni̱ aninꞌ ga̱nꞌanj ni xucu hua ni̱ꞌnaꞌ mán xataꞌ, ni̱ hua hua̱tanꞌ si-gachi da go̱ꞌngoj. Ni̱ ni̱nꞌ ga̱chraꞌ nnee̱ cúj aninꞌ ga̱nꞌanj xucu daj, ni̱ hua gaꞌi̱ ni̱nꞌ ruhua rundij rian xuj. Ni̱ hua rundij rian riqui si-gachi nej. Ni̱ nu̱n güi ni̱ganꞌ, ni̱ nun aꞌninꞌ ruhua aninꞌ xucu si ga̱ꞌmi. Ni̱ ataj aninꞌ ga̱nꞌanj xuj:

Hua sa̱ꞌ ni̱nꞌ ruhua Yanꞌanj.

Hua sa̱ꞌ ni̱nꞌ ruhua Yanꞌanj.

Hua sa̱ꞌ ni̱nꞌ ruhua Señor huin Yanꞌanj.

Ni̱ nucuaj ni̱nꞌ ruhua Yanꞌanj.

Ni̱ hué Yanꞌanj huin si gane asi̱j sini.

Ni̱ Yanꞌanj huin si nne acuanꞌ.

Ni̱ Yanꞌanj huin si ga̱ꞌnaꞌ ru̱huaꞌ yún.

Ataj aninꞌ ga̱nꞌanj xucu mán xataꞌ daj. ⁹Ni̱ gaꞌmi sa̱ꞌ aninꞌ ga̱nꞌanj xuj rian si nne rian chrun xila sa̱ꞌ daj. Ni̱ nu̱n yanꞌanj aninꞌ ga̱nꞌan. Ni̱ aꞌuiꞌ aninꞌ ga̱nꞌan si guruhua si nne rian chrun xila sa̱ꞌ huin si nne ni̱ganj. Ni̱ da yu̱n yu̱n hué daj ꞌyaj aninꞌ ga̱nꞌanj daj ngaa aꞌmi sa̱ꞌ aninꞌ-inj. ¹⁰Ngaa ni̱ guiniquinꞌ ráj da̱coj ico̱ ga̱nꞌanj ni tsínj huin achij rian si nne rian chrun xila sa̱ꞌ daj. Ni̱ aꞌmi sa̱ꞌ ni sij. Ni̱ dugüéj ni sij si-corona ni sij rian si nne rian chrun xila sa̱ꞌ daj. Ni̱ ataj ni sij:

¹¹Hué re̱ꞌ huin Señor.

Ni̱ duguꞌna̱j huin sisi̱ ga̱ꞌmi sa̱ꞌ ni ngüi̱ xiꞌí re̱ꞌ.

Ni̱ duguꞌna̱j huin sisi̱ gui̱nun yanꞌanj ni ngüi̱ manꞌán re̱ꞌ nej.

Ni̱ duguꞌna̱j huin sisi̱ gui̱nicaj re̱ꞌ daranꞌ fuerza.

Daj si hué re̱ꞌ guiꞌyaj daranꞌ ni rasu̱n.

Ni̱ ma̱n ni rasu̱n daj xiꞌí si hué daj garanꞌ ruhuá re̱ꞌ.

Ataj ico̱ ga̱nꞌanj ni tsínj huin achij daj.

El rollo y el Cordero

¹Ngaa ni̱ guiniꞌīnj sisi̱ nicaj si nne rian chrun xila sa̱ꞌ daj ꞌngo̱ yanj libro ne̱ꞌ chrej raꞌa sa̱ꞌaj. Ni̱ hua ni̱ca nu̱n letra xiráj yanj daj. Ni̱ hua ni̱ca nu̱n letra riqui yanj daj nej. Ni̱ hua ránj sa̱ꞌ ichij sello duꞌua yanj daj. ²Ni̱ guiniꞌīnj ꞌngo̱ ángel nucuaj. Ni̱ nachínj snanꞌanj ángel daj. Ni̱ gaꞌmi nucuaj-áꞌ gataj-áꞌ:

―Ni̱ u̱n sin huin si sa̱ꞌ sisi̱ ga̱ꞌne sello hua ránj duꞌua yanj libro daj, ngaa ni̱ na̱guraj duꞌua rumi yanj daj únj. ―Daj gataj ángel daj.

³Sani̱ ni̱ a̱ ꞌngo̱ si mán xataꞌ nga̱ si mán rian yoꞌój nej, si mán riqui yoꞌój nej, si̱ gaꞌue naguraj rian yanj libro daj, ni̱ gui̱niꞌi da̱j hua rian yanj da mánj. ⁴Ngaa ni̱ gaco ni̱nꞌ ruhuāj xiꞌí si nun nariꞌ ni sij ꞌngo̱ si hua sa̱ꞌ na̱ꞌni ni̱ꞌyaj duꞌua da̱j hua yanj daj. ⁵Ngaa ni̱ gataj ꞌngo̱ dugüiꞌ ni tsínj huin achij gunūnj:

―Si̱ gacó re̱ꞌ ga̱ mánj. Daj si tsínj huin xiꞌninꞌ gu̱ꞌnaj Judá huin daꞌni̱ siꞌni̱ rey David, ni̱ guiꞌyaj gana sij. Ni̱ gu̱ꞌnaj sij sigueꞌej. Ni̱ xiꞌí daj ga̱ꞌue ga̱ꞌne sij ichij sello nu̱n duꞌua yanj libro, ni̱ na̱guraꞌ sij libro daj.

⁶Ngaa ni̱ guiniꞌīnj niquinꞌ ꞌngo̱ xachij ꞌni̱j da̱ni rian niquinꞌ chrun xila sa̱ꞌ daj nga̱ aninꞌ ga̱nꞌanj xucu hua ni̱ꞌnaꞌ. Ni̱ niquinꞌ xuj da̱ni ni tsínj huin achij. Ni̱ rúnꞌ huin sisi̱ hua dagahuiꞌ ni sij xachij ꞌni̱j daj. Ni̱ hua ichij si-cúj xuj nga̱ ichij rundij rian xuj huin ichij Espíritu Santo ꞌna̱ꞌ rian Yanꞌanj. Ni̱ gaꞌníj Yanꞌanj ichij Espíritu Santo ganꞌanj ni̱nꞌ ga̱chraꞌ chruhua xungüi̱. ⁷Ngaa ni̱ gaꞌna̱ꞌ xachij ꞌni̱j daj. Ni̱ guidaꞌa xuj yanj libro raꞌa sa̱ꞌ si nne rian chrun xila sa̱ꞌ daj. ⁸Ni̱ ngaa guidaꞌa xuj yanj daj, ngaa ni̱ ganiquinꞌ ráj da̱coj aninꞌ ga̱nꞌanj xucu hua ni̱ꞌnaꞌ daj nga̱ ico̱ ga̱nꞌanj ni tsínj huin achij rian xachij ꞌni̱j daj. Ni̱ nicaj daranꞌ ni sij yánꞌanj nu̱n gaꞌi̱ yaꞌa̱. Ni̱ nicaj ni sij cu̱ huin oro. Ni̱ daꞌ gara ni sij siquíj chruhua ni cu̱ daj. Ni̱ siquíj daj huin ni nuguanꞌ achínj jniꞌyaj ni ngüi̱ hua sa̱ꞌ rian Yanꞌanj. ⁹Ni̱ aráj ni sij chraꞌ na̱ca nan rian xachij ꞌni̱j daj:

Hué re̱ꞌ huin tsínj sa̱ꞌ ga̱ꞌue gui̱daꞌa yanj.

Ni̱ ga̱ꞌue na̱ꞌnij re̱ꞌ duꞌua yanj daj rian nu̱n ichij sello.

Daj si hué re̱ꞌ dagahuiꞌ ni sij.

Ni̱ naruꞌué re̱ꞌ si-tun manꞌán re̱ꞌ xiꞌí si-ga̱quinꞌ ni ngüi̱.

¹⁰Ni̱ guiꞌyáj re̱ꞌ sisi̱ gui̱nicaj sun ni sij ga̱huin ni sij rey.

Ni̱ guiꞌyáj re̱ꞌ sisi̱ ga̱huin ni sij chrej rian Yanꞌanj.

Ni̱ gui̱nicaj sun ni sij chruhua xungüi̱ ga̱ꞌnaꞌ.

Hué daj gara ni sij rian xachij ꞌni̱j daj.

¹¹Ngaa ni̱ guiniꞌīnj. Ni̱ gunūnj si-na̱ne nico ni ángel mán ganica̱j xiꞌníj chrun xila sa̱ꞌ daj nga̱ aninꞌ ga̱nꞌanj si hua ni̱ꞌnaꞌ nga̱ ni tsínj huin achij nej. Ni̱ ma̱n millón millón ni ángel. ¹²Ni̱ gaꞌmi nucuaj ni ángel gataj-áꞌ:

Sa̱ꞌ ni̱nꞌ ruhua huin xachij ꞌni̱j dagahuiꞌ ni sij.

Ni̱ duguꞌna̱j huin sisi̱ gui̱nicaj ni̱nꞌ sij sun.

Ni̱ gui̱nicaj sij daranꞌ rasu̱n sa̱ꞌ.

Ni̱ ga̱huin chru̱n ni̱nꞌ ruhua sij.

Ni̱ na̱huin raꞌa sij daranꞌ fuerza.

Ni̱ gui̱nun yanꞌanj ni ngüi̱ sij.

Ni̱ ga̱ꞌmi sa̱ꞌ ni sij xiꞌí sij.

Ni̱ ga̱ꞌmi ꞌueé ni sij xiꞌí sij nej.

Hué daj garáj sa̱ꞌ ni ángel daj xiꞌí xachij ꞌni̱j daj.

¹³Ngaa ni̱ gunūnj si gaꞌmi daranꞌ si guiꞌyaj Yanꞌanj huin si ma̱n ne̱ꞌ xataꞌ nga̱ si ma̱n rian yoꞌój nej, si ma̱n ne̱ꞌ riqui yoꞌój, si ma̱n chruhua nnee yanꞌanj nej. Ni̱ gataj daranꞌanj:

Ni̱ganj ga̱ꞌmi sa̱ꞌ daranꞌ néꞌ rian si nne rian chrun xila sa̱ꞌ nga̱ rian xachij ꞌni̱j.

Ni̱ ni̱ganj gui̱nun yanꞌanj néꞌ rian nu̱ngüej sij.

Ni̱ ni̱ganj ga̱ ꞌueé rian nu̱ngüej sij, gui̱ꞌyaj néꞌ.

Ni̱ hué daj ga̱ fuerza rian nu̱ngüej sij ni̱ganj, gui̱ꞌyaj néꞌ nej.

Daj gataj daranꞌ ni sij.

¹⁴Ngaa ni̱:

―Amén. ―Gataj aninꞌ ga̱nꞌanj xucu hua ni̱ꞌnaꞌ.

Ngaa ni̱ ganiquinꞌ ráj da̱coj ico̱ ga̱nꞌanj ni tsínj huin achij rian Yanꞌanj. Ni̱ Yanꞌanj huin si ga̱ne ni̱ganj.

Los sellos

¹Ngaa ni̱ guiniꞌīnj ngaa gaꞌnej xachij ꞌni̱j ꞌngo̱ sello nu̱n duꞌua yanj libro daj. Ni̱ gunūnj gaꞌmi ꞌngo̱ dugüiꞌ ga̱nꞌanj xucu hua ni̱ꞌnaꞌ daj. Ni̱ da̱j rúnꞌ ngaa aguáj duꞌui, ni̱ hué daj gaꞌmi nucuaj-áꞌ. Ni̱:

―Ga̱huaꞌ re̱ꞌ ni̱ꞌyaj re̱ꞌ aj. ―Gataj ꞌngo̱ si hua ni̱ꞌnaꞌ daj.

²Ngaa ni̱ guiniꞌīnj ꞌngo̱ guayo ga̱tsi. Ni̱ tsínj ta̱j guayo daj, ni̱ nicaj sij ꞌngo̱ raꞌuej raꞌa sij. Ni̱ gaꞌuiꞌ ni sij ꞌngo̱ corona gunu̱n chra̱ sij. Ngaa ni̱ gahui sij ga̱nꞌanj gui̱ꞌyaj gana sij. Daj si huin sij tsínj ꞌyaj gana.

³Ni̱ ngaa gaꞌnej xachij ꞌni̱j daj ango sello guisíj hui̱, ngaa ni̱ gunūnj gaꞌmi ango xucu hua ni̱ꞌnaꞌ. Ni̱ gataj-áꞌ:

―Ga̱huaꞌ re̱ꞌ ni̱ꞌyaj re̱ꞌ aj. ―Daj gataj-áꞌ.

⁴Ni̱ gahui ango guayo. Ni̱ guayo daj huin guayo mare. Ni̱ hua permiso rian tsínj ta̱j guayo mare daj sisi̱ gui̱sij ga̱ne dinꞌinj ni ngüi̱, gui̱ꞌyaj síꞌ. Ni̱ hué sij guiꞌyaj sisi̱ da̱gahuiꞌ go̱ꞌngo ni sij ni tsínj huin dugüiꞌ ni sij. Ni̱ gaꞌuiꞌ ni sij ꞌngo̱ espada xxi raꞌa síꞌ. ⁵Ni̱ ngaa gaꞌníj xachij ꞌni̱j daj ango sello guisíj hua̱ꞌni, ni̱ gunūnj gaꞌmi xucu hua ni̱ꞌnaꞌ huin xucu hua̱ꞌnij. Ni̱ gataj-áꞌ:

―Ga̱huaꞌ re̱ꞌ ni̱ꞌyaj re̱ꞌ aj: ―Daj gataj-áꞌ.

Ngaa ni̱ guiniꞌīnj ꞌngo̱ guayo maru̱. Ni̱ tsínj ta̱j guayo maru̱ daj, ni̱ nicaj sij ꞌngo̱ aruꞌ daꞌngaꞌ raꞌa sij. ⁶Ni̱ da̱ni aninꞌ ga̱nꞌanj xucu hua ni̱ꞌnaꞌ daj gunūnj ꞌngo̱ nane̱. Ni̱ gataj-áꞌ:

―Da̱j rúnꞌ ꞌyaj gana á re̱ꞌ ꞌngo̱ güi, ni̱ hué daj duꞌue ꞌngo̱ kilo strigo. Ni̱ hué daj duꞌue hua̱ꞌnij kilo cebada. Sani̱ si̱ guiꞌyaj ni é re̱ꞌ si gue̱reꞌ gasiti nga̱ nnee vino mánj. ―Daj gataj nane̱ daj.

⁷Ni̱ ngaa gaꞌnej xachij ꞌni̱j daj ango sello guisíj ga̱nꞌanj, ni̱ hué daj gunūnj gaꞌmi ango xucu huin xucu ga̱nꞌanj. Ni̱ gataj xuj gunūnj:

―Ga̱huaꞌ re̱ꞌ ni̱ꞌyaj re̱ꞌ. ―Daj gataj-áꞌ.

⁸Ngaa ni̱ guiniꞌīnj ꞌngo̱ guayo mayaj. Ni̱ tsínj ta̱j guayo mayaj daj huin tsínj ꞌyaj si ahuiꞌ ni ngüi̱. Hué daj gu̱ꞌnaj sij. Ni̱ nicoꞌ ꞌngo̱ tsínj ru̱cu sij. Ni̱ hué síꞌ nicaj ni ngüi̱ ga̱nꞌanj rian ma̱n ni níman. Ni̱ gaꞌuiꞌ Yanꞌanj sun rian nu̱ngüej tsínj daj sisi̱ gui̱nicaj sun nu̱ngüej sij rian ga̱nꞌanj si ane̱j yoꞌój xungüi̱ nan. Ni̱ ga̱ꞌue da̱gahuiꞌ nu̱ngüej sij ni ngüi̱. Ni̱ ga̱huiꞌ ni ngüi̱, gui̱ꞌyaj xiꞌna̱ nga̱ xiꞌi̱, gui̱ꞌyaj nu̱ngüej sij. Ni̱ ga̱ꞌue gui̱ꞌyaj nu̱ngüej sij sisi̱ ga̱huiꞌ ni ngüi̱, gui̱ꞌyaj xucu huee ma̱n riqui quij nej.

⁹Ni̱ ngaa gaꞌnej xachij ꞌni̱j daj ango sello guisíj u̱nꞌunj, ni̱ guiniꞌīnj ngaj ni níman riqui nna huin altar. Ni̱ hué ni sij huin ni tsínj gahuiꞌ xiꞌí si gaꞌmi sa̱ꞌ ni sij si-nu̱guanꞌ Yanꞌanj rian ni ngüi̱. ¹⁰Ni̱ gaꞌmi nucuaj ni sij gataj ni sij:

―Sa̱ꞌ ni̱nꞌ ruhua huín re̱ꞌ Señor. Ni̱ xa̱ngaꞌ yya huín re̱ꞌ. Ni̱ a̱man na̱guiꞌyaj yyá re̱ꞌ xiꞌí ni tsínj ma̱n chruhua xungüi̱ únj. Ni̱ a̱man gui̱ꞌyáj re̱ꞌ castigo ni sij xiꞌí gaquinꞌ daꞌui ni sij si dagahuiꞌ ni sij ni únj únj. ―Hué daj gataj ni ngüi̱ gahuiꞌ daj.

¹¹Ngaa ni̱ gaꞌuiꞌ ni síꞌ atsij ga̱tsi gu̱nun ni sij. Ni̱ gataj Yanꞌanj gunun ni tsínj daj sisi̱ na̱ran ruhua ni sij do̱j da gui̱sij ga̱huin yya número ni dugüiꞌ ni sij huin ni tsínj ꞌyaj sun nga̱ ni sij. Daj si hua nia̱n si ga̱huiꞌ ni síꞌ da̱j rúnꞌ gahuiꞌ ni sij.

¹²Ngaa ni̱ guiniꞌīnj sisi̱ gaꞌnej xachij ꞌni̱j daj ango sello guisíj hua̱tanj duꞌua yanj daj. Ngaa ni̱ gaꞌna̱ꞌ nucuaj ꞌngo̱ yún. Ni̱ gahuin ru̱miꞌ rian güi da̱j rúnꞌ hua ꞌngo̱ atsij mare̱. Ni̱ gahuin mare rian yahui̱ da̱j rúnꞌ hua tun. ¹³Ni̱ guinij ni yatiꞌ mán xataꞌ rian yoꞌój. Da̱j rúnꞌ ayu higo chra̱ chrun higuera ngaa ahui nucuaj nane̱, ni̱ hué daj guinij ni yatiꞌ rian yoꞌój. ¹⁴Ni̱ jnarumi xataꞌ manꞌan da̱j rúnꞌ ꞌyaj néꞌ ngaa jnarumi néꞌ ꞌngo̱ yanj xe̱ꞌe. Ni̱ naduna daranꞌ quij ango yuꞌuj guisiquiꞌ-íꞌ nga̱ ni yoꞌój ngaj chruhua nnee yanꞌanj nej. ¹⁵Ni̱ guixiꞌij hui̱ ni rey ma̱n chruhua xungüi̱ chruhua huej nga̱ scanij ni huej nej. Ni̱ hué daj guiꞌyaj ni tsínj huin rian nga̱ ni xuruꞌue nej, ni tsínj capitán nej, ni tsínj nicaj sun nej, daranꞌ ni tsínj ꞌyaj sun rian xuruꞌue nga̱ daranꞌ ni tsínj nitaj si ꞌyaj sun rian xuruꞌue nej. ¹⁶Ni̱ gataj ni sij rian ni quij nga̱ rian ni huej:

―Ga̱yu a ni é re̱ꞌ xiráj ni únj. Ni̱ ga̱ri hui̱ a ni é re̱ꞌ ni únj rian si nne rian chrun xila sa̱ꞌ daj nga̱ rian xachij ꞌni̱j. Daj si aꞌman ruhua xachij ꞌni̱j daj niꞌya ni únj. ¹⁷Ni̱ hua guisíj güi ga̱huin nico castigo ni únj, gui̱ꞌyaj nu̱ngüej sij. Ni̱ u̱n tsínj ga̱ꞌue gu̱nucuaj gui̱niquinꞌ rian nu̱ngüej sij únj. ―Hué daj gataj ni sij gunun ni quij nga̱ ni huej.

Los 144,000 sellados

¹Ngaa guisíj ni̱ guiniꞌīnj niquinꞌ ga̱nꞌanj ángel go̱ꞌngo sicúj xungüi̱ nan. Ni̱ ránj ni ángel rian ga̱nꞌanj nane̱ sisi̱ si̱ gahui ni nane̱ daj rian yoꞌój nga̱ rian nnee yanꞌanj nga̱ rian ni̱ a̱ ꞌngo̱ ni chrun nej. ²Ni̱ hué daj guiniꞌīnj ango ángel ꞌna̱ꞌ rian síj güi. Ni̱ nicaj ángel daj si-sello Yanꞌanj hua ni̱ꞌnaꞌ. Ni̱ gaguáj nucuaj ángel daj rian ango ga̱nꞌanj ángel daj. Ni̱ nicaj ni ga̱nꞌanj ángel daj sun, guiꞌyaj Yanꞌanj sisi̱ chranꞌ yunꞌunj ni ángel daj rian yoꞌój nga̱ rian nnee yanꞌanj nej. ³Ni̱ gataj ángel ꞌna̱ꞌ daj gunun ango ga̱nꞌanj ángel niquinꞌ daj:

―Si̱ chranꞌ yunꞌunj aninꞌ é re̱ꞌ yoꞌój nga̱ rian nnee yanꞌanj nej, rian ni chrun nej mánj. Ga̱ꞌninꞌ ruhua á re̱ꞌ da ga̱ri únj sello yo ni tsínj ꞌyaj sun rian Danꞌanj néꞌ. ―Daj gataj ángel daj.

⁴Ngaa ni̱ gunūnj número ni tsínj guixíj sello, guiꞌyaj aninꞌ ángel daj. Ni̱ ꞌngo̱ ciento táj hui̱j xia ga̱nꞌanj mí ni sij guixíj sello. Ni̱ hué ni sij huin ni tsínj ꞌna̱ꞌ ni xiꞌninꞌ ni ngüi̱ israelita.

⁵Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Judá. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Rubén. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Gad. ⁶Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Aser. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Neftalí. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Manasés. ⁷Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Simeón. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Leví. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Isacar. ⁸Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Zabulón. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj José. Ni̱ xu̱huij mí ni sij huin daꞌni̱ siꞌni̱ tsínj gu̱ꞌnaj Benjamín.

La multitud vestida de ropas blancas

⁹Ngaa guisíj ni̱ guiniꞌīnj ꞌngo̱ xiꞌninꞌ xxi ni ngüi̱ huin ni ngüi̱ ꞌna̱ꞌ daranꞌ rian xungüi̱ nga̱ daranꞌ rian xiꞌninꞌ nej, daranꞌ ni ngüi̱ aꞌmi gaꞌi̱ snánj aꞌmi ni sij nej, daranꞌ rian ni xumanꞌ nej. Ni̱ nico ni̱nꞌ ruhua ni sij huin. Ni̱ a̱ ꞌngo̱ ni tsínj si̱ gunucuaj ga̱ya u̱ndaj ni sij huin. Ni̱ ma̱n ni sij rian niquinꞌ chrun xila sa̱ꞌ nga̱ rian xachij ꞌni̱j. Ni̱ nu̱n ni sij atsij ga̱tsi. Ni̱ nicaj ni sij yun raꞌa ni sij. ¹⁰Ni̱ gaguáj nucuaj ni sij. Ni̱ gataj ni sij:

Yanꞌanj nne rian chrun xila sa̱ꞌ huin Danꞌanj néꞌ.

Ni̱ Yanꞌanj nga̱ xachij ꞌni̱j huin si ganacaj néꞌ.

Hué daj gataj ni sij.

¹¹Ni̱ daranꞌ ni ángel niquinꞌ ganica̱j xiꞌníj chrun xila sa̱ꞌ nga̱ ni tsínj huin achij nga̱ aninꞌ ga̱nꞌanj xucu hua ni̱ꞌnaꞌ nej. Ni̱ guiniquinꞌ ráj da̱coj ni ángel daj rian chrun xila sa̱ꞌ daj. Ni̱ daꞌ huin si ganun yo ni ángel daj rian yoꞌój. Ni̱ gaꞌmi sa̱ꞌ ni ángel daj rian Yanꞌanj. ¹²Ni̱ gataj ni ángel daj:

Amén.

Ga̱ꞌmi sa̱ꞌ néꞌ rian Danꞌanj néꞌ.

Ni̱ ga̱ ꞌueé rian Danꞌanj néꞌ.

Ni̱ ni̱ganj gui̱niꞌi Danꞌanj néꞌ daranꞌanj.

Ni̱ ni̱ganj ga̱taj néꞌ si guruhua Danꞌanj néꞌ.

Ni̱ ni̱ganj gui̱nun yanꞌanj néꞌ rian Danꞌanj néꞌ.

Ni̱ duguꞌna̱j huin sisi̱ gui̱nicaj Danꞌanj néꞌ sun.

Ni̱ duguꞌna̱j huin sisi̱ ni̱ganj gui̱nicaj Danꞌanj néꞌ fuerza.

Amén.

Daj gataj ni ángel daj.

¹³Ngaa ni̱ nachínj snanꞌanj ꞌngo̱ tsínj huin achij riānj. Ni̱ gataj sij:

―Ni̱ u̱n sin huin ni ngüi̱ nu̱n atsij ga̱tsi nan, ni̱, ni̱ a̱ ꞌna̱ꞌ ni sij, ruhua á re̱ꞌ únj. ―Hué daj gataj ꞌngo̱ tsínj huin achij daj gunūnj.

¹⁴Ngaa ni̱ gatā gunun sij:

―Señor, niꞌi manꞌán re̱ꞌ, ruhuāj. ―Gatā gunun sij.

Ngaa ni̱ gataj sij gunūnj:

―Hué ni ngüi̱ nan huin ni ngüi̱ guiranꞌ nico sayun ngaa gahuin sayun nico chruhua xungüi̱. Ni̱ da̱j rúnꞌ nánj néꞌ si-ganꞌ néꞌ sisi̱ na̱huin ga̱tsij, ni̱ hué daj gahuin niman ni sij guiꞌyaj si-tun manꞌan xachij ꞌni̱j. ¹⁵Xiꞌí daj ni̱ niquinꞌ ni ngüi̱ daj rian si-chrun xila Yanꞌanj. Ni̱ nun güi ni̱ganꞌ niquinꞌ ni sij chruhua si-nuhui Yanꞌanj ꞌyaj sun ni sij rian Yanꞌanj. Ni̱ ga̱ne Yanꞌanj nga̱ ni sij sisi̱ du̱gumij ni sij. ¹⁶Ni̱ si̱ gachin xiꞌna̱ riqui ni sij ga̱ mánj. Ni̱ si̱ nagoꞌoj ni sij nnee ga̱ mánj. Ni̱ si̱ gurunun nnán rian ni sij, gui̱ꞌyaj güi. Ni̱ si̱ chranꞌ yunꞌunj gachiꞌ ni sij ga̱ mánj. ¹⁷Daj si du̱gumi xachij ꞌni̱j nne da̱ni rian chrun xila sa̱ꞌ ni sij. Ni̱ na̱caj síꞌ ni sij ga̱nꞌanj di̱gyán síꞌ rian ahui nnee sa̱ꞌ huin nnee ꞌyaj si ga̱ne ni̱ganj ni sij. Ni̱ na̱ruꞌui Yanꞌanj rian daranꞌ ni ngüi̱ aco. ―Daj gataj tsínj huin achij daj gunūnj.

El séptimo sello

¹Ni̱ ngaa gaꞌnej xachij ꞌni̱j daj ango sello guisíj ichij duꞌua yanj daj, ni̱ gahuin dinꞌinj xataꞌ chra̱ ane̱j hora. ²Ngaa ni̱ guiniꞌīnj ichij ángel huin ni ángel niquinꞌ rian Yanꞌanj. Ni̱ gaꞌuiꞌ ni si mán xataꞌ ichij trompeta rian ni ángel daj. ³Hué dan ni̱ gaꞌna̱ꞌ ango ángel. Ni̱ guiniquinꞌ ángel daj rian altar. Ni̱ nicaj ángel daj cu̱ nu̱n siquíj huin oro. Ni̱ gaꞌuiꞌ ni si mán xataꞌ nico siquíj rian ángel daj sisi̱ jna̱chej ángel daj siquíj nga̱ nuguanꞌ achínj jniꞌyaj ni ngüi̱ rian Yanꞌanj huin ni ngüi̱ xuman ruhua niꞌyaj Yanꞌanj. Ngaa ni̱ ga̱ꞌuiꞌ ángel siquíj daj rian altar huin oro. Ni̱ niquinꞌ altar huin oro daj rian chrun xila sa̱ꞌ nne Yanꞌanj. ⁴Ni̱ gahui gatseꞌ, guiꞌyaj siquíj nicaj raꞌa ángel daj rian Yanꞌanj ngaa gachínj jniꞌyaj ni ngüi̱ hua sa̱ꞌ niman rian Yanꞌanj. ⁵Ngaa ni̱ guidaꞌa ángel daj cu̱. Ni̱ gara ángel daj yanꞌa̱n chruhua cu̱ aca rian altar. Ni̱ guereꞌej ángel daj cu̱ nu̱n yanꞌa̱n rian xungüi̱. Ngaa ni̱ gaguáj duꞌui. Ni̱ gahuin gari̱n. Ni̱ guira̱n nej. Ni̱ gaꞌna̱ꞌ yún nej.

Las trompetas

⁶Hué dan ni̱ guiꞌyaj xugüi ichij ni ángel nicaj ichij trompeta daj sisi̱ ga̱ꞌyanj ni ángel ni trompeta daj.

⁷Ngaa ni̱ gaꞌyanj ꞌngo̱ ángel daj trompeta. Ni̱ gamanꞌ guma̱n yatan nga̱ yanꞌa̱n nachej tun. Ni̱ gamanꞌ daj rian xungüi̱. Ni̱ do̱j ni̱ guisíj daꞌaj ni chrun gaca. Ni̱ gaca daranꞌ ni coj mare̱ nej.

⁸Ngaa ni̱ gaꞌyanj ango ángel trompeta guisíj hui̱j ángel daj. Ni̱ guinij ꞌngo̱ yanꞌa̱n xxi chruhua nnee yanꞌanj. Ni̱ da̱j rúnꞌ quij xa̱can hua yanꞌa̱n xxi daj. Ni̱ do̱j ni̱ guisíj daꞌaj nnee yanꞌanj gahuin tun. ⁹Ni̱ do̱j ni̱ guisíj daꞌaj xucu mán chruhua nnee yanꞌanj gahuiꞌ. Ni̱ do̱j ni̱ guisíj daꞌaj rio̱ achéj rian nnee guereꞌ nej.

¹⁰Ngaa ni̱ gaꞌyanj ango ángel trompeta huin ángel guisíj hua̱ꞌnij. Ni̱ guinij ꞌngo̱ yatiꞌ xxi niquinꞌ xataꞌ. Ni̱ da̱j rúnꞌ aca caꞌ chrun, ni̱ hué daj aca yatiꞌ daj. Ni̱ guinij yatiꞌ daj rian daꞌaj ni xinéj nnee nga̱ rian daꞌaj yuꞌuj ahui nnee. ¹¹Ni̱ yatiꞌ guinij daj gu̱ꞌnaj yatiꞌ yai̱ꞌ. Ni̱ do̱j ni̱ guisíj daꞌaj nnee daj gahuin yai̱ꞌ, guiꞌyaj yatiꞌ daj. Ni̱ xiꞌí nnee yai̱ꞌ daj, ni̱ gahuiꞌ nico ni̱nꞌ ruhua ni ngüi̱.

¹²Ngaa ni̱ gaꞌyanj ango ángel trompeta huin ángel guisíj ga̱nꞌanj. Ni̱ do̱j ni̱ guisíj daꞌaj rian güi guereꞌ. Ni̱ hué daj gahuin nga̱ yahui̱. Ni̱ do̱j ni̱ guisíj daꞌaj ni yatiꞌ guere̱ꞌ nej. Ngaa ni̱ do̱j ni̱ guisíj daꞌaj güi nga̱ yahui̱ gahuin ru̱miꞌ rian. Ni̱ do̱j ni̱ guisíj ni yatiꞌ gahuin ru̱miꞌ rian nej. Ni̱ do̱j ni̱ guisíj daꞌaj ne̱ꞌ guníꞌyanj gahuin ru̱miꞌ. Ni̱ do̱j ni̱ guisíj daꞌaj ne̱ꞌ ni̱ gahuin ru̱miꞌ.

¹³Ngaa ni̱ guiniꞌīnj ꞌngo̱ ángel huaj daꞌaj xataꞌ. Ni̱ gaꞌmi nucuaj ángel daj. Ni̱ gataj-áꞌ:

―Niqui niman ni̱nꞌ ruhua ni ngüi̱ ma̱n chruhua xungüi̱ nan xiꞌí sayun gui̱ranꞌ ni sij ngaa gui̱xingaꞌ ga̱ꞌyanj yaꞌnij ni ángel trompeta. ―Daj gataj ángel daj.

¹Ngaa ni̱ gaꞌyanj ango ángel trompeta huin ángel guisíj u̱nꞌunꞌ. Ni̱ guiniꞌīnj guinij ꞌngo̱ yatiꞌ xataꞌ rian yoꞌój. Ni̱ gaꞌuiꞌ ꞌngo̱ si mán xataꞌ llave rian yatiꞌ daj. Ni̱ llave daj naꞌni duꞌua yuꞌuj gunu̱n ni̱nꞌ ruhua daj. ²Ngaa ni̱ naꞌnij yatiꞌ duꞌua yuꞌuj daj. Ni̱ gahui gatseꞌ duꞌua yuꞌuj daj. Ni̱ da̱j rúnꞌ gatseꞌ ahui duꞌua ꞌngo̱ chrúnj xxi, hué daj hua gatseꞌ daj. Ngaa ni̱ gahuin ru̱miꞌ rian güi nga̱ rian nane̱, guiꞌyaj gatseꞌ ahui duꞌua yuꞌuj daj. ³Ni̱ scanij gatseꞌ daj guixiraꞌ xiriquíj. Ni̱ ganꞌanj ni xuj rian ni xungüi̱. Ni̱ gaꞌuiꞌ Yanꞌanj sisi̱ ga̱huin nucuaj ni xuj gui̱ꞌyaj ni xuj da̱j rúnꞌ ꞌyaj ni xiqui̱n. ⁴Ni̱ gaꞌninꞌ Yanꞌanj sun sisi̱ si̱ chranꞌ yunꞌunj ni xuj chrinꞌ ma̱n rian yoꞌój nga̱ ni̱ a̱ ꞌngo̱ ni coj mare̱ nej, ni̱ a̱ ꞌngo̱ ni chrun nej. Sani̱ ni ngüi̱ nitaj si nu̱n si-sello Yanꞌanj yo ni sij, ni̱ hua permiso rian xuj ga̱ꞌuiꞌ xuj tánj ni sij. ⁵Sani̱ nitaj permiso hua sisi̱ da̱gahuiꞌ ni xuj ni ngüi̱ daj. Maan si u̱nꞌunꞌ yahui̱ ga̱ꞌuiꞌ ni xuj tánj ni ngüi̱ daj. Ni̱ da̱j rúnꞌ aꞌngaj ngaa aꞌuiꞌ xiqui̱n tánj néꞌ, ni̱ hué daj gaꞌngaj ngaa gaꞌuiꞌ ni xuj tánj ni ngüi̱. ⁶Ni̱ güi daj ni̱ na̱noꞌ ni ngüi̱ da̱j ga̱ꞌue ga̱huiꞌ ni sij. Sani̱ si̱ gaꞌue na̱riꞌ ni sij da̱j ga̱ꞌue ga̱huiꞌ ni sij mánj. Ga̱huin ruhua ni sij ga̱huiꞌ ni sij. Sani̱ nitaj da̱j gui̱ꞌyaj ni sij sisi̱ ga̱huiꞌ ni sij mánj.

⁷Ni̱ da̱j rúnꞌ hua guayo ngaa hua chru̱n xuj ga̱nꞌanj xuj nga̱ ni snado rian huin sayun, ni̱ hué daj hua ni xiriquíj daj. Ni̱ rúnꞌ hua ꞌngo̱ corona huin oro hué daj hua si gunu̱n chra̱ xuj. Ni̱ rúnꞌ hua rian ni ngüi̱, ni̱ hué daj hua rian xuj nej. ⁸Ni̱ rúnꞌ hua hueé chra̱ yunꞌunj xa̱na, ni̱ hué daj hua hueé xuj. Ni̱ rúnꞌ hua yanꞌ sigueꞌej, ni̱ hué daj hua yanꞌ xuj nej. ⁹Ni̱ rúnꞌ hua gató gagaꞌ hua si nu̱n xuj. Ni̱ da̱j rúnꞌ aca̱ chanj ꞌyaj nico ni carreta anucua ni guayo ngaa ga̱nꞌanj xuj rian huin sayun, ni̱ hué daj ꞌyaj si-gachi xuj. ¹⁰Ni̱ da̱j rúnꞌ hua duneꞌ xiquin hua duneꞌ xuj. Ni̱ hua si-tanj xuj. Ni̱ hua fuerza duneꞌ xuj sisi̱ chranꞌ yunꞌunj xuj ni ngüi̱ chra̱ u̱nꞌunꞌ yahui̱. ¹¹Ni̱ hua ꞌngo̱ ángel nicaj sun rian ni xuj. Ni̱ ángel daj huin si niquinꞌ rian yuꞌuj gunu̱n ni̱nꞌ ruhua daj. Ni̱ si-xugüi ángel daj gu̱ꞌnaj Abadón huin snánj hebreo. Ni̱ si-xugüi ángel daj gu̱ꞌnaj Apolión huin snánj griego. ¹²Ni̱ hua gachin ꞌngo̱ sayun guiranꞌ ni ngüi̱. Sani̱ achin yahuij sayun ga̱ꞌnaꞌ gui̱ranꞌ ni sij.

¹³Ngaa ni̱ gaꞌyanj ango ángel trompeta huin ángel guisíj hua̱tanꞌ. Ni̱ gunūnj ꞌngo̱ nane̱ gaꞌmi scanij ga̱nꞌanj cúj ta̱j rian altar huin oro. Ni̱ niquinꞌ altar daj rian Yanꞌanj. ¹⁴Ni̱ gataj nane̱ daj gunun ángel aꞌyanj trompeta huin ángel guisíj hua̱tanꞌ:

―Na̱chi re̱ꞌ aninꞌ ga̱nꞌanj ángel anumi duꞌua quin nnee xxi gu̱ꞌnaj Eufrates. ―Daj gataj nane̱ daj gunun ángel.

¹⁵Ngaa ni̱ ganachi aninꞌ ga̱nꞌanj ángel anumi daj. Ni̱ do̱j ni̱ guisíj daꞌaj ni ngüi̱ da̱gahuiꞌ ni ga̱nꞌanj ángel daj. Ni̱ hua guiꞌyaj xugüi Yanꞌanj ni ángel daj sisi̱ hué hora daj, güi daj nej, yahui̱ daj nej, yoꞌ daj nej, ni̱ da̱gahuiꞌ ni ángel daj ni ngüi̱. ¹⁶Ni̱ guisíj hui̱j ciento millón ni tsínj ta̱j guayo huin ni snado nicoꞌ ga̱nꞌanj ángel daj, ataj ni sij gunūnj. ¹⁷Ngaa ni̱ guiꞌyaj Yanꞌanj sisi̱ guiniꞌīnj da̱j hua ni tsínj ta̱j guayo daj. Ni̱ guiniꞌīnj da̱j hua ni guayo nej. Ni̱ da̱j rúnꞌ hua yanꞌa̱n hua gagaꞌ hua ránj xiꞌyanj ni tsínj ta̱j guayo guiniꞌīnj. Ni̱ hua jnitaj gagaꞌ daj da̱j rúnꞌ hua yej gu̱ꞌnaj zafiro. Ni̱ hua mayaj gagaꞌ daj da̱j rúnꞌ hua yoꞌój sufre. Ni̱ rúnꞌ hua chra̱ sigueꞌej, ni̱ hué daj hua chra̱ ni guayo daj. Ni̱ ahui yanꞌa̱n nga̱ gatseꞌ nej, yoꞌój sufre nej, duꞌua ni xuj. ¹⁸Ni̱ do̱j ni̱ guisíj daꞌaj ni ngüi̱ gahuiꞌ, guiꞌyaj yanꞌa̱n nga̱ gatseꞌ nej, yoꞌój sufre nej, ahui duꞌua ni xuj. ¹⁹Daj si hua fuerza duꞌua xuj nga̱ duneꞌ xuj. Ni̱ da̱j rúnꞌ hua xucuáj hua duneꞌ xuj. Ni̱ da̱j rúnꞌ hua chra̱ xucuáj, ni̱ hué daj hua chra̱ duneꞌ xuj nej. Ni̱ hué daj aꞌuiꞌ duneꞌ ni xuj ni ngüi̱.

²⁰Ni̱ ango ni ngüi̱ nun ga̱huiꞌ guiꞌyaj sayun daj, sani̱ nun ga̱nani ruhua ni sij xiꞌí gaquinꞌ guiꞌyaj ni sij. Ni̱ nun duna ni sij si guinicoꞌ ni sij ni nane̱ xi̱ꞌi nga̱ yanꞌanj huin oro nga̱ plata nej, gagaꞌ bronce nej, yej nej, chrun nej, huin ni yanꞌanj guiꞌyaj raꞌa ni sij. Ni̱ naꞌue gui̱niꞌyaj ni yanꞌanj guiꞌyaj raꞌa ni sij daj. Ni̱ naꞌue gu̱nun ni yanꞌanj daj. Ni̱ naꞌue ga̱che ni yanꞌanj da mánj. ²¹Ni̱ nun ganani ruhua ni sij si dagahuiꞌ ni sij níman. Ni̱ nun gaꞌninꞌ ruhua ni sij si guiꞌyaj stuꞌuaj ni sij. Ni̱ hua gue̱ guiꞌyaj squi̱raꞌ ni sij. Ni̱ hué daj guiꞌyaj tu̱ gue̱ ni sij.

El ángel con el librito

¹Ngaa ni̱ guiniꞌīnj gaꞌna̱ꞌ ango ángel nucuaj xataꞌ. Ni̱ nique ángel daj ꞌngo̱ nga. Ni̱ niquinꞌ xucuáj guꞌluj chra̱ ángel daj. Ni̱ da̱j rúnꞌ xigui̱n güi, ni̱ daꞌngaꞌ daj xigui̱n rian ángel daj. Ni̱ da̱j rúnꞌ hua yanꞌa̱n, ni̱ hué daj hua nu̱ngüej dacój ángel daj. ²Ni̱ hua naguraꞌ rian libro leꞌej nicaj ángel daj. Ni̱ ne̱ꞌ chrej sa̱ꞌ dacój ángel daj gutaꞌ sij chruhua nnee yanꞌanj. Ni̱ gutaꞌ sij dacój sij ne̱ꞌ chrej ro̱tsi sij rian yoꞌój. ³Ngaa ni̱ gaguáj nucuaj ángel daj da̱j rúnꞌ aguáj ꞌngo̱ sigueꞌej. Ni̱ ngaa gaguáj ángel daj, ni̱ ichij yya gaguáj duꞌui gunūnj. ⁴Ni̱ ngaa guisíj ichij gaguáj duꞌui, ni̱ gahuin ruhuāj ga̱rūnj nuguanꞌ gaguáj duꞌui rian yanj. Sani̱ gunūnj gaꞌmi ꞌngo̱ nane̱ ꞌna̱ꞌ xataꞌ. Ni̱ gataj nane̱ daj gunūnj:

―Na̱ra sa̱ꞌ re̱ꞌ ni nuguanꞌ gunún re̱ꞌ huin nuguanꞌ gaguáj duꞌui daj. Ni̱ si̱ garun re̱ꞌ ni nuguanꞌ daj rian yanj mánj. ―Daj gataj nane̱ daj.

⁵Ngaa ni̱ nachi nicaj ángel niquinꞌ chruhua nnee yanꞌanj nga̱ rian yoꞌój raꞌa xataꞌ. ⁶Ni̱ gataj ni̱ca ángel nga̱ si-xugüi Yanꞌanj nne ni̱ganj huin si guiꞌyaj xataꞌ nga̱ yoꞌój nej, nnee yanꞌanj nej, daranꞌ ni rasu̱n mán xataꞌ nej, daranꞌ si ma̱n rian yoꞌój nej, daranꞌ si ma̱n chruhua nnee yanꞌanj nej:

―Xa̱ngaꞌ hua gahuin ni̱chrunꞌ güi ga̱nahuij xungüi̱ nan. ⁷Sani̱ ngaa gui̱sij güi ga̱ꞌyanj ango ángel trompeta huin ángel guisíj ichij, ngaa ni̱ gui̱sij ga̱huin yya nuguanꞌ gani hui̱ ruhua Yanꞌanj gui̱ꞌya da̱j rúnꞌ hua nataꞌ Yanꞌanj rian ni tsínj nataꞌ si-nu̱guanꞌ Yanꞌanj huin ni tsínj guiꞌyaj sun rian Yanꞌanj. ―Daj gataj ángel daj.

⁸Ngaa ni̱ gunūnj nane̱ gaꞌmi ru̱huaꞌ yún ngāj huin nane̱ ꞌna̱ꞌ xataꞌ. Ni̱ gataj nane̱ daj:

―Güi̱j ni̱ gui̱daꞌá re̱ꞌ libro leꞌej hua naguraꞌ rian ángel niquinꞌ chruhua nnee yanꞌanj nga̱ rian yoꞌój. ―Daj gataj nane̱ daj.

⁹Ngaa ni̱ ganꞌān rian ángel niquinꞌ daj. Ni̱ gachīn sisi̱ ri̱qui ángel daj libro leꞌej daj riānj. Ngaa ni̱ gataj ángel gunūnj:

―Gui̱daꞌá re̱ꞌ ni xa̱ re̱ꞌ. Ni̱ ga̱huin tsiꞌ duꞌuá re̱ꞌ rúnꞌ tsiꞌ gatsiꞌ, gui̱ꞌyaj libro nan. Sani̱ ga̱huin yai̱ꞌ riquí re̱ꞌ, gui̱ꞌyaj-áꞌ. ―Daj gataj ángel.

¹⁰Ngaa ni̱ guidaꞌā libro leꞌej daj raꞌa ángel ni xāj. Ni̱ gahuin tsiꞌ duꞌuāj da̱j rúnꞌ tsiꞌ gatsiꞌ. Sani̱ ngaa guisíj xāj, ni̱ gahuin yai̱ꞌ riquīj, guiꞌyaj libro daj. ¹¹Ngaa ni̱ gataj nane̱ daj gunūnj:

―Hua nia̱n si ga̱ꞌmi ru̱huaꞌ yún re̱ꞌ xiꞌí da̱j gui̱ranꞌ gaꞌi̱ ni̱nꞌ ruhua ni ngüi̱. Ni̱ ma̱n gaꞌi̱ xumanꞌ ni sij. Ni̱ ma̱n gaꞌi̱ snánj aꞌmi ni sij nej. Ni̱ ma̱n gaꞌi̱ rey nicaj sun rian ni sij nej. ―Daj gataj nane̱ daj.

Los dos testigos

¹Ngaa ni̱ riqui ni si mán xataꞌ ꞌngo̱ ria̱nj riānj. Ni̱ rúnꞌ hua ꞌngo̱ rutsi̱ riun néꞌ, ni̱ hué daj hua ria̱nj daj. Ni̱ gataj Yanꞌanj gunūnj:

―Na̱xuman re̱ꞌ ga̱nꞌanj gui̱riun re̱ꞌ si-nuhui Yanꞌanj nga̱ altar nej. Ni̱ ga̱ya re̱ꞌ u̱ndaj ni ngüi̱ aꞌmi sa̱ꞌ rian Yanꞌanj ma̱n chruhua nuhui daj. ²Sani̱ si̱ guiriún re̱ꞌ ne̱ꞌ chrej xe̱ꞌ rian nuhui da mánj. Daj si ga̱ꞌue ga̱ꞌnaꞌ ni ngüi̱ ꞌna̱ꞌ anéj chrej yuꞌuj daj. Ni̱ hui̱j xia hui̱j yahui̱ gu̱run ni ngüi̱ daj xumanꞌ hua sa̱ꞌ ni̱nꞌ ruhua. ³Ni̱ ga̱ꞌuīj atsij niqui guinique hui̱j tsínj huin testigo niquinꞌ aꞌmi xiꞌīj rian ni ngüi̱. Ni̱ ga̱huin nucuaj nu̱ngüej sij ga̱ꞌmi nu̱ngüej sij xiꞌīj da gui̱sij mí táj hui̱j ciento táj hua̱ꞌnij xia güi, gui̱ꞌyā. ―Daj gataj Yanꞌanj gunūnj.

⁴Ni̱ nu̱ngüej testigo daj huin hui̱j chrun olivo niquinꞌ rian Yanꞌanj huin Yanꞌanj nicaj sun rian xungüi̱ nan. Ni̱ nu̱ngüej testigo daj huin hui̱j candelero niquinꞌ rian Yanꞌanj nej. ⁵Ni̱ sisi̱ hua tsínj huin ruhua gui̱ꞌyaj xi̱ꞌi nu̱ngüej testigo daj, ni̱ ga̱huin yanꞌa̱n duꞌua nu̱ngüej sij. Ngaa ni̱ ga̱ca ni tsínj ununꞌ nga̱ nu̱ngüej sij, gui̱ꞌyaj yanꞌa̱n daj. Ni̱ daꞌngaꞌ daj ga̱huiꞌ daranꞌ ni tsínj huin ruhua gui̱ꞌyaj xi̱ꞌi nu̱ngüej sij. ⁶Ni̱ nicaj nu̱ngüej tsínj testigo daj fuerza sisi̱ na̱ranꞌ nu̱ngüej sij xataꞌ sisi̱ si̱ gamanꞌ ni güi nataꞌ nu̱ngüej sij si-nu̱guanꞌ Yanꞌanj rian ni ngüi̱. Ni̱ hué daj nicaj nu̱ngüej sij fuerza sisi̱ na̱duna nu̱ngüej sij nnee na̱huin tun. Ni̱ ga̱ꞌue gui̱ꞌyaj nu̱ngüej sij sisi̱ ga̱ꞌnaꞌ daranꞌ rian xi̱ꞌi chruhua xungüi̱ da̱j rúnꞌ huin ruhua nu̱ngüej sij, gui̱ꞌyaj nu̱ngüej sij.

⁷Sani̱ ngaa gui̱sij na̱huij na̱taꞌ nu̱ngüej sij si-nu̱guanꞌ nu̱ngüej sij rian ni ngüi̱, ngaa ni̱ ga̱hui xucu huee duꞌua yuꞌuj gunu̱n ni̱nꞌ ruhua daj. Ngaa ni̱ gu̱nunꞌ xuj nga̱ nu̱ngüej tsínj daj. Ni̱ gui̱ꞌyaj gana xuj. Ni da̱gahuiꞌ xuj nu̱ngüej sij. ⁸Ngaa ni̱ gui̱ngaj nu̱ngüej níman daj chruhua cayu rian ngaj xumanꞌ xxi. Ni̱ si-xugüi nu̱ngüej xumanꞌ daj huin Sodoma nga̱ Egipto sisi̱ ga̱ꞌmi ru̱cu néꞌ. Daj si hué xumanꞌ daj huin rian doco̱ꞌ ni sij Señor rian rugutsi̱. ⁹Ni̱ gui̱ngaj nu̱ngüej níman daj hua̱ꞌnij güi táj ane̱j gaxu̱j gui̱niꞌi ni ngüi̱ ma̱n gaꞌi̱ rian xumanꞌ nga̱ gaꞌi̱ rian xiꞌninꞌ nej, gaꞌi̱ rian snánj aꞌmi ni sij nej, gaꞌi̱ rian xungüi̱ nej. Ni̱ gui̱niꞌi ni sij nu̱ngüej níman daj. Ni̱ nun ga̱ꞌuej ruhua ni sij ga̱chinꞌ nu̱ngüej níman daj. ¹⁰Ngaa ni̱ ducu ga̱huin nia̱ꞌ ruhua ni ngüi̱ ma̱n chruhua xungüi̱ gui̱niꞌi ni sij nu̱ngüej níman daj. Ni̱ xiꞌí daj ga̱ꞌuiꞌ ni sij ni rasu̱n rian dugüiꞌ ni sij. Daj si ngaa hua ni̱ꞌnaꞌ nu̱ngüej sij, ni̱ chranꞌ yunꞌunj ni̱nꞌ ruhua nu̱ngüej sij ni ngüi̱ ma̱n chruhua xungüi̱.

¹¹Sani̱ ngaa gachin hua̱ꞌnij güi táj ane̱j gaxu̱j, ni̱ guiꞌyaj Yanꞌanj si ga̱tu nane̱ chruhua niman nu̱ngüej sij. Ni̱ nahuin ni̱ꞌnaꞌ nu̱ngüej sij. Ni̱ guiniquinꞌ gaya nu̱ngüej sij. Ni̱ daranꞌ ni ngüi̱ guiniꞌi, ni̱ ducu guxuꞌuiꞌ ni sij. ¹²Ngaa ni̱ gunun nu̱ngüej testigo daj ꞌngo̱ nane̱ nucuaj xataꞌ. Ni̱ gataj nane̱ daj:

―Ga̱hui nu̱ngüej é re̱ꞌ, ni̱ ga̱ꞌnaꞌ nu̱ngüej é re̱ꞌ nan anj. ―Daj gataj nane̱ daj.

Ngaa ni̱ gahui nu̱ngüej sij rian nga ganꞌanj nu̱ngüej sij xataꞌ. Ni̱ guiniꞌi ni tsínj ununꞌ nga̱ nu̱ngüej sij mán ni síꞌ ngaa gahui nu̱ngüej sij ganꞌanj sij xataꞌ.

¹³Ni̱ hué ꞌngo̱ hora daj, ni̱ gaꞌna̱ꞌ ꞌngo̱ yún xxi. Ni̱ gane gaꞌi̱ hueꞌ chruhua xumanꞌ daj, guiꞌyaj yún. Ni̱ gahuiꞌ chij mí ni ngüi̱, guiꞌyaj yún. Ni̱ ducu guxuꞌuiꞌ ni ngüi̱ guna daj. Ni̱ gaꞌmi sa̱ꞌ ni sij rian Yanꞌanj nne xataꞌ. ¹⁴Hué dan ni̱ guisíj hui̱j sayun gachin guiranꞌ ni ngüi̱. Sani̱ ráꞌyanj ga̱ꞌnaꞌ ango sayun gui̱sij hua̱ꞌnij.

La séptima trompeta

¹⁵Ngaa ni̱ gaꞌyanj ango ángel trompeta guisíj ichij ángel gaꞌyanj daj. Ngaa ni̱ gunūnj gaꞌmi nucuaj ni si mán xataꞌ. Ni̱ gataj-áꞌ:

Yya̱j ni̱ gaxi̱ꞌi gahuin achij Señor.

Ni̱ gahuin achij Cristo huin tsínj ꞌna̱ꞌ rian Yanꞌanj gahuin achij nu̱ngüej sij rian xungüi̱ nan.

Ngaa ni̱ ni̱ganj ꞌngo̱ gui̱nicaj sun Señor.

Hué daj gataj ni si mán xataꞌ.

¹⁶Ni̱ ico̱ ga̱nꞌanj ni tsínj huin achij nne chrun xila sa̱ꞌ rian Yanꞌanj, ni̱ ga̱ꞌ nitu rian ni sij rian yoꞌój. Ni̱ gaꞌmi sa̱ꞌ ni sij rian Yanꞌanj. ¹⁷Ni̱ gataj ni sij:

Riqui únj si guruhuá re̱ꞌ huín re̱ꞌ Señor.

Ni̱ hué re̱ꞌ huin Yanꞌanj nucuaj ni̱nꞌ ruhua.

Ni̱ hué re̱ꞌ huin si nne asi̱j sini ya̱n.

Ni̱ nné re̱ꞌ yya̱j nej.

Ni̱ ni̱ganj ga̱né re̱ꞌ nej.

Ni̱ riqui únj si guruhuá re̱ꞌ xiꞌí si hua guidaꞌá re̱ꞌ nico si-fuerzá re̱ꞌ.

Ni̱ gaxi̱ꞌi re̱ꞌ gahuin achíj re̱ꞌ rian xungüi̱.

¹⁸Ni̱ gaꞌman ruhua ni ngüi̱ ma̱n chruhua ni xungüi̱ niꞌyaj sij manꞌán re̱ꞌ.

Ngaa ni̱ gaꞌman ruhuá re̱ꞌ guiniꞌí re̱ꞌ ni ngüi̱ daj.

Ni̱ guisíj güi na̱guiꞌyaj yyá re̱ꞌ xiꞌí si-ga̱quinꞌ ni ngüi̱ gahuiꞌ.

Ni̱ guisíj güi na̱ruꞌue re̱ꞌ rian ni tsínj ꞌyaj sun rián re̱ꞌ huin ni tsínj gaꞌmi si-nu̱guanꞌ re̱ꞌ nga̱ ni ngüi̱ hua sa̱ꞌ chruhua niman nej, ni̱ ngüi̱ nu̱n yanꞌanj si-xugüí re̱ꞌ nej.

Ni̱ ga̱ꞌue si tsínj niqui huin ni sij, ga̱ꞌue si tsínj huin rian huin ni sij, sani̱ ꞌngo̱ na̱ruꞌue re̱ꞌ rian ni sij.

Ni̱ hué hora daj dréꞌ re̱ꞌ ni ngüi̱ dreꞌ xungüi̱.

Daj gataj ico̱ ga̱nꞌanj ni tsínj huin achij daj gunun Yanꞌanj.

¹⁹Ngaa ni̱ naxiꞌni rian si-nuhui Yanꞌanj nne xataꞌ. Ni̱ chruhua si-nuhui Yanꞌanj, ni̱ gurugüiꞌ chrúnj nu̱n ni nuguanꞌ guiꞌyaj yya Yanꞌanj nga̱ ni ngüi̱. Ngaa ni̱ ducu guira̱n. Ni̱ gani̱. Ni̱ gaꞌna̱ꞌ ꞌngo̱ yún. Ni̱ gamanꞌ ꞌngo̱ guma̱n yatan xxi nej.

La mujer y el dragón

¹Ngaa ni̱ guiniꞌīnj ꞌngo̱ rasu̱n nico gurugüiꞌ xataꞌ, guiꞌyaj Yanꞌanj. Ni̱ rasu̱n daj huin ꞌngo̱ yunꞌunj xa̱na. ²Ni̱ nu̱n riqui unj. Ni̱ aguáj unj xiꞌí si ruhua ga̱ꞌnga daꞌníj unj. Daj si ranꞌ unj sayun xiꞌí lij daj. ³Ni̱ gurugüiꞌ ango rasu̱n xataꞌ guiniꞌīnj, guiꞌyaj Yanꞌanj. Ni̱ rasu̱n daj huin ꞌngo̱ xucuáj xxi mare. Ni̱ hua ichij chra̱ xuj. Ni̱ hua ichiꞌ si-cúj xuj nej. Ni̱ nu̱n go̱ꞌngo corona da go̱ꞌngo chra̱ xuj. ⁴Ni̱ guxun duneꞌ xuj gaꞌi̱ yatiꞌ mán xataꞌ. Ni̱ do̱j guisíj daꞌaj ni yatiꞌ dugüej duneꞌ xuj chruhua xungüi̱. Ni̱ ganiquinꞌ xucuáj daj rian yunꞌunj xa̱na ruhua ga̱ꞌnga daꞌníj daj. Ni̱ anaꞌuij xuj sisi̱ hué hora ga̱ꞌnga daꞌníj unj, ni̱ xa̱mánj xuj, ruhua xuj. ⁵Ngaa ni̱ gaꞌnga ꞌngo̱ lij snoꞌo, guiꞌyaj yunꞌunj xa̱na daj. Ni̱ tsínj daj gui̱nicaj sun rian daranꞌ xungüi̱. Ni̱ gui̱nicaj sij niꞌí gagaꞌ gui̱nicaj sun sij. Sani̱ nachi nicaj Yanꞌanj daꞌníj yunꞌunj xa̱na daj. Ni̱ ganꞌanj sij xataꞌ, guiꞌyaj Yanꞌanj. Ni̱ ganꞌanj ga̱ne sij rian nne Yanꞌanj rian chrun xila sa̱ꞌ. ⁶Ngaa ni̱ gunánj yunꞌunj xa̱na daj ganꞌanj unj quij quiꞌyanj na̱co rian guiꞌyaj xugüi Yanꞌanj ꞌngo̱ yuꞌuj ga̱ne unj. Ni̱ yuꞌuj daj ga̱ꞌuiꞌ Yanꞌanj si xa̱ unj chra̱ ꞌngo̱ mí táj yahuij ciento táj hua̱ꞌnij xia güi.

⁷Hué dan ni̱ gahuin ꞌngo̱ sayun nico xataꞌ. Ni̱ gununꞌ ni ángel nicaj dugüiꞌ nga̱ ángel gu̱ꞌnaj Miguel nga̱ xucuáj daj. Ni̱ hué daj gununꞌ ni ángel nicaj dugüiꞌ nga̱ xucuáj daj nga̱ ni ángel nicaj dugüiꞌ nga̱ Miguel. ⁸Sani̱ nun gahuin nucuaj guiꞌyaj gana ni du̱güiꞌ xucuáj daj rian Miguel. Ni̱ nitaj rian gui̱man ni du̱güiꞌ xuj xataꞌ ga̱ mánj. ⁹Ngaa ni̱ guereꞌej ni ángel nicaj dugüiꞌ nga̱ Miguel ni du̱güiꞌ xucuáj daj rian xungüi̱. Ni̱ xucu daj gu̱ꞌnaj sichre nga̱ Satanás. Ni̱ asi̱j ná snoꞌo gane xuj. Ni̱ hué sichre daj digyaꞌ yunꞌunj daranꞌ ni ngüi̱ ma̱n chruhua xungüi̱. ¹⁰Ngaa ni̱ gunūnj si gaꞌmi nucuaj ꞌngo̱ tsínj nne ne̱ꞌ xataꞌ. Ni̱ gataj síꞌ:

―Yya̱j ni̱ guisíj güi ga̱nacaj Yanꞌanj ni ngüi̱. Ni̱ gahuin nucuaj ni̱nꞌ ruhua Danꞌanj únj. Ni̱ gahuin achij Yanꞌanj nej. Ni̱ gahuin achij Cristo huin tsínj ꞌna̱ꞌ rian Yanꞌanj. Daj si guereꞌej ni si mán xataꞌ sichre. Ni̱ sichre daj huin si gaꞌmi gaquinꞌ nun güi ni̱ganꞌ xiꞌí ni jnánj néꞌ rian Yanꞌanj. ¹¹Ni̱ guiꞌyaj gana ni jnánj néꞌ rian sichre xiꞌí si-tun manꞌan tsínj gu̱ꞌnaj xachij ꞌni̱j daj. Ni̱ hué daj guiꞌyaj gana ni sij xiꞌí nuguanꞌ xa̱ngaꞌ gaꞌmi ni sij rian ni ngüi̱. Ni̱ nun gu̱xuꞌuiꞌ ni sij sisi̱ ga̱huiꞌ ni sij xiꞌí nuguanꞌ sa̱ꞌ gaꞌmi ni sij. ¹²Ngaa ni̱ ducu ga̱huin nia̱ꞌ ruhua daranꞌ si mán xataꞌ. Sani̱ niqui niman ni̱nꞌ ruhua ni ngüi̱ ma̱n chruhua xungüi̱ nga̱ ni ngüi̱ ma̱n rian nnee yanꞌanj nej. Daj si gaꞌna̱ꞌ sichre rian ma̱n ni é re̱ꞌ. Ni̱ ducu aꞌman ruhua sichre. Daj si niꞌi sij sisi̱ do̱j hua ni güi ga̱nahuij si-sunj. ―Daj gataj nane̱ daj.

¹³Ni̱ ngaa guiniꞌi xucuáj daj sisi̱ guiri ni si mán xataꞌ ganꞌanj xuj chruhua xungüi̱, ni̱ guinicoꞌ xuj ganꞌanj xuj yunꞌunj xa̱na guiꞌyaj si gaꞌnga lij snoꞌo daj. ¹⁴Sani̱ gaꞌuiꞌ Yanꞌanj hui̱j si-gachi xata̱ xxi gu̱nun yunꞌunj xa̱na daj sisi̱ ga̱ꞌue güéj unj, ni̱ gui̱sij unj quij guiꞌyanj naco̱. Ni̱ ga̱huin ga̱nꞌ unj rian xucu daj. Ni̱ hué yuꞌuj daj ga̱ne unj sisi̱ ga̱ꞌuiꞌ Yanꞌanj si xa̱ unj chra̱ hua̱ꞌnij yoꞌ táj nej. ¹⁵Ngaa ni̱ gaꞌyanj xuj nnee duꞌua xuj rucu yunꞌunj xa̱na daj sisi̱ ga̱huin nnee daj ꞌngo̱ xinéj nnee. Ngaa ni̱ gu̱nucuaj nnee yunꞌunj xa̱na daj, ruhua xuj. ¹⁶Sani̱ chracuij yunꞌunj yoꞌój yunꞌunj xa̱na daj. Daj si nasitsiꞌ duꞌua yoꞌój. Ngaa ni̱ xamánj yoꞌój xinéj nnee guiri xucuáj duꞌua xuj. ¹⁷Ngaa ni̱ ducu gaꞌman ruhua xuj niꞌyaj xuj yunꞌunj xa̱na daj. Ni̱ ganꞌanj gu̱nunꞌ xuj nga̱ ango ni daꞌníj unj huin ni sij ni ngüi̱ dagahuin nuguanꞌ aꞌninꞌ Yanꞌanj sun rian ni sij. Ni̱ huin ni sij ni ngüi̱ aꞌmi sa̱ꞌ si-nu̱guanꞌ Jesucristo rian ni ngüi̱.

Las dos bestias

¹Hué dan ni̱ guiniquīnj rian yoꞌój chru̱ ngaj duꞌua nnee yanꞌanj. Ngaa ni̱ guiniꞌīnj gahui ꞌngo̱ xucu huee chruhua nnee yanꞌanj. Ni̱ hua ichij chra̱ xuj nga̱ ichiꞌ si-cúj xuj. Ni̱ chra̱ go̱ꞌngo si-cúj xuj, ni̱ nu̱n go̱ꞌngo corona. Ni̱ nu̱n letra rian ichij chra̱ xuj huin si-xugüi xuj. Ni̱ quij ni̱nꞌ ruhua huin si-xugüi xuj. ²Ni̱ rúnꞌ hua xucu gu̱ꞌnaj leopardo hua xuj guiniꞌīnj. Ni̱ rúnꞌ hua raꞌa oso, ni̱ hué daj hua raꞌa xuj. Ni̱ rúnꞌ hua duꞌua sigueꞌej, ni̱ hué daj hua duꞌua xuj. Ni̱ gaꞌuiꞌ xucuáj daj si-sun xuj rian xucu daj. Ni̱ gaꞌuiꞌ xuj sisi̱ gahuin achij xúꞌ ga̱ne xúꞌ rian chrun xila sa̱ꞌ rian nne manꞌan xuj. Ni̱ gaꞌuiꞌ xuj nico sun gui̱nicaj xúꞌ. ³Ni̱ guiniꞌīnj sisi̱ guiranꞌ xi̱ꞌi ꞌngo̱ chra̱ xucu daj. Ni̱ rúnꞌ guiranꞌ xi̱ꞌi chra̱ ꞌngo̱ tsínj ruhua ga̱huiꞌ, ni̱ hué daj hua chra̱ xuj. Sani̱ ganahuin rian guiranꞌ xi̱ꞌi chra̱ xuj daj. Ni̱ gara yanꞌanj ruhua daranꞌ ni ngüi̱ ma̱n chruhua xungüi̱ guiniꞌi ni sij sisi̱ nahuin chra̱ xuj. Ni̱ guinicoꞌ ni sij rucu xuj ganꞌanj ni sij. ⁴Ni̱ guinicoꞌ ni ngüi̱ xucuáj daj xiꞌí si gaꞌuiꞌ xuj si-sun xuj rian xucu huee daj. Ni̱ gaꞌmi sa̱ꞌ ni sij rian xucu huee daj. Ni̱ gataj ni sij:

―Un tsínj ga̱ꞌue gui̱ꞌyaj da̱j rúnꞌ ꞌyaj xucu huee daj únj. Ni̱ u̱n tsínj ga̱ꞌue gu̱nunꞌ nga̱ xuj ruhua á re̱ꞌ únj. ―Daj gataj ni sij.

⁵Ni̱ gaꞌuej ruhua Yanꞌanj sisi̱ ga̱huin nucuaj xuj ga̱ꞌmi nne̱ xuj. Ni̱ ga̱ꞌmi quij xuj rian Yanꞌanj nej. Ni̱ gaꞌuej ruhua Yanꞌanj sisi̱ gui̱nicaj sun xuj hui̱j xia hui̱j yahui̱. ⁶Hué dan ni̱ gaꞌmi quij xuj xiꞌí Yanꞌanj nga̱ xiꞌí si-xugüi Yanꞌanj nej. Ni̱ hué daj gaꞌmi quij xuj xiꞌí si-nuhui Yanꞌanj nga̱ xiꞌí ni si mán xataꞌ nej. ⁷Ni̱ gaꞌuej ruhua Yanꞌanj sisi̱ gu̱nunꞌ xuj nga̱ ni ngüi̱ hua sa̱ꞌ niman rian Yanꞌanj. Ni̱ gui̱ꞌyaj gana xuj rian ni sij. Ni̱ hua permiso rian xuj sisi̱ gui̱nicaj sun xuj rian daranꞌ xiꞌninꞌ ni ngüi̱ nga̱ daranꞌ xumanꞌ nej, daranꞌ snánj aꞌmi ni ngüi̱ nej, daranꞌ xungüi̱ nej. ⁸Ni̱ guinicoꞌ daranꞌ ni ngüi̱ ma̱n chruhua xungüi̱ xucu daj. Sani̱ sé daj guiꞌyaj ni ngüi̱ ta̱j si-xugüi rian si-libro xachij ꞌni̱j daj. Ni̱ ni ngüi̱ ta̱j si-xugüi rian libro daj, ni̱ hué ni sij huin si ga̱ne ni̱ganj nga̱ Yanꞌanj. Ni̱ hué xachij ꞌni̱j daj huin Jesucristo gahuiꞌ xiꞌí si-ga̱quinꞌ néꞌ. Ni̱ asi̱j achin guiꞌyaj Yanꞌanj xungüi̱, ni̱ hua gani ruhua Yanꞌanj sisi̱ hué daj ga̱huiꞌ Jesús.

⁹Ni̱ sisi̱ nu̱n chraquij ꞌngo̱ tsínj daj, ni̱ hua nia̱n si gu̱nun sij si ataj nuguanꞌ nan anj. ¹⁰Sisi̱ ni̱caj ꞌngo̱ tsínj daj ga̱nꞌanj sij ducuaga̱ꞌ dugüiꞌ sij, sani̱ hué daj ga̱nꞌanj manꞌan sij ducuaga̱ꞌ nej. Sisi̱ da̱gahuiꞌ ꞌngo̱ tsínj daj espada dugüiꞌ sij, ni̱ hué espada daj gui̱ꞌyaj ga̱huiꞌ manꞌan sij. Ngaa ni̱ huin ruhuaj sisi̱ ga̱ nucuaj ruhua ni ngüi̱ hua sa̱ꞌ rian Yanꞌanj. Ni̱ gu̱xuman sa̱ꞌ ruhua ni sij ni̱ꞌyaj ni sij Yanꞌanj.

¹¹Hué dan ni̱ guiniꞌīnj gahui ango xucu huee riqui yoꞌój. Ni̱ ta̱j hui̱j si-cúj chra̱ xuj. Ni̱ da̱j rúnꞌ hua si-cúj xachij ꞌni̱j, ni̱ hué daj hua si-cúj chra̱ xuj. Sani̱ aꞌmi xuj da̱j rúnꞌ aꞌmi manꞌan xucuáj daj. ¹²Ni̱ da̱j rúnꞌ nicaj sun xucu huee gaꞌna̱ꞌ sini, ni̱ hué daj nicaj sun ango xuj nej. Ni̱ niquinꞌ xuj rian xucu huee gaꞌna̱ꞌ sini daj. Ni̱ guiꞌyaj xuj sisi̱ guinicoꞌ daranꞌ ni ngüi̱ ma̱n chruhua xungüi̱ xucu huee gaꞌna̱ꞌ sini daj. Ni̱ hua ganahuin xucu huee ruhua ga̱huiꞌ daj. ¹³Ni̱ gaꞌue guiꞌyaj xuj ni rasu̱n nico. Daj si da gayu yanꞌa̱n xataꞌ rian yoꞌój, guiꞌyaj xuj gui̱niꞌi ni ngüi̱. ¹⁴Ni̱ di̱gyaꞌ yunꞌunj xuj ni ngüi̱ ma̱n chruhua xungüi̱ xiꞌí ni rasu̱n nico gui̱ꞌyaj xuj rian ni ngüi̱. Daj si nicaj xuj permiso sisi̱ hué daj gui̱ꞌyaj xuj rian xucu huee gaꞌna̱ꞌ sini daj. Ni̱ gaꞌninꞌ xuj sun rian ni ngüi̱ ma̱n chruhua xungüi̱ sisi̱ na̱ri raꞌa ni sij ꞌngo̱ yanꞌanj ga̱huin xucu huee guiranꞌ xi̱ꞌi, guiꞌyaj espada, sani̱ nun gahuiꞌ xuj. ¹⁵Ni̱ hua permiso rian xucu huee daj sisi̱ gui̱nun nane̱ niman yanꞌanj gui̱ꞌyaj xuj huin xucu nari raꞌa ni ngüi̱ daj. Ngaa ni̱ ga̱ꞌmi xucu nari raꞌa ni ngüi̱, guiꞌyaj xuj. Ni̱ gataj xucu huee daj sisi̱ da̱gahuiꞌ ni sij daranꞌ ni tsínj nun gui̱nicoꞌ xucu huin yanꞌanj guiꞌyaj raꞌa ni sij daj. ¹⁶Ni̱ guiꞌyaj xucu huee daj sisi̱ ga̱ri ni sij daꞌngaꞌ raꞌa sa̱ꞌ ni ngüi̱, asi̱ yo ni sij nej. Ni̱ hué daj guiꞌyaj ni sij nga̱ ni tsínj huin rian nga̱ ni tsínj nicoꞌ ru̱cu nej, ni tsínj xuruꞌue nga̱ ni tsínj niqui nej, ni tsínj ꞌyaj sun yu̱n rian xuruꞌue nga̱ ni tsínj nitaj si ꞌyaj sun yu̱n rian xuruꞌue nej. ¹⁷Hué dan ni̱ ni ngüi̱ nitaj si nu̱n daꞌngaꞌ, asi̱ si-xugüi xucu daj, asi̱ número si-xugüi xucu daj, ni̱ si̱ gaꞌue gui̱ran ni sij rasu̱n. Ni̱ si̱ gaꞌue gu̱duꞌue ni sij rasu̱n ngaa nitaj daꞌngaꞌ daj nu̱n ni sij mánj.

¹⁸Ni̱ nuguanꞌ nan ruhuaj sisi̱ ga̱huin chru̱n néꞌ. Ni̱ ga̱ra daꞌngaꞌ ruhua néꞌ u̱n sin huin nuguanꞌ nan ruhuaj gata. Daj si si-nu̱guanꞌ xucu huee daj huin si-xugüi ꞌngo̱ tsínj. Ni̱ número daj huin hua̱tanꞌ ciento táj hua̱ꞌnij xia hua̱tanꞌ.

El cántico de los 144,000

¹Ngaa ni̱ guiniꞌīnj niquinꞌ xachij ꞌni̱j chra̱ quij gu̱ꞌnaj Sión. Ni̱ ma̱n nu̱guanꞌan ꞌngo̱ ciento mí táj hui̱j xia ga̱nꞌanj mí ni tsínj nga̱ xachij ꞌni̱j daj. Ni̱ hua ni̱ca nun si-xugüi xachij ꞌni̱j yo ni sij nga̱ si-xugüi chrej xachij ꞌni̱j nej. ²Ngaa ni̱ gunūnj si gaꞌmi ꞌngo̱ nane̱ gaꞌna̱ꞌ xataꞌ. Ni̱ da̱j rúnꞌ gari̱n rian nicoꞌ nico nnee rian huej, ni̱ hué daj gahuin gari̱n gunūnj. Ni̱ da̱j rúnꞌ aguáj duꞌui, ni̱ hué daj gunūnj nej. Ni̱ nane̱ gunūnj daj huin da̱j rúnꞌ xingaꞌ yánꞌanj nu̱n gaꞌi̱ yaꞌa̱ ngaa aráj gaꞌi̱ ni tsínj aráj yánꞌanj. Ni̱ hué daj gunūnj nane̱ gaꞌmi daj. ³Ni̱ garáj ni sij ꞌngo̱ chraꞌ na̱ca rian tsínj nne chrun xila sa̱ꞌ nga̱ rian aninꞌ ga̱nꞌanj xucu hua ni̱ꞌnaꞌ nga̱ rian ni tsínj huin achij nej. Ni̱ a̱ ꞌngo̱ tsínj nun ga̱ꞌue na̱riꞌ gara chraꞌ daj. Maan si urin ciento mí táj hui̱j xia ga̱nꞌanj mí ni tsínj ganani scanij ni ngüi̱ ma̱n chruhua xungüi̱ gahuin nucuaj nariꞌ chraꞌ na̱ca daj garáj ni sij. ⁴Ni̱ ni tsínj nan nun guiꞌyaj gaquinꞌ nga̱ ni ngüi̱ xa̱na. Daj si nun gaꞌmi ni sij nga̱ ni ngüi̱ xa̱na. Ni̱ hué ni tsínj nan nicoꞌ xachij ꞌni̱j ngaa achéj síꞌ niaj diꞌyaj nga̱ ni sij. Ni̱ nacaj Yanꞌanj ni sij scanij ni ngüi̱ sisi̱ gui̱nicaj dugüiꞌ sini ni sij nga̱ Yanꞌanj nga̱ xachij ꞌni̱j nej. ⁵Ni̱ nun gaꞌmi ni sij nuguanꞌ yya̱. Daj si hua sa̱ꞌ niman ni sij niquinꞌ ni sij rian chrun xila sa̱ꞌ rian nne Yanꞌanj.

El mensaje de los tres ángeles

⁶Ngaa ni̱ guiniꞌīnj huaj ango ángel da̱ni xataꞌ. Ni̱ nicaj ángel daj nuguanꞌ sa̱ꞌ huin nuguanꞌ nun ganahuij. Ni̱ na̱taꞌ ángel daj rian ni ngüi̱ ma̱n daranꞌ xungüi̱ nga̱ daranꞌ xiꞌninꞌ ni ngüi̱ nej, daranꞌ snánj aꞌmi ni ngüi̱ nej, daranꞌ xumanꞌ nej. ⁷Ni̱ gaꞌmi nucuaj ángel. Ni̱ gataj-áꞌ:

―Gui̱nun yanꞌanj ni é re̱ꞌ rian Yanꞌanj xa̱ngaꞌ. Ni̱ ga̱ꞌmi sa̱ꞌ ni é re̱ꞌ rian Yanꞌanj nej. Daj si guisíj hora na̱guiꞌyaj yya Yanꞌanj nga̱ si-ga̱quinꞌ ni ngüi̱. Ni̱ ga̱ꞌmi ꞌueé ni é re̱ꞌ rian Yanꞌanj si hué Yanꞌanj guiꞌyaj xataꞌ nga̱ yoꞌój nej, nnee yanꞌanj nej, rian ahui nnee nej. ―Daj gataj ángel daj gunūnj.

⁸Ni̱ guinicoꞌ ango ángel ru̱cu ángel daj. Ni̱ gataj ango ángel daj:

―Guereꞌ xumanꞌ Babilonia. Guereꞌ xumanꞌ Babilonia huin xumanꞌ xxi. Daj si da̱j rúnꞌ digyán ꞌngo̱ tsínj daj goꞌo dugüiꞌ sij rente sisi̱ ga̱xini síꞌ, ni̱ hué daj digyán ni tsínj ma̱n Babilonia ꞌngo̱ chrej quij rian daranꞌ xungüi̱. ―Daj gataj ango ángel daj.

⁹Ngaa ni̱ guinicoꞌ ango ángel guisíj hua̱ꞌnij ángel. Ni̱ gaꞌmi nucuaj ángel daj. Ni̱ hué nan huin nuguanꞌ gataj ángel daj:

―Sisi̱ hua ꞌngo̱ tsínj nun yanꞌanj xucu huee daj xucu huin yanꞌanj guiꞌyaj raꞌa ni sij, ni̱ sisi̱ ga̱ꞌuej ruhua sij sisi̱ ga̱nun daꞌngaꞌ daj yo sij, asi̱ raꞌa sij, ¹⁰ngaa ni̱ ga̱huin nico castigo sij, gui̱ꞌyaj Yanꞌanj. Daj si da̱j rúnꞌ huin ꞌngo̱ nnee xunánj ngaa naꞌue go̱ꞌo néꞌ, ni̱ hué daj huin castigo ga̱huin sij, gui̱ꞌyaj Yanꞌanj. Ni̱ nun jnachej Yanꞌanj ango nnee sa̱ꞌ nga̱ nnee xunánj daj sisi̱ ga̱ꞌue go̱ꞌo ni sij. Daj si ducu gaꞌman ruhua Yanꞌanj niꞌya ni sij. Ni̱ ducu gui̱ranꞌ ni sij sayun gu̱nun ni sij rian yanꞌa̱n ga̱ca ni sij nga̱ yoꞌój sufre. Ni̱ gui̱niꞌyaj ni ángel hua sa̱ꞌ niman nga̱ xachij ꞌni̱j nej. ¹¹Ni̱ ni̱ganj ga̱hui gatseꞌ rian gui̱ranꞌ ni sij sayun. Ni̱ naꞌue ga̱hui ni sij na̱ran ruhua ni sij rian gui̱ranꞌ ni sij sayun. Daj si nugüi ni̱ganꞌ nu̱n ni sij. Ni̱ hué daj gui̱ranꞌ ni tsínj nicoꞌ xucu huee nga̱ xucu huin yanꞌanj guiꞌyaj raꞌa ni sij. Ni̱ daꞌngaꞌ daj gui̱ranꞌ ni tsínj ga̱ꞌuej ruhua sisi̱ ga̱nun daꞌngaꞌ si-xugüi xucu daj nej. ―Daj gataj ángel daj.

¹²Ngaa ni̱ ruhuaj si ꞌngo̱ ga̱ nucuaj niman ni tsínj hua sa̱ꞌ rian Yanꞌanj rian sayun huin ni tsínj dagahuin nuguanꞌ gaꞌninꞌ Yanꞌanj sun rian ni sij. Ni̱ xuman ruhua ni sij niꞌyaj ni sij Jesús.

¹³Ngaa ni̱ gunūnj ꞌngo̱ nane̱ gaꞌmi xataꞌ. Ni̱ gataj nane̱ daj gunūnj:

―Ga̱run re̱ꞌ nuguanꞌ nan rian yanj: “Asi̱j yya̱j nga̱ ni güi ga̱ꞌnaꞌ ne̱ꞌ rian, ni̱ hua ꞌueé rian ni ngüi̱ nicoꞌ Señor ngaa ga̱huiꞌ ni sij.” ―Daj gataj nane̱ daj gunūnj.

Ngaa ni̱ gataj Espíritu:

―Xa̱ngaꞌ ni̱ na̱ran ruhua ni sij nga̱ sun ꞌyaj ni sij. Daj si niꞌi Yanꞌanj sun sa̱ꞌ guiꞌyaj sun ni sij chruhua xungüi̱. ―Gataj Espíritu.

La tierra es segada

¹⁴Ngaa ni̱ guiniꞌīnj ꞌngo̱ nga ga̱tsi xataꞌ. Ni̱ rúnꞌ hua ꞌngo̱ daꞌníj ni ngüi̱, ni̱ hué daj hua ꞌngo̱ tsínj nne rian nga daj. Ni̱ nu̱n chra̱ sij ꞌngo̱ corona huin oro. Ni̱ nicaj sij ꞌngo̱ gagaꞌ cera hua̱. ¹⁵Ngaa ni̱ gahui ango ángel chruhua nuhui nico. Ni̱ gaguáj nucuaj ángel daj rian tsínj nne rian nga daj. Ni̱ gataj ángel daj:

―Ga̱xiꞌi re̱ꞌ ga̱ꞌninꞌ re̱ꞌ ni rasu̱n ma̱n rian yoꞌój nga̱ gagaꞌ cera nicáj re̱ꞌ. Daj si hua guisíj hora ga̱ꞌninꞌ re̱ꞌ ni rasu̱n. Ni̱ hua gachij ni̱nꞌ si ma̱n rian yoꞌój nan. ―Daj gataj ángel daj.

¹⁶Ngaa ni̱ gaxi̱ꞌi tsínj nne rian nga daj gaꞌninꞌ sij ni rasu̱n nga̱ cera daj. Ni̱ naranꞌ sij ni rasu̱n gahui rian yoꞌój.

¹⁷Ngaa ni̱ gahui ango ángel chruhua nuhui nico nne xataꞌ. Ni̱ hué daj nicaj ango ángel daj ꞌngo̱ cera hua̱ nej. ¹⁸Ni̱ rian altar gahui ango ángel. Ni̱ nicaj ángel daj sun rian yanꞌa̱n. Ngaa ni̱ gaguáj nucuaj ango ángel daj rian ángel nicaj gagaꞌ cera hua̱ daj. Ni̱ gataj ángel daj:

―Ga̱xiꞌi re̱ꞌ nga̱ cera hua̱ nicáj re̱ꞌ daj, ngaa ni̱ ga̱ꞌninꞌ re̱ꞌ ni rasu̱n ma̱n rian yoꞌój. Ni̱ gu̱ta re̱ꞌ ni uva gachij rian yoꞌój. Daj si hua guisíj gane uva daj. ―Daj gataj ángel daj.

¹⁹Ngaa ni̱ gaꞌninꞌ ango ángel daj ni rasu̱n ma̱n rian yoꞌój nga̱ gagaꞌ cera. Ni̱ guta ángel daj uva gachij ma̱n rian yoꞌój. Ni̱ gara ángel daj uva chruhua ꞌngo̱ gagaꞌ xxi sisi̱ ga̱ni gagaꞌ daj uva, ni̱ ga̱hui nnee uva, gui̱ꞌyaj gagaꞌ daj. Ni̱ hué nuguanꞌ daj digyán da̱j aꞌman ruhua Yanꞌanj niꞌya ni ngüi̱ daꞌui gaquinꞌ. ²⁰Ni̱ ne̱ꞌ chrej xe̱ꞌ xumanꞌ daj gani ni sij uva. Ni̱ gahui nico tun chruhua gagaꞌ daj. Ni̱ guisíj ganun tun daj da gagaꞌ nu̱n duꞌua guayo. Ni̱ hua̱ꞌnij ciento kilómetro gachéj tun ganꞌan.

Los ángeles con las siete postreras plagas

¹Ngaa ni̱ guiniꞌīnj ango daꞌngaꞌ xxi gurugüiꞌ xataꞌ, guiꞌyaj Yanꞌanj. Ni̱ gara yanꞌanj ruhuāj guiniꞌīnj. Ni̱ daꞌngaꞌ daj huin ichij ángel nicaj ichij sayun ga̱ꞌnaꞌ. Ni̱ hué nan huin ichij sayun guisíj ganahuij. Ni̱ ngaa gui̱sij ga̱nahuij ichij sayun daj, gui̱ꞌyaj Yanꞌanj, ngaa ni̱ ga̱nahuij si ga̱ꞌman ruhua Yanꞌanj ni̱ꞌya xungüi̱.

²Ni̱ guiniꞌīnj ꞌngo̱ nnee yanꞌanj. Ni̱ rúnꞌ hua pidrio nachej yanꞌa̱n, ni̱ hué daj hua nnee yanꞌanj daj guiniꞌīnj. Ni̱ duꞌua nnee yanꞌanj daj ma̱n ni ngüi̱ guiꞌyaj gana rian xucu huee nej, rian yanꞌanj huin xucu guiꞌyaj raꞌa ni sij nej, rian número huin si-xugüi xucu daj. Ni̱ nicaj ni sij yánꞌanj nu̱n gaꞌi̱ yaꞌa̱ gaꞌuiꞌ Yanꞌanj rian ni sij. ³Ni̱ aráj ni sij si-chraꞌ Moisés huin síꞌ tsínj guiꞌyaj sun rian Yanꞌanj asi̱j ná. Ni̱ hué daj aráj ni sij si-chraꞌ xachij ꞌni̱j nej. Ni̱ nan huin nuguanꞌ aráj ni sij:

Hua nico ni̱nꞌ ruhua ni sun sa̱ꞌ guiꞌyaj sún re̱ꞌ huín re̱ꞌ Señor.

Ni̱ nicáj re̱ꞌ daranꞌ fuerza huín re̱ꞌ Yanꞌanj.

Ni̱ hua ni̱ca xa̱ngaꞌ si-chréj re̱ꞌ huín re̱ꞌ rey rian ni ngüi̱ hua sa̱ꞌ niman rian Yanꞌanj.

⁴Ni̱ u̱n tsínj naꞌuej ruhua gui̱nun yanꞌanj rián re̱ꞌ huín re̱ꞌ Señor únj.

Daj si sa̱ꞌ ni̱nꞌ ruhua huin urín re̱ꞌ.

Xiꞌí daj ni̱ ga̱ꞌnaꞌ daranꞌ ni ngüi̱ ma̱n chruhua xungüi̱.

Ni̱ ga̱ꞌmi sa̱ꞌ ni sij rian xiꞌí re̱ꞌ.

Daj si hua guiniꞌi ni sij sun sa̱ꞌ guiꞌyaj ni̱ca re̱ꞌ rian ni sij.

Daj huin chraꞌ garáj ni ngüi̱ guiꞌyaj gana daj.

⁵Ngaa guisíj ni̱ guiniꞌīnj sisi̱ naxiꞌnij rian ducuá Yanꞌanj xataꞌ huin nuhui atsij nu̱n nuguanꞌ sa̱ꞌ guiꞌyaj yya Yanꞌanj nga̱ ni ngüi̱. ⁶Ngaa ni̱ gahui ichij ángel daj chruhua ducuá Yanꞌanj. Ni̱ nicaj ni ángel daj ichij sayun ga̱ꞌnaꞌ gui̱ranꞌ ni ngüi̱. Ni̱ nu̱n ni ángel atsij ga̱tsi sa̱ꞌ gu̱ꞌnaj lino. Ni̱ ran rian atsij daj. Ni̱ aníꞌyanj nnij huin oro xíꞌyanj ni ángel daj. ⁷Ngaa ni̱ gaꞌuiꞌ ꞌngo̱ dugüiꞌ ga̱nꞌanj xucu hua ni̱ꞌnaꞌ ꞌngo̱ vaso huin oro raꞌa da go̱ꞌngo ichij ni ángel daj. Ni̱ da̱j rúnꞌ ꞌyaj néꞌ ngaa ara néꞌ nnee chruhua vaso, ni̱ hué daj gara ni sayun chruhua ni vaso daj. Daj si xiꞌí si aꞌman ruhua Yanꞌanj niꞌya ni ngüi̱, ni̱ gui̱ranꞌ ni ngüi̱ castigo, gui̱ꞌyaj Yanꞌanj. Ni̱ ni̱ganj hua ni̱ꞌnaꞌ Yanꞌanj. ⁸Ni̱ nara gatseꞌ chruhua ducuá Yanꞌanj xiꞌí si hua ꞌueé ni̱nꞌ ruhua Yanꞌanj, ni̱ xiꞌí si nucuaj ni̱nꞌ ruhua Yanꞌanj nej. Ni̱, ni̱ a̱ ꞌngo̱ tsínj si̱ gaꞌue ga̱tu chruhua ducuá Yanꞌanj da gui̱sij ga̱chin ichij ni sayun ga̱ꞌnaꞌ, gui̱ꞌyaj ichij ni ángel daj.

Las copas de ira

¹Ngaa ni̱ gunūnj gaꞌmi ꞌngo̱ nane̱ nucuaj gahui chruhua ducuá Yanꞌanj. Ni̱ gataj nane̱ daj gunun ichij ni ángel:

―Güi̱j ga̱yanj ni é re̱ꞌ ni sayun ma̱n chruhua ichij vaso daj rian yoꞌój. Daj si ga̱huin castigo ni ngüi̱ xiꞌí si aꞌman ruhua Yanꞌanj. ―Daj gataj nane̱ daj.

²Ngaa ni̱ ganꞌanj ga̱yan sini ꞌngo̱ ángel daj si ma̱n chruhua si-vaso sij rian yoꞌój. Ni̱ aꞌngaj nnee̱ cúj ni ngüi̱ gahui yaꞌui quij huin ni sij ni tsínj ta̱j si-daꞌngaꞌ xucu huee. Ni̱ nicoꞌ ni sij yanꞌanj huin xucu guiꞌyaj raꞌa ni sij.

³Ngaa ni̱ gayanj ango ángel huin ángel hui̱j si ma̱n chruhua si-vaso sij rian nnee yanꞌanj. Ni̱ gahuiꞌ daranꞌ xucu hua ni̱ꞌnaꞌ mán chruhua nnee yanꞌanj.

⁴Ngaa ni̱ gayanj ango ángel daj si ma̱n chruhua vaso sij rian ni xinéj nnee nga̱ rian ni yuꞌuj ahui nnee. Ni̱ ángel daj huin ángel hua̱ꞌnij. Ni̱ nahuin nnee daj tun.

⁵Ngaa ni̱ gunūnj gataj ángel dugumi rian ni nnee daj:

―Duguꞌna̱j ꞌyáj re̱ꞌ huín re̱ꞌ Yanꞌanj xiꞌí si guiꞌyáj re̱ꞌ castigo daj. Ni̱ sa̱ꞌ ni̱nꞌ ruhuá re̱ꞌ. Ni̱ hué re̱ꞌ huin si gane asi̱j sini. Ni̱ hué re̱ꞌ huin si nne acuanꞌ. ⁶Daj si gayanj si-tun manꞌan ni tsínj hua sa̱ꞌ niman nga̱ si-tun ni tsínj gaꞌmi si-nu̱guanꞌ re̱ꞌ, guiꞌyaj ni sij. Xiꞌí daj ni̱ gaꞌuíꞌ re̱ꞌ tun goꞌo manꞌan ni sij. Ngaa ni̱ nayun yya cuenta da̱j rúnꞌ guiꞌyaj ni sij. ―Daj gataj ángel daj.

⁷Ni̱ hué daj gunūnj gaꞌmi ango ángel niquinꞌ rian altar. Ni̱ gataj-áꞌ:

―Nuguanꞌ xa̱ngaꞌ huin nuguanꞌ gaꞌmí re̱ꞌ ngaa naguiꞌyaj yyá re̱ꞌ si-ga̱quinꞌ ni sij. Ni̱ guiꞌyaj ni̱ca re̱ꞌ huín re̱ꞌ Señor. Ni̱ hué re̱ꞌ huin Yanꞌanj nicaj daranꞌ fuerza nej. ―Gataj ango ángel daj.

⁸Ngaa ni̱ gayanj ango ángel si ma̱n chruhua si-vaso sij rian güi huin ángel ga̱nꞌanj. Ni̱ hua permiso rian güi sisi̱ ga̱ca ni ngüi̱, gui̱ꞌyaj nnán. ⁹Ni̱ ducu gaca ni ngüi̱, guiꞌyaj nnán. Ngaa ni̱ gaꞌmi quij ni sij xiꞌí si-xugüi Yanꞌanj. Daj si Yanꞌanj nicaj sun rian ni sayun gaꞌna̱ꞌ guiranꞌ ni ngüi̱. Ni̱ nun na̱nicaj ruhua ni sij xiꞌí si-ga̱quinꞌ ni sij sisi̱ ga̱ꞌmi sa̱ꞌ ni sij rian Yanꞌanj.

¹⁰Ngaa ni̱ gayanj ango ángel si ma̱n chruhua si-vaso sij rian chrun xila rian nne xucu huee. Ni̱ ángel daj huin ángel u̱nꞌunj. Ni̱ gahuin ru̱miꞌ rian nicaj sun xuj. Ni̱ xiꞌí si ducu gaꞌngaj nnee̱ cúj ni ngüi̱, ni̱ xa ni sij yya ni sij, guiꞌyaj xiꞌi̱ daj. ¹¹Ni̱ xiꞌí si aꞌngaj nnee̱ cúj ni sij, guiꞌyaj yaꞌui daj, ni̱ gaꞌmi quij ni sij xiꞌí Yanꞌanj nne xataꞌ. Ni̱ nu̱nj si hué daj guiranꞌ ni sij, sani̱ nun nanica̱j ruhua ni sij duna ni sij gaquinꞌ, guiꞌyaj ni sij.

¹²Ngaa ni̱ gayanj ango ángel huin ángel hua̱tanꞌ si ma̱n chruhua si-vaso sij rian quin gu̱ꞌnaj Eufrates. Ngaa ni̱ ga naco̱ quin daj sisi̱ ga̱ níꞌnij ga̱chin ni rey ꞌna̱ꞌ ne̱ꞌ rian síj güi ga̱ꞌnaꞌ ni síꞌ. ¹³Ngaa ni̱ guiniꞌīnj gahui nane̱ quij duꞌua xucuáj nej, duꞌua xucu huee nej, duꞌua tsínj nataꞌ nuguanꞌ digyaꞌ yunꞌunj nej. Ni̱ rúnꞌ hua xiriquij, ni̱ hué daj hua hua̱ꞌnij ni nane̱ quij daj. ¹⁴Ni̱ nane̱ ꞌna̱ꞌ rian sichre huin ni nane̱ quij daj. Ni̱ ꞌyaj sun hua̱ꞌnij nane̱ quij daj sun nico sisi̱ gui̱niꞌi ni ngüi̱. Ni̱ huaj ni hua̱ꞌnij nane̱ daj ni̱nꞌ ga̱chraꞌ rian ma̱n ni rey ma̱n chruhua xungüi̱ sisi̱ na̱huin yuꞌ ni síꞌ güi na̱guiꞌyaj yya Yanꞌanj nga̱ si-ga̱quinꞌ ni ngüi̱. Ngaa ni̱ gu̱nunꞌ ni síꞌ nga̱ Yanꞌanj. Ni̱ nicaj Yanꞌanj daranꞌ fuerza.

¹⁵Hué nan huin si-nu̱guanꞌ Señor:

―Ni̱ꞌyaj ni é re̱ꞌ si huēj ga̱ꞌnaꞌ da̱j rúnꞌ ꞌyaj ꞌngo̱ tsínj tu̱. Ni̱ ga̱huin ꞌueé rian tsínj nitaj si atoj si nun ruhua sij nne sij. Ni̱ nu̱n sa̱ꞌ sij si-ganꞌ sij. Ngaa ni̱ si̱ ga nne̱ sij ga̱che sij. Ni̱ si̱ gahuin na̱ꞌaj sij. ―Daj gataj Señor.

¹⁶Ni̱ nahuin yuꞌ ni rey daj ꞌngo̱ yuꞌuj gu̱ꞌnaj Armagedón huin snanꞌanj hebreo, guiꞌyaj hua̱ꞌnij nane̱ quij daj. ¹⁷Ngaa ni̱ gayanj ango ángel daj si ma̱n chruhua si-vaso sij rian nane̱. Ni̱ guisíj ichij ni ángel gayanj ni vaso daj. Ngaa ni̱ gunūnj gaꞌmi nucuaj ꞌngo̱ tsínj nne chruhua ducuá Yanꞌanj nne xataꞌ. Ni̱ nne tsínj gaꞌmi daj rian chrun xila sa̱ꞌ. Ni̱ gataj síꞌ:

―Yya̱j ni̱ guisíj ganahui. ―Daj gataj síꞌ.

¹⁸Ngaa ni̱ guira̱n. Ni̱ gari̱n ni̱nꞌ ruhua. Ni̱ gaguáj duꞌui. Ni̱ gaꞌna̱ꞌ ꞌngo̱ yún xxi. Ni̱ asi̱j guimán ni ngüi̱ chruhua xungüi̱ nan, ni̱ nun gui̱niꞌi ni sij ꞌngo̱ yún nucuaj rúnꞌ nucuaj yún gaꞌna̱ꞌ daj. ¹⁹Ngaa ni̱ da̱ni xumanꞌ xxi daj guisitsiꞌ daꞌaj hua̱ꞌnij dasu, guiꞌyaj yún. Ngaa ni̱ gane ango ni xumanꞌ xxi ma̱n chruhua xungüi̱. Hué dan ni̱ gananun ruhua Yanꞌanj xiꞌí xumanꞌ xxi gu̱ꞌnaj Babilonia sisi̱ ga̱huin ni ngüi̱ ma̱n xumanꞌ daj castigo. Daj si ni̱nꞌ ruhua gaꞌman ruhua Yanꞌanj niꞌya ni ngüi̱ daj. ²⁰Ni̱ gane daranꞌ yoꞌój niquinꞌ da̱ni chruhua nnee yanꞌanj. Ni̱ hué daj gane daranꞌ ni quij xa̱can nej. Ni̱ nun gurugüiꞌ ni̱ a̱ ꞌngo̱ quij ga̱ mánj. ²¹Ni̱ gamanꞌ ꞌngo̱ guma̱n yatan xxi rian ni ngüi̱. Ni̱ aꞌuíj go̱ꞌngo yatan daj ꞌngo̱ si hui̱j xia chiꞌ kilo. Ni̱ xiꞌí si gamanꞌ guma̱n yatan xxi, guiꞌyaj Yanꞌanj, ni̱ gaꞌmi quij ni sij xiꞌí Yanꞌanj. Daj si gahuin ni sij ꞌngo̱ castigo xxi, guiꞌyaj Yanꞌanj.

Condenación de la gran ramera

¹Ngaa ni̱ gaꞌna̱ꞌ ꞌngo̱ ni ichij ni dugüiꞌ ni ángel nicaj ichij vaso daj. Ni̱ gataj ángel daj gunūnj:

―Ga̱huaꞌ so̱ꞌ nan, ni̱ di̱gyānj rián re̱ꞌ da̱j ga̱huin castigo gui̱ranꞌ yunꞌunj xa̱na ꞌyaj squi̱raꞌ nne unj rian ni nnee yanꞌanj. Ni̱ huin achij yunꞌunj xa̱na daj. ²Ni̱ guiꞌyaj squi̱raꞌ ni rey ma̱n chruhua xungüi̱ nga̱ yunꞌunj xa̱na daj. Ni̱ da̱j rúnꞌ hua xi̱ni ꞌngo̱ tsínj daj, ni̱ hué daj guiꞌyaj ni tsínj ma̱n chruhua xungüi̱, guiꞌyaj yunꞌunj xa̱na daj. Daj si gahuin nia̱ꞌ ruhua ni sij nga̱ nuguanꞌ quij digyán yunꞌunj xa̱na daj rian ni sij. ―Daj gataj ángel daj.

³Ngaa ni̱ ganꞌanj nimānj chra̱ ꞌngo̱ quij quiꞌyanj na̱co, guiꞌyaj ángel daj. Ni̱ guiniꞌīnj ꞌngo̱ yunꞌunj xa̱na ta̱j xiráj ꞌngo̱ xucu huee mare. Ni̱ ni̱nꞌ ga̱chraꞌ xuj nu̱n si-xugüi xuj. Ni̱ ni̱nanj nuguanꞌ quij huin ni nuguanꞌ daj. Ni̱ hua ichij chra̱ xuj nga̱ ichiꞌ si-cúj xuj nej. ⁴Ni̱ nu̱n yunꞌunj xa̱na daj ꞌngo̱ atsij jnitaj nga̱ atsij mare. Ni̱ naguiꞌyaj sa̱ꞌ unj manꞌan unj nga̱ gagaꞌ oro nga̱ yej nia̱ꞌ nej, yej huin perla nej. Ni̱ nicaj raꞌa unj ꞌngo̱ tasa huin oro. Ni̱ gara chruhua tasa daj, guiꞌyaj nuguanꞌ quij nga̱ ni gaquinꞌ guiꞌyaj yunꞌunj xa̱na daj. ⁵Ni̱ hua ni̱ca nu̱n si-xugüi unj yo unj. Ni̱ aꞌmi ru̱cu nuguanꞌ nu̱n yo unj. Ni̱ hué daj ataj nuguanꞌ daj: “Xumanꞌ xxi Babilonia huin nni ni yunꞌunj xa̱na ꞌyaj squi̱raꞌ. Ni̱ xumanꞌ daj ꞌyaj sisi̱ hua daranꞌ gaquinꞌ chruhua xungüi̱.” Hué daj ataj letra nu̱n yo yunꞌunj xa̱na daj. ⁶Ngaa ni̱ guiniꞌīnj sisi̱ hua xi̱ni unj xiꞌí si goꞌo unj si-tun ni tsínj hua sa̱ꞌ rian Yanꞌanj nga̱ ni tsínj gahuiꞌ xiꞌí si gaꞌmi ni sij si-nu̱guanꞌ Jesús. Ni̱ ni̱nꞌ ruhua ganꞌanj ruhuāj niꞌyā yunꞌunj xa̱na daj. ⁷Ngaa ni̱ gataj ángel daj gunūnj:

―Ni̱ u̱n sin ni̱ ganꞌanj ruhuá re̱ꞌ únj. Ga̱tā gu̱nun re̱ꞌ sisi̱ u̱n sin huin ruhua nuguanꞌ hui̱ nicaj yunꞌunj xa̱na daj gata nga̱ nuguanꞌ xiꞌí xucu huee ta̱j yunꞌunj xa̱na daj huin xuj xucu hua ichij chra̱, ni̱ nu̱n ichiꞌ si-cúj xuj. ⁸Ni̱ xucu huee guiniꞌí re̱ꞌ daj, ni̱ hué xuj gane asi̱j ná. Sani̱ nitaj si huaj xuj chruhua xungüi̱ acuanꞌ. Ni̱ ga̱hui xuj chruhua yuꞌuj gunu̱n ni̱nꞌ ruhua. Ngaa ni̱ ga̱ niꞌya xuj rian yanꞌa̱n. Ni̱ ga̱nꞌanj ruhua ni ngüi̱ gui̱niꞌi ni sij xucu huee huin ni sij ni ngüi̱ nitaj si ta̱j si-xugüi ni sij rian libro ta̱j si-xugüi ni ngüi̱ ga̱ne ni̱ganj nga̱ Yanꞌanj. Daj si asi̱j gaxi̱ꞌi xungüi̱, ni̱ nun guiꞌyaj Yanꞌanj sisi̱ gui̱taj si-xugüi ni ngüi̱ daj rian libro. Ni̱ xucu daj huin xucu gane asi̱j ná. Sani̱ nitaj si huaj xuj acuanꞌ. Sani̱ na̱nicaj ru̱huaꞌ yún xuj ga̱ꞌnaꞌ xuj. ⁹Güenda tsínj niꞌi sa̱ꞌ huin nuguanꞌ nan. Daj si ichij chra̱ xucu daj huin ruhuaj gata ichij dacan rian nne yunꞌunj xa̱na daj. ¹⁰Ni̱ ichij chra̱ xucu daj huin ruhuaj gata chij rey nej. Ni̱ hua gahuiꞌ u̱nꞌunꞌ rey daj. Ni̱ nne ango rey daj. Ni̱ achin ga̱ꞌnaꞌ ango rey daj. Ni̱ hua nia̱n si ga̱ne sij do̱j gue̱ güi nga̱ si-sun sij. ¹¹Ni̱ hua ango rey guisíj tu̱nj ni rey daj. Ni̱ rey daj huin xucu huee gane asi̱j ná. Sani̱ nitaj xuj nne acuanꞌ. Ni̱ nicaj dugüiꞌ rey daj nga̱ ango ichij ni rey. Ni̱ ga̱ niꞌya sij rian yanꞌa̱n.

¹²’Ni̱ ichiꞌ si-cúj xuj guiniꞌí re̱ꞌ huin ichiꞌ rey. Ni̱ achin si gui̱nicaj sun ni sij. Sani̱ urin hora na̱huin raꞌa nu̱guanꞌan ni sij sun nga̱ xucu huee ga̱huin ni sij rey. ¹³Ni̱ ꞌngo̱ guyan ga̱ ruhua ni ichiꞌ rey daj sisi̱ na̱gaꞌuiꞌ ni sij sun nicaj ni sij rian xucu huee daj ga̱huin achij síꞌ, gui̱ꞌyaj ni sij. ¹⁴Ni̱ gu̱nunꞌ ni sij nga̱ xachij ꞌni̱j. Sani̱ gui̱ꞌyaj gana xachij ꞌni̱j rian ni sij. Daj si xachij ꞌni̱j daj huin Señor huin achij rian daranꞌ ni Señor. Ni̱ huin sij rey huin achij rian daranꞌ ni rey. Ni̱ gaquínj Yanꞌanj ni tsínj nicaj dugüiꞌ nga̱ xachij ꞌni̱j. Ni̱ nacui Yanꞌanj ni sij nej. Ni̱ hua ni̱ca ruhua ni sij nej. ―Daj gataj ángel daj gunūnj.

¹⁵Ngaa ni̱ gataj ru̱huaꞌ yún ángel daj gunūnj:

―Ni̱ nnee guiniꞌí re̱ꞌ rian nne yunꞌunj xa̱na ꞌyaj squi̱raꞌ daj huin gaꞌi̱ ni̱nꞌ ruhua ni ngüi̱. Huin ni ngüi̱ ma̱n gaꞌi̱ xumanꞌ nga̱ gaꞌi̱ ni xungüi̱ nej, ni ngüi̱ aꞌmi gaꞌi̱ snanꞌanj aꞌmi ni ngüi̱ nej. ¹⁶Ni̱ ichiꞌ si-cúj xucu huee guiniꞌí re̱ꞌ daj, ni̱ si̱ gahuin xa̱nꞌ ruhua ni sij gui̱niꞌyaj ni sij yunꞌunj xa̱na daj. Ni̱ gue̱reꞌ unj, gui̱ꞌyaj ni sij. Ni̱ du̱na ni sij yunꞌunj xa̱na daj sisi̱ ga̱ nne̱ unj. Ni̱ xa̱ ni sij si-nne̱ unj. Ngaa ni̱ ga̱ri yanꞌa̱n ni sij yunꞌunj xa̱na daj rian yanꞌa̱n ga̱ca unj. ¹⁷Daj si guiꞌyaj Yanꞌanj sisi̱ gui̱ꞌyaj ni sij da̱j rúnꞌ huin ruhua Yanꞌanj. Xiꞌí daj ni̱ ꞌngo̱ hua ruhua daranꞌ ni sij sisi̱ na̱gaꞌuiꞌ ni sij si-sun ni sij rian xucu huee ga̱huin achij xúꞌ, guiꞌyaj ni sij da gui̱sij ga̱huin yya da̱j rúnꞌ ataj si-nu̱guanꞌ Yanꞌanj. ¹⁸Ni̱ yunꞌunj xa̱na guiniꞌí re̱ꞌ daj huin xumanꞌ xxi nicaj sun rian ni rey ma̱n chruhua xungüi̱. ―Daj gataj ángel daj gunūnj.

La caída de Babilonia

¹Hué dan ni̱ guiniꞌīnj ango ángel ꞌna̱ꞌ guinij xataꞌ. Ni̱ nicaj ni̱nꞌ ruhua ángel daj fuerza. Ni̱ guixigui̱n rian yoꞌój, guiꞌyaj si hua ꞌueé ni̱nꞌ ruhua ángel daj. ²Ngaa ni̱ gaguáj nucuaj ángel daj. Ni̱ gataj-áꞌ:

―Gane xumanꞌ xxi gu̱ꞌnaj Babilonia. Ni̱ xumanꞌ nan nahuin xánj ni nane̱ quij. Ni̱ nahuin xánj daranꞌ rian ni nane̱ xi̱ꞌi nej. Ni̱ nahuin si-ga̱gaꞌ daranꞌ rian ni xataj quij huin ni xuj ni xucu nun huin xa̱nꞌ ruhua ni ngüi̱. ³Daj si guixini̱ ni ngüi̱ ma̱n ni̱nꞌ ga̱chraꞌ chruhua xungüi̱, guiꞌyaj nuguanꞌ quij digyán yunꞌunj xa̱na daj rian ni sij. Ni̱ guiꞌyaj squi̱raꞌ ni rey ma̱n chruhua xungüi̱ nga̱ yunꞌunj xa̱na huin xumanꞌ xxi daj. Ni̱ ni tsínj duꞌuej ni rasu̱n, ni̱ gahuin xuruꞌue ni sij, guiꞌyaj ni rasu̱n duꞌue ni̱nꞌ ruhua mán xumanꞌ daj. ―Daj gataj ángel daj.

⁴Ngaa ni̱ gunūnj ango nane̱ gaꞌmi xataꞌ. Ni̱ gataj nane̱ daj:

―Ga̱hui ni é re̱ꞌ xumanꞌ daj huin ni é re̱ꞌ ni ngüi̱ nicoꞌ manꞌānj. Ngaa ni̱ si̱ guiꞌyaj á re̱ꞌ gaquinꞌ da̱j rúnꞌ ꞌyaj ni ngüi̱ ma̱n xumanꞌ daj. Ni̱ si̱ guiranꞌ ni é re̱ꞌ sayun da̱j rúnꞌ gui̱ranꞌ ni sij nej. ⁵Daj si nahuin nico si-ga̱quinꞌ ni sij guisi da xataꞌ. Ni̱ nanun ruhua Yanꞌanj ni nuguanꞌ quij guiꞌyaj ni sij. ⁶Ni̱ da̱j rúnꞌ guiꞌyaj quij xumanꞌ daj nga̱ ni ngüi̱, ni̱ hué daj gui̱ꞌyaj gue̱ a ni é re̱ꞌ nga̱ ni sij. Ni̱ ngaa hué daj gui̱ꞌyaj ni é re̱ꞌ, ni̱ na̱ruꞌue a ni é re̱ꞌ hui̱j rian ni sij. Ni̱ da̱j rúnꞌ guiꞌyaj xugüi ni sij ꞌngo̱ vaso nu̱n nnee yai̱ꞌ goꞌo ni ngüi̱, ni̱ hué daj ga̱ꞌuiꞌ re̱ꞌ hui̱j vaso nu̱n nnee daj go̱ꞌo ni sij. ⁷Ni̱ gaꞌmi sa̱ꞌ ni tsínj ma̱n xumanꞌ daj xiꞌí manꞌan ni sij. Ni̱ garasu̱n ni sij ni rasu̱n duꞌue ni̱nꞌ ruhua nej. Hué dan ni̱ da̱j rúnꞌ guiꞌyaj quij ni sij, ni̱ hué daj gui̱ꞌyaj ni é re̱ꞌ sisi̱ gui̱ranꞌ ni sij sayun. Ni̱ gui̱ꞌyaj á re̱ꞌ sisi̱ ga̱co ni sij nej. Daj si ani ruhua ni tsínj ma̱n xumanꞌ daj da̱j rúnꞌ ani ruhua ꞌngo̱ yunꞌunj nicaj sun huin reina. Ni̱ ataj niman unj: “Nicaj sūnj nnēj da̱j rúnꞌ nicaj sun reina. Sé yunꞌunj mmij huīnj mánj. Ni̱ nitaj a̱man ga̱cōj, gui̱ꞌyaj sayun mánj.” Hué daj ataj unj niman unj. ⁸Xiꞌí daj ni̱ urin güi ga̱ꞌnaꞌ ni sayun gui̱ranꞌ unj. Ni̱ ga̱huiꞌ nico ni sij chruhua xumanꞌ huin unj. Ni̱ ga̱co ni sij nej. Ni̱ ga̱chin xiꞌna̱ riqui ni sij nej. Ni̱ ga̱ca ni sij rian yanꞌa̱n nej. Daj si nucuaj ni̱nꞌ ruhua Yanꞌanj huin Señor. Ni̱ Yanꞌanj huin si na̱guiꞌyaj yya si-ga̱quinꞌ ni sij. ―Daj gataj nane̱ ꞌna̱ꞌ xataꞌ daj.

⁹Ni̱ ngaa gui̱niꞌi ni rey ma̱n chruhua xungüi̱ ahui gatseꞌ aca xumanꞌ daj, ni̱ ducu ga̱co ni sij. Ni̱ ga̱nani ruhua ni sij. Daj si da̱j rúnꞌ ꞌyaj ꞌngo̱ tsínj ngaa ꞌyaj squi̱raꞌ sij nga̱ ꞌngo̱ yunꞌunj xa̱na, ni̱ hué daj guiꞌyaj ni rey daj gaquinꞌ nga̱ xumanꞌ daj. Ni̱ garasu̱n ni sij ni rasu̱n duꞌue nga̱ ni ngüi̱ ma̱n chruhua xumanꞌ daj. ¹⁰Ni̱ xiꞌí si xuꞌuiꞌ ni rey daj, ni̱ gui̱niquinꞌ ga̱nꞌ ni sij gui̱niꞌyaj ni sij da̱j gui̱ranꞌ xumanꞌ daj sayun. Ni̱ ga̱taj ni sij:

―Niqui niman xumanꞌ xxi gu̱ꞌnaj Babilonia huin xumanꞌ nicaj nico fuerza. Daj si urin hora, ni̱ guisíj castigo guiranꞌ xumanꞌ daj. ―Daj ga̱taj ni sij.

¹¹Ni̱ ni tsínj duꞌuej ni rasu̱n ma̱n chruhua xungüi̱, ni̱ ducu ga̱co ni sij xiꞌí xumanꞌ daj. Ni̱ na̱ni ruhua ni sij xiꞌí si nitaj a̱ ꞌngo̱ ni ngüi̱ gui̱ran rasu̱n duꞌuej ni sij. ¹²Ni̱ si̱ ganeꞌ gagaꞌ oro nga̱ gagaꞌ plata nej, yej nia̱ꞌ nej, yej huin perla nga̱ atsij sa̱ꞌ gu̱ꞌnaj lino nej, atsij jnitaj nga̱ atsij gu̱ꞌnaj seda nej, atsij mare; nga̱ daranꞌ chrun guinꞌ da̱j nej, ni rasu̱n ri ni sij huin cúj gu̱ꞌnaj márfil nej, ni rasu̱n ri ni sij huin chrun nia̱ꞌ nej, gagaꞌ mmíj nga̱ gagaꞌ hierro nej, yej gu̱ꞌnaj mármol ¹³nga̱ canela nej, especia guinꞌ da̱j nej, siquíj nej, mirra nga̱ olíbano nej, nnee vino nga̱ gasiti nej, chru sa̱ꞌ huin harina nej, strigo nga̱ xucu nej, xachij nej, guayo nej, carreta nej, tsínj ꞌyaj sun yu̱n huin niman ni ngüi̱ nej. ¹⁴Ni̱ ga̱taj ni sij rian ni tsínj ma̱n xumanꞌ daj:

―Ni̱ garanꞌ ruhua ni é re̱ꞌ nga̱ ni chruj nia̱ꞌ ayu chra̱ chrun. Sani̱ yya̱j ni̱ nitaj si nicaj ni é re̱ꞌ xa̱ ni é re̱ꞌ ni rasu̱n sa̱ꞌ da mánj. Daj si ni̱ganj guereꞌ ni rasu̱n duꞌue nga̱ daranꞌ ni rasu̱n sa̱ꞌ. Ni̱ nitaj a̱man gui̱riꞌ ni é re̱ꞌ ni rasu̱n da ga̱ mánj. ―Daj gataj ni sij.

¹⁵Ni̱ ni tsínj duꞌuej ni rasu̱n, ni̱ gahuin xuruꞌue ni sij, guiꞌyaj xumanꞌ daj. Ni̱ xiꞌí si xuꞌuiꞌ ni sij, ni̱ gui̱niquinꞌ ga̱nꞌ ni sij gui̱niꞌyaj ni sij da̱j gui̱ranꞌ xumanꞌ daj sayun. Ni̱ ga̱co ni sij. Ni̱ ga̱nani ruhua ni sij nej. ¹⁶Ni̱ ga̱taj ni sij:

―Niqui niman xumanꞌ xxi daj. Daj si da̱j rúnꞌ hua ꞌngo̱ yunꞌunj xa̱na ngaa nu̱n unj atsij lino sa̱ꞌ nga̱ atsij jnitaj nej, atsij mare nga̱ gagaꞌ oro nej, yej nia̱ꞌ nga̱ yej perla nej, ni̱ hué daj hua xumanꞌ xxi daj. ¹⁷Sani̱ urin hora ni̱ guereꞌ daranꞌ ni rasu̱n duꞌue daj. ―Daj ga̱taj ni sij.

Ni̱ guiniquinꞌ ga̱nꞌ daranꞌ ni tsínj duguáj rio̱ achéj rian nnee nga̱ daranꞌ ni tsínj achéj nga̱ rio̱ nej, ni tsínj ꞌyaj sun chruhua ni rio̱ nej. ¹⁸Ni̱ ngaa guiniꞌi ni sij gahui gatseꞌ aca xumanꞌ daj, ni̱ gaguáj ni sij. Ni̱ gataj ni sij:

―Ni̱ u̱n xumanꞌ huin achij da̱j rúnꞌ huin achij xumanꞌ nan, ruhua á re̱ꞌ únj. ―Daj ga̱taj ni sij.

¹⁹Ngaa ni̱ guidaꞌa ni sij yoꞌój yaj gara ni sij chra̱ ni sij. Ni̱ gaco ni sij. Ni̱ ducu ganani ruhua ni sij. Ni̱ gaguáj ni sij gataj ni sij:

―Niqui niman xumanꞌ xxi daj. Ni̱ gahuin xuruꞌue daranꞌ ni tsínj nicaj rio̱ achéj rian nnee. Ni̱ gahuin xuruꞌue ni sij, guiꞌyaj sanꞌanj mán xumanꞌ xxi daj. Sani̱ urin hora, ni̱ guereꞌ daranꞌanj. ²⁰Ni̱ ga̱huin nia̱ꞌ ruhua á re̱ꞌ si mán xataꞌ. Ni̱ ga̱huin nia̱ꞌ ruhua á re̱ꞌ huin ín re̱ꞌ ni ngüi̱ hua sa̱ꞌ rian Yanꞌanj nej, ni tsínj nataꞌ si-nu̱guanꞌ Jesús rian ni ngüi̱ nej, ni tsínj gaꞌmi si-nu̱guanꞌ Yanꞌanj rian ni ngüi̱ nej. Daj si guiꞌyaj Yanꞌanj castigo xumanꞌ daj xiꞌí gaquinꞌ guiꞌyaj ni sij rian án re̱ꞌ. ―Daj gataj ni sij.

²¹Ngaa ni̱ nachi nicaj ꞌngo̱ ángel nucuaj ꞌngo̱ yej xxi rúnꞌ hua to̱ xa̱chij huaj. Ni̱ dugüéj ángel daj chruhua nnee yanꞌanj. Ngaa ni̱ gataj ángel daj:

―Hué daj gui̱ranꞌ gue̱ re̱ꞌ huín re̱ꞌ xumanꞌ xxi Babilonia. Ni̱ nitaj a̱man gu̱rugüiꞌ re̱ꞌ gui̱niꞌi ni ngüi̱ ga̱ mánj. ²²Ni̱ xumanꞌ daj nitaj a̱man gui̱xingaꞌ gu̱nun ni ngüi̱ ga̱ra ni sij yánꞌanj nu̱n gaꞌi̱ yaꞌa̱ nga̱ ni tsínj aráj ria̱ nej, ni tsínj aꞌyanj trompeta nej. Ni̱, ni̱ a̱ ꞌngo̱ ni tsínj si̱ guiꞌyaj sun si-sun ni sij. Ni̱ si̱ gunun ni ngüi̱ gui̱xingaꞌ ngaa duguáj ni sij molino chruhua xumanꞌ da ga̱ mánj. ²³Ni̱ nitaj a̱man gui̱xiguin yanꞌa̱n xumanꞌ da ga̱ mánj. Ni̱ si̱ gunun ni ngüi̱ ga̱ꞌmi tsínj xa̱caj yunꞌunj xa̱na nga̱ nuguanꞌ ga̱ꞌmi yunꞌunj xa̱na xa̱caj nica̱ daj. Daj si huin achij ni tsínj duꞌuej ni rasu̱n ma̱n xumanꞌ daj scanij ni tsínj ma̱n chruhua xungüi̱ nan. Ni̱ digyaꞌ yunꞌunj ni é re̱ꞌ daranꞌ ni ngüi̱ ma̱n chruhua xungüi̱ ngaa guiꞌyaj stuꞌuaj a ni é re̱ꞌ. ²⁴Ni̱ xumanꞌ daj daꞌui gaquinꞌ xiꞌí si-tun manꞌan ni tsínj gaꞌmi si-nu̱guanꞌ Yanꞌanj nga̱ si-tun manꞌan ni tsínj hua sa̱ꞌ rian Yanꞌanj nej, si-tun daranꞌ ni ngüi̱ gahuiꞌ chruhua xungüi̱, guiꞌyaj ni sij. ―Daj gataj ángel daj rian xumanꞌ xxi gu̱ꞌnaj Babilonia.

Alabanzas en el cielo

¹Ngaa guisíj ni̱ gunūnj ꞌngo̱ nane̱ nucuaj gaꞌmi nico ni̱nꞌ ruhua ni ngüi̱ xataꞌ. Ni̱ gataj ni sij:

Aleluya. Danꞌanj néꞌ huin si nacaj néꞌ.

Ni̱ ruhuaj si gui̱nun yanꞌanj néꞌ rian Yanꞌanj.

Ni̱ ruhuaj si ga̱ꞌmi sa̱ꞌ néꞌ rian Yanꞌanj.

Ni̱ ni̱nꞌ ruhua nicaj Danꞌanj néꞌ fuerza.

²Daj si urin nuguanꞌ xa̱ngaꞌ nga̱ urin nuguanꞌ ni̱ca aꞌmi Yanꞌanj ngaa na̱guiꞌyaj yya si-ga̱quinꞌ ni ngüi̱.

Ni̱ guiꞌyaj Yanꞌanj castigo yunꞌunj xa̱na huin achij guiꞌyaj squi̱raꞌ daj.

Daj si gahuin quij ni ngüi̱ ma̱n chruhua xungüi̱, guiꞌyaj unj nga̱ chrej quij digyán unj rian ni sij.

Ni̱ guiꞌyaj Yanꞌanj castigo yunꞌunj xa̱na daj xiꞌí si dagahuiꞌ unj ni ngüi̱ nicoꞌ Yanꞌanj.

Daj gataj ni ngüi̱ daj.

³Ngaa ni̱ gataj ru̱huaꞌ yún ni sij:

―Aleluya. Ni̱ganj ahui gatseꞌ xumanꞌ daj huin yunꞌunj xa̱na guiꞌyaj squi̱raꞌ. ―Daj gataj ni sij.

⁴Ngaa ni̱ ganiquinꞌ ráj da̱coj ico̱ ga̱nꞌanj ni tsínj huin achij rian yoꞌój nga̱ ga̱nꞌanj ni xucu hua ni̱ꞌnaꞌ. Ni̱ gaꞌmi sa̱ꞌ ni sij rian Yanꞌanj nne rian chrun xila sa̱ꞌ. Ni̱ gataj ni sij:

―Amén. Aleluya. ―Daj gataj ni sij.

⁵Ngaa ni̱ gunūnj gaꞌmi ꞌngo̱ nane̱ rian nne chrun xila sa̱ꞌ daj. Ni̱ gataj nane̱ daj:

Ga̱ꞌmi sa̱ꞌ á re̱ꞌ rian Danꞌanj néꞌ huin ín re̱ꞌ tsínj ꞌyaj sun rian Yanꞌanj.

Ni̱ nu̱n yanꞌanj án re̱ꞌ rian Yanꞌanj nej.

Ni̱ nitaj si ga̱huin sisi̱ huin achij ni é re̱ꞌ, asi̱ nitaj si huin achij ni é re̱ꞌ.

Daj gataj nane̱ daj.

⁶Ngaa ni̱ da̱j rúnꞌ huin ngaa aꞌmi gaꞌi̱ ni̱nꞌ ruhua ni ngüi̱, ni̱ hué daj gunūnj. Ni̱ da̱j rúnꞌ huin rian nicoꞌ nico nnee rian huej, ni̱ hué daj gahuin gari̱n gunūnj. Ni̱ da̱j rúnꞌ huin ngaa ducu gaguáj duꞌui, ni̱ hué daj gahuin gari̱n gunūnj nej. Ni̱ gataj ni ngüi̱ daj:

Aleluya.

Daj si nucuaj ni̱nꞌ ruhua Señor huin Danꞌanj néꞌ.

Ni̱ nicaj sun Señor rian daranꞌanj.

⁷Hué dan ni̱ ga̱huin nia̱ꞌ ruhua néꞌ.

Ni̱ ga̱ꞌmi sa̱ꞌ néꞌ rian Señor huin Yanꞌanj.

Daj si ꞌna̱ꞌ gui̱sij hora ga̱huin guiꞌyanj xa̱caj xachij ꞌni̱j yunꞌunj xa̱na ga̱huin nica̱ sij.

⁸Ni̱ gaꞌuiꞌ Yanꞌanj sisi̱ gu̱nun unj atsij duꞌue huin lino sa̱ꞌ.

Ni̱ ran rian atsij sa̱ꞌ daj.

Ni̱ atsij duꞌue daj huin si sa̱ꞌ guiꞌyaj ni ngüi̱ hua sa̱ꞌ rian Yanꞌanj.

Daj gataj ni sij.

La cena de las bodas del Cordero

⁹Ngaa ni̱ gataj ángel daj gunūnj:

―Ga̱run re̱ꞌ nuguanꞌ nan rian yanj: “Hua ꞌueé rian ni ngüi̱ ga̱quinj Yanꞌanj ga̱nꞌanj rian ga̱huin guiꞌyanj na̱raꞌa xachij ꞌni̱j.” Hué daj ga̱run re̱ꞌ. ―Gataj ángel daj.

Ni̱ gataj ru̱huaꞌ yún ángel daj:

―Nan huin nuguanꞌ xa̱ngaꞌ ꞌna̱ꞌ rian manꞌan Yanꞌanj. ―Daj gataj ángel daj gunūnj.

¹⁰Ngaa ni̱ ganiquinꞌ ráj dacō rian ángel sisi̱ gui̱nun yanꞌān ángel daj. Sani̱ gataj ángel daj gunūnj:

―Si̱ guiꞌyáj re̱ꞌ da mánj. Daj si huēj ꞌyaj sun rian Yanꞌanj nga̱ re̱ꞌ nga̱ ni jnánj re̱ꞌ huin ni sij ni tsínj hua ni̱ca ruhua nga̱ nuguanꞌ gaꞌmi Jesús. Gui̱nicóꞌ re̱ꞌ urin Yanꞌanj xa̱ngaꞌ. Daj si ni nuguanꞌ gaꞌmi Jesús huin ni nuguanꞌ gunun ni tsínj gaꞌmi si-nu̱guanꞌ Yanꞌanj. ―Daj gataj ángel daj.

El jinete del caballo blanco

¹¹Ngaa ni̱ guiniꞌīnj sisi̱ naxiꞌnij xataꞌ. Ni̱ gurugüiꞌ ꞌngo̱ guayo ga̱tsi. Ni̱ tsínj ta̱j guayo daj gu̱ꞌnaj síꞌ tsínj hua ni̱ca ruhua. Ni̱ hué daj gu̱ꞌnaj síꞌ tsínj xa̱ngaꞌ nej. Ni̱ ꞌyaj ni̱ca sij ngaa ꞌyaj yya sij si-ga̱quinꞌ ni ngüi̱. Ni̱ ꞌyaj ni̱ca sij ngaa ununꞌ sij nej. ¹²Ni̱ da̱j rúnꞌ xigui̱n yanꞌa̱n, ni̱ hué daj xigui̱n rundij rian sij. Ni̱ nu̱n chra̱ sij gaꞌi̱ corona. Ni̱ hua ni̱ca si-xugüi sij chra̱ sij. Sani̱ urin manꞌan sij niꞌi da̱j gu̱ꞌnaj sij. ¹³Ni̱ nu̱n sij ꞌngo̱ atsij gane tun. Ni̱ si-xugüi sij huin: SI-NUGUANꞌ YANꞌANJ. ¹⁴Ni̱ nicoꞌ ni snado mán xataꞌ ru̱cu sij. Ni̱ nu̱n ni síꞌ atsij ga̱tsi hua sa̱ꞌ gu̱ꞌnaj lino. Ni̱ ta̱j ni síꞌ guayo ga̱tsi nicoꞌ ni síꞌ rucú sij. ¹⁵Ni̱ nu̱n ꞌngo̱ espada hua̱ chruhua duꞌua sij. Ni̱ gui̱ranꞌ xi̱ꞌi ni ngüi̱ ma̱n chruhua ni xungüi̱, gui̱ꞌyaj sij nga̱ espada daj. Ni̱ gui̱nicaj sun sij nga̱ chrun niꞌí huin gagaꞌ hierro. Ni̱ da̱j rúnꞌ ꞌyaj ꞌngo̱ tsínj ngaa rún sij uva sisi̱ da̱gamanꞌ nnee uva daj, ni̱ hué daj gui̱ꞌyaj sij castigo ni ngüi̱ ngaa na̱guiꞌyaj yya sij si-ga̱quinꞌ ni ngüi̱. Daj si ni̱nꞌ ruhua gaꞌman ruhua Yanꞌanj nga̱ xiꞌí si-ga̱quinꞌ ni sij. Ni̱ Yanꞌanj huin nucuaj ni̱nꞌ ruhua. ¹⁶Ni̱ nu̱n si-xugüi sij rian si-ganꞌ sij nga̱ rian daꞌma̱n sij. Ni̱ si-xugüi sij huin: REY RIAN NI REY NGA̱ SENOR RIAN NI SENOR.

¹⁷Ngaa ni̱ guiniꞌīnj ꞌngo̱ ángel niquinꞌ dani rian güi. Ni̱ gaguáj nucuaj ángel daj. Ni̱ gataj ángel rian daranꞌ xataj huéj xataꞌ:

―Na̱huin yuꞌ ni é re̱ꞌ xa̱ nico ni é re̱ꞌ rian ga̱huin guiꞌyanj gui̱ꞌyaj Yanꞌanj. ¹⁸Ngaa ni̱ xa̱ ni é re̱ꞌ si-nnee̱ ni rey nga̱ si-nnee̱ ni capitán nej, si-nnee̱ ni tsínj nucuaj nga̱ si-nnee̱ ni guayo nej, si-nnee̱ ni tsínj ta̱j guayo nga̱ si-nnee̱ daranꞌ ni tsínj nun ꞌyaj sun yu̱n rian xuruꞌue nga̱ ni tsínj ꞌyaj sun yu̱n rian xuruꞌue nej, ni tsínj huin achij nga̱ ni tsínj nitaj si huin achij nej. ―Daj gataj ángel daj.

¹⁹Ngaa ni̱ guiniꞌīnj xucu huee daj nga̱ ni rey ma̱n chruhua xungüi̱ nga̱ ni snado nicoꞌ ni rey daj. Ni̱ nahuin yuꞌ ni sij sisi̱ gu̱nunꞌ ni sij nga̱ tsínj ta̱j guayo ga̱tsi daj nga̱ ni snado nicoꞌ rucú síꞌ. ²⁰Ni̱ guidaꞌa tsínj ta̱j guayo nga̱ si-snado sij xucu huee daj nga̱ tsínj gaꞌmi nuguanꞌ digyaꞌ yunꞌunj. Ni̱ hué síꞌ huin tsínj guiꞌyaj sun nico rian xucu huee daj. Ni̱ xiꞌí daj digyaꞌ yunꞌunj sij ni tsínj gaꞌuej ruhua gui̱nun si-daꞌngaꞌ xucu daj manꞌan ni síꞌ. Ni̱ guinun yanꞌanj ni síꞌ yanꞌanj guiꞌyaj raꞌa ni ngüi̱ huin ꞌngo̱ daꞌngaꞌ duꞌua xucu daj. Ni̱ hua ni̱ꞌnaꞌ xucu huee nga̱ tsínj digyaꞌ yunꞌunj daj dugüéj ni sij chruhua nnee yanꞌanj rian aca yanꞌa̱n nga̱ yoꞌój sufre. ²¹Ni̱ espada nu̱n duꞌua tsínj ta̱j guayo ga̱tsi daj guiꞌyaj sisi̱ gahuiꞌ ni tsínj gunánj huin ni tsínj nicoꞌ ru̱cu nu̱ngüej síꞌ. Ni̱ guiriꞌ nico ni xataj xa xuj si-nnee̱ ni tsínj gahuiꞌ daj.

Los mil años

¹Ngaa ni̱ guiniꞌīnj ꞌna̱ꞌ guinij ꞌngo̱ ángel xataꞌ. Ni̱ nicaj ángel daj ꞌngo̱ rian gagaꞌ llave naꞌnij duꞌua yuꞌuj gunu̱n ni̱nꞌ ruhua. Ni̱ nicaj ángel daj ꞌngo̱ cadena xxi nej. ²Ni̱ guidaꞌa ángel daj xucu xucuáj huin xucuáj gane asi̱j ná. Ni̱ xucuáj daj huin sichre. Ni̱ Satanás gu̱ꞌnaj síꞌ. Ngaa ni̱ numij ángel daj ꞌngo̱ mí yoꞌ Satanás. ³Ngaa ni̱ dugüéj ángel daj Satanás chruhua yuꞌuj gunu̱n ni̱nꞌ ruhua daj. Ni̱ naránj ángel daj rian yuꞌuj. Ni̱ garun ángel daj sello duꞌua yuꞌuj sisi̱ si̱ gahui Satanás. Ngaa ni̱ si̱ digyaꞌ yunꞌunj sichre Satanás ni ngüi̱ ma̱n chruhua xungüi̱ da gui̱sij mí yoꞌ daj. Hué dan ni̱ ngaa gui̱sij mí yoꞌ daj, ni̱ ga̱huin níꞌnij rian sichre do̱j aj.

⁴Hué dan ni̱ guiniꞌīnj ni chrun xila sa̱ꞌ. Ni̱ rian ni chrun xila daj nne ni tsínj hua gaꞌninꞌ Yanꞌanj sun rian ni sij sisi̱ na̱guiꞌyaj yya ni sij nga̱ si-ga̱quinꞌ ni ngüi̱. Ni̱ guiniꞌīnj ni tsínj gahuiꞌ ngaa gaꞌninꞌ ni sij chra̱ ni síꞌ xiꞌí si gaꞌmi ni síꞌ si-nu̱guanꞌ Jesús nga̱ si-nu̱guanꞌ Yanꞌanj. Ni̱ nun guinicoꞌ ni tsínj daj xucu huee nga̱ xucu guiꞌyaj raꞌa ni sij huin ꞌngo̱ daꞌngaꞌ duꞌua xucu daj. Daj si nun gaꞌuej ruhua ni sij sisi̱ gui̱nun si-daꞌngaꞌ xuj yo ni sij nga̱ raꞌa ni sij. Ni̱ ganáꞌnij ni sij gui̱man ni sij mí yoꞌ. Ni̱ gahuin achij ni sij nga̱ Cristo. ⁵Sani̱ ango ni níman, ni̱ nun ga̱naꞌnij ni sij da guisíj mí yoꞌ. Ni̱ hué nan huin ngaa ganáꞌnij sini ni ngüi̱ scanij ni níman. ⁶Ni̱ hua ꞌueé rian ni ngüi̱ ga̱naꞌnij sini daj. Ni̱ hua sa̱ꞌ niman ni sij rian Yanꞌanj. Ni̱ si̱ gahuiꞌ ni sij ngaa gui̱sij hui̱j ga̱huiꞌ ni ngüi̱. Sani̱ ga̱huin ni sij chrej rian Yanꞌanj nga̱ rian Cristo. Ni̱ gui̱nicaj sun ni sij gahuin achij ni sij mí yoꞌ nga̱ Cristo.

⁷Ngaa gui̱sij mí yoꞌ daj, ni̱ na̱chi sichre Satanás chruhua ducuaga̱ꞌ. ⁸Ngaa ni̱ ga̱hui sichre di̱gyaꞌ yunꞌunj sij ni ngüi̱ ma̱n ni̱nꞌ ga̱chraꞌ chruhua xungüi̱. Ni̱ hué daj di̱gyaꞌ yunꞌunj sichre ni tsínj ma̱n ꞌngo̱ yuꞌuj gu̱ꞌnaj Gog nga̱ yuꞌuj gu̱ꞌnaj Magog. Ni̱ na̱huin yuꞌ ni snado sisi̱ gu̱nunꞌ ni sij, gui̱ꞌyaj sichre Satanás. Ni̱ da̱j rúnꞌ mán nico ni yoꞌój chru duꞌua nnee yanꞌanj, ni̱ hué daj nico ni snado daj. ⁹Ni̱ daꞌ gara daꞌaj xungüi̱ guiꞌyaj ni sij ngaa gahui ni sij ganꞌanj ni sij. Ni̱ ganica̱j ni sij rucú xumanꞌ ma̱n ni ngüi̱ hua sa̱ꞌ rian Yanꞌanj huin xumanꞌ ꞌi̱ ruhua Yanꞌanj. Sani̱ gayu yanꞌa̱n xataꞌ, guiꞌyaj Yanꞌanj. Ni̱ gaca ni sij, guiꞌyaj yanꞌa̱n daj. ¹⁰Ni̱ sichre digyaꞌ yunꞌunj ni sij, sani̱ dugüéj Yanꞌanj sichre daj chruhua nnee yanꞌanj rian aca yanꞌa̱n nga̱ yoꞌój sufre. Ni̱ yuꞌuj daj nu̱n xucu huee nga̱ tsínj digyaꞌ yunꞌunj ni ngüi̱ nej. Ngaa ni̱ nugüi ni̱ganꞌ gui̱ranꞌ ni sij nico sayun. Ni̱ nitaj a̱man guinaꞌaj yanꞌa̱n daj.

El juicio ante el gran trono blanco

¹¹Hué dan ni̱ guiniꞌīnj ꞌngo̱ chrun xila xxi sa̱ꞌ ga̱tsi. Ni̱ guiniꞌīnj si nne rian chrun xila daj. Ni̱ gunánj xataꞌ nga̱ xungüi̱ rian si nne chrun xila sa̱ꞌ daj. Ni̱ nun nariꞌ nu̱ngüe rian gui̱niquinꞌ nu̱ngüe. ¹²Ni̱ guiniꞌīnj ni níman huin achij nga̱ ni níman nitaj si huin achij. Ni̱ niquinꞌ ni sij rian chrun xila sa̱ꞌ rian nne Yanꞌanj. Ngaa ni̱ naxiꞌnij ni si mán xataꞌ rian ni yanj libro. Ni̱ naxiꞌnij ni sij rian ango libro huin libro ta̱j si-xugüi ni ngüi̱ ga̱ne ni̱ganj nga̱ Yanꞌanj. Ni̱ da̱j rúnꞌ hua ni̱ca rian ni libro daj si guiꞌyaj ni ngüi̱ ngaa hua ni̱ꞌnaꞌ ni sij, ni̱ hué daj naguiꞌyaj yya Yanꞌanj nga̱ si-ga̱quinꞌ ni sij. ¹³Ngaa ni̱ nagaꞌuiꞌ nnee yanꞌanj ni tsínj gahuiꞌ ma̱n chruhua nnee yanꞌanj daj. Ni̱ gaꞌna̱ꞌ ni níman gahuiꞌ rian ma̱n ni níman. Ni̱ naguiꞌyaj yya Yanꞌanj nga̱ si-ga̱quinꞌ ni sij da̱j rúnꞌ guiꞌyaj ni sij. ¹⁴Ni̱ dugüéj Yanꞌanj yuꞌuj rian achinꞌ ni níman chruhua nnee yanꞌanj huin rian aca yanꞌa̱n. Ni̱ si̱ gahuiꞌ ni ngüi̱ ga̱ mánj. Ni̱ rian aca yanꞌa̱n daj huin si gui̱sij hui̱j ga̱huiꞌ ni ngüi̱. ¹⁵Ni̱ yuꞌuj daj dugüéj Yanꞌanj ni ngüi̱ nitaj si ta̱j ni̱ca si-xugüi rian libro ta̱j si-xugüi ni ngüi̱ ga̱ne ni̱ganj nga̱ Yanꞌanj.

Cielo nuevo y tierra nueva

¹Hué dan ni̱ guiniꞌīnj hua na̱ca xataꞌ nga̱ yoꞌój. Daj si hua ganahuij xataꞌ nga̱ yoꞌój hua acuanꞌ. Ni̱ hué daj ganahuij nnee yanꞌanj nej. ²Huēj huin Juan. Ni̱ guiniꞌīnj ꞌna̱ꞌ guinij xumanꞌ hua sa̱ꞌ rian Yanꞌanj huin xumanꞌ Jerusalén na̱ca. Ni̱ da̱j rúnꞌ naguiꞌyaj sa̱ꞌ ꞌngo̱ yunꞌunj xa̱na manꞌan unj ngaa xa̱caj unj ꞌngo̱ tsínj, ni̱ hué daj hua xumanꞌ daj. ³Ni̱ gunūnj ꞌngo̱ nane̱ nucuaj gaꞌmi xataꞌ. Ni̱ gataj nane̱ daj:

―Nne ducuá Yanꞌanj scanij ni ngüi̱ acuanꞌ. Ni̱ Yanꞌanj huin si ga̱ne nga̱ ni sij. Ni̱ ga̱huin ni sij ni ngüi̱ nicoꞌ Yanꞌanj. Ni̱ hué manꞌan Yanꞌanj ga̱ne nu̱guanꞌan nga̱ ni sij. ⁴Ni̱ na̱ruꞌui Yanꞌanj daranꞌ nnee nicoꞌ rian ni sij. Ni̱ si̱ gahuiꞌ ni sij ga̱ mánj. Ni̱ si̱ gaco ni sij nej. Ni̱ si̱ nani ruhua ni sij. Ni̱ si̱ gaꞌngaj ni sij. Daj si hua ganahuij daranꞌ rasu̱n gachin asi̱j sini. ―Daj gataj nane̱ daj.

⁵Ngaa ni̱ gataj si nne rian chrun xila sa̱ꞌ daj:

―Ni̱ꞌyaj á re̱ꞌ. Huēj gui̱ꞌyaj na̱ca daranꞌ ni rasu̱n. ―Daj gataj-áꞌ.

Ni̱ gataj ru̱huaꞌ yún-únꞌ gunūnj:

―Ga̱run re̱ꞌ nuguanꞌ nan rian yanj. Daj si nuguanꞌ nan huin nuguanꞌ xa̱ngaꞌ yya. ―Daj gataj si nne rian chrun xila sa̱ꞌ daj.

⁶Ngaa síj ni̱ gataj-áꞌ:

―Guisíj ganahui. Huēj huin tsínj gu̱ꞌnaj Alfa nga̱ Omega. Daj si Alfa huin letra gaxi̱ꞌi asi̱j sini ya̱n. Ni̱ Omega huin letra nicoꞌ da ne̱ꞌ ru̱cu. Ni̱ huēj huin tsínj niquinꞌ asi̱j sini. Ni̱ huēj huin si gui̱niquinꞌ ni̱ganj ni̱nꞌ. Sisi̱ na̱goꞌo ꞌngo̱ tsínj daj nnee, ni̱ ga̱ꞌuiꞌ yūnj go̱ꞌo sij rian ahui nnee gui̱ꞌyaj si ga̱ne ni̱ganj sij. ⁷Ni̱ tsínj gui̱ꞌyaj gana rian nuguanꞌ quij, ni̱ na̱huin raꞌa sij daranꞌ rasu̱n nan. Ni̱ ga̱huin Danꞌanj sij manꞌānj. Ni̱ ga̱huin daꞌnī sij. ⁸Sani̱ rian aca yanꞌa̱n nga̱ yoꞌój sufre ga̱nꞌanj ni tsínj xuꞌuiꞌ nga̱ ni tsínj nun xu̱man ruhua ni̱ꞌyaj manꞌānj nej, tsínj ꞌyaj quij nej, ni tsínj dagahuiꞌ níman nga̱ ni tsínj ꞌyaj stuꞌuaj nej, ni tsínj nicoꞌ yanꞌanj ꞌyaj raꞌa ni sij nga̱ daranꞌ ni tsínj aꞌmi yya̱ nej. Ni̱ rian aca yanꞌa̱n daj huin si guisíj hui̱j ga̱huiꞌ ni ngüi̱. ―Daj gataj si nne rian chrun xila sa̱ꞌ daj.

La nueva Jerusalén

⁹Ngaa ni̱ gaꞌna̱ꞌ ꞌngo̱ ni ichij ángel nicaj ichij vaso huin ni vaso ara ichij ni sayun gui̱ranꞌ ni ngüi̱ ngaa ruhua ga̱nahuij xungüi̱. Ni̱ gataj ángel daj gunūnj:

―Ga̱huaꞌ re̱ꞌ nan, ni̱ di̱gyānj rián re̱ꞌ da̱j hua yunꞌunj xa̱na xa̱caj tsínj huin xachij ꞌni̱j gui̱niꞌí re̱ꞌ. Ni̱ ga̱huin nica̱ sij unj. ―Daj gataj ángel daj gunūnj.

¹⁰Ngaa ni̱ nicaj ángel nimānj ganꞌān chra̱ ꞌngo̱ quij xa̱can xxi. Ni̱ digyán ángel daj xumanꞌ sa̱ꞌ xxi huin Jerusalén riānj. Ni̱ xataꞌ ꞌna̱ꞌ guinij xumanꞌ Jerusalén rian Yanꞌanj. ¹¹Ni̱ ran xumanꞌ daj da̱j rúnꞌ ran rian nne Yanꞌanj. Ni̱ xigui̱n sa̱ꞌ xumanꞌ daj da̱j rúnꞌ xigui̱n sa̱ꞌ ꞌngo̱ yej duꞌue nico. Ni̱ da̱j rúnꞌ hua ꞌngo̱ yej gu̱ꞌnaj jaspe hua yej. Ni̱ da̱j rúnꞌ xigui̱n pidrio sa̱ꞌ ꞌyaj güi, ni̱ hué daj hua xumanꞌ daj. ¹²Ni̱ niquinꞌ ꞌngo̱ xingá yej xxi xa̱can anica̱j duꞌua xumanꞌ daj. Ni̱ hua xu̱huij rian xingá yej daj. Ni̱ daꞌ go̱ꞌngo rian xingá yej niquinꞌ ꞌngo̱ ángel. Ni̱ hua ni̱ca nu̱n si-xugüi xu̱huij xiꞌninꞌ huin ni daꞌníj Israel rian go̱ꞌngo rian xingá yej. ¹³Ni̱ ta̱j hua̱ꞌnij rian xingá yej ne̱ꞌ rian síj güi. Ni̱ ta̱j yaꞌnij rian xingá yej ne̱ꞌ chrej norte. Ni̱ ta̱j yaꞌnij rian xingá yej ne̱ꞌ sur. Ni̱ ta̱j yaꞌnij rian xingá yej ne̱ꞌ rian atúj güi nej. ¹⁴Ni̱ ngaj xu̱huij yej xxi xiꞌí xingá yej daj. Ni̱ rian ni yej daj, ni̱ hua ni̱ca si-xugüi xu̱huij ni tsínj huin apóstol huin ni tsínj gaꞌmi si-nu̱guanꞌ xachij ꞌni̱j huin Jesucristo.

¹⁵Ni̱ nicaj ángel gaꞌmi ngāj daj ꞌngo̱ rianj huin oro sisi̱ gui̱riun ángel xumanꞌ daj nga̱ ni rian xingá yej nej, xingá yej nej. ¹⁶Ni̱ uyan garaꞌ aninꞌ ga̱nꞌanj squina xumanꞌ daj. Ni̱ guiriun ángel xumanꞌ daj nga̱ rianj. Ni̱ hui̱j mí táj yahuij ciento kilómetro huin rian garaꞌ nga̱ rian chreꞌ. Ni̱ hué daj huin güenda xa̱canj nej. ¹⁷Ngaa ni̱ guiriun ángel daj xingá yej. Ni̱ guisíj ꞌngo̱ ciento táj yahuij xia ga̱nꞌanj dane nicaj xingá yej daj. Ni̱ da̱j rúnꞌ riúnꞌ nga̱ daneꞌ, ni̱ hué daj guiꞌyaj ángel daj. ¹⁸Ni̱ xingá yej daj huin yej gu̱ꞌnaj jaspe. Ni̱ ni̱nanj oro huin xumanꞌ daj. Ni̱ rúnꞌ hua pidrio aca̱ hua oro daj. ¹⁹Ni̱ nia̱ꞌ hua ni yej ngaj daqui xingá yej nga̱ daranꞌ rian yej duꞌue. Ni̱ ngo̱j huin yej gu̱ꞌnaj jaspe. Ni̱ hui̱ huin yej zafiro. Ni̱ hua̱ꞌni huin yej ágata. Ni̱ ga̱nꞌan huin yej esmeralda. ²⁰Ni̱ u̱nꞌunj huin yej ónice. Ni̱ hua̱tanj huin yej gu̱ꞌnaj cornalina. Ni̱ ichij huin yej crisólito. Ni̱ tu̱nj huin berilo. Ni̱ u̱n huin yej topacio. Ni̱ chiꞌ huin yej gu̱ꞌnaj crisopraso. Ni̱ xa̱n huin yej gu̱ꞌnaj jacinto. Ni̱ guisíj xu̱huij huin yej gu̱ꞌnaj amatista. ²¹Ni̱ xu̱huij rian xingá yej daj huin xu̱huij yej gu̱ꞌnaj perla. Ni̱ da go̱ꞌngo rian xingá yej daj huin ꞌngo̱ yej perla. Ni̱ cayu huin achij huin xumanꞌ daj, ni̱ ni̱nanj oro huin. Ni̱ da̱j rúnꞌ ran pidrio, ni̱ hué daj hua oro daj.

²²Ni̱ a̱ ꞌngo̱ nuhui nun guiniꞌīnj xumanꞌ daj. Daj si Señor huin Yanꞌanj nucuaj ni̱nꞌ ruhua huin nuhui daj nga̱ xachij ꞌni̱j huin Jesucristo. ²³Ni̱ chruhua xumanꞌ daj, ni̱ nitaj si ruhuaj sisi̱ gui̱xiguin güi nga̱ yahui̱ mánj. Daj si hué manꞌan Yanꞌanj xigui̱n chruhua xumanꞌ daj. Ni̱ xachij ꞌni̱j huin yanꞌa̱n xigui̱n nej. ²⁴Ni̱ gui̱xiguin ga̱che ni ngüi̱ ma̱n chruhua xungüi̱, gui̱ꞌyaj yanꞌa̱n xigui̱n chruhua xumanꞌ daj huin ni ngüi̱ ganani, guiꞌyaj Yanꞌanj. Ni̱ na̱gaꞌuiꞌ ni rey ma̱n chruhua xungüi̱ ni rasu̱n sa̱ꞌ nga̱ ni nuguanꞌ sa̱ꞌ rian xumanꞌ daj. ²⁵Ni̱ nitaj a̱man naránj ni rian xingá yej ne̱ꞌ guníꞌyanj. Daj si nitaj si gui̱ni xumanꞌ daj ga̱ mánj. ²⁶Ni̱ ni̱caj ni ngüi̱ ma̱n chruhua xungüi̱ ni rasu̱n sa̱ꞌ nga̱ ni nuguanꞌ sa̱ꞌ ga̱nꞌanj jna ni sij chruhua xumanꞌ daj. ²⁷Ni̱ a̱ ꞌngo̱ rasu̱n quij si̱ gatuj xumanꞌ daj. Ni̱ si̱ gatuj ni ngüi̱ ꞌyaj quij nga̱ ni ngüi̱ aꞌmi yya̱ chruhua xumanꞌ daj. Sani̱ maan si ga̱tu ni ngüi̱ ta̱j ni̱ca si-xugüi rian si-libro xachij ꞌni̱j huin libro ta̱j si-xugüi ni ngüi̱ ga̱ne ni̱ganj nga̱ Yanꞌanj.

¹Ngaa ni̱ digyán ángel daj ꞌngo̱ xinéj nnee hua sa̱ꞌ riānj. Ni̱ nnee daj ꞌyaj si ga̱ne ni̱ganj ni ngüi̱ nga̱ Yanꞌanj. Ni̱ ran nnee daj da̱j rúnꞌ ran pidrio sa̱ꞌ. Ni̱ ahui nnee daj rian chrun xila sa̱ꞌ rian nne Yanꞌanj nga̱ xachij ꞌni̱j. ²Ni̱ dani cayu xa̱chij ta̱j chruhua xumanꞌ daj niquinꞌ chrun ꞌyaj si ga̱ne ni̱ganj ni ngüi̱ nga̱ Yanꞌanj. Ni̱ niquinꞌ chrun da go̱ꞌngo duꞌua xinéj nnee daj. Ni̱ da yahui̱, ni̱ ayu go̱ꞌngo rian chruj. Ni̱ huin ruhuaj gata sisi̱ guisíj xu̱huij rian chruj ga̱yu chra̱ chrun daj guisíj ꞌngo̱ yoꞌ. Ni̱ níꞌyanj coj raꞌa chrun daj sisi̱ ga̱nahuin ni ngüi̱ ma̱n chruhua xungüi̱. ³Ni̱ nitaj nuguanꞌ quij ga̱ chruhua xumanꞌ da ga̱ mánj. Ni̱ niquinꞌ chrun xila sa̱ꞌ rian nne Yanꞌanj nga̱ xachij ꞌni̱j xumanꞌ daj. Ni tsínj ꞌyaj sun rian Yanꞌanj, ni̱ gui̱ꞌyaj sun ni sij rian Yanꞌanj. ⁴Ni̱ gui̱niꞌi ni sij rian manꞌan Yanꞌanj. Ni̱ gui̱nun si-xugüi Yanꞌanj yo ni sij. ⁵Ni̱ si̱ guini̱ xumanꞌ daj. Ni̱ nitaj si ruhuaj sisi̱ gui̱xiguin yanꞌa̱n xumanꞌ daj. Ni̱ nitaj si ruhuaj sisi̱ gui̱xiguin, gui̱ꞌyaj güi. Daj si gui̱xiguin rian ni sij, gui̱ꞌyaj Yanꞌanj huin Señor. Ni̱ ni̱ganj ni̱nꞌ gui̱nicaj sun ni sij nga̱ Yanꞌanj.

La venida de Cristo está cerca

⁶Ngaa ni̱ gataj ángel daj gunūnj:

―Ni nuguanꞌ nan huin nuguanꞌ xa̱ngaꞌ yya. Ni̱ hué Señor huin Yanꞌanj huin achij niman ni tsínj aꞌmi si-nu̱guanꞌ Yanꞌanj. Ni̱ gaꞌníj Yanꞌanj ángel gaꞌna̱ꞌ sisi̱ di̱gyán ángel daj da̱j ga̱huin ráꞌyanj rian ni tsínj ꞌyaj sun rian Yanꞌanj. ―Daj gataj ángel daj.

⁷Hue dan ni̱:

―Ráꞌyanj gui̱sī rian ma̱n án re̱ꞌ. ―Daj gataj Jesucristo gunun néꞌ.

Ni̱ hua ꞌueé rian tsínj unun sa̱ꞌ ni nuguanꞌ nun rian yanj libro nan huin nuguanꞌ ataj snanꞌanj da̱j ga̱huin nga̱ ni ngüi̱. ⁸Huēj huin Juan. Ni̱ gunūnj ni nuguanꞌ nan. Ni̱ guiniꞌīnj ni rasu̱n nan. Ni̱ ngaa guisíj gunūnj, ni̱ guiniꞌīnj, ngaa ni̱ ganiquinꞌ ráj dacō rian ángel digyán ni rasu̱n daj riānj sisi̱ ga̱ꞌmi sa̱ꞌāj rian ángel daj. ⁹Sani̱ gataj ángel daj gunūnj:

―Si̱ guiꞌyáj re̱ꞌ daj si huēj huin si ꞌyaj sun rian Yanꞌanj nga̱ re̱ꞌ nga̱ ni jnánj re̱ꞌ huin ni tsínj aꞌmi si-nu̱guanꞌ Yanꞌanj nga̱ ni tsínj dagahuin si ataj ni nuguanꞌ ꞌna̱ꞌ rian libro nan. Ga̱ꞌmi sa̱ꞌ re̱ꞌ rian urin manꞌan Yanꞌanj. ―Daj gataj ángel daj.

¹⁰Ngaa ni̱ gataj ru̱huaꞌ yún ángel daj:

―Ni̱ si̱ garij hui̱ re̱ꞌ ni nuguanꞌ nu̱n rian yanj libro nan huin si-nu̱guanꞌ Yanꞌanj. Daj si ga̱huin ni̱chrunꞌ güi ga̱ꞌnaꞌ Jesucristo. ¹¹Xiꞌí daj ni̱ tsínj ꞌyaj gaquinꞌ, ni̱ ga̱ gue̱ gui̱ꞌyaj gaquinꞌ sij. Ni̱ tsínj ani quij ruhua, ni̱ ga̱ gue̱ ga̱ni quij ruhua sij. Sani̱ tsínj ꞌyaj ni̱ca, ni̱ ga̱ gue̱ gui̱ꞌyaj ni̱ca sij. Ni̱ tsínj hua sa̱ꞌ rian Yanꞌanj, ni̱ ga̱ gue̱ ga̱ sa̱ꞌ sij rian Yanꞌanj anj. ―Daj gataj ángel daj.

¹²Hué dan ni̱ gataj Jesucristo:

―Ráꞌyanj gui̱sī rian ma̱n án re̱ꞌ. Ni̱ nicā si na̱ruꞌuē rian án re̱ꞌ. Ngaa ni̱ na̱ruꞌuē rian da go̱ꞌngo a ni é re̱ꞌ da̱j rúnꞌ guiꞌyaj go̱ꞌngo a ni é re̱ꞌ. ¹³Huēj huin tsínj gu̱ꞌnaj Alfa nga̱ Omega. Daj si Alfa huin letra gaxi̱ꞌi asi̱j sini ya̱n. Ni̱ Omega huin letra nicoꞌ da ru̱cu. Ni̱ huēj huin tsínj niquinꞌ asi̱j sini ya̱n. Ni̱ huēj huin tsínj gui̱niquinꞌ ni̱ganj anj.

¹⁴’Ni̱ hua ꞌueé rian ni ngüi̱ naruꞌui si-ganꞌ sisi̱ ga̱ꞌue xa̱ ni sij chruj ayu chra̱ chrun ꞌyaj si ga̱ne ni̱ganj ni sij nga̱ Yanꞌanj. Ni̱ ga̱ꞌue ga̱tu ni sij rian hueꞌ duꞌua xumanꞌ daj. ¹⁵Sani̱ ne̱ꞌ chrej xe̱ꞌ gu̱na ni tsínj ꞌyaj da̱j rúnꞌ ꞌyaj ni xuhue nga̱ ni tsínj ꞌyaj stuꞌuaj nej, ni tsínj ꞌyaj squi̱raꞌ nej, ni tsínj dagahuiꞌ níman nej, ni tsínj nicoꞌ yanꞌanj ꞌyaj raꞌa ni sij nga̱ daranꞌ ni tsínj nia̱ꞌ ruhua ga̱ꞌmi nuguanꞌ yya̱ nej.

¹⁶’Huēj huin Jesús. Ni̱ gaꞌnī ꞌngo̱ ángel niquinꞌ riānj gaꞌna̱ꞌ nataꞌ ni nuguanꞌ nan rian án re̱ꞌ huin ín re̱ꞌ ni ngüi̱ nicoꞌ manꞌānj ma̱n go̱ꞌngo xumanꞌ. Ni̱ da̱j rúnꞌ huin ꞌngo̱ yaꞌa̱ siu̱ coj, ni̱ hué daj huīnj rian rey David. Daj si huēj huin daꞌni̱ siꞌni̱ síꞌ. Ni̱ da̱j rúnꞌ huin ꞌngo̱ yatiꞌ sta̱nga niquinꞌ xigui̱n ngaa ruhua gue̱rengaꞌ, ni̱ hué daj xiguīnj rian xungüi̱. ―Daj gataj Jesús.

¹⁷Hué dan ni̱ ataj Espíritu Santo nga̱ yunꞌunj xa̱na ga̱huin nica̱ Jesucristo:

―Ga̱huaꞌ re̱ꞌ aj. ―Gataj nu̱ngüej-éꞌ.

Ni̱ tsínj unun nuguanꞌ nan, ni̱ ga̱taj síꞌ:

―Ga̱huaꞌ re̱ꞌ aj. ―Ga̱taj síꞌ.

Tsínj nagoꞌo nnee, ni̱ ga̱ꞌnaꞌ sij. Ni̱ sisi̱ huin ruhua sij, ni̱ go̱ꞌo yu̱n sij nnee ꞌyaj si ga̱ne ni̱ganj sij nga̱ Yanꞌanj.

¹⁸Ni̱ ataj chrūnj rian daranꞌ ni tsínj unun ni nuguanꞌ nu̱n rian yanj libro nan huin si-nu̱guanꞌ Yanꞌanj sisi̱ si̱ gutaꞌ ni sij chra̱ ni nuguanꞌ nan mánj. Daj si sisi̱ hué daj gui̱ꞌyaj ni sij, ngaa ni̱ ga̱ꞌnij Yanꞌanj sayun ga̱ꞌnaꞌ rian ni sij da̱j rúnꞌ hua ni̱ca rian libro nan. ¹⁹Ni̱ sisi̱ hua ꞌngo̱ tsínj gaꞌnej ni nuguanꞌ nun rian yanj libro nan huin nuguanꞌ ataj da̱j ga̱huin ni güi ga̱ꞌnaꞌ, ngaa ni̱ ga̱ꞌne Yanꞌanj si-xugüi sij rian yanj libro ta̱j si-xugüi ni ngüi̱ ga̱ne ni̱ganj nga̱ Yanꞌanj. Ni̱ si̱ gaꞌue ga̱tu sij chruhua xumanꞌ hua sa̱ꞌ daj da̱j rúnꞌ hua ni̱ca rian libro nan mánj.

²⁰Hué dan ni̱ gataj Jesucristo huin tsínj aꞌmi ni nuguanꞌ nan:

―Xa̱ngaꞌ ni̱ ráꞌyanj gui̱sī rian ma̱n án re̱ꞌ. ―Daj gataj Jesús.

Ni̱:

―Amén. Ga̱huaꞌ re̱ꞌ Señor Jesús, ―ataj néꞌ.

²¹Hué dan ni̱ huin ruhuāj sisi̱ Señor Jesús gui̱ꞌyaj sinduj rian án re̱ꞌ. Amén.