Hebreos

LA EPÍSTOLA A LOS HEBREOS

Dios ha hablado por medio de su Hijo

¹Asi̱j ná ni̱ gaꞌi̱ ni̱nꞌ ruhua gaꞌmi Yanꞌanj rian ni tsínj nataꞌ si-nu̱guanꞌ Yanꞌanj rian ni ngüi̱. Ngaa ni̱ nataꞌ ni síꞌ rian ni xi néꞌ. Ni̱ gaꞌi̱ ducuánj gaꞌmi Yanꞌanj rian ni xi néꞌ xiꞌí ni síꞌ. ²Sani̱ yya̱j ruhua ga̱nahuij xungüi̱ nan, ni̱ guiꞌyaj Yanꞌanj sisi̱ ga̱ꞌmi daꞌni nga̱ néꞌ. Ni̱ guiꞌyaj Yanꞌanj si ga̱huin achij sij na̱huin raꞌa sij daranꞌ si guiꞌyaj Yanꞌanj. Ni̱ xiꞌí daꞌníj Yanꞌanj, ni̱ guiꞌyaj Yanꞌanj xungüi̱ nga̱ daranꞌ si mán xataꞌ nej. ³Ni̱ da̱j rúnꞌ ra̱n ꞌngo̱ nnee guꞌndiꞌ ꞌyaj güi, ni̱ hué daj digyán daꞌníj Yanꞌanj da̱j hua ꞌueé manꞌan Yanꞌanj. Ni̱ da̱j rúnꞌ hua gue̱ manꞌan Yanꞌanj, ni̱ hué daj hua manꞌan daꞌni huin síꞌ Jesucristo. Ni̱ hué si-nu̱guanꞌ Jesucristo ꞌyaj sisi̱ ma̱n sa̱ꞌ daranꞌanj. Ni̱ nucuaj ni̱nꞌ ruhua si-nu̱guanꞌ sij. Ni̱ ngaa guisíj naꞌninꞌ Jesucristo xiꞌí si-ga̱quinꞌ néꞌ, ni̱ ganꞌanj ga̱ne sij ne̱ꞌ chrej raꞌa sa̱ꞌ Yanꞌanj xataꞌ. ⁴Ni̱ ni̱nꞌ ruhua gahuin achij daꞌníj Yanꞌanj rian ni ángel. Daj si sa̱ꞌ ni̱nꞌ ruhua hua si-xugüi sij daj nga̱ si-xugüi ni ángel, guiꞌyaj Yanꞌanj.

El Hijo es superior a los ángeles

⁵Daj si hua niꞌi ni é re̱ꞌ nuguanꞌ nan huin nuguanꞌ gaꞌmi Yanꞌanj rian daꞌni:

Hué re̱ꞌ huin daꞌnī.

Yya̱j ni̱ gahuīnj chréj re̱ꞌ.

Daj gataj Yanꞌanj xiꞌí daꞌni.

Sani̱ ni̱ a̱ ꞌngo̱ yu̱n nun gataj Yanꞌanj nuguanꞌ nan rian ꞌngo̱ ángel mánj.

Ni̱ nan huin ango nuguanꞌ gaꞌmi Yanꞌanj xiꞌí daꞌni:

Huēj ga̱huin chrej sij.

Ni̱ hué sij ga̱huin daꞌnī.

Daj gaꞌmi Yanꞌanj xiꞌí daꞌni.

Sani̱ ni̱ a̱ ꞌngo̱ yu̱n nun gataj Yanꞌanj nuguanꞌ nan gunun ꞌngo̱ ángel mánj.

⁶Ni̱ ngaa nicaj Yanꞌanj daꞌni huin síꞌ si xa̱huaꞌ gaꞌna̱ꞌ síꞌ chruhua xungüi̱ nan, ni̱ gataj snanꞌanj Yanꞌanj rian ni ángel:

Ga̱ꞌmi sa̱ꞌ daranꞌ ni ángel rian xiꞌí síꞌ.

Daj gataj Yanꞌanj.

⁷Ni̱ gataj Yanꞌanj xiꞌí ni ángel nej:

Rúnꞌ huin nane̱ huin ni ángel.

Ni̱ da̱j rúnꞌ huin yanꞌa̱n ngaa naxu̱manj aca huin ni ángel nej, guiꞌyaj Yanꞌanj.

Hué daj gataj Yanꞌanj xiꞌí ni ángel.

⁸Sani̱ hué nuguanꞌ nan gataj Yanꞌanj rian daꞌni:

Hué re̱ꞌ huin Yanꞌanj.

Ni̱ ni̱ganj nicáj re̱ꞌ sun nné re̱ꞌ chrun xila sa̱ꞌ.

Ni̱ ꞌyaj ni̱ca re̱ꞌ nne sún re̱ꞌ rian chrun xila daj.

⁹Ni̱ aranꞌ ruhuá re̱ꞌ niꞌyáj re̱ꞌ chrej ni̱ca.

Sani̱ nitaj si huin xa̱nꞌ ruhuá re̱ꞌ niꞌyáj re̱ꞌ chrej quij mánj.

Xiꞌí daj, ni̱ nacui Danꞌánj re̱ꞌ manꞌán re̱ꞌ sisi̱ huaj ga̱huin nia̱ꞌ ruhuá re̱ꞌ si ga̱huin nia̱ꞌ ruhua ni dugüíꞌ re̱ꞌ.

Daj gataj Yanꞌanj gunun daꞌni.

¹⁰Ni̱ gataj ru̱huaꞌ yún Yanꞌanj gunun daꞌni:

Hué re̱ꞌ huin Señor.

Ni̱ asi̱j gaxi̱ꞌi daranꞌanj, ni̱ hué re̱ꞌ guiꞌyaj xungüi̱ nan.

Ni̱ hué raꞌá re̱ꞌ guiꞌyaj daranꞌ si ma̱n ne̱ꞌ xataꞌ nej.

¹¹Ni̱ ga̱nahuij daranꞌ nan.

Sani̱ ni̱ganj ga̱ne manꞌán re̱ꞌ.

Ni̱ da̱j rúnꞌ ga̱huin re̱ꞌe ꞌngo̱ atsij, ni̱ hué daj ga̱huin re̱ꞌe daranꞌ nan.

¹²Ni̱ da̱j rúnꞌ jnachrúnꞌ ꞌngo̱ atsij, ni̱ hué daj jna̱chranꞌ re̱ꞌ xataꞌ nga̱ yoꞌój.

Ni̱ da̱j rúnꞌ naduna néꞌ si-ganꞌ néꞌ, ni̱ hué daj na̱duna re̱ꞌ xataꞌ nga̱ yoꞌój.

Sani̱ manꞌán re̱ꞌ nitaj si na̱duna mánj.

Ni̱ yoꞌ ga̱ne re̱ꞌ nitaj a̱man ga̱nahuij mánj.

Hué daj gataj Yanꞌanj nej.

¹³Ni̱ gataj ru̱huaꞌ yún Yanꞌanj rian daꞌni:

Ga̱né re̱ꞌ ne̱ꞌ chrej raꞌa sa̱ꞌāj da gu̱rūnj ni tsínj ununꞌ nga̱ re̱ꞌ da ga̱huin ni sij ꞌngo̱ riguiyaꞌ gu̱taꞌ re̱ꞌ xiꞌí re̱ꞌ.

Daj gataj Yanꞌanj gunun daꞌni.

Sani̱ ni̱ a̱ ꞌngo̱ yu̱n nun gataj Yanꞌanj nuguanꞌ nan gunun ꞌngo̱ ángel mánj. ¹⁴Daj si daranꞌ ni ángel huin si unánj guitsi rian Yanꞌanj. Ni̱ aꞌníj Yanꞌanj ni ángel daj rian néꞌ sisi̱ chra̱cuij ni ángel néꞌ huin néꞌ ni ngüi̱ ga̱ne ni̱ganj nga̱ Yanꞌanj xiꞌí si ganacaj Yanꞌanj néꞌ.

Una salvación tan grande

¹Xiꞌí daj ni̱ hua nia̱n si gu̱nun sa̱ꞌ néꞌ nga̱ nuguanꞌ sa̱ꞌ gunun néꞌ sisi̱ si̱ nananj ga̱huin ni̱ni néꞌ rian si-chrej Yanꞌanj mánj. ²Ni̱ asi̱j ná ni̱ nicaj sun ni nuguanꞌ gaꞌmi ni ángel rian ni ngüi̱. Ni̱ daranꞌ ni ngüi̱ guiꞌyaj gaquinꞌ nun dagahuin ni sij rian Yanꞌanj. Ni̱ gahuin ni sij castigo. Ni̱ da̱j rúnꞌ guiꞌyaj ni sij gaquinꞌ, ni̱ hué daj guiꞌyaj Yanꞌanj castigo ni sij. ³Xiꞌí daj ni̱ da̱j ga̱ꞌue ga̱nani néꞌ rian castigo sisi̱ si̱ dugumi ꞌueé néꞌ nuguanꞌ sa̱ꞌ xiꞌí si ganacaj Yanꞌanj néꞌ, ruhua á re̱ꞌ níꞌ. Ni̱ hua sini nataꞌ Señor Jesucristo nuguanꞌ sa̱ꞌ daj rian ni ngüi̱. Ni̱ ni tsínj gunun nuguanꞌ sa̱ꞌ gaꞌmi Señor, ni̱ nataꞌ ni sij nuguanꞌ sa̱ꞌ daj gunun néꞌ. Ni̱ gara xina néꞌ nuguanꞌ xa̱ngaꞌ nataꞌ ni sij gunun néꞌ. ⁴Ni̱ digyán Yanꞌanj sisi̱ xa̱ngaꞌ si-nu̱guanꞌ ni sij. Daj si guiꞌyaj Yanꞌanj sisi̱ ga̱ꞌue gui̱ꞌyaj ni sij si sa̱ꞌ ꞌna̱ꞌ xataꞌ. Ni̱ ganahuin ni ngüi̱ aꞌnanꞌ, guiꞌyaj ni sij. Ni̱ gara yanꞌanj ruhua ni ngüi̱ ngaa guiniꞌi ni sij nuguanꞌ ꞌueé guiꞌyaj ni sij. Ni̱ gaꞌuiꞌ Yanꞌanj Espíritu Santo rian go̱ꞌngo ni ngüi̱ da̱j rúnꞌ garanꞌ ruhua Yanꞌanj.

El autor de la salvación

⁵Ni̱ nun ga̱ꞌuiꞌ Yanꞌanj sisi̱ gui̱nicaj sun ni ángel rian xungüi̱ ga̱ꞌnaꞌ. Ni̱ xiꞌí xungüi̱ ga̱ꞌnaꞌ daj aꞌmi únj rian án re̱ꞌ. ⁶Ni̱ gaꞌmi ꞌngo̱ tsínj rian si-nu̱guanꞌ Yanꞌanj. Ni̱ gataj síꞌ gunun Yanꞌanj:

Ni̱ u̱n sin huin ni ngüi̱ sisi̱ nanun ruhuá re̱ꞌ niꞌyáj re̱ꞌ ni sij únj.

Ni̱ u̱n sin huin, ni̱ ꞌna̱ꞌ niꞌyáj re̱ꞌ ni daꞌníj ni ngüi̱ únj.

⁷Ni̱ guiꞌyáj re̱ꞌ sisi̱ do̱j gahuin lij ni sij rian ni ángel.

Ni̱ da̱j rúnꞌ ꞌyaj ni tsínj ngaa gutaꞌ ni sij corona chra̱ ꞌngo̱ rey, ni̱ hué daj guiꞌyáj re̱ꞌ nga̱ ni sij.

Ni̱ gahuin ꞌueé ni sij, guiꞌyáj re̱ꞌ.

Ni̱ gaꞌuíꞌ re̱ꞌ sisi̱ gui̱nicaj sun ni sij rian daranꞌ si guiꞌyaj raꞌá re̱ꞌ.

⁸Ni̱ guiꞌyáj re̱ꞌ sisi̱ gui̱nicaj sun ni ngüi̱ rian daranꞌ rasu̱n.

Daj gataj tsínj daj gunun Yanꞌanj.

Ni̱ ngaa hué daj guiꞌyaj Yanꞌanj, ni̱ huin ruhuaj gata sisi̱ ꞌngo̱ da̱gahuin daranꞌanj si-nu̱guanꞌ ni sij. Sani̱ niꞌi néꞌ yya̱j sisi̱ achin da̱gahuin daranꞌanj rian ni sij. ⁹Sani̱ niꞌyaj néꞌ Jesús. Ni̱ guiꞌyaj Yanꞌanj sisi̱ do̱j gahuin lij Jesús rian ni ángel. Sani̱ yya̱j ni̱ gahuin ꞌueé ni̱nꞌ sij. Ni̱ gahuin achij ni̱nꞌ sij, guiꞌyaj Yanꞌanj nej. Ni̱ hué daj gahuin guiranꞌ Jesús sayun xiꞌí si gahuiꞌ síꞌ. Ni̱ guiꞌyaj Yanꞌanj sisi̱ gui̱ranꞌ Jesús sayun gahuiꞌ sij xiꞌí daranꞌ néꞌ huin ꞌngo̱ sinduj guiꞌyaj Yanꞌanj xiꞌí néꞌ.

¹⁰Daranꞌ ni rasu̱n ni̱ güenda Yanꞌanj huin. Ni̱ huin ruhua Yanꞌanj sisi̱ daranꞌ ni daꞌni ga̱ne ꞌueé rian hua sa̱ꞌ nne Yanꞌanj. Ni̱ xiꞌí Jesucristo huin sisi̱ nacaj Yanꞌanj ni ngüi̱. Ni̱ gani ruhua Yanꞌanj sisi̱ ga̱huin sa̱ꞌ ni̱nꞌ Jesús xiꞌí sayun guiranꞌ sij. Ni̱ ganacaj Yanꞌanj néꞌ xiꞌí Jesús. ¹¹Ni̱ uyan hua chrej Jesús nga̱ chrej néꞌ huin néꞌ ni ngüi̱ ganahuin sa̱ꞌ rian Yanꞌanj xiꞌí Jesús. Xiꞌí daj ni̱ nitaj si na̱ꞌaj Jesús ga̱taj sij sisi̱ néꞌ huin jnánj sij nga̱ xicaꞌuij sij. ¹²Ni̱ gataj Jesús:

Na̱tāj si-xugüí re̱ꞌ rian ni jnān.

Ni̱ ga̱ꞌmi saꞌāj xiꞌí re̱ꞌ scanij ni ngüi̱ nicoꞌ manꞌán re̱ꞌ huín re̱ꞌ Yanꞌanj.

Hué daj gataj Jesús rian Yanꞌanj. ¹³Ni̱ gataj ru̱huaꞌ yún Jesús:

Niquīnj yuꞌuj nan nga̱ ni daꞌnī riqui Yanꞌanj riānj.

Daj gataj Jesús xiꞌí néꞌ.

¹⁴Ni̱ huin néꞌ daꞌníj Yanꞌanj. Ni̱ hua nnee̱ cúj néꞌ nga̱ tun manꞌan néꞌ. Ni̱ hué gue̱ daj gahuin Jesucristo. Ni̱ ga nnee̱ cúj sij nga̱ tun manꞌan sij nej. Ngaa ni̱ gaꞌuej ruhua sij ga̱huiꞌ sij sisi̱ gui̱ꞌyaj gana sij rian sichre. Ni̱ sichre ꞌyaj sisi̱ ahuiꞌ néꞌ. Ni̱ ganahuij si-fuerza sichre, guiꞌyaj Jesús. ¹⁵Hué ducuánj daj, ni̱ gahuin níꞌnij rian daranꞌ ni ngüi̱ xuꞌuiꞌ ga̱huiꞌ, guiꞌyaj Jesús. Daj si yaꞌyoj nani ruhua daranꞌ ni ngüi̱ xiꞌí si ga̱huiꞌ ni sij. ¹⁶Ni̱ nun gaꞌna̱ꞌ Jesús chra̱cuij sij ni ángel mánj. Sani̱ gaꞌna̱ꞌ sij chra̱cuij sij néꞌ huin néꞌ ni daꞌníj Abraham huin tsínj gane asi̱j ná. ¹⁷Xiꞌí daj ni̱ hua nia̱n si ꞌngo̱ ga̱ gue̱ Jesús da̱j rúnꞌ hua ni jnánj sij. Ngaa ni̱ gui̱sij sij ga̱huin sij ꞌngo̱ chrej huin achij rian Yanꞌanj xiꞌí néꞌ. Ni̱ ga̱ꞌue na̱huin yaco ruhua sij ni̱ꞌyaj sij néꞌ. Ni̱ ni̱ganj ꞌyaj sa̱ꞌ sij nga̱ néꞌ. Ni̱ na̱ránj sij rian si-ga̱quinꞌ ni ngüi̱. ¹⁸Ni̱ hué manꞌan Jesús guiranꞌ sayun xiꞌí si gatsij sichre niman sij. Xiꞌí daj ni̱ gahuin nucuaj sij chra̱cuij sij ni munꞌúnꞌ ngaa atsij sichre niman néꞌ.

Jesús es superior a Moisés

¹Hué dan ni̱ gahuin sa̱ꞌ niman án re̱ꞌ rian Yanꞌanj huin ni é re̱ꞌ jnān nga̱ xicaꞌuī. Ni̱ gaquínj Yanꞌanj nne xataꞌ manꞌan án re̱ꞌ sisi̱ gui̱nicaj dugüiꞌ a ni é re̱ꞌ nga̱ Cristo Jesús. Xiꞌí daj xa̱caj ni é re̱ꞌ cuenta xiꞌí Cristo Jesús huin sij tsínj gaꞌníj Yanꞌanj ga̱ꞌnaꞌ di̱gyán chrej sa̱ꞌ ga̱che néꞌ. Ni̱ huin sij ꞌngo̱ chrej huin achij nun xi̱ꞌi sij xiꞌíꞌ rian Yanꞌanj. Ni̱ nataꞌ néꞌ rian ni ngüi̱ sisi̱ xuman ruhua néꞌ niꞌyaj néꞌ Jesús. ²Ni̱ ꞌueé guiꞌyaj sun Jesús ni sun gaꞌninꞌ Yanꞌanj sun rian sij da̱j rúnꞌ guiꞌyaj sun sa̱ꞌ Moisés si-sun Yanꞌanj xiꞌí ni ngüi̱ nicoꞌ Yanꞌanj. ³Sani̱ huin achij Jesús rian Moisés. Gui̱ꞌyóꞌ cuenta sisi̱ da̱j rúnꞌ huin achij tsínj ꞌyaj hueꞌ rian hueꞌ ꞌyaj sij, ni̱ daꞌngaꞌ daj huin achij Jesús rian Moisés. ⁴Daranꞌ ni hueꞌ, ni̱ hua tsínj guiꞌyaj ni hueꞌ daj. Sani̱ Yanꞌanj huin si guiꞌyaj daranꞌanj. ⁵Xa̱ngaꞌ ni̱ Moisés huin tsínj guiꞌyaj sun sa̱ꞌ si-sun Yanꞌanj xiꞌí ni ngüi̱ nicoꞌ Yanꞌanj. Sani̱ maan ni̱nanj ꞌngo̱ tsínj guiꞌyaj sun chruhua ducuá Yanꞌanj huin síꞌ. Ni̱ gaꞌmi sini Moisés si-nu̱guanꞌ Yanꞌanj rian ni ngüi̱ huin nuguanꞌ na̱taꞌ Yanꞌanj daꞌ síj rian ni ngüi̱. ⁶Sani̱ Cristo huin daꞌníj tsínj du̱cua. Ni̱ tsínj du̱cua daj huin Yanꞌanj. Ni̱ guiꞌyaj sun sa̱ꞌ Cristo ducuá Yanꞌanj huin néꞌ. Ni̱ hué daj huin néꞌ sisi̱ ni̱ganj na̱riꞌ nucuaj ruhua néꞌ. Ni̱ ga̱huin nia̱ꞌ ruhua néꞌ xiꞌí si anaꞌuij néꞌ si gui̱ꞌyaj sa̱ꞌ Jesucristo nga̱ néꞌ huin nuguanꞌ aꞌmi néꞌ rian ni ngüi̱.

El reposo del pueblo de Dios

⁷Xiꞌí daj ni̱ gaꞌmi Espíritu Santo nuguanꞌ nan gunun néꞌ:

Sisi̱ gunun yya á re̱ꞌ nuguanꞌ aꞌmi Yanꞌanj yya̱j,

⁸ngaa ni̱ si̱ guiꞌyaj soꞌo a ni é re̱ꞌ manꞌan án re̱ꞌ da̱j rúnꞌ guiꞌyaj ni tsínj guimán asi̱j ná quij quiꞌyanj na̱co ngaa gununꞌ ni sij nga̱ Yanꞌanj.

Ni̱ chranꞌ yunꞌunj ni sij Yanꞌanj nej.

⁹Yuꞌuj daj ni̱ chranꞌ yunꞌunj ni xi a ni é re̱ꞌ manꞌānj.

Ni̱ gahuin ruhua ni sij gui̱niꞌi ni sij da̱j gui̱ꞌyā nga̱ ni sij.

Ni̱ hui̱j xia yoꞌ guiniꞌi ni sij sisi̱ sa̱ꞌ nico guiꞌyā nga̱ ni sij.

¹⁰Xiꞌí daj ni̱ gaꞌman ruhuāj guiniꞌīnj ni sij.

Ni̱ gataj manꞌānj sisi̱ ni̱ganj ga̱nꞌanj anéj ni sij riānj.

Ni̱ nun gui̱niꞌi ni sij da̱j gui̱ꞌyaj ni sij gui̱nicoꞌ ni sij manꞌānj.

¹¹Hué dan ni̱ gaꞌman ruhuāj.

Ni̱ gataj nicāj gunun ni sij sisi̱ nitaj a̱man ga̱tu ni sij rian na̱ran ruhua ni sij ngāj mánj.

Daj gataj Espíritu Santo gunun ni sij asíj ná.

¹²Hué dan ni̱ ga̱ cuidado ni é re̱ꞌ huin a ni é re̱ꞌ jnān nga̱ xicaꞌuī sisi̱ si̱ ga quij niman ni̱ a̱ ꞌngo̱ ni é re̱ꞌ nun sa̱ꞌ nun gahuin ni̱ni ni é re̱ꞌ rian Yanꞌanj hua ni̱ꞌnaꞌ xiꞌí si nun xu̱man ruhua á re̱ꞌ ni̱ꞌyaj ni é re̱ꞌ Yanꞌanj. ¹³Sani̱ go̱ꞌngo güi gui̱ꞌyaj fuerza ni é re̱ꞌ go̱ꞌngo ni dugüiꞌ ni é re̱ꞌ sisi̱ ga̱ ni̱ca ruhua á re̱ꞌ. Ni̱ daꞌngaꞌ daj gui̱ꞌyaj á re̱ꞌ ngaa achin guini̱ güi yya̱j. Ngaa ni̱ si̱ guiꞌyaj soꞌo ni̱ a̱ ꞌngo̱ a ni é re̱ꞌ manꞌan án re̱ꞌ xiꞌí si di̱gyaꞌ yunꞌunj gaquinꞌ a ni é re̱ꞌ mánj. ¹⁴Ni̱ nicaj dugüiꞌ néꞌ nga̱ Cristo sisi̱ ga̱ ni̱ca ruhua néꞌ da̱j rúnꞌ ga ni̱ca ruhua néꞌ asi̱j sini. Ni̱ hué daj gui̱ꞌyaj néꞌ da güi ga̱ꞌnaꞌ Cristo aj.

¹⁵Daj si hua gue̱ ataj Yanꞌanj:

Sisi̱ gunun yya ni é re̱ꞌ nuguanꞌ aꞌmi Yanꞌanj yya̱j, ni̱ si̱ guiꞌyaj soꞌo a ni é re̱ꞌ manꞌán re̱ꞌ da̱j rúnꞌ guiꞌyaj ni tsínj guimán asi̱j ná.

Daj si gununꞌ ni sij nga̱ Yanꞌanj.

Daj gataj si-nu̱guanꞌ Yanꞌanj.

¹⁶Ni̱ u̱n sin huin ni tsínj nun ga̱ꞌuej ruhua gu̱nun si-nu̱guanꞌ Yanꞌanj, ni̱ gununꞌ ni sij nga̱ Yanꞌanj, ruhua á re̱ꞌ únj. Hué ni sij huin ni tsínj guiri tsínj gu̱ꞌnaj Moisés yuꞌuj gu̱ꞌnaj Egipto. ¹⁷Ni̱ u̱n sin huin ni tsínj ri̱an gaꞌman ruhua Yanꞌanj hui̱j xia yoꞌ, ruhua á re̱ꞌ únj. Hué ni sij huin ni tsínj guiꞌyaj gaquinꞌ. Ni̱ gahuiꞌ ni sij quij quiꞌyanj na̱co. ¹⁸Ni̱ u̱n sin huin ni tsínj ri̱an gataj ni̱ca Yanꞌanj sisi̱ nitaj a̱man ga̱tu ni sij rian na̱ran ruhua ni sij nga̱ Yanꞌanj, ruhua á re̱ꞌ únj. Hué ni sij huin ni tsínj nun dagahuin si gataj Yanꞌanj rian ni sij. ¹⁹Ni̱ niꞌi néꞌ sisi̱ naꞌue gu̱nucuaj ni sij ga̱tu ni sij rian na̱ran ruhua ni sij nga̱ Yanꞌanj xiꞌí si nun gu̱xuman ruhua ni sij ni̱ꞌyaj ni sij Yanꞌanj anj.

¹Hué dan ni̱ hua gue̱ ataj Yanꞌanj gunun néꞌ sisi̱ ga̱ꞌue ga̱tu néꞌ rian naránj ruhua Yanꞌanj. Ngaa ni̱ ga̱ cuidado go̱ꞌngo ni é re̱ꞌ nun sa̱ꞌ nun si̱ guiriꞌ ni é re̱ꞌ ga̱tu a ni é re̱ꞌ yuꞌuj da mánj. ²Daj si da̱j rúnꞌ gunun ni xi néꞌ nuguanꞌ sa̱ꞌ, ni̱ hué daj gunun néꞌ nuguanꞌ daj, guiꞌyaj Yanꞌanj. Sani̱ gunun yu̱n ni xi néꞌ si nun gu̱xuman ruhua ni sij nuguanꞌ daj. ³Sani̱ ga̱ꞌue ga̱tu néꞌ rian naránj ruhua Yanꞌanj xiꞌí si xuman ruhua néꞌ niꞌyaj néꞌ Jesús. Ni̱ hua gaꞌmi Yanꞌanj xiꞌí ni xi néꞌ. Ni̱ gataj Yanꞌanj:

Hué dan ni̱ gaꞌman ruhuāj.

Ni̱ ꞌngo̱ gataj nicāj gunun ni sij sisi̱ si̱ gatuj ni sij rian naránj ruhuāj mánj.

Hué daj gataj Yanꞌanj xiꞌí ni sij.

Sani̱ hua guisíj ganahuij guiꞌyaj sun Yanꞌanj asi̱j ngaa guiꞌya xungüi̱ aj. ⁴Ni̱ hua ꞌngo̱ yuꞌuj gataj si-nu̱guanꞌ Yanꞌanj xiꞌí güi chij: “Naránj ruhua Yanꞌanj güi chij ngaa guisíj guiꞌyaj sun Yanꞌanj daranꞌ si-sunj.” Hué daj gataj nuguanꞌ daj. ⁵Ni̱ gataj ru̱huaꞌ yún yuꞌuj daj: “Ni̱ si̱ gatuj ni sij rian naránj ruhuāj mánj.” Daj gataj Yanꞌanj xiꞌí ni xi néꞌ.

⁶Hué dan ni̱ achin si ga̱tu daꞌaj ni ngüi̱ rian naránj ruhua Yanꞌanj. Sani̱ nun ga̱tu ni tsínj gunun sini nuguanꞌ sa̱ꞌ daj xiꞌí si nun dagahuin ni sij si gataj nuguanꞌ daj. ⁷Hué dan ni̱ gani ru̱huaꞌ yún Yanꞌanj ꞌngo̱ güi ga̱ꞌue ga̱tu néꞌ yuꞌuj daj huin güi yya̱j. Daj si ngaa hua gachin nico yoꞌ, ni̱ guiꞌyaj Yanꞌanj sisi̱ ga̱ꞌmi tsínj gu̱ꞌnaj David nuguanꞌ hua garūnj daj. Ni̱ gataj nuguanꞌ daj:

Sisi̱ gunun yya á re̱ꞌ si aꞌmi Yanꞌanj yya̱j,

ngaa ni̱ si̱ gahuin soꞌo ni é re̱ꞌ xiꞌí nuguanꞌ da mánj.

Hué daj gataj si-nu̱guanꞌ Yanꞌanj.

⁸Ni̱ xiꞌí si nun ga̱tu ni tsínj israelita rian naránj ruhua Yanꞌanj, guiꞌyaj tsínj gu̱ꞌnaj Josué, ngaa ni̱ aꞌmi si-nu̱guanꞌ Yanꞌanj xiꞌí ango güi na̱ranj ruhua néꞌ. ⁹Ngaa ni̱ niꞌi néꞌ sisi̱ ga̱ꞌue ga̱tu néꞌ rian naránj ruhua Yanꞌanj huin néꞌ ni ngüi̱ nicoꞌ Yanꞌanj xa̱ngaꞌ. ¹⁰Ni̱ tsínj ga̱tu rian naránj ruhua Yanꞌanj, ni̱ ga̱ꞌue na̱ranj ruhua ni sij nga̱ si-sun ni sij da̱j rúnꞌ naránj ruhua Yanꞌanj nga̱ si-sunj. ¹¹Hué dan ni̱ na̱naꞌuiꞌ néꞌ da̱j ga̱tu néꞌ rian naránj ruhua Yanꞌanj. Ngaa ni̱ si̱ guiꞌyaj ni̱ a̱ ꞌngo̱ néꞌ da̱j rúnꞌ guiꞌyaj ni xi néꞌ nun dagahuin daj asi̱j ná.

¹²Daj si hua ni̱ꞌnaꞌ si-nu̱guanꞌ Yanꞌanj. Ni̱ nucuaj nuguanꞌ daj. Ni̱ da̱j rúnꞌ hua̱ rianj ꞌngo̱ espada, ni̱ hué daj hua̱ rian si-nu̱guanꞌ Yanꞌanj. Ni̱ hua̱ rianj daj nga̱ daranꞌ espada hua hui̱j rian. Daj si ga̱ꞌue ga̱tu sa̱ꞌ si-nu̱guanꞌ Yanꞌanj chruhua niman néꞌ. Ni̱ da̱j rúnꞌ ꞌyaj ꞌngo̱ espada ngaa atu rian naranꞌ dugüiꞌ cúj rian nu̱n laquinj, ni̱ hué daj ꞌyaj si-nu̱guanꞌ Yanꞌanj ngaa atu chruhua niman néꞌ. Ni̱ rugüiꞌ si ani ruhua néꞌ nga̱ si huin ruhua néꞌ, ꞌyaj si-nu̱guanꞌ Yanꞌanj nej. ¹³Ni̱ a̱ ꞌngo̱ ni rasu̱n guiꞌyaj Yanꞌanj si̱ gaꞌue gui̱xi hui̱ rian manꞌan Yanꞌanj mánj. Daj si rugüiꞌ sa̱ꞌ daranꞌanj rian Yanꞌanj. Ni̱ rian Yanꞌanj huin si na̱gaꞌuiꞌ néꞌ cuenta.

Jesús el gran sumo sacerdote

¹⁴Ni̱ Jesús huin daꞌníj Yanꞌanj. Ni̱ huin sij ꞌngo̱ chrej huin achij ni̱nꞌ ruhua. Ni̱ nun xi̱ꞌi sij xiꞌí néꞌ rian Yanꞌanj. Ni̱ hua guisíj sij da ni xataꞌ nne sij. Xiꞌí daj ni̱ ga̱ ni̱ca ruhua néꞌ nga̱ si-nu̱guanꞌ Yanꞌanj huin nuguanꞌ nataꞌ néꞌ rian ni ngüi̱. ¹⁵Hué Jesús huin ꞌngo̱ chrej aꞌninꞌ xiꞌí néꞌ. Sani̱ ga̱ꞌue na̱ni ꞌi̱ ruhua sij ni̱ꞌyaj sij néꞌ ngaa naꞌue xa̱caj sa̱ꞌ néꞌ cuenta ꞌngo̱ chrej sa̱ꞌ. Daj si da̱j rúnꞌ atsij sichre niman néꞌ, ni̱ hué daj gatsij sichre niman Jesús. Sani̱ nitaj gaquinꞌ guiꞌyaj sij mánj. ¹⁶Hué dan ni̱ ga̱huin ni̱chrunꞌ néꞌ rian Cristo huin tsínj huin chrej sa̱ꞌ daj. Ni̱ si̱ guiriun ruhua néꞌ ga̱nꞌanj néꞌ rian nne Yanꞌanj mánj. Ngaa ni̱ na̱huin yaco ruhua Yanꞌanj ni̱ꞌya néꞌ. Ni̱ güi gui̱ranꞌ néꞌ sayun, ni̱ gui̱ꞌyaj Yanꞌanj sinduj rian néꞌ.

¹Ni̱ ngaa nacui ni ngüi̱ ꞌngo̱ tsínj ga̱huin ꞌngo̱ chrej aꞌninꞌ, ni̱ ga̱ni ni sij síꞌ sisi̱ gui̱niquinꞌ síꞌ ga̱ꞌmi síꞌ nga̱ Yanꞌanj xiꞌí ni sij. Ni̱ nagaꞌuiꞌ chrej daj ni rasu̱n nga̱ ni xucu dagahuiꞌ ni sij rian Yanꞌanj xiꞌí gaquinꞌ daꞌui ni sij. ²Ni̱ ga̱ꞌue ga̱ꞌmi na̱naj chrej daj nga̱ ni ngüi̱ nun niꞌi sa̱ꞌ nga̱ ni ngüi̱ ga niꞌya nej. Daj si achin ga̱huin sa̱ꞌ niman sij huin sij chrej. ³Ni̱ xiꞌí si achin ga̱huin sa̱ꞌ niman sij, ni̱ hua nia̱n si na̱gaꞌuiꞌ sij xucu rian Yanꞌanj xiꞌí si-ga̱quinꞌ manꞌan sij nga̱ xiꞌí si-ga̱quinꞌ ni ngüi̱ nej.

⁴Ni̱ a̱ ꞌngo̱ tsínj si̱ gaꞌue ga̱huin chrej aninꞌ, gui̱ꞌyaj manꞌan sij. Sani̱ tsínj ga̱quinj Yanꞌanj, ni̱ hué sij ga̱huin chrej da̱j rúnꞌ gaquínj Yanꞌanj tsínj gu̱ꞌnaj Aarón gahuin síꞌ chrej aꞌninꞌ asi̱j ná. ⁵Ni̱ sé manꞌan Cristo gani ruhua sisi̱ ga̱huin sij ꞌngo̱ chrej aꞌninꞌ. Sani̱ nacui manꞌan Yanꞌanj Cristo gahuin síꞌ chrej aꞌninꞌ. Ni̱ gataj Yanꞌanj gunun sij:

Hué re̱ꞌ huin daꞌnī.

Yya̱j ni̱ gahuīnj chréj re̱ꞌ aj.

Hué daj gataj Yanꞌanj gunun Jesús.

⁶Ni̱ gataj Yanꞌanj ango nuguanꞌ gunun Jesús:

Ni̱ganj ni̱nꞌ ga̱huín re̱ꞌ chrej.

Ni̱ da̱j rúnꞌ gahuin tsínj gu̱ꞌnaj Melquisedec chrej asi̱j ná, ni̱ hué daj ga̱huin manꞌán re̱ꞌ chrej nej.

Daj gataj Yanꞌanj gunun Cristo.

⁷Ngaa gane Cristo chruhua xungüi̱ nan, ni̱ gachínj jniꞌyaj sij gaꞌmi yaco sij rian Yanꞌanj. Ni̱ gaꞌmi nucuaj sij gacój sij rian Yanꞌanj. Daj si Yanꞌanj gaꞌue gui̱ꞌyaj sisi̱ si̱ gahuiꞌ sij. Ni̱ gunun sa̱ꞌ Yanꞌanj si-nu̱guanꞌ Cristo xiꞌí si dagahuin sa̱ꞌ sij rian Yanꞌanj. ⁸Ni̱ nu̱nj si Cristo huin daꞌníj Yanꞌanj, sani̱ gahuin chru̱n sij dagahuin sij rian Yanꞌanj xiꞌí sayun guiranꞌ sij ngaa gahuiꞌ sij. ⁹Ni̱ ngaa guisíj gahuin sa̱ꞌ ni̱nꞌ Cristo, ni̱ gahuin sij tsínj ga̱nacaj ni̱ganj ni̱nꞌ daranꞌ ni ngüi̱ dagahuin rian sij. ¹⁰Ni̱ guiꞌyaj Yanꞌanj sisi̱ ga̱huin sij chrej aꞌninꞌ da̱j rúnꞌ gahuin Melquisedec chrej aꞌninꞌ asi̱j ná.

Advertencia contra la apostasía

¹¹Xiꞌí nuguanꞌ nan, ni̱ hua nico nuguanꞌ ga̱ꞌue ga̱ꞌmī rian án re̱ꞌ. Sani̱ ꞌi̱ huaj ga̱ꞌmī si naꞌue gu̱nun ráꞌyanj án re̱ꞌ. ¹²Ni̱ ri̱an guisíj gaꞌi̱ yoꞌ xuman ruhua á re̱ꞌ niꞌyaj á re̱ꞌ Cristo, ni̱ hua nia̱n si ga̱huin ni é re̱ꞌ tsínj digyán rian ni ngüi̱. Daj si achin si ga̱ra daꞌngaꞌ sa̱ꞌ ruhua ni é re̱ꞌ nuguanꞌ gahuin chru̱n sini ni é re̱ꞌ rian si-nu̱guanꞌ Yanꞌanj ruhua á re̱ꞌ. Xiꞌí daj ni̱ da̱j rúnꞌ ꞌyaj ni lij, ni̱ daꞌngaꞌ daj ꞌyaj á re̱ꞌ. Daj si utsi lij xiꞌí si naꞌue xa̱j chra. Ni̱ naꞌue ga̱ra daꞌngaꞌ ruhua á re̱ꞌ nuguanꞌ hua cu aj. ¹³Ni̱ daranꞌ tsínj achin ga̱huin chru̱n sa̱ꞌ si-nu̱guanꞌ Yanꞌanj, ni̱ ꞌyaj ni sij da̱j rúnꞌ ꞌyaj ni lij utsi to̱. Daj si achin ga̱huin chru̱n ni sij chrej ni̱ca digyán Yanꞌanj rian ni sij. ¹⁴Sani̱ ni tsínj huin chru̱n sa̱ꞌ si-nu̱guanꞌ Yanꞌanj, ni̱ yaꞌyoj ꞌyaj ni sij da̱j rúnꞌ ꞌyaj ni tsínj aꞌue xa chra. Daj si guꞌyun ni sij guiniꞌi ni sij da̱j hua nuguanꞌ sa̱ꞌ nga̱ nuguanꞌ nitaj si hua sa̱ꞌ.

¹Hué dan ni̱ si̱ gani ruhua néꞌ di̱guiꞌyun ru̱huaꞌ yún néꞌ nuguanꞌ gahuin chru̱n sini néꞌ xiꞌí Cristo. Sani̱ di̱guiꞌyun néꞌ ango nuguanꞌ achij doj xiꞌí Cristo huin nuguanꞌ gui̱ꞌyaj sisi̱ gui̱nicoꞌ sa̱ꞌ néꞌ Cristo. Ni̱ sé si hua nia̱n ga̱ꞌmi néꞌ yaꞌyoj xiꞌí si ga̱nani ruhua néꞌ xiꞌí gaquinꞌ guiꞌyaj néꞌ ngaa nun gahuin guiniꞌi néꞌ Yanꞌanj mánj. Ni̱ si̱ gaꞌmi néꞌ yaꞌyoj xiꞌí si da̱j gu̱xuman ruhua néꞌ ni̱ꞌyaj néꞌ Yanꞌanj mánj. ²Ni̱ si̱ gaꞌmi néꞌ yaꞌyoj xiꞌí si ga̱taꞌ nnee néꞌ. Ni̱ sé yaꞌyoj ga̱ꞌmi néꞌ xiꞌí si gu̱taꞌ néꞌ raꞌa néꞌ rian ni jnánj néꞌ. Ni̱ si̱ gaꞌmi néꞌ yaꞌyoj xiꞌí si ga̱naꞌnij ni níman. Ni̱ si̱ gaꞌmi néꞌ yaꞌyoj xiꞌí si ga̱huin ni̱ganj ni ngüi̱ castigo, gui̱ꞌyaj Yanꞌanj mánj. Daj si hua gahuin chru̱n néꞌ nuguanꞌ nan. ³Ni̱ sisi̱ ri̱qui Yanꞌanj, ni̱ hué daj gui̱ꞌyaj néꞌ di̱guiꞌyun néꞌ ango nuguanꞌ nico doj.

⁴Daj si sisi̱ hua guixigui̱n chruhua niman néꞌ, guiꞌyaj Yanꞌanj, sisi̱ garanꞌ ruhua néꞌ nuguanꞌ sa̱ꞌ digyán Yanꞌanj rian néꞌ, sisi̱ guinicaj dugüiꞌ néꞌ nga̱ Espíritu Santo, ⁵ni̱ sisi̱ hua xacaj néꞌ cuenta sisi̱ hua sa̱ꞌ si-nu̱guanꞌ Yanꞌanj, sisi̱ hua niꞌi néꞌ da̱j naguiꞌyaj sa̱ꞌ Yanꞌanj xungüi̱ ga̱ꞌnaꞌ, ⁶ngaa ni̱ sisi̱ ꞌngo̱ duna néꞌ si-chrej Yanꞌanj, ni̱ si̱ gaꞌue na̱nicaj ruhua néꞌ na̱nicoꞌ néꞌ Yanꞌanj ga̱ mánj. Da̱j rúnꞌ huaj sisi̱ ga̱nicoꞌ ru̱huaꞌ yún daꞌníj Yanꞌanj rian rugutsi̱, gui̱ꞌyaj néꞌ. Ni̱ gui̱ꞌyaj ducu ni ngüi̱ rian daꞌníj Yanꞌanj, gui̱ꞌyaj néꞌ nej.

⁷Ni̱ gui̱ꞌyóꞌ cuenta da̱j ꞌyaj yoꞌój. Ni̱ sisi̱ nico̱ꞌ huaj amanꞌ, ni̱ xi̱raꞌ cuej xa̱ ni tsínj anáj xina̱. Ni̱ ga̱hui sa̱ꞌ yoꞌój daj, gui̱ꞌyaj Yanꞌanj. Ni̱ da̱j rúnꞌ ꞌyaj yoꞌój sa̱ꞌ daj, ni̱ hué daj ꞌyaj niman tsínj xuman sa̱ꞌ ruhua niꞌyaj Yanꞌanj. Ni̱ ga̱hui sa̱ꞌ sij, gui̱ꞌyaj Yanꞌanj. ⁸Sani̱ sisi̱ xi̱raꞌ coj tanj nga̱ coj niꞌyo, ni̱ sé yoꞌój sa̱ꞌ huin, ataj ni sij. Ni̱ aꞌmi quij ni sij xiꞌí yoꞌój daj. Ni̱ ga̱ca yoꞌój daj, si nitaj si ꞌyaj sa̱ꞌ, ataj ni sij.

⁹Ni̱ ꞌi̱ ruhuāj niꞌyā á re̱ꞌ huin ín re̱ꞌ jnān nga̱ xicaꞌuī. Ni̱ nu̱nj si aꞌmī nuguanꞌ nucuaj rian án re̱ꞌ, sani̱ hua gahuin yya ruhuāj sisi̱ gui̱ꞌyaj sa̱ꞌ á re̱ꞌ. Ni̱ ga̱hui sa̱ꞌ á re̱ꞌ, gui̱ꞌyaj Yanꞌanj anj. ¹⁰Daj si ni̱ca ꞌyaj Yanꞌanj. Ni̱ sé si ꞌyaj quij Yanꞌanj mánj. Ni̱ nitaj ni̱ꞌyun ruhua Yanꞌanj si guiꞌyaj sun sa̱ꞌ á re̱ꞌ. Daj si guiꞌyaj sa̱ꞌ á re̱ꞌ rian ni ngüi̱ hua sa̱ꞌ rian Yanꞌanj. Ni̱ hua gue̱ ꞌyaj ni é re̱ꞌ sinduj nga̱ ni sij xiꞌí si ꞌi̱ ruhua á re̱ꞌ niꞌyaj á re̱ꞌ Yanꞌanj. ¹¹Ni̱ huin ruhuāj sisi̱ da̱j rúnꞌ ꞌyaj sa̱ꞌ ni é re̱ꞌ, ni̱ hué daj ga̱ gue̱ gui̱ꞌyaj daranꞌ ni é re̱ꞌ daꞌ güi ga̱nahuij xungüi̱. Ni̱ ga̱huin yya ruhua á re̱ꞌ sisi̱ gui̱ꞌyaj sa̱ꞌ Yanꞌanj nga̱ á re̱ꞌ aj. ¹²Xiꞌí daj ni̱ si̱ gahuin ru̱miꞌ a ni é re̱ꞌ mánj. Sani̱ ga̱che a ni é re̱ꞌ si-chrej ni tsínj xuman sa̱ꞌ ruhua niꞌyaj Yanꞌanj. Ni̱ gaꞌninꞌ ruhua ni sij nga̱ sayun guiranꞌ ni sij. Ni̱ ꞌngo̱ nicoꞌ ni sij Yanꞌanj. Xiꞌí daj ni̱ na̱huin raꞌa ni sij ni rasu̱n sa̱ꞌ gataj yya Yanꞌanj gunun ni sij huin ni rasu̱n nahuin raꞌa ni ngüi̱ nicoꞌ Yanꞌanj da̱j rúnꞌ gataj yya Yanꞌanj gunun néꞌ.

¹³Ni̱ ngaa guiꞌyaj yya Yanꞌanj ꞌngo̱ nuguanꞌ nga̱ tsínj gu̱ꞌnaj Abraham asi̱j ná, ni̱ gutaꞌ ni̱ca yya manꞌan Yanꞌanj nga̱ si-xugüi rian Abraham. Daj si nitaj si-xugüi ango tsínj huin achij daj nga̱ manꞌan Yanꞌanj mánj. ¹⁴Ni̱ gataj Yanꞌanj gunun Abraham: “Xa̱ngaꞌ yya ni̱ gui̱ꞌyā sinduj rián re̱ꞌ. Ni̱ gui̱xiꞌnanj ni daꞌníj re̱ꞌ. Ni̱ ga̱huin nico ni sij, gui̱ꞌyā.” Daj gataj Yanꞌanj gunun Abraham.

¹⁵Ngaa ni nun gahuin ruhua Abraham mánj. Ni̱ ganaꞌuij sa̱ꞌ sij sisi̱ ga̱huin da̱j rúnꞌ gataj Yanꞌanj gunun sij. Ni̱ hua yya gaꞌnga daꞌníj sij. ¹⁶Ni̱ ngaa utaꞌ ni̱ca yya tsínj daj rian dugüiꞌ ni sij, ni̱ aꞌmi ni sij si-xugüi ꞌngo̱ rasu̱n hua achij daj nga̱ manꞌan ni sij. Ni̱ ngaa utaꞌ ni̱ca yya ni sij rian dugüiꞌ ni sij, ngaa ni̱ ganiquinꞌ si ununꞌ ni sij, guiꞌyaj nuguanꞌ daj. ¹⁷Ni̱ huin ruhua Yanꞌanj di̱gyanj rian ni du̱güiꞌ Abraham sisi̱ si̱ naduna si-nu̱guanꞌ manꞌan Yanꞌanj. Xiꞌí daj ni̱ digyán Yanꞌanj, ni̱ gutaꞌ ni̱ca yya raꞌa sisi̱ xa̱ngaꞌ si-nu̱guanꞌanj. ¹⁸Ngaa ni̱ guisíj hui̱j nuguanꞌ gaꞌmi Yanꞌanj. Ni̱ nitaj a̱man na̱duna Yanꞌanj nuguanꞌ ga̱ꞌmi mánj. Ni̱ xiꞌí si xa̱ngaꞌ si-nu̱guanꞌ Yanꞌanj, ni̱ hua nia̱ꞌ ruhua néꞌ, ꞌyaj nuguanꞌ daj. Ni̱ ga̱huin yya ruhua néꞌ sisi̱ yya ga̱hui sa̱ꞌ néꞌ da̱j rúnꞌ gataj Yanꞌanj gunun néꞌ. ¹⁹Ni̱ sisi̱ ꞌngo̱ gahuin yya ruhua néꞌ, ni̱ hua ni̱ca ruhua néꞌ, ngaa ni̱ si̱ guxuꞌuiꞌ niman néꞌ xiꞌí si xa̱ngaꞌ nuguanꞌ guxuman ruhua néꞌ. Ni̱ xiꞌí nuguanꞌ sa̱ꞌ daj ga̱ꞌue ga̱nꞌanj ga̱ne néꞌ rian nne manꞌan Yanꞌanj. ²⁰Ni̱ hua gatúj sini Jesús yuꞌuj daj. Ngaa ni̱ gaꞌníj sij chrej ga̱ꞌue ga̱nꞌanj néꞌ rian nne manꞌan Yanꞌanj. Ni̱ ni̱ganj gahuin Jesús chrej aꞌninꞌ xiꞌí néꞌ da̱j rúnꞌ gahuin tsínj gu̱ꞌnaj Melquisedec asi̱j ná.

El sacerdocio de Melquisedec

¹Ni̱ tsínj gu̱ꞌnaj Melquisedec gahuin rey gane sij xumanꞌ gu̱ꞌnaj Salem asi̱j ná. Ni̱ gahuin sij chrej gunánj guitsi rian Yanꞌanj achij nne xataꞌ. Ni̱ ngaa nanica̱j Abraham ꞌna̱ꞌ niqui sij ngaa guiꞌyaj gana sij gununꞌ sij nga̱ ni rey, ni̱ nacaj dugüiꞌ Melquisedec nga̱ sij. Ni̱ gataj Melquisedec sisi̱ gui̱ꞌyaj Yanꞌanj sinduj rian Abraham, ruhua sij. ²Ni̱ gaya Abraham da̱j nico guiꞌyaj gana sij rian ni rey daj. Ni̱ ngaa guisíj ichiꞌ rasu̱n, ni̱ gaꞌuiꞌ sij ꞌngo̱ rasu̱n daj rian Melquisedec. Ni̱ hué daj guiꞌyaj Abraham daꞌ ganahuij gaya sij ni rasu̱n guiꞌyaj gana sij. Ni̱ si-xugüi Melquisedec huin ruhuaj gata sisi̱ “Rey ꞌyaj ni̱ca” huin sij. Ni̱ gahuin sij “Rey rian xumanꞌ Salem”. Ni̱ huin ruhuaj gata sisi̱ ga̱huin dinꞌinj ruhua ni ngüi̱ ꞌyaj rey daj. ³Ni̱ nitaj chrej Melquisedec nga̱ nni sij mánj. Ni̱ nitaj dugüiꞌ sij rian gaꞌnga sij. Ni̱ nitaj güi gahuiꞌ sij nej. Ni̱ da̱j rúnꞌ huin daꞌníj Yanꞌanj, ni̱ hué daj huin Melquisedec nej. Ni̱ ni̱ganj ni̱nꞌ ga̱huin sij chrej.

⁴Hué dan ni̱ xa̱caj néꞌ cuenta da̱j huin rian nico Melquisedec. Daj si manꞌan xi néꞌ Abraham gaꞌuiꞌ ꞌngo̱ rasu̱n rian ichiꞌ guiꞌyaj gana sij rian ni rey daj, gaꞌuiꞌ sij rian Melquisedec. ⁵Ni̱ guiꞌyaj Yanꞌanj sisi̱ go̱ꞌngo ni daꞌni̱ siꞌni̱ xi néꞌ tsínj gu̱ꞌnaj Leví gahuin chrej xiꞌí ni ngüi̱ israelita. Ni̱ aꞌninꞌ si-ley Moisés sun sisi̱ hua nia̱n ga̱ꞌne ni sij ꞌngo̱ rasu̱n rian ichiꞌ daj rian daranꞌ ni tsínj israelita. Ni̱ huin ni sij dugüiꞌ ni tsínj israelita. Daj si daranꞌ ni sij huin daꞌni̱ siꞌni̱ Abraham.

⁶Sani̱ sé daꞌníj Leví huin Melquisedec. Sani̱ nacaj sij ꞌngo̱ rasu̱n rian ichiꞌ rasu̱n, guiꞌyaj Abraham. Ni̱ gataj Melquisedec sisi̱ gui̱ꞌyaj Yanꞌanj sinduj rian Abraham huin síꞌ tsínj ri̱an hua gataj yya Yanꞌanj sisi̱ ga̱hui sa̱ꞌ síꞌ, gui̱ꞌyaj Yanꞌanj. ⁷Ni̱ niꞌi daranꞌ néꞌ sisi̱ huin achij tsínj aꞌmi nuguanꞌ sa̱ꞌ sisi̱ gui̱ꞌyaj Yanꞌanj sinduj rian dugüiꞌ sij daj nga̱ tsínj unun nuguanꞌ sa̱ꞌ daj. ⁸Ni̱ xungüi̱ mán néꞌ nan, ni̱ aꞌuiꞌ ni sij ꞌngo̱ rasu̱n xiꞌnej rian ichiꞌ rian ni tsínj huin ni síꞌ ni daꞌni̱ siꞌni̱ Leví. Ni̱ hua ꞌngo̱ güi, ni̱ ga̱huiꞌ ni síꞌ. Sani̱ ataj si-nu̱guanꞌ Yanꞌanj sisi̱ ni̱ganj hua ni̱ꞌnaꞌ xíꞌ Melquisedec. ⁹Ni̱ ga̱ꞌue ga̱taj néꞌ sisi̱ ngaa gaꞌuiꞌ Abraham ꞌngo̱ rasu̱n xiꞌnej rian ichiꞌ rian xíꞌ gu̱ꞌnaj Melquisedec, ni̱ naruꞌue nu̱guanꞌan Leví nga̱ Abraham rian Melquisedec. Ni̱ aꞌnej ni daꞌni̱ siꞌni̱ Leví rasu̱n daj rian ni ngüi̱. ¹⁰Ni̱ ga̱ꞌue ga̱taj néꞌ daj xiꞌí si ngaa gahui Melquisedec nacaj dugüiꞌ sij nga̱ Abraham, ni̱ hua guiniꞌi Yanꞌanj sisi̱ ga̱ꞌnga Leví rian Abraham.

¹¹Ni̱ huin ni sij ni daꞌni̱ siꞌni̱ Aarón. Ni̱ sisi̱ ga̱ꞌue ga̱huin sa̱ꞌ ni̱nꞌ ni tsínj israelita, gui̱ꞌyaj ni daꞌni̱ siꞌni̱ Leví, (daj si nahuin raꞌa ni tsínj israelita si-ley Yanꞌanj rian ni daꞌni̱ siꞌni̱ tsínj gu̱ꞌnaj Leví) ni̱ nitaj si níꞌyanj si ga̱ꞌnaꞌ ango chrej da̱j rúnꞌ huin Melquisedec. Sani̱ nun gui̱sij gahuin sa̱ꞌ ni tsínj israelita, guiꞌyaj ni tsínj levita mánj. Ni̱ sé dugüiꞌ Aarón huin chrej na̱ca daj. ¹²Daj si ngaa naduna Yanꞌanj ni chrej, ni̱ hua nia̱n si na̱duna ley nej. ¹³Ni̱ chrej na̱ca daj, ni̱ nicoꞌ sij ango xiꞌninꞌ ni tsínj israelita. Ni̱ a̱ ꞌngo̱ ni tsínj huin xiꞌninꞌ daj nun gahuin chrej guiniquinꞌ rian altar mánj.

¹⁴Daj si niꞌi daranꞌ néꞌ sisi̱ ga̱ꞌnaꞌ Señor nicaj sun rian néꞌ rian xi síꞌ huin tsínj gu̱ꞌnaj Judá. Ni̱ nun gataj Moisés sisi̱ ni tsínj nicoꞌ xiꞌninꞌ daj ga̱huin chrej mánj. ¹⁵Hué dan ni̱ ga̱ꞌue gui̱niꞌi xa̱ngaꞌ néꞌ sisi̱ naduna Yanꞌanj ni chrej daj. Daj si yya̱j ni̱ huin Cristo chrej na̱ca da̱j rúnꞌ gahuin Melquisedec asi̱j ná. ¹⁶Ni̱ nitaj ꞌngo̱ ley guiꞌyaj, ni̱ gahuin Cristo ꞌngo̱ chrej. Daj si gataj ley daj u̱n xiꞌninꞌ ga̱ꞌnaꞌ ni chrej. Ni̱ nitaj si gaꞌna̱ꞌ Cristo xiꞌninꞌ da mánj. Sani̱ Cristo huin chrej xiꞌí si gahuin nucuaj sij ga ni̱ꞌnaꞌ ni̱ganj sij aj. ¹⁷Daj si gataj si-nu̱guanꞌ Yanꞌanj xiꞌí Cristo:

Hué re̱ꞌ huin chrej ga̱ne ni̱ganj.

Ni̱ da̱j rúnꞌ gahuin Melquisedec chrej asi̱j ná, ni̱ hué daj huín re̱ꞌ nej.

Hué daj gataj si-nu̱guanꞌ Yanꞌanj xiꞌí Cristo.

¹⁸Hué dan ni̱ xiꞌí ley dagahuin ni sij asi̱j ná, sani̱ yya̱j ni̱ gahuin ni̱ni néꞌ rian ley daj. Daj si ninaj gaꞌmi ley daj. Ni̱ nitaj si níꞌyan ga̱ mánj. ¹⁹(Ni̱ a̱ ꞌngo̱ ni tsínj nun gui̱sij gahuin sa̱ꞌ, guiꞌyaj si-ley Moisés mánj). Ngaa ni̱ yya̱j ni̱ anaꞌuij néꞌ sisi̱ gui̱ꞌyaj Yanꞌanj ango nuguanꞌ sa̱ꞌ nga̱ néꞌ. Xiꞌí daj ni̱ huaj néꞌ ga̱huin ni̱chrunꞌ néꞌ rian Yanꞌanj.

²⁰Ni̱ ngaa gataj Yanꞌanj sisi̱ Cristo ga̱huin chrej na̱ca daj, ni̱ gutaꞌ ni̱ca yya Yanꞌanj sisi̱ nuguanꞌ xa̱ngaꞌ huin. ²¹Sani̱ nun gu̱taꞌ ni̱ca Yanꞌanj rian ni daꞌníj siꞌni̱ Leví asi̱j ná ngaa gaxi̱ꞌi ni sij gahuin ni sij chrej. Sani̱ gataj Yanꞌanj nuguanꞌ nan rian Cristo:

Gutaꞌ ni̱ca Señor.

Ni̱ si̱ naduna si-nu̱guanꞌ sij:

“Ni̱ganj ga̱huín re̱ꞌ chrej da̱j rúnꞌ gahuin Melquisedec asi̱j ná.”

Daj gataj Yanꞌanj gunun Cristo.

²²Hué dan ni̱ xiꞌí Jesucristo, ni̱ guiniꞌi yya néꞌ sisi̱ hua sa̱ꞌ doj nuguanꞌ nan daj nga̱ nuguanꞌ guiꞌyaj yya Yanꞌanj nga̱ ni ngüi̱ guimán asi̱j ná. ²³Ni̱ xiꞌí si nun ga̱ꞌue ga̱ne ni̱ganj ni chrej guimán asi̱j ná, guiꞌyaj si ahuiꞌ ni sij, xiꞌí daj ni̱ gahuin nico tsínj gahuin chrej. ²⁴Sani̱ Jesús huin ꞌngo̱ chrej ga̱ne ni̱ganj. Xiꞌí daj urin sij huin chrej rian Yanꞌanj xiꞌí néꞌ. Ni̱ a̱ ꞌngo̱ tsínj si̱ gaꞌue na̱tu rian sij mánj. ²⁵Hué dan ni̱ ꞌngo̱ hua ni̱ꞌnaꞌ Jesús. Xiꞌí daj ni̱ ga̱ꞌue ga̱nacaj ni̱ganj ni̱nꞌ Jesús daranꞌ néꞌ ngaa ga̱huin ni̱chrunꞌ néꞌ rian Yanꞌanj xiꞌí manꞌan sij. Daj si ni̱ganj achínj jniꞌyaj Jesús rian Yanꞌanj xiꞌí néꞌ.

²⁶Hué gue̱ Jesús huin chrej huin achij níꞌyanj néꞌ. Daj si hué sij huin tsínj sa̱ꞌ ni̱nꞌ ruhua. Ni̱ nitaj gaquinꞌ daꞌui sij mánj. Ni̱ nitaj si hua quij niman sij. Ni̱ gahuin ni̱ni sij rian ni tsínj ꞌyaj gaquinꞌ. Ni̱ nne sa̱ꞌ ni̱nꞌ sij xataꞌ rian nne manꞌan Yanꞌanj xa̱ngaꞌ. ²⁷Ni̱ sé da̱j rúnꞌ gahuin ni chrej aꞌninꞌ guimán asi̱j ná huin Jesús mánj. Daj si yaꞌyoj dagahuiꞌ sini ni sij xucu nagaꞌuiꞌ ni sij rian Yanꞌanj xiꞌí si-ga̱quinꞌ manꞌan ni sij. Asíj ni̱ dagahuiꞌ ni sij xucu xiꞌí si-ga̱quinꞌ ango ni ngüi̱. Sani̱ sé daj huin nga̱ Jesús mánj. Daj si ngaa nagaꞌuiꞌ sij manꞌan sij xiꞌí néꞌ, ni̱ urin yu̱n naránj sij rian si-ga̱quinꞌ néꞌ. ²⁸Ni̱ si-ley Moisés ꞌyaj sisi̱ gui̱nicaj sun ni tsínj achin ga̱huin sa̱ꞌ gahuin ni sij chrej aꞌninꞌ. Sani̱ daꞌ síj gaꞌuiꞌ Yanꞌanj ley daj, ni̱ gutaꞌ ni̱ca yya Yanꞌanj ango nuguanꞌ na̱ca. Ni̱ daꞌníj Yanꞌanj gahuin nuguanꞌ na̱ca daj. Ni̱ hua sa̱ꞌ ni̱nꞌ Jesús. Ni̱ ga̱ne ni̱ganj sij nej.

El mediador de un nuevo pacto

¹Hué dan ni̱ nuguanꞌ huin rian scanij ni nuguanꞌ aꞌmī rian án re̱ꞌ huin nuguanꞌ xiꞌí chrej aꞌninꞌ niquinꞌ rian Yanꞌanj xiꞌí néꞌ. Ni̱ nne sij ne̱ꞌ chrej raꞌa sa̱ꞌ Yanꞌanj nucuaj nne xataꞌ. ²Ni̱ hué Jesús unánj guitsi rian Yanꞌanj chruhua nuhui nne xataꞌ. Ni̱ hué nuhui daj huin nuhui xa̱ngaꞌ, guiꞌyaj manꞌan Señor. Ni̱ sé ni tsínj ma̱n chruhua xungüi̱ nan guiꞌyaj mánj. ³Ni̱ niquinꞌ daranꞌ chrej aꞌninꞌ nagaꞌuiꞌ ni sij ni rasu̱n nga̱ ni xucu gaca rian Yanꞌanj. Xiꞌí daj ni̱ hua nia̱n si gui̱nicaj Jesús si na̱gaꞌuiꞌ sij rian Yanꞌanj nej. ⁴Ni̱ sisi̱ nne Jesús chruhua xungüi̱ nan, ni̱ si̱ gahuin sij chrej mánj. Daj si ma̱n ni chrej nagaꞌuiꞌ ni rasu̱n rian Yanꞌanj da̱j rúnꞌ aꞌninꞌ si-ley Moisés sun. ⁵Sani̱ unánj guitsi ni chrej daj rian Yanꞌanj nga̱ rasu̱n ma̱n chruhua xungüi̱ nan. Ni̱ ni rasu̱n daj huin ꞌngo̱ daꞌngaꞌ si mán xataꞌ. Asi̱ da̱j rúnꞌ huin si-ga̱xunꞌ ni rasu̱n mán xataꞌ huin ni rasu̱n da nej. Daj si ngaa gaxi̱ꞌi Moisés guiꞌyaj sij ducuá Yanꞌanj, ni̱ gataj Yanꞌanj gunun sij: “Ga̱ cuidadó re̱ꞌ sisi̱ gui̱ꞌyáj re̱ꞌ daranꞌanj da̱j rúnꞌ digyānj rián re̱ꞌ ngaa gané re̱ꞌ chra̱ quij daj.” Daj gataj Yanꞌanj gunun Moisés. ⁶Sani̱ yya̱j ni̱ niquinꞌ Jesús unánj guitsi sij rian Yanꞌanj. Ni̱ hua sa̱ꞌ doj si-sun sij daj nga̱ si-sun ni chrej guimán asi̱j ná. Ni̱ da̱j rúnꞌ hua sa̱ꞌ doj si-sun Jesús daj nga̱ si-sun ni chrej daj, ni̱ hué daj hua sa̱ꞌ nuguanꞌ na̱ca riqui Yanꞌanj rian néꞌ daj nga̱ si-ley Moisés. Ni̱ hua sa̱ꞌ doj nuguanꞌ gataj yya Yanꞌanj rian néꞌ yya̱j rian nuguanꞌ gaꞌmi sini Yanꞌanj anj.

⁷Ni̱ sisi̱ ga sa̱ꞌ ni̱nꞌ nuguanꞌ guiꞌyaj yya sini Yanꞌanj nga̱ ni tsínj israelita, ni̱ nitaj si huaj sisi̱ gui̱ꞌyaj yya ru̱huaꞌ yún Yanꞌanj nga̱ néꞌ mánj. Sani̱ hua yya guiꞌyaj yya ru̱huaꞌ yún Yanꞌanj nga̱ néꞌ. ⁸Hué dan ni̱ gaꞌmi Yanꞌanj gaquinꞌ rian ni ngüi̱ guimán asi̱j ná. Ni̱ gataj Yanꞌanj:

Hua ꞌngo̱ güi, ni̱ gui̱ꞌyaj yyāj ango nuguanꞌ na̱ca nga̱ ni du̱güiꞌ tsínj gu̱ꞌnaj Israel nga̱ ni du̱güiꞌ tsínj gu̱ꞌnaj Judá, ataj manꞌan Señor.

⁹Ni̱ sé da̱j rúnꞌ guiꞌyaj yyāj nga̱ ni xi ni sij huin ni tsínj guimán asi̱j ná, ni̱ sé daj gui̱ꞌyaj yya ru̱huaꞌ yūnj nga̱ ni sij mánj.

Ni̱ asi̱j ná ngaa guimán ni sij yuꞌuj gu̱ꞌnaj Egipto, ni̱ guidaꞌā raꞌa ni sij, ni̱ guirīj ganꞌanj ni sij.

Sani̱ ri̱an nun dagahuin ni sij nuguanꞌ guiꞌyaj yyāj nga̱ ni sij, ni̱ gahuin anē rian ni sij, ataj manꞌan Señor.

¹⁰Hué dan ni̱ nan huin nuguanꞌ na̱ca gui̱ꞌyaj yyāj nga̱ ni du̱güiꞌ Israel xiráj gaꞌi̱ yoꞌ, ataj manꞌan Señor.

Gui̱ꞌyā sisi̱ gu̱nun si-nu̱guanꞌānj chruhua niman ni sij.

Ni̱ ga̱rūnj nuguanꞌ daj chruhua niman ni sij nej.

Ni̱ ga̱huin Danꞌanj ni sij manꞌānj.

Ni̱ ga̱huin ni sij ni tsínj gui̱nicoꞌ manꞌānj.

¹¹Ni̱ güi daj ni̱ nitaj si hua nia̱n sisi̱ ga̱taj ni sij rian dugüiꞌ ni sij nga̱ jnánj ni sij:

“Gui̱niꞌí re̱ꞌ Señor.”

Sé daj ga̱taj ni sij mánj.

Daj si gui̱niꞌi daranꞌ ni sij manꞌānj.

Ni̱ asi̱j ni tsínj hua lij nga̱ ni tsínj achij, ni̱ gui̱niꞌi daranꞌ ni sij manꞌānj.

¹²Ni̱ gui̱nicā ꞌngo̱ niman nico rian si quij guiꞌyaj ni sij.

Ni̱ nitaj a̱man na̱nun ruhuāj gui̱niꞌīnj si-ga̱quinꞌ ni sij mánj.

Daj gataj Yanꞌanj gunun ni ngüi̱ guimán asi̱j ná.

¹³Ni̱ ngaa aꞌmi Yanꞌanj xiꞌí nuguanꞌ na̱ca gui̱ꞌyaj yya nga̱ néꞌ, ni̱ huin ruhuaj gata sisi̱ nuguanꞌ hua gachin huin nuguanꞌ guiꞌyaj yya sini Yanꞌanj nga̱ ni ngüi̱ guimán asi̱j ná. Do̱j hua ni̱ ꞌngo̱ ga̱nahuij nuguanꞌ daj.

¹Ni̱ ngaa guiꞌyaj yya sini Yanꞌanj nga̱ ni tsínj israelita, ni̱ gataj snanꞌanj Yanꞌanj da̱j gui̱ꞌyaj ni sij ngaa na̱huin yuꞌ ni sij gui̱nicoꞌ ni sij Yanꞌanj. Ni̱ gataj snanꞌanj Yanꞌanj da̱j ga̱ nuhui gui̱ꞌyaj ni sij chruhua xungüi̱ nan. ²Ni̱ nuhui daj huin ꞌngo̱ nuhui atsij, guiꞌyaj ni sij. Ni̱ ne̱ꞌ rian chruhua nuhui niquinꞌ ꞌngo̱ candelero nga̱ mesa ta̱j si-chra̱chrunj Yanꞌanj. Ni̱ yuꞌuj daj gu̱ꞌnaj rian hua sa̱ꞌ. ³Ni̱ ne̱ꞌ ru̱cu ango atsij nicoꞌ chruhua nuhui daj gu̱ꞌnaj rian hua sa̱ꞌ ni̱nꞌ. ⁴Ni̱ chruhua hueꞌ daj niquinꞌ ꞌngo̱ gagaꞌ oro rian utinꞌ ni sij siquíj. Ni̱ ngaj si-chrúnj Yanꞌanj chrúnj gue̱ daj. Ni̱ daꞌ ganica̱j oro xiráj chrúnj daj nga. Ni̱ chruhua chrúnj daj nu̱n ꞌngo̱ siu̱ huin gagaꞌ oro. Ni̱ chruhua siu̱ daj nu̱n si gu̱ꞌnaj maná. Ni̱ chruhua chrúnj daj, ni̱ nu̱n chrun niꞌí guinicaj tsínj gu̱ꞌnaj Aarón. Ni̱ naxiꞌnanj daꞌníj chrun niꞌí daj asi̱j ná. Ni̱ nu̱n hui̱j yej garaꞌ chruhua daj. Ni̱ rian hui̱j yej daj garun Yanꞌanj ni nuguanꞌ guiꞌyaj yya Yanꞌanj nga̱ ni ngüi̱. ⁵Ni̱ niquinꞌ hui̱j gagaꞌ huin ángel gu̱ꞌnaj-áꞌ querubines xiráj chrúnj daj. Ni̱ nu̱ngüej ángel daj huin ꞌngo̱ daꞌngaꞌ digyán sisi̱ nne Yanꞌanj yuꞌuj daj. Ni̱ hua ránj si-gachi nu̱ngüej ángel daj rian gayanj ni sij si-tun xucu aránj rian si-ga̱quinꞌ ni ngüi̱. Sani̱ yya̱j ni̱ sé si hua nia̱n sisi̱ ga̱ꞌmi xe̱ꞌēj xiꞌí go̱ꞌngo ni rasu̱n daj mánj.

⁶Ni̱ ngaa hué daj guiꞌyaj xugüi ni sij ni rasu̱n daj, ni̱ yaꞌyoj atuj ni chrej chruhua hueꞌ ne̱ꞌ rian daj sisi̱ gui̱ꞌyaj sun ni sij si-sun Yanꞌanj. ⁷Sani̱ chruhua ango hueꞌ, ni̱ atuj urin chrej aꞌninꞌ. Ni̱ urin yu̱n atuj sij da nasíj yoꞌ. Ni̱ ngaa atuj sij, ni̱ nicaj sij si-tun xucu sisi̱ ga̱ꞌuiꞌ sij xiꞌí si-ga̱quinꞌ manꞌan sij nga̱ xiꞌí si-ga̱quinꞌ ni ngüi̱ huin gaquinꞌ nun niꞌi ni ngüi̱ si guiꞌyaj ni sij. ⁸Hué ducuánj daj, ni̱ digyán Espíritu Santo sisi̱ ngaa hua gue̱ nne hueꞌ ne̱ꞌ rian daj, ni̱ achin si gahuin níꞌnij chrej ga̱tu ni ngüi̱ chruhua ango hueꞌ nne ne̱ꞌ chru̱hua huin rian hua sa̱ꞌ daj. ⁹Hué ni nuguanꞌ nan huin ꞌngo̱ chrej digyán Yanꞌanj rian néꞌ ma̱n yya̱j. Daj si nagaꞌuiꞌ ni chrej ni rasu̱n nga̱ ni xucu gaca rian Yanꞌanj. Sani̱ naꞌue ga̱huin sa̱ꞌ niman ni ngüi̱ rian Yanꞌanj, gui̱ꞌyaj ni rasu̱n nga̱ ni xucu gaca nagaꞌuiꞌ ni chrej daj mánj. ¹⁰Maan si aꞌmi ni nuguanꞌ nan xiꞌí si xa̱ néꞌ, si go̱ꞌo néꞌ, ni̱ da̱j gui̱ꞌyaj néꞌ na̱niaꞌ néꞌ. Ni̱ urin güenda nnee̱ cúj néꞌ aꞌninꞌ ni nuguanꞌ nan sun. Ni̱ níꞌyanj ni nuguanꞌ nan da na̱guiꞌyaj na̱ca Yanꞌanj ni nuguanꞌ.

¹¹Sani̱ hua gaꞌna̱ꞌ Cristo. Ni̱ hué sij huin chrej aꞌninꞌ rian ni nuguanꞌ na̱ca daj. Ni̱ gatúj sij chruhua nuhui sa̱ꞌ. Ni̱ hua sa̱ꞌ daj, daj nga̱ nuhui nne chruhua xungüi̱ nan. Ni̱ sé raꞌa ni tsínj guiꞌyaj nuhui gatúj Jesús daj mánj. Daj si sé ꞌngo̱ nuhui nne chruhua xungüi̱ nan huin mánj. ¹²Ni̱ sé tun stane̱ nga̱ tun cero nicaj Cristo gatúj sij chruhua nuhui daj. Sani̱ urin yu̱n gatúj sij rian hua sa̱ꞌ ni̱nꞌ daj nga̱ si-tun manꞌan sij. Ni̱ hué ducuánj daj guiꞌyaj sij si ganacaj sij ni̱ganj ni̱nꞌ néꞌ. ¹³Ni̱ dagamanꞌ ni chrej si-tun sicuj nga̱ si-tun stane̱ rian nnee̱ cúj ni ngüi̱ nitaj si hua sa̱ꞌ nnee̱ cúj. Ni̱ hué daj gari yanꞌa̱n ni sij cero rian nna daj. Ni̱ dagamanꞌ ni sij yaj cero daj rian nnee̱ cúj ni ngüi̱ daj. Ni̱ gahuin sa̱ꞌ nnee̱ cúj ni sij rian Yanꞌanj, guiꞌyaj tun xucu nga̱ yaj cero. ¹⁴Ni̱ sisi̱ gahuin sa̱ꞌ nnee̱ cúj ni ngüi̱ guiꞌyaj si-tun xucu, ni̱ sa̱ꞌ doj gui̱ꞌyaj si-tun manꞌan Cristo na̱ꞌninꞌ-ínꞌ niman néꞌ. Daj si xiꞌí Espíritu Santo nne ni̱ganj, ni̱ nagaꞌuiꞌ Cristo manꞌan sij rian Yanꞌanj. Ni̱ nitaj ꞌngo̱ gaquinꞌ daꞌui sij mánj. Ni̱ naꞌninꞌ si-tun manꞌan Cristo niman néꞌ xiꞌí si-quij guiꞌyaj néꞌ. Ngaa ni̱ ga̱ꞌue da̱gahuin néꞌ rian Yanꞌanj hua ni̱ꞌnaꞌ.

¹⁵Ngaa ni̱ gaꞌna̱ꞌ Jesucristo gahuiꞌ sij xiꞌí si-ga̱quinꞌ néꞌ. Daj si guiꞌyaj néꞌ gaquinꞌ nun dagahuin néꞌ nuguanꞌ guiꞌyaj yya Yanꞌanj nga̱ ni ngüi̱ guimán asi̱j ná. Yya̱j ni̱ niquinꞌ Jesús aꞌmi sij ꞌngo̱ nuguanꞌ na̱ca rian néꞌ da̱j gui̱ꞌyaj néꞌ ga̱huin sa̱ꞌ néꞌ rian Yanꞌanj. Xiꞌí daj ni̱ ga̱ꞌue na̱huin raꞌa ni̱ganj néꞌ ni rasu̱n sa̱ꞌ mán xataꞌ, gui̱ꞌyaj Cristo huin néꞌ ni ngüi̱ gaquínj Yanꞌanj. Daj si hué daj gataj yya Yanꞌanj gunun néꞌ. ¹⁶Ni̱ naxi nicaj ꞌngo̱ tsínj daj ꞌngo̱ yanj ata sisi̱ da̱j huin ruhua sij si gu̱raꞌ daꞌaj ni dugüiꞌ sij siꞌyaj sij ngaa ga̱huiꞌ sij. Sani̱ si̱ gaꞌue gu̱raꞌ daꞌaj ni dugüiꞌ sij siꞌyaj sij ngaa nun ga̱huin ga̱huiꞌ sij mánj. ¹⁷Daj si si̱ gaꞌue gui̱ꞌyaj ni sij rúnꞌ ataj ata daj ngaa hua ni̱ꞌnaꞌ sij nne sij. Sani̱ ngaa ga̱huiꞌ tsínj daj, ni̱ ga̱ꞌue gui̱ꞌyaj ni sij da̱j rúnꞌ ataj ata daj. ¹⁸Ni̱ ngaa guiꞌyaj yya sini Yanꞌanj ꞌngo̱ nuguanꞌ nga̱ ni ngüi̱ guimán asi̱j ná, ni̱ hua nia̱n si ga̱yanj si-tun xucu xiꞌí gaquinꞌ daꞌui ni sij. ¹⁹Ni̱ ngaa guisíj gaꞌmi Moisés daranꞌ ni nuguanꞌ huin si-ley Yanꞌanj rian daranꞌ ni ngüi̱, ni̱ guidaꞌa sij si-tun cero nga̱ si-tun stane̱ nachej sij nnee. Ni̱ guidaꞌa sij to̱ xachij mare nga̱ raꞌa coj gu̱ꞌnaj hisopo nej. Ni̱ dagamanꞌ sij tun daj rian libro huin si-ley Yanꞌanj nga̱ rian daranꞌ ni ngüi̱ nej. ²⁰Ni̱ gataj snanꞌanj Moisés rian ni ngüi̱: “Tun nan huin tun gayanj xiꞌí nuguanꞌ guiꞌyaj yya Yanꞌanj nga̱ néꞌ. Ni̱ aꞌninꞌ Yanꞌanj sun sisi̱ da̱gahuin néꞌ nuguanꞌ daj.” Daj gataj Moisés rian ni ngüi̱.

²¹Ni̱ hué daj dagamanꞌ Moisés tun daj nuhui atsij nga̱ rian ni rasu̱n aráj sun ni sij chruhua nuhui ngaa guiꞌyaj sun ni sij si-sun Yanꞌanj. ²²Ni̱ nico ni rasu̱n na̱huin sa̱ꞌ rian Yanꞌanj gui̱ꞌyaj si-tun xucu ataj si-ley Moisés. Ni̱ sisi̱ nitaj tun ga̱yanj, ni̱ si̱ guinicaj Yanꞌanj niman nico nga̱ si-ga̱quinꞌ ni ngüi̱ mánj.

El sacrificio de Cristo quita el pecado

²³Ni̱ asi̱j ná ni̱ hua nia̱n sisi̱ ga̱huin sa̱ꞌ ni rasu̱n garasu̱n ni chrej nga̱ si-tun xucu. Ni̱ rasu̱n daj huin ꞌngo̱ daꞌngaꞌ da̱j rúnꞌ huin ni rasu̱n mán xataꞌ. Sani̱ ni rasu̱n mán xataꞌ si̱ gaꞌue ga̱huin sa̱ꞌ ni rasu̱n daj, gui̱ꞌyaj si-tun xucu mánj. Urin si-tun manꞌan Cristo ga̱ꞌue gui̱ꞌyaj sisi̱ ga̱huin sa̱ꞌ ni rasu̱n daj. ²⁴Daj si nun ga̱tu Cristo chruhua nuhui guiꞌyaj ni tsínj. Daj si nuhui guiꞌyaj ni sij asi̱j ná huin ꞌngo̱ daꞌngaꞌ da̱j rúnꞌ huin nuhui mán xataꞌ. Sani̱ gatúj Cristo chruhua nuhui mán xataꞌ. Ni̱ yya̱j niquinꞌ sij achínj jniꞌyaj sij rian Yanꞌanj xiꞌí néꞌ. ²⁵Ni̱ nun ga̱tu Cristo chruhua nuhui nne xataꞌ sisi̱ nico̱ꞌ huaj na̱gaꞌuiꞌ sij manꞌan sij rian Yanꞌanj da̱j rúnꞌ gatúj chrej aꞌninꞌ urin nasíj yoꞌ asi̱j ná. Ni̱ nicaj chrej daj si-tun xucu huaj sij. Sani̱ sé si-tun manꞌan sij nicaj sij gatúj sij rian hua sa̱ꞌ ni̱nꞌ ruhua mánj. ²⁶Sisi̱ hué daj guiꞌyaj Jesús, ni̱ hua nia̱n sisi̱ nico̱ꞌ huaj gui̱ranꞌ sij sayun asi̱j ngaa guerenga̱ꞌ xungüi̱. Sani̱ yya̱j ruhua ga̱nahuij xungüi̱, ni̱ gaꞌna̱ꞌ Cristo. Ni̱ urin yu̱n nagaꞌuiꞌ sij manꞌan sij rian Yanꞌanj sisi̱ ga̱ꞌne sij si-ga̱quinꞌ néꞌ.

²⁷Ni̱ niꞌi néꞌ sisi̱ urin yu̱n ga̱huiꞌ daranꞌ néꞌ huin néꞌ ni ngüi̱ ma̱n chruhua xungüi̱ nan. Hué dan ni̱ da ru̱cu, ni gui̱niquinꞌ néꞌ rian Yanꞌanj. Ni̱ na̱guiꞌyaj yya Yanꞌanj xiꞌí si-ga̱quinꞌ néꞌ. ²⁸Hué ducuánj daj, ni̱ urin yu̱n nagaꞌuiꞌ Cristo manꞌan sij gahuiꞌ sij xiꞌí si-ga̱quinꞌ nico ni ngüi̱. Ni̱ ngaa ga̱ꞌnaꞌ ru̱huaꞌ yún sij, ni̱ sé si ga̱ꞌnaꞌ ga̱huiꞌ sij xiꞌí si-ga̱quinꞌ ni ngüi̱ mánj. Sani̱ ga̱ꞌnaꞌ Cristo sisi̱ na̱caj sij ni ngüi̱ anaꞌuij sisi̱ ga̱ꞌnaꞌ sij.

¹Ni̱ si-ley Moisés huin ꞌngo̱ daꞌngaꞌ digyán da̱j hua si sa̱ꞌ gui̱ꞌyaj Yanꞌanj da ne̱ꞌ ru̱cu rian néꞌ. Ni̱ sé da̱j rúnꞌ hua si-ley Moisés hua si sa̱ꞌ da mánj. Asi̱j ná ni̱ yoyoꞌ huaj ni sij rian Yanꞌanj nagaꞌuiꞌ ni sij xucu xiꞌí si-ga̱quinꞌ ni sij. Sani̱ nitaj a̱man ga̱ꞌue ga̱huin sa̱ꞌ niman ni sij rian Yanꞌanj, gui̱ꞌyaj ley da mánj. ²Ni̱ sisi̱ ga̱ꞌue ga̱huin sa̱ꞌ niman ni sij xiꞌí si nagaꞌuiꞌ ni sij xucu rian Yanꞌanj, ngaa ni̱ si̱ dagahuiꞌ ni sij xucu rian Yanꞌanj ga̱ mánj. Daj si ꞌngo̱ ga̱huin sa̱ꞌ ni sij xiꞌí si guiꞌyaj ni sij. Ni̱ nitaj si ga̱huin ruhua ni sij nga̱ si-ga̱quinꞌ ni sij mánj. ³Sani̱ yoyoꞌ ngaa dagahuiꞌ ni sij xucu, ni̱ nanun ruhua ni sij sisi̱ daꞌui ni sij gaquinꞌ. ⁴Daj si si̱ gaꞌue ga̱ꞌne si-tun sicuj nga̱ si-tun stane̱ si-ga̱quinꞌ ni ngüi̱ mánj. ⁵Xiꞌí daj ni̱ ngaa gatúj Cristo chruhua xungüi̱ nan, ni̱ gataj sij gunun Yanꞌanj:

Naꞌuej ruhuá re̱ꞌ sisi̱ da̱gahuīj xucu rian re̱ꞌ.

Ni̱ naꞌuej ruhuá re̱ꞌ sisi̱ ri̱quīj rasu̱n rián re̱ꞌ.

Sani̱ guiꞌyaj xugüí re̱ꞌ nnee̱ cū xiꞌīj.

⁶Ni̱ nun aranꞌ ruhuá re̱ꞌ niꞌyáj re̱ꞌ xucu aca nga̱ xucu gahuiꞌ xiꞌí gaquinꞌ mánj.

⁷Ngaa ni gatā gunún re̱ꞌ:

“Huēj ꞌna̱ꞌ rián re̱ꞌ gui̱ꞌyā si aranꞌ ruhuá re̱ꞌ huín re̱ꞌ Yanꞌanj.

Daj si hué daj garun ni sij xiꞌīj chruhua libro daj asi̱j ná.”

Daj gataj Cristo gunun Yanꞌanj.

⁸Ni̱ hua sini gataj Cristo gunun Yanꞌanj: “Nun aranꞌ ruhuá re̱ꞌ niꞌyáj re̱ꞌ ni xucu dagahuiꞌ ni ngüi̱ rián re̱ꞌ nga̱ ni rasu̱n aꞌuiꞌ ni sij rián re̱ꞌ nej, xucu ahuiꞌ sisi̱ xi̱ꞌne si-ga̱quinꞌ ni sij nej. Nun huin ruhuá re̱ꞌ sisi̱ hué daj gui̱ꞌyaj ni ngüi̱ mánj.” Daj gataj Cristo. (Ni̱ aꞌuiꞌ ni sij ni rasu̱n daj da̱j rúnꞌ gataj si-ley Moisés.)

⁹Ngaa ni̱ gataj ru̱huaꞌ yún Cristo: “Huēj ꞌna̱ꞌ rián re̱ꞌ gui̱ꞌyā si aranꞌ ruhua re̱ꞌ huín re̱ꞌ Yanꞌanj.” Daj gataj sij.

Ni̱ huin ruhuaj gata sisi̱ gaꞌne Cristo ducuánj nicaj sini ni sij. Ni̱ naguiꞌyaj Cristo ango ducuánj na̱ca huin si-nu̱guanꞌ manꞌan sij. ¹⁰Ngaa ni̱ gahuin sa̱ꞌ niman néꞌ rian Yanꞌanj, ꞌyaj si dagahuin Jesús si garanꞌ ruhua Yanꞌanj. Daj si urin yu̱n nagaꞌuiꞌ sij manꞌan sij gahuiꞌ sij ni̱ganj ni̱nꞌ xiꞌí si-ga̱quinꞌ néꞌ.

¹¹Xa̱ngaꞌ ni̱ yaꞌyoj niquinꞌ daranꞌ ni chrej ꞌyaj sun ni sij rian Yanꞌanj. Ni̱ nagaꞌuiꞌ ni sij xucu rian Yanꞌanj. Sani̱ nitaj a̱man ga̱ꞌue xi̱ꞌne si-ga̱quinꞌ ni ngüi̱, gui̱ꞌyaj ni xucu nagaꞌuiꞌ ni sij da mánj. ¹²Sani̱ urin yu̱n nagaꞌuiꞌ Cristo manꞌan sij rian Yanꞌanj gahuiꞌ sij urin ni̱ganj ni̱nꞌ xiꞌí si-ga̱quinꞌ ni ngüi̱. Ngaa ni̱ ganꞌanj ga̱ne sij ne̱ꞌ chrej raꞌa sa̱ꞌ manꞌan Yanꞌanj. ¹³Ni̱ yya̱j ni̱ anaꞌuij sij sisi̱ gu̱taꞌ sij dacój sij rian ni tsínj ununꞌ nga̱ sij, gui̱ꞌyaj Yanꞌanj. ¹⁴Urin yu̱n nagaꞌuiꞌ Cristo manꞌan sij rian Yanꞌanj. Xiꞌí daj ni̱ ni̱ganj ni̱nꞌ ga̱huin sa̱ꞌ niman ni ngüi̱ hua sa̱ꞌ rian Yanꞌanj. ¹⁵Ni̱ hué daj gaꞌmi xa̱ngaꞌ Espíritu Santo asi̱j ná. Hua sini gataj-áꞌ:

¹⁶Ngaa ga̱chin ni güi daj, ni̱ hué nan huin nuguanꞌ gui̱ꞌyaj yyāj nga̱ ni sij.

Gui̱ꞌyā sisi̱ gui̱nun si-lēy niman ni sij.

Ni̱ ga̱rūnj ley daj chruhua niman ni sij nej.

Daj gataj Espíritu Santo.

¹⁷Ngaa ni gataj ru̱huaꞌ yún sij:

Ni̱ nitaj a̱man na̱nun ruhuāj niꞌīnj si-ga̱quinꞌ ni sij nga̱ ni rasu̱n quij, guiꞌyaj ni sij mánj.

Daj gataj Espíritu Santo.

¹⁸Hué dan ni̱ xiꞌí si guinicaj Yanꞌanj ꞌngo̱ niman nico rian si-ga̱quinꞌ néꞌ, ni̱ nitaj si níꞌyanj sisi̱ na̱gaꞌuiꞌ néꞌ rasu̱n rian Yanꞌanj xiꞌí si-ga̱quinꞌ néꞌ ga̱ mánj.

¹⁹Hué dan ni̱ xiꞌí si-tun manꞌan Jesucristo, ni̱ nitaj si guxuꞌuiꞌ néꞌ ga̱tu néꞌ rian hua sa̱ꞌ ni̱nꞌ daj huin ducuá Yanꞌanj huin ín re̱ꞌ jnān nga̱ xicaꞌuī. ²⁰Ni̱ gaꞌníj Cristo ꞌngo̱ chrej na̱ca ga̱cheꞌ xiꞌí si gahuiꞌ nnee̱ cúj sij. Ni̱ xiꞌí daj ni̱ ga̱ꞌue ga̱tu néꞌ ru̱cu atsij nicoꞌ chruhua ducuá Yanꞌanj. Ni̱ chrej na̱ca daj huin nnee̱ cúj manꞌan sij. ²¹Ni̱ hua ꞌngo̱ chrej huin achij ni̱nꞌ niquinꞌ sij rian Yanꞌanj xiꞌí néꞌ huin sij Jesucristo. ²²Xiꞌí daj ni̱ ga̱nꞌanj nichi néꞌ rian Yanꞌanj. Ni̱ xiꞌí si xuman ruhua néꞌ niꞌyaj néꞌ Jesús, ni̱ ga̱huin yya ruhua néꞌ sisi̱ ga̱ꞌue gui̱nicoꞌ sa̱ꞌ néꞌ Yanꞌanj. Ni̱ si̱ ganani ruhua néꞌ xiꞌí gaquinꞌ daꞌui néꞌ. Daj si naꞌninꞌ Yanꞌanj si-tun manꞌan Jesús chruhua niman néꞌ. Ni̱ nahuin sa̱ꞌ nnee̱ cúj néꞌ xiꞌí si gataꞌ nnee néꞌ chruhua nnee sa̱ꞌ.

²³Ni̱ ꞌngo̱ ga̱ ni̱ca ruhua néꞌ. Ni̱ si̱ gahuin hui̱j ruhua néꞌ nga̱ nuguanꞌ sa̱ꞌ gui̱ꞌyaj Yanꞌanj nga̱ néꞌ huin nuguanꞌ nataꞌ néꞌ rian ni ngüi̱. Daj si da̱gahuin Yanꞌanj nuguanꞌ guiꞌyaj yya nga̱ néꞌ. ²⁴Ni̱ na̱noꞌ néꞌ ducuánj da̱j ga̱ꞌue ga̱huin ꞌi̱ ruhua go̱ꞌngoꞌ gui̱niꞌíꞌ ni dugüíꞌ. Ni̱ hué daj gui̱ꞌyaj néꞌ sisi̱ gui̱ꞌyaj sa̱ꞌ go̱ꞌngoꞌ rian ni dugüíꞌ. ²⁵Ni̱ si̱ duna néꞌ si na̱huin yuꞌ néꞌ nga̱ ni dugüiꞌ néꞌ, si hua ngüi̱ nitaj si nicoꞌ ducuánj daj. Sani̱ du̱guꞌnunꞌ néꞌ ga̱ꞌuiꞌ chrej néꞌ rian ni dugüiꞌ néꞌ, xiꞌí si niꞌi néꞌ sisi̱ gahuin ni̱chrunꞌ güi ga̱ꞌnaꞌ Señor.

Advertencia al que peca deliberadamente

²⁶Daj si sisi̱ hua niꞌi néꞌ nuguanꞌ xa̱ngaꞌ, ni̱ ga̱ gue̱ gui̱ꞌyaj néꞌ gaquinꞌ ngaa niꞌi néꞌ sisi̱ gaquinꞌ huin ꞌyaj néꞌ, ni̱ nitaj si naránj rian si-ga̱quinꞌ néꞌ mánj. ²⁷Hué dan ni̱ niqui ni̱nꞌ ruhua niman néꞌ sisi̱ urin si anaꞌuij néꞌ huin si gui̱ꞌyaj Yanꞌanj castigo néꞌ gu̱nun néꞌ rian aca yanꞌa̱n nga̱ ni ngüi̱ ununꞌ nga̱ Yanꞌanj. ²⁸Tsínj naꞌue da̱gahuin si gataj si-ley Moisés, ni̱ gahuiꞌ síꞌ, guiꞌyaj si-nu̱guanꞌ hui̱j hua̱ꞌnij tsínj guiniꞌi sisi̱ guiꞌyaj síꞌ gaquinꞌ. Ni̱ si̱ nahuin ꞌi̱ ruhua ni sij gui̱niꞌi ni sij síꞌ mánj. ²⁹Ni̱ sisi̱ hué daj gahuin asi̱j ná, ni̱ nico doj ga̱huin castigo tsínj ꞌyaj quij rian daꞌníj Yanꞌanj. Ni̱ ꞌyaj sij sisi̱ nitaj si níꞌyanj si-tun manꞌan Jesús. Ni̱ hué si-tun manꞌan Jesús guiꞌyaj sisi̱ gahuin sa̱ꞌ niman néꞌ rian Yanꞌanj. Ni̱ guiꞌyaj yya Yanꞌanj nga̱ néꞌ xiꞌí tun daj. Ni̱ ꞌyaj quij sij rian Espíritu Santo. Ni̱ hué Espíritu Santo huin si guiꞌyaj sinduj rian sij. ³⁰Ni̱ niꞌi néꞌ Señor gataj: “Manꞌānj huin si gui̱ꞌyaj castigo. Ni̱ na̱ruꞌuē da̱j rúnꞌ guiꞌyaj quij ni sij.” Daj gataj Señor.

Ni̱ gataj ru̱huaꞌ yún Señor: “Na̱guiꞌyaj yya Señor nga̱ ni ngüi̱ nicoꞌ manꞌan sij.” Daj gataj Señor.

³¹Hué dan ni̱ nuguanꞌ xuꞌuiꞌ huin si gui̱ranꞌ tsínj gui̱daꞌa Yanꞌanj hua ni̱ꞌnaꞌ.

³²Hué dan ni̱ na̱nun ruhua á re̱ꞌ da̱j guiꞌyaj ni é re̱ꞌ ni güi gachin ngaa guxuman sini chruhua á re̱ꞌ niꞌyaj á re̱ꞌ Jesús. Daj si guixigui̱n chruhua niman án re̱ꞌ, guiꞌyaj Yanꞌanj. Ni̱ gahuin nucuaj á re̱ꞌ guiranꞌ a ni é re̱ꞌ sayun nico. ³³Ni̱ gaꞌmi quij ni sij rian ni é re̱ꞌ. Ni̱ chranꞌ yunꞌunj ni sij a ni é re̱ꞌ rian daranꞌ ni ngüi̱. Ni̱ guinicaj dugüiꞌ a ni é re̱ꞌ nga̱ ango ni dugüiꞌ ni é re̱ꞌ ngaa hué daj chranꞌ yunꞌunj ni sij ni dugüiꞌ ni é re̱ꞌ. ³⁴Ni̱ nani yaco ruhua á re̱ꞌ niꞌyaj á re̱ꞌ ni dugüiꞌ a ni é re̱ꞌ gunu̱n ducuaga̱ꞌ. Ni̱ gahuin nia̱ꞌ ruhua ni é re̱ꞌ ngaa gaꞌnej ni sij siꞌyaj á re̱ꞌ. Ni̱ hué daj guiꞌyaj á re̱ꞌ si hua niꞌi a ni é re̱ꞌ sisi̱ sa̱ꞌ doj hua siꞌyaj á re̱ꞌ mán xataꞌ. Ni̱ ga̱ ni̱ganj siꞌyaj á re̱ꞌ daj. ³⁵Hué dan ni̱ si̱ gaꞌninꞌ ruhua á re̱ꞌ si gu̱xuman ruhua á re̱ꞌ ni̱ꞌyaj á re̱ꞌ Yanꞌanj. Daj si gui̱ꞌyaj sa̱ꞌ Yanꞌanj nga̱ á re̱ꞌ xiꞌí si xuman ruhua á re̱ꞌ niꞌyaj á re̱ꞌ Yanꞌanj. ³⁶Ni̱ hua nia̱n si gu̱nucuaj á re̱ꞌ nga̱ sayun ranꞌ ni é re̱ꞌ. Ngaa ni ga̱ꞌue gui̱ꞌyaj á re̱ꞌ da̱j rúnꞌ huin ruhua Yanꞌanj si gui̱ꞌyaj á re̱ꞌ. Ngaa síj ni̱ na̱huin raꞌa á re̱ꞌ ni rasu̱n da̱j rúnꞌ gataj yya Yanꞌanj rian án re̱ꞌ.

³⁷Daj si gataj si-nu̱guanꞌ Yanꞌanj:

Gahuin ni̱chrunꞌ ga̱ꞌnaꞌ Señor.

Ni̱ si̱ gahuin ran sij ga̱ꞌnaꞌ sij mánj.

³⁸Tsínj hua ni̱ca niman, ni̱ gu̱nucuaj sij ga̱ne sij xiꞌí si xuman ruhua sij niꞌyaj sij manꞌānj.

Sani̱ sisi̱ du̱na sij si-nu̱guanꞌānj, ni̱ si̱ gahuin nia̱ꞌ ruhuāj ni̱ꞌyā sij mánj.

Gataj si-nu̱guanꞌ Yanꞌanj.

³⁹Sani̱ sé rúnꞌ huin ni tsínj duna si-nu̱guanꞌ Yanꞌanj huin néꞌ sisi̱ ga̱huin néꞌ castigo rian yanꞌa̱n mánj. Daj si huin néꞌ ni tsínj xuman ruhua niꞌyaj Yanꞌanj. Xiꞌí daj ni̱ ga̱nacaj Yanꞌanj néꞌ.

La fe

¹Ni̱ ngaa ataj néꞌ sisi̱ xuman ruhua néꞌ niꞌyaj néꞌ Yanꞌanj, ni̱ huin ruhuaj gata sisi̱ niꞌi sa̱ꞌ néꞌ sisi̱ na̱huin raꞌa néꞌ si anaꞌuij néꞌ. Ni̱ gahuin yya ruhua néꞌ nga̱ nuguanꞌ nun niꞌi rian néꞌ. ²Ni̱ xiꞌí si guxuman ruhua ni tsínj guimán asi̱j ná niꞌyaj ni sij Yanꞌanj, ni̱ gaꞌmi ꞌueé Yanꞌanj xiꞌí ni sij.

³Ni̱ niꞌi néꞌ sisi̱ guiꞌyaj Yanꞌanj ni xungüi̱ nga̱ xataꞌ xiꞌí si-nu̱guanꞌanj. Ni̱ hué daj niꞌi néꞌ xiꞌí si xuman ruhua néꞌ niꞌyaj néꞌ Yanꞌanj. Ni̱ ngaa guiꞌyaj Yanꞌanj daranꞌ ni rasu̱n niꞌi rian néꞌ, ni̱ garáj sun Yanꞌanj ni rasu̱n si̱ gaꞌue guiniꞌi rian néꞌ.

⁴Ni̱ xiꞌí si guxuman ruhua tsínj gu̱ꞌnaj Abel niꞌyaj sij Yanꞌanj, ni̱ hua sa̱ꞌ ofrenda nagaꞌuiꞌ sij daj nga̱ ofrenda nagaꞌuiꞌ jnánj sij Caín. Ni̱ xiꞌí daj ni̱ gataj Yanꞌanj sisi̱ hua ni̱ca niman tsínj gu̱ꞌnaj Abel. Ni̱ nahuin raꞌa Yanꞌanj si-ofrenda sij. Hué daj ni̱ nu̱nj si hua gahuiꞌ Abel asi̱j ná, sani̱ hua gue̱ aꞌmi sij xiꞌí si guxuman ruhua sij niꞌyaj sij Yanꞌanj.

⁵Ni̱ xiꞌí si guxuman ruhua tsínj gu̱ꞌnaj Enoc niꞌyaj sij Yanꞌanj, ni̱ nicaj Yanꞌanj sij ganꞌan xataꞌ. Ni̱ nun gahuiꞌ sij. Ni̱ nun nariꞌ ni dugüiꞌ sij manꞌan sij. Daj si Yanꞌanj nicaj ganꞌanj sij xataꞌ. Ni̱ ataj si-nu̱guanꞌ Yanꞌanj sisi̱ asi̱j ngaa achin nicaj Yanꞌanj ganꞌanj sij xataꞌ, ni̱ gaꞌmi sa̱ꞌ Yanꞌanj xiꞌí Enoc. ⁶Sani̱ sisi̱ nitaj si xuman ruhua néꞌ niꞌyaj néꞌ Yanꞌanj, ni̱ si̱ gaꞌue gui̱ꞌyaj néꞌ si aranꞌ ruhua Yanꞌanj mánj. Daj si sisi̱ huin ruhua néꞌ ga̱huin ni̱chrunꞌ néꞌ rian Yanꞌanj, ni̱ hua nia̱n sisi̱ gu̱xuman ruhua néꞌ sisi̱ hua yya hua Yanꞌanj. Ni̱ hua nia̱n sisi̱ gu̱xuman ruhua néꞌ sisi̱ gui̱ꞌyaj sa̱ꞌ Yanꞌanj nga̱ ni ngüi̱ nanoꞌ Yanꞌanj.

⁷Ni̱ xiꞌí si guxuman ruhua tsínj gu̱ꞌnaj Noé niꞌyaj sij Yanꞌanj, ni̱ dagahuin ꞌueé sij si gataj snanꞌanj Yanꞌanj gunun sij. Ni̱ xiꞌí daj guiꞌyaj sij ꞌngo̱ rio̱ xxi ta̱j rian nnee. Ni̱ hué daj gaꞌue ganani ni du̱güiꞌ sij rian sayun ga̱ꞌnaꞌ. Daj si hua gataj chru̱n Yanꞌanj gunun Noé da̱j ga̱huin chruhua xungüi̱ ngaa gane Noé asi̱j ná. Ni̱ xiꞌí si xuman ruhua Noé niꞌyaj sij Yanꞌanj, ni̱ digyán sij sisi̱ daꞌui ni ngüi̱ guimán asi̱j ná gaquinꞌ. Ni̱ xiꞌí si guxuman ruhua sij, ni̱ gahuin sij tsínj hua ni̱ca niman gataj Yanꞌanj.

⁸Ni̱ xiꞌí si guxuman ruhua tsínj gu̱ꞌnaj Abraham niꞌyaj sij Yanꞌanj, ni̱ dagahuin sij ngaa gaquínj Yanꞌanj ga̱nꞌanj sij. Daj si gataj Yanꞌanj gunun sij sisi̱ ga̱hui sij ga̱nꞌanj sij ꞌngo̱ yuꞌuj rian nun niꞌi manꞌan sij. Ni̱ yuꞌuj daj gahuin doꞌój sij, guiꞌyaj Yanꞌanj. ⁹Ni̱ rúnꞌ huin ꞌngo̱ tsínj ꞌna̱ꞌ ango xumanꞌ, ni̱ daꞌngaꞌ daj gane sij yoꞌój daj xiꞌí si guxuman ruhua sij niꞌyaj sij Yanꞌanj. Ni̱ hua gataj yya Yanꞌanj gunun sij sisi̱ ga̱ꞌue ga̱ne sij yoꞌój daj. Ni̱ gane sij ꞌngo̱ hueꞌ atsij nga̱ daꞌníj sij Isaac nga̱ daꞌni̱ siꞌni̱ sij Jacob. Ni̱ da̱j rúnꞌ gataj yya Yanꞌanj si yoꞌój daj ga̱huin doꞌój Abraham, ni̱ hué daj gataj yya Yanꞌanj gunun Isaac nga̱ Jacob nej. ¹⁰Daj si anaꞌuij Abraham sisi̱ ga̱ne sij ango xumanꞌ ne̱ꞌ xataꞌ rian ma̱n hueꞌ sa̱ꞌ ni̱nꞌ ruhua. Ni̱ Yanꞌanj huin si gani ruhua da̱j ga̱ xumanꞌ daj. Ni̱ Yanꞌanj huin si guiꞌyaj ni hueꞌ sa̱ꞌ daj.

¹¹Hué dan ni̱ xiꞌí si guxuman ruhua yunꞌunj xa̱na gu̱ꞌnaj Sara niꞌyaj unj Yanꞌanj, ni̱ gunucuaj unj guiriꞌ unj ꞌngo̱ lij. Ni̱ gahuin unj ꞌngo̱ yunꞌunj xa̱na yatin achij ni̱nꞌ ruhua. Ni̱ gaꞌnga ꞌngo̱ lij, guiꞌyaj unj. Daj si guxuman ruhua unj sisi̱ hua yya nuguanꞌ guiꞌyaj yya Yanꞌanj nga̱ unj. ¹²Ni̱ achij ni̱nꞌ ruhua Abraham chruhua ga̱huiꞌ sij. Sani̱ ducu guixiꞌnanj ni daꞌni̱ siꞌni̱ sij. Ni̱ gahuin nico ni daꞌni̱ siꞌni̱ sij da̱j rúnꞌ hua nico ni yatiꞌ mán xataꞌ nga̱ ni yoꞌój chru mán duꞌua nnee yanꞌanj nej. Ni si̱ gaꞌue gu̱nucóꞌ ga̱yóꞌ ni yoꞌój chru da mánj.

¹³Ni̱ nu̱nj si achin na̱huin raꞌa ni tsínj guimán asi̱j ná nuguanꞌ guiꞌyaj yya Yanꞌanj nga̱ ni sij, sani̱ ꞌngo̱ guxuman ruhua ni sij niꞌyaj ni sij Yanꞌanj ngaa gahuiꞌ ni sij. Ni̱ xiꞌí si guxuman ruhua ni sij niꞌyaj ni sij Yanꞌanj, ni̱ guiniꞌi ni sij nuguanꞌ sa̱ꞌ gui̱ꞌyaj Yanꞌanj nga̱ ni sij ni güi ga̱ꞌnaꞌ. Ni̱ gahuin nia̱ꞌ ruhua ni sij nga̱ nuguanꞌ sa̱ꞌ gui̱ꞌyaj Yanꞌanj ni güi daj. Ni̱ xacaj ni sij cuenta sisi̱ tsínj ꞌna̱ꞌ anéj chrej huin ni sij. Ni̱ sé xánj ni sij huin xungüi̱ nan, gataj ni sij. ¹⁴Ni̱ ngaa hué daj aꞌmi ni ngüi̱, ni̱ nataꞌ yya ni sij sisi̱ nanoꞌ ni sij ꞌngo̱ xumanꞌ ga̱huin xánj ni sij. ¹⁵Ni̱ sisi̱ gani ruhua ni tsínj daj sisi̱ xumanꞌ rian gahui ni sij huin xánj ni sij, ni̱ ga̱ꞌue nanica̱j ni sij na̱nꞌ sij xánj ni sij daj. ¹⁶Sani̱ huin ruhua ni sij ꞌngo̱ xumanꞌ sa̱ꞌ ga̱ne ni sij daj nga̱ xánj ni sij. Ni̱ xumanꞌ sa̱ꞌ daj huin xataꞌ. Xiꞌí daj ni̱ nitaj si na̱ꞌaj Yanꞌanj gahuin Danꞌanj ni sij. Daj si hua guiꞌyaj xugüi Yanꞌanj ꞌngo̱ xumanꞌ rian gui̱man ni sij huin xataꞌ.

¹⁷Ni̱ xiꞌí si guxuman ruhua Abraham niꞌyaj sij Yanꞌanj, ni̱ guidaꞌa sij daꞌníj sij Isaac. Ni̱ gaꞌuej ruhua sij da̱gahuiꞌ sij urin daꞌníj sij na̱gaꞌuiꞌ sij síꞌ rian Yanꞌanj. Daj si xacaj Yanꞌanj daꞌngaꞌ si gui̱ꞌyaj Abraham. Ni̱ hua guiꞌyaj yya Yanꞌanj ꞌngo̱ nuguanꞌ nga̱ Abraham xiꞌí Isaac. ¹⁸Ni̱ hua gataj snanꞌanj Yanꞌanj gunun Abraham: “Gui̱niꞌi ni ngüi̱ ni daꞌni̱ siꞌni̱ re̱ꞌ, gui̱ꞌyaj daꞌníj re̱ꞌ Isaac.” Daj gataj Yanꞌanj rian Abraham. ¹⁹Ni̱ gani ruhua Abraham sisi̱ ga̱ꞌue ga̱naꞌnij ni níman, gui̱ꞌyaj Yanꞌanj. Do̱j ni̱ dagahuiꞌ Abraham daꞌníj sij. Sani̱ naꞌuej ruhua Yanꞌanj sisi̱ ga̱huiꞌ Isaac. Ngaa ni̱ güenda Abraham, ni̱ rúnꞌ huin sisi̱ hua gahuiꞌ daꞌníj sij. Sani̱ nahuin raꞌa ru̱huaꞌ yún sij daꞌníj sij.

²⁰Hué dan ni̱ xiꞌí si guxuman ruhua tsínj gu̱ꞌnaj Isaac niꞌyaj sij Yanꞌanj, ni̱ gaꞌmi sij ꞌngo̱ nuguanꞌ sa̱ꞌ xiꞌí si ga̱huin nga̱ nu̱ngüej daꞌníj sij Jacob nga̱ Esaú ni güi ga̱ꞌnaꞌ.

²¹Ni̱ xiꞌí si guxuman ruhua tsínj gu̱ꞌnaj Jacob niꞌyaj sij Yanꞌanj, ni̱ gaꞌmi sij nuguanꞌ sa̱ꞌ xiꞌí si ga̱huin nga̱ nu̱ngüej daꞌníj José. Ni̱ hué daj guiꞌyaj sij ngaa ruhua ga̱huiꞌ sij. Ni̱ gaꞌmi sa̱ꞌ sij rian Yanꞌanj ngaa runun sij chrun huaj sij.

²²Hué dan ni̱ xiꞌí si guxuman ruhua José niꞌyaj sij Yanꞌanj, ni̱ gataj snanꞌanj sij sisi̱ hua güi, ni̱ ga̱hui ni ngüi̱ israelita yoꞌój Egipto ga̱nꞌanj ni síꞌ. Ni̱ hué daj guiꞌyaj sij ngaa ruhua ga̱huiꞌ sij. Ni̱ gaꞌninꞌ sij sun da̱j gui̱ꞌyaj ni síꞌ nga̱ si-cúj sij.

²³Ni̱ xiꞌí si guxuman ruhua chrej Moisés nga̱ nni sij niꞌyaj nu̱ngüej nica̱ síꞌ Yanꞌanj, ni̱ garij hui̱ nu̱ngüej nica̱ síꞌ chra̱ hua̱ꞌnij yahui̱ sij ngaa gaꞌnga sij. Daj guiꞌyaj nu̱ngüej nica̱ síꞌ, si guiniꞌi nu̱ngüej nica̱ síꞌ sisi̱ nia̱ꞌ hua sij. Ni̱ nun gu̱xuꞌuiꞌ nu̱ngüej nica̱ síꞌ ngaa gaꞌninꞌ rey sun rian ni ngüi̱ sisi̱ ga̱huiꞌ daranꞌ ni daꞌni̱ snoꞌo ni sij.

²⁴Ni̱ xiꞌí si guxuman ruhua Moisés niꞌyaj sij Yanꞌanj ngaa gachij sij, ni̱ naꞌuej ruhua sij si ga̱taj ni ngüi̱ sisi̱ daꞌníj daꞌni̱ xa̱na rey nne Egipto huin sij mánj. ²⁵Sani̱ garanꞌ ruhua sij gui̱ranꞌ sij sayun nga̱ ni tsínj nicoꞌ Yanꞌanj. Daj si naꞌuej ruhua sij ga̱huin nia̱ꞌ ruhua sij do̱j yoꞌ nga̱ ni gaquinꞌ guiꞌyaj ni tsínj guimán Egipto. ²⁶Ni̱ gaꞌninꞌ ruhua sij sisi̱ ga̱ꞌmi quij ni ngüi̱ rian sij xiꞌí si nicaj dugüiꞌ sij nga̱ Cristo. Daj si gani ruhua sij sisi̱ sa̱ꞌ si-nu̱guanꞌ Cristo daj nga̱ daranꞌ rasu̱n sa̱ꞌ ma̱n yoꞌój Egipto. Ni̱ guiniꞌi sa̱ꞌ sij sisi̱ gui̱ꞌyaj sa̱ꞌ Yanꞌanj nga̱ sij. ²⁷Ni̱ xiꞌí si guxuman ruhua Moisés niꞌyaj sij Yanꞌanj, ni̱ gahui sij Egipto ganꞌanj sij. Ni̱ nun gu̱xuꞌuiꞌ sij si gaꞌman ruhua rey daj niꞌyaj síꞌ sij. Ni̱ nu̱nj si nun guiniꞌi rian sij manꞌan Yanꞌanj, sani̱ gahuin ni̱ca ruhua sij nga̱ si-chrej Yanꞌanj. Daj si guiniꞌi sa̱ꞌ niman sij sisi̱ niquinꞌ Yanꞌanj nga̱ sij. ²⁸Ni̱ xiꞌí si guxuman ruhua Moisés niꞌyaj sij Yanꞌanj, ni̱ guiꞌyaj sij guiꞌyanj Pascua. Ni̱ gaꞌninꞌ sij sun sisi̱ ga̱nꞌanj ga̱ri ni sij tun xachij rian ni hueꞌ. Ngaa ni̱ si̱ gahuiꞌ ni daꞌníj ni tsínj israelita, ni si xa̱huaꞌ, gui̱ꞌyaj ángel huin ángel ꞌyaj ahuiꞌ ni ngüi̱.

²⁹Hué dan ni̱ xiꞌí si guxuman ruhua ni tsínj israelita niꞌyaj ni sij Yanꞌanj, ni̱ gachin ni sij anéj chrej duꞌua nnee yanꞌanj gu̱ꞌnaj Nnee Yanꞌanj Mare. Ni̱ yoꞌój na̱co huin rian gachin ni sij da̱ni nnee yanꞌanj daj, guiꞌyaj Yanꞌanj. Sani̱ ngaa gahuin ruhua ni tsínj ma̱n Egipto ga̱chin ni sij rian gachin ni tsínj israelita, sani̱ gahuiꞌ ni sij chruhua nnee, guiꞌyaj nnee daj.

³⁰Ni̱ xiꞌí si guxuman ruhua ni tsínj israelita niꞌyaj ni sij Yanꞌanj, ni̱ gane̱ xingá yej xxi ganica̱j duꞌua xumanꞌ Jericó, guiꞌyaj Yanꞌanj. Ni̱ guisíj ichij güi gachéj ni tsínj israelita ngaa ganica̱j ni sij rucú xingá yej xxi daj.

³¹Ni̱ Rahab huin ꞌngo̱ yunꞌunj xa̱na achéj manꞌan. Ni̱ xiꞌí si guxuman ruhua unj niꞌyaj unj Yanꞌanj, ni̱ nun gahuiꞌ nu̱guanꞌan unj nga̱ ni ngüi̱ nun dagahuin rian Yanꞌanj daj. Daj si gaꞌníj unj ducuá unj ga̱tu hui̱j tsínj israelita huin nu̱ngüej síꞌ tsínj huin ruhua gui̱niꞌi da̱j hua xumanꞌ Jericó.

³²Ni̱ da̱j hua ango nuguanꞌ ga̱tā ruhua á re̱ꞌ únj. Nun riquij tiempo garūnj xiꞌí tsínj gu̱ꞌnaj Gedeón nej, Barac nej, Sansón nej, Jefté nej, David nej, Samuel nej nga̱ ni tsínj gaꞌmi si-nu̱guanꞌ Yanꞌanj asi̱j ná. ³³Ni̱ xiꞌí si guxuman ruhua ni sij niꞌyaj ni sij Yanꞌanj, ni̱ guiꞌyaj gana ni sij rian ni rey guimán asi̱j ná. Ni̱ sa̱ꞌ guiꞌyaj yya ni sij si-ga̱quinꞌ ni ngüi̱. Ni̱ guiriꞌ ni sij nuguanꞌ guiꞌyaj yya Yanꞌanj nga̱ ni sij. Ni̱ naránj ni sij duꞌua ni sigueꞌej xxi nej. ³⁴Ni̱ dinaꞌaj ni sij yanꞌa̱n huee nun gaca ni sij, guiꞌyaj yanꞌa̱n daj. Ni̱ ganani ni sij rian ni tsínj ata espada nanoꞌ da̱gahuiꞌ ni sij. Ni̱ ngaa ninaj ni sij, ni̱ nariꞌ fuerza ni sij, guiꞌyaj Yanꞌanj. Ni̱ gahuin nucuaj ni sij guiꞌyaj gana ni sij scanij ni sayun ngaa udaꞌ ni sij nga̱ ango xumanꞌ. Ni̱ gunucuaj ni sij guiꞌyaj gana ni sij rian ango xiꞌninꞌ xxi ni tsínj ununꞌ nga̱ ni sij. ³⁵Ni̱ hua dugüiꞌ ni ngüi̱ xa̱na ganáꞌnij scanij ni níman, guiꞌyaj Yanꞌanj.

Ni̱ guiranꞌ ango ni sij sayun, guiꞌyaj ni tsínj ga niqui hua. Ni̱ naꞌuej ruhua ni sij sisi̱ ga̱huin níꞌnij ni sij rian ni tsínj xi̱ꞌi daj. Daj si huin ruhua ni sij ga̱naꞌnij sa̱ꞌ ni sij scanij ni níman. ³⁶Ni̱ guiranꞌ ango ni sij sayun. Daj si gaꞌmi ducu ni ngüi̱ rian ni sij. Ni̱ duguayun ni síꞌ nneꞌ ni sij. Ni̱ numij ni síꞌ cadena ni sij. Ni̱ garij ni síꞌ ducuaga̱ꞌ ni sij. ³⁷Ni̱ gaꞌuiꞌ ni ngüi̱ yej daꞌaj ni sij. Ni̱ gaꞌninꞌ ni síꞌ cera aꞌninꞌ chrun daꞌaj ni sij. Ni̱ gahuiꞌ ango ni sij, guiꞌyaj espada. Ni̱ nu̱n ni sij nnij xachij nga̱ nnij stane̱ gachéj ni sij go̱ꞌngo yuꞌuj rian quij. Ni̱ yaco guiranꞌ ni sij. Ni̱ nico̱ꞌ huaj guiranꞌ ni sij sayun. Ni̱ chranꞌ yunꞌunj ni ngüi̱ ni sij nej. ³⁸Ni̱ xiꞌí si sa̱ꞌ niman ni sij, ni̱ nun níꞌyanj ni ngüi̱ ma̱n chruhua xungüi̱ nan sisi̱ ga̱ne ni síꞌ scanij ni sij. Ni̱ gachéj hui̱ ni sij riqui quij guiꞌyanj na̱co nga̱ riqui ango quij nej. Ni̱ guimán hui̱ ni sij chruhua huej nga̱ chruhua yuꞌuj ta̱j riqui yoꞌój nej.

³⁹Hué dan ni̱ nu̱nj si gaꞌmi sa̱ꞌ Yanꞌanj xiꞌí si guxuman sa̱ꞌ ruhua ni sij niꞌyaj ni sij Yanꞌanj, sani̱ nun nahuin raꞌa ni sij nuguanꞌ guiꞌyaj yya Yanꞌanj gaꞌna̱ꞌ rian ni sij. ⁴⁰Daj si hua gani sini ruhua Yanꞌanj da̱j gui̱ꞌyaj sa̱ꞌaj nga̱ néꞌ. Daj si huin ruhua Yanꞌanj sisi̱ gui̱nicaj dugüiꞌ néꞌ nga̱ ni sij ga̱huin ni̱ca niman daranꞌ néꞌ, gui̱ꞌyaj Yanꞌanj.

Puestos los ojos en Jesús

¹Hué dan ni̱ xiꞌí si ma̱n nico ni tsínj xuman ruhua niꞌyaj Yanꞌanj, ni̱ daꞌ ganica̱j ni sij xiꞌníj néꞌ niꞌyaj ni sij da̱j ꞌyaj néꞌ, ngaa ni̱ du̱na néꞌ ꞌngo̱ yuꞌuj daranꞌ ni rasu̱n chranꞌ yunꞌunj néꞌ. Ni̱ hué daj du̱na néꞌ daranꞌ ni gaquinꞌ yaꞌi̱ ata néꞌ. Ni̱ da̱j rúnꞌ ꞌyaj ni tsínj unánj ngaa huin ruhua ni sij gui̱ꞌyaj gana ni sij rian dugüiꞌ ni sij, ni̱ hué daj gui̱ꞌyaj fuerza néꞌ si-chrej Yanꞌanj. Sani̱ ga̱huin dinꞌinj néꞌ ga̱che néꞌ chrej daj. ²Ni̱ ga̱ꞌnij néꞌ rian néꞌ rian nne Jesús. Daj si hué sij guiꞌyaj si guxuman ruhua néꞌ niꞌyaj néꞌ Yanꞌanj. Ni̱ hué sij gui̱ꞌyaj sisi̱ gu̱xuman ni̱ganj ruhua néꞌ ni̱ꞌyaj néꞌ Yanꞌanj. Ni̱ guiranꞌ Jesús sayun ngaa guinicoꞌ sij rian rugutsi̱. Sani̱ nun nahuij ruhua sij gui̱riꞌ sij si-na̱ꞌaj, si hué daj ga̱huiꞌ sij rian rugutsi̱. Daj si hua niꞌi sij sisi̱ ngaa gui̱sij gui̱ranꞌ sij sayun daj, ni̱ ni̱nꞌ ruhua ga̱huin nia̱ꞌ ruhua sij. Ngaa ni̱ ga̱nꞌanj ga̱ne sij ne̱ꞌ chrej raꞌa sa̱ꞌ Yanꞌanj xataꞌ. ³Ngaa ni̱ ga̱ni ruhua á re̱ꞌ da̱j guiranꞌ Jesús. Daj si guiranꞌ sij nico sayun, guiꞌyaj ni tsínj xi̱ꞌi huin ni tsínj ꞌyaj gaquinꞌ. Xiꞌí daj ni̱ si̱ guinichre ni é re̱ꞌ si-chrej Yanꞌanj. Ni̱ si̱ guininaj niman án re̱ꞌ mánj.

⁴Ni̱ ununꞌ yya ni é re̱ꞌ nga̱ sichre xiꞌí si naꞌuej ruhua á re̱ꞌ gui̱ꞌyaj á re̱ꞌ gaquinꞌ. Sani̱ nun ga̱huin gayanj si-tun manꞌan án re̱ꞌ xiꞌí si-nu̱guanꞌ Yanꞌanj mánj. ⁵Ni̱ guiniꞌyun ruhua ni é re̱ꞌ nga̱ ducuánj digyán Yanꞌanj rian án re̱ꞌ rúnꞌ huaj. Aꞌmi Yanꞌanj rian néꞌ rúnꞌ huin daꞌníj Yanꞌanj huin néꞌ. Ni̱ gataj si-nu̱guanꞌ Yanꞌanj:

Daꞌnī huín re̱ꞌ.

Ni̱ si̱ gani ruhuá re̱ꞌ si nitaj si níꞌyanj castigo ꞌyaj Señor nga̱ re̱ꞌ.

Ni̱ si̱ guinichre ruhuá re̱ꞌ ngaa digyán Señor si-ga̱quinꞌ re̱ꞌ rián re̱ꞌ mánj.

⁶Daj si aꞌninꞌ Señor chrej rian ni tsínj ꞌi̱ ruhua sij.

Ni̱ daranꞌ ni tsínj nahuin raꞌa Yanꞌanj huin daꞌni, ni̱ huin ni sij castigo, ꞌyaj Señor.

Daj gataj si-nu̱guanꞌ Yanꞌanj.

⁷Ga̱ꞌninꞌ ruhua á re̱ꞌ nga̱ castigo ꞌyaj Yanꞌanj nga̱ ni é re̱ꞌ. Daj si ꞌyaj Yanꞌanj sisi̱ ni é re̱ꞌ huin daꞌni. Ni̱ daranꞌ ni tsinꞌ ni huin castigo, ꞌyaj ni chre. ⁸Ni̱ ꞌyaj Yanꞌanj castigo daranꞌ ni daꞌni. Ngaa ni̱ sisi̱ nitaj si huin ni é re̱ꞌ castigo, ꞌyaj Yanꞌanj, ngaa ni̱ sé si hua yya huin ni é re̱ꞌ daꞌníj Yanꞌanj mánj. Sani̱ huin ín re̱ꞌ ni tsínj nitaj chrej.

⁹Ni̱ ango nuguanꞌ huin sisi̱ ngaa ga lij néꞌ, ni̱ gahuin néꞌ castigo, guiꞌyaj chrej néꞌ. Xiꞌí si guiꞌyaj ni sij daj, ni̱ aꞌmi sa̱ꞌ néꞌ xiꞌí si guiꞌyaj ni sij. Ni̱ sisi̱ hué daj dagahuin néꞌ rian chrej néꞌ ma̱n chruhua xungüi̱ nan, ni̱ u̱n sin huin, ni̱ nun dagahuin sa̱ꞌ néꞌ doj rian chrej niman néꞌ nne xataꞌ únj. Daj si sisi̱ hué daj gui̱ꞌyaj néꞌ, ni̱ ga̱ne ni̱ganj néꞌ nga̱ Yanꞌanj anj. ¹⁰Doj gue̱ güi guiꞌyaj ni chrej néꞌ castigo néꞌ. Ni̱ guiꞌyaj ni sij nga̱ néꞌ da̱j rúnꞌ huin ruhua ni sij. Sani̱ ꞌyaj Yanꞌanj castigo néꞌ güenda si ga̱huin sa̱ꞌ niman néꞌ da̱j rúnꞌ hua sa̱ꞌ niman manꞌan Yanꞌanj. ¹¹Hué hora ngaa ranꞌ néꞌ castigo, ni̱ nitaj si hua nia̱ꞌ ruhua néꞌ. Maan si nani ruhua néꞌ ꞌyaj. Sani̱ da ru̱cu, ni̱ ga̱huin chru̱n néꞌ, ꞌyaj castigo daj. Ni̱ ga̱ꞌue ga̱che néꞌ ꞌngo̱ chrej ni̱ca. Ni̱ ga̱huin dinꞌinj ruhua néꞌ nej.

Los que rechacen la gracia de Dios

¹²Ngaa ni̱ gui̱ꞌyaj ni é re̱ꞌ sisi̱ na̱riꞌ ruhua ni é re̱ꞌ. Ni̱ gui̱ꞌyaj ni é re̱ꞌ sisi̱ gui̱siquiꞌ raꞌa ni é re̱ꞌ. Ni̱ na̱guiꞌyaj ran ni é re̱ꞌ dacój ni é re̱ꞌ sisi̱ ga̱che sa̱ꞌ ni é re̱ꞌ si-chrej Yanꞌanj anj. ¹³Ni̱ na̱guiꞌyaj sa̱ꞌ á re̱ꞌ chrej ni̱ca ga̱che ni é re̱ꞌ. Ngaa ni̱ si̱ guduna dacój tsínj yacuan daj ango chrej ga̱che sij mánj. Sani̱ na̱huin dacój sij gui̱ꞌyaj chrej ni̱ca daj, guiꞌyaj á re̱ꞌ.

¹⁴Du̱guꞌnunꞌ a ni é re̱ꞌ si ga̱ dinꞌinj ga̱ne a ni é re̱ꞌ nga̱ daranꞌ ni ngüi̱. Ni̱ du̱guꞌnunꞌ a ni é re̱ꞌ si ga̱huin sa̱ꞌ niman án re̱ꞌ rian Yanꞌanj. Daj si sisi̱ nitaj ga̱ sa̱ꞌ ruhua néꞌ, ni̱ si̱ guiniꞌi néꞌ Señor mánj. ¹⁵Ni̱ ga̱ cuidado ni é re̱ꞌ sisi̱ ni̱ a̱ ꞌngo̱ ni é re̱ꞌ si̱ duna sinduj guiꞌyaj Yanꞌanj xiꞌí néꞌ. Ni̱ ga̱ cuidado ni é re̱ꞌ sisi̱ si̱ guixiraꞌ ꞌngo̱ yaꞌa̱ yai̱ꞌ scanij a ni é re̱ꞌ. Ni̱ yaꞌa̱ yai̱ꞌ daj huin ꞌngo̱ tsínj nanꞌan ruhua niꞌyaj dugüiꞌ sij. Daj si tsínj daj ꞌyaj sisi̱ uyan ga̱ quij niman ni dugüiꞌ sij da̱j rúnꞌ hua manꞌan sij. ¹⁶Ni̱ a̱ ꞌngo̱ ni é re̱ꞌ si̱ gaꞌmi nga̱ squi̱raꞌ mánj. Ni̱ si̱ gani ruhua á re̱ꞌ sisi̱ sé si sa̱ꞌ si ꞌna̱ꞌ rian Yanꞌanj mánj. Daj si hué daj guiꞌyaj tsínj gu̱ꞌnaj Esaú huin sij si xa̱huaꞌ. Sani̱ guruꞌue sij si-sun sij rian jnánj sij Jacob sisi̱ na̱tu síꞌ rian sij ga̱huin síꞌ tsínj huin achij. Ni̱ urin nia̱ gaꞌuiꞌ Jacob xa jnánj sij Esaú. Xiꞌí daj ni̱ gaꞌuej ruhua Esaú sisi̱ ga̱huin Jacob tsínj huin achij. ¹⁷Ni̱ niꞌi a ni é re̱ꞌ da̱j gahuin nga̱ Esaú da ru̱cu. Ni̱ huin ruhua sij na̱huin raꞌa sij sinduj ga̱ꞌuiꞌ chrej sij rian sij. Ni̱ nu̱nj si gaco sij, sani̱ nun gaꞌuiꞌ chrej sij si achínj sij. Daj si nun riꞌ ruhua chrej sij si gui̱ꞌyaj síꞌ si hua guiꞌyaj chrej sij sinduj rian jnánj sij Jacob.

¹⁸Ni̱ sé si guiranꞌ án re̱ꞌ da̱j rúnꞌ guiranꞌ ni xi néꞌ. Daj si gahuin ni̱chrunꞌ ni sij ꞌngo̱ quij rian nagaꞌuiꞌ Yanꞌanj si-ley rian ni sij. Ni̱ quij ri̱an gahuin ni̱chrunꞌ ni sij, ni̱ anun yanꞌa̱n. Ni̱ hua ru̱miꞌ nej. Ni̱ garánj nga maru̱ chra̱ quij daj. Ni̱ gahui ꞌngo̱ nane̱ xxi. ¹⁹Ni̱ nucuaj gaꞌyanj ꞌngo̱ trompeta. Ni̱ gunun ni sij si gaꞌmi Yanꞌanj. Ni̱ gaꞌmi yaco ni tsínj gunun nuguanꞌ daj sisi̱ si̱ gaꞌmi Yanꞌanj nga̱ ni sij ga̱ mánj. ²⁰Daj si naꞌue gu̱nucuaj ni sij nuguanꞌ gaꞌninꞌ Yanꞌanj sun rian ni sij, ruhua ni sij. Daj si gataj Yanꞌanj gunun ni sij: “Sisi̱ ga̱tu da ꞌngo̱ xucu quij daj, ni̱ da̱gahuiꞌ ni é re̱ꞌ nga̱ yej, asi̱ nga̱ lanza.” Daj gataj Yanꞌanj gunun ni sij. ²¹Ni̱ ducu guxuꞌuiꞌ ni sij guiꞌyaj si guiniꞌi ni sij. Xiꞌí daj ni̱ gataj Moisés: “Nagunanj manꞌānj ꞌyaj si xuꞌuīj.” Daj gataj Moisés.

²²Ni̱ sé rian quij daj gahuin ni̱chrunꞌ ni é re̱ꞌ mánj. Sani̱ gahuin ni̱chrunꞌ a ni é re̱ꞌ rian quij gu̱ꞌnaj Sión. Ni̱ yuꞌuj daj huin xánj Yanꞌanj hua ni̱ꞌnaꞌ huin xumanꞌ Jerusalén na̱ca ngaj xataꞌ. Ni̱ ma̱n gaꞌi̱ mí ni ángel nahuin yuꞌ yuꞌuj daj. ²³Ni̱ nahuin yuꞌ a ni é re̱ꞌ nga̱ daranꞌ ni daꞌníj Yanꞌanj. Ni̱ da̱j rúnꞌ tsínj xa̱huaꞌ huin ni sij. Ni̱ ta̱j si-xugüi ni sij chruhua libro táj xataꞌ. Ni̱ gahuin ni̱chrunꞌ ni é re̱ꞌ rian Yanꞌanj. Ni̱ hué Yanꞌanj huin si gui̱ꞌyaj yya rian si-ga̱quinꞌ daranꞌ ni ngüi̱. Ni̱ yuꞌuj daj nne ni níman huin ni tsínj hua ni̱ca niman. Ni̱ Yanꞌanj guiꞌyaj sisi̱ gahuin sa̱ꞌ ni sij. ²⁴Ni̱ gahuin ni̱chrunꞌ néꞌ rian Jesús huin tsínj guiꞌyaj yya nuguanꞌ na̱ca nga̱ néꞌ. Ni̱ ganahuin sa̱ꞌ niman néꞌ, guiꞌyaj si-tun manꞌan sij. Ni̱ sa̱ꞌ guiꞌyaj si-tun Jesús daj nga̱ si guiꞌyaj si-tun tsínj gu̱ꞌnaj Abel.

²⁵Ngaa ni̱ ga̱ cuidado ni é re̱ꞌ sisi̱ si̱ danica̱j ni é re̱ꞌ nuguanꞌ gaꞌmi Yanꞌanj. Daj si sisi̱ nun ganani ni tsínj danica̱j nuguanꞌ gaꞌmi Yanꞌanj chruhua xungüi̱ asi̱j ná, ni̱ si̱ gaꞌue ga̱nani néꞌ yya̱j sisi̱ da̱nicaj néꞌ nuguanꞌ aꞌmi Yanꞌanj xataꞌ rian néꞌ. ²⁶Ni̱ ngaa gaꞌmi Yanꞌanj asi̱j ná, ni̱ nagunanj yoꞌój, guiꞌyaj. Sani̱ yya̱j ni̱ gataj yya Yanꞌanj gunun néꞌ: “Ango rin yu̱n na̱gunanj yoꞌój, gui̱ꞌyā. Ni̱ sé urin yoꞌój na̱gunanꞌ, sani̱ na̱gunanꞌ xataꞌ, gui̱ꞌyā nej.” Daj gataj Yanꞌanj. ²⁷Ni̱ ngaa gataj Yanꞌanj nuguanꞌ: “Ango rin yu̱n”, ni̱ huin ruhuaj gata sisi̱ ga̱ꞌne Yanꞌanj daranꞌ ni rasu̱n ga̱ꞌue gui̱siquiꞌ huin ni rasu̱n guiꞌyaj Yanꞌanj niꞌyaj néꞌ. Ngaa ni̱ gu̱na ni rasu̱n si̱ gaꞌue gui̱siquiꞌ huin ni rasu̱n nun rugüiꞌ niꞌyaj néꞌ. ²⁸Ni̱ si̱ gaꞌue gui̱siquiꞌ rian nicaj Yanꞌanj sun. Ni̱ riqui Yanꞌanj si ga̱ne néꞌ yuꞌuj daj. Xiꞌí daj ni̱ ga̱ꞌuiꞌ néꞌ si guruhua Yanꞌanj. Ni̱ gui̱ꞌyaj sun néꞌ rian Yanꞌanj. Ni̱ ga̱ꞌmi sa̱ꞌ néꞌ rian Yanꞌanj. Ni̱ gui̱nun yanꞌanj néꞌ rian Yanꞌanj. Ngaa ni̱ ga̱ranꞌ ruhua Yanꞌanj xiꞌí si ꞌyaj néꞌ. ²⁹Daj si da̱j rúnꞌ huin ꞌngo̱ yanꞌa̱n nico anun, hué daj huin Yanꞌanj nicoꞌ néꞌ. Ni̱ hué yanꞌa̱n daj gui̱ꞌyaj sisi̱ ga̱ca daranꞌ rasu̱n quij.

Deberes cristianos

¹Ngaa ni̱ ꞌngo̱ ga̱huin ꞌi̱ ruhua ni é re̱ꞌ gui̱niꞌi a ni é re̱ꞌ ni dugüiꞌ a ni é re̱ꞌ. ²Ni̱ si̱ guiniꞌyun ruhua ni é re̱ꞌ gui̱ꞌyaj sa̱ꞌ ni é re̱ꞌ nga̱ ni ngüi̱ ꞌna̱ꞌ anéj chrej. Daj si asi̱j hua ná, ni̱ ganꞌanj go̱ꞌngo ni tsínj ꞌna̱ꞌ chrej ducuá ni tsínj daj. Sani̱ nun gui̱niꞌi ni tsínj daj sisi̱ ángel huin si huaj. ³Ni̱ ga̱nanun ruhua á re̱ꞌ ni̱ꞌyaj á re̱ꞌ ni jnánj néꞌ nu̱n ducuaga̱ꞌ. Ni̱ ga̱ni ruhua á re̱ꞌ sisi̱ nu̱n nu̱guanꞌan án re̱ꞌ nga̱ ni sij. Ni̱ hué daj gui̱ꞌyaj á re̱ꞌ nga̱ ni tsínj chranꞌ sayun ꞌyaj ni ngüi̱. Ni̱ ga̱ni ruhua á re̱ꞌ sisi̱ hué daj ga̱ꞌue gui̱ranꞌ án re̱ꞌ, gui̱ꞌyaj ni ngüi̱ nej. ⁴Ni̱ ga̱ni ruhua daranꞌ néꞌ sisi̱ hua ꞌueé ngaa xa̱caj dugüiꞌ ꞌngo̱ tsínj nga̱ yunꞌunj xa̱na. Sé si na̱ꞌaj huin mánj. Ni̱ sé gaquinꞌ huin sisi̱ ga̱toj nu̱guanꞌan nu̱ngüej ni̱ca ꞌngo̱ tsínj daj. Sani̱ gui̱ꞌyaj Yanꞌanj castigo ni ngüi̱ aꞌmi nga̱ squi̱raꞌ. Ni̱ hué daj gui̱ꞌyaj Yanꞌanj castigo nga̱ ni ngüi̱ aꞌmi nga̱ nica̱ dugüiꞌ. ⁵Ni̱ si̱ gahuin ꞌi̱ ruhua á re̱ꞌ ni̱ꞌyaj á re̱ꞌ sanꞌanj mánj. Sani̱ ga̱huin nia̱ꞌ ruhua á re̱ꞌ nga̱ si nicaj á re̱ꞌ. Daj si hua gataj Yanꞌanj gunun néꞌ: “Nitaj a̱man du̱nā á re̱ꞌ. Ni̱ nitaj a̱man ga̱huin ni̱ni a ni é re̱ꞌ riānj mánj.” Daj gataj Yanꞌanj.

⁶Xiꞌí daj ni̱ ga̱ꞌue ga̱huin yya ruhua néꞌ ga̱taj néꞌ:

Señor huin si chracuij manꞌānj.

Ni̱ xiꞌí daj si̱ guxuꞌuīj si nitaj nu̱nj gui̱ꞌyaj ni sij manꞌānj.

Ga̱taj néꞌ.

⁷Ni̱ ga̱nunun ruhua á re̱ꞌ ni̱ꞌyaj á re̱ꞌ ni tsínj huin achij huin ni tsínj gaꞌmi si-nu̱guanꞌ Yanꞌanj scanij ni é re̱ꞌ. Ni̱ ga̱ni ruhua á re̱ꞌ da̱j gahuin sa̱ꞌ si-chrej ni sij. Ni̱ gui̱ꞌyaj á re̱ꞌ da̱j rúnꞌ guiꞌyaj ni sij guxuman ruhua ni sij niꞌyaj ni sij Yanꞌanj.

⁸Da̱j rúnꞌ gahuin Cristo asi̱j ná, ni̱ hué daj huin sij yya̱j. Ni̱ hué daj ga̱huin sij ni̱ganj ni̱nꞌ.

⁹Ni̱ si̱ duna á re̱ꞌ si gu̱xuman ruhua á re̱ꞌ ango rian nuguanꞌ di̱gyan ni sij rian án re̱ꞌ mánj. Daj si ni̱ni huin nuguanꞌ na̱ca aꞌmi ni sij. Duguꞌna̱j huin sisi̱ ga̱huin nucuaj niman néꞌ xiꞌí sinduj ꞌyaj Yanꞌanj rian néꞌ. Daj si digyán go̱ꞌngo ni sij sisi̱ ga̱huin nucuaj niman néꞌ xiꞌí ni rasu̱n xa néꞌ. Sani̱ sé si sa̱ꞌ si ataj ni sij mánj. Ni̱ nun gahuin sa̱ꞌ niman ni sij ꞌyaj nuguanꞌ da mánj. ¹⁰Ni̱ unánj guitsi ni chrej rian dagahuiꞌ ni sij xucu rian Yanꞌanj. Sani̱ gahuiꞌ Cristo xiꞌí néꞌ. Ni̱ nitaj si guinicaj dugüiꞌ ni chrej daj nga̱ Cristo da̱j rúnꞌ nicaj dugüiꞌ néꞌ nga̱ sij. ¹¹Ni̱ nicaj chrej aꞌninꞌ si-tun ni xucu daj huaj sij rian hua sa̱ꞌ ni̱nꞌ ruhua. Ni̱ rúnꞌ huin ofrenda huin sisi̱ ga̱ꞌne tun daj si-ga̱quinꞌ ni ngüi̱. Sani̱ nicaj ni sij xucu gahuiꞌ daj huaj ni sij ne̱ꞌ chrej xe̱ꞌ xumanꞌ daj gari yanꞌa̱n ni sij. ¹²Ni̱ hué gue̱ daj guiranꞌ Jesús sayun gahuiꞌ sij ne̱ꞌ chrej xe̱ꞌ duꞌua xumanꞌ Jerusalén. Ni̱ hué daj guiꞌyaj Jesús sisi̱ ga̱huin sa̱ꞌ niman ni ngüi̱ rian Yanꞌanj, gui̱ꞌyaj si-tun manꞌan sij.

¹³Ngaa ni̱ da̱j rúnꞌ guiranꞌ Jesús sayun ne̱ꞌ chrej xe̱ꞌ duꞌua xumanꞌ daj, ni̱ ga̱ꞌninꞌ ruhua néꞌ sisi̱ hué daj gui̱ranꞌ néꞌ nej. Ni̱ ga̱ꞌninꞌ ruhua néꞌ sisi̱ ga̱ꞌmi quij ni ngüi̱ xiꞌí néꞌ si hué daj gaꞌmi quij ni sij rian Jesús. ¹⁴Daj si si̱ gane ni̱ganj néꞌ xumanꞌ ma̱n néꞌ chruhua xungüi̱ nan mánj. Sani̱ na̱noꞌ néꞌ ango xumanꞌ rian ga̱ne ni̱ganj néꞌ. ¹⁵Hué dan ni̱ xiꞌí si guiꞌyaj Jesús, ni̱ ꞌngo̱ ga̱ꞌmi sa̱ꞌ néꞌ rian Yanꞌanj xiꞌí si guiꞌyaj ꞌueé Yanꞌanj nga̱ néꞌ. Ni̱ da̱j rúnꞌ nagaꞌuiꞌ ni sij xucu rian Yanꞌanj, ni̱ hué daj gui̱ꞌyaj néꞌ nga̱ nuguanꞌ sa̱ꞌ ga̱ꞌmi duꞌua néꞌ rian Yanꞌanj. ¹⁶Si̱ guiniꞌyun ruhua á re̱ꞌ gui̱ꞌyaj sa̱ꞌ á re̱ꞌ nga̱ ni dugüiꞌ ni é re̱ꞌ. Ni̱ chra̱cuij a ni é re̱ꞌ ni dugüiꞌ a ni é re̱ꞌ. Ni̱ aranꞌ ruhua Yanꞌanj sisi̱ hué daj gui̱ꞌyaj néꞌ. Ni̱ rúnꞌ huin sisi̱ aꞌuiꞌ néꞌ rasu̱n rian manꞌan Yanꞌanj ngaa chracuij néꞌ ni dugüiꞌ néꞌ.

¹⁷Da̱gahuin sa̱ꞌ á re̱ꞌ rian ni tsínj huin achij rian án re̱ꞌ. Ni̱ ga̱ra xina ni é re̱ꞌ si aꞌmi ni sij. Daj si hué ni sij dugumi niman ni é re̱ꞌ. Ni̱ hua nia̱n si na̱gaꞌuiꞌ ni sij cuenta da̱j guiꞌyaj go̱ꞌngo a ni é re̱ꞌ rian Yanꞌanj. Ngaa ni̱ da̱gahuin sa̱ꞌ á re̱ꞌ sisi̱ ga̱huin nia̱ꞌ ruhua ni sij nga̱ si-sun ni sij. Ni̱ si̱ guiꞌyaj á re̱ꞌ sisi̱ na̱ni ruhua ni sij. Daj si sisi̱ naꞌue da̱gahuin sa̱ꞌ á re̱ꞌ rian ni sij, ni̱ si̱ gaꞌue gui̱man sa̱ꞌ á re̱ꞌ mánj.

¹⁸Ga̱chinj jniꞌyaj á ni é re̱ꞌ rian Yanꞌanj xiꞌí únj. Gahuin yya ruhua únj sisi̱ nitaj daꞌui únj gaquinꞌ. Ni̱ huin ruhua únj gui̱ꞌyaj sa̱ꞌ únj nga̱ daranꞌanj. ¹⁹Ni̱ huin ruhuāj sisi̱ ga̱chinj jniꞌyaj á re̱ꞌ rian Yanꞌanj sisi̱ ruhua Yanꞌanj, ni̱ gu̱chiꞌ ráꞌyān rian ma̱n ni é re̱ꞌ aj.

Bendición y salutaciones finales

²⁰Yanꞌanj ꞌyaj sisi̱ hua dinꞌinj ruhua néꞌ. Ni̱ Yanꞌanj guiꞌyaj sisi̱ ganáꞌnij Señor Jesucristo scanij ni níman. Ni̱ Jesucristo huin ꞌngo̱ tsínj huin rian ni̱nꞌ dugumi néꞌ. Ni̱ da̱j rúnꞌ dugumi ꞌngo̱ yucuaj dánj sij xachij, ni̱ hué daj dugumi Jesucristo néꞌ. Ni̱ gayanj si-tun manꞌan Jesucristo xiꞌí nuguanꞌ guiꞌyaj yya Yanꞌanj ni̱ganj ni̱nꞌ nga̱ néꞌ. ²¹Ni̱ huin ruhuāj sisi̱ gui̱ꞌyaj Yanꞌanj sinduj rian án re̱ꞌ. Ngaa ni̱ ga̱ꞌue gui̱ꞌyaj á re̱ꞌ daranꞌ sun sa̱ꞌ. Ni̱ ga̱ꞌue gui̱ꞌyaj á re̱ꞌ si huin ruhua Yanꞌanj gui̱ꞌyaj á re̱ꞌ nej. Ni̱ huin ruhuāj sisi̱ xiꞌí Cristo, ni̱ gui̱ꞌyaj Yanꞌanj nga̱ néꞌ da̱j rúnꞌ aranꞌ ruhua manꞌan Yanꞌanj. Ni̱ ga̱ꞌmi sa̱ꞌ néꞌ ni̱ganj ni̱nꞌ xiꞌí Cristo. Amén.

²²Achínj jniꞌyā rian án re̱ꞌ sisi̱ si̱ gaꞌman ruhua á re̱ꞌ nga̱ chrej digyānj rian án re̱ꞌ huin ín re̱ꞌ jnān nga̱ xicaꞌuī. Daj si sé si nico nuguanꞌ arūnj rian yanj gaya a ni é re̱ꞌ mánj.

²³Xa̱caj á re̱ꞌ cuenta sisi̱ hua gahui jnánj néꞌ Timoteo ducuaga̱ꞌ. Ngaa ni̱ sisi̱ gui̱sij yoo̱ sij riānj, ni̱ nicā sij huā, ni̱ gu̱chiꞌ ni̱ꞌyaj nu̱ngüej únj rian ma̱n án re̱ꞌ.

²⁴Aꞌnī ꞌngo̱ nuguanꞌ huaj rian daranꞌ ni tsínj huin achij scanij a ni é re̱ꞌ nga̱ rian daranꞌ ni ngüi̱ hua sa̱ꞌ rian Yanꞌanj huin ni ngüi̱ nicoꞌ Yanꞌanj. Ni̱ aꞌníj ni tsínj ꞌna̱ꞌ estado Italia ꞌngo̱ nuguanꞌ rian án re̱ꞌ nej.

²⁵Ni̱ huin ruhuāj sisi̱ gui̱ꞌyaj Yanꞌanj sinduj rian daranꞌ ni é re̱ꞌ. Amén.