1 Tesalonicenses

PRIMERA EPÍSTOLA DEL APÓSTOL SAN PABLO A LOS TESALONICENSES

Salutación

¹Huēj huin Pablo. Ni̱ arun aninꞌ únj Silvano nga̱ Timoteo yanj carta nan aꞌníj únj huaj rian án re̱ꞌ huin ín re̱ꞌ ni tsínj nicoꞌ Yanꞌanj ma̱n xumanꞌ Tesalónica. Ni̱ nicaj dugüiꞌ a ni é re̱ꞌ nga̱ Yanꞌanj huin chrej néꞌ nga̱ Señor Jesucristo. Ni̱ huin ruhua aninꞌ únj sisi̱ gui̱ꞌyaj Yanꞌanj nga̱ Señor Jesucristo sinduj rian án re̱ꞌ ga̱huin dinꞌinj chruhua á re̱ꞌ.

Ejemplo de los tesalonicenses

²Ni̱ganj aꞌuiꞌ aninꞌ únj si guruhua Yanꞌanj xiꞌí daranꞌ a ni é re̱ꞌ. Ni̱ nanun ruhua únj xiꞌí a ni é re̱ꞌ ngaa achínj jniꞌyaj únj rian Yanꞌanj. ³Ni̱ yaꞌyoj ngaa achínj jniꞌyaj aninꞌ únj rian Yanꞌanj huin chrej néꞌ, ni̱ nanun ruhua únj da̱j guiꞌyaj sun sa̱ꞌ á re̱ꞌ si-sun Yanꞌanj xiꞌí si xuman ruhua á re̱ꞌ niꞌyaj á re̱ꞌ Jesús. Ni̱ xiꞌí si ꞌi̱ ruhua á re̱ꞌ niꞌyaj á re̱ꞌ Yanꞌanj, ni̱ guiꞌyaj sun sa̱ꞌ á re̱ꞌ si-sun Señor. Ni̱ gunucuaj á re̱ꞌ rian ni sayun xiꞌí si anaꞌuij ni é re̱ꞌ sisi̱ chra̱cuij yunꞌunj Señor Jesucristo a ni é re̱ꞌ. ⁴Ni̱ ꞌi̱ ruhua Yanꞌanj niꞌya a ni é re̱ꞌ huin ín re̱ꞌ jnánj néꞌ nga̱ xicaꞌuij néꞌ. Ni̱ niꞌi aninꞌ únj sisi̱ hué Yanꞌanj nacui ni é re̱ꞌ sisi̱ gui̱nicoꞌ a ni é re̱ꞌ Yanꞌanj.

⁵Daj si ngaa gaꞌmi únj nuguanꞌ sa̱ꞌ rian án re̱ꞌ, ni̱ sé urin nuguanꞌ gaꞌmi únj ganꞌanj únj. Sani̱ gaꞌmi únj nga̱ si-fuerza Espíritu Santo. Ni̱ gahuin yya ruhua únj sisi̱ nuguanꞌ xa̱ngaꞌ huin nuguanꞌ gaꞌmi únj. Ni̱ niꞌi sa̱ꞌ ni é re̱ꞌ da̱j guiꞌyaj únj ngaa guimán únj scanij a ni é re̱ꞌ. Daj si nanoꞌ únj sisi̱ da̱j ga̱ꞌue ga̱huin sa̱ꞌ ruhua ni é re̱ꞌ aj. ⁶Ni̱ gaxi̱ꞌi a ni é re̱ꞌ guiꞌyaj gue̱ a ni é re̱ꞌ da̱j rúnꞌ guiꞌyā nga̱ da̱j rúnꞌ ꞌyaj gue̱ Señor nej. Ni̱ nu̱nj si guiranꞌ a ni é re̱ꞌ nico sayun guiꞌyaj ni ngüi̱ nun xu̱man ruhua niꞌyaj Jesús, sani̱ ꞌngo̱ guinicoꞌ a ni é re̱ꞌ si-nu̱guanꞌ Yanꞌanj. Ni̱ gahuin nia̱ꞌ ruhua á re̱ꞌ, guiꞌyaj Espíritu Santo. ⁷Xiꞌí daj ni̱ digyán ni é re̱ꞌ ꞌngo̱ ducuánj sa̱ꞌ rian ni ngüi̱ xuman ruhua niꞌyaj Yanꞌanj mán estado Macedonia nga̱ estado Acaya.

⁸Ni̱ gaxaꞌni̱ si-nu̱guanꞌ Señor scanij ni ngüi̱ mán estado Macedonia nga̱ estado Acaya, guiꞌyaj á re̱ꞌ. Sani̱ sé urin nu̱ngüej estado daj, sani̱ gaxaꞌni̱ nuguanꞌ daj ni̱nꞌ ga̱chraꞌ chruhua xungüi̱, guiꞌyaj á re̱ꞌ. Ni̱ niꞌi daranꞌ ni sij da̱j xuman ruhua á re̱ꞌ niꞌyaj á re̱ꞌ Yanꞌanj. Xiꞌí daj ni̱ nitaj chrej hua sisi̱ ga̱ꞌmi aninꞌ únj rian ni ngüi̱ daj xiꞌí si guiꞌyaj á re̱ꞌ. ⁹Ni̱ aꞌmi manꞌan ni ngüi̱ da̱j gahuin ngaa guchiꞌ aninꞌ únj rian ma̱n án re̱ꞌ. Aꞌmi ni sij sisi̱ gaꞌmi sa̱ꞌ á re̱ꞌ nga̱ únj ngaa gane únj nga̱ á re̱ꞌ. Ni̱ aꞌmi ni sij sisi̱ duna á re̱ꞌ yanꞌanj ꞌyaj raꞌa ni sij. Ni̱ gaxi̱ꞌi ni é re̱ꞌ guinicoꞌ a ni é re̱ꞌ Yanꞌanj hua ni̱ꞌnaꞌ huin Yanꞌanj xa̱ngaꞌ aj. ¹⁰Ni̱ hué daj aꞌmi ni sij sisi̱ anaꞌuij a ni é re̱ꞌ sisi̱ na̱nicaj Jesús ga̱ꞌnaꞌ sij xataꞌ huin sij daꞌníj Yanꞌanj anj. Ni̱ ganáꞌnij sij scanij ni níman, guiꞌyaj Yanꞌanj. Ni̱ Jesús huin si ga̱nacaj néꞌ ngaa ga̱huin nico castigo ni ngüi̱ daꞌui gaquinꞌ, gui̱ꞌyaj Yanꞌanj.

Ministerio de Pablo en Tesalónica

¹Ni̱ niꞌi a ni é re̱ꞌ sisi̱ ngaa guchiꞌ aninꞌ únj rian ma̱n a ni é re̱ꞌ, ni̱ sé si guchiꞌ yu̱n únj huin ín re̱ꞌ jnánj néꞌ nga̱ xicaꞌuij néꞌ mánj. ²Ni̱ hua niꞌi a ni é re̱ꞌ da̱j guiranꞌ únj sayun xumanꞌ Filipos ngaa gaꞌmi quij ni sij rian únj. Ni̱ nu̱nj si ducu gununꞌ ni ngüi̱ ma̱n xánj án re̱ꞌ nga̱ únj, sani̱ chracuij Yanꞌanj sisi̱ ga̱ꞌmi nucuaj únj rian a ni é re̱ꞌ nuguanꞌ sa̱ꞌ sisi̱ ga̱nacaj Yanꞌanj ni ngüi̱ aj.

³Ni̱ nun ga̱chej ruhua aninꞌ únj nga̱ nuguanꞌ gaꞌmi únj rian án re̱ꞌ mánj. Ni̱ nitaj si hua quij niman únj mánj. Ni̱ nitaj si huin ruhua únj di̱gyaꞌ yunꞌunj únj a ni é re̱ꞌ mánj. ⁴Sani̱ garanꞌ ruhua Yanꞌanj nga̱ si guiꞌyaj únj. Ni̱ garasu̱n Yanꞌanj únj sisi̱ ga̱ꞌmi únj si-nu̱guanꞌ Yanꞌanj huin nuguanꞌ sa̱ꞌ rian ni ngüi̱. Ni̱ hué daj aꞌmi gue̱ únj. Ni̱ sé si aꞌmi únj sisi̱ ga̱ranꞌ ruhua ni ngüi̱ nga̱ nuguanꞌ aꞌmi únj mánj. Sani̱ aꞌmi únj nuguanꞌ huin ruhua Yanꞌanj ga̱ꞌmi únj rian ni ngüi̱. Ni̱ acaj Yanꞌanj cuenta da̱j hua niman únj. ⁵Ni̱ niꞌi a ni é re̱ꞌ sisi̱ nitaj a̱man digyaꞌ yunꞌunj únj manꞌan án re̱ꞌ da̱j rúnꞌ ꞌyaj ꞌngo̱ tsínj daj. Aꞌmi sa̱ꞌ sij xiꞌí re̱ꞌ, sani̱ ni̱ni huin niman sij. Ni̱ nitaj si nanoꞌ únj ango ducuánj sisi̱ ri̱qui a ni é re̱ꞌ sanꞌanj gui̱ꞌyaj gana únj mánj. Ni̱ Yanꞌanj niꞌi sisi̱ sé daj ꞌyaj únj mánj. ⁶Ni̱ nun nanoꞌ aninꞌ únj sisi̱ ga̱ꞌmi sa̱ꞌ ni ngüi̱ xiꞌí únj mánj. Ni̱ nitaj si nanoꞌ únj si ga̱ꞌmi sa̱ꞌ a ni é re̱ꞌ xiꞌí únj mánj. Sani̱ hua si-chrej únj si ga̱chinj únj si chra̱cuij a ni é re̱ꞌ únj xiꞌí si huin únj tsínj apóstol rian Cristo.

⁷Sani̱ ngaa guimán únj scanij a ni é re̱ꞌ, ni̱ guiꞌyaj únj da̱j rúnꞌ ꞌyaj ꞌngo̱ yunꞌunj xa̱na ngaa dugumi ꞌueé unj daꞌníj unj. ⁸Ni̱ ni̱nꞌ ruhua gahuin ꞌi̱ ruhua aninꞌ únj niꞌyaj únj ni é re̱ꞌ. Xiꞌí daj ni̱ sé urin si-nu̱guanꞌ Yanꞌanj gaꞌmi únj rian a ni é re̱ꞌ, ruhua únj, sani̱ gaꞌuej ruhua únj gui̱ꞌyaj sun únj rian a ni é re̱ꞌ nej. Daj si ni̱nꞌ ruhua gahuin ꞌi̱ ruhua únj niꞌyaj únj a ni é re̱ꞌ aj. ⁹Ni̱ niꞌi a ni é re̱ꞌ da̱j guiꞌyaj sun únj ngaa guimán únj scanij ni é re̱ꞌ sisi̱ da̱j gui̱ꞌyaj únj gui̱riꞌ únj si xa̱ únj. Nugüi ni̱ganꞌ guiꞌyaj sun únj. Daj si nitaj si huin ruhua únj ga̱rasun únj rian án re̱ꞌ ngaa gaꞌmi únj si-nu̱guanꞌ Yanꞌanj rian án re̱ꞌ mánj.

¹⁰Ni̱ niꞌi a ni é re̱ꞌ, ni̱ hué daj niꞌi Yanꞌanj sisi̱ guiꞌyaj sa̱ꞌ únj ngaa guimán únj scanij ni é re̱ꞌ huin ni é re̱ꞌ ni tsínj xuman ruhua niꞌyaj Yanꞌanj. Ni̱ dagahuin ni̱ca únj. Ni̱ nitaj ꞌngo̱ si guiꞌyaj únj sisi̱ ga̱ꞌmi gaquinꞌ ni ngüi̱ xiꞌí únj mánj. ¹¹Ni̱ niꞌi a ni é re̱ꞌ sisi̱ da̱j rúnꞌ ꞌyaj ꞌngo̱ tsínj ngaa aꞌmi sa̱ꞌ sij sisi̱ ga̱huin nia̱ꞌ ruhua daꞌníj sij, ni̱ hué daj guiꞌyaj únj nga̱ go̱ꞌngo a ni é re̱ꞌ. Ni̱ riqui únj chrej rian án re̱ꞌ nej. ¹²Ni̱ gaꞌninꞌ aninꞌ únj sun rian a ni é re̱ꞌ sisi̱ ga̱che ni̱ca a ni é re̱ꞌ si-chrej Yanꞌanj da̱j rúnꞌ ꞌyaj ni tsínj nicoꞌ sa̱ꞌ Yanꞌanj anj. Ni̱ aquínj Yanꞌanj sisi̱ ga̱ne a ni é re̱ꞌ rian hua ꞌueé nicaj sun Yanꞌanj.

¹³Xiꞌí daj ni̱ ni̱ganj aꞌuiꞌ únj si guruhua Yanꞌanj. Daj si ngaa gunun a ni é re̱ꞌ si-nu̱guanꞌ Yanꞌanj gaꞌmi únj rian án re̱ꞌ, ni̱ nahuin raꞌa yya a ni é re̱ꞌ nuguanꞌ daj sisi̱ hué si-nu̱guanꞌ Yanꞌanj huin yya. Ni̱ nun ga̱taj a ni é re̱ꞌ sisi̱ si-nu̱guanꞌ ni tsínj huin mánj. Ni̱ si-nu̱guanꞌ Yanꞌanj huin xa̱ngaꞌ yya. Ni̱ ꞌyaj sa̱ꞌ nuguanꞌ daj chruhua niman ni é re̱ꞌ huin ni é re̱ꞌ ni tsínj xuman ruhua niꞌyaj Yanꞌanj. ¹⁴Ni̱ ngaa guiranꞌ ni é re̱ꞌ huin jnánj néꞌ sayun, guiꞌyaj ni tsínj ma̱n xánj ni é re̱ꞌ, ni̱ uyan guiranꞌ ni é re̱ꞌ nga̱ ni tsínj nicoꞌ Yanꞌanj ma̱n estado Judea huin ni sij ni tsínj nicaj dugüiꞌ nga̱ Cristo Jesús. Daj si guiranꞌ ni sij sayun, guiꞌyaj ni tsínj israelita huin ni síꞌ tsínj xánj ni sij. ¹⁵Ni̱ hué ni tsínj israelita daj dagahuiꞌ Señor Jesús. Ni̱ dagahuiꞌ ni sij ni tsínj gaꞌmi si-nu̱guanꞌ Yanꞌanj asi̱j ná. Ni̱ guiri ni sij ne̱ꞌ chrej xe̱ꞌ ni únj nej. Ni̱ nun aranꞌ ruhua Yanꞌanj si ꞌyaj ni sij. Ni̱ ununꞌ ni sij nga̱ daranꞌ ni ngüi̱. ¹⁶Ni̱ ngaa huin ruhua únj ga̱ꞌmi únj rian ni ngüi̱ ꞌna̱ꞌ anéj chrej sisi̱ na̱caj Yanꞌanj ni síꞌ, ni̱ naꞌuej ruhua ni sij sisi̱ hué daj ga̱ꞌmi únj mánj. Xiꞌí daj ni̱ huaj daꞌui ni sij gaquinꞌ. Ni̱ xiꞌí daj ducu gaꞌman ruhua Yanꞌanj niꞌya ni sij.

Ausencia de Pablo de la iglesia

¹⁷Ni̱ nu̱nj si nitaj si nicaj dugüiꞌ néꞌ xiꞌí si gahuin ni̱ni únj do̱j rian án re̱ꞌ, sani̱ ni̱ganj nicaj dugüiꞌ niman néꞌ huin ín re̱ꞌ jnánj néꞌ nga̱ xicaꞌuij néꞌ. Ni̱ ni̱nꞌ ruhua hua ruhua únj gu̱chiꞌ ni̱ꞌyaj únj rian ma̱n án re̱ꞌ aj. ¹⁸Ni̱ da gaꞌi̱ gahuin ruhua aninꞌ únj gu̱chiꞌ ni̱ꞌyaj únj rian ma̱n a ni é re̱ꞌ. Ni̱ nicoꞌ huaj hué daj gahuin ruhua manꞌānj, huīnj Pablo. Sani̱ guiránj sichre Satanás chrej rian únj gu̱chiꞌ ni̱ꞌyaj únj rian ma̱n án re̱ꞌ. ¹⁹Ni̱ anaꞌuij únj sisi̱ ngaa ga̱ꞌnaꞌ Señor Jesucristo, ni̱ gui̱ꞌyaj sa̱ꞌ sij nga̱ únj xiꞌí a ni é re̱ꞌ. Ni̱ ga̱huin nia̱ꞌ ruhua únj, gui̱ꞌyaj á re̱ꞌ nej. Ni̱ di̱gyán án re̱ꞌ sisi̱ guiꞌyaj sa̱ꞌ únj si-sun Yanꞌanj scanij a ni é re̱ꞌ aj. ²⁰Xa̱ngaꞌ ni guiꞌyaj á re̱ꞌ sisi̱ hua sa̱ꞌ si-sun únj rian Yanꞌanj. Ni̱ huin nia̱ꞌ ruhua únj, guiꞌyaj á re̱ꞌ nej.

¹Ngaa ni̱ ngaa nun gu̱nucuaj únj gu̱chiꞌ únj rian ma̱n án re̱ꞌ, ni̱ gani ruhua únj sisi̱ gu̱na hui̱j gue̱ únj xumanꞌ Atenas. ²Ni̱ gaꞌníj únj jnánj néꞌ Timoteo sisi̱ gu̱chiꞌ sij rian ma̱n án re̱ꞌ. Daj si huin sij ꞌngo̱ tsínj ꞌyaj sun nu̱guanꞌan nga̱ únj rian Yanꞌanj. Ni̱ aꞌmi únj nuguanꞌ sa̱ꞌ xiꞌí Cristo rian ni ngüi̱. Ni̱ gaꞌníj únj gu̱chiꞌ sij rian ma̱n án re̱ꞌ sisi̱ ga̱ ni̱ca ruhua ni é re̱ꞌ, gui̱ꞌyaj sij. Ni̱ gui̱ꞌyaj fuerza sij sisi̱ gu̱xuman sa̱ꞌ ruhua ni é re̱ꞌ ni̱ꞌyaj á re̱ꞌ Yanꞌanj anj. ³Ni̱ guiꞌyaj sij sisi̱ si̱ gahuin ruhua ni é re̱ꞌ xiꞌí sayun ranꞌ a ni é re̱ꞌ, ruhua únj. Ni̱ niꞌi a ni é re̱ꞌ sisi̱ hua nia̱n gui̱ranꞌ néꞌ sayun daj. ⁴Ni̱ ngaa guimán únj scanij ni é re̱ꞌ, ni̱ gataj chru̱n únj gunun a ni é re̱ꞌ sisi̱ gui̱ranꞌ néꞌ sayun daj. Ni̱ da̱j rúnꞌ niꞌi ni é re̱ꞌ, ni̱ hué daj gahuin. ⁵Ngaa ni̱ nun gu̱nucuā ga̱ mánj. Xiꞌí daj ni̱ gaꞌnī ꞌngo̱ tsínj daj rian ma̱n án re̱ꞌ sisi̱ na̱chinꞌ snanꞌanj sij da̱j xuman ruhua ni é re̱ꞌ niꞌyaj ni é re̱ꞌ Yanꞌanj. Daj si guxuꞌuīj sisi̱ duna ni é re̱ꞌ si-chrej Yanꞌanj xiꞌí si digyaꞌ yunꞌunj sichre ni é re̱ꞌ. Ngaa ni̱ gue̱reꞌej si-sun únj guiꞌyaj sun únj scanij ni é re̱ꞌ, gui̱ꞌyaj sichre.

⁶Sani̱ ngaa nanica̱j Timoteo ganꞌanj sij xánj án re̱ꞌ, ni̱ nicaj sij nuguanꞌ sa̱ꞌ nasíj sij sisi̱ xuman sa̱ꞌ ruhua ni é re̱ꞌ niꞌyaj á re̱ꞌ Yanꞌanj, ataj sij. Ni̱ ꞌi̱ ruhua ni é re̱ꞌ niꞌyaj ni é re̱ꞌ ni dugüiꞌ ni é re̱ꞌ, ataj sij nej. Ni̱ nataꞌ sij sisi̱ ni̱ganj nanun sa̱ꞌ ruhua ni é re̱ꞌ niꞌyaj ni é re̱ꞌ únj. Ni̱ ꞌi̱ ruhua ni é re̱ꞌ niꞌyaj ni é re̱ꞌ únj, ataj sij nej. Ni̱ da̱j rúnꞌ huin ruhua únj gu̱chiꞌ ni̱ꞌyaj únj rian ma̱n ni é re̱ꞌ, ni̱ hué daj huin ruhua ni é re̱ꞌ ga̱ꞌnaꞌ ni̱ꞌyaj ni é re̱ꞌ rian ma̱n únj, ataj sij gunun únj. ⁷Hué dan ni̱ scanij ni sayun ranꞌ únj, ni̱ gahuin nia̱ꞌ ruhua únj gunun únj sisi̱ xuman ruhua ni é re̱ꞌ niꞌyaj ni é re̱ꞌ Yanꞌanj huin ín re̱ꞌ jnánj néꞌ nga̱ xicaꞌuij néꞌ. ⁸Xiꞌí si hua ni̱ca ruhua ni é re̱ꞌ nga̱ si-chrej Señor, ni̱ huin nia̱ꞌ ruhua únj ga̱che únj si-chrej Yanꞌanj, ꞌyaj ni é re̱ꞌ. ⁹Ni̱ ni̱nꞌ ruhua huin ruhua aninꞌ únj ga̱ꞌuiꞌ únj si guruhua Yanꞌanj, ꞌyaj á re̱ꞌ. Ni̱ ni̱nꞌ ruhua huin nia̱ꞌ ruhua únj rian Yanꞌanj xiꞌí a ni é re̱ꞌ aj. ¹⁰Nugüi ni̱ganꞌ achínj jniꞌyaj únj rian Yanꞌanj sisi̱ ri̱qui Yanꞌanj, ni̱ gu̱chiꞌ ni̱ꞌyaj únj rian ma̱n án re̱ꞌ. Daj si huin ruhua únj di̱gyán únj rian án re̱ꞌ nuguanꞌ gui̱ꞌyaj sisi̱ gu̱xuman sa̱ꞌ ruhua ni é re̱ꞌ ni̱ꞌyaj ni é re̱ꞌ Yanꞌanj anj.

¹¹Ni̱ huin ruhua únj sisi̱ chra̱cuij Yanꞌanj huin chrej néꞌ nga̱ Señor Jesús sisi̱ ga̱ꞌue gu̱chiꞌ ni̱ꞌyaj únj rian ma̱n án re̱ꞌ. ¹²Ni̱ huin ruhua únj sisi̱ ga̱huin ꞌi̱ ruhua á re̱ꞌ gui̱niꞌyaj a ni é re̱ꞌ go̱ꞌngo ni dugüiꞌ a ni é re̱ꞌ, gui̱ꞌyaj Señor. Ni̱ da̱j rúnꞌ ꞌi̱ ruhua únj niꞌyaj únj a ni é re̱ꞌ, ni̱ hué daj ga̱ ꞌi̱ ruhua á re̱ꞌ gui̱niꞌyaj a ni é re̱ꞌ daranꞌ ni ngüi̱, ruhua únj. ¹³Ni̱ huin ruhua únj sisi̱ ga̱huin ni̱ca ruhua á re̱ꞌ, gui̱ꞌyaj Señor. Ni̱ ga̱huin sa̱ꞌ niman ni é re̱ꞌ rian Yanꞌanj. Ni̱ si̱ daꞌui a ni é re̱ꞌ gaquinꞌ rian Yanꞌanj huin chrej néꞌ ngaa ga̱ꞌnaꞌ Señor Jesús nga̱ daranꞌ ni ngüi̱ sa̱ꞌ nicaj dugüiꞌ nga̱ sij, ruhua únj.

La vida que agrada a Dios

¹Hué dan ni̱ xiꞌí si nicaj dugüiꞌ a ni é re̱ꞌ nga̱ Señor Jesús, ni̱ achínj jniꞌyaj únj rian a ni é re̱ꞌ sisi̱ ga̱ gue̱ da̱gahuin a ni é re̱ꞌ si digyán únj rian a ni é re̱ꞌ huin ín re̱ꞌ jnánj néꞌ nga̱ xicaꞌuij néꞌ. Daj si gataj únj gunun a ni é re̱ꞌ da̱j gui̱ꞌyaj á re̱ꞌ chruhua xungüi̱ nan. Ngaa ni̱ ga̱ꞌue gui̱ꞌyaj a ni é re̱ꞌ si ga̱ranꞌ ruhua Yanꞌanj. ²Daj si hua niꞌi ni é re̱ꞌ da̱j hua nuguanꞌ gaꞌninꞌ únj sun rian án re̱ꞌ xiꞌí Señor Jesús. ³Ni̱ huin ruhua Yanꞌanj sisi̱ ga̱huin sa̱ꞌ niman án re̱ꞌ rian Yanꞌanj. Ni̱ naꞌuej ruhua Yanꞌanj sisi̱ gui̱ꞌyaj squi̱raꞌ go̱ꞌngo a ni é re̱ꞌ ni ngüi̱ mánj. ⁴Ni̱ huin ruhua Yanꞌanj sisi̱ ga̱ne ꞌueé go̱ꞌngo ni é re̱ꞌ nga̱ nica̱ a ni é re̱ꞌ. Ni̱ gui̱nun yanꞌanj án re̱ꞌ nica̱ á re̱ꞌ nej. ⁵Ni̱ si̱ gani quij ruhua a ni é re̱ꞌ xiꞌí ni yunꞌunj xa̱na da̱j rúnꞌ ꞌyaj ni ngüi̱ nun niꞌi Yanꞌanj mánj. ⁶Ni̱ ga̱ cuidado rian ni é re̱ꞌ sisi̱ si̱ digyaꞌ yunꞌunj a ni é re̱ꞌ jnánj ni é re̱ꞌ xiꞌí ni yunꞌunj xa̱na. Daj si Señor huin si gui̱ꞌyaj nico castigo daranꞌ ni tsínj ꞌyaj daj. Ni̱ hué daj hua gataj chru̱n únj rian ni é re̱ꞌ. ⁷Daj si nun ga̱quinj Yanꞌanj néꞌ sisi̱ ga̱che néꞌ ꞌngo̱ chrej quij hua. Sani̱ huin ruhua Yanꞌanj sisi̱ ga̱huin sa̱ꞌ niman néꞌ rian Yanꞌanj. ⁸Ngaa ni̱ tsínj naꞌuej ruhua da̱gahuin nuguanꞌ digyán únj nan, ni̱ nun dagahuin sij rian manꞌan Yanꞌanj. Daj si sé si-nu̱guanꞌ ni tsínj huin nuguanꞌ digyán únj. Ni̱ Yanꞌanj huin si riqui Espíritu Santo rian néꞌ.

⁹Ni̱ sé si níꞌyanj sisi̱ ga̱run únj nuguanꞌ guchij rian ma̱n án re̱ꞌ sisi̱ ga̱huin ꞌi̱ ruhua ni é re̱ꞌ ni̱ꞌyaj ni é re̱ꞌ ni dugüiꞌ ni é re̱ꞌ. Daj si hua digyán Yanꞌanj rian án re̱ꞌ sisi̱ ga̱huin ꞌi̱ ruhua go̱ꞌngo ni é re̱ꞌ nga̱ ni dugüiꞌ ni é re̱ꞌ aj. ¹⁰Ni̱ hué daj ꞌyaj ni é re̱ꞌ nga̱ daranꞌ ni tsínj nicoꞌ Yanꞌanj ma̱n estado Macedonia. Sani̱ achínj jniꞌyaj únj rian án re̱ꞌ sisi̱ ga̱huin ruhua á re̱ꞌ doj ni̱ꞌyaj á re̱ꞌ ni dugüiꞌ néꞌ huin ín re̱ꞌ jnánj néꞌ nga̱ xicaꞌuij néꞌ. ¹¹Ni̱ gui̱ꞌyaj fuerza á re̱ꞌ sisi̱ gui̱man dinꞌinj ni é re̱ꞌ. Ni̱ si̱ nahuij ruhua á re̱ꞌ nga̱ si-sun dugüíꞌ re̱ꞌ mánj. Ni̱ gui̱ꞌyaj sun ni é re̱ꞌ nga̱ raꞌa ni é re̱ꞌ da̱j rúnꞌ gaꞌninꞌ únj sun rian ni é re̱ꞌ aj. ¹²Ngaa ni̱ ga̱ꞌmi achij ꞌueé a ni é re̱ꞌ rian ni tsínj nun xu̱man ruhua ni̱ꞌyaj Yanꞌanj. Ni̱ si̱ gachin ꞌngo̱ rasu̱n rian ni é re̱ꞌ mánj.

La venida del Señor

¹³Ni̱ huin ruhua aninꞌ únj si gui̱niꞌi ni é re̱ꞌ da̱j gui̱ranꞌ ni tsínj gahuiꞌ huin ni tsínj nicoꞌ Jesús huin ín re̱ꞌ jnánj néꞌ nga̱ xicaꞌuij néꞌ. Ngaa ni̱ si̱ nani ruhua á re̱ꞌ da̱j rúnꞌ ꞌyaj ango ni ngüi̱ mánj. Daj si nani ruhua ni sij xiꞌí si si̱ ganáꞌnij ni dugüiꞌ ni sij, ruhua ni sij. ¹⁴Ni̱ xuman ruhua néꞌ sisi̱ gahuiꞌ Jesús. Ni̱ ganáꞌnij sij scanij ni niman, guiꞌyaj Yanꞌanj. Ni̱ xiꞌí daj niꞌi néꞌ sisi̱ Yanꞌanj gui̱ꞌyaj ga̱naꞌnij ni ngüi̱ guinicaj dugüiꞌ nga̱ Cristo ngaa gahuiꞌ ni sij. Ni̱ ga̱ꞌnaꞌ nu̱guanꞌan ni sij nga̱ Jesús, gui̱ꞌyaj Yanꞌanj.

¹⁵Hué dan ni̱ néꞌ tsínj gui̱man da güi ga̱ꞌnaꞌ Señor chruhua xungüi̱, ni̱ si̱ gahuin rian néꞌ rian ni ngüi̱ hua gahuiꞌ mánj. Ni̱ hué daj ataj únj gu̱nun a ni é re̱ꞌ, guiꞌyaj Señor. ¹⁶Daj si ga̱guáj manꞌan Señor ngaa ga̱hui sij xataꞌ na̱nij sij rian xungüi̱ nan. Ni̱ nicaj sun si-na̱ne Señor gu̱nun ni ngüi̱. Ni̱ gu̱nun ni ngüi̱ si-na̱ne ꞌngo̱ ángel huin achij ni̱nꞌ. Ni̱ gu̱nun ni sij si ga̱ꞌyanj si-trompeta Yanꞌanj anj. Ngaa ni̱ ni ngüi̱ guinicaj dugüiꞌ nga̱ Cristo huin ni tsínj gahuiꞌ, ni̱ hua sini ni sij ga̱naꞌnij aj. ¹⁷Ni̱ néꞌ gu̱na gui̱man, ni̱ ni̱caj Yanꞌanj néꞌ ga̱nꞌanj nu̱guanꞌan néꞌ nga̱ ni ngüi̱ ganáꞌnij daj rian nga. Ni̱ na̱riꞌ dugüiꞌ daranꞌ néꞌ nga̱ Señor xataꞌ. Ni̱ ga̱ne ni̱ganj néꞌ nga̱ Señor. ¹⁸Hué dan ni̱ na̱riꞌ nucuaj niman go̱ꞌngo a ni é re̱ꞌ, gui̱ꞌyaj ni nuguanꞌ nan, ruhuāj aj.

¹Sé si hua nia̱n ga̱run aninꞌ únj nuguanꞌ gu̱chij rian án re̱ꞌ xiꞌí güi ga̱ꞌnaꞌ ru̱huaꞌ yún Cristo huin ín re̱ꞌ jnánj néꞌ nga̱ xicaꞌuij néꞌ. ²Daj si niꞌi sa̱ꞌ ni é re̱ꞌ sisi̱ da̱j rúnꞌ nun niꞌi néꞌ u̱n güi ga̱tu tsínj tu̱ gui̱ꞌyaj tu̱ síꞌ ne̱ꞌ ya̱nꞌ, ni̱ hué daj nun niꞌi néꞌ u̱n güi ga̱ꞌnaꞌ Señor mánj. ³Ni̱ ꞌngo̱ güi ni̱ ga̱taj ni ngüi̱: “Hua dinꞌinj mán daranꞌ néꞌ. Ni̱ hua xitinj mán néꞌ.” Daj ga̱taj ni sij. Ngaa ni̱ hué gue̱ hora daj, ni̱ nasi̱nunj ga̱ꞌnaꞌ ꞌngo̱ sayun rian ni sij. Ni̱ da̱j rúnꞌ ranꞌ ꞌngo̱ yunꞌunj xa̱na ngaa ruhua ga̱ꞌnga daꞌníj unj, ni̱ hué daj gui̱ranꞌ ni ngüi̱ daj. Ni̱ si̱ ganani ni sij mánj.

⁴Sani̱ axa̱ꞌ á re̱ꞌ, ni̱ nitaj chrej huaj si gu̱xuꞌuiꞌ a ni é re̱ꞌ da̱j rúnꞌ xuꞌuiꞌ ni tsínj niꞌi si ga̱tu tsínj tu̱ huin ín re̱ꞌ jnánj néꞌ nga̱ xicaꞌuij néꞌ. Daj si nitaj si ma̱n ni é re̱ꞌ rian hua ru̱miꞌ mánj. ⁵Daranꞌ ni é re̱ꞌ mán guníꞌyanj. Ni̱ mán ni é re̱ꞌ rian xigui̱n yanꞌa̱n. Daj si xigui̱n chruhua niman néꞌ, guiꞌyaj Yanꞌanj. Nitaj si mán néꞌ rian hua ru̱miꞌ mánj. ⁶Hué dan ni̱ si̱ gatoj néꞌ da̱j rúnꞌ ꞌyaj ango ni ngüi̱ mánj. Sani̱ gu̱nun sa̱ꞌ ruhua néꞌ ga̱naꞌuij néꞌ güi ga̱ꞌnaꞌ Señor. Ni̱ si̱ guixini néꞌ mánj. ⁷Ni tsínj atoj, ni̱ atoj ni sij ne̱ꞌ ni̱. Ni̱ ni tsínj hua xi̱ni, ni̱ hua xi̱ni ni sij ne̱ꞌ ni̱ huin ni sij ni tsínj nun xu̱man ruhua ni̱ꞌyaj Yanꞌanj. ⁸Sani̱ néꞌ mán rian xigui̱n sa̱ꞌ, ni̱ hua nia̱n si ni̱ganj ga̱ cuidado néꞌ nga̱ si gui̱ꞌyaj néꞌ. Ni̱ da̱j rúnꞌ dugumi ꞌngo̱ snado niman sij nu̱n sij ꞌngo̱ gató gagaꞌ, ni̱ hué daj du̱gumi néꞌ manꞌan néꞌ xiꞌí si xuman sa̱ꞌ ruhua néꞌ niꞌyaj néꞌ Yanꞌanj. Ni̱ ga̱huin ꞌi̱ ruhua néꞌ ni̱ꞌyaj néꞌ ni dugüiꞌ néꞌ. Ni̱ da̱j rúnꞌ dugumi ꞌngo̱ snado manꞌan sij ngaa nu̱n chra̱ sij ꞌngo̱ jnahui goꞌo, ni̱ hué daj du̱gumi néꞌ manꞌan néꞌ xiꞌí si gahuin yya ruhua néꞌ sisi̱ na̱caj Yanꞌanj néꞌ.

⁹Daj si nun ga̱ni ruhua Yanꞌanj sisi̱ ga̱huin néꞌ castigo mánj. Sani̱ gani ruhua Yanꞌanj na̱ca néꞌ xiꞌí Señor Jesucristo aj. ¹⁰Ni̱ gahuiꞌ Jesucristo xiꞌí néꞌ. Ni̱ xiꞌí daj, asi̱ mán néꞌ, asi̱ ga̱huiꞌ néꞌ, ni̱ gui̱man nu̱guanꞌan néꞌ nga̱ sij. ¹¹Xiꞌí daj ni̱ da̱j rúnꞌ ꞌyaj á re̱ꞌ, ni̱ ga̱ gue̱ gui̱ꞌyaj fuerza á re̱ꞌ sisi̱ na̱riꞌ nucuaj niman ni du̱güiꞌ ni é re̱ꞌ. Ni̱ ga̱ ni̱ca ruhua go̱ꞌngo ni é re̱ꞌ nga̱ si-nu̱guanꞌ Yanꞌanj, gui̱ꞌyaj á re̱ꞌ nej.

Pablo exhorta a los hermanos

¹²Achínj jniꞌyaj aninꞌ únj rian ni é re̱ꞌ sisi̱ ga̱ níꞌyanj a ni é re̱ꞌ nga̱ ni tsínj ꞌyaj sun scanij ni é re̱ꞌ huin ín re̱ꞌ jnánj néꞌ nga̱ xicaꞌuij néꞌ. Daj si aꞌninꞌ ni sij rian ni é re̱ꞌ, guiꞌyaj Señor. Ni̱ riqui ni sij ducuánj sa̱ꞌ rian án re̱ꞌ nej. ¹³Ni̱ ni̱nꞌ ruhua ga̱ níꞌyanj a ni é re̱ꞌ nga̱ ni sij. Ni̱ ni̱nꞌ ruhua ga̱ ꞌi̱ ruhua á re̱ꞌ ni̱ꞌyaj á re̱ꞌ ni sij xiꞌí sun ꞌyaj sun ni sij scanij ni é re̱ꞌ. Ni̱ ga̱huin dinꞌinj ruhua ni du̱güiꞌ ni é re̱ꞌ aj. ¹⁴Ni̱ achínj jniꞌyaj aninꞌ únj rian án re̱ꞌ sisi̱ ga̱ꞌuiꞌ a ni é re̱ꞌ chrej sisi̱ gui̱ꞌyaj sun ni tsínj ru̱mi rián re̱ꞌ huin ín re̱ꞌ jnánj néꞌ nga̱ xicaꞌuij néꞌ. Ni̱ ga̱ꞌmi ꞌueé ni é re̱ꞌ rian ni tsínj hua ni̱naj nga̱ si-chrej Yanꞌanj sisi̱ na̱riꞌ nucuaj niman ni sij, gui̱ꞌyaj á re̱ꞌ. Ni̱ chra̱cuij ni é re̱ꞌ ni tsínj achin si gu̱xuman sa̱ꞌ ruhua ni̱ꞌyaj Yanꞌanj. Ni̱ ga̱ꞌmi na̱j ni é re̱ꞌ rian daranꞌ ni ngüi̱ aj. ¹⁵Ga̱ cuidado ni é re̱ꞌ manꞌan án re̱ꞌ sisi̱ si̱ guiꞌyaj quij go̱ꞌngo ni é re̱ꞌ rian ni tsínj guiꞌyaj quij nga̱ ni é re̱ꞌ. Sani̱ ni̱ganj gui̱ꞌyaj sa̱ꞌ á re̱ꞌ nga̱ ni du̱güiꞌ a ni é re̱ꞌ. Ni̱ gui̱ꞌyaj sa̱ꞌ ni é re̱ꞌ rian daranꞌ ni ngüi̱ aj.

¹⁶Ni̱ganj ga̱huin nia̱ꞌ ruhua ni é re̱ꞌ aj. ¹⁷Ni̱ si̱ gaꞌninꞌ ruhua á re̱ꞌ ga̱chinj jniꞌyaj á re̱ꞌ rian Yanꞌanj mánj. ¹⁸Ni̱ ꞌngo̱ na̱gaꞌuiꞌ a ni é re̱ꞌ si guruhua Yanꞌanj nga̱ daranꞌ si ranꞌ án re̱ꞌ. Daj si hué daj huin ruhua Yanꞌanj sisi̱ gui̱ꞌyaj a ni é re̱ꞌ xiꞌí si nicoꞌ a ni é re̱ꞌ Cristo Jesús.

¹⁹Ni̱ si̱ guiránj ni é re̱ꞌ chrej rian Espíritu Santo sisi̱ si̱ gaꞌmi Espíritu Santo nuguanꞌ sa̱ꞌ scanij ni é re̱ꞌ mánj. ²⁰Ni̱ si̱ gani ruhua á re̱ꞌ sisi̱ nitaj si níꞌyanj nuguanꞌ ga̱ꞌmi ꞌngo̱ tsínj daj, gui̱ꞌyaj Espíritu Santo mánj. ²¹Xa̱caj a ni é re̱ꞌ cuenta da̱j hua go̱ꞌngo nuguanꞌ gu̱nun a ni é re̱ꞌ. Ngaa ni̱ gu̱na a ni é re̱ꞌ nga̱ nuguanꞌ sa̱ꞌ. ²²Ga̱huin ni̱ni a ni é re̱ꞌ rian daranꞌ si quij hua. ²³Ni̱ Yanꞌanj gui̱ꞌyaj si huin dinꞌinj ruhua néꞌ. Ni̱ huin ruhua aninꞌ únj sisi̱ ga̱huin sa̱ꞌ ni̱nꞌ ni é re̱ꞌ, gui̱ꞌyaj manꞌan Yanꞌanj. Ni̱ huin ruhua únj sisi̱ du̱gumi sa̱ꞌ Yanꞌanj niman án re̱ꞌ nga̱ nnee̱ cúj a ni é re̱ꞌ nej. Ngaa ni̱ si̱ gui̱daꞌui ni é re̱ꞌ a̱ ꞌngo̱ gaquinꞌ ngaa ga̱ꞌnaꞌ Señor Jesucristo chruhua xungüi̱ aj. ²⁴Ni̱ si̱caꞌ Yanꞌanj. Ni̱ aquínj Yanꞌanj án re̱ꞌ sisi̱ gui̱nicaj dugüiꞌ a ni é re̱ꞌ nga̱ Yanꞌanj. Ni̱ ga̱huin yya daranꞌ si gataj Yanꞌanj gunun a ni é re̱ꞌ.

Salutaciones y bendición final

²⁵Ga̱chinj jniꞌyaj a ni é re̱ꞌ rian Yanꞌanj xiꞌí únj huin ín re̱ꞌ jnánj néꞌ nga̱ xicaꞌuij néꞌ.

²⁶Ni̱ ngaa na̱riꞌ dugüiꞌ a ni é re̱ꞌ, ni̱ ga̱run duꞌua ni é re̱ꞌ ni dugüiꞌ a ni é re̱ꞌ rian Yanꞌanj. ²⁷Ni̱ aꞌnīj sun rian án re̱ꞌ nga̱ si-xugüi Señor sisi̱ ga̱ya ꞌngo̱ ni é re̱ꞌ yanj carta nan rian daranꞌ a ni é re̱ꞌ huin ín re̱ꞌ tsínj nicoꞌ Yanꞌanj. ²⁸Ni̱ huin ruhua aninꞌ únj sisi̱ gui̱ꞌyaj Señor Jesucristo sinduj rian daranꞌ ni é re̱ꞌ aj. Amén.