2 Corintios

SEGUNDA EPÍSTOLA DEL APÓSTOL SAN PABLO A LOS CORINTIOS

Salutación

¹Huēj huin Pablo. Ni̱ huin ruhua Yanꞌanj sisi̱ ga̱huīnj ꞌngo̱ tsínj apóstol huin tsínj aꞌmi nuguanꞌ sa̱ꞌ xiꞌí Jesucristo rian ni ngüi̱. Ni̱ aꞌníj nu̱ngüej únj jnánj néꞌ Timoteo yanj nan huaj rian án re̱ꞌ huin ín re̱ꞌ ni ngüi̱ nicoꞌ Yanꞌanj mán xumanꞌ Corinto nga̱ ni̱nꞌ ga̱chraꞌ estado Acaya nej. ²Huin ruhua nu̱ngüej únj sisi̱ gui̱ꞌyaj Yanꞌanj huin chrej néꞌ nga̱ Señor Jesucristo sinduj rian án re̱ꞌ. Ni̱ hué daj ga̱ dinꞌinj ruhua á re̱ꞌ, ruhua nu̱ngüej únj.

Aflicciones de Pablo

³Hua ꞌueé rian Yanꞌanj huin chrej Señor Jesucristo. Ni̱ Yanꞌanj huin chrej néꞌ. Ni̱ huin ꞌi̱ ruhua chrej néꞌ niꞌyaj néꞌ. Ni̱ ni̱ganj ꞌyaj Yanꞌanj sisi̱ na̱huin nia̱ꞌ ruhua néꞌ nga̱ si-chrej Yanꞌanj. ⁴Ni̱ ngaa nani ruhua únj, ꞌyaj sayun, ni̱ ꞌyaj Yanꞌanj sisi̱ na̱huin nia̱ꞌ ruhua únj. Ni̱ hué ducuánj daj ga̱huin nucuaj únj gui̱ꞌyaj únj si na̱huin nia̱ꞌ ruhua ni ngüi̱ ranꞌ sayun da̱j rúnꞌ guiꞌyaj Yanꞌanj nga̱ únj. ⁵Ni̱ ni̱nꞌ ruhua ranꞌ únj sayun xiꞌí si nicoꞌ únj Cristo. Sani̱ hué ducuánj daj ni̱nꞌ ruhua nahuin nia̱ꞌ ruhua únj, ꞌyaj Cristo nej. ⁶Ni̱ ngaa ranꞌ únj sayun, ni̱ ga̱ꞌue ri̱qui únj ꞌngo̱ chrej sisi̱ na̱riꞌ nucuaj niman án re̱ꞌ. Ni̱ ga̱ꞌue ga̱nacaj Yanꞌanj a ni é re̱ꞌ nej. Ni̱ sisi̱ ri̱qui Yanꞌanj si nariꞌ nucuaj niman únj, ngaa ni̱ ga̱ꞌue gu̱nucuaj a ni é re̱ꞌ gui̱ranꞌ án re̱ꞌ sayun da̱j rúnꞌ ranꞌ ni únj. ⁷Ni̱ hua gahuin yya ruhua ni únj xiꞌí a ni é re̱ꞌ. Daj si da̱j rúnꞌ uyan ranꞌ ni é re̱ꞌ sayun xiꞌí Cristo nga̱ únj, ni̱ hué daj uyan na̱riꞌ nucuaj ruhua á re̱ꞌ nga̱ únj, gui̱ꞌyaj Yanꞌanj.

⁸Ni̱ huin ruhua únj sisi̱ xa̱caj á re̱ꞌ cuenta da̱j guiranꞌ únj sayun estado Asia huin ín re̱ꞌ jnān nga̱ xicaꞌuī. Ni̱ guiranꞌ únj nico sayun daꞌ nun ga̱ꞌue gu̱nucuaj únj, ruhua únj. Ni̱ gani ruhua únj sisi̱ ga̱huiꞌ únj. ⁹Ni̱ da̱j rúnꞌ ani ruhua ꞌngo̱ tsínj ngaa ruhua ga̱huiꞌ sij, ni̱ hué daj gani ruhua únj si ga̱huiꞌ únj. Ni̱ gahuin chru̱n únj sisi̱ si̱ gaꞌue gu̱xuman ruhua únj gui̱niꞌyaj únj ni manꞌan únj. Sani̱ urin Yanꞌanj huin si gu̱xuman ruhua únj ni̱ꞌyaj únj si Yanꞌanj ꞌyaj si ga̱naꞌnij ni níman. ¹⁰Ni̱ Yanꞌanj guiꞌyaj si nun gahuiꞌ únj. Ni̱ hué daj gui̱ꞌyaj Yanꞌanj ni güi yya̱j nej. Ni̱ hua yya ruhua únj sisi̱ hué daj gui̱ꞌyaj Yanꞌanj daranꞌ ni güi nga̱ únj ¹¹sisi̱ ga̱chinj jniꞌyaj ni é re̱ꞌ rian Yanꞌanj xiꞌí ni únj. Ni̱ sisi̱ nico a ni é re̱ꞌ ga̱chinj jniꞌyaj rian Yanꞌanj xiꞌí ni únj, ni̱ hué daj nico ni ngüi̱ na̱gaꞌuiꞌ si guruhua Yanꞌanj xiꞌí si sa̱ꞌ nahuin raꞌa ni únj, gui̱ꞌyaj Yanꞌanj.

Por qué Pablo pospuso su visita a Corinto

¹²Ni̱ hua ꞌngo̱ nuguanꞌ sa̱ꞌ ꞌyaj sisi̱ huin nia̱ꞌ ruhua únj. Daj si sé si digyaꞌ yunꞌunj únj ni ngüi̱ mánj. Ni̱ niꞌi únj sisi̱ xacaj únj ꞌngo̱ chrej sa̱ꞌ chruhua xungüi̱ nan. Ni̱ hué daj guiꞌyaj únj rian án re̱ꞌ nej. Ni̱ sé daj ꞌyaj únj xiꞌí si niꞌi sa̱ꞌ únj. Sani̱ chracuij Yanꞌanj únj. Ni̱ xiꞌí daj guiꞌyaj sa̱ꞌ únj. ^13-14Ni̱ ni yanj aꞌníj únj huaj rian án re̱ꞌ, ni̱ nun garun únj ni nuguanꞌ cu sisi̱ si̱ gaꞌue ga̱ya á re̱ꞌ, asi̱ si̱ gaꞌue gu̱nun a ni é re̱ꞌ nej. Ni̱ huin ruhuāj sisi̱ gu̱nun sa̱ꞌ ni é re̱ꞌ daranꞌanj da̱j rúnꞌ gunun sa̱ꞌ ni é re̱ꞌ daꞌaj ni nuguanꞌ garun únj rian án re̱ꞌ. Hué dan ni̱ güi ngaa na̱nicaj Señor Jesús, ni̱ ga̱huin nia̱ꞌ ruhua ni é re̱ꞌ xiꞌí únj. Ni̱ hué daj ga̱huin nia̱ꞌ ruhua únj xiꞌí a ni é re̱ꞌ nej.

¹⁵Ni̱ xiꞌí si gahuin yya ruhuāj sisi̱ hué daj gui̱ꞌyaj ni é re̱ꞌ, ngaa ni̱ gani ruhuāj sisi̱ gu̱chiꞌ niꞌyā sini rian ma̱n án re̱ꞌ. Ngaa ni̱ gui̱sij hui̱j gu̱chiꞌ niꞌyā rian ma̱n án re̱ꞌ xiꞌí si huin ruhuāj ga̱huin nia̱ꞌ ruhua ni é re̱ꞌ. ¹⁶Hué dan ni̱ gani ruhuāj sisi̱ gu̱chiꞌ ni̱ꞌyaj sinīj rian ma̱n án re̱ꞌ. Asíj ni̱ ga̱chīnj chrej Macedonia ga̱nꞌān. Ngaa ni̱ na̱nicaj ru̱huaꞌ yūnj gu̱chiꞌ ni̱ꞌyā rian ma̱n án re̱ꞌ. Ngaa ni̱ ga̱ꞌue chra̱cuij ni é re̱ꞌ manꞌānj ngaa ga̱nꞌān estado Judea.

¹⁷Ni̱ ngaa gatā gunun a ni é re̱ꞌ sisi̱ gu̱chiꞌ ni̱ꞌyā rian ma̱n án re̱ꞌ, ni̱ gani ruhua á re̱ꞌ sisi̱ sé si xa̱ngaꞌ si-nu̱guanꞌānj níꞌ. Ni̱ ani ruhua á re̱ꞌ sisi̱ ngaa huin ruhuāj ga̱hui ga̱nꞌān ꞌngo̱ yuꞌuj, ni̱ ani hui̱j ruhuāj da̱j rúnꞌ ꞌyaj ni ngüi̱ ma̱n chruhua xungüi̱ gaquinꞌ nan níꞌ. Sé daj huin mánj. ¹⁸Niꞌi Yanꞌanj sisi̱ ni̱ganj aꞌmi yya únj rian án re̱ꞌ. Ni̱ nitaj si ani hui̱j ruhua ni únj mánj. ¹⁹Ni̱ Jesucristo huin daꞌníj Yanꞌanj. Ni̱ gaꞌmī si-nu̱guanꞌ Jesucristo scanij ni é re̱ꞌ. Ni̱ hué daj guiꞌyaj nu̱ngüej tsínj gu̱ꞌnaj Silvano nga̱ Timoteo nej. Ni̱ nitaj si ani hui̱j ruhua Cristo mánj. Maan ni̱nanj nuguanꞌ xa̱ngaꞌ huin si-nu̱guanꞌ Jesucristo aj. ²⁰Ni̱ hua gaꞌi̱ nuguanꞌ guiꞌyaj yya Yanꞌanj nga̱ néꞌ. Ni̱ digyán Cristo sisi̱ hua yya ni nuguanꞌ daj. Ni̱ aꞌmi sa̱ꞌ néꞌ rian Yanꞌanj, ni̱ ataj néꞌ “Amén” xiꞌí Cristo Jesús. ²¹Ni̱ hué Yanꞌanj ꞌyaj sisi̱ ga̱ ni̱ca ruhua únj nga̱ á re̱ꞌ xiꞌí si-nu̱guanꞌ Cristo. Ni̱ garasu̱n Yanꞌanj únj si gui̱ꞌyaj sun únj si-sunj. ²²Ni̱ riqui Yanꞌanj sisi̱ ga̱huin yya ruhua néꞌ sisi̱ huin néꞌ daꞌníj Yanꞌanj. Ni̱ riqui Yanꞌanj Espíritu Santo gane niman néꞌ. Xiꞌí daj ni̱ ga̱huin yya ruhua néꞌ sisi̱ da ru̱cu, ni̱ na̱huin raꞌa néꞌ nico nuguanꞌ sa̱ꞌ, gui̱ꞌyaj Yanꞌanj.

²³Ni̱ sisi̱ nun gahuin ga̱nꞌān xumanꞌ Corinto da̱j rúnꞌ gani ruhuāj, ni̱ niꞌi Yanꞌanj sisi̱ hué daj guiꞌyā xiꞌí si nun ga̱ꞌuej ruhuāj gu̱chīj chranꞌānj a ni é re̱ꞌ. ²⁴Ni̱ sé si huin ruhua únj gu̱chiꞌ únj ga̱taj únj gu̱nun a ni é re̱ꞌ da̱j gu̱xuman ruhua á re̱ꞌ niꞌyaj á re̱ꞌ Yanꞌanj mánj. Daj si hua ni̱ca ruhua á re̱ꞌ xiꞌí si xuman ruhua á re̱ꞌ si-nu̱guanꞌ Yanꞌanj. Maan si huin ruhua únj sisi̱ gui̱ꞌyaj sun nu̱guanꞌan néꞌ. Ngaa ni̱ ga̱huin nia̱ꞌ ruhua á re̱ꞌ, gui̱ꞌyaj únj, ruhua únj.

¹Xiꞌí daj ni̱ nitaj si gahuin ruhuāj gu̱chiꞌ ru̱huaꞌ yūnj rian ma̱n án re̱ꞌ sisi̱ ga̱nani ruhua á re̱ꞌ, gui̱ꞌyā. ²Ni̱ sisi̱ na̱ni ruhua á re̱ꞌ, gui̱ꞌyā, ngaa ni̱ u̱n tsínj ga̱ꞌue gui̱ꞌyaj sisi̱ na̱huin nia̱ꞌ ruhuāj únj. Urin ni é re̱ꞌ ga̱ꞌue gui̱ꞌyaj si na̱huin nia̱ꞌ ruhuāj. ³Ni̱ hué daj garūnj nuguanꞌ daj gaꞌnī huaj rian án re̱ꞌ. Daj si nun gahuin ruhuāj ga̱nꞌān rian ma̱n án re̱ꞌ sisi̱ ga̱nani ruhuāj, gui̱ꞌyaj á re̱ꞌ. Daj si hua nia̱n si ga̱huin nia̱ꞌ ruhua á re̱ꞌ da̱j rúnꞌ huin nia̱ꞌ ruhuāj. ⁴Ni̱ ngaa guiꞌyā yanj daj, ni̱ gahuin guitsi ruhuāj xiꞌí ni é re̱ꞌ. Ni̱ ducu nani ruhuāj nej. Ni̱ da gacōj xiꞌí a ni é re̱ꞌ. Sani̱ sé si guiꞌyā yanj daj sisi̱ ga̱nani ruhua á re̱ꞌ. Sani̱ huin ruhuāj gui̱niꞌi a ni é re̱ꞌ sisi̱ ni̱nꞌ ruhua ꞌi̱ ruhuāj niꞌyā á re̱ꞌ.

Pablo perdona al ofensor

⁵Ni̱ sisi̱ nani ruhua manꞌānj xiꞌí si guiꞌyaj ꞌngo̱ tsínj daj, ni̱ sé urin manꞌānj nani ruhuāj mánj. Sani̱ nani ruhua daranꞌ ni é re̱ꞌ, guiꞌyaj sij nej. Ni̱ sé daranꞌ ni é re̱ꞌ nani ruhua si ruhuaj. (Nitaj si huin ruhuāj sisi̱ gu̱tāj chra̱ nuguanꞌ ga̱ꞌmī rian ni é re̱ꞌ mánj.) ⁶Ni̱ hua gahuin nico castigo guiranꞌ tsínj guiꞌyaj gaquinꞌ daj, guiꞌyaj gaꞌi̱ ni é re̱ꞌ. Ni̱ nitaj si gui̱ꞌyā si gui̱ranꞌ sij doj. ⁷Yya̱j ni̱ sa̱ꞌ huin sisi̱ gui̱nicaj ni é re̱ꞌ ꞌngo̱ niman nico nga̱ sij. Ni̱ chra̱cuij a ni é re̱ꞌ sij, sisi̱ na̱huin nia̱ꞌ ruhua sij. Daj si si ruhuaj, ni̱ gui̱nichre sij xiꞌí si ducu nani ruhua sij. ⁸Hué dan ni̱ achínj jniꞌyā rian án re̱ꞌ sisi̱ ꞌueé gui̱ꞌyaj ru̱huaꞌ yún a ni é re̱ꞌ nga̱ sij, sisi̱ hua yya ꞌi̱ ruhua á re̱ꞌ niꞌyaj á re̱ꞌ sij. ⁹Ni̱ asi̱j sini, ni̱ guiꞌyā ꞌngo̱ yanj gaꞌnī huaj rian án re̱ꞌ xiꞌí nuguanꞌ nan. Ni̱ gahuin ruhuāj gui̱niꞌīnj da̱j gui̱ꞌyaj á re̱ꞌ, sisi̱ da̱gahuin ni é re̱ꞌ si-nu̱guanꞌānj. ¹⁰Ngaa ni̱ sisi̱ ga̱ꞌue gui̱nicaj á re̱ꞌ ꞌngo̱ niman nico xiꞌí ꞌngo̱ tsínj daj, ni̱ hué daj gui̱nicaj manꞌānj ꞌngo̱ niman nico xiꞌí sij nej. Ni̱ sisi̱ hua nia̱n gui̱nicā ꞌngo̱ niman nico xiꞌí ꞌngo̱ gaquinꞌ daj, ni̱ hué daj ꞌyā xiꞌí ni é re̱ꞌ. Ni̱ niꞌyaj Cristo da̱j guiꞌyā nej. ¹¹Ngaa ni̱ si̱ guiꞌyaj gana sichre rian néꞌ. Daj si niꞌi sa̱ꞌ néꞌ da̱j huin ruhua sichre di̱gyaꞌ yunꞌun néꞌ.

Ansiedad de Pablo en Troas

¹²Ngaa ganꞌān xumanꞌ gu̱ꞌnaj Troas gaꞌmī si-nu̱guanꞌ Cristo rian ni ngüi̱, ni̱ gunun sa̱ꞌ ni ngüi̱ si-nu̱guanꞌānj, guiꞌyaj Señor. ¹³Sani̱ nitaj si hua nia̱ꞌ ruhuāj si naꞌue na̱riꞌīj jna̱nj néꞌ Tito. Hué dan ni̱ gatā gunun ni sij sisi̱ ga̱nꞌān. Ni̱ ganꞌān estado Macedonia.

Triunfantes en Cristo

¹⁴Sani̱ ga̱ꞌuiꞌ néꞌ si guruhua Yanꞌanj sisi̱ nico̱ꞌ huaj guiꞌyaj gana néꞌ rian sichre xiꞌí Cristo Jesús. Xiꞌí néꞌ ni̱ ꞌyaj Yanꞌanj sisi̱ gui̱niꞌi ni ngüi̱ da̱j hua Yanꞌanj. Ni̱ ni̱nꞌ ga̱chraꞌ gaxaꞌni̱ nuguanꞌ sa̱ꞌ daj gunun ni ngüi̱, ꞌyaj néꞌ. Ni̱ da̱j rúnꞌ guinꞌ da̱j ni yaj, ni̱ hué daj ꞌyaj néꞌ nga̱ si-nu̱guanꞌ Yanꞌanj. ¹⁵Hué dan ni̱ da̱j rúnꞌ guinꞌ da̱j ꞌngo̱ ni rasu̱n, ni̱ hué daj guinꞌ sa̱ꞌ néꞌ rian Yanꞌanj xiꞌí Cristo. Ni̱ uchrunj ni ngüi̱ na̱caj Yanꞌanj nuguanꞌ unun ni sij. Ni̱ uchrunj ni ngüi̱ ga̱nꞌanj niꞌya nej. ¹⁶Ni̱ ngaa gu̱nun ni ngüi̱ ga̱nꞌanj niꞌya daj, ni̱ xa̱caj ni sij cuenta sisi̱ ga̱nꞌanj niꞌya ni̱ganj ni sij, gui̱ꞌyaj nuguanꞌ sa̱ꞌ daj. Sani̱ ngaa gu̱nun ni ngüi̱ nacaj Yanꞌanj, ni xa̱caj ni sij cuenta sisi̱ ga̱ ni̱ꞌnaꞌ ni̱ganj ni sij, gui̱ꞌyaj nuguanꞌ daj. Sani̱ u̱n tsínj ga̱ꞌue gui̱ꞌyaj nan, ruhua á re̱ꞌ únj. ¹⁷Sé si chrej únj ꞌyaj gana únj sanꞌanj xiꞌí si-nu̱guanꞌ Yanꞌanj da̱j rúnꞌ ꞌyaj ango ni tsínj mánj. Sani̱ rian Yanꞌanj, ni̱ nitaj si digyaꞌ yunꞌunj únj ngaa aꞌmi únj si-nu̱guanꞌ Yanꞌanj mánj. Daj si gaꞌníj Yanꞌanj sisi̱ ga̱nꞌanj ga̱ꞌmi únj nuguanꞌ sa̱ꞌ rian ni ngüi̱. Ni̱ nicaj dugüiꞌ únj nga̱ Cristo.

Ministros del nuevo pacto

¹Ni̱ ngaa hué daj aꞌmi únj, ni̱ axi̱ꞌi ru̱huaꞌ yún únj gaꞌmi sa̱ꞌ únj xiꞌí manꞌan únj, ruhua á re̱ꞌ níꞌ. Ni̱ hua nia̱n si ri̱qui únj ꞌngo̱ yanj carta aꞌmi sa̱ꞌ xiꞌí únj rian án re̱ꞌ níꞌ. Asi̱ ga̱chinj únj ꞌngo̱ yanj carta aꞌmi sa̱ꞌ xiꞌí únj rian án re̱ꞌ da̱j rúnꞌ ꞌyaj go̱ꞌngo ni sij, ruhua á re̱ꞌ sa̱ꞌ. Sé daj huin mánj. ²Urin yanj carta aꞌmi sa̱ꞌ xiꞌí únj huin a ni é re̱ꞌ. Hué dan ni̱ niꞌi daranꞌ ni ngüi̱ sisi̱ ꞌi̱ ruhua únj niꞌyaj únj a ni é re̱ꞌ. Ni̱ xiꞌí daj ga̱ꞌue xa̱caj ni sij cuenta da̱j hua niman únj. ³Ni̱ niꞌi néꞌ sisi̱ hué ni é re̱ꞌ huin ꞌngo̱ yanj carta hua ni̱ca garun únj, guiꞌyaj Cristo. Ni̱ nagaꞌuiꞌ ni únj rian ni ngüi̱. Sani̱ nun garun únj yanj daj nga̱ tinta mánj. Sani̱ Espíritu Santo nne chruhua niman ni é re̱ꞌ guiꞌya. Ni̱ nun garun únj rian yej hua ga̱raꞌ rian. Sani̱ garun únj nuguanꞌ daj rian niman ni ngüi̱, guiꞌyaj Yanꞌanj.

⁴Ni̱ gahuin yya ruhua únj nga̱ nuguanꞌ daj xiꞌí si xuman ruhua únj niꞌyaj únj Cristo, guiꞌyaj Yanꞌanj. ⁵Nitaj si ruhuāj ga̱tā sisi̱ gahuin nucuaj únj gui̱ꞌyaj sun únj si-sun Yanꞌanj nga̱ si-fuerza manꞌan únj mánj. Sani̱ manꞌan Yanꞌanj ꞌyaj sisi̱ nucuaj únj gui̱ꞌyaj sun únj. ⁶Ni̱ hua ꞌngo̱ nuguanꞌ na̱ca naguiꞌyaj Yanꞌanj nga̱ ni ngüi̱. Ni̱ guiꞌyaj Yanꞌanj sisi̱ huin nucuaj únj ga̱ꞌmi únj nuguanꞌ na̱ca daj rian ni ngüi̱. Ni̱ sé si hua ni̱ca nuguanꞌ daj rian yanj. Sani̱ nuguanꞌ daj unun néꞌ, ꞌyaj Espíritu Santo. Daj si nuguanꞌ nu̱n rian yanj ꞌyaj sisi̱ ga̱huiꞌ niman néꞌ. Sani̱ nuguanꞌ na̱ca riqui Espíritu Santo rian néꞌ ꞌyaj sisi̱ ga̱ ni̱ꞌnaꞌ ni̱ganj niman néꞌ ga̱ne néꞌ nga̱ Yanꞌanj.

⁷Ni̱ garun Moisés ley daj rian yej ga̱raꞌ rian, guiꞌyaj Yanꞌanj. Sani̱ ngaa nicaj Moisés yej garun sij ley daj ganꞌanj sij, ni̱ ni̱nꞌ ruhua guixigui̱n rian sij. Ni̱ daꞌ nun gunucuaj ni ngüi̱ guiniꞌyaj ni síꞌ rian sij. Ni̱ ley daj ꞌyaj sisi̱ ga̱huiꞌ niman ni ngüi̱. ⁸Ni̱ sisi̱ hua sa̱ꞌ do̱j ley daj, sani̱ ni̱nꞌ ruhua hua sa̱ꞌ nuguanꞌ na̱ca ꞌna̱ꞌ rian Espíritu Santo aꞌmi ni únj. ⁹Ni̱ huin ruhuaj gata sisi̱ hua sa̱ꞌ ley ꞌyaj sisi̱ ga̱huin castigo ni ngüi̱. Sani̱ ni̱nꞌ ruhua hua sa̱ꞌ nuguanꞌ aꞌmi ni únj huin nuguanꞌ ataj sisi̱ nitaj si daꞌui néꞌ gaquinꞌ rian Yanꞌanj mánj. ¹⁰Hua sa̱ꞌ ley riqui Yanꞌanj rian Moisés. Sani̱ nitaj si hua sa̱ꞌ da̱j rúnꞌ hua sa̱ꞌ nuguanꞌ na̱ca riqui Yanꞌanj rian néꞌ. ¹¹Hua sa̱ꞌ si-ley Moisés, sani̱ si̱ guisi ga̱ ni̱gan da̱j rúnꞌ hua sa̱ꞌ ni̱ganj ni̱nꞌ nuguanꞌ na̱ca riqui Yanꞌanj rian néꞌ.

¹²Ni̱ xiꞌí si anaꞌuij únj sisi̱ ni̱ganj gui̱ꞌyaj sa̱ꞌ Yanꞌanj nga̱ únj, ni̱ huin nucuaj niman únj gaꞌmi únj si-nu̱guanꞌ Yanꞌanj rian ni ngüi̱. ¹³Nitaj si ꞌyaj únj da̱j rúnꞌ guiꞌyaj Moisés ngaa guirán sij ꞌngo̱ atsij rian sij sisi̱ si̱ guiniꞌi ni ngüi̱ israelita ngaa huaj guinaꞌaj si xigui̱n rian sij daj. ¹⁴Sani̱ nun gara daꞌngaꞌ ruhua ni ngüi̱ sisi̱ ganiquinꞌ si xigui̱n rian Moisés. Ni̱ da yya̱j ngaa aya ni sij si-ley Moisés, ni̱ naꞌue ga̱ra daꞌngaꞌ ruhua ni sij. Daj si nun gahuin xiꞌne atsij daj. Urin Cristo gui̱ꞌyaj si xi̱ꞌne atsij daj ga̱ra daꞌngaꞌ ruhua ni sij. ¹⁵Da yya̱j ngaa aya ni sij ni libro garun Moisés, ni̱ da̱j rúnꞌ ránj ꞌngo̱ atsij niman ni sij. Ni̱ naꞌue ga̱ra daꞌngaꞌ ruhua ni sij mánj. ¹⁶Sani̱ ngaa na̱nicaj ruhua ꞌngo̱ tsínj daj na̱nicoꞌ sij rian Señor, ngaa ni̱ xiꞌne atsij daj. Ni̱ ga̱ꞌue ga̱ra daꞌngaꞌ ruhua sij aj. ¹⁷Ni̱ Señor huin Espíritu Santo. Ni̱ ri̱an nne Espíritu Santo, ni̱ hua níꞌnij rian ni ngüi̱ xa̱caj ni sij daranꞌ chrej sa̱ꞌ. ¹⁸Yya̱j ni̱ guixiꞌnej atsij hua ránj rian néꞌ. Ni̱ huin daranꞌ néꞌ da̱j rúnꞌ huin ꞌngo̱ nnee guꞌndiꞌ ran sa̱ꞌ xiꞌí si niꞌyaj néꞌ da̱j hua ꞌueé rian Señor. Ni̱ riúnꞌ gui̱niꞌi ni ngüi̱ da̱j hua ꞌueé Señor. Ngaa ni̱ hua gui̱sij néꞌ ga̱huin sa̱ꞌ néꞌ da̱j rúnꞌ hua Cristo. Ni̱ da yunꞌyun huin ꞌueé néꞌ da̱j rúnꞌ huin Señor. Ni̱ hué daj ga̱huin néꞌ ꞌyaj Señor huin Espíritu Santo.

¹Hué dan ni̱ nun guinij ruhua únj nga̱ sun garasu̱n Yanꞌanj únj gaꞌmi únj nuguanꞌ sa̱ꞌ rian ni ngüi̱. Daj si nahuin ꞌi̱ ruhua Yanꞌanj niꞌya únj. ²Nitaj si diguij únj nga̱ ni nuguanꞌ hua na̱ꞌaj ꞌyaj hui̱ ni ngüi̱ mánj. Ni̱ sé si chéj únj digyaꞌ yunꞌunj únj ni ngüi̱. Ni̱ nitaj si naduna únj si-nu̱guanꞌ Yanꞌanj aꞌmi únj. Sani̱ urin si aꞌmi únj huin nuguanꞌ xa̱ngaꞌ. Hué dan ni̱ niꞌi daranꞌ ni ngüi̱ sisi̱ hua yya nuguanꞌ aꞌmi ni únj. Ni̱ niꞌi Yanꞌanj daranꞌ si aꞌmi únj. ³Ni̱ sisi̱ naꞌue ga̱ra daꞌngaꞌ ruhua ni ngüi̱ nga̱ nuguanꞌ sa̱ꞌ aꞌmi únj, ni̱ huin ruhuaj gata sisi̱ ni ngüi̱ ga̱ niꞌya huin ni sij. ⁴Ni̱ xiꞌí si naꞌuej gu̱xuman ruhua ni sij, ni̱ guiránj chraquij ni sij. Ni̱ naꞌue ga̱ra daꞌngaꞌ ruhua ni sij, guiꞌyaj sichre nicaj sun rian ni sij. Ngaa ni̱ naꞌue gui̱xiguin yanꞌa̱n chruhua niman ni sij. Ni̱ yanꞌa̱n xigui̱n daj huin nuguanꞌ sa̱ꞌ xiꞌí si hua ꞌueé Cristo. Ni̱ hué Cristo digyán da̱j hua Yanꞌanj guiniꞌi néꞌ.

⁵Sé si aꞌmi únj xiꞌí manꞌan únj. Sani̱ aꞌmi únj sisi̱ Jesús huin Señor. Ni̱ huin únj ni tsínj unánj guitsi rian ni é re̱ꞌ xiꞌí si ꞌi̱ ruhua Jesús niꞌyaj sij únj. ⁶Ni̱ asi̱j sini ya̱n, ni̱ gaꞌninꞌ Yanꞌanj sun sisi̱ gui̱xiguin yanꞌa̱n rian hua ru̱miꞌ. Ngaa ni̱ guixigui̱n rian xungüi̱ nan. Ni̱ yya̱j ni̱ guixigui̱n yanꞌa̱n chruhua niman néꞌ, guiꞌyaj Yanꞌanj nej. Ni̱ yanꞌa̱n daj ꞌyaj, ni̱ gui̱niꞌi néꞌ da̱j hua sa̱ꞌ ꞌueé nne Yanꞌanj. Ni̱ xigui̱n sa̱ꞌ Yanꞌanj rian Jesucristo guiniꞌi néꞌ.

Viviendo por la fe

⁷Ni̱ xigui̱n sa̱ꞌ yanꞌa̱n daj chruhua niman únj. Ni̱ hua ꞌueé ni̱nꞌ yanꞌa̱n daj. Sani̱ da̱j rúnꞌ huin ꞌngo̱ chruj yoꞌój niqui huin únj. Ngaa ni̱ gui̱niꞌi ni ngüi̱ sisi̱ nucuaj nuguanꞌ aꞌmi únj. Sani̱ nucuaj nuguanꞌ daj xiꞌí si ꞌna̱ꞌ rian Yanꞌanj. Ni̱ sé si-nu̱guanꞌ únj huin mánj. ⁸Ni̱ nu̱nj si nico sayun ranꞌ únj, sani̱ xa̱ngaꞌ sisi̱ ga̱ꞌue ga̱chin únj rian ni sayun daj. Ni̱ nun xugüi ruhua únj si gui̱ꞌyaj únj, sani̱ anaꞌuij únj sisi̱ gui̱ꞌyaj sa̱ꞌ Yanꞌanj nga̱ únj. ⁹Nicoꞌ ni̱nꞌ ruhua ni ngüi̱ únj xiꞌí si huin ruhua ni sij ga̱ꞌuiꞌ ni sij únj, sani̱ nitaj si duna Yanꞌanj únj mánj. Ni̱ nu̱nj sij chráj raꞌa ni ngüi̱ únj rian yoꞌój, sani̱ nun gahuiꞌ únj mánj. ¹⁰Ni̱ a̱ ga̱huin ga̱nꞌanj únj, ni̱ niꞌi únj sisi̱ ga̱ꞌue ga̱huiꞌ únj da̱j rúnꞌ gahuiꞌ Jesús. Sani̱ ga̱ꞌue gui̱niꞌi ni ngüi̱ sisi̱ hua ni̱ꞌnaꞌ Jesús nne sij chruhua niman únj. ¹¹Hué dan ni̱ ngaa mán únj, ni̱ ni̱ganj niꞌi únj sisi̱ ga̱ꞌue ga̱huiꞌ únj xiꞌí si nicoꞌ únj Cristo. Ni̱ ranꞌ únj sayun daj sisi̱ gui̱niꞌi ni ngüi̱ sisi̱ hua ni̱ꞌnaꞌ Jesús nne sij nga̱ ni únj. ¹²Ni̱ niꞌi únj sisi̱ ga̱ꞌue ga̱huiꞌ únj. Ni̱ xiꞌí si hué daj huin, ni̱ hua ni̱ꞌnaꞌ niman ni é re̱ꞌ. ¹³Gaꞌmi ꞌngo̱ tsínj gane asi̱j ná rian si-nu̱guanꞌ Yanꞌanj. Ni̱ gataj sij:

Guxuman ruhuāj niꞌyā Yanꞌanj.

Ni̱ xiꞌí daj gaꞌmī xiꞌí Yanꞌanj.

Hué daj gataj ꞌngo̱ tsínj gane asi̱j ná.

Ni̱ hué ducuánj daj huin sisi̱ xuman ruhua únj niꞌyaj únj Yanꞌanj. Ni̱ xiꞌí daj aꞌmi únj xiꞌí Yanꞌanj nej. ¹⁴Daj si niꞌi néꞌ sisi̱ ganáꞌnij Señor Jesús scanij ni níman, guiꞌyaj Yanꞌanj. Ni̱ xiꞌí daj ga̱naꞌnij manꞌan únj nga̱ Jesús, gui̱ꞌyaj Yanꞌanj. Ngaa ni̱ gui̱nicaj Jesús ga̱nꞌanj nu̱guanꞌan ni únj nga̱ á re̱ꞌ rian Yanꞌanj. ¹⁵Ni̱ ranꞌ únj ni sayun nan xiꞌí si ga̱ꞌue gui̱man sa̱ꞌ á re̱ꞌ, ruhua únj. Ni̱ ngaa ga̱huin nico doj ni ngüi̱ nicaj sinduj, gui̱ꞌyaj Yanꞌanj, ni̱ ga̱huin nico doj néꞌ si aꞌuiꞌ si guruhua Yanꞌanj nej. Ni̱ ga̱huin nico doj néꞌ ga̱taj sisi̱ hua sa̱ꞌ ꞌyaj Yanꞌanj.

¹⁶Xiꞌí daj nun ga̱ꞌninꞌ ruhua únj mánj. Ni̱ nu̱nj si huaj gachij nnee̱ cúj únj, sani̱ yaꞌyoj huaj ga̱huin ran niman únj. ¹⁷Do̱j huin sayun ranꞌ néꞌ chruhua xungüi̱ nan. Ni̱ yoo̱ na̱huij ni sayun daj. Sani̱ ni sayun daj ꞌyaj sisi̱ ga̱huin sa̱ꞌ ꞌueé rian néꞌ ngaa ga̱ne ni̱ganj néꞌ nga̱ Yanꞌanj ango xungüi̱ ga̱ꞌnaꞌ. ¹⁸Ni̱ nitaj si huin ruhua únj nga̱ ni rasu̱n rugüiꞌ niꞌyaj únj. Sani̱ huin ruhua únj nga̱ ni rasu̱n nun rugüiꞌ niꞌyaj únj. Daj si ni rasu̱n rugüiꞌ daj, ni̱ si̱ guisi ga̱ ni̱gan. Sani̱ ni rasu̱n nun rugüiꞌ huin ni rasu̱n gui̱man ni̱ganj ni̱nꞌ.

¹Hué dan ni̱ niꞌi únj sisi̱ da̱j rúnꞌ huin ꞌngo̱ hueꞌ atsij nun síj ga̱ne, ni̱ hué daj huin nnee̱ cúj únj chruhua xungüi̱ nan. Ni̱ niꞌi únj sisi̱ ga̱huiꞌ nnee̱ cúj únj huin hueꞌ daj. Sani̱ hua guiꞌyaj xugüi Yanꞌanj ango hueꞌ rian ga̱ne ni̱ganj únj xataꞌ huin ꞌngo̱ nnee̱ cúj na̱ca. Ni̱ sé hueꞌ ꞌyaj raꞌa ni tsínj huin mánj. ²Xiꞌí daj ni̱ uchej únj ꞌyaj hueꞌ gue̱reꞌ daj huin nnee̱ cúj únj. Daj si huin ruhua únj na̱duna únj ango hueꞌ na̱ca ga̱ne únj xataꞌ. ³Ni̱ hueꞌ na̱ca daj ga̱huin da̱j rúnꞌ huin ꞌngo̱ atsij sa̱ꞌ gu̱nun nnee̱ cúj únj, sisi̱ si̱ ga nne̱ únj mánj.

⁴Ni̱ ngaa nne únj hueꞌ gue̱reꞌ nan, ni̱ ducu uchej únj nga̱ nnee̱ cúj únj. Daj si naꞌuej ruhua únj sisi̱ ga̱ nne̱ únj. Sani̱ huin ruhua únj gu̱nun únj ꞌngo̱ atsij na̱ca sa̱ꞌ huin ꞌngo̱ nnee̱ cúj na̱ca. Ngaa ni̱ nnee̱ cúj únj gue̱reꞌ nan na̱huin na̱ca ga̱ne ni̱ganj nga̱ Yanꞌanj. ⁵Ni̱ Yanꞌanj guiꞌyaj xugüi únj sisi̱ ga̱ꞌue ga̱huin na̱ca nnee̱ cúj únj. Ni̱ riqui Yanꞌanj Espíritu Santo ga̱ne nga̱ únj. Ni̱ xiꞌí daj ga̱huin yya ruhua únj sisi̱ ga̱huin na̱ca únj. ⁶Hué daj ni̱ ni̱ganj hua nucuaj niman únj. Ni̱ ngaa nne únj nga̱ nnee̱ cúj únj, ni̱ huin ruhuaj gata sisi̱ achin ga̱nꞌanj ga̱ne únj nga̱ Señor. ⁷(Yya̱j ni̱ naꞌue gui̱niꞌi únj Señor. Sani̱ xiꞌí si xuman ruhua únj niꞌyaj únj Señor, ni̱ niꞌi únj sisi̱ hua yya nuguanꞌ gataj sij rian únj.) ⁸Sani̱ hua nucuaj niman únj nga̱ si-chrej Yanꞌanj. Ni̱ huin ruhua únj sisi̱ du̱na únj nnee̱ cúj únj nan, ni̱ ga̱nꞌanj ga̱ne únj nga̱ Señor.

⁹Xiꞌí daj ni̱ ni̱ganj ꞌyaj únj si aranꞌ ruhua Señor. Hué si ga̱huiꞌ únj si ga̱ne únj, sani̱ ꞌyaj únj si aranꞌ ruhua Señor. ¹⁰Daj si hua nia̱n si gui̱niquinꞌ darúnꞌ rian Cristo ngaa na̱guiꞌyaj yya sij si-ga̱quinꞌ ni ngüi̱. Ni̱ na̱ruꞌue Cristo rian néꞌ xiꞌí si guiꞌyaj néꞌ ngaa hua ni̱ꞌnaꞌ néꞌ chruhua xungüi̱ nan. Ni̱ sisi̱ sa̱ꞌ guiꞌyaj néꞌ, ni̱ sa̱ꞌ na̱ruꞌue Cristo rian néꞌ. Ni̱ sisi̱ quij guiꞌyaj néꞌ, ni̱ quij na̱ruꞌue Cristo rian néꞌ.

El ministerio de la reconciliación

¹¹Xiꞌí si na̱guiꞌyaj yya Señor si-ga̱quinꞌ ni ngüi̱, ni̱ ꞌyaj fuerza únj sisi̱ na̱nicaj ruhua ni ngüi̱ nga̱ si-ga̱quinꞌ ni sij. Ni̱ niꞌi sa̱ꞌ Yanꞌanj da̱j hua niman únj. Ni̱ huin ruhuāj sisi̱ gui̱niꞌi ni é re̱ꞌ da̱j hua niman únj nej. ¹²Nitaj si huin ruhua únj ga̱ꞌmi sa̱ꞌ ru̱huaꞌ yún únj xiꞌí ni manꞌan únj. Maan si huin ruhua únj sisi̱ ga̱huin nia̱ꞌ ruhua ni é re̱ꞌ nga̱ únj. Ngaa ni̱ ga̱ꞌue da̱nicaj ni é re̱ꞌ ꞌngo̱ nuguanꞌ rian ni tsínj nahuij ruhua sisi̱ ga̱huin achij ni sij, ruhua ni sij. Ni̱ nitaj si nahuij ruhua ni sij da̱j hua niman ni sij. ¹³Ni̱ sisi̱ sinúnj únj, ruhua ni sij, ni̱ hué daj huin únj xiꞌí si nicoꞌ únj Yanꞌanj. Ni̱ sisi̱ nitaj sinúnj únj, ni̱ hué daj huin únj xiꞌí si huin ruhua únj sisi̱ ga̱hui sa̱ꞌ ni é re̱ꞌ.

¹⁴Ni̱ xiꞌí si ꞌi̱ ruhua Cristo niꞌyaj sij néꞌ, ni̱ huin ruhua únj da̱gahuin únj nuguanꞌ aꞌninꞌ Cristo sun rian únj. Ni̱ gahuin yya ruhua únj sisi̱ gahuiꞌ urin sij xiꞌí daranꞌ ni ngüi̱. Ni̱ xiꞌí si gahuiꞌ Cristo, ni̱ gahuiꞌ nu̱guanꞌan daranꞌ néꞌ nga̱ sij. ¹⁵Ni̱ gahuiꞌ Cristo xiꞌí daranꞌ ni ngüi̱ sisi̱ ngaa mán ni sij, ni̱ si̱ gachej ni sij si-chrej manꞌan ni sij. Sani̱ ga̱che ni sij si-chrej Cristo. Daj si gahuiꞌ Cristo, ni̱ ganáꞌnij sij xiꞌí ni sij.

¹⁶Xiꞌí daj asi̱j yya̱j, ni̱ si̱ gani ruhua únj xiꞌí ni ngüi̱ da̱j rúnꞌ rugüiꞌ nnee̱ cúj ni sij. Ni̱ nu̱nj si hué daj gani ruhua únj xiꞌí Cristo asi̱j sini, sani̱ yya̱j ni̱ sé daj ga̱ni ruhua únj xiꞌí sij mánj. ¹⁷Hué dan ni̱ sisi̱ nicaj dugüiꞌ ꞌngo̱ tsínj daj nga̱ Cristo, ni̱ hua ganahuin na̱ca niman sij. Nitaj si ꞌyaj sij da̱j rúnꞌ guiꞌyaj sini sij. Daj si ganahuin na̱ca daranꞌanj, guiꞌyaj Cristo.

¹⁸Ni̱ daranꞌ nan ꞌna̱ꞌ rian Yanꞌanj. Ni̱ xiꞌí Cristo, ni̱ guiꞌyaj Yanꞌanj sisi̱ ga̱huin nu̱guanꞌan néꞌ nga̱ Yanꞌanj. Ni̱ riqui Yanꞌanj sun rian únj sisi̱ ga̱ꞌmi únj nuguanꞌ sa̱ꞌ rian ni ngüi̱ sisi̱ ga̱ꞌue ga̱huin nu̱guanꞌan ni ngüi̱ nga̱ Yanꞌanj anj. ¹⁹Hué dan ni̱ xiꞌí si gane nu̱guanꞌan Yanꞌanj nga̱ Cristo, ni̱ guiꞌyaj Yanꞌanj sisi̱ ga̱huin nu̱guanꞌan néꞌ nga̱ Yanꞌanj. Ni̱ nitaj si xacaj Yanꞌanj cuenta nga̱ si-ga̱quinꞌ ni ngüi̱. Ni̱ riqui Yanꞌanj sisi̱ ga̱ꞌmi únj nuguanꞌ sa̱ꞌ daj rian ni ngüi̱.

²⁰Ngaa ni̱ hué únj huin tsínj ꞌna̱ꞌ aꞌmi si-nu̱guanꞌ Cristo rian ni ngüi̱. Ni̱ huin ruhuaj gata sisi̱ riqui Yanꞌanj nuguanꞌ ga̱ꞌmi únj xiꞌí manꞌan Yanꞌanj. Ngaa ni̱ achínj jniꞌyaj únj rian án re̱ꞌ nga̱ si-xugüi Cristo sisi̱ ga̱huin nu̱guanꞌan ni é re̱ꞌ nga̱ Yanꞌanj. ²¹Ni̱ a̱ ꞌngo̱ gaquinꞌ nun gui̱ꞌyaj Cristo. Sani̱ guiꞌyaj Yanꞌanj sisi̱ ga̱huin Cristo ꞌngo̱ tsínj daꞌui gaquinꞌ gahuiꞌ sij xiꞌí néꞌ. Ngaa ni̱ xiꞌí Cristo, ni̱ gahuin sa̱ꞌ niman néꞌ rian Yanꞌanj xiꞌí si nicaj dugüiꞌ néꞌ nga̱ sij.

¹Ngaa ni̱ nicaj dugüiꞌ únj ꞌyaj sun nu̱guanꞌan únj nga̱ Yanꞌanj. Ni̱ achínj jniꞌyaj únj rian án re̱ꞌ sisi̱ si̱ nahuin raꞌa yu̱n a ni é re̱ꞌ sinduj guiꞌyaj Yanꞌanj rian án re̱ꞌ mánj. ²Daj si nuguanꞌ nan huin nuguanꞌ gaꞌmi Yanꞌanj:

Gunūnj nuguanꞌ gachínj jniꞌyáj re̱ꞌ riānj ngaa huin ruhuāj gui̱ꞌyā sinduj rián re̱ꞌ.

Ni̱ chracuī manꞌán re̱ꞌ güi ngaa huin ruhuāj na̱cā ni ngüi̱.

Daj gataj Yanꞌanj asi̱j ná.

Hué dan ni̱ yya̱j huin güi huin ruhua Yanꞌanj gui̱ꞌya sinduj rian ni ngüi̱. Ni̱ yya̱j huin güi huin ruhua Yanꞌanj ga̱naca ni ngüi̱ nej.

³Ni̱ hua cuidado únj nga̱ si-chrej manꞌan únj. Daj si naꞌuej ruhua únj sisi̱ ga̱ꞌmi quij ni ngüi̱ nga̱ xiꞌí sun riqui Yanꞌanj rian únj. ⁴Ni̱ xiꞌí daranꞌ si ꞌyaj únj, ni̱ ga̱ꞌue xa̱caj á re̱ꞌ cuenta sisi̱ ꞌyaj sun únj si-sun Yanꞌanj. Ni̱ aꞌninꞌ ruhua únj nga̱ ni sayun ranꞌ únj. Ni̱ ngaa ꞌyaj sun únj, ni̱ achin rasu̱n rian únj. Ni̱ xuꞌuiꞌ niman únj. ⁵Ni̱ duguayun ni sij nneꞌ únj. Ni̱ arij ni sij ducuaga̱ꞌ únj. Ni̱ nahuin yuꞌ ni ngüi̱ aꞌmi huee ni sij rian únj. Ni̱ ꞌyaj sun nucuaj únj. Ni̱ hua güi nitaj si atoj únj nnej. Ni̱ hua güi nitaj si hua níꞌnij xa̱ únj nej. ⁶Sani̱ hua sa̱ꞌ si-chrej únj. Ni̱ niꞌi únj nuguanꞌ xa̱ngaꞌ nej. Ni̱ aꞌmi sa̱ꞌ únj rian ni ngüi̱. Ni̱ aꞌmi na̱j únj nej. Ni̱ nne Espíritu Santo chruhua niman únj nej. Ni̱ ꞌi̱ xa̱ngaꞌ ruhua unj niꞌyaj unj ni ngüi̱. ⁷Ni̱ aꞌmi únj nuguanꞌ xa̱ngaꞌ rian ni ngüi̱. Ni̱ Yanꞌanj ꞌyaj si nucuaj si-nu̱guanꞌ únj. Ni̱ ꞌyaj gana únj rian sichre xiꞌí si hua ni̱ca si-nu̱guanꞌ Yanꞌanj aꞌmi ni únj. ⁸Ni̱ ꞌngo̱ güi, ni̱ aꞌmi sa̱ꞌ ni sij xiꞌí únj. Ni̱ ango güi ni aꞌmi quij ni sij. Ni̱ ataj ni sij sisi̱ nuguanꞌ nne̱ aꞌmi únj. Sani̱ aꞌmi únj nuguanꞌ xa̱ngaꞌ. ⁹Ni̱ nu̱nj si niꞌi sa̱ꞌ ni ngüi̱ únj, sani̱ ꞌyaj ni sij sisi̱ nun niꞌi ni sij únj. Ni̱ ani ruhua únj sisi̱ ga̱huiꞌ únj. Sani̱ hua gue̱ mán únj. Ni̱ ni únj huin castigo ꞌyaj ni sij. Sani̱ sé si dagahuiꞌ ni sij únj mánj. ¹⁰Ni̱ nu̱nj si nani ruhua únj xiꞌí sayun ranꞌ únj, sani̱ ni̱ganj hua nia̱ꞌ ruhua únj rian Yanꞌanj. Ni̱ rúnꞌ huaj sisi̱ aco ranꞌ únj. Sani̱ nahuin raꞌa nico ni ngüi̱ sinduj, ꞌyaj únj. Rúnꞌ huaj sisi̱ ni̱ a̱ ꞌngo̱ ni rasu̱n nicaj únj. Sani̱ daranꞌanj nicaj únj.

¹¹Tsínj mán xumanꞌ Corinto huin a ni é re̱ꞌ. Ni̱ gaꞌmi re̱ngaꞌ únj rian án re̱ꞌ. Nun gari hui̱ únj a̱ ꞌngo̱ ni nuguanꞌ hui̱ chruhua niman únj ngaa gaꞌmi únj rian án re̱ꞌ mánj. ¹²Nitaj ni nuguanꞌ hui̱ nicaj únj xiꞌí ni é re̱ꞌ. Sani̱ nicaj ni é re̱ꞌ nuguanꞌ hui̱ xiꞌí únj. ¹³(Ni̱ da̱j rúnꞌ ꞌyaj ꞌngo̱ chrej néꞌ nga̱ daꞌníj sij, ni̱ hué daj huin ruhuāj niꞌyā á re̱ꞌ.) Xiꞌí daj ni̱ achínj jniꞌyā rian án re̱ꞌ sisi̱ ga̱ꞌmi re̱ngaꞌ ni é re̱ꞌ nga̱ únj da̱j rúnꞌ aꞌmi re̱ngaꞌ únj nga̱ á re̱ꞌ aj.

Somos templo del Dios viviente

¹⁴Ni̱ ngaa ni̱caj dugüiꞌ ni é re̱ꞌ nga̱ ni ngüi̱ nun xu̱man ruhua ni̱ꞌyaj Yanꞌanj, ni̱ si̱ guiꞌyaj á re̱ꞌ da̱j rúnꞌ ꞌyaj ni sij. Daj si nitaj si nicaj dugüiꞌ nuguanꞌ hua ni̱ca nga̱ nuguanꞌ nitaj si hua ni̱ca mánj. Nitaj si nicaj dugüiꞌ yanꞌa̱n nga̱ si ru̱miꞌ mánj. ¹⁵Ni̱ si̱ gaꞌue ga̱ni uyan ruhua Cristo nga̱ sichre. Ni̱ si̱ gaꞌue ga̱ni uyan ruhua ꞌngo̱ tsínj xuman ruhua niꞌyaj Yanꞌanj nga̱ ꞌngo̱ tsínj nun xu̱man ruhua mánj. ¹⁶Ni̱ huin néꞌ ni ngüi̱ nicoꞌ Yanꞌanj. Ni̱ nitaj si nicaj dugüiꞌ néꞌ nga̱ ni yanꞌanj ꞌyaj raꞌa ni ngüi̱. Daj si hué niman néꞌ huin si-nuhui Yanꞌanj xa̱ngaꞌ. Ni̱ hué daj gataj Yanꞌanj asi̱j ná:

Ga̱nēj scanij ni sij.

Ni̱ ga̱chē nga̱ ni sij.

Ni̱ huēj ga̱huin Danꞌanj ni sij.

Ni̱ ga̱huin ni sij ni ngüi̱ nicoꞌ manꞌānj.

Daj gataj Yanꞌanj xiꞌí néꞌ ni tsínj nicoꞌ Yanꞌanj.

¹⁷Ni̱ hué daj gataj Señor nej:

Ga̱hui ni é re̱ꞌ scanij ni tsínj xi̱ꞌi.

Ni̱ ga̱huin ni̱ni ni é re̱ꞌ nej.

Ni̱ si̱ gatsi ni é re̱ꞌ ni̱ a̱ ꞌngo̱ si quij mánj.

Ngaa ni̱ na̱huin raꞌāj ni é re̱ꞌ aj.

¹⁸Ni̱ ga̱huin chrej ni é re̱ꞌ manꞌānj.

Ni̱ ga̱huin daꞌni̱ snoꞌōj nga̱ daꞌni̱ xa̱nāj ni é re̱ꞌ.

Hué daj gataj Señor nicaj daranꞌ fuerza.

¹Hué dan ni̱ huin ín re̱ꞌ ni tsínj nicaj dugüiꞌ nga̱ únj. Ni̱ hué ni nuguanꞌ nan huin nuguanꞌ guiꞌyaj yya Yanꞌanj nga̱ néꞌ. Xiꞌí daj ni̱ ga̱ cuidado néꞌ sisi̱ si̱ guiꞌyaj néꞌ gaquinꞌ nga̱ nnee̱ cúj néꞌ nga̱ niman néꞌ nej. Ni̱ xiꞌí si nu̱n yanꞌanj néꞌ Yanꞌanj, ni̱ na̱guiꞌyaj sa̱ꞌ ni̱ganj néꞌ niman néꞌ.

Regocijo de Pablo al arrepentirse los corintios

²Huin ruhua únj sisi̱ gui̱nicaj dugüiꞌ ni é re̱ꞌ nga̱ únj. Ni̱ a̱ ꞌngo̱ ni é re̱ꞌ nun guiranꞌ sayun guiꞌyaj únj mánj. Ni̱ nun gui̱ꞌyaj xi̱ꞌi únj ni̱ a̱ ꞌngo̱ ni é re̱ꞌ mánj. Ni̱ nun digyaꞌ yunꞌunj únj ni̱ a̱ ꞌngo̱ ni é re̱ꞌ nej. ³Sé nuguanꞌ nan aꞌmī rian án re̱ꞌ sisi̱ ga̱ꞌmi gaquīnj rian án re̱ꞌ mánj. Daj si hua gatā gunun a ni é re̱ꞌ asi̱j sini sisi̱ ꞌi̱ ruhuāj niꞌyā ni é re̱ꞌ. Ni̱ ga̱ꞌuej ruhuāj sisi̱ gui̱man nu̱guanꞌan néꞌ. Ni̱ ga̱ꞌuej ruhuāj ga̱huiꞌ nu̱guanꞌan néꞌ. Sani̱ ꞌngo̱ ꞌi̱ ruhuāj niꞌyā a ni é re̱ꞌ. ⁴Ni̱ ani gue̱ ruhuāj sisi̱ gui̱ꞌyaj sa̱ꞌ ni é re̱ꞌ. Ni̱ xiꞌí ni é re̱ꞌ huin nia̱ꞌ ruhuāj. Ni̱ huin dinꞌinj ruhuāj xiꞌí a ni é re̱ꞌ. Ni̱ nu̱nj si ranꞌ únj nico sayun, sani̱ huin nia̱ꞌ ruhua únj.

⁵Ni̱ asi̱j ngaa guisíj únj estado Macedonia, ni̱ nitaj rian naránj ruhua únj mánj. Ni̱ ni̱nꞌ ga̱chraꞌ, ni̱ ranꞌ únj sayun achéj únj anj. Daj si chranꞌ yunꞌunj ni ngüi̱ únj. Ni̱ guxuꞌuiꞌ niman únj nej. ⁶Sani̱ Yanꞌanj ꞌyaj si na̱riꞌ nucuaj néꞌ ngaa nani ruhua néꞌ. Xiꞌí daj ni̱ guiꞌyaj Yanꞌanj sisi̱ ga̱ꞌnaꞌ tsínj gu̱ꞌnaj Tito rian únj. Ni̱ ganariꞌ ruhua únj, guiꞌyaj sij. ⁷Ni̱ sé urin si gaꞌna̱ꞌ Tito guiꞌyaj si nahuin nia̱ꞌ ruhua únj. Sani̱ nahuin nia̱ꞌ ruhua únj xiꞌí si huin nia̱ꞌ ruhua sij niꞌyaj sij ni é re̱ꞌ nej. Ni̱ nataꞌ sij rian únj sisi̱ ni̱nꞌ ruhua huin ruhua ni é re̱ꞌ gui̱niꞌi ru̱huaꞌ yún ni é re̱ꞌ únj. Ni̱ nataꞌ sij sisi̱ nani ruhua á re̱ꞌ xiꞌí gaquinꞌ daj. Ni̱ huin ruhua á re̱ꞌ xiꞌí únj. Ni̱ daranꞌ ni nuguanꞌ daj guiꞌyaj sisi̱ ducu gahuin nia̱ꞌ ruhuāj.

⁸Ni̱ nu̱nj si ganani ruhua ni é re̱ꞌ, guiꞌyaj yanj carta gaꞌnī huaj rian án re̱ꞌ, sani̱ nitaj si nanica̱j ruhuāj nga̱ si gatā gunun a ni é re̱ꞌ mánj. Daj xa̱ngaꞌ ni̱ asi̱j sini nanica̱j ruhuāj do̱j ngaa guiniꞌīnj sisi̱ do̱j gue̱ güi ganani ruhua á re̱ꞌ, guiꞌyaj yanj daj. ⁹Sani̱ yya̱j ni̱ huin nia̱ꞌ ruhuāj. Sé si huin nia̱ꞌ ruhuāj xiꞌí si ganani ruhua á re̱ꞌ. Sani̱ huin nia̱ꞌ ruhuāj xiꞌí si nanicoꞌ a ni é re̱ꞌ Yanꞌanj, guiꞌyaj si ganani ruhua á re̱ꞌ. Daj si garanꞌ ruhua Yanꞌanj ngaa gani ruhua á re̱ꞌ xiꞌí si-ga̱quinꞌ ni é re̱ꞌ. Hué dan ni̱ nitaj ꞌngo̱ xiꞌi̱ guiꞌyaj yanj daj, guiꞌyaj únj nga̱ ni é re̱ꞌ mánj. ¹⁰Ni̱ ngaa nani ruhua néꞌ xiꞌí si-ga̱quinꞌ néꞌ da̱j rúnꞌ huin ruhua Yanꞌanj gui̱ꞌyaj néꞌ, ni̱ na̱caj Yanꞌanj néꞌ xiꞌí si nanica̱j ruhua néꞌ. Ni̱ nitaj si huaj si ga̱ni ruhua néꞌ si nun gui̱ꞌyaj sa̱ꞌ néꞌ. Sani̱ sisi̱ ga̱nani ruhua néꞌ da̱j rúnꞌ nani ruhua ni ngüi̱ ma̱n chruhua xungüi̱, ni̱ ga̱huiꞌ néꞌ, guiꞌya. ¹¹Ni̱ ganani ruhua á re̱ꞌ xiꞌí gaquinꞌ daj da̱j rúnꞌ huin ruhua Yanꞌanj. Ni̱ niꞌi ni é re̱ꞌ yya̱j sisi̱ duguꞌna̱j guiꞌyaj Yanꞌanj nga̱ ni é re̱ꞌ. Daj si huin ruhua á re̱ꞌ gui̱ꞌyaj sa̱ꞌ ni é re̱ꞌ. Ni̱ gaꞌman ruhua á re̱ꞌ nga̱ gaquinꞌ daj. Ni̱ hué daj guxuꞌuiꞌ ni é re̱ꞌ niꞌyaj á re̱ꞌ xiꞌí gaquinꞌ daj. Ngaa síj ni̱ huin ruhua á re̱ꞌ gui̱niꞌyaj á re̱ꞌ manꞌānj. Ni̱ gaꞌuej a ni é re̱ꞌ sisi̱ ga̱huin castigo tsínj guiꞌyaj gaquinꞌ daj. Hué dan ni̱ xiꞌí daranꞌ nan, ni̱ hua digyán yya ni é re̱ꞌ sisi̱ nitaj si daꞌui a ni é re̱ꞌ gaquinꞌ ga̱ mánj.

¹²Hué dan ni̱ ngaa gaꞌnī yanj daj huaj rian án re̱ꞌ, ni̱ nun ga̱ni ruhuāj xiꞌí tsínj guiꞌyaj gaquinꞌ daj nga̱ tsínj guiranꞌ sayun xiꞌí gaquinꞌ guiꞌyaj tsínj daj. Sani̱ guiꞌyā yanj daj sisi̱ xa̱caj ni é re̱ꞌ cuenta rian Yanꞌanj sisi̱ hua yya nahuij ruhua únj xiꞌí ni é re̱ꞌ aj. ¹³Daranꞌ nan ꞌyaj sisi̱ na̱huin nia̱ꞌ ruhua únj.

Hué dan ni̱ gahuin nia̱ꞌ ruhua únj doj xiꞌí si hua nia̱ꞌ ruhua tsínj gu̱ꞌnaj Tito. Daj si ganariꞌ ruhua sij, guiꞌyaj daranꞌ ni é re̱ꞌ. ¹⁴Ni̱ hua gatā gunun Tito sisi̱ huin nia̱ꞌ ruhuāj niꞌyā á re̱ꞌ. Ni̱ nun gahuin na̱ꞌā nga̱ nuguanꞌ gaꞌmī xiꞌí ni é re̱ꞌ. Ni̱ da̱j rúnꞌ huin xa̱ngaꞌ daranꞌ si gataj únj gunun á ni é re̱ꞌ, ni̱ hué daj huin xa̱ngaꞌ si gataj únj rian Tito sisi̱ huin nia̱ꞌ ruhua únj nga̱ ni é re̱ꞌ. ¹⁵Ni̱ gahuin ꞌi̱ ruhua Tito niꞌyaj sij doj ni é re̱ꞌ ngaa nanun ruhua sij da̱j dagahuin ni é re̱ꞌ si-nu̱guanꞌ sij, ni̱ da guxuꞌuiꞌ a ni é re̱ꞌ, guiꞌyaj nuguanꞌ daj. Ni̱ ni̱nꞌ ruhua guinicaj ni é re̱ꞌ ꞌngo̱ ducuánj sa̱ꞌ nga̱ sij ngaa guisíj sij rian ma̱n án re̱ꞌ. ¹⁶Ni̱ gahuin nia̱ꞌ ruhuāj xiꞌí si niꞌīnj sisi̱ da̱gahuin a ni é re̱ꞌ daranꞌ nuguanꞌ digyānj rian án re̱ꞌ.

La ofrenda para los santos

¹Yya̱j ni̱ huin ruhua únj na̱taꞌ únj rian án re̱ꞌ da̱j guiꞌyaj Yanꞌanj sinduj rian ni ngüi̱ nicoꞌ Yanꞌanj ma̱n estado Macedonia huin ín re̱ꞌ jnánj néꞌ nga̱ xicaꞌuij néꞌ. ²Ni̱ nu̱nj si nico sayun guiranꞌ ni sij, sani̱ gahuin nia̱ꞌ ruhua ni sij. Ni̱ nu̱nj si yaco ranꞌ ni̱nꞌ ruhua ni sij, sani̱ ofrenda guiꞌyaj ni sij huin da̱j rúnꞌ huin si-ofrenda ni xuruꞌue.

³Huēj huin testigo sisi̱ gaꞌuiꞌ ni sij daranꞌ si gaꞌue gaꞌuiꞌ ni sij. Ni̱ ngaa guisíj gaꞌuiꞌ ni sij daranꞌ daj, ni̱ huaj gaꞌuiꞌ ni sij doj. ⁴Ni̱ ducu gachínj jniꞌyaj ni sij rian únj sisi̱ ga̱ꞌue chra̱cuij ni sij ango ni ngüi̱ sa̱ꞌ nicoꞌ Yanꞌanj. ⁵Ni̱ guiꞌyaj sa̱ꞌ ni sij daj nga̱ si ganaꞌuij únj si gui̱ꞌyaj ni sij. Daj si hua sini nagaꞌuiꞌ ni sij manꞌan ni sij rian Señor. Ngaa ni̱ nagaꞌuiꞌ ni sij manꞌan ni sij rian ni únj nej da̱j rúnꞌ aranꞌ ruhua Yanꞌanj.

⁶Xiꞌí daj gataj snanꞌanj únj rian Tito sisi̱ na̱caj sij sanꞌanj guiꞌyaj ni é re̱ꞌ ofrenda da̱j rúnꞌ gaxi̱ꞌi sij guiꞌyaj sij asi̱j sini nga̱ á re̱ꞌ huin ꞌngo̱ sinduj ꞌyaj á re̱ꞌ rian ni ngüi̱ yaco ranꞌ daj. ⁷Ni̱ gahuin chru̱n sa̱ꞌ á re̱ꞌ gaꞌi̱ nuguanꞌ. Daj si xuman sa̱ꞌ ruhua á re̱ꞌ niꞌyaj á re̱ꞌ Yanꞌanj. Ni̱ aꞌmi sa̱ꞌ á re̱ꞌ. Ni̱ niꞌi sa̱ꞌ á re̱ꞌ nej. Ni̱ hua nia̱ꞌ ruhua á re̱ꞌ gui̱ꞌyaj sun a ni é re̱ꞌ si-sun Yanꞌanj. Ni̱ ꞌi̱ ruhua á re̱ꞌ niꞌyaj á re̱ꞌ únj nej. Ngaa ni̱ da̱j rúnꞌ gahuin chru̱n sa̱ꞌ á re̱ꞌ nga̱ ni nuguanꞌ nan, ni̱ hué daj gui̱ꞌyaj sa̱ꞌ á re̱ꞌ nga̱ ofrenda ga̱ꞌuiꞌ ni é re̱ꞌ rian ni ngüi̱ yaco ranꞌ daj.

⁸Nitaj si aꞌnīj sun rian án re̱ꞌ nga̱ nuguanꞌ nan. Maan si huin ruhuāj sisi̱ gui̱niꞌi a ni é re̱ꞌ da̱j ꞌyaj sa̱ꞌ ango ni ngüi̱. Ngaa ni̱ ga̱ꞌue di̱gyán ni é re̱ꞌ sisi̱ hua yya ꞌi̱ ruhua manꞌan ni é re̱ꞌ niꞌyaj á re̱ꞌ ni ngüi̱ yaco ranꞌ da aj. ⁹Daj si hua niꞌi a ni é re̱ꞌ sinduj guiꞌyaj Señor Jesucristo nga̱ néꞌ. Asi̱j sini ni̱ gahuin sij xuruꞌue. Sani̱ naguiꞌyaj niqui sij manꞌan sij xiꞌí néꞌ. Ngaa ni̱ xiꞌí si gahuin niqui sij, ni̱ gahuin xuruꞌue néꞌ güenda niman néꞌ, guiꞌyaj sij.

¹⁰Hué dan ni̱ riquī ꞌngo̱ ducuánj rian án re̱ꞌ da̱j huin ruhuāj si gui̱ꞌyaj á re̱ꞌ. Asi̱j goj ni̱ gaxi̱ꞌi a ni é re̱ꞌ guiꞌyaj á re̱ꞌ ni ofrenda. Ni̱ huin ruhua á re̱ꞌ guiꞌyaj á re̱ꞌ daj. ¹¹Ngaa ni̱ yya̱j ni̱ di̱sij a ni é re̱ꞌ nga̱ si gaxi̱ꞌi ni é re̱ꞌ guiꞌyaj á re̱ꞌ daj. Ni̱ da̱j rúnꞌ gahuin nia̱ꞌ ruhua á re̱ꞌ chracuij a ni é re̱ꞌ asi̱j sini, daꞌngaꞌ daj di̱sij a ni é re̱ꞌ nga̱ sun daj. Ni̱ chra̱cuij a ni é re̱ꞌ sanꞌanj da̱j rúnꞌ nicaj á re̱ꞌ. ¹²Daj si sisi̱ huin xa̱ngaꞌ ruhua ꞌngo̱ tsínj daj gui̱ꞌyaj sij ofrenda, ni̱ na̱huin raꞌa Yanꞌanj ofrenda daj ngaa aꞌuiꞌ sij da̱j rúnꞌ ga̱ꞌue ga̱ꞌuiꞌ sij. Nitaj si anaꞌuij Yanꞌanj ga̱ꞌuiꞌ néꞌ sisi̱ nitaj nicaj néꞌ mánj. ¹³Naꞌuej ruhuāj sisi̱ gui̱man sa̱ꞌ ango ni ngüi̱, gui̱ꞌyaj a ni é re̱ꞌ sisi̱ ga̱huin niqui ni é re̱ꞌ mánj. ¹⁴Maan si huin ruhua únj sisi̱ uyan gui̱nicaj á re̱ꞌ nga̱ ni ngüi̱ daj. Yya̱j ni nicaj ni é re̱ꞌ si achin rian ni ngüi̱ daj. Ni̱ ango yún ni̱ gui̱nicaj ni sij si achin rian án re̱ꞌ. Hué ducuánj da huin ni̱ uyan ga̱ á re̱ꞌ nga̱ ango ni ngüi̱ nicoꞌ Yanꞌanj anj. ¹⁵Ni̱ hué daj gataj si-nu̱guanꞌ Yanꞌanj nej: “Nun gu̱na rian tsínj naranꞌ nico. Ni̱ nun ga̱chin rian tsínj naranꞌ do̱j.” Daj gataj si-nu̱guanꞌ Yanꞌanj.

¹⁶Ni̱ aꞌuīj si guruhua Yanꞌanj sisi̱ uyan huin ruhua nu̱ngüej únj Tito sisi̱ na̱huij ruhua nu̱ngüej únj xiꞌí a ni é re̱ꞌ, guiꞌyaj Yanꞌanj. ¹⁷Ni̱ garáj xina sij nga̱ si gachínj jniꞌyā rian sij. Ni̱ hua nia̱ꞌ ruhua sij gui̱sij ni̱ꞌyaj sij ni é re̱ꞌ, si hué daj huin ruhua manꞌan sij.

¹⁸Ni̱ aꞌníj únj jnánj néꞌ huaj nu̱guanꞌan nga̱ Tito rian án re̱ꞌ. Ni̱ aꞌmi sa̱ꞌ daranꞌ ni ngüi̱ nicoꞌ Yanꞌanj ma̱n ni̱nꞌ ga̱chraꞌ xiꞌí sij. Daj si aꞌmi sa̱ꞌ sij si-nu̱guanꞌ Yanꞌanj huin nuguanꞌ sa̱ꞌ. ¹⁹Ni̱ nacui daranꞌ ni ngüi̱ nicoꞌ Yanꞌanj sij sisi̱ gui̱nicaj dugüiꞌ sij nga̱ únj ga̱nꞌanj nicaj únj ofrenda daj rian ni ngüi̱ niqui. Ni̱ hué daj ꞌyaj únj sisi̱ ga̱ꞌmi sa̱ꞌ ni ngüi̱ rian Señor. Ni̱ di̱gyán únj sisi̱ huin ruhua únj chra̱cuij únj ni ngüi̱ niqui, ruhua únj nej. ²⁰Ni̱ naꞌuej ruhua únj si ga̱ꞌmi gaquinꞌ ni ngüi̱ rian únj xiꞌí ofrenda ga̱ꞌuiꞌ únj rian ni ngüi̱ niqui. ²¹Xiꞌí daj ni̱ ꞌyaj fuerza únj sisi̱ gui̱ꞌyaj sa̱ꞌ únj rian Señor nga̱ rian ni ngüi̱ nej.

²²Ni̱ aꞌníj únj ango jnánj néꞌ huaj nga̱ nu̱ngüej sij rian án re̱ꞌ. Ni̱ hua gaꞌi̱ digyán sij rian únj sisi̱ hua yya huin ruhua sij gui̱ꞌyaj sun sij si-sun Yanꞌanj. Ni̱ huin ruhua sij gui̱ꞌyaj sa̱ꞌ sij rian án re̱ꞌ. Daj si ani sa̱ꞌ ruhua sij xiꞌí a ni é re̱ꞌ. ²³Tsínj gu̱ꞌnaj Tito, ni̱ tsínj nicaj dugüiꞌ ꞌyaj sun ngāj huin sij. Ni̱ ꞌyaj sun sij rián re̱ꞌ. Ni̱ xiꞌí nu̱ngüej tsínj daj, ni̱ tsínj gaꞌníj ni ngüi̱ nicoꞌ Yanꞌanj huin nu̱ngüej sij. Ni̱ aꞌmi sa̱ꞌ ni ngüi̱ xiꞌí Cristo, ꞌyaj nu̱ngüej sij. ²⁴Ngaa ni̱ di̱gyán án re̱ꞌ sisi̱ yya ꞌi̱ ruhua á re̱ꞌ niꞌyaj á re̱ꞌ aninꞌ sij. Ngaa ni̱ gui̱niꞌi ni ngüi̱ nicoꞌ Yanꞌanj sisi̱ hua yya ꞌi̱ ruhua á re̱ꞌ niꞌyaj á re̱ꞌ aninꞌ sij. Ni̱ gui̱niꞌi aninꞌ sij u̱n sin huin, ni̱ gaꞌmi sa̱ꞌāj xiꞌí a ni é re̱ꞌ.

¹Nitaj si huaj si ga̱ꞌnī ꞌngo̱ yanj huaj rian án re̱ꞌ xiꞌí ofrenda ꞌyaj á re̱ꞌ güenda ni ngüi̱ sa̱ꞌ nicoꞌ Yanꞌanj. ²Daj si hua niꞌīnj sisi̱ huin nia̱ꞌ ruhua á re̱ꞌ ga̱ꞌuiꞌ a ni é re̱ꞌ sanꞌanj rian ni síꞌ. Ni̱ gaꞌmi sa̱ꞌāj xiꞌí ni é re̱ꞌ rian ni jnánj néꞌ huin ni tsínj ma̱n estado Macedonia. Ni̱ gatā gunun ni sij sisi̱ asi̱j goj, ni̱ hua ruhua ni tsínj ma̱n estado Acaya chra̱cuij ni sij ni ngüi̱ niqui. Ni̱ xiꞌí si hua ruhua á re̱ꞌ chra̱cuij a ni é re̱ꞌ, ni̱ huin ruhua nico ni ngüi̱ ma̱n estado Macedonia chra̱cuij ni sij ni ngüi̱ da nej.

³Sani̱ aꞌnī ni jnánj néꞌ huaj rian án re̱ꞌ sisi̱ na̱ranꞌ án re̱ꞌ sanꞌanj güenda ofrenda daj. Daj si hua gatā gunun ni sij sisi̱ hué daj gui̱ꞌyaj á re̱ꞌ. Ni̱ nitaj si huin ruhuāj sisi̱ nuguanꞌ sa̱ꞌ gaꞌmī xiꞌí ni é re̱ꞌ ga̱huin ꞌngo̱ nuguanꞌ yu̱n mánj. ⁴Ni̱ sisi̱ gu̱chīj nga̱ go̱ꞌngo ni tsínj ma̱n estado Macedonia rian ma̱n ni é re̱ꞌ ngaa achin na̱ranꞌ ni é re̱ꞌ sanꞌanj daj, ni̱ gui̱riꞌ únj si-na̱ꞌaj. Ni̱ ga̱huin na̱ꞌaj doj manꞌan án re̱ꞌ xiꞌí nuguanꞌ gaꞌmi únj sisi̱ gahuin yya ruhua únj sisi̱ ga̱ꞌuiꞌ a ni é re̱ꞌ sanꞌanj rian ni ngüi̱ yaco ranꞌ.

⁵Xiꞌí daj ni̱ gani ruhuāj sisi̱ hua sini ni jnánj néꞌ gui̱sij ni̱ꞌyaj sini rian ma̱n án re̱ꞌ. Ni̱ chra̱cuij ni sij sisi̱ na̱ranꞌ ni é re̱ꞌ sanꞌanj hua gataj yya á re̱ꞌ sisi̱ chra̱cuij a ni é re̱ꞌ gui̱niꞌi ni ngüi̱. Ngaa ni̱ gui̱niꞌi ni ngüi̱ sisi̱ hua yya huin ruhua á re̱ꞌ ga̱ꞌuiꞌ a ni é re̱ꞌ ofrenda daj. Ni̱ sé si ga̱ꞌuiꞌ a ni é re̱ꞌ xiꞌí si guiꞌyaj fuerza únj mánj.

⁶Gu̱nun ruhua á re̱ꞌ sisi̱ tsínj unu̱n do̱j ꞌníj, ni̱ do̱j tanꞌ na̱caj sij. Ni̱ tsínj unu̱n nico ꞌníj, ni̱ nico tanꞌ na̱caj sij. ⁷Ni̱ da̱j ani ruhua go̱ꞌngo néꞌ, ni̱ hué daj ga̱ꞌuiꞌ go̱ꞌngo néꞌ sanꞌanj. Ni̱ sé si na̱ni ruhua néꞌ ga̱ꞌuiꞌ néꞌ sanꞌanj. Ni̱ sé si da fuerza ga̱ꞌuiꞌ néꞌ. Daj si ꞌi̱ ruhua Yanꞌanj niꞌya ni ngüi̱ hua nia̱ꞌ ruhua aꞌuiꞌ sanꞌanj daj. ⁸Ni̱ Yanꞌanj nucuaj si ri̱quij daranꞌ ni rasu̱n sa̱ꞌ rian án re̱ꞌ. Ngaa ni̱ ni̱ganj ga̱ ni rasu̱n achin rian án re̱ꞌ. Ni̱ xiꞌí si riqui Yanꞌanj nico rasu̱n sa̱ꞌ rian án re̱ꞌ, ni̱ ga̱ꞌue gui̱ꞌyaj á re̱ꞌ daranꞌ sun sa̱ꞌ rian ango ni ngüi̱ nej. ⁹Ni̱ gataj si-nu̱guanꞌ Yanꞌanj:

Tsínj uꞌyun chracuij ni ngüi̱ yaco ranꞌ, ni̱ nitaj a̱man

gui̱niꞌyun ruhua Yanꞌanj si sa̱ꞌ ꞌyaj sij nga̱ ni ngüi̱.

Daj gataj si-nu̱guanꞌ Yanꞌanj.

¹⁰Ni̱ aꞌuiꞌ Yanꞌanj ꞌníj rian tsínj unu̱n nnaa̱. Ni̱ aꞌuiꞌ Yanꞌanj chra xa̱ ni ngüi̱ nej. Ni̱ hué ducuánj daj huin sisi̱ ga̱ꞌuiꞌ Yanꞌanj nico rasu̱n sa̱ꞌ rian ni é re̱ꞌ. Hué daj ni̱ ga̱ꞌue gui̱ꞌyaj ni é re̱ꞌ sisi̱ ga̱hui sa̱ꞌ ni jnánj néꞌ xiꞌí nuguanꞌ sa̱ꞌ ꞌna̱ꞌ rian án re̱ꞌ, gui̱ꞌyaj Yanꞌanj. ¹¹Ngaa ni̱ ga̱huin nico nuguanꞌ sa̱ꞌ rian án re̱ꞌ. Hué daj ni̱ ga̱ꞌue ga̱ꞌuiꞌ ni é re̱ꞌ nico rian ni jnánj néꞌ. Ni̱ sanꞌanj riqui ni é re̱ꞌ ni̱caj únj ga̱nꞌanj únj ga̱ꞌuiꞌ únj rian ni jnánj néꞌ.

¹²Daj si sanꞌanj ga̱ꞌuiꞌ ni é re̱ꞌ daj, ni̱ sé urin si achin rian ni ngüi̱ nicoꞌ Yanꞌanj ga̱ꞌuiꞌ únj, sani̱ hué daj gui̱ꞌyaj únj sisi̱ ga̱ꞌuiꞌ ni sij si guruhua Yanꞌanj nej. ¹³Ni̱ xiꞌí sinduj ꞌyaj á re̱ꞌ daj, ni̱ gui̱niꞌi ni ngüi̱ sisi̱ dagahuin a ni é re̱ꞌ nuguanꞌ sa̱ꞌ xiꞌí Cristo. Ni̱ ga̱ꞌmi sa̱ꞌ ni sij rian Yanꞌanj nej. Ni̱ hué daj ga̱ꞌmi sa̱ꞌ ni sij rian Yanꞌanj xiꞌí si hua nia̱ꞌ ruhua á re̱ꞌ gaꞌuiꞌ a ni é re̱ꞌ siꞌyaj á re̱ꞌ rian ni sij nga̱ rian ango ni ngüi̱ nej. ¹⁴Ni̱ ga̱chinj jniꞌyaj ni sij rian Yanꞌanj xiꞌí a ni é re̱ꞌ. Ni̱ ga̱huin ꞌi̱ ruhua ni sij gui̱niꞌi ni sij a ni é re̱ꞌ xiꞌí si chra̱cuij a ni é re̱ꞌ ni sij, gui̱ꞌyaj Yanꞌanj. ¹⁵Ni̱ ga̱ꞌuiꞌ néꞌ si guruhua Yanꞌanj xiꞌí si ꞌueé ni̱nꞌ ruhua guiꞌyaj Yanꞌanj nga̱ néꞌ. Ni̱ nitaj a̱man gui̱riꞌ néꞌ na̱taꞌ néꞌ da̱j hua sa̱ꞌ sinduj daj.

Pablo defiende su ministerio

¹Huēj huin Pablo. Ni̱ huin ruhuāj ga̱huīnj da̱j rúnꞌ huin Cristo. Ni̱ ataj ni ngüi̱ sisi̱ ngaa nnēj scanij a ni é re̱ꞌ, ni̱ na̱j aꞌmī, ataj ni sij. Ni̱ ngaa nitaj si nnēj nga̱ á re̱ꞌ, ni̱ aꞌmi huēj rian yanj aꞌnī huaj rian án re̱ꞌ, ataj ni sij. Ngaa ni̱ xiꞌí si aꞌmi sa̱ꞌ Cristo, ni̱ ꞌi̱ ruhua sij niꞌyaj sij néꞌ, ²ni̱ achínj jniꞌyā rian án re̱ꞌ sisi̱ gui̱ꞌyaj sa̱ꞌ ni é re̱ꞌ. Ngaa ni̱ ngaa gui̱sī rian ma̱n ni é re̱ꞌ, ni̱ si̱ gaꞌmi huēj rian án re̱ꞌ. Daj si huin ruhuāj ga̱ꞌmi huēj rian ni tsínj aꞌmi gaquinꞌ xiꞌí únj sisi̱ ꞌyaj únj da̱j rúnꞌ huin ruhua nnee̱ cúj únj.

³Ni̱ nu̱nj si hua ni̱ꞌnaꞌ nnee̱ cúj únj, sani̱ nitaj si ununꞌ nnee̱ cúj únj nga̱ sichre mánj. ⁴Ngaa ununꞌ únj, ni̱ nitaj si daꞌa únj xiti da̱j rúnꞌ ꞌyaj ni tsínj ma̱n chruhua xungüi̱ nan. Sani̱ daꞌa únj si-fuerza Yanꞌanj. Ni̱ si-fuerza Yanꞌanj ꞌyaj sisi̱ ga̱ꞌue gui̱ꞌyaj gana néꞌ rian daranꞌ ni tsínj ununꞌ nga̱ Yanꞌanj. ⁵Ni̱ dereꞌ únj daranꞌ si-nu̱guanꞌ ni tsínj ununꞌ nga̱ Yanꞌanj. Ni̱ dereꞌ únj daranꞌ nuguanꞌ aránj chrej rian ni ngüi̱ gu̱nun si-nu̱guanꞌ Yanꞌanj. Ngaa ni̱ ga̱huin ruhua ni sij da̱gahuin ni sij rian Cristo, gui̱ꞌyaj únj. ⁶Ni̱ ngaa da̱gahuin sa̱ꞌ á re̱ꞌ rian Yanꞌanj, ni̱ hua ruhua únj gui̱ꞌyaj únj castigo daranꞌ ni ngüi̱ naꞌuej ruhua da̱gahuin rian Yanꞌanj.

⁷Maan si ga̱ cuidado ni é re̱ꞌ da̱j ani ruhua ni é re̱ꞌ xiꞌí únj. Ni̱ sisi̱ hua yya ruhua ꞌngo̱ ni é re̱ꞌ sisi̱ nicaj dugüiꞌ síꞌ nga̱ Cristo, ni̱ hua nia̱n sisi̱ xa̱caj síꞌ cuenta sisi̱ da̱j rúnꞌ nicaj dugüiꞌ síꞌ nga̱ Cristo, ni̱ daꞌngaꞌ daj nicaj dugüiꞌ únj nga̱ Cristo nej. ⁸Ni̱ nu̱nj si gachin gaꞌmī do̱j nga̱ sun riqui Señor riānj, sani̱ si̱ gahuin na̱ꞌā mánj. Daj si Señor riqui sun daj sisi̱ ga̱huin ni̱ca niman án re̱ꞌ, gui̱ꞌyaj únj. Ni̱ si̱ ganꞌanj niꞌya á re̱ꞌ mánj.

⁹Naꞌuej ruhuāj sisi̱ ga̱ni ruhua á re̱ꞌ sisi̱ aꞌnī yanj carta huaj rian án re̱ꞌ, ngaa ni̱ gu̱xuꞌuiꞌ ni é re̱ꞌ, gui̱ꞌyā mánj. ¹⁰Ni̱ ataj go̱ꞌngo a ni é re̱ꞌ sisi̱ nuguanꞌ nucuaj arūnj rian yanj carta guchij rian án re̱ꞌ. Ni̱ nicaj sun ni carta daj nej. Sani̱ ngaa gui̱sī rian ma̱n án re̱ꞌ, ni̱ nitaj si nucuaj si-nu̱guanꞌānj. Ni̱ nitaj si nicaj sun si aꞌmī, ataj ni sij nej. ¹¹Ni̱ hua nia̱n sisi̱ xa̱caj tsínj aꞌmi daj cuenta sisi̱ da̱j rúnꞌ hua nuguanꞌ arun únj rian yanj carta ngaa nitaj si nne únj nga̱ ni é re̱ꞌ, ni̱ hué daj ga̱ nuguanꞌ ga̱ꞌmi únj rian án re̱ꞌ ngaa gui̱sij únj rian ma̱n ni é re̱ꞌ aj.

¹²Xa̱ngaꞌ ni̱ nun gui̱sij ruhua únj ga̱taj únj sisi̱ hua sa̱ꞌ únj da̱j rúnꞌ ataj ni tsínj aꞌmi sisi̱ hua sa̱ꞌ ni sij. Daj si hua sa̱ꞌ ni sij ani ruhua ni manꞌan ni sij. Ni̱ huin ruhua ni sij gui̱niꞌi ni sij u̱n tsínj ga̱huin rian scanij ni sij. Ni̱ ataj ni sij sisi̱ manꞌan ni sij huin ni tsínj sa̱ꞌ doj rian ango dugüiꞌ ni sij. Tsínj ni̱ꞌyun huin ni sij. ¹³Sani̱ hua cuidado únj ngaa aꞌmi únj sisi̱ hua sa̱ꞌ si-sun únj. Daj si urin Yanꞌanj digyán da̱j hua si-sun únj. Ni̱ aꞌmi únj da̱j rúnꞌ hua sun daj. Ni̱ hué Yanꞌanj gaꞌníj sun rian únj sisi̱ ga̱ꞌmi únj nuguanꞌ sa̱ꞌ rian án re̱ꞌ.

¹⁴Hué dan ni̱ nun ganꞌanj únj rian naꞌuej ruhua Yanꞌanj ga̱nꞌanj únj. Daj si huin ruhua Yanꞌanj sisi̱ gui̱sij únj rian ma̱n án re̱ꞌ. Ni̱ hua yya guisíj sini únj gaꞌmi únj nuguanꞌ sa̱ꞌ xiꞌí Cristo rian án re̱ꞌ. ¹⁵Ni̱ hua cuidado únj ngaa aꞌmi únj xiꞌí si-sun ango ni sij. Sani̱ anaꞌuij únj sisi̱ gu̱xuman doj ruhua á re̱ꞌ gui̱niꞌi a ni é re̱ꞌ Yanꞌanj. Ngaa ni̱ ga̱ꞌue gui̱ꞌyaj sun únj doj scanij ni é re̱ꞌ da̱j rúnꞌ huin ruhua Yanꞌanj sisi̱ gui̱ꞌyaj únj. ¹⁶Ngaa ni̱ ga̱ꞌue ga̱nꞌanj ga̱ꞌmi únj si-nu̱guanꞌ Yanꞌanj ango ni xumanꞌ ne̱ꞌ rian xánj ni é re̱ꞌ. Daj si naꞌuej ruhua únj di̱guij únj si-sun ango ni tsínj daj. Ni̱ nitaj si hua sa̱ꞌaj sisi̱ ga̱taj únj sisi̱ manꞌan únj guiꞌyaj sisi̱ guiꞌyaj sun ango síꞌ.

¹⁷Ni̱ sisi̱ huin ruhua ꞌngo̱ tsínj daj ga̱ꞌmi sa̱ꞌ sij xiꞌí manꞌan sij, ngaa ni̱ ga̱taj sij sisi̱ sa̱ꞌ guiꞌyaj Señor nga̱ sij. ¹⁸Nitaj si níꞌyanj si-nu̱guanꞌ ꞌngo̱ tsínj ataj sisi̱ sa̱ꞌ guiꞌyaj sij. Sani̱ níꞌyanj sisi̱ ga̱taj Señor sisi̱ hua sa̱ꞌ si guiꞌyaj ꞌngo̱ tsínj daj.

¹Gui̱nicaj a ni é re̱ꞌ ꞌngo̱ niman nico sisi̱ ga̱ꞌmi niꞌyūnj do̱j gu̱nun a ni é re̱ꞌ. Hué daj gui̱ꞌyaj á re̱ꞌ, ruhuāj aj. ²Daj si da̱j rúnꞌ huin ruhua Yanꞌanj du̱gumij a ni é re̱ꞌ, ni̱ hué daj huin ruhuāj du̱gumīj a ni é re̱ꞌ nej. Ni̱ hua guiꞌyaj yyāj sisi̱ gui̱nicaj dugüiꞌ ni é re̱ꞌ nga̱ Cristo. Ni̱ da̱j rúnꞌ gui̱ꞌyaj ꞌngo̱ yunꞌunj xa̱na hua sa̱ꞌ ngaa xacaj unj urin nica̱ unj, ni̱ hué daj huin ruhuāj sisi̱ gui̱nicaj dugüiꞌ ni é re̱ꞌ nga̱ Cristo aj. ³Sani̱ ani xuꞌuiꞌ ruhuāj nga̱ ni é re̱ꞌ sisi̱ di̱gyaꞌ yunꞌunj sichre ni é re̱ꞌ da̱j rúnꞌ digyaꞌ yunꞌunj xucuáj yunꞌunj gu̱ꞌnaj Eva asi̱j ná. Daj si nitaj si huin ruhuāj sisi̱ du̱na ni é re̱ꞌ si gui̱nicaj dugüiꞌ ni é re̱ꞌ nga̱ Cristo mánj. ⁴Gaꞌuej ruhua a ni é re̱ꞌ sisi̱ ga̱ꞌnaꞌ ango tsínj ga̱ꞌmi sij ango nuguanꞌ xiꞌí Jesús rian án re̱ꞌ. Ni̱ ni̱ni huin nuguanꞌ daj nga̱ nuguanꞌ gaꞌmi únj rian án re̱ꞌ. Ni̱ hua nia̱ꞌ ruhua ni é re̱ꞌ na̱huin raꞌa ni é re̱ꞌ ango nane̱, sani̱ sé Espíritu Santo huin mánj. Ni̱ ni̱ni hua ango nuguanꞌ nahuin raꞌa ni é re̱ꞌ. Sani̱ sé da̱j rúnꞌ hua si-nu̱guanꞌ Yanꞌanj nahuin raꞌa sini ni é re̱ꞌ daj hua mánj. Ni̱ aꞌninꞌ ruhua á re̱ꞌ sisi̱ gui̱nicoꞌ a ni é re̱ꞌ ango nuguanꞌ daj. ⁵Ni̱ ani ruhuāj sisi̱ níꞌyanj si-nu̱guanꞌānj da̱j rúnꞌ níꞌyanj si-nu̱guanꞌ ni tsínj huin achij nicoꞌ ni é re̱ꞌ daj. Ni̱ apóstol achij huin ni sij, ruhua ni sij. Sani̱ huin achij nne̱ ni sij. ⁶Ni̱ nu̱nj si achin ango nuguanꞌ nachranꞌ ga̱ꞌmi sa̱ꞌāj rian ni ngüi̱, sani̱ gahuin chru̱n sa̱ꞌāj xiꞌí nuguanꞌ sa̱ꞌaj. Ni̱ hua xacaj á re̱ꞌ cuenta sisi̱ hué daj huin, guiꞌyaj únj.

⁷Niꞌi ni é re̱ꞌ sisi̱ nun ga̱ꞌnē sanꞌanj rian án re̱ꞌ ngaa gaꞌmī si-nu̱guanꞌ Yanꞌanj huin nuguanꞌ sa̱ꞌ rian án re̱ꞌ. Ni̱ gahuin rian án re̱ꞌ, guiꞌyā. Ni̱ gunā da ru̱cu. Ngaa ni̱ gaquinꞌ guiꞌyā rian án re̱ꞌ, ruhua á re̱ꞌ níꞌ. Sé daj huin mánj. ⁸Ni̱ gaꞌnē si-sanꞌanj ango ni ngüi̱ nicoꞌ Yanꞌanj huin ni ngüi̱ ma̱n ango xumanꞌ. Ni̱ riqui ni sij sanꞌanj daj sisi̱ ga̱ꞌue gui̱ꞌyaj sūnj rian án re̱ꞌ. ⁹Ngaa guimán néꞌ, ni̱ gachin ꞌngo̱ rasu̱n riānj, sani̱ nun ga̱rasūnj rian go̱ꞌngo ni é re̱ꞌ mánj. Daj si ni jnánj néꞌ ꞌna̱ꞌ estado Macedonia, ni̱ riqui ni sij si gachin riānj. Ni̱ nun ga̱rasūnj rian ni é re̱ꞌ mánj. Ni̱ hué daj ga̱ gui̱ꞌyā, ruhuāj aj.

¹⁰Ni̱ xiꞌí si nne Cristo ngāj, xiꞌí daj niꞌi a ni é re̱ꞌ sisi̱ xa̱ngaꞌ nuguanꞌ aꞌmī rian án re̱ꞌ. Ni̱ ga̱taj snanꞌān rian án re̱ꞌ sisi̱ nitaj a̱man ga̱taj ni ngüi̱ mán estado Acaya sisi̱ gaꞌnē sanꞌanj rian án re̱ꞌ mánj. ¹¹Ni̱ u̱n sin huin, ni̱ aꞌmī nuguanꞌ nan, ruhua á re̱ꞌ únj. Sisi̱ ruhuaj, ni̱ nitaj si ꞌi̱ ruhuāj niꞌyā ni é re̱ꞌ. Sé daj huin mánj. Daj si Yanꞌanj niꞌi sisi̱ hua yya ꞌi̱ ruhuāj niꞌyā ni é re̱ꞌ aj.

¹²Ni̱ ga̱ gue̱ gui̱ꞌyā da̱j rúnꞌ ꞌyā. Ngaa ni̱ si̱ gaꞌuiꞌ únj chrej rian ni tsínj chéj nanaꞌuiꞌ sisi̱ uyan ga̱ ni sij nga̱ únj. Aꞌmī xa̱can ni sij. Sani̱ sé uyan huin ni sij nga̱ únj. ¹³Ni̱ aꞌmi yya̱ ni sij sisi̱ huin ni sij apóstol huin tsínj aꞌmi si-nu̱guanꞌ Jesucristo. Tsínj digyaꞌ yunꞌunj huin ni sij. Daj si ꞌyaj ni sij sisi̱ aꞌmi ni sij si-nu̱guanꞌ Cristo. Sani̱ sé daj huin mánj. ¹⁴Ni̱ sé urin ni sij ꞌyaj daj. Daj si manꞌan sichre ꞌyaj si ángel xigui̱n sa̱ꞌ huin sij. ¹⁵Ni̱ da̱j rúnꞌ ꞌyaj sichre, ni̱ hué daj ꞌyaj ni tsínj daj nej. Ni̱ huin ruhua ni sij sisi̱ ga̱ni ruhua ni ngüi̱ sisi̱ ꞌyaj ni̱ca ni sij. Ni̱ da̱j rúnꞌ hua quij si-chrej ni sij, ni̱ hué daj gui̱ranꞌ ni sij castigo nej.

Sufrimientos de Pablo como apóstol

¹⁶Ga̱taj ru̱huaꞌ yūnj sisi̱ si̱ gani ruhua á re̱ꞌ sisi̱ sinūn. Ni̱ sisi̱ hué daj ani ruhua á re̱ꞌ, ni̱ ga̱ꞌninꞌ ruhua ni é re̱ꞌ sisi̱ ga̱ꞌmī da̱j rúnꞌ aꞌmi ꞌngo̱ tsínj sinúnj. Ngaa ni̱ hué daj ga̱ꞌue ga̱ꞌmi sa̱ꞌāj xiꞌí si-sūnj. ¹⁷Ni̱ sé Señor riqui sisi̱ hué daj ga̱ꞌmī mánj. Sani̱ maan si aꞌmī da̱j rúnꞌ aꞌmi ꞌngo̱ tsínj sinúnj. Ni̱ hué ducuánj daj ga̱ꞌue ga̱ꞌmi xa̱cānj do̱j xiꞌīj. ¹⁸Ni̱ hua gaꞌi̱ ni tsínj aꞌmi sa̱ꞌ xiꞌí ni manꞌan ni sij. Ngaa ni̱ hué daj ga̱ꞌmi sa̱ꞌāj rian án re̱ꞌ xiꞌīj nej. ¹⁹Daj si ani ruhua á re̱ꞌ sisi̱ niꞌi sa̱ꞌ á re̱ꞌ. Sani̱ aꞌninꞌ ruhua á re̱ꞌ sisi̱ ga̱ꞌmi ni tsínj sinúnj rian án re̱ꞌ. ²⁰Ni̱ aꞌninꞌ ruhua á re̱ꞌ sisi̱ gui̱ꞌyaj sun ni é re̱ꞌ rian ni tsínj daj ngaa xa ni sij si-sanꞌanj ni é re̱ꞌ. Ni̱ digyaꞌ yunꞌunj ni sij ni é re̱ꞌ nej. Ni̱ nitaj si níꞌyanj ni é re̱ꞌ, ataj ni sij nej. Ni̱ raꞌui ni sij rian án re̱ꞌ nej. ²¹Ni̱ nu̱nj si huin na̱ꞌā ga̱ꞌmī nuguanꞌ nan, sani̱ nun gahuin nucuaj únj guiꞌyaj únj da̱j rúnꞌ guiꞌyaj ni tsínj daj.

Ni̱ sisi̱ gui̱sij ruhua ni sij ga̱ꞌmi sa̱ꞌ ni sij xiꞌí ni manꞌan ni sij, ni̱ hué daj ga̱ꞌmi sa̱ꞌāj xiꞌīj, (nu̱nj si ga̱ꞌmī da̱j rúnꞌ aꞌmi ꞌngo̱ tsínj sinúnj). ²²Hué ni sij huin ni tsínj hebreo, ataj ni sij níꞌ. Ni̱ huēj huin tsínj hebreo nej. Ni̱ hué ni sij huin ni tsínj israelita, ataj ni sij níꞌ. Ni̱ huēj huin tsínj israelita nej. Ni̱ hué ni sij huin daꞌni̱ siꞌni̱ Abraham, ataj ni sij níꞌ. Ni̱ huēj huin nej. ²³Ni̱ ꞌyaj sun ni sij si-sun Cristo, ataj ni sij níꞌ. Huaj ꞌyaj sūnj si-sun Cristo nga̱ si ꞌyaj ni sij (nu̱nj si aꞌmī nuguanꞌ nan da̱j rúnꞌ aꞌmi ꞌngo̱ tsínj sinúnj). Ni̱ huaj guiꞌyaj sūnj si guiꞌyaj ni sij. Ni̱ ducu duguayun ni tsínj nicaj sun manꞌānj. Ni̱ huaj gunūnj ducuaga̱ꞌ si gunu̱n ni sij. Ni̱ nico̱ꞌ huaj ruhua ga̱huīj, sani̱ nun gahuīj mánj. ²⁴Guisíj u̱nꞌunꞌ yya huin si duguayun ni tsínj israelita ico̱ xinunꞌ ga̱nꞌanj nneꞌ manꞌānj. ²⁵Ni̱ hua̱ꞌnij duguayun ni sij rutsi̱ xirāj. Ni̱ ango yún gaꞌuiꞌ ni sij yej manꞌānj. Ni̱ guisíj hua̱ꞌnij nagaꞌ rio̱ daqui nnee nūnj huā. ²⁶Ni̱ gachēj ni̱nꞌ ruhua. Ni̱ hua sayun ngaa gachē chrej ngaa gara quin nnee. Ni̱ ma̱n ni tsínj ꞌna̱ꞌ anéj chrej nej. Ni̱ hua sayun guiniꞌīnj riqui ni xumanꞌ nga̱ riqui quij nej, nga̱ rian nnee yanꞌanj nej. Ni̱ hua sayun guiꞌyaj ni tsínj digyaꞌ yunꞌunj gataj ni sij sisi̱ hué sij huin jnánj néꞌ.

²⁷Ni̱ ducu guiꞌyaj sūnj. Ni̱ guiranꞌānj sayun nej. Ni̱ guisíj gaꞌi̱ nun ga̱ꞌue gatō. Ni̱ daꞌaj güi gachin xiꞌna̱ riquīj. Ni̱ nagoꞌōj nnee. Ni̱ guisíj gaꞌi̱ nun xāj. Ni̱ guiranꞌānj sayun, guiꞌyaj nuhuij xiꞌí si nitaj si-ganꞌānj. ²⁸Ni̱ sayun nan ranꞌānj nga̱ ango ni sayun. Daj si da go̱ꞌngo güi, ni̱ nahuij ruhuāj niꞌyā daranꞌ ni ngüi̱ nicoꞌ Yanꞌanj ma̱n go̱ꞌngo xumanꞌ. ²⁹Ni̱ sisi̱ hua ꞌngo̱ tsínj aꞌnanꞌ, ni̱ da̱j rúnꞌ ranꞌ sij, ni̱ hué daj ranꞌ manꞌānj nej. Ni̱ sisi̱ gui̱ꞌyaj ꞌngo̱ tsínj daj gaquinꞌ, gui̱ꞌyaj dugüiꞌ sij, ni̱ aꞌman ruhuāj niꞌyā tsínj guiꞌyaj daj.

³⁰Ni̱ sisi̱ ga̱ꞌmi sa̱ꞌāj xiꞌīj, ni̱ maan si ga̱ꞌmi sa̱ꞌāj xiꞌí si nitaj fuerza riānj. Yanꞌanj ꞌyaj sisi̱ ga̱ꞌue gui̱ꞌyaj sūnj. ³¹Ni̱ niꞌi Yanꞌanj si aꞌmī nuguanꞌ xa̱ngaꞌ. Ni̱ Yanꞌanj huin chrej Señor Jesucristo. Ni̱ hua nia̱n sisi̱ ni̱ganj ga̱ꞌmi sa̱ꞌ néꞌ xiꞌí Yanꞌanj. ³²Ngaa ganꞌān xumanꞌ Damasco, ni̱ gobernado ꞌyaj sun rian rey Aretas, ni̱ gaꞌninꞌ síꞌ sun rian ni policía sisi̱ du̱gumi ni sij, ni̱ gui̱daꞌa ni sij manꞌānj. ³³Sani̱ chracuij go̱ꞌngo ni tsínj ma̱n xumanꞌ daj manꞌānj. Ni̱ dinij ni sij xuguti nūnj daj rian ꞌngo̱ yuꞌuj ta̱j rian xingá yej ganica̱j duꞌua xumanꞌ daj. Ngaa ni̱ gananīj rian gobernado daj.

El aguijón en la carne

¹Nitaj si hua sa̱ꞌaj sisi̱ ga̱ꞌmi sa̱ꞌ néꞌ xiꞌí manꞌan néꞌ. Sani̱ ga̱ꞌmī xiꞌí ni rasu̱n gurugüiꞌ riānj. Ni̱ ga̱ꞌmī xiꞌí si digyán Señor riānj. ²Hué dan ni̱ niꞌīnj ꞌngo̱ tsínj xuman ruhua niꞌyaj Cristo. Ni̱ guisíj xiganꞌanj yoꞌ, ni̱ gahui tsínj daj ganꞌanj ga̱nꞌ sij xataꞌ, guiꞌyaj Yanꞌanj. Ni̱ da hua̱ꞌnij xataꞌ gahui sij ganꞌanj sij. (Ni̱ nun niꞌīnj sisi̱ ganꞌanj nnee̱ cúj sij nga̱ sij, asi̱ maan nane̱ nu̱n niman sij ganꞌanj. Urin Yanꞌanj niꞌi nánj.) Ni̱ huēj huin tsínj daj. ^3-4(Ni̱ xa̱ngaꞌ urin Yanꞌanj niꞌi sisi̱ ganꞌanj nnee̱ cū nga̱ manꞌānj, asi̱ maan nane̱ nu̱n nimānj ganꞌanj.) Sani̱ niꞌīnj sisi̱ ganꞌān rian hua sa̱ꞌ xataꞌ rian gunūnj ni nuguanꞌ hua sa̱ꞌ. Ni̱ naꞌuej ruhua Yanꞌanj sisi̱ na̱taꞌ a̱ ꞌngo̱ ni ngüi̱ da̱j hua ni nuguanꞌ sa̱ꞌ daj.

⁵Ni̱ ga̱ꞌue ga̱ꞌmi sa̱ꞌāj xiꞌí si guiranꞌānj. Sani̱ sé xiꞌīj ga̱ꞌmi sa̱ꞌāj. Maan si ga̱ꞌmi sa̱ꞌāj xiꞌīj si nitaj fuerza riānj. Yanꞌanj ꞌyaj sisi̱ ga̱ꞌue gui̱ꞌyaj sūnj. ⁶Ni̱ sisi̱ huin ruhuāj ga̱ꞌmi sa̱ꞌāj xiꞌīj, ni̱ sé ꞌngo̱ nuguanꞌ ni̱ꞌyun huin ga̱ꞌmī mánj. Daj si si-nu̱guanꞌānj huin nuguanꞌ xa̱ngaꞌ. Sani̱ sé daj guiꞌyā mánj. Daj si hua guiniꞌi ni ngüi̱ da̱j hua si-sūnj nga̱ si-nu̱guanꞌānj. Ni̱ nitaj si huin ruhuāj sisi̱ ga̱ni ruhua ni ngüi̱ sisi̱ huaj huīnj xiꞌí si-sūnj nga̱ ni nuguanꞌ gaꞌmī rian ni sij mánj. ⁷Ni̱ hua sa̱ꞌ ni̱nꞌ ruhua nuguanꞌ digyán Yanꞌanj riānj.

Ngaa ni̱ guidaꞌa ꞌngo̱ xiꞌi̱ manꞌānj sisi̱ si̱ guiꞌyaj nnēj, guiꞌyaj Yanꞌanj. Ni̱ da̱j rúnꞌ ꞌyaj ꞌngo̱ tanj ngaa atuj yu̱nꞌ, ni̱ hué daj ranꞌānj, guiꞌyaj xiꞌi̱ daj. Ni̱ xiꞌi̱ daj gaꞌna̱ꞌ rian sichre sisi̱ si̱ gaꞌmi xa̱cānj xiꞌīj mánj. ⁸Ni̱ guisíj hua̱ꞌnij yya gachínj jniꞌyā rian Señor sisi̱ xi̱ꞌne xiꞌi̱ aꞌnānj daj. ⁹Sani̱ gataj Señor gunūnj:

Gui̱ꞌyā sinduj rián re̱ꞌ.

Ngaa ni̱ ga̱ꞌue gu̱nucuá re̱ꞌ si achin rián re̱ꞌ.

Ni̱ ngüi̱ nitaj fuerza rian, ni̱ ga̱huin nucuaj ni sij, gui̱ꞌyaj si-fuerza manꞌānj.

Daj gataj Señor gunūnj.

Xiꞌí daj ni̱ huin nia̱ꞌ ruhuāj ngaa nitaj fuerza riānj. Ngaa ni̱ gui̱niꞌi ni ngüi̱ sisi̱ si-fuerza Cristo ꞌyaj sisi̱ hua fuerza riānj. ¹⁰Xiꞌí si ꞌi̱ ruhuāj niꞌyā Cristo, ni̱ huin nia̱ꞌ ruhuāj ngaa nitaj fuerza riānj. Daj si aꞌmi quij ni ngüi̱ riānj nej. Ni̱ achin ni rasu̱n riānj. Ni̱ chranꞌ yunꞌunj ni ngüi̱ yūnj nej. Ni̱ ranꞌānj sayun xiꞌí Cristo nej. Ni̱ ngaa ani ruhuāj sisi̱ nitaj fuerza riānj, ni̱ hué hora daj ga̱huin nucuā, ꞌyaj Yanꞌanj.

¹¹Aꞌmī da̱ꞌ rúnꞌ aꞌmi ꞌngo̱ tsínj sinúnj. Sani̱ guiꞌyaj á re̱ꞌ sisi̱ hué daj gaꞌmī. Daj si hua nia̱n si ga̱ꞌmi sa̱ꞌ ni é re̱ꞌ xiꞌí si ꞌyā. Ni̱ nu̱nj si nitaj si niꞌyān, sani̱ uyan niꞌyān nga̱ tsínj huin achij aꞌmi si-nu̱guanꞌ Yanꞌanj nicoꞌ ni é re̱ꞌ. Ni̱ tsínj apóstol huin ni sij, ruhua á re̱ꞌ. Sani̱ maan si achij nne̱ ni sij. ¹²Ni̱ guiꞌyā nuguanꞌ nico rian ni é re̱ꞌ. Ni̱ ganahuin ni ngüi̱ aꞌnanꞌ, guiꞌyā nej. Ni̱ guiꞌyā ango si sa̱ꞌ scanij ni é re̱ꞌ. Ni̱ daranꞌ ni nuguanꞌ nan digyán sisi̱ huīnj ꞌngo̱ apóstol huin tsínj aꞌmi si-nu̱guanꞌ Jesucristo rian ni ngüi̱. Ni̱ nun ga̱ꞌninꞌ ruhuāj nga̱ sun guiꞌyaj sūnj scanij a ni é re̱ꞌ. ¹³Ni̱ nun gatā gunun a ni é re̱ꞌ si hua nij ruhua á re̱ꞌ daj nga̱ ango ni tsínj nicoꞌ Yanꞌanj. Ni̱ nun ga̱rasūnj rian án re̱ꞌ. Ni̱ xiꞌí daj ni̱ sisi̱ ruhuaj, ni̱ hua nij ruhua á re̱ꞌ daj nga̱ ango ni tsínj nicoꞌ Yanꞌanj, ruhua á re̱ꞌ. Hué dan ni̱ gui̱nicaj á re̱ꞌ ꞌngo̱ niman nico nga̱ si-nu̱guanꞌānj.

Pablo anuncia su tercera visita

¹⁴Yya̱j ni̱ a̱ hua chrūnj gu̱chiꞌ ni̱ꞌyā ru̱huaꞌ yūnj rian ma̱n án re̱ꞌ. Ni̱ hué nan gui̱sij hua̱ꞌnij guchīj rian ma̱n án re̱ꞌ. Ni̱ nitaj si ruhuāj ga̱rasūnj rian án re̱ꞌ mánj. Nitaj si nanoꞌōj rasu̱n nicaj ni é re̱ꞌ mánj. Sani̱ nanoꞌōj ni manꞌan án re̱ꞌ. Ni̱ da̱j rúnꞌ daꞌnī huin a ni é re̱ꞌ riānj. Ni̱ sé daꞌníj néꞌ nanoꞌ sanꞌanj gui̱riꞌ néꞌ mánj. Sani̱ hua nia̱n si na̱noꞌ néꞌ sanꞌanj gui̱riꞌ ni daꞌníj néꞌ. ¹⁵Ni̱ hua nia̱ꞌ ruhuāj gutīnj daranꞌ si nicā xiꞌí niman án re̱ꞌ. Ni̱ ni̱ganj hua ruhuāj gui̱ꞌyaj sūnj si-sun Yanꞌanj scanij a ni é re̱ꞌ. Ni̱ nu̱nj si ni̱nꞌ ruhua ꞌi̱ ruhuāj niꞌyā a ni é re̱ꞌ, sani̱ do̱j ꞌi̱ ruhua á re̱ꞌ niꞌyaj á re̱ꞌ manꞌānj. ¹⁶Ni̱ nun ga̱rasūnj rian án re̱ꞌ mánj. Sani̱ ataj go̱ꞌngo ni é re̱ꞌ sisi̱ digyaꞌ yunꞌūn ni é re̱ꞌ guidaꞌā sun rian án re̱ꞌ, ataj á re̱ꞌ. ¹⁷Ni̱ digyaꞌ yunꞌūn ni é re̱ꞌ ngaa gaꞌnī ni tsínj guisíj rian án re̱ꞌ níꞌ. Sé daj huin mánj. ¹⁸Gachínj jniꞌyā rian tsínj gu̱ꞌnaj Tito sisi̱ gui̱sij ni̱ꞌyaj sij rian ma̱n án re̱ꞌ. Ni̱ gaꞌnī ango jnánj néꞌ gui̱sij nga̱ sij. Ni̱ digyaꞌ yunꞌunj Tito ni é re̱ꞌ nej nánj níꞌ. Sé daj huin mánj. Daj si uyan gani ruhua nu̱ngüej únj Tito. Ni̱ uyan guiꞌyaj nu̱ngüej únj síꞌ.

¹⁹Ni̱ ani ruhua á re̱ꞌ sisi̱ xuꞌuiꞌ únj rian án re̱ꞌ xiꞌí si ga̱ꞌmi a ni é re̱ꞌ gaquinꞌ rian únj níꞌ. Sé daj huin mánj. Daj si niꞌi Yanꞌanj da̱j aꞌmi únj. Ni̱ xiꞌí si nicoꞌ únj Cristo, ni̱ gaꞌmi únj nuguanꞌ nan rian án re̱ꞌ xiꞌí si ꞌi̱ ruhua únj niꞌyaj únj a ni é re̱ꞌ. Daj si huin ruhua únj sisi̱ gu̱xuman sa̱ꞌ ruhua á re̱ꞌ gui̱niꞌyaj á re̱ꞌ Yanꞌanj huin a ni é re̱ꞌ jnān nga̱ xicaꞌuī. ²⁰Daj si nahuij ruhuāj sisi̱ ngaa gui̱sī rian ma̱n án re̱ꞌ, ni̱ si̱ nariꞌīj ni é re̱ꞌ da̱j rúnꞌ huin ruhuāj. Ni̱ hué daj nga̱ ni é re̱ꞌ, ni̱ si̱ nariꞌ ni é re̱ꞌ manꞌānj da̱j rúnꞌ huin ruhua á re̱ꞌ nej mánj. Daj si nahuij ruhuāj sisi̱ ununꞌ dugüiꞌ ni é re̱ꞌ. Ni̱ huin xicoj ruhua ni du̱güiꞌ a ni é re̱ꞌ nej. Ni̱ aꞌman ruhua ni du̱güiꞌ ni é re̱ꞌ. Ni̱ huin yanꞌanj ruhua á re̱ꞌ nej. Ni̱ aꞌmi snanꞌanj ni é re̱ꞌ xiꞌí ni dugüiꞌ ni é re̱ꞌ. Ni̱ nuna ni é re̱ꞌ xiꞌí ni dugüiꞌ ni é re̱ꞌ. Ni̱ aꞌmi nne̱ ni é re̱ꞌ nej. Ni̱ hua sayun rian án re̱ꞌ xiꞌí si ununꞌ ni du̱güiꞌ ni é re̱ꞌ. ²¹Ni̱ nahuij ruhuāj sisi̱ ngaa gu̱chiꞌ ru̱huaꞌ yūnj rian ma̱n ni é re̱ꞌ, ni̱ gui̱riꞌīj si-na̱ꞌaj, gui̱ꞌyaj Yanꞌanj xiꞌí a ni é re̱ꞌ. Ni̱ sisi̱ ruhuaj, ni̱ ga̱cōj xiꞌí ni é re̱ꞌ nga̱ gaquinꞌ guiꞌyaj gaꞌi̱ ni é re̱ꞌ asi̱j ná. Daj si achin si ga̱nani ruhua ni é re̱ꞌ xiꞌí si-ga̱quinꞌ a ni é re̱ꞌ. Ni̱ guiꞌyaj quij go̱ꞌngo a ni é re̱ꞌ. Ni̱ gaꞌmi go̱ꞌngo ni é re̱ꞌ nga̱ squi̱raꞌ ni é re̱ꞌ. Ni̱ hua ango ni gaquinꞌ quij guiꞌyaj go̱ꞌngo ni é re̱ꞌ nej.

¹Hué nan gui̱sij hua̱ꞌnij huā rian ma̱n án re̱ꞌ. Da gui̱sij na̱taꞌ hui̱j hua̱ꞌnij testigo, ni̱ ga̱ꞌue gui̱ꞌyaj yya néꞌ ꞌngo̱ gaquinꞌ. ²Ni̱ da̱j rúnꞌ gataj sinīj ngaa guisíj hui̱j guchiꞌ niꞌyā rian ma̱n án re̱ꞌ, ni̱ hué daj ga̱taj ru̱huaꞌ yúnj rian án re̱ꞌ huin ín re̱ꞌ ni tsínj guiꞌyaj ni gaquinꞌ daj. Ni̱ nitaj si nnēj nga̱ á re̱ꞌ, sani̱ ataj snanꞌān gu̱nun daranꞌ a ni é re̱ꞌ sisi̱ ngaa gui̱sī rian ma̱n ni é re̱ꞌ, ni̱ si̱ gaꞌmi xa̱nj nga̱ ni é re̱ꞌ mánj. ³Daj si huin ruhua á re̱ꞌ xa̱caj á re̱ꞌ cuenta sisi̱ riqui Cristo nuguanꞌ aꞌmī rian án re̱ꞌ. Si̱ gani ruhua á re̱ꞌ sisi̱ nitaj si nucuaj Cristo scanij ni é re̱ꞌ mánj. Daj si nicaj Cristo fuerza scanij a ni é re̱ꞌ. ⁴Xa̱ngaꞌ ni̱ yaco guiranꞌ sij ngaa guinicoꞌ sij rian rugutsi̱. Sani̱ ganáꞌnij sij, ni̱ nne nucuaj sij yya̱j, guiꞌyaj si-fuerza Yanꞌanj. Ni̱ da̱j rúnꞌ guiranꞌ Cristo sayun, ni̱ hué daj ranꞌ únj xiꞌí si nicaj dugüiꞌ únj nga̱ sij. Sani̱ gahuin nucuaj únj, guiꞌyaj si-fuerza Yanꞌanj. Ngaa ni̱ ga̱ꞌue gui̱ꞌyaj sun únj rian án re̱ꞌ.

⁵Gui̱niꞌyaj sa̱ꞌ ni é re̱ꞌ manꞌan án re̱ꞌ sisi̱ hua yya xuman ruhua á re̱ꞌ niꞌyaj á re̱ꞌ Cristo. Ni̱ xa̱caj á re̱ꞌ cuenta sisi̱ hué daj huin. Nun niꞌi a ni é re̱ꞌ sisi̱ nne Cristo niman án re̱ꞌ níꞌ. Asi̱ huin ni é re̱ꞌ tsínj digyaꞌ yunꞌunj sisi̱ xuman ruhua ni é re̱ꞌ a̱ꞌ. ⁶Ni̱ huin ruhuāj sisi̱ xa̱caj á re̱ꞌ cuenta sisi̱ nitaj si digyaꞌ yunꞌunj únj mánj. ⁷Ni̱ achínj jniꞌyaj únj rian Yanꞌanj sisi̱ si̱ guiꞌyaj á re̱ꞌ ni̱ a̱ ꞌngo̱ si xi̱ꞌi mánj. Ni̱ sé si achínj jniꞌyaj únj daj rian Yanꞌanj sisi̱ ga̱ꞌmi sa̱ꞌ ni ngüi̱ xiꞌí únj. Sani̱ hué daj ꞌyaj únj sisi̱ gui̱ꞌyaj sa̱ꞌ ni̱ganj ni é re̱ꞌ. Ni̱ nitaj si ga̱huin sisi̱ ga̱ni ruhua ni ngüi̱ sisi̱ nitaj si níꞌyanj si-nu̱guanꞌ únj mánj. ⁸Daj si si̱ gaꞌue gui̱ranj únj rian nuguanꞌ xa̱ngaꞌ. Sani̱ huin ruhua únj sisi̱ gu̱nun ni ngüi̱ urin nuguanꞌ xa̱ngaꞌ. ⁹Xiꞌí daj ni̱ huin nia̱ꞌ ruhua únj ngaa nitaj nico fuerza nicaj únj sisi̱ hua ran ruhua manꞌan án re̱ꞌ nga̱ si-chrej Yanꞌanj. Ni̱ achínj jniꞌyaj únj rian Yanꞌanj sisi̱ ga̱huin sa̱ꞌ niman án re̱ꞌ. ¹⁰Ni̱ arūnj nuguanꞌ nan rian yanj aꞌnī huaj rian án re̱ꞌ ngaa achin gui̱sī rian ma̱n án re̱ꞌ. Ngaa ni̱ ngaa gui̱sī, ni̱ si̱ gani ruhua á re̱ꞌ sisi̱ ꞌngo̱ tsínj huee huīnj xiꞌí si nicaj sūnj mánj. Ni̱ riqui Señor sun daj riānj sisi̱ ga̱huin ran ruhua á re̱ꞌ nga̱ si-chrej Yanꞌanj. Ni̱ sé güenda si ga̱nꞌanj niꞌya ni é re̱ꞌ huin mánj.

Saludos y doxología final

¹¹Yya̱j ni̱ ruhua na̱huij nuguanꞌ aꞌmī rian án re̱ꞌ huin ín re̱ꞌ jnān nga̱ xicaꞌuī. Ga̱huin nia̱ꞌ ruhua niman án re̱ꞌ. Ni̱ du̱guꞌnunꞌ a ni é re̱ꞌ manꞌan án re̱ꞌ sisi̱ ga̱chej ni é re̱ꞌ ꞌngo̱ chrej sa̱ꞌ. Ni̱ chra̱cuij a ni é re̱ꞌ ꞌngo̱ nuguanꞌ sa̱ꞌ rian jnánj a ni é re̱ꞌ sisi̱ ga̱huin nucuaj sij gui̱nicoꞌ sij Yanꞌanj. Ni̱ uyan ga̱ niman daranꞌ ni é re̱ꞌ nga̱ dugüiꞌ a ni é re̱ꞌ. Ni̱ ga̱ dinꞌinj ruhua á re̱ꞌ nej. Ngaa ni̱ ga̱ne Yanꞌanj nga̱ á re̱ꞌ. Daj si Yanꞌanj ꞌyaj sisi̱ ꞌi̱ ruhua néꞌ niꞌyaj néꞌ ni dugüiꞌ néꞌ. Ni̱ ga̱huin dinꞌinj ruhua néꞌ, gui̱ꞌyaj Yanꞌanj nej. ¹²Ni̱ ga̱run duꞌua go̱ꞌngo a ni é re̱ꞌ ni dugüiꞌ ni é re̱ꞌ ngaa gui̱ꞌyaj saludando a ni é re̱ꞌ ni dugüiꞌ ni é re̱ꞌ. ¹³Daranꞌ ni jnánj néꞌ xuman ruhua niꞌyaj Yanꞌanj aꞌníj ꞌngo̱ nuguanꞌ rian án re̱ꞌ. ¹⁴Ni̱ huin ruhuāj sisi̱ gui̱ꞌyaj Señor Jesucristo sinduj rian án re̱ꞌ. Ni̱ hué daj ga̱ ꞌi̱ ruhua Yanꞌanj ni̱ꞌya á re̱ꞌ nej. Ni̱ gui̱nicaj dugüiꞌ ni̱ganj Espíritu Santo nga̱ ni é re̱ꞌ, ruhuāj aj. Amén.