1 Corintios

PRIMERA EPÍSTOLA DEL APÓSTOL PABLO A LOS CORINTIOS

Salutación

¹Huēj huin Pablo. Ni̱ gaquínj Yanꞌanj ga̱ꞌnāj ga̱huīnj ꞌngo̱ apóstol, tsínj nataꞌ si-nu̱guanꞌ Jesucristo rian ni ngüi̱. Daj si hué daj gahuin ruhua Yanꞌanj. Ni̱ aꞌníj nu̱guanꞌan nu̱ngüej jnánj únj Sóstenes ꞌngo̱ yanj rian án re̱ꞌ. ²Ni̱ aꞌníj nu̱ngüej únj yanj nan huaj rian án re̱ꞌ huin ín re̱ꞌ ꞌngo̱ xiꞌninꞌ nicoꞌ Yanꞌanj mán xumanꞌ Corinto. Ni̱ nagaꞌuiꞌ ni é re̱ꞌ niman án re̱ꞌ rian Yanꞌanj xiꞌí Jesucristo. Ni̱ gaquínj Yanꞌanj a ni é re̱ꞌ ga̱huin a ni é re̱ꞌ tsínj sa̱ꞌ niman rian Yanꞌanj. Ni̱ hué daj aꞌníj nu̱ngüej únj yanj nan rian daranꞌ ni ngüi̱ achínj jniꞌyaj rian Yanꞌanj nga̱ si-xugüi Jesucristo. Ni̱ hué Jesucristo huin Señor nicaj sun rian ni sij. Ni̱ huin sij Señor rian daranꞌ néꞌ. ³Ni̱ huin ruhua nu̱ngüej únj sisi̱ chrej néꞌ nga̱ Jesucristo gui̱ꞌyaj sinduj rian án re̱ꞌ. Ni̱ ga̱huin dinꞌinj ruhua á re̱ꞌ, gui̱ꞌyaj nu̱ngüej síꞌ, ruhua nu̱ngüej únj.

Acción de gracias por dones espirituales

⁴Ni̱ ni̱ganj aꞌuīj si guruhua Yanꞌanj xiꞌí a ni é re̱ꞌ. Daj si Yanꞌanj guiꞌyaj sinduj rian án re̱ꞌ xiꞌí si nicoꞌ a ni é re̱ꞌ Jesucristo. ⁵Ni̱ xiꞌí Jesucristo, ni̱ gahui sa̱ꞌ á re̱ꞌ, guiꞌyaj Yanꞌanj. Ni̱ guiꞌyaj Yanꞌanj sisi̱ aꞌmi sa̱ꞌ a ni é re̱ꞌ. Ni̱ guiꞌyaj Yanꞌanj sisi̱ huin chru̱n ni é re̱ꞌ gaꞌi̱ nuguanꞌ sa̱ꞌ nej. ⁶Ni̱ xiꞌí si guiꞌyaj sa̱ꞌ si-nu̱guanꞌ Cristo niman án re̱ꞌ, ni̱ huej digyán sisi̱ nuguanꞌ xa̱ngaꞌ huin. ⁷Ngaa ni̱ ni̱ a̱ ꞌngo̱ nuguanꞌ sa̱ꞌ nitaj si achin ri̱qui Yanꞌanj rian án re̱ꞌ ga̱ mánj. Ni̱ anaꞌuij a ni é re̱ꞌ güi na̱nicaj ru̱huaꞌ yún Jesucristo huin Señor nicaj sun rian néꞌ. ⁸Ni̱ gui̱ꞌyaj síꞌ sisi̱ ga̱huin ran niman án re̱ꞌ da ga̱nahuij xungüi̱ nan. Ngaa ni̱ nitaj a̱ ꞌngo̱ tsínj ga̱ꞌue ga̱ꞌmi gaquinꞌ rian án re̱ꞌ güi na̱nicaj Señor Jesucristo ga̱ꞌnaꞌ sij. ⁹Ni̱ganj da̱gahuin Yanꞌanj si-nu̱guanꞌanj rian néꞌ. Ni̱ hué Yanꞌanj gaquínj sisi̱ gui̱nicaj dugüiꞌ ni é re̱ꞌ nga̱ daꞌni Jesucristo huin Señor nicaj sun rian néꞌ.

¿Está divido Cristo?

¹⁰Ni̱ achínj jniꞌyā rian án re̱ꞌ huin ín re̱ꞌ jnánj néꞌ nga̱ si-xugüi Señor Jesucristo sisi̱ uyan ga̱ ni̱ca ruhua daranꞌ ni é re̱ꞌ. Ni̱ si̱ guiꞌyaj ni̱ni go̱ꞌngo ni é re̱ꞌ manꞌan án re̱ꞌ mánj. Ni̱ uyan ga̱ꞌmi ni é re̱ꞌ gui̱man án re̱ꞌ. Ni̱ urin ga̱ni ruhua á re̱ꞌ aj. ¹¹Ni̱ gataj ni dugüiꞌ Cloé gunūnj sisi̱ ununꞌ ni du̱güiꞌ ni é re̱ꞌ huin ín re̱ꞌ jnánj néꞌ. ¹²Ni̱ huin ruhuāj ga̱tā sisi̱ ataj go̱ꞌngo ni é re̱ꞌ: “Huēj nicoꞌ si-nu̱guanꞌ Pablo.” Ni̱ ataj ango ni é re̱ꞌ: “Huēj nicoꞌ si-nu̱guanꞌ Apolos.” Ni̱ ángo ni é re̱ꞌ ataj: “Huēj nicoꞌ si-nu̱guanꞌ Cefas.” Ni̱ ángo re̱ꞌ ataj: “Huēj nicoꞌ si-nu̱guanꞌ Cristo.” Daj ataj go̱ꞌngo a ni é re̱ꞌ. ¹³Asi̱ gaꞌi̱ Cristo hua ruhua á re̱ꞌ níꞌ. Asi̱ gahuiꞌ manꞌānj rian rugutsi̱ xiꞌí a ni é re̱ꞌ ga̱ꞌ. Asi̱ si-xugüi manꞌānj gataꞌ nnee ni é re̱ꞌ ga̱ꞌ. Sé daj huin mánj.

¹⁴Ni̱ aꞌuīj si guruhua Yanꞌanj sisi̱ nun duguataꞌ nnēj ni é re̱ꞌ. Sani̱ urin nu̱ngüej tsínj Crispo nga̱ Gayo duguataꞌ nnēj nanj. ¹⁵Hué dan ni̱, ni̱ a̱ ꞌngo̱ ni é re̱ꞌ si̱ gaꞌue ga̱taj sisi̱ gataꞌ nnee ni é re̱ꞌ xiꞌí si-xugüīj mánj. ¹⁶Ni̱ hué daj duguataꞌ nnēj ni du̱güiꞌ Estéfanas. Sani̱ nitaj si nanun ruhuāj sisi̱ duguataꞌ nnēj ango ni sij mánj. ¹⁷Daj si nun ga̱ꞌnij Cristo sisi̱ ga̱nꞌanj du̱guataꞌ nnēj ni ngüi̱ mánj. Sani̱ huin ruhua Cristo sisi̱ ga̱ꞌmī si-nu̱guanꞌ Yanꞌanj nuguanꞌ sa̱ꞌ rian ni sij. Ni̱ sé si-nu̱guanꞌ tsínj niꞌi sa̱ꞌ huin nuguanꞌ aꞌmī mánj. Sani̱ aꞌmī si-nu̱guanꞌ Jesucristo sisi̱ xa̱caj ni ngüi̱ cuenta da̱j gahuiꞌ síꞌ rian rugutsi̱ xiꞌí ni sij. Ngaa ni̱ ga̱ꞌue gu̱xuman ruhua ni ngüi̱ nuguanꞌ sa̱ꞌ aꞌmī rian ni sij aj.

Cristo, poder y sabiduría de Dios

¹⁸Ni̱ ani ruhua ni ngüi̱ ga̱nꞌanj rian yanꞌa̱n sisi̱ nuguanꞌ ni̱ꞌyun huin nuguanꞌ nataꞌ néꞌ xiꞌí si gahuiꞌ Cristo rian rugutsi̱. Sani̱ nuguanꞌ nan huin ꞌngo̱ nuguanꞌ nucuaj, guiꞌyaj Yanꞌanj rian ni ngüi̱ ga̱nacaj Yanꞌanj huin néꞌ aj. ¹⁹Ni̱ gataj si-nu̱guanꞌ Yanꞌanj:

Ga̱ꞌnē si-nu̱guanꞌ ni tsínj ani ruhua sisi̱ chru̱n sa̱ꞌ ni sij.

Ni̱ si̱ gahuin nucuaj ni sij xa̱caj ni sij cuenta xiꞌí nuguanꞌ sa̱ꞌ, guiꞌyā.

Daj gataj Yanꞌanj.

²⁰Ni̱ hua tsínj niꞌi gaꞌi̱ nuguanꞌ. Ni̱ hua tsínj arun yanj libro nej. Ni̱ hua tsínj aꞌmi nico nuguanꞌ rian ni dugüiꞌ sij nej. Sani̱ nitaj si níꞌyanj si-nu̱guanꞌ ni tsínj daj, guiꞌyaj Yanꞌanj si nun xu̱man ruhua ni sij ni̱ꞌyaj ni sij Yanꞌanj. ²¹Ni̱ guiꞌyaj Yanꞌanj sisi̱ naꞌue ga̱ra daꞌngaꞌ ruhua ni ngüi̱ da̱j hua manꞌan Yanꞌanj xiꞌí si-nu̱guanꞌ ni tsínj ani ruhua sisi̱ niꞌi sa̱ꞌ ni sij. Sani̱ gani ruhua Yanꞌanj ga̱nacaj síꞌ ni ngüi̱ xiꞌí si-nu̱guanꞌ manꞌan síꞌ huin nuguanꞌ aꞌmi ni únj rian ni ngüi̱. Ni̱ daꞌngaꞌ daj ꞌyaj Yanꞌanj nu̱nj si ani ruhua daꞌaj ni ngüi̱ sisi̱ nuguanꞌ ni̱ꞌyun huin aj.

²²Achínj ni tsínj israelita ꞌngo̱ rasu̱n sa̱ꞌ ꞌna̱ꞌ xataꞌ gui̱niꞌi ni sij. Ni̱ tsínj griego, sani̱ nanoꞌ ni sij si ga̱huin chru̱n ni sij. Sani̱ nataꞌ ni únj sisi̱ gahuiꞌ Cristo rian rugutsi̱ xiꞌí ni ngüi̱. ²³Ni tsínj israelita huin na̱ꞌaj, ꞌyaj nuguanꞌ nan. Ni̱ ani ruhua ango ni ngüi̱ ꞌna̱ꞌ anéj chrej sisi̱ ꞌngo̱ nuguanꞌ ni̱ꞌyun huin nuguanꞌ nan. ²⁴Sani̱ ni ngüi̱ gaquínj Yanꞌanj ga̱ꞌnaꞌ gui̱nicaj dugüiꞌ nga̱ Cristo, ni̱ nu̱nj si ni ngüi̱ israelita huin ni sij, asi̱ ni ngüi̱ griego huin ni sij, sani̱ ngaa unun ni sij nuguanꞌ aꞌmi ni únj, ni huin yya ruhua ni sij sisi̱ nucuaj Cristo xiꞌí si ꞌna̱ꞌ sij rian Yanꞌanj anj. Ni̱ huin yya ruhua ni sij sisi̱ niꞌi sa̱ꞌ Cristo xiꞌí si ꞌna̱ꞌ sij rian Yanꞌanj nej. ²⁵Ni̱ ani ruhua daꞌaj ni ngüi̱ sisi̱ nuguanꞌ ni̱ꞌyun huin ꞌngo̱ si-nu̱guanꞌ Yanꞌanj. Sani̱ nuguanꞌ daj níꞌyanj doj daj nga̱ daranꞌ si-nu̱guanꞌ ni ngüi̱ aj. Ni̱ ani ruhua daꞌaj ni ngüi̱ sisi̱ nitaj si nucuaj ꞌngo̱ si-nu̱guanꞌ Yanꞌanj. Sani̱ nucuaj nuguanꞌ daj doj daj nga̱ daranꞌ si-nu̱guanꞌ ni tsínj aj.

²⁶Ni̱ xa̱caj á re̱ꞌ cuenta huin ín re̱ꞌ jnánj néꞌ nga̱ xicaꞌuij néꞌ sisi̱ gaquínj Yanꞌanj ga̱ꞌnaꞌ á re̱ꞌ gui̱nicaj dugüiꞌ a ni é re̱ꞌ nga̱ Cristo. Ni̱ sé nico a ni é re̱ꞌ huin tsínj niꞌi sa̱ꞌ scanij a ni é re̱ꞌ da̱j ani ruhua ni ngüi̱. Ni̱ sé nico a ni é re̱ꞌ huin tsínj nucuaj scanij a ni é re̱ꞌ. Ni̱ sé nico a ni é re̱ꞌ huin tsínj huin achij scanij a ni é re̱ꞌ nej. ²⁷Sani̱ nacui Yanꞌanj a ni é re̱ꞌ. Ni̱ nu̱nj si ani ruhua ni tsínj niꞌi sa̱ꞌ sisi̱ nitaj si níꞌyanj a ni é re̱ꞌ, sani̱ ga̱huin na̱ꞌaj ni sij xiꞌí ni é re̱ꞌ, gui̱ꞌyaj Yanꞌanj. Ni̱ nacui Yanꞌanj a ni é re̱ꞌ huin ín re̱ꞌ ni ngüi̱ nitaj si huin achij. Sani̱ hué daj ga̱huin na̱ꞌaj ni tsínj huin achij xiꞌí a ni é re̱ꞌ, gui̱ꞌyaj Yanꞌanj anj. ²⁸Ni̱ nacui Yanꞌanj ni ngüi̱ niqui nga̱ ni ngüi̱ nitaj si níꞌyanj, ataj ni ngüi̱ ma̱n chruhua xungüi̱ gaquinꞌ nan. Sani̱ gui̱ꞌyaj gana ni ngüi̱ daj rian ni ngüi̱ huin achij doj ma̱n chruhua xungüi̱ nan, gui̱ꞌyaj Yanꞌanj. ²⁹Ngaa ni̱ ngaa guisíj, ni̱ a̱ ꞌngo̱ ni ngüi̱ si̱ guisij ruhua ga̱ꞌmi sa̱ꞌ xiꞌí manꞌan ni sij rian Yanꞌanj mánj. ³⁰Sani̱ guiꞌyaj Yanꞌanj sisi̱ uyan guinicaj dugüiꞌ ni é re̱ꞌ nga̱ Cristo Jesús. Ni̱ guiꞌyaj Yanꞌanj sisi̱ Cristo huin tsínj niꞌi daranꞌ nuguanꞌ níꞌyanj néꞌ. Ni̱ xiꞌí Cristo, ni̱ nitaj si daꞌui néꞌ gaquinꞌ, guiꞌyaj Yanꞌanj. Ni̱ xiꞌí Cristo, ni̱ hua sa̱ꞌ niman néꞌ rian Yanꞌanj, guiꞌyaj Yanꞌanj. Ni̱ naránj Cristo rian si-ga̱quinꞌ néꞌ, guiꞌyaj Yanꞌanj. ³¹Xiꞌí daj hua nia̱n si gui̱ꞌyaj sa̱ꞌ néꞌ da̱j rúnꞌ gataj si-nu̱guanꞌ Yanꞌanj: “Si̱ gaꞌmi sa̱ꞌ néꞌ xiꞌí manꞌan néꞌ mánj. Sani̱ ni̱nanj ga̱ꞌmi sa̱ꞌ néꞌ xiꞌí Señor aj.” Daj gataj si-nu̱guanꞌ Yanꞌanj.

Proclamando a Cristo crucificado

¹Ni̱ niꞌi a ni é re̱ꞌ sisi̱ ngaa guisī rian ma̱n án re̱ꞌ natāj nuguanꞌ xa̱ngaꞌ ꞌna̱ꞌ rian Yanꞌanj gunun a ni é re̱ꞌ, ni̱ nun ga̱ꞌmī nuguanꞌ chru̱n nga̱ nuguanꞌ ꞌueé gunun a ni é re̱ꞌ huin ín re̱ꞌ jnánj néꞌ nga̱ xicaꞌuij néꞌ. ²Sani̱ gani ruhuāj si ga̱ꞌmī urin nuguanꞌ rian án re̱ꞌ huin si-nu̱guanꞌ Jesucristo tsínj guinicoꞌ rian rugutsi̱. ³Ni̱ ngaa guisī rian ma̱n án re̱ꞌ, ni̱ gahuin na̱ꞌā gaꞌmī. Ni̱ guxuꞌuīj. Ni̱ nagunanj yūnj anj. ⁴Ni̱ ngaa gaꞌmī, ni̱ natāj si-nu̱guanꞌ Yanꞌanj gunun a ni é re̱ꞌ. Ni̱ nun ga̱ꞌmī nuguanꞌ chru̱n huin nuguanꞌ aꞌmi ni tsínj niꞌi sa̱ꞌ mánj. Sani̱ riqui Espíritu Santo sisi̱ nucuaj nuguanꞌ gaꞌmī rian án re̱ꞌ. ⁵Nitaj si huin ruhuāj sisi̱ gu̱xuman ruhua á re̱ꞌ ni̱ꞌyaj á re̱ꞌ Yanꞌanj xiꞌí si aꞌmi manꞌānj nuguanꞌ aꞌmi ni tsínj niꞌi sa̱ꞌ. Sani̱ huin ruhuāj sisi̱ gu̱xuman ruhua á re̱ꞌ ni̱ꞌyaj á re̱ꞌ Yanꞌanj xiꞌí si nucuaj si-nu̱guanꞌ ni únj, gui̱ꞌyaj Yanꞌanj anj.

La revelación por el Espíritu Santo

⁶Sani̱ hua nuguanꞌ chru̱n niꞌi néꞌ ꞌna̱ꞌ rian Yanꞌanj. Ni̱ aꞌmi ni únj nuguanꞌ daj rian ni ngüi̱ unun sa̱ꞌ si-nu̱guanꞌ Yanꞌanj. Sani̱ nitaj si ꞌna̱ꞌ ni nuguanꞌ aꞌmi néꞌ rian ni tsínj huin achij rian xungüi̱ gaquinꞌ nan mánj. Daj si niꞌi néꞌ sisi̱ ga̱nahuij ni tsínj huin achij daj. ⁷Sani̱ aꞌmi ni únj si-nu̱guanꞌ Yanꞌanj huin nuguanꞌ chru̱n. Ni̱ nuguanꞌ nan huin ꞌngo̱ nuguanꞌ gari hui̱ Yanꞌanj asi̱j sini ya̱n ngaa achin guiꞌyaj Yanꞌanj xungüi̱. Ni̱ huin ruhua Yanꞌanj sisi̱ ga̱nahuin ꞌueé néꞌ, gui̱ꞌyaj nuguanꞌ nan. ⁸Nun gara daꞌngaꞌ ruhua ni tsínj huin achij mán chruhua xungüi̱ nuguanꞌ nan. Sisi̱ nu̱n gara daꞌngaꞌ ruhua ni sij, ni̱ si̱ docoꞌ ni sij rian rugutsi̱ Señor huin tsínj gahuin achij ne̱ꞌ xataꞌ mánj.

⁹Sani̱ hua ni̱ca rian si-nu̱guanꞌ Yanꞌanj:

Ni ngüi̱ ꞌi̱ ruhua niꞌyaj Yanꞌanj, ni̱ hua guiꞌyaj xugüi Yanꞌanj ni rasu̱n hua ꞌueé.

Ni̱ a̱ ꞌngo̱ ni sij nun gui̱niꞌi ni rasu̱n daj.

Ni̱ nun gunun ni sij xiꞌí ni rasu̱n daj nej.

Ni̱ nun ga̱ni ruhua ni sij da̱j hua ni rasu̱n daj.

Daj gataj si-nu̱guanꞌ Yanꞌanj.

¹⁰Sani̱ digyán Yanꞌanj ni rasu̱n daj rian ni únj, guiꞌyaj Espíritu Santo. Daj si niꞌyaj sa̱ꞌ Espíritu Santo daranꞌ ni nuguanꞌ. Ni̱ niꞌi sa̱ꞌ Espíritu Santo si ani ruhua niman Yanꞌanj nej.

¹¹Nitaj a̱ ꞌngo̱ tsínj ga̱ꞌue xa̱caj cuenta da̱j ani ruhua niman ꞌngo̱ tsínj da mánj. Sani̱ urin niman tsínj daj niꞌi da̱j ani ruhua manꞌan sij. Ni̱ hué ducuánj daj, ni̱ nitaj a̱ ꞌngo̱ ni ngüi̱ niꞌi da̱j ani ruhua Yanꞌanj mánj. Urin Espíritu Santo niꞌi da̱j ani ruhua Yanꞌanj anj. ¹²Nitaj si ani ruhua ni únj da̱j rúnꞌ ani ruhua ni ngüi̱ ma̱n chruhua xungüi̱ gaquinꞌ nan. Sani̱ ani ruhua ni únj da̱j rúnꞌ digyán Espíritu Santo chruhua niman ni únj. Ngaa ni̱ ga̱ꞌue xa̱caj ni únj cuenta da̱j hua ni nuguanꞌ sa̱ꞌ riqui Yanꞌanj rian néꞌ. ¹³Ni̱ aꞌmi ni únj ni nuguanꞌ sa̱ꞌ nan rian ni ngüi̱. Ni̱ sé ni nuguanꞌ huin chru̱n ni únj güenda manꞌan ni únj huin mánj. Sani̱ aꞌmi ni únj nuguanꞌ digyán Espíritu Santo rian ni únj. Ni̱ aꞌmi ni únj nuguanꞌ daj rian ni ngüi̱ nu̱n Espíritu Santo niman.

¹⁴Tsínj acaj chrej chruhua xungüi̱ gaquinꞌ nan, ni̱ naꞌue xa̱caj sij cuenta da̱j hua nuguanꞌ ataj Espíritu Santo gunun ni ngüi̱ mánj. Daj si nuguanꞌ ni̱ꞌyun huin ani ruhua sij. Ni̱ naꞌue ga̱ra daꞌngaꞌ ruhua sij. Daj si Espíritu Santo ꞌyaj si ga̱ra daꞌngaꞌ ruhua néꞌ da̱j hua ni nuguanꞌ da aj. ¹⁵Tsínj unun si ataj Espíritu Santo, ni̱ naguiꞌyaj cu sij daranꞌ ni nuguanꞌ. Sani̱ naꞌue ga̱ra daꞌngaꞌ ruhua ni ngüi̱ ni nuguanꞌ ani ruhua tsínj daj huin tsínj unun si ataj Espíritu Santo. ¹⁶Daj si gataj si-nu̱guanꞌ Yanꞌanj: “Ni a̱ ꞌngo̱ tsínj nun niꞌi da̱j ani ruhua Señor. Ni̱ a̱ ꞌngo̱ tsínj si̱ gaꞌue di̱gyan rian Señor mánj. Sani̱ niꞌi ni únj da̱j ani ruhua Cristo.” Daj gataj si-nu̱guanꞌ Yanꞌanj anj.

Colaboradores de Dios

¹Ngaa guisī rian án re̱ꞌ, ni̱ si̱ gaꞌue gaꞌmī rian án re̱ꞌ da̱j rúnꞌ aꞌmī rian ango ni ngüi̱ nicoꞌ sa̱ꞌ Yanꞌanj huin ín re̱ꞌ jnánj néꞌ nga̱ xicaꞌuij néꞌ. Daj si nitaj si gani ruhua á re̱ꞌ da̱j rúnꞌ digyán Espíritu Santo rian án re̱ꞌ. Ngaa ni̱ gaꞌmī rian án re̱ꞌ da̱j rúnꞌ aꞌmī rian ni ngüi̱ chéj si-chrej xungüi̱ gaquinꞌ nan. Daj si da̱j rúnꞌ ꞌyaj ni lij, ni̱ hué daj guiꞌyaj á re̱ꞌ. ²Ni̱ nun gu̱nucuaj á re̱ꞌ gu̱nun a ni é re̱ꞌ nuguanꞌ ꞌna̱ꞌ rian Espíritu Santo. Ni̱ da̱j rúnꞌ hua ꞌngo̱ lij ngaa utsi xiꞌyanj nni, ni̱ naꞌue xa̱j chra, ni̱ daꞌngaꞌ daj hua á re̱ꞌ, si naꞌue gu̱nun a ni é re̱ꞌ ni nuguanꞌ cu digyānj rian án re̱ꞌ mánj. Ni̱ hua gue̱ naꞌue gu̱nun a ni é re̱ꞌ mánj. ³Daj si hua gue̱ ani ruhua á re̱ꞌ da̱j rúnꞌ ani ruhua ni ngüi̱ ma̱n chruhua xungüi̱ gaquinꞌ nan. Ni̱ huin xicoj ruhua á re̱ꞌ niꞌyaj á re̱ꞌ ni dugüiꞌ a ni é re̱ꞌ. Ni̱ ununꞌ a ni é re̱ꞌ nga̱ ni dugüiꞌ a ni é re̱ꞌ nej. Ni̱ huin ruhuaj gata sisi̱ hua gue̱ ꞌyaj ni é re̱ꞌ da̱j rúnꞌ ꞌyaj ni ngüi̱ ma̱n chruhua xungüi̱ gaquinꞌ nan.

⁴Daj si ataj ꞌngo̱ ni é re̱ꞌ: “Huēj nicoꞌ Pablo.” Ni ango ni é re̱ꞌ ataj: “Huēj nicoꞌ tsínj gu̱ꞌnaj Apolos.” Daj aꞌmi go̱ꞌngo a ni é re̱ꞌ. Ni̱ huin ruhuaj gata sisi̱ hua gue̱ ani ruhua á re̱ꞌ da̱j rúnꞌ ani ruhua ni ngüi̱ ma̱n chruhua xungüi̱ gaquinꞌ nan. ⁵Ni̱ u̱n tsínj huin Pablo, ni̱ u̱n tsínj huin Apolos, ruhua á re̱ꞌ únj. Maan si ꞌyaj sun nu̱ngüej únj rian Señor. Xiꞌí nu̱ngüej únj, ni̱ guxuman ruhua ni é re̱ꞌ niꞌyaj á re̱ꞌ Señor. Ni̱ ꞌyaj sun go̱ꞌngo nu̱ngüej únj da̱j rúnꞌ digyán Señor rian únj. ⁶Ni̱ huēj gunu̱n ca̱n huin si-nu̱guanꞌ Yanꞌanj scanij a ni é re̱ꞌ. Ni̱ tsínj gu̱ꞌnaj Apolos utaj nnee rian ca̱n daj. Sani̱ Yanꞌanj guiꞌyaj si gachi ca̱n daj. ⁷Sani̱ tsínj gunu̱n nga̱ tsínj utaj nnee, ni̱ sé nu̱ngüej tsínj daj guiꞌyaj achij coj daj huin ín re̱ꞌ. Urin Yanꞌanj guiꞌyaj sisi̱ achij coj da aj. ⁸Ni̱ uyan huin tsínj gunu̱n ca̱n nga̱ tsínj utaj nnee. Sani̱ na̱ruꞌue Yanꞌanj rian go̱ꞌngo nu̱ngüej únj da̱j rúnꞌ guiꞌyaj sun go̱ꞌngo nu̱ngüej únj. ⁹Ni̱ ꞌyaj sun nu̱guanꞌan nu̱ngüej únj nga̱ Yanꞌanj. Ni̱ rúnꞌ huin yoꞌój huin ni é re̱ꞌ. Ni̱ ꞌyaj sun Yanꞌanj yoꞌój daj. Ni̱ da̱j rúnꞌ huin ꞌngo̱ hueꞌ ꞌyaj sun Yanꞌanj huin ín re̱ꞌ nej.

¹⁰Ni̱ guiꞌyaj Yanꞌanj sinduj riqui sij si huēj huin ꞌngo̱ maestro guiꞌyaj sun sa̱ꞌāj xiꞌí hueꞌ daj. Ni̱ aráj ango tsínj hueꞌ daj huin ni tsínj digyán si-nu̱guanꞌ Yanꞌanj. Sani̱ ga̱ cuidado ni tsínj ga̱ra hueꞌ daj sisi̱ gui̱ꞌyaj sa̱ꞌ ni sij nga̱ nuguanꞌ daj. ¹¹Daj si si̱ gaꞌue gu̱neꞌ ni sij ango xiꞌí hueꞌ rian hua guisíj garā daj huin Jesucristo mánj. ¹²Ga̱ꞌue ga̱ra ꞌngo̱ tsínj daj gagaꞌ oro, asi̱ plata nej, yej nia̱ꞌ nej, chrun nej, chrinꞌ naco̱ nej, guiꞌyo̱ nej. ¹³Sani̱ güi na̱guiꞌyaj yya Cristo daranꞌ ni nuguanꞌ, ni̱ gui̱niꞌi yya néꞌ da̱j hua sun guiꞌyaj go̱ꞌngo néꞌ. Daj si ga̱ꞌnaꞌ Cristo nga̱ yanꞌa̱n. Ngaa ni̱ gui̱niꞌi néꞌ da̱j guiꞌyaj sun go̱ꞌngo néꞌ.

¹⁴Sisi̱ garáj ꞌngo̱ tsínj daj hueꞌ, ni̱ nun ga̱ca hueꞌ guiꞌyaj yanꞌa̱n daj, ngaa ni̱ na̱ruꞌue Yanꞌanj rian sij. ¹⁵Sani̱ sisi̱ ga̱ca hueꞌ garáj tsínj daj, ni̱ ꞌngo̱ ga̱ niꞌya sun guiꞌyaj sun síꞌ. Sani̱ tsínj daj ga̱nani scanij yanꞌa̱n, gui̱ꞌyaj Yanꞌanj. ¹⁶Ni̱ niꞌi a ni é re̱ꞌ sisi̱ da̱j rúnꞌ huin ꞌngo̱ nuhui nne Yanꞌanj huin ín re̱ꞌ. Ni̱ nne Espíritu Santo chruhua niman án re̱ꞌ aj. ¹⁷Ni̱ sisi̱ de̱reꞌ ꞌngo̱ tsínj daj ducuá Yanꞌanj, ni̱ hué daj gui̱ꞌyaj Yanꞌanj nga̱ sij nej. Daj si hua sa̱ꞌ ni̱nꞌ ducuá Yanꞌanj huin ín re̱ꞌ.

¹⁸Hué dan ni̱ si̱ digyaꞌ yunꞌunj a ni é re̱ꞌ manꞌan án re̱ꞌ mánj. Sisi̱ ani ruhua ꞌngo̱ a ni é re̱ꞌ sisi̱ chru̱n sij xiꞌí nuguanꞌ ꞌna̱ꞌ chruhua xungüi̱ nan, ngaa ni̱ ruhuāj sisi̱ na̱guiꞌyaj sij manꞌan sij da̱j rúnꞌ ꞌyaj ꞌngo̱ tsínj nun niꞌi. Ni̱ hué ducuánj daj, ni̱ ga̱ꞌue gui̱sij sij ga̱huin chru̱n xa̱ngaꞌ sij aj. ¹⁹Daj si nuguanꞌ chru̱n ni tsínj ma̱n chruhua xungüi̱ nan huin nuguanꞌ ni̱ꞌyun rian Yanꞌanj nánj. Ni̱ gataj si-nu̱guanꞌ Yanꞌanj: “Ni̱ xiꞌí si ani ruhua ni sij sisi̱ chru̱n ni sij, ni̱ gue̱reꞌ si-nu̱guanꞌ ni sij, gui̱ꞌyaj Yanꞌanj.” Daj gataj si-nu̱guanꞌ Yanꞌanj. ²⁰Ni̱ gataj si-nu̱guanꞌ Yanꞌanj nej: “Niꞌi Señor sisi̱ nuguanꞌ ni̱ꞌyun huin si ani ruhua ni tsínj daj huin ni tsínj ani ruhua sisi̱ chru̱n manꞌan ni sij.” Daj gataj si-nu̱guanꞌ Yanꞌanj.

²¹Xiꞌí daj ni̱ si̱ gaꞌue ga̱ꞌmi xa̱can ni é re̱ꞌ da̱j hua tsínj nicoꞌ a ni é re̱ꞌ mánj. Daj si daranꞌ ni rasu̱n huin siꞌyaj a ni é re̱ꞌ. ²²Ni̱ nicaj dugüiꞌ a ni é re̱ꞌ nga̱ manꞌānj huin Pablo nej, tsínj gu̱ꞌnaj Apolos nej, tsínj gu̱ꞌnaj Cefas nej. Ni̱ siꞌyaj a ni é re̱ꞌ huin xungüi̱ nan. Ni̱ hua ni̱ꞌnaꞌ a ni é re̱ꞌ, guiꞌyaj Yanꞌanj. Ni̱ ga̱huiꞌ ni é re̱ꞌ, sani̱ ga̱ne ni̱ganj a ni é re̱ꞌ, gui̱ꞌyaj Yanꞌanj. Ni̱ hua sa̱ꞌ mán án re̱ꞌ acuanꞌ. Ni̱ ga̱ sa̱ꞌ gui̱man a ni é re̱ꞌ ni güi ga̱ꞌnaꞌ nej. Daranꞌanj huin siꞌyaj a ni é re̱ꞌ ²³huin ín re̱ꞌ tsínj nicoꞌ Cristo. Ni̱ Cristo huin daꞌníj Yanꞌanj nej.

El ministerio de los apóstoles

¹Ngaa ni̱ huin ruhua únj sisi̱ xa̱caj ni ngüi̱ cuenta sisi̱ tsínj ꞌyaj sun rian Cristo huin únj. Ni̱ narij sun Yanꞌanj ni únj sisi̱ na̱taꞌ únj si-nu̱guanꞌ Yanꞌanj rian ni ngüi̱ huin nuguanꞌ digyán na̱ca Yanꞌanj rian néꞌ. ²Ni̱ xiꞌí si narij sun Yanꞌanj ni únj, ni̱ hua nia̱n sisi̱ gui̱ꞌyaj ꞌueé únj nga̱ sun da aj. ³Güendāj ni̱ nitaj si riun ruhuāj si aꞌmi a ni é re̱ꞌ xiꞌí si-sūnj. Ni̱ nitaj si riun ruhuāj si aꞌmi ni tsínj nicaj sun xiꞌīj mánj. Ni̱ nitaj si riun ruhua manꞌānj xiꞌīj nej. ⁴Ni̱ nu̱nj si nitaj si aꞌmi gaquinꞌ nimānj xiꞌīj, sani̱ sé daj huin ruhuaj gata sisi̱ nitaj gaquinꞌ daꞌuīj. Daj si niꞌīnj sisi̱ Señor huin si na̱guiꞌyaj yya xiꞌīj aj. ⁵Hué daj ni̱ si̱ gaꞌmi gaquinꞌ a ni é re̱ꞌ xiꞌí si ꞌyaj dugüiꞌ a ni é re̱ꞌ mánj. Ga̱noꞌ naj a ni é re̱ꞌ da ga̱ꞌnaꞌ Señor. Ngaa ni̱ gui̱ri Señor rian xigui̱n daranꞌ si gari hui̱ ni ngüi̱ rian hua ru̱miꞌ. Ni̱ gui̱niꞌi néꞌ da̱j ani ruhua ni ngüi̱, gui̱ꞌyaj Señor. Ngaa ni̱ ga̱ꞌmi sa̱ꞌ Yanꞌanj xiꞌí ni ngüi̱ dagahuin sa̱ꞌ si-nu̱guanꞌ Yanꞌanj.

⁶Ni̱ hua gatā ni nuguanꞌ nan rian án re̱ꞌ sisi̱ ga̱ sa̱ꞌ rian án re̱ꞌ huin ín re̱ꞌ jnánj néꞌ nga̱ xicaꞌuij néꞌ. Ni̱ huin ruhuāj sisi̱ gui̱niꞌi a ni é re̱ꞌ nu̱ngüej únj Apolos. Ni̱ ga̱huin chru̱n a ni é re̱ꞌ gui̱ꞌyaj ni é re̱ꞌ urin si ataj si-nu̱guanꞌ Yanꞌanj. Ni̱ si̱ gunun a ni é re̱ꞌ ango ni nuguanꞌ mánj. Hué dan ni̱ si̱ gataj a ni é re̱ꞌ sisi̱ sa̱ꞌ doj si digyán ꞌngo̱ tsínj daj daj nga̱ si digyán ango tsínj da mánj. ⁷Ni̱ u̱n tsínj gataj sisi̱ sa̱ꞌ doj huín re̱ꞌ rian ango ni ngüi̱ únj. Ni̱ u̱n rasu̱n nicáj re̱ꞌ ruhuá re̱ꞌ sisi̱ nitaj Yanꞌanj riqui rián re̱ꞌ únj. Ni̱ sisi̱ riqui Yanꞌanj daranꞌ si nicáj re̱ꞌ, ngaa ni̱ u̱n sin huin, ni̱ ꞌyaj nne̱ re̱ꞌ sisi̱ nun riqui Yanꞌanj rian án re̱ꞌ, ruhua á re̱ꞌ únj. ⁸Ni̱ nun hua sa̱ꞌ si ani ruhua á re̱ꞌ. Daj si ni̱ a̱ ꞌngo̱ rasu̱n nun achin rian án re̱ꞌ, ruhua á re̱ꞌ. Ni̱ xuruꞌue a ni é re̱ꞌ, ruhua á re̱ꞌ. Ni̱ ngaa nitaj si chracuij únj a ni é re̱ꞌ, ni̱ gu̱nucuaj a ni é re̱ꞌ gui̱nicaj sun a ni é re̱ꞌ, ruhua á re̱ꞌ nej. Ngaa ni̱ gui̱nicaj nu̱guanꞌan ni únj sun nga̱ á re̱ꞌ, ruhuāj aj. Nitaj si hua sa̱ꞌ si ani ruhua á re̱ꞌ mánj.

⁹Ni̱ ani ruhuāj sisi̱ nicoꞌ únj da ru̱cu, guiꞌyaj Yanꞌanj. Ni̱ da̱j rúnꞌ ranꞌ ꞌngo̱ tsínj daj ngaa chruhua ga̱huiꞌ sij, gui̱ꞌyaj ni tsínj dagahuiꞌ níman, ni̱ daꞌngaꞌ daj ranꞌ ni únj huin únj ni tsínj apóstol huin ni tsínj aꞌmi si-nu̱guanꞌ Jesucristo rian ni ngüi̱. Daj si da̱j doj ga̱huiꞌ únj, ruhuāj aj. Ni̱ rúnꞌ huaj sisi̱ niꞌyaj daranꞌ ni ngüi̱ ma̱n chruhua xungüi̱ nga̱ ni ángel rian ni únj, ruhuāj aj. ¹⁰Ni̱ xiꞌí si nicaj dugüiꞌ ni únj nga̱ Cristo, ni̱ ani ruhua ni ngüi̱ sisi̱ tsínj ni̱ꞌyun huin únj. Sani̱ tsínj niꞌi sa̱ꞌ huin a ni é re̱ꞌ, ruhua á re̱ꞌ. Nitaj si nucuaj ni únj, ataj ni ngüi̱. Sani̱ tsínj nucuaj huin ín re̱ꞌ, ruhua á re̱ꞌ. Aꞌmi sa̱ꞌ ni ngüi̱ xiꞌí a ni é re̱ꞌ, ruhua á re̱ꞌ. Sani̱ nun huin xa̱nꞌ ruhua ni ngüi̱ niꞌyaj ni sij ni únj mánj.

¹¹Daꞌ acuanꞌ ni̱ ranꞌ únj sayun. Ni̱ achin xiꞌna̱ riqui únj. Ni̱ nagoꞌo únj nnee nej. Ni̱ achin si-ganꞌ únj nej. Ni̱ chranꞌ yunꞌunj ni ngüi̱ ni únj. Ni̱ nitaj ri̱an ga̱ne yya ni únj mánj. ¹²Ni̱ ninaj únj ꞌyaj sun únj nga̱ raꞌa únj. Ni̱ ngaa aꞌmi quij ni ngüi̱ rian únj, ni̱ aꞌmi únj nuguanꞌ sa̱ꞌ rian ni sij. Ni̱ ngaa chranꞌ yunꞌunj ni ngüi̱ únj, ni̱ aꞌninꞌ ruhua únj xiꞌí sayun daj. ¹³Ni̱ ngaa aꞌmi snanꞌanj ni ngüi̱ xiꞌí únj, ni̱ aꞌmi sa̱ꞌ únj nga̱ ni sij. Ni̱ ꞌyaj ni ngüi̱ sisi̱ huin únj da̱j rúnꞌ huin yaco̱ ma̱n chruhua xungüi̱ nan. Ni̱ rúnꞌ huin si quij reꞌej ni ngüi̱ hué daj huin ni únj ꞌyaj ni sij nej. Ni̱ hué daj ꞌyaj ni sij daꞌ güi acuanꞌ.

¹⁴Ni̱ nitaj si ruhuāj sisi̱ ga̱huin na̱ꞌaj á re̱ꞌ nga̱ nuguanꞌ arūnj nan. Maan si nariquīj ꞌngo̱ chrej sa̱ꞌ rian án re̱ꞌ, ruhuāj aj. Daj si rúnꞌ huin daꞌnī huin ín re̱ꞌ xiꞌí si ꞌi̱ ruhuāj niꞌyā a ni é re̱ꞌ. ¹⁵Ni̱ nu̱nj si hua ichiꞌ mí maestro digyán rian án re̱ꞌ xiꞌí Cristo, sani̱ nitaj nico chrej a ni é re̱ꞌ mánj. Daj si chrej a ni é re̱ꞌ huin manꞌānj xiꞌí si gaꞌmī si-nu̱guanꞌ Yanꞌanj nuguanꞌ sa̱ꞌ rian án re̱ꞌ. ¹⁶Yuꞌuj daj ni̱ achínj jniꞌyā rian án re̱ꞌ sisi̱ da̱j rúnꞌ ꞌyaj manꞌānj, ni̱ daꞌngaꞌ daj gui̱ꞌyaj gue̱ a ni é re̱ꞌ. ¹⁷Xiꞌí daj ni̱ gaꞌnī tsínj gu̱ꞌnaj Timoteo gu̱chiꞌ sij rian án re̱ꞌ. Ni̱ rúnꞌ huin daꞌnī huin sij rian Señor. Ni̱ ꞌi̱ ruhuāj niꞌyā sij. Ni̱ hua ni̱ca ruhua sij rian Señor. Ni̱ ga̱taj Timoteo gu̱nun ni é re̱ꞌ da̱j hua ducuānj nicoꞌ manꞌānj xiꞌí Cristo. Ni̱ ga̱taj sij gu̱nun a ni é re̱ꞌ nuguanꞌ digyānj rian ni ngüi̱ ma̱n ni̱nꞌ ga̱chraꞌ huin ni tsínj xuman ruhua niꞌyaj Jesús.

¹⁸Ni̱ ani ruhua daꞌaj ni é re̱ꞌ sisi̱ huin achij ni é re̱ꞌ. Ni̱ si̱ guchīj ni̱ꞌyā rian ma̱n án re̱ꞌ, ruhua ni sij. ¹⁹Sani̱ sisi̱ ruhua Señor, ni̱ ráꞌyanj gu̱chīj ni̱ꞌyā rian ma̱n án re̱ꞌ aj. Ngaa ni̱ sé urin nuguanꞌ aꞌmi ni sij gui̱niꞌīnj. Sani̱ gui̱niꞌīnj sisi̱ hua yya ꞌyaj ni sij da̱j rúnꞌ ataj ni sij. ²⁰Daj si ri̱an nicaj sun Yanꞌanj, ni̱ nitaj si níꞌyanj ni nuguanꞌ aꞌmi néꞌ sisi̱ nitaj si-fuerza Yanꞌanj nicaj ni nuguanꞌ da mánj. ²¹Ni̱ u̱n sin huin ruhua á re̱ꞌ si gui̱ꞌyā nga̱ á re̱ꞌ ngaa gui̱sī rian ma̱n án re̱ꞌ únj. Asi̱ ruhua á re̱ꞌ gui̱ꞌyā castigo a ni é re̱ꞌ níꞌ. Asi̱ ruhua á re̱ꞌ ga̱huin ꞌi̱ ruhuāj gui̱niꞌyā á re̱ꞌ, ni̱ ga̱ꞌmi sa̱ꞌāj rian án re̱ꞌ, ruhua á re̱ꞌ sa̱ꞌ.

Un caso de inmoralidad juzgado

¹Ni̱ nataꞌ ni ngüi̱ riānj sisi̱ hua ꞌngo̱ tsínj ꞌyaj squi̱raꞌ scanij a ni é re̱ꞌ. Ni̱ gaquinꞌ daj huin si atoj sij nga̱ nica̱ chrej sij. Ni̱ gue̱ gaquinꞌ daj rian ni ngüi̱ ꞌna̱ꞌ anéj chrej huin ni ngüi̱ nun niꞌi Yanꞌanj. ²Ni̱ hua gue̱ ꞌyaj nne̱ a ni é re̱ꞌ aj. Duguꞌna̱j huin sisi̱ ga̱nani ruhua á re̱ꞌ xiꞌí si guiꞌyaj tsínj daj. Ni̱ u̱n sin huin, ni̱ nun gui̱ri a ni é re̱ꞌ tsínj guiꞌyaj gaquinꞌ daj scanij ni é re̱ꞌ únj. ³Ni̱ nu̱nj si nitaj si niquīnj rian án re̱ꞌ, sani̱ niquinꞌ nimānj scanij a ni é re̱ꞌ. Ni̱ hua gani ruhuāj sisi̱ da̱j gui̱ꞌyā nga̱ tsínj guiꞌyaj gaquinꞌ daj. ⁴Ni̱ ngaa na̱huin yuꞌ a ni é re̱ꞌ, ni̱ xa̱caj á re̱ꞌ cuenta sisi̱ niquinꞌ nimānj scanij a ni é re̱ꞌ, guiꞌyaj Jesucristo. Ni̱ xiꞌí Señor Jesucristo ataj manꞌānj sisi̱ daꞌui yya tsínj daj gaquinꞌ. ⁵Xiꞌí daj ni̱ na̱gaꞌuiꞌ a ni é re̱ꞌ tsínj daj rian sichre Satanás sisi̱ gui̱ranꞌ nnee̱ cúj sij sayun. Ni̱ gue̱reꞌ nuguanꞌ quij ꞌyaj nnee̱ cúj sij. Ni̱ hué ducuánj daj na̱caj Yanꞌanj niman sij güi ga̱ꞌnaꞌ ru̱huaꞌ yún Señor Jesús.

⁶Nitaj si hua sa̱ꞌ si aꞌmi nne̱ ni é re̱ꞌ mánj. Niꞌi ni é re̱ꞌ sisi̱: “Do̱j levadura, ni̱ ayu quinj ꞌyaj.” Ni̱ da̱j rúnꞌ ꞌyaj levadura ngaa ayu quinj ꞌyaj, ni̱ hué daj ꞌyaj urin tsínj ꞌyaj gaquinꞌ scanij a ni é re̱ꞌ. ⁷Xiꞌí daj gui̱ri anéj a ni é re̱ꞌ daranꞌ si quij ꞌni̱j scanij a ni é re̱ꞌ. Ngaa ni̱ da̱j rúnꞌ hua quinj na̱ca sa̱ꞌ, ni̱ hué daj ga̱ á re̱ꞌ. Sani̱ gahuin sa̱ꞌ á re̱ꞌ xiꞌí si guiꞌyaj Cristo. Daj si da̱j rúnꞌ dagahuiꞌ ni sij xachij ꞌni̱j xiꞌí si-ga̱quinꞌ ni sij, ni̱ daꞌngaꞌ daj gahuiꞌ Cristo xiꞌí si-ga̱quinꞌ néꞌ. Ni̱ huin síꞌ xachij ꞌni̱j gahuiꞌ sij pascua. ⁸Xiꞌí daj ni̱ gui̱ꞌyaj néꞌ guiꞌyanj gu̱ꞌnaj pascua. Sani̱ si̱ garasu̱n néꞌ levadura mánj. Daj si da̱j rúnꞌ hua quinj gayu ꞌni̱j levadura daj hua daranꞌ si quij ma̱n niman néꞌ nga̱ si quij ꞌyaj néꞌ nej. Sani̱ si̱ garasu̱n néꞌ quinj mánj. Hué dan ni̱ ga̱ꞌue ga̱ꞌmi achij néꞌ nga̱ nuguanꞌ xa̱ngaꞌ.

⁹Ni̱ hua gaꞌnī ango yanj rian án re̱ꞌ. Ni̱ gataj snanꞌān gunun a ni é re̱ꞌ sisi̱ si̱ guinicaj dugüiꞌ a ni é re̱ꞌ nga̱ ni tsínj ꞌyaj squi̱raꞌ. ¹⁰Sani̱ nun garūnj rian yanj daj sisi̱ ga̱huin ni̱ni ni̱nꞌ ni é re̱ꞌ rian daranꞌ ni tsínj ma̱n chruhua xungüi̱ huin ni tsínj nitaj si nicoꞌ Jesucristo. Daj si ni tsínj ma̱n chruhua xungüi̱ gaquinꞌ nan, ni̱ ꞌyaj ni sij gaquinꞌ nga̱ yunꞌunj xa̱na. Ni̱ huin xicoj ruhua ni sij niꞌyaj ni sij dugüiꞌ ni sij. Ni̱ ꞌyaj tu̱ ni sij siꞌyaj dugüiꞌ ni sij. Ni̱ nicoꞌ ni sij yanꞌanj ꞌyaj raꞌa ni sij. Ngaa ni̱ sisi̱ huin ruhua ni é re̱ꞌ ga̱huin ni̱ni ni é re̱ꞌ rian daranꞌ ni ngüi̱ ꞌyaj ni gaquinꞌ daj, ni̱ hua nia̱n ga̱hui a ni é re̱ꞌ xungüi̱ nan ga̱nꞌanj ni é re̱ꞌ aj. ¹¹Maan si huin ruhuāj gatā sisi̱ si̱ guinicaj dugüiꞌ a ni é re̱ꞌ nga̱ ni tsínj ataj sisi̱ nicoꞌ ni sij Cristo, sani̱ aꞌmi ni sij nga̱ squi̱raꞌ ni sij. Ni̱ xicoj ruhua ni sij nga̱ siꞌyaj dugüiꞌ ni sij. Ni̱ nicoꞌ ni sij yanꞌanj ꞌyaj raꞌa ni sij nej. Ni̱ aꞌmi yya̱ ni sij xiꞌí ni ngüi̱ nej. Ni̱ huin ni sij tsínj hua xi̱ni nej. Ni̱ huin ni sij tsínj ꞌyaj tu̱. Ngaa ni̱ si̱ xa á re̱ꞌ nga̱ ni tsínj ꞌyaj ni gaquinꞌ da mánj.

^12-13Sé si-sūnj huin si gui̱ꞌyā castigo ni ngüi̱ nitaj si nicoꞌ Cristo mánj. Yanꞌanj huin si gui̱ꞌyaj castigo ni ngüi̱ daj. Sani̱ hua nia̱n si na̱guiꞌyaj yya á re̱ꞌ si-ga̱quinꞌ ni ngüi̱ nicoꞌ Cristo ma̱n sca̱nij a ni é re̱ꞌ. Yuꞌuj daj gui̱ri ni é re̱ꞌ tsínj xi̱ꞌi daj scanij a ni é re̱ꞌ nánj.

Litigios delante de los incrédulos

¹Sisi̱ hua ꞌngo̱ jnánj néꞌ ununꞌ nga̱ ango jnánj néꞌ, ni̱ u̱n sin huin, ni̱ huaj á re̱ꞌ ga̱ꞌmi gaquinꞌ a ni é re̱ꞌ rian güesi̱ tsínj nun niꞌi Yanꞌanj, ni̱ nun huaj á re̱ꞌ rian ni tsínj sa̱ꞌ nicoꞌ Yanꞌanj únj. ²Asi̱ nun niꞌi a ni é re̱ꞌ sisi̱ néꞌ ni ngüi̱ sa̱ꞌ nicoꞌ Yanꞌanj na̱guiꞌyaj yya si-ga̱quinꞌ ni ngüi̱ ma̱n chruhua xungüi̱ nan a̱ꞌ. Ni̱ sisi̱ hué ni é re̱ꞌ na̱guiꞌyaj yya si-ga̱quinꞌ ni ngüi̱ ma̱n chruhua xungüi̱ nan, ni̱ u̱n sin huin, ni̱ naꞌue na̱guiꞌyaj yya á re̱ꞌ ꞌngo̱ gaquinꞌ leꞌej hua scanij ni é re̱ꞌ únj. ³Ni̱ nun niꞌi a ni é re̱ꞌ sisi̱ néꞌ na̱guiꞌyaj yya xiꞌí ni ángel nej únj. Ngaa ni̱ hua yya ga̱ꞌue na̱guiꞌyaj yya néꞌ ni gaquinꞌ ma̱n chruhua xungüi̱ aj. ⁴Ni̱ sisi̱ ununꞌ ni é re̱ꞌ xiꞌí ꞌngo̱ nuguanꞌ ma̱n chruhua xungüi̱ nan, ni̱ u̱n sin huin, ni̱ huaj nataꞌ ni é re̱ꞌ rian ni tsínj nun niꞌi Yanꞌanj únj. Daj si nitaj si níꞌyanj nico si-nu̱guanꞌ ni tsínj daj. ⁵Aꞌmī nuguanꞌ nan sisi̱ gui̱riꞌ a ni é re̱ꞌ si-na̱ꞌaj aj. Asi̱ ni̱ a̱ ꞌngo̱ tsínj niꞌi sa̱ꞌ nitaj huaj scanij ni é re̱ꞌ sisi̱ na̱guiꞌyaj yya sij ꞌngo̱ gaquinꞌ hua scanij a ni é re̱ꞌ a̱ꞌ. ⁶Sani̱ sé urin ununꞌ ꞌngo̱ jnánj néꞌ nga̱ dugüiꞌ sij. Sani̱ huaj nataꞌ ni é re̱ꞌ rian ni tsínj nun niꞌi Yanꞌanj. Ni̱ nun hua sa̱ꞌaj si ꞌyaj á re̱ꞌ mánj.

⁷Xiꞌí si ununꞌ ni du̱güiꞌ ni é re̱ꞌ, ni̱ huin ruhuaj gata sisi̱ hua guiꞌyaj gana nuguanꞌ quij chruhua niman án re̱ꞌ. Sa̱ꞌ huin sisi̱ ga̱ꞌninꞌ ruhua á re̱ꞌ nga̱ tsínj guiꞌyaj gaquinꞌ rian án re̱ꞌ. Sa̱ꞌ huin sisi̱ ga̱ꞌninꞌ ruhua ni é re̱ꞌ sisi̱ gui̱ꞌyaj tu̱ ꞌngo̱ tsínj daj siꞌyaj á re̱ꞌ. ⁸Sani̱ ꞌyaj xi̱ꞌi manꞌan án re̱ꞌ. Daj si ꞌyaj tu̱ ni é re̱ꞌ scanij ni du̱güiꞌ ni é re̱ꞌ. ⁹Nun niꞌi a ni é re̱ꞌ sisi̱ si̱ ganꞌanj ga̱ne ni tsínj xi̱ꞌi rian nicaj sun Yanꞌanj mánj. Si̱ digyaꞌ yunꞌunj a ni é re̱ꞌ manꞌan án re̱ꞌ mánj. Daj si rian nicaj sun Yanꞌanj, ni̱ si̱ ganꞌanj ga̱ne ni tsínj aꞌmi nga̱ squi̱raꞌ nej, ni̱ tsínj nicoꞌ yanꞌanj ꞌyaj raꞌa ni sij nej, ni tsínj aꞌmi hui̱ nga̱ nica̱ dugüiꞌ ni sij nej, ni tsínj aꞌmi nga̱ ango tsínj nej, ¹⁰ni tsínj ꞌyaj tu̱ nej, ni tsínj huin ruhua nga̱ siꞌyaj dugüiꞌ nej, ni tsínj hua xi̱ni nej, ni tsínj aꞌmi yya̱ xiꞌí ni dugüiꞌ nej, ni tsínj digyaꞌ yunꞌunj ni dugüiꞌ nej. Ni̱ si̱ gaꞌue ga̱tu ni tsínj ꞌyaj ni nuguanꞌ quij nan rian nicaj sun Yanꞌanj mánj. ¹¹Ni̱ hué daj guiꞌyaj daꞌaj ni é re̱ꞌ asi̱j sini. Sani̱ yya̱j ni̱ naruhui si-ga̱quinꞌ a ni é re̱ꞌ, guiꞌyaj Yanꞌanj. Ni̱ gahuin sa̱ꞌ niman án re̱ꞌ. Ni̱ gahuin sa̱ꞌ ni é re̱ꞌ rian Yanꞌanj, guiꞌyaj Señor Jesucristo nga̱ Espíritu Santo huin Espíritu ꞌna̱ꞌ rian Danꞌanj néꞌ.

Glorificad a Dios en vuestro cuerpo

¹²Aꞌmi go̱ꞌngo ni tsínj daj ni̱ ataj ni sij: “Ga̱ꞌue gui̱ꞌyaj néꞌ daranꞌ si aranꞌ ruhua néꞌ.” Xa̱ngaꞌ si ataj ni sij, sani̱ nun hua sa̱ꞌ daranꞌanj si gui̱ꞌyā mánj. Xa̱ngaꞌ ni̱ ga̱ꞌue gui̱ꞌyā daranꞌ si aranꞌ ruhuāj. Sani̱ si̱ gaꞌue dunā si gui̱ꞌyaj gana ꞌngo̱ nuguanꞌ riānj mánj. ¹³Ni̱ hué daj ataj go̱ꞌngo ni ngüi̱ sisi̱ si xóꞌ huin güenda riquíꞌ. Ni̱ riquíꞌ huin güenda si xóꞌ. Xa̱ngaꞌ si ataj ni sij, sani̱ Yanꞌanj gui̱ꞌyaj sisi̱ ga̱nahuij nu̱ngüej rasu̱n daj. Ni̱ nitaj si guiꞌyaj Yanꞌanj nnee̱ cúj néꞌ sisi̱ ga̱ꞌmi néꞌ nga̱ squi̱raꞌ néꞌ. Sani̱ guiꞌyaj Yanꞌanj nnee̱ cúj néꞌ sisi̱ ga̱ne néꞌ nga̱ Señor. Ni̱ ga̱ne Señor nga̱ néꞌ nej. ¹⁴Ni̱ da̱j rúnꞌ ganáꞌnij Señor, guiꞌyaj si-fuerza Yanꞌanj, ni̱ hué daj ga̱naꞌnij néꞌ, gui̱ꞌyaj si-fuerza Yanꞌanj nej.

¹⁵Ni̱ nun niꞌi a ni é re̱ꞌ sisi̱ nnee̱ cúj néꞌ, ni̱ da̱j rúnꞌ huin nnee̱ cúj Cristo huin a̱ꞌ. Ngaa ni̱ ga̱ꞌue gui̱nicaj dugüiꞌ nu̱guanꞌan nnee̱ cúj Cristo nga̱ ꞌngo̱ yunꞌunj xa̱na achéj manꞌan, gui̱ꞌyaj néꞌ, ruhua á re̱ꞌ níꞌ. Si̱ gaꞌue gui̱ꞌyaj néꞌ da ga̱ mánj. ¹⁶Ni̱ nun niꞌi a ni é re̱ꞌ sisi̱ ngaa aꞌmi ꞌngo̱ tsínj daj nga̱ ꞌngo̱ yunꞌunj xa̱na achéj manꞌan, ni̱ na̱huin nu̱ngüej sij urin nnee̱ cúj a̱ꞌ. Ni̱ hué daj gataj si-nu̱guanꞌ Yanꞌanj: “Urin nnee̱ cúj ga̱huin nu̱ngüej sij nánj.” Daj gataj si-nu̱guanꞌ Yanꞌanj. ¹⁷Sani̱ sisi̱ nicaj dugüiꞌ néꞌ nga̱ Señor, ni̱ urin niman néꞌ nga̱ Señor.

¹⁸Du̱gumi a ni é re̱ꞌ manꞌan án re̱ꞌ. Ni̱ na̱xun manꞌan án re̱ꞌ rian ni yunꞌunj xa̱na achéj manꞌan. Daranꞌ ango gaquinꞌ ꞌyaj ꞌngo̱ tsínj daj, ni̱ sé ꞌngo̱ gaquinꞌ ꞌyaj nnee̱ cúj sij huin mánj. Sani̱ ngaa aꞌmi sij nga̱ yunꞌunj xa̱na achéj manꞌan, ni̱ chranꞌ yunꞌunj sij nnee̱ cúj manꞌan sij.

¹⁹Ni̱ nun niꞌi a ni é re̱ꞌ sisi̱ da̱j rúnꞌ hua nuhui sa̱ꞌ hua nnee̱ cúj a ni é re̱ꞌ rian nne Espíritu Santo a̱ꞌ. Ni̱ Yanꞌanj huin si riqui nnee̱ cúj a ni é re̱ꞌ rian án re̱ꞌ. Sé siꞌyaj ni é re̱ꞌ huin mánj. ²⁰Daj si naránj Yanꞌanj a ni é re̱ꞌ nga̱ si-tun manꞌan Jesucristo. Xiꞌí daj ni̱ gui̱ꞌyaj sa̱ꞌ á re̱ꞌ nga̱ nnee̱ cúj a ni é re̱ꞌ, niman án re̱ꞌ. Ngaa ni̱ ga̱ꞌmi sa̱ꞌ ni ngüi̱ xiꞌí Yanꞌanj, gui̱ꞌyaj á re̱ꞌ. Daj si nicoꞌ a ni é re̱ꞌ Yanꞌanj.

Problemas del matrimonio

¹Yya̱j ni̱ nanicā ga̱tā nuguanꞌ nachínj snanꞌanj ni é re̱ꞌ nga̱ yanj guiꞌyaj a ni é re̱ꞌ. Duguꞌna̱j huaj sisi̱ si̱ xacaj ꞌngo̱ tsínj ꞌngo̱ yunꞌunj xa̱na mánj. ²Sani̱ ri̱an hua nico gaquinꞌ ꞌyaj ni tsínj nga̱ ni yunꞌunj xa̱na, ni̱ hua nia̱n gui̱nicaj ꞌngo̱ tsínj daj urin nica̱ sij. Ni̱ hué daj nga̱ ꞌngo̱ yunꞌunj xa̱na, ni̱ urin nica̱ unj gui̱nicaj unj. ³Ni̱ hua nia̱n si ga̱ꞌmi ꞌngo̱ tsínj snoꞌo nga̱ nica̱ sij ngaa hué daj huin ruhua unj. Ni̱ hua nia̱n si ga̱ꞌmi unj nga̱ nica̱ unj ngaa hué daj huin ruhua sij. ⁴Ni̱ sé nnee̱ cúj urin manꞌan yunꞌunj xa̱na daj huin si nicaj unj. Daj si nnee̱ cúj nica̱ unj huin unj. Ni̱ sé nnee̱ cúj urin manꞌan tsínj snoꞌo huin si nicaj sij. Daj si nnee̱ cúj nica̱ sij huin sij.

⁵Ni̱ gui̱ꞌyaj nu̱ngüej nica̱ ꞌngo̱ tsínj daj si huin ruhua nu̱ngüej nica̱ sij. Sani̱ ga̱ꞌue ga̱huin ni̱ni nu̱ngüej nica̱ sij do̱j sisi̱ huin ruhua nu̱ngüej nica̱ sij ga̱chinj jniꞌyaj nu̱ngüej sij rian Yanꞌanj. Asíj ni̱ ga̱ꞌmi ru̱huaꞌ yún nu̱ngüej nica̱ sij nun sa̱ꞌ nun, ni̱ gui̱ꞌyaj gana gaquinꞌ rian nu̱ngüej sij, gui̱ꞌyaj sichre xiꞌí si si̱ gahuin nucuaj nu̱ngüej sij ga̱toj ni̱ni nu̱ngüej sij.

⁶Daranꞌ ni nuguanꞌ nan aꞌmi sa̱ꞌāj rúnꞌ huin permiso huin. Sé sun aꞌnīj rian án re̱ꞌ nga̱ ni nuguanꞌ nan mánj. ⁷Güendāj ni̱ huin ruhuāj sisi̱ daranꞌ ni tsínj snoꞌo ga̱huin da̱j rúnꞌ huin manꞌānj. Sani̱ ni̱ni huin chrej riqui Yanꞌanj rian da go̱ꞌngo néꞌ. Hua ꞌngo̱ chrej rian ango jnánj néꞌ. Ni̱ hua ango chrej rian ango jnánj néꞌ, guiꞌyaj Yanꞌanj.

⁸Ngaa ni̱ ga̱tā gu̱nun ni tsínj nne urin sisi̱ duguꞌna̱j huaj sisi̱ ga̱ gue̱ ga̱ne urin ni sij da̱j rúnꞌ nnēj. Ni̱ hué daj ga̱tā gu̱nun ni yunꞌunj xa̱na nne urin nga̱ ni yunꞌunj xa̱na mmij nej. ⁹Sani̱ sisi̱ naꞌue gu̱nucuaj ꞌngo̱ tsínj daj ga̱ne urin sij, ni̱ xa̱caj naj sij nica̱ sij. Daj si sa̱ꞌ huin si xa̱caj sij nica̱ sij. Ngaa ni̱ si̱ gahuin ruhua sij ni̱ꞌyaj sij ni yunꞌunj xa̱na mánj.

¹⁰Sani̱ aꞌnīj sun rian án re̱ꞌ ni tsínj hua xacaj nica̱. Ni̱ sé si aꞌníj manꞌānj sun daj rian án re̱ꞌ. Sani̱ si-nu̱guanꞌ Señor huin aj. Ni̱ nuguanꞌ nan huin sisi̱ si̱ duna ni yunꞌunj xa̱na nica̱ unj. ¹¹Ni̱ sisi̱ du̱na ꞌngo̱ yunꞌunj xa̱na nica̱ unj, ngaa ni̱ hua nia̱n ga̱ne urin unj, asi̱ ga̱ꞌue na̱ꞌmi unj nga̱ nica̱ unj. Ni̱ si̱ gaꞌue du̱na ꞌngo̱ tsínj daj nica̱ sij mánj.

¹²Ni̱ atā ꞌngo̱ nuguanꞌ rian ango ni é re̱ꞌ. Ni̱ si-nu̱guanꞌ manꞌānj huin nuguanꞌ nan. Sé rian Señor ꞌnaj mánj. Sisi̱ ꞌngo̱ tsínj nicoꞌ Jesús, ni nica̱ sij nun xu̱man ruhua ni̱ꞌyaj Yanꞌanj, ni̱ sisi̱ aꞌuej ruhua unj ga̱ne unj nga̱ sij, ni̱ si̱ rani sij na̱nꞌ unj ducuá unj mánj. ¹³Ni̱ sisi̱ ꞌngo̱ yunꞌunj xa̱na nicoꞌ Jesús, ni̱ nica̱ unj nun xu̱man ruhua sij niꞌyaj sij Yanꞌanj, ni̱ sisi̱ aꞌuej ruhua sij ga̱ne sij nga̱ unj, ni̱ si̱ rani unj na̱nꞌ sij ducuá sij mánj. ¹⁴Ni̱ xiꞌí si xuman ruhua nica̱ ꞌngo̱ tsínj nun xu̱man ruhua daj, ni̱ chra̱cuij Yanꞌanj síꞌ ga̱huin sa̱ꞌ síꞌ. Daj si xuman ruhua nica̱ síꞌ niꞌyaj únꞌ Yanꞌanj. Ni̱ xiꞌí si xuman ruhua nica̱ ꞌngo̱ yunꞌunj xa̱na nun xu̱man ruhua daj, ni̱ chra̱cuij Yanꞌanj yunꞌunj xa̱na daj ga̱huin sa̱ꞌ unj. Daj si xuman ruhua nica̱ unj niꞌyaj síꞌ Yanꞌanj. Ni̱ sisi̱ sé daj huin, ni̱ da̱ꞌui daꞌníj a ni é re̱ꞌ gaquinꞌ rian Yanꞌanj. Sani̱ gahuin sa̱ꞌ daꞌníj a ni é re̱ꞌ rian Yanꞌanj.

¹⁵Sani̱ sisi̱ huin ruhua tsínj nun xu̱man ruhua daj ga̱huin ni̱ni sij rian nica̱ sij, ngaa ni̱ ga̱ꞌninꞌ dinꞌinj ruhua néꞌ si ga̱nꞌanj sij. Ni̱ hué ducuánj daj huin sisi̱ yunꞌunj xa̱na nun xu̱man ruhua daj, ni̱ huin ruhua unj ga̱huin ni̱ni unj rian nica̱ unj, ngaa ni̱ ga̱ꞌninꞌ dinꞌinj ruhua sij sisi̱ na̱nꞌ unj ducuá unj. Daj si nitaj xiꞌí si da fuerza ga̱ne nu̱ngüej nica̱ tsínj daj. Daj si huin ruhua Yanꞌanj sisi̱ ga̱ dinꞌinj rian néꞌ gui̱man néꞌ. ¹⁶Ni̱ nun niꞌí re̱ꞌ huín re̱ꞌ yunꞌunj xa̱na sisi̱ ga̱ꞌue gu̱xuman ruhua nica̱ re̱ꞌ ni̱ꞌyaj sij Yanꞌanj, gui̱ꞌyáj re̱ꞌ níꞌ. Ni̱ manꞌán re̱ꞌ tsínj snoꞌo, ni̱ nun niꞌí re̱ꞌ sisi̱ ga̱ꞌue gu̱xuman ruhua nica̱ re̱ꞌ ni̱ꞌyaj únꞌ Yanꞌanj, gui̱ꞌyáj re̱ꞌ níꞌ.

¹⁷Ni̱ da̱j rúnꞌ hua go̱ꞌngo néꞌ ngaa gaquínj Señor ga̱ꞌnaꞌ néꞌ, ni̱ daꞌngaꞌ daj ga̱ néꞌ aj. Ni̱ hué daj aꞌnīj sun rian daranꞌ ni ngüi̱ nicoꞌ Cristo ma̱n ni sij go̱ꞌngo xumanꞌ. ¹⁸Ni̱ sisi̱ gaquínj Yanꞌanj ga̱ꞌnaꞌ ꞌngo̱ tsínj hua ta̱j daꞌngaꞌ nnee̱ cúj sij, ni̱ hué daj ga̱ sij. Ni̱ sisi̱ gaquínj Yanꞌanj ga̱ꞌnaꞌ ꞌngo̱ tsínj nitaj daꞌngaꞌ táj nnee̱ cúj sij, ni̱ si̱ gaꞌue gu̱taꞌ ni sij daꞌngaꞌ nnee̱ cúj sij mánj. ¹⁹Hué dan ni̱ ga̱ꞌue si ta̱j daꞌngaꞌ nnee̱ cúj néꞌ. Ga̱ꞌue si nitaj daꞌngaꞌ táj néꞌ. Nitaj si ꞌyaj mánj. Sani̱ nuguanꞌ huin rian huin sisi̱ da̱gahuin néꞌ nuguanꞌ aꞌninꞌ Yanꞌanj sun rian néꞌ. ²⁰Ni̱ da̱j rúnꞌ hua gane da go̱ꞌngo néꞌ ngaa gaquínj Yanꞌanj ga̱ꞌnaꞌ néꞌ, ni̱ daꞌngaꞌ daj ga̱ ga̱ne néꞌ aj.

²¹Sisi̱ tsínj guiꞌyaj sun yu̱n rian xuruꞌue gahuín re̱ꞌ ngaa gaquínj Yanꞌanj ga̱ꞌnaꞌ re̱ꞌ, ni̱ si̱ gahuin ruhuá re̱ꞌ mánj. Sani̱ sisi̱ ani ruhuá re̱ꞌ sisi̱ ga̱ꞌue ga̱huin ni̱ni re̱ꞌ rian xuruꞌue daj, ni̱ hué daj gui̱ꞌyáj re̱ꞌ aj. ²²Ni̱ ꞌngo̱ tsínj guiꞌyaj sun yu̱n rian ꞌngo̱ xuruꞌue ngaa gaquínj Señor ga̱ꞌnaꞌ sij, ni̱ gahuin níꞌnij niman sij, guiꞌyaj Señor. Ni̱ hué ducuánj daj huin, ni̱ ꞌngo̱ tsínj nitaj si ꞌyaj sun yu̱n rian ꞌngo̱ xuruꞌue ngaa gaquínj Señor ga̱ꞌnaꞌ sij, ni̱ huin sij ꞌngo̱ tsínj ꞌyaj sun yu̱n rian Cristo. ²³Naruꞌue nico Yanꞌanj guiran a ni é re̱ꞌ. Ngaa ni̱ si̱ duna á re̱ꞌ sisi̱ gui̱ꞌyaj sun yu̱n a ni é re̱ꞌ rian ni tsínj mánj. ²⁴Ngaa ni̱ da̱j rúnꞌ gane go̱ꞌngo néꞌ ngaa gaquínj Yanꞌanj ga̱ꞌnaꞌ néꞌ, ni̱ hué daj ga̱ne néꞌ rian Yanꞌanj huin ín re̱ꞌ jnánj néꞌ nga̱ xicaꞌuij néꞌ.

²⁵Nitaj si gaꞌninꞌ Señor sun riānj sisi̱ ga̱tā gu̱nun a ni é re̱ꞌ da̱j gui̱ꞌyaj ni ngüi̱ nne urin. Maan si ga̱tā rian án re̱ꞌ da̱j rúnꞌ ani ruhuāj. Ni̱ ga̱ꞌue gu̱xuman ruhua á re̱ꞌ nga̱ si-nu̱guanꞌānj xiꞌí si gahuin ꞌi̱ ruhua Yanꞌanj niꞌya manꞌānj. Xiꞌí daj ni̱ nuguanꞌ xa̱ngaꞌ huin si-nu̱guanꞌānj. ²⁶Hué dan ni̱ xiꞌí ni sayun guimán néꞌ, ni̱ sa̱ꞌ doj sisi̱ gu̱na ꞌngo̱ tsínj da̱j rúnꞌ nne sij, ruhuāj aj.

²⁷Sisi̱ hua nica̱ re̱ꞌ, ni̱ si̱ duná re̱ꞌ nica̱ re̱ꞌ mánj. Sisi̱ nitaj nica̱ re̱ꞌ, ni̱ si̱ nanoꞌ re̱ꞌ xa̱caj re̱ꞌ yunꞌunj xa̱na mánj. ²⁸Ni̱ sisi̱ xa̱caj re̱ꞌ yunꞌunj xa̱na, ni̱ sé ꞌngo̱ gaquinꞌ huin mánj. Ni̱ sisi̱ xa̱caj ꞌngo̱ yunꞌunj xa̱na hua lij ꞌngo̱ tsínj snoꞌo, ni̱ sé ꞌngo̱ gaquinꞌ huin mánj. Sani̱ ni ngüi̱ hua nica̱, ni̱ gui̱ranꞌ ni sij sayun xungüi̱ nan. Ni̱ huin ruhuāj sisi̱ ga̱nani a ni é re̱ꞌ rian sayun da aj.

²⁹Huin ruhuāj ga̱ꞌmī ꞌngo̱ nuguanꞌ rian án re̱ꞌ huin ín re̱ꞌ jnánj néꞌ nga̱ xicaꞌuij néꞌ: Do̱j güi hua rian néꞌ. Ngaa ni̱ da̱j rúnꞌ hua ꞌngo̱ tsínj nitaj nica̱, ni̱ hué daj ga̱ ꞌngo̱ tsínj hua nica̱ ga̱ne sij. ³⁰Ni̱ tsínj aco, ni̱ si̱ gaco sij mánj. Ni̱ tsínj huin nia̱ꞌ ruhua, ni̱ si̱ gaꞌngaꞌ sij mánj. Ni̱ tsínj ránj ni rasu̱n daj, ni̱ ga̱ni ruhua sij sisi̱ sé siꞌyaj sij huin si ránj sij mánj. ³¹Ni̱ tsínj nia̱ꞌ ruhua nga̱ ni rasu̱n ma̱n chruhua xungüi̱ nan, ni̱ si̱ gahuin ꞌi̱ ruhua sij ni̱ꞌyaj sij ni rasu̱n da mánj. Daj si xungüi̱ niꞌi néꞌ, ni̱ huaj ga̱nahuij.

³²Huin ruhuāj sisi̱ si̱ guiriun ruhua á re̱ꞌ mánj. Tsínj nne urin, ni̱ nahuij ruhua sij nga̱ si-nu̱guanꞌ Señor. Daj si huin ruhua sij gui̱ꞌyaj sij si aranꞌ ruhua Señor. ³³Sani̱ tsínj hua nica̱, ni̱ nahuij ruhua sij nga̱ ni rasu̱n ma̱n chruhua xungüi̱. Ni̱ huin ruhua sij gui̱ꞌyaj sij da̱j rúnꞌ aranꞌ ruhua nica̱ sij. ³⁴Ni̱ da̱j rúnꞌ ꞌyaj tsínj, ni̱ daꞌngaꞌ daj ꞌyaj yunꞌunj xa̱na nej. Ni̱ yunꞌunj xa̱na nne urin, ni̱ nahuij ruhua unj xiꞌí si-nu̱guanꞌ Señor. Ni̱ huin ruhua unj sisi̱ ga̱huin sa̱ꞌ nnee̱ cúj unj, niman unj nej. Sani̱ yunꞌunj xa̱na hua nica̱, ni̱ nahuij ruhua unj nga̱ ni rasu̱n ma̱n chruhua xungüi̱ nan. Ni̱ huin ruhua unj gui̱ꞌyaj unj si aranꞌ ruhua nica̱ unj. ³⁵Aꞌmī ni nuguanꞌ nan rian án re̱ꞌ sisi̱ ga̱huin ꞌueé rian án re̱ꞌ. Ni̱ sé si huin ruhuāj ga̱ꞌnīj rian án re̱ꞌ mánj. Maan si huin ruhuāj sisi̱ ꞌueé gui̱ꞌyaj á re̱ꞌ gui̱nicoꞌ sa̱ꞌ á re̱ꞌ manꞌan Señor.

³⁶Ni̱ sisi̱ hua daꞌni̱ xa̱na ꞌngo̱ tsínj daj, ni̱ hua guisíj yoꞌ xa̱caj unj tsínj snoꞌo, ni̱ ani ruhua tsínj daj sisi̱ sa̱ꞌ huin xa̱caj daꞌníj sij tsínj snoꞌo, ngaa ni̱ ga̱ꞌue xa̱caj unj tsínj snoꞌo si sé ꞌngo̱ gaquinꞌ huin mánj. ³⁷Sani̱ sisi̱ hua ꞌngo̱ tsínj hua ni̱ca niman sisi̱ si̱ gaꞌue xa̱caj daꞌni̱ xa̱na tsínj snoꞌo, ni̱ hua sa̱ꞌ huin gui̱ꞌyaj sij sisi̱ si̱ xacaj unj tsínj snoꞌo ngaa nitaj xiꞌí xa̱caj unj tsínj snoꞌo aj. ³⁸Hué dan ni̱ tsínj aꞌuiꞌ daꞌníj rian tsínj snoꞌo, ni̱ sa̱ꞌ ꞌyaj sij. Ni̱ tsínj naꞌuej ruhua ga̱ꞌuiꞌ sij daꞌníj rian tsínj snoꞌo, ni̱ sa̱ꞌ doj ꞌyaj sij nánj.

³⁹Ni̱ yunꞌunj xa̱na hua nica̱, ni̱ hua nia̱n si ga̱ne unj nga̱ sij da ga̱huiꞌ sij, ataj si-ley Yanꞌanj. Sani̱ sisi̱ ga̱huiꞌ nica̱ unj, ni̱ ga̱ꞌue xa̱caj unj u̱n tsínj snoꞌo ga̱ranꞌ ruhua unj xa̱caj unj. Sani̱ hua nia̱n si xa̱caj unj ꞌngo̱ tsínj xuman ruhua niꞌyaj Yanꞌanj anj. ⁴⁰Sani̱ ga̱huin nia̱ꞌ ruhua unj doj sisi̱ si̱ xacaj unj ꞌngo̱ tsínj snoꞌo, ruhuāj aj. Ni̱ ani ruhuāj sisi̱ uyan ga̱taj Espíritu Santo nej.

Lo sacrificado a los ídolos

¹Yya̱j ni̱ ga̱ꞌmī xiꞌí nnee̱ xucu aꞌuiꞌ ni ngüi̱ rian yanꞌanj ꞌyaj raꞌa ni sij. Niꞌi néꞌ sisi̱ ga̱ꞌue xa̱caj daranꞌ néꞌ cuenta xiꞌí ni rasu̱n. Ni̱ xiꞌí si niꞌíꞌ, ni̱ ani ruhua néꞌ sisi̱ huin achij néꞌ. Sani̱ sisi̱ ꞌi̱ róꞌ niꞌyóꞌ ni dugüíꞌ, ni̱ ga̱hui sa̱ꞌ ni sij, gui̱ꞌyaj néꞌ. ²Sisi̱ ani ruhua ꞌngo̱ tsínj daj sisi̱ niꞌi sa̱ꞌ sij, sani̱ hua yya nun niꞌi sij ni nuguanꞌ achin gui̱niꞌi sij. ³Sani̱ sisi̱ ꞌi̱ ruhua ꞌngo̱ tsínj daj niꞌi sij Yanꞌanj, ni̱ niꞌi Yanꞌanj sij aj.

⁴Hué dan ni̱ aꞌuiꞌ ni ngüi̱ nnee̱ rian ni yanꞌanj ꞌyaj raꞌa ni sij. Sani̱ niꞌi néꞌ sisi̱ ni yanꞌanj daj nitaj si níꞌyanj chruhua xungüi̱ nan. Daj si hua urin Yanꞌanj xa̱ngaꞌ. ⁵Ni̱ xataꞌ nga̱ ni̱caꞌ rian yoꞌój ma̱n yanꞌanj nicoꞌ ni ngüi̱. Ni̱ xa̱ngaꞌ ni̱ ma̱n nico yanꞌanj nicoꞌ ni sij. Ni̱ ma̱n ni tsínj huin yanꞌanj ruhua ni sij. ⁶Sani̱ güendóꞌ ni̱ hua urin Yanꞌanj riúnꞌ huin chrej néꞌ. Ni̱ hué urin Yanꞌanj huin si guiꞌyaj daranꞌ rasu̱n ma̱n chruhua xungüi̱ nan. Ni̱ xiꞌí manꞌan Yanꞌanj hua ni̱ꞌnaꞌ néꞌ. Ni̱ hua urin Señor tsínj gu̱ꞌnaj Jesucristo. Ni̱ xiꞌí Jesucristo, ni̱ hua daranꞌ ni rasu̱n ma̱n chruhua xungüi̱ nan. Ni̱ xiꞌí síꞌ ni̱ hua ni̱ꞌnaꞌ daranꞌ néꞌ nej.

⁷Sani̱ sé daranꞌ néꞌ niꞌi nuguanꞌ nan. Ni̱ hua guꞌyun go̱ꞌngo ni jnánj néꞌ guinicoꞌ ni sij ni yanꞌanj ꞌyaj raꞌa ni ngüi̱. Ni̱ xiꞌí si guinicoꞌ go̱ꞌngo ni sij ni yanꞌanj daj, ni̱ ani ruhua ni sij sisi̱ yanꞌanj xa̱ngaꞌ huin ni yanꞌanj daj. Ngaa ni ngaa xa ni sij si aꞌuiꞌ ni ngüi̱ rian ni yanꞌanj daj, ni̱ daꞌui ni sij gaquinꞌ, ruhua ni sij. Daj si nun nucuaj niman ni sij. ⁸Sé xiꞌí si xa néꞌ, ni̱ ga̱ꞌue ga̱hui so̱ꞌ doj rian Yanꞌanj. Si̱ gahuin sa̱ꞌ néꞌ xiꞌí si xa néꞌ. Ni̱ si̱ gahuin sa̱ꞌ néꞌ xiꞌí si nun xa̱ néꞌ mánj.

⁹Sani̱ ga̱ cuidado a ni é re̱ꞌ xiꞌí si ga̱ꞌue xa̱ á re̱ꞌ u̱n rasu̱n ga̱huin nun sa̱ꞌ nun gui̱ranꞌ jnánj án re̱ꞌ gaquinꞌ, gui̱ꞌyaj á re̱ꞌ. ¹⁰Gui̱ꞌyóꞌ cuenta sisi̱ manꞌán re̱ꞌ huin ꞌngo̱ tsínj niꞌi ni nuguanꞌ nan. Ni̱ nné re̱ꞌ xá re̱ꞌ ꞌngo̱ nuhui rian ma̱n ni yanꞌanj daj. Ni̱ sisi̱ gui̱niꞌi ꞌngo̱ jnánj re̱ꞌ huin tsínj nun nucuaj niman si xá re̱ꞌ yuꞌuj daj, ni̱ si ruhuaj, ni̱ ga̱huin ruhua sij xa̱ sij si aꞌuiꞌ ni ngüi̱ rian ni yanꞌanj daj. ¹¹Hué dan ni xiꞌí si niꞌí re̱ꞌ ni nuguanꞌ nan, ni̱ duna ꞌngo̱ jnánj néꞌ tsínj nun nucuaj niman si-chrej Yanꞌanj, gui̱ꞌyaj manꞌán re̱ꞌ. Ni̱ gahuiꞌ Cristo xiꞌí tsínj daj. ¹²Xiꞌí daj ni̱ gui̱ꞌyáj re̱ꞌ gaquinꞌ rian tsínj nun nucuaj niman. Ni̱ gue̱reꞌ ruhua sij, gui̱ꞌyáj re̱ꞌ. Ni̱ hué daj gui̱ꞌyáj re̱ꞌ gaquinꞌ rian manꞌan Cristo nej. ¹³Yuꞌuj daj ni̱ sisi̱ gui̱ꞌyā si du̱na jnān si-chrej Yanꞌanj xiꞌí si xāj nnee̱, ngaa ni̱ nitaj a̱man xāj nnee̱ mánj. Daj si naꞌuej ruhuāj di̱gyānj chrej nun hua sa̱ꞌ rian jnān mánj.

Los derechos de un apóstol

¹Niꞌi a ni é re̱ꞌ sisi̱ ga̱ꞌue gui̱ꞌyā si aranꞌ ruhuāj. Sé moso ꞌyaj sun yu̱n huīnj mánj. Huēj huin apóstol, guiꞌyaj Jesucristo sisi̱ ga̱ꞌmī si-nu̱guanꞌ sij rian ni ngüi̱. Ni̱ hua guiniꞌīnj Jesús, tsínj nicaj sun rian néꞌ. Ni̱ xiꞌí si guiꞌyaj sūnj si-sun Señor, ni̱ guxuman ruhua ni é re̱ꞌ niꞌyaj á re̱ꞌ Jesús. ²Ga̱ꞌue sisi̱ nun gara xina ango ni tsínj sisi̱ huīnj apóstol. Sani̱ hua yya niꞌi a ni é re̱ꞌ sisi̱ hué daj huīnj. Daj si xiꞌí si xuman ruhua á re̱ꞌ niꞌyaj á re̱ꞌ Jesús, guiꞌyaj nuguanꞌ gaꞌmī rian án re̱ꞌ, ni̱ hué nan huin ꞌngo̱ daꞌngaꞌ digyán sisi̱ xa̱ngaꞌ huīnj ꞌngo̱ tsínj aꞌmi si-nu̱guanꞌ Jesús. ³Ni̱ xiꞌí si xuman ruhua á re̱ꞌ niꞌyaj á re̱ꞌ Jesucristo, guiꞌyā, ni̱ ataj snanꞌān nuguanꞌ daj rian ni tsínj nitaj si aꞌmi sa̱ꞌ xiꞌīj.

⁴Xiꞌí daj ni hua si-chrē si xāj. Ni̱ hua si-chrē si go̱ꞌōj. ⁵Ni̱ hua si-chrē nicā ga̱nꞌān ꞌngo̱ yunꞌunj xa̱na xuman ruhua niꞌyaj Yanꞌanj ga̱huin nicāj da̱j rúnꞌ ꞌyaj ango ni tsínj aꞌmi si-nu̱guanꞌ Jesús. Ni̱ daꞌngaꞌ daj ꞌyaj ni jnánj Señor nga̱ tsínj gu̱ꞌnaj Cefas nej. ⁶Asi̱ nitaj si hua si-chrej nu̱ngüej únj Bernabé sisi̱ du̱gumi ni ngüi̱ nu̱ngüej únj da̱j rúnꞌ ꞌyaj ni sij nga̱ ango ni tsínj aꞌmi si-nu̱guanꞌ Jesús a̱ꞌ. Sé daj huin mánj. ⁷Ni̱ xa ꞌngo̱ snado sanꞌanj manꞌan sij níꞌ. Nitaj mánj. Aꞌuiꞌ gobierno si xa sij. Ni̱ hua ꞌngo̱ tsínj gunu̱n coj uva, ni̱ nun ga̱ꞌue xa̱ sij uva daj níꞌ. Nitaj mánj. Ni̱ hua ꞌngo̱ tsínj dugumi dán sij xachij, ni̱ nun ga̱ꞌue go̱ꞌo sij to̱ gani sij da níꞌ. Nitaj mánj.

⁸Ni̱ si̱ gani ruhua ni é re̱ꞌ sisi̱ aꞌmī da̱j rúnꞌ aꞌmi ni tsínj ma̱n chruhua xungüi̱ mánj. Daj si hué daj gataj si-du̱cuanj Moisés nej. ⁹Ni̱ hua ni̱ca rian libro daj: “Si̱ gaꞌnij néꞌ nnánj duꞌua sicúj gu̱nunj duꞌua xuj ngaa duguáj xiꞌí xuj strigo gahuin sa̱ꞌ strigo mánj.” Daj gataj rian si-du̱cuanj Moisés. Ni̱ nahuij ruhua Yanꞌanj nga̱ urin ni sicúj, ruhua á re̱ꞌ níꞌ. ¹⁰Asi̱ xiꞌí manꞌan néꞌ aꞌmi nuguanꞌ nan sa̱ꞌ. Hué xiꞌí néꞌ aꞌmi nuguanꞌ nan. Ni̱ tsínj nachéj yoꞌój, ni̱ anaꞌuij sij sisi̱ gui̱riꞌ sij si xa̱ sij rian yoꞌój daj. Ni̱ tsínj aganꞌ chrun, ni̱ hué daj anaꞌuij sij si gui̱riꞌ sij si xa̱ sij nej.

¹¹Ni̱ da̱j rúnꞌ hua tsínj ꞌyaj sun yoꞌój, ni̱ hué daj hua ni únj xiꞌí a ni é re̱ꞌ. Daj si gaꞌmi únj si-nu̱guanꞌ Yanꞌanj gunun a ni é re̱ꞌ. Xiꞌí daj ni̱ ga̱ꞌue ri̱qui ni é re̱ꞌ do̱j rasu̱n gui̱riꞌ únj, ruhuāj aj. ¹²Ni̱ sisi̱ aꞌuiꞌ a ni é re̱ꞌ rian ango ni tsínj, ni̱ na̱anj huaj ri̱qui a ni é re̱ꞌ si xa̱ ni únj. Ni̱ hua si-chrē na̱huin raꞌāj rian án re̱ꞌ. Sani̱ nun gui̱ꞌyā da mánj. Maan si gaꞌninꞌ ruhuāj nga̱ si ranꞌānj. Daj si nitaj si huin ruhuāj sisi̱ chranꞌ yunꞌunj ango ni nuguanꞌ nga̱ xiꞌí si-nu̱guanꞌ Cristo mánj.

¹³Ni̱ ni tsínj ꞌyaj sun chruhua nuhui, ni̱ xa ni sij daꞌaj ni rasu̱n huaj nicaj ni ngüi̱ chruhua nuhui daj. Ni̱ ni tsínj chracuij xucu nagaꞌuiꞌ ni ngüi̱ rian Yanꞌanj, ni̱ xa ni sij daꞌaj nnee̱ xucu nagaꞌuiꞌ ni ngüi̱ daj. ¹⁴Ni̱ hué ducuánj daj huin sisi̱ gaꞌninꞌ Señor sun sisi̱ gui̱riꞌ ni tsínj aꞌmi si-nu̱guanꞌ Yanꞌanj rian ni ngüi̱ sisi̱ xa̱ ni sij, gui̱ꞌyaj ni ngüi̱ unun nuguanꞌ daj.

¹⁵Ni̱ hua si-chrē si hué daj gui̱ꞌyā. Sani̱ nitaj a̱man gui̱ꞌyā da mánj. Ni̱ nun ga̱rūnj nuguanꞌ nan sisi̱ ri̱qui a ni é re̱ꞌ rasu̱n riānj. Ga̱huīj ruhuāj sisi̱ naꞌue gui̱ꞌyaj sūnj gui̱riꞌīj si xāj. ¹⁶Ni̱ naꞌue ga̱ꞌmi xa̱cānj xiꞌí si aꞌmī si-nu̱guanꞌ Yanꞌanj rian ni ngüi̱. Daj si hua nia̱n da̱gahuīnj rian si-sun Señor. Ni̱ niqui nimānj sisi̱ si̱ gaꞌmī si-nu̱guanꞌ Yanꞌanj rian ni ngüi̱ aj. ¹⁷Ni̱ sisi̱ huin nia̱ꞌ ruhuāj ga̱ꞌmī si-nu̱guanꞌ Yanꞌanj rian ni ngüi̱, ni̱ na̱ruꞌue Yanꞌanj riānj. Ni̱ sisi̱ nitaj si huin nia̱ꞌ ruhuāj ga̱ꞌmī si-nu̱guanꞌ Yanꞌanj, sani̱ hua nia̱n sisi̱ hué daj gui̱ꞌyā xiꞌí si garun sun Yanꞌanj riānj. ¹⁸Ni̱ u̱n sin na̱ruꞌue Yanꞌanj riānj, ruhua á re̱ꞌ únj. Duꞌue manꞌānj huin si ga̱ꞌue ga̱ꞌmi yūnj si-nu̱guanꞌ Yanꞌanj rian ni ngüi̱. Ni̱ huin ruhuāj gatā sisi̱ hua si-chrē ri̱qui ni sij rasu̱n riānj xiꞌí si gaꞌmī si-nu̱guanꞌ Yanꞌanj rian ni sij. Sani̱ sé si achīn si ri̱qui ni sij riānj mánj.

¹⁹Sé si aꞌninꞌ ni ngüi̱ sun riānj. Ni̱ hua níꞌnij riānj sisi̱ gui̱ꞌyā daranꞌ si ga̱ranꞌ ruhuāj. Sani̱ gahuīnj ꞌngo̱ tsínj ꞌyaj sun rian daranꞌ ni ngüi̱ xiꞌí si huin ruhuāj gu̱xuman ruhua nico ni sij ni̱ꞌyaj sij Cristo. ²⁰Ni̱ ngaa huaj manꞌānj scanij ni tsínj israelita, ni̱ ꞌyā da̱j rúnꞌ ꞌyaj ni sij xiꞌí si huin ruhuāj si gu̱xuman ruhua ni sij ni̱ꞌyaj ni sij Cristo. Ni̱ nu̱nj si nitaj si aꞌninꞌ si-ley Moisés sun riānj, sani̱ ngaa huaj manꞌānj scanij ni tsínj ri̱an aꞌninꞌ si-ley Moisés sun, ni̱ ꞌyā da̱j rúnꞌ ꞌyaj ni sij xiꞌí si huin ruhuāj si gu̱xuman ruhua ni sij ni̱ꞌyaj ni sij Cristo. ²¹Ni̱ ngaa huaj manꞌānj scanij ni tsínj nun nicoꞌ ley daj, ni̱ ꞌyā da̱j rúnꞌ ꞌyaj ni sij xiꞌí si huin ruhuāj sisi̱ gu̱xuman ruhua ni sij ni̱ꞌyaj sij Cristo. Ni̱ sé si ꞌyā si aranꞌ ruhuāj gui̱ꞌyā. Daj si unūnj si aꞌninꞌ Yanꞌanj sun riānj. Ni̱ unūnj si aꞌninꞌ Cristo sun riānj nej. ²²Ni̱ ngaa huaj manꞌānj scanij ni tsínj achin gui̱niꞌi sa̱ꞌ da̱j hua si-chrej Yanꞌanj, ni̱ ꞌyā da̱j rúnꞌ ꞌyaj ni sij xiꞌí si huin ruhuāj si gui̱niꞌi sa̱ꞌ ni sij si-chrej Yanꞌanj. Ni̱ huin ruhuāj ga̱tā sisi̱ uyan ꞌyā nga̱ da̱j rúnꞌ ꞌyaj go̱ꞌngo ni ngüi̱ daj xiꞌí si huin ruhuāj si gu̱xuman ruhua ni sij ni̱ꞌyaj ni sij Cristo.

²³Ni̱ ꞌyā daranꞌ ni nuguanꞌ nan xiꞌí si-nu̱guanꞌ Yanꞌanj huin nuguanꞌ sa̱ꞌ. Ngaa ni̱ gui̱ꞌyaj sa̱ꞌ Yanꞌanj nga̱ manꞌānj xiꞌí nuguanꞌ daj, ruhuāj aj. ²⁴Niꞌi a ni é re̱ꞌ da̱j ꞌyaj ni tsínj ngaa unánj ni sij nga̱ dugüiꞌ ni sij. Ni̱ huin ruhua ni sij gui̱ꞌyaj gana ni sij rian dugüiꞌ ni sij. Sani̱ urin dugüiꞌ ni sij ꞌyaj gana, ni̱ na̱caj síꞌ premio. Hué ducuánj da huin, ni̱ gu̱nánj sa̱ꞌ a ni é re̱ꞌ chruhua si-chrej Yanꞌanj sisi̱ na̱huin raꞌa á re̱ꞌ premio na̱riqui Yanꞌanj rian án re̱ꞌ. ²⁵Daranꞌ ni tsínj ꞌyaj chru̱n sisi̱ gu̱ducu ni sij, ni̱ gui̱ꞌyaj gana ni sij, ni̱ hua cuidado ni sij nga̱ nnee̱ cúj ni sij sisi̱ gui̱ꞌyaj gana ni sij, ruhua ni sij. Ni̱ hué daj ꞌyaj ni sij sisi̱ ga̱ꞌue gui̱ꞌyaj gana ni sij ꞌngo̱ corona coj huaj ga̱naco, ruhua ni sij. Sani̱ ununꞌ si-chrej Yanꞌanj sisi̱ na̱huin roꞌóꞌ ꞌngo̱ corona nitaj a̱man gu̱chruj.

²⁶Nitaj si unān da̱j rúnꞌ ꞌyaj ꞌngo̱ tsínj nun niꞌi ni̱ a̱ gui̱sij sij. Ni̱ nitaj si unūnj nga̱ sichre da̱j rúnꞌ ꞌyaj ꞌngo̱ tsínj aꞌuiꞌ rian nane̱ mánj. ²⁷Sani̱ ꞌyaj fuerzāj sisi̱ da̱gahuin nnee̱ cū si huin ruhua manꞌānj. Ni̱ hua gaꞌmī si-nu̱guanꞌ Yanꞌanj rian ni ngüi̱. Ni̱ hué daj ꞌyā nga̱ nnee̱ cū xiꞌí si naꞌuej ruhuāj sisi̱ ga̱huin manꞌānj ꞌngo̱ tsínj naꞌue gui̱ꞌyaj gana chruhua si-chrej Yanꞌanj mánj.

Amonestaciones contra la idolatría

¹Ni̱ xa̱caj a ni é re̱ꞌ cuenta da̱j guiranꞌ ni xi néꞌ, ni tsínj guimán asi̱j ná huin ín re̱ꞌ jnánj néꞌ nga̱ xicaꞌuij néꞌ. Daj si gane ni xi néꞌ riqui nga daj. Ni̱ gachin daranꞌ ni sij anéj chrej duꞌua nnee yanꞌanj, guiꞌyaj Yanꞌanj. ²Ni̱ da̱j rúnꞌ ataꞌ nnee néꞌ gahuin nu̱guanꞌan néꞌ nga̱ Jesús, ni̱ hué daj gataꞌ nnee ni sij gahuin nu̱guanꞌan ni sij nga̱ Moisés ngaa guimán ni sij riqui nga daj ngaa gachin ni sij anéj chrej duꞌua nnee yanꞌanj daj. ³Ni̱ uyan xa daranꞌ ni sij si gaꞌuiꞌ Yanꞌanj rian ni sij xa ni sij. ⁴Ni̱ goꞌo ni sij nnee gaꞌuiꞌ Yanꞌanj si goꞌo ni sij nej. Ni̱ nnee daj huin nnee gahui rian huej, guiꞌyaj Yanꞌanj. Ni̱ huej daj huin Cristo huin tsínj guinicaj dugüiꞌ nga̱ ni sij ngaa gachéj ni sij yuꞌuj daj. ⁵Sani̱ nun ga̱ranꞌ ruhua Yanꞌanj nga̱ si guiꞌyaj nico ni tsínj daj. Xiꞌí daj ni̱ gahuiꞌ nico ni sij. Ni̱ guna níman ni sij quij quiꞌyanj na̱co daj, guiꞌyaj Yanꞌanj.

⁶Ni̱ xiꞌí si guiranꞌ ni sij, ni̱ digyán Yanꞌanj rian néꞌ sisi̱ si̱ gahuin ruhua néꞌ gui̱ꞌyaj néꞌ nga̱ si quij hua da̱j rúnꞌ guiꞌyaj ni sij asi̱j ná. ⁷Ngaa ni̱ si̱ guinicoꞌ a ni é re̱ꞌ yanꞌanj guiꞌyaj raꞌa ni tsínj da̱j rúnꞌ guiꞌyaj go̱ꞌngo ni sij. Ni̱ hué daj gataj si-nu̱guanꞌ Yanꞌanj: “Ni ganꞌanj ga̱ne ni sij xa̱ ni sij go̱ꞌo ni sij. Ni̱ naxu̱man ni sij, ni̱ quij ducu ni sij.” Daj gataj si-nu̱guanꞌ Yanꞌanj. ⁸Ngaa ni̱ si̱ guiꞌyaj squi̱raꞌ néꞌ nga̱ ni yunꞌunj xa̱na da̱j rúnꞌ guiꞌyaj go̱ꞌngo ni tsínj israelita. Ni̱ xiꞌí daj, ni̱ gahuiꞌ ico̱ hua̱ꞌnij ni ngüi̱ urin güi, guiꞌyaj Yanꞌanj. ⁹Ni̱ nun gu̱xuꞌuiꞌ ni sij gui̱ꞌyaj ni sij gaquinꞌ. Maan si huin ruhua ni sij gui̱niꞌi ni sij sisi̱ xa̱ngaꞌ gui̱ꞌyaj Yanꞌanj castigo ni sij xiꞌí gaquinꞌ guiꞌyaj ni sij. Ni̱ guiꞌyaj ni sij gaquinꞌ. Sani̱ gahuiꞌ ni sij, guiꞌyaj xucuáj. Xiꞌí daj ni̱ si̱ guiꞌyaj néꞌ da mánj. ¹⁰Ni̱ si̱ gaꞌmi gaquinꞌ néꞌ xiꞌí Yanꞌanj da̱j rúnꞌ guiꞌyaj go̱ꞌngo ni sij. Ngaa ni̱ dagahuiꞌ ꞌngo̱ ángel ni sij, guiꞌyaj Yanꞌanj.

¹¹Ni̱ xiꞌí si guiranꞌ ni xi néꞌ ni sayun daj, ni̱ digyán Yanꞌanj ꞌngo̱ nuguanꞌ rian néꞌ sisi̱ si̱ guiꞌyaj néꞌ ni gaquinꞌ daj. Ni̱ hua ni̱ca rian si-nu̱guanꞌ Yanꞌanj asi̱j ná sisi̱ ga̱huin chru̱n néꞌ mán néꞌ güi huaj ga̱nahuij xungüi̱ nan. ¹²Hué dan ni̱ sisi̱ ani ruhua néꞌ sisi̱ hua ni̱ca niman néꞌ nga̱ si-nu̱guanꞌ Yanꞌanj, ni̱ ga̱ cuidado néꞌ nga̱ manꞌan néꞌ sisi̱ si̱ guinij néꞌ rian gaquinꞌ. ¹³Da̱j rúnꞌ huin sayun chranꞌ ni é re̱ꞌ, ni̱ hué daj huin sayun ranꞌ daranꞌ ni ngüi̱. Ni̱ ga̱ꞌue ga̱ yya ruhua á re̱ꞌ sisi̱ si̱ duna Yanꞌanj si gui̱ranꞌ ni é re̱ꞌ ꞌngo̱ sayun naꞌue gu̱nucuaj ni é re̱ꞌ gui̱ranꞌ a ni é re̱ꞌ mánj. Sani̱ ngaa gui̱ranꞌ án re̱ꞌ sayun daj, ni̱ di̱gyán Yanꞌanj da̱j ga̱chin a ni é re̱ꞌ rian sayun daj. Asíj ni̱ ga̱ꞌue gu̱nucuaj a ni é re̱ꞌ rian sayun daj, gui̱ꞌyaj Yanꞌanj.

¹⁴Ngaa ni̱ ga̱huin ni̱ni a ni é re̱ꞌ rian ni yanꞌanj guiꞌyaj raꞌa ni sij huin ín re̱ꞌ ni jnān ꞌi̱ ruhuāj. ¹⁵Tsínj acaj cuenta huin ín re̱ꞌ, ruhuāj aj. Xiꞌí daj ni̱ ga̱ꞌue xa̱caj sa̱ꞌ á re̱ꞌ daꞌngaꞌ sisi̱ nuguanꞌ sa̱ꞌ huin nuguanꞌ aꞌmī rian án re̱ꞌ. ¹⁶Ni̱ ngaa nahuin yuꞌ néꞌ, ni̱ achínj jniꞌyaj néꞌ rian Yanꞌanj xiꞌí si go̱ꞌo néꞌ vaso nnee vino sa̱ꞌ daj. Daj si da̱j rúnꞌ hua si-tun manꞌan Cristo, ni̱ hué daj hua nnee vino daj rian néꞌ. Ni̱ uraꞌ daꞌaj néꞌ chrachrúnj. Ni̱ hué ꞌngo̱ sinduj nico huin guiꞌyaj Cristo xiꞌí néꞌ. Ni̱ xa nu̱guanꞌan néꞌ do̱j chrachrúnj daj. Ni̱ da̱j rúnꞌ hua nnee̱ cúj Cristo, ni̱ hué daj hua chrachrúnj daj rian néꞌ. ¹⁷Ni̱ nu̱nj si nico néꞌ, sani̱ daranꞌ néꞌ xa urin chrachrúnj. Ni̱ xiꞌí daj, ni̱ huin néꞌ urin nnee̱ cúj. ¹⁸Ni̱ xa̱caj á re̱ꞌ cuenta da̱j guiꞌyaj ni tsínj israelita asi̱j ná. Xa ni sij nnee̱ xucu dagahuiꞌ ni sij rian Yanꞌanj. Xiꞌí daj ni̱ da̱j rúnꞌ hua urin ngüi̱ hué daj hua daranꞌ ni sij rian Yanꞌanj.

¹⁹Ngaa ni̱ u̱n sin huin ruhuāj ga̱tā nga̱ nuguanꞌ nan únj. Huin ruhuāj ga̱tā sisi̱ yya Yanꞌanj huin yanꞌanj guiꞌyaj raꞌa ni ngüi̱ níꞌ. Sé daj huin mánj. Ni̱ huin ruhuāj ga̱tā sisi̱ ni̱ni huin nnee̱ aꞌuiꞌ ni sij rian yanꞌanj guiꞌyaj raꞌa ni sij níꞌ. Sé daj huin mánj. ²⁰Maan si huin ruhuāj ga̱tā sisi̱ ngaa aꞌuiꞌ ni tsínj ꞌna̱ꞌ anéj chrej xucu rian yanꞌanj ꞌyaj raꞌa ni sij, ni̱ sé rian Yanꞌanj xa̱ngaꞌ aꞌuiꞌ ni sij mánj. Sani̱ aꞌuiꞌ ni sij rian ni nane̱ xi̱ꞌi. Ni̱ naꞌuej ruhuāj sisi̱ gui̱nicaj dugüiꞌ ni é re̱ꞌ nga̱ ni nane̱ xi̱ꞌi mánj. ²¹Ni̱ naꞌue go̱ꞌo a ni é re̱ꞌ vaso nnee riqui Señor, ngaa ni̱ na̱nicaj á re̱ꞌ go̱ꞌo a ni é re̱ꞌ vaso nnee riqui ni nane̱ xi̱ꞌi aj. Ni̱ naꞌue ga̱ne a ni é re̱ꞌ rian si-mesa Señor xa̱ á re̱ꞌ si riqui síꞌ, ngaa ni̱ na̱nicaj á re̱ꞌ ga̱ne a ni é re̱ꞌ rian si-mesa ni nane̱ xi̱ꞌi xa̱ á re̱ꞌ mánj. ²²Asi̱ huin ruhua néꞌ sisi̱ ga̱ꞌman ruhua Señor ni̱ꞌyaj sij néꞌ níꞌ. Asi̱ nucuaj néꞌ doj daj nga̱ sij ruhua á re̱ꞌ a̱ꞌ. Sé daj huin mánj.

Haced todo para la gloria de Dios

²³Ga̱ꞌue gui̱ꞌyaj néꞌ si aranꞌ ruhua néꞌ, ataj ni ngüi̱. Xa̱ngaꞌ, sani̱ sé si sa̱ꞌ huin sisi̱ gui̱ꞌyaj néꞌ daranꞌ si aranꞌ ruhua néꞌ. Xa̱ngaꞌ sisi̱ ga̱ꞌue gui̱ꞌyaj néꞌ si aranꞌ ruhua néꞌ. Sani̱ na̱ꞌue ga̱huin sa̱ꞌ néꞌ sisi̱ gui̱ꞌyaj néꞌ daranꞌ si aranꞌ ruhua néꞌ. ²⁴Si̱ nanoꞌ néꞌ si ga̱ sa̱ꞌ rian ni manꞌan néꞌ. Sani̱ na̱noꞌ néꞌ sisi̱ ga̱ sa̱ꞌ rian ango ni dugüiꞌ néꞌ aj.

²⁵Ga̱ꞌue xa̱ á re̱ꞌ daranꞌ ni nnee̱ aneꞌ rian yuꞌue̱. Ni̱ si̱ nachínj snanꞌanj a ni é re̱ꞌ sisi̱ nnee̱ daj huin nnee̱ xucu nagaꞌuiꞌ ni sij rian ango yanꞌanj mánj. ²⁶Daj si siꞌyaj Señor huin xungüi̱ nan nga̱ daranꞌ si ma̱n chruhua xungüi̱ nej.

²⁷Ni̱ sisi̱ aquínj ꞌngo̱ tsínj nun xu̱man ruhua niꞌi Yanꞌanj sisi̱ ga̱nꞌanj xa̱ re̱ꞌ ducuá sij, ni̱ sisi̱ huin ruhuá re̱ꞌ ga̱nꞌanj re̱ꞌ xa̱ re̱ꞌ nga̱ sij, ni̱ xa̱ re̱ꞌ daranꞌ si ri̱qui sij xa̱ re̱ꞌ. Ni̱ si̱ nachínj snanꞌánj re̱ꞌ sij u̱n nnee̱ huin mánj. ²⁸Sani̱ sisi̱ ga̱taj snanꞌanj ꞌngo̱ tsínj daj: “Nnee̱ daj huin nnee̱ xucu nagaꞌuiꞌ ni sij rian yanꞌanj ꞌyaj raꞌa ni ngüi̱”, ngaa ni̱ si̱ xá re̱ꞌ nun sa̱ꞌ nun gui̱ꞌyaj xiꞌij nga̱ tsínj gataj daj. Daj si si ruhuaj, ni̱ nun gahuin yya ruhua sij sisi̱ ga̱ꞌue xa̱ sij nnee̱ daj. ²⁹Ni̱ niꞌi manꞌán re̱ꞌ sisi̱ sé ꞌngo̱ gaquinꞌ huin sisi̱ xa̱ re̱ꞌ nnee̱ daj. Sani̱ ango tsínj daj, ni̱ ꞌngo̱ gaquinꞌ huin sisi̱ xa̱ sij, ruhua sij. Ni̱ ga̱ꞌue na̱chinꞌ snanꞌanj ꞌngo̱ a ni é re̱ꞌ manꞌānj: “Un sin huin, ni̱ gui̱ꞌyā da̱j rúnꞌ huin ruhua ango tsínj únj. ³⁰Ni̱ sisi̱ na̱gaꞌuīj si guruhua Yanꞌanj nga̱ si xāj, ni̱ u̱n sin huin, ni̱ gu̱taꞌ ꞌngo̱ tsínj daj gaquinꞌ xirāj. Hua níꞌnij riānj sisi̱ xāj nnee̱ daj.” Hué daj na̱chinꞌ snanꞌanj ꞌngo̱ ni̱ é re̱ꞌ, ruhuāj aj.

³¹Sani̱, asi̱ si xa néꞌ, asi̱ si goꞌo néꞌ, asi̱ si ꞌyaj néꞌ, ni̱ daꞌui néꞌ gui̱ꞌyaj néꞌ daranꞌanj xiꞌí si ga̱ꞌmi sa̱ꞌ ni ngüi̱ rian Yanꞌanj anj. ³²Hué dan ni̱ si̱ digyán án re̱ꞌ ꞌngo̱ chrej aꞌnanꞌ rian ni ngüi̱ israelita nga̱ ni ngüi̱ ꞌna̱ꞌ anéj chrej nej, daranꞌ ni ngüi̱ xuman ruhua niꞌyaj Yanꞌanj mánj. ³³Güendāj ni̱ nahuij ruhuāj gui̱ꞌyā daranꞌanj da̱j rúnꞌ aranꞌ ruhua ni ngüi̱. Ni̱ nitaj si nahuij ruhuāj nga̱ si aranꞌ ruhua manꞌānj. Sani̱ daꞌngaꞌ daj ꞌyā sisi̱ ga̱ꞌue ga̱nani ni sij, gui̱ꞌyaj Yanꞌanj anj.

¹Hué dan ni̱ gui̱nicoꞌ a ni é re̱ꞌ si-chrej manꞌānj da̱j rúnꞌ nicōj si-chrej Cristo aj.

Atavío de las mujeres

²Ni̱ guiꞌyaj sa̱ꞌ á re̱ꞌ xiꞌí si nanun ruhua á re̱ꞌ niꞌyaj á re̱ꞌ manꞌānj. Ni̱ dagahuin a ni é re̱ꞌ ni nuguanꞌ digyānj rian ni é re̱ꞌ nej. ³Sani̱ huin ruhuāj sisi̱ xa̱caj á re̱ꞌ cuenta sisi̱ huin achij Cristo rian daranꞌ ni tsínj. Ni̱ huin achij ꞌngo̱ tsínj daj rian nica̱ sij. Ni̱ huin achij Yanꞌanj rian Cristo.

⁴Ni̱ sisi̱ nu̱n jnahui chra̱ ꞌngo̱ tsínj daj ngaa achínj jniꞌyaj sij rian Yanꞌanj, asi̱ ngaa aꞌmi sij si-nu̱guanꞌ Yanꞌanj rian ni ngüi̱, ngaa ni̱ nitaj si hua níꞌyanj sij rian Cristo mánj. ⁵Sani̱ sisi̱ nitaj si si̱caꞌ chra̱ ꞌngo̱ yunꞌunj xa̱na ngaa achínj jniꞌyaj unj rian Yanꞌanj, asi̱ ngaa aꞌmi unj si-nu̱guanꞌ Yanꞌanj rian ni ngüi̱, ngaa ni̱ nitaj si hua níꞌyanj unj rian nica̱ unj. Ni̱ hué uyan huin sisi̱ ga̱ canj chra̱ unj. ⁶Ni̱ sisi̱ naꞌuej ruhua unj gui̱ranj chra̱ unj, ngaa ni̱ duguꞌna̱j huin sisi̱ ga̱ꞌninꞌ unj hueé chra̱ unj. Ni̱ sisi̱ na̱ꞌaj unj ga̱ꞌninꞌ unj hueé chra̱ unj, asi̱ ga̱ canj chra̱ unj, ngaa ni̱ gui̱ranj unj chra̱ unj nánj.

⁷Si̱ guiránj ꞌngo̱ tsínj daj chra̱ sij mánj. Daj si hué sij digyán da̱j hua Yanꞌanj xa̱caj ni ngüi̱ cuenta sisi̱ sa̱ꞌ manꞌan Yanꞌanj ngaa gui̱niꞌi ni sij ꞌngo̱ tsínj snoꞌo. Ni̱ xa̱caj ni ngüi̱ cuenta sisi̱ sa̱ꞌ ꞌngo̱ tsínj snoꞌo ngaa gui̱niꞌi ni sij ꞌngo̱ yunꞌunj xa̱na. ⁸Daj si nun gui̱ri Yanꞌanj tsínj snoꞌo rian yunꞌunj xa̱na. Sani̱ Yanꞌanj guiri yunꞌunj xa̱na rian tsínj snoꞌo. ⁹Ni̱ nun gui̱ꞌyaj Yanꞌanj tsínj snoꞌo xiꞌí yunꞌunj xa̱na. Sani̱ guiꞌyaj Yanꞌanj yunꞌunj xa̱na xiꞌí tsínj snoꞌo. ¹⁰Ngaa ni̱ hua nia̱n sisi̱ gui̱ta chra̱ ꞌngo̱ yunꞌunj xa̱na daj ꞌngo̱ atsij huin-ínꞌ ꞌngo̱ daꞌngaꞌ digyán sisi̱ huin achij nica̱ unj rian unj. Ngaa ni̱ gui̱niꞌi ni ángel sisi̱ ꞌyaj sa̱ꞌ unj.

¹¹Sani̱ rian Señor, ni̱ si̱ gaꞌue ga̱ ni̱ꞌnaꞌ ꞌngo̱ tsínj daj sisi̱ nitaj si nne ꞌngo̱ yunꞌunj xa̱na. Ni̱ si̱ gaꞌue ga̱ ni̱ꞌnaꞌ ꞌngo̱ yunꞌunj xa̱na sisi̱ nitaj ꞌngo̱ tsínj. ¹²Daj si xiꞌí tsínj, ni̱ gahuin yunꞌunj xa̱na rian xungüi̱ nan. Sani̱ xiꞌí yunꞌunj xa̱na, ni̱ aꞌnga tsínj. Ni̱ Yanꞌanj guiꞌyaj daranꞌanj. ¹³Ga̱taj néꞌ sisi̱ hua sa̱ꞌ ngaa achínj jniꞌyaj ꞌngo̱ yunꞌunj xa̱na rian Yanꞌanj ngaa nitaj si si̱caꞌ chra̱ unj níꞌ. Sé daj huin mánj. ¹⁴Niꞌi daranꞌ néꞌ sisi̱ nitaj si hua sa̱ꞌaj na̱taꞌ na̱saꞌ chra̱ ꞌngo̱ tsínj daj. ¹⁵Sani̱ si sa̱ꞌ rian ꞌngo̱ yunꞌunj xa̱na huin sisi̱ du̱na unj si ga̱ xa̱can duhue chra̱ unj, ruhua ni ngüi̱. Ni̱ riqui Yanꞌanj sisi̱ gui̱ranj hueé xa̱can daj chra̱ unj. Daj si da̱j rúnꞌ huin ꞌngo̱ si ránj chra̱ unj, ni̱ hué daj huin duhue unj. ¹⁶Ni̱ sisi̱ hua ꞌngo̱ a ni é re̱ꞌ naꞌuej ruhua gu̱nun ni nuguanꞌ nan, ni̱ huin ruhuāj gui̱niꞌi a ni é re̱ꞌ sisi̱ nitaj ango ducuánj ꞌyaj ni únj. Ni̱ hué nan huin ducuánj ꞌyaj ango ni ngüi̱ nicoꞌ Yanꞌanj nej.

Abusos en la Cena del Señor

¹⁷Ni̱ naꞌue ga̱ꞌmi saꞌāj xiꞌí ni é re̱ꞌ nga̱ nuguanꞌ ga̱ꞌmī nan gu̱nun a ni é re̱ꞌ. Daj si ngaa nahuin yuꞌ ni é re̱ꞌ, ni̱ ꞌyaj xi̱ꞌi a ni é re̱ꞌ nga̱ si-chrej Yanꞌanj. Ni̱ si̱ gahui sa̱ꞌ á re̱ꞌ xiꞌí si ꞌyaj á re̱ꞌ rúnꞌ huaj. ¹⁸Hua sini ya̱n ga̱taj snanꞌān gu̱nun a ni é re̱ꞌ xiꞌí si nun hua uyan ruhua daranꞌ án re̱ꞌ. Daj si gunūnj nuguanꞌ sisi̱ ꞌyaj ni̱ni daꞌaj á re̱ꞌ rian dugüiꞌ a ni é re̱ꞌ ngaa nahuin yuꞌ a ni é re̱ꞌ. Ni̱ hua daꞌaj xuman ruhuāj sisi̱ hué daj huin xa̱ngaꞌ. ¹⁹Ni̱ duguꞌna̱j hua sisi̱ ga̱nun guitsi ruhua dugüiꞌ a ni é re̱ꞌ. Xiꞌí daj ni̱ gui̱niꞌi néꞌ da̱j hua yya go̱ꞌngo a ni é re̱ꞌ nicoꞌ xa̱ngaꞌ Yanꞌanj. ²⁰Hué dan ni̱ ngaa nahuin yuꞌ a ni é re̱ꞌ, ni̱ ani ruhua á re̱ꞌ sisi̱ xiꞌí si guiꞌyaj á re̱ꞌ cena si-cena Señor nahuin yuꞌ a ni é re̱ꞌ, ruhua á re̱ꞌ. Sani̱ sé si xa̱ngaꞌ guiꞌyaj a ni é re̱ꞌ si-cena Señor mánj. ²¹Daj si ngaa síj hora xa á re̱ꞌ, ni̱ huin yoo̱ sini a ni é re̱ꞌ da̱ꞌa á re̱ꞌ si xa̱ á re̱ꞌ. Ni̱ achin xiꞌna̱ riqui ango ni é re̱ꞌ gunáj da ru̱cu. Ni̱ hua xi̱ni ango a ni é re̱ꞌ nej. ²²Nitaj nu̱nj huaj ducuá á re̱ꞌ sisi̱ xa̱ siní re̱ꞌ, ni̱ go̱ꞌo re̱ꞌ níꞌ. Ni̱ u̱n sin huin ni̱ ꞌyaj quij a ni é re̱ꞌ rian ni tsínj nicoꞌ Jesús únj. Ni̱ riꞌ ni ngüi̱ niqui si-na̱ꞌaj ꞌyaj á re̱ꞌ nej. Da̱j ga̱tā gu̱nun a ni é re̱ꞌ, ruhua á re̱ꞌ únj. Ga̱ꞌmi sa̱ꞌāj xiꞌí a ni é re̱ꞌ níꞌ. Xiꞌí nuguanꞌ nan si̱ gaꞌuē mánj.

Institución de la Cena del Señor

²³Daj si digyán Señor Jesús ꞌngo̱ nuguanꞌ riānj. Ni̱ hué nuguanꞌ daj digyānj rian án re̱ꞌ nej. Ni̱ nuguanꞌ daj huin: Hué gue̱, ni̱ ngaa nagaꞌuiꞌ tsínj daj Señor Jesús rian ni tsínj nicaj sun, ni̱ guidaꞌa Jesús chrachrúnj. ²⁴Ni̱ ngaa guisíj nagaꞌuiꞌ sij si guruhua Yanꞌanj, ni̱ guraꞌ daꞌaj sij chrachrúnj daj, ni̱ gataj sij:

―Gui̱daꞌa á re̱ꞌ chrachrúnj nan xa̱ á re̱ꞌ. Nan huin nnee̱ cū nariquīj xiꞌí a ni é re̱ꞌ. Ni̱ hué daj gui̱ꞌyaj á re̱ꞌ sisi̱ na̱nun ruhua á re̱ꞌ ni̱ꞌyaj á re̱ꞌ manꞌānj. ―Daj gataj Jesús gunun ni tsínj nicoꞌ sij.

²⁵Ni̱ ngaa guisíj xa stiꞌni̱ ni sij, ni̱ guidaꞌa Jesús vaso nu̱n nnee vino, ni̱ gataj sij:

―Hué nnee nan huin nuguanꞌ na̱ca guiꞌyaj yya Yanꞌanj nga̱ si-tun manꞌānj rian án re̱ꞌ. Ni̱ da yu̱n yu̱n go̱ꞌo a ni é re̱ꞌ nnee nan, ni̱ ga̱nanun ruhua á re̱ꞌ ni̱ꞌyaj á re̱ꞌ manꞌānj. ―Daj gataj Jesús gunun ni sij.

²⁶Ni̱ huin ruhuāj ga̱tā sisi̱ da güi ga̱ꞌnaꞌ Señor ni̱ da yu̱n yu̱n xa̱ á re̱ꞌ chrachrúnj daj, ni̱ go̱ꞌo a ni é re̱ꞌ rian vaso daj, ni̱ di̱gyán án re̱ꞌ rian ni ngüi̱ sisi̱ da̱j gahuiꞌ Señor xiꞌí a ni é re̱ꞌ.

Tomando la Cena indignamente

²⁷Hué dan ni̱ sisi̱ hua ꞌngo̱ dugüiꞌ néꞌ xa chrachrúnj daj, asi̱ goꞌo sij rian vaso daj, ngaa nitaj si hua níꞌyanj sij rian Señor, ni̱ daꞌui sij gaquinꞌ xiꞌí nnee̱ cúj Señor nga̱ si-tun manꞌan Señor nej. ²⁸Xiꞌí daj ni̱ hua nia̱n xa̱caj go̱ꞌngo néꞌ cuenta da̱j guiꞌyaj go̱ꞌngo néꞌ. Ngaa ni̱ ga̱ꞌue xa̱ néꞌ chrachrúnj daj. Ni̱ ga̱ꞌue go̱ꞌo néꞌ rian vaso da nej. ²⁹Daj si tsínj xa chrachrúnj daj, ni̱ goꞌo sij rian vaso daj ngaa nun xacaj sij cuenta sisi̱ nnee̱ cúj Señor huin, ni̱ ga̱huin sij castigo xiꞌí si xa sij goꞌo sij aj. ³⁰Xiꞌí daj ni̱ aꞌnanꞌ nico ni é re̱ꞌ. Ni̱ hua nichre nnee̱ cúj ni é re̱ꞌ nej. Ni̱ hua gahuiꞌ go̱ꞌngo ni é re̱ꞌ nej.

³¹Ni̱ sisi̱ gui̱niꞌyaj sa̱ꞌ néꞌ xiꞌí si-ga̱quinꞌ munꞌúnꞌ sisi̱ daꞌui yya néꞌ gaquinꞌ, ni̱ si̱ gahuin néꞌ castigo, gui̱ꞌyaj Señor, ruhua néꞌ. ³²Sani̱ xiꞌí si niꞌi Señor sisi̱ daꞌui néꞌ gaquinꞌ, ni̱ ga̱huin castigo néꞌ, gui̱ꞌyaj Señor. Ni̱ hué daj ꞌyaj sij sisi̱ si̱ gahuin néꞌ castigo güi ga̱ꞌnaꞌ ru̱huaꞌ yún sij na̱guiꞌyaj yya sij nga̱ si-ga̱quinꞌ ni ngüi̱ ma̱n chruhua xungüi̱ gaquinꞌ nan.

³³Xiꞌí daj ni̱ ngaa na̱huin yuꞌ a ni é re̱ꞌ huin ín re̱ꞌ jnān nga̱ xicaꞌuī xa̱ nu̱guanꞌan a ni é re̱ꞌ, ni̱ ga̱naꞌuij go̱ꞌngo ni é re̱ꞌ ni dugüiꞌ a ni é re̱ꞌ. Ngaa ni̱ uyan xa̱ daranꞌ ni é re̱ꞌ. ³⁴Sisi̱ achin xiꞌna̱ riqui ꞌngo̱ a ni é re̱ꞌ, ni̱ xa̱ sij ducuá sij. Ngaa ni̱ nitaj si gui̱ꞌyaj Yanꞌanj castigo sij xiꞌí si ꞌyaj sij ngaa nahuin yuꞌ a ni é re̱ꞌ. Ni̱ ango ni nuguanꞌ gachínj snanꞌanj án re̱ꞌ manꞌānj, ni̱ na̱guiꞌyaj yyāj ngaa gu̱chīj niꞌyā rian ma̱n án re̱ꞌ.

Dones espirituales

¹Huin ruhuāj sisi̱ xa̱caj á re̱ꞌ cuenta xiꞌí sun sa̱ꞌ nicaj néꞌ, ꞌyaj Espíritu Santo huin ín re̱ꞌ jnān nga̱ xicaꞌuī. ²Niꞌi a ni é re̱ꞌ sisi̱ ngaa achin gu̱xuman ruhua á re̱ꞌ ni̱ꞌyaj á re̱ꞌ Yanꞌanj, ni̱ chéj a ni é re̱ꞌ rian yanꞌanj naꞌue ga̱ꞌmi, guiꞌyaj ni dugüiꞌ a ni é re̱ꞌ. ³Xiꞌí daj ni̱ ataj snanꞌān gu̱nun a ni é re̱ꞌ sisi̱ ni̱ a̱ ꞌngo̱ tsínj si̱ gaꞌue ga̱taj: “Quij hua Jesús”, ngaa aꞌmi sij si gui̱ꞌyaj Espíritu Santo mánj. Ni̱ si̱ gaꞌue ga̱taj ꞌngo̱ tsínj daj: “Jesús huin Señor”, ngaa nitaj Espíritu Santo nne niman sij mánj.

⁴Ni̱ hua ni̱ni go̱ꞌngo sun riqui Espíritu Santo nicaj go̱ꞌngo néꞌ. Sani̱ urin Espíritu Santo riqui go̱ꞌngo sun daj rian néꞌ. ⁵Ni̱ hua ni̱ni go̱ꞌngo sun ꞌyaj sun go̱ꞌngo néꞌ rian ni dugüiꞌ néꞌ. Sani̱ urin Señor riqui go̱ꞌngo sun rian néꞌ. ⁶Ni̱ hua ni̱ni go̱ꞌngo sun ꞌyaj sun Yanꞌanj chruhua niman da go̱ꞌngo néꞌ. Sani̱ hué gue̱ Yanꞌanj ꞌyaj sisi̱ ga̱ꞌue gui̱ꞌyaj néꞌ daranꞌ ni rasu̱n daj.

⁷Ni̱ riqui Espíritu Santo ꞌngo̱ sun nicaj da go̱ꞌngo néꞌ. Ni̱ sun daj huin ꞌngo̱ daꞌngaꞌ digyán sisi̱ nne Espíritu Santo niman néꞌ. Ni̱ gui̱man sa̱ꞌ néꞌ, ꞌyaj sun riqui Espíritu Santo rian néꞌ. ⁸Hué dan ni̱ aꞌmi ꞌngo̱ jnánj néꞌ nuguanꞌ chru̱n sa̱ꞌ, ꞌyaj Espíritu Santo. Ni̱ hué gue̱ Espíritu Santo ꞌyaj sisi̱ niꞌi sa̱ꞌ ango jnánj néꞌ da̱j ani ruhua manꞌan Yanꞌanj. ⁹Ni̱ ꞌyaj sa̱ꞌ Espíritu Santo sisi̱ gu̱xuman sa̱ꞌ ruhua ango jnánj néꞌ. Ni̱ ga̱nahuin ni ngüi̱ aꞌnanꞌ, gui̱ꞌyaj ango jnánj néꞌ, ꞌyaj Espíritu Santo nej. ¹⁰Ni̱ riqui Espíritu Santo sisi̱ ga̱ꞌue gui̱ꞌyaj sa̱ꞌ ángo jnánj néꞌ ꞌngo̱ si sa̱ꞌ, gui̱ꞌyaj Yanꞌanj. Ni̱ ga̱ꞌmi ángo jnánj néꞌ nuguanꞌ gaꞌuiꞌ Yanꞌanj rian síꞌ. Ni̱ gui̱niꞌi ángo jnánj néꞌ da̱j hua nane̱ aꞌmi go̱ꞌngo néꞌ. Ni̱ niꞌi sij sisi̱ si-na̱ne Espíritu Santo aꞌmi néꞌ níꞌ, asi̱ si-na̱ne sichre huin si aꞌmi néꞌ sa̱ꞌ. Ni̱ ga̱ꞌue ga̱ꞌmi ángo jnánj néꞌ gaꞌi̱ rian snanꞌanj na̱ca huin snanꞌanj nun niꞌi manꞌan síꞌ. Ni̱ ga̱ꞌue na̱taꞌ ango jnánj néꞌ u̱n sin huin ruhua nuguanꞌ na̱ca daj ga̱ta, ꞌyaj Espíritu Santo nej.

¹¹Ni̱ manꞌan Espíritu Santo ꞌyaj sisi̱ gu̱nucuaj go̱ꞌngo ni jnánj néꞌ gui̱ꞌyaj sun néꞌ sun nicaj néꞌ. Sani̱ hua ni̱ni si riqui Espíritu Santo rian da go̱ꞌngo néꞌ. Daj si riqui sij rian néꞌ da̱j rúnꞌ huin ruhua manꞌan sij.

¹²Ni̱ nu̱nj si gaꞌi̱ nnee̱ cúj ꞌngo̱ tsínj nicaj dugüiꞌ, sani̱ urin nnee̱ cúj sij huin. Ni̱ da̱j rúnꞌ nnee̱ cúj ꞌngo̱ tsínj daj, ni̱ hué daj huin daranꞌ néꞌ huin néꞌ ni ngüi̱ nicoꞌ Cristo. Ni̱ huin néꞌ urin ngüi̱. ¹³Ni̱ ngaa gataꞌ nnee̱ néꞌ, ni̱ guiꞌyaj Espíritu Santo sisi̱ ga̱huin daranꞌ néꞌ urin nnee̱ cúj Cristo. Ni̱ daꞌaj néꞌ huin ni ngüi̱ israelita. Ni̱ ango daꞌaj néꞌ huin ni ngüi̱ ꞌna̱ꞌ anéj chrej. Ni̱ ángo daꞌaj néꞌ huin ni ngüi̱ ꞌyaj sun yu̱n rian xuruꞌue. Ni̱ ángo daꞌaj néꞌ huin ni ngüi̱ nitaj si ꞌyaj sun yu̱n nej. Ni̱ nne Espíritu Santo chruhua niman daranꞌ néꞌ, guiꞌyaj Yanꞌanj.

¹⁴Ni̱ sé urin rasu̱n huin nnee̱ cúj ꞌngo̱ tsínj daj. Sani̱ gaꞌi̱ nnee̱ cúj sij huin. ¹⁵Gui̱ꞌyóꞌ cuenta sisi̱ ga̱ꞌue ga̱ꞌmi dacóꞌ. Ni̱ ga̱taj-áꞌ gu̱nun nnee̱ cúꞌ: “Xiꞌí si sé raꞌá re̱ꞌ huīnj, ni̱ nitaj si nicaj dugüiꞌīj nga̱ re̱ꞌ mánj.” Daj ga̱taj dacóꞌ si ruhuaj. Ni̱ nu̱nj si hué daj ga̱taj dacóꞌ, sani̱ hué gue̱ nicaj dugüiꞌ dacóꞌ nga̱ nnee̱ cúꞌ. ¹⁶Ni̱ hué ducuánj daj huin sisi̱ ga̱taj chraquíꞌ gu̱nun nnee̱ cúꞌ: “Xiꞌí si sé rundij rián re̱ꞌ huīnj, ni̱ nitaj si nicaj dugüiꞌīj nga̱ re̱ꞌ mánj.” Sisi̱ hué daj ga̱taj chraquíꞌ, sani̱ hua gue̱ nicaj dugüiꞌ chraquíꞌ nga̱ nnee̱ cúꞌ. ¹⁷Ni̱ sisi̱ daranꞌ nnee̱ cúꞌ huin rundij riúnꞌ, ni̱ si̱ gaꞌue gu̱nunꞌ nuguanꞌ mánj. Ni̱ sisi̱ daranꞌ nnee̱ cúꞌ huin chraquíꞌ, ni̱ si̱ gaꞌue gu̱chrúnꞌ mánj.

¹⁸Ni̱ da̱j rúnꞌ garanꞌ ruhua Yanꞌanj, ni̱ hué daj guiꞌyaj go̱ꞌngo nnee̱ cúꞌ. Ni̱ riqui Yanꞌanj da̱j gui̱ꞌyaj go̱ꞌngo nnee̱ cúꞌ. ¹⁹Ni̱ sisi̱ uyan ga̱ daranꞌ nnee̱ cúj néꞌ, ni̱ sé ngüi̱ huin néꞌ mánj. ²⁰Xa̱ngaꞌ ni̱ gaꞌi̱ nnee̱ cúj néꞌ nicaj dugüiꞌ, sani̱ urin nnee̱ cúj néꞌ hua nánj. ²¹Nitaj si ataj rundij riúnꞌ gu̱nun raꞌa néꞌ: “Nitaj si huín re̱ꞌ riānj mánj.” Sé daj aꞌmi rundij riúnꞌ mánj. Ni̱ nitaj si ataj chra̱ néꞌ gu̱nun dacóꞌ: “Nitaj si huín re̱ꞌ riānj mánj.” Sé daj aꞌmi chra̱ néꞌ mánj.

²²Ni̱ ani ruhua néꞌ sisi̱ ni̱naj ꞌngo̱ nnee̱ cúj néꞌ si ruhuaj. Sani̱ hua yya sisi̱ níꞌyanj ni̱nꞌ ruhua nnee̱ cúj néꞌ daj. ²³Ni̱ ani ruhua néꞌ sisi̱ nitaj si níꞌyanj nico ꞌngo̱ nnee̱ cúj néꞌ. Xiꞌí daj ni̱ nique sa̱ꞌ néꞌ ꞌyaj néꞌ. Ni̱ naránj sa̱ꞌ néꞌ atsij rian hua na̱ꞌaj nnee̱ cúj néꞌ. ²⁴Ni̱ sé daj ꞌyaj néꞌ nga̱ ango nnee̱ cúj néꞌ. Daj si nitaj si na̱ꞌaj néꞌ ꞌyaj ango nnee̱ cúj néꞌ daj. Sani̱ garúnj Yanꞌanj sisi̱ hué daj ga̱ nnee̱ cúj néꞌ. Ni̱ ani ruhua néꞌ sisi̱ nitaj si níꞌyanj nico ꞌngo̱ nnee̱ cúj néꞌ. Sani̱ Yanꞌanj huin ruhua sisi̱ du̱gumi sa̱ꞌ néꞌ nnee̱ cúj néꞌ daj. ²⁵Ni̱ naꞌuej ruhua Yanꞌanj si gu̱nunꞌ ni du̱güiꞌ nnee̱ cúj néꞌ. Sani̱ huin ruhua Yanꞌanj si na̱huij ruhua ꞌngo̱ nnee̱ cúj néꞌ nga̱ nnee̱ cúj ango néꞌ. ²⁶Ni̱ sisi̱ gui̱ranꞌ xi̱ꞌi ꞌngo̱ nnee̱ cúj néꞌ, ni̱ nani ruhua ni̱nꞌ nnee̱ cúj néꞌ. Ni̱ sisi̱ aꞌmi sa̱ꞌ ni ngüi̱ xiꞌí ꞌngo̱ nnee̱ cúj néꞌ, ni̱ huin nia̱ꞌ ruhua ni̱nꞌ nnee̱ cúj néꞌ.

²⁷Hué nnee̱ cúj Cristo huin ín re̱ꞌ. Ni̱ da go̱ꞌngo ni é re̱ꞌ huin nnee̱ cúj sij nej. ²⁸Ni̱ guneꞌ Yanꞌanj go̱ꞌngo néꞌ gui̱ꞌyaj sun néꞌ rian daranꞌ ni ngüi̱ nicoꞌ Yanꞌanj. Ni̱ guiꞌyaj Yanꞌanj sisi̱ gui̱niquinꞌ sini ni apóstol ni tsínj nataꞌ si-nu̱guanꞌ Yanꞌanj rian daranꞌ ni ngüi̱. Ngaa ni̱ ango néꞌ huin ni tsínj aꞌuiꞌ nuguanꞌ riqui Yanꞌanj rian ni sij. Ni̱ ángo néꞌ huin ni tsínj digyán si-nu̱guanꞌ Yanꞌanj rian ni ngüi̱. Ni̱ ángo néꞌ huin ni tsínj ꞌyaj si sa̱ꞌ ꞌna̱ꞌ xataꞌ. Ni̱ ángo néꞌ huin ni tsínj ꞌyaj si na̱huin ni ngüi̱ aꞌnanꞌ. Ni̱ ángo néꞌ huin ni tsínj chracuij dugüiꞌ ni sij. Ni̱ ángo néꞌ huin ni tsínj nicaj sun scanij néꞌ. Ni̱ ángo néꞌ huin ni tsínj aꞌmi snanꞌanj na̱ca huin snanꞌanj nun niꞌi ni sij.

²⁹Ni̱ sé daranꞌ néꞌ huin apóstol tsínj nataꞌ si-nu̱guanꞌ Yanꞌanj rian ni ngüi̱. Ni̱ sé daranꞌ néꞌ huin tsínj nataꞌ nuguanꞌ aꞌuiꞌ Yanꞌanj rian ni síꞌ. Ni̱ sé daranꞌ néꞌ huin tsínj digyán si-nu̱guanꞌ Yanꞌanj. Ni̱ sé daranꞌ néꞌ huin tsínj ꞌyaj si sa̱ꞌ ꞌna̱ꞌ xataꞌ mánj. ³⁰Ni̱ sé daranꞌ néꞌ huin nucuaj gui̱ꞌyaj ga̱nahuin ni ngüi̱ aꞌnanꞌ. Ni̱ si̱ gaꞌue ga̱ꞌmi daranꞌ néꞌ ango snanꞌanj na̱ca huin snanꞌanj nun niꞌi néꞌ. Ni̱ sé daranꞌ néꞌ ga̱ꞌue na̱taꞌ u̱n sin huin ruhua snanꞌanj daj ga̱ta. ³¹Ngaa ni̱ du̱guꞌnuꞌ a ni é re̱ꞌ sisi̱ gui̱nicaj a ni é re̱ꞌ ni sun sa̱ꞌ doj ri̱qui Espíritu Santo rian án re̱ꞌ. Sani̱ huin ruhuāj di̱gyānj ꞌngo̱ chrej sa̱ꞌ doj rian án re̱ꞌ.

La preeminencia del amor

¹Ni̱ sisi̱ ga̱ꞌue ga̱ꞌmī snanꞌanj aꞌmi ni ngüi̱ nga̱ snanꞌanj aꞌmi ni ángel, sani̱ sisi̱ nitaj si ꞌi̱ ruhuāj niꞌyā ni dugüiꞌīj, ni̱ maan si huīnj da̱j rúnꞌ huin ꞌngo̱ yánꞌanj ngaa duguasi̱n sij, asi̱ ꞌngo̱ gagaꞌ gasi̱n aganꞌ ni sij huīnj nej. ²Ni̱ ga̱ꞌue si ga̱ꞌmī nuguanꞌ riqui Yanꞌanj riānj gu̱nun ni ngüi̱. Ni̱ ga̱ꞌue sisi̱ niꞌīnj daranꞌ ni nuguanꞌ digyán Yanꞌanj rian ni ngüi̱. Ni̱ ga̱ꞌue sisi̱ niꞌi sa̱ꞌāj daranꞌ nuguanꞌ. Ni̱ ga̱ꞌue sisi̱ gu̱xuman sa̱ꞌ ruhuāj niꞌyā Yanꞌanj. Ni̱ gahuin nucuaj nadunāj rian niquinꞌ ꞌngo̱ quij xa̱can xiꞌí si xuman sa̱ꞌ ruhuāj niꞌīnj Yanꞌanj. Sani̱ sisi̱ nitaj si ꞌi̱ ruhuāj niꞌyā ni dugüiꞌīj, ni̱ nitaj nu̱nj huīnj mánj. ³Ni̱ ga̱ꞌue sisi̱ gu̱raꞌ daꞌāj daranꞌ si nicā ga̱ꞌuīj rian ni ngüi̱ niqui. Ni̱ ga̱ꞌue sisi̱ na̱gaꞌuīj nnee̱ cū sisi̱ ga̱ri yanꞌa̱n ni sij ga̱ca. Sani̱ sisi̱ nitaj si ꞌi̱ ruhuāj niꞌyā ni dugüiꞌīj, ni̱ nitaj si ga̱hui sa̱ꞌ manꞌānj mánj.

⁴Nitaj si ráꞌyanj ruhua tsínj ꞌi̱ ruhua niꞌyaj sij dugüiꞌ sij. Ni̱ ꞌyaj sa̱ꞌ sij nga̱ ni dugüiꞌ sij nej. Ni̱ nitaj si huin xicoj ruhua sij niꞌyaj sij ni dugüiꞌ sij. Ni̱ nitaj si aꞌmi xa̱can sij. Ni̱ nitaj si nne̱ sij nej. ⁵Ni̱ nitaj si aꞌmi quij sij rian dugüiꞌ sij. Ni̱ nitaj si huin yanꞌanj ruhua sij rian dugüiꞌ sij. Ni̱ nitaj si chranꞌ sij dugüiꞌ sij. Ni̱ nitaj si ꞌyaj sij gunun sij nuguanꞌ quij aꞌmi ni dugüiꞌ sij. ⁶Ni̱ nitaj si numan ruhua sij ngaa ꞌyaj ni dugüiꞌ sij gaquinꞌ. Sani̱ huin nia̱ꞌ ruhua sij niꞌi sij sisi̱ unun ni ngüi̱ nuguanꞌ xa̱ngaꞌ. ⁷Ni̱ huin nucuaj sij ranꞌ sij daranꞌ sayun. Ni̱ xuman ruhua sij sisi̱ gui̱ꞌyaj sa̱ꞌ ni dugüiꞌ sij. Ni̱ anaꞌuij sij sisi̱ ga̱huin sa̱ꞌ daranꞌanj. Ni̱ daranꞌ ni nuguanꞌ aꞌninꞌ ruhua tsínj ꞌi̱ ruhua niꞌyaj sij dugüiꞌ sij.

⁸Nitaj a̱man ga̱nahuij si ga̱huin ꞌi̱ ruhua néꞌ ni̱ꞌyaj néꞌ ni dugüiꞌ néꞌ. Hua ꞌngo̱ güi, ni̱ si̱ gaꞌmi ni tsínj nuguanꞌ aꞌuiꞌ Yanꞌanj rian ni sij. Ni̱ ni tsínj aꞌmi ni snanꞌanj na̱ca huin snanꞌanj nun niꞌi ni ngüi̱, ni̱ hua ꞌngo̱ güi, ni̱ si̱ gaꞌmi ni sij ga̱ mánj. Ni̱ ni tsínj niꞌi sa̱ꞌ daranꞌ nuguanꞌ, ni̱ hua ꞌngo̱ güi, ni̱ si̱ gaꞌmi ni sij nuguanꞌ da mánj. ⁹Yya̱j ni̱ nun niꞌi sa̱ꞌ néꞌ da̱j hua ni nuguanꞌ. Ni̱ achin si ga̱ꞌmi sa̱ꞌ néꞌ nuguanꞌ aꞌuiꞌ Yanꞌanj rian néꞌ. ¹⁰Sani̱ ngaa ga̱nahuin sa̱ꞌ daranꞌ nuguanꞌ ango xungüi̱ ga̱ꞌnaꞌ, ni̱ ꞌngo̱ gui̱niꞌi néꞌ daranꞌ nuguanꞌ achin gunun néꞌ xungüi̱ nan.

¹¹Ni̱ ngaa hua lī, ni̱ gaꞌmī da̱j rúnꞌ aꞌmi ꞌngo̱ tsinꞌ. Ni̱ gani ruhuāj da̱j rúnꞌ ani ruhua ꞌngo̱ tsinꞌ nej. Ni̱ gunūnj da̱j rúnꞌ unun ꞌngo̱ tsinꞌ. Sani̱ ngaa gachī, ni̱ duna rucūj daranꞌ si guiꞌyā ngaa ga lī. ¹²Yya̱j ni̱ naꞌue gu̱nun sa̱ꞌ néꞌ ni nuguanꞌ. Ni̱ niꞌyaj néꞌ ni nuguanꞌ sisi̱ da̱j rúnꞌ ꞌyaj néꞌ ngaa ni̱ꞌyaj néꞌ rian ꞌngo̱ nnee guꞌndiꞌ ngaa naꞌue gui̱xiguin sa̱ꞌāj gui̱niꞌyaj néꞌ rian néꞌ. Daꞌngaꞌ daj huin ni nuguanꞌ yya̱j. Sani̱ hua ꞌngo̱ güi, ni̱ gui̱niꞌi sa̱ꞌ néꞌ Yanꞌanj. Yya̱j ni̱ nun niꞌi sa̱ꞌ manꞌānj. Sani̱ hua ꞌngo̱ güi, ni̱ gui̱niꞌīnj daranꞌanj da̱j rúnꞌ niꞌi Yanꞌanj manꞌānj. ¹³Ni̱ hua hua̱ꞌnij nuguanꞌ sisi̱ nitaj a̱man ga̱nahuij mánj. Ni̱ ꞌngo̱j huin si gu̱xuman ruhua néꞌ ni̱ꞌyaj néꞌ Yanꞌanj. Ni̱ ango nuguanꞌ huin sisi̱ ga̱naꞌuij néꞌ si gui̱ꞌyaj sa̱ꞌ Yanꞌanj nga̱ néꞌ. Ni̱ ángo nuguanꞌ huin sisi̱ ga̱ ꞌi̱ ruhua néꞌ ni̱ꞌyaj néꞌ ni dugüiꞌ néꞌ. Sani̱ nuguanꞌ nico doj huin sisi̱ ga̱ ꞌi̱ ruhua néꞌ ni̱ꞌyaj néꞌ ni dugüiꞌ néꞌ.

El hablar en lenguas

¹Hué dan ni̱ ꞌngo̱ ga̱ ꞌi̱ ruhua á re̱ꞌ ni̱ꞌyaj á re̱ꞌ ni dugüiꞌ a ni é re̱ꞌ. Ni̱ na̱noꞌ a ni é re̱ꞌ sisi̱ ri̱qui Espíritu Santo sun sa̱ꞌ rian án re̱ꞌ. Sani̱ sa̱ꞌ doj huin si ga̱huin ruhua á re̱ꞌ ga̱ꞌmi a ni é re̱ꞌ nuguanꞌ di̱gyán Yanꞌanj rian án re̱ꞌ. ²Tsínj aꞌmi snanꞌanj na̱ca daj, ni̱ aꞌmi sij rian Yanꞌanj. Ni̱ sé rian ni ngüi̱ aꞌmi sij mánj. Daj si naꞌue ga̱ra daꞌngaꞌ ruhua ni ngüi̱ nga̱ nuguanꞌ aꞌmi sij. Ni̱ nuguanꞌ sa̱ꞌ aꞌmi sij daj ꞌna̱ꞌ rian Espíritu Santo. Sani̱ naꞌue gu̱nun ni ngüi̱ nuguanꞌ hui̱ daj. ³Sani̱ tsínj aꞌmi nuguanꞌ aꞌuiꞌ Yanꞌanj rian sij, ni̱ aꞌmi sij rian ni ngüi̱. Ni̱ ꞌyaj sij sisi̱ gui̱nicoꞌ sa̱ꞌ ni ngüi̱ si-nu̱guanꞌ Yanꞌanj. Ni̱ ꞌyaj sij sisi̱ gu̱xuman sa̱ꞌ ruhua ni sij ni̱ꞌyaj ni sij Yanꞌanj. Ni̱ ga̱huin nia̱ꞌ doj ruhua ni sij, ꞌyaj sij nej. ⁴Tsínj aꞌmi snanꞌanj na̱ca daj, ni̱ urin manꞌan sij nicoꞌ sa̱ꞌ doj Yanꞌanj, ꞌyaj sij. Sani̱ tsínj aꞌmi nuguanꞌ aꞌuiꞌ Yanꞌanj rian síꞌ, ni̱ sa̱ꞌ doj nicoꞌ daranꞌ ni tsínj xuman ruhua niꞌyaj Yanꞌanj, ꞌyaj síꞌ. ⁵Ni̱ huin ruhuāj sisi̱ ga̱ꞌmi daranꞌ ni é re̱ꞌ snanꞌanj na̱ca. Sani̱ sa̱ꞌ doj huin sisi̱ ga̱ꞌmi ni é re̱ꞌ nuguanꞌ aꞌuiꞌ Yanꞌanj rian án re̱ꞌ. Daj si huin achij ꞌngo̱ tsínj aꞌmi nuguanꞌ gaꞌuiꞌ Yanꞌanj rian sij daj nga̱ ango tsínj aꞌmi ꞌngo̱ snanꞌanj na̱ca. Sani̱ huin achij tsínj aꞌmi snanꞌanj na̱ca daj sisi̱ na̱taꞌ ango tsínj u̱n sin huin ruhua snanꞌanj daj ga̱ta. Ngaa ni̱ sa̱ꞌ doj nicoꞌ ni ngüi̱ xuman ruhua niꞌyaj Yanꞌanj, ꞌyaj sij.

⁶Hué dan ni̱ sisi̱ gui̱sī rian ma̱n án re̱ꞌ huin ín re̱ꞌ jnān nga̱ xicaꞌuī, ni̱ gu̱nun a ni é re̱ꞌ sisi̱ ni̱nanj snanꞌanj na̱ca ga̱ꞌmī rian án re̱ꞌ, ruhua á re̱ꞌ níꞌ. Nitaj mánj. Sani̱ sisi̱ digyānj ꞌngo̱ nuguanꞌ gaꞌmi Yanꞌanj riānj rian án re̱ꞌ, ni̱ gu̱nun a ni é re̱ꞌ nuguanꞌ daj. Ni̱ gu̱nun a ni é re̱ꞌ sisi̱ ga̱ꞌmī ꞌngo̱ nuguanꞌ chru̱n, asi̱ ꞌngo̱ nuguanꞌ aꞌuiꞌ Yanꞌanj riānj, asi̱ ꞌngo̱ nuguanꞌ digyānj rian án re̱ꞌ. ⁷Niꞌi néꞌ sisi̱ nitaj si hua ni̱ꞌnaꞌ yánꞌanj nga̱ ria̱. Ngaa ni̱ gui̱ꞌyóꞌ cuenta sisi̱ nitaj si na̱duna nane̱ ngaa aráj sij yánꞌanj nga̱ ria̱ nej, ni̱ naꞌue ga̱ra daꞌngaꞌ ruhua néꞌ da̱j hua chraꞌ aráj sij mánj. ⁸Ni̱ sisi̱ naꞌue ga̱ꞌyanj sa̱ꞌ ꞌngo̱ snado corneta, ngaa ni̱ asa̱ꞌ ga̱ꞌue ga̱huin yoo̱ ni snado ga̱nꞌanj gu̱nunꞌ ni sij rian huin sayun únj. ⁹Ni̱ hué daj ꞌya nga̱ ni é re̱ꞌ. Ni̱ sisi̱ nun gaꞌmi ni é re̱ꞌ nuguanꞌ ga̱ꞌue gu̱nun ni ngüi̱, ni̱ asa̱ꞌ ga̱ꞌue ga̱ra daꞌngaꞌ ruhua ni sij nga̱ si aꞌmí re̱ꞌ únj. Maan si aꞌmí re̱ꞌ rian nane̱, ꞌyáj re̱ꞌ, ruhuāj aj.

¹⁰Xa̱ngaꞌ ni̱ gaꞌi̱ nico rian snanꞌanj aꞌmi ni ngüi̱ ma̱n chruhua xungüi̱ nan. Ni̱ xa̱ngaꞌ, ni̱ hua ngüi̱ unun si huin ruhua daranꞌ ni snanꞌanj daj ga̱ta. ¹¹Sani̱ sisi̱ nunūnj snanꞌanj aꞌmi ꞌngo̱ ni sij, ngaa ni̱ ga̱ni ruhua sij sisi̱ huīnj ꞌngo̱ tsínj ꞌna̱ꞌ ango xumanꞌ. Ni̱ ga̱ni ruhua manꞌānj sisi̱ tsínj daj huin ꞌngo̱ tsínj ꞌna̱ꞌ ango xumanꞌ nej.

¹²Ni̱ hué daj ꞌya nga̱ á re̱ꞌ. Huin ruhua á re̱ꞌ sisi̱ ri̱qui Espíritu Santo sun rian án re̱ꞌ. Ngaa ni̱ na̱naꞌuiꞌ a ni é re̱ꞌ sisi̱ na̱huin raꞌa á re̱ꞌ ni sun gui̱ꞌyaj sisi̱ chra̱cuij ni ngüi̱ nicoꞌ Yanꞌanj. ¹³Hué dan ni̱ tsínj aꞌmi snanꞌanj na̱ca, ꞌyaj Espíritu Santo, ni̱ hua nia̱n si ga̱chinj jniꞌyaj sij rian Yanꞌanj sisi̱ ga̱ꞌue na̱taꞌ sij u̱n sin huin ruhua nuguanꞌ daj ga̱ta rian ni ngüi̱ unun si aꞌmi sij. ¹⁴Ni̱ sisi̱ ga̱chinj jniꞌyā ꞌngo̱ snanꞌanj na̱ca rian Yanꞌanj, ni̱ maan ni̱nanj nimānj huin si achínj jniꞌyaj rian Yanꞌanj. Sani̱ naꞌue ga̱ra daꞌngaꞌ ruhuāj nga̱ snanꞌanj aꞌmī nánj. ¹⁵Ngaa ni̱ u̱n sin huin gui̱ꞌyā únj. Ga̱chinj jniꞌyā rian Yanꞌanj nga̱ nimānj. Ni̱ ga̱chinj jniꞌyā rian Yanꞌanj nga̱ cúj chraj nej. Ni̱ ga̱rā chraꞌ rian Yanꞌanj nga̱ nimānj. Ni̱ ga̱rā chraꞌ rian Yanꞌanj nga̱ cúj chraj nej. ¹⁶Daj si ngaa aꞌmi sa̱ꞌ re̱ꞌ rian Yanꞌanj nga̱ urin nimán re̱ꞌ, ni̱ asa̱ꞌ ga̱ꞌue gu̱nun ango tsínj ꞌna̱ꞌ na̱ca si aꞌmí re̱ꞌ únj. Ni̱ ngaa aꞌuíꞌ re̱ꞌ si guruhua Yanꞌanj, ni̱ asa̱ꞌ ga̱ꞌue ga̱taj sij sisi̱ hua yya nuguanꞌ gaꞌmí re̱ꞌ únj. Daj si naꞌue gu̱nun sij si aꞌmí re̱ꞌ mánj. ¹⁷Ga̱ꞌue si hua ꞌueé nuguanꞌ gaꞌmí re̱ꞌ ngaa hué daj gaꞌuíꞌ re̱ꞌ si guruhua Yanꞌanj. Sani̱ nun gahuin nucuaj niman ango tsínj daj, guiꞌyáj re̱ꞌ mánj.

¹⁸Aꞌuīj si guruhua Yanꞌanj xiꞌí si aꞌue aꞌmī snanꞌanj na̱ca ꞌna̱ꞌ rian Espíritu Santo daj nga̱ si aꞌmi daranꞌ ni é re̱ꞌ. ¹⁹Sani̱ ngaa na̱huin yuꞌ néꞌ, ni̱ huin ruhuāj ga̱ꞌmī u̱nꞌunꞌ gue̱ nuguanꞌ ga̱ꞌue gu̱nun néꞌ daj nga̱ ichiꞌ mí nuguanꞌ naꞌue gu̱nun néꞌ. Daj si huin ruhuāj di̱gyānj nuguanꞌ ga̱ꞌue gu̱nun a ni é re̱ꞌ aj.

²⁰Ga̱ si̱caꞌ chra̱ á re̱ꞌ, ni̱ si̱ gani ruhua á re̱ꞌ da̱j rúnꞌ ani ruhua ni tsinꞌ. Ni̱ da̱j rúnꞌ ꞌyaj ꞌngo̱ tsinꞌ ngaa nun gahuin chrunj gui̱ꞌya ni nuguanꞌ quij hua, ni̱ hué daj gui̱ꞌyaj á re̱ꞌ nej. Sani̱ ga̱ni ruhua á re̱ꞌ da̱j rúnꞌ ani ruhua ni tsínj achij. ²¹Ni̱ gataj si-ley Yanꞌanj: “Ga̱ꞌnaꞌ ni tsínj ma̱n ga̱nꞌ gui̱sij ni sij rian ma̱n ni ngüi̱ israelita, gui̱ꞌyā. Ni̱ ga̱nataꞌ ni sij ango snanꞌanj rian ni síꞌ. Sani̱ hua gue̱ si̱ gunun ni sij si-nu̱guanꞌānj.” Daj gataj Yanꞌanj rian ni tsínj israelita asi̱j ná. ²²Hué dan ni̱ ngaa aꞌmi néꞌ snanꞌanj na̱ca ꞌna̱ꞌ rian Espíritu Santo huin snanꞌanj nunun néꞌ, ni̱ hué ni nuguanꞌ daj huin ꞌngo̱ daꞌngaꞌ rian ni tsínj nun xu̱man ruhua ni̱ꞌyaj Yanꞌanj. Ni̱ sé güenda ni ngüi̱ xuman ruhua niꞌyaj Yanꞌanj huin mánj. Sani̱ ngaa aꞌmi néꞌ nuguanꞌ aꞌuiꞌ Yanꞌanj rian néꞌ, ni̱ hué nuguanꞌ daj huin ꞌngo̱ daꞌngaꞌ rian néꞌ huin néꞌ tsínj xuman ruhua niꞌyaj Yanꞌanj. Ni̱ sé rian ni ngüi̱ nun xu̱man ruhua huin mánj.

²³Gui̱ꞌyóꞌ cuenta sisi̱ nahuin yuꞌ daranꞌ a ni é re̱ꞌ aꞌmi daranꞌ a ni é re̱ꞌ snanꞌanj na̱ca, ni̱ atuj ni tsínj nun niꞌi si ꞌyaj a ni é re̱ꞌ, asi̱ ni tsínj nun xu̱man ruhua ni̱ꞌyaj Yanꞌanj. Ngaa ni̱ ga̱taj síꞌ sisi̱ sinúnj ni é re̱ꞌ aj. ²⁴Sani̱ sisi̱ aꞌmi daranꞌ a ni é re̱ꞌ nuguanꞌ aꞌuiꞌ Yanꞌanj rian án re̱ꞌ, ni̱ atuj ꞌngo̱ tsínj nun xu̱man ruhua ni̱ꞌyaj Yanꞌanj, asi̱ ꞌngo̱ tsínj nun niꞌi si ꞌyaj á re̱ꞌ, ni xa̱caj síꞌ cuenta sisi̱ daꞌui síꞌ gaquinꞌ, gui̱ꞌyaj a ni é re̱ꞌ. Ngaa ni̱ ga̱nani ruhua síꞌ, gui̱ꞌyaj nuguanꞌ aꞌmi a ni é re̱ꞌ, ruhuāj aj. ²⁵Hué dan ni̱ gui̱ꞌyaj Yanꞌanj sisi̱ gui̱niꞌi tsínj daj ni nuguanꞌ gari hui̱ sij chruhua niman sij. Ni̱ ga̱niquinꞌ ráj da̱coj sij. Ni̱ ga̱ꞌmi sa̱ꞌ sij rian Yanꞌanj. Ni̱ ga̱taj sij sisi̱ hua yya nne Yanꞌanj scanij a ni é re̱ꞌ.

²⁶Hué dan ni̱ ngaa na̱huin yuꞌ a ni é re̱ꞌ huin ín re̱ꞌ jnān nga̱ xicaꞌuī, ni̱ ga̱ꞌue ga̱ra go̱ꞌngo ni é re̱ꞌ chraꞌ rian Yanꞌanj, asi̱ ga̱ꞌue di̱gyán ango ni é re̱ꞌ nuguanꞌ aꞌuiꞌ Yanꞌanj rian síꞌ, asi̱ na̱taꞌ ángo ni é re̱ꞌ u̱n sin huin ruhuaj snanꞌanj na̱ca daj ga̱ta. Sani̱ gui̱ꞌyaj ni é re̱ꞌ daranꞌanj sisi̱ ga̱ꞌue ga̱huin nucuaj ni é re̱ꞌ nga̱ si-chrej Yanꞌanj, ruhuāj aj.

²⁷Ni̱ ngaa ga̱ꞌmi a ni é re̱ꞌ snanꞌanj na̱ca, ni̱ maan si ga̱ꞌmi hui̱j hua̱ꞌnij ranꞌ ni é re̱ꞌ. Ni̱ ga̱naꞌuij ꞌngo̱ tsínj daj da gui̱sij ga̱ꞌmi duguiꞌ sij. Ni̱ hua nia̱n sisi̱ na̱taꞌ ꞌngo̱ ni é re̱ꞌ u̱n sin huin ruhua nuguanꞌ daj ga̱ta. ²⁸Ni̱ sisi̱ nitaj tsínj ga̱huin nucuaj na̱taꞌ u̱n sin huin ruhua nuguanꞌ daj ga̱ta, ni̱ dínj gui̱niquinꞌ duꞌua tsínj aꞌmi snanꞌanj na̱ca daj. Maan si ga̱ꞌmi sij snanꞌanj na̱ca daj chruhua niman sij gu̱nun Yanꞌanj anj.

²⁹Ni̱ hué ducuánj daj huin sisi̱ ngaa ga̱ꞌmi a ni é re̱ꞌ nuguanꞌ aꞌuiꞌ Yanꞌanj rian án re̱ꞌ, ni̱ maan si ga̱ꞌmi hui̱j hua̱ꞌnij ranꞌ án re̱ꞌ. Ngaa ni̱ gu̱nun sa̱ꞌ ango ni dugüiꞌ a ni é re̱ꞌ sisi̱ xa̱ngaꞌ si-nu̱guanꞌ Yanꞌanj huin si aꞌmi ni sij aj. ³⁰Sani̱ sisi̱ aꞌuiꞌ Yanꞌanj ꞌngo̱ nuguanꞌ sa̱ꞌ rian ango tsínj nne unun nuguanꞌ aꞌuiꞌ Yanꞌanj daj, ni̱ maan si du̱na tsínj aꞌmi daj si ga̱ꞌmi síꞌ. ³¹Hué dan ni̱ ga̱ꞌue na̱duna dugüiꞌ a ni é re̱ꞌ ga̱ꞌmi a ni é re̱ꞌ nuguanꞌ aꞌuiꞌ Yanꞌanj rian án re̱ꞌ. Xiꞌí daj, ni̱ ga̱huin chru̱n daranꞌ a ni é re̱ꞌ. Ni̱ ga̱huin ni̱ca ruhua ni é re̱ꞌ, gui̱ꞌyaj nuguanꞌ da aj. ³²Ni̱ ni tsínj aꞌmi nuguanꞌ aꞌuiꞌ Yanꞌanj rian ni sij, ni̱ nicaj ni manꞌan ni sij sun rian nuguanꞌ aꞌmi ni sij.

^33-34Daj si nitaj si ꞌyaj Yanꞌanj sisi̱ na̱chej ni nuguanꞌ aꞌmi néꞌ. Sani̱ ꞌyaj Yanꞌanj sisi̱ hua ni̱ca daranꞌanj.

Ni̱ da̱j rúnꞌ digyānj rian daranꞌ ni ngüi̱ nicoꞌ Yanꞌanj, ni̱ dínj ga̱huin duꞌua ni yunꞌunj xa̱na ngaa na̱huin yuꞌ a ni é re̱ꞌ. Daj si nitaj permiso hua sisi̱ ga̱ꞌmi ne mánj. Hua nia̱n si da̱gahuin ne. Ni̱ hué daj ataj si-ley Yanꞌanj nej. ³⁵Ni̱ sisi̱ hua nuguanꞌ huin ruhua ne da̱j na̱chinꞌ snanꞌanj ne, ni̱ asi̱j ducuá ne na̱chinꞌ snanꞌanj ne nica̱ ne. Daj si nun hua sa̱ꞌ sisi̱ ga̱ꞌmi ꞌngo̱ yunꞌunj xa̱na ngaa nahuin yuꞌ a ni é re̱ꞌ mánj.

³⁶Ani ruhua á re̱ꞌ sisi̱ gaxi̱ꞌi sini si-nu̱guanꞌ Yanꞌanj nga̱ á re̱ꞌ níꞌ. Sé daj huin mánj. Daj si sé urin ni é re̱ꞌ huin si nahuin raꞌa si-nu̱guanꞌ Yanꞌanj mánj. ³⁷Ni̱ sisi̱ ani ruhua ꞌngo̱ tsínj daj sisi̱ aꞌmi sij nuguanꞌ aꞌuiꞌ Yanꞌanj rian sij, asi̱ ani ruhua sij sisi̱ si-nu̱guanꞌ sij ꞌna̱ꞌ rian Espíritu Santo, sani̱ hua nia̱n si xa̱caj sij cuenta sisi̱ nuguanꞌ arūnj nan huin nuguanꞌ aꞌninꞌ Señor sun riānj anj. ³⁸Ni̱ sisi̱ naꞌue ga̱naniꞌi tsínj daj sisi̱ nuguanꞌ arūnj nan ꞌna̱ꞌ rian Señor, ni̱ si̱ naniꞌi néꞌ si-nu̱guanꞌ sij mánj. ³⁹Xiꞌí daj ni̱ ataj snanꞌān gu̱nun a ni é re̱ꞌ, huin ín re̱ꞌ jnān nga̱ xicaꞌuī, sisi̱ gui̱ꞌyaj fuerza a ni é re̱ꞌ ga̱ꞌmi a ni é re̱ꞌ nuguanꞌ aꞌuiꞌ Yanꞌanj rian án re̱ꞌ aj. Ni̱ si̱ gataj á re̱ꞌ sisi̱ si̱ gaꞌmi ni dugüiꞌ a ni é re̱ꞌ snanꞌanj na̱ca ꞌna̱ꞌ rian Espíritu Santo mánj. ⁴⁰Sani̱ ꞌueé gui̱ꞌyaj á re̱ꞌ daranꞌ si ꞌyaj á re̱ꞌ. Ni̱ gui̱ꞌyaj ni̱ca á re̱ꞌ daranꞌanj nej.

La resurrección de los muertos

¹Yya̱j ni̱ huin ruhuāj sisi̱ na̱nun ruhua á re̱ꞌ si-nu̱guanꞌ Yanꞌanj, huin nuguanꞌ sa̱ꞌ natāj gunun a ni é re̱ꞌ, huin ín re̱ꞌ jnān nga̱ xicaꞌuī. Ni̱ hua ni̱ca ruhua á re̱ꞌ, guiꞌyaj nuguanꞌ daj. ²Ni̱ hué xiꞌí nuguanꞌ daj, ni̱ na̱caj Yanꞌanj a ni é re̱ꞌ, sisi̱ ga̱ ni̱ca ruhua á re̱ꞌ nga̱ nuguanꞌ natāj rian án re̱ꞌ nan. Ni̱ hué daj gui̱ꞌyaj Yanꞌanj sisi̱ gu̱xuman xa̱ngaꞌ ruhua á re̱ꞌ ni̱ꞌyaj á re̱ꞌ nuguanꞌ daj.

³Ni̱ hua sini digyānj rian án re̱ꞌ nuguanꞌ riqui Yanꞌanj riānj, sisi̱ gahuiꞌ Cristo xiꞌí si-ga̱quinꞌ néꞌ da̱j rúnꞌ ataj si-nu̱guanꞌ Yanꞌanj. ⁴Ni̱ gachinꞌ ni sij riqui yoꞌój. Ngaa ni̱ chra̱ hua̱ꞌnij güi, ni̱ ganáꞌnij sij da̱j rúnꞌ ataj si-nu̱guanꞌ Yanꞌanj nej. ⁵Hué dan ni̱ gurugüiꞌ sij rian Pedro. Asíj ni̱ gurugüiꞌ sij rian ni xu̱huij ni tsínj nicoꞌ sij nej.

⁶Ngaa ni̱ gurugüiꞌ ru̱huaꞌ yún sij rian u̱nꞌunꞌ ciento táj doj ranꞌ ni tsínj huin jnánj néꞌ ngaa nahuin yuꞌ ni síꞌ mán síꞌ. Ni̱ hua ni̱ꞌnaꞌ daꞌaj ni sij mán ni sij nga̱ néꞌ. Ni̱ hua go̱ꞌngo ni sij gahuiꞌ. ⁷Ni̱ ngaa gachin doj, ni̱ gurugüiꞌ ru̱huaꞌ yún sij rian tsínj gu̱ꞌnaj Jacobo. Ni̱ hué daj gurugüiꞌ sij rian daranꞌ ni apóstol, huin ni tsínj aꞌmi si-nu̱guanꞌ sij rian ni ngüi̱. ⁸Ni̱ da ru̱cu gurugüiꞌ sij riānj. Ni̱ rúnꞌ huin ꞌngo̱ tsínj nun gaꞌnga sa̱ꞌ huīnj. Daj si nun gu̱xuman sini ruhuāj ni̱ꞌyā Jesús.

⁹Ni̱ huīnj tsínj hua lij scanij ni apóstol huin ni tsínj aꞌmi si-nu̱guanꞌ Jesús. Ni̱ naꞌā si ga̱taj ni sij riānj si huīnj ꞌngo̱ apóstol. Daj si asi̱j sini, ni̱ chranꞌ yunꞌūn ni tsínj nicoꞌ Yanꞌanj. ¹⁰Sani̱ guiꞌyaj Yanꞌanj ꞌngo̱ sinduj riānj. Xiꞌí daj ni̱ huīnj tsínj aꞌmi si-nu̱guanꞌ Yanꞌanj. Ni̱ sé si guiꞌyaj yu̱n Yanꞌanj sinduj riānj. Daj si huaj guiꞌyaj sūnj daj nga̱ daranꞌ ni sij. Sani̱ sé manꞌānj guiꞌyaj mánj. Maan si chracuij Yanꞌanj riānj, ni̱ hué daj guiꞌyā. ¹¹Hué dan ni̱, asi̱ gaꞌmi manꞌānj, asi̱ gaꞌmi ango ni sij, sani̱ nitaj si guiꞌya mánj. Uyan huin si-nu̱guanꞌ ni únj. Ni̱ nuguanꞌ daj guiꞌyaj sisi̱ gu̱xuman ruhua ni é re̱ꞌ ni̱ꞌyaj á re̱ꞌ Jesús.

¹²Ni̱ niꞌi a ni é re̱ꞌ sisi̱ aꞌmi ni únj sisi̱ ganáꞌnij Cristo scanij ni níman. Ngaa ni̱ u̱n sin huin, ni̱ ataj go̱ꞌngo a ni é re̱ꞌ sisi̱ si̱ ganáꞌnij ni niman únj. ¹³Sani̱ sisi̱ si̱ naꞌnij ni níman, ni̱ huin ruhuaj gata sisi̱ nun ganáꞌnij Cristo nej. ¹⁴Ni̱ sisi̱ nun ganáꞌnij Cristo, ni nitaj si níꞌyanj nuguanꞌ gaꞌmi ni únj rian án re̱ꞌ mánj. Ni̱ nitaj si níꞌyanj si xuman ruhua á re̱ꞌ niꞌyaj á re̱ꞌ Cristo mánj. ¹⁵Ni̱ sisi̱ hué daj huin, ni̱ huin ni únj tsínj digyaꞌ yunꞌunj aꞌmi si-nu̱guanꞌ Yanꞌanj. Daj si aꞌmi ni únj sisi̱ ganáꞌnij Cristo scanij ni níman, guiꞌyaj Yanꞌanj. Ni̱ sisi̱ sé si xa̱ngaꞌ ga̱naꞌnij ni níman, ngaa ni̱ sé si xa̱ngaꞌ si ganáꞌnij Cristo, guiꞌyaj Yanꞌanj nej. ¹⁶Ni̱ sisi̱ si̱ naꞌnij ni níman, ni̱ huin ruhuaj gata sisi̱ nun ganáꞌnij Cristo nej. ¹⁷Ni̱ sisi̱ nun ganáꞌnij Cristo, ni̱ nitaj si níꞌyanj si xuman ruhua ni é re̱ꞌ niꞌyaj ni é re̱ꞌ Cristo. Ni̱ hua gue̱ daꞌui a ni é re̱ꞌ gaquinꞌ nej. ¹⁸Ni̱ sisi̱ hué daj huin, ni̱ hué daj ga niꞌya ni ngüi̱ gahuiꞌ, huin ni ngüi̱ guxuman ruhua niꞌyaj Cristo. ¹⁹Ni̱ sisi̱ urin si anaꞌuíꞌ sisi̱ gui̱ꞌyaj sa̱ꞌ Cristo ngo̱ꞌ ngaa múnꞌ xungüi̱ nan, sani̱ niqui nimúnꞌ daj nga̱ daranꞌ ango ni ngüi̱.

²⁰Sani̱ xa̱ngaꞌ yya sisi̱ ganáꞌnij Cristo. Ni̱ gahuin sij tsínj ganáꞌnij sini ya̱n scanij ni níman. ²¹Ni̱ xiꞌí urin tsínj guiꞌyaj, ni̱ ga̱huiꞌ daranꞌ ni ngüi̱. Sani̱ xiꞌí urin ango tsínj guiꞌyaj, ni̱ ga̱naꞌnij ni ngüi̱ aj. ²²Xiꞌí tsínj gu̱ꞌnaj Adán, ni̱ gahuiꞌ daranꞌ ni ngüi̱. Sani̱ nga̱ xiꞌí Cristo, ni̱ ga̱ ni̱ꞌnaꞌ daranꞌ ni ngüi̱ aj.

²³Sani̱ ni̱ni huin ngaa náꞌnij go̱ꞌngo ni níman: Asi̱j sini ganáꞌnij Cristo. Ngaa ni̱ ngaa ga̱ꞌnaꞌ ru̱huaꞌ yún sij, ni̱ ga̱naꞌnij ni ngüi̱ guinicaj dugüiꞌ nga̱ sij. ²⁴Ngaa ni̱ ga̱nahuij daranꞌanj. Hué dan ni̱ ga̱ꞌne Cristo daranꞌ sun nicaj ni ngüi̱. Ni̱ ga̱ꞌne sij daranꞌ sun nicaj ni yanꞌanj huin achij xataꞌ nga̱ chruhua xungüi̱ nej. Ngaa ni̱ na̱gaꞌuiꞌ Cristo daranꞌ si-sun sij rian Yanꞌanj xa̱ngaꞌ, huin chrej néꞌ. ²⁵Ni̱ hua nia̱n si gui̱nicaj sun Cristo da gu̱taꞌ sij dacój sij xiráj daranꞌ si ununꞌ nga̱ sij. ²⁶Hué dan ni̱ gui̱ꞌyaj gana Cristo rian ango xiꞌi̱. Ni̱ xiꞌi̱ daj ꞌyaj sisi̱ ahuiꞌ ni ngüi̱. Ngaa ni̱ gui̱sij ga̱nahuij daranꞌ si ununꞌ nga̱ Cristo.

²⁷Daj si Yanꞌanj guiꞌyaj sisi̱ gu̱taꞌ Cristo dacój sij rian daranꞌanj. Hué daj ataj si-nu̱guanꞌ Yanꞌanj. Ni̱ ngaa ataj Yanꞌanj sisi̱ nicaj sun Cristo rian daranꞌanj, ni̱ hua yya nitaj si nicaj sun Cristo rian manꞌan Yanꞌanj mánj. Daj si hué manꞌan Yanꞌanj guiꞌyaj sisi̱ gui̱nicaj Cristo sun rian daranꞌanj. ²⁸Ni̱ ngaa gui̱nicaj sun Cristo rian daranꞌanj, ni̱ na̱gaꞌuiꞌ sij daranꞌ si-sun sij rian Yanꞌanj. Ni̱ hué sij huin daꞌníj Yanꞌanj. Ni̱ hué Yanꞌanj guiꞌyaj sisi̱ gui̱nicaj Cristo sun rian daranꞌanj. Hué dan ni̱ gui̱nicaj ni̱nꞌ manꞌan Yanꞌanj sun rian daranꞌanj, gui̱ꞌyaj Cristo.

²⁹Ni̱ sisi̱ si̱ naꞌnij ni níman, ni̱ u̱n sin huin ni̱ ataꞌ nnee go̱ꞌngo ni ngüi̱ nga̱ si-xugüi ni níman, ruhua á re̱ꞌ únj. ³⁰Ni̱ u̱n sin huin ni̱ nico̱ꞌ huaj, huaj ni únj rian huin ruhua ni tsínj da̱gahuiꞌ ni sij ni únj, ruhua á re̱ꞌ únj. ³¹Xa̱ngaꞌ ni̱ huin nia̱ꞌ ruhuāj sisi̱ xuman ruhua á re̱ꞌ niꞌyaj á re̱ꞌ Señor Jesucristo, huin ín re̱ꞌ jnúnꞌ nga̱ xicaꞌuíꞌ. Ni̱ hué daj ani yya ruhuāj sisi̱ go̱ꞌngo güi ga̱huīj xiꞌí si-nu̱guanꞌ Yanꞌanj. ³²Ni̱ guiranꞌānj sayun, guiꞌyaj ni tsínj huee ma̱n xumanꞌ Efeso. Ni̱ sisi̱ si̱ naꞌnij ni níman, ni̱ u̱n sin huin gui̱ꞌyaj ganāj xiꞌí ni sayun ranꞌānj, ruhua á re̱ꞌ únj. Ni̱ sisi̱ xa̱ngaꞌ sisi̱ si̱ naꞌnij ni níman, ni̱ maan si gui̱ꞌyaj néꞌ da̱j rúnꞌ ataj go̱ꞌngo ni ngüi̱: “Maan si xo̱ꞌ. Ni̱ maan si go̱ꞌoꞌ si aꞌyoj ga̱huiꞌ”, ataj ni ngüi̱ daj.

³³Si̱ duna á re̱ꞌ sisi̱ di̱gyaꞌ yunꞌunj go̱ꞌngo ni tsínj a ni é re̱ꞌ mánj. Daj si hua yya: “Sisi̱ gui̱nicaj dugüiꞌ néꞌ nga̱ ni tsínj xi̱ꞌi, ni̱ gue̱reꞌ chrej sa̱ꞌ huaj néꞌ”, gui̱ꞌyaj ni sij. ³⁴Na̱nicaj ruhua á re̱ꞌ ꞌngo̱ chrej ni̱ca. Ni̱ si̱ guiꞌyaj á re̱ꞌ gaquinꞌ. Daj si hua go̱ꞌngo ni é re̱ꞌ nun niꞌi Yanꞌanj. Ni̱ ataj snanꞌān nuguanꞌ nan rian án re̱ꞌ sisi̱ gui̱riꞌ a ni é re̱ꞌ si-na̱ꞌaj.

³⁵Ni̱ sisi̱ ruhuaj, ni̱ na̱chinꞌ snanꞌanj ꞌngo̱ a ni é re̱ꞌ: “Da̱j ga̱naꞌnij ni níman, ni̱ da̱j ga̱ nnee̱ cúj ni tsínj ga̱naꞌnij daj”, ga̱taj á re̱ꞌ únj. ³⁶Sani̱ tsínj ni̱ꞌyun huín re̱ꞌ sisi̱ hué daj aꞌmí re̱ꞌ. Ngaa unu̱n néꞌ ꞌngo̱ ca̱n, ni̱ hua nia̱n sisi̱ ga̱huiꞌ ca̱n daj. Ngaa ni̱ xi̱raꞌ coj, gui̱ꞌyaj. Sani̱ sisi̱ nitaj si gue̱reꞌ ca̱n daj riqui yoꞌój, ni̱ naꞌue xi̱raꞌ coj aj.

³⁷Ni̱ sé coj daj unu̱n re̱ꞌ sisi̱ ga̱nij. Sani̱ unu̱n re̱ꞌ manꞌan ca̱n riqui yoꞌój, huin ca̱n strigo, asi̱ ango ni ca̱n unu̱n re̱ꞌ. ³⁸Daꞌ síj ni̱ gui̱ꞌyaj Yanꞌanj sisi̱ da ni̱ni ga̱ go̱ꞌngo ni coj, da̱j rúnꞌ ga̱ranꞌ ruhua Yanꞌanj. Ni̱ da ni̱ni ga̱ go̱ꞌngo ni ca̱n xiraꞌ, ꞌyaj Yanꞌanj nej. ³⁹Ni̱ sé uyan hua daranꞌ ni nnee̱. Ni̱ni hua nnee̱ ni ngüi̱. Ni̱ ni̱ni hua nnee̱ ni xucu. Ni̱ ni̱ni hua nnee̱ ni xataj nga̱ nnee̱ ni xucuaj nej. ⁴⁰Ni̱ hua ꞌueé ni si mán xataꞌ nga̱ ni si mán rian yoꞌój nej. Sani̱ ni̱ni huin ni si mán xataꞌ. Ni̱ ni̱ni huin ni si mán rian yoꞌój nej. ⁴¹Ni̱ ni̱ni xigui̱n güi. Ni̱ ni̱ni xigui̱n yahui̱. Ni̱ ni̱ni xigui̱n yatiꞌ. Ni̱ ni̱ni xigui̱n go̱ꞌngo ni yatiꞌ nej.

⁴²Ni̱ hué daj ga̱huin ngaa ga̱naꞌnij ni níman. Ngaa ga̱chinꞌ ni sij néꞌ, ni̱ huin néꞌ níman gu̱chru. Sani̱ ngaa ga̱naꞌnij néꞌ, ni̱ ga̱huin néꞌ ni tsínj si̱ gaꞌue gu̱chru mánj. ⁴³Ni̱ ga̱chinꞌ ni sij ꞌngo̱ néꞌ, huin néꞌ ꞌngo̱ ni níman nitaj si níꞌyanj. Sani̱ ga̱naꞌnij ru̱huaꞌ yún néꞌ, ga̱nahuin sa̱ꞌ ꞌueé néꞌ. Ni̱ ga̱chinꞌ ni sij ꞌngo̱ níman naꞌue gui̱siquiꞌ, huin néꞌ. Sani̱ ga̱naꞌnij néꞌ, ga̱huin néꞌ ꞌngo̱ ni tsínj nucuaj. ⁴⁴Ni̱ ga̱chinꞌ ni sij néꞌ, huin néꞌ nnee̱. Sani̱ ngaa ga̱naꞌnij néꞌ, ni̱ na̱huin na̱ca nnee̱ cúꞌ. Ni̱ ga̱ne ni̱ganj néꞌ, gui̱ꞌyaj Espíritu Santo. Ni̱ hua nnee̱ cúj néꞌ. Ni̱ ni̱ni ga̱huin néꞌ ngaa ga̱naꞌnij néꞌ, gui̱ꞌyaj Espíritu Santo.

⁴⁵Ni̱ hué daj gataj rian si-nu̱guanꞌ Yanꞌanj: “Hua sini ya̱n Adán gahuin ꞌngo̱ tsínj hua ni̱ꞌnaꞌ, guiꞌyaj Yanꞌanj.” Hué daj gataj si-nu̱guanꞌ Yanꞌanj. Sani̱ gaꞌna̱ꞌ ango Adán. Ni̱ riqui síꞌ sisi̱ ga̱ ni̱ꞌnaꞌ ni̱ganj néꞌ. Ni̱ ango Adán daj huin Cristo. Ni̱ ni̱ni huin nnee̱ cúj Cristo. ⁴⁶Sani̱ hua sini ni̱ ga ni̱ꞌnoꞌ nga̱ nnee̱ cúj néꞌ chruhua xungüi̱ nan. Daꞌ síj da ga̱nahuin na̱ca nnee̱ cúj néꞌ, gui̱ꞌyaj Espíritu Santo. ⁴⁷Tsínj gahuin sini daj guiꞌyaj Yanꞌanj yoꞌój sij, gu̱ꞌnaj sij Adán. Ni̱ gahuin sij yoꞌój. Sani̱ ango tsínj daj huin Cristo gaꞌna̱ꞌ síꞌ xataꞌ. ⁴⁸Ni̱ da̱j rúnꞌ gahuin sini Adán yoꞌój, ni̱ hué daj huin daranꞌ néꞌ yoꞌój nej. Ni̱ da̱j rúnꞌ huin Cristo ꞌngo̱ tsínj gaꞌna̱ꞌ xataꞌ, ni̱ hué daj ga̱huin ni ngüi̱ ga̱ne xataꞌ nga̱ sij nej. ⁴⁹Ni̱ da̱j rúnꞌ gahuin tsínj huin yoꞌój daj, ni̱ hué daj huin néꞌ. Sani̱ da̱j rúnꞌ huin tsínj gaꞌna̱ꞌ xataꞌ, ni̱ hué daj ga̱huin néꞌ.

⁵⁰Ni̱ ataj snanꞌān gu̱nun a ni é re̱ꞌ huin jnúnꞌ nga̱ xicaꞌuíꞌ sisi̱ naꞌue ga̱nꞌanj ga̱ne néꞌ rian nicaj sun Yanꞌanj ngaa hua gue̱ nnee̱ cúj néꞌ, tun néꞌ. Ni̱ si̱ gaꞌue ga̱ne ꞌngo̱ ni si ga̱huiꞌ rian nicaj sun Yanꞌanj. Daj si nitaj si ahuiꞌ ni ngüi̱ mán yuꞌuj da mánj.

⁵¹Sani̱ ga̱taj snanꞌān gu̱nun a ni é re̱ꞌ ꞌngo̱ nuguanꞌ sa̱ꞌ huin ꞌngo̱ nuguanꞌ garij hui̱ Yanꞌanj. Ni̱ nuguanꞌ daj huin: Sé daranꞌ néꞌ ga̱huiꞌ. Sani̱ na̱duna daranꞌ néꞌ, gui̱ꞌyaj Yanꞌanj. ⁵²Ni̱ hora leꞌej ga̱dinꞌ, ni̱ na̱duna néꞌ, gui̱ꞌyaj Yanꞌanj. Ni̱ güi ga̱nahuij xungüi̱, ni̱ urin yu̱n gui̱xingaꞌ gaꞌyanj ángel trompeta. Ni̱ ga̱naꞌnij daranꞌ ni níman, sisi̱ ga̱huin ni sij tsínj si̱ gaꞌue ga̱huiꞌ. Ni̱ na̱duna néꞌ, gui̱ꞌyaj Yanꞌanj.

⁵³Yya̱j ni̱ huin néꞌ tsínj gu̱chru. Sani̱ hua nia̱n sisi̱ ga̱huin néꞌ tsínj naꞌue gu̱chru. Yya̱j ni̱ huin néꞌ tsínj ga̱huiꞌ. Sani̱ hua nia̱n sisi̱ ga̱huin néꞌ tsínj naꞌue ga̱huiꞌ. ⁵⁴Hué dan ni̱ huin néꞌ ꞌngo̱ tsínj ga̱huiꞌ. Ni̱ huin néꞌ ꞌngo̱ tsínj gu̱chru nej. Sani̱ hua nia̱n si ga̱huin néꞌ tsínj si̱ gaꞌue ga̱huiꞌ nga̱ tsínj si̱ gaꞌue gu̱chru nej. Ngaa ni̱ ga̱huin yya da̱j rúnꞌ gataj rian si-nu̱guanꞌ Yanꞌanj: “Si̱ gahuiꞌ néꞌ ga̱ mánj. Daj si guiꞌyaj gana néꞌ rian xiꞌi̱ ꞌyaj si ahuiꞌ néꞌ. ⁵⁵Ni̱ nani ruhua néꞌ, ꞌyaj si ahuiꞌ néꞌ. Sani̱ ango xungüi̱ ga̱ꞌnaꞌ, ni̱ si̱ gahuiꞌ néꞌ ga̱ mánj. Daj si guiꞌyaj gana néꞌ rian xiꞌi̱ ꞌyaj si ahuiꞌ néꞌ.” Daj gataj rian si-nu̱guanꞌ Yanꞌanj. ⁵⁶Daꞌui ni ngüi̱ gaquinꞌ. Xiꞌí daj ni̱ nani ruhua ni sij ngaa ahuiꞌ ni sij. Ni̱ si-ley Yanꞌanj ꞌyaj sisi̱ ataj néꞌ gaquinꞌ. ⁵⁷Sani̱ ga̱ꞌuiꞌ néꞌ si guruhua Yanꞌanj. Daj si xiꞌí Señor Jesucristo, ni̱ ga̱ꞌue gui̱ꞌyaj gana néꞌ rian gaquinꞌ daꞌui néꞌ.

⁵⁸Ni̱ ꞌi̱ ruhuāj niꞌyā ni é re̱ꞌ huin ín re̱ꞌ jnánj néꞌ. Ni̱ xiꞌí si gatā gunun a ni é re̱ꞌ, ni̱ ga̱ ni̱ca ruhua á re̱ꞌ nga̱ si-chrej Yanꞌanj. Ni̱ ga̱huin ran niman án re̱ꞌ nga̱ si-nu̱guanꞌ Yanꞌanj nej. Ni̱ gui̱ꞌyaj fuerza ni é re̱ꞌ sisi̱ ni̱ganj gui̱ꞌyaj sun a ni é re̱ꞌ si-sun Señor. Daj si niꞌi ni é re̱ꞌ sisi̱ sé si-sun Señor huin ꞌngo̱ sun yu̱n ngaa ꞌyaj sun ni é re̱ꞌ rian Señor.

La ofrenda para los santos

¹Yya̱j ni̱ ga̱ꞌmī do̱j rian án re̱ꞌ xiꞌí ofrenda aꞌuiꞌ ni é re̱ꞌ rian ni tsínj sa̱ꞌ xuman ruhua niꞌyaj Yanꞌanj. Ni̱ gui̱ꞌyaj á re̱ꞌ da̱j rúnꞌ gataj snanꞌān rian ni tsínj xuman ruhua niꞌyaj Jesús mán estado Galacia. ²Ni̱ go̱ꞌngo güi gudungu, ni̱ ga̱ꞌnij ni̱ni a ni é re̱ꞌ do̱j sanꞌanj ducuá á re̱ꞌ. Ni̱ ga̱ꞌnij sa̱ꞌ ni é re̱ꞌ da̱j rúnꞌ guiꞌyaj gana go̱ꞌngo a ni é re̱ꞌ. Ngaa ni̱ ngaa gui̱sī rian ma̱n án re̱ꞌ, ni̱ nitaj si hua nia̱n si ga̱ꞌnij ni̱ni ni é re̱ꞌ sanꞌanj da mánj. ³Ni̱ ngaa gui̱sī rian ma̱n án re̱ꞌ, ni̱ ga̱ꞌnīj ni tsínj ga̱nꞌanj xumanꞌ Jerusalén, huin ni sij ni tsínj nacui a ni é re̱ꞌ. Ni̱ ga̱ꞌuīj yanj raꞌa ni sij sisi̱ ni̱caj ni sij ofrenda ꞌyaj ni é re̱ꞌ ga̱nꞌanj ni sij ga̱ꞌuiꞌ ni sij raꞌa ni tsínj mán yuꞌuj daj. ⁴Ni̱ sisi̱ hua ꞌngo̱ si xi̱ꞌi ga̱nꞌanj manꞌānj nej, ni̱ ga̱nꞌanj ni sij ngāj.

Planes de Pablo

⁵Ni̱ ngaa ga̱hui ga̱nꞌān, ni̱ hua nia̱n ga̱chīnj estado Macedonia. Ngaa síj ga̱chīnj estado daj, ni̱ gui̱sī xánj án re̱ꞌ. ⁶Si ruhuaj ni̱ gu̱nā go̱ꞌngo ni güi gui̱man néꞌ. Asi̱ si ruhuaj, ni̱ gu̱nā gui̱man néꞌ ni yahui̱ nuhuij. Ngaa ni̱ ga̱ꞌue chra̱cuij ni é re̱ꞌ manꞌānj ngaa ga̱hui ga̱nꞌān ango yuꞌuj. ⁷Nitaj si huin ruhuāj sisi̱ do̱j gue̱ güi gu̱nā gui̱man néꞌ mánj. Sani̱ huin ruhuāj sisi̱ ngaa gui̱sī, ni̱ ga̱huin rānj gui̱man néꞌ sisi̱ hué daj aranꞌ ruhua Señor. ⁸Sani̱ gu̱nā xumanꞌ Efeso daꞌ güi ga̱huin guiꞌyanj Pentecostés, ruhuāj aj. ⁹Ni̱ ducu huin ruhuāj gui̱ꞌyaj súnj si-sun Señor yuꞌuj nan. Daj si huin ruhua ni ngüi̱ gu̱nun ni sij si-nu̱guanꞌ Yanꞌanj. Sani̱ hua nico ni tsínj chranꞌ yunꞌunj manꞌānj.

¹⁰Ni̱ sisi̱ gui̱sij tsínj gu̱ꞌnaj Timoteo rian ma̱n án re̱ꞌ, ni̱ gui̱ꞌyaj ni é re̱ꞌ sisi̱ ga̱huin nia̱ꞌ ruhua sij gu̱na sij gui̱man án re̱ꞌ. Daj si ꞌyaj sun sij si-sun Señor da̱j rúnꞌ ꞌyaj manꞌānj nej. ¹¹Ni̱ si̱ gani ruhua ni̱ a̱ ꞌngo̱ a ni é re̱ꞌ sisi̱ nitaj si níꞌyanj sij mánj. Ni̱ ga̱nꞌanj na̱ꞌnij ni é re̱ꞌ sisi̱ ga̱nꞌanj dinꞌinj sij ga̱ꞌnaꞌ ni̱ꞌyaj sij rian nnēj. Daj si anaꞌuī sisi̱ ga̱ꞌnaꞌ sij nga̱ ango ni jnánj néꞌ.

¹²Ni̱ gachínj jniꞌyā rian jnánj néꞌ Apolos sisi̱ gu̱chiꞌ ni̱ꞌyaj sij nga̱ ango ni jnánj néꞌ rian ma̱n án re̱ꞌ. Sani̱ nun ga̱ꞌuej ruhua sij gu̱chiꞌ sij yya̱j. Sani̱ da güi gui̱xiꞌnij rian sij, ni̱ gu̱chiꞌ sij rian án re̱ꞌ aj.

Salutaciones finales

¹³Du̱gumi a ni é re̱ꞌ manꞌan án re̱ꞌ sisi̱ ga̱ ni̱ca ruhua á re̱ꞌ nga̱ nuguanꞌ xuman ruhua á re̱ꞌ. Ni̱ ga̱huin ran sa̱ꞌ ruhua á re̱ꞌ nga̱ si-nu̱guanꞌ Yanꞌanj nej. Ni̱ gui̱ꞌyaj nucuaj á re̱ꞌ niman án re̱ꞌ nej. ¹⁴Ni̱ nga̱ daranꞌ si ꞌyaj á re̱ꞌ, ni̱ ga̱ ꞌi̱ ruhua á re̱ꞌ ni̱ꞌyaj á re̱ꞌ ni dugüiꞌ a ni é re̱ꞌ.

¹⁵Niꞌi a ni é re̱ꞌ huin jnān nga̱ xicaꞌuī sisi̱ guxuman sini ruhua ni du̱güiꞌ Estéfanas niꞌyaj ni sij Jesús rian daranꞌ ni tsínj mán estado Acaya. Ni̱ chracuij ꞌueé ni sij nga̱ ni tsínj xuman ruhua niꞌyaj Yanꞌanj. ¹⁶Ni̱ huin ruhuāj si gu̱nun sa̱ꞌ ni é re̱ꞌ si-nu̱guanꞌ ni tsínj ꞌyaj sun da̱j rúnꞌ ꞌyaj sun ni du̱güiꞌ Estéfanas. Ni̱ gu̱nun sa̱ꞌ á re̱ꞌ si-nu̱guanꞌ ni tsínj chracuij nga̱ si-sun Yanꞌanj nej. ¹⁷Ni̱ gahuin nia̱ꞌ ruhuāj sisi̱ gaꞌna̱ꞌ hua̱ꞌnij ranꞌ tsínj gu̱ꞌnaj Estéfanas nga̱ Fortunato nga̱ Acaico riānj. Daj si da̱j rúnꞌ mán án re̱ꞌ ngāj, ni̱ hué daj ꞌyaj ni sij. ¹⁸Ni̱ nahuin nia̱ꞌ ruhuāj nga̱ ni é re̱ꞌ, guiꞌyaj ni sij. Ni̱ hua nia̱n si gui̱niꞌi a ni é re̱ꞌ da̱j rúnꞌ ꞌyaj sa̱ꞌ ni sij.

¹⁹Aꞌníj ni ngüi̱ nicoꞌ Yanꞌanj ma̱n estado Asia nuguanꞌ huaj rian án re̱ꞌ. Ni̱ hué daj aꞌníj nu̱ngüej nica̱ tsínj gu̱ꞌnaj Aquila nga̱ Priscila nga̱ daranꞌ ni ngüi̱ nahuin yuꞌ ducuá nu̱ngüej nica̱ sij nuguanꞌ huaj rian án re̱ꞌ nga̱ si-xugüi Señor. ²⁰Ni̱ daranꞌ ni jnánj néꞌ aꞌníj nuguanꞌ huaj rian án re̱ꞌ. Ni̱ xiꞌí Señor, ni̱ ga̱run duꞌua go̱ꞌngo a ni é re̱ꞌ ni dugüiꞌ ni é re̱ꞌ.

²¹Huēj huin Pablo. Ni̱ arūnj letra nan huin ꞌngo̱ nuguanꞌ aꞌnī huaj rian án re̱ꞌ.

²²Ni̱ sisi̱ hua ꞌngo̱ dugüiꞌ a ni é re̱ꞌ nitaj si ꞌi̱ ruhua sij niꞌyaj sij Señor Jesucristo, ni̱ ni̱ganj gui̱ranꞌ sij sayun xa̱ngaꞌ. Ga̱ꞌnaꞌ Señor.

²³Ni̱ huin ruhuāj sisi̱ gui̱ꞌyaj Señor Jesucristo sinduj rian án re̱ꞌ aj. ²⁴Ni̱ ꞌi̱ ruhuāj niꞌyā a ni é re̱ꞌ, guiꞌyaj Cristo Jesús. Amén.