Gálatas

LA EPÍSTOLA DEL APÓSTOL SAN PABLO A LOS GÁLATAS

Salutación

¹Huēj huin Pablo. Ni̱ huīnj ꞌngo̱ apóstol tsínj aꞌmi si-nu̱guanꞌ Jesucristo rian ni ngüi̱. (Ni̱ sé si gaꞌníj ni tsínj ga̱nꞌanj ga̱ꞌmī nuguanꞌ daj rian ni ngüi̱ mánj. Ni̱ sé si garij sun ni sij manꞌānj mánj. Sani̱ manꞌan Jesucristo nga̱ Yanꞌanj garij sun manꞌānj sisi̱ ga̱nꞌanj ga̱ꞌmī nuguanꞌ daj rian ni ngüi̱. Ni̱ ganáꞌnij Jesucristo scanij ni níman, guiꞌyaj Yanꞌanj huin chrej néꞌ.) ²Hué dan ni̱ aꞌníj nu̱guanꞌan ni jna̱nj únj yanj carta nan rian án re̱ꞌ huin ín re̱ꞌ ni tsínj nicoꞌ Yanꞌanj mán estado Galacia. ³Ni̱ huin ruhua únj sisi̱ gui̱ꞌyaj Yanꞌanj huin chrej néꞌ nga̱ Señor Jesucristo sinduj rian án re̱ꞌ. Ni̱ ga̱ dinꞌinj ruhua únj nej. ⁴Ni̱ nagaꞌuiꞌ Jesucristo manꞌan sij gahuiꞌ sij xiꞌí si-ga̱quinꞌ néꞌ sisi̱ ga̱huin ni̱ni néꞌ rian ni gaquinꞌ quij ma̱n chruhua xungüi̱ gaquinꞌ nan. Daj si hué daj huin ruhua Yanꞌanj huin chrej néꞌ sisi̱ ga̱huin ni̱ni néꞌ. ⁵Ni̱ganj ga̱ꞌmi sa̱ꞌ néꞌ rian Yanꞌanj. Amén.

No hay otro evangelio

⁶Garáj yanꞌanj ruhuāj sisi̱ gahuin yoo̱ ni é re̱ꞌ nga̱ ango nuguanꞌ, sisi̱ sé huin nuguanꞌ xa̱ngaꞌ. Niꞌi ni é re̱ꞌ sisi̱ guiꞌyaj Cristo sinduj xiꞌí ni é re̱ꞌ. Ni̱ gaquínj Yanꞌanj sisi̱ gui̱nicoꞌ ni é re̱ꞌ manꞌan Yanꞌanj. ⁷Sani̱ xa̱ngaꞌ ni̱ nitaj ango nuguanꞌ gui̱ꞌyaj sisi̱ ga̱nini ni ngüi̱ mánj. Maan si huin ruhua go̱ꞌngo ni tsínj sisi̱ na̱duna ni é re̱ꞌ xiꞌí si-nu̱guanꞌ Cristo. Ni̱ chranꞌ yunꞌunj ni sij ni é re̱ꞌ. ⁸Ni̱ sisi̱ ga̱ꞌmi ꞌngo̱ tsínj ango nuguanꞌ huin ni̱ni nga̱ nuguanꞌ sa̱ꞌ gaꞌmi sinīj rian ni é re̱ꞌ, ni̱ ga̱ niꞌya sij, gui̱ꞌyaj Yanꞌanj. Nitaj si ga̱huin sisi̱ huēj ga̱ꞌmi ango nuguanꞌ daj, asi̱ ꞌngo̱ ángel ꞌna̱ꞌ xataꞌ. Ni̱ u̱n tsínj na̱duna si-nu̱guanꞌ Yanꞌanj, ni̱ ga̱ niꞌya síꞌ. ⁹Ni̱ hua gatā, ni̱ hué daj ga̱taj ru̱huaꞌ yūnj rian án re̱ꞌ, sisi̱ ga̱ꞌmi ꞌngo̱ tsínj ango nuguanꞌ huin ni̱ni nga̱ nuguanꞌ sa̱ꞌ nahuin raꞌa ni é re̱ꞌ, ni̱ ga̱nꞌanj sij rian yanꞌa̱n gu̱nun sij.

¹⁰Huin ruhuāj sisi̱ ga̱ꞌmi sa̱ꞌ ni ngüi̱ xiꞌīj, ruhua á re̱ꞌ níꞌ. Sé daj huin mánj. Maan si huin ruhuāj sisi̱ ga̱ꞌmi sa̱ꞌ Yanꞌanj xiꞌīj. Ni̱ sisi̱ huin ruhuāj sisi̱ ga̱ꞌmi sa̱ꞌ ni ngüi̱ xiꞌīj, ni̱ huin ruhuaj gata sisi̱ nitaj si ꞌyaj sūnj rian Cristo mánj.

El ministerio de Pablo

¹¹Ni̱ huin ruhuāj sisi̱ xa̱caj á re̱ꞌ cuenta sisi̱ si-nu̱guanꞌ Yanꞌanj gaꞌmī rian ni ngüi̱, ni̱ sé ꞌngo̱ si-nu̱guanꞌ ꞌngo̱ ni tsínj huin, huin ni é re̱ꞌ jnān nga̱ xicaꞌuī. ¹²Nun di̱gyán ni ngüi̱ nuguanꞌ daj riānj mánj. Ni̱ nun gahuin chrūnj rian ni̱ a̱ ꞌngo̱ ni ngüi̱ mánj. Sani̱ urin Jesucristo guiꞌyaj sisi̱ gui̱niꞌīnj si-nu̱guanꞌ sij.

¹³Ni̱ hua gunun ni é re̱ꞌ da̱j guiꞌyā asi̱j sini ngaa guinicōj si-nu̱guanꞌ ni tsínj israelita. Ni̱ ni̱nꞌ ruhua chranꞌ yunꞌūn ni tsínj nicoꞌ Jesús. Ni̱ gahuin ruhuāj sisi̱ gue̱reꞌ daranꞌ ni sij. ¹⁴Ni̱ guiꞌyaj fuerzāj nga̱ si-du̱cuanj ni tsínj israelita daj nga̱ ango ni tsínj israelita uyan hua sij ngāj. Ni̱ ducu dagahuīnj si-nu̱guanꞌ ni xi únj.

¹⁵Sani̱ hua nacui Yanꞌanj manꞌānj ngaa achin ga̱ꞌngā. Ni̱ guiꞌyaj Yanꞌanj sinduj riānj xiꞌí si gaquínj Yanꞌanj manꞌānj gui̱ꞌyaj sūnj si-sun Yanꞌanj. ¹⁶Ni̱ garanꞌ ruhua Yanꞌanj sisi̱ gui̱niꞌīnj daꞌni, ni̱ ga̱nꞌanj ga̱ꞌmī si-nu̱guanꞌ Yanꞌanj scanij ni ngüi̱ ꞌna̱ꞌ anéj chrej. Sani̱ nun ganꞌanj gaꞌmī nga̱ a̱ ꞌngo̱ ni tsínj mánj. ¹⁷Ni̱ nun ganꞌān xumanꞌ Jerusalén rian ma̱n ni apóstol ni tsínj ganꞌanj ga̱ꞌmi sini si-nu̱guanꞌ Yanꞌanj daj nga̱ nuguanꞌ gaꞌmi manꞌānj. Sani̱ ꞌngo̱ yu̱n ganꞌān estado Arabia. Ngaa ni̱ nanica̱j ru̱huaꞌ yūnj xumanꞌ Damasco.

¹⁸Ni̱ ngaa gachin hua̱ꞌnij yoꞌ, ni̱ ganꞌān xumanꞌ Jerusalén sisi̱ gui̱niꞌīnj Pedro. Ni̱ ganēj xinunꞌ güi nga̱ sij. ¹⁹Sani̱ nun gui̱niꞌīnj ni̱ a̱ ꞌngo̱ ni tsínj aꞌmi si-nu̱guanꞌ Jesús. Urin Jacobo guiniꞌīnj huin síꞌ jnánj manꞌan Señor. ²⁰Ni̱ niꞌi Yanꞌanj sisi̱ nuguanꞌ arūnj huaj rian ni é re̱ꞌ huin nuguanꞌ xa̱ngaꞌ. Sé nuguanꞌ nne̱ huin mánj.

²¹Hué dan ni̱ ganꞌān ni xumanꞌ ngaj estado Siria nga̱ estado Cilicia nej. ²²Sani̱ nun gui̱niꞌi ni tsínj nicoꞌ Cristo mán estado Judea manꞌānj mánj. ²³Maan si gunun ni sij cuento rian xiꞌīj. Ni̱ gataj cuento daj: “Tsínj chranꞌ yunꞌunj asi̱j sini néꞌ, yya̱j ni chéj sij aꞌmi sij si-nu̱guanꞌ Yanꞌanj sisi̱ gu̱xuman ruhua néꞌ gui̱niꞌyaj néꞌ Yanꞌanj. Ni̱ asi̱j sini ni̱ huin ruhua sij sisi̱ gue̱reꞌ nuguanꞌ daj.” Daj gataj ni ngüi̱ daj. ²⁴Ni̱ gaꞌmi sa̱ꞌ ni sij rian Yanꞌanj xiꞌīj.

¹Ni̱ ngaa gachin xiga̱nꞌanj yoꞌ, ni̱ ganꞌanj ru̱huaꞌ yūnj xumanꞌ Jerusalén nga̱ tsínj gu̱ꞌnaj Bernabé. Ni̱ ganꞌanj tsínj gu̱ꞌnaj Tito nga̱ únj nej. ²Ni̱ ganꞌān si hué daj digyán Yanꞌanj sisi̱ ga̱nꞌān xumanꞌ Jerusalén. Ni̱ nahuin yuꞌ ni tsínj huin rian ngāj. Ni̱ natāj rian ni sij da̱j hua si-nu̱guanꞌ Yanꞌanj huin nuguanꞌ aꞌmī rian án re̱ꞌ huin ni é re̱ꞌ ni ngüi̱ ꞌna̱ꞌ anéj chrej. Ni̱ hué daj guiꞌyā si naꞌuej ruhuāj si gue̱reꞌ nuguanꞌ gaꞌmī rian ni ngüi̱ nga̱ nuguanꞌ aꞌmī acuanꞌ nej.

³Ni̱ guinicaj dugüiꞌ Tito ngāj huin sij tsínj griego. Sani̱ nun gui̱ꞌyaj fuerza ni sij sisi̱ gu̱taꞌ daꞌngaꞌ nnee̱ cúj Tito. ⁴Ni̱ hua go̱ꞌngo ni tsínj digyaꞌ yunꞌunj, nitaj si huin xa̱ngaꞌ ni sij jnánj néꞌ. Ni̱ guixiꞌij hui̱ ni sij scanij néꞌ sisi̱ gui̱niꞌi ni sij da̱j gahuin níꞌnij néꞌ rian si-du̱cuanj ni sij, guiꞌyaj Cristo. Daj si huin ruhua ni sij sisi̱ da̱gahuin ru̱huaꞌ yún néꞌ si-du̱cuanj Moisés. ⁵Sani̱ ni̱ a̱ ꞌngo̱ xicoꞌ nun du̱na únj si dagahuin únj si-nu̱guanꞌ ni sij. Daj si huin ruhua únj sisi̱ ꞌueé gu̱naj ni̱nꞌ si-nu̱guanꞌ Yanꞌanj nuguanꞌ xa̱ngaꞌ rian án re̱ꞌ. ⁶Ni̱ ma̱n go̱ꞌngo ni tsínj huin achij, ataj ni ngüi̱. (Sani̱ güendāj ni̱ nitaj si níꞌyanj un tsínj gahuin ni sij ni güi gachin. Daj si uyan hua daranꞌ ni ngüi̱ rian Yanꞌanj.) Ni̱ güendāj ni̱ nun gaꞌmi ni tsínj huin achij daj ni̱ a̱ ꞌngo̱ nuguanꞌ na̱ca riānj mánj.

⁷Sani̱ naniꞌi ni tsínj huin achij daj sisi̱ garun sun Yanꞌanj ga̱nꞌanj ga̱ꞌmī si-nu̱guanꞌ Yanꞌanj rian ni ngüi̱ ꞌna̱ꞌ anéj chrej. Ni̱ hué daj garij sun Yanꞌanj Pedro ga̱nꞌanj sij ga̱ꞌmi sij nuguanꞌ sa̱ꞌ rian ni ngüi̱ israelita. ⁸(Ni̱ hué Yanꞌanj gaꞌníj Pedro ga̱nꞌanj sij ga̱ꞌmi sij nuguanꞌ sa̱ꞌ scanij ni ngüi̱ israelita. Ni̱ da̱j rúnꞌ gaꞌníj Yanꞌanj Pedro rian ni tsínj daj, ni̱ daꞌngaꞌ daj gaꞌníj Yanꞌanj ga̱nꞌanj ga̱ꞌmī nuguanꞌ sa̱ꞌ rian ni ngüi̱ ꞌna̱ꞌ anéj chrej.) ⁹Ngaa ni̱ naniꞌi tsínj gu̱ꞌnaj Jacobo nga̱ Pedro nej, Juan nej, sisi̱ guiꞌyaj Yanꞌanj sinduj riānj nga̱ sun nan. Ni̱ hua̱ꞌnij tsínj daj huin achij scanij ni tsínj nicoꞌ Yanꞌanj xumanꞌ Jerusalén. Sani̱ gahuin yya ruhua ni sij sisi̱ huin nu̱ngüej únj Bernabé dugüiꞌ ni sij. Ni̱ gaꞌuej ruhua ni sij sisi̱ ga̱nꞌanj ga̱ꞌmi nu̱ngüej únj nuguanꞌ sa̱ꞌ rian ni ngüi̱ ꞌna̱ꞌ anéj chrej. Ni̱ hué daj ga̱nꞌanj ga̱ꞌmi ni sij nuguanꞌ sa̱ꞌ rian ni ngüi̱ israelita. ¹⁰Maan si gachínj ni sij sisi̱ ga̱nanun ruhua nu̱ngüej únj gui̱niꞌyaj únj ni ngüi̱ niqui. Sani̱ hua cuidado únj güenda chracuij únj ni ngüi̱ daj.

Pablo reprende a Pedro en Antioquía

¹¹Sani̱ ngaa guisíj Pedro xumanꞌ Antioquía, ni̱ gaꞌmi huēj rian sij. Daj si nun hua sa̱ꞌ si guiꞌyaj sij. ¹²Daj si hua sini xa sij nga̱ ni tsínj ꞌna̱ꞌ anéj chrej. Sani̱ ngaa guisíj go̱ꞌngo ni tsínj ꞌna̱ꞌ rian Jacobo, ni̱ guxun anéj sij manꞌan sij. Ni̱ dunáj sij si xa sij nga̱ ni tsínj daj. Daj si guxuꞌuiꞌ sij niꞌyaj sij ni tsínj ꞌyaj fuerza si gu̱taꞌ ni síꞌ daꞌngaꞌ nnee̱ cúꞌ. ¹³Ni̱ hué daj guxun anéj ango ni tsínj israelita nej. Ni̱ uyan guiꞌyaj Bernabé, si naꞌuej ruhua síꞌ gui̱nicaj dugüiꞌ síꞌ nga̱ ni tsínj ꞌna̱ꞌ anéj chrej daj.

¹⁴Ni̱ ngaa xacaj cuentāj sisi̱ nitaj si ꞌyaj sa̱ꞌ ni sij da̱j rúnꞌ digyán si-nu̱guanꞌ Yanꞌanj rian néꞌ, ni̱ gatā gunun Pedro rian daranꞌ ni tsínj ma̱n nahuin yuꞌ yuꞌuj daj: “Hué re̱ꞌ huin tsínj israelita. Sani̱ acáj re̱ꞌ si-du̱cuanj ni tsínj ꞌna̱ꞌ anéj chrej. Ni̱ nitaj si ꞌyáj re̱ꞌ da̱j rúnꞌ ꞌyaj ni tsínj israelita ga̱ mánj. Hué dan ni̱ u̱n sin ni̱ ꞌyáj re̱ꞌ fuerza sisi̱ xa̱caj ni tsínj ꞌna̱ꞌ anéj chrej si-du̱cuanj ni tsínj israelita únj.” Daj gatā gunun Pedro. ¹⁵Ni̱ asi̱j gaꞌnga néꞌ, ni̱ huin néꞌ tsínj israelita. Ni̱ sé tsínj ꞌyaj gaquinꞌ ꞌna̱ꞌ anéj chrej huin néꞌ mánj. ¹⁶Ni̱ niꞌi néꞌ sisi̱ nitaj si ga̱huin sa̱ꞌ néꞌ rian Yanꞌanj xiꞌí si dagahuin néꞌ si aꞌninꞌ si-ley Moisés sun rian néꞌ. Sani̱ ga̱huin sa̱ꞌ néꞌ rian Yanꞌanj urin si xuman ruhua néꞌ niꞌyaj néꞌ Jesucristo. Ni̱ hué daj guxuman ruhua néꞌ niꞌyaj néꞌ Jesucristo sisi̱ ga̱huin sa̱ꞌ néꞌ rian Yanꞌanj. Ni̱ gahuin sa̱ꞌ néꞌ xiꞌí si xuman ruhua néꞌ. Sani̱ si̱ gahuin sa̱ꞌ néꞌ xiꞌí si dagahuin néꞌ si aꞌninꞌ si-ley Moisés sun rian néꞌ mánj. Daj si a̱ ꞌngo̱ néꞌ si̱ gahuin sa̱ꞌ néꞌ rian Yanꞌanj, gui̱ꞌyaj si-ley Moisés mánj. ¹⁷Ngaa ni̱ sisi̱ huin ruhua néꞌ ga̱huin sa̱ꞌ néꞌ rian Yanꞌanj, gui̱ꞌyaj Cristo, ni̱ xa̱caj néꞌ cuenta sisi̱ daꞌui néꞌ gaquinꞌ, ngaa ni̱ huin ruhuaj gata sisi̱ Cristo guiꞌyaj sisi̱ daꞌui néꞌ gaquinꞌ níꞌ. Sé daj huin mánj.

¹⁸Ni̱ sisi̱ guereꞌ ꞌngo̱ nuguanꞌ guiꞌyā, ni̱ na̱nicaj ru̱huaꞌ yún na̱guiꞌyā, ni̱ huin ruhuaj gata sisi̱ manꞌānj nicaj gaquinꞌ xiꞌí nuguanꞌ daj. ¹⁹Asi̱j ná ni̱ guinicōj si-ley Moisés. Sani̱ guereꞌ ruhuāj, guiꞌyaj ley daj. Ni̱ yya̱j ni̱ ga̱ꞌue gui̱nicaj dugüiꞌīj nga̱ Yanꞌanj. ²⁰Ni̱ guinicoꞌ nu̱guanꞌānj nga̱ Cristo rian rugutsi̱. Xiꞌí daj ni̱ sēj huin tsínj nne acuanꞌ. Sani̱ Cristo huin si nne nimānj. Ni̱ chrej achē acuanꞌ, ni̱ hué daj ꞌyā xiꞌí si xuman ruhuāj niꞌyā Jesucristo. Ni̱ xiꞌí si ga ꞌi̱ ruhua Cristo niꞌyaj sij manꞌānj, ni̱ gahuiꞌ sij rian rugutsi̱ xiꞌīj. ²¹Naꞌuej ruhuāj danicā sinduj guiꞌyaj Yanꞌanj riānj mánj. Daj si sisi̱ ga̱ꞌue ga̱huin sa̱ꞌ néꞌ rian Yanꞌanj, gui̱ꞌyaj si-ley Moisés, ni̱ huin ruhuaj gata sisi̱ gahuiꞌ yu̱n Cristo rian xiꞌí néꞌ.

El Espíritu se recibe por la fe

¹Tsínj ni̱ꞌyun huin ni é re̱ꞌ tsínj ma̱n estado Galacia. Ni̱ u̱n tsínj digyaꞌ yunꞌunj, ni̱ naꞌue da̱gahuin ni é re̱ꞌ nuguanꞌ xa̱ngaꞌ únj. Ngaa gaꞌmi únj si-nu̱guanꞌ Yanꞌanj, ni̱ digyán yya únj rian ni é re̱ꞌ da̱j guinicoꞌ Jesucristo rian rugutsi̱ gahuiꞌ sij xiꞌí ni é re̱ꞌ. ²Huin ruhuāj sisi̱ da̱nicaj ni é re̱ꞌ nuguanꞌ nachínj snanꞌān. Gaꞌna̱ꞌ Espíritu Santo rian án re̱ꞌ guiꞌyaj sisi̱ dagahuin ni é re̱ꞌ si-ley Moisés níꞌ. Asi̱ gaꞌna̱ꞌ Espíritu Santo rian án re̱ꞌ xiꞌí si guxuman ruhua ni é re̱ꞌ niꞌyaj á re̱ꞌ nuguanꞌ gunun ni é re̱ꞌ sa̱ꞌ. ³Gaxi̱ꞌi ni é re̱ꞌ gachéj ni é re̱ꞌ si-chej Yanꞌanj, guiꞌyaj Espíritu Santo. Sani̱ yya̱j ni̱ ani ruhua ni é re̱ꞌ sisi̱ ga̱che ni é re̱ꞌ nga̱ si-fuerza manꞌan ni é re̱ꞌ. ⁴Guiranꞌ yu̱n ni é re̱ꞌ ni sayun da níꞌ. Sé si guiranꞌ yu̱n a ni é re̱ꞌ mánj. ⁵Ni̱ riqui Yanꞌanj Espíritu Santo ga̱ne nga̱ ni é re̱ꞌ. Ni̱ guiꞌyaj Yanꞌanj si sa̱ꞌ scanij ni é re̱ꞌ nej. Sani̱ sé daj guiꞌyaj Yanꞌanj xiꞌí si dagahuin ni é re̱ꞌ rian si-ley Moisés mánj. Maan si hué daj guiꞌyaj Yanꞌanj xiꞌí si xuman ruhua ni é re̱ꞌ nga̱ nuguanꞌ sa̱ꞌ gunun ni é re̱ꞌ.

El pacto de Dios con Abraham

⁶Ni̱ asi̱j ná guxuman ruhua tsínj gu̱ꞌnaj Abraham niꞌyaj sij Yanꞌanj. Xiꞌí daj gataj Yanꞌanj sisi̱ gahuin sa̱ꞌ sij rian Yanꞌanj. ⁷Xiꞌí daj ni̱ gui̱niꞌi ni é re̱ꞌ sisi̱ daranꞌ ni ngüi̱ xuman ruhua niꞌyaj Yanꞌanj, ni̱ huin ni sij daꞌni̱ siꞌni̱ Abraham.

⁸Ni̱ asi̱j ná ni̱ gataj si-nu̱guanꞌ Yanꞌanj sisi̱ ga̱huin sa̱ꞌ ni ngüi̱ ꞌna̱ꞌ anéj chrej rian Yanꞌanj xiꞌí si gu̱xuman ruhua ni sij gui̱niꞌyaj ni sij Yanꞌanj. Ni̱ xiꞌí daj gataj Yanꞌanj ꞌngo̱ nuguanꞌ sa̱ꞌ gunun Abraham: “Xiꞌí manꞌán re̱ꞌ, ni̱ gui̱ꞌyā sinduj rian daranꞌ ni ngüi̱ ma̱n chruhua xungüi̱.” Daj gataj Yanꞌanj gunun Abraham.

⁹Hué dan ni̱ ni ngüi̱ xuman ruhua niꞌyaj Yanꞌanj, ni̱ gui̱ꞌyaj nu̱guanꞌan Yanꞌanj sinduj rian ni sij nga̱ Abraham, si hué daj guxuman ruhua Abraham niꞌyaj sij Yanꞌanj nej.

¹⁰Ni̱ daranꞌ ni tsínj ani ruhua sisi̱ tsínj sa̱ꞌ huin ni sij xiꞌí si dagahuin ni sij si-ley Moisés, ni̱ ga̱ niꞌya ni sij. Daj si gataj si-nu̱guanꞌ Yanꞌanj: “Ga̱ niꞌya daranꞌ ni tsínj nun dagahuin sa̱ꞌ daranꞌ si hua ni̱ca rian libro huin si-ley Yanꞌanj.” Daj gataj si-nu̱guanꞌ Yanꞌanj. ¹¹Hué dan ni̱ hua ni̱ca yya sisi̱ ni̱ a̱ ꞌngo̱ néꞌ si̱ gahuin sa̱ꞌ néꞌ rian Yanꞌanj xiꞌí si da̱gahuin néꞌ si ataj ley daj mánj. Daj si gataj si-nu̱guanꞌ Yanꞌanj: “Tsínj gahuin sa̱ꞌ rian Yanꞌanj, ni̱ ga̱ne ni̱ganj sij xiꞌí si xuman ruhua sij niꞌyaj sij Yanꞌanj.” Daj gataj Yanꞌanj. ¹²Sé si-ley Moisés ꞌyaj sisi̱ gu̱xuman ruhua néꞌ ni̱ꞌyaj néꞌ Yanꞌanj mánj. Maan si gataj ley daj: “Tsínj da̱gahuin ley daj, ni̱ ga̱ne ni̱ganj sij.” Daj gataj ley daj.

¹³Rúnꞌ huaj sisi̱ ga̱ niꞌya néꞌ xiꞌí si naꞌue da̱gahuin sa̱ꞌ néꞌ si ataj ley daj. Sani̱ naruꞌue Cristo rian si-ga̱quinꞌ néꞌ. Ni̱ rúnꞌ huaj sisi̱ hué Cristo ga niꞌya xiꞌí néꞌ. (Daj si gataj si-nu̱guanꞌ Yanꞌanj: “Ga̱ niꞌya daranꞌ ni tsínj ga̱huiꞌ gui̱nicoꞌ rian chrun.” Daj gataj si-nu̱guanꞌ Yanꞌanj.) ¹⁴Ni̱ hué daj guiranꞌ Jesús sisi̱ ga̱huin da̱j rúnꞌ gataj yya Yanꞌanj gunun Abraham asi̱j ná. Ngaa ni̱ xiꞌí Cristo Jesús, ni̱ ga̱ꞌue ga̱ne Espíritu Santo niman ni ngüi̱ ꞌna̱ꞌ anéj chrej. Ni̱ xiꞌí si xuman ruhua néꞌ niꞌyaj néꞌ Yanꞌanj, ni̱ ga̱ꞌue ga̱ne Espíritu Santo niman daranꞌ néꞌ.

¹⁵Gui̱ꞌyóꞌ cuenta da̱j ꞌyaj néꞌ mán néꞌ rian xungüi̱ nan huin ín re̱ꞌ jnān nga̱ xicaꞌuī. Sisi̱ naguiꞌyaj ꞌngo̱ tsínj daj yanj, ni̱ gaꞌuiꞌ sij si-firma sij, ni̱, ni̱ a̱ ꞌngo̱ ni ngüi̱ si̱ gaꞌue di̱reꞌ si garun sij mánj. ¹⁶Ni̱ hué ducuánj daj huin sisi̱ guiꞌyaj yya Yanꞌanj nga̱ Abraham nga̱ daꞌni̱ siꞌni̱ sij. Ni̱ sé si aꞌmi si-nu̱guanꞌ Yanꞌanj xiꞌí daranꞌ ni daꞌni̱ siꞌni̱ Abraham mánj. Sani̱ aꞌmi si-nu̱guanꞌ Yanꞌanj xiꞌí urin daꞌníj sij huin Cristo.

¹⁷Nuguanꞌ aꞌmī huin nan: Guiꞌyaj yya Yanꞌanj ꞌngo̱ nuguanꞌ nga̱ Abraham xiꞌí Cristo. Ni̱ ngaa gachin ga̱nꞌanj ciento táj ico̱ chiꞌ yoꞌ, ni̱ gaꞌuiꞌ Yanꞌanj ley rian Moisés. Sani̱ si̱ gaꞌue di̱reꞌ ley daj si guiꞌyaj yya Yanꞌanj nga̱ Abraham mánj. ¹⁸Ni̱ sisi̱ anaꞌuij néꞌ sisi̱ gui̱ꞌyaj sa̱ꞌ Yanꞌanj nga̱ néꞌ xiꞌí si-ley Moisés, ni̱ huin ruhuaj gata sisi̱ nitaj si anaꞌuij néꞌ nga̱ nuguanꞌ sa̱ꞌ guiꞌyaj yya Yanꞌanj nga̱ Abraham. Sani̱ hua yya anaꞌuij néꞌ sisi̱ gui̱ꞌyaj sa̱ꞌ Yanꞌanj nga̱ néꞌ xiꞌí si guiꞌyaj yya Yanꞌanj nga̱ Abraham asi̱j ná.

El propósito de la ley

¹⁹Ngaa ni̱ u̱n sin níꞌyanj si-ley Moisés, ruhua á re̱ꞌ únj. Hué si gaꞌna̱ꞌ ley daj sisi̱ xa̱caj ni ngüi̱ cuenta da̱j hua si-ga̱quinꞌ ni sij. Ni̱ guiꞌyaj Yanꞌanj sisi̱ gui̱nicaj sun ley daj da ga̱ꞌnaꞌ daꞌni̱ siꞌni̱ Abraham huin Cristo. Ni̱ hué sij huin tsínj xi̱ꞌi guiꞌyaj yya Yanꞌanj nga̱ Abraham. Ni̱ gaꞌuiꞌ Yanꞌanj ley daj xiꞌí ni ángel. Ni̱ digyán ni ángel ley daj rian Moisés. Ngaa ni̱ digyán Moisés da̱j hua ley daj rian ni ngüi̱. ²⁰Sani̱ güenda nuguanꞌ sa̱ꞌ guiꞌyaj yya Yanꞌanj nga̱ Abraham, ni̱ nitaj si achin ꞌngo̱ tsínj ga̱ꞌmi xiꞌí Yanꞌanj mánj. Daj si urin Yanꞌanj huin. Ni̱ gaꞌmi urin Yanꞌanj rian Abraham.

²¹Ni̱ nuguanꞌ nan huin ruhuaj gata sisi̱ ununꞌ si-ley Moisés nga̱ nuguanꞌ guiꞌyaj yya Yanꞌanj nga̱ Abraham níꞌ. Sé daj huin mánj. Ni̱ sisi̱ ley daj ga̱ꞌue gui̱ꞌyaj sisi̱ ga̱ne ni̱ganj néꞌ, ngaa ni̱ ga̱ꞌue ga̱huin sa̱ꞌ néꞌ rian Yanꞌanj xiꞌí si da̱gahuin néꞌ si ataj ley daj. ²²Sani̱ ataj si-nu̱guanꞌ Yanꞌanj sisi̱ daꞌui daranꞌ ni ngüi̱ gaquinꞌ. Ngaa ni̱ ni ngüi̱ xuman ruhua niꞌyaj Jesucristo, ni̱ ga̱ꞌue ga̱nahuin raꞌa ni sij nuguanꞌ sa̱ꞌ guiꞌyaj yya Yanꞌanj nga̱ Abraham.

²³Ni̱ ngaa achin gu̱xuman ruhua néꞌ niꞌyaj néꞌ Jesucristo, ni̱ da̱j rúnꞌ anumi ꞌngo̱ nneꞌ yu̱nꞌ, ni̱ hué daj guiꞌyaj si-ley Moisés. Ni̱ hué daj guiꞌyaj ley daj da güi digyán Yanꞌanj sisi̱ gu̱xuman ruhua néꞌ ni̱ꞌyaj néꞌ Cristo. ²⁴Ni̱ dugumi ley daj rian néꞌ da güi gaꞌna̱ꞌ Cristo. Ngaa ni̱ ngaa gu̱xuman ruhua néꞌ ni̱ꞌyaj néꞌ Jesucristo, ni̱ ga̱huin sa̱ꞌ néꞌ rian Yanꞌanj. ²⁵Ni̱ xiꞌí si guxuman ruhua néꞌ niꞌyaj néꞌ Jesucristo, ni̱ nitaj si dugumi ley daj néꞌ ga̱ mánj.

²⁶Ni̱ xiꞌí si xuman ruhua ni é re̱ꞌ niꞌyaj ni é re̱ꞌ Cristo Jesús, ni̱ daranꞌ ni é re̱ꞌ huin daꞌníj Yanꞌanj. ²⁷Ni̱ xiꞌí si gataꞌ nnee ni é re̱ꞌ nga̱ si-xugüi Cristo, ni̱ nne Cristo chruhua niman án re̱ꞌ. Ni̱ da̱j rúnꞌ ꞌyaj ꞌngo̱ tsínj ngaa ga̱nanun sij ꞌngo̱ atsij na̱ca, ni̱ hué daj ganahuin na̱ca ni é re̱ꞌ, guiꞌyaj Cristo. ²⁸Ngaa ni̱ uyan huin ni tsínj israelita nga̱ ni tsínj griego nej. Ni̱ uyan huin tsínj ꞌyaj sun yu̱n rian xuruꞌue nga̱ tsínj hua níꞌnij rian nej. Ni̱ uyan huin tsínj nga̱ yunꞌunj xa̱na nej. Daj si ngaa ni̱caj dugüiꞌ ni é re̱ꞌ nga̱ Cristo, ni̱ urin ni é re̱ꞌ huin. ²⁹Ni̱ sisi̱ nicaj dugüiꞌ ni é re̱ꞌ nga̱ Cristo, ngaa ni̱ huin ni é re̱ꞌ daꞌni̱ siꞌni̱ Abraham. Ni̱ na̱huin raꞌa ni é re̱ꞌ nuguanꞌ sa̱ꞌ da̱j rúnꞌ gataj yya Yanꞌanj rian Abraham.

¹Ni̱ huin ruhuāj ga̱tā sisi̱ ngaa hua lij daꞌníj ꞌngo̱ tsínj daj, ni̱ siꞌyaj chrej sij huin siꞌyaj sij. Sani̱ xiꞌí si hua lij sij, ni̱ uyan huin sij nga̱ ni tsínj ꞌyaj sun yu̱n rian chrej sij. Ni̱ si̱ gaꞌue na̱caj sij siꞌyaj chrej sij mánj. ²Hua ni ngüi̱ dugumi tsinꞌ daj. Ni̱ dugumi ni síꞌ siꞌyaj sij. Ni̱ hué daj ꞌyaj ni síꞌ nga̱ sij da gui̱sij güi ga̱taj chrej sij sisi̱ na̱huin raꞌa sij siꞌyaj chrej sij. ³Ni̱ hué daj ranꞌ néꞌ nej. Ngaa ga lij néꞌ, ni̱ dagahuin néꞌ si-nu̱guanꞌ ni yanꞌanj huin achij chruhua xungüi̱ nan.

⁴Sani̱ ngaa guisíj güi huin ruhua Yanꞌanj xa̱ngaꞌ riqui si sa̱ꞌ rian néꞌ, ni̱ gaꞌníj Yanꞌanj xa̱ngaꞌ daꞌni ga̱ꞌnaꞌ chruhua xungüi̱ nan. Ni̱ gaꞌnga síꞌ, guiꞌyaj ꞌngo̱ yunꞌunj xa̱na. Ni̱ dagahuin ni du̱güiꞌ síꞌ si-ley Moisés ngaa gane síꞌ chruhua xungüi̱ nan. ⁵Ni̱ gaꞌna̱ꞌ síꞌ sisi̱ ga̱huin níꞌnij néꞌ rian ley daj, guiꞌyaj síꞌ. Ni̱ huin ruhua Yanꞌanj sisi̱ ga̱huin néꞌ daꞌníj Yanꞌanj, gui̱ꞌyaj síꞌ. ⁶Ni̱ xiꞌí si huin a ni é re̱ꞌ daꞌníj Yanꞌanj, ni̱ gaꞌníj Yanꞌanj Si-Espíritu daꞌni ga̱ꞌnaꞌ ga̱ne chruhua niman néꞌ. Ni̱ ga̱ꞌue ga̱taj néꞌ gu̱nun Yanꞌanj: “Chrej ni únj huín so̱ꞌ, ataj néꞌ, aguáj néꞌ”, ꞌyaj Si-Espíritu daꞌníj Yanꞌanj. ⁷Hué dan ni̱ sé tsínj ꞌyaj sun yu̱n rian ꞌngo̱ xuruꞌue huin a ni é re̱ꞌ ga̱ mánj. Sani̱ nahuin a ni é re̱ꞌ daꞌníj Yanꞌanj. Ni̱ xiꞌí si huin a ni é re̱ꞌ daꞌníj Yanꞌanj, ni̱ huin ruhua Yanꞌanj sisi̱ na̱huin raꞌa á re̱ꞌ daranꞌ nuguanꞌ sa̱ꞌ, gui̱ꞌyaj Cristo.

Exhortación contra el volver a la esclavitud

⁸Asi̱j sini ni̱ nun gui̱niꞌi ni é re̱ꞌ Yanꞌanj xa̱ngaꞌ mánj. Ni̱ dagahuin ni é re̱ꞌ rian ango ni yanꞌanj sisi̱ sé yanꞌanj xa̱ngaꞌ huin mánj. ⁹Sani̱ yya̱j ni̱ niꞌi ni é re̱ꞌ Yanꞌanj xa̱ngaꞌ. Asi̱ sa̱ꞌ huin ga̱tā sisi̱ niꞌi Yanꞌanj ni é re̱ꞌ. Hué dan ni̱ da̱j ga̱ꞌue na̱nicaj ru̱huaꞌ yún ni é re̱ꞌ na̱nicoꞌ ni é re̱ꞌ ni yanꞌanj niqui nitaj fuerza nicaj sisi̱ gui̱ꞌyaj sun yu̱n ni é re̱ꞌ rian ni yanꞌanj da únj. ¹⁰Gue̱ ni é re̱ꞌ gaꞌi̱ güi. Ni̱ hua yahui̱ gue̱ ni é re̱ꞌ, ataj á re̱ꞌ nej. Ni̱ hua yoꞌ gue̱ é re̱ꞌ, ataj á re̱ꞌ nej. ¹¹Nani ruhuāj sisi̱ guiꞌyaj sun yūnj si-sun Yanꞌanj scanij ni é re̱ꞌ.

¹²Achínj jniꞌyā rian án re̱ꞌ sisi̱ ga̱huin ni é re̱ꞌ da̱j rúnꞌ huīnj huin ni é re̱ꞌ jnān nga̱ xicaꞌuī. Daj si gahuīnj da̱j rúnꞌ huin ni é re̱ꞌ. Nitaj nu̱nj guiranꞌānj, guiꞌyaj ni é re̱ꞌ mánj. ¹³Hua niꞌi ni é re̱ꞌ sisi̱ asi̱j sini gaꞌmī si-nu̱guanꞌ Yanꞌanj rian ni é re̱ꞌ xiꞌí ꞌngo̱ xiꞌi̱ guidaꞌa yūnj. ¹⁴Hué xiꞌi̱ guiꞌyaj gaꞌnānj daj gahuin ꞌngo̱ sayun guiranꞌānj. Sani̱ nun gahuin ruhua ni é re̱ꞌ, ni̱ nun da̱nicaj ni é re̱ꞌ manꞌānj xiꞌí xiꞌi̱ guiranꞌānj da mánj. Ni̱ nahuin raꞌa sa̱ꞌ ni é re̱ꞌ manꞌānj da̱j rúnꞌ gahuīnj ꞌngo̱ si-ángel Yanꞌanj, asi̱ gahuīnj da̱j rúnꞌ gahuin manꞌan Jesucristo, ruhua á re̱ꞌ. ¹⁵Ni̱ u̱n sin huin ni̱ nitaj si nia̱ꞌ ruhua ni é re̱ꞌ ngāj, da̱j rúnꞌ gahuin nia̱ꞌ ruhua ni é re̱ꞌ asi̱j sini únj. Daj si atā gu̱nun ni é re̱ꞌ sisi̱ ga̱ꞌuej ruhua á re̱ꞌ gui̱ri ni é re̱ꞌ rundij rian án re̱ꞌ ri̱qui ni é re̱ꞌ riānj. ¹⁶Yya̱j ni̱ gahuīnj ꞌngo̱ tsínj ununꞌ nga̱ ni é re̱ꞌ urin si gaꞌmī nuguanꞌ xa̱ngaꞌ rian án re̱ꞌ, ruhua á re̱ꞌ níꞌ.

¹⁷Ni̱ ni tsínj digyán rian án re̱ꞌ daj, ni̱ xicoj ruhua ni sij niꞌyaj ni sij ni é re̱ꞌ. Sani̱ sé si huin sa̱ꞌ ruhua ni sij mánj. Daj si huin ruhua ni sij sisi̱ ga̱huin ni̱ni ni é re̱ꞌ rian únj. Ngaa ni̱ gui̱nicoꞌ ni é re̱ꞌ ni sij, ruhua ni sij. ¹⁸Sisi̱ huin sa̱ꞌ ruhua ni sij xiꞌí ni é re̱ꞌ, ngaa ni̱ duguꞌna̱j huin sisi̱ xi̱coj ruhua ni sij ni̱ꞌyaj ni sij ni é re̱ꞌ. Ni̱ hua nia̱n sisi̱ ni̱ganj gui̱ꞌyaj ni sij daj. Ni̱ sé urin ngaa nnēj scanij ni é re̱ꞌ mánj. ¹⁹Rúnꞌ huin daꞌnī lij huin ni é re̱ꞌ riānj. Ni̱ da̱j rúnꞌ chranꞌ ꞌngo̱ yunꞌunj xa̱na sayun ngaa achin ga̱ꞌnga daꞌníj unj, ni̱ hué daj ranꞌānj xiꞌí ni é re̱ꞌ. Ni̱ ga̱ guiranꞌānj sayun xiꞌí ni é re̱ꞌ da gui̱nicaj dugüiꞌ sa̱ꞌ ni é re̱ꞌ nga̱ Cristo. ²⁰Ni̱ huin ruhuāj sisi̱ gui̱man néꞌ acuanꞌ sisi̱ ga̱ꞌue na̱dunāj nuguanꞌ aꞌmī nga̱ ni é re̱ꞌ. Daj si nun xugüi ruhuāj si gui̱ꞌyā nga̱ ni é re̱ꞌ mánj.

Alegoría de Sara y Agar

²¹Huin ruhuāj sisi̱ ga̱taj yya á re̱ꞌ ꞌngo̱ nuguanꞌ gu̱nūnj: Ni̱ huin ruhua á re̱ꞌ da̱gahuin a ni é re̱ꞌ si gataj si-ley Moisés, sani̱ gunun ni é re̱ꞌ si ataj ley da níꞌ. ²²Ni̱ gataj ley daj sisi̱ hua hui̱j daꞌni̱ snoꞌo tsínj gu̱ꞌnaj Abraham. Ni̱ gaꞌnga ꞌngo̱ daꞌníj sij nga̱ ꞌngo̱ yunꞌunj xa̱na ꞌyaj sun yu̱n ducuá sij. Ni̱ gaꞌnga ango daꞌníj sij nga̱ manꞌan nica̱ sij. ²³Ni̱ da̱j rúnꞌ aꞌnga ango ni lij, ni̱ hué daj gaꞌnga daꞌníj yunꞌunj xa̱na ꞌyaj sun yu̱n daj. Sani̱ ango daꞌníj sij gaꞌnga nga̱ manꞌan nica̱ sij huin tsínj xi̱ꞌi guiꞌyaj yya Yanꞌanj nga̱ Abraham ngaa achin ga̱ꞌnga lij daj.

²⁴Gui̱ꞌyóꞌ cuenta sisi̱ da̱j rúnꞌ huin nu̱ngüej yunꞌunj xa̱na daj, ni̱ hué daj huin hui̱j nuguanꞌ guiꞌyaj yya Yanꞌanj nga̱ ni ngüi̱. Ni̱ ꞌngo̱ nuguanꞌ daj huin ꞌngo̱ nuguanꞌ guiꞌyaj yya Yanꞌanj nga̱ Moisés chra̱ quij gu̱ꞌnaj Sinaí. Ni̱ da̱j rúnꞌ guiꞌyaj sun yu̱n yunꞌunj gu̱ꞌnaj Agar ducuá Abraham, ni̱ hué daj huin nuguanꞌ daj. Ni̱ ni tsínj dagahuin rian si-ley Moisés, ni̱ nun gahuin níꞌnij ni sij rian ley daj. Daj si aꞌninꞌ ley daj sun rian ni sij. Ni̱ yunꞌunj xa̱na daj gu̱ꞌnaj Agar. ²⁵Ni̱ da̱j rúnꞌ huin Agar, ni̱ hué daj huin quij gu̱ꞌnaj Sinaí niquinꞌ estado Arabia. Ni̱ hua gue̱ acaj ni tsínj mán xumanꞌ Jerusalén cuenta nuguanꞌ guiꞌyaj yya Yanꞌanj chra̱ quij gu̱ꞌnaj Sinaí huin si-ley Moisés. Ni̱ nun gahuin níꞌnij ni sij rian ley da mánj. ²⁶Sani̱ hua níꞌnij néꞌ nne néꞌ ango xumanꞌ Jerusalén huin ꞌngo̱ xumanꞌ ngaj da xataꞌ. Ni̱ da̱j rúnꞌ nicoꞌ néꞌ nni néꞌ chruhua xungüi̱ nan, ni̱ daꞌngaꞌ daj nicoꞌ néꞌ xumanꞌ daj.

²⁷Daj si gataj si-nu̱guanꞌ Yanꞌanj:

Ga̱huin nia̱ꞌ ruhuá re̱ꞌ huín re̱ꞌ ꞌngo̱ yunꞌunj xa̱na yatin nitaj daꞌníj re̱ꞌ gaꞌnga.

Ni̱nꞌ ruhua ga̱huin nia̱ꞌ ruhuá re̱ꞌ sisi̱ huín re̱ꞌ ꞌngo̱ yunꞌunj xa̱na nun niꞌi sayun ranꞌ ni ngüi̱ xa̱na aꞌnga daꞌníj.

Daj si ga̱huin nico daꞌníj yunꞌunj xa̱na nne urin daj nga̱ daꞌníj yunꞌunj xa̱na hua nica̱.

Daj gataj si-nu̱guanꞌ Yanꞌanj.

²⁸Ni̱ da̱j rúnꞌ huin tsínj gu̱ꞌnaj Isaac huin néꞌ huin ni é re̱ꞌ jnān nga̱ xicaꞌuī. Hué néꞌ huin ni tsínj xi̱ꞌi guiꞌyaj yya Yanꞌanj ꞌngo̱ nuguanꞌ nga̱ chrej Isaac. ²⁹Sani̱ chranꞌ yunꞌunj daꞌníj yunꞌunj xa̱na guiꞌyaj sun yu̱n daj manꞌan Isaac. Ni̱ hué daj chranꞌ yunꞌunj ni tsínj nicoꞌ si-ley Moisés néꞌ huin néꞌ ni tsínj gahuin sa̱ꞌ, guiꞌyaj Espíritu Santo ma̱n acuanꞌ.

³⁰Sani̱ gataj si-nu̱guanꞌ Yanꞌanj: “Gui̱ri re̱ꞌ xe̱ꞌ nu̱ngüej daꞌni̱ xa̱na ꞌyaj sun yu̱n daj. Daj si si̱ gaꞌue na̱huin raꞌa daꞌníj yunꞌunj xa̱na daj ni rasu̱n nga̱ daꞌníj nu̱ngüej nica̱ Abraham.” Daj gataj si-nu̱guanꞌ Yanꞌanj. ³¹Xiꞌí daj ni̱ sé daꞌníj yunꞌunj xa̱na guiꞌyaj sun yu̱n daj huin néꞌ huin ni é re̱ꞌ jnān nga̱ xicaꞌuī. Daj si nitaj si aꞌninꞌ si-ley Moisés sun rian néꞌ. Sani̱ huin néꞌ da̱j rúnꞌ huin daꞌníj nu̱ngüej nica̱ Abraham.

Estad firmes en la libertad

¹Ni̱ guiꞌyaj Cristo sisi̱ gahuin níꞌnij rian néꞌ. Ngaa ni̱ ga̱ ni̱ca ruhua ni é re̱ꞌ xiꞌí si gahuin níꞌnij ni é re̱ꞌ. Ni̱ si̱ nanica̱j ru̱huaꞌ yún ni é re̱ꞌ sisi̱ da̱gahuin ni é re̱ꞌ rian ango nuguanꞌ aꞌninꞌ sun rian ni é re̱ꞌ mánj.

²Ni̱ ga̱nani chraquij ni é re̱ꞌ si ataj snanꞌān gu̱nun ni é re̱ꞌ, huīnj Pablo. Ni̱ sisi̱ gu̱taꞌ ni sij daꞌngaꞌ nnee̱ cúj ni é re̱ꞌ, ni̱ huin ruhuaj gata sisi̱ nitaj si níꞌyanj si guiꞌyaj Cristo xiꞌí ni é re̱ꞌ mánj. ³Ni̱ ataj snanꞌān ru̱huaꞌ yūnj rian án re̱ꞌ sisi̱ daranꞌ ni tsínj aꞌuej ruhua sisi̱ gu̱taꞌ ni sij daꞌngaꞌ nnee̱ cúj ni sij, ni̱ hua nia̱n sisi̱ da̱gahuin ni sij daranꞌ si aꞌninꞌ si-ley Moisés rian ni sij. ⁴Ni̱ sisi̱ ani ruhua ni é re̱ꞌ sisi̱ ga̱huin sa̱ꞌ á re̱ꞌ rian Yanꞌanj xiꞌí si dagahuin ni é re̱ꞌ ley daj, ngaa ni̱ gahuin ni̱ni ni é re̱ꞌ rian Cristo. Ni̱ gahuin ni̱ni ni é re̱ꞌ rian sinduj guiꞌyaj Yanꞌanj nga̱ néꞌ. ⁵Sani̱ Espíritu Santo ꞌyaj sisi̱ anaꞌuij néꞌ sisi̱ ga̱huin sa̱ꞌ néꞌ rian Yanꞌanj xiꞌí si xuman ruhua néꞌ niꞌyaj néꞌ Jesucristo. ⁶Ni̱ sisi̱ nicaj dugüiꞌ néꞌ nga̱ Cristo Jesús, ni̱ nitaj si ꞌya sisi̱ gui̱taj, asi̱ si̱ guitaj daꞌngaꞌ nnee̱ cúj néꞌ mánj. Sani̱ níꞌyanj yya sisi̱ gu̱xuman róꞌ niꞌíꞌ Cristo Jesús. Xiꞌí daj ni̱ ga̱huin ꞌi̱ róꞌ gui̱niꞌíꞌ ni dugüíꞌ.

⁷Hua sa̱ꞌ gachéj sini ni é re̱ꞌ si-chrej Yanꞌanj. Ngaa ni̱ u̱n tsínj guiꞌyaj, ni̱ duna ni é re̱ꞌ sisi̱ nun dagahuin ni é re̱ꞌ nuguanꞌ xa̱ngaꞌ únj. ⁸Ni̱ Yanꞌanj gaquínj ni é re̱ꞌ sisi̱ gui̱nicaj dugüiꞌ ni é re̱ꞌ nga̱ Yanꞌanj. Ni̱ sé Yanꞌanj guiꞌyaj sisi̱ duna á re̱ꞌ nuguanꞌ xa̱ngaꞌ daj. ⁹Ataj néꞌ sisi̱ do̱j xínj levadura ꞌyaj, ni̱ ayu daranꞌ ni quinj. Ni̱ da̱j róꞌ ꞌyaj levadura daj, ni̱ hué daj ꞌyaj nuguanꞌ yya̱ unun ni é re̱ꞌ. Sisi̱ gu̱nun néꞌ do̱j nuguanꞌ yya̱, ni̱ ga̱ꞌue gue̱reꞌ daranꞌ ni nuguanꞌ sa̱ꞌ nun chruhua niman néꞌ.

¹⁰Ni̱ hua xitinj ruhuāj rian Señor sisi̱ uyan ga̱ ruhua á re̱ꞌ ngāj. Sani̱ Yanꞌanj gui̱ꞌyaj castigo tsínj chranꞌ yunꞌunj ni é re̱ꞌ. Nitaj si gui̱ꞌya u̱n tsínj ga̱huin mánj.

¹¹Ni̱ sisi̱ hua gue̱ aꞌmī sisi̱ gu̱taꞌ ni sij daꞌngaꞌ ni ngüi̱, ni̱ si̱ chranꞌ yunꞌunj ni tsínj israelita manꞌānj huin ni é re̱ꞌ jnān nga̱ xicaꞌuī. Sani̱ aꞌmī rian ni ngüi̱ sisi̱ gahuiꞌ Jesús xiꞌí si-ga̱quinꞌ néꞌ. Xiꞌí daj ni̱ ununꞌ ni sij nga̱ manꞌānj. ¹²Sani̱ xiꞌí ni tsínj chranꞌ yunꞌunj ni é re̱ꞌ daj, ni̱ huin ruhuāj sisi̱ uyun ga̱ꞌninꞌ ni sij manꞌan ni sij.

¹³Ni̱ ngaa gaquínj Yanꞌanj ni é re̱ꞌ, ni̱ gahuin níꞌnij rian ni é re̱ꞌ huin ín re̱ꞌ jnān nga̱ xicaꞌuī. Sani̱ nitaj si huin ruhuaj gata sisi̱ ga̱ꞌue xa̱caj ni é re̱ꞌ daranꞌ chrej huin chrej huin ruhua nnee̱ cúj ni é re̱ꞌ xa̱caj a̱ꞌ. Sa̱ꞌ huin sisi̱ ga̱huin ꞌi̱ ruhua á re̱ꞌ ni̱ꞌyaj á re̱ꞌ dugüiꞌ ni é re̱ꞌ. Ni̱ gui̱ꞌyaj sun ni é re̱ꞌ xiꞌí dugüiꞌ ni é re̱ꞌ. ¹⁴Daj si daranꞌ si-ley Yanꞌanj huin urin nuguanꞌ. Ni̱ nuguanꞌ nan huin: “Ga̱huin ꞌi̱ ruhua néꞌ gui̱niꞌyaj néꞌ ni dugüiꞌ néꞌ da̱j rúnꞌ ꞌi̱ ruhua néꞌ niꞌyaj néꞌ ni manꞌan néꞌ”. Ni̱ sisi̱ hué daj gui̱ꞌyaj néꞌ, ni̱ da̱gahuin néꞌ daranꞌ nuguanꞌ aꞌninꞌ Yanꞌanj sun rian néꞌ. Daj gataj si-ley Yanꞌanj. ¹⁵Ga̱ cuidado ni é re̱ꞌ sisi̱ si̱ gununꞌ ni du̱güiꞌ ni é re̱ꞌ mánj. Ni̱ si̱ gaꞌmi ni é re̱ꞌ ni nuguanꞌ quij xiꞌí ni du̱güiꞌ ni é re̱ꞌ mánj. Ni̱ sisi̱ hué daj gui̱ꞌyaj ni é re̱ꞌ, ni̱ gue̱reꞌ ni du̱güiꞌ ni é re̱ꞌ.

Las obras de la carne y el fruto del Espíritu

¹⁶Hué dan ni̱ ataj snanꞌān gu̱nun ni é re̱ꞌ sisi̱ xa̱caj ni é re̱ꞌ si-chrej Espíritu Santo. Ngaa ni̱ si̱ guiꞌyaj ni é re̱ꞌ da̱j rúnꞌ huin ruhua nnee̱ cúj ni é re̱ꞌ mánj. ¹⁷Daj si ununꞌ si huin ruhua nnee̱ cúj néꞌ nga̱ si huin ruhua Espíritu Santo. Ni̱ ununꞌ Espíritu Santo nga̱ si huin ruhua nnee̱ cúj néꞌ. Ni̱ ni̱ni huin ruhua go̱ꞌngo nu̱ngüe. Xiꞌí daj ni̱ naꞌue gui̱ꞌyaj ni é re̱ꞌ da̱j rúnꞌ huin ruhua ni é re̱ꞌ gui̱ꞌyaj á re̱ꞌ mánj. ¹⁸Sani̱ sisi̱ ga̱ꞌuej ruhua á re̱ꞌ di̱gyán Espíritu Santo chrej ga̱nꞌanj ni é re̱ꞌ, ni̱ nitaj si aꞌninꞌ si-ley Moisés sun rian ni é re̱ꞌ mánj.

¹⁹Sé si ꞌi̱ gui̱niꞌi ni é re̱ꞌ da̱j ꞌyaj ni tsínj ꞌyaj si huin ruhua nnee̱ cúj ni sij. Ni̱ aꞌmi ni sij nga̱ squi̱raꞌ ni sij. Ni̱ ꞌyaj ni sij ni rasu̱n quij hua nej. Ni̱ ꞌyaj ni sij si na̱ꞌaj nej. ²⁰Ni̱ nicoꞌ ni sij ango yanꞌanj ꞌyaj raꞌa ni sij. Ni̱ ꞌyaj stuꞌuaj ni sij nej. Ni̱ nun huin xa̱nꞌ ruhua ni sij nga̱ ni dugüiꞌ ni sij. Ni̱ ununꞌ ni sij nga̱ dugüiꞌ ni sij. Ni̱ xicoj ruhua ni sij nga̱ dugüiꞌ ni sij. Ni̱ yoo̱ nanꞌan ruhua ni sij. Ni̱ huin ruhua ni sij sisi̱ ga̱huin achij manꞌan ni sij. Ni̱ ꞌyaj ni sij sisi̱ huin ni̱ni go̱ꞌngo ni sij. Ni̱ ꞌyaj ni̱ni ni sij ꞌngo̱ xiꞌninꞌ manꞌan ni sij. ²¹Ni̱ huin ruhua ni sij ni̱ꞌyaj ni sij siꞌyaj dugüiꞌ ni sij. Ni̱ dagahuiꞌ ni sij níman nej. Ni̱ hua xi̱ni ni sij. Ni̱ xa na̱saꞌ ni sij. Ni̱ ꞌyaj ni sij ango rasu̱n quij da̱j rúnꞌ huin ruhua nnee̱ cúj ni sij. Ni̱ asi̱j sini, ni̱ hua gataj chrūnj rian án re̱ꞌ, ni̱ hué daj gataj ru̱huaꞌ yūnj sisi̱ daranꞌ ni tsínj ꞌyaj ni gaquinꞌ nan, ni̱ si̱ gane ni sij rian nicaj sun Yanꞌanj mánj.

²²Sani̱ ꞌyaj Espíritu Santo sisi̱ ga̱huin ꞌi̱ róꞌ gui̱niꞌíꞌ ni dugüíꞌ. Ni̱ ga̱huin nia̱ꞌ róꞌ. Ni̱ ga̱huin dinꞌinj ruhua néꞌ. Ni̱ ga̱ꞌninꞌ ruhua néꞌ nga̱ ni dugüiꞌ néꞌ. Ni̱ ga̱ꞌmi sa̱ꞌ néꞌ nej. Ni̱ gui̱ꞌyaj néꞌ sinduj nga̱ ni dugüiꞌ néꞌ. Ni̱ gu̱xuman ruhua néꞌ nej. ²³Ni̱ ga̱huin ni̱ néꞌ nej. Ni̱ gui̱nicaj sun néꞌ rian manꞌan néꞌ. Ni̱ sisi̱ da̱gahuin néꞌ ni nuguanꞌ nan, gui̱ꞌyaj Espíritu Santo, ni̱ nitaj a̱ ꞌngo̱ ley nicaj sun rian néꞌ mánj. ²⁴Ni̱ néꞌ, ni tsínj nicaj dugüiꞌ nga̱ Cristo, ni̱ naꞌue da̱gahuin néꞌ si huin ruhua nnee̱ cúj néꞌ mánj. Ni̱ rúnꞌ huin sisi̱ gahuiꞌ nu̱guanꞌan néꞌ rian rugutsi̱ nga̱ Cristo. Hué dan ni̱ guisíj si guiꞌyaj néꞌ si xi̱ꞌi da̱j rúnꞌ huin ruhua nnee̱ cúj néꞌ, gui̱ꞌyaj néꞌ. ²⁵Sisi̱ gahuin sa̱ꞌ néꞌ, guiꞌyaj Espíritu Santo, ngaa ni̱ xa̱caj néꞌ chrej di̱gyan Espíritu Santo rian néꞌ nej. ²⁶Si̱ guiꞌyaj nne̱ néꞌ mánj. Ni̱ si̱ chranꞌ néꞌ ni dugüiꞌ néꞌ mánj. Ni̱ si̱ gahuin xicoj ruhua néꞌ gui̱niꞌi néꞌ ni dugüiꞌ néꞌ mánj.

¹Ni̱ sisi̱ gui̱ꞌyaj ꞌngo̱ tsínj daj gaquinꞌ gui̱niꞌi ni é re̱ꞌ, ni̱ sisi̱ ni é re̱ꞌ huin tsínj xuman ruhua sa̱ꞌ ruhua, ngaa ni̱ ga̱nꞌanj chra̱cuij ni é re̱ꞌ sij sisi̱ na̱nicaj ruhua sij, ni̱ gui̱nicaj dugüíꞌ ru̱huaꞌ yún sij nga̱ ni é re̱ꞌ. Sani̱ ga̱ꞌmi na̱j ni é re̱ꞌ nga̱ sij. Ni̱ ga̱ cuidado ni é re̱ꞌ nun sa̱ꞌ nun di̱gyaꞌ yunꞌunj sichre ni é re̱ꞌ nej. ²Ni̱ chra̱cuij go̱ꞌngoꞌ ni dugüíꞌ. Ni̱ sisi̱ hué daj gui̱ꞌyaj néꞌ, ni̱ da̱gahuin néꞌ nuguanꞌ aꞌninꞌ Cristo sun rian néꞌ. ³Ni̱ sisi̱ ani ruhua ꞌngo̱ tsínj nasi̱nunj sisi̱ huin achij sij, sani̱ digyaꞌ yunꞌunj sij manꞌan sij. ⁴Xa̱caj go̱ꞌngo néꞌ cuenta da̱j ꞌyaj go̱ꞌngo néꞌ. Ni̱ sisi̱ ꞌyaj sa̱ꞌ néꞌ, ni̱ ga̱ꞌue ga̱huin nia̱ꞌ ruhua néꞌ nga̱ si ꞌyaj néꞌ. Sani̱ si̱ gataj néꞌ sisi̱ ꞌyaj sa̱ꞌ néꞌ daj nga̱ si ꞌyaj ni dugüiꞌ néꞌ. ⁵Daj si xiráj go̱ꞌngo néꞌ huin si ga̱ cuidado néꞌ nga̱ si ꞌyaj manꞌan néꞌ.

⁶Tsínj gahuin chru̱n si-nu̱guanꞌ Yanꞌanj, ni̱ ga̱ꞌuiꞌ sij si achin rian tsínj digyán nuguanꞌ daj rian sij.

⁷Si̱ duna ni é re̱ꞌ sisi̱ di̱gyaꞌ yunꞌunj ꞌngo̱ nuguanꞌ snanꞌanj manꞌan án re̱ꞌ mánj. Si̱ gaꞌue di̱gyaꞌ yunꞌunj ni é re̱ꞌ Yanꞌanj mánj. Sisi̱ ꞌyaj sa̱ꞌ ꞌngo̱ tsínj daj chruhua xungüi̱ nan, ni̱ ga̱huin sa̱ꞌ rian sij. Ni̱ sisi̱ ꞌyaj quij ꞌngo̱ tsínj daj, ni ga̱ sayun rian sij. ⁸Daj si sisi̱ gui̱ꞌyaj ꞌngo̱ tsínj daj si huin ruhua nnee̱ cúj sij gui̱ꞌyaj sij, ni̱ gue̱reꞌ sij, gui̱ꞌyaj nuguanꞌ daj. Sani̱ sisi̱ gui̱ꞌyaj ꞌngo̱ tsínj daj si huin ruhua Espíritu Santo gui̱ꞌyaj sij, ni̱ ga̱ne ni̱ganj sij, gui̱ꞌyaj Espíritu Santo. ⁹Ngaa ni̱ si̱ gaꞌninꞌ ruhua néꞌ si gui̱ꞌyaj sa̱ꞌ néꞌ. Daj si sisi̱ gui̱ꞌyaj fuerza néꞌ nga̱ nuguanꞌ sa̱ꞌ, ni̱ hua ꞌngo̱ güi gui̱ꞌyaj sa̱ꞌ Yanꞌanj rian néꞌ. ¹⁰Hué dan ni̱ yya̱j hua níꞌnij rian néꞌ, ni̱ gui̱ꞌyaj sa̱ꞌ néꞌ nga̱ daranꞌ ni ngüi̱. Ni̱ gui̱ꞌyaj sa̱ꞌ doj néꞌ nga̱ ni ngüi̱ xuman ruhua niꞌyaj Yanꞌanj.

Pablo se gloría en la cruz de Cristo

¹¹Ni̱ꞌyaj ni é re̱ꞌ sisi̱ da̱j arūnj letra xxi nan nga̱ raꞌāj. ¹²Ni tsínj aꞌninꞌ sun rian án re̱ꞌ sisi̱ gui̱taj daꞌngaꞌ nnee̱ cúj ni é re̱ꞌ, ni̱ maan si huin ruhua ni sij sisi̱ ga̱ꞌmi sa̱ꞌ ni ngüi̱ xiꞌí ni sij. Ni̱ naꞌuej ruhua ni sij sisi̱ chra̱nꞌ yunꞌunj ni ngüi̱ ni sij xiꞌí si gahuiꞌ Cristo rian rugutsi̱. ¹³Ni̱ ni tsínj gui̱taj daꞌngaꞌ nnee̱ cúj ni sij, ni̱ nun dagahuin ni sij si ataj si-ley Moisés mánj. Sani̱ maan si huin ruhua ni sij sisi̱ gui̱taj daꞌngaꞌ nnee̱ cúj ni é re̱ꞌ. Ngaa ni̱ ga̱huin nne̱ ni sij sisi̱ gui̱taj daꞌngaꞌ nnee̱ cúj ni é re̱ꞌ, guiꞌyaj ni sij. ¹⁴Sani̱ güendāj, ni̱ naꞌuej ruhuāj sisi̱ ga̱huin nnēj. Maan si huin ruhuāj ga̱ꞌmi saꞌāj xiꞌí Señor Jesucristo huin tsínj gahuiꞌ rian rugutsi̱ xiꞌí néꞌ. Daj si xiꞌí si gahuiꞌ Cristo rian rugutsi̱, ni̱ nitaj si níꞌyanj si-chrej ni ngüi̱ ma̱n chruhua xungüi̱ gaquinꞌ nan riānj ga̱ mánj. Ni̱ hua duna manꞌānj si ꞌyaj ni ngüi̱ daj. ¹⁵Ni̱ ngaa ni̱caj dugüiꞌ néꞌ nga̱ Cristo Jesús, ni̱ nitaj si ꞌya sisi̱ gui̱taj daꞌngaꞌ nnee̱ cúj néꞌ, asi̱ si̱ guitaj daꞌngaꞌ nnee̱ cúj néꞌ a̱ꞌ. Sani̱ hua nia̱n si ga̱huin na̱ca néꞌ, gui̱ꞌyaj Cristo. ¹⁶Ni̱ huin ruhuāj sisi̱ ga̱huin dinꞌinj rian daranꞌ ni ngüi̱ dagahuin nuguanꞌ nan. Ni̱ na̱huin ꞌi̱ ruhua Yanꞌanj ni̱ꞌya ni ngüi̱ daj ruhuāj. Daj si huin yya ni sij tsínj israelita rian Yanꞌanj.

¹⁷Ni̱ güi ga̱nꞌanj ne̱ꞌ rian, ni̱ nitaj si huin ruhuāj sisi̱ chra̱nꞌ yunꞌunj ni é re̱ꞌ manꞌānj. Daj si guiranꞌ nnee̱ cū sayun xiꞌí si huīnj ꞌngo̱ tsínj ꞌyaj sun rian Jesús.

Bendición final

¹⁸Huin ruhuāj sisi̱ gui̱ꞌyaj Señor Jesucristo sinduj niman daranꞌ ni é re̱ꞌ huin ni é re̱ꞌ jnān nga̱ xicaꞌuī. Amén.