FILIPAI TIMA

FILIPAI TIMA TƆN

¹Min waa, Pɔɔl, la sɔbi tɔn nɔ a nyɛ ma. Mu wa Timoti ya naa ya Yesu Kristo tumtumsa zaami ma naa ya Koosa nara awa ma nihɛɛta awa ma nisuŋɛ a li Filipai ni. Ma wa Yesu Kristo ya nibɛgimnɛ.

²Ya kunyana Koosa awa ya kunyan Yesu Kristo kisuŋi ma a kinyɛ ma bara sɔɔna.

Pɔɔl Fun Sumi Koosa A Nyɛ Ba

³Mu yaa lisi ma wɛu a la zaami Koosa ma daha. ⁴Muu sumi un ma daha, mu tuha sɔɔniu kinkan. ⁵Domi saha naa ma fun nu Koosa laaboor weri ti hali wa zinan, ma yaa suŋi minu di mu ŋɔ nara ni o wɛ. ⁶Mu kpak bambi di Yesu Kristo wa bur wa, Koosa zi wa peti tum naa o fun piin a tum ma niu. ⁷Mu daŋni mau kinkan. Chendaha o weru wa mu lisi ma wɛ nan saha maga. Ba kpak min a tɔ dɛ koo mu chiŋɛ Koosa laaboor weri ti gantɛl ni a sɛm nara ni di o kpak wutiu, Koosa yaa funɛ suŋi minu awa ma maga. ⁸Koosa ya mu sɛhɛra tiina di Yesu Kristo kpa o daŋni a nyɛ min mu daŋni ma kinkan.

⁹Nannɛ muu sumi Koosa ma daha. Mu sumi unu di ma zi wa zim unu wuti ni a kidaŋni dɔŋa kinkan aa gbaari, ¹⁰chen ni saha maga ma zi kotiu a zim a lisi nyinbaan weri. Ma ya chen, Kristo wa bur wa, ma zi kotiu a chem un wa tu chaani a ta kpak galimsa. ¹¹Yesu Kristo zi suŋi mau di ma ya nibin werewa kinkan a chi chen. Nara zi na mau a kidaŋni ba pɛgi Koosa a nyɛ un jirima.

Kristo Ya Pɔɔl Nyɛni Nyuha.

¹²Mu niinbisa, mu daŋni mu ŋɔ mau chenani ba fun kpak min a tɔ dɛ chen nyɛ Koosa laaboor weri ti pisiu a gbaari. ¹³Koor nyuhu tiina Siiza lanjimasa ba naa maga la il min awa nidamata a nyɛn bar nɔ, zimu di ba funɛ tɔ min dɛrɛ muu tiŋ Kristo daha. ¹⁴Nan daha, Yesu nitiŋɛ nidamata kpak bambe kpok a gbaari a biksi nara Koosa laaboor weri ti wɛ.

¹⁵Nara bɔnɛ ba naa kpak handɔta min ni, ba biksi narawa Kristo wɛ. Bɔnɛ ka biksi o wɛ a suŋi min. ¹⁶Ba waa la daŋni min aa zim di Koosa funɛ kpa min a du bar nɔ, chen ni mu zi chiŋi o laaboor weri ti gantɛl niu. ¹⁷Ba naa kpak handɔta min ni, ba biksi narawa Kristo wɛ awa ba nyina nɛɛ. Ba ya se timwa a daŋni ba gbaari mu namsi ni a li dɛ nɔ ni.

¹⁸Amaa o magu. Bɔnɛ biksi nara Kristo wɛ a li ba bambe nee, bɔnɛ ka biksi ba a li ba nyina ni. Kristo wɛwa ba maga biksi. Chendaha mu tuha sɔɔnɛu. ¹⁹Maa sumi Koosarɛ mu daha ka Yesu Kristo siim weri ti kisuŋi min. Chendaha mu zimu di ba zi wa yisi minu a li dɛ nɔ ni. Kin nama daha, mu tuha gbanko sɔɔni kinkan aa la. ²⁰Mu kpak miisa koo mu siwɛɛ, mu se sɛrɛu lalaknɔ ka mu kpak bambi bɛgim Kristo ni, chen ni mu wa zi na hiisa a kpak bambi kpok kinkan. Mu ya chen, mu zi kpa mu barau a nyɛ un jirima kinkan a chi chenani mu ya nyɛ un jirima chen. ²¹Mu nyɛni mun ya baŋa? O mun ya Kristo. Mu sowɛɛ, mu wa un zi nyɛnu. Chen bɔɛɛ. ²²Amaa mu kpak miisa, mu zi kotiu a tum tum were a gbaari a nyɛ un. Mu wa zim chenani mu zi lisi. ²³A muksi minu mu bambi ni kinkan. Mu daŋni kinkan di mu sou a la nyɛn Kristo wati. Mu ya chen, waa kaali wa mu nyɛn bar nɔ. ²⁴O deŋlu kinkan di mu nyɛn bar nɔ ma daha. ²⁵Mu kpak bambi kin nama wɛ ni. Chendaha mu zim di mu zi nyɛn bar nɔu a koti a suŋi ma se su un a gbaari ka ma tusa sɔɔni kinkan. ²⁶Ma wa min bu wa lagmi dɔŋ ni, min la zi ya ma jirima tiina, chen ni ma zi pɛgi Yesu Kristou kinkan mu daha.

²⁷Ma zim chenani o deŋliu wa maa tiŋ un. Maa tiŋ chen, chen ni mu wa wa ma wati lalaga koo mu vusu a nu ma wɛ, mu zi zimu di ma kpak nɔ bɛgimu wa dɔŋ ni a kpak nɛnɛ, a kpak un ma bambe ni kinkan di ma biksi nara Koosa laaboor weri naa nyɛ ba se su un wɛ. ²⁸Ma ta ɔm ma dɔma hali tama. Nan la zi biksi ba di Koosa titi zi wa na ba galimsau a ta ba yɔri, a biksi ma di o zi yisi mau a li ma tum tagna ni hali o wa peti. ²⁹Waa nyɛ ma se su Kristo a nyɛ ma gbanko namsi o daha. ³⁰Mu funɛ nyɛn ma wati, ma funɛ na chenani mu namsiu. Lalaknɔ ma nu chenani mu ha vɛɛn a namsiu. Ma titi gbanko namsiu chen ni.

Kristo Ya Nizen A Kaali Kina Maga

¹Ma naa la tiŋ Kristo nan o kpami mauu? Chenani oo daŋni ma belimi mauu? Ma wa Koosa siim weri ti ya nɔ bɛgimuu? Maa daŋni dɔŋa a kpak siki wa dɔŋ niuu? ²Kin nama ya chen, ma nyɛ ma lise ya kibɛgim, chen ni mu tuha zi sɔɔniu hali o wa peti. Ma gbanko kpak nɔ bɛgim a kidaŋni dɔŋa saha maga. ³Ma ta ya se tima a kidaŋni sɔna. Ma ta lisi di ma ya nibin werewa a kaali ma dɔŋtima. Ma ka ya jɛrgɛ tima. ⁴Ma ta nyini ma titi kina duŋduŋ, amaa ma nyini ma dɔŋtima kina wɛ gbanko. ⁵O lawa maa lisi a chi chenani Yesu Kristo funɛ lisi.

⁶O du chenani Koosa durɛ saha maga,

amaa o wa fun saksi di o kpak un kpok.

⁷O fun kpa chenani o du a ta gantɛl ni a kaali a wa burgi chenani nibinsa du.

⁸O funɛ ya jɛrgɛ tiinnɛ a la tiŋ Koosa nɔ a sou.

Hali o fun sou a li daakakli ni.

⁹Chendaha Koosa fun zer un buudaha a nyɛ un sɔn naa zenee a kaali sɔna maga,

¹⁰chen ni ba naa maga Koosa fun naami ka ba nyɛn bawu maga ni zi wa gbiri o suwachak niu a nyɛ un jirima.

¹¹Ba maga zi wa ŋɔ gbampulim niu di Yesu Kristo ya ba kunyan ti.

Chen la zi nyɛ o nyana Koosa jirimau.

Ma Tu Chaana Chi Wuliwa A Li Buudaha Ni

¹²Mu bi daŋnɛ, mu funɛ nyɛn ma wati, ma funɛ tiŋ mu nɔu. Lalaknɔwa mu vɛ nyɛn ma wati, waa ya kibirigi wa ma ha vɛɛn tiŋ mu sɛm ta nɛnɛ. Saha maga maa nyɛ Koosa wa jirima kinkan aa kitum chenani deŋlee a chi ba naa Koosa yisi a li ba tum tagna ni. ¹³Saha maga Koosa yaa tum ma bambe niu, chen ni ma zi zim chenani o daŋni ma tumu.

¹⁴Ma tum o tuma a ta zulimi ma dɔŋtima a kidi dɔŋwa amɔrɛ. ¹⁵Ma waa ya o bisa a kpak tu chaana a vɛ kpak galimsa. Ba naa ya nusun tima a la tum tum tagna kinkan, nyɛnu a go ma. Ma chaani ba bambaan ni a chi wula chaani buudaha ni, ¹⁶aa kibiksi ba chenani Koosa daŋni o kpa o mi fali ti a nyɛ ba. Maa tum nan, ka Kristo wa bur wa, ma zi ya mu jirima narau. Mu tum nama maga mu tum a nyɛ ma nan, a wa zi ya yɔri.

¹⁷Ma se su Koosa ma tum a nyɛ un chen, chi chenani Ju tim ta fun kpa sela a kɔɔri kɔɔra a nyɛ un chene. Ba kpu min, mu tuha zi sɔɔniu. ¹⁸O lawa mu wa ma gbanko tusa sɔɔniu.

Timoti Awa Ɛpafrodaitus Baga Nyɛn Ma Ni

¹⁹Ya kunyana Yesu Kristo nyɛ min bambi bɛgim mu tum Timoti ma wati lalaga, chen ni o wa bur wa, o zi kpami minu wa ma laaboora ni. ²⁰O duŋduŋ nyɛn mu wati bar nɔ a bɔni chenani mu baga nyɛn ma ni. ²¹Ba naa kaɛɛ bar nɔ, ba baga nyɛn ba titi kinnɛɛ. Ba baga wa to Yesu Kristo kina ni. ²²Ma zim chenani Timoti bambi du awa chenani mu wa un fun tum a chi nyana awa o be a biksi nara Koosa laaboor weri ti wɛ. ²³Mu wa zim chenani kina zi du min ni, mu zi tum unu ma wati. ²⁴Ya kunyan ti la nyɛ min bambi bɛgim di mu titi zi kotiu a wa na ma lalaga.

²⁵Mu lisi di o deŋlu di mu tum ya niinbe Ɛpafrodaitus ma wati lalaknɔ. Ma funɛ tum unu di o wa suŋi min. O funɛ kpaŋi o titiu kinkan di o wa min kitum bar nɔ nɛnɛ. ²⁶O kpak unu o bambi ni kinkan di o wa na ma maga. O baga funɛ nyɛnu di ma nu di o bara wa fun lɛm. ²⁷O ya wutirɛ di o bara wa fun lɛm ka o daŋni o sou, amaa Koosa funɛ kpak un sikiu o na alaafɛ. Koosa funɛ kpak min gbanko wa sikiu, domi o fu siwɛɛ, mu tuha fu zi chɔku a gbaari. ²⁸Chendaha mu kpak un mu bambi ni a tum un ma wati lalaga. Ma na un, ma tusa zi sɔɔniu ka chenani maa tiŋ wa zi bu muksi min kinkan. ²⁹O wa pu ma, ma la un a du wa tu sɔɔni ya kunyan ti daha. Ma nyɛ ba naa maga chi un wa jirima. ³⁰Waa chiŋi ma bar chiŋɛ ni a tum tuma a nyɛ Kristo ni a suŋi min. Hali o fun la zu bar tagna ni a daŋni o sou.

Lalaknɔ Koosa Wa Bu Na Ya Galimsa O Wati

¹Mu niinbisa, ma nyɛ ma tusa sɔɔni ya kunyan ti daha. Mu daŋni mu ŋɔ ma wu digirɛ. Mu funɛ te sɔbiu o wɛu a nyɛ ma a bura sɔbi nan. O zi suŋi mau ma ta cheli. Chendaha ma tuha sɔɔni di mu ya chen. ²Ma doso kinkan ba naa funɛ teŋsi ba titi bara a la tum tum tagna a la daŋni ba teŋsi ma gbanko chen. Ba chi vasa a naa ya yɔrirɛ a gba a tum tum tagniwa. ³Ba teŋsi ti wa ya wuti. Koosa wara daŋni ya teŋsi ya bara, domi o funɛ kpa o siim weri tirɛ a nyɛ ya, chen ni ya zi kotiu a jɛɛmi un wa wuti ni. Lalaknɔ Yesu Kristo ya ya jirima tiina. Ya wa bu kpak wu digi a li chenani nara tum tuma li ba titi kpok ni. ⁴Nandigi kote a kpak wu digi a li chenani nara tum tuma a li ba titi kpok ni, mu zi kaali ba magau. ⁵Ju tim ta funɛ lul min a li Bɛnjamin lul nɛɛ. Mu ya Ju narrɛ wuti ni. Mu funɛ ya wuzu bunɔpɛ, ba fun a teŋ min. Mu fun wa bi a burgi Farisi tim nidigi. Ba waa la tiŋ Koosa chiksɛ ta nɛnɛ. ⁶Nandigi wa zi koti a ŋɔ di mu funɛ chɔk au. Mu se funɛ sɛriu hali mu muksi ba naa tiŋ Yesu kinkan. ⁷Saha digi mu funɛ lisiu di kin nama ya mu nyɔɔrrɛ, amaa lalaknɔwa mu zim Kristo, mu zimu di a ya yɔrirɛ. ⁸Chenani mu fun tiŋ saha digi, lalaknɔ mu lisu di a chi chaasiwa. Nibine zim ya kunyana Yesu Kristo, chen kaali a nama maga kinkan. Chendaha muu daŋni mu zim di Kristo ya mu nyɔɔra. ⁹Mu daŋni di o wa min zi burgi nibɛgimnɛ hali o wa peti. Mu funɛ tiŋ Koosa chiksɛ ta, o ha funɛ vɛɛn na mu galimsau. Lalaknɔ mu si su Kristo, Koosa wa bu na mu galimsa. ^10-11Mu daŋni mu zim Kristo duŋduŋnɛ nɛnɛ a kpak kpok naa Koosa fun kpa a lɛli Kristo a li o sou ni chene. Mu vɛɛna daŋniu mu namsi a sou a chi un, chen ni Koosa zi lɛli minu a li mu sou ni mu nyɛn o wati.

Ma Nyɛ Ya Na Kin Nawara Nyɛn Ya Suwachak Ni

¹²Mu wara sɛm di mu piin na kin nama magau. Mu ha wa ya nibin weri a peti. Kristo dɔ min lalaknɔ. Chendaha mu kpaŋi mu titiu kinkan di mu zi wa dɔ kin namau. ¹³Mu niinbisa, mu ha wa lisi di mu dɔ kin nama. Mu kpa mu bambi a du wu bɛgim nɛɛ. Mu suglɛ wuzuna naa kaali chenu aa kpak un mu bambi ni a na kin nawara nyɛn mu suwachak ni. ¹⁴Koosa funɛ yir min di mu wa lagmi Yesu Kristo ni a nyɛn o tɔhɔn ti ni wuzu digi. Chendaha mu kpaŋi mu titi di mu ya chen.

¹⁵Ya naa maga la tiŋ Kristo aa kpak un nɛnɛ, ya maga kilisi chen. Ma bɔnɛ vɛ la nɔɔni chenani mu sɔbi chen, Koosa zi suŋi mau ma zim chenani mu biksi ma. ¹⁶Ma nyɛ yaa tiŋ chenani ya piinsa tiŋ hali wa zinan.

¹⁷Mu niinbisa, o lawa ma zer mu ninu a li chenani mu tiŋ Kristo ni. Ya waa funɛ biksi ma nɛnɛ. Maa nyini ba naa la tiŋ ya biksi ti. ¹⁸Mu funɛ ŋɔ mau bu damata di nidamata vɛ Kristo daakakli biksi ti. Lalaknɔ mu bura ŋɔ mau awa siini ni. ¹⁹Ba titi daŋnɛ kaali kina maga. Ba zer ba titi a li ba tum tagna naa nyɛ ba na hiisarɛ daha. Baa lisi tɛɛnɛ nɔ maga kina duŋduŋnɛ. Kin nama daha, Koosa zi wa chɔk bau. ²⁰Ya waa ka ya Koosa tɔhɔn ti nara. O nyɛn ya bambe niu di ya pɔ ya kunyan Yesu Kristo naa funɛ yisi ya a li ya tum tagna ni ya tiŋ un, o wa bur a li dooni a wa. ²¹O wa wa, o zi chɛrgi ya barau a naa vɛ kpoki a kɔɔri a a chi o titi bara naa kpak kpok awa chaani kinkan. O kpok nɔ gbanko zi nyɛ o lagmi kina magau a dɔ a.

Chenani Ma Zi Kpak Ya Kunyan Ti Nɛnɛ

¹Mu niinbisa, mu yaa daŋni mau kinkan. Ma waa ya mu jirima nara aa nyɛ mu tuha sɔɔni saha maga. Mu bi daŋnɛ, mu daŋni mu ŋɔ mau chenani ma zi tiŋ ya kunyan, chen ni ma zi kpak unu nɛnɛ. ²Mu sumi ya toosau Yuodia awa Sintaiki ba naa la tiŋ ya kunyan ti, di ba la nɔɔni wa dɔŋa. ³Nihaana nama awa Klɛmɛnt wa tumtumsa bɔnɛ wa min, ya waa funɛ tum kinkan di ya biksi nara tima Koosa laaboor weri ti wɛ. Mu dɔŋtiin birigi naa wa min la tum Kristo tuma, mu sumi hinu di i suŋi ba. Koosa fun sɔbi ba naa la o mi fali ti, sɔna a du o tɔn ni. Ba sɔna nyɛn dooni.

⁴Ma nyɛ ma tusa sɔɔni saha maga ya kunyan ti daha. Mu zi bukoo nɔ mau, ma nyɛ ma tusa sɔɔni.

⁵O zi wa bur wa lalagau. Chendaha o lawa ma ya jɛrgɛu nara wati. ⁶Ma ta nyɛ wu digi kimuksi ma, amaa maa zaami Koosa a kisumi un di o kpa kin naa maga ma daŋni a nyɛ ma. ⁷Koosa nyɛ ma bara sɔɔni kinkan. Chen zi nyɛn ma bambe awa ma lise niu domi ma wa Yesu Kristo ya nibɛgimnɛ. Chenani o ya chen kaali chenani ya zim.

⁸Mu niinbisa, ma nyɛ mu lagmi a nama maga a ŋɔ ma. Ma yaa lisi kin naa ya wuti a kpak jirima a deŋli a chaani a wer. Kin nawara nara pɛgi, maa lisi a wɛ. ⁹Mu funɛ nyɛn ma wati, ma fun a nu mu biksi ti a na mu tuma. Maa lisi mu biksi ti wɛ aa kitum ma tuma a chi min. Ma ya nan, Koosa zi sɔɔni ma barau kinkan a nyɛn ma wati.

Pɔɔl Fun Zaami Ba Ba Papaha Ti Daha

¹⁰Ya kunyan ti funɛ nyɛ mu tuha sɔɔniu kinkan, domi ma funɛ bu biksi minu chenani ma baga nyɛn min ni. Saha digi ma funɛ kotiu a suŋi min a chi nan, amaa ma wa bu a na nyinbaan a suŋi min hali wa zinan. ¹¹Mu wara sɛmu di kina pɔɔgi min. Chenani maga mu fun a du, mu funɛ na di kin nawara mu kpak chen mak minu. ¹²Mu zim chenani a fun pɔɔgi minu awa chenani mu ya kin tiina. Mu zim chenani lɔsa fun kpak minu awa chenani mu di diwe a puŋu. Kin naa maga ya min mu zim di a mak minu. ¹³Kristo kpak o kpok ti a nyɛ min, chen ni mu zi a chem kina magau.

¹⁴O funɛ weru kinkan ma suŋi min a li mu namsi ni a chi nan. ¹⁵Ma Filipai nara, ma zimu nɛnɛ di mu funɛ te a biksi Masɛdonia nara Koosa laaboor weri ti wɛ a la saksi di mu kaali, ma duŋduŋ funɛ suŋi min nyinbaan ni. ¹⁶Mu funɛ nyɛn Tɛsalɔnika ni a daŋni kina, wuzu bilɛ bambaan ni ma fun kpa papaha a wa nyɛ min. ¹⁷Mu wara daŋni ma papaha duŋduŋnɛ. Mu daŋni chenani ma zi ya a sɔɔni Koosa tuharɛ. ¹⁸Ma papaha naa Ɛpafrodaitus fun kpa li ma wati, a mak chenani mu daŋni a kaali. Chenani ma fun ya nyɛ Koosa tuha sɔɔni kinkan. O chi Ju tim ta funɛ kpa sela a kɔɔri kɔɔra a nyɛ Koosa ni saha digi chene. ¹⁹Ma daŋni kundɔŋ, o zi lisi au a li o kidamata a naa o kpak a li Kristo ni, a suŋi ma. ²⁰Koosa naa ya ya kunyana, kpak jirima kinkan hali saha naa vɛ kpak bɔ. Ami.

Pɔɔl Mak Tɔn Nɔ Bar Nɔwa

²¹Mu zaami Koosa narau ba naa wa Kristo ya nibɛgimnɛ. Ya dɔŋtima ba naa wa min nyɛn bar nɔ, gbanko zaami mau. ²²Koosa nara ba naa nyɛn tɔhɔn nɔ ni, zaami mau. Ba naa maga la tum koorsi ta nyuhu tiina Siiza dam zen ni zaami mau kinkan.

²³Ya kunyan Yesu Kristo suŋi ma maga.