1 Juan

PRIMERA EPÍSTOLA UNIVERSAL DE SAN JUAN APÓSTOL

La palabra de vida

¹Hué dan ni̱ ga̱taj snanꞌanj aninꞌ únj nuguanꞌ nan rian ni é re̱ꞌ xiꞌí tsínj gane asi̱j gaxi̱ꞌi daranꞌanj. Ni̱ hua gunun aninꞌ únj si gaꞌmi sij. Ni̱ hua guiniꞌi aninꞌ únj nga̱ rian aninꞌ únj nej. Ni̱ hua guiniꞌyaj sa̱ꞌ aninꞌ únj da̱j hua manꞌan sij nej. Ni̱ hua ganun raꞌa aninꞌ únj sij nej. Ni̱ tsínj daj gaꞌmi nuguanꞌ gunúnꞌ. Ni̱ nuguanꞌ daj ꞌyaj si ga̱ ni̱ꞌnaꞌ néꞌ gui̱man néꞌ ni̱ganj ni̱nꞌ nga̱ Yanꞌanj anj. ²Ni̱ hua gurugüiꞌ tsínj ꞌyaj si hua ni̱ꞌnoꞌ daj. Ni̱ hua guiniꞌi aninꞌ únj sij. Ni̱ gahuin aninꞌ únj tsínj nataꞌ rian ni ngüi̱ xiꞌí manꞌan sij. Ni̱ nataꞌ aninꞌ únj rian ni é re̱ꞌ xiꞌí tsínj ꞌyaj si hua ni̱ꞌnoꞌ ni̱ganj ni̱nꞌ anj. Ni̱ asi̱j ná gane sij nga̱ Yanꞌanj huin chrej néꞌ. Sani̱ gaꞌna̱ꞌ sij gane sij nga̱ néꞌ. ³Hué dan ni̱ nataꞌ aninꞌ únj rian ni é re̱ꞌ xiꞌí si guiniꞌi aninꞌ únj nga̱ si gunun aninꞌ únj. Hué daj ꞌyaj aninꞌ únj sisi̱ ga̱ꞌue gui̱nicaj dugüiꞌ ni é re̱ꞌ nga̱ aninꞌ únj. Ni̱ xa̱ngaꞌ yya nicaj dugüiꞌ néꞌ nga̱ chrej néꞌ, ni̱ nga̱ daꞌníj sij huin Jesucristo nej aj. ⁴Ni̱ arun aninꞌ únj ni nuguanꞌ nan aꞌníj aninꞌ únj huaj rian ni é re̱ꞌ sisi̱ ga̱ꞌue ga̱ nia̱ꞌ ni̱nꞌ ruhua ni é re̱ꞌ aj.

Dios es luz

⁵Hué nan huin nuguanꞌ digyán Jesucristo rian aninꞌ únj. Ni̱ nataꞌ snanꞌanj aninꞌ únj nuguanꞌ nan rian ni é re̱ꞌ. Da̱j rúnꞌ hua ꞌngo̱ yanꞌa̱n xigui̱n, ni̱ daꞌngaꞌ daj hua Yanꞌanj. Ni̱ a̱ ꞌngo̱ nitaj si hua ru̱miꞌ rian nne manꞌan Yanꞌanj mánj. ⁶Ngaa ni̱ sisi̱ chéj néꞌ rian ru̱miꞌ hua ꞌyaj quij néꞌ, ni̱ aꞌmi yya̱ néꞌ ngaa ataj néꞌ sisi̱ nicaj dugüiꞌ néꞌ nga̱ Yanꞌanj anj. Ni̱ nitaj si nicoꞌ néꞌ nuguanꞌ xa̱ngaꞌ mánj. ⁷Sani̱ sisi̱ chéj néꞌ rian xigui̱n hua rúnꞌ nne Yanꞌanj rian xigui̱n hua, ngaa ni̱ manꞌan ni dugüiꞌ néꞌ nicaj dugüiꞌ. Ni̱ naꞌninꞌ tun daꞌníj sij Jesucristo daranꞌ si-ga̱quinꞌ néꞌ aj. ⁸Ni̱ sisi̱ ga̱taj néꞌ sisi̱ nitaj gaquinꞌ daꞌui néꞌ, ngaa ni̱ digyaꞌ yunꞌunj néꞌ manꞌan néꞌ. Ni̱ nitaj si nu̱n nuguanꞌ xa̱ngaꞌ niman néꞌ mánj. ⁹Sani̱ sisi̱ na̱toꞌ gaquinꞌ guiꞌyóꞌ gu̱nun Yanꞌanj, ngaa ni̱ gui̱nicaj sij ꞌngo̱ niman nico xiꞌí si-ga̱quinꞌ. Daj si hua sa̱ꞌ niman Yanꞌanj. Ni̱ hua yya niman sij nej. Ngaa ni̱ na̱ꞌninꞌ sij daranꞌ si quij hua chruhua niman néꞌ aj. ¹⁰Ni̱ sisi̱ ga̱taj néꞌ sisi̱ nitaj gaquinꞌ guiꞌyaj néꞌ, ngaa ni̱ ꞌyaj néꞌ sisi̱ Yanꞌanj huin tsínj digyaꞌ yunꞌunj, ga̱taj néꞌ. Daj si hua gataj Yanꞌanj si daꞌui néꞌ gaquinꞌ. Ngaa ni̱ sisi̱ ga̱taj néꞌ daj, ni̱ nitaj si unun néꞌ si-nu̱guanꞌ Yanꞌanj mánj.

Cristo, nuestro abogado

¹Da̱j rúnꞌ huin daꞌníj manꞌānj huin ni é re̱ꞌ jnān nga̱ xicaꞌuī. Ni̱ arūnj nuguanꞌ nan huaj rian ni é re̱ꞌ sisi̱ si̱ guiꞌyaj ni é re̱ꞌ gaquinꞌ mánj.

Hué dan ni sisi̱ gui̱ꞌyaj néꞌ gaquinꞌ, ngaa ni̱ hua ꞌngo̱ tsínj nu̱n xi̱ꞌi xiꞌí néꞌ rian chrej néꞌ huin Yanꞌanj huin síꞌ Jesucristo. Ni̱ ga̱ꞌmi síꞌ rian Yanꞌanj xiꞌí néꞌ. Ni̱ hua ni̱nꞌ ni̱ca niman síꞌ. ²Ni̱ nagaꞌuiꞌ Jesucristo manꞌan sij ganarán sij rian si-ga̱quinꞌ néꞌ. Ni̱ sé si narán sij rian urin si-ga̱quinꞌ néꞌ, sani̱ narán sij rian si-ga̱quinꞌ daranꞌ ni ngüi̱ ma̱n chruhua xungüi̱ aj.

³Ni̱ sisi̱ da̱gahuin néꞌ nuguanꞌ aꞌninꞌ Jesucristo sun rian néꞌ, ngaa ni̱ ga̱ꞌue gui̱niꞌi néꞌ sisi̱ hua yya niꞌi néꞌ manꞌan sij aj. ⁴Sisi̱ ataj ꞌngo̱ tsínj daj: “Niꞌi nimānj Jesús”, ni̱ nitaj si dagahuin sij nuguanꞌ aꞌninꞌ síꞌ sun rian néꞌ, ngaa ni̱ hué sij huin ꞌngo̱ tsínj aꞌmi nuguanꞌ yya̱. Ni̱ nitaj si hua yya niman sij mánj. ⁵Sani̱ tsínj dagahuin si-nu̱guanꞌ Jesús, ni̱ hua yya ni̱nꞌ gahuin chru̱n sij gahuin ꞌi̱ ruhua sij niꞌyaj sij Yanꞌanj anj. Ni̱ sisi̱ gui̱ꞌyaj néꞌ daj, ni̱ ga̱ꞌue gui̱niꞌi néꞌ sisi̱ nicaj dugüiꞌ néꞌ nga̱ Jesús. ⁶Ni̱ sisi̱ ataj ꞌngo̱ tsínj daj sisi̱ nicaj dugüiꞌ sij nga̱ Jesús, ngaa ni̱ daꞌui sij si ga̱che sij da̱j rúnꞌ gachéj Jesús aj.

El nuevo mandamiento

⁷Ni̱ aꞌnī nuguanꞌ aꞌninꞌ nan huaj rian ni é re̱ꞌ huin ni é re̱ꞌ jnān nga̱ xicaꞌuī. Ni̱ sé ꞌngo̱ nuguanꞌ na̱ca huin mánj. Hué ꞌngo̱ huin nga̱ nuguanꞌ guidaꞌa ni é re̱ꞌ asi̱j sini ya̱n anj. Ni̱ nuguanꞌ aꞌninꞌ hua ná daj huéj huin nuguanꞌ hua gunun ni é re̱ꞌ asi̱j sini. ⁸Sani̱ si arūnj nan rúnꞌ huin ꞌngo̱ nuguanꞌ na̱ca aꞌninꞌ Yanꞌanj sun rian néꞌ. Ni̱ hua digyán Cristo sisi̱ hua yya nuguanꞌ nan. Ni̱ hué daj digyán ni é re̱ꞌ nej. Ni̱ huaj ga̱nahuij si hua ru̱miꞌ rian xungüi̱ nan. Ni̱ hua xigui̱n yanꞌa̱n xa̱ngaꞌ huin Jesucristo aj. ⁹Ni̱ sisi̱ hua ꞌngo̱ tsínj ataj sisi̱ chéj sij rian xigui̱n yanꞌa̱n, sani̱ nun huin xa̱nꞌ ruhua sij niꞌyaj sij jnánj sij, ngaa ni̱ chéj gue̱ sij rian ru̱miꞌ hua daj. ¹⁰Ni̱ tsínj ꞌi̱ ruhua niꞌyaj jnánj sij, ni̱ hua chéj sij rian xigui̱n. Ni̱ nitaj ꞌngo̱ si hua gui̱ꞌyaj si gui̱nij sij gaquinꞌ. ¹¹Sani̱ tsínj nun huin xa̱nꞌ ruhua niꞌyaj jnánj sij, ni̱ nne sij rian ru̱miꞌ. Ni̱ chéj sij rian ru̱miꞌ nej. Ni̱ nun niꞌi sij rian chéj sij xiꞌí si guiránj si ru̱miꞌ hua daj rian sij.

¹²Arūnj nuguanꞌ nan aꞌnī huaj rian ni é re̱ꞌ huin ni é re̱ꞌ ni tsínj hua lij. Daj si hua guisíj guinicaj Yanꞌanj ꞌngo̱ niman nico xiꞌí si-ga̱quinꞌ ni é re̱ꞌ. Ni̱ hué daj guiꞌyaj sij xiꞌí si-xugüi manꞌan sij.

¹³Ni̱ arūnj nuguanꞌ nan aꞌnī huaj rian ni é re̱ꞌ tsínj hua daꞌníj. Daj si hua niꞌi ni é re̱ꞌ tsínj gane asi̱j sini ya̱n.

Ni̱ arūnj nuguanꞌ nan aꞌnī huaj rian ni é re̱ꞌ ni tsínj hua lij. Daj si hua guiꞌyaj gana ni é re̱ꞌ rian sichre aj.

Ni̱ arūnj nuguanꞌ nan aꞌnī huaj rian ni é re̱ꞌ huin ni é re̱ꞌ si hua lij. Daj si hua niꞌi ni é re̱ꞌ chrej néꞌ huin Yanꞌanj.

¹⁴Ni̱ hua garūnj nuguanꞌ gaꞌnī rian ni é re̱ꞌ tsínj hua daꞌníj. Daj si hua niꞌi ni é re̱ꞌ tsínj gane asi̱j sini ya̱n.

Ni̱ hua garūnj nuguanꞌ gaꞌnī rian ni é re̱ꞌ ni tsínj hua lij. Daj si hua gahuin nucuaj niman ni é re̱ꞌ rian sayun. Ni̱ ꞌngo̱ gunun ni é re̱ꞌ si-nu̱guanꞌ Yanꞌanj. Ni̱ guiꞌyaj gana ni é re̱ꞌ rian sichre aj.

¹⁵Si̱ gahuin ruhua ni é re̱ꞌ ni̱ꞌyaj ni é re̱ꞌ si-chrej xungüi̱ nan nga̱ ni rasu̱n ma̱n chruhua xungüi̱ nan mánj. Sisi̱ hua ꞌngo̱ tsínj huin ruhua ni̱ꞌyaj si-chrej xungüi̱ nan, ngaa ni̱ nitaj si huin ruhua sij ni̱ꞌyaj sij chrej néꞌ huin Yanꞌanj. ¹⁶Daj si daranꞌ nuguanꞌ ma̱n chruhua xungüi̱, ni̱ nitaj si ꞌna̱ꞌ ni nuguanꞌ daj rian chrej néꞌ mánj. Sani̱ maan si-nu̱guanꞌ xungüi̱ huin nánj. Ni̱ ni tsínj chéj si-chrej xungüi̱, ni̱ dagahuin ni sij si huin ruhua nnee̱ cúj ni sij. Ni̱ huin ruhua ni sij gui̱nicaj ni sij si niꞌyaj ni sij nej. Ni̱ nne̱ ni sij nga̱ si ꞌyaj ni sij nej. ¹⁷Ni̱ huaj nahuij xungüi̱ nan nga̱ daranꞌ si quij hua huin ruhua ni ngüi̱ ma̱n chruhua xungüi̱ nej. Sani̱ tsínj ꞌyaj si aranꞌ ruhua Yanꞌanj, ni̱ ga̱ne ni̱ganj ni̱nꞌ sij nánj.

El anticristo

¹⁸Hué dan ni̱ da̱j rúnꞌ huin daꞌnī huin ni é re̱ꞌ riānj. Ni̱ ataj snanꞌān gu̱nun ni é re̱ꞌ sisi̱ ruhua ga̱nahuij xungüi̱. Ni̱ hua gunun ni é re̱ꞌ nuguanꞌ sisi̱ ga̱ꞌnaꞌ ꞌngo̱ tsínj ununꞌ nga̱ Cristo. Ni̱ hua narugüiꞌ nico ni tsínj ununꞌ nga̱ Cristo. Ni̱ xiꞌí daj niꞌi néꞌ sisi̱ hua̱ huaj ga̱nahuij xungüi̱ nan anj. ¹⁹Ni̱ gahui ni tsínj daj scanij néꞌ. Sani̱ xa̱ngaꞌ nitaj si nicaj dugüiꞌ ni sij nga̱ néꞌ. Daj si sisi̱ nu̱n ruhua ni sij guinicaj dugüiꞌ ni sij nga̱ néꞌ, ngaa ni̱ hua gunáj ni sij nga̱ néꞌ. Sani̱ xiꞌí si gahui ni sij, ni̱ digyán yya ni sij sisi̱ hua yya nitaj si nicaj dugüiꞌ daranꞌ ni sij nga̱ néꞌ mánj.

²⁰Sani̱ Cristo riqui Espíritu Santo rian ni é re̱ꞌ. Xiꞌí daj hua niꞌi ni é re̱ꞌ daranꞌ nuguanꞌ. ²¹Ni̱ sé si arūnj nuguanꞌ nan aꞌnī rian ni é re̱ꞌ xiꞌí si nun niꞌi ni é re̱ꞌ nuguanꞌ xa̱ngaꞌ mánj. Sani̱ hua niꞌi ni é re̱ꞌ nuguanꞌ xa̱ngaꞌ. Ni̱ niꞌi ni é re̱ꞌ sisi̱ ni̱ a̱ ꞌngo̱ nuguanꞌ yya̱ nitaj si ga̱ꞌnaꞌ scanij nuguanꞌ xa̱ngaꞌ mánj.

²²Ni̱ u̱n tsínj huin tsínj aꞌmi yya̱, ruhua ni é re̱ꞌ únj. Hué sij huin tsínj ataj sisi̱ sé Jesús huin Cristo mánj. Ni̱ hué tsínj daj huin tsínj ununꞌ nga̱ Cristo. Daj si naꞌuej ruhua sij gu̱xuman ruhua sij ni̱ꞌyaj sij chrej néꞌ huin Yanꞌanj nga̱ daꞌníj síꞌ Jesús nej aj. ²³Ni̱ tsínj naꞌuej ruhua gu̱xuman ruhua niꞌyaj daꞌníj chrej néꞌ, ni̱ nitaj si nicaj dugüiꞌ sij nga̱ chrej néꞌ nej. Sani̱ tsínj xuman ruhua niꞌyaj daꞌníj chrej néꞌ, ni̱ nicaj dugüiꞌ sij nga̱ chrej néꞌ aj.

²⁴Hué dan ni̱ ꞌngo̱ gu̱nun ni é re̱ꞌ nuguanꞌ gunun ni é re̱ꞌ asi̱j sini ya̱n. Ni̱ sisi̱ ꞌngo̱ gu̱naj sa̱ꞌ nuguanꞌ daj chruhua niman ni é re̱ꞌ, ngaa ni̱ ꞌngo̱ gui̱nicaj dugüiꞌ ni é re̱ꞌ nga̱ daꞌníj Yanꞌanj nga̱ chrej néꞌ huin Yanꞌanj nej aj. ²⁵Ni̱ nan huin nuguanꞌ gaꞌníj duꞌua Jesucristo rian néꞌ sisi̱ ga̱ꞌue ga̱ne ni̱ganj néꞌ nga̱ Yanꞌanj anj.

²⁶Ni̱ garūnj ni nuguanꞌ nan aꞌnī huaj rian ni é re̱ꞌ sisi̱ xa̱caj ni é re̱ꞌ cuenta xiꞌí ni tsínj huin ruhua di̱gyaꞌ yunꞌunj ni é re̱ꞌ. ²⁷Sani̱ hua gaꞌna̱ꞌ Espíritu Santo chruhua niman ni é re̱ꞌ, guiꞌyaj Jesucristo. Ni̱ nitaj si hua nia̱n sisi̱ di̱gyán ꞌngo̱ tsínj daj ꞌngo̱ nuguanꞌ rian ni é re̱ꞌ mánj. Daj si manꞌan Espíritu Santo digyán daranꞌ nuguanꞌ rian ni é re̱ꞌ. Ni̱ si digyán sij huin nuguanꞌ xa̱ngaꞌ. Sé nuguanꞌ yya̱ huin mánj. Hué dan ni̱ da̱j rúnꞌ digyán sij nuguanꞌ xa̱ngaꞌ rian ni é re̱ꞌ, ni̱ hué daj ꞌngo̱ gui̱nicaj dugüiꞌ ni é re̱ꞌ nga̱ Jesús aj.

²⁸Hué dan ni̱ da̱j rúnꞌ huin daꞌnī huin ni é re̱ꞌ riānj. Ni̱ huin ruhuāj sisi̱ ꞌngo̱ gui̱nicaj dugüiꞌ ni é re̱ꞌ nga̱ Jesucristo. Hué daj ni̱ nitaj si ga̱huin ruhua néꞌ ngaa ga̱ꞌnaꞌ sij. Ni̱ si̱ gahuin na̱ꞌaj néꞌ rian sij ngaa ga̱ꞌnaꞌ sij aj. ²⁹Ni̱ sisi̱ niꞌi ni é re̱ꞌ sisi̱ hua ni̱ca yya niman Jesucristo, ngaa ni̱ niꞌi ni é re̱ꞌ sisi̱ daranꞌ ni ngüi̱ ꞌyaj ni̱ca, ni̱ huin ni sij daꞌníj Yanꞌanj anj.

Hijos de Dios

¹Hué dan ni̱ xa̱caj ni é re̱ꞌ cuenta sisi̱ ni̱nꞌ ruhua gahuin ꞌi̱ ruhua chrej néꞌ huin Yanꞌanj niꞌya yu̱nꞌ. Xiꞌí daj ni̱ riqui Yanꞌanj sisi̱ ga̱huin néꞌ daꞌníj sij. Ni̱ xa̱ngaꞌ huin néꞌ daꞌníj Yanꞌanj. Xiꞌí daj ni̱ tsínj guidaꞌa si-chrej xungüi̱ nan, ni̱ nun niꞌi ni sij néꞌ. Daj si nun niꞌi ni sij Yanꞌanj mánj. ²Hué dan ni̱ ꞌi̱ ruhuāj niꞌyā ni é re̱ꞌ. Yya̱j huin néꞌ daꞌníj Yanꞌanj. Ni̱ nu̱nj si nun niꞌi néꞌ da̱j ga̱ néꞌ ne̱ꞌ chrej rian, sani̱ niꞌi néꞌ sisi̱ ngaa na̱rugüiꞌ Jesucristo, ngaa ni̱ ga̱ néꞌ da̱j rúnꞌ hua manꞌan sij. Daj si gui̱niꞌi yya néꞌ da̱j hua manꞌan sij. ³Ni̱ daranꞌ ni tsínj anoꞌ sisi̱ hué daj ga̱ ni sij, gui̱ꞌyaj Jesucristo, ni̱ na̱guiꞌyaj sa̱ꞌ ni sij niman manꞌan ni sij da̱j rúnꞌ hua sa̱ꞌ ni̱nꞌ niman manꞌan Jesucristo.

⁴Ni̱ daranꞌ ni tsínj ꞌyaj gaquinꞌ, ni̱ nun dagahuin ni sij si-ley Yanꞌanj. Daj si ngaa ꞌyaj néꞌ gaquinꞌ, ni̱ nun dagahuin néꞌ si-ley Yanꞌanj mánj. ⁵Ni̱ hua niꞌi ni é re̱ꞌ sisi̱ gaꞌna̱ꞌ Jesucristo xungüi̱ nan sisi̱ ga̱ꞌne sij si-ga̱quinꞌ néꞌ. Ni̱ nitaj ni̱ a̱ ꞌngo̱ gaquinꞌ daꞌui sij mánj. ⁶Ni̱ daranꞌ ni tsínj nicaj dugüiꞌ nga̱ Jesús, ni̱ nitaj si ꞌyaj ni sij gaquinꞌ mánj. Sani̱ daranꞌ ni tsínj ꞌyaj gaquinꞌ, ni̱ nitaj si niꞌi ni sij manꞌan síꞌ mánj. ⁷Hué dan ni̱ da̱j rúnꞌ huin daꞌnī huin ni é re̱ꞌ riānj. Si̱ gaꞌuej ruhua ni é re̱ꞌ sisi̱ di̱gyaꞌ yunꞌunj ni̱ a̱ ꞌngo̱ ni ngüi̱ ni é re̱ꞌ mánj. Ni̱ da̱j rúnꞌ hua ni̱ca niman Jesucristo, ni̱ hué daj hua ni̱ca niman ꞌngo̱ tsínj ꞌyaj ni̱ca nej. ⁸Ni̱ tsínj ꞌyaj gaquinꞌ, ni̱ hué sij nicaj dugüiꞌ nga̱ sichre. Daj si ꞌyaj sichre gaquinꞌ asi̱j sini ya̱n. Ni̱ gaꞌna̱ꞌ daꞌníj Yanꞌanj chruhua xungüi̱ nan sisi̱ gue̱reꞌej sij si-sun sichre aj. ⁹Ni̱ daranꞌ tsínj huin daꞌníj Yanꞌanj, ni̱ nitaj si ꞌyaj ni sij gaquinꞌ mánj. Daj si gahuin sa̱ꞌ niman ni sij, guiꞌyaj Yanꞌanj. Ni̱ si̱ gaꞌue ꞌngo̱ gui̱ꞌyaj ni sij gaquinꞌ, si daꞌníj Yanꞌanj huin ni sij aj. ¹⁰Ni̱ ga̱ꞌue xa̱caj néꞌ cuenta ni̱ꞌyaj néꞌ u̱n tsínj huin daꞌníj Yanꞌanj, ni̱ u̱n tsínj huin daꞌníj sichre aj. Daj si sisi̱ nitaj si ꞌyaj ni̱ca ꞌngo̱ tsínj daj, ni̱ sisi̱ nitaj si ꞌi̱ ruhua sij niꞌyaj sij dugüiꞌ sij, ngaa ni̱ nitaj si nicaj dugüiꞌ sij nga̱ Yanꞌanj mánj.

¹¹Ni̱ hué nan huin nuguanꞌ gunun ni é re̱ꞌ asi̱j sini ya̱n. Ni̱ nuguanꞌ nan huin sisi̱ daꞌui néꞌ ga̱huin ꞌi̱ róꞌ niꞌyóꞌ ni dugüíꞌ aj. ¹²Ni̱ si̱ guiꞌyóꞌ da̱j rúnꞌ guiꞌyaj Caín tsínj guinicaj dugüiꞌ nga̱ sichre asi̱j ná. Ni̱ dagahuiꞌ sij jnánj sij. Ni̱ u̱n sin huin ni̱ dagahuiꞌ sij, ruhua á re̱ꞌ únj. Hué dagahuiꞌ sij jnánj sij xiꞌí si guiꞌyaj quij sij. Ni̱ guiꞌyaj sa̱ꞌ jnánj sij aj.

¹³Hué dan ni̱ si̱ gani ruhua ni é re̱ꞌ sisi̱ nun huin xa̱nꞌ ruhua ni tsínj nicoꞌ si-chrej xungüi̱ nan niꞌyaj ni sij ni é re̱ꞌ huin ni é re̱ꞌ jnān nga̱ xicaꞌuī. ¹⁴Ni̱ asi̱j sini róꞌ huin níman gahuin néꞌ. Sani̱ niꞌi néꞌ sisi̱ hua ni̱ꞌnaꞌ niman néꞌ yya̱j aj. Daj si ꞌi̱ ruhua néꞌ niꞌyaj néꞌ ni dugüiꞌ néꞌ aj. Tsínj nitaj si ꞌi̱ ruhua niꞌyaj dugüiꞌ, ni̱ hua niman sij da̱j rúnꞌ huin níman anj. ¹⁵Ni̱ daranꞌ ni tsínj nun huin xa̱nꞌ ruhua ni sij niꞌyaj ni sij jnánj ni sij, ni̱ huin ni sij rúnꞌ huin ꞌngo̱ tsínj dagahuiꞌ níman. Ni̱ niꞌi ni é re̱ꞌ sisi̱ si̱ gaꞌue ga̱ne ni̱ganj ꞌngo̱ tsínj dagahuiꞌ níman mánj. ¹⁶Ni̱ niꞌi néꞌ sisi̱ ꞌi̱ ruhua Jesús niꞌyaj sij munꞌúnꞌ. Daj si gaꞌuej ruhua sij ga̱huiꞌ sij xiꞌí néꞌ. Ni̱ hué ducuánj daj gaꞌuej ruhua néꞌ ga̱huiꞌ néꞌ xiꞌí jnánj néꞌ nej.

¹⁷Ni̱ sisi̱ hua ꞌngo̱ néꞌ hua rasu̱n rian, ni̱ niꞌyaj sij sisi̱ achin ꞌngo̱ rasu̱n rian jnánj sij, ni̱ naꞌuej sij ga̱ꞌuiꞌ sij, ni̱ nitaj si ꞌi̱ ruhua sij niꞌyaj sij Yanꞌanj mánj. ¹⁸Da̱j rúnꞌ huin daꞌnī huin ni é re̱ꞌ riānj. Si̱ gataj néꞌ nuguanꞌ yu̱n sisi̱ ꞌi̱ ruhua néꞌ niꞌyaj néꞌ jnánj néꞌ mánj. Maan si gui̱ꞌyaj sa̱ꞌ néꞌ nga̱ jnánj néꞌ. Ngaa ni̱ hué daj ga̱huin xa̱ngaꞌ néꞌ tsínj ꞌi̱ ruhua niꞌyaj jnánj néꞌ.

¹⁹Ni̱ sisi̱ hué daj gui̱ꞌyaj néꞌ, ngaa ni̱ gui̱niꞌi néꞌ sisi̱ xacaj néꞌ chrej xa̱ngaꞌ aj. Ni̱ ga̱ꞌue ga̱huin yya ruhua néꞌ nga̱ Yanꞌanj nej. ²⁰Ni̱ sisi̱ nimúnꞌ aꞌmi gaquinꞌ rian xiꞌí munꞌúnꞌ, sani̱ niꞌi néꞌ sisi̱ niꞌi sa̱ꞌ Yanꞌanj daj nga̱ nimúnꞌ. Ni̱ niꞌi sij daranꞌanj. ²¹Ni̱ ꞌi̱ ruhuāj niꞌyā ni é re̱ꞌ. Sisi̱ nitaj si aꞌmi gaquinꞌ niman néꞌ rian xiꞌí manꞌan néꞌ, ngaa ni̱ gahuin yya ruhua néꞌ nga̱ Yanꞌanj anj. ²²Ni̱ riqui Yanꞌanj daranꞌ si achínj néꞌ rian sij xiꞌí si dagahuin néꞌ ni nuguanꞌ aꞌninꞌ sij sun rian néꞌ. Ni̱ ꞌyaj néꞌ si aranꞌ ruhua manꞌan sij nej. ²³Ni̱ nan huin nuguanꞌ aꞌninꞌ Yanꞌanj sun rian néꞌ. Ni̱ ataj Yanꞌanj sisi̱ gu̱xuman ruhua néꞌ ni̱ꞌyaj néꞌ daꞌníj sij Jesucristo. Ni̱ ataj sij sisi̱ ga̱huin ꞌi̱ ruhua néꞌ ni̱ꞌyaj néꞌ ni dugüiꞌ néꞌ da̱j rúnꞌ gaꞌninꞌ sij sun rian néꞌ. ²⁴Ni̱ tsínj dagahuin ni nuguanꞌ aꞌninꞌ Yanꞌanj sun rian néꞌ, ni̱ ꞌngo̱ nicaj dugüiꞌ sij nga̱ Yanꞌanj. Ni̱ nicaj dugüiꞌ Yanꞌanj nga̱ sij nej. Ni̱ niꞌi yya néꞌ sisi̱ ꞌngo̱ nne Yanꞌanj chruhua niman néꞌ xiꞌí si riqui sij Espíritu Santo rian néꞌ.

El Espíritu de Dios y el espíritu del anticristo

¹Ni̱ ꞌi̱ ruhuāj niꞌyā ni é re̱ꞌ. Hué dan ni̱ si̱ guxuman ruhua ni é re̱ꞌ ni̱ꞌyaj ni é re̱ꞌ daranꞌ ni nuguanꞌ mánj. Sani̱ gui̱niꞌyaj sa̱ꞌ ni é re̱ꞌ sisi̱ xa̱ngaꞌ si aꞌmi ꞌngo̱ tsínj daj. Ni̱ gui̱niꞌyaj sa̱ꞌ ni é re̱ꞌ sisi̱ hué gue̱ Espíritu Santo riqui nuguanꞌ aꞌmi sij. Daj si xungüi̱ nan ma̱n ni̱nꞌ ruhua ni tsínj digyaꞌ yunꞌunj sisi̱ aꞌmi ni sij si-nu̱guanꞌ Yanꞌanj anj. ²Ni̱ sisi̱ ataj ꞌngo̱ tsínj daj sisi̱ gaꞌna̱ꞌ Jesucristo chruhua xungüi̱ nan gahuin xa̱ngaꞌ síꞌ ꞌngo̱ tsínj hua nnee̱ cúj, ngaa ni̱ si-nu̱guanꞌ tsínj daj huin si-nu̱guanꞌ Espíritu Santo. Ni̱ hué ducuánj daj ga̱ꞌue gui̱niꞌi ni é re̱ꞌ u̱n nuguanꞌ huin nuguanꞌ ꞌna̱ꞌ rian Yanꞌanj anj. ³Ni̱ daranꞌ ni tsínj nun gara xina sisi̱ gaꞌna̱ꞌ Jesús gahuin sij ꞌngo̱ tsínj hua nnee̱ cúj, ni̱ nitaj si ꞌna̱ꞌ si-nu̱guanꞌ ni sij rian Yanꞌanj mánj. Sani̱ ꞌna̱ꞌ si-nu̱guanꞌ ni sij rian tsínj ununꞌ nga̱ Cristo. Ni̱ hua gunun ni é re̱ꞌ sisi̱ hua ꞌna̱ꞌ tsínj quij hua daj. Ni̱ hua nne sij chruhua xungüi̱ aj.

⁴Da̱j rúnꞌ huin daꞌnī huin ni é re̱ꞌ riānj. Ni̱ nicaj dugüiꞌ niman ni é re̱ꞌ nga̱ Yanꞌanj. Ni̱ hua guiꞌyaj gana ni é re̱ꞌ rian ni tsínj digyaꞌ yunꞌunj daj. Daj si huin nucuaj doj Espíritu Santo nne chruhua niman néꞌ daj nga̱ si nne ruhua niman ni tsínj huaj si-chrej xungüi̱ nan anj. ⁵Hué ni tsínj daj huaj si-chrej xungüi̱ nan. Da̱j da aꞌmi ni sij da̱j rúnꞌ aꞌmi ni tsínj huaj si-chrej xungüi̱. Ni̱ ni tsínj huaj si-chrej xungüi̱ nan, ni̱ unun ni síꞌ si ataj ni sij. ⁶Sani̱ nicaj dugüiꞌ néꞌ nga̱ Yanꞌanj. Ni̱ sisi̱ niꞌi ꞌngo̱ tsínj daj Yanꞌanj, ngaa ni̱ unun sa̱ꞌ sij si ataj néꞌ. Sani̱ tsínj nitaj si nicaj dugüiꞌ nga̱ Yanꞌanj, ni̱ nitaj si unun sij si ataj néꞌ mánj. Ni̱ hué ducuánj daj niꞌi néꞌ u̱n tsínj nicaj dugüiꞌ nga̱ Espíritu Santo. Ni̱ niꞌi néꞌ u̱n tsínj aꞌmi nuguanꞌ digyaꞌ yunꞌunj nej.

Dios es amor

⁷Ni̱ ꞌi̱ ruhuāj niꞌyā ni é re̱ꞌ. Ni̱ daꞌui néꞌ si ga̱huin ꞌi̱ ruhua néꞌ ni̱ꞌyaj néꞌ ni dugüiꞌ néꞌ. Daj si Yanꞌanj riqui sisi̱ ga̱ꞌue ga̱huin ꞌi̱ ruhua néꞌ ni̱ꞌyaj néꞌ ni dugüiꞌ néꞌ. Ni̱ sisi̱ ꞌi̱ ruhua néꞌ niꞌyaj néꞌ dugüiꞌ néꞌ, ngaa ni̱ huin néꞌ daꞌníj Yanꞌanj. Ni̱ niꞌi néꞌ Yanꞌanj nej aj. ⁸Ni̱ sisi̱ nuhuiꞌ si ꞌi̱ ruhua néꞌ niꞌyaj néꞌ dugüiꞌ néꞌ, ngaa ni̱ nun niꞌi néꞌ Yanꞌanj mánj. Daj si Yanꞌanj huin si ꞌi̱ ruhua niꞌyaj néꞌ. ⁹Ni̱ ga̱ꞌue gui̱niꞌi néꞌ sisi̱ ꞌi̱ ruhua Yanꞌanj niꞌya néꞌ xiꞌí si gaꞌníj sij urin daꞌníj sij gaꞌna̱ꞌ chruhua xungüi̱ nan. Ni̱ ga̱ ni̱ꞌnaꞌ niman néꞌ, gui̱ꞌyaj síꞌ. ¹⁰Ni̱ ga̱ꞌue xa̱caj néꞌ cuenta sisi̱ sé munꞌúnꞌ gahuin ꞌi̱ róꞌ niꞌyóꞌ manꞌan Yanꞌanj asi̱j sini ya̱n mánj. Sani̱ asi̱j sini ya̱n, ni̱ gahuin ꞌi̱ ruhua Yanꞌanj niꞌya néꞌ. Daj si gaꞌníj sij daꞌníj sij rian néꞌ. Ni̱ gahuiꞌ síꞌ rian si-ga̱quinꞌ néꞌ. ¹¹Ni̱ ꞌi̱ ruhuāj niꞌyā ni é re̱ꞌ. Ni̱ sisi̱ hué daj ꞌi̱ ruhua Yanꞌanj niꞌya néꞌ, ni̱ daꞌui néꞌ si ga̱huin ꞌi̱ ruhua néꞌ ni̱ꞌyaj néꞌ ni dugüiꞌ néꞌ. ¹²Ni̱ a̱ ꞌngo̱ yu̱n nun gui̱niꞌi ni ngüi̱ manꞌan Yanꞌanj mánj. Sani̱ sisi̱ ꞌi̱ ruhua néꞌ ni̱ꞌyaj néꞌ ni dugüiꞌ néꞌ, ni̱ nne Yanꞌanj chruhua niman néꞌ. Ni̱ xiꞌí daj ga̱ꞌue ga̱huin sa̱ꞌ niman néꞌ ga̱huin ꞌi̱ ruhua néꞌ ni̱ꞌyaj néꞌ manꞌan Yanꞌanj nga̱ ni dugüíꞌ nej.

¹³Hué dan ni̱ xiꞌí si riqui Yanꞌanj Espíritu Santo rian néꞌ, ni̱ niꞌi yya néꞌ sisi̱ nicaj dugüiꞌ Yanꞌanj nga̱ néꞌ. Ni̱ niꞌi néꞌ sisi̱ nicaj dugüiꞌ néꞌ nga̱ Yanꞌanj nej. ¹⁴Ni̱ hua guiniꞌi ni únj sisi̱ gaꞌníj chrej néꞌ daꞌníj sij gaꞌna̱ꞌ chruhua xungüi nan. Ni̱ hué sij huin tsínj nacaj ni ngüi̱ ma̱n chruhua xungüi̱ aj. Ni̱ nataꞌ ni únj nuguanꞌ nan rian ni ngüi̱ aj. ¹⁵Ni̱ sisi̱ na̱taꞌ néꞌ gu̱nun ni ngüi̱ sisi̱ Jesús huin daꞌníj Yanꞌanj, hué dan ni̱ nicaj dugüiꞌ néꞌ nga̱ Yanꞌanj. Ni̱ Yanꞌanj nicaj dugüiꞌ nga̱ néꞌ nej. ¹⁶Ni̱ hua niꞌi néꞌ sisi̱ ꞌi̱ ruhua Yanꞌanj niꞌya néꞌ. Ni̱ guxuman ruhua néꞌ sisi̱ hué daj huin.

Yanꞌanj huin si ꞌi̱ ruhua niꞌya néꞌ. Ni̱ sisi̱ ꞌngo̱ ꞌi̱ ruhua néꞌ ni̱ꞌyaj néꞌ ni dugüiꞌ néꞌ, ni̱ nicaj dugüiꞌ néꞌ nga̱ Yanꞌanj. Ni̱ Yanꞌanj nicaj dugüiꞌ nga̱ néꞌ nej. ¹⁷Ni̱ xiꞌí si ꞌi̱ ruhua néꞌ niꞌyaj néꞌ ni dugüiꞌ néꞌ, ni̱ ga̱ꞌue ga̱huin yya ruhua néꞌ xiꞌí güi na̱guiꞌyaj yya Yanꞌanj si-ga̱quinꞌ ni ngüi̱. Daj si da̱j rúnꞌ guiꞌyaj Jesucristo ngaa huaj sij xungüi̱ nan, ni̱ hué daj gui̱ꞌyaj néꞌ nej. ¹⁸Ni̱ sisi̱ ꞌi̱ ruhua néꞌ niꞌyaj néꞌ Yanꞌanj, ngaa ni̱ nitaj si xuꞌuiꞌ néꞌ rian sij mánj. Sani̱ sisi̱ ꞌi̱ ruhua néꞌ ni̱ꞌyaj néꞌ Yanꞌanj, ni̱ gahui si xuꞌuiꞌ néꞌ chruhua niman néꞌ. Daj si ngaa xuꞌuíꞌ, ni̱ ani róꞌ si ga̱ꞌnaꞌ castigo riúnꞌ, gui̱ꞌyaj Yanꞌanj. Hué dan ni̱ sisi̱ hua go̱ꞌngo néꞌ xuꞌuíꞌ, ni̱ achin si ga̱huin ꞌi̱ ruhua sij ni̱ꞌyaj sij manꞌan Yanꞌanj. ¹⁹Ni̱ ꞌi̱ ruhua néꞌ niꞌyaj néꞌ Yanꞌanj xiꞌí si asi̱j sini gahuin ꞌi̱ ruhua sij niꞌyaj sij manꞌan néꞌ. ²⁰Ni̱ sisi̱ ataj ꞌngo̱ tsínj daj: “ꞌI̱ ruhuāj niꞌyā Yanꞌanj” ngaa nun huin xa̱nꞌ ruhua sij niꞌyaj sij jnánj sij, ngaa ni̱ tsínj aꞌmi yya̱ huin sij aj. Ni̱ sisi̱ nitaj si ꞌi̱ ruhua sij niꞌyaj sij jnánj sij, ni̱ asa̱ꞌ ga̱ꞌue ga̱huin ꞌi̱ ruhua sij ni̱ꞌyaj sij Yanꞌanj únj. Ni̱ ga̱ꞌue gui̱niꞌi sij jnánj sij. Sani̱ nitaj si rugüiꞌ Yanꞌanj gui̱niꞌi sij mánj. ²¹Ni̱ gaꞌninꞌ Jesucristo sun rian néꞌ. Ni̱ gataj sij sisi̱ ꞌi̱ ruhua ꞌngo̱ tsínj daj niꞌyaj sij manꞌan Yanꞌanj, ni̱ daꞌui sij si ga̱huin ꞌi̱ ruhua sij ni̱ꞌyaj sij jnánj sij nej.

La fe que vence al mundo

¹Daranꞌ ni tsínj xuman ruhua sisi̱ Jesús huin yya Cristo, ni̱ hué ni sij huin daꞌníj Yanꞌanj anj. Ni̱ sisi̱ ꞌi̱ ruhua néꞌ niꞌyaj néꞌ chrej néꞌ huin Yanꞌanj, ni̱ hué daj ꞌi̱ ruhua néꞌ niꞌyaj néꞌ ni daꞌníj sij nej. ²Ni̱ sisi̱ ꞌi̱ ruhua néꞌ niꞌyaj néꞌ Yanꞌanj, ni̱ sisi̱ da̱gahuin néꞌ ni nuguanꞌ aꞌninꞌ sij sun rian néꞌ, hué dan ni̱ niꞌi néꞌ sisi̱ ꞌi̱ ruhua néꞌ niꞌyaj néꞌ ni daꞌníj sij nej. ³Ni̱ sisi̱ xa̱ngaꞌ ꞌi̱ róꞌ niꞌyóꞌ Yanꞌanj, ngaa ni̱ hua yya da̱gahuínꞌ sun aꞌninꞌ sij riunꞌ nej.

Ni̱ sé ꞌngo̱ sayun huin si aꞌninꞌ sij riunꞌ mánj. ⁴Ni̱ daranꞌ ni tsínj huin daꞌníj Yanꞌanj, ni̱ hua guiꞌyaj gana ni sij rian ni chrej quij hua chruhua xungüi̱ nan anj. Ni̱ hua gaꞌue gunucuaj néꞌ guiꞌyaj gana néꞌ rian chrej quij hua chruhua xungüi̱ nan xiꞌí si xuman ruhua néꞌ niꞌyaj néꞌ Jesús. ⁵Hué dan ni̱ sisi̱ xuman ruhua ꞌngo̱ tsínj daj sisi̱ Jesús huin daꞌníj Yanꞌanj, ni̱ ga̱ꞌue gui̱ꞌyaj gana sij rian chrej quij hua chruhua xungüi̱ nan anj.

El testimonio del Espíritu

⁶Ni̱ gaꞌna̱ꞌ Jesucristo chruhua xungüi̱ nan. Ni̱ gataꞌ nnee sij. Ni̱ gayanj si-tun manꞌan sij xiꞌí si-ga̱quinꞌ néꞌ nej. Ni̱ sé urin gataꞌ nnee sij, sani̱ gayanj si-tun sij nej. Ni̱ Espíritu Santo ataj snanꞌanj rian néꞌ xiꞌí Jesús. Ni̱ aꞌmi yya Espíritu Santo nej. ⁷Ni̱ xataꞌ ni̱ hua hua̱ꞌnij si ataj snanꞌanj rian néꞌ xiꞌí Jesús: Ni̱ ꞌngo̱j huin chrej néꞌ. Ni̱ angoj huin Nuguanꞌ daj. Ni̱ ángoj huin Espíritu Santo. Ni̱ aninꞌ hua̱ꞌni daj huin urin. ⁸Ni̱ chruhua xungüi̱ nan, ni̱ hua hua̱ꞌnij si ataj snanꞌanj rian néꞌ xiꞌí Jesús. Ngo̱j huin Espíritu Santo. Ni̱ angoj huin nnee gataꞌ nnee Jesús. Ni̱ ángoj huin si-tun manꞌan Jesús gayanj xiꞌí néꞌ. Ni̱ uyan aꞌmi hua̱ꞌnij nuguanꞌ nan. ⁹Ni̱ sisi̱ niquinꞌ ꞌngo̱ tsínj nataꞌ sij ꞌngo̱ nuguanꞌ, ni̱ ga̱ra xina néꞌ si-nu̱guanꞌ sij. Sani̱ níꞌyanj yya doj si nataꞌ Yanꞌanj rian néꞌ. Ni̱ Yanꞌanj huin si nataꞌ rian néꞌ xiꞌí daꞌníj sij Jesús aj. ¹⁰Hué dan ni̱ sisi̱ xuman ruhua ꞌngo̱ tsínj daj niꞌyaj sij daꞌníj Yanꞌanj, ni̱ nu̱n nuguanꞌ nataꞌ Yanꞌanj daj chruhua niman sij. Sani̱ tsínj nun xu̱man ruhua si-nu̱guanꞌ Yanꞌanj, ni̱ huin ruhua síꞌ sisi̱ nuguanꞌ yya̱ huin si-nu̱guanꞌ Yanꞌanj. Daj si nun xu̱man ruhua síꞌ nuguanꞌ nataꞌ Yanꞌanj xiꞌí daꞌni. ¹¹Ni̱ nuguanꞌ nataꞌ Yanꞌanj rian néꞌ huin sisi̱ riqui Yanꞌanj sisi̱ ga̱ꞌue ga̱ne ni̱ganj néꞌ nga̱ manꞌan Yanꞌanj. Ni̱ daꞌníj Yanꞌanj ꞌyaj si ga̱ne ni̱ganj néꞌ. ¹²Tsínj nicaj dugüiꞌ nga̱ daꞌníj Yanꞌanj, ni̱ ga̱ne ni̱ganj sij nga̱ Yanꞌanj. Sani̱ tsínj nitaj si nicaj dugüiꞌ nga̱ daꞌníj Yanꞌanj, ni̱ si̱ gane ni̱ganj sij nga̱ Yanꞌanj mánj.

El conocimiento de la vida eterna

¹³Ni̱ garūnj nuguanꞌ nan gaꞌnī rian ni é re̱ꞌ huin ni é re̱ꞌ ni ngüi̱ xuman ruhua niꞌyaj daꞌníj Yanꞌanj. Ni̱ huin ruhuāj sisi̱ gui̱niꞌi ni é re̱ꞌ sisi̱ ga̱ne ni̱ganj ni é re̱ꞌ nga̱ Yanꞌanj. Ni̱ arūnj nuguanꞌ nan sisi̱ ga̱ gue̱ gu̱xuman ruhua ni é re̱ꞌ ni̱ꞌyaj ni é re̱ꞌ daꞌníj Yanꞌanj nej. ¹⁴Ni̱ gahuin yya ruhua néꞌ nga̱ Yanꞌanj. Daj si ngaa ga̱chinj jniꞌyaj néꞌ ꞌngo̱ nuguanꞌ rian Yanꞌanj, ni̱ ga̱ꞌuej ruhua Yanꞌanj sisi̱ ni̱caj néꞌ nuguanꞌ daj, ngaa ni̱ ri̱qui sij aj. ¹⁵Ni̱ sisi̱ niꞌi néꞌ si gu̱nun sa̱ꞌ Yanꞌanj daranꞌ si achínj jniꞌyaj néꞌ rian sij, hué dan ni̱ niꞌi néꞌ sisi̱ hua nicaj néꞌ si gachínj néꞌ rian sij aj.

¹⁶Ni̱ sisi̱ niꞌi néꞌ ꞌyaj ꞌngo̱ jnánj néꞌ gaquinꞌ, ni̱ sé ꞌngo̱ gaquinꞌ gui̱ꞌyaj ga̱huiꞌ sij rian Yanꞌanj huin, ngaa ni̱ ga̱chinj jniꞌyaj néꞌ rian Yanꞌanj xiꞌí sij. Ni̱ ga̱ꞌuiꞌ Yanꞌanj si ga̱ ni̱ꞌnaꞌ sij. Sani̱ hua ango gaquinꞌ quij hua. Ni̱ sisi̱ gui̱ꞌyaj ꞌngo̱ jnánj néꞌ gaquinꞌ daj, ni̱ ga̱huiꞌ sij rian Yanꞌanj. Ngaa ni̱ si̱ gachínj jniꞌyóꞌ rian Yanꞌanj xiꞌí tsínj ꞌyaj gaquinꞌ quij da mánj. ¹⁷Daranꞌ si quij ꞌyaj ni ngüi̱ huin gaquinꞌ. Sani̱ hua gaquinꞌ ꞌyaj ni ngüi̱. Ni̱ sé si ga̱huiꞌ ni ngüi̱ rian Yanꞌanj, gui̱ꞌyaj daranꞌ gaquinꞌ mánj.

¹⁸Ni̱ niꞌi néꞌ sisi̱ nitaj si chéj ni daꞌníj Yanꞌanj si-chrej xungüi̱ nan mánj. Daj si dugumi daꞌníj Yanꞌanj si-chrej ni sij. Ni̱ si̱ gaꞌue gui̱daꞌa sichre ni sij mánj. ¹⁹Ni̱ niꞌi néꞌ sisi̱ nicaj dugüiꞌ niman néꞌ nga̱ Yanꞌanj. Sani̱ ni̱nꞌ ga̱chraꞌ chruhua xungüi̱ chéj sichre nicaj sun sij rian ni tsínj nitaj si nicaj dugüiꞌ nga̱ Yanꞌanj anj. ²⁰Ni̱ niꞌi néꞌ sisi̱ hua gaꞌna̱ꞌ daꞌníj Yanꞌanj. Ni̱ riqui sij si gara daꞌngaꞌ ruhua néꞌ da̱j hua Yanꞌanj xa̱ngaꞌ. Ni̱ nicaj dugüiꞌ néꞌ nga̱ tsínj huin xa̱ngaꞌ daꞌníj Yanꞌanj huin Jesucristo. Ni̱ hué sij huin Yanꞌanj xa̱ngaꞌ yya. Ni̱ ꞌyaj sij si ga̱ne ni̱ganj néꞌ nej.

²¹Da̱j rúnꞌ huin ni daꞌnī huin ín re̱ꞌ riānj. Hué dan ni̱ ga̱ cuidado ni é re̱ꞌ rian ni yanꞌanj digyaꞌ yunꞌunj huin ni yanꞌanj guiꞌyaj raꞌa ni ngüi̱. Ni̱ si̱ guinicoꞌ a ni é re̱ꞌ ango nuguanꞌ mánj. Amén.