JƆN DEESI

KIN NAA JƆN FUN NA A CHI O DEESI

¹Min waa, Jɔn, la sɔbi tɔn nɔ a nyɛ Koosa tumtumsi ni di mu biksi ba chenani la zi ya lalaga. Koosa funɛ te kpa kin nama maga a sogli a zi kpa a a li gbampulim a nyɛ Yesu Kristo ni. Waa funɛ kpa a a nyɛ mu waa naa ya Yesu tumtum ni. ²Mu funɛ kpa Koosa sɛmau, chenani Yesu Kristo biksi ya o titi wɛ awa kin naa maga mu fun na a nu a sɔbi a dau bar nɔ. ³Ba naa karimi tɔn nɔ a ŋɔ ba dɔŋtim ni awa ba naa nu chenani la zi wa ya ka ba tiŋ mu sɛma, ba tusa zi sɔɔniu kinkan. Saha naa kin nama kaa wa ya duglɛu.

Jɔn Funɛ Sɔbi A Nyɛ Yesu Nitiŋɛ Naa Purige Bunɔpɛ

⁴Min waa, Jɔn, la sɔbi tɔn nɔ bar digi a nyɛ Yesu nitiŋɛ ba naa purige bunɔpɛ a li Azia pulum ni.

Koosa naa funɛ nyɛn a ha vɛɛn nyɛn, o zi nyɛnu. O wa siimsa nɔpɛ a naa nyɛn o suwachak ni a li o tɔhɔn ni, ⁵wa Yesu Kristo naa funɛ biksi ya Koosa wuti ti ka o te lɛli un a li o sou ni ya maga suwachak ni, ba maga zi suŋi mau a kinyɛ ma bara sɔɔna.

Yesu ya koor zen a kaali tɛɛnɛ nɔ maga koorsa. Waa funɛ daŋni ya a kpa o chɛl a chaksi ya tum tagna a li ya bambe ni, ⁶a vɔti ya koorsa a lisi ya di ya ya Koosa dam kɔkɔɔrsa di ya tum tuma a nyɛ o nyan Koosa ni. Yesu kpak jirima awa chaani wa kpok kinkan hali saha naa vɛ kpak bɔ. Ami.

⁷Maa il. O zi wa li dobaala tuhu niu di ba naa nyɛ ba kpa tim a tau o lɔgum hɛna a li o daakakli ti ni chen awa nara maga zi na unu. O wa bur wa, nibin kurgɛ maga zi wiu kinkan. O wa zi vusi. Ami.

⁸Koosa funɛ nyɛn a ha vɛɛn nyɛn, o zi nyɛnu. O waa naa kpak kina maga kpok, ŋɔ, “Mu vɛ kpak piili a nyɛn a vɛ kpak peti.”

Jɔn Fun Na Yesu A Chi O Deesi

⁹Mu waa, Jɔn, ya ma niinbe. Mu wa ma la namsi Yesu daha, amaa o suŋi yau ya di un, chen ni ya zi la zu o koor tiu wuzu digi. Ba fun kpa min a la nyɛ mu nyɛn pulum we naa ba yir Patmɔs ka ni go un. Ba funɛ ya chene, domi mu funɛ mɔɔli Koosa laaboor weri ti a ŋɔ nara wuti naa Yesu fun biksi ya a li gbampulim ni chen wɛ. ¹⁰Aleedi wuzu digi Koosa siim weri ti fun wa si min ni a nyɛ mu na kin bɔnɛ a chi mu deesi. Mu fun nu ta zaŋa a chi kaabul, ¹¹ka o ŋɔ min, “Sɔbi chenani i kaa na a du tɔn ni a nyɛ Yesu nitiŋɛ ba naa nyɛn Ɛfɛsus, Sumana, Pɛgamum, Tiataya, Sardis, Filadɛlfia, awa Laodisia a li Azia pulum ni.”

¹²Mu fun burgi di mu na naa la sɛm chen a na fitinsa bar chiŋe kina nɔpɛ ka ba kpa salmasa a kɔɔri a. ¹³Mu funɛ vɛɛn nau ka Yesu naa la yir o titi nibine be, chiŋi a bambaan ni. O funɛ laari takta ziŋnirɛ a kpa salma gar wi a kirisi o bambi. ¹⁴O nyuha awa o nyuksa funɛ pilimiu kinkan a chi gar pilim ka o se sɛri a chi din a la chɛr nara se. ¹⁵O naŋgere sɛri ti funɛ chi sulminne ba kpa kɔɔri kina a lili kinkan. O ta ti funɛ ku a chi ni bar chuuri kinkan. ¹⁶O funɛ kpak wula nɔpɛwa o nindil ni a kpak chisi nɔsa lɛ o li o nɔ ni. O se funɛ chɛru a chi nha biee. ¹⁷Mu funɛ na un, mu fun chel tɛɛnɛ ni a chi mu siwɛɛ. O fun wa pu min a kpa o nindil a gbaŋsi min a ŋɔ, “Ta ɔmi. Mu vɛ kpak piili a nyɛn a vɛ kpak peti. ¹⁸Mu ya naa nyɛnɛɛ. Mu funɛ sou, amaa lalaknɔ mu zi nyɛnu hali saha naa vɛ kpak bɔ. Min dɔ sou awa ba naa sitɛɛ bar nyɛni. ¹⁹Sɔbi kin nawara i na nan a dau. A bɔnɛ ya zinan kiniwa. Bɔnɛ ka zi wa yau. ²⁰Wula nɔpɛ a naa nyɛn mu nindil ni nan awa fitinsa bar chiŋɛ nɔpɛ ka ba fun kpa salma a kɔɔri a, a muna funɛ sogliu. Lalaknɔ a li gbampulimu mu zi kpa a munau a biksi hin. Wula nɔpɛ ta ya Koosa malaikasa nɔpɛ a naa la nyini Yesu nitiŋɛ ka ba purigi bunɔpɛ a li Azia pulum ni. Fitinsa bar chiŋɛ kina nɔpɛ ta ya Yesu nitiŋɛ ba naa purige bunɔpɛ dooni chen.”

Chenani Yesu Fun Sɛm A Nyɛ Ɛfɛsus Tim Ni

¹“Sɔbi kin nama a la nyɛ naa la nyini Yesu nitiŋɛ ta a li Ɛfɛsus ni. Mu waa naa kpak wula nɔpɛ mu nindil ni a val a go fitinsa bar chiŋɛ nɔpɛ ka ba fun kpa salma a kɔɔri a bambaan ni, ma nu chenani mu kaa ŋɔ ma. ²Mu zim chenani ma bambe duu awa chenani ma kpak un ma bambe ni di ma tum ma tuma wa kanyita ni a ta kuuli. Mu zimu di ma wa kpak wu digi wa ba naa la tum tum tagna ni a zaamsi ba naa ŋɔ di ba ya Koosa wuti nibiksɛwa a na di ba ya nusun timwa. ³Ma di ma namsiu a wa kanyita ni mu daha a vɛ bur mu tiŋi ni, ⁴amaa wu digirɛ ma vɛ seen a yaali. Ma wara daŋni min a chi chenani ma fun te daŋni min chen. ⁵Ma lisi chenani o fun te du a bur kuwa mu wati. Ma vɛ di ma wa zi bur wa, mu zi bur wa ma watiu lalaga a wa zer ma fitin bar chiŋsi a chɔk un. ⁶Ma waa la ha tum tagna a naa Nikolaitan tima tum a chi chenani mu ha a. Chen weru.

⁷“Ma cheŋi ma diŋsa a nu chenani Koosa siim weri ti sɛm a nyɛ Yesu nitiŋɛ ba naa nyɛn Azia pulum ni. Ba naa maga vɛ bur mu tiŋi ni, mu zi nyɛ ba nyinbaanu ba di Koosa mi fali bugil nɔnau. O bi Koosa tɔhɔn naa weri nee. Ba naa maga nyɛn dooni, ba tusa sɔɔnɛu kinkan.”

Chenani Yesu Fun Sɛm A Nyɛ Sumana Tim Ni

⁸“Sɔbi kin nama a la nyɛ naa la nyini Yesu nitiŋɛ ta a li Sumana ni.

“Mu vɛ kpak piili a nyɛn a vɛ kpak peti. Mu funɛ sou, amaa lalaknɔ mu zi nyɛnu hali saha naa vɛ kpak bɔ. ⁹Mu zim chenani ma namsiu kinkan a ya fara tima, amaa ma ta suglɛ di ma funɛ kpa kidamatiwa a chiŋsi a li Koosa tɔhɔn ti ni. Bɔnɛ nyɛn ma ni aa chɔk ma sɔna. Sintana dɔ ba, domi ba ŋɔ di ba ya Ju timwa a vɛ yaali. ¹⁰Ma ta ɔm chenani ma namsi zi wa gbaari. Sintana zi wa nyɛ ba kpak ma bɔnɛu a tɔ dɛ di o zaamsi ma a nyɛ ma namsi kinkan wuzu fi. Ba daŋni ba kpu ma, ma kpak nɛnɛ ka mu zi kpa Koosa mi fali ti a nyɛ ma.

¹¹“Ma cheŋi ma diŋsa a nu chenani Koosa siim weri ti sɛm a nyɛ Yesu nitiŋɛ ba naa nyɛn Azia pulum ni. Ba naa kpak nɛnɛ hali a la tel o bɔ, Koosa wa zi kpa ba a gbaari ba naa o zi wa na ba galimsa a ta ba yɔri.”

Chenani Yesu Fun Sɛm A Nyɛ Pɛgamum Tim Ni

¹²“Sɔbi kin nama a la nyɛ naa la nyini Yesu nitiŋɛ ta a li Pɛgamum ni.

“Mu waa naa kpak chisi nɔsa lɛ ti o li mu nɔ ni, ma nu chenani mu kaa ŋɔ ma. ¹³Mu zimu di doonani ma nyɛn nan, sintana dɔ nidamata. Hali o nitiŋɛ funɛ kpu naa ba yir Antipas domi o funɛ biksi nara mu wɛ, ma wa fun bur a li mu tiŋi ni. ¹⁴Amaa wu bɔnɛwa ma vɛ seen a yaali. Bɔnɛ nyɛn ma ni a tiŋ naa ba yir Beelam chen biksi. O funɛ nyɛn saha digi a biksi baal naa ba yir Belak di o la biksi Ju tima chenani ba zi di vursa diwe a tum chɔkumsa tuma. ¹⁵Bɔnɛ ka nyɛn ma ni a tiŋ Nikolaitan tima biksi. ¹⁶Ma duŋni ba a ta. Ma vɛ duŋni ba, mu zi bur wa ma watiu lalaga a wa lisi chisi naa la li mu nɔ ni a chem ba.

¹⁷“Ma cheŋi ma diŋsa a nu chenani Koosa siim weri ti sɛm a nyɛ Yesu nitiŋɛ ba naa nyɛn Azia pulum ni. Ba naa kpak nɛnɛ hali a la tel o bɔ, mu zi kpa diwe naa ba yir ‘mana’ ka o sogliu, a nyɛ ba ba di. Mu zi sɔbi sɔn falɛu a sak buŋkul pilimi ni a kpa nyɛ ba. Ba naa la a chen duŋduŋ la zi zim chenani sɔbi sak o kin ni.”

Chenani Yesu Fun Sɛm A Nyɛ Tiataya Tim Ni

¹⁸“Sɔbi kin nama a la nyɛ naa la nyini Yesu nitiŋɛ ta a li Tiataya ni.

“Mu waa naa Koosa be ka mu se sɛri a chi din a la chɛr nara se ka mu naŋgere sɛri ti funɛ chi sulminne ba kpa kɔɔri kina a lili kinkan, ma nu chenani mu kaa ŋɔ ma. ¹⁹Mu zim chenani ma bambe duu awa chenani ma daŋni Koosa awa dɔŋa awa chenani ma se su un nɛnɛ. Mu gbanko zim di tum were naa maa tum wa kanyita ni lalaknɔ nan kaali te tel tum ta. ²⁰Amaa wu digirɛ ma vɛ seen a yaali. Nihaan digi nyɛn ma ni ba yir un Jɛzɛbɛl. O ŋɔ di waa ya Koosa nitumɛ ta digi, amaa o biksi ma di ma bur a tum chɔkumsi tuma a kidi vursa diwe. Ma waa la nɔɔni o nyɛn ma wati. ²¹Saha naa mu fun ŋɔ un di o gil o tum tagni chen galɛu. O wara daŋni o bur a li o chɔkumsi tum ta ni. ²²Ma nu mu wati. O wa ba naa lagmi dɔŋ ni a tum chɔkumsi tum chen vɛ gil a, mu zi nyɛ wichɔɔrta kpak bau ba chɔ tɛɛnɛ ni a namsi kinkan. ²³Mu zi nyɛ o bisa sitiu, chen ni Yesu nitiŋɛ ta maga zi zimu di min ya naa zim chenani nibinsa bambe du. Mu zi bɔ ma magau a li chenani ma tum ni.

^24-25“Ma naa nyɛn Tiataya ni a vɛ tiŋ sintana wu sogle naa o biksi nara, mu daŋni ma duŋduŋnɛ kpak mu wuti biksi ti hali mu wa bur wa. Mu wa ŋɔ ma di ma bu ya wu digi. ²⁶Ma kpak nɛnɛ a sɔɔni mu tuha hali a la tel o bɔ, mu zi vɔti ma mu koorsau ma dɔ tɛɛnɛ nɔ tim maga. ²⁷Mu nyana funɛ kpa o kpok a nyɛ min di mu zi dɔ bau wa kpok ni. Ma zimu chenani tempile nikɔɔri yaa kpa o lugɛ da a chɛɛgi o tempilsa naa vɛ were. Ma zi dɔ ba chenu. ²⁸Mu jirima awa mu chaani a naa mu zi kpa a nyɛ ma, a zi chaaniu a chi chau wul.

²⁹“Ma cheŋi ma diŋsa a nu chenani Koosa siim weri ti sɛm a nyɛ Yesu nitiŋɛ ba naa nyɛn Azia pulum ni.”

Chenani Yesu Fun Sɛm A Nyɛ Sardis Tim Ni

¹“Sɔbi kin nama a la nyɛ naa la nyini Yesu nitiŋɛ ta a li Sardis ni.

“Mu waa kpak Koosa siimsa nɔpɛ awa wula nɔpɛ. Ma nu chenani mu kaa ŋɔ ma. Mu zim chenani maa tumu awa chenani nara sɛm di ma tiŋ minu nɛnɛ amaa ma wa tiŋ nɛnɛ. ²Ma kaa tiŋ chen, o wa zi vusi ka ma bur mu tiŋi ni. Ma si chiŋi a kpak si sɛm a tiŋ nɛnɛ, chen ni ma zi peti tum naa Koosa fun kpa nyɛ ma di ma tumu. ³Ma lisi chenani ma fun te nu Koosa laaboor weri ti a nyɛ ma se su un. Ma kpak un nɛnɛ a gil chenani ma vɛ tiŋ min nɛnɛ. Ma vɛ si chiŋi a kpak si sɛm a tiŋ min nɛnɛ, mu zi wa wa ma watiu ka ma vɛ zim mu wɛ. Mu waali ti zi chi chenani ŋmɛɛr ya wa ŋmɛ kina chen. ⁴Ma naa nyɛn Sardis ni, bɔnɛ ha wa tum tum tagna naa nyɛ ma tusa doŋ. Mu zi nyɛ ma kipilimau ma laari a nyɛ ma wa min lagmi dɔŋ ni chenani ma ya chen daha. ⁵Mu zi nyɛ ba naa kpak nɛnɛu hali a la tel o bɔ laari kipilimau ka mu zi nyɛ ba sɔna naa ba fun sɔbi aa du Koosa mi fali tɔn ti ni kpalimi dooni. Mu si sɛm mu nyana awa o malaikasi ta gbampulim niu a li ba suwachak ni di min dɔ ba.

⁶“Ma cheŋi ma diŋsa a nu chenani Koosa siim weri ti sɛm a nyɛ Yesu nitiŋɛ ba naa nyɛn Azia pulum ni.”

Chenani Yesu Fun Sɛm A Nyɛ Filadɛlfia Tim Ni

⁷“Sɔbi kin nama a la nyɛ naa la nyini Yesu nitiŋɛ ta a li Filadɛlfia ni.

“Mu waa naa ya tu chaan tiina awa wuti tiina a kpak koor Devid dam safibe. Mu kpa un a puti mu koor ti bulzɔɔnɔ, nandigi wa kikoti a far un. Mu kpa safibe ti a pur bulzɔɔnɔ ti, nandigi wa kikoti a puti un. ⁸Mu zim chenani maa tumu awa chenani ma vɛ kpak kpoku, amaa ma tiŋ mu biksi ti a vɛ li mu gantɛl nara bambaan ni. Chendaha mu fun puk mu koor ti bulzɔɔnɔ di ma zu. Nandigi wa to a la zi tɔ un. ⁹Ma nu mu wati. Ba naa ŋɔ ma di ba ya Ju timwa a ya nusun tima, sintana dɔ ba. Mu zi nyɛ ba wa gbiri ma suwachak niu a nyɛ ma jirima, domi ba zimu di mu daŋni mau. ¹⁰Saha naa ba naa maga nyɛn tɛɛnɛ nɔ maga ni zi wa namsi kinkan, ka mu zi zaamsi ba, duglɛu. Ma funɛ tum ma tumau wa kanyita ni a chi chenani mu fun biksi ma. Chendaha mu zi wa lisi mau a li namsi ti saha ni. ¹¹Mu zi bur wau lalaga. Ma kpak chenani ma tiŋ min nɛnɛ, chen ni nandigi wa zi lisi Koosa mi fali naa mu zi kpa a nyɛ ma, a li ma ni. ¹²Ba naa kpak nɛnɛ hali a la tel o bɔ, mu zi nyɛ ba burgiu a chi zantɔglsa a li Koosa bar jɛɛmi dam ni hali saha naa vɛ kpak bɔ. Mu zi sɔbi Koosa sɔn awa o tɔhɔn ti sɔnu a sak ba ni. O tɔhɔn ti ya Jɛrusalɛm fali naa Koosa zi nyɛ o wa nyɛn tɛɛnɛ nɔ maga ni wuzu digi. Mu gbanko zi sɔbi mu sɔn faliu a sak ba ni.

¹³“Ma cheŋi ma diŋsa a nu chenani Koosa siim weri ti sɛm a nyɛ Yesu nitiŋɛ ba naa nyɛn Azia pulum ni.”

Chenani Yesu Fun Sɛm A Nyɛ Laodisia Tim Ni

¹⁴“Sɔbi kin nama a la nyɛ naa la nyini Yesu nitiŋɛ ta a li Laodisia ni.

“Mu waa naa ba ya yir Ami ka mu biksi nara Koosa wuti wɛ. Waa funɛ nyɛ mu naami kina maga a li o piili ti ni. ¹⁵Mu zim chenani maa tum. Ma se wa sɛri a li chenani ma daŋni ma tum mu tuma, amaa ma wa bur a li mu tiŋi ni. Mu fu daŋni mu zim di ma se sɛriu akoo ma zi gil mu tiŋirɛ. ¹⁶Domi ma se wa sɛri wa mu tiŋi ni, ma nyɛ sɛsirɛ kpak min. Ma nyɛ mu daŋni mu wa chɔk ma. ¹⁷Ma ŋɔ ma titi ni, ‘Ya ya kin timawa kinkan a vɛ daŋni kundɔŋ.’ Mu zi ŋɔ ma chenani ma duu wuti. Ma ya fara timwa kinkan a chi nyuluma ba naa laari kizɛrgɛ. Ba naa maga na ma, ma wɛ zi ya ba sikiu. ¹⁸Ma wa mu wati a wa yau salma naa ba fun kpa du din ni a chaksi di ma ya kin tima wuti awa gar pilima naa ma laari, chen ni ma wa zi bu na hiisa. Ma wa yau se luri a du ma se ni, chen ni ma zi bukoo kinau. ¹⁹Mu zulimi ba naa maga mu daŋni a biksi ba ba tum tagna. Ma gil chenani ma funɛ tum a kpak si sɛm awa mu tiŋi ni. ²⁰Ma nu mu wati. Saha maga mu yaa chiŋi bulzɔɔnɔ nɛɛ a mo a la yir. Ba naa nu mu ta a puk bulzɔɔnɔ ti, mu zi zuu, chen ni ba wa min zi lagmiu a di diwe. ²¹Ba naa kpak nɛnɛ hali a la tel o bɔ, mu zi nyɛ ba bɔni mu jirima bar nyɛniu Koosa chakpal ni. Mu funɛ kpak nɛnɛ hali a fun la tel o bɔ. Chendaha o nyɛ mu kani dooni.

²²“Ma cheŋi ma diŋsa a nu chenani Koosa siim weri ti sɛm a nyɛ Yesu nitiŋɛ ba naa nyɛn Azia pulum ni.” O fun sɛm chen peti a kaali.

Chenani Koosa Tɔhɔn Tima Funɛ Jɛɛmi Un

¹A gantɛl ni mu fun bu nyini a na kundɔŋ a chi mu deesi.

Koosa tɔhɔn ti bulzɔɔnɔ funɛ puku, ka ta zaŋa naa mu fun te nu chen chi kaabul fun ŋɔ min, “Zini kuwa bar nɔ ka mu biksi hin chenani la zi wa ya.” ²Koosa siim weri ti fun vaan te mu suwachak a nyɛ mu zini a zu. Mu fun nyini a na Koosa jirima bar nyɛni ka nandigi kani dooni. ³O se funɛ liliu a chi buŋkul were a naa sɛrɛ a chaani, ka doonkagla naa chi suwasi ni go un. ⁴Bar kanɛ fumlɛ danaasi funɛ go un. Nihɛɛta nara fumlɛ danaasi funɛ kani doonma ni. Ba maga funɛ laari kipilimiwa a chik salma nyuchigsa. ⁵Din fun nyiksi awa nasɛha a li Koosa jirima bar kani ti. Fitin hɛmsɛ abanɔpɛ funɛ nyɛn o suwachak ni. A waa funɛ ya Koosa siimsa nɔpɛ. ⁶Bɛɛŋa naa funɛ pɛn a lili a chi diga gbanko funɛ nyɛn o suwachak ni. Sela naasi funɛ chiŋi a go un a gbaari.

A maga se funɛ iiu a nyɛn a se awa a naŋkporsi ni. ⁷Sel digi funɛ chi gbogumtirɛ, digi chi nupɔl, digi ka kpak nyuha a chi nibine, digi ka kpak nyuha a chi tiisi naa pisi o chɛnɛ. ⁸A maga funɛ kpak chɛnɛ anɔnɔrawa ka se ta su a bara maga. Ba yaa funɛ lɔ boola a vɛ hiisi a ŋɔ,

“Ya kunyana Koosa naa ya tu chaan tiina a kpak kina maga kpok,

i vɛ kpak piili a nyɛn a vɛ kpak peti.”

⁹Sela naasi ta funɛ lɔ a booliwa a pɛgi naa funɛ kanɛ Koosa jirima bar kani ni, domi o kpak jirima awa chaani kinkanu a nyɛn hali saha naa vɛ kpak bɔ. ¹⁰A funɛ lɔ a bool ta chene, nihɛɛta nara fumlɛ danaasi ta yaa fun siu a pimi tɛɛne ni a jɛɛmi naa funɛ kanɛ Koosa jirima bar kani a nyɛn hali saha naa vɛ kpak bɔ, ni. Ba yaa fun bini ba salma nyuchigsau a dau a li o suwachak ni a kpa aa chiksi a ŋɔ,

¹¹“Ya kunyana awa ya Koosa,

hin naami kina maga.

O ya i tutɔrɛ a nyɛn.

Chendaha o deŋli wa ya jɛɛmi hin,

domi i kpak jirima awa chaani wa kpok kinkan a kaali a maga.”

Tɔn Awa Piisi Be Wɛ

¹Mu fun nyini a na ka naa kanɛ Koosa jirima bar kani ni chen, funɛ kpak tɔnnɛ o nindil ni. Ba fun sɔbi a sak o suwachak awa o gantɛl ni a guti un a tɔ un tɔɔli bunɔpɛ. ²Malaika digi funɛ kpak ta kpok a nyɛn dooni. Waa funɛ mɔɔli a ŋɔ, “Anti ya nizen a la zi wa kasi kitɔɔli nama a puk tɔn nɔ?” ³Nandigi wa ta ba naa nyɛn Koosa tɔhɔn ti ni akoo tɛɛnɛ nɔ maga ni koo nisitɛ bar nyɛni ni a ya nizen di ba wa puk un a nyini o tuha ni. ⁴Mu funɛ na di nandigi wa to a ya nizen a la zi la puk tɔn ti a nyini o tuha ni, sini fun li mu se ni kinkan. ⁵Nihɛɛti ta digi fun bur a ŋɔ min, “Ta nyɛ i sini kilili. Naa ba yir gbogumti chen a li Juda buuri ni, waa ya koor Devid bi luli. O funɛ kpaku hali o bɔ a nyaŋi o dɔma a koti a kasi kitɔɔlisa nɔpɛ ta a puk tɔn ti. Kina, waa nɛɛnɛ.” ⁶Mu fun nyini a na ka piisi be nyɛn doon. O chi ba funɛ kɔrigi unu. O fun chiŋi a dugli Koosa jirima bar kani ti ka sela naasi ta awa nihɛɛta nara fumlɛ danaasi ta go dooni. Piisi be ti funɛ kpak nyindaasa anɔpɛ awa se nɔpɛwa. O se nɔpɛ ta funɛ ya Koosa siimsa nɔpɛ naa Koosa fun tum tɛɛnɛ nɔ maga ni. ⁷Piisi be ti fun la la tɔn ti a li naa kanɛ Koosa jirima ba kanɛ nindil ni. ⁸Piisi be ti funɛ la, sela naasi ta awa nihɛɛta nara fumlɛ danaasi ta fun si a pimi tɛɛnɛ ni o suwachak ni. Nihɛɛti ta maga funɛ kpak gɔnjisiwa awa salma gbaŋsa a kpa kin naa sɔɔra weree a du a tuha ni. Kin naa sɔɔra weree chen funɛ ya Koosa nara sumi. ⁹Ba fun lɔ bool fali a ŋɔ,

“I ya nizenu wa i la tɔn ti a kasi kitɔɔli ta a puk un.

Ba funɛ kpu hin,

i fun kpa i chɛl a la nidamata nyuuna a nyɛ Koosa ni.

I funɛ lisi bau a li pulumsa awa buurisa maga ni ka ba maga sɛm sɛm kurgɛ.

¹⁰I funɛ vɔti ba koorsa a lisi ba di ba ya Koosa dam kɔkɔɔrsa a tum tuma a nyɛ ya Koosa ni.

Ba zi dɔ tɛɛnɛ nɔ tim magau.”

¹¹Mu fun bukoo nyini a na ka Koosa malaikasa nyɛn dooni. Ba funɛ iiu a vɛ kpak guri a chiŋi a go doon maga. Mu funɛ nu a, ¹²ka a lɔ bool wa ta zaŋa ni a ŋɔ,

“Piisa be naa ba fun kɔrigi chen,

o deŋlu wa ya jɛɛmi hin,

domi i dɔ kina maga a kpak zima awa kpok wa jirima wa chaani kinkan wa tu sɔɔni.”

¹³Doone mu fun nu kin naa maga funɛ nyɛn Koosa tɔhɔn ti awa tɛɛnɛ nɔ maga wa nisitɛ bar nyɛni wa teku ni ka a fun lɔ bool a ŋɔ,

“Ma nyɛ ya pɛgi naa kanɛ Koosa jirima bar kani ni awa piisi be ti,

domi ba kpak jirima awa chaani wa kpok kinkan hali saha naa vɛ kpak bɔ.”

¹⁴A funɛ lɔ a bool ti peti, sela naasi ta fun ŋɔ, “Ami,” ka nihɛɛti ta fun si a pimi tɛɛnɛ ni a jɛɛmi ba.

Piisi Be Fun Kasi Tɔn Kitɔɔlɛ Abanɔra

¹Piisi be ti funɛ la tɔn ti, o fun kasi kitɔɔli naa te chen a puk tɔn ti bar digi. Sela naasi ta digi fun ŋɔ min a chi nasɛha, “Kuwa a wa na.” ²Mu fun la nyini a na zaag pilim ka o nyɛn dooni. Naa funɛ zini zaag ti chen funɛ kpak toha awa hɛmwa ka ba fun kpa salma nyuchiga a chik o nyuha. O fun la chem laal a nyaŋi o dɔm damata.

³Doone piisi be ti fun kasi kitɔɔli alɛ tiina a bu puk tɔn ti tama a gbaari. Sel naa funɛ chi nupɔl chen, fun ŋɔ min, “Kina.” ⁴Mu fun nyini a na zaag sɛm ka o nyɛn dooni. Ba funɛ kpa chisi zen a nyɛ naa funɛ zini zaag ti chen. Ba gbanko funɛ kpa kpokre di o la a la nyɛ tɛɛnɛ nɔ tim maga la chem laal a kpu dɔŋa a nyɛ un.

⁵Doone piisi be ti fun kasi kitɔɔli atora tiina a bu puk tɔn ti tama a gbaari. Sel naa kpak nyuha a chi nibine chen, fun ŋɔ min, “Kina.” Mu fun nyini a na zaag bilim ka o nyɛn dooni. Naa funɛ zini zaag ti chen funɛ kpak kina kizaamsirɛ o nin ni. ⁶Mu fun nu ta a li sela naasi ta bambaan ni ka o ŋɔ, “Kila a la bɔ ba naa tum wuzu bɛgim chen wa poge gbaŋpuluma akoo mɛ gbaŋpulumsa tora, amaa doso a ta chɔk nu ti akoo sin.”

⁷Doone piisi be ti fun kasi kitɔɔli anaasi tiina a bu puk tɔn ti tama a gbaari. Sel naa kpak nyuha a chi tiisi naa pisi o chɛnɛ, fun ŋɔ min, “Kina, ⁸mu fun nyini a na zaaga ka o chi suwasi ni ka o nyɛn dooni. Naa funɛ zini zaag ti chen, sɔn funɛ ya ‘sou’. Nidigi sɔn funɛ ya ‘nisitɛ bar nyɛni’ fun tiŋ o gantɛl. Ba fun purigi tɛɛnɛ nɔ maga bunaasi a lisi bar digi a nyɛ ba di ba kpa nyinbaan kurgɛ a kpu ba naa maga nyɛn dooni. Nara balɛ ta fun kaali a nyɛ lɔsa awa wichɔɔrta chel dooni. Ba gbanko fun kpa chisi zene awa sel zene a kpu ba.

⁹Doone piisi be ti fun kasi kitɔɔli anyuun tiina a bu puk tɔn ti tama a gbaari. Mu fun nyini a na ka biŋbiŋa nyɛn dooni. Ba naa tɛɛnɛ nɔ tim maga fun kpu domi ba funɛ biksi ba Koosa laaboor weri ti wɛ a vɛ bur gantɛl a li ba biksi ni, ba funɛ nyɛn biŋbiŋ ti mun nɛɛ. ¹⁰Ba fun tɛsi ta zaŋa a ŋɔ, “Ya kunyana, hin ya tu chaan tiina awa wuti tiina a kpak kina maga kpok. Yɛrɛ o zi vusi ka i di tɛɛnɛ nɔ tim maga sɛria a lɛrgi ba diŋsa chenani ba fun kpu ya chen daha?” ¹¹Ba naa funɛ nyɛn Koosa jirima bar kani ti ni a go, bɔnɛ fun kpa takta ziŋɛ pilima a nyɛ ba a ŋɔ ba di ba hiisi tama, hali tɛɛnɛ nɔ tim maga wa kpu ba niinbisa a chi ba funɛ kpu ba a gbaari peti.

¹²Doone mu fun nyini a na ka piisi be ti fun kasi kitɔɔli anɔra tiina a bu puk tɔn ti tama a gbaari. Tɛɛnɛ nɔ maga fun vaan zigsi kinkan ka nha fun biri a chi dinhala. Pɛna fun burgi kisɛm a chi chɛl, ¹³ka wula fun li buudaha a wa tu tɛɛnɛ nɔ maga a chi chenani peha yaa ya soom galsa chesi chen. ¹⁴Buudaha funɛ gutiu a chi ba guti kichɔɔli a nyuksi, ka bɛ awa pulumsi naa ni go chen maga fun tur a bar nyɛnɛ ni. ¹⁵Tɛɛnɛ nɔ tim maga koorsa, nibirige ta, kin tima, lanjimasa nyuhu tima, ba naa funɛ ya yosa awa ba naa funɛ ya nihiise, ba maga fun chɔ la zu gbɛntɛl bɔsa awa bɛ bambaanisi ni. ¹⁶Ba funɛ sumi di bɛ ta chesi ba ni, chen ni naa kanɛ Koosa jirima bar kani ni wa zi na ba, ka piisi be ti wa zi kpa o paan a du ba ni a na ba galimsa a ta ba yɔri. ¹⁷Ba fun ŋɔ dɔŋ ni, “Wuzu zen naa Koosa kaa wa na paan a lɛrgi ya diŋsa, telu. Anti la zi koti a chem un?”

Nara Tusuk Kɔk Di Fumnaasi Danaasiwa Wɛ

¹A gantɛl ni mu fun nyini a na ka Koosa malaikasa naasi chiŋi tɛɛnɛ nɔ maga koŋsa naasi ta ni. Ba fun tɔ tɛɛnɛ nɔ maga peha bar lilɛ anabaasi, chen ni peha ti wa kikoti a ya tɛɛnɛ ni akoo ni ni koo a viigi bugila. ²Koosa funɛ nyɛ a kpok di a chɔk tɛɛnɛ awa ni. Doone mu fun na malaika digi fun li nha bar yɛli ka o kpak kin naa o kpa dani nara a nyɛ Koosa ni o nin ni. O fun yir kinkan awa ta zaŋ ni a ŋɔ malaikasa naasi ta ni, ³“Ma nyɛ mu te dani Koosa tumtumsa a li ba tilsa ni ka ma zi chɔk tɛɛnɛ awa ni wa bugila.” ⁴Nandigi fun ŋɔ min chenani Koosa malaika ti zi dani Koosa tumtumsa a mak. O funɛ dani tusuk kɔk di fumnaasi danaasiwa a li Ju tim buuri fidalɛ ni. ⁵O funɛ dani tusuk fidalɛwa a li Juda awa Rubɛn wa Gad a li ba maga buurisi ta ni. ⁶O funɛ dani tusuk fidalɛwa a li Asa awa Naftalai wa Manasɛ a li ba maga buurisi ta ni. ⁷O funɛ dani tusuk fidalɛwa a li Simɛɔn awa Livai wa Isaka a li ba maga buurisi ta ni. ⁸O funɛ dani tusuk fidalɛwa a li Zɛbulun awa Josɛf wa Bɛnjamin a li ba maga buurisi ta ni.

Jɔn Fun Na Zɛmɛ Kinkan A Li Koosa Tɔhɔn Ni

⁹A gantɛl ni mu fun nyini a na ka zɛmɛ kinkan nyɛn dooni. Nandigi wa fun koti a gur ba. Ba funɛ li tɛɛnɛ nɔ maga pulumsa awa buurisa maga ni ka ba maga sɛm sɛm kurgɛ. Ba fun laari takta ziŋɛ pilima a kpak bone kpachaga ba nisa ni a chiŋi Koosa jirima bar kani awa piisi be ti suwachak ni. ¹⁰Ba fun tɛsi wa ta zaŋ ni a ŋɔ, “Koosa naa la kani o jirima bar kani ni awa piisi be ti, ba maga funɛ yisi ya a li ya tum tagna ni hali a wa peti a kpa ya wa bar nɔ.” ¹¹Sela naasi ta awa nihɛɛti ta awa malaikasa a naa maga fun si a pimi tɛɛnɛ ni Koosa jirima bar kani suwachak ni a jɛɛmi un, ¹²a ŋɔ, “Ami. Ya pɛgi a zaami hin, domi i kpak zima awa jirima wa chaani wa kpok kinkan hali saha naa vɛ kpak bɔ. Ami.”

¹³Nihɛɛti ta digi fun bur a pɛɛsi min, “Ba naa laari takta ziŋɛ pilima nan, anti ya ba? Leene ba li?”

¹⁴Mu fun ŋɔ un, “Mu wa zim ba, ŋɔ min.”

O fun ŋɔ min, “Ba fun val a wa li namsi kinkan saha a kpa piisi be ti chɛl a chaksi ba kilaarɛ di a ta kpak doŋa. ¹⁵Chendaha ba nyɛn Koosa jirima bar kani suwachak ni a la tum o tuma saha maga a li Koosa tɔhɔn nɔ ni. Koosa titi zi kpalimi ba watiu. ¹⁶Lɔsa awa nyɔksa wa zi bu kpak ba. Nha awa nunum gbanko wa zi pu ba. ¹⁷Piisi be naa duglɛ Koosa jirima bar kani zi ya ba nigbaŋiu a zi te ba suwachak a dɛu ni pali di ba nyɔ. Hali Koosa titi zi fisi siniu a ta a li ba se ni.”

Piisi Be Fun Kasi Kitɔɔli Nɔpɛ Tiina

¹Doone piisi be ti fun kasi kitɔɔli anɔpɛ tiina a puk tɔn ti maga. Doon funɛ duu balimm kinkan hali a wa tel minti fumtora. ²Chen saha ti funɛ wa kaali, ba fun kpa kaabulsa nɔpɛ a nyɛ malaikasa nɔpɛ ta ni. A waa yaa chiŋi Koosa suwachak ni.

³Salma biŋbiŋa funɛ nyɛn Koosa jirima bar kani suwachak nɛɛ. Malaikasi ta digi fun kpak salma gbaŋa a kpa kin naa sɔɔra weree a du un ni a wa chiŋi o suwachak ni. Kin naa sɔɔra weree chen funɛ ya Koosa nara sumi. Ba fun kpa kin naa sɔɔra weree kinkan a gbaari un di malaika ti kpa fu a nyɛ Koosa ni. ⁴Kin naa sɔɔra weree nyɔɔsa awa Koosa nara sumi fun zini buudaha a li doonani malaika ti chiŋi Koosa suwachak ni chen. ⁵O funɛ fu kin naa sɔɔra weree chen a peti, o fun zer din ti a biti du salma gbaŋ ti tuha ni a zer a maga a yo ta tɛɛnɛ nɔ maga ni. Tɛɛnɛ fun zigsi kinkan ka nasɛha nyiksi a jim kinkan.

Malaikasa Nɔra Fun Hu A Kaabulsa

⁶Doone malaikasa nɔpɛ ta fun saksi di a hu a kaabulsa.

⁷Malaikasi ta te tel tiina fun hu o kaabul. Doonbe naa funɛ sɛri a chi chɛl vaan chesi tɛɛnɛ nɔ maga ni ka nasɛha nyiksi a du un ni. O fun purigi tɛɛnɛ nɔ maga butora a lisi bar digi a fu tɛɛnɛ ti awa bugila wa kɔsa a naa nyɛn un ni.

⁸Alɛ tiin di fun hu o kaabul. Ba fun kpa kundɔŋ a chi bi zen ka din di un a yo du ni ni. O fun purigi ni ti butora a lisi bar digi a chɛrgi un o burgi chɛl, ⁹chen ni kinyine awa arŋsa a naa maga nyɛn un ni, funɛ chɔku.

¹⁰Atora tiin ti fun hu o kaabul. Wul zen naa funɛ chaani kinkan, fun li buudaha a wa chel tɛɛnɛ nɔ maga ni. Malaika ti fun purigi pula awa nise butora a lisi bar digi a nyɛ wul ti chɔk a. ¹¹Wul ti sɔn funɛ ya ‘Haasa’. Nise awa ni ti fun haasi ka nidamata fun nyɔ un a siti.

¹²Anaasi tiin ti fun hu o kaabul. Ba fun purigi nha awa pɛna wa wula butora a lisi a chaani bar digi a ta. Ba gbanko fun purigi dusum awa nha a lisi a chaani bar digi a ta.

¹³Mu fun nyini a na ka tiisi nyɛn dooni a za buudaha bar boli ni. O fun ŋɔ wa ta zaŋ ni, “Malaikasa tora a naa kaɛɛ nan wa hu a kaabulsa, yɛrɛ o kaa wa du ba naa nyɛn tɛɛnɛ nɔ maga ni?”

¹Anyuun tiin ti fun hu o kaabul. Mu fun na wul naa li buudaha a wa chel tɛɛnɛ nɔ maga ni. O fun kpak kpok a puk bɔ naa vɛ kpak bar peti, bulzɔɔnɔ. ²O fun puk bɔ ti bulzɔɔnɔ ka nyɔɔsa kinkan fun wa li bɔ ti ni a chi din zenzen nyɔɔsa. Nyɔɔsi ta fun du kuum buudaha ni. ³Hɔɔna fun li nyɔɔsi ta ni a tu tɛɛnɛ ka a fun kpok a chi numsa. ⁴Ba fun ŋɔ a di a ta se kpachaga koo kɔsa, amaa a la dusi ba naa malaika ti vɛ dani ba tilsa duŋduŋ. ⁵Hɔɔni ta wa kpak nyinbaan di a kpu ba, amaa a namsi ba pɛnsa nyuun. Chenani numa wi awa chenani a namsi ba ya kibɛgimnɛ. ⁶Pɛnsa nyuun ta tuhu ni, nara tima zi daŋni ba kpu ba titiu, amaa ba wa kikoti. O chi sou chɔ a ka ba.

⁷Hɔɔni ta funɛ chi zaagna a naa ba saksi a di a la chem laal. A se funɛ chi nibinsa sewa ka ba fun chiksi salma nyuchigsa. ⁸A nyuksa funɛ chi nihaana nyuksiwa ka a nyina fun chi gbogumta nyina. ⁹Ba fun kpa lugɛ lɛusɛ a tɔ a bambe ka a chɛnɛ ta fewi funɛ chɛɛmi a chi zaag damata chɔ. ¹⁰A munzuuna funɛ chi num munzuhurɛ. Chenani a kpa a munzuuni tima a dusi nara funɛ ya a kpok a koti a namsi ba pɛnsa nyuun. ¹¹Malaikasi ta digi funɛ nyɛn doon ba yir un a li Ju tim sɛm ni, Abadɔn. Ba funɛ yir un a li Girik tim sɛm ni, Apɔliyɔn. O mun ya, ‘naa la chɔk kina’. Waa funɛ ya hɔɔni ta koora a il bɔ naa vɛ kpak bar peti.

¹²Ba fun ŋɔ min chenani nibinsa zi wa te namsi peti. Ba fun ŋɔ min chenani ba zi namsi bilɛ tiina a gbaari.

¹³Doone malaikasa nɔra tiin ti fun hu o kaabul. Mu fun nu ta a li salma biŋbiŋ naa nyɛn Koosa suwachak bambaan ni. ¹⁴Ta ti fun ŋɔ malaika ti ni, “Lisi malaikasa naasi naa ba fun vɔti a du mɔɔga naa ba yir Yufretis nɔ ni a ta.” ¹⁵Malaikasa naasi ta fun li mɔɔga ti ni a purigi tɛɛnɛ nɔ maga nara butora a lisi ba digi di a kpu ba. Ba fun kpa a a chiŋsi hali a wuzu naa Koosa fun ŋɔ di a tum chen. ¹⁶Lanjimasa ba naa funɛ zini zaagna a la laal bar chemi fun tiŋ malaikasa naasi ta gantɛl. Ba fun ŋɔ min di ba iiu nara vɛ koti a gur ba. ¹⁷Nannɛ mu fun na zaagna nizinɛ ta a chi mu deesi. Ba funɛ laari lugɛ lɛusɛwa ba suwachak ni. A funɛ sɛriu a chi din a vɛɛn sɛri a chi sumin. Zaagni ta nyuuna funɛ chi gbogumta nyuuniwa ka nyɔɔsa naa ya kibilim a chi sumin awa din funɛ li a nɔni ni. ¹⁸Nyɔɔsa naa ya kibilim a chi sumin awa din a naa funɛ li zaagni ta nɔɔni ni fun kpu tɛɛnɛ nɔ tima ba naa maga malaikasa naasi ta fun purigi butora a lisi bar digi chen. ¹⁹Zaagni ta munzuuna funɛ kpak dum nyuuniwa a munzuuna bar peti ta ni. A fun kpa a a nyɛ nara namsi a gbaari chenani ba nɔɔna kpu ba chen.

²⁰Tɛɛnɛ nɔ tima ba naa maga malaikasa naasi ta ha fun vɛ lisi di a kpu ba, wa fun gil ba tum tagna a bur tiŋ Koosa. Ba yaa funɛ jɛɛmi alizin tagniwa a kpa salma, aniita, lugɛ naa sɛrɛ a chi sumin, buŋkula awa daasa a kɔɔri vursa a naa vɛ naali akoo a nu sɛma koo a val, a jɛɛmi a. ²¹Ba yaa funɛ kpu nara a tum luri bilim tuma a daŋni nihaana yɔri yɔri a la ŋmɛ. Tum tagna naa maga ba yaa funɛ tum, ba wa fun gil a a bur tiŋ Koosa.

Malaika Awa Tɔn Wewe Wɛ

¹Doone mu fun nyini a na ka malaika zenzen digi nyɛn dooni, a fun li Koosa tɔhɔn ti. Dobaal funɛ go un ka doonkagla fun go o nyuha. O se funɛ chaaniu a chi nha ka o naŋgere nyiksi a chi din. ²O funɛ kpak tɔn wewe o nin ni ka o puk. O fun tu wa tɛɛnɛ nɔ maga a kpa o naŋgeri dil a du teku ni ni a kpa naŋgeri gal a chiŋsi jibaŋ ni. ³O fun kaasi a chi gbogumta wi, ka nasɛhasa nɔpɛ a naa funɛ nyɛn doon, tɛsi a bur a nyɛ un. ⁴A funɛ tɛsi a peti, mu funɛ daŋni mu sɔbi chenani yɛɛ, amaa ta funɛ ŋɔ min a li Koosa tɔhɔn ti ni a ŋɔ, “Ta sɔbi chenani nasɛhasa nɔpɛ ta sɛmi a dawi. Mu daŋni a sogliu.”

⁵Malaika naa naŋgeri dil funɛ nyɛn ni ni ka o naŋgeri gal ka chiŋi jibaŋ ni chen, o fun zer o nindil buudaha ni, ⁶a hɛɛsi Koosa naa nyɛnɛɛ hali saha naa vɛ kpak bɔ. Waa ya naa funɛ naami buudaha awa tɛɛnɛ wa teku ni wa kin naa maga nyɛn a ni. Malaika ti fun hɛɛsi a ŋɔ, “Ma ta nyɛ ya sɔɔni. ⁷Malaikasa nɔpɛ tiin ti funɛ wa hu o kaabul, Koosa naa funɛ te kpa chenani o funɛ lisi a sogli a zi kpa a a li gbampulim a biksi o witinsa ba naa funɛ ya o tumtumsa, o zi tum chenani o daŋni o ya saha digiu.”

⁸Doone ta naa funɛ ŋɔ min a li Koosa tɔhɔn ti ni fun bu ŋɔ min, “La zer tɔn we naa funɛ puk chen a li malaika naa naŋgeri nyɛn ni ni awa jibaŋ ni chen nin ni.”

⁹Mu fun la ŋɔ malaika ti ni di o nyɛ min tɔn we ti. O fun ŋɔ min, “Kpa un a se. O zi lɛmu a chi toon a li i nɔ ni, amaa o zu i tuha, o zi haasiu.”

¹⁰Mu fun la tɔn we ti a li o nin ni a se un. Chenani o fun sɛm chen sir ya. O funɛ lɛm a chi toon a li mu nɔ niu amaa o funɛ haasiu mu tuhu ni. ¹¹Mu funɛ se un peti, o fun bu ŋɔ min, “Mu daŋni i la biksi chenani Koosa fun sɛm pulum damata awa ba naa la sɛm sɛm kurgɛ awa ba koorsa wɛu.”

Koosa Fun Tum Nara Balɛ Di Ba Biksi Nara O Sɛma

¹Doone ba fun kpa da naa ba yaa kpa maksi kina a nyɛ min a ŋɔ, “Si a la maksi Koosa bar jɛɛmi dama awa biŋbiŋa naa nyɛn un ni chen. I gbanko la gur ba naa la jɛɛmi un dooni. ²Ta maksɛ Koosa bar jɛɛmi dam sali ta, domi ba naa vɛ zim Koosa chen, zi wa zu dooniu a chɔk tɔhɔn naa o fun lisi a nyɛ o titi ni, a val o daha ni pɛn fumnaasi dalɛ ni. ³Chen saha ti mu zi nyɛ nara balɛ laari taktasa a naa la lɔk barau a biksi nara tima Koosa sɛma wɛ wuzu tusuga awa kɔksa lɛ di fumnɔra.”

⁴Ba waa ya bugila lɛ ba yir ‘ɔlif’ awa fitinsa bar chiŋse kina balɛ. A waa nyɛn Koosa naa dɔ tɛɛnɛ nɔ maga, suwachak ni. ⁵Ba naa maga funɛ daŋni ba hɔɔsi a, din fun wa li ba nɔɔniu a kpu ba. Nannɛ ba yaa funɛ kpu ba dɔma. ⁶Saha naa ba funɛ biksi nara Koosa sɛm wɛ chen, ba funɛ kpak kpoku a nyɛ doon ta miili a nyɛ pulse sɛri a chi chɛl. Ba gbanko funɛ kpak kpoku a nyɛ wichɔɔrta kinkan wa kpaksi nara a chi chenani ba daŋni.

⁷Ba funɛ biksi Koosa sɛma a peti, sel zen naa kpak kpok kinkan funɛ wa li bɔ naa vɛ kpak bar peti chenu a chem ba yo niu. O fun nyaŋi ba a kpu ba maga, ⁸a nyɛ ba bara chɔ tɔhɔn zen naa ba fun kpaasi ba kunyana a mari daakakli ti, nyinbaan ni. Ba gbanko funɛ yir tɔhɔn ti Sɔdɔm akoo Ijipt. ⁹Ba naa funɛ li pulum maga awa buuri a la sɛm sɛm kurgɛ, fun na ba bara ka ba chɔ dooni a ta nyɛ nara la sogli ba. Ba zi ya chenu wuzu butora awa wuzu bore. ¹⁰Sel zen ti wa kpu nara balɛ ta, tɛɛnɛ nɔ tim maga tusa funɛ sɔɔniu, domi ba nyɛ ba na namsiu kinkan. Ba funɛ zɔ zɔɔlɛu a kpa dɔŋa wa kina. ¹¹Wuzu butora awa wuzu bore gantɛl ni, Koosa fun tum o siim weri ti di o lɛli ba a li ba sou ni. Nara funɛ na ba ka ba bu chiŋi, hansura fun kpak ba kinkan. ¹²Doone nara balɛ ta fun nu ta kpok a li Koosa tɔhɔn ti ni ka o ŋɔ ba, “Ma zini kuwa bar nɔ.” Ba fun zini a kaali buudaha ka dobaal tɔ ba ka ba dɔma nyini ba. ¹³Tɛɛnɛ ti fun vaan zigsi kinkan a kpu ba nara tusugsa nɔpɛ a purigi tɔhɔn ti bufi a lisi bar digi a chɔk. Ba naa funɛ ka, hansura fun kpak ba hali a la gali ka ba nyɛ Koosa naa nyɛn o tɔhɔn ti ni wa jirima kinkan.

¹⁴Namsi bilɛ tiin ti funɛ wa peti, amaa o wa fun vusi ka naa ya butora tiin chen, wa ya.

Malaikasa Nɔpɛ Tiina Fun Hu O Kaabul

¹⁵Doone malaikasa nɔpɛ tiina fun hu o kaabul. Mu fun nu ta kpoka a li Koosa tɔhɔn ti ni ka a ŋɔ, “Ya kunyana awa Kristo naa o fun lisi a nyɛ o titi ni kpak kpok a dɔ tɛɛnɛ nɔ maga. Waa la zi dɔ un hali saha naa vɛ kpak bɔ.” ¹⁶Nihɛɛta nara fi danaasi ba naa funɛ kani a go Koosa chen, fun si pimi tɛɛnɛ ni a jɛɛmi un a ŋɔ,

¹⁷“Ya kunyan Koosa naa kpak kina maga kpok,

i wa kpak piili aa nyɛn.

Ya zaami hinu di i funɛ kpa i kpok zenu a piili a dɔ tɛɛnɛ nɔ tim maga.

¹⁸Saha telu di i na paan a lɛrgi ba diŋsa a di ba naa sitɛɛ, sɛria.

Chendaha ba naa vɛ zim hin,

fun na paan kinkan a du hin ni.

Saha telu di i bɔ i witinsa ba naa ya i tumtumsa,

awa i nara ba naa maga ya nizene awa niwisa a la nyɛ hin jirima, chem.

Saha telu di i kpa ba naa funɛ chɔk tɛɛnɛ nɔ kina maga a ta ba yɔri.”

¹⁹Nihɛɛti ta funɛ sɛm peti, ba fun puk Koosa bar jɛɛmi dam naa nyɛn o tɔhɔn ti ni, bulzɔɔnɔ, ka tɛɛnɛ nɔ tim maga fun na o tuha. Doonee ba fun na adaka awa doonani ba fun sɔbi di Koosa wa nara funɛ ya nɔ bɛgim. Nasɛha fun nyiksi a tɛsi. Tɛɛnɛ fun zigsi ka doonbe chesi kinkan.

Nihaan Awa Sel Zen Sɛm Wɛ

¹Doone dana zenzen fun nyɛn buudaha ni. Haan digi funɛ nyɛn doon. O wa o kilaarɛ fun chaani a chi nha, ka o naŋgere zɔŋ pɛn daha ni. Wula fidalɛ funɛ nyɛn nyuchik naa o fun chik chen ni. ²O funɛ wa duuri a daŋni o lul a la wi.

³Dana zen digi funɛ gbaari un ni a li buudaha ni. Sel zen sɛm funɛ nyɛn doon. O funɛ kpak nyuuna nɔpɛ awa nyindaasa fire a chiksi koorsa nyuchigsa nɔpɛ. ⁴Sel zen ti fun purigi buudaha butora a lisi bar digi a kpa o munzuha a chaasi wula a ta tɛɛnɛ nɔ maga ni. Sel zen ti fun chiŋi nihaan naa la duuri chen suwachak ni, chen ni o lulɛɛ, o zi se be tiu. ⁵O fun lul nibabichɛla naa la zi wa bi a dɔ tɛɛnɛ nɔ nara maga wa kpok kinkannɛ. Ba fun wa fuksi be ti bu bɛgim a nyɛ Koosa naa kanɛ o jirima bar kani ni a li o tɔhɔn ti ni. ⁶Nihaan ti fun chɔ kaali nyabaan. Koosa funɛ kɔɔri bar nyɛni a nyɛ un dooni di o nyɛn ba nyini un wuzu tusuga awa kɔksa lɛ di fumnɔra.

⁷Doone Koosa malaikasa awa a nihɛɛ naa ba yir Maikil, fun lagmi dɔŋ ni di a la chem sel zen ti awa o malaikasa laal ni a li Koosa tɔhɔn ti ni. ⁸Koosa malaikasi ta fun nyaŋi sel zen ti wa o walɛ a fun vɛ nyɛ a bu nyɛn dooni. ⁹A fun duŋni a a ta tɛɛnɛ nɔ maga ni di a nyɛn dooni. Sel zen ti awa sintana ya kibɛgimnɛ. Waa ya naa ba yir dum ti a nyɛn a vusi a ya alizin tagna koora. Saha maga o yaa mur tɛɛnɛ nɔ tim magau.

¹⁰Doone mu fun nu ta kpok a li Koosa tɔhɔn ti ni ka o ŋɔ, “Ya funɛ nyaŋi naa yaa funɛ fiksi ya niinbisa Koosa suwachak niu saha maga a duŋni un a ta. Koosa naa ya ya koor wuti, funɛ kpa Kristo kpok a gbaari o kpok ni a lisi naa la muksi ya chen a li ba bambaan ni. ¹¹Chenani Kristo naa ya Koosa piisi be, fun sou awa chenani ya niinbisa fun biksi nara o wɛ a fun saksi di ba sou a nyɛ un, kin nama funɛ nyaŋi sintana. ¹²Ma nyɛ ya naa maga nyɛn Koosa tɔhɔn ti ni tusa sɔɔni, amaa yɛrɛ o kaa wa du ba naa maga nyɛn tɛɛnɛ nɔ maga ni domi sintana wa ma nyɛnɛɛ. O na paanu kinkan, domi o zimu di o nyɛni saha wa zi vusi.”

¹³Sel zen ti funɛ na di ba duŋni un a ta tɛɛnɛ nɔ maga ni chen, o fun la muksi nihaan naa funɛ lul nibabichɛla, kinkan. ¹⁴Ba fun kpa tiisi zen chɛnɛ lɛ a nyɛ haan ti ni di o za a la nyabaan ti, chen ni ba zi nyini un dooni a kok un a li sel ta ni bunsa tora awa pɛnsa nɔra. ¹⁵Doon sel zen ti fun nyɛ ni pal kinkan a li o nɔ ni a chi pul, chen ni o zi chuŋi un kaaliu. ¹⁶Amaa tɛɛnɛ funɛ puku a nyɔɔsi ni ti maga a suŋi nihaan ti. ¹⁷Sel zen ti funɛ na chenani yɛɛ, a paan fun bu si a du nihaan ti ni a gbaari. O fun bur a la chem ba naa maga tiŋ Koosa chiksɛ nɔ a ŋɔ nara ni di Yesu dɔ ba wa laal ni. Ba waa ya nihaan ti nibabichɛla bi lulɛ. ¹⁸Chen saha ti sel zen ti fun wa chiŋi teku ni nɔ ni.

Sel Zen Alɛ Fun Gbaari Te Tel Kin Ti Ni

¹Doone mu fun na sel zen digi ka o li ni ni. O funɛ kpak nyuuna nɔpɛ awa nyindaasa fire a chiksi koorsa nyuchigsa kin fi o nyindaasi ni. Ba fun sɔbi sɛm nawara la pini Koosa zoma a sak o nyuuna nɔpɛ ta ni. ²Sel zen ti funɛ chi wiibagarɛ ka o naŋgere awa o nɔ chi gbogumta. Sel zen naa funɛ chiŋi ni nɔ ni chen, fun kpa o kpok kinkan awa chenani o dɔ tɛɛnɛ nɔ tim maga a kpa du o nin ni. ³Mu funɛ nau ka ba huusi sel zen naa li ni ni chen, nyuhu digi di ba kpu un, amaa bar huusi ti funɛ petiu ka o vɛ siwi. Tɛɛnɛ nɔ tim maga funɛ na chenani yɛɛ, alaazibu fun kpak ba ka ba tiŋ sel zen ti. ⁴Ba fun jɛɛmi un a ŋɔ dɔŋ ni, “Anti zen a tel un akoo a kpak kpok di o wa un yo dɔŋa?” Ba gbanko funɛ jɛɛmi sel zen naa funɛ chiŋi ni nɔ ti ni, domi o funɛ kpa o kpok magau a nyɛ un.

⁵Ba fun nyɛ sel zen naa funɛ li ni ni chen nyinbaan di o pini Koosa zoma kinkan a dɔ tɛɛnɛ nɔ tim maga pɛn fumnaasi dalɛ. ⁶O fun pini Koosa awa o bar jɛɛmi dama wa ba naa maga nyɛn o tɔhɔn ti ni zoma. ⁷Ba fun nyɛ sel zen ti nyinbaan di o la chem Koosa nara wa laal ni a nyaŋi ba a kpa kpok a nyɛ un di o dɔ pulumsa awa buure ba naa maga la sɛm sɛm kurgɛ. ⁸Koosa funɛ te sɔbi ba naa maga la zi wa la o mi fali ti, sɔna a du o tɔn ti ni a zi naami tɛɛnɛ nɔ maga. O piisi be naa ba fun kpu chen, dɔ tɔn ti. Ba naa maga sɔna vɛ nyɛn tɔn ti ni, funɛ jɛɛmi sel zen tire.

⁹Ma cheŋi ma diŋsa a nu mu sɛm na nɛnɛ. ¹⁰O ya Koosa tutɔrɛ ba zi wa kpaksi ma bɔnɛ a tɔ dɛ a kpa chisi zene a kpu ma bɔnɛ. O lawa ma naa ya Koosa nara di ma namsi wa kanyita niu a kpak nɛnɛ hali o bɔ wa tel. Kin nama zi sir yau.

¹¹Doone mu fun na sel zen digi ka o li tɛɛnɛ ni. O funɛ kpak nyindaasa lɛwa a chi piisi be a sɛm sɛm zene wa ta zaŋ ni. ¹²O funɛ chiŋi sel zen naa nyuha funɛ huusi a peti chen, gantɛl nɛɛ a kpa o kpok a muksi ba naa maga nyɛn tɛɛnɛ nɔ maga ni di ba jɛɛmi sel zen nɔ. ¹³Sel zen naa funɛ li tɛɛnɛ ni chen, fun tum tum zene damata. Hali o funɛ nyɛ din li buudahau a tu wa tɛɛnɛ nara maga suwachak ni. ¹⁴Domi kpok naa sel zen naa nyuha funɛ huusi a peti chen, fun kpa a nyɛ un chen, o fun koti a tum tum zene a la mur tɛɛnɛ nɔ tim maga. O fun ŋɔ ba di ba kɔɔri vura o chi sel zen naa nyuha funɛ huusi ka o ha vɛɛn kpak miisa chen a jɛɛmi un. ¹⁵Ba funɛ kpa kpok a nyɛ naa funɛ li tɛɛnɛ ni chen di o nyɛ vur ti kinyini a koti a sɛm sɛma. Vur ti fun ŋɔ di ba kpaksi ba naa maga vɛ jɛɛmi un, a kpu. ¹⁶O gbanko fun kpa o titi dana a dani nara ba naa maga ya nibirige awa ba naa vɛ yaali, kin tima awa fara tima, ba naa ya yosa awa ba naa vɛ yaali a li ba nindilsa awa ba tilsa ni. ¹⁷Sel zen ti sɔn awa kɔksa nɔra di fumnɔra danɔra funɛ ya o dani. Nandigi wa fun kpak nyinbaan di o kpiŋi see o kpak dani nɔ a li un ni.

¹⁸Ma kpak zima, ma zi zimu di kɔksa nɔra di fumnɔra danɔra chiŋɛ baal digi sɔn bar chiŋi nɛɛ.

Koosa Nara Fun Lɔ Bool Fali

¹Doone mu fun nyini a na ka piisi be ti wa kɔk di fumnaasi danaasi tusugsa nara funɛ chiŋi bi naa ba yir Zaiyɔn. Ba funɛ sɔbi o sɔn awa o nyana sɔnnɛ a sak ba tilsi ni. ²Mu fun nu ta kpok a li Koosa tɔhɔn ti ni a chi ni chuuri gbɛntɛl ni awa nasɛha jimi kinkan. Ta ta gbanko funɛ chi nidamata la mo gɔnjisa. ³Ba naa wa piisi be ti funɛ chiŋi, ba se funɛ chem doonani Koosa jirima bar kani awa sela naasi ta wa nihɛɛta fumlɛ danaasi ta fun nyɛn, a lɔ bool fali. Kɔk di fumnaasi danaasi tusugsa ba naa piisi be ti fun lisi a li tɛɛnɛ nɔ tim maga, ba duŋduŋ funɛ koti a lɔ bool fali ti. ⁴Ba wa fun kpak haanasa akoo a daŋni nihaana yɔri yɔri a ya tu chaan tima. Piisi be ti funɛ lisi bau a li tɛɛnɛ nɔ tim maga ni, chen ni ba wa zi bu waligi dɔŋ ni. Ba waa ya ba naa o fun te lisi a nyɛ Koosa ni. ⁵O waa funɛ lisi ba a li ba tum tagna hali a wa peti. Nandigi wa kibu koti a fiksi ba.

Malaikasi Tora Fun Za Buudaha Bar Boli Ni

⁶Doone mu fun nyini a na ka malaika funɛ za buudaha bar boli ni. O fun chuŋi Koosa laaboor weri ti di o la nyɛ pulumsa awa buure ba naa maga la sɛm sɛm kurgɛ a nyɛn tɛɛnɛ nɔ ni. ⁷O fun ŋɔ ba ta zaŋa ni, “Ma nyɛ Koosa wa jirima a kipɛgi un o zenzen daha. Waa funɛ naami buudaha awa tɛɛnɛ wa teku ni wa nise. Saha telu di o di nara maga sɛria. Chendaha o lawa ma jɛɛmi un chenu.”

⁸Malaikasa lɛ tiina fun za a tiŋ te tel tiin ti gantɛl a ŋɔ, “Tɔhɔn zen naa ba yir Babilɔn, fun chɔk. Chɔkumsi tuma a naa o nara fun tum, chi sin kpokre o fun muksi ba ba nyɔ.”

⁹Malaikasa tora tiin ti fun za a tiŋ abalɛ ta mun ni a ŋɔ ta zaŋa ni, “Ba naa maga la jɛɛmi sel zen naa funɛ li teku ni ni chen akoo o vura a nyɛ o kpa o dana a dani ba nindilsa awa ba tilsa, ¹⁰Koosa na paan kinkan a du ba ni a lɛrgi ba diŋsa. O paan kinkan chi sin kpokre ba vɛ kpa kundɔŋ a pulsi, naa o muksi ba di ba nyɔ. O zi nyɛ ba kpa bau a du din ni di ba namsi kinkan a li piisi be ti awa o malaikasa naa o fun lisi a nyɛ o titi ni suwachak ni. ¹¹Din naa nyɛ ba namsi, nyɔɔsa zini buudaha hali saha naa vɛ kpak bɔ. Ba naa funɛ jɛɛmi sel zen ti awa o vur ti a nyɛ o kpa o sɔn a dani ba, ba waa la namsi a vɛ hiisi.”

¹²Chendaha o lawa Koosa nara ba naa la tiŋ Koosa chiksɛ nɔ ka ba vɛ bur Yesu tiŋi ni, ba li lalaknɔ namsi wa kanyita niu.

¹³Doone mu fun nu ta a li Koosa tɔhɔn ti ni ka o ŋɔ, “Sɔbi chenani mu kaa sɛm nan a dau. Ba naa tum tuma aa nyɛ ya kunyan ni a wa siti, ba tusa zi sɔɔniu.”

Koosa siim weri ti fun ŋɔ a gbaari, “I sɛma ya wutirɛ.” Koosa zi bɔ ba ba chimu a nyɛ ba hiisi a li ba tum kpok kinkan ni ka ba tusa sɔɔni.

Tɛɛnɛ Nɔ Maga Kina Kumi Saha Telu

¹⁴Mu fun nyini a na ka Yesu naa ya nibine be fun kani dobaal pilim daha ni. O funɛ chik salma nyuchigrɛ a kpak gorga diili o nin ni. ¹⁵Malaika fun li Koosa bar jɛɛmi dama a sɛm ta zaŋa a ŋɔ un, “Tɛɛnɛ nɔ maga kina kumi saha telu. Zer i gorga a la kum.” ¹⁶Doone Yesu naa funɛ kani dobaal ti ni chen fun viigi o gorga a kum tɛɛnɛ nɔ maga kina.

¹⁷Malaika digi fun li Koosa bar jɛɛmi dama naa nyɛn o tɔhɔn ti ni. O gbanko funɛ kpak gorga diilire.

¹⁸Malaikasa tora tiina naa la nyini din ti, fun li biŋbiŋ ti suwachak a fun tiŋ o gantɛl a sɛm ta zaŋa a ŋɔ a nyɛ naa o sak chen ni, “Zer i gorga diili a teŋsi bugil naa maga ba yir ‘vain’ ka a nɔna sɛri chen maga.” ¹⁹Malaika ti fun viigi o gorga ti a teŋsi bugil ta nɔna a lagmi a dau doonani ba hɛmsi a ni. Dooni awa Koosa paan kinkan ya kibɛgimnɛ. ²⁰Doonani ba hɛmsi a ni wa Jɛrusalɛm wa bol. Ba funɛ hɛmsi nɔna naa malaika ti fun lagmi a dau chen, chɛl kinkan fun li. Chɛl ti maga funɛ li, o fun pal a tɔ tɛɛnɛ maali kɔksa lɛ a zini buudaha o wa nibine nyuha mak.

Wichɔɔrtisa Nɔpɛ Naa Malaikasa Fun Kpak Wɛ

¹Doone mu fun nyini a na ka dana zen naa nyɛ alaazibu fun kpak min, fun nyɛn buudaha ni. Malaikasa nɔpɛ fun kpak wichɔɔrta a naa kurgɛ, kina nɔpɛ a nyɛn dooni. Ba wa kaali a nyɛ wichɔɔrtisi ta kpaksi tɛɛnɛ nɔ tim maga, chenani Koosa na paan a du ba ni a lɛrgi ba diŋsa zi wa petiu.

²Mu fun na Koosa nara ba naa maga vɛ jɛɛmi sel zen ti akoo o vura a vɛ nyɛ o kpa o sɔn awa kɔksa nɔra di fumnɔra danɔra a dani ba. Ba fun chiŋi a dugli bɛɛŋa naa funɛ pɛn a lili a chi diga ka din nyɛn o daha ni, a kpak gɔnjisa a naa Koosa fun kpa a nyɛ ba. ³Ba funɛ lɔ Mosis naa funɛ ya Koosa tumtumna awa piisi be ti bool a ŋɔ,

“Ya kunyana Koosa naa kpak kina maga kpok,

alaazibu fun kpak ya i tum zene daha.

I waa naa ya tɛɛnɛ nɔ tim maga koora.

Tum naa maga i tum,

a ya deŋliu a ya wuti.

⁴Ya kunyana,

i duŋduŋ ya bambi chaani tiina.

Chendaha o deŋlu di nibinsa maga kinyɛ hin jirima a ŋɔ ba dɔŋtim ni chenani i zen mak.

Tɛɛnɛ nɔ tim maga zi wa chiŋi i suwachak niu a jɛɛmi hinu,

domi ba zimu di i tuma maga deŋlu.”

⁵Ba funɛ lɔ bool ti peti, mu fun na ka doonani Koosa fun lisi kinkan o bar jɛɛmi dam ti ni, zɔɔnɔ puk. ⁶Malaikasa nɔpɛ naa funɛ kpak wichɔɔrtisa nɔpɛ ta fun li dooni. A fun laari kipilima kinkan a wer ka salma gar we kirisi a bambe. ⁷Ba fun la chiŋi sela naasi naa chiŋɛ a go Koosa jirima bar kani ti chen digi suwachak ni. O fun kpa Koosa naa nyɛn hali saha naa vɛ kpak bɔ, paan kinkan awa chenani o lɛrgi tɛɛnɛ nɔ tim maga diŋsa a du salma gbaŋsa nɔpɛ ni a nyɛ malaikasi ta ni. ⁸Koosa jirima awa o chaani wa o kpok kinkan funɛ chi nyɔɔsa su o bar jɛɛmi dam ti. Hali malaikasi ta nyɛ wichɔɔrsa nɔpɛ ta kpaksi tɛɛnɛ nɔ tim maga a peti, nandigi wa kizu dooni.

¹Doone mu fun nu ta a li Koosa bar jɛɛmi dam ti ni ka o fun ŋɔ malaikasi ta ni, “Ma kpa Koosa paan kinkan awa chenani o lɛrgi tɛɛnɛ nɔ tim maga diŋsa naa nyɛn salma gbaŋsi ta ni a la bini a biti du ba ni.”

²Tel te tiin ti fun te la biti a dau tɛɛnɛ ni. Chɔɔra tagna a naa nyɛ nara namsi kinkan, fun nyɛn ba naa sel zen ti fun dani ka ba jɛɛmi o vur ti chen.

³Malaikasa lɛ tiina fun la biti a du teku ni ni. O fun burgi a chi siwi chɛl di kin naa maga nyɛn un ni siti.

⁴Atora tiina fun la biti a du pula awa nise ni a maga burgi chɛl. ⁵Mu fun nu malaika ti ka o ŋɔ Koosa ni, “I waa naa ya bambi chaani tiina a vɛ kpak piili aa nyɛn, chenani i na tɛɛnɛ nɔ tim maga galimsa deŋlu. ⁶Ba funɛ kpu i nara awa i witinsa ka ba chɛl li a chɔ tɛɛnɛ ni. O deŋlu wa i nyɛ ba chɛl ba nyɔ lalaknɔ.” ⁷Doone mu fun nu ta a li biŋbiŋ ti ni ka o ŋɔ, “Ya kunyana Koosa naa kpak kina maga kpok, chenani i na ba galimsa deŋlu a ya wuti.”

⁸Malaikasa naasi tiina fun la biti a du nha ni, chen ni o nunum kinkan fun na nyinbaan a suksi nara. ⁹Nha ti funɛ nyɛ o nunum kinkan ti suksi ba, ba fun ŋɔ nɔɔna a nyɛ Koosa ni, domi waa funɛ nyɛ wichɔɔrsi ta kpaksi ba. Ba wa fun gil ba tum tagna a bur a nyɛ un jirima.

¹⁰Malaikasa nyuun tiina fun la biti a du kin nawara sel zen naa funɛ li ni ni chen, dɔ. O koor ti bar nyɛni fun wa biri ka o nitiŋɛ fun na paan a dusi ba zuluma. ¹¹Ba fun ŋɔ nɔɔna a nyɛ Koosa naa nyɛn o tɔhɔn ti ni ba chɔɔri ta awa ba namsi kinkan daha, amaa ba wa fun gil a li ba tum tagni ta ni.

¹²Malaikasa nɔra tiina fun la biti a du mɔɔga zen naa ba yir Yufretis. O maga fun hɛɛsi, chen ni koorsa ba naa kaa li nha bar yɛli a wa chen zi na nyinbaanu a wa. ¹³Doone mu fun na ka alizin tagna tora a chi sampɔrsa fun wa li sel zen naa duŋni nihaan ti awa sel zen naa li ni ni wa witiina naa vɛ zim Koosa, nɔɔni ni. ¹⁴Alizin tagna tora ta funɛ kpak kpok di a tum tum zene damata. Ba fun gba a lagmi tɛɛnɛ nɔ tim maga koorsa awa ba walɛ, chen ni Koosa wuzu zen naa o zi wa di ba sɛria chen wa tel, ba zi chem unu a li laal ni.

¹⁵Maa nu chenani ya kunyana ŋɔ ma. O ŋɔ, “Mu zi bur wau ka ma vɛ zim mu wɛ a chi ŋmɛɛr. Chenani Koosa bu vɛ na ma galimsa chi ma gatiwa. Ma doso a kilaari a saha maga, chen ni mu wa wa, ma wa zi kpak bar kpal a chiŋi ma na hiisa nara suwachak ni.”

¹⁶Chen saha ti alizin tagni ta fun te koorsa ba naa a fun lagmi dɔŋ ni suwachak a la tel doonani ba yir Amagɛdɔn a li Ju tim sɛm ni.

¹⁷Doone malaikasa nɔpɛ tiina fun la biti a du buudaha ni. Mu funɛ nu ta kpoku a li Koosa jirima bar nyɛni ni ka o ŋɔ, “Chenani mu di tɛɛnɛ nɔ tim maga sɛria duglɛ petiu.” ¹⁸Nasɛha fun nyiksi a jim ka tɛɛnɛ fun zigsi kinkan. Saha naa Koosa fun naami nibinsa hali chen saha ti, tɛɛnɛ ha wa zigsi chen. ¹⁹Babilɔn awa tɛɛnɛ nɔ maga tɔ zene fun chesi Koosa fun lisi chenani Babilɔn tima fun tum tum tagna damata a kpa o paan kinkan a du ba ni a lɛrgi ba diŋsa. O funɛ chi o nyɛ ba sinnɛ di ba nyɔ ba biti o maga a nyɔ. ²⁰Bɛ maga fun a burgi a chɔ tɛɛnɛ ni awa pulumsi naa maga ni go chen fun nyuksi. ²¹Doonbe kinkan fun li buudaha a wa yaksi nara. Doonbe ta yuyuk awa niŋmɛna booto yuyuk funɛ ya kibɛgimnɛ. Nara tima fun ŋɔ nɔɔna a nyɛ Koosa ni domi waa funɛ nyɛ doonbe ta yuyuk.

Chenani Koosa Fun Lɛrgi Sakaal Tiin Zen Diŋna

¹Doone malaikasa naa funɛ kpak salma gbaŋsa, digi fun wa ŋɔ min, “Sakaal tiin digi kanɛ mɔɔga damata bambaan ni. Kuwa a wa na chenani Koosa zi lɛrgi o diŋsa. ²Tɛɛnɛ nɔ tim maga awa ba koorsa wa un funɛ tum sakaal tuma. Chenani ba wa un fun tum chi sinnɛ ba nyɔ a dɛɛsi.”

³Koosa siim weri ti fun nyɛ malaika ti zer min a la nyabaan. Sel zen sɛm naa funɛ kpak nyuuna nɔpɛ awa nyindaasa fi funɛ nyɛn dooni. Ba fun sɔbi sɛm nawara la pini Koosa zoma kidamata a du un ni ka sakaal tiin ti fun zini un. ⁴O funɛ niŋi kibilima awa kisɛmwa a laari tula kina naa ba kpa salma awa buŋkul lilɛ a kɔɔri, kidamata. O funɛ kpak salma gbaŋa a li o nin ni a kpa kidoŋa a li o sakaal tum ni a du un ni. ⁵Ba fun sɔbi o sɔn naa mun soglee a sak o til ni. Ma nyɛ mu kpa un li gbampulim a ŋɔ ma. O mun ya, “min ya Babilɔn naa ya tɔ zen awa sakaal tima wa ba naa maga la tum tum doŋa kinkan niina.” ⁶Mu funɛ na di nihaan ti nyɔ Koosa nara awa ba naa ba fun kpu domi ba ha vɛ bur Yesu gantɛl tiŋi ni, chɛl a dɛɛsi.

Alaazibu fun kpak min kinkan o daha. ⁷Malaika ti fun ŋɔ min, “Yɛrɛ i nyɛ alaazibu kpak hin chen ni? Nihaan ti awa sel zen naa kpak nyuuna nɔpɛ awa nyindaasa fi ka o zini un, o wa un kpak mun naa soglee. Mu zi ŋɔ hin chenani o duu. ⁸Sel zen naa i fun na chen, wa bu to o miisa ni. O wa zi vusi ka o li bɔ naa vɛ kpak bar peti chen ni a kaali din dama. Koosa funɛ te sɔbi ba naa maga la zi wa la o mi fali ti, sɔna a du o tɔn ti ni a zi naami tɛɛnɛ nɔ maga. Ba naa kaɛɛ a na ka sel zen naa funɛ sou chen bu kpak miisa, alaazibu zi kpak bau kinkan.

⁹“Ninɛɛgɛ duŋduŋ la zi zim nan mun. Sel zen ti nyuuna nɔpɛ ta ya kuŋkule nyuuna nɔpɛ ka nihaan ti nyɛn a bambaan ni. Sel zen ti nyuuna nɔpɛ ta gbanko ya koorsa nɔpɛwa. ¹⁰Koorsi ta nara banyuu wa fun bu dɔ nandigi amaa digi ha vɛɛn dɔu. Ba ha wa vɔu nara banɔpɛ tiin ti koora. Ba wa vɔu un, o wa zi dɔ nara a vusi. ¹¹Sel zen ti funɛ ya koor gbanko. O wa si o sou ni a bu kpak miisa, o zi kpa o titiu a gbaari koorsa nɔpɛ ta ni a dɔ. O wa dɔ peti, o zi la zu din dam tiu.

¹²“Sel zen ti nyindaasa fi ya nara ba zi wa vɔti ba koorsa. Ba wa vɔti ba, ba wa sel zen ti zi dɔ kerifi bɛgimu. ¹³Ba fun lagmi a la nɔɔni di sel zen ti zi ya ba kaŋkoorau. ¹⁴Ba wa ba walɛ zi la chem piisi be ti wa o nitiŋɛ ba naa o fun lisi a nyɛ o titi ni ka ba vɛ bur a li o tiŋi ni, wa laal ni. Waa la zi nyaŋi koorsi ta, domi waa ya koorsa maga kaŋkoora.”

¹⁵Malaika ti fun bu ŋɔ min, “Lisi chenani nihaan sakaal ti fun kani mɔɔg damata bambaan ni. A waa ya pulumsa awa buure ba naa maga la sɛm sɛm kurgɛ. ¹⁶Sel zen ti wa o nyindaasa fi a naa ya koorsa zi ha nihaan tiu. O wa ba zi lɛrgi o gar were tau a ur o bara ni a kpu un a se a fu un wa din ni. ¹⁷O ya Koosa tutɔrɛ ba zi ya chen. O fun kpa un a du ba nyuuni ni di ba la nɔɔni a kpa sel zen ti a ya ba nihɛɛ hali Koosa sɛma wa ya wuti.

¹⁸“Nihaan sakaal tiina naa i na chen, ya Babilɔn tɔ zen ka o dɔ tɛɛnɛ nɔ tim koorsa maga.”

Tɛɛnɛ Nɔ Tim Maga Tusa Fun Chɔk Babilɔn Daha

¹A gantɛl ni mu fun na malaika digi ka o li Koosa tɔhɔn ti a tu wa tɛɛnɛ nɔ maga. O fun kpak kpok kinkan a nyɛ doon maga chaani. ²O fun tɛsi wa ta zaŋ ni a ŋɔ, “Tɔhɔn zen naa ba yir Babilɔn, fun chɔk. Alizin tagna awa zimebisa a nawara doŋee kinkan duŋduŋ nyɛn dooni. ³O wa tɛɛnɛ nɔ tim maga funɛ tum sakaal tuma kinkan. O chi o funɛ kpa sin a nyɛ ba ba nyɔ. O wa ba koorsa gbanko fun tum sakaal tuma ka nikpiŋɛ ba naa funɛ nyɛn bawu maga ni, fun na nyɔɔra kinkan a li un ni.” ⁴Doone mu fun nu ta a li Koosa tɔhɔn ti ni ka o ŋɔ,

“Ma naa ya mu nara,

ma waligi ma titi a li un ni.

Ma wa un tum tum tagna,

mu zi kpa ma a gbaari un niu a lɛrgi ma diŋsa.

⁵Mu lisu di o tum tagna iiu kinkan.

Nibine zi vɛ koti a guri a.

⁶Waa funɛ nyɛ nara tum tum tagna kinkan.

Ma nyɛ ba la tum tum tagna bilɛ lalaknɔ a nyɛ un.

Chenani o wa ba tum sakaal tuma funɛ chi sinnɛ o kpa nyɛ ba.

Ma nyɛ ba kɔɔri sin bilɛ lalaknɔ a la nyɛ un.

⁷O funɛ kpak kin naa maga o daŋniu ka nara fun nyɛ un jirima kinkan.

Ma nyɛ ba la namsi un lalaknɔ chen ni o tuha zi chɔku.

O yaa kpa o titirɛ a ŋɔ,

‘Min ya koor nihaan.

Mu wa ya luhaan naa tuha chɔkɛɛ.’

⁸Nan daha,

wichɔɔrtisa awa lɔsa zi vaan wa kpak unu o tuha chɔk,

ka din fu un.

Min ya naa ya ma kunyan Koosa zenu kinkan a zi di o sɛria.”

⁹Tɛɛnɛ nɔ tim maga koorsa ba naa wa un tum sakaal tuma, zi wa na tɔ zen tiu ka o bu din, ba zi wiu o daha. ¹⁰Hansura zi kpak bau kinkan o daha. Ba zi lagmi dɔŋ niu a chiŋi bar boli ni a ŋɔ dɔŋ ni, “Yɛrɛ o du Babilɔn tɔ zen ti ni? Kerifi bɛgim tuhu nɛɛ Koosa na o galimsa a ta un yɔri.”

¹¹Nikpine ba naa nyɛn bawu maga ni zi wiu o daha, domi nandigi wa bu ka a yau ba kina. ¹²Ba naa nyɛn dooni wa bura yausi ba salma, aniita, buŋkul lilɛ, buŋkul were, gar kurgɛ a naa ya kisɛma awa kibilima, kin nawara ba kpa daasa awa bɔl nyin wa sulmin wa lugɛ wa buŋkul zen a kɔɔri ka a malɛ kpok. ¹³Ba gbanko wa bura yausi ba ŋmaga, poora naa sɔɔra weree, tulale naa ba yir firaŋkinsens awa mɛr, sin, nu, sau, mɛ, nuhɛ, piisisa, zaagna, loori munzuta a naa zaagna lɛrgi, awa yosa. ¹⁴Nikpiŋɛ ta zi ŋɔ dɔŋ niu, “Ba naa maga nyɛn doon a la daŋni kinkan di ba yausi ya kin nama, situ. Kiwere a naa maga funɛ nyɛn dooni chen, kaalu. A wa zi bu bur wa.” ¹⁵Nikpiŋɛ ba naa funɛ na nyɔɔra kinkan a li nara tima ni chen, zi chiŋi bar boli niu a nyini chenani la ya. Hansura zi kpak bau kinkan ba wi o daha. ¹⁶Ba zi ŋɔ dɔŋ niu, “Yɛrɛ o du un ni? Ba naa funɛ nyɛn dooni, fun laari gar kurgɛ a naa ya kisɛma awa kibilima a di tula naa ba kpa salma awa buŋkul lilɛ wa buŋkul were a kɔɔri. ¹⁷Kerifi bɛgim tuhu nɛɛ, kin nama maga wa bu toli.

“Niduse awa ba nihɛɛta wa ba naa nyɛn arŋsi ni a gba nidamata, fun lagmi a chiŋi a li bar boli ni, ¹⁸a na tɔ zen ti ka o bu din. Ba funɛ wi o daha a ŋɔ dɔŋ ni, ‘Tɔhɔn nɔ funɛ zen a kaali tɔsi ta maga.’ ¹⁹Ba fun zɔk hɛɛra a saksi ba nyuuni ni di ba biksi nara di ba tusa chɔku kinkan, a ŋɔ dɔŋ ni, ‘Yɛrɛ o du un ni? Ba naa maga dɔ arŋsa yaa funɛ tum au dooni di ba na nyɔɔra a li o kidamati ni. Kerifi bɛgim tuhu nɛɛ, o kina maga wa bu toli.’ ”

²⁰Doone mu fun nu ta ka o ŋɔ, “Ma naa ya Koosa nitumɛ awa o witinsa wa ba naa maga nyɛn o tɔhɔn ti ni, ma nyɛ ma tusa sɔɔni kinkan domi tɔ zen ti chel daha. Waa funɛ na o galimsa a ta un yɔri ma daha.”

²¹Malaika kpok fun zer buŋkul a chi nam a yo du teku ni ni a ŋɔ, “Nannɛ Koosa fun kpa o kpok a chɔk Babilɔn tɔ zen, ka o bu vɛ nyɛni. ²²Ba naa la mo gɔnjisa a la hu gbetelsa awa kaabulsa wa fun bura ya a maga dooni. Ba naa kpak ba sɛmbiri tuma awa ba naa la nam sau wa fun bura ya a maga dooni. ²³Nandigi wa zi bu suk fitina dooni akoo a lagmi o chɛnsa di ba wa di diwe o haan fali dam ni. Nikpiŋɛ ba naa funɛ nyɛn dooni chen funɛ zim kpiŋi a kaali ba maga. Ba naa la tum tu bilima tumi a nyɛn dooni, fun mur nidamata.”

²⁴Babilɔn tima dɔ ba naa funɛ ya Koosa witinsa awa o nara, sou. Hali ba dɔ ba naa maga ba fun kpu tɛɛnɛ nɔ maga ni, sou. Chendaha o fun lɛrgi ba diŋsa a ta ba yɔri.

¹A gantɛl ni mu fun nu zɛmɛ kinkan ta zaŋa a li Koosa tɔhɔn ti ni ka ba ŋɔ, “Ma nyɛ ya pɛgi Koosa, domi o kpak jirima awa chaani kinkan wa kpok a lisi ya a li ya tum tagna ni hali a wa peti. ²Chenani o di nara sɛria deŋlu a ya wuti. O funɛ na sakaal tiina naa zen chenu galimsa a ta un yɔri, domi o funɛ nyɛ tɛɛnɛ nɔ tim maga wa un tum sakaal tumwa. Waa funɛ lɛrgi o diŋna domi o funɛ kpu o tumtumsiwa.” ³Ba fun tɛsi a ŋɔ, “Din naa fu un chen, nyɔɔsa zini buudaha hali saha naa vɛ kpak bɔ. Ma nyɛ ya pɛgi Koosa chen daha.” ⁴Nihɛɛta nara fumlɛ danaasi ta awa sel zene naasi a naa funɛ go Koosa jirima bar nyɛni fun si a pimi o suwachak ni a jɛɛmi un a ŋɔ, “Ami. Ma nyɛ ya maga pɛgi un a gbaari.”

Saha Telu Di Piisi Be Ti Kpa Haan

⁵Doone mu fun nu ta a li Koosa jirima bar nyɛni ni ka o ŋɔ, “O deŋlu di ba naa maga ya nizene awa ba naa vɛ yaali a ya o tumtumsa a la ɔm un, ba pɛgi un.” ⁶Mu fun bu nu zɛmɛ kinkan ta a chi ni chuuri kinkan awa nasɛha tɛsi, ka ba ŋɔ, “Ma nyɛ ya pɛgi Koosa. Waa dɔ kina maga a kpak kina maga kpok a ya ya kunyana. ⁷Waa ya nizen a kaali kina maga. Chendaha o lawa ya pɛgi unu ka ya tusa sɔɔni kinkan. Saha telu di piisi be ti kpa haan naa saksɛ o titi a pɔ. ⁸Ba funɛ nyɛ o haan ti nyinbaanu di o laari kichaani weri. A waa ya tum were naa Koosa nara fun tumi.”

⁹Malaikasi ta digi fun wa ŋɔ min, “Sɔbi chenani mu kaa sɛm nan a dau. Ba naa ba zi yir ba wa piisi be ti di diwe a li haan fali dam ti ni, ba tusa zi sɔɔni.” O funɛ sɛm nannɛ a peti a bu sɛm tama a gbaari, “Sɛm na ya Koosa wuti sɛmwa.”

¹⁰Mu fun gbiri o suwachak un di mu jɛɛmi un, amaa o funɛ ŋɔ minu, “Ta ya chen, domi mu wa hin awa i niinbisa ba naa funɛ ŋɔ nara ni di Yesu dɔ ba, ya o tumtumsa. Kijɛɛmi Koosa duŋduŋ.”

Chenani Yesu fun biksi nara tima wuti ti awa chenani Koosa witinsi ta fun biksi, ya kibɛgimnɛ.

Jɔn Fun Na Ka Nandigi Zini Zaag Pilim

¹¹Doone mu fun nyini a na ka Koosa tɔhɔn ti bulzɔɔnɔ puk, ka zaag pilim chiŋi dooni. Ba funɛ yir naa la zini un chen, wuti tiina awa naa tiŋ o ŋɔ. O yaa funɛ la laal ni saha maga a la di o dɔma sɛria awa chenani deŋlee ni. ¹²O se funɛ chi dinfullɛ ka o fun chik salma nyuchik damata o nyuhu ni. Ba fun sɔbi sɔn naa nandigi vɛ zim o mun a gbaari un ni, a sak un ni. ¹³Takta ziŋi naa o fun laari chen maga fun tɔ wa chɛl ni ka ba yir un ‘Koosa laaboor weri ti’. ¹⁴Lanjima damata ba naa nyɛn Koosa tɔhɔn ti ni fun tiŋ o gantɛl a zini zaag pilima a laari kipilima were. ¹⁵Ba nyuhu tiina fun kpak chisi nɔsa lɛ o li o nɔ ni naa o zi lisi a nyaŋi tɛɛnɛ nɔ tim maga. O zi sɔ bau wa kpok kinkan ni a hɛmsi bugil ta nɔna naa malaika ti teŋsi a lagmi a dau, a bar hɛmsi ni. Dooni awa chenani Koosa na paan kinkan a la zi lɛrgi tɛɛnɛ nɔ tim maga diŋsa ya kibɛgimnɛ. Waa kpak kpok a kaali kina maga. Chendaha o zi koti a ya chen. ¹⁶Ba fun sɔbi sɔn a sak lanjimasa nyuhu tiin ti takta ziŋi awa o naŋgeri ni. O funɛ ya, ‘Mu ya koorsa maga kaŋkoora.’

¹⁷Mu fun na malaika ka o chiŋi nha suwachak ni. O fun tɛsi kinkan awa ta zaŋ ni a nyɛ zimebisa a naa maga la za buudaha ni a ŋɔ, “Ma wa lagmi a di diwe naa Koosa zi nyɛ ma kinkan. ¹⁸O zi kpa koorsa, lanjimasa awa ba nihɛɛta, zaagna awa ba naa zinɛ a, ba naa ya nibirige awa ba naa vɛ yaali, ba naa ya yosa awa ba naa vɛ yaali, a wa ba magwa o zi kpa nyɛ ma ma di.”

¹⁹Doone mu fun na sel zen naa funɛ li ni ni awa tɛɛnɛ nɔ tim maga koorsa wa ba lanjimasa ka ba la di ba la chem naa la zini zaag pilim ti awa o lanjimasa wa laa ni. ²⁰Koosa tɔhɔn lanjimasi ta fun nyaŋi tɛɛnɛ nɔ tim maga lanjimasi ta a kpaksi sel zen ti awa witiina naa vɛ zim Koosa. Witiin ti yaa funɛ tum tum zenewa sel zen ti suwachak ni di o mur ba naa sel zen ti fun kpa o sɔn a dani ba a la jɛɛmi o vura. Koosa tɔhɔn lanjimasi ta fun kpa sel zen ti awa witiin ti a la yo a du bɛɛŋ naa din bu saha maga ni ka ba nyini. ²¹Koosa tɔhɔn lanjimasi ta nyuhu tiina naa funɛ zini zaag pilim ti, fun lisi chisi nɔsa lɛ ti a li o nɔ ni a kpu tɛɛnɛ nɔ maga lanjimasa ba naa kaɛɛ. Zimebisa fun li buudaha a wa di ba puŋ a ka.

Koosa Malaika Fun Vɔu Sintana Bun Tusuga

¹Doone mu fun na malaika ka o li Koosa tɔhɔn ti a tu wa tɛɛnɛ nɔ maga. O fun kpak zɔgli yuk awa bɔ naa vɛ kpak bar peti bulzɔɔnɔ saafibe a li o nin ni. ²O fun kpak sel zen sɛm naa funɛ te duŋni nihaan ti a vɔu un wa zɔgli ti ni hali bun tusuga. Waa ya sintana naa ba yir dum ti a nyɛn a vusi a ya alizin tagna koora. ³Malaika ti fun kpa un a yo du bɔ naa vɛ kpak bar peti chen ni a kpa saafibe ti a pur bɔ ti zɔɔnɔ a pɛri. O funɛ ya chene, chen ni o wa zi bu koti a mur tɛɛnɛ nɔ tim maga hali bu tusuk ti wa peti. Chen saha ti wa tel, ba zi lisi unu a nyɛ o hiisi tama.

⁴Doone mu fun na jirima bar kanɛ dooni. Ba funɛ kpa kpok a nyɛ ba naa kanɛ dooni di ba di sɛriasa. Mu gbanko funɛ na ba naa tɛɛnɛ nɔ tim maga fun kpu domi ba funɛ biksi ba Yesu wuti wɛu. Ba wa funɛ jɛɛmi sel zen ti akoo o vura, a vɛ nyɛ o kpa o sɔn a dani ba tilsa awa ba nisa. Kristo fun lɛli ba a li ba sou ni a nyɛ ba wa un ya koorsa a dɔ bun tusuga. ⁵Ba warɛ o fun te lɛli a li ba sou ni. O wa fun lɛli ba naa funɛ siti a kpalimi chen hali bun tusuga fun wa tel. ⁶Ba naa Kristo fun te lisi a lɛli ba a li ba sou ni, ba tusa zi sɔɔniu. Ba zi ya Koosa awa Kristo dam kɔkɔɔrsau ka ba wa un dɔ bun tusuga. Saha ti wa peti ka Koosa zi wa na ba naa kpalimi chen galimsa a ta ba yɔri, o wa zi wa la nɔɔni di o ya chen a nyɛ ba.

Koosa Fun Nyaŋi Sintana Awa O Walɛ A Li Laal Ni

⁷Bun tusuk ti wa peti, ba zi wa lisi sintanau a li bɔ ti ni. ⁸O zi la gbau a mur tɛɛnɛ nɔ nara a lagmi ba wa ba naa ba yir Gɔg awa Megɔg di ba la chem Koosa nara wa laal ni. Ba zi wa iiu kinkan a chi mɔɔga hɛchɛ naa nandigi vɛ koti a guri. ⁹Ba zi wa li bawu maga niu a go Koosa tɔhɔn ka o nara nyɛn dooni. O daŋni dooni bar nyɛni kinkan. Koosa zi wa tum dinu o li buudaha a wa chɔk ba naa maga go un. ¹⁰Doone ba zi zer sintana naa gbaɛɛ a mur nara a yo du a gbaari sel zen ti awa witiina naa vɛ zim Koosa a li bɛɛŋ naa din di saha maga ni. Doonee ba wa un zi namsi kinkan hali saha naa vɛ kpak bɔ.

Koosa Fun Di Tɛɛnɛ Nɔ Tim Maga Sɛria

¹¹Doone mu fun na jirima bar kani naa zenee a pilimi a wa na naa kani un ni. Tɛɛnɛ nɔ maga awa buudaha vɛ nyɛn o suwachak ni, amaa bar digi wa fun to a zi sogli. ¹²Mu fun na tɛɛnɛ nɔ tim maga ba naa funɛ ya nibirige awa ba baa funɛ vɛ yaali ka Koosa lɛli ba a li ba sou ni. Ba funɛ chiŋi o jirima bar kani suwachak nɛɛ. Ba fun puk Koosa mi fali tɔn ti awa tɔni naa ba fun sɔbi ba tuma a du a tuhu ni. O fun di ba sɛria a li chenani ba sɔbi a du tɔni ta ni. ¹³Ba naa funɛ siti ka ba sogli ba tɛɛnɛ awa teku ni ni awa ba naa funɛ nyɛn nisitɛ bar nyɛni ni, ba maga funɛ chiŋi dooni. O fun di ba sɛria a li tum naa ba tum ni. ¹⁴Ba fun kpa sou kpok awa nisitɛ bar nyɛni a yo du bɛɛŋ naa din nyɛn saha maga ni di a wa chɔk. ¹⁵Ba naa ba ha vɛ sɔbi ba sɔna a du Koosa mi fali tɔn ti ni, ba fun kpa ba a yo du bɛɛŋ ti gbanko ni.

Koosa Fun Naami Buudaha Awa Tɛɛnɛ Nɔ Maga Kifalɛ

¹Doone mu fun nyini a na ka buudaha awa tɛɛnɛ nɔ maga wa teku ni fun nyuksi. Koosa funɛ naami buudaha awa tɛɛnɛ nɔ maga kifalɛ di a chiŋi a bar chiŋi ni. ²Mu gbanko fun na Koosa tɔhɔn naa o fun lisi a nyɛ o titi ni ka o li o tɔhɔn ti a tu wa tɛɛnɛ nɔ maga. Ba funɛ yir un Jɛrusalɛm fali, domi o funɛ naami unu di o chiŋi kibuni ti bar chiŋi ni. O funɛ chi chenani nihaan yaa saksi di o yu baal chene. ³Mu fun nu ta kpok a li Koosa jirima bar kani ni ka o ŋɔ, “Kinu mu wati. Lalaknɔ Koosa awa nibinsa zi lagmi nyɛnu. Ba zi ya o narau ka o ka ya ba Koosa. ⁴O zi fiisi ba sine magau a ta a li ba se ni. Sou awa namsi wa bara wiha wa zi bu nyɛn. Chenani o fun te du wa bu toli.”

⁵Doone naa funɛ kanɛ a li Koosa jirima bar kani ni, fun ŋɔ min, “Mu naami kina maga kifalɛ.” O fun bu ŋɔ min, “Sɔbi chenani mu kaa ŋɔ hin nan a dau, domi mu sɛma deŋlu a ya wuti. ⁶Mu tum peteu. Mu vɛ kpak piili a nyɛn a vɛ kpak peti. Mu mi fali naa mu kpa nyɛ nara ni chi nisire. Ba naa maga nyɔksa kpak, mu zi nyɛ ba nyɔ dooniu yɔri. ⁷Ba naa maga kpak nɛnɛ hali a la tel o bɔ, mu zi nyɛ ba nyɔ dooniu. Mu zi ya ba Koosau ka ba ka ya mu bisa. ⁸Amaa ba naa bur a li mu tiŋi ni a li nara gantɛl a la tiŋ doŋ tuma a la kpu nara a la tum chɔkumsi tuma a la tum tu bilim tuma a la jɛɛmi vursa a ya nusun tima, mu zi na ba galimsau a kpa bau a yo du bɛɛŋ naa din nyɛn saha maga ni a ta ba yɔri.”

Koosa Jɛrusalɛm Fali Wɛ

⁹Doone malaikasa naa funɛ kpak salma gbaŋsa a kpa wichɔɔrtisa nɔpɛ a du a ni, digi fun wa ŋɔ min, “Kuwa mu biksi hin piisi be ti haan.” ¹⁰Koosa siim weri ti fun nyɛ malaika ti zer min a la zini bi ziŋziŋi nyuha. O fun biksi min Jɛrusalɛm fali naa Koosa fun lisi a nyɛ o titi ni ka o li o tɔhɔn ti a tu wa tɛɛnɛ nɔ maga. ¹¹Koosa funɛ kpa o jirima awa o chaani kinkan a du un ni ka tɔhɔn ti funɛ chaani a chi buŋkul lilɛ. ¹²Ba funɛ sa chechepure mɔgli ziŋirɛ a go un. O funɛ kpak bulzɔɔnɔ fidalɛwa ka malaikasa fidalɛ il bulzɔɔnɔsi ta. Ba funɛ sɔbi Ju tim buure nara fidalɛ sɔna a marigi a ni. ¹³Bulzɔɔnɔsa tora funɛ chem nha bar yɛli. A batora chem pul mun. A batora ka chem nha bar cheli. A batora ka chem pul nyuha. ¹⁴Ba fun kpa buŋkul fidalɛ a sɔbi piisi be ti nitumɛ nara fidalɛ sɔna a sak a ni a kpa a du chechepure ti zɛchik ni. ¹⁵Malaika naa funɛ sɛm min funɛ kpak da zaamsirɛ a li o nin ni di o zaamsi tɔhɔn ti awa o chechepure ti wa o bulzɔɔnɔsi ta. ¹⁶Tɔhɔn ti bar mɔgle ta funɛ mak dɔŋwa. Malaika ti fun zer o da ti a maksi un. O funɛ ya tusuga awa kɔksa nyuunwa a go a la kaali a chem a vɛɛn ziŋ buudaha ni chen. ¹⁷O fun maksi chechepure ti biksi di o ya naŋgere kɔksa lɛ di fidanɔrawa. Malaika ti funɛ maksi a chi nara maksirɛ. ¹⁸Ba funɛ kpa buŋkul wer naa ba yir ‘jasipa’ a sa chechepure ti a kpa salma naa la lɛli a chi diga a sa damsa. ¹⁹Ba funɛ kpa buŋkul were a naa kurgɛ a sa zɛchik ti a saksi dɔŋ ni. Ba funɛ te kpa ‘jasipa’ a sa a zi kpa buŋkul were naa ba yir ‘safa’ a sak un ni. Ba fun bu kpa atora tiin naa ba yir ‘aget’ a sak a bu kpa anaasi tiin naa ba yir ‘ɛmɛral’ a sak. ²⁰Ba fun bu kpa anyuun tiin naa ba yir ‘ɔniks’ a sak a bu kpa anɔra tiin naa ba yir ‘kanilian’ a sak. Ba fun bu kpa anɔpɛ tiin naa ba yir ‘kɔɔts’ a sak a bu kpa mɛnasa tiin naa ba yir ‘bɛril’ a sak. Ba fun bu kpa dikto tiin naa ba yir ‘topas’ a sak a bu kpa fi tiin naa ba yir ‘kalkɛdoni’ a sak. Ba fun bu kpa fi di kibɛgim tiin naa ba yir ‘tɛkuwas’ a sak a bu kpa fidalɛ tiin naa ba yir ‘amɛtis’ a teŋ gantɛl a sak. ²¹Ba funɛ kpa buŋkul were fidalɛ naa ba yir ‘pil’ a kɔɔri bulzɔɔni fidalɛ ta, a kpa salma weri a chi diga a kɔɔri nyinbaanasa.

²²Ba wa fun sa Koosa bar jɛɛmi dama, domi ba naa nyɛn dooni funɛ jɛɛmi ba kunyana Koosa naa kpak kpok a kaali kina maga awa piisi be ti bawu maga ni. ²³Ba naa funɛ nyɛn dooni wa funɛ nyini nha awa pɛn se ni di a nyɛ ba chaani. Koosa awa piisi be ti jirima awa ba chaani kinkan funɛ nyɛ ba chaani. ²⁴Tɛɛnɛ nɔ tim maga zi val o chaani ti niu awa ba koorsa zi kpa ba jirima a wa gbaari un niu. ²⁵Ba wa zi far bulzɔɔnɔsi ta, domi dusum wa toli. A yaa puk chene saha maga. ²⁶Tɛɛnɛ nɔ tim maga zi kpa ba jirima kinkanu a wa gbaari un ni. ²⁷Tum tagna nitumɛ awa ba naa tum chɔkumsi tuma a la suni wɛ, ba wa zi koti a zu dooni. Ba naa ba fun sɔbi ba sɔna a du piisi be ti mi fali tɔn ti ni duŋduŋ la zi zu dooni.

¹Malaika ti fun biksi min Koosa mi fali pul naa la chaani a chi diga. O funɛ li Koosa awa piisi be ti jirima bar kani nɛɛ, ²a pal tu la tɔhɔn ti nyinbaan zen bambaan ni. Koosa mi fali bugila funɛ nyu a chiŋi pul ti nɔsi ni, a ya fun nɔn nɔni fidalɛwa bun bɛgim. A kpachaga nyɛ tɛɛnɛ nɔ tim maga na alaafɛ. ³Kin nawara Koosa fun ŋɔ nɔ a nyɛ wa zi nyɛn tɔhɔn ti ni. Koosa awa piisi be jirima bar kani nyɛn dooni.

Chendaha ba tumtumsa duŋduŋ nyɛn dooni a la jɛɛmi ba. ⁴Ba na Koosa seu ka o fun sɔbi o sɛn a marigi ba tilsa, ⁵a nyɛ ba ya koorsa hali saha naa vɛ kpak bɔ. Dusum wa fun to dooni, domi ba kunyan Koosa la nyɛ ba chaani. Ba wara daŋni nha akoo fitinsa nyɛ ba chaani dooni.

Yesu Fun Ŋɔ Di O Zi Bur Wau Lalaga

⁶Doone malaika ti fun ŋɔ min, “Chenani mu kaa ŋɔ hin deŋlu a ya wuti. Ya kunyana Koosa naa funɛ kpa o siim weri ti a du o witinsi ta ni, funɛ tum o malaika di o biksi o tumtumsa chenani la zi wa ya lalaga.”

⁷Yesu ŋɔ ma, “Ma nu mu sɛm na. O wa zi vusi ka mu bur wa. Ba naa maga se su chenani mu sɔbi a li tɔn nɔ ni, ba tusa zi sɔɔni.”

⁸Min, Jɔn, funɛ nau a nu kin nama maga. Mu funɛ na a nu kin nama peti, mu fun gbiri malaika naa funɛ biksi min, suwachak ni di mu jɛɛmi un. ⁹Amaa o funɛ ŋɔ minu, “Ta ya chen, domi mu wa hin awa i niinbisa ba naa ya Koosa witinsa ka ba tiŋ tɔn nɔ sɛma nɔ, ya Koosa tumtumsiwa. Kijɛɛmi o duŋduŋ.” ¹⁰O fun bu ŋɔ min, “Ta kpa sɛm naa nyɛn tɔn nɔ ni a sogli, domi o wa zi vusi ka a zi ya wuti. ¹¹Chen saha ti wa tel, ba naa la tum tum tagna awa tum doŋa, ba zi tum au a gbaari. Ba naa ka la tum tum were, ba zi tum au a gbaari. Ba naa ya tu chaan tima gbanko tusa zi chaaniu a gbaari.”

¹²Yesu ŋɔ, “Ma nu mu wati. O wa zi vusi ka mu wa bɔ ma chim a li chenani ma tum. ¹³Mu vɛ kpak piili a nyɛn a vɛ kpak peti.

¹⁴“Ba naa chaksi ba kilaarɛ di a ta kpak doŋa a kpak nyinbaan di ba zu tɔhɔn ti bulzɔɔnɔ a di Koosa mi fali bugili nɔna, ba tusa zi sɔɔniu. ¹⁵Amaa ba naa la tum tum doŋa a la tum tu bilim tuma a la tum chɔkumsi tuma a la kpu nara a la jɛɛmi vursa ka ba tusa sɔɔni awa nusun ni, ba maga zi wa kpalimi tɔhɔn ti dentil niu.

¹⁶“Min, Yesu, funɛ tum mu malaika di o mɔɔli kin nama maga a nyɛ ba naa maga la tiŋ min ni. Min ya koor Devid be luli. Mu chaani kinkan chi chau wul.”

¹⁷Koosa siim weri ti awa piisi be haan ti la ŋɔ, “Ma wa.”

Ba naa maga nu ba sɛma zi gbaari a ŋɔ, “Ma wa.”

Ma naa maga nyɔksa kpak, ma wa nyɔ Koosa mi fali ni yɔri.

Jɔn Mak Tɔn Nɔ Banɔwa

¹⁸Min, Jɔn, la te ba naa maga nu tɔn nɔ sɛma, nin kinkan. Nandigi wa kpa kundɔŋ a gbaari mu sɛm nama ni, Koosa zi kpa wichɔɔrtisa a naa malaikasa nɔpɛ ta kpaku a gbaari chenani o kaa lɛrgi o diŋnau. ¹⁹Nandigi lisi kundɔŋ a li tɔn nɔ ni, Koosa wa zi nyɛ o zu o tɔhɔn ti a di o mi fali bugili nɔn a naa wɛ mu ŋɔ ma a li tɔn ti ni.

²⁰Naa chiŋɛ mu sɛm na gantɛl ni ŋɔɛɛ di, “Wuti o wa zi vusi ka mu bur wa.” Nyɛ o ya a chi chenani i ŋɔ chen.

Ya kunyana, bur kuwa.

²¹Ya kunyan Yesu kisuŋi ma maga.